عآمـلوني گ فصـليه بقلمي ايمان محمد وٌ رين الزين الفصل الثلاثون 30 - بقلم آلگآتبه تآج آلعرآق

يآضـآلمـني مـآترتآح
ورآح تعلمـگ آلآيآم ربگ فوووگ رآسـگ شـووف صـآحي وعينهہ آبد مـتنآم يآضـآلمـني مـآترتآح رآح تعلمـگ آلآيآم
بآجر هم ورآگ حسـآب وين تروووح مـن ربگ يآگسـر گلوب آلنآس
صـعبهہ دمـعهہ آلمـظـلوم صـعبهہ نهآيهہ آلظـلآم
ربگ فوگ رآسـگ شـوف صـآحي وعينهہ آبد مـتنآم
عيني بعين رب آلگون ظـلمـگ مـآيخوفني
مـآعندي آني غير آللهہ ربي وهو يعرفني
جرح آلظـآلم آتحس بي يوم آلي يظـلمـونگ لو هسـهہ فرحت مـثلوو لآزمـ تدمـع
بسـ وجهہ آلگريمـ يدوم مـحد عآشـ بيهہ آوجآع ربگ فوگ رآسـگ شـوف صـآحي وعينهہ آيد مـتنآم
____________________________________

كل يوم يمر علي احس حالي بصراع واحارب حربين حرب ويا اهلي أو المفروض هما اهلي علمود ابني والحرب الثانية هاي حرب اصعب واقسى وهي بداخل عقلي شي بداخلي يكلي بس تموتين راح ترتاحين من كل هالشي وشي ثاني يكولي لا ما اموت لو متت منو لابني لازم مااضعف وأخذه من عيونهم طبعا بعد اللي جنت اسوية والعناد الي اعانده وياهم وضرب صكر اليه حسيت حالي داضعف يوم عن يوم صرت

مارادد مثل قبل ولا اسوي شي وأغلب وقتي ساكتة بس اباوع عليهم واتحسر علي نفسي وعلي كل شي
هما لما يشوفوني ساكتة يزيدون باذيتهم الي أكثر من جنت احجي وارادد سيوفي عمره صار 9 شهور وصار يزحف ويناغي كلمات مامفهومة واخذني صكر من كم يوم وعقدنا محكمة ما هتميت لان اعرف صار مصيري مرتبط بيه

بيوم اجتي عمتي هناء تشوفني لان صارلها فترة كبيرة ماجت سلمت عليه وحضنتني وانا بس سااااكتة ومستسلمة هي ضلت تحجيني وكل شوي تسالني عن شي وانا ارد بكلمة لو كلمتين هي تحجي وانا احس حالي اروح بعالم ثاني عيني علي حلكها بس احسها تتكلم لغة ثانية كلام مامفهوم هزت كتفي وهي مستغربة وضعي اجت عمتي سلمت عليها وكعدت ونزلت اخلاص من فوك وابني علي أيدها

بس مهما سرحت وعقلي فصل عن العالم بس اشوف ابني عيني تتوجه عليه واضل مباوعتله بعيوني
وانا احترك من حبه لاخلاص ولو بعدت عنه شوي يضل يصرخ وراها شالت عمتي هناء سيف وباسته وضلت تناغيه وهو يضحك هو ابني بسرعة ياخذ عالناس ومايخاف بس لو اخلاص بعدت عنه يضل يبجي

عمتي هناء. فدووة لولدنه اللي كبر وصاير مثل الكمر
ام صكر. ايي هو يشبه أبوه

عمتي هناء. ايه كله صكر بس عيون همس سبحان الخالق

ام صكر بتغليس. كوليلي شنو اخبار ابو سمر

عمتي هناء تنهدت. الحمد لله صار احسن والله كنت حاطة ايدي علي كلبي الفترة اللي مرت وكلت راح يصيرله شي بس الله ستر ويانه مالنا غيره الله يباركلنا بعمره

ام صكر. امين خيه الله يخليه الكم

ضلت تسولف هي وعمتي حسيت كعدتي وياهم مالها لزوم كمت من مكاني وطلعت لغرفتي وحطيت راسي عالمخدة وضميت رجلي لصدري شوية ونمت هاي عادتي من فترة لو حسيت بضيق او شي احس حالي اريد النوم هيج وبس احط راسي انام بسرعة
حسيت صوت عمتي هناء تصحيني بس انا مارديت هي نزلت وصوتها كله حزن بعد وقت

