رواية على صراط امي الفصل الثاني والعشرون 22 - بقلم Shaqraa

مساء الخير

على صراط امي
الجزء الواحد والعشرون

بقيت جامدة بمكاني حر شجابه بالسطح!!كتله بفزع..
شعندك هناا؟؟!
بقيت اتلفت واحجي..
روح اخواني وبابا هنا روح لا يشوفوك ..
تقرب عليه رجعت ليورا وحجيت بشفايف ترجف ..
لا تقرب حر لا تقرب ،.
تقرب اكثر ووجهه بي علامات الاستغراب
بس انة احس انعادت عليه
سالفة خالد..

كعدت بالكاع واباوعله بخوف بكد مامشتاقتله
بس خفت
كعد كدامي بسرعة ومد ايده يريد يلزم ايدي ويسالني
بس دفعتها بسرعة وعطت..
وخررر وخرر لا تلزمني لا تدنالي ..
وطن شبيج انة حر شبيج؟؟؟؟تدرين بيه ااذيج؟؟
هزيت راسي ودموعي طفرت من الجهتين
مادري سبق وسويتها
واذا اذا هسه تأذيني اموووت...

رفع ايديه مستسلم وكال وغلاتج مالمسج بس
روحي نزلي جوا
حتى اطمن عليج واروح..
مسحت دموعي برداني واشهك ..اي اي رايحة..
وكمت ركض فتحت الباب ودخلت..

لكيت سبأ واكفة من شافت وجهي لطمت خدها
عزاا العزاني شبييج؟؟
عفتها ونزلت اركض وهي وراي لزمتني تريد تدخلني
للغرفة
وانة ادفعها واكلها وخرري وهي تجر ..ولج شبيج
بس فهميني ولج وطن..

دفعت ايدها ودخلت للغرفة وهي دخلت وراي..
شبيج ولج ليش تبجين احجي.؟
ماتدرين ليش؟؟هاي سالفة تسوينها بيه؟ماخفتي يسوي
بيه مثل ماسوا زفت..
افتر بالغرفة واحجي بحركة وهي تفتر وياي وتباوع
بوجهي وتحاجيني...
ولج ادري بي ماياذيج ياا وطن شجاج مو انت
تكولين حر شريف ويخاف عليه؟
اييي قبل قبل مو هسه..هسه مايخاف ولو يخاف ما
طيحني بانياب خالد ..
قلت حيلته وحقه احتار شيسوي يعني هم احتار
وياج الرجال..

هسه كعدي واهدي لا احد يحس عليج ارتاحي
وجرت ايدي وكعدتني
وفتحت الثلاجة وجابتلي باكيت حليب
فتحته وانطتني ..
شربي وجهج مخطوف سودة بوجهي مو قصدي
بس ردتكم ترتاحون
هو خطية يقهر وانت اكثر ..
شربت شوية ولزمته بيدي وصفنت..سبأ انة بعد ماافيد..

كعدت بالارض ولزمت رجلي وهزتها..
وطن راح تتحملين خطيتي
هسه اموت انة وبتي ..احجي نطقي شصار ..
لا اسم الله عليجن ..
بس ولج كلشي ماصار ..مجرد شفته
لوحدنا وتقرب عليه
انتهيت خفت تقززت
تخيلت يسوي السواه خالد..
لا غلطانة وطن حر مايسويها لان يعرفج حساسة
وفقيرة
واذا هذا كله ميوكف بعينه
ماينسى علاء صحبان روح بروح ويستحي يلمسج
لخاطره..

فركت وجهي بخوف وتعب..
ماعرف تفكيري مشوش وخايفة من كلشي
سبأ الله يخليج..
لا تساعدين حر بعد وترتبين لقاءنا
انة مريضة انة مخبلة صرت من يتقرب مني رجال
سبأ حر ..حر مد ايده يريد يسالني
انقبضت روحي
حتى انصدم ووجهه مايتفسر من
الاستغراب بتصرفي..

يعني ماافيده
وهم اذيته هواي ورخصته ..
عفية سبأ خلينا هيج لا تحاولين
تصليحين المايتصلح...حجيتها وكمت اريد اطلع...
براحتج حبيبة ميخالف
بس لا تزعلين مني..حجتها وشبتكني..
بستها وكتلها لا مازعلانة..

