علمني كيف الحب يداوي الفصل الثاني وثلاثون 32 - بقلم Chrakirkuki

#علمني_كيف_الحب_يداوي 32

حامد : حبيبتي روحي كولي لميرا تروح يم الدكتور ينتظرها اليوم لازم تروح وحدها أكدلي على هالشي

فرح : زين ليش وحدها اخاف مترضى تروح متعرفها وخصوصا هسة رجعنا من يم عفرا تكول تعبانة

حامد : الدكتور يفهم اكثر من عدنا حتى تكدر تتجاوز اللي صار وتعتمد على نفسها .

هاي اخرتها شامل افندي كذبت على الرجال علمودك انشالله يطلع براسك خير وتساعدها مثل ماتكول والله استحي من نفسي

شامل : هههههه كذبة بيضة دكتورنا متأثر عادي كتلك تهمني وانت تعرفني صدكني اني بنفسي ماعرف شريد منها بس اريد اشوفها واساعدها

الدكتور : هي شوية بدت تتقبل حالتها وتحجي وتسمع كلامي الله يستر لاتخرب اللي سويناه ديربالك تحجي حبيات وياها راح تنتكس حالتها اكثر ولو وجهك مو مال هالسوالف بس ننتظر

ميرا : شنو اروح وحدي لا ماريد خليها غير يوم لو تعالي انتي

فرح : ماكدر اعوف الجهال وحدهم ومرمر طالعة ويا خالتي وحامد مريض السايق يوصلج للعيادة ويرجعج الدكتورة أكد على حضورج الجلسة

ميرا : محبيت اتناقش وياها هاهيه ميرا اوكفي على رجلج كافي تعتمدين على غيرج كلهم ضاجو وملو مني ويعيشون حياتهم بدلت ملابسي وامسح دموعي صرت عالة عليهم ركبت السيارة ويا السايق رجال جبير كلش احترمه وانقهر عليه بهالعمر ويشتغل وصلت اريد انزل ماكدر احس بخوف بقيت بالسيارة 10 دقايق افتح الباب وارجع اسده

السايق : عمو بيج شي تحبين انزل وياج لو ارجعج للبيت

ميرا : مسحت دموعي لا عمو راح انزل بس ابقى بمكانك لاتروح شوية وارجعلك باوعت على تليفوني تاكدت يشتغل باوعت على المحلات الموجودة بصف العمارة مطاعم وكوفي شوب ماكو شي يخوف الناس تروح تجي عادي صعدت وصلت للشقة الموجودة بيها العيادة جم واحد موجود شايفتهم من قبل دخلت يمه سلمت

الدكتور : شلونج اليوم ميرا تحبين انتي تحجيلي موضوع لو اني اسئلج وانتي تجاوبيني بس قبلها جيتي وحدج ويا السايق لو ويا اخ حامد

ميرا : لا وحدي انت بكيفك اسئلني شوية ارتاحيت

الدكتور: عفية عليج ميرا هاي اول خطوة نجحتي بيها باقي اهم شي تثقين بالناس وتكونين صداقات مثل ماعلمتج المرة الماضية

ميرا : هاي صعب بس راح احاول دكتور اني اشكرك ساعدتني اهواية

الدكتور : زين ميرا شنو رأيج بالحب والزواج اريد اتناقش وياج هالموضوع اعتبريني مموجود ولا تخجلين اهم شي من تفكرين تفكيرج لازم ايجابي يكون

ميرا : حالي حال كل بنية تحلم ببيت واسرة خصوصا اني واختي تيتمنا واحنا صغار نسينا طعم حضن الام والاب حبيت اعوض نفسي من اتزوج بجهالي وحلمت بزوج يحبني ويقدرني بيه مواصفات بابا اللي اسمعه من اهلي واصحابه بس

الدكتور : بس شنو ميرا لاتقتلين احلامج ماكو بس استمري وراح تحقيقها لاتوكفيها على ماضي انتي مالج ذنب بي زين

