رواية أعد لي هويتي الفصل الثاني والثلاثون 32 - بقلم ss4a4ss

البـــــــــــــارت الثاني والــــثلاثـــــون ..
00000000000000000000000

أيٌجب أنْ أموت فــي غيابكـِ إختنآقآ
لتُدرك أنَك هوائي الذي أتنفسُه..!! ? ~

00000000000000
يبدو ان هذا الصبح لا يشبه أي صباح اخر .. هنا استيقضت على صوت الاذان ينادي للصلاة .. اااه لم انم كمثل هذي الليله وكانني تناولة حبوب منومه لاول مره نومي يبدوا طبيعيا اشعر بالراحه والطمانينه وكاننها غفوه لا اريد الاستيقاض منها .. بعد رحلة الامس كنت متعبه ولم اضحك هكذا منذو زمن .. كانت غايبه بالجمال والمتعه بين ضحكات اخواتي وبين حركات اخوتي التي لا تخفيها مشاكسات الطفوله بين حناياها .. ونظرة امي المطمئنه والمبتسمه لي ... حقا استمتعت كنت الجلسه بغاية المتعه .. ركضنا وكانني طفله تعود من جديد .. انادي على اخوتي واشاكسهم وكانه الحلم الذي تمنيته طويلا قد تحقق اخيرا بتجمع اسرتي حولي ..

اغمضت جفوني وانا اتذكر السعاده على وجه كل شخص حفظة ملامحه .. ولا اريد نسيانها ضحكاتهم التي نمت وانا اتخيلها لن تختفي بوجودي لن تختفي ..
استيقضت بعد تعوذت من الشيطان الرجيم كي اقوم اتوضا واصلي .. وبعد الانتهاء من الوضوء فرشت سجادتي ولبست جلالي الصلاة وكبرت وصليت والغيت السلام الاخير .. ورفعت يداي للسما بدعاء " يا حي ياقيوم برحمتك استغيث اصلح لي شاني كله ولا تكلني الى نفسي طرفة عين "
وجلست على سجادتها تقرا بعض السور القرانيه الى حين طلوع الشمس .. وبعد الانتهاء قبلة المصحف الشريف وحطته جنب وسادتها وفتحت خزانتها طلعت لها لقنز اخضر عشبي .. وعليه بلوزه طويله للركبه اوف وايت عليهارسمت شجره باغصانها واوراق متنثره .. مشطت شعرها وحطت عليه تاج اوف وايت عليه فيونكه وفلات اخضر نفس درجة اللون .. حطت رشتين من عطر جفنشي الجديد .. وسمت باسم الله وانزلت وهي تبتسم ..

اول ما فتحت الباب غرفتها شافت ليان توها تقوم ..
العنود : صبااح الخير يا قطوه .ز
ليان : وين السنجاب ..
العنود : هههه بالحديقه تحت ..
ليان : ابي اثوفه (اشوفه )
العنود : صاحيه بدري علشانه ما كفاك امس عذبتيه بيدك ذي بغى المسكين يتشهد هههههه مسكتك قويه انتي بطله ..
ليان : هههه هو يبغى يهرب من يديني ..
العنود : يالله ننزل بهدوو
وتمسك باب غرفة جواهر وتغفل الباب بعد خروج ليان منها .. وتمسك يد ليان وينزلون ..
ليان : انا ابغى بسكويت ..
العنود بنظرات طفوله : ههه وانا ابغى عصير وابغى سوي رياضه وش رايك تنجري بالحديقه ..
ليان بفرح : نروح للسنجاب ..!!
العنود : اول شي نسوي الفطور وبعدها نسوي رياضه ونرجع ناكل وبعدها نلعب معه وش رايك ..
ليان : ما ابغى افطر ابغى العب معه ..
العنود : ذا حقي السنجاب ماراح اخليك تلعبين معه ..
العنود تجلس على اخر درجه يعنني زعلانه من ليان ..
ليان منصدمه منها : وش بك نلعب به انا وانتي صح انتي تحبييني ..
العنود تمسك يدينها وتضمها : يمااا منك انتي عياره ..
ليان : يالله نروح له قبل يقوم ويهرب ..
العنود : كيف يهرب هو بالقفص ..!!
ليان : عنوده ابغااه لي ..
العنود : لما تفطري بعدها اعطيك ايااه ..
ليان ما كملت العنود جملتها الا وهي عند باب المطبخ .. العنود تبتسم .. تتذكر عندما كانت طفله بعمرها .. كانت تبغى حليب ولا هي عارفه كيف تقوله بالانقليزي ..

العنود : ابغى حليب ..
لويس : مالذي تريدينه ..
العنود تشوفه بستغراب ...
لويس : اظن انك جائعه ياطفلتي ماري ..
تقوم العنود للثلاجه وتفتحها وتشوف الحليب لونه ابيض وتاخذه وتحطه على الطاوله ...
الى الان تتذكر ضحكات لويس .. ههههههه هل تريدين الحليب ياصغيرتي وكانك القطه الجائعه ...

تستيقض من ذاكرتها على صوت ليان ..
ليان : عنوده اناديكي ..
العنود بهمس : وش تبغين ياعيون عنوده ..
ليان : ابغى عصير ..
العنود : طيب
تفتح الثلاجه وتعطيها عصير وتسوي لها توست بالجبنه .. وتجلس بالطاوله معها وتشوف ليان كيف تاكل وتشوف كيف الطفوله هنا وهناك كلها متشابهه ولكن هنا الاختلاف اكبر بين المحبه واحضان القربون لك وبين البيئه التي خلقت بها ..
العنود سرحانه مع ليان وسوالفها وتبتسم لما تشوف البرئه بعيونها وكيف تسوالف وتاشر بيدينها مع صوتها تبتسم وتسرح وتقارن نفسها بليان .. ومره تحس بشي بداخلها قوي كثير اقوى من الطفوله ..

