رواية عندما تزهر الاشواك الفصل التاسع 9 - بقلم ورود الخالدي

#عندماتزهرالاشواك

#الكاتبةورودالخالدي

البارت9

بقيت شهرين بالسجن امي تزوني هي وحمودي..وخوالي مرات يجون..اسألها على علاوي تكولي سمنان وكبران وميوكع من ايد سارة..وتموت عليه..كل شويه تلبسه شكل وعايفة الدنيا ومتفرغة بس لهالطفل فرحت حسيت اكو امل..مادام حبت ابني..اكيد كلبها راح يلين وتفكر بيه بالمستقبل..طلبت من امي اجيبلي صورة لعلاوي..وصورة لسارة وفعلا جابتلي صورهم للسجن..بقن عندي كل يوم اطلعهن اتأملهن وارجع اضمهن ..بجيبي..والمحامي زارني للسجن وفهمني انه موضوع طلاك سوزان وحضانه الطفل اجلته المحكمة الى ان اخلص محكوميتي واطلع..بس اني هم راجعت نفسي كلت حرام احرمها من ابنها مهما يكون..واذا طلعت ارجعها..ع مود ابنها...ومرت الايام والاشهر..وبعد شهر وتخلص مدة السجن تفاجأت ابو سوزان جاي يزورني..فكرت يمكن جاي يعتذر..اذا جاي يعتذر ممكن ارجعها من اطلع ع مود علاوي بس انصدمت من سمعته يكول:

اتمنه السجن رباك زين مهيمن..ابن الفكر..تطلع من السجن ورقة طلاك المحكمة توصلنا..لان بتي جايها نصيب وتريد تتزوج وتطلع خارج العراق..

هااا..بسرعة لكيت لبتك رجل..والله صدوك انت ديمقراطي مثل مكال ابويه الله يرحمه..وبتك..ام الرجولة..من تريد تعرس من جديد وتسافرمفكرت بابنها؟

متريد منك شي..والطفل الي من ريحتك هم متبريه منه ومتريده..عمي انت طالبنه بطلابة طلك بتنا..ودز ورقتها وفوت حالنا

ماشي..تدللون ورقة الطلاك توصلكم وفوكاها قندرة

ورة شهر..طلعوني بس مكلت لامي  طالع بهاليوم لان اريد..اسويها مفاجئة وافرحها بس اول مطلعت خابرت المحامي كتله يبلش باوراق الطلاك..وصلت للبيت..ساعة 3ونص..الضهرامي شافتني ماصدكت تحضن بيه وتبوس وضمياء وحمودي تلكوني.بالاحضان اني عيوني تدور بالبيت ادور على ابني وعلى سارة..كلت:

يمه علاوي..وين؟......

علاوي اووف يمه هذا ابنك مو تكول طفل عبالك شيطان الليل كوله يلعب..وسارة متكول لا للصبح كاعدة وياه تلعب بيه وحارمها نوم الليل وبالنهار تلكاها حاضنته ونايمة!!

ضحكت..رحت لغرفة البنات فتحت الباب على كيفي..لكيتها صدوك حاضنته شعرها عالمخدة والركبه تلمع..ومخليه خشمها بشعر علاوي ورايحين بسابع نومه..اوووف هنيالك..علاوي هنيالك بابا شيصير..لو فد مرة سارة تحضن ابوك هالحضنه الحلوة♥♥♥

امي صبتلي..غدة تغديت وبقينا نسولف اني وهي وضمياء..وتكول عيال..ضمياء..ياخذوها ورة دورة السنه مال المرحوم..وسوالف تجر سوالف صار العصر..ورة شوية جتي ضمياء شايلة علاوي:

وهذا البطل علاوي كعد من النوم

وانطتنيا يخبل ودبدوب صح عمرة 8اشهر بس يبين اكبر.وهوهم مااستغرب كبل شبك علية ويضحك ويجرجر بشواربي ولحيتي..واني ابوس بي واعضعض بخدوده ضمياء تضحك:

شوف الملعون شلون شبك على..ابو..ويضخك صدوك لو كالت امي شيطان..
سألتها:

سارة كعدت؟؟

اي كعدت هسه اصيحها..تسلم عليك!

لا لتصيحيها خليها اذا تريد تسلم هي من كيفها تجي خليها ع راحتها!!

