رواية عآمـلوني گ فصـليه بقلمي ايمان محمد وٌ رين الزين الفصل السادس والعشرون 26 - بقلم آلگآتبه تآج آلعرآق

لاتظلمني إن كنت مقتدرا
فالظلم مرتعه يقضي الي الندم
تنام عينيك والمظلوم منتبه
يدعي عليك وعين الله لم تنم

............................
انصدمنا باللي سمعناه
طبينه لغرفه الكعده من بسكوت وامي من شافتنه لونها نخطف هي واخلاص كامت تبلعم

وكامت من مكانها تسوي نفسهه كأنها ملهوفة وسألت صكر علي همس

ام صكر .طمني صكر يمه عن هموسة شون صارت هسه

صكر . كافي تمثيل مامليتي لخاطر ربج هاي نكشفتن

ام صكر . انت فهمت غلط وليدي مانقصد شي

صكر . اي ايي صدكت والله صدكتج انا ماتخيلت بعمري كله انو امي تكون بهالحقد والخبث هذا
اشسوتلج  هليتيمة حته تسوين هيج بيها هااا شسوت  بقيتي تمثلين دور الأم الحنونه لبنتها وانا صدكتج وعبالي صدك أنو انتي تحبينها وانتي كل هالحنية جذب بس علمود تعذبينها

امي كامت ترجف وتبلعم وما تعرف شتكول لو ترد

اخلاص . صكر تره احنا جنه نمزح مانقصد شي والله
التفتلها صكر وضربها راجدي علي وجهه

صكر . سدي حلكج ياحقيرة عيدي شنو كلتي قبل شوي هااا تريدين تجيبين خالد لهنا وانا اشوفهم ويا بعض واطلقها هذا لو ماقتلتها طبعا تعرفوني عصبي ووقت عصبيتي مااشوف كدامي

وسيف هذا الطفل تكرهينه بس لأنه ابن همس يعني ماكفاج انو انا اخذت ابنها منها بس علمود ماتحسين بالنقص وتصيرين مثل كل النسوان لااااا تمثلين حبج للطفل بس حتي تحرقين كلبها

اخلاص .... اي صكر اكرهاااا وابنها مااحبه سمعت ماااااحبه اكرهو مثل كرهي لهمس ويمكن اكثر
صكر بس سمعها اتخبل وضل يضربها وامي تحاول تبعده عنها هاي اول مرة صكر يضرب اخلاص وامي تبعده عنها وماترضي يضربها برغم هي تستاهل هالضرب .وهمس عمرها مادافعت عنها وكل شوي صكر كان يضربها
ام صكر .... اتركها صكر حقها تكره همس هاي اخذت زوجها منها شي طبيعي تكرها
صكر .... منوووو اللي اخذت زوجها همس .همس بعمرها مااخذت شي احنا اللي اخذنا منها كل شي أحلامها ومستقبلها واخذنا ابنها وحتي صحتها دمرناها
اخلاص طااالق و ترجع لأهلها بعد ماتصيرلي مرة وانا بس يومين تصير همس زينة راح أطلقها محكمة 
اخلاص اتخبلت وضلت تصرخ

صكر .... وانتي المفروض امي المفروض تريدي سعادتي مو انتي اللي تدمريني بايدك
كنت تشوفيني اتعذب وانا ظالم همس والله ليلي ماكنت انامه واكثر من مرة احاول ارجعلها ابنها وانتي وبنت اختك الحية تبكو وهااي الحقيرة تمثل حبها لابني

بس الله كشفكون وكشف خططكو الحقيرة والله اعلم شنو اللي سويتو قبل بهمس وانا بغباءي كنت اساعدكو من دون ماادري
اخلاص وهي تمسح الدم عن حلكها... الله يخليك صكر ماتطلقني والله ماراح ادخل بشي يخص همس وسيف راح احطه بعيوني والله وراح احبه
صكر .... ماله داعي كل هالشي سيف راح أرجعه لأمه وانتي مااريد اشوف وجهك مرة ثانية روحي لاهلك ارجع من المشفي لو شفتك هنا راح اقتلك والله
وطلع فوك لغرفة اخلاص اخذ سيف ونزل شكله كان نايم حبيبي
امي شافته اخذ الطفل ونزل ضلت تلطم وتدعي علي همس وتحاول تمسك صكر حتي مايطلع بالطفل وينطي لهمس

