رواية أعد لي هويتي الفصل الثالث والعشرون 23 - بقلم ss4a4ss

البـــــارت الثالث والعشــــــــرون
0000000000000000
لا أفتح بابي للغرباء
لا أعرف أحدا
فالباب الصامت نقطة ضوء في عيني
أو ظلمة ليل أو سجان
فالدنيا حولي أبواب
لكن السجن بلا قضبان

فاروق
0000000
ام مشاري : يمه عهود قومي معي خلنا نروح لاختك بالمستشفى بتطلع اليوم لبيتها ..
عهود بتعب : يمه والله تعبانه ..
ام مشاري : اسم الله عليك من التعب يامك اليوم اختك بتروح لبيتها الجديد والبيت مو مرتب على كلام طلال وتبينا نرتبه قبل لا تسكنه .. وتعرفين اليوم بتطلع والبيت معفس ..
عهود : طيب طيب بروح معاك ..
ام مشاري : عهود يوجعك شي ..؟
عهود ترفع راسها لامها وهي لابسه بجايم : مافيني شي يالغاليه فديتك بس تعب شوي وبيروح ..
ام مشاري : انتي ما اكلتي شي قومي خلي الخدامه تحط لك كوب شاهي على الاقل ..
عهود : والله مالي مشتهيه شي ..
ام مشاري تجلس جنبها : عهود انا اعرفك لا تمثلين انك بخير وجهك تعبان عارفه وش الي يوجع قلبك ياروح امك بس لا تخلينهم يفرحون وانتي اللي تتضايقين ..
من غير شعور عهود حطت اصابع يدها على فم امها بهدوء : تكفين يمه لا تكملين ترا اللي فيني يكفيني ..
ام مشاري : يعني للحين ماشبعتي بكي ..
عهود وعيونها على الباب : للحين انتظره يجي ..
ام مشاري : لا تنتظرينه ياعهود مشعل ماهو راجع ..
عهود : .......
ام مشاري تمسكها عند اكتافها : قومي قومي ياعهود وضيعي وقتك عند اختك واعيالها يعل وعسى ترتاحين وتشيلين هالمشعل من راسك ..
عهود : هذاني قايمه فديتك ..
ام مشاري : الله يوفقك بواحد امه داعيتله بالتوفيق والزوجه الصالحه ..
عهود بابتسامه باهته : ههههه ماعاد ابي اتزوج يا يمه ..
ام مشاري : لا ان شاءالله بتتزوجين ذاك الرجال اللي كل الرجاجيل تمدحه ويجلس الخبل مشعل ياخذ اردى الحريم ..
عهود تضحك على كلام امها وهي مسنده نفسها على الكنبه ..
ام مشاري : ايه اذحكي ولا تشيلين في بالك مشيعل اللي باعك انتي الف واحد يبغاك لا تنسين الف من خطبك ولانتي خسرانه هو الخسران يابعدي ..
عهود : يمه خلاص
ام مشاري : لا تشيلين بخاطرك ياعهود خلاص ردي عهود اللي اعرفها اللي تزعجني بحنتها وتوقف ببلعومي لما تبغى حاجه ..
عهود : والله يايمه ماعرفتك قبل تشتكين مني والحين مو عاجبتك حالتي ..
ام مشاري : الا تعجبيني بعفويتك انتي كذا منتي عهود اصحي ياعهود اصحي ..
عهود تقرب من امها وتبوس راسها : فديتك يالغاليه خلاص برجع مثل ما تحبين ..
ام مشاري : يافديتك يالله قومي اكلي لك كم لقمه واشربي شي وبعدها البسي نروح لبيت اختك وبعدها نمشي لاختك بالمستشفى ..
عهود : بجد فرحانه ببيت جواهر واخيرا بتجتمع بـ طلال بجد تحبه والمسكينه طول وقت افراقه ما تنام والدموع تسيل عليها وما تبين عليها واخيرا الله هدااه لها بس قهرتني عمتي ام ضاري بجد كلامها جارح لي ..
ام مشاري : خليها واكسبي ثواب بسكوتك علشان ما تغلطي على الكبير يابنتي خليها كل واحد يحاسب بنيته ..
عهود : الله يستر على جواهر ويسسسسعدها يارب بجد ربي لا تخرب فرحتها ويسعدهم يارب ..
ام مشاري : امين يارب والعايده لك انتي وعنود تصحى وتقوم بالسلامه يارب يشفيها وتقوم من غيبوبتها ..
عهود : يارب تصحى يارب وتقوم بالسلامه بجد وحشتني العنود فقدت لهجتها وتكسيرها بالكلام ..
ام مشاري : وش رايك بعد ما ننظف البيت نروح نزورها بعد ما نرجع من جواهر واعيالها ..
عهود : ماعندي مانع ..
الا يدخل مشاري وغدير ..: السلام عليكم
ام مشاري : وعليكم السلام والرحمه ..هلا وغلا بولدي مشاري ..
عهود : وعليكم السلام والرحمه ..
مشاري يقرب من امه ويبوس راسها : هلا فيك والله يحيك ..
غدير : اشلونك يا عمه وش اخبارك ..
ام مشاري : الحمدلله يالغالين دامكم بخير انا بخير ..
غدير : اشلونها جواهر اليوم عساها زينه ..
ام مشاري : الحمدلله اليوم احسن وبتطلع لبيتها ..
مشاري : ماءشالله الله يبارك لها فيه ...
غدير: تستاهل جواهر من يفرح لها ..
ام مشاري بفرحه : والله يتمم عليكم وربي لا يغير عليكم ..
