رواية على قمة الحكيم الفصل الحادي والخمسون 51 - بقلم الكاتبه : ضحى ال عامر

الكاتبة : ( Duha al amer ) 🦋

_تابعو حسابي
_صوتو للبارت❤
_ فرحوني بتعليقاتكم الحلوه

يا من سرق قلبي مني
يا من غير لي حياتي
يا من احببته من كل قلبي
يا من قادني الى الخيال
......

ملاحضة : خليت الكلام 3 اجزاء حكيم ونجاة ونرمان حتة تفهمون الاحداث
_________________________________________

اصيلة : الووو ولككككك يمةةةة الحك اخوووك رااااح يموووت

نرمان : حسيت على شخص يضربني راشدي فتحت عيني وصرت اسمع اصوات متداخلة الكل يحجي سوة

عبير : ولج يمة كعدت

غربة : خلني اجيس نبضها واشوف

عبير : صرتي دكتورة

نرمان : فتحت عيني ورجعت من شفت اشكالهن ضليت اباوعلهن وكل جسمي يرجف .. ا ءء .. اني وين

عبير : يمنة عيونيييي

نرمان : باوعتلي العجوز وقربت وجها من وجهي ..

غربة : ولج اصيرين عاقل وما تفكين حلجج ارجعج لرجلج سالمة والااااا تفكين حلجج احط سجينة بزردومج

نرمان : هزيت راسي و ضليت ساكتة ودموعي تطافر بلعت ريكي بخوف .. كامو طلعو من الغرفة وسمعت صوت قفل الباب لزمت راسي شراح اسوي وين اروح شلون اطلع منا منو ذولة .. كمت اسمع اصواتهم برة

عبير : البنية نضيفة وثوبها غالي

غربة : خلنة نشوف يجينة شي منوراها لاع ..

عبير : كولي يا الله حيدوري شكال

غربة : خوفي من حيدورج لا يطلع جذاب واكمع راسة من لغلوغة

عبير : يااااااا لاتكولين علية هيج هسة يجي ونتفاهم جدامج

غربة : منتضرة شعدي

نرمان : ضليت بالغرفة ابجي اخاف يسون بية شي .. باوعت على ارجاء الغرفة قديمة والرطوبة ماكلتها احس السكف راح يوكع على راسي .. مرت ربع ساعة وطبت البنية

عبير : هاااج هاذة زقوم اطفحي حتة اشيل الصينية واطلع

نرمان : كعدت على سرير حديد كبالي جان شكلها سمينة كلش وشعرها قصير وكفشة ضلت تخوز ربية شمرت الصينية ودفعتها بالكاع

عبير : ما تاااااكليييين

نرمان : ما .. ماريد

عبير : اذا ما اكلتي اخليج بلاية اكل الباجر

نرمان : ما اريد .. انتو ليش ماخذيني شتريدون مني

عبير : شغل بس يخلص نكلعج منا

نرمان : ضليت ساكتة ومادة رجلي واحس بألم براسي مو طبيعي

عبير : انتي مو مال احترام

نرمان : شالت الاكل من كدامي وطلعت وسدت الباب ..

فاروق : اني قدمت بلاغ للمركز وانطيتهم الورقة المكتوبة والملابس وراح يسون DNA للدم الفوك الملابس

نزار : الاخذ نرمان والتهديد من البيت هدوم نرمان من اختفن ما جان عدنة احد غريب بالبيت لحد ما رجعت من السفر وهم ما اجانة احد غير خطار شوية وراحو وين لكو هدوم مرتك

حكيم : اشششش مااريد اسمع شي ..

نجاة : كلنة مجتمعين بالصالة اريد نوصل الحل وحكيم مدد على القنفة مشكليلة سيروم لان ضغطة صاعد .. كام من القنفة وكف وكال ..

حكيم : راح ابيع محلي مال منطقة الجزائر وابيع المخازن مال بغداد

نزار : واني ابيع سيارتي

فاروق : وشلون تنتضر لحد ما تبيع يلة ترجع مرتك

حكيم : لا راح اداين واسحب جم فلس بالبنك اكمل المبلغ لليل ما اخليها اضل

فاروق : واني اخابرلك على جماعتي وفراس وايهاب هم ناخذ منهم بين ما تبيع

نجاة : ضل ساكت ولازم راسة

فاروق : وشلون راح نوصللهم

حكيم : ادك باب السما واجيبها

نجاة : عافنة وراد يطلع

نزار : وين رايح

حكيم : للمركز

نجم : اجي وياك

حكيم : لااااا خلييييك .. اريد فاروق

نجاة : طلع فاروق وراه وضلينة وحدنة بالبيت

روان : اني اريد اروح لاهلي ما اضل هنا لا انوب يجيني السرة

اسراء : اني هم ما اضل بعد لو طالعة وفاكة الباب جان اني هسة مكان مرت حكيم

نجاة : بدل ما تدعولها ترجع بالسلامة امداجن

حكيم : اريدك اجيب ايثار للبيت بس ما اريد احد يحس

فاروق : شاك بايثار !!!!

