رواية عشگ الفرات ( عِندما تَهوى القُلوب ) الفصل الخامس والعشرون 25 - بقلم سحر الدليمي

يگول بدر العِزي :

- خلك گريب ، لا لا تغيب
أنت الگريب لـ گَلبي و غيرك غِريب

- كافي غياب ، كافي عذاب
أطرد ورا حَبك مثل طرد السراب

***

عشق
كملت كُل محاظراتي اليوم چانن هواية لأن الدوام توقف فترة ، طلعت للكراج و دزيت رسالة لـ فرات أنُ كملت و جاوبني و گال شوي و آني يمچ ، بقيت گاعدة بالكراج و أنتظرة ، مَرت ربع ساعة و آني أنتظر ، أجاني ولد ويانه بالقسم أعرفه بس ما حاچية وياه و لا مره و هو هم ما حاچي وياي ، وگف گبالي و حچه ...

- مرحبا

- أهلاً

- عادي آخذ من وقتچ فد خمس دقايق؟

- إي تفضل

راد يحچي الولد و ما حسينه أله فرات فوگ روسنه ، چان عاگد حواجبه و ضايج ، وگف بيني و بين الولد و أشرلي أوگف وراه ، حچه ...

- خير شعندك واگف وياها؟؟؟

- لا بس ردت أستعير منها الملزمة لأن ملزمتي ضاعت و كُل ملاحظاتي بيها ، فـ ردت ملزمة عشق حتى آخذ الملاحظات

ردت أحچي ، سبقني فرات و حچه ...

- ماعدنه ملازم خالي

أندار عليه و لزم إيدي و گال ...

- يلا أمشي

دنريد نمشي و حچه هذا الولد ...

- بس ...

أندار عليه فرات و ما خلاه يكمل ...

- هااا بس شنو يابة؟؟

- رايد الملزمة

- لا حول الله ، يابة گتلك ماعدنة ملازم أحچي هندي آني؟!

- خلص تمام

عافنه و مشه الولد و فرات سحبني من إيدي و مشينه للسيارة ...

- هد إيدي تره أعرف أمشي وحدي آني مو طفلة!!

جاوبني بدون ميلتفت عليه ...

- أمشي و أنتِ ساكتة

وصلنه السيارة و فتحلي الباب و صعدت و سده و راح صعد و حط أديه ع الستيرن و بقى ساكت ، بقى هيچ دقايق ، طگت روحي و حچيت ...

- متمشي ليش واگف؟

أندار عليه و هو عاگد حاجبة ، گال ...

- شعندچ ويه هذا الوليد

- مو گالك رايد ملزمة من عندي ، حتى مخليتني أنطي الملزمة شبيك!!

- لا حقچ والله لو منتظرچ الى ما منطيته الملزمة و بعدين متگاودين و ماشين و عايفيني آني أكش ذبان

- هاايي شبيييكك!!

- حچييي ووييههه الشببااب مااريييد ععشگ أفتهمتيي؟؟؟

- و أنتتت شععلييكك!!

- شعليييههه؟؟؟ ، مو آنيي طررطور هنااا ، غييرر أبنن خاااللچ

- أبن خالي بس متدخل بيه

- لا إله ألا الله ، عششگ لااا تخبليينييي ، حچييي ويهه الشبااب مااريددچ تحچييين ، تره و القرآن أسووي شي ميعجبچ!!

سكتت ما جاوبته لأن عصب كلش و صار نار ، حرك السيارة و مشينه ، فرحت من حسيته غار عليه لذلك گلت أستفزه شوي بس ما توقعت هالگد يعصب!! ، وصلنه البيت و طبگ السيارة ، حچه ...

- ما تنزلين؟!

- آني آسفه ع الحچي الحچيته قبل شوي ، ما توقعت يعصبك

جَـر نفس و ألتفت عليه ...

- آني هم آسف لأن صيحت عليچ ، ما چنت بوعيي آني من أعصب أگوم أمسلت و ما أعرف شحچي أعذريني

- لا و لا يهمك ما زعلت

أبتسم و بقى يباوع عليه و آني مركزة بي و بودي ما ننزل و أعوفه و نبقى هيچ واحد يباوع بالثاني و أضيع بعيونه و عسى محد يلگاني ، حچه ...