غدير : اللهم امين يارب تسلمين ياعمه ..
عهود : وش اخبار امك اليوم ..
غدير : الحمدلله تمام ..
ام مشاري : رحت لها البارحه والحمدلله احسن من قبل ..
غدير : الحمدلله ..
مشاري : عهود وش رايك تروحين معنا ..
عهود : وين اروح معكم ..؟
مشاري : بنروح لسوق نشتري هدية لجواهر لبيتها ..
عهود : ههههه ابد تسلم ياخوي لكني بروح مع امي ارتب بيت جواهر الله لا يحوسها ..
غدير : اللهم امين ويتمم عليها ويفرحها بجد اصبرت وتستاهل ام جهاد ..
عهود : هههههههه تصدقين للحين ماعرف منهو الكبير جهاد او اياد ..؟
ام مشاري : يادفع البلا ام جهاد ..
عهود : لو مسميته معاذ حلو يالبيه اموت بالاسم هذا ..
مشاري : وش طرى عليك اسم معاذ ..
عهود : ههههههه في روايه لا تفهمني غلط ..
مشاري : على بالي لو يسمك عمر وعثمان ليقطعونك ..
عهود : وينهم لي ايام ما لهم لا حس ولا خبر ..
مشاري : لاهين بالدراسه ..
عهود تنزل راسها : اممم ..
مشاري : ومتى تبين اسوي اوراقك ..
عهود : ابوي كلمك ..!!
مشاري : ايه البارحه كلمني وقالي اسجلك اليوم بس بعد ما اخلص السوق من المدام وبعدها اسويها لك ..
عهود : هههه طيب على راحتك ماني مستعجله ..
مشاري : طيب ( يتلفت على غدير ) ما ودك نمشي ..
غدير : على راحتك ( وتلتفت لعمتها ) في خاطرك شي ياعمه اجيبه لك من السوق ..؟
ام مشاري : ابد ما ابي الا سلامتكم ..
مشاري : يالله فمان الله يالغاليه ..
ام مشاري : الله يحفظكم يالغالين ..
تبتسم غدير وتطلع مع زوجها ..
عهود : بقوم البس وخلص تبين شي يالغاليه ..
ام مشاري : ابد سلامتك ياقلبي ..
تقوم عهود وتروح لغرفتها تطلع ملابسها وتلبس وتتكحل وتتعطر من عطر ترش ولما خلصت اخذت تلفونها من الشحن اللي من البارحه عليه ... افتحته تبي تتصل على جواهر اختها بتقول وش تبي علشان بتزورها .. الا تلقى مسجين قالت بينها وبين نفسها من بيكون يعني اكيد واحد من اخوانها والا ابوها تركت الجوال بشنطتها والبست عبايتها وانزلت تحت وفي قلبها يقول لا تفتحينها ياعهود ويعورك قلبك اكثر لاهو مشعل ولا نوف اكيد هذي مسجات الشركه .. وتنزل تحت لين اوصلت اخر سلم وابتسمت لامها وطلعت معها للسياره ..
وهي تشوف الدريشه وتفكر في كلام نوف وما توقعت انه نوف الي اعز من اغلى اخت بالدنيا ما تصدقها تتذكر لما طاحت العهود بعد ضرب ابوها اتصلت عليها عهود وتتوسل عليها انها تشهد انها بريئه ولا عمرها طلعت بشقق شباب .. وكان ردها ..
نوف : عهود انتي طلعتي حتى ما خبرتيني انتي صدمتيني كيف تبغيني اشهد وانا انصدمت يك اليوم كل يوم تروحين معي صح بس وش دراني انك تروحين شقق انا وانتي مو كل يوم نروح مع بعض الا احيانا ..
عهود : نوف انتي تعرفين كل شي عني تعرفين كل شي وتعرفين انا وشهووو انا لو خربانه كان عرفتي معدني من قبل ..
نوف : صدمتيني يا عهود ما توقعت انك بالشقه لو علمتيني كان ما خليت اخوي مشعل يتبعك ويشوف بعينه يعني انتي غلطي يا عهود ليه ما تعترفين ..
عهود : انا رحت وانتي تعرفين نجلا اللي جتني وقالت لي ابيك بكلمة راس .. هي من قالت لي هي اللي قالت انه مشعل عنده بنات الحين وروحي شوفي شقته وعطتني الكرت والعنوان ما صدقتها وخليت الامر كله وانتبهت على كلامها لما قالت تتزوجينه قبل لا تبتلشين فيه مع رفايقه ..
تقاطعها نوف : وانتي صدقتيها يا عهود ...
عهود : ما صدقتها وربي بس اقنعتني ..
نوف : ما يبرر ياعهود والله ما يبرر بالموقف اللي شفته لا تلوميني المنظر اللي شفته فيك وانتي بلا ملابس خلاني ما اثق فيك كيف تسلمين نفسك بهذي السهوله ..
عهود بصياااح وتوسل : نوووف اذا انتي ما صدقتيني من بيصدقني تكفين قوليهم اني ما عمري رحت من قبل قولي لهم انا وشهووو
نوف : للاسف الانسان تنصدم فيه بعد العمر لا تلومين اخوي لما يطلقك الانه ما يحب زوجته تصير بكل لسان وبكل صوره ينقلونها الشباب ..
عهود بصوت اعلى ودموووع : نووووف احترمي نفسك انا اشرف من الشرف
نوف : بعد العرا اللي شافك وانتي بالشارع مفصخه تبغينه لك لا يا عهود الغلط كله راكبك محدن قال لك روحي لشقققققه ..