حكيم : مرتك هية الجانت تاخذ ملابس نرمان وجنت اكول يجوز غيرة نسوان وبنفسها البس وتاخذة بس نفس الي اختفن طلعن

فاروق : امشي هسة اجيبها واجي

حكيم : لا اريد اروح للمركز ومن ارجع اريد الكاك جايبها وما اريد واحد من البيت يعرف ايثار اجت للبيت

فاروق : ماشي .. بس خل اوصلك للمركز واطلع البيتهم

حكيم : يلة امشي

نرمان : ضليت لليل على هاي الحالة محد طب وصار البيت هدوء وضلمة اختنكت من المكان كمت ابجي بصوت عالي واصيح .. طلعووووووووونييي فدددوة طلعوووووني ما ارررريد اضللل هناااااااا شترررريدووون منيييي .. كمت اردد بالكلام واصرخ مابيدي شي اسوي

عبير : ها وغسل

نرمان : حبابة طلعيني شتريدين مني اني مسوية حادث ورجلي مكسورة وعندي ارتجاج بالمخ والله اموت اذا اضل هنا

عبير : اريد اناااام والصباح رباح واذا سمعت حسج وابو فاضل ادزلج غربة اطلع مصارينج

نرمان : ضليت ساكتة شغلت الضوة وسدت الباب وقفلتها وطلعت .. كمت ابجي بخنك حسيت المكان ياكلني الضوة اصفر والجو يخنك اريد اطلع ما اكدر اتحمل بعد

حكيم : رجعت من المركز بعد دوخة وركضة ماكو نتيجة .. سحبت فلوس من المصرف وخابرت على الناس الاعرفهم وباجر يلة يكدرون يجهزولي المبلغ كامل .. السلام عليكم

فاروق : عليكم السلام

ايثار : اءء شلونك عيني

حكيم : هزيت راسي .. زين

ايثار : شكو شبيكم تريدون شي

حكيم : تعرفين نرمان وين !

ايثار : سمعت مسوين حادث الحمدلله على سلامتكم

حكيم : الله يسلمج .. احم ايثار باوعلي يابة

ايثار : ها

حكيم : اني ادري جان بينكم مشاكل انتي وفاروق وما متوالمين ..

ايثار : اي

حكيم : انتي جنتي تاخذين ملابس نرمان

ايثار : انييييي لاااااااا طبعااااا

حكيم : اششش اهدي سمعيني وباوعيلي .. نرمان انخطفت

ايثار : بصدمة .. شنووووو شنووو انخطفت صدك تحجي

فاروق : اي وهسة مضرطي وكولي السلابات منو جان ياخذهن

ايثار : اءء ما ادري

حكيم : تنهدت .. يعني مو انتي الجنتي تاخذين هدوم نرمان ولا تدرين بيها مخطوفة

ايثار : اي

حكيم : فجأة رفعت راسي على صوت فاروق ضرب ايثار راشدي

فاروق : لججججج مو ما اريد احجي زايد ايثاررررر اذا طلع الج ايد بخطف نرمان قسما برب العزة ما اخليج اطلعين منا سالمة

حكيم : لج مرتي ما ادري بيها وين ولا ادري شيسون بيها تدرين روحي شبيها روحي مشتعلة احجي اذا تعرفين شي احجي وصدكي ما اخلي بشر يمس شعرة منج

فاروق : اخر مرة اسألج مثل الاوادم وراها ما اخليج تعرفيني .. ملابس نرمان انتي جنتي تبوكيهن لو لا

ايثار : لا

حكيم : حسيت بردودها جامدة واكو شي ورا هاذة الهدوء .. كام فاروق وصار يضرب بيها وهية تصرخ سمعت صوت الباب يندك بقوة اشرت الفاروق يعوفها

نجاة : افتح الباب

حكيم : نزلي جوة وحلكج لاتفتحي

نجاة : منو يمكم

حكيم : معليييج يلة ولييي

فاروق : لج بت الكلب اذا صار شي بالبنية اشرب من دمج وحق الخلقج

حكيم : انتي من ضمن الشكوك ومن حقي اسلمج للمركز وهمة يحققون وياج ويتعاملون

ايثار : لااااا بروح ابوك لاسلمني للمركز

حكيم : ماعندي خيار ثاني همة يحققون وياج

فاروق : اي ماكو غير حل

ايثار : شلون ترضوها اسلموني للمركز واني حامل لاسون بية هيج والله ما ادري بنرمان مخطوفة وداعت الي بطني

