____________________________________
بعد ماحددو موعد العرس
اجتي سناء ثاني يوم وراح تبقى عدنا ليوم العرس
وهناء ورهف اجو بنفس اليوم الي اجتي بي سناء وراح يبقن عدنا عشان ثاني يوم نروح للسوك اكمل جهازي
عمتي ام صكر كالت ماراح تروح معانه لان رجليها توجعها مااعرف عمي عباس اتفق مع صكر علي المقدم والمؤخر ضلو عمتي واخوات صكر عندنا
وحسيت هناء وسناء اخوات صكر فرحانين لأنه صكر راح يتزوجني وكل شوي يحضنوني
رهف رادتني انام معاها بغرفتنه بس عمتي مارضت .وانا ماحبيت ازعل عمتي وضليت معها
رهف وعمتي هناء باتو بغرفتي وهناء وسناء بغرفة ثانية هاي للخطار اخلاص ماشفتها باليوم اللي اجو فيه طلعت بس سلمت عليهم ودخلت غرفتها وعمتي كانت تاخذلها الاكل لغرفتها
وكل شوي تروحلها تضل معها شوي وترجع النا
ثاني يوم من الصبح عمتي هناء اجت كعدتني حتي نروح للسوك لبست عباتي وحجابي وطلعت لكيتهم جاهزين كلهم وصكر هو اللي راح يودينا
طلعنا برا للسيارة وركبت عمتي هناء كدام وانا وهناء وسناء ورا
رهف ماجت معنا كامت الصبح دايخة و تعبانة من الحمل صكر ضل يتكلم مع اخواته وعمتي هناء وفرحان اول مرة اشوفه هيج يحجي ومنطلق ويضحك
وصلنا وصكر نزلنا وانطى لعمتي هناء فلوس حتي نجيب كل شيء نزلو هما واجيت انزل انا صكر صاحلي
صكر. همس كل اللي تردينه خلي عمتي تجيبه الج ومايهمج فلوس ماشي
همس. ماشي
صكر. اليوم مالبستج بوشية حتي ماتتقيدين وانتي جاي تشترين اشيائج بس مرة ثانية راح تلبسيها
ضجت حيل هاي البوشية صارت جزء من ملابسي ولازم بكل طلعة البسها
همس. بس ليش البس بوشية انا مامخليه شي علي وجهي ابدا
صكر. ميخالف اني ماريدن احد يشوف وجهج الحلو وغمزلي
انصدمت حسيت خدودي صارن نار من خجلتي اول مرة صكر يحجي معاي بهاي الطريقة
ضحك وكالي انزلي يابه موجلمة هاي وصرتي حمرة طماطايه نزلت لكيتهم واكفين منتظريني وهناء تغمزلي وتضحك سويت حالي مامنتبهة الها
هناء. هاا حبيبة ليش صاحلج صكيير
همس. هااا ماكو شي بس يوصيني اشتري كل اللي أريده
هناء. اي اي صدكتج انا وليش من نزلتي خدودج جنها طماطه هااااا
همس. م ماكو شي
ولحكت عمتي حتي اخلص من لح هناء دخلنا السوك واشتريت جثير اشياء ملابس هواي وعطور ومكياجات
واكسسوارات
وطبعا السوك مايخلى من الشباب اللي كل شوي يرمون كلمة وانا اسمع واحس رجلي ترجف وهما وصوني مااجيب طاري لصكر عن هاي المعاكسات لأن ممكن يتخبل
هاي مايعرفون انا اخاف اكول لصكر اي شي مو اروح وأكله علي صار عمتي هناء والبنات ضلو يختارون معي تعبنا من كثر اللف وعمتي هناء كالت نرجع للبيت وباجر نجي نكمل ونجيب الذهب ونحجز البدلة والصالون اتصلت سناء علي صكر اجا اخذنه
بس السيارة ماراح تكفينا والأشياء اللي اشتريناها معانه