تهزها كلمه وتطيح دمعتها ..
ام مشاري : عهود ..
عهود تمسح دمعتها قبل لا تلاحظ امها ووجهها على الدريشه ماحركته : هلا
ام مشاري : وش قالت جواهر تبي اغراض ..؟
عهود : اها ايه تذكرت بتصل عليها ..
ام مشاري : وليه ما اتصلتي ؟؟
عهود تمسك شنطتها وتطلع تلفونها وتمسح دمعتها ع لشان ما تلاحظ امها .. وتبي تتصل الا المسج ينفتح ..
المرسل : نوف 2
سامحيني واعذريني ما بقى لك شي عندي
في أمان الله روحـــي ربـي يسهل دروبك
شيلي حزنك و الفرح ولعالم النسيان شدي
بصراحة أعترف لك ابتدى فيني غروبك

العهود : منصدمه .. وتكرر الاسم والمسج وتحط يدها بفمها ما تبي تشهق وتفضح اسمه ..
((وتفتح المسج الثاني : المرسل نوف 2
العهود اتمنى ما ترسلين لي انا خطبت وبتزوج قريب واللي بيننا انتها والله يستر عليك ...
ويرزقك بواحد احسن مني .. مع تحيات الزوج الي صانك وللاسف خذلتيه ...))

