رواية علي الفصل الثامن 8 - بقلم أم احمد

#علي _ام احمد
الثامن _ حقيقة
صارت كله مسؤليه براسي مرض والدي كسرني بس مع هذا استمريت بالعمل ومهتميت لحجي الناس ظليت اراجع بالمستشفيات بوالدي من دكتور لدكتور وحطيت اله ممرضه خاصه ردته يگوم عل حيله اما امي فخواتي يدارون بيها الكل لاموني لاني گتلت اختي وسببت هاي مأساة الاهلي وفضيحه يمكن تفكيرهم صحيح يعني اني لو بس ضاربها ومكاتله جان زوجته لواحد من ولد عمي ومجان خواتي كبار اطلگوا ولا والدي اتمرض ولاامي هم تمرضت والفضيحه جان لميتها تصرفي جان طائش جدا ومرت ايام واني بين والدي مريض وشغل جنت اريده يتحسن بساع ويكوم عل حيل تمنيت عندي اخ يساندي ويعيني جانت وجدان نعم اخت بس وداد جانت صامته اغلب الوقت تحملني سبب مرض ابويه وامي وطلاكها اتحولت العيش وياهم حتى اكون قريب عل والدي وايضا اراقب خواتي فثقتي معدومه بكل انثى وبيوم جنا نتغده واشتد كلام بيني وبين امي فهيه رغم مرضها ضلت حاقده عليه وتحملني مسؤليه الي صار زهكت بيهم وظليت اغلط عليهم وفجاة بدون سابق انذار اختي وداد گالت شي هزني هز كالت انت حقود متنلام ابن العجم  كلامها وقع عليه مثل صاعقه ظلت امي متبلعمه اما وجدان مثل الي فزت من كلام وداد وظلت تلغمط الها بس اني حسيت اكو شي مقصود بالموضوع وظلت تزن بااذاني كلمه مكدرت اتناساها ابد حتى من نمت حلمت بااختي تردده عل مسامعي بهاي اثناء حاولت ويه ابن عمي الي هو زوج وداد ان اصالحهم لان هو ابن عمي وامون عليه وأيضا لخاطر اولادهم الصغار فسافرت لااربيل حتى احاول وياهم اكثر من مره حجيت ويه عمي بس جانوا قافلين عل موضوع حسيت بخيبه امل جبيره كلش وقبل مااسافر عمي عرض عليه ارجع لخانقين او اربيل واتحول من منطقتتا حتى فضيحه تنسي مقبلت شلون اعوف بغداد اني اتعلمت عل هاي حياتي ورجعت لبغداد واني مثقل بالهموم حسيت بداخلي ميت وعجوز حتى شرب قللت من كثر هموم وره ايام اتوفى والدي جانت اتعس  شي مر بحياتي كلها انهاريت كلش الشخص الوحيد الي احبه مات وعافني حسيت بذنب شديد وره ايام العزاء واجتماع اعمامي واحد من ولد عمي ظل يتشمت باالي صار بيه ويحملني مسؤليه الي صار بيهم
مكدرت اتحمل اكثر هجمت عليه وشبعته بوكسات وره مفاككونا ظل يسب بيه وكلي هو انت هم صدكت  روحك انت ابن جلال روح شوف امك سحاره مين جابتك  كلام وقع عليه مثل صاعقه مااعرف شلون ربطته بكلام وداد حسيت بركان بداخلي ومتحملت هجمت عليه دميته وكوه خلصوه من ايدي عل اثره اعمامي كلهم قاطعوني وراحوا لديارهم اني ظليت بشك وريبه شنو اني معقوله اني ابن حرام  داخلي كله اتحطم اكيد اني ابن حرام ودليل كره امي الي وحجي وداد صح يجوز امي غلطانه ويه واحد ايراني مر عليه اسبوع حسيته  سنه كبرت بيه وشلت هموم شلون اتاكد من موضوع ممعقوله امي راح تعترف ان هيه غلطت وهيه لتروح للسحارين اكيد تغلط وهاي اختي هم غلطت تفكير كتلني مكدرت اواجه امي بالموضوع بس جنت اغلب الوكت ساكت او اقضيه بالمحل
جان اكو رجال اكبر من ابويه يبيع جاي وقديم بالمنطقه ويعرف كل المنطقه واخباره يسموه ابو جبار وبذاك اليوم صحته ودخلته للمكتب الرجال اتفاجا من موقفي وبديت اساله
ابو جبار اريد اسالك كم سؤال اذا ممكن
اي وليدي اسال
بسنه 80جان اكو ايرانين اهنا
اووو هوايه بس امن كلهم سفرهم
هااا يعني كلهم طلعوا
اي مبقوا احد
زين والدي جان اكو احد يشتغل عنده ايراني 
لا ياابني محد يشغلهم لان الي يستر عليهم ياذوه