- هااا شنو ما ننزل؟!

- إي يلا

نزلت و دخلنه للحوش ، وگف فرات و طلع المفتاح من جيبه و فتح الباب ، أثناء ما جاي يفتح بالباب أنتبهت السوار ما موجود بأيده ، ليش نازعة؟! ، هو چان ميفارگ إيده أبد ، دخلنه للبيت و فرات نزع السترة مالته و گعد ع القنفة و آني رحت لغرفتي ذبيت كتبي و رحت أبدل

***

شهم
دخلت للغرفة بعد ما چنت يم الدكتور أفهم منه وضع مُهره ، گعدت ع الكرسي و مُهره گبالي نايمة و المغذي مشكل بإيدها ، ماكو شال على راسها و الشعر مفتوح و نازل على چتافها چنه ليل ، تمنيت أكضه و أشتم عطره و تنفح ريتي بي ، تمنيت أگدر آخذها بحضني و أگللها بعد لا تخوفيني عليچ هيچ ، بين ما آنـه صافن بيها صحت و فتحت عيونها و آنـه صحيت من أوهامي و رديت لواقعي ...

- هاا الحمدلله ع السلامة

- آني شصارلي؟

- طحتي علينه فجاة و جبتچ للمستشفى ، خفيفة مابيچ شي ان شاء الله

دارت عني بصفحة و صارت تبچي بخفوت ، نغزني گلبي و آنـه أسمع صوت شهگاتها أحسها شگت صدري مو صدرها ...

- هسه ليش تبچين يا عيني؟!

- أبچي على حظي

أنفتح الباب و دخل أبوي و عمي حسين وياه ، راح ملهوف لـ مُهره و هي من شافته شهگت عبالك صايرلها سنين ما شايفته ...

- باابااا

- ها يـَ بعد أبوچ آنـه يمچ

راح گعد يمها و حضنها و هي دفنت راسها بصدره و تبچي ، حچه عمي و هو يباوعلي ...

- شبيها شهم شگالك الدكتور؟

- يگول هابط عدها الضغط لأن صارلها يومين ما ماكلة شي

- ليش يا بوية ليش هيچ تسوين بروحچ و تحرگين گلبي عليچ

ما جاوبته و هي مستمرة تبچي ...

- ولچ بابا ليش تبچين ، بنيتي مُهره شو باوعيلي!!

سلام : خوية عوفها تفرغ الهم اللي بداخلها و هي تسكت

سكت عنها عمي و هي بقت تبچي بحضنه لحد ما غفت و رجعها للمخدة
للعصر و طلعناها من المستشفى آني و أبوي و رجعنه للبيت و عمي رجع لـ بيته ، وصلنه البيت و تلگتنه أمي و أخذت مُهره للغرفة ، گعدت آني و أبوي بالهول شوي و أجت أمي ...

- يمه فدوة ديربالچ عليها

- بعيوني يمه لا توصيني هاي بنيتي

- تسلم عيونچ ، عود خليها تاكل زين لأن طيحتها هاي لأنها صارلها يومين ما جاي تاكل زين

- أن شاء الله

- يلا چا آنـه طالع

سلام : وين يبوك؟

- بوية تعرف من صارت هالسالفة و آنـه ما مار ع الشركة أريد أروح أشوف شغلي

- خير أن شاء الله ، درب السلامة

- الله يسلمك

***

نَفس
بـ هاي الأيام الـ مَرت و آني هنا أحس أني تغيرت صرت أحب الحياة أكثر لأن محاوطيني ناس يحبوني و يهمهم أمري بالرغم أنُ لا يعرفوني و لا تربطهم بيه إي صلة قرابة ، يوم عن يوم و گلبي يميل لـ رافد أكثر ، و آني أشوفه شلون مهتم بيه و دائمًا يسأل عني ، صح الكُل يحچون وياي و يسألوني بس رافد أحسه غير بوده كُل الوقت يبقى مگابلني و يحچي وياي ، غير عن نظراته أللي تاخذ گلبي
واگف بالحديقة هو و فرات يسولفون و يضحكون و آني واگفه ع الشباك و أباوعله ، أحس أريد أشبع عيوني منه .

