رواية عد الى قلبي الفصل السابع عشر 17 - بقلم الكاتبة روجمان

شعوري كاانسانه تغلب على شعور حبي اني لازم اوكف بجانب
سامي لان مااريد اشعر بتأنيب الضمير ومااريد
اكون انسانه انتهازيه واسغلاليه ومتحب بس نفسها
ومن ثاني يوم رحت للمستشفى وبديت احاول  اقدم اي مساعدة
حتى لو بكلمه طبعا سامي كانت حالته ‏ميؤوس منها
بس سبحان الله بيوم ولليله كان اكو امل سبحان ربي الخالق من
يريد يحي ويموت
ظليت مايقارب اربع ايام اروح ويا والدي للمستشفى وارجع العصر
واليوم بالليل اجاني سيف وجان متخبل وصاير عصبي
دخل للحديقه ماقبل يدخل جوة لان بابا واخويه مهند ماموجودين
كلي
....وينج صارلج كم يوم
.....بلمستشفى
.....هاا يم سامي مو
.....اي
......ها صحيح شفتي  شلون نسيت  هو زوجج
وانتي مرته ولازم توكفين بجانبه خطيه
....سيف والله ماكدرت اعرف بيك ضايج بس ميصير اتخلى
عنه بهيج وقت واني داحس من ورايه هيج صار بي
....لا لويش اضوج شنو قابل راح تهتمين اصلا اني مافارق
وياج ضجت  اوماضجت
...سيف انت تعرف كلش زين انت دك بكلبي بس صراحه
حسيت بتأنيب  الضمير لان قبل الحادث بكم يوم جان يمنا بالبيت
واني حجيت وياة وكتله مااريدك ومااحبك وهو كلي مااعوفج
واني احبج
....سكتي لتكملين  والله اروح هسه اقتله وهو بالمستشفى  واخلص منه منين طلعلي هذا
....لا خطيه حالته موهلكد
....لدكولين خطيه
....ههههه شنو تغار
......لضحكين ريمان ترة صاير اعصاب وبكوة ساكت
وكامش نفسي
....شكو شصار لكل هذا
...صدك تسئلين شصار
.....اي شكو ليش هيجي مزعوج 
...شوفي لتخبليني شنو ليش مزعوج احنا مواتفقنا انتي راح تعوفي واني وياج نزوج بعد شنو دتروحين للمستشفى
شنو المعنى من هذا التصرف
........اي موميصير حتى بابا كلي
......لدكوليلي بابا اني معليه شنو يكلج عمي  عليه
بيج وشنو الي تريدين تسوي وبهذا تصرفج بعد ميعوفج
زين ولا راح دكدرين اسحبين نفسج
....مو هسه اني فعلا ماااكدر اكول شي الولد بين الحياة
والموت اكله تعال طلكني
....انتي ليش مصممه اضوجيني ها
.....موقصدي اضوجك بس شسوي مااكدر احجي هسه
...المشكله مو انج دكدرين تحجين لولا بس داحسج مهتمه بي
كلش واني ممهتمه بمشاعري
.....انت كل حياتي واني مايربطني شي بــ سامي
بس مجرد وقت انطيني
....ريمان اني مليت من الصبر ومل الصبر من صبري
اني اريدج الي اريد ازوجج ونسافر اني وياج ونبتعد
اني ممرتاح ريمان كلبي ديوجعني احس اكو حجارة
نايمه على كلبي الله يخليج خلينه نبتعد اني وياج
ماادري ليش احس شي ديحوم داير مدايري
....شبيك سيف ليش هيج ضايج
....اوف اوف ريمان تعبان كلش وماعندي قابليه اني
كلش تعذبت
شوفي ريمان اني راح اسافر لان شغلي هنا خلص لازم ارجع فلي راح اسوي راح انطيج فرصه شهر بس وبعدها اريد ارجع اشوف كلشي تمام واذا مانتهى الموضوع فااعتبريني
انتهيت هالمرة من حياتج واني مراح ارجع الا من تخابريني ودكوليلي يله تعال فلان يوم نزوج
