رواية عشق المومنين(أبناء الساده) الفصل الثامن وسبعون 78 - بقلم نازك الحمراني

السلام عليكم..ارجو قرائة سورة الفاتحه على روح اختي قبلها الصلاة على محمد وال محمد

بارت مفاجاااااااه
.....
حين نقرأ في دعاء كميل  :
وكل سيئةٍ أمرتَ بإثباتِها الكرامَ الكاتبين الذين وَكَّلتَهم بحفظِ مايكونُ مِني وجعلتَهم شهوداً عليَّ مع جوارحي ( وكنتَ أنتَ الرقيبَ عليَّ من ورائهم و الشاهد لما خفي عنهم )

ندرك أنو رب العالمين بلطفه يستر ذنوبنا على الملائكة الموكلين بنا بعض من الذنوب الي نرتكبها فقط هو يكون شاهد علينا ليش؟
لان الله هو الساتر

گم يجب علينا أن نذوب خجلاً من ستر الله علينا رغم معاصينا ليظهرنا ليس امام الناس بل حتى ملائكته باحسن مايگون!!

،دموع الخذلان والوجع والقهرر حاولت الملم شتات نفسي وچذبتي الچذبتها عليه بداية زواجنا
اجى وگت حصادها وعقوبتها

گتله بخوف وتوسل

-لااااا تطلع الله علیك والله ماااعيدها بعد والله انا بریئه

بقى ساكت ومانطق بكلمه عافني وطلع من الغرفه گعدت اندب حظي وابچي
احچي بقهر ولوم بنفسي

-هاااااي انه السبب اي لأن چذبت چذبت وكتلة عندي عذرر شرعي

يااااربي اشلللون والله مااعيدها ربي واالله ماااچذب بعد هااااي عقوبة الچذاب بدنيا قبل الاخره اشلون هسه شاااسوي وهو عافني وراح ولااجن صاير شئ
هدوئة يخوف وقلقني اگثر

العشر دقايق صارت دهر گد الخوف ارید اعرف علتي شنو وليش من دون النسوان ماوگع علیه دم

لیش یصیر بیه هیچ(اللهم لا اسالك رد القضاء لكن اسئلك الطف فيه))اردد بثقه ربي ماراح يخذلني

راح ينصف برائتي،ينصف حالي وحال اهلي من هيچ موقف

عیوني للساعه الجدامي خلصت العشر دقايق وانه على گعدتي ودعائي المستمر

انفتح باب الغرفه دخل سيد سلمان كأنو دخل عليه الخوف گله
اتخيل راح هسه یسحلني ويجرجرني من شعري ومتعصب

عيني عليه من دخل ابتسملي بوجه بشوش مستبشر
اما  وجهي خايف مخذول متعوب لان الهل لحظه ماعرف سلمان بشنو ديفكر وليش ابتسملي واني بهالحاله

دخل ينشف بشعره ولابس بجامه قطنيه صحراوي وفانيله بيضة بعده متغطي بلخاولي وينشف شعره ببرود وهدوء

گال

-غفورتي يله رووحي سبحي ليش بعدچ كاعدة
جاوبته اتوسل

-بس انه بريئه والله انت مفتهمني مو

وجهه للمرایه ولخاولي على رگبته

رد

-یله غفورتي گومي غسلي
الامام الرضا علیه السلام يگول”غُسْلُ الْجَنَابَةِ فَرِيضَةٌ" والفريضه ماتتاخر ومضار تاخير الجنابه  یؤدي الى الم بظهر وكسل عام  وخمول بجسم شديد وكئابه وتثائوب فگومي حبيبتي غسلي وبعدين نحچي على راحتناا الليل طويل

تناوعت اله اشلون وجهه مطمئن ويحچي  يريد  يخفف من أرتباگي

تذكرت دعائي ورى كل صلاة جنت اردد
‏"يارب ارزقني زوج صالح، ممتد الود رحيم الجوار، مؤتمن الجانب طيّب الذكر، بشوش الوجه يسير المعشر، كثير النفع قليل المنة، واسع الفهم رحب الأفق، سريع الفطنة متمهل الخطوة، من نلمس فيه المُستراح والمقرّ، ولا يحول بيننا وبينه الفزع))

