رواية على صراط امي الفصل الخامس 5 - بقلم Shaqraa

مساء السعادة

على صراط امي
الجزء الخامس

حجيت بسرعة وبارتباك ها ياحر ؟
صديقي الاسمر..
يعني ليش تسالني هيج اشفت مني؟
منج ماشفت شي وانت عرضي بس يجوز انة غلطان
عذريني وانسي السالفة..
حجاها وكام طلع مالحكت احاجي
صح ارتاحيت من طلع بس استغربت
شنو الي شافه خلاه يحجي هيجي..
بس حاولت اخلي نفسي طبيعية
حتى لايبين حجيه اثر بيه..

صبينا الاكل وتجمعنا ع السفرة وبدت السوالف
علاء كال لبابا ..
عمي نريدلنا فد جمعة بيها الاهل كلها شتكول ؟
اي عمي ياريت صارلنا هواي مامنجمعين
ومدام هسه ربيع والجو حلو ..
والكل ايد الفكرة وعجبتنهم وقررو نروح للسيبة
بس ينطون جدي وعمامي وخوالي خبر
احنا عمامي وخوالي لمة وحدة لان جدي ابو امي
هو عمهم وابوهم ميت
فهو جامع الطرفين ويعتبر ابو الكل

للعصر راحو بيت خالو سلام وبابا كال
راح اروح للحجي والحجية اشوفهم ..
انة وماما ويمامة كعدنا نلف كليجة
والولد يمنا شوي يساعدون
شوية يطفرون ..

اميكالت لمرتجى ..ماما ليش ماتتزوج
مدامك الحمدلله خلصت دراسة وتشتغل..
لا حجية بعد مو هسه ..
ها خاف تنتظرلك وحيدة؟
ههه لا حجية..حجاها بحرج وكام..
مرتجى عمره ٢٥ سنة ترتيبه الثالث بالعائلة..
الاكبر يمامة عمرها ٢٩
وحسين ٢٧
ومرتجى ٢٥
مختار ٢٣
عابد ٢٢
واني ٢٠

مختار وعابد صارو بنفس السنة
مختاربدابة السنة شهر الواحد وعابد نهاية السنة شهر ١٢
لان امي حبلت بي ع الاربعين..
وطبعا انة اخر العنقود على كولة بابا سكر معقود
امي دائما تكول احمد ربي لان انطاني بنات
عشت عمري كله وحيدة اتمنى عندي اخت...
بالليل اجه بابا كال يسلمون عليكم
واتفقو بعيد نوروز نطلع كلنا سفرة ...

صار الاحد وداومت وطبعا سالت عن سجلي ماكو
طلاب الاعرفهم كلهم سالتهم ووصيتهم
الي يلكاه يجيبه الي بس المادة كلها يعني دراستي
كلها متوقفة عليه..
قررت اسال الاء صح متستاهل احاجيها
بس ميخالف العشرة ماتهون ..
رحت للكافتريا هي جانت كاعدة وي بنات من شعبتنا..

مرحبا بنات شلونكم..
جاوبوني كلهم هلا وطونه تعالي انضمي للكعدة تفوتج
طبعا علاقتي طيبة وي الطالبات اغلبهن..
والاء ماردت السلام بس تباوع بتكبر..
جاوبتهم ..لا مشكورين لان مستعجلة
بس اجيت اسأل الاء ماشفتي سجلي؟
سجلج الازرك الي علي سيارات؟

اي اي هو ماكو غيره ..
اممم شفته ذاك اليوم بيد هذا العبد صاحب قرايبج!!
من كالت هيج صدك صدمتني خصوصا كدام البنات
حتى هم تفاجئو وردة فعلهم واضحة...
جاوبتها بهدوء..قصدج عد صديق اخوي اي زين
معناها لكاه زين طمنتيني مشكورة..
حسيتها تفشلت والبنات خفت الصدمة عدهم
ترخصت منهم ومشيت..

وقررت من هذا اليوم مااختلط بالاء ولا احاجيها
لان ماعدها صفة صديق ابد..
بس الزاد قلقي السجل شلون اجيبه من حر
صح تطمنت لكيته
بس ماريد احاجي ولا اختلط بي وفكرت وي نفسي عدل
اخذ سجل وحدة من البنات واستنسخه
بس ما اتجرا واتواصل وي حر ..وبالذات بعد
ماعلاء سالني وعنده شك ..