ياالله كل هاد كره لهمس حتي تحاول تمنع ابنها عنها
صكر ماسال وأخذ سيف وطلع وانا وراه مااتكلمت كلمة واحدة حتي كنت اباوع وانا ساكته من كمية الحقد والغل اللي بقلب امي واخلاص
طلعت وراه ركبت السيارة وهو انطاني سيف شلته علي رجلي وركب السيارة وحط راسه عالستيرن
والله حزنت عليه مسحت علي ظهره رفع رأسه وكانت عيونه حمررررر
صكر ... تفتكري رهف ممكن همس تسامحني
ماعرفت ارد عليه وشنو اكله اكله همس اكيد ماراح تسامحك
هو شاف سكوتي دور السيارة وطلع وبالطريق اتصل علي اخو اخلاص وكاله تعاد اخذ اختك لاني طلقتها وانا برا البيت ولو رجعت لكيتها راح اذبحها الك
حاول اخوها يفهم السبب وصكر كاله أسأل اختك وهي تحكيلك عن حقارتها وقفل بوجها

رهف .... ليه اتصلت علي اخوها اكيد بعد ماطلقتها راح تروح هي وتتصل علي اهلها حتي يجو الها
صكر .... لاا انتي ماتعرفيها ماراح تروح لمكان راح تضل وامك تسوي المستحيل حتي ماتروح واطلقها
وصلنا المشفي ونزلنا رحنا لعند غرفة همس لكينا خالتها كاعدة علي كرسي كدام الغرفة هي وزوجها وعمو عباس كاعد كبالهم هو وخالد وعمتي سارة
الظاهر لما عرفت اللي صار اجت للمشفي
راح صكر الطبيبة وناولني سيف أخذته وكعدت قريبة علي خالتها

هي شافت سيف
دارين ... هاد ابن هموسة
رهف ... ايه هاد سيف ابنها
ضلت تبجي وتتحسب علينا كلنا بصراحة ماكدرت ارد عليها ومالي عين حتي ارد بعد اللي سووه اهلي
شوي واجت دكتورة غالية مع صكر
وكفت برا معنا وكالت همس شوي  ومفعول الإبرة يخلص وراح تصحي
واول ماتصحي ونسمع صوتها صكر يدخل الها ابنها

دخلت لهمس وضلت شوي وسمعنا همس تصرخ
بسرعة صكر اخذ سيف مني وفتح الباب ودخل
والدكتورة تحاول تهدي همس
الدكتورةغالية ... شوفي همس منو اجا هااد سيف ابنج
رفعت راسها علي صوت سيف وهو يبجي
بس شافته سكتت من الصراخ بس ضلت تبجي بصوت عالي
اقترب منها صكر ومد ايده الها وانطاها سيف
مدت أيدها أخذته منه ضمته لصدرها وهي تبجي ضلت تبوسه بكل مكان بوجهه وسيف يبجي
لانه مامتعود عليها

سبحان ربي رغم انهيارها وكل شي صارلها بس شافت ابنها هديت كانو ماصار شي وكانو سيف مثل السحر شافته هديت
وفصلت عن كل العالم حواليها وماحاسة بشي غير ابنها ماحست حتي بصكر الي كاعد يمها وحاضنها
ولا حاسة بخالتها اللي تحاول تكلمها
فاقدة عن كل شي وكل تركيزها مع ابنها

سيف ضل يبجي  كام صكر وشاله منها حتي يسكته
بجت وضلت تترجاه ماياخذه منها
رجع كعد يمها وسيف علي ايده
صكر ... ماراح أخذه لمكان والله ابنج راح يضل معك وماحدا راح ياخذه منج لاتخافي انا بس أخذته لأنه يبجي بس يسكت راح أرجعه الك

