رواية على قمة الحكيم الفصل السابع والخمسون 57 - بقلم الكاتبه : ضحى ال عامر

الكاتبة : ( Duha al amer ) 🦋

_تابعو حسابي
_صوتو للبارت❤
_ فرحوني بتعليقاتكم الحلوه

من طين مثلي نعم ....بس عود جنك طين
ذرات منك بقن لمهن واسوه العين........
عشره بالميه ندى ويمكن ورد عشرين ...
ومد روحه نهر الخمر كملك للسبعين....

تابعوني انستكرام duu_199

( طب عام موازي صباحي ) قبل لا اسألون
_________________________________________

نرمان : ضليت واكفة على اخر درجة واسمع صوت تلفزيون والاخبار عالي فتح الباب حكيم وما اشوفة غير فتح عينة على وسعها ونزع حذائة وشمرة عليهم اني ما ادري شكو بس سمعت صوت فاروق ..

فاروق : اوووكف على كيفك ..

نرمان : نزع التك الثاني مال حذائة وضرب فاروق بي صار وجها احمر من العصبية وعروكة نطت

حكيم : انعل ابوك لابو الك*** الجايبها امشي اطلع برررة لا اشبعك اهاين كدام العالم

نرمان : نزلت جوة مفزوعة من اصواتهم صار صوت بنية عالي تصرخ وتتنعوص

_ لااااا عفيةةة اعصابك لا هيججج

فاروق : اكعد احجي وياك منا العالم الخاطري

حكيم : تف عليك وعلى خاطرك يا كلب يا كو***

نرمان : طبيت للمطبخ الجوة حاطة ايدي على حلكي واسراء تلوب تريد تعرف شكو

اسراء : شكووو شكووو شبيهم تعاركوو ؟

نرمان : ها .. ما ادري

اسراء : انتي متدرين اكص ايدي اذا مو من وراج

نرمان : عبرتها ورحت للصالة لكيت عمتي حاطة الجهال تلعبهم وتبدل العلاوي .. شلونج عمة

اصيلة : هلا

نرمان : ضوجوج مو

اصيلة : لعبو روحي

نرمان : بعد ما اخليهم ادري يتعبوج

اصيلة : شبيهم ولد نرجس جنهم حصونة

نرمان : وكفت بالشباك شفت حكيم جار فاروق من ياختة وفتح باب الشارع وطردة وذاك بس يصيح

فاروق : هوووو مو بيتك وبكيفك تطررردني افتهمت بكيفي اجيب اليعجبنييي

حكيم : اذا وصلت للبيت بعد اكسر رجلك

فاروق : مو بكيفك بيتيييي هااااذة

حكيم : اراويك بكيف منو

نرمان : طب حكيم اعصابة ترجف صعد بوجها فوك وسمعت صوت ركعت الباب

اصيلة : ها ديج دجاجة

نرمان : عمة خلي الجهال يمج دقايق وجاية .. صعدت فوك اركض فتحت الباب لكيت حكيم بيدة علاكة سودة ويلم بقواطي واكل حتى مواعين وكلاصات كزاز شمرهن بالعلاكة

حكيم : تعالي لمي الزولية

نرمان : ادري بي يتنكس من هاي الامور ركضت شلت الطبلة ولميت الزولية برمتها وسحلتها برة

حكيم : فاروق ممنوع يطب للبيت بعد اذا شفتة مايلوم الا نفسة

نرمان : نزار وين .. طلع برة شمر العلاليك بالحاوية ركعها وفتح مبايلة يتصل

حكيم : الوووو انتة وين وليت .. يلة 10 دقايق والكاك بالبيت ..

نرمان : صعد فوك فتح باب غرفة فاروق ورجع سدها كال ..

حكيم : نضفي الطبلات وصعدي الجهال فوك

نرمان : اخذت قطعة قماش ورحت انضف بالطبلات كملت ونزلت جوة اخذت الجهال وصعدت لكيت نزار راجع ..

نزار : بهمس .. يا ستار شكو

نرمان : لا تسأل هسة

نزار : شكو شبيك فاروق وين ليش شايلين الزولية باردة

حكيم : انتة تدري بي جايب ك*** للبيت

نزار : لا اشم كفة ايدي كال راح يجون جماعتي وطلعت

حكيم : شو ما استغربت !!

نرمان : حسيتة فكس بنزار اخذت الجهال نومتهم بالغرفة وطلعت .. اسمع نزار يحلف حلفان يكسر الضهر

حكيم : متدري مو

نزار : وروح ابوية ما ادري عساني بالعمى ما ادري .. ليش استغرب فاروق غريبة علية الك***

حكيم : هاذة هو بس اني الك والة

نرمان : مر اليوم على خير وفاروق ما اجة بعد ولا بات بالبيت .. ثاني يوم كعدت الصبح غسلت وبدلت وكفت انتضر حكيم اروح للمدرسة استلم النتيجة

حكيم : يلة ماعندي شي امشي

نرمان : باوعلي من فوك ليجوة وصاح

حكيم : هيج تروحين

نرمان : اي وفوكاه جاكيت

حكيم : مسحي حلكج الازرك

نرمان : انطيتة بوسة بالهوى

نرمان : طلعنة بالسيارة .. وصلنة للمدرسة ختمت القران ادعي كون درجاتي عالية

حكيم : نزلي بابا حبيبي

نرمان : نزلت طبيت للمدرسة كبل بوجهي للمديرة انطيتها اسمي وكعدت تكلب بالشهايد وصلت النتيجتي انطتنياها

المديرة : مبروك ناجحة

نرمان : باوعت على درجاتي وبجيت

حكيم : فدوة الطولج لاتبجين وعيونج السنة الجاية نطلع طب

نرمان : سلمت على المديرة وطلعت امسح بوجهي واباوع الدرجاتي كلها 50 و 60 اقوى درجة 72

حكيم : الحمدلله من تعبج ما راح

نرمان : هزيت راسي وصعدت بالسيارة

حكيم : مو كافي !

نرمان : مسحت دموعي وفتحت الجامة صار الهوى يضرب بوجهي .. انتبهت على الطريق مو طريق البيت

حكيم : راح اغديج بمناسبة نجاحج ودرجاتج الترفع الراس

نرمان : من كال هيج غصيت وفحطت بالبجي

حكيم : ليش تبجين يمعودة

نرمان : تضحك علية مو

حكيم : وعيونج ما اضحك عليج ليش شبيهن درجاتج نمنمة لا ازوديها

نرمان : سكتت لحد ما وصلنة للمطعم نزلت وطبينة كعدنة على طاولة وطلبنة اكل

حكيم : اجيب الاكل واجيج

نرمان : راح يجيب الاكل ضليت اكلب بالمنيو رفعت راسي واشوف واحد كاعد بالطاولة الكبالنة هوة واصدقائة وماشال عينة مني .. درت وجهي وسويت نفسي ما اشوفة ..

_ درت وجهي مرة ثانية لكيتة مبتسم .. كمت رحت للحمام اريدة يكف عني .. طبيت غسلت وجهي وطلعت انصدمت من شفتة واكف بالباب حسيت كلبي راح يطلع من صدري من الخوف حجيت بغضب .. خيرررر شكووو لاحكنيييي

_ اني !

نرمان : لعد امي

_ لعددد شبيج دادة مو داكولج مو يمج

نرمان : ضل يعيب علية من عرف لهجتي بغدادية .. مشيت عنى وكلت بصوت ناصي .. همجي غير محترم

_ منو هاذة الغير محترم انتي تتبلين علية .. هااا عرفتج انتي من ذني

نرمان : التفتت عليه يحجي بصوت عالي والعالم كلها التمت تباوع علية متت من الخوف وهوة يصيح لحد ما سمعت صوت فزز كلبي التفتت شفت ..

حكيم : هااااااااي علييييييمن كووووو****

نرمان : ماشوف غير حكيم ضربة بوكس على وجهي نيمة بالكاع وكفت على صفحة ارجف .. اجو جماعة الولد وحكيم كسر المحل على راسهم بلحظات كلشي انكلب كلاب

حكيم : اطلع حليب امك من خشمك انتةةة تتعددة على عرضي ..

_ وابو فاضل ما سويتلها شي تتبلى علية

حكيم : وابو فاضل ما اعوفك

_ مسدسي وووووين

حكيم : بشيب الخلفك كو***

نرمان : التمت العالم كلها لزمو حكيم بعدو عن الولد يسب ويلعن بي اجة علية جرني من جتفي وطلعنة برة فتح السيارة صعدت وصعد بصفي

حكيم : شعنددددج بالحمااااام عفتج عشرررر دقاييييق

نرمان : اغسل ..

حكيم : اشششش ما اريد اسمع صووووتج

نرمان : الطريق كلة يحجي ويصيح لحد ما وصلنة للبيت اني ميتة

حكيم : نزليي نزليي عود لطخي وجهج زين قبل لانطلع

نرمان : انوب رجعت علية

حكيم : على امي خل اشوفج لابسة هاذة البنطرون بعد

نرمان : انطيتة الاذن الطرشة ونزلت من السيارة صعدت فوك لكيت الجهال كاعدين وسابين البيت بالبجي ونزار على نومتة

نزار : تؤ تؤ تؤ متخلون واحد ينطمر

نرمان : راح حكيم دفر نزار وعاط بي يكوم

حكيم : كوووم كااافي نوم شو تخرررجت واندثرت

نزار : استغفرلله مو اعوفلكم البيت واروح ويا اخوية فاروق ابات

حكيم : ليش اخوك العار وين جاي يبات

نزار : يم صاحبة

حكيم : طارق

نزار : اي .. يريد يجي يصالحك

حكيم : لا يوصل للبيت

نزار : يريد ابنة

حكيم : خل ياخذة يربي يم الك***

نرمان : سمعت صوت ركعة الباب عرفت حكيم طلع .. رحت للصالة لكيت نزار يتصل وفاتح سبيكر اشرلي اسكت

نزار : الووو ..