اي طول عمري اقراء هذا الدعاء من چنت بفترة مراهقه وهسه اجت ثمار الدعاء

مسحت وجهي گلت لاااا اگید هذا كمين يستدرجني بيه بس خل اگوم وذا يشك بيه ابقى اتوسل لان انه بريئه حتى عباس الله يرحمه مره وحده لزم ايدي وباسني جنت منصيه بعدها ابد ملزمني

تمشيت من يمه بخوف عبرته وبسرعه دخلت للحمام سديت الباب وشغلت الدوش ابچي افرغ دموع مضمومه بگلبي ونداء
((يااافارس الحجاز انجدني))

محتاره بردة فعلة اول مره گام متوتره بس بوجهه ابتسامه وهسه هاديء فرحان يلعب باعصابي أصفن وكل تفگير موزين اجة بالي

غسلت وقريت طقوس الاغتسال بس عرگانه من الخوف من القلق من الحيره

گل هل تشتت الصار بسبب چذبتي صارت ركيزه دمرتني متذكره قول الحبيب محمد صل الله عليه والله وحديثه عن الكذب
((ويلٌ للَّذي يحدِّثُ فيَكذِبُ ليُضحِكَ بِه القومَ، ويلٌ لَه، ويلٌ لَه))
كذب المزاح يگول ویل له ویل له كيف انه كذبتي الحقيقيه((استغفر الله ربي واتوب اليه))

زين هسه شنو ابررر شلون ابرر نفسي جدامه وانا چنت مااخلي يقترب طول هل فتره
اشلون  ابرر چذبتي وخيبتي انه عندي عذر شرعي وهو چذب

لو ابرر هو خطبني وانه رفضته يارب هل چذب الاولى والاخيره بحياتي راح تاذيني ودمرني

طلعت من الحمام واگفه یم باب الغرفه متردده ادخل لو لاااا أخاف يتعصب ويطلع وجه الحقيقي ياذيني

خاف يريدني اسبح حتى ياخذني الاهلي ويقتلوني نضيفة
عزاا ربي رحمتك بية
شنو راح يسوي ويايه شراح يسوي بية
شنو هاي الافكار براااسي

لالا.. لاااااا هو زين وخوش انسان و تفهم الوضع اكيد ماراح يتهمني رجعت اليورى

لاا هوة هسة يودني لهلي يجوز يريدني اسبح حتى احلف بلقران هي هاي دروب الزلم
غميت گصتي هو انه منين اعرف زلم
بس اي اي وذا احلف ليش لا ياريت على الحلف خاف يسوي شي اگبر ویذبحني

ضلت فكرة تجيبني وفكرة تودني شگول علیچ یاامي ورثتني هل حاله من يصير موقف ابقى اسوي افلام براسي مو حي الله افلام عاديه افلام اكشن

مسحت على راسي انه داخله على الله واهل بيته نبينا والي نجاني من الخوف بهاي لحظه ارتباطي وقربي من الامام المهدي عجل الله فرجه الشريف گل یوم  اجلس ساعه مع حضرة صاحب الزمان واتوجه أليه و اقرأ زيارة آلِ ياسين واردد((يا صاحب الزمان أغثني  يا صاحب الزمان‌ أدرڪني المستعان بك يا ابن الحسن))
هنا كملت المناجات مولاي الغائب بديت اقراء زيارة ال يس((سلام على آل يس، السلام عليك يا داعي الله ورباني آياته، السلام عليك يا باب الله وديان دينه السلام عليك يا خليفة الله وناصر الى قول....
وأرني في آل محمد (ع) ما يأملون وفي عدوهم ما يحذرون إله الحق آمين يا ذا الجلال والإكرام يا أرحم الراحمين))

بعد ان كملت قرائة زيارة طمئنيت گلش وحسيت براحه نفسيه تامه مثل احد مسح على قلبي

تناوعت أگو سله یم باب الغرفه خلي بيها الملابس الوسخه لگیت مخليه عبائتي بيها نصيت حتى اخذها وبعد ان ارتاحيت هواي افكار اجت بالي منها فكره وحده منهن البس عبايتي والشحاطه واشرد بعد ميلحك يتعصب عليه لان انه طاگتها رگضه وشارده واصله بيت اهلي

رجعت فكرت لااا مااشرد الاهلي شنو اكلهم ماعندي عذرية
لا خلي اروح وين يريد ياخذني ياخذني..