حكيم : هاذة الحجي جمعي وكولي بالمركز

ايثار : انطيني مبايلي اريد اخابر ابوية

حكيم : طب فاروق للغرفة وطلع بيدة مسدس سحب اقسام حطة براس ايثار

فاروق : وربج اكتلج واذبج بالنهر وعندي احلى من العسل

ايثار : والله والقران ما ادري بنرمان مخطوفة

حكيم : السلابااااات منوووو جااااان يبوكهن

ايثار : اني

فاروق : ايا ك***

حكيم : كعدت على التخم كبالها .. وين توديهن

ايثار : انتة وعدتني اذا احجي متخلي واحد يمس شعرة مني

حكيم : تعال اكعد فاروق

فاروق : اني الج عرض السكط

ايثار : جان ياخذهن اخوك وينطيني فلوس

حكيم : وكفت على رجلي حسيت حيلي باد .. يا اخو

فاروق : ولج ك*** يا اخو

ايثار : نجم

فاروق : كالها نزار كالها

حكيم : ليش جان ينطيج فلوس وشيسوي بيهن

ايثار : ما ادري وداعت الي بطني ما ادري اصلا اني ما اريد الفلوس الي

فاروق : اليوم اعراضكم **** انتي واهلج

حكيم : اسكت خل تكمل

ايثار : امي جانت محتاجة فلوس واخذهن واديهن الج

حكيم : وفلوس القاصة وحلقة نرمان

ايثار : راح احجي بس

حكيم : ااااااااحجييييييي

ايثار : اي اي

الرجوع الى الماضي ..

من نرمان بدت تجهز وتفتح القاصة جنت اخذ كل يوم من الفلوس واجمعهن حتة متحسون و مرة جنت فاتحة القاصة وسحبت ورقة ورجعت اريد اسدها

نجم : هااااا قرامة

ايثار : انداريت علية مفزوعة .. اءء

نجم : اءء وجعةةةة

ايثار : نرمان تريد فلوس ودزتني اجيبلها

نجم : ايبااااخ

ايثار : عقدت حاجبي .. وانتة شسوي هناااا مو اتوقع ميقبلون واحد يصعد فوك بس اهل البيت

نجم : چا غير احنة اهل البيت

ايثار : قفلت القاصة وكمت اريد اطلع

نجم : راح يجي اخوج ياخذهن

ايثار : انتة شتريد

نجم : اذا نتفق نتفاهم

ايثار : ماعندي حجي وياك انزل جوة لا اعيط والم العالم عليك

نجم : لاه لاه لاه .. راح انزل جوة المغرب الكاج ورا البيت واذا ما اجيتي تندمين ها

ايثار : عافني ونزل بيومها خفت وقررت اسولف الفاروق حتة اذا يضربني لان اخاف اروح ورا البيت ويا للمغرب وما اجة فاروق باوعت من شباك غرفتي لكيتة واكف ينتضرني لبست حجابي واتأكدت ماكو احد بالحديقة طبيت ورا البيت لكيتة واكف

نجم : والله لو ما جاية جان خليتهم يطردوج بالقنادر

ايثار : شتريد

نجم : انتي مو تبوكين فلوس حكيم .. يعني مسلط على مسلط

ايثار : ما ابوك اني محتاجة واخذتهن وبس يرجع اكولة

نجم : يعني متريدين اضاعفلجياهن

ايثار : شلون

نجم : كلما مرت حكيم تشتري هدوم اجيبيلي الملابس الحلوة البيهن يعني ملات نوم وهل سوالف

ايثار : وانتة شسوي بيهن تلبسهن

نجم : اكلي تبن .. اريدهن الصاحبتي وانطيج على كل قطعة اجيبيها 50 الف

ايثار : يعني تريد بس اخذهن منها واجيبلكياهن

نجم : اي ..

ايثار : يعني انتة جنت صاعد فوك تبوك هدومها مووو

نجم : كلنا بالهوى سوى

ايثار : ماشي بس على كل قطعة 50

نجم : خوش

ايثار : وبديت اخذ الملابس ومرات البسهن يلة انطيهيا لان يعجبني شكلهن .. وصدك صار ينطيني على القطعة 50 الف واوديهن لأمي

حكيم : والحلقة

ايثار : جنت ضايجة منها وردت احرك كلبها وكسرتها .. بس والله ماعندي شي وياها بعد

فاروق : والله لاكسر روسكم وادحسها بالقنادر

حكيم : كام يريد يطلع .. فاررووق اذا سويت شي بدون علمي لا اخوية ولا اعرفك بعد .. لك اني راح اتخبل تعرف شنو راح اتخبل مرررتي ما ادري بيها وين لو شيسولي بيها لك تدري بالدقيقة شيجي براسي

فاروق : ليش اريد افتهم ليش انتي شمسويلهم

حكيم : مرتك لازم اسلمها للمركز

فاروق : وذاك الكو***

حكيم : اول شي مرتك وبعدين نجم

ايثار : لا ابوس ايدكم لاسلموني للمركز انتة مو وعدتني مسوي هيج ليش اجذب ليش ماعندك كلمة فاروق تقبل يسلمني للمركز واني حامل بأبنك

حكيم : ضل يمها ..