كمت علي صوت صكر يكعدني

صكر. همس همس كومي حبيبتي شنو هالنوم

حسيت عيوني ثكال وبالكوه فتحتهم واريد انام مرة ثانية

صكر براحه. الحمد لله هبطيني كلت صارلج شي صارلي ساعة اصحيج صايو نومج ثكيل كومي كالولي نايمة من الظهر وهسه المغرب اذن من شوي وعمتي هناء تحت ماراحت منتظرة تشوفج ورهف اجت تسال عليج يلا كومي

كانت ايده علي كتفي ويمسح علي ذراعي بعدت ايده عني وكمت واني ساكته غسلت وجهي ونزلت تحت
وهو وراي رحت كعدت عندهم

عمتي هناء. شنو الي صايرلج همس شمالج عمة احس كان مو همس اللي كدامي

ام صكر. مثل الوردة صايرة ماتشوفيها عقلت وماتسوي مشاكل وبس تسمع الكلام

عمتي هناء. هااي مثل الوردة لا والله بنت اخوي بيها شي وشي جبير ماتشوفينها وانت صكر ماحاس باللي يصير ويا بنت عمك ابني

صكر. ايه عمة والله حاولت احاجيها اكثر من مرة بس مثل ماشفتي ماترد أو تهز راسها بس انا شاك انو هاي خطة جديدة منها واكو شي براسها بس والله لو سوت شي هي تعرف شنو اللي راح اسويه

كنت اسمع وماارد حتي عيوني علي سيف وهو يزحف بلكاع ويلعب بالعابه شافتني اخلاص عيني عليه راحت شالته وكعدت كدامي وصارت تكله كول ماما كول بابا
حسيت بنار بصدري بس ساكتة وحتي الدموع ماكو دموع أو عيوني من كثر مابجيت خلصت دموعها رهف اجت يمي وتحاجيني وانا لا رد كعدو شوي وراحو
كالت عمتي اروح اجهز عشا رحت المطبخ بسكووت جهزت الاكل ونقلته عالسفرة وكعدت اكلت لكمتين واجيت اروح كالت عمتي روحي سوي جاي

رحت اسوي شوي ودخلت اخلاص المواعين وكالت اغسليهم وتريدين تولين ماراح نمنعج غسلتهم وطلعت غرفتي وانا عالدرج اسمع صكر يكلم امه انو هو شايفني اسوي كل شي واخلاص كاعدة ولازم تقسم الشغل علينه كملت لغرفتي رحت عالجربايه بملابسي المنكعة ماي رميت حالي عالسرير ورحت بسابع نومة ولا كاني كعدت المغرب وكل النهار نايمة

صحيت ثاني يوم صكر نايم يمي وملابسي اللي كنت لابستهم عالارض ولابسة ملابس ثانية ماعرفت منو بدلي ولا حسيت حتي كان الوكت بكيير يمكن الساعة 6 كعدت كدام الشباج وأتأمل الزرع وعيوني عالعصافير واتمني عندي جناح مثلهم وأخذ ابني واطير منا دماغي مثل العادة سرحت وانا اباوع علي كل شي حسيت ايد انحطت علي كتفي وصكر يهزني
التفتت شفته الظاهر هستوه كعد

صكر. يمتي صحيتي

همس. من شوي

صكر. كومي جهزيلي ريوك علي مابدل حتي اروح للدوام

هزيت راسي ونزلت تحت جهزتله الاكل فطر وشرب جايه وراح غسلت الاماعين بعده وكعدت بالصالة كعدن عمتي واخلاص جهزتلهم الريوك وكالتلي عمتي ادخل ارتب غرفتها رتبتها وطلعت كملت ترتيب البيت خلصت ورحت حتي اجهز للغده كل ايامي بهالشكل وكل ماسال ايهم عن خالتي يكولي لسة ماكو اخبار فقدت اخر امل ممكن يخلصني منهم

مرت الايام بهالشكل وقبل مدة سالني ايهم عن انو امي شون جانت تحجي وي خالتي اوتوصل الها
اتذكرت أن اكو مذكرة ببيتنا اللي بغداد امي مسجلة بيهم كل الأرقام كال راح احاول اروح بغداد واشوف مفتاح البيت ويا منو باي حجة واشوف هاي الأجندة
بس مر شهر وهو ماكالي اي خبر

...................

