رواية اعيدوا لي قلبي الفصل الخامس 5 - بقلم دانيا

رواية اعيدوا لي قلبي

الفصل الرابع4

بقلم دانيا

مشيت وارهو لمن وصل الباب الخلفي للمبنى باب السلم ، وقف مسافه جنب الباب وبعدين دخل جوا مشيت بسرعه اشبه بالجري وراهو وقفت جنب الباب كان المكان مظلم نورت فلاش تلفوني م لقيت المريض بس كان في سلم بودي لتحت البيدروم حق المستشفى م كان فيهو نور بس كان في لمبه بتولع وتتطفي في نهايه البيدروم .

وقفت وانا بين انزل او لا بس تاني قلت في نفسي لا يازكرى دا ما وقت فضولك الدنيا ليل ، امشي وبكره الصباح تعالي شوفي الحاصل شنو هنا ، درت وجهي عاوزة اطلع من المكان الغريب دا سمعت صوت بنفس الهمسات ديك "اعيدوا لي قلبي" لمن اتخلعت وقلبي بقى يدق بسرعه .

اتلفتت بسرعه على البيدروم قررت انزل بالدرج ، تلفوني اتصل لمن اتخلعت من الرنه قرب يقع مني ، عاينت للإسم لقيتو مكتوب دكتورة بيان ، طلعت مسرعه من المكان داك ورديت عليها قالت لي وينك قلت ليها برا جايه.

طلعت فوق لقيت الدكتور طلع من العمليه ، مشيت على غرفة الدكتورة بيان قالت لي المريضه الطلعت من العمليه دي مسؤليتك ، الحمد لله العمليه كانت ناجحه جابت ولد حالياً المريضه نقلوها العنبر امشي افحصيها وراقبي حالتها وادتني تقرير المريضه وطلعت مشيت عنبر الولاده ، كانت الساعه عشره عندها جرعات اديتهم ليها وقلت ليها عندك جرعه تاني بعد سته ساعات بجي بديكي ليها ، سألت من البيبي قالوا في الحاضنه .

مشيت ظبطت المنبه على الساعه تلاته ونمت ، م قدرت انوم لأنو جو المستشفى كان جايط عاينت للساعه لقيتها وحده ، قمت مشيت الحمام عاينت في مراية الحمام شفت مره واقفه وراي و كانت لابسه زي المرضى وجنبتها اليسار كلها ملطخه بالدم ، بقيت ارجف اتلفتت وراي سريع م شايفه اي شيء فجأة اختفت طلعت برا جري .

وصلت مكان كنت نايمه لقيت عاوزة اطلع التلفون من جيبي وانا برجف من الخوف ، دخلت يدي في جيبي لقيت ورقه طلعتها عاينت ليها لقيت مكتوب في بالخط العريض باللون الأحمر "اعيدوا لي قلبي" ، بقيت اعاين فيها مصدومه ، كانت في دكتورة نايمه جنبي في نفس المكان صحت شربت مويه وتاني دايره تنوم ، قلت ليها دكتورة ربى شوفي الكلام دا معناهو شنو والمستشفى دي قصتها شنو انا حاسه بحاجه غريبه هنا .

مديت ليها الورقه شالتها وبقت تعاين لي ، قلت ليها حتى انتي مصدومه زي وم مصدقه والله حقك لأنو انا من اول يوم جيت حاسه بشيء م طبيعي ، رجعت لي الورقه وبقت تعاين لي بدهشه قالت لي الغريب شنو الورقه فاضيه ، عاينت ليها بإستغراب وعاينت للورقه ، فتحت عيوني كبار وانا م مصدقه كيف يعني الورقه فاضيه