نجاة : كاعدين جوة وطب كمال بيدة 4 ملاين حطهن على الميز

كمال : ذني الكدرت ادبرة الحكيم

نجم : اني لو عندي شي ما اقصر ويا

اصيلة : رحم الله والديك زين اسوي بلكت يدبر فوكاهن ويرجع البت قبل لا يصخمون وجوهنا ذولة ناس شرانية وماندري شيسون بيها

نجاة : حطيت ايدي على خدي وكمت اسبح .. يا ودود .. شفت حكيم طب للهول عيونة تريد تنط على نجم وصدرة يصعد وينزل بسرعة .. كمت وكفت اباوعلة

نجم : شبيك اول مرة اشوفني

نجاة : اجة علية حكيم شالة من ركبتة وركعة بالحايط

حكيم : مرررررررتي وين

نجاة : لطمت على وجهي .. طلع مسدس وحطة براس نجم وشمرة بالكاع وكعد على صدرة

حكيم : مرررررتي وووووين

نجم : و وخ وخر راح اموت

نجاة : لزم راسة وركعة بالكاع ضربة بوكس على وجها حسيت حكيم تهستر صار ميشوف كدامة يضرب بنجم بعشوائية .. كلها التمت علية لازمي ميكدرون يفلتو من جوة ايدة

كمال : ادرررري نجممم شعليةةةة وخررر عنةةة

اصيلة : ولك وخررر راح تكتلة تخبلت انتةةةة

نجاة : طب نزار شاف حكيم يضرب نجم بدون ميدري شكو دخل على الخط وكام يضرب بي التمو ثنينهم علية ملخو تملخ صار الدم يطلع منة من كل مكان .. طفرت عمتي للشارع اصيح

اصيلة : يبووووووو الحكوووووونة راااااح يكتلوووون ابنيي

نجاة : كمت الطم على وجهي مجاي اصدك اجاي يصير بالبيت نزل فاروق جرها وطببها للبيت

فاروق : ولج انتة مخلفة كوا*** مو زلم

كمال : ادري شكووو غير تفهمونة

فاروق : عوفة راح يموت قبل لا ندري بمكان مرتك

حكيم : ولك احجيييي مرتي ووووين

نجم : م ما ادري

نجاة : صار صوت دورية بالباب اشرلي فاروق اطب جوة .. رحت الغرفتي مصدمة .. الجاي يصير بينة صدك

نرمان : سمعت صوت اذان الفجر كمت اردد ويا الله اكبر .. الله اكبر .. اذكرت من جان يأذن ونصلي اني وحكيم اذكرت من اول مرة صليت بحياتي ولبسني شماغة وطكلي صورة .. نزلت دموعي وسمعت صوت هوسة برة

_ فجأة اندفرت الباب من قبل مسلح ماشوف غير حكيم طب يركض علية كعد على ركبة يم رجلي وشبكني عصرني بين ادية وكمت اشهك بصوت عالي واسمع صوتة

حكيم : نرررمان هددديتي حييييلي

نرمان : خايفة خايفة احضني

حكيم : اشششش محد يكدر يسويلج شي بعد

نرمان : شالني من الكاع ضامني الصدرة طلعني من بين كل الهوسة والاصوات صعدني بسيارة فاروق وقفل السيارة

حكيم : هسة ارجعلج

نرمان : لاتعوفني اخاف وحدي كلبي راح يوكف .. عافني وطلع يمشي سمعتة كال

حكيم : راح ادزلج نزار

نرمان : ضليت بالسيارة وحدي مرت ربع ساعة واجة نزار فتح الباب الي بصف السايق وصعد

نزار : الحمدلله على سلامتج

نرمان : بجيت وباوعتلة .. الله يسلمك .. ضل ساكت ومبايلة كل شوية يدك ويرفضة اجت اكثر من دورية تقريبا ساعة احنة بالسيارة .. شفت حكيم من بعيد سلم على ضابط وضل فترة يحجي ويا واجة صعد بالسيارة

نزار : مو كافي

نرمان : باوعتلة بالمراية مسح عيونة وشغل السيارة

حكيم : نرمان احجي اكو واحد اذاج لو سوالج شي

نرمان : لا ابد ماشفت احد بس نسوان ثنين هددني يكتلني ومرة طبن جابلي اكل

حكيم : بس

نرمان : والله

نزار : يعني ماشفتي نجم ابد

نرمان : نجم ؟؟ لا ابد وين اشوفة

نزار : راح ترجع للبيت

حكيم : حجيت ويا الضابط ما اكدر اوديها اليوم للمركز باجر يلة

نزار : اي احسن خل ترتاح

نرمان : بس اني ما اريد ارجع للبيت اخاف ما اريد اطبلة ولا اشوفة

حكيم : يابعد راسي بس اليوم تحملي

نرمان : ما اكدر

نزار : اروحلج فدوة سكتي البي كافي وين يوديج بهل ليل اتحملي بس اليوم لحد ما يطلع الصبح