***

رافد : فرات

- هااا

- أريد أگُلك شي

- گول

سكتت شوي و آني أتذكر أبتسامتها و هي تحچي وياي ، أحس تاخذني لـ غير عالم

فرات : هييوو أبو الشباب متحچي شبيك!!

- آني حَبيت بنيه يول

- إي و شنو الجديد ، أنت حِبيباتك چثيرات

- لا يول ، هالمره گلبي وگع من صدُگ و عيوني ما جاي تشوف غيرها

- تحچي صدُگ؟!

- وداعتك رب الصدُگ

- ما زال حلفت بوداعتي يعني چذب!!

- شبييييك جاي أگُلككك أحب حَبيت يالأثول تصدگ متصدگ يطبك مَرض

- أنچب و گُلي منيه البنيه

- نَفس

- رافد ، ملاعيبك هاي ألعبها بعيد عن نَفس ، البنيه يتيمه و مالها أحد غيرنه و ما نريد نأذيها ، لو يسمعك صگر يشوي على أذانك بصل ، فـ جُر من يم البنيه و شوف غيرها تلعب عليها

- أگف شبيك أكلتني بگشوري ، جاي أگُلك أحبها البنيه ميت عليها فرات أعشگها ، جاي تگُلي لعب و ضحك

- مو آني أدري بسوالفك

- لا و القرآن أحبها و بس شوي أريد أحچي وياها و إذا وافقت آني ماخذها على سُنة الله و رسوله

- إي دام السالفة هيچ ، عَجل بيها الخير ، بس ديربالك من سوالفك الطايح حظها

- أگُلك ليش محسسني أنت أخوية الچبير ، هييوو. يـَ وليد تره آني أكبر منك لا تصدگ نفسك

- كافي رحمة لوالديك صارلك سنين ذالني بـ هالسنة الگشره

- و أذلك أنوب وداعتك

سكت و دار وجهه ، أحسه يفكر بشي ، فرات صارله فترة مو طبيعي ...

- شو سكتت شبيك؟

- مابيه شي

- لا بيك شو صِد عليه ، أنت مغبي عليه شي؟

- شغبي يعني

- ما أدري بس آني متأكد وراك سالفة و آني ماعندي علم بيها ، تفضل شيخ أحچي أسمعك

سكت شوي و بعدين گال ...

- راح أحچيلك بس صُم بوزك و أگدر لـ نفسك ماريد هالحچي يدري بي أحد

- مسويلك مكسورة و خايف لا عَمي يدري مو؟

- دنچب الله يچفينا شرك عوذه

- عَجل؟!

- آني أحب عشگ و أريد أخطبها

صفنت ، هذا شجاي يحچي ، معقولة هذا الگدامي فرات

- عليك القرآن؟!

- إي والله ، تعرفني آني بـ هاي المواضيع ماعندي شِقة

- ياااا الله يوولـ ...

قاطعني و هو يحط إيده على حلگي حتى أسكت ...

- أششش يربك ، أهل المنطقة كُلهم راح يسمعون!!

- تمام تمام

***

سليمة : حسين وين چنت أدگ عليك متجاوب؟!

- بالمستشفى

- خير أن شاء الله شعندك بالمستشفى!!

- مُهره طايحة عليهم و ماخذها شهم للمستشفى و چنت وياهم

- أسم الله بنيتي ، شمالها ليش طايحة؟؟

- ما أدري يگولون دايخة

- و هسه هي وينها و شلونها

- رجعو للبيت و الحمدلله صارت زينة

- فدوة حسين گوم أخذني ألها أريد أشوفها و أتطمن عليها

- شگوم بوية ، خليني أرتاح و أوچد دربي و آخذچ تشوفيها

- چا آنـه شيصبرني

- لليل أرتاح و آخذچ

***

مُهره
صار الليل و آني گاعدة بالغرفة وحدي و صافنه بحياتي شلون صارت ، أنفتح الباب و دخلت أمي ، أجت حضنتني و آني حضنتها ، كلش چنت مشتاقتلها ...