اتصل صكر علي ايهم يجي علينا ضلينا منتظرين بالسيارة والجنط اللي اشتريناها مصفطة بالأرض يم السيارة راح صكر اشترالنه عصير واجه سال عمتي هناء
صكر. خلصتو كل شي عمة
عمتي هناء. لا والله وين نلحك ونخلص كل شي بيوم
راح نرجع باجر ان شاء الله نحاول نكمل
صكر. ان شاء الله
اجا ايهم وصكر خلاهم يركبون معه كلهم
وخلاني انا وغراضي معاه بسيارته هههههه
خلي شوية اشياء بجنطة السيارة والباقي عالكرسي الورا وانا ركبت كدام
جنت خجلانة منه حيل بعد غمزته الي الصبح وبنفس الوقت خايفة من يوم اللي ضربني بيه واخاف ابقى معاه بمكان لحالي مااعرف ليه احسه باي وقت راح يضوج ويضربني ركب وشغل السيارة وطلع طول الطريق يحاول يحجيني وانا ارد بكلمة لو اثنين
وصلنا البيت ونزلت طلعو عمتي هناء والبنات ساعدوني اشيل الجنط شلنه منهن شوي وصكر شال الباقي دخلتهم غرفة عمتي لان غرفتي صكر راح يجيب الغرفة الجديدة عليها باجر
اجتي اخلاص ضلت تتفرج عالاشياء من غير استئذان حتي ضلت تطلع وتتفرج وتكوم علي بعضه ماتلمه حتي وترمي الملابس بغل استغربت منها بس ماحجيت
ليه تسوي هالشي وليش رغم كرهها الي وافقت أن صكر يتزوجني
اخلاص. مو هواي هاي الملابس
سناء. لا هاي عروس وحتي ماكملنا الها لسة باقي أشياء راح نجيبها باجر
اخلاص كلبت وجها ضاجت ورمت اللي بايدها وطلعت لغرفتها وعمتي ام صكر طلعت وراها بعد شوي اجتي رهف وكعدت تتفرج عالملابس وتلمهم بجنطهم انا وهي وسناء وهناء بس طول ماتتفرج سرحانة كأنها تفكر بشي
.......................
رهف
بعد ماكلي ايهم علي قرار صكر ونهوته علي همس ضجت منه كلش وخفت علي همس ترفض ويتزوجها غصب لو يضربها لاني أعرفه عصبي وبوقت عصبيته مايشوف كدامه
رحت بعد فترة لبيت اهلي لاني ماجنت اروح اخاف همس تحس اني زعلانه وتسالني وهما موصين ماحد يكوللها لان صكر هو اللي راح يكلمها
يمكن ارتاحيت شوي لما عرفت صكر راح يحجي مع همس ويقنعها بالزواج منه بهدوء
رحت كعدت مع همس شوي وضلت تعاتبني لاني ماازورها وتحججت بحملي لاني قبل يومين عرفت حالي حامل باول شهر لما تعبت وايهم وعمتي اخذوني للطبيبة وطلبت مني التحليل وعرفت حالي حامل شكد فرحت وايهم وعمتي حسيتهم طايرين من فرحتهم بهلخبر وايهم كل شوي يضحك ويحمد الله
حجيت لهمس اللي صار فرحت ونست عتبها ونست زعلها وباركتلي وضلت تدعي يتم حملي علي خير انا دائما استبشر بدعوة همس احسها يتيمة ودعوتها مستجابة
ضليت عندهم يومين لاني جنت تعبانة من النساوة وعرفت صكر كلم همس وتركها اسبوع تفكر
رجعت لبيتي وجنت شاكة أنه همس راح ترفض بس اللي استغربته موافقتها وجنت عند اهلي بيوم واجه عمي عباس حتي يسال همس علي موافقتها
هاا علي أساس لو رفضت صكر راح يتركها مثلا
ووافقت وصكر حدد العرس بعد 6 ايام
حاول عمو عباس معه حتي يسوي عقد وخطوبة بس وياجل العرس لبعدد سنوية بابا حتي يكدرون يسوون الها عرس وزفه بس صكر ماوافق يسوي العقد وماوافق وصمم العرس بعد اسبوع
