رواية عاشقه السفير الفصل الأول 1 - بقلم Chra

#عاشقه_السفير  1

تحية طيبة .. يا والدي الطيب
الله يطول عمرك .. يا غالي يا حبيّب
أكتب لك رسالة حب .. يا غالي يا أطيب أب
وصت عليك الشرايع .. وموصي عليك الرب
ياللي راضاك عليه .. أحلى وأغلى هديه

تحية لصبرك كل شيبة في شعرك رفيقة دربك أمي
يا سهرها يا تعبها أمي .. أمي حبيبة عمرك
بوسة لدمك المحبوب .. بوسه لحبك الخالد
غازل علم العشاق .. حب هذا الزمن بارد
يا لي رضاك عليّه .. أحلى و أغلى هديه
كبرت في ظلك .. أحبك أجلك
وتحبك أكثر أمي .. ترعي الوالد يا أمي
أمي حبيبة عمرك ..
جالس حولك الأحباب .. ولا مثلك ملك جالس
تنزل على الجرح ويطيب .. هيبة وربي لك حارس

طفيت السي دي ودموعي تنزل على خدي فراكك يابويه صعب الله يرحمك ياغالي جيت هسة راح انزل غسلت وجهي ورشيت عطر لبست ساعتي الروليكس ونزلت اخويه ينتظرني وامي كاعدة تبجي كالعادة من يصير عندي مؤتمر

ديربالك ابني على نفسك لاتتأخر

بست ايدها اشبيج ماما هذا شغل مو رايح اتونس

يمه كلبي بعده محروك ماعندي غيركم بالدنيا مو حقي اخاف عليكم

ماما لاتخافين ماكو شي  كعدت يمها اهديها مو هاين عليه اعوفها تبجي مسحت دموعها كافي حبيبتي انت مو تفرحين تشوفيني مبسوط

وانت تشك بهالشي منو عندي غيركم ربي يحرسك ويحميك واشوفك بأعلى المراتب يارب ترجع من وكت لو تتأخر

عمه شنو يرجع عنده مؤتمر يعني بوفيه حلويات يحتاج تبياته عوفي يشوف نفسه

متستحي انت شنو تبياته ياسر هسة نبع الحنان تكلب من الدعاوي الى الشتائم والنصايح

عماد شنو تبياته يعني مترجع شنو هالمؤتمر

سيدي احنا حاضرين اذا تحب نروح

جايي يالله مقداد نروح ماريد اتأخر راح اركب بالسيارة الثانية اوك خلي ياسر يطلع ورانا احسن اله ماريد اكعد يمه لااكسر صف سنونه حميد

نعم سيدي

اني راح اركب بسيارة مقداد

زين سيدي تأمر

طلعت من البيت واني اشوف الحماية ينتظروني اركب حتى يرافقوني وبيدهم سلاح اكثر شي اكرهه بالدنيا عصبت شنو هذا حميد رايح للجبهة لو للمؤتمر ماريد يشيلون سلاح ماعداك افتهمتني

على كيفك عماد غير الوضع ميتأمن وخايفين عليك اني بلغتهم يشيلون سلاح

مقداد اعرف هالشي ماحبه مو بيدي تذكرني بأشياء احاول اتناساها انت اكثر واحد تعرف باللي مريت بي

اسف سيدي هسة ابلغهم تفضل حضرتك اصعد للسيارة وكلشي يصير تمام مثل ماتريد

فتحلي الباب وانطلق السيارة واني كاعد ليوراه  ويا اخويه الكبير مقداد وحميد الحارس الشخصي اليه ويا السايق كاعدين بالصدر  والسيارة الثانية بيها  ياسر ابن عمتي وزوج اختي الوحيدة شهد متوجهين لمؤتمر يناقش قضايا انسانية واني بصفتي كسفير معزوم على المؤتمر حياتي  مقسوم بين شغلي واسفاري وبين اهلي اما بالنسبة لحياتي الشخصية احس ظالم نفسي اهواية دافن نفسي بالشغل ماعندي علاقات اهواية حريص على سمعتي بالرغم من منصبي وجمالي والاغراءات الي تجيني من كل مكان واشوف اشكال والوان من النسوان ولا وحدة خلت كلبي يتحرك مرات احس نفسي صنم مو رجال يمكن اللي مريت بيه خلاني هيجي لو الخوف من منصبي ومستقبلي زاد عندي الحذر من هالناحية