فاروق : ها شتريد

نزار : حكيم يكول عندي شروط اذا رجع للبيت

فاروق : وهي !

نزار : يبطل شرب ويصلي فرض بفرضى ويصوم ثنين وخميس .. يكسر خط جهازة ويبدلة .. يغسل الحديقة وسيارة حكيم ونزار يومية .. وجبة العشئ علية يومية يجيب من برة

فاروق : ميريد اسبحة واغنيلة من ينام

نزار : لا هاي سويها الي

فاروق : امشي لك ناصب علية

نزار : بكيفك هسة جان يمي وكلتلة فاروق متندم ويريد يرجع كال هاي شروطي واذا ما عجبة حتى ابنة يجي يلكاه كاعد بالباب ويا جنطة هدومة

فاروق : هوة وين راح

نزار : يصلي الضهر بالجامع

فاروق : هاي هية روح اني اتصرف ويا

نزار : براحتك

نرمان : سدة وكام يضحك اجة كنان يزحف توة متعلم

نزار : اذا مااربي لابوك

نرمان : شكد خبيث .. رحت للمطبخ سويت غدة بعد ما حكيم طلعة زقوم بالمطعم للعصر طب حكيم باوعلي صفح وكعد على التخم

حكيم : انتة مخابر فاروق !

نزار : انيييي يااااع شعلية

نرمان : هز راسة وضل ساكت .. صبيت غدة وديتة بالهول كعدنة اني ونزار وحكيم ميقبل يتغدة صحت بصوت ناصي ..

_ حبيبي متتغدة ! عدل كعدتة وباوعلي مضيق عينة ومبين علية الغضب كال ..

حكيم : اذا ضليتي بهاذة لبسج وحمرتج الكلية كطنة بيضة مسحي بيها الحمص بطحينة البوجهج وذبيها

نرمان : ميلت راسي اتمسكن .. كيمووو حبيبي

حكيم : حبيبج

نرمان : بعد ماحط وردي احط جوزي .. باوعلي صفح كمت يمة بست خدة وكعدت على رجلة .. انطيني بوسة

حكيم : ام الطكة لو طباعة

نرمان : ام الطكة

نزار : الله كملو

نرمان : انتبهت على نزار صخام الصخمني عدلت كعدتي وباوعت على حكيم يعدل بملابسة .. نزلنة نكعد على الاكل

نزار : خابرك فاروق

حكيم : اي يريد يرجع للبيت ويصلي ويصوم

نزار : يا الله ياهادي

حكيم : افرك خشمة يلة اخلي يرجع

نزار : كفووووو

نرمان : مر اسبوع وفاروق يبات برة لحد ما بيوم كاعدين نشرب جاي بالحديقة طب فاروق

فاروق : السلام عليكم

نزار : عليكم السلام

نرمان : باوعت على حكيم ما انطا وجه اجة وكف وراه وباس راسة

فاروق : اعتذر ماتنعاد

حكيم : انتة زعطوط ماعندك حجاية

فاروق : وروح ابوية ما اعيدها تدري بية اني ما اجيب وحدة للبيت بس هل مرة صارت

حكيم : ابنك اذا كبر شنسولفلة

فاروق : كافي لا ضل تلوم بية بروح هويدر

حكيم : اذا شربت ترجع تنام بالشارع

فاروق : هاذة هو

نزار : دغيتة .. اليوم خميس كلة صايم

فاروق : ها اني صايم

حكيم : صايم !

فاروق : اي راح التزم اصوم

حكيم : الله يهديك

نرمان : عرفت هاي سوالف نزار لزمت روحي ما اضحك اجة اخذ ابنة وكام يبوس بي ..

حكيم : باجر اروح للنجف واخذ نرمان لابوها وازور ابوية

نزار : اجي وياك

فاروق : اني هم اجي

حكيم : اطلع ساعة 1 باليل علمود الازدحامات ونوصل ويا الفجر

نرمان : صارت غصة بلعومي من جاب طاري المقبرة صارلي من يوم وفاة ابوية ما زايرتة اخجل ازورة بعد هاي السنين .. بلعت غصتي وكمت العب علاوي ..

_ لليل طلب مني اخذ غراض للجهال وابدل واخذ عباية وياي علمود الزيارة .. كملت كلشي وطلعت لكيتهم مبدلين وكاعدين

حكيم : اروح سيارة وحدة

فاروق : انطوني الغراض اصعدهن

نرمان : صعدو الغراض وحكيم راد جاي ناخذ ويانة .. اخذت الجهال ولبستهم زين صعدنة بالسيارة وكعدت اني ونزار ليورا

فاروق : انطيني كنان انيمة بحضني

نرمان : انطيتهيا وخليت علاوي على صفحة صبيتلهم جاي وانطيتهم ..

نزار : اني ما اريد

نرمان : اباوع علية طلع علاكة بيها جبن انكور وصمونتين وحليب بالفراولة كعد ياكل

نزار : شبيج هيج تباوعين راح تنفسيهن

نرمان : هههههه بالعافية

نزار : الله يعافيج

فاروق : انطيني صمون

نرمان : ضلو ياكلون واني غفيت لحد ما سمعت حكيم يكعدني ..

حكيم : نونو كومي وصلنة

نرمان : فتحت عيني دنيا ليل وضلمة حجة بصوت ناصي ..

حكيم : خلي الجهال نايمين بالسيارة ونزلي

نرمان : نزلت من السيارة نزار مشغل فلاش مال مبايل ومنضر المقبرة يقبض الكلب .. فتحو الصندوك وطلعو بطالة مي وبدو يغسلون بالقبور وحكيم كعد يم ابو على صفحة وبدة يقرأ قرأن

نزار : هاذة جدي هويدر وهاذة ابن عمة بحر وهاي بيبتي شلغم

فاروق : حرام مطي حتى الموتى ماخلصو منك اسمها .. غلامة

نزار : بت عم راغب علامة

نرمان : كعدت بصف حكيم اقراء زيارة اهل القبور .. قريتلهم الفاتحة بالسرة رحت اصعد بالسيارة واشوف فاروق ونزار صافنين وفاتحين حلكم اخترعت من شفتهم وفجأة سمعت صوت واحد كال

_ سلامااااا على اهل القبوووور

نرمان : من سمعت صوتة عثرت بالطابوكة وكعت من الخوف درت وجهي شفتة رجال ملثم بشماغ ابيض ولابس دشداشة بيضة ويقرة قرأن

حكيم : شبيكم انطو فلوس

نرمان : ضلو واكفين وراح حكيم انطا 5 الاف قرة شوية وراح

نزار : عبالي ابوية

فاروق : واني عبالي بيبتي لان حجيت عليها

نزار : لا بيبتي سمينة هاذة ضعيف

فاروق : صارلها 17 سنة اكيد ضعفت لا اكل ولا شرب

حكيم : كافي انتو متستحون

نرمان : قرو الفاتحة وصعدو بالسيارة صعدت وياهم وضل شوية حكيم يلة صعد .. اخذني المقبرة ابوية نزلت من السيارة وحكيم نزل ضلو الباقين بالسيارة

حكيم : سلمي واقريلة سورة يس

نرمان : لزمت قبرة وايدي ترجف كعدت بالكاع كبالة وبديت اقرأ سورة يس ودموعي تنزل

حكيم : غسلي القبر اني راح اصعد اخذي راحتج

نرمان : درت مي وكمت انضف بي بيدي .. استحي احجي ويا بعد كل هاي السنين اني ما زايرتة بس والله مو بيدي منو يجيبني اشوفة واشم ترابة .. بست القبر وكمت نفضت هدومي ورحت باتجاه السيارة صعدت امسح بوجهي

حكيم : اقريلة الفاتحة وترحميلة دائما احسن من البجي

نرمان : صارلي 4 سنوات ما زايرتة .. حكيم هاذة ابوية

حكيم : چا اني ياهو خراع خضرة

نرمان : هم ابوية بس الثاني

نزار : رومانسية حموضة

نرمان : تغاررر

حكيم : ولسوف يمضي بك الزمن وتعلمك الايام الحياة مليئة بما لا تتوقع وعليك ان تكون مستعد على الدوام وستدرك ان كل خسارة هينة الا خسارتك لذاتك ..

فاروق : صح السانك ابو علي

حكيم : راح اوكلكم يم سيد حسين باكلة ودهن

فاروق : هاذة الحجي الزين

نرمان : صار الصبح وهوة يسوق وصلنة يم مطعم نزلنة واباوع كلها شباب اشرلي حكيم البس عباية على راسي ..

_ طلبنة اكل وكعدنة ناكل خلصنة وتوجهنا الامير المؤمنين علي ابن ابي طالب

حكيم : السلام عليك يا اسد الله

نرمان : حكيم اخذ علي وفاروق اخذ ابنة .. طبيت من باب النساء وهمة راهو من ذيج الجهة

_ اَلسَّلامُ عَلَيْكَ يا أَمِينَ اللهِ فِي أَرْضِهِ وَحُجَّتَهُ عَلَى عِبادِهِ، أَشْهَدُ أَنَّكَ جاهَدْتَ فِي اللهِ حَقَّ جِهادِهِ، ..