طگیت خدي يااا وين اروح ياربي رحمتك
فتحت العبايه اريد البسها طلع سلمان جفلت مرعوبه امتمتت

كال

ـ هاي شنو حتى بالبيت تلبسين العباية

ـ ها..  لا اريد اطلع

- اها..  اطلعين شنو.. 
وبدون متكوليلي؟

ـ بقيت ساكته واتناوعله بخوف

ـ زين وين غير نعرف

ابالي مااچذب واكله الحقيقيه

-هااا اريد اشرد

- ياستار.. ليش خير ياطير
.
-مو انه والله فقيره وووحبابه ووووعمري بحياتي محد لامسني ولا طاخني ولااأاااا حتى مسويه شي يغضب ربي مالي ذنب ولا مسويه شي بس والله
والله ماعرف ليش ماااا

اتبسم
-ما شنوو ياصبر گلبي

نزلت ادموعي وخايفه وهو بعده مبتسم  ومتوجي على الباب

برودة تصرفه يموت هسه غير يبين غضبه عصبيته لزم ايدي

بحلقت عيوني

-وووين تاخذني

-ياااا الطاف الله ددخلي ياعيني

دخلني للغرفه عاضه العبايه بحلگي وتمشى وراه  نزعني العباية گوه جرها من حلگي وچماله یضحك بعده گال

-مرتي تاگل عبي ماادري

محچیت اخذ العبائه خلاهه على الجرباية
لزم متني گعدني على القنفه وانه بعدني
اتوسل

-والله بريئه والله بريئه وذا على الچذبه بعد مااااچذب 
احچي وابچي
بهدوء يطمئني

-اخ اخ ياصبر گلبي اهدئي يا راحة عيني على شنو هالبچي

-شلون اهدائ

-مو انا اريد احچي وياچ بهالموضوع بس انتي متوتره اشلون احچي

گعد یمي أخذ ايدي سحب راسي الصدره حضني وبهمس ناعم

-اششش لاتبچين راحن عيونچ يااروحي

بعدني من صدره  مد أيدة للميز نطاني بطل مي فتحه رفعت ايدي گوه اخذته همزين فاتح القبق لان من خوفي ايدي ترجف ماكدر اسيطر عليهه

شربت مجعه وحده
وباعذب الحچي همس

-يا ااطهر من الطهر،وابيض من البياض واحلى من الجمال

-لاااا هذااا كمين لو هو بيه شي شلون هيج يحجي و ماگو دم نزل..
رديت... ها

-بیچ بس الشرف العفیف،والعفه الندیه
-والصار شنو اسمي

-امسحي دموعچ  ليش البچي والارتباگ

جاوبته

-گووول ولله یعني انه مابيه شي ومحد فاعل

-استغفرك ربي شلون هل حچي انتي طاهره وحسب  خبرتي وعمري وفهمي ودراستي بالاضافة لزواجي السابق صرت اعرف بهالامور واميز بين البگاره الحقیقه واعرف اذا أگو غير شي

ـ مفهمت

ـ  بساعة القرب منچ وضح الیه انتي باكر عذراااء واااضح  من دون مجهود منس

گام من یم دي وگعد بثقه ورزانه علی الچربایه وانا وگفت اگباله منصیه افرگ بديه ودموعي صب

