رواية على قمة الحكيم الفصل الرابع والخمسون 54 - بقلم الكاتبه : ضحى ال عامر

الكاتبة : ( Duha al amer ) 🦋

_تابعو حسابي
_صوتو للبارت❤
_ فرحوني بتعليقاتكم الحلوه

يُقشِّرُني الحبُّ كالبُرْتُقَالة يفتحُ في الليل صدري ويتركُ فيه نبيذاً، وقمحاً، وقنديلَ زيت ولا أتذكَّرُ أنّي انْذَبَحت ولا أتذكَّر أني نَزَفْت .. عميقة

خليت اسم الطفل حقيقي لأن عمو حكيم ما قصر حرك القصة بالستوري ..

_________________________________________

نجاة : هااااذة منين الطفل

فاروق : بصوت تعبان .. ايثار جابت

حكيم : شوكت ليش ما حجييت

فاروق : اليوم جابت

حكيم : شلون جبت الطفل من امة

نرمان : بهتت ملامحة كعد على القنفة حاضن الطفل بيدة ضل ساكت ومدنك وعيونة حمر عرفتة يبجي .. كعد حكيم على ركبتة كبال فاروق

حكيم : شلون اخذت الطفل

نرمان : جر نفس ومسح وجها ..

فاروق : ابوها خابرني اجي اخذة

حكيم : وامة وين شلون انطوكيا

فاروق : ما شفتها بعدها بالبنج دفعت تكاليف العملية واخذت الطفل من الخدج وطلعت

حكيم : يعني امة ما شافتة

فاروق : لا

نزار : شلون تاخذ الطفل من امة شنو من كلب انتة

فاروق : همة خلوني اخذة قبل لا تكعد وتشوفة همة ميريدوها اشوفة وتتعلق بي .. اني ما جنت مستعد اخذة وبعدة لحم

حكيم : دخيل ربهم شكد مخانيث

نرمان : صار الطفل يبجي بحضن فاروق راحت نجاة اخذتة منة والطفل كام يلوع بيدها

فاروق : هسة اني شسويلة فهموني

نزار : ولد !

فاروق : اي

حكيم : نجاة .. نزلي الطفل الاصيلة لو صيحيلها تصعد فوك

فاروق : لا ما اريد اصيلة تلزمة انطونيا

نرمان : اخذة من ايد نجاة وكام يفتر بي بالغرفة والطفل ما سكت بس يفرفح بيدة

حكيم : خاف جوعان

فاروق : ما ادري

نجاة : اكيد جوعان لازم اجيبلة حليب وممية ودوة مال غازات وهواي سوالف

فاروق : شلون اعرف اجيبهن شكول وينطونياهن

حكيم : اني راح اخذ اصيلة واروح للصيدلية هية اعرف من عدنة

نرمان : ضل يفتر بالطفل ويخض بي منا ومنا والطفل فاحط اخذتة منة وكمت افتر بي حطيت اصبعي يم شفايفة فتح حلكة يريد يرضع

نزار : هاذة ميشرب حليب عادي

نرمان : لا ابد موزين

نجاة : خطية سودة علية ما اشاف امة

نزار : شنو اسمة

فاروق : كنان

نزار : ما سميتة فرحة الزهرة ضل بنفسي

فاروق : عود سمي ابنك

نجاة : باعي خل نكلبة على بطنة وندك على ضهرة اني شايفة روان هيج اسوي

نرمان : لا خطية بعدة صغير

نجاة : حكيم وين صار

نرمان : ما ادري .. مرت نص ساعة وطبو عمتي وحكيم

اصيلة : انطيني البزر

فاروق : بهمس .. انييي مو كلتتتت ما اريد اصيلةةةة

حكيم : مو وكتها الطفل يلوع

اصيلة : شغلن صوبة وجيبلي قوري بي مي معقم

نرمان : جبنالها التريدة وشغلنة الصوبة كعدت ونزعت عبايتها حطت الطفل بحضنها وسوتلة حليب دافي وكعدت تشربة

نزار : شو هاذة ناعم جنة بنية

حكيم : چا تريد شواربة طاكة

اصيلة : هاذة كل ساعتين اسويلة ممة رقم واحد واضل وحدة منجن سهرانة ويا للصبح ترة مينعاف .. وبدلن الحفاضة بين وكت وكت

نجاة : واذا ضل يبجي وماقبل ينام

اصيلة : ميخالف البجي زين الة يقوي كلبة يفتح صدرة خلو يبجي وجبتلة دوة مال غازات انطو مرتين باليوم

نرمان : اخذت الطفل منها وحطيتة بحضني باوعت الملامحة وجها صافي وهادي ضل بنفسي ابوسة بس اخاف من فاروق يعيط بية

اصيلة : يلة اني اترخص ديرو بالكم على البزر

حكيم : رحم الله والديج

اصيلة : والديك

نجاة : انطونيا

نزار : لا جيبو اني انيمة يمي

حكيم : انتو صدك تحجون

فاروق : صدك هاذة وين انيمة

حكيم : جيبلة كاروك وجرباية وملابس

فاروق : ميخالف بس خل يطلع الصبح

نرمان : بهل اثناء دك مبايل فاروق باوع بوجوهنا وفتح خط

فاروق : الو

ايثار : اررررريد ابنيييييي وين اخذذذذذت الطفلللل فاررروف اجيبةةةةة وغصبا ما علييييك