حكيم : ام علي

نرمان : انداريت علية ..

حكيم : نلتقي هنا

نرمان : اشرلي على باب رقم 4 .. هزيت راسي وطبيت .. صليت صلاة الزيارة وكفت ادعي .. بست الشباك وطلعت رحت يم حكيم لان مسويها مشتركة

حكيم : حبيتج اكثر من روحي لدرجة اول شي اذكرة بالدعاء انتي .. نرماني بالدنيا عيوني ماشوف غيرج ولا راح اشوف حملتج مسؤلية اكبر من عمرج وانتي كدها .. انتي غفران لذنوبي وحسناتي كلها

نرمان : بست ايدة وحضنتة هوة ويحجي شفت عيونة دمعت .. وانتة حبيبي وايامي الحلوة باس راسي وحاضني من جتفي والعالم تباوعلنا

_ انتبهت الفاروق يصلي وابنة بصفة يفتر ويلم الترب من الجاي يصلون

حكيم : شوووف الكلب شكد عيب من العالم انتضريني هنا

نرمان : راح حكيم وشالة ورجع الترب للعالم .. كعدو كلهم صف واحد حكيم وفاروق ونزار بيدهم قرأن يقرون حبيت منضرهم فتحت مبايلي وطكيتلهم صورة .. كعدت على صفحة اسبح لحد ما اشرلي حكيم نطلع

_ طلعنة من باب الخروج بوجهنا للكراج صعدنة بالسيارة وطلعنة متوجهين للبصرة

حكيم : حبيبتي نامي حتى متعبين وانطي علي النزار

نرمان : كبل شمرت علي على نزار واناريت على الجامة غمضت عيني احاول انام .. ما ادري شوكت نمت كعدت على صوتهم

نزار : كومي لا ادفرج اطلعج من الجامة

نرمان : احترم نفسك .. باوعت على نزار ملابسة كلها اثار تقيئ من علي

نزار : مو اسحلج عيب من رجلج

حكيم : وووولك لا تلح وياها

نرمان : اخذتة مسحت حلكة ونزار نزع تشيرتة بقى بالفانيلة

فاروق : اغسل المكان والبس تشيرت منا العالم

نزار : لازم انتة خبرة

فاروق : لا اني متعلم البس تشيرتين من اطلع واحد انزعة واحد اشرة

نرمان : خربت من الضحك عليهم ونزار ميقبل يلبس تشيرت ..

_ وصلنة للبصرة بس جسمي كلة مكسر من الكعدة اول ما طببنة اجت نجاة

حكيم : ها ولج رجلج وين

نجاة : اوكف خل اجر نفس .. راح يسبح واجيتكم ادك من البارحة ماكو محد يجاوب

نرمان : رحت للنجف

نجاة : وانييييي ليششش ما اخذتوووني

حكيم : مو عندج رجال خل هوة ياخذج

نرمان : واكفين يجادلون وطب مؤيد لاف الخاولي على بطنة ولابس فانيلة لزم نجاة من ياختها

فاروق : هااا ابو الشباب وين طاب لغرفة نومك

مؤيد : ولكم راااح تخبلنييي شوكت تبطلين طفراتج من البيت

نجاة : اريد اشوف اخوتي شني صلة الرحم واجبة

مؤيد : شكيتيني بهل رحم

حكيم : ادب سز ميصير اطلعين هيج من البيت اذا لكفتج بعد هنا اعلكج من اذاناتج

نجاة : يووو ما اعيدها مو صوجكم

نرمان : طلعت زعلانة اعتذر مؤيد وطلع وراها

حكيم : هاي البنية راح تجلطني

نرمان : على كيفكم وياها خطية .. عبرتهم وصعدت فوك ميتة تعب شمرت غراضي وكعدت

فاروق : اسبح الجهال

نرمان : اي والله علوى بس لفهم زين لا يتمرضون

فاروق : جيبيلهم هدوم وتعالي

نرمان : انطيتهيا وطبيت الغرفتي رتبت غراضم وحضرتلهم ملابس على صفحة .. بدلت ملابسي بشي مريح ويا حجاب .. طلعت من الغرفة دكيت باب الحمام ..

_ فاروق كملت !!

نزار : تحجين ويا روحج

نرمان : لا راح يسبح الجهال

نزار : اخذهم بالحديقة

نرمان : بصدمة .. يا حديقة .. طلعت اركض اباوع من الدرج اشوفة مصلخهم وفاتح الصوندة وبيدة ليفة يجلف بيهم ويرش مي وهمة مكيفين ويضحكون

فاروق : هسة ماما اجيبلكم ملابس ونصعد ناكل جاجيك

نرمان : اجااااي اسوووي بيهم

فاروق : هيييييي اجتتت ماما

نرمان : راح الطم على راسي .. لفيتهم بخاولي وشلتهم صعدت فوك وكنان يبجي يريد يركص بالمي

فاروق : چا مثلج فكيتي الدوش وسديتي

نرمان : باوعتلة صفح وبديت البسهم ملابس .. جاي البس علي تشيرت وانتبه على ايدة بيها عضتين .. هاي منو عاضة

فاروق : كنان يشاقة ويا سوالة ساعة

نرمان : كنان مطلع سنون ثنين ليفوك بس حادات يكصن كص .. لزمت كنان من ملابسة ورفعت اصبعي ..

_ ليشششش تعض هااااا

فاروق : شسوالة هية عضة امشي بابا امشي ناس متتحمل شقة

نرمان : اخذابنة وراح للمطبخ .. انقهر على علاوي لان دائما ينكتل

_ مرت الايام وشوية العطلة نقذتني من الضغط الصار علية بيوم جنت وحدي دخلت نجاة وجها ميتفسر ..

نجاة : حكيم موجود !!

نرمان : وعليكم السلام

نجاة : نسيت اسلم .. شبيج صافنة ترة البية كافيني

نرمان : صاير شي متعاركين انتي ومؤيد

نجاة : لا راح للدوام .. المهم منو اكو بالبيت

نرمان : فاروق نايم بغرفتة وحكيم طالع ونزار ما ادري بي

نجاة : تعالي وياي

نرمان : وين .. جرتني ومشت وكفت كبال غرفة فاروق

نجاة : بهمس .. اجتني رسالة من رقم شوفي شمكتوب

نرمان : فتحت مبايلها تراويني مكتوب ..

_شلونج نجاتي اريدج هل فترة تبدلين وتكشخين زين

نجاة : رديت .. منو !

_ عزائيل

نرمان : لج منو هاااذة !

نجاة : فلاح اني عرفتة من اسلوبة الخايس

نرمان : وشراح اسوين شيريد منج ليش هيج يدزلج بعد مو ازوجتي

نجاة : راح احجي الفاروق

نرمان : لا لا انتضري حكيم وراوي الرسايل

نجاة : ما اكدر انتضر حكيم اخاف عمتي ترجع ومتلكاني ومالي خلك الحجي راح اسولف الفاروق قابل شيريد يسويلي

نرمان : بكيفج .. فتحت الباب ودخلت ضليت واكفة برة والباب مفتوح

فاروق : دكي الباب شبيج

نجاة : عبالي نايم

فاروق : خيرج

نجاة : اكو .. اكو رقم دزلي رسالة وخفت ادزها المؤيد اريد اراويكياها

فاروق : وينها !

نرمان : فتحت جهازها جرة منها وبدة يقرأ .. خفت وبطني مغصتني واني مالي دخل

فاروق : عندج برنامج (....)

نجاة : لا

نرمان : اخذ جهازها وفتح مبايلة ما اعرف شينقل ضل قريب الربع ساعة كبل طفر من فراشة حتى ابنة اخترع

فاروق : اني اعلمك شلون تندك بيها بعد

نجاة : فلاح !

نرمان : هز راسة واخذ كلبية من الكنتور لبسها بسرعة وطلع ميشوف دربة

نجاة : خاف يكتلة واصير فضيحة

نرمان : لا ما اتوقع يتصرف هيج ويدري بيج ازوجتي مستحيل يسويلج فضيحة

نجاة : ما ادري جسمي كلة يرجف

نرمان : روحي للبيت واني اخابرج

نجاة : لا ما اكدر حتى مبايلي اخذة شلون تخابريني .. اني اسويت

نرمان : يمعودة اهدي

نجاة : منين .. منين اتلكاها من فلاح لو من عمتي المطيحة حظي

نرمان : تربعت كبالها .. هم شكووو

نجاة : تمشي واصيح عاكر ومتخلف ومطلكة وطارحة وياهو اليجينة كعدت سولفتلة شريط حياتي

نرمان : يوو مرة جبيرة اخذيها على كد عقلها متذكرين عمتي اصيلة وهية اخت ابوية ..

نجاة : لاااا اصيلة ملاك منسبة الهاي .. لج يجون بنات خواتها تكلي نجاة تعالي سولفيلهم جم مرة حبلتي من ذاك رجلج

نرمان : كامت تبجي وتحجي انقهرت عليها رحت يمها .. ومؤيد شيكول

نجاة : ميجيب طاري الطفل يكول اذا الله كاتبة يصير بس عمتي متسكت

نرمان : روحي لادكتورة

نجاة : يمعودة وين اروح هية معروفة الي تسقط بجر متحبل بسرعة

نرمان : بيد الله قابل بيدج كافي لاتبجين والله كريم

نجاة : ما ادري اختنكت خاف فاروق يكملها ويطربكها فوك راسي

نرمان : لا اسم الله .. اخذت مبايلي ادك علية ميجاوب .. دكيت على حكيم

حكيم : ها حبيبي

نرمان : شلونك يروحي شوكت ترجع

حكيم : ماعندي شي مسافة الطريق

نرمان : تمام انتضرك حتى نتغدة سوة .. سديتة وباوعت النجاة

نجاة : راح يجي

نرمان : اي .. اخذي عباتج وروحي العمتج كليلها راح اتغدة بيت اخوية لان باجي مريضة واريد اداريها

نجاة : صدك شلون صارت عمتج

نرمان : بعدها تضرب كيمياوي

نجاة : الله يشفيها .. يلة هسة اجي

نرمان : طلعت ورحت لامطبخ اسوي زلاطة مرت ساعة ودخل حكيم واجة وراه مباشراة فاروق

حكيم : الله يساعدج بنيتي

نرمان : ويساعدك رحت اريد احضنة انتبهت على فاروق باوعلي عاقد حاجبة ..