عهود بشهقه اااااااه ااااااااااااااه ..
ام مشاري منصدمه وتمسك بنتها وتهزها : عهود عهود يمه وش فيك ..
عهود من غير شعور تطيح على امها وتمسك طرف عبايتها وتبكي وتنوووح ..
ام مشاري تهزها اكثر وترفع صوتها : عهود وش فيك عهود وش فيك تبكين تكلمي ..
عهود ما قدرت تتكلم خلاص تبي تتكلم ما قدرت حست اكتمت كثثثير خلاص بعد رسالته هذي صحتها وخلتها تسكر كل البيباان له جلست تبكي وتبكي وهي ماسكه التلفون وتصيييح .. ام مشاري تاخذ منها التلفون وتقرا المسج وتفهم السالفه وقلبها طلع من مكانها لما فهمت وش صاير انه بنتها مصدووومه ومحترقه بداخلها ..
ام مشاري : الحمدلله والشكر تبكين علشانه خلاص قلت لك باااعك باعك وتزوج ليه تعذبين قلبك عليه وتحرقينه تتوقعين بيرد لك لا ياعهود اصحي هو باعك لا تحبينه خلاص انسسسيه ياقلب امك وتضم بنتها اكثر واكثر واكثر وعهود بين صدر امها تنوح : احبه احبه والله اول حب بحياتي ما اقدر يمه والله ما اقدر انسااااه ..
ام مشاري : دوووسيه لا تخلينه يدمر قلبك دووسيه يا يمه
عهود تشهق : اشلون قلبي ماهو مثل قلبه كيف هانت عليه كيف قدر يبعدني عنه ..
ام مشاري : اووووص اوووص لا تتعبين نفسك اسكتي ولا تفكرين فيه ارتاحي انتي من البارحه ما نمتي اكيد كل تفكيرك عليه والله ما يستاهل تتعبين عمرك عليه ..
تنام على ارجول امها بالسياره والسايق يسوق وامها تحط يدها على جبهتها وتسرح العهود وهي تشهق ..
000000
يدخل عليها بالجناحها وبيده باكيه ورد وهديه بسسسيطه وعصير..
يدخل بشويش وهو يشوف محبوبته وملكة قلبه نايمه بسريرها الابيض يقرب من السرير بخفه ..
ويشوف عيونها نايمه وشكلها تعبان ومعه الهديه يحطها جنبها بالسرير والعصير يحطه لها بالطاوله المقابله لها .والورد معه وعليه كرت .. من محبوبك اللي سحرتيه " طلال "
يقرب منها مبسسوط ويقرب لخدها ويبووسه بشوي شوي .. وللحين ما قامت ولا حسست ببوسته .. وراح للخد الثاني وطبع بوسه خفيفه ..
جواهر بنعاس : طلال ..
طلال : ياصباح النور والفل والياسمين ..
جواهر : هههه ياصباح مثل راعيه ..
طلال : يعني حلو والا شين .؟
جواهر : الا الزين وفوق الزين يابعدي ..
طلال : الحمدلله اخبارك اليوم ي حبي .؟
جواهر : الحمدلله احسن ..
طلال : عسى العمليه ما توجعك ؟
جواهر : للحين غرزها توجع ..
طلال : مشتاق لك ..
جواهر بخجل : وانا اكثر ..
طلال : من قلبك ياجواهر ..
جواهر : من قلبي وروحي وكلي ..
طلال يقرب منها اكثر : اااه عذبتيني ببعادك ..
جواهر : ابعد تراك توجعني بقربك ..
طلال : مافيني صبر ابيك ببيتك علشان اضمك حيييل مشتاق لريختك وصوتك وكلك ..
جواهر : ههههه ياويلي ويلاه منك ..
طلال : والله لخليك ترقصين من الفرحه وما اخليك تبكين بسبابي ..
جواهر : والله يقدرني على سعادك يارب ..
طلال : اووص لا تقولين انتي ماخليتي لي بالسعاده مكان يكفي انك رجعتي لقلبي لمحلك لمكانك لديرتك وش اقول كل شي ماعاد يستوعبني من اشوفك ..
جواهر : اسم الله عليك يابعدي وقلبي وروحي ..
طلال :يسرح بعيونها : تتدرين اني اتعذب ب عيونك ..؟
جواهر تنزل عيونها خجل : طلول ..
طلال : يـ روحه وعمره ..
جواهر : اسم الله عليهم وش فيك ..
طلال : تصدقين احس مرات اصدق كلام امي اني مسحور منك ..
جواهر بصدمه : وشهووو ...
طلال : وش سويتي فيني ياجواهر حبك عذبني ..
جواهر : هههه امك تقول انه سحر ..
طلال : ما اظن انه سحر هذا بلا عيونك ..
جواهر : ما تدري انه حبنا من صغرنا حبنا ياطلول مستحيل احد يشيله من قلوبنا ..
طلال : ما يحتاج تعلمني ياجواهر امي من النار الي فيها تقوله .. امس جتني هند تقول اخوها بيجي اليوم وانصدموا بالبيت الي شريته لك..
جواهر : خبرتهم ..
طلال : ايه امس
جواهر : وامك وش ردت فعلها .
طلال : خليك من ردت فعل امي
جواهر : وهند بتسكن معاي ..!!!
طلال : هند بيجيها اخوها ..
جواهر بخوف من الجواب : بطلقها ..؟..
طلال : وش تبين انتي وانا انفذه ..
جواهر : انت اللي تبي سوا
طلال يتنهد تنهيده حاره : القلب ما يسكنه شخصين يا جواهر ..
جواهر : يعني انا بس اللي بقلبك ..
طلال : اكذب عليك ان قلت لك صرتي مثل غلا امي ..
جواهر : ما كنت ادري بغلاي بهذا الكبر ..
طلال : لا ياجواهر ما توقعت انك ما تتدرين انتي اكثر وحده المفروض ما تخليني صحيح عتبت عليك وكنت بصدق كلامهم وخليك بس قلبي دايما يجبرني عليك انتي بالذات ..
جواهر : ما قسيت عليك الا من فعايل يديك والا انت بدنيتي شي ثاني ..
طلال : والحين ؟
جواهر : ما ابيك تسال ابيك تدخله وتشوف بنفسك غلاك وينه ..
طلال : قولي لي ..
جواهر : ما يكفيه كلام ولا يكفيه شي يجازيك على حبك ما اقدر اقول الا انا بعدك ماني انسانه مافيني الا جسد من غير روح ..
طلال : قسيتي علي كثير ..
جواهر : يحق لك تعاتبني لكن كل قسوة اقسيها عليك كنت توجعني وأتعذب كثيييير بس اسمها وطريقت عرسك كانت تخليني اقسى اكثر ..اماانه لا تلومني الاني ما احب احد يشاركني بقلبك قل عني انانيه قل عني أي شي بس انا احبك والله احبك ..
طلال : وانا احبك يانور عيوني ..
جواهر : شفت جهاد واياد ..
طلال : بشوفهم لما نطلع ..
جواهر : شغتهم بالبارحه ..
طلال : ههههه واحد يشبهني والثاني يشيهك ..
جواهر : ابيهم كلهم يشبهونك بكل شي الطيبه والحب اللي تملكه تقسمه عليهم ..
طلال يقرب منها لين ضمها لصدره : بتنورين بيتك الليله ..
جواهر بخجل : وبينور فيك ..
طلال : لو تشوفين بيتك بيعجبك عاد تصميمي وانا متاكد انه تصميمي بيعجبك ..
جواهر : سوالف لي عنه ..
طلال : لالا بتشوفينه احسن ماعرف اوصف ..
جواهر : بس شوي كلمني عنه ..
طلال : مشكلتتي ما اقدر ارفض لك طلب .الخخخ الخخخ
وجلس يقول لها الالوان وكم غرفه وسوالف وضحك ويعطيها العصير ويعطيها كرت الورد اللي لما قرته استحت .. وحمرت خدوها وهو يكمل لها وصف البيت ...

000000000000000000
ناصر والدكتور مصطفى عند العنود ..