سمعتيني
...لسافر
...وشغلي شلون  مااكدر ريمان اني كتلج رتبي امورج اوكي
....اوكي سيف
...يله تصبحين على خير
.....بس تصبحين على خير ماكو فد كلمه بعد وياها
..... لا ماكو الا من تعوفين هذا سامي وهذاك الوقت تكونين مالتي
واكلج الي اريدة
..زين لعد انت من اهل الخير بس لظل ضايج
.....اني موضايج انما مخنوك

كلشي بدة يمشي طبيعي سامي شويه تحسن وسيف سافر
ولمن حجيت وياسامي كلي
....اني راح اطلكج
واني اشكرج على تواجدج بجانبي والدي كلي انج
ظليتي هنا
....هذا واجبي واني احترمك واقدرك واتمنالك السعادة
....الشعور متبادل اني راح انفصل عنج واتمنالج ايضا السعادة
طلعت من يم سامي واني فرحانه والابتسامه متفارقني
ومحبيت اتصل بسيف واكله شي الا من اخلص الامور كلها بيني وبين سامي
وفعلا لمن انتهت ونفصلت عن سامي
اتصلت بسيف مجاوبني تركتله رساله
كتبتله (((((احبك شوكت تجي تخطبني)))
ورة ربع ساعه خابرني كلي
....هاياعمري
....شوكت تجي تخطبني ترة اني ماااسوي علاقه وياشاب
....هههه صدك لعد اني اريد اتعرف
......لعد انت متفيدني هههههه
.....شلونك سيوفي
.....والله ياعيون سيوفي
سيوفي بخير بسماع  صوتج  انتي شلونج ياعمري
.....اني هم بخير مدام سمعت صوتك
....خلصتي من هذا سامي
.....اي
...الحمدلله لان خفت لايخليني اضطر اقتله
.....ههههه شنو مجرم انت
.....اي مجرم بحبج
رمونه
......هاعيوني
....فديت عيونج الي تخبل  احبج احبج احبج
احبج وحق الخلقج وعيوني ماشافت غيرج وكلبي مانبض لغيرج
ولاكدرت اعيش واني بعيد عنج
لتعوفيني
......اني خايفه منك انت تعوفني
....ليش اني اكدر بدونج حتى اعوفج اني هسه عشت وكمت اتنفس قبل جنت ميت اني اموت من انتي مويمي
.....اسم الله عليك  يومي قبل يومك ان شاءالله
....لاياعمري لتحجين هيج كلبي نخمط من كلتي هيج
الله يحفظج الي
....ويحفظك
.....مداصدك نفسي هاي نفسها ريمان الي دتحجي ويايه
....هههههه اهووو راح اذكرني بالماضي
....احلى ماضي بس بدون خبالاتج يصير تمام ويخبل
.....اي متكدر ترجعه بدون خبالاتي
...اي حتى بخبالج احبج
.....صدك سيوفي شوكت ترجع لبغداد
....لوبيدي هسه اجي غير بس اجي اريد احضنج حضنه قويه
ترد عافيتي
.....ههههه خجلتني لاصدك شوكت تجي
...ان شاء الله باجر احجز واشوف الشركه هم مالتي وشلون الدوام
...الله كريم يله
....هاولج تريدين تنهزمين
...هههه لاوالله بالعكس اريد انام على صوتك
...يله مابقى شي وتنامين على صدري ونتنفس
اني وياج نفس النفس
...ياريت مابقى صبر شوكت اكون الك وتكون الي
.....ان شاءالله مايصير شي يخرب فرحتنه
...عفيه لتخوفني
...هههه. كلشي بيد الله
....بس امانه اذا صار بيه شي وزوجتي من بعدي جيبي ولد
وسمي سيف وبعدين سوي اسم سيف بكلادة ولبسي ولتنزعي ابد واعتبريني موجود
....سيف ياالله منك شنو هذا الحجي ترة مااحب هيج تحجي
والله العظيم
....ههههه داشاقه وياج