فاروق : نجاة وين ولت

نرمان : هسة تجي

حكيم : شكو

نرمان : ماكو شي

فاروق : فلاح دازلها رسالة يهدد النغل

حكيم : شوكت ..

نرمان : فتح مبايلة وشاف الرسالة كعد على التخم منصي راسة

حكيم : وانتة شلون اصرفت

فاروق : اصرفت واذا عادها احطلة رمانة بالمطبخ وانعل والديه

حكيم : عاشت ايدك انتة وبس اذا اصرفت

نرمان : صار البيت مكهرب كملتها وطبت نجاة عيونها مورمة شافها حكيم وصار اعصاب اكثر

حكيم : اني مو كلت من تزوجين تبدلين خطج

نجاة : نسيت

فاروق : كسرت خطها وحطيتلها خطي القديم

حكيم : زين اسوي

نرمان : اخذت مبايلها وكعدت ساكتة بس دموعها تنزل ..رحت صبيت غدة وكعدت اباوعلهم محد يقبل ياكل

حكيم : كومي اكلي

نجاة : معليكم بية اريد الله ياخذ عمري

حكيم : يعني اذا ما تغديتي الله ياخذ عمرج

نرمان : الثولة كبل كامت تضحك اجت كعدت تاكل نست حتى السالفة التمو كلهم ياكلون بس حكيم وفاروق اشكالهم ابد ممرتاحين

_ خلصو شلت الصينية وكفت اغسل مواعين رجعت للهول ما لكيت ولا واحد كلمن بمكان رحت الغرفتي شفت حكيمي نايم طفيت الضوة ورجعت للهول .. ثاني يوم باليل اندكت الباب .. كمت افتحها

حكيم : كعدي اني افتحها

نرمان : راح فتحها صار صوت سلام طلعت من الغرفة لابسة تراك وحجاب شفت كمال ومرتة استغربت وجودة اول مرة يصعد فوك

حكيم : تفضل ابو باقر نور البيت بوجودك

نرمان : طبيت سلمت عليهم ورحت للمطبخ سويت جاي وديتلهم

كمال : والله اني جاي اشكر منك على كل وكفاتك ويانة وبذات علاج امي وكافي بعدك مخلينة ابيتك

حكيم : شنو هاذة الحجي انتة غير اخوي ابن ابوي انتو اهل هاذة البيت

اسراء : مشكور عيني بس احنى رايديك بغير شي

نرمان : عرفت وراهم سالفة ضليت كاعدة استمع والجهال يزحفون بالهول واحد ورا الاخ خبلوني

كمال : تعرف بيت ابو حازم بالشارع الورانا

حكيم : اي !

كمال : يريدون يبيعو

حكيم : هاذة مو بيت شقة طابق ثاني وجوها محل كصاب

كمال : اي هوة .. اني رايد اخذ الشقة ومحل الكصابة اشتغل بي مثل ما هوة

حكيم : ليش اكو واحد غاثك هنا شو معزز مكرم انتة وعيالك وشغلك بالاحواض والبساتين مثل ما هوة وما كايلك فديوم على زايدة واردة

كمال : لا يا خوي ما قصرت وياي بس شفت المشاكل اخر فترة وهاذة بيت عيال وهم تريد ازوج اخوتك باجر عكبة

حكيم : هاذة مو مبرر اخوتي يزوجون البيت شكبرة يوسعهم كلهم ولا تنسى هاذة البيت شكد جانو عايشين بي كبل ومكفيهم وزايد

نرمان : صار كل شوية يطلع بسالفة ولحد الان ما افتهمنة شيريد بالضبط لحد ما حجت اسراء

اسراء : يعني هوة قصدة يكلك اريد نشتري الشقة والمحل من الورث

كمال : اخذ حصتي من ابوي واشتري واستقر هم باقر كبر واريد ازوجة واشوف جهالة

نرمان : ضل حكيم ساكت فترة وهمة يمتمتون

كمال : ها شكلت .. واني هم اريد اسراء ترتاح من العيال تدري مو صغيرة بعد والنهار كلة لابسة حجاب ومجبوسة بي كافي تخدم امي ومراضية عليها

حكيم : هاي امك غصبا ما عليك تخدمها انتة بنفسك

كمال : طبعا على راسي قابل شكايل

حكيم : باجر اجيب محامي وانطيك حصتك وحصة نجم هم تطلع والبنات

كمال : اي هاي احسن فكرة وهاذة حك الله ميزعل

حكيم : يصير خير

اسراء : وحصة نجم وين تودوها

حكيم : اخذ بيت المرتة وبناتة قريب يمنة يكعدن بي وهم عيني عليهم ذني بنات مينعافن

كمال : زين اسوي رحم الله والديك

نرمان : شربو الجاي ونزلو فرحانين بس حكيم ضل ضايج رحت يمة كعدت

حكيم : تاليتها بيت حجي فاضل هيج يصير

نرمان : انتة ليش ضايج هم حقهم هاذة

حكيم : حقهم بس مراح يضل شي على حالة الاحواض تنباع والبساتين وبيت جدي ابوي اشراه من عمامي هم لازم يروح

نرمان : انتة ماعندك تنطي حصصهم بدون ميبيعون

حكيم : شعندي فلس فلسين هاذة ورث

نرمان : حط راسة على رجلي مغمض عينة

حكيم : شفتي الوكت .. كلشي ميضل على حالة

نرمان : مسدت على شعرة حسيت الي بداخلة اكبر من الكلام

_ دخلو نزار وفاروق يتناكرون لان هل فترة يرحون سوة للجم

فاروق : كلتلي ملتزم ومتاكل دهن واكلك صحي مو وبروتينات

نزار : غير كدام المدرب وبعدين من اليوم التزم

حكيم : بدت رحمة الله

فاروق : حاط الولد بالجم يجذب عليهم طلعلهم وصفات ضليت فاك حلكي .. يكلهم اكل الصبح تفاحة وجبن مملح والضهر بروكلي وجزر وبتيتة سلك ودجاج وعشى بيض سلك ابن المسلوكة

نزار : اهوووو لا تلح انتة شعليك .. كوم ابو علي اسلك بتيتة خل اتعشا

حكيم : روح انتة اسلك الروحك

نرمان : لا عادي اني اسويلة .. رحت للمطبخ اجة وراية نزار حطيت بتيتة بالمي وشغلت النار

نزار : شتعشيتو

نرمان : سويت صاج دجاج

نزار : ما بقة

نرمان : اكو ثنين بالفرن .. كبل فتح الفرن وجرهن وتربع ياكل باوعت علية ..

_ والبتيتة المن !!

نزار : البتيتة كدام فاروق

نرمان : صدك جذب .. ضليت واكفة بالمطبخ وهوة نسف الماعون سمعت حكيم يصيحلة

نزار : ايييي جااااي .. بالعباس اذا فكيتي حلكج

نرمان : طلع من المطبخ ضجت من الوكفة واستحيت اروح يمهم حسيت يريد يحجي وياهم علمود الورث كعدت على كرسي بصف الثلاجة واسمع صوتهم عالي

فاروق : يعني هاي هية راح تبيع

حكيم : ما بيدي شي هاذة حك الله وباجر عكبة اتحاسب علية

فاروق : وماليش تنطي النجم

حكيم : اشتري بيت المرتة وبناتة وهم يضلن كبال عيني

نزار : وفلوسنة وين توديهن

حكيم : تريدون اشتريلكم حاجة بيها تستفادون من راتبها لو احطهن بالمصرف

فاروق : عوف الاحواض خليها حصصنة

حكيم : اي اشوف شكد يحق الكم ويصير خير

نرمان : ضلو يتناقشون رحت كشرت البتيتة وديت الفاروق والنزار

نزار : رحم الله والديج بطني كامت توجعني من الجوع

فاروق : لازم تلتزم منا وهيج حتى تنشف

حكيم : منيلة دهون

فاروق : قاس طولة 186 لازم وزنة 86 كيلو ضبط حتى جسمة يتناسق

حكيم : على الكيلوين

نزار : حاط عينة عليهن

نرمان : بالمطبخ صارن 3 كيلوات .. شفتة خزرني وفاروق ضحك عرفت روحي جفصت

فاروق : باجر افضحك فضيحة الكو***

حكيم : تصبحون على خير اني ومرتي

فاروق : كنان وين

نرمان : نايم ويا علاوي بالجرباية

فاروق : اذا بجى باليل جيبي يمي

نرمان : ماشي .. اخذني حكيم وطبينة للغرفة تمددت على صدرة حاضنتة

_ ثاني يوم الصبح راح هوة وكل اخوانة ودز على خواتة يحضرن صار قسام شرعي وقعو الكل وبهل فترة بدو يصفون .. كلشي باسم ابوهم انباع عدى مزرعة والبيت باسم حكيم .. طلعت حصة نزار وفاروق مجيب سعر الاحواض خلوهن بالمصرف

_ بدأ كمال يلم بغارضة حتى ينقل للشقة ويفتح محلة الجديد

اسراء : حبابة نرمان تعالي بس انزل الجنط من فوك ضهري انكسر

اصيلة : لا خلي ابنج يساعدج اريد نرمان تلم هدومي وتحضرهن

نرمان : من كالت هيج ضليت ساكتة ما اكدر احجي ..

