رواية على وطايا الخيل الفصل الثامن 8 - بقلم روايات تثريـب

الجزء السادس

كان واقفًا عند باب المستشفى الرئيسي.. حاملًا حقيبة صغيرة.. وينظر إلى السماء.. كان يأخذ أكبر قدرٍ من الاكسجين.. يريد أن يتنفس الحرية.. يريد أن يتلذذ بها

لا زال لا يصدق الأمر.. يشعر بأنه في خدعة.. وبعد يومين سيعود إلى نفس المكان

أغمض عينيه يقاوم الفكرة السيئة التي وصل إليها

إلى أن توقفت سيارة غديّر الفخمة أمامه.. ونزل بدوره.. يسلّم عليه ويرحّب به.. ولكن سلطان سرعان ما ركب السيارة.. يريد الهرب من هذا المكان.. والتخلص منه للأبد

غديّر: ما يحتاي اوقع على أوراق أو شي؟

سلطان ارتاح بجلسته: خلاص.. ودعت المصحة ماشي لا أوراق ولا غيرها بإذن الله

غديّر فتح عيونه بصدمة: كيف يعني؟ طلّعوك؟

سلطان بشك: هاه ليكون مب عايبنك؟

غديّر: لا والله ماقصد هالشي وانته تعرف.. بس اني مب فاهم.. كيف يعني طلعوك.. مب جنه لازم أهلك يطلعونك؟

سلطان بعدم اهتمام: خلاص.. اكتشفوا إني سليم العقل.. الحمدلله.. ماخبرتكم بشي لكن من فترة طويلة وهم يبون يعيدون التشخيص.. يقولون يمكن الفريق الاولي استعيل بالتشخيص

غديّر مب مستوعب: مستحيل! مستشفى هالكبر كيف يغلطون بتشخيص خطير مثل هذا!!

سلطان: والله هذا اللي استوا.. والحمدلله بدوا من فترة بالموضوع ونقصوا الادوية تدريجيًا تحت اشرافهم لين وقفوها تمامًا

غديّر مذهول: وكل هالسنين عايش هني بتشخيص غلط

سلطان بغصة لم يستطع اخفائها: قضاء وقدر.. الحمدلله على كل حال

غديّر بتردد: بس كيف والحالة اللي يتك؟ ماكانت طبيعية؟ سلطان لا تفهمني غلط أنا والله مستانس لردتك لكن مب فاهم شي

سلطان هز رأسه بتفهم: ولا يهمك.. الله يسلمك هذيج الحالة موجة اكتئاب وانهيار حاد واعتلالات مختلفة وتعالجت منها الحمدلله.. لكن مب مرض نفسي دائم

غديّر: لا حول ولا قوة الا بالله.. سلطان لازم نقاضيهم.. حرام.. شبابك راح هني

سلطان تنهد: خلاص ياخوي.. أبا اطوي هالصفحة وما أرد لها أبدًا

غديّر: بس حرام والله.. حقوقك

سلطان قاطعه: خلاص.. يزاهم الله خير برّوني.. لو حد غيرهم بيدفنني ولا بيغلّط نفسه ويتعرض لكل هالمشاكل

غديّر تنهد: الحمدلله على كل حال.. يالله الحمدلله على سلامتك.. قرّت عيونك بالحرية

سلطان: الحمدلله يارب.. الحمدلله كما ينبغي لجلال وجهه العظيم وعظيم سلطانه.. نعمة عظيمة من نعم ربي علي.. يا غديّر العيشة في مستشفى الأمراض النفسية ابتلاء عظيم الله لا يذوقه مسلم

غديّر: الحمدلله على سلامتك يارب.. الحمدلله.. أحلى خبر والله ياني هالفترة "وكأنه تذكر"

سلطان انتبه على تغير ملامحه: خير ان شاءالله؟ شي مستوي

تنهد غديّر: دامك طلعت عيل لازم اخبرك.. في كل الحالات بتعرف بس أخاف اخرب فرحتك

سلطان وضع يديه خلف رأسه: يا ريال.. شو بيخرب فرحتي هذي.. هاليوم اتريا من سنيييين والدقايق اعدها دقيقة دقيقة.. واثق ان ربي بيفرجها والحمدلله مايخيب ظن مسلم