نزلت جوا جاي يصلون الرياجيل بالصالة كلهم
رحت لغرفة يمامة
امي ويمامة يصلن
طلعت توضيت ورجعت
وكفت اصلي وامي خلصت وكعدت تسبح
وتباوعلي...
وانة حتى صلاتي تخربطت ماعرف شحجي
خلصت فرض الظهر
وكعدت اسبح...

سالتني ماما وين رحتي تاخرتي ؟
رحت وي سبأ صعدتلها السلة للسطح..
يو لو صايحة لواحد من الولد يصعدها
لا مو ثكيلة خفيفة..
زين سويتي خطية هي هم مايصيرلها ثكل
شريتيهم عنها؟
لا ماقبلت اخذتني راوتني فساتينها تريد
تختار منهم لعرس مرتجى..
يلا شوف وبقت الملابس بالسطح؟
اي ..
خلصي ونصعد انة وياج نشرهن حتى ننزل
نتغدى كلشي كامل..
هزيتلها راسي وكمت كملت صلاتي..

ومن خلصت هي بعدها مرتجة ع الحايط
وتسبح
ويمامة من طلعت باوعتلي بنظرة قصد...
شافتني ماما خلصت ..
ها خلصتي نصعد؟
انة اصعد انت تعبانة وثكيلة..
لا خليني اتحرك احسنلي...

صعدنا انة وياها فوك واركض كدامها افتح
الباب
كل عقلي اخاف حر بعده
هوس عندي وخبال رغم هو اعرف راح..
طلعنا وهي بقت تشر وياي ولكيت القراصات ع جهة
الكذبت سبأ عليه
وانة مطفية مساع ولا انتبهت...

وصلت للجهة الي يصير بيها بيت حر..
وكفت قريب الحايط
ارتجت ع السبلت..وانة سويت نفسي مشغولة
بالفانيلة البيدي ..
وطن ليش عيونج مورمة؟سالتني وباوعتلي
بنظرة احجي صدك لتكذبين..
تنهدت..ودنكت..لان بجيت ماما..
شفتي صح؟؟؟تعالي يمي ولا تدنكين
مو بتي التدنك راسها..

تقربت يمها باوعتلي بابتسامة خفيفة..
احجلي شلون شفتي؟
غمضت عيوني حيل..هنا هنا اجه وشفته ..
ههه ولا يتراجع هالولد صلب..
ليش بجيتي؟
لان خفت ..خفت لا يتقربلي او يسوي مثل خالد..

جرتني لصدرها وهمست..
ماكو مقارنة ..حر يعشكج عشك صافي مو شهواني
وخالد حبج صح بس ماصبر
قدم رغبته على كلشي..
لا تقارنين بينهم وانسي الصار..
ابدي من جديد ورجعي وطن القديمة
لا تذبلين ورود عمرج بشحة الحب
المشاعر والاحساس مثل الورد ترف وحساس
وبس يشح عنه الحب يذبل ويجف
واذا جف يا ماما تبقين عمرج كله تعيسة..
رفعت راسي وكتلها..

بس وين الامل اليجمعني بحر منو يوافق؟
يوافقون صدكي لان الصار درس للكل...
رجعت كملت الملابس ومسحت دمعتي...
الله كريم ماما خليني براحتي...
والنعم بالله...
وكملنا ونزلنا سوا..
بس انة قلبي يخفق حيل
شنو معقولة يوافقون!
ولو حتى لو وافقو ماريد زواج ماريد
خلي انسى خلاص انسي وطن
سدي تفكيرج...

رحت للمطبخ البنات جاي ينقلون الاكل
ساعدتهم وفرشنا برا
وكعدنا كلنا..
بدا الاكل والسوالف وعابد يضحك المايضحك..
وانة رجعت فصلت عنهم
وبقى موقف حر وكلام امي يتناوبن ببالي..
امي مقتنعة بحر وتحجي لجانبه
وانة متهربة من كلشي..

انتبهت على مختار صاح الووو..
التفتت عليه..
ولج عبالي نايمة انطيني لبن خلصه ابو بطن ..
جاوبه عابد..ليش مستحي مختار كول
انة انطي الك..
مد روحه من امي وابوي الكاعدين يمه..
انطه البطل لمختار
فتحه لكاه بي ماي ..
ولك انت مو مال احترام لو ماكاعدين الكبارية
جان شوفتك شسوي..