اسراء : يا تلمين ملابسج وين ترحين !!!

اصيلة : وياكم بيت ابني كمال شعندي كاعدة بعد يم ابن ضرتي

اسراء : لا عمة كمال ميقبل يكول امي عدها علاج واني ماعندي كل فلوسي ذبيتها بالشقة والمحل

اصيلة : شو اكلي تبن انتي معليج .. كومي نرمان لمي هدومي

نرمان : كمت طبيت الغرفتها انقهرت اكللها ميردوج ترحين وياهم وصدك كلام اسراء

اصيلة : لا تصفنين خلي العبي وحد والدشاديش وحد

نرمان : اي .. كمت اصفط بيهن بالجنط خلت البوم صور عرسها الي حتى شكلها ممبين بي كد ما الكامرة قديمة .. خلت كل التحتاجهن وطلعت ذهب هم ضمتة كملت كلشي وقفلت الجنط

اصيلة : يلة طلعيهن برة من يجي كمال ياخذهن

نرمان : سحلت الجنط برة الغرفة ورحت للهول لكيت نجاة جاية تساعد اسراء شافتني واجت تبوسني

نجاة : عززة تعالي اسولفلج

نرمان : طبينة للهول واسراء ضلت تخوزربيها لان عافتها تشتغل وحدها ..

نجاة : بس اخذت الخط ورجعت للبيت ماكو وحدة ما راسلتني تسأل على فاروق والي تغلطوتسب لان عافها والي تكتبلي نسيت ايامنة والعشرة ملعون .. واني اقرة وخربانة من الضحك

نرمان : يمة بدلي خطج لا يصادقهن رجلج

نجاة : اذبحة هوة وامة

نرمان : عمتج بعدها على سوالفها

نجاة : ايي عادي تعودت الله يهديها

نرمان : الله كريم دائما ادعي ونذري العبدلله الرضيع اذا صار عندج طفل

نجاة : اي راح انذر بيوم الوفاة

نرمان : الله كريم .. دخل كمال حتى ياخذ وجبة من غراضة هوة وسيارة حمل مأجرها

اصيلة : اخذ غراضي بالاول

كمال : هااا .. وين

اصيلة : وياكم چا غير ابن بطني

كمال : هز راسة .. ميخالف خل انقل غراضي وخلي غراضج اخر شي

نرمان : صعد فوك ينزل بالغراض وكبت العيطة مالتهم

نجاة : شكو

نرمان : عمتي تريد تروح وياهم وهمة ميردوها

نجاة : كبرررر عود ابنها

نرمان : نزل من فوك ضايج وجها احمر بدأ يصعد بغراضة وبقت بس غراض عمتي نزلت اسراء لابسة جبة وشال وتفر بمفاتيح بيتها الجديد وحاطتلة مدالية

اسراء : يلة بنات نشاوف بالافراح .. اروح اغسل بيتي وارتبة وراي طلعة للسوك واثاث

اصيلة : ولج وين يل مكموعة

نرمان : عبرت عمتي بدون مجاوبها .. الله يرحم ايام جانت اذا عاطت بيها توكف مثل القلم ..

_ راحو وضلت عمتي تنتضر يرجعون مرت ساعتين وهمة ماكو وعمتي ما الها حس

نجاة : اني راح اروح للبيت اتأخرت

نرمان : طلعت ورحت اشوف عمتي لكيتها بالغرفة دكيت الباب عليها ما حجت فتحتها وطبيت لكيتها كاعدة على الجرباية وحاطة الشيلة على وجها عرفتها تبجي

اصيلة : هاي تاليتها احبل واجيب واربي يذبوني يم ابن ضرتي لا البنات يسألن علية اجن لهفن فلوسهن وطلعن والولد واحد الله ياخذ عمرة عاميتة الدنيا واهلها والثاني يخاف من مرتة ليشش هيج اني شمسويتلهم متعاجزين من لكمتي

نرمان : لا عمة لاتكولين هيج .. اذا انتي مرة جبيرة ولدج هيج عافوج بس الله ما نساج ورحمج بحكيم الي ما مخليج تحتاجين الشي عمة اني بيوم من الايام صارت الدنيا كلها علية انتي وعمي وامي كلكم شمرتوني وتخليتو عني واني طفلة كلشي ما افتهم اتحملت ضرب واهاين منكم ومن جنت اتوسل بيكم ترحمون بحالي شسون !!

اصيلة : يو عمة جنتي طفلة تكبرين وتنسين

نرمان : ضحكت على حجايتها مسحت دموعها بشيلتها وحضنتني وجانت الصدمة منسبة الي اول مرة اسويها بحياتها .. بادلتها الحضن وفتح الباب نزار ومد راسة

نزار : خاف اجيتكم بوكت غير مناسب

نرمان : اخخخ من السانك .. طب وكعد على الجرباية متربع

نزار : سمعيني ولج عجوز البين

اصيلة : اكل تبن لا تركع بالشحاطة

نزار : اهووو صار عدها جم فلس كامت تشمر

اصيلة : شتريد احجي وكوم ولي وسد الباب وجهك يسوي جالي

نزار : نسوي مشروع اني وياج

اصيلة : ماليش وشكد ربحة

نزار : اشتري مكتب بفلوسج وفلوسي واثمن اجارة شكد يطلع انطيج النص

نرمان : صفنت تحسب وباوعت علية

اصيلة : وانتة شسوي بي

نزار : غير محامي الزم قضاية واخذ مبالغ قوية وانطيج شهرية يعني المنطقة الاريد اشتري بيها اجار المكتب رادو بمليون اني انطبج النص وهم المكتب يسجل نص باسمج ونص باسمي

اصيلة : تنطيني 500

نزار : 150 وكولي شايف كل الخير

اصيلة : امشي لك لاتخليني اسب المرحوم

نزار : بكيفج انتي الخسرانة فكري ورديلي خبر واذا صار عندي شغل قوي ازيد الاجار 25

اصيلة : عود افكر

نرمان : ضلو يداهرون رجعت غراض عمتي بالكنتور للعصر اجة حكيم وحجو بالمشروع مال نزار وقنع عمتي تشاركة وصدك اشترو المكتب وصار ينطيها اجار 350 بالشهر

_ بهل فترة صار ابن فاروق يمشي وابني يوكف ويوكع وزاد الطين بلة بدأ دوام السادس .. بهاي الفترة حسيت نفسي انهار

حكيم : جفون عيني انتي اقري ومعليج

نرمان : بجيت بصوت عالي .. حكيم شلون اقرأ فهمني كنان كل ما شاف كتاب حطة بحلكة وعلاوي كل شوية يريد يفكس عينة بقلم

حكيم : زين اخليهم بحضانة هم تخلصين وهم وكت تقرين

نرمان : هااا خاف يضيعون لو يبوكوهم وشلون يرحون ويرجعون

حكيم : الصبح نزار يوديهم واني من ارجع ارجعهم وياي

نرمان : واذا انباكو لو اتعورو خاف محد يديرلهم بال هناك

حكيم : شنو السالفة غير حضانة معروفة والها سمعتها والعالم كلها تمدح بيهم

نرمان : ما ادري بكيفك بس اذا صار بيهم شي انتة السبب

حكيم : عمي ميخالف

نرمان : ثاني يوم اخذهم حكيم وسجلهم بالحضانة كمت اداوم وارجع اطبخ وانضف يجون بس يتغدون ينامون كم ساعة اكعد اخلص دراستي استمريت هيج طول السنة بس من يسافر حكيم البغداد اتعب واضل اتوسل بفاروق يدير باله عليهم

_ اجت امتحانات اخر السنة وبهل فترة اخذت غراضي ونزلت بغرفتي القديمة جوة عفت الجهال وعفت كلشي وراية حتى حكيم نسيتى .. صارت حياتي بس قراية ونفسيتي كلش تعبت ضعفت وشعري بدأ يكوع من التفكير والقلق اخاف ما انجح او اعيد السنة او ما اطلع المعدل الي يدخلني طب ..