غديّر: الحمدلله يارب.. اللي استوا الله يسلمك ان المخبّل اللي وياي متحدين بعض قفز حواجز وواحد منهم تخرطف "تعثر" بالخيل وتكسر هو والخيل

سلطان: لا اله الا الله.. شو استوا به؟ عسى خير يارب

غديّر: توه طالع من العمليات.. اصابة في الظهر الحمدلله عدت على خير بس يقولون الباقي يعتمد على العلاج الطبيعي.. ان شاءالله يرد لكن مايضمنون انه ما يعري (يعرج)

سلطان: لا حول ولا قوة الا بالله.. والله انهم مب صاحين هالشباب.. يالله الحمدلله على سلامته واهم شي انه سلم

غديّر: المصيبة انه قافز بالجامح وهي باطح

سلطان انصدم: شوووووووو؟؟؟

غديّر: هي والله.. هذا اللي استوا.. والله السموحة منك سلطان مادري شو اقولك.. بس هذيل صدق يهال ومافيهم عقل.. تعبت وانا انصح واهزب ماشي فايدة

سلطان شعر بغضب شديد: منو هالغبي اللي يقفز بخيل باطح!

غديّر: حياب

سلطان أغمض عينيه بقهر يحاول كتمانه: والحين شو صحتها؟ استوابها شي؟

غديّر: يقولون احتمال كبير ولادة مبكّرة.. بس الحمدلله إنها بخير يعني رضوض واصابات بسيطة لكن بشكل عام صحتها زينة

سلطان مسح وجهه بيديه: استغفر الله العظيم وأتوب إليه.. الحمدلله يارب.. خلنا نسير نتطمن على حياب وعقب بنشوف الجامح

.

،

كان حياب يزجرهم وهو يضحك ممسكًا ببطنه: يالسبلان (يالقرود) ظهرررري روحي مكسَّر

قرواش: ههههههههههههه والله لاراويك يالچلب تحيد (تذكر) يوم كسرت ريلي

حياب يضحك: عنبوك بعير مب آدمي ماتنسى.. انا فاتحين ظهري والله عيب عليك بتضيع مستقبلي

قرواش: زين مب انت تقول ماتبا تعرس؟

هزاع كان يضحك بشيطانية: ماعلييييك ولد العم أنا بأدبه

كان يضغط على زر رفع السرير من الارجل إلى أن وصل الحد الاقصى عندما دخل سلطان وغديّر بصدمة من المنظر

كان حياب مستلقيًا على فراشه والسرير مرفوع من جهة رجله بشكل كامل.. والمصيبة بأنه كان يضحك معهم

صرخ فيهم غديّر: انتوا ايييييه يا حمير

فز الثلاثة برعب وبدأ قرواش بإعادة وضعية السرير للوضعية الطبيعية

كان غديّر غاضبًا.. مالذي يحدُث أمامه.. كيف يستطيعون اللهو بمريض بهذه الطريقة الخطيرة.. والتي قد تتسبب بشلله!

يتمنى لو كان يستطيع ضربهم.. اعمارهم مابين 20-24 ولكنهم يتصرفون كالأطفال بالفعل

غديّر: والله العظيم ودي اييب خيزرانة وامرغكم (اضربكم) واحد ورا الثاني.. اغبيا انتوا؟ ابا افهم.. ليتكم يهال اصفعكم لكن كل واحد شنبه مغطي ويهه

التفت على حياب: وانته شو؟ بهيمة؟ تشوفهم يتعبثون بشبريتك (سريرك) يالس تضحك؟؟ راس مال الريال ظهره وانته ماخذنها لعبة؟

تبا تتشلل على الاخير؟ بدال لا تحمد ربك ان الله رحمك ونجيت منها يالس تضحك ومخلنهم يلعبون بحياتك؟؟؟؟

كان سلطان ينظر إليهم ببرود تام.. بعد أن رأى هذا المشهد.. يستطيع تبرير فعلتهم مع الجامح.. فكما يبدو هم لا يفكرون بأي شيء سوى اللهو.. والطيش

طال الصمت.. فقال لكسره: الحمدلله على سلامتك يا حياب

حياب: الله يسلمك سلطان

سلطان بجمود: يقولون قافز بالجامح

سكت حياب.. وسكت الجميع

سلطان جلس ببرود: ان شاءالله دواك عندي من تصح وتمشي على ريولك

حياب يحاول تلطيف الجو: يا رياااال كسرتني تراها اي حق بعد باقي

سلطان: والله اقل عن يزاك.. لو دايسة راسك زين يمكن تعقل

حياب قهقه: يا ريال استغفر.. هالعقل روحه مب شغال زين

سلطان: ماعليه.. وانتوا الاثنين.. تعرفون شو شغلة السايس (عامل الاسطبل)

التفت الاثنان على بعضهما البعض باستغراب

قال هزاع: أكيد!