فاروق : امشي لج ماعندج طفل يمي

ايثار : والله فارررروق والله اذا ما جبتة احرك روحي

فاروق : حركتهم

ايثار : ولكممممم انتووووو بشرررر الله ياخذذذك وياخذذذ ابووووية وياخذذذذكم كلكم جلاااااااب

نرمان : سدة بوجها وشمر المبايل على التخم ضل كاعد ولازم راسة

حكيم : اخذلها الطفل اشوفة

فاروق : لاحددددد يدددددخل معلييييكم بيةةةةة

نرمان : عم الهدوء بالمكان ما طول فاروق شوية وطب الغرفة ضل الطفل على التخم واحنة واحد يباوع بوجه الاخ

حكيم : هاذة راح يخبلني

نجاة : اذا اهلها ذبو الطفل وميردون بتهم تصحى اشوفة يعني اكيد اذا ضل يمهم راح يعذبو وميريدو

نرمان : هسة لو بعدين ايثار تعوف هاذة الطفل وتشوف حياتها احسن متركة بالشارع تعوفة يم ابو

حكيم : بلا زحمة ابو وين !

نزار : ادري مابينة واحد بي خير وعندة اهل مثل الاوادم

نجاة : مكتوب حتى ابنة يتبهذل مثلة

حكيم : مو كل ام مثل نرجس وعواطف لا تاخذون غيبة واحد مهمى يكون هاي ام و (نفسة) وكلبها محروك

نرمان : خطية والله اني لو اجيب وتاخذ ابني اموت والله .. حسيت خنكتني العبرة ولزمت صدري .. خاف اسوي مثل فاروق وتاخذ الطفل مني

حكيم : اخذة وين اودي

نجاة : بلا خبالاتج الطفل كام يبجي

نزار : خل اشيلة

نرمان : هاك حطة بحضنك شوية وانطينيا

نزار : ليش يبجي الازرك

نرمان : يا يخبل جنة امة

نزار : والله ياعمو لو عندي حليب ارضعك

نرمان : خربت من الضحك ونزار متأثر شوية ويبجي على الطفل

حكيم : اخذي الطفل كام يمسلت

نرمان : اخذتة منا وضلينة كاعدين وكل شوية نشربة حليب صارت ساعة 4 الصبح توضينى وصلينة الفجر كملنة وراحو حكيم ونزار كل واحد على قنفة ونامو

نجاة : اني راح انزل احجي ويا مؤيد عندة واجب ويريد اسهر ويا

نرمان : براحتج .. نزلت جوة وحسيت روحي انثولت من النعاس حطيت راسي بصف الطفل ونمت وكل شوية افز الكا يبجي صارت 7 الصبح وسمعت صوت فاروق بالحمام يتقيئ كمت دكيت الباب علية ..

فاروق : هااااا

نرمان : رجع يتقيئ ويكح سمعتة صاح ..

فاروق : ماكو شي روحي

نرمان : رجعت كعدت يم الطفل حسيت طاقتي خلصت تمددت بصفة وغمضت عيني شوية وسمعت صوت همس ..

فاروق : شارب حليب !

نرمان : فتحت عيني .. اي

فاروق : راح اخذة يمي شوية بين ما ابدل وقبل لا اطلع للدوام ارجعة يمج

نرمان : ماشي .. شال الطفل وراح ضليت مغمضة عيني بس طارت النومة دقايق وسمعت صوت قران كمت عدلت كعدتي ممصدكة الجاي اسمعة

يس (1) وَالْقُرْآنِ الْحَكِيمِ (2) إِنَّكَ لَمِنَ الْمُرْسَلِينَ (3) عَلَى صِرَاطٍ مُسْتَقِيمٍ (4) تَنْزِيلَ الْعَزِيزِ الرَّحِيمِ (5) لِتُنْذِرَ قَوْمًا مَا أُنْذِرَ آبَاؤُهُمْ فَهُمْ غَافِلُونَ (6) لَقَدْ حَقَّ الْقَوْلُ عَلَى أَكْثَرِهِمْ فَهُمْ لَا يُؤْمِنُونَ (7) إِنَّا جَعَلْنَا فِي أَعْنَاقِهِمْ أَغْلَالًا فَهِيَ إِلَى الْأَذْقَانِ فَهُمْ مُقْمَحُونَ (8) وَجَعَلْنَا مِنْ بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ (9) وَسَوَاءٌ عَلَيْهِمْ أَأَنْذَرْتَهُمْ أَمْ لَمْ تُنْذِرْهُمْ لَا يُؤْمِنُونَ (10) إِنَّمَا تُنْذِرُ مَنِ اتَّبَعَ الذِّكْرَ وَخَشِيَ الرَّحْمَنَ بِالْغَيْبِ .. جزء من سورة يس

نزار : شنو الجامع نقلو بغرفة فاروق

نرمان : تسمع !!!! مشغل قرأن للطفل

نزار : چا ابنة ينام واني اكعد عمييي ارررريد انااام

نرمان : بداخلي الدنيا ما لمتني من سمعتة مشغل قرأن حتى النومة راحت من عيني سمعتة سد باب غرفتة اجة انطاني الطفل وراح يلبس حذائة

فاروق : اي شي تحتاجون خابروني اذا انتكس لو ضل يبجي هم خابروني

نرمان : ماشي

فاروق : وامانة بركبتج لاتقصرين ويا ادري اضغط عليج بس اختي عار .. واعتبري مثل ابنج

نرمان : تدلل اصلا اشوفة مثل ابني .. طلع وسد الباب فتحت مبايلي ودكيت على نجاة مشغول .. اخذت الطفل وطبيت الغرفتي نيمتة على الجرباية ونمت بصفة للضهر

حكيم : نرمان وين !