-ليش موگع دم مثل البنات

-لان انتي عنيده

-یااااا

-اي عنيده بگلشي حتتتتی غشائچ عنید ویایه ومقبل قربي

-صدك عنيد

-اي انه اسمي عنيد ياعنيده لكن علميا
rubber membrane

-مفهمت

مد ايده اليه

-تعالي افهمچ اكعدي شبيچ كل شوي تطفرين وتوكفين لاتخافين اكعدي حتی اجدد نشاطي وياچ

اگاد من حِيائك ياعشق الروح اعشقه أكثر مِنَّ جُمْال وجهگ

-یعنی ما حتعوفني

-‏أتخلى عن روحي.. لو عنچ تخلّيت

شدیت علی ایده بطمئنان عرفت نفسي احبه بس متخوفه اعترف أحب  اعيونه احب ارموشه احب لحيته احب خشمه  عصبيته حتى شرايين البارزه من يطبطب عليه یبرزن احبها

قطب حواجبه الاحبهن وحتى بؤبؤ عيونه احبها بهمس وامان

-فهمني الله عليك

سحب راسي الصدره وبداء يمسد على شعري..  ها هسة فهمتي

جاوبت

-لااااا مفهمت

-هههه یاصبر گلبي
شوفي حبيبتي غشاء البكارة المطاطي اسمه بلانكليزي  Elastic Hymen
يعني غشاء البكارة يكون مرنا مطاطي  قابل للتمدد مثل النفاخه وهل النوع من غشاء البكارة اثناء القرب والدخول يتمدد ويرجع الشكله العادي بعد الخروج ، بهل حاله شيصير ياغفورتي مايتمزق يبقى مقاوم عنيد بسبب مطاطیته وتمدده المرن الواسع

-یعني

-يعني هل  شی یودي عدم خروج الدم او علامات  فض غشاء البكارة ومووو اي شخص راح يعرف هل شي اليعرف فقط الرجل ألي يتقرب الزوجته بتأني وبراحه هدوء وسكينه راح يعرف هاي البنت باكرر

اما الرجل يتقرب بهمجيه وحشيه ماراح يحس ولا راح يعرف لان ضاعت السالفه بوحشيته فراسا يتهم زوجتهه بشرفهه للأسف ويتحمل ذنبهه برگبته الى يوم يبعثون

ارتاحيت من گلامه گام من یمي راح مدد السجاده الیه واله رغم بليلة زواجنه صلى صلاة الدخله وانه صليتها من نزل

بس هسه المن گالي

-يله انصلي رگعتين شگر

لبست الچادر صرت وراه صلیت صلاة الشگر بقیت وحدي اسبح احمدت الله أنو تفهم الوضع وعرف حالتي

لان اسمعت هواي بناات مرن هيچ نفس وضعي بس چانت نتيجة رجل همجي والاهل مايتفهمون

كملت وهو گمل بس بقی گاعد گمت اريد الملم السجاده  اشر الیه اجي يمه ردت اگعد دار جسمي للقبله
وعلى وگفتي وهو گاعد على سجاده قرا

((اللهم ارزقني إلفها وودها ورضاها بي وارضني بها واجمع بيننا بأحسن اجتماع وأيسر ائتلاف فإنك تحب الحلال وتكره الحرام ))

مد ایده جوه بطني وقراء
(اللهم بأمانتك أخذتها وبكلماتك استحللتُ فرجها ، فإن قضيت لي منها ولداً فاجعله مباركاً سوياً ولا تجعل للشيطان فيه شركاً ولا نصيباً

ياارب بكلمات الله استحللتُ فرجها وفي أمانة الله أخذتها ، اللهم إن قضيت لي في رحمها شيئاً فاجعله بارّاً تقياً واجعله مسلماً سوياً ولا تجعل فيه شركاً للشيطان))

گام لملم سجادته والفرحه ماوسعتني گل هل اشیاء الحلوه بزواج حرمت نفسي منها بعنادي وخوفي

قررت اهيء نفسي  تهيء الزوجه للزوج لبست نفنوف نوم ابيض تول خفيفه من الردن وطويل ستن مشطت شعري
تعطرت تمددت ع جرباية  بيدي المسبحه الاكترونيه اشكر ربي على هاي النعمه