الا بصوت الرجولي الخشن .. : السلام عليكم
العنود تلتفت بخوف : وعليكم السلام والرحمه,,
عادل : ماشاءالله القطط صاحية من بدري ..
العنود تبتسم : ايوه جوعانين ..
عادل : وانا راجع من المسجد حبيت اجيب معي خبز تميس وفول بتاكلين اصابعك وراها ..
العنود تبتسم وكانه النور ينشق من وجهها : لا فول لا ..
عادل يبتسم : وليه لا ..
العنود : الفول ثقيل ويخلي الواحد كسول وتعبان ومخمول ..
ليان : بابا عنوده بتعطيني السنجاب ..
العنود : طيب احلمي مابعطيك طيب ..وهذا بابا حقي انتي ابوك طلال ..
ليان : لا هذا بابا الكبير صح ..بابا عادل ..
عادل : ايوه صح .. وانا بشتري لك سنجاب ثاني كبير احلى من ذا ..
ليان : متى ذا الحين ..
عادل يضحك : وكل شي تبغينه ذا الحين .؟؟
العنود : يبه ..
عادل يلتفت لها : هلا ياعيون ابيك ..
العنود : تبغى قهوة فديتك ..
عادل : ههههه وتعرفين تصلحينها ؟
العنود : بتعلمني صح ..
عادل : وش اللي صحاك مبكر انتي وليان ..
العنود تبتسم : هههه خطط عسكريه سريه للغايه ما نخبر فيها احد صح ليان ..
ليان ما تدري وش تقول العنود بس ردت : صحح
عادل : اها يعني مخططات من ورانا ..
العنود : هههه لا فديتك انا شبعت نوم صليت وماعاد فيني نوم قلت اقوم اسوي رياضه بالساحه الخلفيه لكن لقيتها بوجهي تنتظرني تبغا السنجاب ..
عادل : هههه الله لا يحرمني ضحكاتك يارب ..
العنود تقوم من طاولة الطعام : ولا منك يالغالي ..
عادل : وين بتروحين ؟؟
العنود : بتعلمني القهوه ولا اشلون ؟؟
عادل :وش يبيلها القهوه كلها ماي وبن وبهارات قهوه وزعفران( مسمار ..(القرنفل).. وبالترمس تحطين فيها هيل ..
العنود : لالالا كذا العمليه خطيره يا دكتور بصحي امي تعلمني بطريقه اسهل واحسن ..
عادل يضحك وهو يقوم من كرسيه : شوفي وش بسوي ذا الحين وتعلمي ذا القهوه اللي يحبها كل رجال .. مو زي قهوتكم بيضه نحبها مايله للشقار وسواد احيانااا ..
العنود : وش بتسوي بذا ..
عادل : شوفي وبس ..
ليان : عنوده ابي السنجااااب ..
عنود : بعدين يا ليان بنشوف القهوه اللي يقول انها سهله وكل مقاديرها صعبه ..
عادل يبتسم ويشرح لها كل اسم وكل شغله ..
العنود : يعني القرنفل كويس لوجع الاسنان قبل ..
عادل : البدو قبل ما كان عندهم دكتور اسنان ..كانوا يستخدمون ذا القرنفل للبنج الالم ..
العنود بتعجب : شي حلو ..
عادل : وذي القهوه علاج حلو للجروح توقف الدم وتمنع تسممه ..
العنود بصدمه اكبر : ذي معلومات جديده ..طيب ليه نستخدم البرهم والدهان ..؟
عادل : الطب تطور والادويه تطورت .. وهذا زمان ..
العنود : طيب كل شي بالقهوه دوه ..
عادل : وحتى ورق الشاهي كان علاج ..
العنود بصدمه : يعني الشاهي والقهوه كلهم نشربهم فيهم علاج كيف ذي ؟؟
عادل : ورق الشاهي تسخنينه وتغمصينه بـ مويه حاره بس وبعدها تحطينها بالعين .. وتشفي سبحان الله ..
العنود باهتمام كبير : وكيف اكتشفوا ذا ؟
عادل يحط القهوه على النار .. : ههههه الله سبحانه يسخر افراد للعلم والطب والتجارب خير برهان والشي الطبيعي كله دواء وشفاء .. مو مثل هذا الوقت كله كميائي ومخلوط وامراض الدنيا جايتنا الله يكفينا شرها ..
العنود : طيب يبه ابغى افتح عياده هنا كيف ..
عادل بصدمه : عيادة؟
العنود : ايوه كلينك
عادل بضحكه عفويه : طيب ..!!
العنود : ههههه وش بك تضحك ..ابعى افتح عيادة للطب الشعبي ..
عادل : ههههههه وانتي بتدرسين الطب الشعبي ..
العنود : ههههه منها بدرس اللغه العربيه منها وبعرف هويتي اكثر بالبداوى ..
عادل : وش رايك يابوك نروح للحرم نتعمر وبعدها اوريك الحرم النبوي في المدينه بلا سوالف عياده وعوار راس نروح ناخذ لنا عمره وتهدي نفوسنا ...
العنود : بجد ودي اروح لها مره ثانيه ..
عادل : طيب بنروح بعد يومين وش رايك انتي ؟
العنود : محتاجه اروح اصلي هناك المكان هناك يشرح الصدر كثييييير ..
عادل : طيب بقول لامك تروح معنا من زمان ماراحت معنا ..
العنود : ههههه اهم شي لما اروح للحرم ودي اروح للسطح طيب بشوف العالم من الطابق الثالث ..
عادل : اتمنى يفتحونه ..

تدخل بذعر كشتها نافشه وعيونها طالعه لقدام سبع امتار وصوتها المذعور وعيونها تدور على شخص واحد : ليــــــــــــــــان وقفتي قلبي وين رحتي ..
العنود بصدمه : جواهر وش بك ؟
عادل : البنت صاحية من بدري توك تفقديها ..؟
العنود : انا اللي اسفه ما خبرتك اني اخذتها ..
جواهر تضرب ليان مع راسها : كويس كذا توقفين قلبي عليك قمت اتروش بعد ما صحيت ما لقيتها وانا متاكده قبل لا اصلي الفجر وهي بفراشها ..
عادل : شوي شوي على البنت لا تعصبي عليها
العنود تحضن : ههههههه مسكينه نفسها بسنجاب ووقفت على بابي تنتظرني اصحى علشان تستاذن تاخذه..
ليان بعيونها دمعه حايره : ماما تكفين ابي مثله ..
العنود : هو لك ياقلبي ..
جواهر : عنود انا ما ابغاها كل شي تبغااه تاخذه ..
عنود تقاطعها : انا خالتها ..
عادل : عنود خلي جواهر تربي بنتها زي ما تبغى ..
عنود تقاطعه : لكن حرام صغيره ..
جواهر : نعلمها من صغرها واذا تبغى الشي نعطيها اذا سوت شي زين نكافائها عليه ..
عنود : بس ذا الحين تبغااه ..
عادل بهمس : واذا لازم تصبر علشان تربي البنت .. الطفل مو كل حاجه بغاها نلبي له لازم نشد مره ومره نرخي شوي .. منها يتعلم الطفل مو كل ما يتمنا ياخذه الا بنفسه مو من احد ثاني ...
العنود : طيب علشان خاطري ياجواهر ابغاها تاخذه ..
جواهر : وتبغين عمر وعثمان يزعلون عليك ..
العنود : طيب انا بقولهم وهم بيتفاهمون الوضع ...
جواهر : عنوووود
العنود بزعل : طيب مالي خاطر عندك ...
جواهر بتوتر : يبا قول لها شي
عادل : جواهر خليها تاخذه هذي المره بس عشان خاطر العنود بس ..
جواهر بعدم الرضا : روحي اخذيه ...
ليان من الفرحه نطت من الفرحه وركضت للغرفة العنود تاخذه ..
العنود بابتسامه : مشكوره ياجوجو بجد ابغاك راضيه ..
جواهر : علشانك بس بس مره ثانيه لا تعطينها كل شي تبيه
عادل : اخليكم انا بروح انام
العنود بابتسامه : انتظر الموعد ..
جواهر : وين على الله .؟؟
العنود : سر بنت وابوها انتي وش تبغين ..
جواهر بعتب : الله الله اسرار بعد من ورانا ؟؟ وين وين يبه ..
عادل بضحكه : مثل ما قالت العنود سر سر .<< وطلع لغرفته ..
تمسك جواهر العنود : قوليلي يا ملسونه وين بتروحون هاااا ..
العنود : بنروح للعمره بتروحين معانا حيااك ..
جواهر : وين عبايتي بمشي من ذا الحين ..
العنود بضحكه : هههههه للحين نخطط ..
جواهر تجلس جنبها : اها تخطيط من ورانا ترا من الحين رجلي برجلك وين ما تروحين ..
العنود : هههههههه وش رايك تلصقين بعبايتي ..
جواهر : يكون احسن ..
العنود تسكت ثواني وجواهر تقوم تسوي لها قهوة تركيه ..
جواهر : العنود تبغين قهوه معي ..
العنود : اممم سوي اذا عجبتني بشربها ..
جواهر : بتعجبك ..
العنود : بنشوف مع اني احب اشرب العصير الصبح ..
جواهر : ياعيني على الصحيه ..
العنود تسكت وجواهر تغني وتغني ولاهيه بالقهوه والغنى والعنود تفكر .. اعجبتها فكرة كيف جواهر تربي بنتها يعني لو انها عايشه معهم وهي صغيره كان ربتها امها كذا .!!! الانه اكيد جواهر ما علمتها ذا الطريقه الا انها ما اخذتها من امي .. وانا كيف بربي اعيالي ههههه (تضحك بينها وبين نفسها) ..شكلي بعلمهم اشياء معقده عليهم ههه وماراح يتربون عدل ههههههه ..