نزار : راحت الغرفتها الطفل للصبح ما نام

حكيم : ونجاة ماضلت يمها

نزار : نجاة بس شافتنة غفينة طفرت الغرفتها

حكيم : اكوم اشوفها

نزار : كعدها خل اسويلنا ريوك

حكيم : سوي الروحك

نجاة : صباح الخير

حكيم : تعاي تعاي

نجاة : ها

حكيم : انتي ليش عديمة المسئولية

نجاة : ليش

حكيم : نرمان حامل ولصبح ما نامت ويا الطفل

نجاة : اني كاعدة وياها للصبح

نزار : جذابة وروح ابو حسيبة

نجاة : حاروكة

حكيم : استغفرلله .. عفتهم وفتحت باب غرفتي لكيتها نايمة والطفل يبجي بس ما حاسة علية شلتة من يمها مباشراة فزت

نرمان : راح ابجييييي ميخليني انااااام شلون راح اعيششش ويا هاذة الطفل وانوب راح اخلف

حكيم : شعبالج الخلفة سهلة مو كتلتي روحج اكليها

نجاة : انطينيا اني اشربة حليب

حكيم : طفيت الضوة وطلعت عفتها نايمة للعصر ..

فاروق : السلام عليكم

_ عليكم السلام

حكيم : دخل بيدة كارتون وغراض للطفل فرحت من شفتة مهتم بي

فاروق : اريد درنفيس اشد الكاروك

حكيم : تربعو بالكاع هوة ونزار

نزار : جايبلة ليفة !!!

فاروق : مو صغير وجسمة يتحسس يسبح وحدة بيها

حكيم : يمعوووود هاذة ميليف

فاروق : خليها من يكبر متنشمر

نجاة : الله شكد حلو هاذة الكرسي

فاروق : الموضفة كالت هاذة ينام بي ويشتغل على الريمونت يهز الطفل حتى ينام

نجاة : يجنن

نزار : والله اب حوك حتى عوادين اذان جايبلة

نجاة : ليش هلكد جايب حفاضات ورقم واحد راح يصغرن وهوة ملابسهن

فاروق : اليبقة لبسوهن للطفل الجاي

حكيم : رحم الله والديك وفرت

نرمان : طلعت من الغرفة راسي مسطور حطيت حجاب على راسي وفتت .. صباح الخير

نزار : تعالي شوفي فاروق مجهز الكنوش منا لما يعرس

نرمان : باوعت للصالة هوسة ومكلوبة بالغراض والاكياس .. حسيت حكيم يتلمس بوجهي

حكيم : مصخنة !

نرمان : ما ادري

حكيم : هاذة اهمالج من تسبحين ومتنشفين شعرج وتنامين على البنكة

نجاة : اسويلها حامض شلغم للعشة يفيد اذا فلاونزة

نرمان : لا بس اريد برودة محترة ..

حكيم : اشوف بلاعيمج

نرمان : تلمس بلعومي بيدة

حكيم : مورمة اليسرى

نرمان : اي توجعني

حكيم : بلا أمر عليج سويلها مي حار وشكر

نجاة : تدلل

نرمان : لليل ضليت ما اكدر اكل شي وجسمي ابرد واحتر بنفس الوكت صارت ساعة 9 وحسيت نفسي اتخربطت لفيت نفسي بالبطانية وكمت ارجف

حكيم : شلون صرتي

نرمان : ارررجف

حكيم : تكومين اخذج للمستشفى

نرمان : لا بس اريد خافض حرارة راح اموت .. تقرب يتلمس بيدي وجهي

حكيم : كومي انتي مشتعلة نار

نرمان : فتح الكنتور وطلعلي ملابس اخذني للحمام وفتح المي البارد شهكت .. راااح يوووكف كلبيييي

حكيم : لازم تبردين

نرمان : رلح اتمرض اكثر

حكيم : اسكتي ومعليج

نرمان : كمل وبدة يلبسني ملابسي طلعني من الحمام وشغل صوبة كعدت يمها جاب شسوار وكعد ورا ضهري ينشف بشعري