...لتشاقه بعد ويايه ماااريد هيج شقه محلو باع كلبي وجعني من حجيت هيج
...لتخافين حبيبتي ان شاءالله نلتقي ونزوج ونعيش حياة حلوة
وظليت احجي وياسيف لحد مانمت على صوته وعلى شعور الامان والحب والدفو
وماادري ليش ظل بالي من كلي سوي اسمي بكلادة
ولبسي عد  ثاني يوم رحت على ماما كتلها ماما اريد اوصي اسم سيف
وماما قبلت كانت فرحانه على فرحي
وجنت مسويتلهم بالبيت خبالات واغني واكمز حسيت نفسي رجعت طفله وحتى بابا جان مكيف عليه ويكلي كل شويه والله انتي مخبله موطبيعيه
جنت فرحانه وفعلا ماما سوتلي اسم سيف ذهب
وجان عندي زنجيل خليت الاسم بي ولبسته وضميته جوة
هدومي حتى ليشوفه بابا لو اخويه لان عيب
وردت يكون الاسم  مفاجئه لسيف من يرجع
وخابرني سيف وكلي
.....حجزت على باجر بعد ماعندي صبر
بس تعاي لبيت اهلي كوليله لعمو او خلي امج تقنع عمو
تجون لان ماعندي صبر ماااشوفج
اول ماااجي
....ماااكدر اكللهم هيج بس انت انزل شويه ارتاح
وونام واني العصر احاول اجي زين
وياحبيبي روح نام وراك سفر
......اوكي ياكلبي يله باي
...بس روح نام موظل سهران
....اوكي
....احلام سعيدة
...يكفي احلم بيج
اني سديت التلفون وسمعت صوت اهلي عالي نزلت جوة
كتلهم شكو
.....كال اخويه مهند بيت عمو ذابيلهم تهديد بيتهمً
انو اليوم اطلعون من البيت
.....يا عزة خلي يطلعون لعد
...عمو يكول هاي جهال يسوها بالمنطقه لان كل كم يوم
هيجي يسون بيت
والدي كلهً
.....ياجهال ذابين ظرف بي طلقه ومهدديهم
بس هذا اخويه ماعندة عقل كتله تعال يمنه يكلي ماكو شي
باجر نروحلهم نشوف شنو السالفه واكله خلي يطلع من بيته كلبي مامطمن عليهم
،،،اني كلش خفت على سيف رجلي كامت ترجف مثل السعفه
خفت لايصير بي شي وكلت
بس يجي باجر ماااخلي يبقه بالبيت ابد بس خلي يمر باجر على خير وسلامه وعود احجي وياة
وهالليله ماكدرت انام ظليت قلقه ومن اول ماطلعت الشمس
واني الوب وخابرت على سيف تلفونه مغلق
ظليت لحد مااجاني مسج من سيف كلي اني وصلت للمطار
هدورة النار اشتعلت بكلبي   اكثر ماادري ليش
كعدت امي
..ماما الله يخليج كومي كعدي بابا خلي نروح لبيت عمو
كلبي مامرتاح
...شبيج بتي من الصبح هسه ورة الغدة نروح
....لاحبابه هسه
....لسوينه مشكله وياابوج هسه يكلب البيت على راسنه
روحي تعوذي من الشيطان وكعدي
كمت من يمها واني متخبله وكلش شويه اخابر على سيف
هاوين وين وصلت لحد ماكلي وصلت للبيت ودخلت وراح اغسل وانام وانتظرج العصر شويه هديت وارتاحيت
وهي صارت بلاربعه العصر بدلت وكعدت انتظر اهلي يحنون عليه  لحد ماحنو وكامو بدلو ورحنه واول مادخلت شفت سيف كاعد  وجان لابس قميص ابيض وبنطرون جينز
واول مشافني غمزلي
واجي سلم على اهلي ولمن كعدنه كلنه عمي كله لوالدي
.....عيني اخويه احنا نريد المي يرجع لمجاري وسيف يزوج ريمان وخلي نفرح بيهم  شدكول
....والله ياااخويه اني ماعندي مانع
....لعد خلي نقرأ الفاتحه