سلطان: هالأسبوع انتوا الاثنين سيّاس عند الجامح.. بتنظفون مكانها، وتحطولها أكل وشرب، وتسحّون (تمشطون) شعرها، وتدهنون جسمها، يعني كل واحد يشل ورقة وقلم ياخذ كل المهام من محمد ووزعوها بينكم عاد

قرواش بتوتر: تمزح شو؟

سلطان بجدية تامة: يبين على ويهي اني امزح؟

هزاع كان يشوف سلطان باستغراب.. شو هالطلبات وكيف متوقع منهم ينفذون أساسًا؟ وشو يقدر يسوي إذا مانفذوا؟

التفت على غديّر.. يطلب النجدة.. لأنه لا يود مجادلة سلطان.. أو التقليل من احترامه.. فهو بالفعل يرى احترام أخيه الشديد لسلطان، فكيف يكسره هو؟

قال غديّر: لا تتطالعوني.. الخيل خيله وهذا اللي يبتوه لعماركم

هزاع كان وده يتكلم ويتحرطم.. لكن فضل يأجل كلامه لين يطلع سلطان.. وهذا اللي استوا بالفعل.. سلطان استأذن عشان يسير يعدل وضعه في السفارة ويسير يطالع الجامح باستخدام سيارة قرواش

وعلى طول هجموا الاثنين على غديّر

هزاع بغضب: هذا منو يتحرا عمره اونه يبا يشغلنا سيّاس على آخر عمرنا؟؟؟ انا ولد بوالخيول اسيّس وانظف روث الخيول.. والله يهبي

حياب: هههههههه مصدق عمرك انته على آخر عمري اونه.. ترا عمرك 21

غديّر رفع حاجبه: اقول اصطلب و غِد ريال.. الحر ما يترفع عن خدمة الخيل.. نحن خدمنا وأبوك ويدّانك كلهم خدموا الخيول محد رمس رمستك الماصخة

هزاع بعناد: حتى ولو! خير ان شاءالله يتأمر علينا منو يتحرا عمره

غديّر: انته غلطت بحق الريال وتعديت على حلاله.. وواجبك الحين ترد له حقه

قرواش: عن نفسي أنا بسوي اللي يباه.. غلطان وستين غلطان وهذا اقل شي أسويه بحق ولد عمي

هزاع: والله عاد هاي مشكلتك انا مابغي

غديّر: بتطيعه غصبًا عنك يا هزاع.. غصب.. ماعندك اختيار ثاني.. ولو تشتكي عند أي حد من أهلك بيكسرون راسك.. بيفزعولك في أي شي الا هذي.. قلّن عندك الألعاب عشان تلعب بالاصيلة

حياب يلطف الجو: خلاص يا هزاع عاد الا هو أسبوع.. شفت شكثر ولد عمنا طيب.. انا لو فيني حيل بساعدكم بس المشكلة مكسّر

غديّر: انطم انته الثاني اونك بتحلها

حياب ضحك: هههههههههه خلاص آسف.. بس شو سالفته ولد العم أحيدك قلت يعطونه اجازة بين فترة وفترة مب ورا بعض

غديّر: هيييه سلطان الله يبارك له.. طلع خطأ في التشخيص وطلع من المصحة خلاص

قرواش: كيف يعني خطأ في التشخيص

غديّر: الحين بتوصلك السالفة

بدأ غديّر بسرد الموضوع كما أبلغه سلطان بالضبط.. وهو يتحسّر عليه.. كتم كثيرًا من الغضب والحزن عند حديثه مع سلطان.. لئلا يزيد ألمه

ولكنه لم يستطع الكتمان أكثر أمام الثلاثة

فإن قصة سلطان تفطر القلب.. 6 سنين ضاعت بسبب تشخيص خاطئ!