حكيم : ليش هيج اسوين بروحي .. مو اكلج ديري بالج على نفسج

نرمان : رجعت راسي على رجلة وغمضت عيني .. تخاف علية

حكيم : انتي نفسي والنفس عزيزة

نرمان : وانتة روحيييي .. كمل وربط شعري سمعت الباب تندك

حكيم : منوووو

نجاة : اني

حكيم : طبي

نجاة : ها نونو شلون صرتي

نرمان : زينة

نجاة : جبتلج حامض شلغم

نرمان : حطت الصينية كبالي .. اكلت منة

نجاة : ها عجبج

نرمان : اني ما احبة بس انتي مسويتة طيب

نجاة : شغل ادية وحياة عنية

حكيم : الطفل وين

نجاة : كاعد بحضن فاروق وانطيتة ممية يشربة خل شوية يشيل مسؤلية موتني

حكيم : السانج طولان

نجاة : منيلة

نرمان : كعدت اكل اجت كابلتني وكعدت طلع حكيم برة واحس نجاة تريد تكول شي

نجاة : نونو

نرمان : هممم

نجاة : مؤيد يريد يجي بس يستحي

نرمان : خل يخابر حكيم ويكولة اريد اشوف خطيبتي

نجاة : ميقبل يكول استحي

نرمان : شلون لعد

نجاة : كولي الحكيم نعزمة

نرمان : ماشي

نجاة : حبابة قنعي مو بس تكليلة

نرمان : منو يطبخ وينضف !!!

نجاة : ااااااني

نرمان : ابتسمت .. اذا هيج باجر نعزمة

نجاة : استغلالية

نرمان : شالت الصينية وطلعت .. حسيت نفسي احسن .. اجة حكيم وكلتلة نعزم مؤيد وقبل مر اسبوع وصرت زينة ورجع الطفل يمي ونجاة مدير بال وكلشي وكع براسي وفوك كل هاذة عندي امتحانات

حكيم : ليش منطهرة

فاروق : لا بعدة صغير اخاف علية

حكيم : صغير احسن ميحس .. باقر طهرنا عمرة 4 ايام

فاروق : خل يطلع اربعينة ونطهرة

حكيم : بكيفك

نزار : اجة النسيب

فاروق : ادري شنو المناسبة عزمتة !!

حكيم : الة مناسبة

نرمان : اخذت الطفل ولبست حجابي عدل رحت للمطبخ

نجاة : لجججج اجةةةة

نرمان : يلة هل نصب لا يبجي كنان ويخليني الطم

نجاة : هوة اكوو مثل كنوش

نرمان : شالتة نجاة نيمتة بكاروكة وراحت تسلم على خطيبها .. بديت اصب بالغدة

نجاة : ها وين وصلتي

نرمان : ودي السفرة

نجاة : لج فاروق اكلة للولد

نرمان : الله يستر انتي وحمرتج الوردية

نجاة : تخبل

نرمان : بدينة نودي بالمواعين للهول .. شفت الولد كاعد بصف حكيم ويحجون وما ادري شيراوي بالمبايل

نزار : تفضل ضلعي

مؤيد : يزيد فضلك

نرمان : كعد حكيم بصفي وخلا نجاة بصفة وفاروق حتى لكمتة كامت متنبلع

مؤيد : عاشت ايدج حبيبي

فاروق : انطووووني ااااااالبن

نرمان : لزمتني الضحكة ونجاة حتى وجها عرك من الخوف انطيتا البن وسمعت صوت كنان يبجي ..

فاروق : نجاة كومي شوفي كنان

نجاة : اي

نرمان : ما ادري ليش هيج يتصرف بس عندة نجاة خط احمر ويا الكل .. مرت العزيمة على خير وراح الولد ..

نجاة : لج شفتي .. خابرني مؤيد يكلي شبي اخوج بس ينتر وماعندة اسلوب

نرمان : شكد عيب

نجاة : الة اكول الحكيم والله عيبببب والله

نرمان : شيسويلة مثلا لاتحجين ولاتخلي يكرهج

نجاة : لج ايثار من جابت لحد الان ادك علية وميجاوبها حتى على حكيم ونزار دكت

نرمان : خطية والله كلبي انمرد

نجاة : اي تريد تشوف ابنها وفاروق قافل

نرمان : شكد كلبة قاسي .. بهل اثناء فتح الباب حكيم

حكيم : هاج جاوبي ايثار وكليلها كلهم طالعين واذا سألتج على ابنها كليلها بخير وزين وفاروق مداري

نرمان : اخذت المبايل منة وفتحت خط .. الو

ايثار : الوووو

نرمان : هلو حبيبتي

ايثار : منو انتي اريد احجي ويا حكيم

نرمان : طالع اني نرمان كولي شبيج

ايثار : فدوة نرمان ابوس ايدج اريد ابني كليلهم اريد ابني ما اكدر بعد حتى عيوني ما اشوف بيها راح اعمى اريد اشوفة تقبلين !! تقبلين ياخذون ابنج منج

نرمان : ابنج زين الحمدلله لاتخافين علية والله حاطتة بعيني

ايثار : يعني يمج موجود الخاطري افتحي كامرة اريد اشوف وجها

نرمان : جيبي نجاة .. راحت نجاة تجيب الطفل وصار صوت بجي ايثار عالي فتحت كامرة وصورتة

ايثار : اااااااخ يمةةةة حبيبي شلووونك حرموووني من شوفتك بس والله ما اعوفك يم احد نرمان حبابة لاسدي

نرمان : ضليت فاتحة كامرة وهية تحجي ويا

ايثار : ملابس كلها عندي شتريتلك كووومة ملابس ان شاءلله ميصغرن عليك وتلبسهن .. نرمان فتحي من الكماط خل اشوفة