كال خالو ..انت تامن بعابد ولك هذا انة كتله حطلي
السمجة الناشفة يمي
يكل لاخته يمامة السمجة الناشفة خالي يكول حطوها
لعابد يستاهل..
ضحك بابا وغمز لخالو..بضميرك عليمن
طالع غلاب..
ضحك خالو حيل وصار احمر...كله عابد..
ها حجي ليش مستحي احجيها
طالع على الحاخام بابا حجي ..بس بشرفي
لو كاعد جان كعدني بالمطبخ اكل وحدي..
صدك هنا ضحكت
الظاهر خالو وبابا بينهم الغازعليه كد مامشيبهم ...

ورا الغدا تجمعنا وجاي وحلويات وحب وكعدة حلوة
احس نفسيتي تغيرت فعلا احسن
وحتى هم من لاحظوني كال بابا..
الجمعة التجي يمنا الغدا ..جاوبته مرت خالو
علواه كل جمعة نلتم ونتونس
ايدها خالو كال خوش جمعة النا وجمعة الكم..
وبقينا لنهاية العصر يلا رجعنا..

من ردنا نطلع يمامة كالت خلي فونج يمج
بس ترجعين اراسلج..
وسبأ رجعت اعتذرت مني كتلها عادي انة هم غلطانة..
وطلعنا وماما وي مرت خالو بالباب
وانا صرت وي الولد اتخفى بينهم مثل الحرامية..

باوعت بابهم مسدود محد
صارت عيني ع السيارة كاعد بيها..
دنكت بسرعة وكدامي حسين عثرت
ولزمت بتشيرته
وهو اندارلي لزمني..ها ها اسم الله..
واجو كلهم عليه
كتلهم لاا مابيه شي بس عثرت..

صعدت بسرعة ودنكت وصعدت ويانة وماما وبابا
وعابد ومختار
وراحو حسين ومرتجى وحدهم
وعابد استلمني..
وطن لبسي خرزة مشي خوية هسه المنطقة كلها حفظتج
بعد اذا طبيتي للفرع
كلها تصيح اجت العوبة
صاح بي بابا ولك اسكت عنها..
وماما هم ترد بي وحاصرتهم الضحكة
بس عبالهم ازعل لو ضحكو..

مختار كال جنت متوقعها ولك ادري بيها تمشي
مثل الفرارة
درت عليه وضحكت ..وهم اجتهم اشارة طلعو الضحكة الحابسيها
صدك سالفتي تضحك
كل مااجي اسويلي حادث..
بس الحمدلله عدت سلامات بس عثرة..

وصلنا وي الصلاة وصلينا وساعدت ماما
بالعشا
ورا العشا كعدنا كالعادة ..
جبت الفون لكيت يمامة مراسلتني من تفرغين رمشيلي..
خابرتها ومن جاوبت ترخصت منهم
بس ماكتلهم يمامة ..
طلعت بالحديقة كعدت الكرسي وحاجيتها..
ها بقى بالي شبيج ولج؟
شبيه انة هو انت شبيج؟
يا اليوم نبقى شبيج وشبيج ..

هههه ولج رعنة حجتلي سبأ ع الصار
شبيج خرعتي الرجال
حسستني بالذنب وهو ممسوي شي..
تنهدت وحجيت على كيف..
يمامة ماريد اخاف اخاف تعرفين شنو اخاف؟
وطن وطن وطن خبلتيني انت مو طفلة
انت مرا والبكدج خلفن
والصار فهمناج عليه
وكنالج صح غلط ومكروه بس يصير
وهو لان جبرج وضربج هيجي تعقدتي
بغير ظروف يمكن تتقبلي عادي...

لا لا مااتقبل ماريد ..اكيد حر هم
هيج هم يريد
خليني بعيده عنه وخل ينساني ابد ماافيده
هو شلون يقبل بوحدة لاميسها غيره..
بلة كافي تمسلت ..قابل لامسج واحد من الشارع
رجلج وحلال جان
واصلا مايحقله لا يعاتب ولا يحاسب
وحسب تحليلي لشخصيته
هو يكلج سدي الموضوع ولا تفتحتي ابد...
اوف مادري سدي الموضوع..

اي سديناه وامي عرفت بيج صاعدة تشوفي..
اي اعرف حاجتني شمدريها..
بعد اهل مكة ادرى بشعابها والظاهر حر
مجدد امجاد الماضي..
صدك يمامة امي فعلا ناسيته هيج احس ..
اي ناسيته بس بالاول عانت هواي وخبلت
بابا ووصلت بينهم للطلاك ..