سكتت وضلت ماسكة ايد سيف وهو مع صكر
الدكتورة طمنتنا انو همس راح تصير زينه بس تحتاج شوية علاج
اقتربت عليها خالتها ومسكت أيدها التفتت عليها همس
وخالتها حضنتها وتبجي وهمس ساكتة
دارين ... حبيبتي سامحيني والله صار عندي ظروف وماكدرت اجي أو أسأل عنك كل هالسنين اللي مرت وحتي مامعي اي رقم لواحد من عمامج اتصل عليه واسال عنج
طبعا همس بعمرها ماشافت خالتها وماتعرفها هي بس تعرف عندها خالة اسمها دارين لان اول ماامها تزوجت ابوها سافرت خالتها عند خالها بتركيا ولما اجت عزا امها همس ماشافتها فماتعرفها

همس بدموع  ...انتي تشبهي امي شوي انتي خالتي مو
دارين ... ايه ياعمري انا خالتج
همس ببكاء ......من زمان واناانتظرك تجي تساعديني وتاخذيلي حقي من اللي ظلموني
دارين .... سامحيني ياعمري بس تصيري زينه راح احكيلك كل شي وشنو سبب عدم سؤالي عنج
ولا تخافي ماحدا راح يكدر ياذيج انا هنا وماراح اتركج مرة ثانية
سكتت همس احسها مالها خلك حتي تكثر بالكلام برغم هي اتحسنت شوي لما شافت ابنها بس متغيرة ساكتة علي طول وبس حاضنة ابنها
صكر حاول يكلمها وفهمها كل اللي صار وعرفها انو طلق اخلاص بس هي حتي ماردت عليه
ضلت بالمشفي 3 ايام وبعدها طلعت صكر بهالايام ماتركها الا وقت اللي راح المحكمة وكتب ابنها باسمها ولأنه ضابط واله معارفه ماطول بالموضوع وخلصه بسرعة
ماانسي فرحة همس وقت اللي مسكت جنسية الطفل
ضلت تبجي وتبوس بابنها وتكوله رجعت الي وماحدا راح يكدر ياخذك مني مرة ثانية

اول ماطلعنا من المشفي همس رفضت ترجع لبيتنا وعمو عباس اخذها عنده لان خالتها راح ترجع تركيا كم يوم ترتب أمورها هناك وتجيب اولادها وتجي تعيش بالعراق
وافقت تروح عند عمو عباس بس احسها حتي رافضة تروح عنده بس ماكدامها حل ثاني
خالتها ضلت معها ببيت عمو عباس يومين ورجعت هي وزوجها اللي عرفته زوجها يصير ابن خالها بس طيب حيل ومامانع انو يرجعو للعراق بالعكس فرح حيل وكان حنين جدا علي همس
رحت لعندها وضليت اتكلم معها كانت عادية معي بس احسها بس مو همس الأولي وحسيتها مانست اخر موقف الي  لما  حاولت تنتحر

صكر هالفترة بعد عنها شوي لانو دكتورتها طلبت هالشي حتي تهدي وما تنهار مرة ثانية
اخلاص اجا اخوها اخذها ولما رجعنا من المشفي ماشفناها
رحت لبيت اهلي حتي اشوف امي واسالها عن السبب اللي خلاها تسوي بهمس هالشي
لكيتها كاعدة بغرفتها تبجي
لانو اخلاص اتطلقت وصكر مايكلمها حتي ويعتبر حرمها منه مثل ماهي حرمت همس من ابنها
شوي ودخلت سناء تبجي  ووجها مورم وتحت عيونها ازرك
كامت امي بسرعة عليها
كعدت هناء بالارض وضلت تلطم وتصرخ نزل صكر من فوك علي صوتها
وسالناها منو اللي سوي بيها هالشي

سناء .... خالتي وبناتها ضربوني مثل ماصكر ضرب اخلاص وزوجي طلقني وأخذ مني ولادي كالي مثل مااختي اتطلقت انتي كمان راح تتطلقي وترجعي لاهلج
هاااي حوبة همس انا هلا بس حسيت باللي حسته لما اخلاص اخذت ابنها
سألناها منو جابها كالت اخو زوجها وصلها ورجع