نرمان : فتحت الكام وصار يتمغط ابتسمت على شكلة الحلو

ايثار : حبابة لاتكمطي هواي شوفي شلون ارتاح من فتحتي

نرمان : لا ما اكمطة

ايثار : اسفة طولت عليج بس اريد اشبع عيني منة

نرمان : لا عادي .. دقايق وسمعت صوت باب البيت انسد خفت لا فاروق اجة .. ايثار لازم اسدة

ايثار : لا فدوة بس شوية وسدي

نرمان : ضليت امتمت اشرلي حكيم اسدة كبل سديتة وطفيت الانترنيت

فاروق : ووووينكم

حكيم : طلعيلة ابنة لا يعرف بالسالفة مالنة خلكة

نرمان : اخذتة نجاة وطلعت انقهرت على ايثار احس اني لو بمكانها اموت

حكيم : تعاالي اقري

نرمان : معدتي تريد تكلب وراسي يوجعني خليها باليل

حكيم : عوفي كلاواتج

نرمان : جاب كتبي وكعد كبالي يشرح وين واصلين حسيت معدتي كامت تكلب ما اتحملت وكمت اركض للحمام اتقيئ

حكيم : الله الله شجاج

نرمان : ما ادري اطلع .. تضفت الحمام وطلعت راسي يموتني

حكيم : ضغطت عليج

نرمان : لا بس اني ما اتحملت .. حباب خل اجل السنة

حكيم : اشضل حتى تأجلين اسبوع الجاي امتحاناتج

نرمان : شلون اروح امتحن خاف اتخربط

حكيم : لا متتخربطين بس كولي يا الله

نرمان : تنهدت ورجعت للفراش ما استسلم ورجع يقريني .. بهاذة الاسبوع هواي اتأذيت من الصبح لليل بس اقرة ودايخة وحكيم منع كنان يجي يمي بس يم نجاة حتى ما التهي عن دراستي .. اجة اول يوم امتحانات كعدت ويا صلاة الصبح

حكيم : عفية بابا صلي وراجعي حتى الله يوفقج

نرمان : كمت توضيت وصليت كعدت على السجادة وتعلمت من حكيم اكول 7 مرات بعد كل صلاة ( لا إله إلا أنت سبحانك إني كنتُ من الظَّالمين،) راح ينفتح كل باب مسدود وهاذة مأخوذ من دعاء الكرب ..

_ كملت وكعدت اقراء

حكيم : يلة استعجلي بدلي ما ضل وكت

نرمان : اي سديت الكتاب وكمت لبست قميص وصدرية يادوب اطب بية

حكيم : هاي شلووون اداومين بيهاااا !!

نرمان : حبيبي ما ضل وكت الخاطري لا تعلق .. رحت الف حجابي على المراية وهوة واكف وراية متخوصر وفاتح حلكة ويباوع على الصدرية سويت نفسي ما اشوفة

حكيم : لبسي شي فوكاها

نرمان : رحت عالسريع لبست كوت رصاصي هم الجو بارد وهم يغطي قفلتة واخذت محفظة مال اقلام وطلعنة

نزار : ها نمنم

نرمان : ادعيلي نزار ادعيلي

نزار : روحيييي ان شاءلله مجاوبين

حكيم : من حلكك الباب البيت

نرمان : صعدت بالسيارة ماعندي وكت اجادل وصلني للمدرسة نزلت ونزل وياي وكف باب المدرسة

حكيم : سمي بسم الله واول شي جاوبي على الاسئلة التعرفيها والتصعب عليج عوفيها اخر شي فكري وجاوبي

نرمان : اي ماشي .. طبيت للمدرسة اول ما شافوني البنات باوعلي بنضرة غريبة عفتهم وطبيت ادور على قاعتي .. لكيت اسمي وطببت كعدت بدو البنات يجون طبت المدرسة واخذت الجنط والكتب والمبايلات وفتشو الرحلات .. سلمو الاسئلة وكعدت احل

المراقبة : ما ضل وكت ربع ساعة والم الدفاتر

نرمان : بقة اخر سؤال طار من راسي اذكر حكيم كالة قبل لا نطب بس مجاي اذكر شنو الحل اجت سحبت الدفتر من الرحلة كمت ابجي ..

_ اخذت جنطتي وطلعت من المدرسة كمت ادور على حكيم بعيوني لمحت طولة بس صايرة كبالة مرة ومطيتني ضهرها شفتة يضحك ومندمج يسولف رحت علية امشي سريع بس شافني اختفت ابتسامتة

حكيم : ليش تبجين

نرمان : رحت بصفة والمرة الجانت تحجي ويا بس شافتني ضحكت ضحكة مال رقاصات

_ اوي هاي بنتك ؟

حكيم : هاي مريتي

نرمان : فتحت الكوت وبينت بطني حطيت ايدي على ضهرة .. اليوم كلش تعبت

حكيم : سلامتج

_ يا عيني صغيرونة وحامل

نرمان : استأذن منها واخذني للسيارة .. فتحت الباب وصعدت ضلت تباوعلي وتعلج حسيت ودي انبت اضافيري بركبتها

حكيم : شلونج بالامتحان

نرمان : رديت بعدم لا مبالا .. زينة

حكيم : ليش اجيتي عيونج مدمعة اكو شي يوجعج

نرمان : لا

حكيم : شبيك حبيبي

نرمان : مابية .. ضل ساكت ما حجيت ويا وكلبت وجهي وصلنة للبيت ساعة 10 ونص نزلت من السيارة وركعت الباب طبيت جوة سلمت على عمتي

اصيلة : شبيج كالبة جهرتج ما عاجبج احد

نرمان : مابية

حكيم : بطي السالفة لا اطكين

نرمان : شعندك واكف ويا ام حواجب

حكيم : شافتني واكف اجت ادك سوالف اطردها !