سحبني الحضنه

_نامي حبيبتي اليوم هوو يومنا الاول الصلاة والدعاء صارت بدايتنا اذن ماكو بعد هل لليله خاتمه اله الموت الي رب العالمين كاتبه النه

بقيت استغفر الله الى ان غفيت ومااحس الا الجامع الي يمنه يگبير الصلاة  الصبح

گمت گام سید سلمان لبست روب النفوف توضينه لبست الچادر صليت وراه وقریت قران وبدینا نقرا اثنینه بصوت مسموع زیارة عاشوراء

نزعت الجادر والروب رجعت لجربايه تغطيت كمل هو صلاة اجة يمي ايده تلاعب براسي ويلعب بشعري

_الحمد الله دائما وابدا يمي هيچ جماال وحسن ودين مهدوي
تیقنت الله سبحانه شگد يحبني نطاني مرأة مثلج كلهه
وعفه وطهاره

جاوبته
_انه اگثرر منگ اشگر رب العالمین وهم احمد الله گل دقيقة وساعة رزقني برجل مثلك  متفهم ومتحمل اخبالي وعنادي

گتله بهدوء
-ليش انت هيچ اقصد‌‌‌ لان متقي الله هيج صرت

-شوفي حبي هو الخوف من الله رئیسي سبب لكن الحياة الزوجية تعتبر عالم ثاني للمقبلين على الزواج عالم بيه صراعات  مفاجآت بلاول والاخير تتطلب زوج متفهمً وامرأةً واعيةً واثنينه انشاء الله هيچ

و الزواج يطلب مثلنا شخصین حتی  نخوض الزواج بكل تفاصيل،تصادفنه مثل  مشكله او بلاء أو مصيبه وهنا راح تبين متانة حب الزوجين ا وعلاقتهم

ولهيچ یاغفران حتى يگون الزواج ناجح لازم نختار  شريك حياتنه بدقة من خلال عقله وقلبه معًا، ومن اختاریتچ عرفتچ تعويضات الله وراح تگونین الانسانه  گد الثقة وتوأم روحي الي راح أكمل وياها الحياة حتى نهايتها.

-گلامك حلو  بس لیش انه موغيري خصوص شروطي چانت مستفزه مفگرت بحچي الناس

-ليش انتي لان غضيت بصري ع جميــع النساء رزقني  الله ببنيه زينبيه

وحچي الناس مو مهم المهم يكون اختياري يلمع بعيوني انه

-من هل لحظه الك بگلبي مالا يجوز العداك والك بلنبض نبض خاص على غيرك محرم .

-ومن اربع سنوات احببتكِ ثم عشقتك ثم  عانقتك بدعائي  .. أيقنت أن المسافات الطوال  لاتزيد في قلبي  إلا حبآ لكِ

-ماعرف احچي مثلك أعذرني سيد سلمان خاف اذيتك لان ماريدك تنندم

-بلعكس مااتندم لان قال النبي محمد صل الله عليه واله

-اللهم صل على محمد وال محمد

-قال (تُنكحُ المرأةُ لأربعٍ: لمالِها، ولحسبِها، ولجمالِها، ولدينِها، فاظفر بذاتِ الدِّينِ تربت يداكَ)وانا ضفرت بيهن كلهن لان بيچ

-او ابو الاشبال جاي تخجلني بس صدك انت ومريم ليش هيچ اسمائگم

-ابو الاشبال هو لقب اما سلمان الاغر لان انولدت بعيد الغدير الاغررر

-زين ومهجة مريم

سحبت يدي

-وتالي نبقى نسولف للصبح ونعوف ماحله الله لنا وماكتبه علينا ونثاب ونؤجر عليه

بدا يلمس يخطي ويداعب ويتغزل بعد ماگو مفر حبيت اجاري تقربه وحبه اجاري مشاعري أريد أحسسه انه رايدته واحبيه
لان خلاص أحترمته بعد موقفه وتفهمه لوضعي رغم جفاء مشاعري ردت كلام اكوله اله وتغزل بي شجعت نفسي حاچیته