اتذكرت وقتها لما سناء كانت سبب انو صكر ضرب همس وكالت لهمس عادي اخلاص تاخذ ابنج وانتي تفكيرك سلبي
مرت الايام واخذو منها اولادها
هي عندها ابنها وبناتها كبار بس الها اثنين صغار وهي كل خوفها عالصغار
والله ذنب همس وحوبتها ماتركت واحد من اللي ظلموها اخلاص اتطلقت ورجعت لأهلها ..وامي صكر مايكلمها وكانو ماموجودة وسناء انحرمت من ولادها مثل همس
وصكر انحرم من همس وماظن بيوم ممكن ترجعله

....................

همس
كل اللي صار ومحاولتي الانتحار وانهياري مااتذكرها بس اتذكر لما جابولي ابني للمشفي وصكر رجع سجله باسمي
لما طلعت من المشفي ماوافقت ارجع لبيت صكر واخذوني  لبيت عمو عباس كنت كارهة حتي اروح عندهم بس ماكدامي حل ثاني لانو خالتي كالت راح ترجع ترجع لتركيا تخلص أمورها هناك وتجيب ولادها وتجي

كعدت معي ببيت عمو عباس يومين وحكتلي سبب عدم سؤالها عني كل هالسنين
وانو بالاول كانت صغيرة وماتهتم وبعدين لما اتزوجت ابن خالها بفترة وخلفت أول طفلة الها وهي بنتها حست بالمسؤولية وحاولت تسال عني وبهاي الفترة خالها تمرض وضل اكثر من 3 سنين مريض لعند لما توفي وهي خلفت بعد بنتها ولدين .. وبنتها كانت بالمدرسة بالصف الرابع وهي طالعة للشارع ضربتها سيارة وضلت فترة بغيبوبة ولما فاقت كانو رجليها مدمرين وانشغلت ببنتها لعند فترة قريبة لما اتصل عليهم ايهم ببيت  خالها القديم لأنهم ضلو عايشين بي
عذرتها لما حكتلي ظروفها ووعدتني ماتتركني مرة ثانية

ضلت يومين ورجعت تركيا وكانت كل يوم تكلمني وتتطمن عني
عمتي سارة شايلتني مو عالارض شيل وكل شوي تكعد معي وتضل تكلمني وتصبرني
عمتي هناء اول ماعرفت اللي صارلي راحت اتعاركت ويا عمتي وضلت تتحسب عليها وكل يوم تجي تزورني
وعمتي صابرين اجتني يومين ورجعت
بس كل كم يوم تكلمني

صكر اول ماطلعت من المشفي كان كل شوي يجي لعندي ويحاول يكلمني وارجع معه بس انا كنت ماارد عليه
بعدها مااجا مرة ثانية ارتاحت وفكرت انو اقتنع اني مااريده
تابعت مع دكتورة غالية بعيادتها بغداد  كانت عمتي سارة وخالد يروحو معي
كل جلسة عند الدكتورة كنت احس حمل ينزاح عني حكيت الها كل اللي صار معي من اول مااهلي ماتو لهاي اللحظة

كان كلامها الي مثل البلسم اللي يخفف كل الالم
وبديت اتحسن شوي بشوي وابعد عني الأفكار السلبية وابعد فكرة الموت
وابني اتعود علي بالاول كان رافضني وبس يبجي بس هلا لا صار يحبني
خالتي صارلها شهر بتركيا وموعد رجوعها بعد 3 ايام
اول مااجيت لبيت عمو عباس رهف جابتلي كل ملابسي وملابس سيف
لميت كل شي بجنطة لانو اتفقت ويا خالتي نروح نعيش بييت اهلي ببغداد بالاول كانت رافضة ومصرة تشتري بيت واكعد معهم بس اقنعتها انو بيت اهلي موجود ومالازم نشتري