نرمان : ضليت ساكتة لان حسيت بحكيم اعصابة تلفانة .. وصلنة للبيت اول ما طب للكراج كلبي انقبض .. اجة من جهتي فتح الباب وشالني

حكيم : كل فرحة بسنيني دفعت ثمنها بيج

نرمان : حاوطت ركبتة ما اريد اعوفة ولا ابتعد عنة بعد .. دخلنة للبيت الكل بس شافوني وكفو عافهم ومشة بية طببني الغرفتي الجوة وكعدني على السرير .. فجأة انفتحت الباب

نجاة : لج نرررمان ررررجعتييييي

نرمان : اجت حضنتني وبجت

نجاة : الله لا ينطي الجان السبب

حكيم : كولي النزار لايطلع من الباب وفاروق راح يبات بالمركز ويا مرتة

نجاة : ايثار ؟؟؟

حكيم : اي طلعي وسدي الباب راسي راح ينفجر

نرمان : باوعتلة بصدمة .. ايثار ليش بالمركز .. ضل ساكت وكام فتح الكنتور وطلعلي ملابس اجة كعد على ركبتة وبدة يبدلي ملابسي

حكيم : جنت مستعد ابيع روحي واشتريج

نرمان : كلة بسببي اني فتحت الباب

حكيم : باجر اخذج البغداد ما اخليج بعد هنا

نرمان : اي اني ما اضل بعد هنا اخاف .. شال ملابسي القديمة من الكاع وبدة يشكك بيهن بيدة

حكيم : كل ملابسج اذبيهن كلشي ما اريد اشوف منهن كلهن راح احركهن

نرمان : فتح باب الغرفة وشمرهن حتة شالي .. رجع طب للغرفة وركع الباب تقرب مني حاضني

حكيم : احبج

نرمان : حاوطتة بثنين ادية .. اعشقك حكيمي

حكيم : باجر اخذج للمركز تحجين كل الشفتي والسمعتي هناك بالحرف الواحد وراها اخذج واطلع البغداد

نرمان : نضل هناك

حكيم : اي فترة بين ما ترتاحين وافرغ البيت وارجعج

نرمان : يا بيت تفرغة

حكيم : هاذة ..

نرمان : ضليت ساكتة خفت اجادلة وهوة بهاي الحالة حضني وغمض عينة حسيت بروحة شكد تعبانة

نجاة : ضلينة كاعدين اني ونزار للصبح صارت ساعة 7 وطب فاروق عيونة حمر نزع جواريبة شمرهن وكعد على صفحة مرجع راسة ليورا

نزار : وين مرتك

فاروق : يم اهلها

نزار : شصار

فاروق : اخذو اقوالها وكالت الي تعرفة وكدرت اطلعها

نجاة : حرامات ما سجنوها

نزار : وذنيج والك***

فاروق : يومين ويحولهن محكمة ويا نجم .. وضل كمال يمة

نجاة : مرتة راحت لاهلها و اصيلة راحت البيت اخت عمة نهاد

فاروق : بعد احسن

نجاة : شلون عرفتو نجم هيج مسوي

نزار : اكل راشدين وكتهن كلهن

نجاة : زين وين اخذ نرمان ومنو اخذها

نزار : متعرف على كح*** ثنين يلمن قواطي بمنطقة الح*** ومصادق وحدة منهن على اساس يريد يزوجها وكايللها اسمة حيدر وتاجر

نجاة : كبر لفة والله لو تدري مرتة بعد تفلة متتفل بوجها

فاروق : كومي شوفي حكيم خل نفض هاي السالفة

نجاة : اي .. كمت دكيت الباب عليهم

حكيم : طبي

نجاة : فتحت الباب لكيت نرمان نايمة وحكيم كاعد كبالها ولازم ايدها .. فاروق يريدك

حكيم : اششش لاتكعديها ..

نجاة : هد ايدها وطلع وياي وسد الباب ..

حكيم : شوية وكعديها وساعديها تبدل

نجاة : ماشي .. انتة ما نمت ؟

حكيم : ما كدرت

فاروق : ها وين مرتك خل ناخذها تنطي اقوالها

حكيم : ساعة ونطلع

فاروق : مستحي احط عيني بعينك بعد الصار

حكيم : انتة ما الك ذنب

نزار : راح تطلع البغداد

حكيم : اي

فاروق : شلون والمحكمة لازم تحضر

حكيم : ارجع بيوم المحكمة

فاروق : راح تتبهذل

حكيم : ميخالف ما اكدر اخليها هنا نفسيتها تعبانة واخاف تتدهور حالتها

نزار : ومدرستها

حكيم : اسويلها انتساب واقريها بالبيت

نجاة : يعني بعد مترجع

حكيم : لا ارجع بس فترة اريدها ترتاح

فاروق : خابروني عمامي يريدون يطردون نجم من العشيرة

حكيم : شوكت لحكو يسمعون

فاروق : ما ادري منو كايللهم

نزار : اني خابرت عمي نضال وسولفتلة حتة يطردون نجم من العشيرة

فاروق : خرب عرضك

حكيم : روحي كعدي نرمان

نجاة : حاضر .. رحتلها فتحت الباب على كيفي ودغيتها نرمان .. ما اشوفها غير طفرت من مكانها لازمة كلبها

نرمان : هاااا شبيج

نجاة : انتي الي شبيج ..