رهف

همس صارلها فترة متغيرة دائما ساكتة وتحت عيونها سواد وتباوعلنه بس وكل اللي يكولها علي شي تنفذه وكل مااجي اسال عنها يااما تكون نايمة أو كاعدة وساكته احسها تحترك من الداخل بس ماتبين عيونها بيها نظرة توجع الكلب بالاول جانت نظرتها تستنجد بينه ونظرة ضياع كأنها وحيدة مالها أحد
بس هسه نظرتها لامبالية كانو كان بداخلها شي ومات
لما احجي وياها تبقى تباوعلي واحسها ماتفهم حتي كلامي وأوقات ثانية تضل تهز بس براسها صارت تذبل يوم عن يوم وماحد بينا حاس بيها امي واخلاص مخلينها مثل الخدامة الهم وهي ماترادد مثل كبل لا تسوي اللي يريدوه بس اول ماتشوف ابنها عيونها لحالهم تتحول عليه تعلقه باخلاص وحبه الها كان يموت همس بكل ثانية تشوف وتحترك بس ماتكول تتدمر من الداخل بس من الخارج ساكتة مابيها شي اخلاص صارلها فترة تعلم سيف يكول الها ماما ويكول لصكر بابا وبالذات من تكون همس كاعدة تكعد كبالها وتضل تعلمه ايهم صارله فترة مشغول مااعرف بيش

مشغول ولا وين يروح هالايام وكل مااساله يكولي شغلة ضرورية ادعيلي الله يوفقني بيها واليوم سمعته يحكي بالجوال مع واحد وفرحان حيل ويكوله راح اجي اخذكم من المطار والله راح تفرح لما تعرف وانا ماكلت ردتها مفاجئة الها بس تشوفكم كلت اساله منو هاي اللي تفرح بس طلع مستعجل وكالي اجي واحجيلج علي كل شي

كلت اروح عند اهلي اكعد ويا همس شوي بلكت الله يهديها وتتكلم أو تطلع من هالحالة اللي بيها رحت سالت عليها امي كالت بالمطبخ رحت لعندها لكيتها تغسل الاماعين سلمت عليها وهي بس هزت راسها
ساعدتها وخلصنا المطبخ طلعنا كعدنه كبالهم بالصالة
واخلاص وامي كاعدين وسيف كاعد علي رجل اخلاص مثل عادتها تكعده علي رجلها كبال همس كانو تريد اضوجهاهمس ساكتة بس عيونها على ابنها ضليت اسولف ويا امي شوي ودخل صكر بملابس الدوام من برا ووراه عمي عباس كعدو كبالنا وصكر خلع سلاحه من الحزام وخلاه عالطاولة

عمي عباس سلم علينه واجا باس راس همس وضل يكلمها وباركلها لان صكر من فترة عقد محكمة وكال لعمي عباس اليوم وهي ولا هنا حتي التفت لصكر وسأله علي شي يخص الارض وضلو يسولفون ماعرف عن شي ثاني وسيف يلعب ويناغي وفجأة كال ماما بابا التفتنه عليه مصدومين هاي اول مرة يكول كلام مفهوم كل كلامه مناغية وماينفهم كام صكر عنده كعد يم اخلاص وضل يلاعبه ويكوله عيد بابا
منو بابا سيف يضحك ويأشر عليه ويكول بابا ومنو ماما يأشر علي اخلاص ويكول ماما وضل يساله ويعيد فرحان بيه رحت لعنده فرحانة بيه وعمو عباس كام يبوسه وهو عرجل اخلاص كعدت كباله وابوسه واضحك ااااااه كل مااتذكر هاليوم اتمني هاي اللحظة تنعاد ومااكوم من يم همس فرحتي بابن اخوي نستني همس نستني اختي وشنو اللي ممكن تحسه كنا كلنا ملمومين حوالين سيوفي ونلاعبه والتفتنه كلنا علي صوت سحب الزناد

لكينه بايد همس مسدس صكر موجهته علي صدرها وبعيونها نظرة ماراح انساها كل عمري نظرة احد انطعن من اقرب الناس اله نظرة المغدور اللي فقد الامل بكل شي صرخت لما شفتها صكر كام مفزوع يحاول يأخذ منها السلاح وهي ترجع ورا عمو عباس ضل يكلمها وهي ولا يمها