نرمان : لا عيني شلون تطردها وتجرح مشاعرها غير تسمع سوالفها

اصيلة : رهيف مثل ابو

نرمان : باوعتلة صفح ورجعت اكلب بالكتاب متجاهلتة عافني وطلع شمرت الكام وباوعت العمتي ..

اصيلة : اني شعلية تخزريني

نرمان : خاف يصادقها و يزوج علية

اصيلة : دام ابن فاضل كلشي اتوقعي

نرمان : والله اذبحة والقران اذبحة هوة ونايم وذيج عجوز البين اني اعلمها

اصيلة : العقل من الله

نرمان : اخذت غراضي وصعدت فوك طبيت للبيت شفت نجاة حاطة كنان على رجلها تهزة

نجاة : هاج من البارحة ما نايمة

نرمان : اخذتة منها وطببت الغرفتي بدلت ملابسي ونزلت جوة افتر بي بالحديقة

اسراء : ولج طبي موزين على الطفل يطلع برة

نرمان : اخذتة وطبيت جوة حطيتة على القنفة وكمت انضف وياهم بالبيت شفت اسراء شالتة تلعبة

اصيلة : نضفي اخشاب الهول وتعالي غسلي الطرمة

نرمان : اي .. رحت للهول اول ما فتت سمعت الطفل يفحط .. شبيييي

اسراء : ما ادري مكروص مثل ابو

نرمان : رحت شلتة اسكت بي والطفل فاحط وميجر نفس اتخبلت كمت ادك على ضهرة واصيح .. عمةةةةة تعااااالي شووووفي كنااااان فاحط لجججج اسراء اسوووويتيلة

اسراء : اني شعلية جنت كاعدة يمة وفحط

نرمان : ما ادري شلون رد بي النفس وضل يبجي كلبي انمرد علية فتحت كماطة وطبطبت على ضهرة

اصيلة : اخذي وصعدي فوك اذا صار بي شي شيخلصنة من ابو

نرمان : اخذت الطفل صعدتة فوك وضليت يمة ما عفتة للضهر طب فاروق بس نزع حذائة اجة شالة وباسة

فاروق : مو كبران

نرمان : اي ماشاءلله

فاروق : امتحنتي اليوم

نرمان : اي بس اخر سؤال ما جاوبت

فاروق : ميهم خوفج من السادس يعتمد على المعدل

نرمان : بس خل تعدي هاي السنة مو متت

فاروق : بعدج ما شايفة شي

نرمان : حسيتة صار احسن من قبل تصرفاتة وكلامة حتى طلعاتة صار ميطلع الا قليل ومن يجي مو طافي مثل كل مرة ..

فاروق : محتاجين شي اجيبلكم

نرمان : اي العصر جيب حليب الكنوش وحكيم يكول لازم باجر تلقحة

فاروق : ان شاءلله

نرمان : اخذ ابنة وطب الغرفتة وكالعادة يشغلة قرأن

نزار : مساء الموز لعيونك الجوز

نرمان : هلا

نزار : الحكيني بالغدة

نرمان : تدلل .. رحت للمطبخ صبيتلة غدة وديتلهيا وجبت كتابي وكعدت كبالة اقرأ .. مرت دقايق وطلع فاروق من الغرفة وجها ميتفسر ويريد ياكل اوادم

فاروق : شبيهاااااا ايدددد كنااااان

نرمان : شمرت كتابي وكمت اباوع علية رافع ردانة ومطلع جتفة ازرك وداير مدايرة احمر .. هاااي شنووو

فاروق : ما ادررري اني جاااي اسألج هاااي شنو ايدة

نرمان : اتذكرت من فحط بيد اسراء .. يجوز نايم عليها

فاروق : شنو كدامج اثول ! هاي كرصة

نرمان : ما ادري والله الضهر فحط يجوز منوراها

فاروق : راح اخلي الكاروك مالتة بغرفتي وممنوع اطلعي نهائيا واني اجيبلة جهاز ارسال كامرة اخلي يمة ويمج واذا بچى اسمعي

نرمان : اي احسن

نزار : خاف عمتج المسمومة كارصتة

نرمان : اشرتلة يسكت .. راح فاروق وباوعلي نزار

نزار : عمتج كارصتة

نرمان : لا اسراء لأن جان يمها والصراحة اني ما شفتها بس قابل منو يكرصة وهوة فحط بيدها

نزار : اني الها فتون ام الخبط بس خل انام وارست وارجعلها

نرمان : هدء البيت وكل واحد راح الغرفتة طبيت الغرفتي وضل بالي يم حكيم طلع وما رجع .. اريد ادك علية بس ضايجة منة للمغرب وشفتة فتح الباب وطب

حكيم : شبيها مدام نفيخة

نرمان : العفو تقصدني

حكيم : لا احجي ويا ام حواجب

نرمان : خل تفيدك .. كمت اريد اطلع جرني وصاح

حكيم : وين مولية

نرمان : انام جوة الغرفة خنكة

حكيم : لاصيرين ام عقلين

نرمان : تقبل اوكف اسولف واضحك ويا ولد !