همس سمعتهم وخافت لما سمعت مايكدر يسوي عرس يعني ماراح تلبس بدلة ولاتروح للصالون الفطيرة كل فكرها الزواج بدلة وصالون ماتعرف شي
طمنتها أنه راح تلبس البدلة وتروح للصالون فرحت وماهمها العرس ولا الزفة
فرحتها بهاي الأشياء البسيطة تاكد حرمانها من كل شي وماانسي أنه صكر منعها تحط مكياج بحنتي
وثاني يوم منعها تحضر عرسي فهاي الاشياء بالنسبة الها كلش جبيرة
امي كالتلي اتصل علي سناء وهناء يجون واكوللهم أن العرس بهاي الايام حتى يجون يساعدون همس تجهز اتصلت كتلهن وفرحن حيل لأنهن جانن يتمنن صكر يصير عنده ولد وبزواجه من همس راح يتحقق هالشي لأنه اخلاص مستحيل يصير عندها حمل
وحتي اخلاص هما مايحبوها هالكد يحبون همس ودائما يتمنونها لصكر وأنها ماتطلع من بيتنا
ماجذبن خبر واجت سناء ثاني يوم بعد الظهر وهناء حتي يضلو لميعاد العرس رحت عليهم ونمت عند اهلي بعد مالحيت علي ايهم وبالويل ياللي وافق وكان خايف علي من روحة السوك ووعدته ادير باللي
وعمتي هناء اجتي تبات حتي ثاني يوم نطلع السوك من وكت لأنه ماباقي الا خمس ايام عالعرس واليوم هذا محسوب منهن يعني الوقت قليل كلش ولازم نخلص كل شي
كمت ثاني يوم تعبانة وماكدرت اروح معهم للسوك راحو هما وطولو يالله اجو جنت بغرفتي انا وهمس والغرفة اللي يم غرفتي غرفة صكر واخلاص وسمعت صوت اخلاص تحجي وصوتها عالي وامي تحاول تهديها طلعت حتي اشوف شنو اللي صاير سمعت كلامهن
اخلاص تصيح. انا مااااريد صكر يتزوجها انتي ضليتي تقنعي بيه وبالاخر ماحدا راح يخسر غيري
ام صكر. نصي حسج واسمعي وفتحي مخج صكر بموافقتك او من دونها راح يتزوجها انا وانتي ندري هو من زمان شكله هاويها وبعد مانهي عليها مستحيل يتنازل عنها وحتي لو هااا لووو ترك همس راح يتزوج غيرها لأنه يريد اطفال وانتي راح تضلين هيج
همس مالها اهل وماحدا راح يكدر يمنعنه
لازم نكمل اللي بديناه حتي نكدر نحقق هدفنه
اخلاص. بس انا اكرهها لهاي همس اكرههاا
ام صكر. تحملي هو وقت واللي نريده راح يصير
استغربت شنو خطتهم وليش تكولها همس مالها اهل
طلعت امي لكتني بوجها حسيتها انصدمت بس مابينت
ام صكر .... شكو رهف لسة تعبانة
رهف مابينتلها شي. هااااا لا ماتعبانة
ام صكر. الحمد لله تعاي ننزل الهم تحت يله
سبقتني ونزلت وانا نزلت وراها بس ضل الكلام اللي سمعته شاغلني وافكر بي شنو خطتهم وشنو قصدهم
قررت احجي لسناء اختي اللي سمعته اخذتها وصعدت لغرفتي وحجيت الها اللي صار كله
سناء. اكيد قصدها أنو اخلاص تتحمل حتي يصير عند صكر طفل وأنه همس ماغريبة
رهف. مااعرف بس حاسة اكو شي غلط
سناء. لا لاتفكرين هيج اكيد مايقصدون شى
اقتنعت نوعا ما وحاولت اتناسي بس ماانسي
والايام راح تبين كل شي
...........
