علمني كيف الحب يداوي الفصل الخامس والعشرون 25 - بقلم Chrakirkuki

#علمني_كيف_الحب_يداوي 25

سمر : سافرنا ويانزار لاكثر من دولة علمود العلاج أموت ويصير عندي طفل نزار متعلق بجهال حامد أهواية تليفونه كله صورهم أحسه متغير أقل كلمة يتنرفز مني ويضوج مو مثل قبل خصوصا من يطلب مني أروح وياه واني مااقبل

نزار : هاي اخر مرة اكولج تعالي ويايه بعد كيفج تصرفاتج مو حلوة واني ساكت علمود حبي الج بس بديتي تتمادين واني راح اسوي مثلج اقطع علاقتي بأهلج

سمر : ليش هيجي انت تعرف اهلي مو مثل اهلك يموتون عليك بديت تتغير كل هذا علمود مااخلف

نزار : موضوعنا مو بالجهال اني كتلج حبي ألج مو مربوط بالجهال سنين وياج ولا يوم كتلج أريد طفل ولا حسستج موضوعنا أهلي موعاجبج لايجون يمنا ولا انتي تروحين ليش هيجي

سمر : لاتضغط عليه كافي اني نفسيتي خربانة من الأدوية والعلاجات وانت متصدك تجي العطلة تعوفني وتروح يمهم أعرف تريد طفل وميت على جهال أخوك لان تحس بالنقص مو

نزار : استغفرالله يعني الواحد ميحب جهال اخوه الا اذا عنده نقص سمعيني زين اني لو عندي 7 هم جنت أحبهم لان من حامد ياريت تشيلين هالحاجز اللي مسويته بينج وبين اهلي أني اليوم اروح من ارجع اريد اشوف سمر حبيبتي اللي اتزوجتها مو اللي كدامي حاليا مع السلامة ركبت سيارتي ليش وصلنا لهالحالة الناس كلها جانت تحلف بحبنا وعلاقتنا هسة يوميه مشاكل طلعت تليفوني متعود من اطلع اخابر امي احجي وياها حتى ماضوج من مسافة الطريق نحجي بالساعات وماكوللها اني بالسيارة لحد مااوصل واروح احضنها وهي تعاتبني ليش اسوق واخابر

مدينة : متوب من هالحركات هسة اضربك ليش هيجي تسوي حبيبي تعال بحضني اشكد مشتاقتلك جوعان لو تريد ترتاح

نزار : أبوس ايديها وراسها احضنها بكل قوتي حضنها تجيبلي السعادة شفت مرمر تمشي كدامي ولا عبرتني كعدت وتغير محطات تلفزيون اشكد كبرانة ردت احرجها ماما ليش متعلمون ناس أدب واصول

مدينة : ههههه مرمر تعالي سلمي على نزار مشفتيه

مرمر : لا خالة شفته هو ميسلم تعودت بس ميخالف علمودج ارحب بيه شلونك عمو كتله من غير نفس

نزار : تسلمين مبين مرتاحة كولي نزار شنو عمو كبرتي مادري ليش حسيت كلمة عمو ثقيلة على كلبي

مرمر : كمت سويتلهم قهوة وجبت حلويات وهمه يحجون اشكد متغير مبين تعبان صار عندي فضول اعرف شبيه كعدت يمهم سويت نفسي مندمجة ويا التلفزيون واذني يمهم الظاهر عنده مشاكل ويا المحروسة

نزار : ماشالله جريت الريموت منها من يمتى تباوعين على القنوات التعليمية ومال ابتدائية هم

مرمر : اشكد فشلة مجنت مركزة جاوبته شكو بيه اتعلم حتى افيد جهالي بالمستقبل من نتطلك قصدي

نزار : منو كال اطلك اني تحملتج اهواية ترى لسانج قصري خلي بكد طولج ماكو طلاك أبقي هيجي روحي من وجهي هسة زعطوطة تدور زواج من هسة