ناصر بلا شعور مسك يدينها وهو يشوف عيون الدكتور مصطفى وهو يفحص النبض والاوكسجين ..
الا ينصدم بالبيد الي تسمككه .. ويشوف عيونها الا وهي تنفتح بشويش بس من اللمبى وقوة الضوى يالله تفتح عيونها ..
د مصطفى : الحمدلله على سلامتك يابنتي .
ناصر يكلمها بالانقلييزي : أنود هل انتي بخير ..
د مصطفى مستغرب من ليه كلمها بالانقليزي : انته بتكلمها بالانقلش لييه ..
ناصر : ماتعرف عربي يادكتور ..
د مصطفى : ايه ده ابوها سعودي ؟
ناصر : بعدين اوضح لك السالفه الحين قلي وش حالتها ..( وعيونه ما طاحت من عيون العنود)
مصطفى : الحمدلله الحين صحت من الغيبوبه والحمدلله له الشكر والمنه ..
ناصر : الحمدلله الحمدلله انا لازم ابشر اهلها ..
مصطفى : استنا سيبها ترتاح ولازم نعمل لها تدليك طبيعي بعد الشهرين اللي مرت دي عوزه شويت صبر واليوم بتتعب..
ناصر يشوف عيونها كيف تفتحهم وتسكرهم ويقرب منها ويكلمها : أنود انا بجانبك انا ناصر اجيبي لي باصبعك هذا ..اضغطي عليه ..
العنود يالله تحرك الاصبع اللي اشر عليه ناصر ..
ناصر يبتسم : انتي بخير لا تخافي انا بجانبك واهلك بجانبك ..
العنود تشوف عيون ناصر وما تقدر تتكلم الانه الانبوب ببلعومها للحين ..
ناصر : لا تتعبي نفسك اكثر انتي فقد ارتاحي وغدا ستكونين بخير ..
العنود تاشر باصبعها وما فهمها ناصر : ماذا تريدين ؟
العنود تاشر وهم ما فهم ..
ناصر : اهلك ؟؟
العنود تضغط على ابهامها ..
ناصر : اوكيه سوف ابلغهم هل انتي مشتاقه لوالدتك .؟
العنود دمعة عيوها ؟..
ناصر : تكون بجانبك فهي كل يوم تاتي هنا وتقرا لك قران وتخرج وعينيها متفجره من الدمووع .. الان الساعه 10 صباحا سياتون بالتاكيد لا تخافي ولكن انتي ارتاحي ..
مصطفى : لازم نعطيها بروفين ..
ناصر : لا هنا وخلاص مافيه ادويه مهدئ ..
مصطفى : طب ليه ؟
ناصر : الحين انت خرجت من علاجها الجسدي النفسي خله لي ..
مصطفى : بئى انت مش عوزني اشاركك بالحاله ..
ناصر بضحكه : انت ماتعرفش يادكتور دي الحاله روايه فصولها كثيره معي ..
مصطفى : الله الله وبئينا عشاق ..
ناصر بضحكه : لا تفهمني ..
الا يقاطعه مصطفى : دانا فهمك اوي من كترت أقلوسك هنا ..
ناصر بضحكه : طيب هذا سر ولا تخبر فيه احد ..
مصطفى : بئى تخبي عليه ياولد دانا ائرى عيونك قبل ما تتكلمش ..
ناصر بضحكه : طيب استر لا يذبحنا ابوها ..
مصطفى : طب ليه دانتا تحبها تقوزها ..
ناصر يشوف عيون العنود : لو تعرف عربي بس حست بمشاعري لها ..
مصطفى : بئى رد عليه ليه ما يقوزك بيها ..
ناصر يتنهد : دكتور االسالفه كبيره ما ابغى اعور راسي فيها بتصل على اهلها وانت شف الحاله ..
مصطفى فهمه : طيب طيب ..
ناصر يمسك تلفونه ويتصل على عادل اللي كان مع انس بالعمليات .. ومارد عليه الانه مشغول ..
اتصل 6 مرات واستغرب عدم رد ابو مشاري ..
وترك جوله وراح للعنود اللي فاتحه عيونها بتعب وتنتضر امها .. وما بقى بالغرفه غيرهم ..
يقرب منها ناصر ويمسك يدها بحنان ..