همس
رحنا ثاني يوم للسوك حتي نكمل ونجيب الذهب وصكر جان يريدني البس بوشية وعمتي هناء وسناء ضلو يقنعوه يخليني اروح من غيرها
بالف ياعلي حتى اقتنع وراح معانه للسوك رحنا انا وعمتي هناء وسناء واجت رهف اليوم وهناء ضلت
رحنه لمحل الذهب وكالولي اختار اللي يعجبني
بس انا مااعرف بالذهب ولا اعرف شو هو المناسب
رهف اختارتلي طقم نازك وحلو عليه فراشات وقلوب صغيرة شكله حلو
وعمتي اختارتلي 6 اساور حلوات
وجابولي خاتم ودبله راد صكر يحاسب ونطلع بس
رجع واختار حزام ذهب ينلف عالخصر ضخم وجبير حيل وشكله غالي
عمتي سالته. ليش هذا عمة
صكر. هايه هدية عمتي لناس غاليين عليه كلش وباوعلي
صكر اخذ الحزام بعلبة لوحده وأخذه بايده ماحطه مع باقي الذهب الظاهر مايريد احد يشوفه
اخذن الذهب وطلعنا حتي نكمل باقي الاشياء
دخلو لمحل يبيع داخليات انحرجت حيل لأنه صكر معنا باوع علي وضحك وبعدين كال راح اروح حتي تاخذو راحتكم ولما تخلصون خابروني
دخلو وانا رحت اختار الي ملابس داخلية ولكيت عمتي ورهف وسناء يختارن قمصان قصيرة ومشلتحة
رحت سألتهم
همس. المن تشترن هاي الشغلات
سناء بضحك. الج يعني لمنو
همس استغربت. ليه اني وشنو راح اسوي بيهم انا مالبس هاي الاشياء
سناء. لاحبيبة لازم تلبسيهم كل عروس تجيها هالاشياء
همس والله مالبسهم
رهف صارت تضحك
رهف. عوفيها ام فهد هاي مطفية من الرئيسي اعرفها.... وماتعرف اي شي بعدين انا افهمها
سناء وعمتي ضلو يضحكون
استغربت ليش يضحكون شكو من اللي كلته يضحك
خلصنا وطلعنا من المحل ورحنا حتي نحجز البدلة والصالون
طبعا ماراح يسوولي حنة هو العرس وهو العقد بس يعني كله بيوم واحد
رحت عند البدلات شفت البدل ودموعي نزلت اذكرت لما عمو سلمان جان دائما يكلي انا اللي راح اسلمج لرجلج بايدي وانتي راح تكونين احلي عروس لبست البدلة البيضه
اجت رهف الي شفتها مسحت دموعي بسرعة حتي مااخليها تضوج او تزعل وهي حامل
اختاريت بدلة لونها ابيض حلوة حيل بس كصة صدرها تبين نص صدري وضهرها شفاف والها كلوشة من تحت عجبتهم كلهم
وكانو يريدوني اختار بدل ثانية البسها واغير كل شوي بدلة كتعويض عن يوم الحنة بس انا ماوافقت مااحب هالشي هي بدلة واحدة حلوة تكفي وانا كنت اتمني البدلة البيضة احسها للاميرات
رحنا للصالون حجزنا الموعد وطلعنا اتصلو علي صكر شوي واجه ركبنا ركبت ورا يم رهف وسناء
وصكر عينه عليه بالمراية
صكر. خلصتو عمتي اللي ناقص ولا ترجعون يوم ثاني
عمتي هناء. لا ابني خلصنا
صكر بضحكة. والمحل اللي دخلتوه بالاخير جبتو منه كل شيء
عمتي ضحكت. اي جبنا كل شي لاتخاف
رهف وسناء يضحكن وانا اباوعلهم مستغربة ليش يضحكون
اجت عيني بعين صكر بالمراية شافني مستغربة من ضحكهم طكها ضحكة بصوت عالي لما عيونه دمعت
ضلو يضحكون شوي وانا نظرتي الهم