ماانكر اعجابي بحر رغم شفته قليل
وماجمعنا حديث طويل
بس هالشخص من اشوفه احساس بداخلي حلو
ومااتمناه يروح
اعرف الحب مسموحالي وامي دائما تكلي
لو حبيتي تعالي واحجيلي
لا تضمين عليه شي خليني بالصورة
واذا يحبج صح يجي ويخطبج
لتخافين من الحب..لان اقدس شي بالحياة هو
الحب...
والشراع الي يمشي سفينة كل حياة ناجحة
هو الحب...

وفعلا يمامة من حبت حجتلها وساعدتها لحد
ماخطبها
وحتى من انفصلو ..ساندتها وما وبختها لاختيارها الغلط..
بس اليمنعني عن حر ومااسايره
هو صديق ابن خالي واكيد كل رجال عرضه غالي
وهو صديقه المقرب
يعني من تصير بينا علاقة علاء يكون اول المخربين
ويمكن صداقتهم وقرابتهم
تنتهي بسببي انة..
وهذا المخليني ماانطي مجال لحر ابداً...

مرت الايام والوضع نفسه بين دوام وبين بيت
وجمعتنا ربي لا يحرمنا منها..
اما الاء فابداً ما حاجيتها بعد ولا هي حاجتني

بيوم خابرت سفانا لحسين حتى يروح وياها تحجز
بدلة الحنة والعرس
ورادو امي تجي وياه عود كلشي كدامها يصير
وهي ام الولد..
راحو العصر ورجعو ورا ساعة ..
جنا كاعدين انة وبابا ويمامة
بس شنو حسين اول مادخل صعد فوك مباشرة
امي وجهها احمر دم
كالت وطن كلاص ماي بسرعة ...

كعد بابا على حيله وكلها خير سهير شصار؟
وانة ركضت جبت ماي لماما واجيت
لكيتها فاتحة شالها وتهفي ..
شحجي يا عيسى شحجي هم بايعين خلاص مشكلتهم..
اي فهمينا شصاير
ادري بيهم لا حيا ولا مستحى بس شكو هسه؟
غسلي وجهج مو زين عليج شوفي شصار بيج
حسبي الله بهيج ناس عينها صفر...

رجنا وياهم ناجر البدلات وامها واختها ويانا
دخلنا لمحل ومحلين
ماعجبهن شي بثالث محل عجبتهن بدلتين
وحدة ب٧٠٠
ووحدة ٥٠٠ رادن ثنينهن
حسين كال وحدة جبيرة ع كولته والباقي اخذي
ذني الصغار
يقصد بدون تلة ..هي عفست وجهه اووو هم راح تقنط
عليه..
خزرها كلها هي حنة مو عرس وماارفض لان بخيل
بس هذا تبذير زايد وماله داعي..

شو امها طكت الحجي عرض الحايط وحاجت الولد
نريد ذني ثنينهم
وتعاي اختاريلج ثالثة شنو ناطينج فصلية ومايدللوج
نطيتج زينة باتي وخريجة وحلوة..
خريجة من شيب الخلفها بعدها اعدادية مامخلصة
دكملي كملي بلة...

حسين ماتحمل انوب كدام ابو المحل..
كلها وحدة وبس تختار والثانية بيضا للعرس
غير هالحجي ماعندي
وامها مدت لسانها شنوو مان علينا وعبالك فكور
هسه تاجرلها ثلاثة
واذا مااجرت اليوم اطلكها منك واخذ كل حقوها..

احنا تفشلنا كدام الولد اهل المحل
وهم ضلو يهدون بيها ويكلولها خالة عيب ومايصير
وانة لازمة حسين واهدي بي
صار نار من احراجه سودة عليه..
عاد كلها توافقين حجي امج لو حجيي؟
كلتله امي حجيها صح ..
كوم جرني من ايدي وامشي ..امشي يما كافي
صارت ماصخة من صدك
وكلهن باجر نطلك..

بقى بابا يستغفر وانقهر..امي كلتله تولي احسن
هم امبين بايعين
ومايردون سعادة بتهم وهي وي اهلها شمايكولون..
هذا هو بعد شنسوي سوينا العلينا وازيد
الله يعوضه بالاحسن انشالله...
كومي ارتاحي كومي شصاير بيج..
راحو بابا وماما للغرفة..
ويمامة طكتلها صفنة يمكن تذكرت وضعها قبل...

وفعلا وكل حسين محامي لان هم عاقدذن محكمة
وتطلكو ..
وصار شهرالرابع وخلص وقربت الامتحانات
والطلعة العائلية الجماعية
تأجلت لان امي ضاجت ع حسين والتهى هم بالاجراءات
وكال جدي مدام سهير هيج وضعها
خليها غير وكت..جدي يحب امي حب عجيب
رغم يكولون قاسي بس هي بنته الوحيدة
وكلش يحبها ..

