رواية عآمـلوني گ فصـليه بقلمي ايمان محمد وٌ رين الزين الفصل الاول 1 - بقلم آلگآتبه تآج آلعرآق

____________________________________
فتحت اول صفحة بالدفتر ومسكت قلمي حتي اكتب مذكراتي .. بس احتاريت منين ابدي
راح ابدي من اول ذكري بدأ وياها عذابي لما جان عمري 7 سنوات
جنت اني وماما كاعدين بحديقة بيتنا نسقي ورودنا اللي زرعناهم اني وياها

فجأة انفتح باب البيت الخارجي ودخل ابوي بسرعة وكال لماما يلا جهزي غراضج انتي وهمس راح نسافر للعمارة بسرعة ابوي تعبان وطالب يشوفني
ماما طفرت من مكانها لما شافت خوف بابا وقلقه وضلت تهدي بيه وصاحتلي يلا هموسة بسرعة ماما حتى نروح
انا استغربت اول مرة نروح لبيت جدو دائما اسمع بابا يكول لماما اريد اشوف ابوي بس خايف من رد فعله اخاف يطردني

ماما كالت يلا بسرعة همس ركضت بسرعة وغيرت ملابسي وماما خلتلي بجنطة ملابس الي والها ولبابا
قفلنا الباب زين وركبنا مع بابا بالسيارة بس طول الطريق بابا خايف ويدعي كون جدو مابي شي
الطريق جان طويل كلش وتعبنا على ماوصلنا
وصلنا يم بيت كلش جبير مثل القصر

وجان اكو زلم هواي واكفين برا البيت منتظرين كانو يعرفون نحنا راح نجي
نزلنا من السيارة هما حضنو ابوي وسلمو على ماما
وبابا بسرعة كاللهم وين ابوي
كالو الشيخ غزوان بالمستشفي
ابويه انصدم وبسرعة تركني انا وكال لرجال عرفت بعدين أنه ابن عمه لابوي
كاله فوت همس يم عماتها جوا ما اكدر اخذها ويانه للمستشفى
الرجال كاله لاتخاف روح انته واحنا راح نجي وراك نحنا جينا من المشفي حتي نستقبلك
مارضينا نكولك هو بالمشفي حتي لاتخاف وانت بالطريق
كالو لبابا علي اسم المستشفي وراح هو وامي وتركوني الزلمه دخلني لنسوان جوا
وكاللهم هاي بنت عمران خلوها هنا لان ابوها وامها راحو للمستشفي يم الشيخ غزوان
اني جنت خايفة كلش وضليت ابجي اجتي وحده شكلها طيوبه حيل حضنتني وكالت تعاي بنت الغالي تعاي عمة لاتخافين
هاي اني عمتج هناء أخته لبابا لاتخافين حبيبة
اجوي اثنين نسوان سلمو عليه وحضنوني وعرفت هما عماتي خوات بابا وحده اسمها نورية والثانية صابرين

وجان اكو هواي نسوان بالبيت وعمتي كالتلي أنو هنا يصيرن نسوان عمامي وعمات بابا وبنات عمه وكرايبنه
اني جنت خايفة هواي وضليت ابجي بحضن عمتي .ودخلتني لغرفة وضلت يمي حتى غفيت
كعدت بعدها علي صوت لطم وصراخ خفت
وفكرت انه جدو يكون صارله شي
بس سمعت صوت عمتي هناء تصرخ باسم بابا
طلعت أركض علي صوت الصراخ ولكيت تابوتين جار
صرخت من خوفي من شكل النسوان وصراخهم سمعتني عمتي هناء واجت حضنتني وكالتلي بعدج صغيرونة عافوج وراحو ياعمه

اني جنت بحضنها بس عيني عالتابوتين
ومنو هما اللي عافوني ....... خوفي بوكتها مايعادله اي خوف ثاني جنت حاسة حالي غريبة بوسط ناس مااعرفهم
اجا زلمه يبجي كال لعمتي جيبيها خلي تودع ابوها وامها قبل لا نروح ندفنهم
حولت نظري ابوي وامي انااا

انصدمت من كلمة عمي ماما وبابا شلون يعني اودعهم .. سالت عمتي ليش اودعهم هما راحو للمشفي يشوفو جدو ويرجعو بابا كاللي هيج وشنو هذني التوابيت عمتي حضنتني وضلت تبجي وكالتلي راحو ياعمة بعد مايرجعون كتلها وين راحو

.كالتلي ماتو يايمه ماتوووو وضلت تبجي وتصرخ جمدت شلوون يعني ماتو هما كالو حيرجعون مايعوفوني وحدي عمي قربني على تابوت منهم كالي هذا ابوج ودعيه ياعمي .وضل يبجي جان اكو هواي نسوان واكفين يم التابوت ويبجون .عمي بعدهم قربت من التابوت ولمسته وقلت بابا انته هنا انته مامتت مثل ميكولون صح هما ديجذبون عليه وبجيت وضليت اصيح واكول تعال بابا من هنا حتى نرجع عالبيت