ويقول لها : انا سعيد جدا بانك بخير يا أنود لا تصدقي مقدار السعاده بنجاتك حيه انا حقا فرح للغايه .. ليس لانجازي العلمي بل الانك على قيد الحياة سوف أعيد الامل بداخلك ارجوك لا تياسي .. لا اريدك ان تحزني .. كثيرا ما قلت لكيِ لا تنهاري حقا لا اعرف ما مقدار الصدمه التي اتت بك الى هنا ولكن الذي اعلمه بانك تصعبتي الواقع التي عشتيه ووجدي الفرق ..
العنود تشوفه من غير ما تتكلم وتلمس يديه باصابعها ..
ناصر : عنود والديك يحبونك انهم دائما هنا لا يفارقونك .. قبل يومين اختك الكبرى وضعت مولودان وهذا ما جعل والداك يغبون عنك اليوم .. ارجوك لا اريد أي عتاب بقلبك او أي تفكير بفقدانهم ..
العنود تبتسم وهي تتذكر جواهر وبطنها الكبير ..
ناصر لاحظ ابتسامتها : اظن انك تذكرتيها ..
العنود ترمش بعيونها اكثر ..
ناصر : فالاكيد هي تحبك ..
العنود : .....
ناصر : العنود اريدك دوما ان تبتسمي فالابتسامه تجعل وجهك جميل جدا ..
العنود حست بتنام ولا لاحظت اخر كلام قاله ..
عرف انها نامت تامل بوجها شوي الا والجواله يتصل ..
ناصر : الوو..
عادل : هلا ناصر العنود صاير فيها شي متصل علي 6 مرات ..
ناصر بابتسامه : ابد يابو مشاري حبيت اطمنك انه العنود صحت والحمدلله
عادل بفرحه : انت من جدك اللي تقوله
ناصر : ايه يابو مشاري وتقدر تشوفها اذا تبي
عادل : وشلونها عساها تتكلم
ناصر : للحين الجهاز التنفس والبلعوم عليها بس الدكتور ساعه ونشيله عنها
عادل : انا جايكم ..
ناصر : ما عليك امر يا ابو مشاري خل ام مشاري تجي معاك ..
عادل : طيب بقول لها بس لحظه ناصر العنود صاحيه الحين ؟؟
ناصر : صحت والحين قدامي نايمه وما تفكر الا بامها ..
عادل : الله يطمنك ..
ناصر : ويطمنك ان شاءالله في بنتك ..
عادل : امين يارب ارخص لي الحين مستعجل وتوني طالع من العمليات ..
ناصر : الله يعينك . وفمان الله
عادل : مع السلامه ..
0000000

ام ضاري : اقول لك ما تروحين ..
هند : خلاص ياعمه الرجال ما يبيني يقولي تبين تروحين روحي ..
ام ضاري : لا تخلينه يتهنى فيها هذي ساحرته ..
هند : اخوي داخل الرياض وبياخذني ما اقدر اجلس ثواني معه ياعمه ذبحني ذبحني بهجره وحبه لها ..
ام ضاري : هند لا تصيرين خبله وتاخذه منك ..
هند : هو ما يبيني قلبه معها وليه اجلس علشان احرها الا هي اللي اقهرتني اخذت بيت لها وجلست معه وانا بجلس هنا ولا بيوريني وجهه ابد ..
ام ضاري : الله يهديه ان شاءالله ..
هند : صبرت سنه ونص وللحين ما هدى ربي ولا يبي اعيال والله ياعما انه مافيني شي بس هو ما ما ما نزلت راسها ..
ام ضاري : وش فيك سكتي ..
هند : الرجال مايبي مني اعيال ياعمه والله ما يبي والا هو يقدر بس مايبيني ام لعياله بالعربي ما اخذني الا عشانك تكفين ياعمه خليني اشوف نصيبي دامه تركني انا بروح..
ام ضاري : تكفين ياهند لا تروحين علشان خاطري ياعمتك ذي ساحرته وبكره بنفك السحر واعلمك فيها وافضحها عند الخلق كلهم ...
هند : مافيني صببر ..
ام ضاري : طيب اجلسي بخليه يسكنك معها بالبيت ..
هند : عمه لا تحاولين انا رجعه ماراح ارجع وبعلم ابوي بكل شي ..
ام ضاري : تكفين لا تخربين علاقتي مع ابوك ياهند لا تخلين حياتك مع طلال تخرب اللي بيني وبين اخوي
هند : والله تحملي ياعمه انا ما قلت لك اخذيني علشان اولدك وانتي تعرفين اولدك يحبها قبل لا اجيكم ..وانه راضي على زوجته وعلى اللي فيها ..
ام ضاري : هند الله يسماحك تقولين لعمتك كذا هذا وانا اللي عطيتك فلذت كبدي وتمنيته لك لكن انتي ماتعرفين اشلون تمسكينه ..
هند : اصلا طلال ما يبيني وامس ذبحني بكلامه ولا اقدر اصبر ثواني اعيش مذلولوه معه
تكفين ياعمه اذا تحبيني لا تخليني اقعد معه والله مصيري بيروح كله ببلاش ,,
ام ضاري : هذا اخر كلام عندك يا هند ..
هند : الله يوفقه باعياله وفي حرمته وسامحيني ياعمه وهذا اخر شي عندي ولا اني متحسفه عليه ..
ام ضاري : وابوك وش بتقولين له ؟
هند : حظ ونصيب وما كتب ربي نستمر ..
ام ضاري : ابوك مابيقتنع ..
هند : لا تخافين ماراح اقول له الا اللي يسرك وانتي ما جا منك شي كل اللي تبينه مصلحتي لكن ما كتب لي الله نصيب معه او يحبني لكن انا حبيته وندمت على حبي له ..
ام ضاري : الله يهديه عليك ..
هند : لا ياعمه لا تقولينها انا الله يرزقي وهو الله يوفقه ..
الا تلفون اخوها .
هند : انت برا يالله بجيك ..
ام ضاري : بسلم عليه ..
هند تشيل اغراضها وعمتها وراها تتحسر على افراق بنت اخوها وطلاق ولدها لها .. وانها كانت تبي لها الخير وصار عكس ما توقعته وندمت في يوم انها دخلتها في مشكله بينها وبين اخوها ..

