رواية عاشقه السفير الفصل الرابع عشر 14 - بقلم Chra

#عاشقة_السفير14

حبيبي سأبقى أنا
ملكه على عرشك سيبقى
هذا القلب ينبض لك مهما كان
او يكون سيبقى أعذب
وأرقى وأسمى أحساس يتملكني لك
وحدك الى أن تحين ساعتي
مهما بعدت المسافات
ومهما كثرت الحواجز والاسوار
ستظل انت متملك قلبي يا روووحي
دعينى اقترب منكـ لأنظر إلي عيناكـ
وأرسم علي شفتاكـ طريق الأمل
ودعيني أقطف الحنين
من خدودآ تملأها الأماني
واتركينى أمزق خيوط الخجل
لعلى أجد نفسي بدآخلكـ

عماد: جنا بيت عمي معزومين حلوة لمة العائلة خالتي وعمي بس يعاتبوني ليش مازورهم مو مثل قبل جنت اني ابنهم عمي عنده بنات ٢ منال وسارا ماعنده ولد فأني من صغري اعتبر نفسي ابنهم يوميه بيتهم جنت احب منال وسارة مثل شهد واعاملهم مثلها وعمي وخالتي مثل ابويه وامي طلعاتنا سفراتنا كلها سوية منال جانت منافستي بالدراسة وعمرها مقارب اليه جانت كل همها الدراسة وتكون احسن من كل بنات العائلة من وهي صغيرة جانت تكول كولولي دكتورة منال كبرنا وكبرت طموحاتنا صرنا نطلع اني وياهم وحدنا احنا ٦ اني ومقداد وياسر شهد وسارة ومنال نبقى اسابيع نسافر بالعطل نطلع وياهم للاسواق طلبات بيت عمي كلها اني اجيبها واسوي مجنا نخليهم يحسون ماعدهم ابن اني وياسر ومقداد صايرين ابنهم بحكم عائلتي عائلة تعليمية كل همها الدراسة  اني ومقداد  مجان نعرف بنات اونسوي علاقات بالكلية او خارجها  جان عندي جماعة اصدقاء ولد كل همهم بنات وشلون يوكعون بيهم كل مرة اسمعهم شلون ينامون ويا بنات وشنو يسوون ويروحون يم بنات الليل اني الوحيد اللي مجنت مجرب ومسوي شي جانو يضحكون عليه يكولولي عماد العذراء واحد بيهم جان يومية يجي يكولي البارحة نمت ويا فلانة هيجي سويت وهيج شفت ويكولي ليش متجرب مو عيب عليك عبالك جاهل اني بالبداية مقبلت بس اكو مثل يكول كثر الزن يفك قبلت كال راح اجيبلك وحدة توب تنسيك اسمك اني كتله مو هسة خلي اشوف انتظرت صارت عطلة اهلي  مقررين يروحون لفلان مكان يوم واحد ونرجع اني اتحججت مرحت اتفقت ويا صديقي يجيبلي البنت للبيت فعلا جابها بالبداية مستغرب جنت منها تلزمني وتضحك ويايه عبالك من زمان تعرفني اني جنت متوتر بس هي متنطي مجال كالتلي وين ننام كتلها بغرفتي صعدتها للغرفة كامت تنزع ملابسي وتنزع ملابسها وتضحك بصوت عالي واني بعدني ممسوي شي متردد وخايف حتى نسيت شسوي شافتني حاير دفعتني على الفراش واتقربت مني بعدها مبدت شي انفتح الباب اني متت من مكاني جان ابويه شلون فشلة باوعلي وسد الباب محجه شي بس نظرته اليه جانت كافية دفعتها بدلت هدومي كتلها بدلي حتى اطلعج مرضت كالت عجبتني الا انام وياك يالله اروح انطيتها فلوس مرضت كتلها من الاخير اني مو رجال ارتاحيتي كالت كل هالطول والجمال ومو رجال حرام والله متستاهل اريد بس انزلها مجلبه بيه سمعت صوت سيارة ابويه عرفت راح نزلتها وسديت الباب بقيت طول اليوم انتظر رجعت ابويه ثاني يوم جنت نايم سمعت اسمي عماد ماريد اطلع راسي من الفشلة نعم بابا