***

ذهب إلى الاسطبل وهو يتنفس بخفة لأول مرة منذ زمنٍ بعيد.. لطالما كان هواء النادي نقيًّا لكونه في مكان بعيد نسبيًّا عن ضوضاء المدينة

ولكنه كان يكتم صدره.. لعلمه بأن زيارته مؤقتة.. ولكن هذه المرة مختلفة

كان يتمشى في الاسطبل بأريحية تامة.. الاسطبلات بشكل عام مكانه المفضل.. والخيول أُنس له

رأى تجمهرًا في مكان الجامح.. بدأ قلبه يخبط صدره بشدة ويدعو الله أن لا يأخذها منه.. فلم يشبع منها بعد

كانت الجامح مستلقية بتعب شديد.. حولها الاطباء البيطريين والعمال.. ومخلوق جديد.. مهرة

تهللت أساريره عندما رآها والجامح تنظر إليها بفطرة الأمومة

زفر براحة.. الأصيلة بخير.. وهذا اهم ما في الأمر

اطمئن عليها وأكمل مسيره.. إلى ابنة الجامح الأولى "صمود" رأى شكلها غريبًا بعض الشيء فاقترب يتفحص شكلها

جهر بصوته: يااااا محمد

جاء العامل محمد إليه: نعم بابا

سلطان يركز نظره على الفرس: هذي باطح

محمد باستغراب: لا بابا

سلطان التفت عليه بحدة: عيل هذا شو؟ مب هذا خط الحليب؟ كيف طالع؟ بطنها ليش كبير؟ انتوا شغالين هني ولا تستهبلون؟

محمد بتوتر: بس هذي فرس صغيرة مافي زواج

سلطان يحاول كتمان غضبه: هات قفاز

طلب محمد من أحد العمال احضار قفازات الفحص.. وبدأ سلطان بفحص الخيل باحترافية تامة.. لبس قفازاته وبدأ بلمس رحمها ثم ادخل يده في فتحة المستقيم.. فابتسم رغم غضبه.. استطاع لمس كتلة ضخمة تبدو وكأنها جنين

قال وهو ينزع القفازات: منو يهتم بالفرس؟

أكبر: أنا بابا

سلطان: أنت مجنون هذي فرس صغيرة ماكملت 3 سنوات كيف حامل!!

أكبر: سوري بابا والله مافي معلوم

تنفس بغضب.. كان يود تنفيس غضبه أكثر على العمّال.. ولكنه غير رأيه.. لقد تحرر من السجن أخيرًا.. لن يُهلك أعصابه مع العمّال

أما صمود.. سيهتم بها وستكون بخير.. بإذن الله

.

*

.

*

بعد أيام قليلة

في الدانــة

كان مجلس الجدة صغَيْرة عامرًا بالنساء كعادته

قالت أحد النسوة: أم محمد ليش ماتزوجون صغيرة وحياب وتسير له ديار الغرب تهتم فيه لين يخلص علاجه؟

أم حامد: هي والله صدقها مسكين حياب هناك بروحه.. عيال عمه مايمديهم يجابلون (يقابلون) اشغالهم.. وين عندهم وقت يجابلونه؟

الجدة: هي والله إنه نعم الشور الطيب يا أم حارب.. شو رايج يا أم حياب؟

بدال لا اتمين شالة همه وتدوريلج حد يوديج عنده.. يوزيه وخلي حرمته تجابله

(يوزيه=زوجيه)

أم حياب تفكر: امايه حياب مكسّر.. وين فيه شدة على العرس؟

الجدة: مب لازم عرس.. كتب كتاب وخليها تسير له.. وإن الله راد وصحّ بدنه بنسويلهم عرس

أم حياب تفكّر بابنها العنيد: بس حياب يبا يدرس

أم غديّر: أي دراسة الله يهديج وهو بهالحالة.. صدق على الاقل صغور بتجابله.. بسم الله عليها بنيتنا سنعة وتعرف المذهب.. بتراعي ريلها لين يصح ان شاءالله وخير عقبها.. ولا شو رايج أم سلطان؟

أم سلطان كعادتها.. مطيعة: مابعد شور أمي صغيْرة شور

.

،

.

