رواية عآمـلوني گ فصـليه بقلمي ايمان محمد وٌ رين الزين الفصل الخامس 5 - بقلم آلگآتبه تآج آلعرآق

بعد رآح وخسـرتهہ. بعد رآح مـن آديهہ

آلگلب صـآح وعذرتهہ. آنگسـر گلبي خطـيهہ
____________________________________
مـسـآئوووو يآحلوين
گآل آگو تقصـير مـن نآحية آلروآية ليش بشـنو دنقصـر
هہذآ آحنهہ نكتب ونعدل وننشر بلوقت
اما من ناحية مواعيد التنزيل ف اني كلت كل سبت واربعاء ينزل بارت واني انزل بليل يعني بحدود ال 12 و ال 1 اوكي هاي اني داكولكم علشان محد يشتكي من التأخير

روآيه عآمـلوني گ فصـليه

بقلمـي. رين آلزين و آيمـآن مـحمـد
____________________________________

دخلنا لكينا اخلاص فاحطة من البجي وعمتي تهدي بيها
رهف سالت شكو شصاير شبيها اخلاص

ام صكر. ماكو شي روحن لغرفتجن يلا

رهف هزت ايدها مو عاجبها الكلام لأن عمتي دايما مفضلة اخلاص حتي على رهف مفضلتها رحنه غيرنا ملابسنه ورحنا نساعد ام احمد بالمطبخ وبصب الغدا لانوعمي وصكر قرب وقت جيتهم

ضلينا بالمطبخ شوي واجه عمي وبعدها بشوي اجا صكر صبينا الغدا وكعدنن ناكل تغدينا كلنه بس اخلاص مااكلت تكول مالها نفس بعد الغدا عمتي دخلت هي وصكر على غرفتها طلعو بعد شوي وهو صعد لعند اخلاص فوك

العصر نزلو اخلاص وصكر مبدلين وعمتي لبست عباتها وطلعو مع صكر مادري لوين ولما رهف سالتهم وين راح يروحون عمتي كالت للسوك
بس ماصدقنا لان صكر بعمره مايروح معنا للسوك
ضلينا انا ورهف ندرس لحتى اجو

مافتت عمتي وجها مكدر واخلاص عيونها حمرررر وخشمها احمر مبينة باجية هواي وصكر مبين معصب كلش استغربنه انا ورهف شنو اللي مغيرهم هيج ورهف ضلت تسال وماحصلت جواب
انا حتي اخاف أسأل عمتي واخلاص يرزلوني ويفشلوني جنت احس نفسي نقطة عالشمال دائما بالنسبة لكل اللي بالبيت

الوحيدين اللي حبوني رهف وعمي وصكر جان ماله شغل بيه ولا يضايقني بس هسه صارله فترة حاطني براسه مادري ليش ودائما يرزلني علي أتفه الاسباب حتى

مر يومين احس عمتي واخلاص مو على بعضهن ودايما وجوهن مكدره ومتضايقات صكر اخذ اخلاص وراحو لبغداد كالو راح يضلو يومين

مرة كالتلي رهف انها سمعت عمتي وهي تحجي وي سناء وتحجيلها أنه اخلاص اتاخر حملها وعمتي خذتها لدكتورة تشوف سبب تاخير الحمل والدكتورة كايلتلهم أنو عدها مشاكل بالرحم تمنع أنو هي يصير عندها حمل وصكر اخذها لدكتورة ثانية وكايلة نفس الكلام وان هي مستحيل يصير عندها حمل

كال صكر صديقه مرته اتاخرت هيج بالحمل كايله علي دكتورة ببغداد مرته تابعت عندها والله رزقها وصار عندها حمل وصكر اخذها اخلاص عهاي الدكتورة بلكي الله يرزقها والله دعيت الها الله يراضيها بطفل لأن كسرت خاطري يومين متواصلات تبجي وماتاكل الا كم لكمة لما عمتي تغصبها

برغم معاملتها اليه وكرها بس ماحقدت عليها ودعيت الها والله لو عرفت شنو مخبية الي الايام مع اخلاص جنت دعيت الله ياخذ عمري ولا اعيش اللي عشته