-احبك سيد سلمان

_عرفت راح اكدر اخليچ حبیبه الیه حتى
راهنت نفسي على حبچ

آصواتنه وحبنه ترس الغرفه ختلت وجهي بين حنايا صدره ابين اله مو بس احبه انه الزوجه الي تحلم ان تكون اله زادت لهفته

وردد ورد
 ((الله وبالله اللهم جنبني الشيطان وجنب الشيطان ما رزقتني ))

-شنو لیش هذا الدعاء

-هذا الدعاء راح يكون بمثابة الشفره الخاصه الي من تسمعيها تگونین زوجه ذا ود وقرب

بدت اید تخطو علی گل متاح مسترسل
بحديث النبي الاعظم مطبق كل كلمه ((يُسْتَحَب للرجل  أَنْ يلَاعِبو امْرَأَته قَبْل الْجِمَاعِ  لِتَنْهَض شَهْوَتها ، فَتنال مِنْ لَذة الْجماعِ مِثْل مَا نَاله

قطع الكلام وهو يقرب مقرر بقول ابا عبد الله عليه السلام( اتقوا الكلام عند ملتقى الختانين، فإنه يورث الخرس)) حيث  نهي رسول الله صلى الله عليه وآله وسلم الكلام عند المجامعة خوفا ان يكون من هذا القرب ولد اخرس))

لزم رقبتي يتبع حدیث النبي محمد صل الله عليه واله ( لَا تُوَاقِعْهَا إلَّا وَقَدْ أَتَاهَا مِنْ الشَّهْوَةِ مِثْلُ مَا أَتَاك ، لِكَيْ لَا تَسْبِقَهَا بِالْفَرَاغِ)
ابتسمت اله ولان من حسن تبعل الزوجه ان تعرض نفسها برغبه  ابتسمت وكانت ابتسامتي ضوء اخضر مطبق قول نبينا الحبيب

((ألا إنَّ لكم على نسائكم حقًّا، ولنسائكم عليكم حقّاً))
وحق الزوجه على الزوج، وهو أن تمكّنه من نفسها للمقاربة غيرها من الاستمتاعات

گمنا سبحنه وگل خوف عندي راح وتلاشة شفت بنفسي تجردت من غفران الخوافه الغفران الجديده بسبب سيد سلمان الزوج التقي والي نور طريقي وطمئن قلبي

نمت ساعتين گعدت بتمام نشاطي شفت

سيد سلمان يغير ملابس

_صباح الخير 

التفت عليه  يسد سحاب تراكسودة

-اشلونج ياوجهه الخير ابقي نايمه

-نوميش هسه بلعشره گل ظني نايمه ساعه
ردت أكووم

فتح ايده مادهن

_وين رايحة

-اساعد عمتي

-ترى عمتچ من نسوان قبل تگعد بسته تریك الحجي وتتريك وياه

-وانتة ماجعت

-اعرف اسوي اگلي ارتاحي

-والله مبيه شي

- لا مووو اخاف عليچ

-احب اسوي ريوك الك واشارگگ بي

ابتسملي ابستامة عريضة وكلي
ـ من شوكت

-من اليوم

باس راسي وگال

- تمام راح اغسل وجهي وانزل قبلچ

گمت لملمت الغرفه على السريع فتحت الشباك و وهويتهه  والملابس الوسخه خليتهه بالسلة وبلمكنسه الكهربائيه كنستها على السريع.. عدلت الغرفة وگملت ونزلت

احس بنفسي خجلانه ماادري ليش اتخايل كلها تعرف شنو صار بيناتنا وصلت للمطبخ لكيت سيد سلمان كاعد بلگاع  يم امه جدامه صینیه  فارغه