_ اليوم جان اخر امتحان الي بدلت وطلعت بدون ما اباوع بالمراية اخذت الملزمة اقرأ بيها وفجأة الكة نفسي اقرأ قران من الخوف

حكيم : ابوية حبيبي انتي كدها اذا طلعتي معدل يدخلج فنون جميلة اني فخور بيج

نرمان : ليش اجذب علية انتة مو كلت اذا ما نجحتي راح اصغرين بعيني

حكيم : غير حتى اشدين حيلج نمنمة سمي باسم الله وثقي الله ميضيعلج تعب

نرمان : ونعم بالله .. وصلت للمركز الامتحاني نزلت واحس كلبي راح يطلع من مكانة طبيت امتحنت وطلعت اني اشوف نفسي جاوبت بس اخاف المصحح ميفهم خطي من الخوف .. ضل حكيم برة لحد ما طلعت اول ما صعدت بالسيارة طكيتها بجية

حكيم : تؤ تؤ ليش بنيتي

نرمان : مخنوكة .. اذا ما طلعت معدل عالي ابطل

حكيم : هاذة شنو الحجي الماصخ

نرمان : اي والله ابطل وادير بالي على جهالي واكعد واسكت

حكيم : هههههههههههه خرب يومج

نرمان : تضحك علية

حكيم : الصبر يا الله

نرمان : رجعني للبيت اني ابجي وهوة يضحك وصلنة نزلت من السيارة امسح بوجهي وكفت يم السيارة اتحجج علية .. جوعانة ما اكدر امشي راسي يوجعني

حكيم : بس هيج تدللين مريتي

نرمان : اجة شالني على جتفة وصعد بالدرج كمت اضحك طبينة للبيت

حكيم : صايرة هايشة متنشالين

نرمان : الله شاهد ضعفانة

حكيم : شتريدين ريوك اكو قشطة واكو جبن

نرمان : اريد كوكو

حكيم : وبعد

نرمان : وعمبة بيها منكة

حكيم : جاي كهوة

نرمان : جاي واريد بي حليب ومي ورد

حكيم : خدام الخلفوج

نرمان : لا والله بس جاي احس راح اتخربط اخ راسي .. غمضت عيني وشمرت نفسي على التخم

حكيم : الله كريم ام الصفارة

نرمان : اذكرت السادس وبهتت ملامحي

حكيم : جذذذذب عمي اشاااقة

نرمان : راح سوالي اكل والجهال بالحضانة البيت فارغ وهدوء جاب الاكل وكعدنة ناكل ..

_ رجعت حياتي مثل قبل ورجعت فوك اشتغل وانضف كمت اصبر نفسي للنتائج واحاول انسى ..

حكيم : نمنمة علاوي يبجي

نرمان : واكفة اسوي جاي سمعت الهوسة صبيتة على ايدي وفرفحت طلعت من المطبخ اركض للغرفة لكيتهم واحد يخرمش بالاخ

فاروق : تكاونو الفروخ

نرمان : بعدتهم عن بعض واشوف كنان خدة كام يطلع دم حطيت ايدي على حلكي وشلتة حطيتلة دهن على خدة وبس يبجي ويصيح اوووا

حكيم : بشري

نرمان : وديتة للهول انطيتة الفاروق شاف خدة ضل ساكت ويلعب بي لان جهال اكيد ميحط عقلة وياهم

نزار : باجر يعلنون النتائج مال سادس

نرمان : من كال هيج حسيتها كملت فوك راسي طبيت للغرفة اسكت بعلاوي لميت الهوسة وعدلت الفرشة ورشيت عطر بالغرفة حسيت جسمي صار يهرشني كمت احك واملخ بجلدي

_ رفعت ثوبي احك برجلي وبضهري وصفاحي ما ادري شجاني

حكيم : بصدمة .. نمنمة شبيج

نرمان : ما ادري جسمي يحكني راح امووت

حكيم : كومي سبحي بمي بارد

نرمان : اي رايحة .. اخذت ملابس وطبيت سبحت وطلعت صرت احك ازيد من قبل والدم كام يطلع من ايدي ورجلي

حكيم : متكليلي شبيييج

نرمان : سحبني من ايدي وجاب دهن طبي بارد حط على ايدي ورجلي وينفخ علية حتى يبرد اكثر

حكيم : لا تحكين بعد هسة انطيج الرمين

نرمان : انطاني شراب من مال كنان هم عندة حساسية اخذتة ونشفت شعري

حكيم : انيمج

نرمان : هزيت راسي وتمددت غطاني وطفة الضوة اجة يم راسي يهمس

حكيم : يافكة عيون الكلب يارجفة اعصابي

نرمان : انتة هم

حكيم : اني شنو

نرمان : ما دامك بحضن الجفن جف النظر خل يكصر

حكيم : كبران وليدي صاير يحجي

نرمان : شعبالك بس من اشوفك يضيع الحجي كلة

حكيم : خايفة !

نرمان : لا على شنو اذا طلعت طب الحمدلله اذا طلعت معدل بسيط اكعد واسكت

حكيم : هاي الحساسية والحكة وجهج صار حليب بالفراولة وتكولين على شنو ! بربوك

نرمان : هزيت راسي مبتسمة لان هوة واكف وياي ومتركني ابد رغم الضغط العلية بس وجودة خفف كل حزن والم .. تمدد بصفي وحضني ما حسيت شوكت نمت .. فزيت ثاني يوم ساعة 8 الصبح

_ حكييييم كافي نوم اكعدددد

حكيم : ليش الساعة بيش

نرمان : 12 الضهر .. بس كلتها طفر من الفراش وصاح ..

حكيم : متواعد ويا واحد على شغل بالعشرة شلون ماكعدتيني

نرمان : جذذذذب والله ساعة 8

حكيم : جيرة بفركج

نرمان : ضحكت وكمت صفكت بيدي .. شتريد ريوك

حكيم : شيطلع من ايدج انعم الله

نرمان : بستة بالهوى ولبست حجاب وطلعت لان نزار موجود وفاروق بالدوام طبيت للمطبخ حطيت جاي على النار ودكيت الباب على نزار يتريك ويطلع اتأخر

نزار : صباح الخير شنو هل نشاط

نرمان : يلة كافي نوم تريك وروح مو عندك روحة للمحكمة

نزار : اي وعلي نسسسسيت

نرمان : جر خاولي من الباب وركض للحمام يسبح دقايق وكملت الريوك اجو ثنينهم دخل بدل ملابسة قميص ابيض وبنطرون قماش نيلي طلع كلشش حلو

نزار : ها محامي لو ابن عمة

حكيم : محامي اطك بالكاع

نزار : انطوني لفة مال جبن خل الحك

نرمان : سويتلة لفة واخذ طاسة الزيتون وطلع صحت وراه .. رجع الطاسة سالمة

نزار : ايييي ادعيلي

نرمان : الله يوفقك زوزو ..

حكيم : بعد كومي سجدي

نرمان : غمزتلة .. تغارررر

حكيم : اغار !! لا على بختج

نرمان : كمت ادغدغة واشاقة ويا وهوة يضحك علية

حكيم : السادس شلع فيشة من راسج

نرمان : اي والله صدكت

حكيم : عمتج شلون صارت

نرمان : الخميس اخر جرعة وراها يعيدون التحاليل ..

حكيم : ضلت وحدها جوة

نرمان : لا كل يوم ننزل يمها اني ونزار وشطبخ انزل الها وهية متكعد بس تنضف وتلم .. قفلت باب غرفتي والفوك كلة حتى اسهل بالتنضيف هسة بس الحوش والصالة والمضيف مفتوحات

حكيم : ديري بالج عليها

نرمان : ان شاءلله .. شلت الصينية شمرتها بالمطبخ ورحت كعدت بحضن حكيم فتحت مبايلي .. لكيت رسالة من ايثار مكتوب ..

( هلو حبي شلونج .. كنان شلونة سلميلي على الكل وبوسيليا وباقرب فرصة اتصل بيج )

حكيم : لا جاوبيها

نرمان : معقولة هاي ام !

حكيم : هاي اول مرة تسأل بعد جيتها !

نرمان : اي ..

حكيم : عوفيها لا جاوبيها بعد متستاهل حتى اذا دكت راح يصير اكثر من سنة هسة اذكرت ابنها

نرمان : اتذكرت شغلة وانداريت علية ..

حكيم : شبيج مخروعة

نرمان : تعرف اخوها محرم !

حكيم : شبي

نرمان : خطيبتة وياي بالمدرسة بس بغير صف شفتها مرة وحجت وياي

حكيم : شكلتلج

نرمان : عرفت عن نفسها وكالت بس انجح نزوج ونسافر وايثار هم مخطوبة

حكيم : مخطوووبة !! شوكت شو ما حجيتي

نرمان : بيومها جنت تعبانة ونسيت هسة اذكرت .. وعلساس مدرس مال انكليزي عراقي بس عايش هناك

حكيم : الله يوفقها دام هيج بعد ابد ماريدج تحجين وياها لو صدك ام حوك وكلبها محروك ما جان عافت ابنها حتى شلونة متسأل

نرمان : اي والله اني من سمعت ضجت منها .. انخطبت الله يوفقها بس ابنها خطية .. هز راسة وضل ساكت شوية وكعد من النوم اجة كنان يمشي لان يعرف ينزل من الجرباية

كنان : ماما

نرمان : حبيبي شلتة واشرتلة تريد عممم ( اكل )

كنان : عممم

نرمان : اخذتة وياي للمطبخ وسويتلة بسكت وجاي كعدت اوكلة وجبت علاوي هم ياكل ويا

حكيم : اني هم اريد بسكت وجاي

نرمان : ضحكت .. كول والله

حكيم : والله

نرمان : رحت حطيتلة بسكت وحد وجاي وحد حطهن وكعد سوة مثلهم خبط البسكت ويا الجاي صار مثل السريلاك واكلة بالخاشوكة

حكيم : طيب

نرمان : ههههههههههه بالعافية متريد سريلاك طيب

حكيم : خلي الج

نرمان : هههههههههه براحتك

حكيم : جيبيلي مي ام عطوب

نرمان : شلت الكوب ورحت انطيتة مي واني اضحك على السوا بالجاي .. سويت غدة ونزلنة جوة يم عمتي نتغدة .. للعصر اجو الولد التمنية بالبيت الجوة

اصيلة : ولك انتة يل مجلوب

نزار : اني !