- يبعد روحي يمه شبيچ شصارلچ

- مابيه شي يوم لتخافين

- شلونچ هسه يبعد هلي يمه؟

- الحمدلله حَبيبتي

- الحمدلله

سكتت أمي شوي و بعدين حچت ...

- صار بينكم شي أنتِ و شهم؟

- شي مثل شنو ماما ما أفتهمت !!

- يعني العلاقة الزوجية

- لا

- ليش !!

- آني ماريده يتقربلي

- ولچ چا هو مو رجلچ!!

- يعني أنتِ هم حاسبتنا مَره و رجلها؟ ، يمه چنچ ما تدرين الصار ، آني تزوجت مجبورة بس حتى ما أروح فصلية

- إي بس يـَ يمه أنتو هسه تزوجتو و صارت بعد

- حتى لو ، أصلاً شهم گلي بس تفض السالفة أطلگچ و ترجعين لأهلچ

- ولچ تطلگين شنو صاحية أنتِ؟؟ ، آنـه أگول لو تحطين عقلچ براسچ و ترضين بنصيبچ أحسلچ ، ولچ شهم ما تلگين مثلة و يحبچ لو ما يحبچ ما نهى عليچ بالمضيف گبال الشيوخ و كَسر عين حيدر ساعة الرادچ فصلية و خلصچ منه ، چان أنتِ هسه فصلية عنده و معيشچ بالذل

بقت أمي تحچي وياي و تقنع بيه أرضى بزواجي من شهم و أتعود و أتعايش وياه ، بس آني گلبي ويه فرات شلون أتعود ، راحت أمي و بقيت گاعدة وحدي شوي و دخل شهم ، سلم و حچه ...

- جبتلچ عشه گومي نزلي أتعشي

- ماريد

- يعني عاجبچ تطيحين أنوب و أشيلچ و أركض بيچ للمستشفى!!

- هوووف ، ماريد مو جواعنة

- إي بكيفچ ، بَس آنـه جايبلچ دولمة من هذا المطعم اللي تحبينه ما دام ما تردين چا أوديها للحراس يتعشون بيها

- أوگف

- هااا

- گتلي دولمة مو

- إي

- تمام أتعشة

- چا يلا گومي

- بس الحراس شلون

أبتسم و گال ...

- لا تخافين جبتلهم عشه

نزلت للمطبخ حتى أتعشه و شهم راح يگعد بالديوانية ويه عمي ، تعشيت و كملت و گمت أساعد عمه ما تقبل تخليني أشتغل شي تگولي أرجعي أرتاحي بس آني ما هان عليه تشتغل وحدها و بقيت وياها لحد ما خلصنه و صعدت لغرفتي ، بقيت متمدده ع الچرباية و أگلب بالموبايل لحد ما صارت الساعة بالـ 11 ، أنفتح الباب و دخل شهم ، گعد بصفي ع الچرباية و صار يباوع عليه ردت أگوم ، حچه ...

- أبقي هيچ لا تگومين

بقيت بمكاني و أباوعله ، عيونه حمر و مبين ضايج و حاير و مقهور و كُلشي بي ، أصلاً آني أعرفه هو مثلي ما مرتاح ، حچه بصوت هامس و هو يباوعلي ...

- آني تعبان مُهره كلش تعبان

سكتت ما حچيت شي ، أردف ...

- خليني أنام بحضنچ هالليلة بس ، أريد أنام و آني مرتاح و هالشي ميصير أله و أنتِ يمي

ردت أحچي و خله أصبعه على حلگي و حچه ...