كان الرجال يعيدون ترتيب الشقة، استعدادًا لعودة حياب.. فوضعه الصحي الحالي يلزمه أن يبقى على السرير.. إلى أن تبرأ جروحه

قال سلطان: شقتك يا ولد العم فيها بركة.. تبارك الرحمن.. بس شكلها مابتسدنا خلاص.. لازم حد فينا يتطوع ويفارج (يغادر)

غديّر ابتسم: هالشقة شلت القبيلة كلها ما يت عليكم انتوا

سلطان: الله يبارك في الحلال وراعي الحلال.. بس خلاص ان شاءالله بدورلي شقة ثانية عدالكم

غديّر رفع يده برفض: لا تكمل.. إن الله راد الشقة بتسدنا.. وبالعكس حياب يباله حد يكون موجود وياه

سلطان: البركة فيكم ياخوي

قرواش: صدقه غديّر.. والله تعودنا عليك سلطان بالعكس مخفف علينا وتساعدنا

سلطان: عيل يبالنا ندورلنا شقة ثانية اوسع.. شو الراي؟

غديّر بتفكير: والله هالشقة متعود عليها ومكانها قريب من كل شي.. لكن مب مشكلة برمس السمسار اعرف واحد شامي يمكن اييبلنا شقة زينة بسعر زين

هزاع: والله ياخوي انته انسان غريب.. رصيدك فيه اكثر عن ست اصفار ليش تحاتي الفلوس؟ اصرف والرزق من الله

غديّر: لو كل واحد فكر مثلك عز الله فلسوا بوالخيول من زمن يدي سلطان الله يرحمه

قرواش: بس واحد شامي هااااه؟ ماقمنا نتعامل الا ويا الشوام الحين

فلعه غديّر بدبة الماي: ياهل وعطيناه ويه

قرواش ضحك: هههههههههههههههه

سلطان: انزين يا شباب.. أنا ابغي منكم مساعدة بما إني مضيع ارقام كل معارفي في البلاد.. ابغي نيسان بصراحة سياييركم صغيرة وماتناسبني

هزاع: بسسسس عندي الموضوع.. المواصفات شو؟ تبا ارقام البلاد؟

سلطان يفكر: اممم عادي عندي بس اذا ابيض يكون احسن.. والارقام احسن بوظبي بس على ذوقك مرة

هزاع: بس تم عيل كم يوم ويوصلك

قرواش: والله حييييه ولد العم.. صوعة النيسان ماتفجها الغربة

ابتسم سلطان.. فهو بالفعل يعشق هذه السيارة العائلية ولا يحب قيادة أي سيارة أخرى

هزاع: بس سلطان.. اسمحلي على السؤال.. أكيد الحين دام حياب طلع من المستشفى بيون الأهل وبيشوفونك هني.. شو بتقول لهم؟

سلطان: عادي جي مسوي جريمة أنا؟ بيعرفون إني طلعت

هزاع: يعني مابتخبرهم قبل؟

سلطان: مايهموني

صمت الجميع.. يعلمون بمدى حساسية الأمر لدى سلطان.. وتجنبه المستمر للحديث عن علاقته بهم.. أو أي محاولة اتصال معهم.. ونبههم على الأمر غديّر أكثر من مرة

علاقة سلطان ببو الخيول أمر حساس جدًّا وخاص به.. نؤيده أم نعارض هذا لا يهم عنده

.

،

.

كان يتحدث بالهاتف وهو غاضب جدًّا.. لقد هرب لتأجيل الأمر.. فلم يصرّون على التعجيل به.. ولسبب مثير للشفقة كهذا! محال أن يوافق.. محال

قال: الحين انتي ولدج متكسر وداخل العمليات ولا ييتي تزوريني.. وبدال لا تتطمنين علي تبين تطرشيلي بنت أخوج تهتم فيني؟

أم حياب بألم: والله لو بيدي جان مابت يوم بعيد عنك.. لكن منو قال شوري بايدي؟ ليش أبوك من متى يلبي اللي ابغيه؟ قاللي مالج حاية (حاجة) هناك وهو في المستشفى يراعونه وعيال عمه عنده.. لو اقدر تتوقع اني بخليك؟ هذا ظنك بي يا حياب؟

تلوّم حياب: امايه آسف.. ماقصد هالشي.. لكن افهميني دخيلج.. والله صعبة.. مستحيل.. تبيني اخذها عشان تطببني وتهتم فيني؟