قربت السنة تنتهي وهذا اليوم اخر يوم نداوم
لان الاسبوع اليجي امتحانات..
عابد كال نطلع من وكت لان ماعدنا شي..
اتفقنا نطلع ساعة ب١١
ساعة عشرة ونص رحت اتمشىانتظر عابد
وحسيت صوت خطوات وراي..
التفتت لكيت حر تفاجئت وبقيت واكفة بمكاني ..

صباح الخير ..تنهد وكال وطن..
صباح الخير ..حجيتها وانة منثولة ..
اريد احاجيج لا تشردين رجاءاً ترى مااكل بشر وغلاتج..
تفشلت وابتسمت ..لا بس تفضل يعني لان مستعجلة
شوية ويجيلي عابد..
اذا يجي عابد ماترهم اخاف عليج يشوفني واكف يمج
هذا رقمي ومن ترجعين دزيلي رسالة
حتى اخابرج وافهمج ..

لا لا مااكدر الا الرقم..
ليش وطن انة غريب؟ترى اني بمثابة اخت علاء
وماقصدي وياج الا كل خير
وكافي عاد مرمرتيني منين مااطلعلج تطلعيلي...
بالمناسبة هذا سجلج ماكدرت ابقي يمي وعندج امتحانات..
مديت ايدي اخذته وتعمد يلامس اصبعي
بس احس روحي انخمطت احسااااس لا يوصف
باوعلي بنظرات مختلفة وانة بلا مااحس بادلته النظرات...

تأسرين كلبي بخجلج هذا ادفع ثلثين عمري بس اكسب
كلبج
وابقي ثلث اعيش وياج بي ..ولج حني عاد بيش اقسملج
بستر امي كلبي مارايد غيرج..
هو يحجي وانة صافنة بي ونسيت نفسي كلامه تسلل لقلبي
ولامس احساسي واريده يحجي بعد
ماجنت متوقعة هيجي ردة فعلي راح تكون ولا
متخيلة نفسي انجذب لواحد
ماشايفته بس كم مرة ومامحاجيته عدل ..

سالني بابتسامة هادئة..هلكد عندي حظ وعجبتج؟
اشوف عيونج الحلوة تتجول بنظراتها ..
ابتسمت وخليت ايدي ع وجهي الي احس صار كتلة نارية
احتر واحس كلشي بيه يرجف بس مو خوف
ماعرف احساس حلو ..

ها اتفقنا تخابرين؟
هزيتله راسي اي ودنكت ..عن اذنك لا يجي عابد..
اخذي راحتج ومحروسة..
تمشيت كعدت ع المصطبة وهو راح كدامي يمشي
اباوعله شكد انيق
حذاءه اسود نظييف وبنطرونه رصاصي
والقميص ابيض الي متناغم وي بشرته ومامنشز ابد...

ياترى حر شنو السحر والتعويذة الي القيتها على قلبي
بحيث جاريتك بالكلام وقبلت انفذ طلبك
مو اي واحد كدر يقنعني مو غرور ولا تباهي لا لا
بس ماكو واحد حرك احساسي مثله
لمسه ايده هسه تذكرته وقلبي فز رغم محد لامس
طرف صبعي قبل...

وانة كاعدة وصافنة فززني الفون يدك جاوبت
عابد وكمت تمشيتله
ورجعت للبيت وانة مبتسمة مااعرف فرحانة
جنت مترددة والي مرددني علاء
بس احساسي تجاهه اقوى من خوفي وارادتي اله
هي تمشيني ..

قررت احاجي ماما واسولفها حتى تنصحني
بس بعد مااتأكد من مشاعري اكثر
واحاجي ونتناقش احسن ..
بعد ماتغدينا ودخلت لغرفتي اخذ قيلولة
قفلت الباب وطلعت الرقم
كتبته وصفنت عليه..لحظات ترددت بعدها تشجعت
دزيت مسج _مرحبا_
ماكو جواب ..سويت الفون رهزاز حتى اعرفه من يدك
ورا عشر دقايق دك...
لزمته بيد ترجف بس مبتسمة..
فتحت خط...

للحكاية بقية
بقلم شقراء(قمر كانون)
حبايبي اني نوهت وكلت بين يوم ويوم لان مااكدر يعني وضعي مايسمح لهذا تعودو على الموعد ولا تضوجون
لان مستحيل اكدر يومية وماريد استعجل وابخس القصة حقها
القصتين الفاتت استعجلت وماحسيتهن اخذن حقهن
خليكم ريلكس حتى الاحداث تفهموها ونمشي بهداوة بالاحداث ما نختصر ...