زين عمي ابو جبار تكدر تروح
وراح الرجال واني الشكوك الي بداخلي زادت واتفرعنت اكثر ماكو غيرها امي هيه عدها الجواب بذيج الليله شربت هوايه وكعدت بغرفتي افكر وافكر حسيت بنار بصدري كل اعمال امي تاكد سبب كرها الي هو اني ابن حرام وغلطه بالنسبه الها مكدرت اتحمل ورحت عليها لغرفتها شفت وجدان نايمه يمها كعدتهم بصياح وطلبت من وجدان تعوفنه ظلت امي ساكت متحجي شي وكتله 
باعي اسالج سؤال وتجاوبين عليه بصدق ترى والله اذا كذبتي اذبج بالشارع
عدلت كعدته وكالت
ولك شبيك شارب وجاي هاد عليه سرسري
اي سرسري معرفتي تربيني ام سحوره 
انجب ولك حقير
شوفي اني اعرف كل دوربج بس هسه اريدج تحجين الصدك
وشتريد استاذ علي مني بنص الليل
اني ابن منو
شنو ولك
لج احجي والحمزه اجيب المسدس واكتلج
ولك اتخبلت ضربك الحمزه  مين جبت هل حجي
بالفاتحه مال ابويه كالوها بوجهي
اني ابن ولد حرام
انت ابن جلال
جذابه تصرفاتج ويايه تدل عل هذا الشي
والحسين انت ابن جلال شبيك بابه منوكلك انت ابن حرام هو ابن حرام
شالج رب الحسين  وخلصني منج راح اسوي تحليل مال اثبات النسب بس اعرفي اذا طلعت اني مو ابن ابويه محد يرحمج مني اكتلج باايدي
امشي اطلع بره ناقص غيره اني اشرف منك ومن عشيرتك
نشوف سروه خانم ام سحوره اني اعلمج
يلا اطلع بره حقير (   ) هيج من عشيرتك
طالع بس نتلاقى
وره مطلعت حسيت راسي يريد ينفجر من القهر معقوله اني مو ابن جلال ومن الصبح رحت للمستشفى  اسوي تحليل DNA وكملت كلشي  وطلعت گالوا يطول فتره اني بهاي الفتره اني شك كاتلني مرت عليه ايام بس الله يعلم بيها جنت من ادخل للبيت الكل تنهزم حتى  بالمحل محد يحجي ويايه  وره الفتره المطلوبه رحت للمستشفى  حتى استلم النتيجه جانت رجليه متشيلني وگلبي يريد يوكف من خوف وشويه صاحو اسمي ومن انطيته للدكتور وقرا وكلي تتطابق سجدت راسا وبجيت من فرحه يمكن هموم بكد الجبال انزاحت عني اخذت النتيجه ورحت للمحل بذاك اليوم وزعت فلوس عل فقراء وذبحت الذبايح جان داخلي يعلم اني ماامر بيه من مصايب من فضيحة اختي وقتله وموت ابي ومرض امي وشكي باامي ماهيه الا عقوبه الي من رب العالمين عل اسهتاري بااعراض الناس 
بس ظل بالي ليش امي هيج تعاملني وليش تكرهني واني ابنه الوحيد وره احداث 2003 وسقوط بغداد ونظام السابق تغيرت الحياة هوايه ودخل النه الستلايت واجهزه الحديثه بكل انواعها وتغيرت التجارة وصار العراق منفتح اكثر تطورت تجارتي اكثر واكثر وصرت مشهور
صح الذيب الي بداخلي نام وقل تعرضي للنساء او اني صرت وحيد تماما ماعندي احد احجي وياه حتى وجدان من عرفت اني شككت باامي تركتني وابتعدت عني
وباانفتاح السفر بديت اسافر لتركيا لاايران لااردن سوريا رغم كل مقومات الحياة عندي بس اني وحيد وداخلي فراغ مقيت
من صارت اوضاع مو زينه بالعراق ماهمني موضوع كلما تتازم اسافر واوسع عملي اكثر طبعا بسوريا اكثر اتوسع عملي بحكم انفتاحها مع حدود العراق وصارت سوريا عندي مثل باب الشرجي
اقضي وقتي بيها  حلو مناظرها ومقاهي بيها حلو وجنت كل اكل بالمطاعم حبيت سوريا هوايه وبيوم اني كاعد وطلبت المينيو واجت الي ابنيه حلوه كلش يطلع عمرها 18او اكثر وابتسامه عل شفايفها تخبل مااعرف شنو الي جذبني الها يمكن عيونها انطتني القائمه ظليت اتفرج عليها واهنا حسيت اكو شي بداخلي كعد بعد سبات طويل كعد بشوفة هاي ابنيه الحلوه  اي الذيب الي بداخلي نفض التراب عنه وصحى من سباته

تحياتي الكم_ام احمد