وانو انا راح ارتاح ببيت اهلي اكثر
كل خوفي هلا عمامي وصكر يوافقو اروح ويا خالتي
طبعا انا بلغت عمو عباس اني اريد أطلق من صكر وهو بلغه ورفض وكايله انو سبب سكوته  تاركني فترة اهدي وماراح يطلق
رهف رجعت معها مثل قبل بس احس قلبي ماصافي الها يعني اكو حزن شايلته بقلبي من يمها
طبعا عرفت باللي صار لاخلاص وانو صكر طلقها لما سمعهم يتفقوا عليا هي وعمتي ام صكر
وانوسناء زوجها طلقها وأخذ منها ولادها وخالتها وبناتها ضربوها

سناء اللي كانت موافقة صكر علي قراره وموافقة اخلاص تاخذ ابني وحتي انضربت بسببها
الله شربها من نفس الكاس وحست باللي احسه
ورهف كالتلي انو زوج سناء اتزوج هالايام وسناء اتخبلت وبس تريد أطفالها الصغار وهما رافضين
عمتي ام صكر اتعاركت ويا اختها عاللي سووه بسناء واختها غلطت عليها وانو هما اللي بدو لما طلقو اخلاص
وشرطت عليها لو تريد سناء ترجع لزوجها هي تخلي صكر يرجع اخلاص

وحاولت مع صكر يرجع اخلاص حتي ترجع سناء بس هو رفض وحتي مايكلمها صارله فترة
الله مايقبل بالظلم وكل اللي ظلموني الله عاقبهم وحوبتي ماتعدتهم
طبعا هاي مو شماتة بس ارتحت انو الله رجعلي حقي منهم
خالتي رجعت اليوم من تركيا هي وولادها بنتها الجبيرة اسمها جيلان علي اسم ماما  عمرها 14 وابنها الثاني اسمه يمان  عمره 10 والصغير اسمه عمر  عمره 7 سنوات

خالتي بلغت عمو عباس وعمو صالح انها تريد تاخذني معها لبغداد ونعيش ببيت اهلي
رفضو بالاول بس أقنعتهم انا ان هالشي افضل الي
ضل بس صكر يقتنع
اتصل عليه عمو عباس وكاله يجي للبيت لان عنده موضوع مهم يريد يكلمه بي
ماطول شوي واجا دخلو بالاستقبال ومعهم زوج خالتي شوي وكبت العيطة وصوت صكر يعيط عليهم
اجاني عمو عباس بلغني انو صكر يريد يتكلم معي
حسيت جسمي يرجف من الخوف لهلا اخاف منه بس حاولت اقوي حالي لازم مااضعف
دخل عندي حاولت اكعد بالصالة معهم بس رفض وراد يكلمني لحالنا

دخلنا غرفة عمو عباس
صكر .... تريدين تتركيني همس  وتروحي ويا خالتج
همس .... هاد احسن الي طول ماانا هنا ماراح ارتاح
صكر .... ضلي كاعدة ببيت عمي عباس لعند ماتهدي ماراح اجبرك علي شي
همس ... لااا انا اريد ابعد عن كل شي يذكرني باللي صارلي يمكن بيوم انسي
بس لو ضليت هنا ماراح انسي بعمري
صكر .... ضلي معي همس والله راح انسيج كل شي واحاول اعوضج عن اللي صار
همس .... تعوضني عن اي شي بالضبط تكدر تعوضني عن دراستي اللي حرمتني منها ولا ضربك واهانتك الي ولا ابني اللي أخذته مني تعرف بشنو افكر
صكر .... شنو
همس .... انك لو ماسمعت اخلاص وعمتي يتفقو عليا ماكنت راح ترجعلي ابني يمكن كنت جبته الي فترة حتي اصير زينه بس كان راح يضل باسم اخلاص وبالاخير ترجعه الها
صكر ... والله همس صارلي فترة حتي قبل ماتمرضي وانا افكر أرجعه الك والله ماكنت مرتاح باي شي وانا ظالمك واحس كل شي ضدي حتي صارلي مشاكل بدوامي