جواهر : ياااهووو وش بك تضحكين بروحك ...
العنود : هههههه وش دخلك انتي انا اضحك بتدخلين بكل شي ..
جواهر : ااااه واحشني طلول كثير ..
العنود : متا بيرجع من السفر ؟
جواهر : شوي مطول
العنود:: تبغين اسفرك له ..
جواهر : بروحي موافقه بس مع اعيالي لا ..
العنود : ومن قالك تفرخينهم يا دجاجه ..
جواهر تتنهد: الحب يا عنود الحب ..ااااه
والعنود اعجبتها السالفه : وش اللي تحبين فيه ؟
جواهر : من صغرنا والحب موجود فينا ..
العنود تحط يدها على خدها وتتراكه على الطاوله : جواهر قوليلي قصتكم ..
جواهر تبتسم وتتنهد : ااه ياحلو ايامنا تخيلي اربع سنوات خاطبني وانا بزر بالمتوسط ..
العنود : بالمتوسط يعني متا ..
جواهر بالثامنن .. تخيلي حبنا بدا من الصغر بس المسكين من سمع انه صديقة امي بتخطبني لولدها هو جن جنونه لدرجه اتصل على ابوي يقوله لا تزوجها لاحد غيري انا ابيها ..
اتذكر ساعتها ابوي ابتسم وفرح الانه يبونها اعيال عمها وبالخصوص طلال ..
جواهر : اااه كانت ايام يا العنود كل مارحنا للمزارع او للبر والمخيمات وحتا بالافراح مرات اركب معهم السياره كانت عيونا ما تنزل الا من الحيا ..
العنود : وكيف حبيتيه ؟
جواهر : حبيته اممم مدري بس من فتحت عيوني عرفت اني احبه من مواقف كنا صغااار كثير كل ما رحنا فرح او لعبنا معرس وعروسه قال انا زوج جواهر .. ومن هنا حبينا بعضنا ..
العنود : بسس..
جواهر : ههههه وبس من هنا حبينا بس ما خطبني رسمي الا بثالث ثانوي الانه خاطبني خمس سنوات وكل ما جاء خطيب وقف بوجهه طلال الانه كان يسبقني بسنتين يعني على ما خلصت الثانويه كان بالجامعه .. خطبني وبعدها تزوجني وهو برابعه جامع تخيلي
العنود : واااو وش صار لكم بالخمس سنوات خطبه
جواهر : يوووو سوالف وعلوم ..
العنود تلصق جنبها قوليلي تكفين ..
جواهر : اشربي القهوه بالاول وانا اقولك ..
العنود تشرب القههوه : ها ذقتها وتجنن يالله كملي شوقتيني ..
جواهر : اممم مره من المرات كانا بالبر والخبل يبغاني اخذ صورته هههههههههه
العنود بصدمه : بجدك انتي ..
جواهر : ايه وانا من الخوف اخذت بنت خالتي شريفه تمشي معاي ومشت وبعدها قالت بتروح تصلي وانا علي عذر شرعي قلت بجلس انتظرك هنا لين تخلصي صلاتك .. وانا جالسه الا يجي بسيارته ويدور حولي وانا من الرعب ما قدرت اتحرك هههههه
العنود : ايوه ..
جحواهر : رما علي علبة شوكولاته وانا من الخوف اخذتها علشان محد يشك فيني وفتحتها وكان..داخلها اربع حبات شوكولاته ..
العنود : ايه ..
جواهر : لكن بعد في داخل العلبه صوره انصدمت فيها كانت صورته وهو وسيم ههههه
العنود : ياخطييييييره ..
جواهر تبتسم : كانت ايام حلوه ..
العنود : تحبينه حتى بعد ما تزوج عليك ؟
جواهر : طلقها ياعنود طلقها ..
العنود : حتا لو طلقها يعني رضا يتزوج عليك ..
جواهر : تسع شهور وانا عند اهلي كنت اتقطع من الداخل بس حبه عيا يتحول لكره عمري ما كرههته يا عنود احبه ومستحيل في يوك اكرهه يمكن أعاتبه يمكن في مشاكل بس كرهه صعبه هناك عشره هناك ذكريات وعمر حب انبنا فينا .. هو يحبني لكن انجبر لامه ..
العنود تسكت : ,,,,,,,
جواهر : وش بك سكتي ؟
العنود : وافكر بنفسي ..
جواهر : بـ ..؟؟
العنود : مدري بصراحه ..
جواهر : بـ ناصر ..

العنود بداخلها :اسمه فقط الذي يربكني وكاانني ابتلع حجرا كبيرا ببلعومي لا يجعلني اتكلم .. كانت عيوني تنزف شوقا له وكيف لو جاءه اسمه سهوا .. وكانه العلم يرجع للخلف فجاءه وصورته التي تتلاشا يوم بعد يوم عن الذاكرتي .. لا استطيع سوا القول انني افتقده واشتاق له وبشده .. ياللهي كم اتعبني الحنين له ...
جواهر : انا بقوم اصحي العهود واغير ليان للدوام واخليك ساكته ..
بالحقيقه العنود لا تسمع شي مما قالته جواهر كانت محيطه باالافكار والذكريات ...