نرمان : ما ادري فزيت

نجاة : تعالي ابدلج حكيم يريدج

نرمان : وين اروح ما الي خلك

نجاة : ما ادري تعالي كعدتها على السرير وقريت عليها الم نشرح حتة تهدء

نرمان : لبسيني جبة فوك ملابسي

نجاة : تدللين

نرمان : حكيم بالبيت

نجاة : كاعد يم فاروق .. جبتلها ملابس لبستها وطلعت برة ساندة علية .. لان لكينة عكازتها مكسورة

نرمان : صباح الخير

نجاة : كام حكيم سندها وكعدها على التخم بصفة ..

حكيم : متحسين راسج احسن

نرمان : اي احسن

فاروق : يلة امشو ما ضل وكت

نرمان : اخذني وطلعنة من البيت ساندة علية صعدني بالسيارة ليورا وصعد بصف فاروق

فاروق : وسيارتك شلون

حكيم : راح ابيعها واخذ من بغداد

فاروق : وشلون تروح

حكيم : اروح بسيارة نزار واحاول اشتري ومن تجي على المحكمة ارجع نزار وياي ياخذ سيارتة

فاروق : متخاف علية يرجع طريق البصرة وحدة

حكيم : ما علية شي مو صغير

فاروق : الله كريم

نرمان : وصلنة للمركز نزلني من السيارة طبينة والاغلبية عينهم علية حسيت روحي مجرمة من نضراتهم .. دخلنة الغرفة الضابط سلم على حكيم وكعد

الضابط : الحمدلله على سلامتج

نرمان : شكرا

الضابط : بنتي احجيلي من اخذوج لحد ما طبينة للبيت

نرمان : باوعت على حكيم بخوف لزم ايدي واشرلي براسة بمعنى احجي .. بديت احجيلة من دكت الباب لحد ما طب حكيم

الضابط : وقعي هنا

نرمان : وقعت بدفتر اخذة مني وباوع الحكيم

الضابط : صار 4 مرات ناخذ اقوال نجم وكل مرة يكول شكل والبنات الويا هم متفقين على هاذة النمط

حكيم : اني جدا ممنون الجهودكم ومشكور الك شخصيا سيادة المقدم

الضابط : اني حاضر بأي وقت

نرمان : طلعنة من المركز حسيت براحة من خلصت من هاذة المكان

فاروق : نجم جنة ك*** عورة

حكيم : الكو *** عبالة يلزمني من ايدي التوجعني

نرمان : وصلنا للبيت ضليت بالسيارة وحكيم نزل طب جوة

فاروق : خوية اني اسف

نرمان : لا على شنو

فاروق : هواي حاولت أذيج بالبداية وجرحتج واجت مرتي كملتها

نرمان : الله يسامحك ويسامحها اني هسة ماريد شي غير ارتاح لان هواي تعبت

فاروق : الله كريم

نرمان : اجة حكيم مبدل وبيدة جنطة مال ملابس صغيرة فتح سيارة نزار وصعد الجنطة اجة علية ونزلني من السيارة

فاروق : يعني هاي هية نويت

حكيم : ارجع ما اتأخر

فاروق : تروح وترجع بالسلامة

نرمان : صعدت بالسيارة .. طلعت نجاة من البيت تركض اجت باستني وتبجي

نجاة : ديري بالج على نفسج وعلى حكيم

نرمان : اني محتاجة واحد يدير بالة علية

نجاة : ههههههه امداج ضحكتيني

حكيم : فاروق .. نجاة امانة بركبتك تخليها

فاروق : ان شاءلله

حكيم : قفلو البيت الفوك ونزلو جوة لحد ما ارجع هم عينك على نجاة لان اصيلة متقبل ترجع هسة وماكو احد بالبيت وها لاتنسة عينك على نزار اريدك كد المسؤلية لو مرة وحدة مو الخاطر احد بس الخاطري