اخذت علاوي ودخلت بغرفة ابويه امي دخلت يمي..خلت راسي على رجلها واصابعها بشعري..خطية ممصدكة طلعت من السجن...وعلاوي يلعب داير مداير الجرباية

سارة::

جنت اصفط بملابس..علاوي.. دخلت ضمياء:

شنو القصة سارة ليش هيج كلبج صخر على اخويه يعني صار اكثر من 3ساعات من اجه للبيت مفكرتي اطلعين تسلمين عليه..هسه ع الاقل كولي ابن عمي..مو رجلي؟؟

هااا اي ..اي هسه اصفط ملابس علاوي واطلع اسلم عليه

ضمياء اخذت موبايلها وطلعت واني فتحت باب الغرفة ملكيت احد بالصالة باوعت..باب غرفة خالةمفتوح اكيد كاعدين هناك بس استحي افوت.رحت خدرت جاي..وكلت اسوي نفسي جايبة الجاي واسلم عليه..اخذت الصينيةوقبل ما ادخل اسمع خالة تكوله:

لايمه حشاك مكرم لتكول على نفسك هيج

باوعت هو مخلي راسه ع رجلها..وسمعته يكول:

لاوالله يمه زمال واكبر..زمال ضيعت احلى سنين عمري على ناس متسوة يمه تصدكين دازه ابوها للسجن تريد ورقة طلاك محكمة لا وفوكاها يكولي انخطبت وتريد تعرس..وتطلع خارج العراق تعيش حياتها..ومتبرية من ابنك متريد من ريحتك..طفل..

يايمة..دخلي تولي دفعة مردي..ع شنو ضايج ع هاي المعصعصة ام فجوج؟؟

لايمه مضايج عليها اصلا بعد جيه ابوها للسجن كرهتها كره الصنم وداعة عيونج..بس ضايج ع روحي اكول شبيه مخبل عفت ناسي واهلي وخليت ابويه مات بحسرته ع مود وحدة ممربايه وماعدها ذرة وفه الي..يمة متعرفين شلون الندم ياكل بروحي ..مرات افكر اخلي طلقة بكلبي واخلص من هالندم

اسم الله عليك بعد امك شهالتفكير..شو عندك هذا وليدك جنه وردة..ومرتك سراوي ..تكل للكمر غيب وانه بمكانك..عيش حياتك ييمه وانسه الندم والماضي!!

يمه سارة حاقدة عليه وتكرهني..وتكول..انت متحبني ولا راح تحبني تفكر..بيه لان لكيتني كبرانه وحلوة يمه متعرفين الحجي الي وجهته الي يمه كل كلمة..سجينه تكطع بكلبي..ما اكدر انسه ولا كلمة من حجيها..

يمه حقها..عفتها 8سنين وتريد تجي تلكة لسانها طيب وتحبك اشافت منك اكيد تكلك ماحبيتني ولا راح تحبني؟؟

يمه بس اني احبها وداعة عيونج..احبها صح ماعاشرتها هواي..بس اكتشفت الحب مو بالعشرة..الحب نبض يمه ..واني من شفتها لليوم كلبي يرفرف مثل الطير..عليها..ادري محد راح يصدكني بس هاي الحقيقة حبيت سوزان..سنين وسنين بس ماكو بكلبي هاللهفة ..سارة 4شهور صورتها بجيبي كل شويه..اطلعها واحلم اشوف عيونها ما اريد منها شيء..شوفتها تكفيني..خليها تكرهني المهم اني احبها..

سمعته يكول لخالة هالحجي عني ويكول احبها..حسيت وجهي صار..نار استحيت..مكدرت افوت اسلم عليه..

رجعت..خليت..الصينية بالمطبخ..ودخلت للغرفة افكرمعقولة صدوك يحجي بعد كل هالحجي الي كلته اله وهو يكول احبهاورغم بوجهه صرخت اكرهك وما اريدك!!!بس هالوضع لشوكت يبقى..يعني لاهو زوجي صدوك ولا مطلكني..حجيه ويه خاله حسسني اني حيل قاسية عليه..بس شاسوي اني جنت صريحة وياه..وهو رغم صراحتي وكل حجي التجريح بعده يكول عني احبها..بعدين اذا اصريت ع الطلاك راح..انحرم من علاوي واني روحي معلكة بهالطفل..ليش ما اجرب انطي مهيمن فرصة ثانيه شكو بيها..ليش سادة كل البوب بوجهه..واذا على ابراهيم هو وينه اشو اختفه وتخلى عني..من اول مشكلة والحب الجان يحجي عنه...موكف بعينه تركني..وتبخر مثل غيمة الصيف..بقيت بغرفتي..مستحيه..اطلع هسه لو مسامعته يكول احبها جان اهون عليه وطلعت سلمت بس من كال احبها..وتكفيني شوفتها كمت استحي بالزايد..طلعت وكت العشة جان هو طالع..من البيت..اي الحمد لله مموجود..تعشيت..وضمياء..ع السطح تدوك سوالف ويه خطيبها..يسولفون ع تجهيزات العرس..اني بالغرفة علاوي نام من وكت اعرفة يوميه ينام من وكت ويكعد ساعة بالوحدة بالليل بس يريد يلعب..