اكعد احجي وياك ابني

حاضر بابا كمت

غسل وبدل انتظرك بالمكتب

باوعتله وجهه عادي مو معصب نزلت يمه

اللي صار البارحة اول مرة لو متعود

نزلت راسي كتله اولا اني اسف اهواية وثانيا هاي اول واخر مرة واللي تريده تسوي بيا اني حاضر

ابني انت شاب وهالشي غريزة بكل انسان بس كل واحد ونفسه اكو يسيطرون على نفسهم واكو عدهم شهوات حيوانيه

هالكلمة حسيته يقصدني بيها

اني مراح اعاتبك اللي راح راح بس حبيت اكولك اني البارحة خطبتلك بنت عمك منال

اهنا الكارثة ردت اكول لا بس صدمني

واتصور بعد سوايتك ماعندك اعتراض حضر نفسك يوم الخميس حفلة خطوبتك وانتهى النقاش

مجان عندي اعتراض على منال بس اني اعتبرها شهد ماكدر اعتبرها زوجة وماكدر ارفض خوفا من ابويه وعمي وهي متستاهل ابن عمها يكسرها وميريدها صارت الخطوبة وصارت الزواج منال بعالم واني بعالم اول ليلة كلش جانت صعبة ماعرف شلون دخلت عليها وشنو سويت منال جانت بكلية الطبية كل همها دراستها وتكون الاولى على دفعتها ماعدها اي اهتمام لا بالتزيين ولا بشكلها جانت مثل ماهي شلون بيت ابوها اهنا نفس الشي متهتم هي تزوجت تنتظر زوجها تتزيين ماكو واني همينه مجنت احس بشي اتجاهها جنا بنفس البيت بس ماكو اي تقارب جسدي بينا كلما اريد اقترب منها جانت تصد وتكول عندي دراسة عندي امتحانات واني ماكدر زواج ومسؤولية خليني بحالي هي جانت مجبورة مثلي بقت يمي سنة اقتربت منها ٣ مرات خلال السنة اول شهر من زواجنا صارت حامل يوميه جانت تحجي عليه صوجك اني راح يضيع مستقبلي اهلي حسو انه احنا مراح نتفاهم واني عزلت نفسي منها جنت انام بغرفة ثانية خليتها تاخذ راحتها جابت ولد سميته كريم على اسم ابويه وبعدها كالت اني ماكدر اكمل حياتي وياك انت مثل اخويه صعب عليه انام وياك فجمعنا اهلي واهلها فهمناهم سالفتنا مجان عدنا الحل الا طلاق طلقتها وبقى ابني بيني وبينها هسة عمره ١٠ سنين وعلاقتي بيها مثل قبل الزواج اخوان بست عمي حقك علي بس تعرف ظروف شغلي

ام عماد:والله اني ماشوفه يحتاج اخذ موعد حتى اروح اشوفه

ست الحبايب الزيارة الج مفتوح دايما بدون بطايق منو النا غيرج بالدنيا رجعنا لبيتنا كعدت بالصالة ويا مقداد امي راحت غرفتها ترتاح أشكد حلو لمة العائلة من زمان عنها

آيه ليش جتي للمكتب

شنو اني وين احجي وانت وين  حجيتله السالفة باوعلي مصدوم

عماد اتخبلت ليش تكوللها احبج وانت تعرف شنو نهايتكم

ماعرف مقداد مردت اصلا احجي وياها بس شفتها كلشي اتغير وكتلها احبج وفعلا اني احبها خليني اعيش وياها يوم بيوم لحد ماتفرج