مرن يومين ورجع صكر واخلاص وجها يبين فرحانه شوي صكر كال لعمتي أن الدكتورة كتبتلهم علاج لاخلاص تاخذه وتتابع معها وكالت ان شاء الله اكو امل ويصير عندها حمل

اول شي من اخلاص عرفت بتعبها جانت عايفتني بحالي أو بالاصح ملتهية عني بعلاجها ومتابعتها
مرت فترة ورجعت مثل قبل وزادت صارت حتي تضربني لاتفه الاسباب وعمتي تايدها دائما بس
رهف جانت تدافعلي بس ماتكدر علي اخلاص وعمتي

مر ثلاث سنوات وصار عمري 16 سنة
كل مااكبر أشبه امي اكثر ودايما تجيني خطابة بس عمي مايوافق الا اكمل دراستي واصير دكتورة

طول هاي المدة واخلاص تتابع مع دكتورتها بس ماصار عندا حمل والدكتورة باخر زيارة الها كايلة لاخلاص انو بعد ماكو امل بحملها وصار من المستحيل تحمل او تجيب جهال

صكر بالفترة اللي مرت وهو زاد تحكمه بيه
وعمي يدافعلي صار بلبسي وكل شي بحياتي يتدخل فيه وهذا الشي جان يخلي اخلاص كرهها اليه يزيد

اما رهف خطبها ايهم ابن عمو صالح من سنة والزواج بعد ماتخلص الجامعة ايهم وأبوه حجو ويا عمي سلمان انو الزواج يسوونه هسه بهاي الايام وتكمل بالجامعة عند ايهم من يزوجون عمي سلمان وافق عالعرس وتحدد بعد اسبوعين

جنه مشغولين بجهازها وكل يوم نروح للسوك عمتي ماجانت تريد تخليني اروح معاهم بس رهف تصمم أني اروح معاها وتحت إصرار رهف مرت عمي ترضي بس احسها ماتريدني اروح معهم

مر الاسبوعين بسرعة واليوم الحنه مالت رهف

كعدت الصبح ب 8 تذكرت رهف راح تزوج وتتركني . هاي اختي واكثر والله لو عندي اخت مستحيل تحبني مثل رهف جانت تدافعلي وتوكف معايه بكل شي حسيت حالي صرت وحيدة من دونها دمعت وضليت ابجي لما حسيت عيوني صارن نار من دموعي علي صوت شهكاتي كعدت رهف كامت من فراشها بسرعة واجتي لعندي وتسالني شو اللي صار

همس. منو الي بقالي بعدج رهوفه منو يدافعلي عمي سلمان ماموجود دايما حتي يدافعلي
منو يحميني من اخلاص منو رهف منوووو وضليت ابجي والله بوقتها حسيت كأنه امي اللي راح تفاركني مو بنت عمي

رهف كامت تبجي معاي
رهف. والله ما اعوفج مو هذا بيتي هنا بسدج وراح اكون معاج وانتي تجين لعندي ومانتفارك والله

كامت تهديني كمت اني غسلت وجهي ونزلت مع رهف اتريكنا سوا بس ما اكلنه ولا وحدة منه اكلت جنا نداري دموعنا ورا شوي
خلصنا ولبسنا حتي نروح عالصالون انا ورهف وهناء لبسنا العبي وطلعنا برا حتي يوصلونه للصالون
صكر شافنا اجه علينا

شغل سيارته وركبت هناء كدام وانا ورهف ورا وصلنا عالصالون نزلت هناء ورهف اجيت انا انزل وكفني صوته

صكر. سمعي همس لا تحطين مكياج علي وجهج

همس. مو مو كل البنات راح يحطون ليش بس انا

صكر. مالي شغل بالبنات انا اللي يخصني بس اتكلم عنه

استغربت منه كلهم بنات عمي وبنات عماتي يعني كلهم يخصونه مثلي بس فكرت لان اتربيت ببيتهم يحسني مسؤليته