صكر. هاتي السلاح همس

همس. بعد مالي مكان بينكم ولا بالدنيا حتي انا مكاني بين اهلي كنت مفكرتكم اهلي بس وسفهه علي الدنيا وعلي زماني وباوعت لابنها وابني عمري حلم حياتي بس أخذه واحضنه وهسه ينادي لغيري ماما صدقو راح انتظركم بالمكان اللي راح اروحله ورب العالمين هو اللي راح يحكم بينا ياظلمة

صكر. بس انطيني السلاح واللي تريدي والله راح اسويه الله يخليج همس هاتي

همس. لا ماراح تاخذه الموت هو الحل الوحيد فكرت وفكرت مالكيت حل غيره

عمو عباس. استهدي بالله بنتي الموت مو حل والله كل شي ينحل انتي تردين تموتين كافرة

همس. الله يدري بالي يصيرلي ويعرف مالكيت غير هالطريقة ولو انتو كان بايدكم الحل من الاول بس كبرتو راسكو على همس

انا واكفة ابجي واحس روحي تنسحب من منظرها وكلامها وصكر الخوف اللي بعيونه يعادل خوفنا كلنا يريد بس ياخذ السلاح منها حجيت انا كلت بلكت تسمع مني وتعوف السلاح

رهف. همس عوفي السلاح الله يخليج تريدين تموتين تخلينب وتخلين ابنج

همس بصرخة. وووين انتي انتي مثلهم مايهمج غير نفسج وبس وشنو اللي سويتي اللي حتي اخذ ابني هااا جنتي تشوفيني اموت كل يوم كدامج وماحركتي ساكن وامج الله ينتقم منها ماوكفتيها عند حدها مخليتها تدمرني هي وبنت اختها حسبي الله عليكم كلكم عساكم لاتهنيتو بحياتكم ولا شفتو الراحة عسي حوبتي ماتتعداكم كلكم تريديني اتراجع لخاطر ابني هو وين ابني ابني مو الي حتي اتركه

صكر يصيح عليها وأوقات يترجاها تترك السلاح بس ماكو فايدة غمضت عيونها اللي صار كله بثانية صكر راح عليها اول ماغمضت عيونها حاول يمسك السلاح من أيدها وهي ضغطت وطارت طلقة الحمد لله اجت بالسكف لما صكر رفع السلاح من أيدها رمي السلاح بالأرض وضربها علي وجها وهي كعدت بالأرض ضلت تصرخ صراخها غريب كأنها فاقدة بس تصرخ وصكر كاعد يمها حاضنها ودموعه تنزل ويعتذر ويحجي وياها وفجأة سكتت وفقدت لاايد ولا رجل شالها صكر بسرعة وطلع يركض عالسيارة وانا وراه وامي واخلاص واكفين ولا حركو ساكن عمو عباس دموعه نزلت عليها وطلع ورانا طلعنا برا لكينا ولاد عمي عباس واخوان ايهم اجو علي صوت الرمي

خالد شاف همس هيج منظرها علي ايد صكر راد يتعارك وياه بس ماخلوه اخوان ايهم ركب السيارة وطلع اخو ايهم الجبير احمد هو اللي ساق وصكر كعد يم همس حاضنها وطول الطريق يبجي عليها وعاللي صارلها انا ركبت كدام ومشينا وورانا عمو عباس وخالد بسيارتهم

بعمري ماتخيلت تكون همس وصلت لهاي الدرجة حتي انها تقتل حالها وصلنا للمستشفي ونزلنا وصكر شايلها ويركض بسرعه اخذوها منه الممرضين ودخلت الدكتور وراها بسرعة شوي وسمعنا همس تصرخ وتكول عوفونييي امووووت ماريد هاي الدنيا صكر تخبل ودخل بسرعة للغرفة

شاف الممرضين يحاولون يمسكونها وهي تصرخ وتبعدهم والدكتور يجهز إبرة انطاها الإبرة وشوي شوي نامت انصدمت من منظرها شنو اللي صارلج ياعمري ووصلج لهاي المرحلة طلع الطبيب واحنا وراه
صكر. طمني عنها الله يخليك شنو الي يصير وياها
وليش ماتبطل تصرخ

الطبيب. شوف هذا اللي عندها اسمه انهيار عصبي حاد بسبب ظروف صارت عدها أو صدمة وانا راح اكلم أخصائية نفسية تجي تشوف حالتها لان راح نضل نعطيها منوم خوفا انها تسوي بحالها شي مثل ماشفتو هي تريد تموت حالها راح وخلانه بصدمتنا من اللي يصير ويا همس