عفرا : صار يومي أستقبال رسائل بعد ماعرفت يعرفني حتى من يخابر مااشيله صرت اخاف من شي اسمه حب أم حسن قبل فترة زارتني وجابتلي لبس جديد نزعتني الاسود غصب وياأمي فعلا حسيت الاسود جان حاجز بيني وبين واقعي اللي صرت بي اباوع على نفسي كبرت وراحت احلامي

شامل : ماما وين غراضي اللي جان بالصندوق كلما اشتاق لغسق اطلع غراضها اتأملها وأشيلها صارلي فترة ملتهي حسيت نفسي اريد اذكرها دورت ماكو امي مغيرة كل شي بحياتي غرفتي اكلي ماابقى بالشقة وحدي بس تعرفني موجود اهناك لو نص الليل تجي ترجعني للبيت غصب

أم شامل : انطيته لأختها كافي شامل لاترجع لنقطة البداية اللي راح راح

شامل : لعد منار مكالتلي يمها الغراض بارحة جنت طالع وياها

ام شامل : تدري ليش لان كالتلي تخلصي منها الأخت متريد ذكرياتها انت ليش خابص نفسك وبعدين هاي طلعاتكم سويه مو عاجبني لو تتزوجها لو تخليها تمشي بنصيبها

شامل : ههههه يعني اي وحدة اصادقها لازم اتزوجها ماما احنا اصدقاء وبس اني اعتبرها مثل نور اني طالع تردين شي

ام شامل : اي لاتروح للشقة تكلبها فاتحة لان الغراض راحت اعرفك مترتاح اللي تسوي بنفسك شي بالليل ارجع نام يمنا افتهمت بعد ماكو حرية اني مو مثل ابوك اطلع عينك رجلك تروح للسوالف المكسرة

عامر : رجعت لأهلي بعد غياب سنوات متحملت ابقى بعد اربد اشوف حياتي وحتى جهالي كيفو على الموضوع بعت الشقة وكلشي ماريد ارجع طلبت من امي تعزم عفرا على الغدا حتى اتعرف عليها صارلي اسبوع راجع كلشي متغير بالبلد والمنطقة البيت متغير اليوم عفرا راح تجي رحت ويا ابويه تسوكنا وقررت نشوي بالحديقة كلش يعجبني الشمس كتلني البرد لو ابقى طول عمري كدام الشمس مااشبع منه جهالي كوة أمي تدخلهم جوا بالمطبخ احضر ويا امي وابويه يلعب ويا الجهال انتظر وصولها على نار احس نفسي مراهق

عفرا : دخلت لبيت حسن شفت ابوه سلمت عليه وياه جهال اثنين كلش حلوين عزمتني ام حسن ولحت عليه اهواية طلع شاب اني بدون وعي ركضت عليه حسن هذا انت رجعت تراجعت خطوات لا هذا مو حسن عفرا نهايتج تخبلتي

عامر : جنت بقمة فرحي من سمعت صوتها طلعت أشوفها وتمنيت اكوللها جيتج من أخر الدنيا حتى أشوف صاحبة الصوت اللي أسرت كلبي بس مجرد ماكالت حسن حسيت نفسي سقطت من اعلى الجبل حتى مكدرت ارحب بيها رجعت للمطبخ اكمل تحضيرات اريد اغلس ومانطيها وجهه بس طعيني لا ارديا تروح عليها

عفرا : اشبيه هذا عصب من كلت حسن شايل خشمه وميحجي لعبت ويا الجهال شوية وكعدت احجي ويا ام حسن تسألني على اهلي واني بالي يم هذا الشخص اللي اسمه عامر صوته مو غريب وين سامعته يمكن يشبه صوت حسن

أمل :كاعدين ناكل واني بالي يم بيتنا والمشاكل اللي متخلص اسمع شامل وامجد يحجون على مشاكلهم