صكر. هيووو لج وين صفنتي رهف تصيحلج انزلي يلا وتنفذين اللي كلته

همس. هاااا اي اي بس صگر فدوة شوي مكياج صغيرة والله ماازود

صكر نتر بيه. انا شنو كلت ماكلت لااااا افهمي

نزلت ودمعتي علي خدي وعفت هناء تحجي ويا .دخلتني رهف لجوا الصالون وضلت تهديني
دخلت هناء. اووووف رأسه يابس هالصكر

عرفت أنه هي جانت تحاجيه حتي احط مكياج واسوي شعري مثل البنات وهو مارضى ابتسمت ودموعي تنزل علي خدي تحكم صكر بيه وكره اخلاص ومرت عمي ورزالاتهم اليه خلتني ضعيفة شخصية اخاف اكول رأيي واخاف أسأل عن اي شي

والله لوما رهف وعمي سلمان الله اعلم شنو الي جان ممكن يصيرلي

بلشت ام الصالون برهف وطلعت فدشي وهناء كمان حطت مكياج وسوت شعرها
بس انا خفت احط مكياج وصكر يرزلني كدام البنات
خلصنا واجا صكر علينا اخذنا ورجعنا للبيت طول الطريق عينه علي بالمراية

صكر باستهزاء. عفية باللي تسمع الكلام

تجمعت الدموع بعيني حسيته يضحك علي بينه وبين نفسه واني مثل اللعبة يحركها بكيفه

وصلنا ونزلنا بوجهنا للبيت دخلت رهف تلبس فستانها وهناء
كان مالي نفس البس أو اسوي اي شي
كل البنات حاطين مكياج الا انا
انا مو طفلة وازعل من هيج شي بس اللي زعلني أنه احس حالي اقل منهم كل شي بحياتي بايد صكر
صح عمي سلمان يدافعلي ومايرضى علي صكر لما يضايقني بس اوقات لما اشكيله يكولي مايخالف ابن عمج وخايف عليج يابه

لبست فستاني لما رهف زعلت مني وحلفت ماتلبس ولا تطلع برا الا وانا معاها
فستاني لونه بنفسجي غامق وطويل واله فتحة من الجنب اليمين كان حلو حيل فردت شعري هو ناعم مايحتاج استشوار
طلعنا برا لكيت عمتي هناء وعمتي صابرين رحت عليهم وحضنت عمتي عمتي هناء وبعدها سلمت علي عمتي صابرين وحضنتها
عمتي هناء. اللهم صل على محمد وال محمد شنو هذاا الجمال حبيبة

همس. تسلمين عمة

عمتي صابرين. والله همس احلي بنت هنا شوفي البنات ملبخين وجوهن وهاي من الله حلوة ماتحتاج
ابتسمت لعمتي وسكتت

شفت اخلاص لابسة فستان اخضر وحاطة مكياج ومسوية شعرها تسريحة
حزنت علي حالي يعني ليش صكر منعني انا ومرته مامنعها ضليت كاعدة بسد عماتي شوي ورحت لرهف وركصت معها حتي ماتزعل مني اجو اخوات ايهم وامه ونسوان اخواته عنده أختين اكبر منه ومتزوجات
وعنده اخوان ثنين مزوجين وهو أصغر واحد جانو فرحانين برهف حيل ونسوان حموينها لرهف يحبوها وضلو يركصو معها وامه تهلهل

دعيتلها من كل كلبي الله يسعدها ويوفقها بحياتها
خلصت الحنة وراحو المعازيم واكو ناس باتت عندنا كرايبين عمتي ام صكر واهل اخلاص ضلو حتي يحضرون العرس جنت احاول ابتعد عن اهل اخلاص ومااختلط بيهم لان هما بس يشوفوني يضلون يضايقوني وإذا اتكلمت معهم أو سالت عن اي شي يفشلوني

نمت بحد رهف وكمنا نحجي بعضنه ونسولف كأنه ماراح نشوف بعض مرة ثانية غفينا انا وهي من دون مانحس كعدنه ثاني يوم ورهف راحت هي واخلاص وهناء للصالون انا مارضيت اروح لأن صكر مدايرضى يخليني احط مكياج أو اسوي شعري