خليته..ع جربايتي محسيت..الا..الباب انفتحت:

مهيمن::

رجعت للبيت الساعة ب10..لكيتهم متعشين..امي نايمه وحمودي بيده الريمونت..ونايم  ع التخم بالصالة.. كلت..اروح ابوس علاوي واكل لضمياء تصبلي لكمة قبل ما اصعد انام..بس فتحت الباب شفتها فزت خلت شال على راسها محد بالغرفة..علاوي نايم وضمياء ماكو بس هيه بالغرفة..دنكت ادنيت..كعدت ع طرف جرباية ضمياء..:

اشو مسلمتي عليه..شنو..مجان بودج اطلع من السجن:

لا..لا عمو..هلة بيك..اني جيت اسلم عليك..العصر بس..جنت انت بغرفة خالة فاستحيت ادخل؟؟

منين استحيتي مني..لو من خاله؟

.سكتت بس احسها مرتبكة بقت تعدل بشالها:

سارة انتي تصلين وتقرين

قرآن..مو؟؟

اي الحمد لله
وكفت كبالها بيني وبينها ربع متر!!

زين اكو آية قرآنية مذكور بيها..لازم المرة تلبس حجاب من رجلها

هاااا...لا..لا ..ماكو..

دنكت..كتلها:

اشو..رفعي راسج..باعيلي♥♥

رفعت راسها..

دخيل الله شلون خلقة..تخبل

ابتسمت..تشجعت..مديت ايدي نزعتها الشال..لزمت ايدها..حسيت ايدها ترجف..بيدي وكلبها يدوك بسرعة..ايدها وكعدت ع الجربايه كعدتها كبالي:

هههههه شبيها ايدج ترجف؟؟

هاااا..عمو..مو متعودة احد يلزم ايدي ؟؟

ليش..حبيبج ابراهيم ملازم ايدج..قبل..مماخذلة بوسه من شفايفج الحلوة؟

تقصدت اسألها هالسؤال لان شاغل بالي..ودائما افكر..بيه..بس هي جانت رده فعلها سريعه فكالت بلهفة:

لا..لا عمو..استغفر..الله وداعة علاوي بعمرة ابراهيم متجرأ..يرفع عينه بعيني..هو اصلا حيل مؤدب؟؟

هااا..بعدج تمدحين بيه..لازم بعده بالكلب:

تنهدت وكالت:

لا عمو..محد بكلبي وابراهيم نسيته..من يوم الي..نساني واتخله عني باول مشكلة تصادفنا!!

اكيد؟؟

اي اكيد عمو وداعة علاوي نسيته؟؟

هههه اشو تحلفين بعلاوي هالكد تحبيه؟؟

التفتت عليه:

اذا اكولك احبه اكثر من روحي مراح تصدك؟؟

الله..الله...زين..وابو علاوي ماكو اله وشالة..محبة بكلبج منا..منا؟؟

ابتسمت..

لا...لا ماكو ولا وشالة الك؟؟

اخ شلون ابتسامه هاي تشهي العليل؟؟

لخاطر الله عمو..لتخجلني فدوة اسكت!!

مديت ايدي ع شفتها..عصرتها..خدودها..صارن حمر..وخرت ايدي

عمو..هاي..شنو منك..صدوك جذب؟؟..

قبل متكوم..جريتها بحضني ولفيت ايدي عليها:

من عمت عينه عمو.. ع القهر..وج مشتاقلج بكد الهوه.

بس..عمو؟؟

بعد عمج لتبسبسين..شويه ابقي بحضني لخاطر..رب العالمين..رحميني خمس دقايق اريد احضنج ما اريد شي..لتخافين..

هدأت بعد ما اسمع بس نفسها..يصعد وينزل بسرعة وكلبها يدك يم كلبي

بست شعرها..كم بوسة..هي مستحيه..وكمت احجي ع كيفي باذنها:

شوفي تكرهيني..متكرهيني هسه مو مهم..بس قسم عليه وعلى شبابي..اله اخليج...تحبيني..لا ومو بس تحبيني..تتحلمين بيه مثل ما..مااني هسه كلبي..يتفتت تفتت..واحلم بيج..كل ليلة..وهذا الحقد الي بكلبج..اله اخليه يتبدل حب..و عشك..وشوق الي..وكل ساعة بعد بيني وبينج اعوضها..من عمرنا..الجاي..سعادة..وراحة بال..خلصت كلامي..دنكت بست ركبتها..هي خطية مشدوهة ومستحيه عبالك الحجي ضاع من لسانها بس صافنه بوجهي..وعيونها يلمعن مثل عيون الطفل.

انتظروا بارت10♥♥♥♥