ميرا : بقيت يمه فترة وطلعت من عنده ردت اصعد للمصعد شفت شامل بوجهي اني تخبلت اكيد هذا يراقبني ومتقصد يطلعلي بكل مكان محجيت شي ردت اروح وكف كدامي

شامل : شلونج ميرا

ميرا : اذا مااشوفك اصير بخير متستحي تراقبني بكل مكان اروحله حضرتك موجود ساعدتني شكرا الك ماريد اشوفك بكلبي اكول الله عليك لاتطلع كدامي راح اضعف وانت متزوج ميصير

شامل : اني مااراقبج عزيزتي عندي موعد ويا الدكتور اذا يزعجج احجي وياج بعد ماسلم عليج استغربت من وقاحتها اشكد ندمت على تسرعي

ميرا : متحملت كلامه بجيت مو وكتك والله انت وين اني وين اول مرة اجرح انسان بحياتي ومنو هو اللي صار بكل احلامي

شامل : جريتها من ايدها لاتبجين اوعدج مااضايقج بعد

ميرا : لا اعتذر ماقصد شي عن أذنك واني اسفة
طلعت للسيارة واتذكر هو شلون يحجي بأدب واني شلون جنت رفعت ايدي امسح دموعي شميت عطر غريب اي هذا عطره الله اشكد طيب انشغلت ونسيت اللي صار من رجعت واشوف مرمر تاكل وتحجي ويا عمتي من شافوني يباوعون عليه فاتحين عينهم

مرمر : ولج شنو هالفلم اللي صاير بوجهج عمتي هاي ميرا لو باندا

فرح : ليش جنتي تبجين روحي غسلي وجههج وتعالي كعدي ويانه

ميرا : أستغربت منهم يضحكون عليه رحت للمغاسل شفت وجهي لا الكحل والمسكارا نازلة وصدك صايرة باندا يعني خوفته بشكلي هم فتحت المي اغسل ايدي تذكرت عطره قفلت المي وجريت كلينس مسحته رحت للصالة كعدت سويت نفسي مابيه شي بين فترة وفترة اشم ايدي فكرت راح تروح شسوي لازم اشتري منه عمتي خلي نروح للسوك عفية هسة الله يخليج

فرح : زين حبيبتي علمود هالضحكة اروح وياج لأخر الدنيا صارلي فترة انتظر تطلبين مني هالشي كومي نروح

مرمر : تعالي ولج شعندج اليوم وضعج مو طبيعي لو تخبلتي رسمي لو رجعتي ميرا العاقلة روحي سويلي عصير وتعالي مشتهية عصير

ميرا : لا طبعا روحي كولي لنزار اني شعليه مااوسخ ايدي

مرمر : اي صح شبيج لازمة ايدج عبالج معوقه متستعمليها

ميرا : شفته مرمر

مرمر : باوعت منا منا فرح ماكو منو شفتي

ميرا : شامل بس جنت غبية حجيت عليه ماعرف شكول

مرمر : ههههههه وايدج شدخله بالموضوع اكصها الج اذا ملزم ايدج اللي مخبيته بحضنج وشنو حجيتي وياه اصلا انتي هالفترة متغيرة لسانج طولان وغير مؤدبة تشبهين وحدة زمان جنت اعرفها جان اسمها مرمر الوكيحة بس تزوجت واحد حلو اسمه نزار صارت عاقلة

ميرا : متجوزين من سوالفج ابد احبه والله العظيم احبه شسوي حتى مااحبه كوليلي على طريقة تخليني اكرهه مثل غيره من الرياجيل ماعرف شنو صخمني احب واني ناقصة شمي ايدي بجنن عطره مو

مرمر : خلي اكوم اروح لرجلي قبل لاتطيري عقلي الباقي وياج احبه وعطره واريد اكرهه الحمدالله على نعمة العقل واحد ميعرف قيمته الا من يشوف امثالج وهو عطره مال حاجة بمية