يضحگون

_هاااااااا يمه سلمااان دشووف وجهك اشلون يلوك اله ياصباح الخير

_شنو يمه قبل مااستاهل تگولین صباح للخیر

-لااااه حشاك بس مابيه سالفه والضوجه مترزه وجهك بعد سيد ويضوج تحس الدنيا مغيمه

سلمت گعدت یمهم

-صباح الخیر

-هلااا یمه صباح النور اشلونچ بنیتي

-الحمد الله خاله

-شوووف مرتك اشلون الوردي يشع على وجههه

-اي يمه شفتي اشلون حلوه مرتي تموت بسببي وامكانياتي

-سلامتك يمه من الموت

-يمه دشوفي شامتها

-ولك يمه عين الحاره بارده عليگم

اجت ريام جايبه غراض دولمه وكعدت وكالت

_يمه فدوة الخوي وضحگته

_هلاا بخيتي الحنينه

طلع نقاله وهو يغمز الي

التفت الامه

-والله يمه مشتاق الاختي منى شوگت تجي مو طولت صار هوواي وكالت تجي اليوم

-اي والله يمه حقك صدك راحت للهند و الايران وهل روحه روحه باقين على المخابره حتى ماطفي نار المحبه

_خاااف ماگدرت  تجي تريد تبقى هناك يم رجلهااا لحد مايكمل مراجعته بعد عمليته

-ماادري ييمه

حجت ريام
_لاا ماتجي على اسبوع اليجي يگملون مراجعة

-اووف يمه ابوي مااعرف ليش يزوج خواتي الولد صحبانه

-يمه لان يعرف صحبانه ناس يخافون الله
ويگلك يخافون الله بناتي احسن من المانعرفهم

-الله يسهل ييمه الحرمه تتبع رجلها وين مااايصير مادامه زلمه يخاف الله
وان شاء الله يمه نوار همين يرجع بالسلامه ويصون خيتي والله هواي  شتاقيت للمريم

-الله كريم بس لاااااااااا تفكر بخواتك زايد البيك مكفيك
وراك شغلك

صبيت چاي اليه والسيد سلمان تريگنا خفايف طلع سيد سلمان وانه رتبت المطبخ ويه عمتي وريام

عزلت البيت مسحت الطارمه بين التنضيف الترايب صار وقت صلاة رحت صليت وقريت زيارة عاشوراء

لگیت عمتي وريام  مگمله دولمه  وتمن العنبر وسوب الحم  وانه لگطت الخضره سويت زلاطات والبن وطرشي

اجة سيد سلمان صعد سبح ونزل تغدينا وگعدناا نسولف وية ‌ريام وتحشيشاته موتتنه من ضحگ وسولفلي على خواته ومقالبه بيهن تالي كل واحد راح لمكانة ياخذ قيلولة الضهر

صعد سيد سلمان فوك وعمتي گلتلي گومي ورة رجلچ
مبين تعبان

-صار عمه

كمت صعدت رحت للحمام سبحت وبدلت بثوب قصير اصفر خفيف واجیت لگیته متمدد وصافن على السكف..
مشطت وتعطرت وخليت حمرة خفيفة وكحل اجیت يمه وگتله
ليش صافن

_صافن افگر بيج حلم وصار حقيقة وصرتي بين ايديه

ضحكت..
واني هم افگر بيك وگلت شوگت يجي اشتاقيتلك

_تعالي واني اكثر موساعات عبالك عايفج ايام

الله وبالله اللهم جنبني الشيطان وجنب الشيطان ما رزقتني ))

ابتسمت اله وعرفت مغزى الدعاء لان هنا تبدي لحظات الحلال الحقيقيه في القرب الاسلامي الصحيح من منطلق الحديث النبوي

" لا تواقعها إلا وقد أتاها من الشهوة مثل ما أتاك لكي لا تسبقها بالفراغ"نعم أن تقبلها وتغمزها وتلمزها فإذا رأيت أنه قد جاءها مثل ما جاءك واقعتها))بعد نص ساعة رحت سبحت وهو سبح اجى يمي

_هسة واحد ينام مرتاح

-انت فعلا نعمه اشكر الله عليها

-،وانتي حسنه اثاب عليچ

كعدنه العصر نزلنا اثنيته نضحك ونسولف لگیت عمتي مسويه چاي وريام مسويه كيكة وكاعدين يم عمي