000000000000000

وين أي غرفة هي ؟
هنادي : اممم غرفه 7 يمكن ..
خلود : بسال الرسبشن ..
تقرب منه وتسال : لو سمحتي بغيت الدكتوره عهود عادل ..
الموظفه الاستقبال : بعد ساعه تبدا دوامها ..
خلود تشوف ساعتها : بتتاخر اكثر من ساعه دايما ؟
الموظفه بضيق : الله اعلم بضروفها
خلود : طيب باخذ رقم ممكن ..
الموظفه :تضغط على جهاز صغير وتطللع لها رقم وتعطيه لخلود ..
هنادي : ههههه بتفرح لما تشوفني ..
خلود : ودي اشوف ذوقك ياويلك اذا شييين ..
هنادي : انتي بس شوفيها وبعدين كلميني .
خلود : الله يستر عليك من صغرك طالع لك لسان ..
هنادي : هههه طالعه زيك يا ماما ..
خلود : الا على عماتك الله يستر منك ..
وهم يسوالفون الا تمر عهود ...
هنادي : هذي هي ماما شوفيها ..
خلود وةتشوف ساعتها علشان تتاكد انها مرت ساعه وانصدمت انها جت قبل الموعد ..
تشوفها خلود كيف تسلم على الموظفات الاستقبال وكيف تبتسم وتضحك .. وثواني الا وجها يوضح لخلود ..
خلود من غير شعور : ماشاءالله الا اله الا الله تبارك الرحمن ..
عهود انتبهت لذكر الله واستغربت وهي تقطع حديثها مع الموظفات ..
عهود تسال الموظفات : من ذي ؟
الموظفه : توها تجي تسال عنك وقلت لها بعد ساعه بتحضر الدكتوره عهود ..
عهود ما انتبهت لهنادي .: اها يمكن مريضه ..يالله اخليكم ..
الموظفه : الله معاك ..
تتوجهه عهود بوجها البشوش لغرفتها الا توقف بطريقها خلوود : السلام عليكم دكتوره عهود ..
عهود وعلامات التعجب بوجهها : هلا امريني اختي ..؟
خلود : ماشاءالله تبارك الرحمن اشهدنه بنتي ما كذبتها عينها ..
عهود بتعجب اكثر : عفووا ..
هنادي :تتذكريني انا بنت اخت الدكتور انس ..
عهود انتبهة للبنت : هلا الا اتذكرك بس اسمحيلي نسيت اسمك ..
هنادي : انا من جيت من عيادتك
تقاطعها خلود : من جت وهي تمدح فيك تقول انك ما اوجعتيها وانا جيت اشكرك بالنيابه عنها تعرفينها بزر ..
هنادي : ماماااااا
خلود تضرب بنتها بخفه : هنادي بس يا ماما
عهود تبتسم : لا تشكريني هذا واجبي .. وما سوينا شي وانتوا من طرف غالي عند ابوي ..اذا تبغين شي ابشري انا عندك هنا ..
خلود : ابد ما تقصرين يا بنت عادل والنعم فيك وباهلك .. والله يعطيك الصحه والعافيه ..

اتت موجات كهربائيه لسعت الموجودين كلهم واولهم عهود .. بعد تصرفها مع ابوها وهو موجود ماعاد تقدر تششوف عينه تحسب انه بيظن فيها شي شين .. ...

انس : السلام عليكم ..
الكل : وعليكم السلام والرحمه ..
انس : متجمعين على النبي ان شاءالله ..
عهود استحت : استاذن انا ..
وطلعت من الحديث ولمة الاسره ..
خلود : زين كذا استحت البنت وراحت ..
انس : وش عندك هنا ؟
خلود : جيت اشكرها على اللي سوته لبنتي ..
انس بتعجب : بسسسسس !
خلود وعيونها تدور حول المكان : ايوه بس ..
انس : خلود لو تبغيني اشكرها كان شكرتيها وانتهى الامر لكن الله يعلم وش له جايه ..
هنادي : انا قلت لها تعالي شوفيها صح عهود تجنن وحلوه وبيييضه مررره
انس بعصبيه : عيييب يابنت ..
ويلتفت لخلود : عقلي بنتك ..
خلود : بنتي ما قالت الا الصح خلي خالها يفتح عيونه عليها يعل يجيب الله رزق من هذي النظره ..
انس بتحدي اكبر : وانا اقول منتي جايه عبث ..
خلود : شفها من الحيا راحت ما شافتك حتا حسيتها تكهربت المسكينه .
انس : خلود الكلام بالبيت ماهو هنا روحي انتي وبنتك ..
خلود : تكفى ياخوي فرح قلبي وشوفها ترا النظره بالشرع حلال خصوصا اذا كنت ناوي تتزوجها ..
انس بغضب : خلود يصير خييير روحي انتي وبنتك للبيت المواضيع ذي ما تنفتح هنا ..
خلود :" طيب وفكر وبالبيت باخذ قرارك ..
انس : روحي وبعدها حسابي معاك ..

مشت خلود مع بنتها بالممر .. وانس يناظر خطواتهم بتفكير والكلامات تُعاد . فيها حيا . فيها جمال . فيها اخلاق .. ويكفي انه ابوها الدكتور عادل ينشري نسبه بالملايين . لكن هل بيوافق علي بعد ما رفضت بنته بالمره الاولى ؟ ما اظن يمكن يردني مثل ما رديته . وخصوصا سالفة بنته بعد انفصالها .. لكن البنت ماشفت منها شي للامانه وابوها بنفسه وضح لي هدفها .. لكن القرار الاخير لها ؟؟ ولابوها .. صعب الاثنين يوافقون .. الاول ابوها الانه طلبني وانا رفضته والسبب الثاني البنت بعد دخولها تدورني ولقتني عند ابوها تغير وجهها كثير .. حسيت اني ظريتها ..

انس : روح يا انس وشوف نصيبك من يدري !! قط الخيط وعلى الله الصييييييد

0000000000000000000
أسافر عنك
فألمح وجهك في كل شيء
فيغدو الفنارات يغدو المطارات
يغدو المقاهي..
يسد أمامي كل الطرق
وأرجع يا نيل كي أحترق

فاروق

بالغرفه المجاوره لغرفة مكتبها تكلمه بخلصه .. من غير لا يلاحظها احد ..وضحكاتها وهمساتها تكاد ان تسمعها الجدران ..الحب اعمى بل لا يعرف مكان له او وقت .. قلوب اجتمعت .. ودموع انهالت لسماع صوته .. كم اشتقت اليه وكم هي الغربه كريهه وحتى الوطن لا طعم له من غير ملامسة كفيه وراسه وحرقات انفاسه تدقدق احاسيسي الانثويه .. اشتقت لنبرات صوته التي كُتوا ان اعطش لسماعها .. وان اسمع اسمي بلسانه يدغدغ مشاعري .. وضحكاته كادت انت تقتلني لاحتضانه .. وما باليد حيله وسوا سماع صوته .......