اصيلة : اكو مجلوب غيرك .. العصر وديني البيت كمال ابو صماخ اريد ادكة بالصوندة

نزار : اذا هيج انتي لزمي كمال واني ادك فتون

نرمان : اكلك مو اليوم النتائج

نزار : جاي احملهن واذا ما نزلن مال مدرستكم اروح لابو المكتبة

نرمان : حسيت اطرافي رجفت كمت افرك بيدي واهفي على وجهي

نزار : طلعن النتاااااااائج

نرمان : صدددددددك

نزار : ابتسمت .. جذب

نرمان : وججججع ليش تضحك علية حررررام عليك .. كام يضحك ويباوعلي بخبث

حكيم : العصر اني اخذج لابو المكتبة نطلعهن

نزار : ميحتاج اني اخابر صاحبي يطلعهن اختة هم سادس وياج

نرمان : كمت توضيت ولبست حجاب كعدت اقرأ قران وانفخ على روحي ما ادري ليش صارت 5 العصر وماكو

نزار : راح اخابر صاحبي

نرمان : اتصل على صديقة واني ارجف حضني حكيم وعصرني حيل يحاول يهديني ..

نزار : اسمها نرمان عماد

نرمان : انطاه اسمي الرباعي وبقة ويا على الخط تقريب الربع ساعة حسيت روحي بعد ما اكدر اوكف كعدت بالكاع وغمضت عيني ادعي

نزار : شتكووووول !!!! 60 اي اي رحم الله والديك

نرمان : من كال 60 حطيت ايدي على وجهي وسجدت ابجي حسيت كل تعبي وكل المريت بي صار رماد بداخلي اتحطمت وانتهيت انتهى مستقبلي من هاي الحضة خيبت امل حكيم والكل صرت اشهك ولازمة صدري ما اكدر اتنفس

حكيم : ميخالف ابوية فدوة الطولج

نزار : صدك جذب نونو هوة هاذة معدل 96 وين ادخلج

نرمان : شنو 96 تضحك علية مو اتحسب عليك اشايف روحك انتة

نزار : والله 96 وروح ابوية

نرمان : منو جاب 96

نزار : انتي معدلج 96

نرمان : كول ان شاءلله تموت اذا اجذب

نزار : ان شاءلله اموت اذا اجذب

حكيم : تف عليك يا عار .. كووومي فدوة الطولج تسوين راسة انتي دكتورتي

نرمان : كمت من الكاع ما مستوعبة اني طلعت هاذة المعدل من الفرحة حضنت حكيم وكمت ادك على ضهرة

حكيم : راح تكسرين ضهري

نرمان : انيييييييي دكتورة والعباس دكتوووورة .. حضنت عمتي والجهال مسحت وجهي ورجعت ابوس بحكيم حتى من حلكة بستة

نزار : تعاااي حضنيني لا تستحين مثل اخوج

نرمان : انتة بذات لاتحجي وياي

حكيم : لاتحجون بعد لا وياي ولا وياها

فاروق : المفروض هسة نبارك الحكيم انتي تمتحنين وهوة يطلك

نرمان : تااااج راسي حبيبي ابووية حكيم

نزار : ملعونة بجيتيني

نرمان : واكفين يضحكون علية واني ما اعرف شلون ابوس حكيم واشكرة لو انطي عيوني ما اوفي ذرة من تعبة وياي

حكيم : باجر لو متت وكفت كدام الله .. طالع من خطيتكم

نرمان : حضنتة حيييل واجة نزار هم حضنة وباسة

نزار : ابو علي انتة اذا متموتنة متموت

حكيم : لازك على كلبك ابن الماريد احجيها

فاروق : يابة الله يخليك خيمة

نرمان : جابتلي عمتي مي وملح تكول مال هبطة شربتة وكعدت فرحانة جريت نفس عميق ورتبت حجابي ..

_ التمينة كلنة وصينا اكل من برة كعدنة ناكل سوة

حكيم : ماضل عندي هم غير ابو الفوارق

فاروق : شبيه

حكيم : من ازوجك انام ليلي على مغدة نعام

فاروق : باجر اجيبلك مخدة نعام نام عليها

حكيم : نعام مووو .. بوية ازوج محد يفيدك شوفلك مرة بت اوادم ادير بالها عليك وعلى ابنك

فاروق : هاا متعاجزين من ابني بعد ما اخلي يمكم

حكيم : انتة شنايم براسك .. تكلك ازوج تكلي متعاجزين من ابني خليها بعلمك نرمان مداريتة اكثر من ابنها

فاروق : چا لاجيبون هاذة الطاري بعد لو اريد ازوج باجر ازوج بس هسة مو ابالي

حكيم : اني ادري شني ابالك ابو كنان

فاروق : عمي الله شاهد كلشي ماكو من البالك

نزار : لا خوية صاير زلمة

فاروق : الصم

حكيم : الله كريم

نزار : دام كال الله كريم ميعوفك اذا متزوج

فاروق : سدو الموضوع وانسو

نرمان : بيومها جان اسعد يوم بحياتي حسيت لو البيت يحترك ما ادير بال

نزار : يا كلية راح تقدمين عليها

نرمان : ابتسمت .. طب عام

حكيم : كرصت خدها نشوفلج واسطة بجامعة البصرة

نزار : قريبة علية يومية امرلج اذا قبلوج فراشة بالطب

نرمان : باوعتلة صفح ورجعت ابتسم الحكيم

حكيم : راح تبدي الدياحة

نرمان : يوووو كيمووو ..

حكيم : خابري نجاة خل تجي اشوفها مشتاقلها

نرمان : كمت بسرعة دكيت على نجاة وكلتها على معدلي من الفرحة سدت المبايل واجتي لابسة عبايتها وطايرة

نجاة : مبرررك نمنمة شدي حيلج حتى تعالجيني

نرمان : بستها وحضنتها كعدنة بالهول بس شكلها ممرتاحة ..

اصيلة : ولج نجيوة هاي عمتج ام صماخ بعدها تعايرج بالبزر

نرمان : صفنت شمدريها !! انوب كدام الولد كبل باوعت على حكيم عقد حاجبة

حكيم : عمتج تعايرج !

نجاة : لا بس مرات تحجي لان ماصار عندي طفل

حكيم : وهوة بيدج غير بيد الله

فاروق : خاف ابنها الخركة عقيم

حكيم : شنو هل حجي مو عيب

نجاة : لا مؤيد مو مثلها

نرمان : حجتها وبجت كعدلو كعدتهم كلهم شايشين خفت تحجي ويرحون يكتلون الولد

نجاة : جانت قبل بس هية تعايرني هسة الكل يطب ويطلع يعايرني

نرمان : كرصتها حتى تسكت

حكيم : ما رحتي دكتورة

نجاة : رحت

حكيم : اي !

نجاة : سوالف نسوان معليك

نرمان : ضلو ساكتين شوية والكل طلعو الي راح ينام والي طلع يم جماعتة وحكيم راح يرش بالحديقة ادري بي طلع حتى نحجي براحتنة

نجاة : الدكتورة تكول حجم المبايض صغير انطتني منشطات وماكو فايدة هم ماصار ورحتلها مرة ثانية طلعت غير سالفة وهم اخذت علاج وضربت ابر تفجيرية بطني وما فاد

اصيلة : يجوز رجلج مابي خير

نجاة : لا لاتكولين هيج

نرمان : الله مرايد هسة شبيدج انتي العليج سويتي

نجاة : اي مابيدي شي اصلا حتى دكتورة بعد ما اروح

نرمان : الله كريم .. بقت شوية وطلعت .. رغم فرحتي بس ضجت عليها سألني حكيم وحجيتلة مقتطفات ما فهمتة كلش

حكيم : اذا سافرت البغداد اشوفلها دكتورة هناك

نرمان : اكو دكتور نسائي هنا كلها تحجي بي حتى من المحافظات يجون علية بس رجلها ميقبل تراجع دكتور ويفحصها

حكيم : اي اعرفة .. لا اني اشوفلها دكتورة وين ما جان اخذها وماخلي بشر يعايرها بالبزر واذا ربج ما رايد سوت العليها

نرمان : خطية والله علوى تشوفلها دكتورة زينة

حكيم : يصير خير

نرمان : مرت الايام وجنت كلش مرتاحة بالعطلة وحكيم شاف دكتورة النجاة بس مو بغداد بالحلة واتفق ويا رجلها حتى ياخذها تتعالج وصدك صار كل اسبوع ياخذها لو هوة لو نزار .. مشت الاشهر تركض ركض انقبلت موازي واجة اليوم الاداوم بي اول يوم جامعة ..

_ بيومها كعدت ويا صلاة الصبح سبحت و صليت اخذت علي الصار عمرة سنتين خليتة يم فاروق وابنة وطلعت امشي على اطراف اصابيعي رجعت الغرفتي وكعدت حكيم

حكيم : صباحي وجهج

نرمان : خايفة

حكيم : انتي سباعية بنيتي

نرمان : تمددت بصفة صار يتحارش بية بيدة

حكيم : حضرتي ملابسج

نرمان : هزيت راسي وضربتة على ايدة .. ما ضل وكت

حكيم : بعد وكت

نرمان : كمت من الجرباية اركض قبل لا يلزمني اخذت ملابسي ورحت للحمام بدلت وحطيت مكياج وطلعت لكيتة مبدل وكاعد بالهول

حكيم : هم هاي الحمرررة

نرمان : خففتها

حكيم : خرب عشيرتج

نرمان : اخذت جنطتي وطلعت ويا حكيم

حكيم : حبيبي اليوم اول يوم كلية .. خليج سطحية ويا الكل اتركي مسافة بينج وبين اقرب صديقة الج .. سالفة زميلي كطنة طلعيها من اذنج كلامج ويا الدكاترة حدي وممنوع ادخلين مكتب اي دكتور لو اصير حياة او موت

نرمان : ما خفت من الكلية خفت من نصايحك

حكيم : تكعدين بحالج .. سجلي محاضراتج اذا ما لحكتي تكتبين .. اي شي يصير وياج تتصلين بية .. مكتب نزار بينج وبينة ربع ساعة اذا اني مسافر لو مشغول ادكين علية يجيج

نرمان : هاي كلية لو جبهة قتال

حكيم : ها بدينة ارجعج للبيت

نرمان : لا لا هاي هية .. اخذني الطريق كلة يوصي .. وصلنة للكلية نزلت من السيارة .. دخلت ودخل وياي حكيم جان عالم ثاني ومختلف حسيت براحة من شفت البنات والشباب كلها من عمري وعمر نزار

_ دخلت كلية طب عام وبدت رحلتي الصعبة من هاذة اليوم ..