أم حياب: هذي حرمتك والحرمة واجب عليها تهتم بريلها وتداريه

حياب: هذي ياهل روحها تبا مداراة.. وين بتداريني أنا؟

أم حياب: دام انها في سن زواج معناها كبيرة.. حياب لا تعور راسي هذا أحسن حل لوضعك

صرخ بغضب: أنا وضعي عايبني انتوا ليش متعبلين هالكثر! منو قال اني احتاي شفقة واهتمام من حد؟

أم حياب: الموضوع منتهي بنييكم (بنجيكم) انا وأهلك نزوجكم هناك ونوثقه في السفارة.. استعد أنا بس اخبرك

حياب: مب على كيفكم.. خلاص لين متى بتتحكمون في حياتنا؟

أم حياب: نحن نبا مصلحتكم يا ولدي.. وبعدين صغيْرة تراك بتاخذها بتاخذها طال الزمن والا قصر.. خذها الحين وهي ياهل وبتكبر على ايدينك

حياب: مابغي.. أنا مب مقتنع بالزواج الحين.. يوم ابا اعرس بخبركم.. ليش محد يفهم؟

هذي ياهل.. وأنا عاجز.. تعرفين حالتي ليش تبلونها!

أم حياب: ماعليه ان شاءالله حالتك بتتحسن مثل ما قالوا الدكاترة

حياب: هييييهاااا لين اتحسن واقدر امشي خير.. الحين شو بسوي بها؟

أم حياب: حياب دخيلك.. ارحمني ترا والله إن مابيدي شي.. أنته تعرف أهلك زين ما زين محد يروم عليهم غير رب العالمين

خلاص خذ البنت وخلها هناك يا تمل أنت والا تمل هي وتتصل بأهلها يشلونها

حياب مصدوم من كلام أمه: هذي رمسة بالله عليج؟

أم حياب: شو تباني أسوي؟ انته من صوب وأهلك يحنون من صوب.. خبلتوا بي.. الكل يرمس جنه الشور بيدي وأنا والله ما لي كلمة.. الشور كله عند يدتك وعمومتك

.

،

.

*

في الدانــة

كنَّ جالسات في منزل أم سلطان كعادتهن.. تحديدًا في غرفة صغيْرة

لكون منزل أم سلطان الأهدأ.. ولكونها الأكثر تسامحًا.. فهي لا تحاسبهن على شيء.. ولا تقاطعهن.. ولا تطلب منهن النزول لتأدية الواجب كما تفعل بقية النساء

سوادة: تعالي انتي راعية العلوم.. ماخبرتينا بتعرسين؟ اسمع الحريم يتكلمن عن المهر والزهبة

صغيرة: أي عرس اي خرابيط.. مادري انا شو السالفة.. امايه قالتلي اونه الحرمة تجابل ريلها ومادري شو.. قصة طويلة بصراحة مافهمت شي الا اني لازم اسير اهتم فيه لين يصح

وضحى: اوووه ممرضة يعني

صغيرة ضحكت: ههههههههه يعني تقدرين تقولين جي

وضحى: بس كاسر خاطري حياب.. مسكين شرد وكسّر عمره وحالته حالة يتحرا انه بيشرد من العرس.. بس مممرررة ماشي فايدة لاصقة فيه بنت محمد

سوادة: ههههههههههههه صدق صغور ماخبرتينا اخر مستجدات العرس؟ تحاتين نحسدج؟

صغيرة بمزح: هيه الوحدة ماتضمن هالأيام.. يقولكم اقضوا حوائجكم بالكتمان

سوادة تنفض ملابسها: عن نفسي مول مافيني ذرة حسد.. ولو ترومين تفكيني من قرواش وانتي هناك.. تسممينه او شي بتسوين فيني خير

صغيرة: عنبوه يالمجرمة.. في بنت تقول عن خطيبها جي

سوادة: لا تطريلي الخطوبة.. طاريها اييبلي صداع.. يوم سعدي والله يوم قال بسير ادرس.. يعلها سيرة بلا ردة قولي آمين

صغيرة: اعوذ بالله منج ومن لسانج.. الواحد مررره مايتمنى تعادينه

سوادة: فكينا من قرواشوه.. الحين وين السويت يالله اتصلي بطباخكم

صغيرة مسحت على زندها بالهاتف ثم شاهدت النتيجة.. لديها تطبيق هاتفي مرتبط بشريحة في ذراعها تقيس السكر بشكل مستمر.. لكونها مريضة سكر من النوع الأول

صغيْرة: انزين بكلمه.. اقولج وضحى شوفي السكر عندج قبل لا تاكلين.. انا جيكت الحمدلله عندي زين.. اذا تحتايين انسولين بييبلج من اللي عندي

وضحى: والله ماعندج سالفة انتي هالكثر تحاتين وتفكرين.. ترا محد يموت ناقص عمر

صغيرة فتحت عيونها بصدمة: ليكون انتي ماتتابعين!