امجد : تعبت والله هاي مو حياة ولا عيشة محد يحس بيه

شامل : تعبان هلكد اكلت لو ماتعبان ونفسيتك صفر جنت تاكلني اني لو منك اتزوج واخذها للبيت واخلص من هالسالفة انت متريد تكعد راحة تدور على المتاعب برجليك مو بيدك

امل : كافي ذبيت الملعقة حرام عليكم انتو شنو 24 ساعة تحجون عن ألمكم واحزانكم انت يامجد اشكد بطران واصلا بحياتك مشايف شنو مشاكل وانت شامل اسوء منه شوف أمك وابوك شلونهم وانت شمسوي بنفسك وبيهم حرام عليك

امجد : سكتي مو ناقصني خبالاتج

شامل : اشرت لامجد يسكت صارلها فترة وضعها مو تمام ومتحجي شي

امل : ميت تتزوج وعندك مشكلة مو شنو مشكلتك وعيت على الدنيا من غير اب عشت ويا زوج ام خسيس يحاول يعتدي عليك باي طريقة امك تشوف وتغلس لو يبقوك من غير اكل ويخلوك تكعد تبيع بالشارع تتوسل الناس يشترون منك وتربي اخوانك امك تريد فلوس تجيبلها باي طريقة حتى لو تبيع نفسك المهم زوجها يرضى عليها عمرك تمنيت تنام للصبح مرتاح بدون مايلمسك ايادي قذرة كول

شامل : وكفت على حيلي شنو هالحجي امل لاتكونين

امل : اسكت شامل انت مو احسن منه ماتت خطيبتك قلبت الدنيا على راسك ضيعت نفسك واهلك وتاليها تطلع ويا اختها على يا ألم تحجي متكولي لو النسوان اللي عرفتهم بعدها لو الشرب لو شغلك اللي محد يدري بيها كل فترة متصاوب بمكان

امجد : امل على كيفج شبيج كعدي احجي براحة حسيت كلبي يطلع من مكانها وهي تنتحب وتحجي

أمل : انت مشكلتك امك النصابة اي بس من تكوللها اريد اتزوج توصل نفسها للموت مبقت قسم جروح حروق كسور قلبية بالمستشفى مضلت بس قسم الولادة مدخلتها وانت مصدك وخواتك عايشين همه وازواجهم احسن عيشة وانت اصلا مو رجال تفو عليك مستغلينك أبشع استغلال

امجد : عيب عليج امل شنو هالحجي

امل : جريت حقيبتي ماكو شي عيب شوف حياتي بعدين احجي عن الالم تدري وين وصلت بيهم يطردوني بالشارع حتى يبيعون البيت امي باعت بيت ابوية علمود زوجها امي استغلتني واني نايمة خلتني اوقع على تنازل منو بينا حياته جحيم طلعت من الشقة واني امشي اباوع على السما يارب اجبر بخاطري تعبت من كلشي

شامل : انطيني رقم اخوها بسرعة

امجد : وكت هذا هسة لاتسوي شي بنفسها هاك الرقم اني طالع وراها متصورتك اناني تتخلى عنها طلعت ادور عليها حضنتها بكل قوتي واني ابوس راسها اني اسف اني نذل وحقير محسيت بمعانتج وجبان اني جبان

امل : بجيت بحضن امجد أني انتهيت حياتي انتهت اهلي ضدي اخواني يعايروني ويحجون على شرفي

امجد : رفعي راسج باوعيلي تدرين ليش اني ماكدر اتزوج واخلي امي حجة أحبج امل من واحنا صغار

أمل : حيوان وصلت بيك الاستهتار تلعب بمشاعري شنو حب تفو وخر مني اروح ياربي شنو يصير مكدرت اروح للمستشفى رجعت للبيت ودخلت للعيادة وبديت اشتغل ومن اخذ الفلوس حتى لو الف دينار اذبه بوجه رضا حتى يسكت ويعوفني بحالي