رهف. ارتحت صكر لما دمرتها انا من البداية كايلتلك انها راح تتدمر بسبب ابنها وبعمرها ماراح ترضي وتسكت

صكر. بس تصير زينة والله راح اسويلها اللي تريده وارجعلها ابنها هاي اكبر غلطة سويتها بعمري والله

وضل يبجي انكسر كلبي عليه انا اعرف هو يحب همس ويموت عليها بس غلطته انو انطي ابنها لاخلاص ماراح تمر بالساهل اجا عمو عباس وخالد ورانا وسمعو كلام الدكتور وخالد تخبل وراد يهجم علي صكر بس احمد اخو ايهم منعه ضلينا بالمستشفي طول الليل وحوالي الساعة 1 لكيت ايهم جاي وياه مرة ورجال اقتربو علينا هاي المرة تشبه همس شوي عمرها بنص الثلاثينات قتربت منا المرة وتبجي وتسأل عن همس

ايهم. وينها همس

رهف. منو هاي الناس ايهم

ايهم. هاي خالة همس دارين ورجلها

دارين بدموع. وينها همس شنو اللي صارلها

صكر. ومنو اللي عرفها مكاننه ووصلها لهنا ايهم

ايهم. اناا اللي وصلتلها وكلمتها تجي لهمس تساعدها وتحررها منكم صكر وهمس هي اللي طلبت هالشي

دارين. تريدني مااجي هاااا تريد تضل كل عمرك ظالمها وماحد يوكف بوجهك مووو والله ماراح اتركها وراح ارد حكها منكم كلكم

صكر. ووين جنتي عنها كل هاي السنين بس تذكرتيها هسه لا وياريت تذكرتيها لحالج لا هي اللي حاولت توصلج

دارين. انت ماتعرف ظروفي ولا تعرف اللي صارلي بس الماضي خلص راح وانا هنا وماراح اعوفها اجا دكتور وخالة همس ركضت عليه تسأله عن حالتها ولما عرفت حالتها ضلت تبجي ورجلها يهديها ردت اعاتب ايهم أنه خبي عني أنه يدور علي خالة همس بس سكتت مو وقتها ضلينا بالمستشفي لثاني يوم واجت طبيبة نفسية دخلت لهمس وشوي وسمعناها تصرخ والطبيبة تحاول تهديها بس ماكو فايدة احنا واكفين برا بس سامعين الي يصير بالغرفة شوي وطلعت الطبيبة والظاهر انطو لهمس مهديء

الدكتورة غالية. انتو اهل همس عمران

صكر. اي احنا دكتورة

الدكتورة غالية. انا اريد أحد منكم يحجيلي اللي صار ووصلها لهاي الحالة حتي نكدر نعالجها لأنها فاقدة وقافلة علي فكرة الانتحار

صكر نزل راسه ورد بحزن راح احجيلك انا
وراحت لغرفة مكتبها وصكر وياها وخالة همس اصرت تروح وراهم حتي تعرف اللي صار ويا همس راحت هي وصكر ورحت انا هم كعدنا وضل صكر يحجي اللي صار لهمس من البداية من اول ماتزوجها لحد مااخذ ابنها وبالاخير دموعه نزلت وانا احجيلها عاللي كانت تكوله الي همس خالة همس مع كل كلمة تفتح عيونها علي وسعهم وتنصدم

من صدمتها هي عرفت غلطتنه كلنا بحق همس اللي نفذ الغلط واللي سكت عنه واحنا كلنا سكتنا واكتفينا بدور المشاهده خالة همس حسيتها تريد تنفجر بس ماسكة حالها لعند ماتسمع الدكتورة ورايها بعلاج همس

الدكتورة غالية. كل هذا صار مع هاي الطفلة وانتو اهلها يعني المفروض تكونون درع الحماية الها مو انتو اللي تاذوها بايدكم اكيد علاجها راح يطول وماراح تعدي هاي الأزمة بسهولة بس اهم شي هسه واهم خطوة بعلاجها وحتي نبعد عنها فكرة الانتحار وفكرة الموت المسيطرة عليها لازم ابنها يرجع الها وبس تهدي شوي راح نبدي وياها بجلسات علاج نفسي
ابنها حاليا هو علاجها الوحيد والاساسي لازم يرجع الها احنا راح نخليها تصحى من مفعول الإبرة اللي انطيناها الها وماراح نخدرها مرة ثانية بس اول ماتصحي لازم يكون ابنها كدامها