ونقرت الفاتحه وصرت خطيبته ورحت للمطبخ وسيف لحكني
كلي
...تذكرين شردت منج
....شردت
...حضن قوي
....روح منا عيب عليك
...ليش عيب غير خطيبتي
وجان يجرني وحضني قوي
....مبروك حبيبتي يوم الي نزوج وتنسد علينه باب الغرفه
هههه
....الله يبارك بيك احبك
...اموت عليج
وسمعت صوت الجرس كال اروح افتح الباب وقبل ميروح
كتله صدك شوف اسمك طلعت الاسم مال سيف باوع
وابتسملي كلي هسه اجي انتظريني هنا لتروحين اموتج ترة
ومابيها كم دقيقه وسمعت صوت طلقه وركضت وشف الكل يركضون وطلعنه برة وجان سيف مليان دم ومدد بالكاع راحو الكل عليه بس اني مكدرت اتحرك جمدت وكمت اسمع صوت عياط وصياح وبجي ولطم وكمت اركض مثل المخبل
وخرتهم وكمت اجر بيهم
وكعدت بالكاع وخليت راس سيف بحضني ومجنت اكدر ابجي لان دموعي ماكو جنت اكمشه واسمع صوت الرياجيل يكولون مات
اكللهم جذابين روحو منا هو ميموت هذا حبيبي انتو مخابيل هو ميعوفني ميكدر روحووووووً  يله روحوووو
روحووووو الله يخليكم واصيح يارب باوع عليه خلي يكوم
ياررررررب خلي يكوم سيف واكمش الدم  مالته واكلهم وخرو منا
لحد يكمشه والله اموتكم هذا سيوفي حبيبي حبي حياتي
سيوفي شوف لبست اسمك هيانه باع احبك
لتموت حباب وتعوفني لتموت واجر يدة وابوسها واخلي راسي على راسه وجنت كلي دم جنت اسمع صوت ناس دكول لتود للمستشفى هو مات واني اصيح مامات  هيانه ديتفس ومن اكول هيجي يجون يشوفون صدك يتنفس
ومن يشوفو ميتنفس  يكومون يصحون الله واكبر
الله واكبر
كوم حبيبي كوم حياتي كوم خلي نزوج ويصير عدنا جهال كوووووم فدوة  كوم ترة راح اموت ياالله يالله شسويت اني ليش
هيج داتعذب ليش راح سيف احبه واصيح واباوع بالوجوة
احبه والله تعرفون شنو احبه هذا ابن عمي وصديقي
هذا اسمه محفور بكلبي وكامو يجرو من يدي واني اجرة واملخ بشعري واكللهم انطوني سيف  وين تودو وين رجعو هذا مالتي
واخذو مالتي مني ودفنو كلبي وياة
ومات سيف ومتت وياة وماتت قصه لشخصين ماعدهم اي ذنب غير انو هما حبو بعضهم اني ميته بدونه اني ميته
ميته ياالله اخذ روحي وخلصني شلي بهلدنيا الي مابيها سيف
صارت طلعتي الوحيدة هي المكبرة اروح اشوفه واحجي وياة اشوفه شمحتاج ممحتاج  ضايج فرحان بدوني سعيد
ديبجي  ودمعته منشفت مثلي اسم سيف محفور بعدة على صدري وصورة بعدها بحضني واسمه بعدة محفور بكلبي
جنت اكول شوكت يرجع جنت اكتبله عد الى قلبي
بس هسه مامنه ردة  بقه بس قميص سيف يمي قميصه الابيض الي مليان دم يمي معلكته بكنتوري اشتم عطرة بي
اشتم عطر حبيبي ياليت لو اكدر اكتبلك مرة ثانيه عد الى قلبي

خلصت قصه تحمل اعظم مشاعر من الألم مراح اكتب بعد كلمه لان ماكو كلمه بعد تصف هاي المشاعر
هذا حال الي يحب بوطني ياما محبين فقدو محبيهم
وكل قصه حب  تنتهي تموت بيها  الف روح اني اسفه على هالمشاعر المؤلمه بس للاسف هاي  وحدة من القصص الي هوايه عشناها بحياتنه

تحياتي وحبي واحترامي لكم
#الكاتبه #روجمان