وشلون راح تفرج حضرة السفير تروح تخلي ايدك بيد توفيق اللي انت سنين حاقد عليه وتحاربه بالسوك

لا طبعا اكص ايدي ماخليها بأيده

لعد شلون تبقى ويا بنته

مقداد اني اعتبر آيه حبيبتي وبس راح انسى هي بنت منو والله كريم صعدت لغرفتي خابرت آيه  احلى الو لأحلى آيه أحبج

ماتحمل هالشي عماد واني هم احبك لا قليل كلمة حب  أعبدك

أحجيلي تفاصيل حياتج اريد اعرف كلشي عنج من وانتي صغيرة

حجيتله طفولتي ومراهقتي ودراستي وشنو احب طبعا هو عكسي بكل شي ركزت من يسمع مني سالفة بيها ابويه يضوج

اذا تعزيني لاتجيبين اسمه لان ماكدر اكمل وياج حسي بيه انتي حبيبة عماد ماعندج غيري اريدج اليه وحدي زين تكدرين آيه

عماد جنت تحب زوجتك

بقيت احجي وياها للصبح ناسي هي منو وبنت منو اسألها تجاوبني نبهتها من البداية لاتدخل وتحجي بسالفة زواجي الاول بس متوب اكيد احبها مو بنت عمي

أي طبعا بنت عمك راح انجلط منه اوف زين سؤال ثاني هي حلوة

مشفتي كريم ابني هي نفس الشبه نفس الشعر والشفايف والعيون الحلوة

استاهل صوجي أسال اي كريم كلش حلو الله يخليه الك عبالي يشبهك معرفت يشبه أمه ومادام هلكد حلوة ليش طلكتها

شكو بيها الانسان ميتفاهم بداية حياته من يكبر يبدي يعرف ويقدر الاشياء اكثر ومادام كريم بيناتنا احتمالية رجوعنا وارده

واني عماد ليش هيجي تسوي بيه سنين عايفها هسة حلوت بعينك

لحظة آيه منال تخابرني خلي ارد عليها بعدين احجي وياج .

لحظة عماد قفل التليفون ساعه 4 الصبح ليش تخابر شعدها خابرته مشغول راح اتخبل هالسالفة منين طلعتلي رجعت اخابره مقفل اي ساعتين تحجي وياها تعبت ياربي شنو يحجي وياها يغازلها مثلي لا شنو يغازلها جانت زوجته يعني اكثر مني ماتحمل نزلت الصبح ضايجة فتحت التلفزيون اصلا بالي مو يمه شفت دينا معصبة كعدت يمي

نصي الصوت خلينا نحجي بهدوء سمعيني عماد انسيه افتهمتي مو اني اللي يحجون عليه من وراج

خير من الصبح شصاير

قبل فترة  جنتي يم عماد مو انتي مترتاحين الا اذا نزلت عليج مصيبة شتريدين تسوين بنفسج ولج ليش متخافين على نفسج تريدين تنفضحين وتنزلين راسنا ولج صارلج شهور تعرفينه وهيجي تسوين اني صارلي ٦ سنوات اعرف مقداد مسويت سواتج

لحظة دينا منين عرفتي

من البلوة مقداد ارتاحيتي يسبني ويحجي عليه لان حضرت جنابج رايحة لاخوه هيجي تجازين اختج اني ماستاهل منج هالاذيه كافي آيه انطيني وعد تعوفين عماد

حضنتها أسفة ماكدر احاول بعد ماجيبلج حجي حبيبتي

آيه تفضلين عماد على اختج وليش اسأل مو رخصتي روحج وانتحرتي بقت على اختج وخري مني اروح اصيح ماما عليج اني غاسلة ايدي منج

بستها والله مو بيدي وماريد اجذب عليج وانطيج وعد اني مو كدها الله يخليج دينا سامحيني .

آيه انتي الخسرانة راح تكبرين وتندمين مثلي.