صدك؟
اي لان جانت مامتقبلته بس من افترقو فترة وهي جانت
حامل بيه
كالت عرفت نفسي حبيته وماقبلت يطلكني كتله ارجع
ورجعت وتحسنت علاقتنا
بس هو مانسى بسرعة ..صح يحبني يعشقني
بس اقل خلاف بينا لو ارفضله طلبه
يكلي متحملتني غصب ومالج خلكي
لو الج خلكي جان قبلتي نخلف هواي..
لان هو حان يريد خلفة
وماما شارطة عليه بس ثنين يعني البطنها تجيبه
وثاني وبس..

لهذا هي تكول جنت اثبتله انة ماكارهته ولا
مااحبه من خلال الاطفال
كل مايعرف بيه حامل يروح يجيبلي هدية ذهب
ويجي..
واصلا تكول جان تساؤل بداخلي وبعقلي الباطن
بعدني اريد فخري؟!
بس عقلي يرفض حتى التفكير ويعتبره خيانه
رغم مااريد عالشي...
بس من شفته من اجو يخطبون وطن حسيته صدك
صار ماضي
وصدك انة حبيت ابوج وهو وبس...

لج لحظة لحظة ..ليش لعد حبلت هسه؟
معقولة لان شافت حر بعرس علاء وتخربطت
يعني تعاركو
وهي ثبتتله بحملها ان هي ناسية الماضي ؟
لا لا من كبرو مابقى يفتح الموضوع كالت انسدت
الصفحة لان بينتله احبه صدك..
بس بيوم لكفج حسين تخابرين وانت معيطة
بسببج طالعين ركض ههههههه وناسين
الاحتياط وصار الحمل..

يووو لعد هذا الحمل شبسرعة يصير يعني
ليش كل مرة ماصار
بس من طلعو ركض صار..؟
يبووووي يبوووي اشك هدومي هسه
اطلع اصيح لحر هسه يشرحلج نظري وعلمي
لو اشرح لحمار جان افتهم..

اي شبيج شدراني قابل حابلة قبل غير اعرف..
انت مامنج فايدة
باعي عقلج شلون الحايط البلوك وتدك بي بسمار
تدكه وينزرف الحايط
بس يبقى البسمار يركص مايكعد
لحد مايتفتت التراب ويطيح البسمار
هسه المعلومة حاولت ادكها ماكو..
اخر شي طاحت من عقلج بالكاع كومي لميها..

اكلج انت مخابرتني حتى ترزليني دروحي
صوجي جاوبتج..
هههه انة هم صوجي عفت رجلي واجيت
اسولف وي وحدة من زمن الجاهلية..
امبيت الحضارة ..
روحي وسلمينا..
يوصل ..باي..

سديته منها ودخلت كعدت يمهم شوية
بعدها كمنا كلمن لغرفته..
رحت فرشت اسناني ورجعت بدلت وتمددت بفراشي
كعدت اتصفح بالفيس
متابعة صفحات مال تحشيش حلوة اتذكر اسمها
جان *سؤال يطرح نفسه ويتمرغل بالكاع*

شفت صورة مال تحشيش عجبتني دزيتها لعابد
كتبتله اكييد يقصدوك انت ..
دك الفون ومالحكت اكمل ارسالة راحت..
قطعها استاذ حر باتصاله...
ترددت اجاوب الى ان انقطع ..
رجع دك وفتحت خط ..
سمعت صوته ونبرة الجدية المفرطة طاغية عليه...

بلا سلام لا سؤال كال..
وطن بس اريد اسألج وجاوبي..
شنو سبب رجفتج وخوفج من تقربت منج ؟
بلعت ريك بصعوبة..اضوج احد يقترب مني..
تضوجين لو عبالج المسج؟
اي ماريد تلمسني ولا اريد تفكر بهالشي
مستحيل اخلي احد يلمسني..
اهااا ...
من الاخير وسبب هالتعقيد..
ذاك ال... شمسوي وياج؟

للحكاية بقية
بقلم شقراء(قمر كانون)

وفديو اليوم هدية من الغالية
roorQueen953  😍😍😍

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

كسرتي خاطري😂😂

كلش مو امان 😂انت

باليز🥴
لاا🌚🌚