- رايد بس هالليلة

نزع القمصلة مالت التراك و ذبها و تقرب مني ، تمدد بصفي و حط راسه على صدري و إيده حاوط بيها خصري ، آني بقيت متجمده بمكاني كلمة ما طلعت مني ، ما گدرت أتقبل شهم يتقرب مني هالگد بس ما ردت أبعده لأن شفت التعب و الحزن بعيونه ، چان صدگ محتاج هالشي ، بقى هو بحضني و آني أباوعله لحد ما غفى ، سحبت نفسي منه بهدوء و گمت غطيته و طلعت

***

عشق
نزلت من غرفتي و رحت أگعد وياهم بالهول ، كُلهم مچتمعين و اللمه حلوة ، فتت و گعدت يم خالة نجاة ، فرات گاعد گبالي ديلاعب بـ لارين ، حاطها على رجليه من جوه و يرفعها بالهوا و هاي مكيفة تضحك من كُل عقلها ، أنتبه لـ وجودي و صار يباوع عليه ، حچت خالة ...

- ولك يمه شوكت أشوفك تلاعب ببنتك هيچ

فرات : ميفرق يوم هي لارين بنتي

- أعرف أبني بس آني أريد أشوف أطفالك ، شوكت تتزوج؟

- يصير خير گلبي يصير خير

سكتت خالة نجاة و هو سكت و نزل لارين عن رجليه ، و هي صارت تحاول تصعد ع القنفة بس متگدر و تباوعلة و تجر بالبدي مالته ...

- هااا هااا شتريدين گوليلي؟

تأشرله ع القنفة و تتنعوص آخر شي شالها و صعدها و هي صارت تلعب بلحيته و تكفش بشعره و هو يحچي عليها و يسوي نفسه زعلان عليها ، نزلها و حچه ...

- يابة راح تضلون ساكتين لـ حارث لو ناوين تسون شي؟

- حاليًا منسوي إي شي خلي يضل يهدد ، بس المهم ضلو ماخذين حذركم منه

صگر : و شنو نهاية هالسالفة؟!

جسام : العلم عند ربك يوليدي

نَفس
ضاگ صَدري و طلعت بالطرمة أگعد ، گعدت ع المُدرجات شوي و أجه صوت رافد من وراي ...

- هاا شعندچ هنا؟

شفته و أبتسمت لا إراديًا ...

- ماكو شي بَس ضجت و أجيت أگعد هنا

گعد على طارف المُدرجات و حچه ...

- منو مضوجچ؟

- مَحد

- عَجل أكو أحد يضوج لحاله!!

- إي آني ههههههه

- هاي راح أسجلها يمي ، نَفس تضوج من لا شيئ ههههههه

- رافد عادي أسألك سؤال؟

- أكيد

- آني أعرف أنُ أمك متوفية ، ولو يَمكن هالموضوع يضوجك بَس حابة أعرف شنو چان سَبب وفاتها

تنهد ، و عَدل گعدته ، حچه ...

- أمي توفت و هي تولدني ، ولادتها چانت خطرة و ماتت على أثرها

- الله يرحمها

- و يرحم والديچ ، چنت أشوفها بَس بالصور ، طول عُمري چنت أتمنى يكون عِندي أم ، تحبني و تداريني و تخاف عَليه ، رغم عَمتي نجاة ما قَصرت وياي ربتني و أهتمت بيه بطفولتي و لحد هَسه ، بَس الأم ما تتعوض و محد يسد مُكانها

- و عمو جسام ليش ما تزوج من بعد وفاة أمك؟

- ما راد يجيبلي مرت أب خوفه عَليه منها ، و هَم أبوية چان حييل يحب أمي لذلك ما هان عليه يحط وحدة بمكانها

***

عشق
گاعدة بغرفتي و أجت نَفس گعدت يمي ، و أشوفها صافنة و تلعب بشعرها و كأنها ناسية العالم كُله ...

- هلووو يالصافنة؟!

فزت و ألتفتت عليه ...

- هااا هلا عشق

- شبيچ صافنه؟

- مابيه شي

- چنتي ويه رافد مو؟

- هااا ، لا لا ، چنت بالمطبخ

- قَبل شوي چنت بالمطبخ ما چنتي هناك

سكتت ما جاوبتني

- باعي إذا عبالچ آني مو حاسة باللي بينچ و بين رافد فـ أنتِ متوهمة

- لا والله ما بيناتنا شي

- ولچ النظرات اللي بيناتكم تكفي تشرح للعالم اللي بگلوبكم ، أعرف أنتو تحبون بَعض

سكتت شوي و بعدين حچت ...