طلال : ما اسمعك قوليها
جواهر بحيا جالسه بالغرفه المقابله المدرسات ونبرة صوتها يالله يسمعها : احبك وحيييييل مشتاقه لك ..
طلال : اااه هالكلام بيعذبني ..
جواهر : وانت بس حافظ الكلمه ذي ..
طلال : الشوووق بيقتلني ودي امسك يدينك واضمها لصدري وضم جسمك واشم ريحتك جنبي ..
جواهر : طلال بس
طلال : اااه بجد انا مشتاق لك كثييير ..
جواهر : بتطول ؟
طلال : هانت اسبوع وثلاث ليالي ..
جواهر : والمؤتمر العسكري ما جاء الا الحين ..
طلال : وش نسوي ظباط درع الجزيره والبحرين قريبه برسل بوساتي لك هوا ..
جواهر : أحر ما عندي ابرد ماعندك .. ياخوي تشوف لك شوفه ..
طلال بضحكه عاليه : هههههههههههه بس هذا اللي حار قلبك
جواهر بدلع وطفوله : ايه ..
طلال بضحكه : ابد يابنت عادل انتي بعدك القلب كويته ماعاد في احد بيدخل بعدك ..
جواهر بتاكيد : اكيييد يا طلول ..
طلال بهمس يذبح اشتياقها وبهدوء : اكيد ياعيون طلال وقلبه ونبضه ..
جواهر : ابيك ترجع لي سالم ..
طلال : يعني ما انفع ارجع لك طلال .. فكري بالموضوع عدل ..
جواهر بضحكه : طلاااااااااااااااال
طلال : ما اسرع ما انقلبتي طلال وين طلول تراني مشتاق لا تخليني اهرب واجيك باول طياره ..
جواهر : ودي والله تسويها ..
طلال : ااااااااااه لا تقتليني ياحرمه وسكري الجوال تراني تعباااااااااااااااااان ولاتزودينها
جواهر بضحكه خفيفه: هههههههههههههه
طلال : ياويلي حتى الضحكه تقتلني ياناس بتقتلني ذي ..
جواهر بنعومه : اسم الله عليك عسى لعدوينك .
طلال : من قلبك ياجواهر ..
جواهر : ياعيون جواهر وكبدها وشراينها ..اي بالله صادقه ..انا لك ثرا تمشي عليها ..
طلال : الا انتي الثريا اللي نحطها فوق راسنا .. انتي قلبب طلال وشراينه ..
جواهر : الا ذي المره خلاص اقفل مااعاد فينا صبر الشوق بيذبحنا ..
طلال تنهيده قويه : اااااه الشوق ذبحني ياجواهر وانا جالس احاكيك .. واشلون لاشافتكِ عيني ..
جواهر : ههههههههه اجل بهرب قبل لا ترجع اخاف تاكلني ماتخلي مني قطعه ..
طلال : جواهر اقفلي الخط خلاص ارحميني ..
جواهر : ومن يرحم قلبي ..!!
طلال : ناويه علي ؟
جواهر : هههه اسم الله عليك ياقلب جواهر وانفاسها ..
طلال : تدرين ياجواهر وش مشتاق له ..
جواهر : وشهو ..
طلال : اول ما برجع بالسلامه ابغى ادفنك بقلبي ما ابغى اطلعك منه ..
جواهر حست بقرب رفايقها اجلسوا جنبها : يالله تبغى شي انا عندي شغل ..
طلال بضحكه : ههههههههههههه وين رحتي يالشرود ياخواافه ردي علي والا بتموتين من شوقي لك .. ههههههههههههه
جواهر : خلاص اكلمك بالبيت ..
طلال : مااقدر الا ذا الحين ..
جواهر : خلاص خلاص رفايقي جنبي ..
طلال بضحكه : شرووود ..
جواهر تضحك : ههههه
طلال : قولي احبك او عطيني بوووسه قبل لا تغفلينه ..
جواهر تعض شفايفها : بعدييين
طلال : ماني بمغفل الا لما تقولينها
جواهر تعرق جسمها : بعدين يابو اياد
طلال : احبك وانتي حتى مستحيه وفيك الحيا مليان ..
جواهر : طيب ابشر ما طلبت شي يالله اخليك الحين واسمحلي ..
طلال بابتسامة فرح : الله معاك ويحفظك وين ما كنتي ..

تغفل الجوال وتضمه لصدرها وتغمض عيونها وتضمه اكثر وتبتسم وتتذكر كلامه الاخير ..وتقول بقلبها : الله يحفظه لي ... ولا توريني يالله به مكروه ..

00000000000000000000

( طق طق ... طق طق )
عادل لاهي بالاوراق بالمستشفى .. من غير ما يرفع راسه نطقها : تفضل ..
انـــس : السلام عليكم ورحمة الله وبركاته ..
عادل يرفع راسه ويوقف يسلم على انس : وعليكم السلام والرحمه ..
انــس : وش اخبارك اليوم سالت عليك الصبح قالوا انك بالعمليات ..
عادل : أيــه كانت عندي عمليتين وخلصتهم وبعد الصلاة باذن الله عملية وبتطول شوي قلت اخلص التقاريير اللي بيدي وبعدها اصلي واتوكل على الله واسويها ..

انـــس : الله يوفقك باذن الله ..
عادل : الا ماعندك جدول عمليات اليوم ؟
انـــس : عندي عمليه وحده ومن الصبح وهي تكح واجلنا العمليه وانت تعرف اظرار الصدر مع العمليه ما يتقبلها البنج ..
عادل : عسى خليت موعدها قريب ..
انــس : تقريبا بعد اسبوع فتره حلوه للنقاهه ..
عادل : كويس اللي سويته ..
انــس : عندي موضوع ودي اكلمك عنه ..
عادل : سم قوله ..
انــس : انا ما ابغى انتقل ..
عادل : وغيره ؟
انس : مابه غيره
عادل : وانا رافض من الاساس نقلك ..
انــس : من جدك بالاول وافقت عليه ..
عادل بابتسامه : وقعته عشانك بس .. وهذي الورقه بالدرج ما حركتها الاني عارف انك بتتراجع عن قرارك ..
انس : طيب حلو انك فاهمني ..
عادل : كل الشباب هنا يتدربون هنا ويعملون لسنه وبعدها ينتقلون لمستشفيات الخاصه ما يدرون انهم يقتلون خبراتهم .. المستشفى الحكومي يعطيهم مجال اوسع للحالات ومنها يطلع عارف بكل الحالات وعنده خبره صعب جدا الدكتور الناجح يستمر بالخاص .. الانه بيشوف نفسه ناقص وانت منهم ما بترضى بالنقصان .. الا بالكمال ومو كامل الا وجهه الكريم سبحانه..
انـس : سبحان الله ..
عادل : واذا عن راتب الخاص والعلاوات انا مستعد اميزك عن الكل بس انت ما بترضى النصب وانا عادل على اسمي ما ابغى اعطي الشخص الا لعمله وتعبه وجهده بالعمل ..