فاروق : روح ولا دير بال اني هنا

نرمان : اجة نزار بوس حكيم واجة يريد يبوسني

حكيم : هااااا خالي

نزار : مثل اختي

حكيم : مثل اختك مثل خالتك امشي ميمشن عندي

نزار : لعد بالعباس مرة من جنتي صغيرة بستج من خدج وهوة ميدري .. وكولي ما اذكر

حكيم : ايا عار

نرمان : شكد حقير ما اذكر اصلا

نزار : تروحون وترجعون بالسلامة بس اذا لكيتها مشخوطة لا ترجعون

حكيم : ارجع للكلية بالفورتات

نزار : عووود فولهااااا بانزززززززين للقبق

حكيم : اني ويامن ابتلشت

نجاة : حكيم .. راح اشتاقلك

حكيم : واني هم ديري بالج على نفسج وصيري عاقلة ما اوصيح بعد

نجاة : لا ابد والله لاتوصيني

حكيم : كرصت خدها .. بعد انتي هنا ام البيت

نجاة : فدوة الطولك

نرمان : صعد حكيم وقفل السيارة .. طلعنة من الكراج واشرتلهم باي

حكيم : اذا نعسانة نامي ومن نوصل اكعدج

نرمان : ما اكدر ممرتاحة .. داس دكمة من الصفحة ونزل الكشن صار شبه سرير

حكيم : وهسة

نرمان : اي احسن .. انداريت علية اباوع وهوة يسوق .. ماجبتلي ملابس

حكيم : لا شتريدين اجيبلج مناك

نرمان : ماشي .. ومدرستي

حكيم : جبت كتبج كل يوم اني اقريج واخذج تمتحنين نص السنة واخر السنة

نرمان : ماشي .. فتحت الجكمجة لكيت بيها جبس وببسي ومي ابتسمت من اذكرت سوالف نزار من ابوك حلوياتة

حكيم : طلعي الجبس وفتحي

نرمان : خطية .. بس يلة نشتريلة غيرة .. فتحتة وكعدت اكل وانطي الحكيم منة

حكيم : لقد فقدت الكثير من الأشياء التي كنت اضن بانها ستدوم ألى الأبد ، وعشت اشياء كثيرة لم تكن من المفترض ان اعيشها في عمري ، لكنني قاومت وبقيت صامدا حتى ادركت بأن الحياة دائما لا تأتي كما نريد ، انما هي اختبار من الله للصبر ومدى تحملنا ؛ من الصحيح ان استيقظ كل يوم لأحارب حزني واحداث منزلي توتري وضياعي الكلام الذي له رؤس اقلام حادة احارب انكساراتي ثم انهض واجمع شظايا السنين بكف عارية احارب عمري الضائع .. فالحمدلله دائما .. من مذكرات الحكيم ..

نرمان : بردت طفي التبريد

حكيم : تدللين

نرمان : نفسي تلعب

حكيم : اليوم من نوصل ارتاحي وباجر اخذج لأحسن دكتور بالحارثية

نرمان : هم راح تخليني وحدي وتروح الشغلك

حكيم : والله ما اخليج

نرمان : غمضت عيني حاولت انام .. ماحسيت شوكت غفيت وفزيت على صوت حكيم

حكيم : نمنمة كومي حبيبي

نرمان : هااا اي

حكيم : اساعدج

نرمان : ارتاحيت من لكيت نفسي بغداد شميت هوى وغمضت عيني نزلني من السيارة

حكيم : خوش نمتي نوم

نرمان : حباب خليني كاعدة بالباب اريد اباوع للشارع ولجهال من يلعبون

حكيم : وين اكو جهال هسة طبي والعصر اطلعج تكعدين بالباب

نرمان : اوووف ماشي .. طبينا للبيت كبل نزع حذائة وشمر تشيرتة وتمدد على القنفة

حكيم : شغلي السبلت وتعالي بحضني

نرمان : ورجلي !!

حكيم : نسيت

نرمان : سحل نفسة من الفراش شغل السبلت وطفة الضوة .. سحبني الحضنة ونيمني ونام على صدري يلعب بشعري

حكيم : احبج بكثر ماترمش جفوني

نرمان : اووف حكيمي شكد كلبي حبك

حكيم : تذكرين اول مرة جبتج هنا

نرمان : اي جنت خايفة منك وانتة ترزل بية

حكيم : غير من حرصي عليج

نرمان : لا والله

حكيم : ااااخ لو الزم ابن عمج اطلع بي قهر السنين كلها هسة كفيلج الله افرغ بي نار كلبي كلها

نرمان : شلون اجة على بالك تصدك اني ناسيتة .. حتى كفاح مرت عمو بعد ما سألت علية

حكيم : ذولة العارات شنو

نرمان : انتة مو تعرف صلة الرحم ؟

حكيم : اي

نرمان : وانذكرت بالقران

حكيم : خاف تريدين اوديج البيت عمج ؟؟؟

نرمان : لا اريد اروح القبر ابوية

حكيم : اني مقصر بحقج تأمرين امر

نرمان : بست راسة وهوة مركز يلعب بشعري ويعكد بي

حكيم : راح انام لاتتحركين وتقلقيني

نرمان : انطيني مبايلك اكلب بي

حكيم : هاج بس نصي

نرمان : ضليت متمددة اكلب بمبايلة واباوع فيديوات باليوتيوب .. للمغرب يلة كعد يتثاوب

حكيم : ماخلص شحن المبايل

نرمان : بي 4 شحن

حكيم : مطلعة ط*** للمبايل

نرمان : ههههههه

حكيم : كومي اسبحج

نرمان : رفعت ايدي معنى شيلني

حكيم : حمال الخلفوج

نرمان : اجة شالني ودخلني للحمام يسبحني ..