هما مشو للصالون وانا من القهر ضليت ابجي لمن عيوني ورمت وحسيت صدري وجعني من كثر البجي
عمي سلمان ماشفته صار يومين مشغول مع خطاره
ضليت شوي وبعدها بدلت ولبست فستاني لونه ازرق قصير وكلوش رهف اللي اختارته الي خلصت وسويت شعري وماحطيت بوجهي اي شي .. نزلت تحت انتظر رهف لما تجي من الصالون

ضليت شوي وبعدها كالو اجت العروس
دخلت رهف لابسة الفستان الابيض وملبسينها كبوس للبدلة لان صدر البدلة عاري ومفتوح حضنتها وضحكت بوجها واني احاول ابقى كاتمة دموعي هوسولها شوي ورا ساعة كالو اجا العريس لبست عباتي بسرعة ووكفت يم رهف

دخل العريس وأخوانه ومسك ايد رهف وباسها بكصتها وخذاها وطلعو طلعت ورا رهف حتي اروح معاها للزفة ركبت هي وعريسها بالسيارة وام العريس ركبت وياهم كدام

جنت حابة اركب ويا رهف بس لما لكيت امه لايهم ركبت ماتكلمت ورحت اركب مع بنات عماتي
شافني صكر ماشيه صاحني رحتله لكيت اخلاص وامها راكبين بالسيارة ورا وعمتي كدام واخلاص حاطة مكياج ومسوية شعرها ورامية الحجاب علي رأسها ...طيب ليش رفض اسوي شعري أو احط مكياج اتنهدت يعني وضليت ساكتة رفعت رأسي لما صكر حجاني

صكر. وين رايحه

همس. رايحة اركب ويا بنات عمتي هناء

صكر. اممممم

مد ايديه بجيوب دشداشته وكأنه يدور علي شي

صكر. طلعي لغرفتي نسيت تليفوني فوك هاتيلياه

همس. بس الزفة راح تروح

صكر. لاتخافين انا متانيج راح تركبين معانا اكو مكان هنا واشر عالمكان اللي بحد اخلاص

ماكدرت اتكلم ولا حتي ارفض اركب معهم رحت للبيت حتي اجيبله تليفونه فتحت باب غرفتهم وضليت ادور عليه مالكيته سمعت صوت هورنات السيارت وهي تروح بس جنت افكر أنه صكر منتظرني
مالكيت التليفون ونزلت تحت اكول لصكر مالكيته

بس مالكيت اي سيارة ولا حتي صكر كلهم راحوا
كمت أتلفت حولي وانا مصدومة معقوله طلعني فوك حتي مااروح معاهم للزفة معقول حرمني من زفة وعرس اختي لا لا لا اكيد حيرجع ياخذني اكيد
شافني عمو سلمان جان كاعد ب الديوان اجاني

سلمان. همس ليش مارحتي معاهم بوية

همس. مو صكر كالي اطلع اجيب تليفونه من الغرفة وهو ينتظرني ونزلت مالكيتهم بس اكيد راح يرجعلي عمو راح يرجع ياخذني موو

عمي صگ علي سنونه وطلع تليفونه وبعد عني شوي ماعرفت منو ديكلمه بس صوته عالي تقربت منه سمعته ديحجي مع صكر

سلمان. وينكم صكر ليش عفت بنت عمك وماخذتها معاكم

ماعرفت شو رد عليه صكر بس عمي حسيته كلش ضاج منه

سلمان. وانت شنو دخلك عسى مايخطبونها كل الدنيا دتكسر خاطر هاي اليتيمة بسبب تفكيرك هذااا
وقفل عمي تليفونه بوجه صگر

همس. ها عمو راح يرجع صكر ياخدني احضر عرس رهف صح

عمو سلمان. دخلي بوية وبدلي ملابسج هاي ماحده راح يرجع هو سوه هذا الشي عشان ماتروحين معاهم للعرس وكل الولد راحو معاه والله لو اكو حدا هنا لاخليه يوصلك لعدهم