انــس كان تفكيره بعيد عن كل الكلام اللي يقوله عادل .. والكلمه اللي تتردد على صيوان اذنه :" فكر فيها يا انس فكر فيها البنت بتعجبك .. اخطبها اخطبها من ابوها اخطبها ..
الخوف مو من كلمة الخطبه الخوف من الرفض الرفض يا خلود كيف بطلب يدها وانا اللي رفضتها قبل منه .. اكيد بيردها لي اكيد ما بيرضا لبنته المهانه والذل اللي يسويه فيها انه جابها لي بالمره الاولى من طبق من ذهب وانا رفضته والحين ارجع اقول رد الطبق وعيد طلبك .. مالي وجهه اقابله بالموضوع ذا كيف ...؟
لكن لحظه يا انس ..! انت فكرت فيها كا زوجه هل بتناسبني ؟ ليه انا شفتها مره جمالها ما شفته غير عيونها وخلود شافتها مفرعه .. اكيد انها حلو لكن والمصيبه النتيجه......

الا ينصدم بصوت

عادل : انس انت معي ..
انــس بتوتر : ها ايه معك
عادل : لا بالله منت معي

الممرض يطرق الباب عليهم ..
عادل : تفضل وش عندك ..
الممرض : في شخص يبغاك على انفراد ..
عادل : من هو مريض ؟
الممرض : ما قال لي اسمه قال يبيك بمساله خاصه ..
عادل : رح خله يعطيني اسمه وبعدها دخله الاسلوب ذا ما يعجبني ..
انــس بحيا وما وده يطلع الا وهو قايل المووضوع له ويريح قلبه بس الحيا والاستحاء والممرض اللي دخل علهم قطع كل كلامه وموضوعه ..

عادل : اجلس ما عليك منه .. هذا الاسلوب ما احبه من المراجعين يا يقول اسمه او لا يدخل
انــس : يمكن ما يبغاني اعرف اسمه ..
عادل : انت منت غريب ..
الممرض رجع بخيبت امل : دكتور عادل ..
عادل يرفع راسه : نعممممم

الا ينصدم بالشخص اللي واقف جنب الممرض .. فهذي الملامح ليست غريبه يعرفها جيدا .. كانه وكانه الماء البارد يرش عليه والفرحه لا تسعه من الابتسامه وقف من كرسيه لا يعرف ماهي هذي المشاعر .. هل يرحب به او سيرسله اليها .. كي تفرح هي الاخرى به ..
يعلم انه الحب الذي بينهم لم يرسم مسبقا ولكن عرف انه هو دواءها الوحيد وليس لها أي دواء اخر له .. مهما تعبت وانهارت فهي لا تنطق الا اسمه ولا تريد أي شخص سوا شخصه .. لا اعلم ما مدى الحب الذي بينهم ولكن اعلم انني قد قسوة عليهم كثيييرا وهذا هي الوجوه المتالمه مني قد اكتشفت اخيرا كي اعالج مما قبحت يداي .. واضمي الجرح الذي سال كثيرا ..

بالجهه الاخرى واقف امام الممرض ونظراته لا يحدق الا على شخص ملامحهه تشبهه ملامحها .. كم اشتاق لها كثيرا مهما سافر فأ اسمها لا يبتعد اطلاقا عن مخيلته.. طالمه سكنت في قلبه وعقله .. لا يعرف لماذا هرب ولكن يعلم انه يريدها والامواج هي من كانت السبب في رده وكانه الجزر كـ الافق البحر الذي لا يستطيع العوده الا بمشاعر تساوي مشاعر موجة تسنامي قاتله للجميع .. هذا هو يعود لتعدي الجميع والوقوف امام الكل ليعلن انه اتى هنا للحرب على حبها .. وعلى نفسه .. مهما كان الماضي الذي لا يردونه قاسيا لهم فهوه كابوس ورحل والان الاحلام لا ارى الا هي فقط هي واسمها الذي زينته لها بدفترها " العــــنود" او بالاحرى " عنــــــــود الصيييد "" كا حبها يترنن بمسامعي .. ها انا عدت اليها وهويتها الضاعئه بين احضاني ..

عادل يقاطع خياله وبصورة الصدمه: ناااصر ..
انـــس متعجب من النظرات ...
ناصر بضحكه : ههه ايه ناصر وش علامك ياعمي كانك شايف شبح ..
عادل يمشي له ويضمه : الحمدالله على السلامه متى وصلت ..
ناصر : الله يسلمك يارب .
عادل : اجل والله انك تتغداا عندي ..
ناصر : لا بالله لا تحلف ..
عادل يمسك يدين ناصر ويصر عليه : والله لحرم واطلق اذا ما وافقت ..
ناصر : تم لكن لا تحرم مره ثانيه لولا غلاك ياعمي واحسبك حسبت الوالد ما قبلت ..
انس : انا استاذن ..
عادل : وين تعال تغدى معي ..
انس : لا كثر الله خير انا وراي شغل بروح اشوفه واتركك مع ضيفك ..
عادل : هذا ولد رفيق عمري وهذا الدكتور ناصر ..
انس بابتسامه : تشرفنا يادكتور ناصر والحمدالله على السلامه ..
يطلع وكل خيبات الامل بوجهه ..
ما يدري متى بيتكلم او يتجرا ويقوله اليوم جا له ضيف وبكره الله يستر وش بيصير ..
يتركهم على سلام حار بين ناصر وعادل ..
ناصر يقعد واول سؤال كان يقصدها به : وكيف احوالها ..
عادل : انا تمام والحمدالله ..
ناصر يرص اسنانه : اقصد العنود ياعمي ..
عادل يتنهد : تسال عن حالتها اليوم او بالامس ؟
ناصر : هو في اختلاف يعني ..؟
عادل بابتسامه " كثثثير ..
ناصر : اللي اعرفه انها انهارت بعد زواجها ..
عادل بصدمه : كيف عرفت ..؟
ناصر :عرفت .. ههه لي مصادري يا دكتور عادل ..
عادل : ومصادرك قالت لك ترجع اليوم باالاخص الانه امس حالتها كانت احسن منها مافي
..
ناصر : بصراحه مصادري خبرتني انها ما جلست يوم واحد عنده وعرفت وش اللي صار بس العتب مو لها العتب على اللي اصر يزوجها ويبقاها ترضخ لعالم ماهي متقبلته من الاساس ولا بتتقبله بذا الطريقه ..
عادل بعصبيه : ناصر ...
نااصر : سكت كثير الانك حسبت الوالد وعلى عمرك بحترمك لكن وش تبقى اكثر مني يكفي انك شوهتني اقبالها وقلت لها عقيم ورضيت وانا اللي ما ابغى اخرب البنت على ابوها ورضيت وقلت لي اقنعها توافق وحاولت وما قدرت وحتى لما جتني هربانه من المزارع لي كانت تتوسل لي اني اهرب معاها .. ما رضيت اتصلت عليك وخبرتك الانها صارت لغيري .. وحذرتك كثثثير كثييير انها ما تتزوج وهي بذا الحاله الانه الشي الي يجي بالقوى ما يتحمل بالقوى ..
عادل : جاااي هنا للمستشفى تعاتبني وتهاوشني وكاني بزر ..