صكر بهالايام متغير مو كأنه صكر العصبي لا جان فرحان ومنطلق يسولف ويحشش ويا الكل الله يهدي ويضل هيج على طول بس كأنهم مجانين ويضحكون من دون سبب وصلنا ونزلنا ورجينه الذهب لعمتي ورهف دخلت باقي الملابس علغرفه وقفلت عليهم حتي ماتجي اخلاص تقلب فيهم
عمتي ام صكر عجبها الذهب
اجتي اخلاص ضلت تتفرج عالذهب وهزت رأسها
اخلاص. وليش كل هالذهب مو جثير
سناء. لا مو جثير هموسة تستاهل اكثر
اخلاص بضوجه. ماجبتو الا الذهب وين باقي اللي اشتريتوه
رهف باوعتلها. ماشترينه شي هو الذهب وحجزنه الصالون والبدلة بس
اخلاص قلبت عيونها وتركتنا وطلعت مااعرف ليش كل مااشتري شي تجي تشوفه شنو هدفها من هالشي
رحت لغرفة عمتي سبحت وغيرت هدومي وصليت فرضي
وطلعت اساعد ام احمد اللي صارلها فترة جبيرة من بعد موت عمو ماكانت تجي لان كانت مريضة
خلصنا الغدا وصبينا وصكر اجه من الديوان اتغدا هو وايهم خلصنا الغدا ولمينا السفرة وهناء رفضت اغسل الاماعين تكولي انتي عروس غسلتهم هي وام احمد كملو المطبخ رهف رجعت بيتها مع ايهم وكالت اجي باجر وايهم اخذ عمتي هناء يوصلها
صكر كال ادخلو غرفكم راح يجو ناس يشيلون الغرفة القديمة اللي جانت الي انا ورهف وراح ينصبون الغرفة الجديدة راحو سناء وهناء لغرفة الخطار وعمتي راحت مع اخلاص لغرفتها وانا دخلت غرفة عمتي حطيت راسي عالمخدة ونمت ماحسيت بشي من التعب واللف بالسوك
كعدت المغرب علي صوت سناء تصحيني
سناء. همس كومي حبيبة صار المغرب ومو زين النوم بهالوقت
همس بصوت ناعس. ايه كمت كمت
سناء كومي يلا راح نطلع غراضج بالغرفة الجديدة تعاي معانهحتي ترتبينهم علي كيفج
همس. ماشي اغسل وجهي بس
سناء. راح اسبقج انا وهناء ننقل الجنط لفوك وانتي الحكينه
طلعت ورحت غسلت وجهي وطلعت وراها لكيتهن ديرتبن الملابس بالكنتور
جانت الغرفة ضخمة وحلوة احساس حلو انه هاي راح تكون غرفتي وخاصة الي طول عمري مالي شي خاص جنت أنا ورهف بغرفة واحدة
وبعدها رحت مع عمتي بغرفتها ماجان الي شي خاص بيه فد يوم مو معني هيج أني جنت كارهة اني مع رهف بغرفة وحدة سويه لا والله جنت مرتاحة معاها واحبها بس حبيت يكون اليه شي خاص
رحت ساعدتهم وخلصنه ترتيب الملابس وطلعوني وهما يكملون باقي الغرفة ويفرشوها ورفضو اضل معهم حتي اشوفها يوم العرس مفاجأة
طلعت وتركتهم سناء وولدها مااجو معها كالت راح يجون مع ابوهم بيوم العرس عندها ولدين وبنت ابنها الكبير عمره 17 اسمه فهد وبعده بنتها ندي عمرها 14 وابنها الصغير اسمه محمد عمره 11 سنة
ماتجيبهم معاها الا قليل
لان ابوهم مايوافق يضلو برا البيت وقت طويل
زوجها يكون اخو اخلاص نزلت لعمتي تحت كعدت بسدها وحطيت راسي بحضنها
همس. شفتي غرفتي يمة
ام صكر. ايه حبيبتي حلوة الله يسعدج ويهنيج
همس. تسلميم الله يخليلياج
....