وضحى: لا طبعا فاضية انا!

صغيرة: انتي مب صاحية انا كل يوم اتأكد!

.

،

بعد يومين

كان حياب متجهّمًا.. وهذا حاله منذ عرف بأمر الزواج

قال قرواش: اوووه المعرس ليش مبوز

حياب بغضب: قرواش والله ان عدتها لا اقوم ارفسك

قرواش قهقه: والله زين يوم بتقوم يا ولد العم.. تعبت وانا ادعيلك قوم وراضي ترفسني

نظر إليه حياب بغضب.. وآثر الصمت على الكلام

غديّر: خلاص نصيبك يا حياب.. شكثر شردت عنه ولا منه مهرب.. عسى أن تكرهوا شيئًا وهو خير لكم

...

عاد سلطان ومعه العشاء

غديّر: أكرمك الله بو مايد.. بس عاد لا تأكلنا كل يوم من برع مب زين

سلطان: صدقك والله بروحي عفت أكل برع.. يبالنا نتشرى حق المطبخ

غديّر: ماعليه باجر ان شاءالله عقب الدوام بسير

سلطان: ماعليك انا موجود.. قبل لا اسير الاسطبل بمر أخذ أغراض الشقة ان شاءالله

غديّر: الا شو استوا على صمود؟

سلطان: الحمدلله صحتها زينة.. ولو انها صغيرة على الحمل بس تبارك الرحمن جسمها قوي على أمها.. ومن بدينا نغذيها ردت لها عافيتها

غديّر بشعور بالذنب: والله مادري كيف أهملتها السموحة منك ياخوي

سلطان ابتسم: الاسطبل فيه تبارك الرحمن وايد خيول.. كم بتجابل.. المفروض اللي وياك يساعدونك في الحمل

قرواش رفع ايده: انا زين مني مجابل دراستي شو دراني بالخيول منو باطح ومنو مربي

سلطان يزجره: امممف هذا وانت ولد بوالخيول.. هاي رمسة الحين.. الله يرحم ايام اول نولّد الأفراس.. الحين يقولك مادري الخيل باطح ولا زايد وزنها

"امف صوت وليست كلمة.. يعتبر أسلوب زجر/ استنكار عند الاماراتيين"

غديّر ضحك: هههههههههه ابتلن الخيول!

.

،

.

كان قد حجز موعدًا في العيادة الخارجية، مع طبيبة محددة.. لسبب لا يعلم به أحدٌ سواه

دخل العيادة بابتسامة بها قليل من المكر: السلام عليكم حي الله د. وديمة

ابتسمت وديمة: وعليكم السلام.. الله يحييك سلطان.. تفضل

سلطان: هاه شو المستشفى بدوني؟

وديمة: على حاله.. بس ماعندنا حد يعوّر راسنا بالاسئلة

سلطان قهقه: ههههههه شكلكم تولهتوا علي

وديمة: اهم شي راحتك النفسية.. وهذا اللي نتمناه.. بس استغربت انك حجزت موعد في العيادة.. خير يارب؟

سلطان: لا بس أراجع

وديمة بشك: تراجع عن شو؟

سلطان: اختلاطي بالمجتمع.. أنا معظم وقتي في الاسطبل مع الخيول والعمال

وديمة بتفهم: هيه اشرحلي الوضع أكثر!

بدأت تستمع باهتمام، تناقشه في بعض النقاط، وتعطيه رأيها بشكل عام

وديمة: اللي فهمته إنك ماشاءالله قادر تدبر أمورك بشكل ممتاز.. الحمدلله.. ما أشوف إنك تحتاج أي مساعدة من صوبي.. بس اقدر احولك على معالج سلوكي يساعدك في الانخراط مع العالم إذا حاب

سلطان: لا مب حاب

وديمة ابتسمت: عيل آمرني.. في شي ثاني اقدر أساعدك به؟

سلطان: هيه.. تتزوجيني؟ 

نهاية الجزء السادس