ميرا : ماكو راح تجين ويانه لعد تردين اروح لمحل عطور رجالي حتى فرح تطير راسي على الاساس انتي تاخذين هدية لنزار

امل : رجعت تعبانة من الدوام وبطني كدامي دخلت للبيت المطبخ هوسة والمواعين الوسخة متروسة على المغسلة واني الصبح رتبت المطبخ وطلعت سمعت اصواتهم الخاتونة عمتي عازمتهم وتنتظرني ارجع انظف المزبلة حتى اكل ممبقيلي سديت باب المطبخ بهدوء اني الج سديت فتحة السنك وفتحت المي عليها وطلعت من الباب الرئيسي اروح لبيت شامل ضحكت على افكاري الجهنمية هسة المطبخ يغرك ويوصل المي للصالة بدل مايغسلون المواعين لازم يغسلون كل البيت خابرت امجد واستأذنت منه محجيتله شي لان دايما يكول طلعوني من مشاكلكم

نور : هلا ومية غلا الله جابج حبي وداعتي كولي لشامل ياخذنا للمول اريد اروح اتعشى بالمطعم

امل : دوخري متت من التعب وميته من الجوع يامول يابطيخ يادوب اكل شي وانام تعبانة هسة رجعت من المستشفى ماما وينها

نور : ويا العصفور مالتها طالعين خو مامثلج عايفج وباقي بالمحل يتعامل ويا النسوان

شامل : اشكد احس نفسي سخيف وعقلي صغيري من كل عقلي ادور حبيات بعد المصايب اللي وكعت على راسي بس مادري ليش من اشوفها انسى نفسى وتعجبني طلعي من راسي ميرا اني وياج مانلتقي ابد سمعت صوت باب غرفتي شفت امل ونور داخلين عليه الله يستر من هالدخلة الشيطانية

امل : هذا ابني مشتاقلك ويحب يسلم عليك ويكولك خالو حبيبي طلع امي وخالتي الخبلة لمطعم يرضيك من الصبح مماكلة شي تقبلها اختك حامل وجوعانة

نور : اي يقبل ليش ميقبل المهم ميطلعج روحي سويلج لفة جبن مو كلتلج هسة يفشلج ومياخذج

شامل : هههههه انتو شنو والله الشيطان راح ياخذ دروس من عدكم خلي ابدل ملابسي واخذكم امري لله

نور : لا شنو تغير هسة لازم ننتظرك ساعة حتى تبدل اصلا لبسك كلش حلو ويخبل

شامل : لا كرهته راح ارمي بالزبالة لو احركه احسن نحس تذكرني باشياء مو حلوة

نور : احنا ننتظرك بالسيارة تدرين اخوج تخبل هو لبسه جديد وقبل ساعتين لابسه شبسرعة صار عنده ذكريات بي والله حايرة شلون اعرف السالفة

امل : لاتدخلين بكلبي اكيد فشل لقائه بميرا خابرت امجد حتى نور تسكت ومتسألني اخاف
لساني تزل كدامها وتسويها سالفة وشامل يزعل مني

فرح : دوختوني والجهال ميتين من الجوع انتي مرمر خاتون شمعرفج بالعطور لزكتي بيها تاخذيه هدية لنزار اخذي غير شي اني اروح فوك جهة المطاعم وانتو دورو براحتكم

مرمر : ارتاحيتي ست ميرا اني مرمر انهان ويكولون عليه ماعرف شي دخت من الروايح اللي تلعب النفس اللي ببطني هم داخ

ميرا : كتلج نروح لمحلات الماركات جلبتي بهالعطور الرخيصة تعالي نروح هذاك المحل

مرمر : اذا جان من العطور الغالية مثل ماتكولين والله اشتريها على حسابي واذا لا افضحج كدام فرح واكوللها ميرا تكره الرياجيل بس تحب عطرهم شتكولين