أمجد : يابرودك يااخي صارلي ساعة احجي وياك شنسوي هسة الكي حل لهالمسكينة

شامل : حسيت أمجد يحب امل بس ردت اتأكد جاوبته حلها موجود صديقي طلبها مني واني وافقت تتزوج وتخلص

امجد : نعم تريد ترميها وتخلص منها متوقعت توصل لهالدرجة واني مستحيل اقبل اوكف بوجهك

شامل : مرة ثانية اذا فكرت تحضنها وتبوس راسها اكسرك افتهمت شفتك يااخي تريدها تعال بوس ايدي حتى ارضى عليك😠😠😠

امجد : 😨😨ها مجان قصدي شي انت تعرفني وبعدين لاتغير السالفة شنو راح تسوي ويا اخوها

شامل : افتح الباب واكعد عاقل لاتكول ولا كلمة واذا متكدر تلزم نفسك روح سلمت على اخوها شوية واذبحه حجيت وياه تدري صار فترة مو عاجبني شغلك راح اسحب السيارة منك

لا يمعود ابوس ايدك اني اعيل اهلي عليها اني شمسوي والله ادعيلك ليل نهار

شامل : واختك امل شلون عايشة وياكم مرتاحة لو لا وانت تداريها لو مثل ابوك

شبيها امل مشتكية من شي شايليها على عينه تروح وتجي بكيفها اطلب مني اي شي بس لاتاخذ السيارة مني

شامل : راح أنطيك فلوس والسيارة تبقى يمك بس بشرط الليلة اجي لبيتكم وراح اربي ابوك من جديد واياني واياك تفتح حلكك بكلمة واختك تعتذر منها شتكول موافق لو اجيك بغير طريقة

وداعتك ماعليه بيه شتسوي براحتك بس لاتاخذ السيارة البيت كدامك يمتى ماتريد تجي براحتك

ميرا : حياة الكلية تختلف عن المدرسة كلش حلوة وخصوصا بس بنات ماخذة راحتي على الاخر البس اللي يعجبني يوميا شكل اتفنن ومن اطلع البس عباية وربطة بسيطة اكوم ساعة 6 الصبح ادخل الحمام وأجفف شعري اخلي مكياج وطلاء اظافر يوميا بالليل أحضر ملابسي وشعري اصلا سرح اسويله شسوار بسيط

فرح : هاج فلوس شهريتج يكفيج لو لا والله اللي يشوفج عبالج رايحة عرس مو كلية اخ لو ماعمي
مااخليج تطلعين هيجي

ميرا : بس باقي اشتري تليفون وارتاح راح اقنعج بس صبري عليه

فرح : اي تعودتي انتي واختج من تردون شي مااقبل بيها ركض يم عمي تعرفون ماكدر احجي شي من هو يقرر ايام زمان زينك ياجبار تعال شوف حفيداتك شيسوون

عفرا : تعالي فرح اريدج بموضوع بغرفتي ماشالله قمر ميرا الله يحفظج من كل عين

فرح : شكو لاتكولين نفس السالفة مال مسجات

عفرا : أي بس الرقم متغير يعني الشخص موجود اهنا راسي راح ينفجر عبالك عايش ويايه يعرف كلشي عني

فرح : بس شلون اشعار وقصائد يرسل مبين شخص متعلم والله كلش حلوات بس جيب اللي تحس

عفرا : هسة جايبتج تفكرين ويايه لو تخربيني واني من غير شي ضعيفة وعندي نقص حنان ههههه

ميرا : دخلت للكلية نزعت العباية ورتبت شعري على السريع المحاظرات احسها حلوة مو مملة وكالعادة بس سلام على البنات مااختلط لو اروح للكافتريا اكعد اشرب نسكافيه واتأمل البنات واسمع السوالف مرات اضحك على سوالفهم أتمنى اتخرج بسرعة واصير شي بالمجتمع