كام صكر وكال راح يجيب سيف من البيت ويجي واول ماطلعنا من عند الدكتورة خالة همس ضلت تشتمنه وتدعي علينا انو نحنا كلنا ظلمة ودمرنا همس بصراحة مالنه عين حتي نرد عليها طلع صكر راح يجيب سيف ورحت وياه وطول الطريق يجر حسرات وانا ابجي عالي صار ركن هو السياره برا البيت وبرا البوابة نفسها حتي ياخذ سيف ويرجع بسرعة

ويمكن حكمة ربنا أنه يركن السيارة بعيد وامي واخلاص مايسمعن صوتها حتي احنا نسمع الخطة الحقيرة اللي كانو يرتبوها لهمس دخلنا انا وصكر ساكتين مالنا نفس نحجي حتي لكينا باب المطبخ مفتوح دخلنا منه وامي واخلاص كاعدين بالصالة

وسمعنه اخلاص تكول. انا اريد اخلص من هاي الحقيرة همس هالايام صكر احسه يريد يرجعلها سيف
ام صكر. لاتخافين ماراح يرجعه الها وكولي خالتي كالت ماحد راح ياخذ ابنج منج

اخلاص. لا والله حسبالج احبه ابنها واموت عليه لا والله ولا اطيقه حتى وادوس علي حالي واعامله زين بس حتي يحبني ويتعلق بيه واحرك كلبها لهاي الحقيرة وحتي يثبت مكاني بهالبيت اكثر لان من دون طفل وهي راح تصير كل شي

ام صكر. والطفل شنو ذنبه يعني تكرهيه

اخلاص. ذنبه انو ابنها لهاي الحية وانا مثل ماكلت راح انفذ خطتي اللي كلت عليها وراح اخلي صكر يطلقها ومو بعيد يقتلها حتي نرتبها انا وانتي ونجيب خالد لهنا باي حجة ونخلي صكر يشوفهم ويا بعض ونخلص منها
طبعا صكر راح يصدك بينهم شي لان خالد كل شوي يدافع عنها وشفتيه امس شنو سوى لما شاف همس

ام صكر. خلص خلص بس تطلع من المستشفي وتمر فترة وننفذ خطتنه الله يخلصنا منها وتروح لأهلها ونرتاح منها بنت السكط

التفتت علي صكر شفت الصدمة بعيونه ودموع بعيونه
وانا حالي مو احسن منه ماتوقعت يوصل حقدهم لهاي الدرجة
____________________________________
يتبع.

هاي همس دتنام يوميه مظلومه ودمعه اليتم بعينها والظالميها منهم سهرانين ومنهم نايمين مرتاحين بس اكو رب ماغافل صاحي وعينه ماتنام وشايفها وشايف كل الي ديصير بيها وحياخذلها حقها وراح تتحقق العداله وكل ظالم حياخذ عقابه وكل مظلوم حيرجعله حقه ثالث ومثلث هم خلو ايمانكم برب العالمين قوي ولا تهتمون لشي الدنيا هيج ولا هيج راح تدور وتاخذلكم حقكم

بعد اكو بارت واحد وتنتهي رحلتنه ويه همس واوجاعها والامها ويتمها وحرمانها

وويه اخلاص وجذبها وحقارتها وتعذيبها لهمس بابنها

وويه ام صكر سعديه وكرهها وحقدها على همس بسبب شي هي اصلا مالها شغل بي والي هو زواج ابوها من امها ورفضه لاخت ام صكر

وويه رهف الي عاشت ويه همس كل حياتها بلحلوه والمره ووقوفها وياها بكل ازماتها ومشاكلها رغم انو بلفتره الاخيره التهت عنها شويبس تبقى مثل اختها وتحبها

وويه صگر الي ماعرف شحجي عنه ماعرف اكرهه لو احبه بس الي اعرفه هو مايكره همس هو يحبها ويحبها كلش هم بس امه ومرته تلاعبن بتفكيره وخلنه ياخذ من همستنه ابنها وينطيه لضرتها والله ماعرف شكول هم انتو كملو عني

تابعو حسابي
وصوتو للبارتات

مع تحياتي الكم. رين الزين