ناصر بانفعال : انا ما جيت اعاتبك انا جيت اقولك رسايلها بكل تاريخ تكتب لي .. تسوالف لي .. كنت احسبنها بتنساني وتستقر لكن الصدمه لما فتحت الجوال انها تستغيث فيني وانا ماني بمخليها انا قدرت اردها العنود لك وانا اللي اقدر ابعدها عنك ..

عادل بعصبيه : ناصر اعرف مع من تتكلم ..
ناصر : عارف ما يحتاج تعلمني لكن خبرت اقولك انا جيت هنا وابغاك بنفسك ترضى من طيب خاطر تراني تعبت وهي تعبت كلنا نبغى الثاني وكلنا ما ننام الليل الا باسم الثاني ماني جريئ ولا اني وقح اقولها لك لكن اكذي عليك ان قلت سفري كان علاج او دوره سفري كله ( يقولها بصوت علي وعيونه تدمع ) كنت ابغى انساااهااااا ابغى انساا انها ملك الحين لغيري بعد ماكانت بين احضاني طول الشهور بامريكيا الحين ملك لشخص غيري ..

عادل بصدمه : وللحين ملك لغيريك ..
ناصر بصدمه : كيف ؟
عادل : شاهين لسه ما طلقها ..
ناصر : وليه ما طلقها تنتضر وشهو اربع شهور لالا بنص الشهر الخامس ولسه ما طلبت يطلقها ..
عادل : كان عندي امل انه الاوضع تهدا ..
ناصر بنار يشتعل : يعني منت مطلقها منه ..
عادل يبتسم من داخل قلبه وهو يشوف وقاحة او انهيار ناصر اقباله : ههه وش تبغى انت قلي ..
ناصر يجلس منهار ما يتكلم : ........
عادل : وش فيك يا جبل سكت بعد السهام اللي رميتها علي .؟
ناصر بدموع وما قدر يستوعب الكلام ذات العيار الثقيل للحين بذمته ..؟
عادل :اطمنك هي باحسن حال وحالتها النفسيه مافيها شي قدرت تتغلب على نفسها وترجع العنود..
يرفع ناصر راسه : يعني بترجع له ؟
عادل بضحكه : ههههههههههه
ناصر وكانه طبول الحرب تشن طبولها عليه : ماقلت شي يضحك اذا ماعاد في نصيب مالي بالبلد قعده ... يوقف ويتوجه للباب ..

يمسكه عادل مع كتفه وهو يضحك : واللي يقول لك انه امس جالي اتصال يقول انه شاهين طلقها وانتظر ثلاث شهور وتصير حليلتك ..

ناصر من الصدمه ما قدر يوقف يحس انه اذنه لاول مره تخونه .. ما يدري وش الكلمات اللي قذفها جدام عادل وكم من سب وشتم نطقها .. سكت وهو يحاول التركيز ..
وش قلت ياعمي ..؟
عادل بضحكه : عمي ههههه الا سمعك ما خانك ..
ناصر بتردد : تقول طلقها ..
عادل : ايه طلقها البارحه وانت بعد ما تخلص عدتها تقدم لها

لم يعلم انه هذي الكلمات فتحت بابا كان من الصعب فتحهه وكانه الشمس اخيرا وجدت بداخل قلبه ثقره لتدخل بالامل من جديد .. هذا هو يسمعها الان تخطب لك بعد عدتها .. لم يعلم بانه هذي الكلمه لها تاثير قوي له .. من الفرحه لم يتمالك نفسه وكانه يثرثر بلا معنا ستكون لي اخيرا ستكون لي وتعود الى احضاني هي تجد هويتها الضائعه التي سلبوها مني ..اااه كم كانت هذي الكلمات مريحه للقلم ويتردد مسمعه طلقها طلقها وبتكون لك العنود ياناصر العنود لك بعد ثلاث سنوات انتظار بتكون لك اخيرا هي لك

عادل يشوف الابتسامه اللي على وجهه ناصر ابتسم وهو يكلمه : وش رايك حرقت اعصابك ..
ناصر : كنت تجربني ؟
عادل : هههههه عجبتك خليتك لين طلعت اللي بقلبك وعلى راحتك تشتب على نار هاديه ..
ناصر : الا بكلامك وبرودك خليتني انفعل والمصيبه انك ساكت وتمثل انك مهتم ..
عادل يضمه لصدره : وانا اشتريك ولولا ما جيتني كنت جيتك .. وتاسفت لك وتعذرت على الي صار مني .. وانا مستعد ازوجك لكن وين كنت تعبت وانا اتصل عليك ..

ناصر : كنت هربان من الديره علشانها .. ماعاد لي قوى اتحمل تعبت وانا ساكت وخطبتها وانت رفضتني لكن هالمره مالك عذر ترفض الاني جاي من هناك وانا ناوي الشر بعيوني ..
عادل : ويا حظ العنود فيك ..
ناصر بابتسامه وضحكه : قلت لي متى اخطبها ..
عادل بضحكه : ههههههههههههه وانت ما صدقت خبر .. اصبر لين تخلص العده ..
ناصر : انت ليه خبرتني انا ماعاد لي صبر ..
عادل : جيب ابوك واهلك بعد ما تخلص عدتها واخطبها رسمي ...
ناصر : من بكره اذا تبغااها ..
عادل : قم الحين وراي عمليه بصلي وبعدها تعال تتغدا عندنا وابشر باللي يعزك ..
ناصر : الحين لي نفس اكل ..
عادل : ههههههههههه لا تترجا مني اخبرها بوجودك ..
ناصر : خير خير بس انت افتح الباب وما عليك ..
عادل : ههههههههههههههههههههههه
الا يدخل عليه الممرض ويقوله انه المريض غير جاهز للعمليه والانه حالت دقات قلبه منخفضه ..
عادل : ماله نصيب نسوي عمليته اليوم بشوفه الحين وقوم معاي نروح للبيت نتغدى ..
ناصر : مشييينا .. وتوكلنا على الله

0000000000000000

مشاري شوي شوي بعدي ما حفظت الاحرف خف علي ..
مشاري : وشهو خف توك كاتبه حرف الشين ..
ميثه : مشاري شوي شوي على اختك
مشاري : انتي متعلمه يمه علميها قولي لها الشين حرف ساكن واذا قلنا اصوات الشين لازم تلتزم بالفتحه والضمه والكسره يعني ما تستهين فيهم بالكتابه ..
العنود ماسكه القلم وتعض شفتها وتكتب ببطئ : كيف يعني بالانقليزي مافي الزخارف ذي ؟؟
مشاري : ذي مو اسمها الزخارف ذي اسمها حركات اسوات ..
العنود : ضحكتني : صا صو صي .. طيب سهله بالكلام ليه اكتبها ..
مشاري : طيب اكتبيها يا فالحه ..
ميثه : عنوده لازم بكل صوت تكتبين حركته علشان توضح العباره بالجمع والمفرد والتنوين ..
العنود : طيب كسرتها طيب من بيضمد جرحهاااا ؟
مشاري : يعني خفيفة دم .. اكتبي الكلمه هذي ( أشربوا ) قالها شفوي
العنود : طيب وشوف .. العنود تردد الكلمه وتعد احرفها بالاصابع .. خمس احرف ..
مشاري : شفتي غلط أ ش ر ب وا حرف الواو فيه مد بالواو مثل حركة (صو )