همس .... طلكني صكر . والله راح احاول انسي وراح اسامحك بس طلكني لان العيشة بينا صارت مستحيلة
صكر .... طلاك ماراح اطلك تريدي تروحي ويا خالتج روحي بس راح تضل عيني عليج واتركك فترة تتحسني وارجعك الي انتي الي وماراح تصيري لغيري
واقترب مني وحضني بكل قوته وباس راسي وطلع بسرعة

سكتت عن موضوع الطلاك هالفترة بس استقر ببيتنا ويا خالتي وارجع افاتح عمامي مرة ثانية بالموضوع
سافرنا لبغداد ورهف ضلت تبجي وانا ماشية ووعدتها راح نضل نكلم بعض وهي تجي تزورني
طبعا صكر اتعارك ويا ايهم بعد ماطلعت من المشفي لانو هو اللي اتصل بخالتي وجابها وللحين مايكلمو بعض واللي واكعة بيها رهف محتارة بين زوجها واخوها
اتشكرت من ايهم واتاسفت اله لاني السبب بالمشاكل الي صارتلي

كالي مااهتم باي شي الا حياتي هما راح يجي يوم ويتصافو وانو اي شي احتاجه
اتصل عليه
حسيته اخ والله وكف معي مثل الاخ واكثر
وأصر لازم يوصلني ورهف فرحت و اجت معه
راحت خالتي وولادها الاثنين بسيارتهم
وركبت انا وجيلان ورهف وسيوفي ابني   وهمس الصغيرة ويا ايهم
ركبت جيلان كدام وهمس علي رجلها ورهف يمي وطول الطريق حاضنتني وتبجي
وصلنا لبيت اهلي ببغداد ايهم كان جايب واحدة نظفت البيت ورتبته كبل يومين  اول مادخلت اتذكرت اهلي كعدت بالكاع وضليت ابجي خالتي حضنتني وهي تبجي معي ورهف واكفة تبجي عليي
وسيف شافني ابجي ضل يبجي
حاولت اقوي نفسي  لخاطر ابني مسحت دموعي وحضنته

ضلت رهف وايهم معنا طول اليوم ورجعو اخر اليوم وهي تبجي
ضليت متابعة ويا دكتورة غالية كم شهر وبعدها اتحسنت وماعدت اروح الها بس لو حسيت بخنكة أو اي شي كنت اكلمها عالواتس لان صكر  اشترالي تليفون حتي يكدر يتواصل معي  وهي ترد عليا بوقتها  
استقريت بحياتي ويا خالتي وصكر كل شوي يكلمني يحاول يخليني ارجعله بس كان ردي هو الرفض
خالتي اقترحت عليا احاول اكمل تعليمي بس انا أجلت الموضوع شوي
بسبب الكورونا واخاف اطلع واتعدي واعدي ابني
انا ورهف علي تواصل وكل شوي نكلم بعض وهي تحكيلي اللي يصير كله اول باول
صكر هالفترة كل يومين يجي عندنا حاول وحاول معي ارجعله بس الرفض كان ردي لدرجة وعدني راح يخليني ببيت لحالي وانا اعرف هالشي صعب عليه لأنه هو الولد الوحيد يعني راح يترك امه لحالها بس حتي يرضيني

هو رجع يكلم امه بس مو مثل الاول وسناء لهلا عندهم
حاولت اقنعه يطلقني
وهو رفضه للطلاق كان قطعي
صارلي اكثر من  سنة عايشة ويا خالتي وسيف حبيبي صار عمره سنتين وثلاث شهور  وكل حياتي صارت اله
عمري هلا ماواصل للعشرين وحياتي ملخبطة لاانا المزوجة ولا انا المطلقة
صكر برغم المدة الطويلة مامل ولا فقد الامل اني ارجعله
كل شوي افكر ممكن بيوم اكدر اسامحه وانسي اللي صار وارجع
____________________________________
هلاو بنات اسفه كلش كلش ع الاتاخير بس والله صارلي يومين مافتحتن نت ولا فيس ولا واتباد وهسه بس فتحت انزل البارت واسكر
ونزلته بدون تعديل هسه اعذروني من اتفضى شوي اعدله

مع تحياتي الكم. رين الزين