تدخل هند السياره بعد ما سلمت على عمتها وودعتها وقالت هالابيات وهي تشوف البيت ..
شف كلهم ودعوني مابقى غيرك
محتاج أودعك.. ياليت تودعني

تركب السياره وكلها حزن ودموع مكبوته ودها لو يتصل بالغلط ويوقول اجلسي خلاص برضيك باللي يرضيبك .. لكن ماباليد حيله الصوت تعب وهو ينادي وهو ما يستجيب لصرخاتي ..
تودع الرياض بكبرها متوجهه لشمال ..تاركه حبها وذكرياتها القديمه على هذي التربة الساكنه البليده ..

00000
ام مشاري وهي ترتب البيت وتكنسه وتنادي العهود تنظف هنا الانه ما زال الترتيب الكنبات غير مرتب والاكسسورات اللي جابهم طلال للحين بصناديقها الانه البيت منضف كله بس باقي الترتيب وعهود وامها للحين يرتبون ..
اتصل ابو مشاري .. عهود بصوت عالي : يمه ابوي يتصل ...
ام مشاري : ردي عليه قوليله امي مشغوله تشتغل ببيت جواهر ..
العهود : طيب طيب
تمسك السماعه وترد على اوبوها ..
عادل : الو ..
عهود : هلا والله يبه ..
عادل : وين امك بسرعه ..
عهود : يبه امي تشتغل بالبيت تبي شي ..
عادل : عطينيااها ابيها بسرعه ..
عهود استغربت نبرت ابوها حيل سريعه وخافت وتركض لامها : يمه يمه ابوي يبغاك ..
ام مشاري تمسك السماعه وتكلمه : الله يهديك ياعادل تعرف اني اشتغل وش الموضوع اللي تبيني فيه ,,
ابو مشاري : البشاااره العنود صحت ..
ام مشاري بصدمه : هاااا وش قلت ؟؟
ابو مشاري : والله توه يعلمني ناصر والحين بمرك واخذك ..
ام مشاري : انت تتكلم جد يعني فتحت ..
عهود من وراء السماعه : من اللي فتحت يما ؟؟
ام مشاري : العنود صحت ..
ابو مشاري : ايه والله صحت يا ميثه يالله البسي عبايتك تراني جايك بالطريق يقول انها تسال عنكم ..
ميثه : عز الله اني كل صبح عندها بس من اولدت جواهر يابعد عيني ما جيتها افقدتني وصحت ..
عهود : ووالله جد احلى خبر والله هالاسبوع ولادة جواهر وصحوة العنود ..
ميثه : الحمدلله يارب الحمدلله يارب نذرن علي يا عادل اني لاذبح خروفين واوزعهم ..
عادل بفرحه : ولك اللي تبين ..
ميثه : قولي ياعادل فيها شي تشتكي من شي ..
عادل : مارحت لها بس يقول انها بخير وفاقدتهم ..
ميثه : هذاني بترك البيت وبروح معاك ..
عادل : يالله اطلعوا على ما اوصل البيت ..
ميثه : طيب طيب بدور عبايتي والبسها .. وتغفل الخط من غير ما تودعه ويضحك عادل على تصرفها وفرحتها لقومة بنتها

ميثه: عهود عجلي جيبي عبايتي والبسي بنروح لها ..
عهود بيدها العبايات : من سمعتك قلتي صحت وانه ابوي بيمرك قلت خلاص بجيب عبايتك وهذاني جبتها ..
ميثه : الحمدلله واخيرا صحت والله انه قلبي كان يوجعني عليها
الا يسمعون هرن السياره ( بي بي بييب ...)
ويغفلون البيت ويطلعون لابو مشاري ..