حكيم : حاولي لا اطلعين هواي تفترين دائما خليج بالمحاضرة راجعي

نرمان : باوعتلة وسكتت صدك يحجي عود

حكيم : شلون فهميني اداوم وياج

نرمان : كافي ارجع واني اتصل عليك من نطلع

حكيم : راح انتضرج برة .. هاج ذني خليهن جوة ايدج يصير ميصير

نرمان : انطاني ورقة 100 دولار وياها خردة .. شسوي بيهن

حكيم : خاف اجوعين يصير ميصير

نرمان : ضحكت على سوالفة .. عافني وطلع يتلفت ضليت واكفة ما ادري وين اروح .. شفت بنات ثنين اجو باتجاهي

منار : انتي مرحلة اولى

نرمان : اي

جيهان : مبينة

نرمان : ابتسمت وضليت ساكتة .. طلبو مني اكعد وياهم على مسطبة .. كعدت واحس حكيم مراقبني من الخوف

منار : اني راسبة بالمرحلة الاولى

نرمان : حفزتيني

جيهان : معليج بيها هاي ادور كلية تربية واهلها جبروها تدخل طب بالدفرات

نرمان : انطلقو يحجون عن حياتهم .. ضليت ساكتة واجاوب على كد السؤال .. دخلت محاضرتين وجانو الاغلبية يعرفون عن نفسهم .. خلص الدوام وطلعت

منار : انتي خط لو فورتات

نرمان : لا ارجع ويا زوجي

جيهان : متززززوجة

نرمان : وعندي اطفال ثنين

منار : بهاذة عمررج تشاقين

نرمان : ابتسمت الهم وطلعت لكيت حكيم بسيارتة نزل فتحلي الباب صعدت وصعد بصفي .. حسيت نفسي اميرة ..

حكيم : شلونة يومج

نرمان : صح خفت بس يجنن

حكيم : تعرفتي على صديقات اندليتي الاماكن

نرمان : اتعرفت على بنات ثنين وحدة منهن وياي بالقسم والثانية لا بس كلش حبابات

حكيم : كلش مستفادة من كلامي اذا شفتيهن مرة وحكمتي حبابات

نرمان : حكيمي مرتك ذيبة

حكيم : بيضة فرخ مال دجاج ما اخليج

نرمان : اذكرك

حكيم : بس من هاي خايف

نرمان : رجعنة للبيت نتناكر .. صعدت فوك فرحانة اتلكوني الجهال من الباب يبجون

كنان : هو .. دبني ( ضربني )

علي : ماما .. ماما

نرمان : كنان السان يحجي بس علي اول مينكتل يكوم يصيح ماما .. ليش دبك

كنان : كب .. ( كلب )

نرمان : عيبببب منو معلمك تكول كلب

كنان : امو حكير ( عمو حكيم )

نرمان : عيب بعد لا تتعاركون .. ابوك وين .. اشر على الحمام

حكيم : ليش تضرب ابني مو اطردك من البيت انتة وابوك

كنان : امو علاوي كب عض بابا

حكيم : وين ابوك التحفة

كنان : يبح ( يسبح )

علي : بابا .. ماما

حكيم : انتة خليك بس صيح بابا وماما وهاذة يومين ويكوم يطلع عمالة ويجيب مصرف للبيت

نرمان : مسحت وجها وكعدتة بحضني باوعت على كنان ايشرلة بيدة بمعنى اذبحك .. وووولك منيلك هاي السوالف

كنان : امو زوز

فاروق : شبي فلذة كبد عمة

نرمان : ابنك ليش يضرب علي خطية

فاروق : ابنج من جوة ليجوة

نرمان : اخذت علي ونزلت جوة شفت عمتي كاعدة تحوك جواريب العلاوي وضاهرة عليها اثار المرض .. بعد ما ضربت كيمياوي ضعفت وشعرها كلة اساقط .. كعدت بصفها .. شلونج عمة

اصيلة : على الله

نرمان : تريدين غدة اصبلج

اصيلة : اسراء وين

نرمان : راحت البارحة لاهلها

اصيلة : عمة اريد حكيم ياخذني النجم اشوفة

نرمان : ميخالف اكولة العصر

اصيلة : لا تكليلة دام البيت فارغ عندي حجاية ويا خل ينزل

نرمان : تدللين بس اتغدي بالاول

اصيلة : انطيني ابنج وروحي صبي غدة

نرمان : انطيتهيا وكمت للمطبخ .. اتفقت ويا نجاة كل يوم تجي تطبخ على الاقل تعيني ويا دوامي .. فتحت الجدر لكيتها جايبة تبسي وتمن .. صبيت الغدة ورحت وديتا الها ..

_ كعدت اكل وياها شوية وصعدت فوك .. لكيت حكيم كاعد .. عمة تريدك

حكيم : اني ! .. وينها

نرمان : جوة تريد تحجي وياك .. هز راسة ونزل جوة .. صبيت تمن احمر ولبن من البارحة وكعدت اوكل الجهال

نزار : سلامن عليكم

نرمان : هلاااا .. اليوم فتت من يم مكتبك

نزار : ما اجيتي

نرمان : لا كلت خاف عندك شغل

نزار : شلونة يومج

نرمان : يجنن

كنان : بهمس .. دبيت علاوي ( ضربت )

نزار : عفية بالسبع

نرمان : حرام عليك ليش هيج تعلمة مو هاذة هم ابن اخوك

نزار : فارغ يشبه امة

علي : انجب

نرمان : حطيت ايدي على حلكي .. عيبببب

نزار : هاي عليمن

علي : انجب

نرمان : شكل يغلط على نزار وذاك يريد يضربة كمت اهدي بيهم ونزار حاط عقلة وياهم ..

اصيلة : السويتة الي .. ولدي ما سو

حكيم : هاذة واجبي

اصيلة : لا يمة مو واجبك .. اريدك تبريني الذمة من اليوم الي انولدت بي

حكيم : ميفيد بعد الفات مات والله يسامحج

اصيلة : امك جانت هواي ادك علية وتتوسل بية تسمع اخباركم لو ارقامكم وانا جنت اصدها .. امك انظلمت هواي .. ارجع خابرها واسأل عليها

حكيم : ادري مالة داعي تحجين بذنوبج وتفتحين دفاتر مطوية ..

اصيلة : يعني مسامحني

حكيم : الله يسامحج مو اني .. عن اذنج

نرمان : طب حكيم عيونة حمر وميتحاجة اجو اخوانة كعدو يمة

فاروق : شبيك

حكيم : اريد اخذكم تشوفون امي

فاروق : يا ام ! هااا الله كريم

نرمان : طب الغرفة وضل مكتئب طول اليوم ..

_ مر يومين وهوة ضايج صار نزار ياخذني للدوام ويرجعني ويا .. بيوم جنت راجعة تعبانة طبيت للبيت لكيت الصالة عبارة عن معكرونة وعدس وكنان وعلي يطبشون بي كمت الطم رحت للمطبخ شفت حكيم يصفي التمن

حكيم : شلونها مريتي

نرمان : ليش منطي الجهال العدس والمعكرونة

حكيم : خطية يلعبون بي

نرمان : لا حكيم لا اشاقة مو .. طبيت للهول بوجهي شغلت مكناسة كهربائية وبديت اكنس وهمة خنسو يخافون من صوت المكناسة

حكيم : يلة مرتس سويتلج تمن ومرك

نرمان : حط الصينية بالكاع كعدت واشوف المركة خفيفة مي والتمن معجن كعدت اكل وابلع بالكمة

حكيم : طيب

نرمان : دام من ايدك يخبل

نزار : حشة النعمة

حكيم : انتة ماعندك ذوق

نرمان : طب فاروق من الدوام غسل واتوضى وكف يصلي .. صح يزاغل مرات ويشرب بس ملتزم بصلاتة .. كمل واجة يريدياكل بس شاف الكل كال ..

فاروق : بالعافية شبعان

حكيم : امشووو سرسرية بيكم خير انتو

نرمان : وتستمر الحياة رغم الشجن لا هي تقف على من اشترى ولا هي تقف على من باع بلا ثمن .. وليعلم جميع من اراد دفني .. اني بذور

حكيم : بذرة خلقت من رحم الظلام زرعتها في قلبي انبتت ذات ليلة ثمار .. امطرت عليها حبي لتنمو !

بقلم الكاتبة : ضحى ال عامر

النهاية ..

بنات فترة وانزل بارت عن حياتهم بهاي الاشهر القريبة وراح تعرفون منو الخلف ومنو العايش ومنو الميت .. وطبعا احس ختمتها ختامية تستحقها 8000 كلمة وماخفيت اي احداث .. لاتنسوني بالدعاء احبكم هووواي