ميرا : دخلنا للمحل جربنا اكثر من عطر مجان موجود مرمر جرت ايدي كالت للولد شم هذا نريد منه شوية واضربها الولد ضحك علينا وانطاني باوعت لمرمر يالله دفعي فلوسها

مرمر : 😲😲الله ياخذك شامل يعني شبيها العطور الرخيصة تبقى وثابتة يالله على هالخسارة ينكص لساني مرة ثانية اذا تحديت وياج خسرتوني

شامل : كعدنا ويا أمجد نحجي بامور اهواية وامل واختي يفترون بالمول بالي مو يمه كل ماتذكر الموقف اللي خليت نفسي بيه انقهر

امجد : وين صرت المن احجي هاي مو ميرا كاعدة بذاك الطرف مكملت كلامي شامل فز يدور بعيونه عليها الاخ واكع ومسوي نفسه مو يمها

ميرا : صارت عيوني بعيون شامل نزلت راسي صدفة هاي لو شنو

مرمر : مال اروح اضربه بالعطر على راسه شتكولين اطلع قهري عليه

فرح : اشبيكم تبسبسون وتباوعون منا ومناك نزلو عيونكم لا اجركم جر للبيت زعاطيط اخر زمن

شامل : كوم امجد نطلع من هالمكان سويت نفسي مو شايفها

ميرا : رجعت للبيت خليت العطر بدولابي ورشيت شوية على ايدي اشكد حلو ويسحر بس ليش سوى هالحركة كأنه مشايفني رجعت لواقعي اصحي ميرا انتي وهو بعيدين على بعض ومتزوج

عفرا : ايامي كلها سعادة عمري متصورت راح اعيش واجرب الحب مرة ثانية وعامر واهله وجهاله كل واحد بيهم ينقلي فرحة بحياتي ناقصني طفل منه وتكتمل سعادتي اخاف يأثر عمري على الخلفة ولو جهاله يصيحولي ماما واني اعتبرهم جهالي واحبهم بس أحب اربي طفل عامر بداخلي

عامر : حبي هم زين منايمة تعالي جبتلج مفاجأة

عفرا : شنو المناسبة

عامر : بمناسبة عيد ميلاد حبنا هذا اول سنه احنا سوية من اليوم اللي كلتيلي احبك عامر شوفي الهدية بالباب

عفرا : طلعت شفت سيارة حمرة كلش حلوة والمفاتيح بايده لايكون مشتريلي سيارة على صوت صياحنا طلعو اهله خطية جانو نايمين استحيت من نفسي جنت بحض عامر وابوه شافنا ضربته على صدره دايما تفشلني وياهم احبك يااحلى شي بالكون الله لايحرمني منك

ميرا : مرت شهور مشفت شامل بيها شوية واتخبل عليه كلش مشتاقتله كملت علاجي وقررت ارجع اداوم بالكلية بس مو نفسها القديمة وحدة ثانية ومختلطة لازم اتغلب على نفسي واثبت نفسي من جديد جنت كاعدة العب ويا الجهال فرح وخالتي مدينة بالمطبخ حامد مسوي عزيمة لأصدقائه دخلت مرمر وهي تركض
وكفت خايفة عبالي بيها شي شكو

مرمر : كومي خايبة لغرفتج عندي حجي وياج مو كدام هذولة اشرت على الجهال غلست تقربت منها شامل موجود اهنا حامد عازمه

ميرا : بدون وعي ركضت لغرفتي بقيت واكفة ساعة انتظرت يطلع من الباب واشوفه

شامل : ابتعدت عن ميرا والتهيت بشغلي من جديد استغربت حامد خابرني وعزمني بالبداية رفضت بس اصر عليه رحت لبيتهم جان موجودين اهواية رياجيل اقاربهم واصدقائهم تعرفت عليهم من طلعت ودعني نزار حسيت بحركة بالطابق الثاني نزار انشغل رفعت راسي شفت ميرا من حست بيه سدت الستارة ركبتي سيارتي واني اضحك على تصرفها.