العنود : بس راسي اوجعني شكلي ما بتعلم اكتب ..
ميثه : هي سهله بس انتي عطيها من وقتك ..
مشاري : ياربي بسك دلع كيف بتنجحين بالتيرم الاولى ابتدائي ..
العنود : بدرس انقلش ..
مشاري : بالعيد باذن الله ..
العنود : قريب العيد توعدني ..
ميثه : هههههههههه يعني هين يالخبله ..
العنود تحط عينها بعينه : تكذب علي ها يا مشاري ..
مشاري : هههههههههه وانتي خبله صدقتي يالله كملي الدرس ولا تنشغلين بسوالف امي ولو سمحتي يمه خلينا نتابع الدرس ما بقا الا شوي ويوصل ابوي وتنتهي حصتنا ..
العنود : والحصه عندك على كم ؟؟

مشاري : اربعين اريال ..وش رايك رخيص مره ..
العنود : مافي مجانا ..
ميثه : بسكم وانا بقوم اشوف الغدا .. ودرس اختك مو كل الحصه ضحك وسوالف ..

مشاري : طيب يالغاليه ابشري ..
العنود تهمس له :راححه خمس دقايق تكفى ..
مشاري : طيب مو اكثر
العنود : طيب خلنا نسوالف فيها ..
مشاري : السوالف عند وجهك اما الدراسه بعيد بعيد ..
العنود : ههههههههههههههههههه دايما تكشفني ..

الا يدخل عليهم عادل : السلام عليكم ..
العنود والمشاري بضحك : وعليكم السلام والرحمه ..
عادل : عساكم دايم الدوم تضحكون وش فيكم ضحكوني معاكم ..
العنود : ههههه ولا شي سوالف ..
مشاري : قصدها ندرس الانه ما اضحكت الا بعد ما قلت بريك خمس دقايق ..
عادل : العنود البسي ملفعك وتعالي للمجلس ..
العنود : وشهو ..
مشاري : عندك احد ..
عادل : عازم لي ضيف ماهوب غريب لكن حبيت العنود تجي تسلم عليه ..
مشاري : اجل بقول لامي تزيد بالغدا ..

عادل : خبرتها ما عليك وانت اجلس لين اقولك ادخل ..
مشاري بتعجب وهو ينطق بشفايفه بس من غير ما تلاحض العنود المتعجبه : شاهين ؟؟
عادل يهز رقبته بالنفي ...
ويلتفت للعنود : ها يابوك منتي جايه معي ؟
العنود بخووف ودموع لتذكر فقط اسمه : منهو يبه ..
عادل : ماهوب شاهين تطمني يابوك ذا شخص ثاني ..
العنود ومن الشخص الثاني اللي ترضى يشوفني ..
عادل : عنووود اخلصي وتعالي للمجلس انا انتظرك هناك وراح وخلاها ماخلاها فرصه تفكر ..
مشاري : روحي وشوفيه اكيد واحد من عماني الانه مستحيل يدخلك على رجال غريب ويقولك تغطي وتعالي ..

العنود : بدخل بشوف من ..
تلبس جلالها وعبايتها وتعطي شعرها عدل وتقرب خطوات لباب المجلس الا تسمع ضحكته :: هذي ضحكه ماهي غريبه علي .. تطرق الباب ,,,

( طق طق ,,, طق طق )

عادل بابتسامه : تفضضضضل ..

العنود تتدخل وعيونها لمصدر الصوت ابوها .. الا تنصدم بوجود رجل لم يكن للبال حساب ,,رجل كسر مراتها التي حاولت العزله منه والهرووب لاسمه مرارا وتكرارا ببكاءها .. ها هو يعود لها بعد الندا الاخير لها .. تعبت حنجرتها بنطق اسمه الانها طوال الليالي القاسيه تناديه بلا موجيب .. ها هي تراه عينيها لا تكذبان امامها هذا هو " ناصر " ناصر يا عنود اماك لما لا تغمضين جفنك لترمشي لتعلمي انها حقيقه وليست سراب الشخص الواقف امامك هو نفسه ناصر وليس شاهين .. ناصر عاد عاد اليك ليلبي ندائي المتاخر .. في داخلي عتبا عليه لماذا تاخر ولماذا لم يرد علي .. هل اصبحت رخيصه لديه وهو الذي وعدني ان يكون بجانبي دوما نسى تنهيداتي وتوسولاتي اليه وانا بين احضانه .. كم اشتقت له وكانه ساقين ترفض متابعة خطواتي وكانه العلم اصبح اصم وابكمم حولي فانا لا اناظر الا عينااه عيناااه وكانه الحديث معه كان طووويلا ونظرات العتاب واضحه لا استطيع ان اغفل عيني خوفا بان يكون الحلم الذي اشهاده مجرد خيال رؤيه ساميه .. ..

ناصر : العنود كيف حالك ..

انه صوته نعم صوته صوته الذي لا يشبهه احد به .. هو بعينه انني لا اعلم ماذا حل بي هل انا بالواقع الحلم هل نمت وانا ادرس ..؟ لا استطيع التفكير ؟؟

هل يريد الاجابه عن سواله : ماذا اقول له ؟ بانني كنت واصبحت بلا وطن من دونه .. وهذا هو الان يعود وهل ستعود هويتي لي كما سلبها مني ؟؟

عادل : وش بك يابوك اجلسي ..
العنود : يبه وش اللي صاير ؟
عادل يشوف ناصر : يالله تكلم قل لها ..
ناصر برهبه لعيونها الذي طاااال الاشتياق لها ولصوتها وهمساتها وصرخاتها ... : وش اقول ..
عادل : العنود ناصر جا من الغربه علشان يخطبك وش قالتي ؟؟

العنود من الصدمه جلست على الارض : هاااا
عادل بابتسامه : وش فيك يابوك .. ناصر جاي يخطبك وش قلتي ..
العنود بصدمه للحين : وش قلت ..؟
عادل : قلت موافق بس بعد ما تنتهي عدتك من شاهين ..
العنود : يبا احس الدنيا تدور فيني ..
عادل بخوف : العنود وش فيك ..
العنود تمسك راسها ويغمى عليها ..
ناصر يركض لهااااااااااااااااااااااااااااااااااااااااااا ..

نتابع بالجزززء الاخييييييييييييييييييييييييييييير
من الروايه يوم السبت باذن الله ..
عاد الحين ابغى احلى تعليق منكم وتوقعاتكم للجزء الاخير .. ما ابغى يعطيك العافيه وتعليقات سطر ترا ماراح ارد عليه برد على اللي سطورهم تقدر تعبي وارهاقي لسهر وطوول الصبر ..

نتواصل انجال