- آني أحبه كلش ، بَس هو ما أدري عنه

- دشوف هاي الثولة يربي ، ولچ آني حسيت بحُبه ألچ تردين تقنعيني أنتِ ما حسيتي !!

- ما أعرف عشق

گالت هيچ و نزلت راسها تلعب بأصابعها ...

- نَفس ، شبيچ عُمري ؟

- عشق أحس مو من حَقي أتقرب من رافد و لا حَتى أحبه ، هذا الحُب مو من حَقي

- و ليش مو من حَقچ بالله ؟!

- آني مقطوعة من شجرة و مالي أحد ، لو ما أنتو عطفتو عليه و لميتوني ببيتكم ، چان هسه آني مُشردة بالشوارع و الله أعلم بحالي ، و رافد ميستاهل ياخذ هيچ وحدة

- لچ شدتحچين أنتِ شنو هالتمسلت ؟! ، أللي صار بيچ مو ذنبچ ، الأنسان اللي يحب ميفكر بهالأمور و رافد يحبچ و شاريچ واضح عليه

- بس أكيد أبوه ميوافق يزوج أبنه الوحيد بوحدة مثلي

- إذا من هالناحية اطمأني ، خالو جسام ميفكر هيچ ، هَمه الوحيد يشوف رافد مرتاح و سعيد يعني أكيد مراح يوگف بسعادته

- هَسه عوفينه مِني ، أنتِ سولفيلي شخبار گلبچ ؟

- گلبي على حاله ، أحس أني صايرة ضعيفة كُلش گدام گلبي ، مدأكدر أسيطر عليه ، گلت أبتعد عَن فرات و أحاول أنساه و ما أحچي وياه ، بَس گلبي مديطاوعني ، يريد قربه دائمًا ، لچ صار روحي من الدنيا ، لو غاب عني أحس الدنيا كُلها سودة و مالها طَعم بغيابة ، و لو أجت عيني بعينه تتسارع دگات گلبي و أحسه يريد يطلع من صدري و يروح بين إديه .

- لا تبتعدين عنه و تكسرين گلبچ ، أبقي قريبة منه و لا تستبقين الأحداث ، يمكن يطلع هو يحبچ بَس أنتِ ما منطينه مجال و دتعذبينه بتصرفاتچ هاي

***

مُهره
گعدت من النوم أخذت تيلفوني و شفت الساعة بالـ ٨ ، باوعت لـ شهم بعده بسابع نومه ، بقيت صافنه عليه و هو غافي ، تقربت منه و صرت ألعب بشعره بَس على كيفي حَتى ميحس ، ما تخيلت يجي يوم و آني و شهم ننام على سَرير واحد و بغرفة وحدة ، صَح اللي سواه شهم قهرني و خلاني گدام الأمر الواقع ، بَس معَ ذلك ما أكرهه و لو ما هو يمكن هَسه آني فصلية ببيت حَيدر و بَس الله يعلم شِنو حالي ، شهم أنقذ حَياتي من الدمار
شوي و بده يتحرك ، سحبت إيدي من شعره ، و هو فَتح عيونه ، أول ما شافني أباوعله أبتسم ...

شهم : صباح الخير

- صباح النور

- بيش الساعة؟

- بالثمانية

- ما حَسيت لأن البارحة نمت أحلى نومة و أنتِ يمي

- أأأ ، أحم ، يلا گوم حتى تتريگ

ضحك و گام دخل للحمام يسبح و آني نزلت جوه للمطبخ ، لگيت عمه فاطمة دتسوي ريوگ و عمي سلام يمه أوراق و ملفات لابس عويناته و ديراجعهن ، صبحت عَليهم و حچت عَمه ...

- ما شاء الله ، اليوم وجهچ يضحك يمه

- هو اللي يصبح بوجوهكم شلون ما يضحك يا عَمه

- هههههه حَبيبتي عساچ دوم

راحت طلعت بيض من الثلاجة حتى تسوي ، رحتلها ...