حكيم : اشك حلكج

نرمان : خلص .. فتحت الباب جرني وسدها

حكيم : والله هي وكفت تسولف وصدفة من طلعتي ضحكت

نرمان : شكلتلك وضحكت !!

حكيم : حجت على بتها حتى ما اذكر شكالت

نرمان : ما اكدر اصدكك ..

حكيم : وراسج

نرمان : زين صدكتك وبعد ممنوع توكف وياها

حكيم : حاضر ماما

نرمان : يلة افرح رضيت عليك

حكيم : امشي لج

نرمان : عافني وراح للحمام حبيت اسوي اجواء شغلت كل الشموع العندي بالغرفة ورتبت الفرشة وبدلت وكفت على المراية احط مكياج .. فتح الباب وطب حكيم

حكيم : احبك والمسافة وياك جرباية وثنعش بوسة

نرمان : حضني من ضهري وباس ركبتي يطبع بيها اثر سمعت الباب تندك .. حبيبي الباب

حكيم : شبي

نرمان : يندك

حكيم : عوفي

نرمان : شتعمق بلمساتة رجعت الباب تندك اقوى

نزار : شنو نايييمين بعد وكتتتت

حكيم : شتريد

نزار : اذا كاعد متفتح الباب تخليني واكف ياحيف الخوة هيج اصير

نرمان : وكفت ورا الباب وراح حكيم فتح الباب الة كبل مد راسة يباوع للغرفة ..

نزار : شعدكم ليلة الوحشة

حكيم : انجب واحجي

نزار : اسأل مرتك وين حاطة الفحم

حكيم : شسوي بي !

نزار : اريد اشوي تكة

حكيم : بالحديقة اكو كونية مال فحم

نزار : لا اريد الفحم ابو الكارتونة

حكيم : تشوي تكة على فحم مال نركيلة !

نرمان : عرفتة يريد يسوي نركيلة ويخاف من حكيم .. تلكا بالمجر مال كاونتر

نزار : هاي وين خاتلة

نرمان : سد الباب بوجها وباوعلي

حكيم : هاذة يدخن !

نرمان : تؤ تؤ

حكيم : متأكدة

نرمان : والله .. بكلبي استغفرت لان يومية ورا 12 باليل يسوي نركيلة ويكعد بغرفتة

حكيم : انعل ابو كرشج

صباحا ..

نرمان : كعدت الصبح متأخرة كمت ما اشوف بعيونة لبست شلون ما جان وطلعنة

حكيم : حبيبي والله توصلين بالوكت بس لاترجفين

نرمان : راح يفوتني الامتحااان

حكيم : سمي باسم الله

نرمان : صعدت بالسيارة وساق بسرعة اول ما وصلت للمدرسة نزلت اركض بيدي اقلامي طبيت ولكيتهم جاي يوزعون الاسئلة الحمدلله ما كالو شي كعدت وبديت احل والتوتر مسيطر علية .. ما ادري شلون مر الوقت بدون ما احس بدو يسحبون الدفاتر وطلعت اخر وحدة من القاعة

_ طلعت من المدرسة مطنكرة باوعت على حكيم هم واكف ويا هاي المرة رحت يمهم

حكيم : هلا حبيب كلبي

نرمان : هلاو .. شلونج خالة

_ الحمدلله انتي شلونج شلونها الاسئلة

نرمان : زينة .. انتي ام الطالبة زينب

_ لا اني مو امها اني اختها الجبيرة

نرمان : عبالي امها .. يلة حبيبي راسي يوجعني ونفسي تلعببببب

حكيم : ما ضل شي وتهون

نرمان : عفتهم وصعدت بالسيارة شفتة يسلم عليها وهز راسة واجة صعد مبتسم

حكيم : شلونها جفون عيني

نرمان : يااا جفووون يا رموووش سوق واسكت لا انزل من السيارة واعوفك واهج انوووب ويا اخت زينب حكيم اشرررب من دمك

حكيم : اعصابج حبيبتي

نرمان : يا اعصاب خليت بيها اعصاب .. باجر نزار يوصلني

حكيم : براحتج حبيبتي اهدي موزين عليج

نرمان : شفتها شلون اطك بالعلج اخخخخ كلبي .. وصلني للبيت وطول الطريق يباوعلي ةساكت نزلت من السيارة وصعدت فوك

نجاة : شبيج

نرمان : اريد مي بارررد كلبي معطب

نجاة : هاج كنان حطي بحضنج

نرمان : اخذتة منها .. اليوم حبيبي لابس احمر

نجاة : اي هاذة التراك جابلهيا فاروق

نرمان : فدوة يخبل انووب ملبسي جواريب حمر راح اكلة

حكيم : نمنمتي

نرمان : وين صرتي اريد ميييي

نجاة : هاج

حكيم : نونو

نرمان : فاروق جابلة حليب

نجاة : اي وجابلة ممية جديدة

نرمان : يمة شلون يحبة .. ينكرط كنووش

حكيم : حبيبتي

نجاة : شبيج مو يحاجيج

نرمان : كولي لاخوج العصر عندي روحة للدكتورة

نجاة : اصاير !