اتجمعت الدموع بعيني وشفتي كامت ترجف
حضني عمي وكمت ابجي بحضنه واناشغ من حركه كلبي وهو يطبطب علي ظهري

سلمان. لاتزعلين بويه لاتزعلين

همس. ليش عمو سوا هيجي وماخلاني احضر عرس رهف ماخلاني احضر عرس اختي

بقى عمي حاضني شوي ويهدي بيه بعدها دخلت جوا وعمو راح للديوان كعدت عالقنفة اللي بالاستقبال وضليت ابجي ليما تعبت مددت جسمي عالقنفة وضميت رجليه لصدري ودموعي علي خدي تجري ماعرفت شوكت غفيت بس كعدت علي صوت اخلاص وعمتي فتحت عيوني شفت صكر كاعد عالكرسي اللي مقابيلي ويتامل بيه فزيت من مكاني وصكر شاف دموعي اللي جافه علي خدي عقد حاجبه واتنهد
اخلاص بحقاره. ولج والله فاتج نص عمرج العرس طان يخبل والزفة كمان هههههههه

حسيت حالي انهضمت منها وتجمعت الدموع بعيوني

اخلاص والا ورهف جانت فرحانة كلش وضلت تركص وانا ركصت معها لما انهد حيلي

غمضت عيوني بقهر ونزلت دموعي علي خدي ومسحتها بسرعه بس صكر انتبهلي وحجه

صكر بنتره. اخلااااااص اسكتي دنعل ابو الزفة لابو العرس بطلي كلام فارغ

ام صكر. عوفها تحجي براحتها يمة فرحانة بعرس اخيتها

تركتهم وصعدت لفوك بسرعة رميت علي جربايه رهف وكمت ابجي بحركه

جنت افكر أن اليوم بجيت البجي اللي بحياتي مابجيته طلع اليوم اقل يوم ذرفت بيه دموع

مر علي زواج رهف شهر بهذا الشهر مارحت على بيت رهف إلا مرة وحدة هي ثاني يوم العرس صكر خلاني اروح معاهم بس رفض اروح بالسبعة مالتها

بعد اسبوع الامتحانات مالتي ضليت ادرس ودخل علي عمي ضل شوي كاعد معاي وكام يشجعني عالدراسة وأنه مهما صار لازم انجح واجيب مجموع يدخلني طب حتي احقق حلم بابا ورا شوي راح وعافني بعد ماحضني شوي استغربت وخفت ماادري ليش لما غفيت

كعدت الصبح كلبي مقبوض استغفرت ربي وصليت ونزلت اتريك بس جان مالي نفس كليت لكمتين و رتبت شوي بالبيت ورحت اساعد ام احمد بالمطبخ لان اخلاص مداتسوي شي جنه دنجهز الغدا وسمعنا صوت هوسة برا واصوات صياح عالية

طلعت برا اركض لكيت عمتي كاعدة بالكاع تصرخ وشاكة دشداشتها وتضرب على وجها ورجليها واخلاص واكفة بسدها تلطم علي وجها
انصدمت وجمدت رجلي كامت ترجف بعد ماتشيلني احس نفسي انشليت تماما......

يتبع

لتنسون
المتابعة
الكومنت
التصويت

وهذا حساب صديقتي ايمان الي دنكتب اني وياها الروايه سويه تابعو حسابها لان اوقات اني اغيب عن الواتباد ف هي الي تكلمني EmanMohamed11

وملاحظة هامه رجاءا حبايبي اني مداشوف تفاعل ع الروايه يعني احنه دنتعب بالكتابه والتعديل والمعاينه
والله دابقى سهرانه لل فجر واني اعدل بلبارت الي نكتبه اني وايمان اذا التفاعل بقى هيجي احنه حنوقف نشر الروايه حتى اشعارا اخر

اما اذا شفنه التفاعل يزيد راح نصير ننشر بين يوم ويوم واحتمال ها احتمال نصير ننشر يوميه

مع تحياتي الكم. رين آلزين