مرمر : دخلت لغرفة نزار مادري ليش رجليه تاخذني لغرفته كل صبح اكوم من وكت واروح اشوف كلشي مرتب مرات أتمنى يبقى زوجي من اسمع سوالف المتزوجين اللي زوجها مو زين وياها لو يضربها اتذكره هو شلون جان ويا سمر ومرات اريد حريتي واتزوج ويصير عندي بيت وجهال اعرف مراح يكون زواجنا طبيعي طول ماهو متعلق بسمر وميشوف غيرها صرت اتمنى يجي بسرعة اشتاقله من يروح

فرح : حامد حبيبي ممكن تحجي ويا اخوك يخلص موضوع مرمر خلص صارت 19 سنة ماريد البنية تتعلق بيه صارلها فترة تسأل امك عليه وتدخل غرفته اشوفها ومن يجي تروح ترتب نفسها حتى تاخذ من غراض ميرا حتى تبين نفسها كدامه اهواية انبهها متسمع مني

حامد : حبيبتي ميصير غير اللي تردينه احجي وياه واشوف شنو قرر اهواية يجوها خطابة حرام نوكف بطريقها وخصوصا هي متريد ترجع لدراستها

امل : نمت متأخرة تعبت من الوكفة على رجليه طول اليوم بالمستشفى سمعت صوت هوسة وصياح امي كمت اشوف شكو شامل شتسوي اهنا وبنص الليل

رضا : هذا العار جاي بوسط بيتي عباله مثل قبل يهددني منو حاسب نفسك هذا ولدي هسة يسويك نصين

شامل : قررت اروح لرضا واربيه خابرت ساعة 2 بالليل على ابنه فتحلي الباب وطلعت رضا من غرفة نومه وجريته للصالة وينه اللي يسويني نصين تقصد اللي فتحلي بابا غرفتك حتى اطلعك منها أضربك اهنا لو كدام باب بيتكم شتكول

رضا : امل اتوسل بيج بنتي ساعديني والله راح اتوب

شامل : لاتبجين اشرت على ام امل اشكد ساعدتج علمود تدارين أمل هاي نهايتها هذا العار يحاول يعتدي على بنتج وانتي ساكته ليش حرام عليج كلمة ام جنت طالب اجمع مصروفي اخليها بايدج علمودها كبرت وبوقت انكساري موكفت مساعدتي الكم خابرت جماعتي يجون ياخذون رضا رغم توسولاته هو وام امل مجاوبتهم روحي امل جيبي غراضج الضرورية راح اخذج ويايه وتنسين هالبيت وانتي ياام امل تنسين امل ومتقتربين منها اذا ردتي زوجج يرجعلج

ام امل : ابني رجع رضا واخذ امل ماعلينا بيها عندي كومة جهال يحتاجون ابوهم

شامل : امل تقرر يمتى ارجع رضا وهسة مع السلامة وهاك فلوسك يا ابن رضا

سمر : ماما متغير اكولج ميفيد ويا اي شي مو مثل قبل جبت العنوان خلي نروح اليوم مادام هو هسة مسافر

ام سمر : كومي لبسي عباية ونقاب حتى محد يتعرف علينا متأكدة الشيخ مضبوط لاتورطينا

سمر : اي صديقاتي يروحون يمه كلش زين بس ياخذ فلوس اهواية بعت شوية من ذهبي واذا احتاجينا اكثر ابيع بعد بس المهم يصير نزار بيدي ويرجع مثل قبل اريده يكرهه عائلته يكون اليه وحدي

نزار : جنت كاعد ويا اهلي نضحك وناكل خابروني من مركز الشرطة استغربت عبالي علمود المختبر فاتحها جديد سمعت صوت سمر وهي تبجي والضابط يصيح عليها يسكتها ياريتني ميت ولا اسمع مرتي محجوزة بنفس اللحظة جمعت غراضي ورجعت.