حكيم : كوليلها تشلعين عيونة

نجاة : معناتة انتة غلطان

حكيم : يابة اسويت شبيكم

نرمان : اني اريد انام بغرفتي الجوة بعد

حكيم : لاطلعيها من ماعونها

نرمان : استمريت متجاهلتة مل وطلع ضليت ملتهية ويا كنان ابدلة والعبة ومرات اقرأ للضهر طب نزار

نزار : احم يا الله

نرمان : شبيك من الباب

نزار : كمال وين !

نرمان : بالشغل ميجي غير العصر .. شمر غراضة ونضارتة ونزل جوة نزلنة وراه اني ونجاة

نزار : شلونج سرسور

اسراء : هلاو بيك عيني

نزار : عندي بحث بالكلية واريدج اساعديني بي

اسراء : اني مكملة سادس ابتدائي .. على شنو يحجي البحث

نزار : عن احساس الحاقد بممارسة حقدة وضخ السم في جميع انحاء المنزل

اسراء : يا ادب سز هاي ويامن تحجي

نزار : ولج هايشة تريدين تموووتين تموووتين من الحقد بالعباس اكطع عطوبج واخليج تفرين بيهن منا ومنا

اسراء : ولك شمسويتلك

نرمان : صفك بيدة وصاح ..

نزار : ولج انتي تكرصين ابن اخوي واسكتج اهمداني وامداج

نرمان : لزمت بطني كد ما ضحكت ..

نزار : اني اكدر اشلع الحار والبارد مال وطنية واشكلهن باذناتج بس راح اسكتلج هل مرة .. بس المرة الجاية اخليج ادكين جوبي ويا الوطنية

نرمان : وجها صار احمر دم ومتعرف شتحجي راحت طلعت التبسي من الفرن حطتة على الميز

نزار : نجاة شيلي التبسي ولحكيني فوك

اسراء : يا هاذة غدانة

نزار : اختاري التبسي لو الوطنية

اسراء : احنة شنتغدة

نزار : مو مشكلتي

نرمان : شالت نجاة التبسي وصعدو فوك باوعتلي اسراء وشالت الصينية الستيل تريد تركعني بيها طفرت وراهم صعدت فوك .. لكيت حكيم جاي

حكيم : ام رجلهاااا

نرمان : خيرررر

حكيم : لج ابوية اني اعمى وياج و بدونج .. ماشوف غيرج بالدنيا

نرمان : البارحة شحجينة !

حكيم : يابة واذا حجيت وياها جريمة

نزار : لا حكيم خطية نونو يومية ويا وحدة شكل مو راح يجيك طفل شوكت تعوف هاي السوالف

نرمان : غرغرت عيوني .. صدك انتة يومية ويا وحدة

حكيم : ناوشيني النعال

نزار : بالعباس اشاقة وياك

نرمان : اجة كعد بصفي يراضيني اتنفقنة يوصلني ويضل كاعد بالسيارة لحد ما اطلع .. للعصر اخذني للدكتورة وسوينة سونار ثلاثي الابعاد بوكتها الدنيا ما لمتني من شفتة علت الصوت وسمعت دكات كلبة ..

حكيم : صدك هاذة كلبة

الدكتورة : اي

حكيم : ليش سريع

الدكتورة : عادي هاذة نبضة الطبيعي

حكيم : زين دكتورة .. انتي شنو اشوفين الافضل الها والعمرها اجيب طبيعي لو عملية

الدكتورة : اكيد طبيعي افضل

حكيم : مو بعدها صغيرة

الدكتورة : لا بالعكس اصغر منها ويولدن طبيعي

حكيم : بس اني اشوف العملية احسن الها لا تتأذة ولا تطلك تنام وتكعد جايبة

الدكتورة : ابد ما انصح بالعملية بعدها صغيرة تدخل عمليات وفتح بطن صدكني ما عليها شي اجيب وتكوم بالسلامة وان شاءلله اني اجيبها

حكيم : ان شاءلله

نرمان : مسحت الجل من بطني وكمت .. زين شوكت نعرف ولد لو بنية !

الدكتورة : ولد

نرمان : باوعت على حكيم فرحانة ..

حكيم : صدك

الدكتورة : اي

نرمان : نزلت من السدية ورحت حضنت حكيم بكل قوتي نسيت اني وين

حكيم : اشكرج دكتورة الله يبارك بيج

الدكتورة : اهلا وسهلا

نرمان : طلعنة من المجمع وصعدنة بالسيارة .. حضني وباسني من راسي مغمض عينة

حكيم : نسمي ادم

نرمان : شنو

حكيم : اسمي على اسم نبي الله ادم

نرمان : حلو يجنن

حكيم : اتمنيت تجيني مؤنسة واسميها فاطمة

نرمان : ميلت راسي اباوعلة .. تحب البنات

حكيم : زينة الحياة ..

يتبع ..

نهاية البارت : صوتو للبارت .. بقة 3 بارتات واختم الرواية .. البارت القادم بي احداث مهمة .. احبكم ♥️