_مرت الايام وحكيم اشترة سيارة واخذني للطبيب انطاني علاج انتضم بي لفترة .. رحنة بيها للبصرة بعد اسبوع لأن اتأجلت المحكمة مال نجم .. وصلنة واحس كلبي صار طبل

حكيم : كلما تحسين نفسج خفتي شربي مي

نرمان : ماشي .. نزلنة من السيارة وطبينة للمحكمة لكيت عمتي اصيلة وفاروق ونزار وكمال واصلين قبلنة .. السلام عليكم

_ وعليكم السلام

نرمان : تقدمو يحضنون حكيم ويسلمون علية عدى عمتي وكمال ضلو كاعدين ويخوزرون بينا

نزار : سيارتي وين

حكيم : بغداد اخذك وياي بات يمي وراها اخذها واطلع للبصرة

فاروق : رحت للشرع وطلكت ايثار

نرمان : من كال هيج بهتت ملامح حكيم وزمخ بية

حكيم : مرتك حامل !!!!

فاروق : بس اجيب تتنازل عن الطفل وعن الحاضر والغايب

حكيم : شلون يابة !!!!

فاروق : ابني اني اربي واول وتالي اهلها يريدون يسافرون لايران يم خوالها والطفل متكدر اسافر بي بدون علمي وماعدها غير حل

حكيم : ليش اصرفت بكيفك

فاروق : لا تدخلون بحياتي بعد

نرمان : ضل حكيم ساكت لحد ما صاحو بأسم نجم دخلنة للمحكمة جان اكو قاضي واحد كعدنة كبالة ونجم خالي بمكان مثل القفص بس كلش بعيد عنا وشكلة من بعيد وجها كلة مورم وازرك

_ بدة القاضي يسألني وبديت احجي حتى عمتي اصيلة حجة وياها

اصيلة : ابني ماعندة هاي السوالف ونجم من هوة وصغير فقير ومايفتح حلكة بس من ابو مات وسجل الاملاك بأسم اخو صار بينهم حقد وراد ياخذ حقة من الورث وهاي كبالك كلشي ما سوالها .. سألوها

القاضي : ابنج اعترف على نفسة هوة الدز سايق التريلة ودعم اخو وزوجتة حتى يؤدي الوفاتهم

نرمان : فتحت عيني على وسعها بصدمة باوعت الحكيم مرتخي .. لزم ايدي وعصرها

اصيلة : چا تفوووو عليك وعلى البطن الشالتك يا ابن الكلب صارلي 9 ايام لا ليلي ليل ولا نهاري نهار

نرمان : ضرب القاضي على الميز ينبها على كلامها خلصت الجلسة وطلعنة من المحكمة

كمال : لا اله الا الله ضيع نفسة وضيع عائلة بأكملها و
عندة 3 بنات جهال منو يعيشهن

نزار : ارجعو ويانة للبيت والعصر نطلع البغداد

نرمان : اي حباب اريد اشوف نجاة

حكيم : انتي تأمرين واني انفذ

نرمان : ابتسمت ومشيت صعدت بسيارة شفت عمتي تمسح بوجها صعدت ويا كمال انقهرت عليها مهما يكون هاذة ابنها

نزار : هاي سيارتك الجديدة بوووية صبر ونال

حكيم : ما عاجبتني تصرف بانزين خل افض هاي الطلابة وابدلها

نزار : اخذ سيارتي وانطيني فرق واخذ هاي

حكيم : وياها وقطعة ارض مجانية للطيبين

نزار : رحم الله والديك انتة طيب واحنة نستاهل

حكيم : ع*** بيك

نرمان : كعدت ليورا وبصفي فاروق فاتح الجامة ويدخن فاصل عنهم بغير عالم

حكيم : ابو الفوارق وين شارد

فاروق : بهل دنيا العوجة

حكيم : كول يا الله ما ضاقت الا لتفرج

نرمان : وصلنا الشارع بيتهم لكيتنا هاذة الولد الجاب الدولمة مرة

فاروق : هاااااذة ابن الك*** اجابة هنا شيسوي بالباب واحنة ماكو

حكيم : بالعكس مؤيد خوش زلمة واعرفة من احنة وجهال عمرة ما فك عينة على عرض العالم يجوز اجة يسأل على واحد بينا

نرمان : بلعت ريكي بخوف نزلت من السيارة شفت بيدة صينية بيها سمج زوري وتمن احمر ويدك بالباب لزمتني الضحكة علية

حكيم : فكي الباب وطبي

نرمان : اول ما فتحت الباب صارت كبالي نجاة حاطة حنة ولافة راسها بعلاكة ورافعة دشداشتها واكفة

يتبع ...