اني عماد كريم ملقب بالجراح عمري۳٥ سنة مطلق من ١٠ سنين عندي دكتوراه بالقانون الدولي وحاليا سفير مالي مكان اقامة محددة كل فترة بمكان حسب شغلي عندي اخ واحد مقداد ٣٧ سنة استاذ ودكتور بالجامعة سابقا مدير لسلسلة قنوات حاليا وكاتب اشعار عازب متعقد من النسوان يرافقني بشغلي يخاف عليه اهوايه واخت وحدة شهد ٣٣ سنة متزوجة من ياسر ابن عمتي الوحيد اني وياسر ومقداد الضلع اللي ماينشلع اسرارنا وحده ابويه الله يرحمه جان يكول علينا مثلث برمودا محد يكدر يدخل بينكم اغلب سفرياتي ياسر ويايه او مقداد واحلى شي بحياتي ابني كريم عمره ١٠ سنوات عايش بيني وبين امه امي عندي بالدنيا كلها بعد خسارة والدي صارت تخاف علينا اهوايه جنا عائله مترابطة امي وابويه علاقتهم مو بس ازواج اصدقاء احباب عمرنا مشفناهم متزاعلين ابويه جان عميد جامعةعنده شهادة بروفيسور بالادارة والاعمال وامي استاذة جامعة تقاعدت بعد ولادة اختي رادت تكبرنا على طريقتها والحمدلله احنا الثلاثة مناصبنا عالية والناس تمدح بينا ولا يوم سوينا شي نخجل اهلنا بيه عائلتنا عائلة مثقفة الهم الاكبر الشهادة واثبات الذات وخدمة المجتمع هاي تربيتنا وعندي عم واحد عنده بنتين منال اللي جانت زوجتي وسارا وزوجت عمي هي خالتي وعندي عمة وحدة هي ام ياسر حالتنا المادية فوق الممتازة اهلنا كلهم اصحاب شهادات عليا واصحاب مناصب بالدولة وصلت للمؤتمر بالوقت المحدد اكثر شي يضوجني الصحافة الصفراء اللي تشوف الناس بعيونها وتزييف الحقائق لازم اوكف ساعة اجاوبهم  على اسئلتهم اللي بعيدة كل البعد عن المؤتمر والاسئلة المتكررة يمتى تتزوج شنو تحب عندك حبيبة وين عايش ويا منو شنو اكلك المفضل هواياتك عندك نية تتزوج اجاوبهم واني كوة لازم اعصابي واضطر اضحك بوجهم ومثل كل مرة متأكد راح يغيرون الي كلته ويكتبون وينشرون اللي همه يردوها دخلت للقاعة واني اشوف نظرات الانبهار والاعجاب بعيون السيدات تقدمت للمنصة قدمت خطاب بسيط كعدت اجامل هذا وذاك انتظر تخلص واطلع منا بأسرع وقت .

ياسر : نروح للمزرعه من زمان عنها شتكول عماد خلي الحراس يرجعون واحنا نروح بسيارتي

عماد : مادري بكيفكم اني تعبان كلش

مقداد : هاهيه نروح اخابر الحرس يرتبلنا كعدة بالحديقة ويحضرلنا عشا بسيط اريد اكتب مقالة جديدة

يلسر : اهم شي النركيله والسهرة صباحي اكو ناس بطرانه داير مدايرة جان اكو حلويات والأخ يسهر وحداني

عماد : جان اخذته انت وريحتنا من وجهك الخايس دواك عندي سجلت كلامك بتليفوني راح اسمعه لشهد حتى تشوفك الحلويات على اصوله هههههه.

هاي هاو شلونكم

اسم الله اشجاج من الصبح

رحت بست نانا مربيتنا من خدها وبعدها امي طلعت لساني شلونج دينا خاتون

اشبيج من الصبح نازلة ويا جنانج ههههههه

ولج روحي بدلي ملابسج كلها الوان هسة شلون نفطرمن ريحت الاصباغ

dont care mam

شنو دونت ومونت روحي غسلي

من عيوني ست الحبابيب لاتاكلون بدوني طلعت من المطبخ ركض صعدت لغرفتي

نانا :اسم الله عليها اشكد مفرحة والله لو عندي هم بكد الجبال بس اشوف آيه انسى كل شي

اي والله نانا ترى مرات اخاف عليها اكول ياربي لايجي يوم وتتغير متلوكلها بس الضحكة هي سبب سعادتنا بالبيت حتى اهلي واهل ابوها يحبوها ماتصور اكو احد ميحب آيه واحلى شي بيها هي بسيطة تحب كل الناس وتحب تساعد اللي تعرفهم واللي متعرفهم مرات اخاف عليها اكول اهوايه على نياتها اخاف يورطوها بس بعدين اكول الله اعلم بالنيات لايمكن يصير بيها شي على كلبها الطيب

مام هاي شنو لعد اني

انتي يابعد كلبي شمعة البيت

اي عبالي نسيتيني

نانا :واي دينا اكو احد ينسى القمر اوي فدوة لوردات بيت توفيق هههههه.

ياربي شلبس هسة اممم كلها عليها اصباغ يالله البس شي بسيط عادي اني آيه ٢٢ سنة خريجة فنون جميلة هوايتي التصوير والرسم انسانة مرحة الى ابعد حدود دائما مبتسمة ولا يوم ابجي اكول مادام الله منطيني كل شي صحة واهل بعد ليش مافرح واشكر الله على النعمة.