.عمي حضني وبعدني عن التابوت وقربني من التابوت الثاني بس طان عكس تابوت بابا ماجان اي حدا عنده كأنو اللي بداخله شيء مايخصهم قربت حطيت راسي عالتابوت وضليت ابجي واعتب على ماما ليش هي عافتني وحدي واكوللها ليش عفتوني انتو تدرون مالي حدا غيركم ضليت حاضنة جار ماما وأبجي واصرخ لحد ما عمي سحبني من عليه وعمتي مسكتني ودخلو زلم شالو تابوت ماما وبابا

وانا ضليت اصرخ وتركت عمتي وركضت وراهم بسرعة واصيح علي ماما وبابا . لاتتركونيييييييي خذوني معكككككم بابااااا ماماااا اللله يخليكم لا تتركونيييي لحكتني عمتي ومسكتني وضلت تهدي بيه وهي تبجي .. فوتتني جوا يم النسوان وكعدتني بسدها وضلت تمسد علي شعري وهي تبجي واني اكلها عمة الله يخليج اريد اروح على بابا وماما الله يخليج وديني لعدهم والله اني خاايفة من دونهم الله يخليج عمتو

..وهي تبجي وتكلي تيتمتي صغيرونة حبيبتي الله بيرد كلبج وكلوبنه وياج بس لاحظت كل نوحهم وبجيهم باسم بابا ولا حدا بجي ولا جاب اسم ماما مااعرف ليش احسهم يكرهون امي استمرت الفاتحة ثلاث ايام وانا طول هاي الايام ابجي واصرخ واسال علي ماما وبابا جنت صغيرة وجان عندي امل أنهم يرجعون بس للاسف اللي يروح بعد ميرجع ...

سمعت النسوان وهنه يحجن ويكولن أنو ماما وبابا من راحو لعند جدو عالمستشفى تايشوفونه وأنو بابا اخذ امي وياه حتى تسلم على جدو وتطلب رضاه لأنو عمره ماشاف ماما .وبعد ماطلعو من المستشفي وهما راجعين سوو حادث وأنه سيارتهم دخلت بشاحنة نقل جبيرة واتوفو قبل لايوصلو للمشفي ..

جنت اسمع كلامهم واكول ديحجون عن حدا ثاني مو عنهم . باليوم الرابع من وفاتهم عرفت أنه جدو توفي هو كمان وانعاد نفس المشهد صياح ولطم انا شفتهم يلطمون ويصرخون ضليت اصرخ من خوفي واصيح على ابوي وامي اجتي عمتي وصاحت على عمو اللي شفته يوم موت اهلي وعرفت هو أخو بابا واسمه سلمان هناء .خويه البنية راح تتخبل والله لو ضلت هنا وسط هاللطم والصراخ صيح واحد من الولد ياخذوها لعندي بالبيت تبقى يم بناتي ومع اهل زوجي لحتي تخلص الفاتحة اخذوني لبيت عمتي وضليت مع بناتها واهل زوجها وكانو حنونين عليه وجنت أنا اضل ابجي واسال على اهلي وهما يصبروني ويكولون هما راحو للجنة مكان احسن من هنا جثير واذا ضليت ابجي راح يزعلون مني

. وبناتها كلش حبابات ويحاولون يضحكوني ويخلوني انسي شوي جانو كبار عني جان عدها ثلاث بنات الكبيرة سمر جان بوقتها عمرها 17 سنة والثانية رغد جان عمرها 14 والصغيرة شهد 11 سنة ضلت عمتي حوالي أسبوع ورجعت لبيتها وانا بقيت معاهم فترة وشوي شوي بدأت اتعود عالعيشة وياهم بس مانسيت اهلي ابد ومر حوالي أسبوعين بعد ماعمتي اجت من بيت جدو وبيوم لكينا عمي سلمان جاي ومعاه عمو عباس أخو بابا كمان اجت عمتي كانت تبكي وكالتلي عمامج يريدوج

استغربت ليش عمتي تبجي طلعت لعمامي وكف عمو سلمان حضني وكالي هلا تعاي بنت الغالي تعاي بويه سلمت عليه وسلمت علي عمو عباس وكان معه واحد اول مرة اشوفه ماسلمت عليه ضحك وكالي هااا ليش ماسلمتي عليه بنت عمي ..عمو سلمان كالي كومي بنيتي سلمي علي ابن عمج بوية هاد ابني صكر سلمت عليه ورحت كعدت جا عمي ..

شوي وكالي يلا بابا حتي ترجعين ويانه انا خفت كلش وكلت عمو بس اني مرتاحة هنا كاللي لا ميصير عمو نحنا قلنا نتركج عند عمتج فترة حتي ترتاح نفسيتج بس خلص كافي ميصير تضلين هنا يالا حتي ترجعين ويانه اني ضليت ابجي واكولله والله عمو انا مرتاحة هنا ماريد ارجع وعمو يحايلني وانا مصره ماروح معهم فجأة زمخ بيه اللي اسمه صكر وكال ديلااااا كافي دلع ترجعين ويانه يعني ترجعين ماتبقين هنانه يلا بسرعة تانرووووح جانت نظرة عينه كافية تخليني ماانطق حرف واحد حتي .........

يتبع....

صحيح اول بارت قصير بس هذي البداية وان شاء الله
البارتات الجاية راح تكون اطول ومشوقة اكثر

لا تنسوا المتابعة والتصويت 🥰

بقلمي

__RynAlzeen089
__Eman Mohamed