مر يومين وباجر العرس اجت عمتي صابرين اليوم واهل اخلاص اجو كمان جانو ماطيقيني وانا ماكعدت معاهم لان اعرفهم يكرهوني دخلت لغرفة عمتي وضليت بيها اجني رهف وهناء وكالولي راح يسوولي جسمي رفضت وخفت اقنعوني أنه لازم كل عروس تسوي هيك
سوولي جسمي كله بالشيرة من فوك لجوا علي ماخلصو حسيت روحي طلعت ضحكو وتركوني اروح اسبح ورهف كالتلي لما تسبحين تعالي لعندي بغرفة الخطار اللي كاعدين بيها هناء وسناء اريد احجي معاج بموضوع مهم
رحت اسبحت بالحمام اللي بالغرفة لان كل غرفة الها حمام خاص بيها حسيت جسمي بعد ماسووه صار يبرك من البياض خلصت ونشفت جسمي لبست ملابسي طلعت لكيت عمتي كاعدة بالغرفة
ام صكر. خلصتي يمة اجوي البنات سولج جسمج
همس. اي يمة بس والله طلعت روحي من الوجع
ام صكر. معليش حبيبة لازم هيج
همس. وليش لازم اذا بس ايدي راح يطلعن من البدلة
ام صكر. تعالي كعدي هنا
كعدت بسدها كالت
ام صكر. انتي تعرفين اللي راح يصير باجر
همس. شنو راح يصير مو باجر العرس وراح البس البدلة واروح للصالون
ام صكر. ايه ادري وبعد ماتعرفين اللي راح يصير بينج انتي وصكر
همس باستغراب. شنو اللي راح يصير مااعرف
ام صكر ابتسمت. هااااا لا ماكو شي شوفي اول ماتطلعون للغرفة صكر راح يجرح ايدك جرح صغيرون ويحطه عالمنديل الابيض وينزله النا
وبهيك تكونو اتزوجتو
همس .... ايه مثل المنديل اللي كان بيوم عرسه هو واخلاص
ام صكر..... ايه مثله ... شفتي لما الرجل يبوس مرته بالافلام ...
همس .... اي
ام صكر .....وبعدها يجرح أيدها ويكونوا اتزوجو
همس .... اي
ام صكر ..... وهو هاد اللي راح يصير
همس .... ماشي يمة
اجت رهف الي
رهف .... مو كلت لما تخلصي تعي عندي احكي معك
ام صكر ...... شو اللي تريدي تحكيه انا فهمتها كل شي
رهف ...... ماشي والله كنت شايلة هم كيف راح احكيلها
استغربت ليه تشيل هم مو عمتي حكتلي كل شي والموضوع عادي مايستاهل تشيل همه
عمتي خلتني عندها باقي اليوم ولو طلعت انا معها ماخلت رهف تحكي معي
يمكن تستغربو كيف عندي 16 سنة ومااعرف اي شي بهالموضوع
بس فعلا ماكنت اعرف لاني ماعمري تكلمت مع احد بهالشي وحتي محد يحكي بهالاشياء كدامنا وصكر كان مانعني اروح لاي مكان وحتي ممنوع اروح لعند بنات عمي
هالشي خلاني انطواءية شوي
حتي لما كانو يجو عندي بنات عمي كنا نكون كلنا كاعدين مع بعض وعمتي ام صكر معنا فكلامنا يكون محدود عالدراسة وهالاشياء
حتي رهف ماكنا نتكلم انا وهي ابدا بهالكلام
وكان كل حياتي دراسة وبس
وحتي تليفون ماعندي بس رهف عندها لما دخلت الجامعة عمو سلمان جابو الها
وكان واعدني لما ادخل الجامعة يجبلي تليفون
وبالمدرسة درسنا عن التلقيح بس المدرسات يشرحولنا شرحهم سطحي وبس يريدو يخلصو الحصة ويطلعو
فكنت جاهلة جدا بهالشي
ولما عمتي ام صكر حكتلي لكيت الموضوع سهل جدا وعادي
اجا ثاني يوم وصحيت من الصبح اتريكت انا ورهف بغرفة عمتي ماطلعت ماحبيت اشوف اخلاص واهلها
خلصنا ورحنا الصالون انا ورهف وهناء معنا
صكر راح يوصلنا وطول الطريق يوصي هناء مايبان مني اي شي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!