بالمستشفى ...
حول العنود امها على يمينها وابوها على يسارها وجالسه اقبالها اختها العهود وعمر وعثمان ومشاري وغدير كلهم حولها .. والحمدلله الاوكسجين شالوه وهي تشوفهم وفرحاانه بشوفتهم تمسك يدين امها وتفرح وتشوف عهود وتسرح فيها .. وتبتسم ..
العهود تقرب منها : اطمئني انا بخير لا تتدعي الخوف يدخل قلبك ..
العهود تمد يدها لاختها ويقوم ابو مشاري ويخلي العهود تجلس عند اختها ..
ويفرح ابو مشاري بلمت بناته وانهم بخير بعد ما احس انه عذبهم معه ..
عمر : انود لا نريد التحدث معك بالانقليزيه يجب ان تتعلمي من الان الحديث ..
عثمان : من الحين تقسي عليها اصبر خلها ترتاح البنت ..
عمر : ياخي وش عليك انت الةاحد ما يضحك مع اخته ..
ميثه تضحك : الله يهديكم ..
غدير تقرب من العنود : فرحنا باتمام الله لك عافيتك ..
العنود تهز رقبتها :....
ميثه : الحمدلله على سلامتك ياقلب امك .. العنود تشوفها ولا فاهمه شي تحس انها نست اللغه ..
عهود : امي تقول الحمدلله على سلامتك ..
ميثه : ليه خوفتيني عليك ياقلب امك ..
عهود تضحك وتشوف العنود : انها تعاتبك على اخافت قلبها ..
مييثه : وش تقولين لها ..
عهود : ابد ما قلت لها الا اللي تقولينه ..
ميثه : لا تزيدين من هرجي ..
عهود : الا بقول عكسه ..
عثمان : ياجماعه البنت تبي ترتاح لا تزدون عليها الازعاج ..
مشاري : هههههه البنت تبي جمعتنا فقدتها ..
عمر : هل تريدين العيش مع المزعجين هؤلاء صدقيني اختاريني اخ لكي وتركيهم .. فهم مزعجون للغايه ..
العنود تضحك وتبتسم تحس انها مرتاحه واخيرا اهلها حولها امها وابوها وخواتها واخوانها الشي اللي تمنت اول ما تطيح مريضه تشوفهم اقبالها ... تشوف ضحكهم وفرحتهم برجوعها .. وهي اللي تظن انها فال شين عليهم تبتسم وتسمع كلامهم اللي تفهمه واللي ما تفهمه ..
مر شخص حول الغرفه عرفته وعرفت تماتيم كلماته حست فيه يكلمها بالانقليزي كل ليله كانت تظن انه حلم بس الحلم انك ما تعيش في صوت الحقيقي .. بصوت ابع من داخله صوت يصرخ يبغاني اقوم علشانه .. كان صوت ناصر بل الدكتور ناصر ..
سرحت باسرتها وبخيالها تماتم الدكتور ناصر : ارجوكي اصحي كي تحيي معي العمر المتبقي ..
العنود احببتك لا اعلم كيف ولا تساليني لماذا .. الانك لا تشبهين من اعرف قلبك قليل من يملكه تعلقت بتصرفاتك .. استطعتي بصعوبه اختراق هذا القلب الذي تممتمه بينه وبين نفسه وعاهدها الا يحب .. ولكن اليوم سابوح لك بسر بسري الخطير انني اعشق بل احب ولكن لا استطيع البوح لها ..
هل تعلمين لماذا .. الانها ترقد بهدوء .. وانا انتظرها .. انتظرها تستفيق كي اقول لها بانني احبك ولكن للاسف لا استطيع ان اقولها الانه والدها رافض كل الرفض بان تكون لي ....
الاني ذات تجارب فاشله .. ولكن لا يعلم بانه الانسان يتعلم من تجاربه ..

كم تمنيت انك تعلمين مقدار هذا الحب انك سكنتي قلبي من الوهله الاولى لا اعرف كيف ولكن قلبي قد اعجب بك .. من غير استطاع لي اوقوه ..
فالحب ياعزيزتي كالسهم لا يستطيع ان يعطي لصاحبه الخيار الاختيار هدفه .. كالرمح ينطلق ويصيب القلب بشده ..

اسف لانني اخفيت كل مشاعري هذي المده واعلم سوف تقولين لي وتعتبين لماذا اخفيتها .. لانه بعد رفض والدك لي فقد بانني املكك مره اخرى .. ولكن وقوعك هذي المره لا تعلمين ماذا فعل بي جعلنني لا اذهب الا لك ...

ارجوك العنود ابقي لا تياسي للمرض ..

عادل : هل انتي بخير يا انود ..
العنود بابتسامه :......
ميثه : ما قال الدكتور متى تطلع ؟؟
عادل : قريب ان شالله ..

مر اسبوع .. وكان احلى اسبوع لناصر اسبوع الودااع له .. الانه العنود استردت عافيتها الصحيه .. وللحين يالله تقدر تتكلم من جفاف حلقها والحركه قليله وبتستمر بالتدليك الطبيعي بالبيت ..

ناصر يقرب من سريرها وكانت الساعه 1 بليل ...
ناصر يشوفها نايمه ويهمس بصوت خفيف : احبك وسوف افتقدك من الغد سوف تكونين ليس الا سراب تمرين وتدغدغين مشاعري بداخلي .. اتمنى ان يوافق والدك على ما اتمناااه
ومر شهر وتشفى العنود من الندليك وتسافر مع ابوها مصر وتسوي العمليه وترجع بحاله صحيه احسن من قبل بلمت اهلها وعافيتها ..
ومر شهرين وجواهر ساكنه بيتها بسعاده وفرحه مع اعيالها وزوجها ..
ومر شهر و عهود خلصت اوراقها وما بقى الا اختباراتها ...

للحديث بقيه بالاحداث المشوووقه ..بالجزززء 24 ..
للحين روايتنا ما خلصت لكن للحديث بقيه باحداث وتطورات جديده وحلوه وبعيد الحزن عنا وبعيد .. وبتكون اجزااااء مشوووفه وحلووووه . ولا فيها طبيب ولا فيها دمووع فيها اكشن وضحك وفرفشه ..
كونوا معي ولا تحرمووني منكم ياحلى اعضااااء ..
نتواصل انجال