- عنچ عمه روحي أگعدي آني أسوي

- لا يمه أنتِ روحي گعدي شهم و أگعدي آني أسوي

- لا والله ميصير أنتِ تسوين و آني گاعدة أتفرج ، و شهم گاعد ديسبح شوي و يجي

من گلت هيچ أشو عمتي صفنت بوجهي و صارت تتبسم ...

- هااا عَمه شبيچ؟!

- هااا ، لا بنتي ماكو شي

راحت گعدت ع الكرسي بصف عمي و هي تگله ...

- يا رجال دترك من إيدك و صبح ، مو وكت شغل ، تلحگ عليه و علي

- ميخالف ميخالف ، بَس أشوف هالملفات

صفنت و آني داسوي بالبيض ، صخااام هاي آني شگلت مساع ، عزززاااا شلون أگول گدام عمتي شهم ديسبح ، المصيبة عَمي گاعد ، عززااا هَسه شفكرو ، أمداچ مُهره شلون تفشلين روحچ هيچ ، لا لا هُمه مستحيل يفكرون هيچ ، عزززااا شگد فشلة يالحُسين ، أنتبهت للبيض أللي راد يحترگ ، بسرعة طفيت جواه و حطيته بالماعون و خليته ع الميز ، أجه شهم و صبح على أهله و گعد ، حچه ...

- يعني اليوم راح نتريگ من تحت أديچ؟

- أكيد

- چا خوش ، بَس تره إذا البيض مالح أخليچ تسوين من جديد

- ههههه تدلل

***

تنويه : بَعض المشاهد راح أرويلكم ياها آني و ليس الأبطال ، لأن أكو مشاهد لازم آني أرويها .

,,,

" بيت المهيوب "

صگر ودع أهله و طلع لـ دوامه ، فرات طلع يوصل أمه لـ دوامها ، رافد طلع يشوف المحلات مالتهم و يتفقد الشغل ، جسام طلع للشيخ جاسر عدهم گعده

أما عَلي فـ ركب سيارته و طلع للمعرض ، يريد يتفقد شغل المعرض و أتفق ويه فرات أنُ راح يبقى وياه اليوم و يشرف الشغل بنفسه ، طلع قبله و فرات بَس يوصل أمه يلحگه ، وصل للمعرض ، دخل و أستقبلو الموظفين ، راح للمكتب ، أول ما دخل و لاحظ المكتب بي ريحة نفط ، صاح على ياسر و أجه ...

- شو ريحة نفط هنا؟! ، شنو جايبين تنكر نفط هينه و آني ما أدري !

- لا عمي بَس چنه حاطين صوبة نفطية هنا و بقت ريحتها

- هااا زين ، روح و من يجي فرات گُله خل يمرلي

- إن شاء الله

طلع ياسر و عَلي راح للخزانة مال الملفات ، طلع منها شكم ملف و بده يگلب بيهن ، ما حَس أله و أجته ضربه على راسه ، على أثرها وگع بالگاع و أغمى عليه ، هذا الشخص المجهول أللي ضربه ، چان شايل دبة نَفط وسط ، شالها و فرغها بغرفة المكتب كُلها ، شَب النار بالمكان و بسرعة طلع و قفل الباب وراه و حَط المفتاح بجيبه ، بقى عَلي مُغمى عَليه و النيران حواليه كُل ما زالها تزداد

ياسر بره بالكراج چان يتفقد السيارت ، دخل جوه و شاف الدخان يطلع من جوه باب المكتب ...

********

يتبع ...

و چان نرجع بَعد أنقطاع دام لأسبوعين😭😂♥️
إي شسمه شلونها القفلة 🌚
والله الحچي بيناتنا ما گدرت أصبر ليباچر و نزلت البارت😂🙂بما أنُ أكو ناس خلصو اليوم فـ نزلته لخاطرهم ، آني باچر يلا أخلص😔💔
المهم أريدكم تفجرون البارت تفاعل ، و أهم شي تعلقون ع الفقرات يعني حسسوني أنتو جاي تقرون🌚💔 ، و هسه يلا أودعناكم .

سحر الدليمي