أمل : جبت بنية كلش تعبت بالولادة واتمنيت امي يمي ام شامل مقصرت ويايه حتى اخذتني اكمل فترة نفاسي ببيتهم ام امجد كلش مو زينة ويايه وتكهرني دايما تحجي عليه وعلى امي مرات اجاوبها مااتحمل مرات اغلس واكثر شي تكولي ابني تزوجج علمود شامل ولا انتي محد ياخذج

امجد : ام نور شلونها اليوم يمتى ناوية ترجعين للبيت البيت ظلمة من دونج لو يحن شامل عليه ويقبل ابقى يمكم صاير نذل ساعة 9 بالليل يطردني أشوف بيه يوم

شامل : تحجي عليه مو ماعدنا نسيب ينام ببيتنا شفت اهلي كلهم كاعدين كتلهم عندي خبر اكيد تفرحكم اني قررت اتزوج

ام شامل : صدك الحمدالله ومنو هي البنية نعرفها

شامل : اي تقريبا تعرفوها كلكم ميرا

ام شامل : شنو تخبلت اكيد مستحيل اقبل مادري شبيك انت تروح للمتاعب برجليك ماقبل وانسى هالسالفة راح اسوي نفسي مسامعة شي منك

ابو شامل : شفت شامل مستغرب من امه ومبين يريدها كعدي ام شامل البنية مابيها شي واهلها ناس معروفين واللي صار هي مالها دخل بيه

ام شامل : لاتصير وياه حبيبي وتشجعه الناس شتكول علينا وانت شامل افندي شلون تكدر تعاشرها مو حضرتك وديتها بنفسك للمستشفى وحتى ملابس مو عليها وانتي امل جنتي تعرفين اخوج ناوي على هالشي وساكته وتعرفين حالة البنية

أمل : الفرحة انقلبت موقفي جان صعب ام شامل مو راضية بميرا جاوبتها ماما هي ماالها ذنب وشامل يحبها واحنا سنين ننتظر هالشي الله يخليج النا لاتخربين فرحتنا

ام شامل : اللهم لاشماته والله مو قصدي شي مو زين عليها هاي اعجاب وتنتهي أبني حرام بعدين تمل منها اكو بنات اهواية بس انت اشر عليهم واني اروح اخطبها الك لو بنت منو ماتكون

شامل : اني فكرت بيها اهواية ومتهمني اللي راح صار سنة اراقبها مشفت شي مو زين عليها من الاخير كلبي رايدها ماما لاتعترضين ادعيلي الله يوفقني تعبت بحياتي محد يحس بيه

ابو شامل : يمتى ماتريد نروح نخطبها الك والف مبروك مقدما

ام شامل : باوعت عليهم كلهم موافقين ماعدايه ميفهمون عليه اني ام واحس اكثر منهم مبروك ابني عفتهم ورحت لغرفتي ادعيله من كل كلبي الله يوفقه

شامل : بقيت ويا ابويه لوحدنا بابا اكو شي ثاني مراح ناخذ نسوان ويانه اني وانت وامجد نروح ماريدها تعرف منو خطبها بالضبط لان راح ترفض من تعرف اني العريس ونفس الشي اتفق ويا اهلها لحد مانتزوج

ابو شامل : والله ماعرف شباب هالوكت شلون يفكرون الله كريم ابني اللي تشوفه

ميرا: منو هذا العريس منو كال اني اريد اتزوج

حامد : انتي ماعندج ثقة بيه مراح نلكي احسن منه ولاتتحججين بوضعج هو يعرف وراضي وانسان يخاف الله اني اكدر اطمن عليج وياه لاتكسرين كلمتي ميرا انتي مو بنت طلعت انتي بنتي هم كبرتي على ايدي واعرف مصلحتج

ميرا : بكل الاحوال اني مجبورة اوافق من هسة اكوللكم لااريد حفلة ولا اريد اشوف شكله ولا اي شي حتى صوته ماريد اسمعه لحد منتزوج