راح سيد سلمان باس ابوه وعدل كعدته
كعد ياگل السيد و شرب چاي  قبل لایطلع گال

-راح اجيب عشاء لاتسون شي

صاحت ريام

_ابو الاشبال مشتهيه شاورما صاج ومقبلات

_تدللين ريووم

امه
_عليمن هذا الصرف خير موجود بالمجمدة طلعي ونسوي التريدي

_لاا يمه اني ناذر نذر عشة 

ـ شنو يمة تحقق النذر

ـ اي يمة الف الحمد لله والشكر اتحقق وهسة اريد اوفيه
يحچي ويرفع حاجبه و يتبسم عرفت قصده شنو..
نصیت راسي وضحكت

طلع وانا اتناوعلة بفرحه لان كلش حلوه خوتهم وحنيتهم  اجت يمي ريام بين سوالف وضحك خلص النهار

صلينا المغرب وأجة السيد وجايب العشاء  ووياه علاگة بيه ملابس

انطه علاگة الريام اخته.. والامه علاگة بيه فوطه ودادشة الابوه

واني تقرب مني نطاني علاگة مبتسم

-وو هاي الچ بس رب العلمین یرزقني بعد اجيب الچ الاحسن

فرحت لازمه العلاگه لان ذگرني ويه اهله من فرحتي أخذت العلاگة صعدت فرحانه فتحتها لگیت تراكسود قطني بنفسجي
وقميص نوم احمر

اخذت التراكسود وكفت جدام المرايه فرحانه بي

دخل سلمان وهو يتنوع من شافني  گال

_عجبچ حلو

_ تسلم كلش حلو

فرحتي بهذا التراك مصايره اول مره احد ينطيني شيى خاص بية

لان من چنت بیت اهلي من امي تشتري التراك انه وعقيله نتشارك بيه ومن چان جدي عايش يجيب العقيله ملابس من يزغرن عليها تنطيني ياهن يعني ما بحياتي اشتريت شي خاص بية والي وهاي بزواجي صارت اول مرة امتلك هدوم تخصني.......

سلمان //غفران مو بس تعب العمر لا هي زوجتي الاحبها الانسانه الكيت نفسي بيها
زوجه وحبيبه وحقيقه مثل مااردتها بس الخوف من القادم الكان عدها مقيدهه

رغم تركي للشغل ويه عمي لكن حاشا لله ان يترك عبده محتار لان من اتعبني الدنيا  اولحـياة أقابـلهـا بتنـهيـدة متُـبوعة
بـ "يا ابا عبدالله" فـ يـهـون كُـل شـيء ...

بگلمة(يا حسين)مابقيت محتار لان خلال فتره قصيره رجعت اخذ دروس بلمعاهد دروس علم النفس ،وتنحسب المحاضره اليه عشره الف اخذ خمس محاضرات بلاسبوع

عمي حاول يرجعني للشرگه رفضت لان مااريد احط نفسي بموقف يهين رزقي رفضت رفض تام..

عندي مبلغ حاطة للطوارئ وقررت اعتمد على نفسي و خبرتي بلاعمال الكتسبتها من شغلي ويه عمي قررت افتح محل سيراميك وبلوك بديت المشروع على التصريف،لان اكو ناس تعرفني كد الثقه

وهنا مثل ما رب العالمين مقرر اليه ابقى مدير نفسي
فتحت المحل بس شوي السوك ميت ماكو رجل
مايأيست لان مخلي صوب نفسي كل شيء بيد الله اذا اعطا فهو رزاق واذا منع فهو المانع لگل سوء

بيومها فتحت المحل وتعبان ضايح لان كلشي مبايع وبصدفه جاي اساعد العمال طلعت من المحل ألتقيت بسيد مهدي ماعرفني لان چنت انزل السیرامیك المحلي ويه العمال  نزل سلم عليه

-السلام عليكم سيد

-وعليكم السلام ابو علي شوو هنا جايه ترى تراب

-چنت راید شغلات انشائيه الاخويه سيد مجتبى انا وجدي نسويله مفاجاه نريد نبني اله صيدليه.واريد من السيراميك الى السمنت من محلك يطلع

-صار سيد نجهزك بالتريدة اتفضل

-لا مستعجل وبارك الله بيك واي شي تحتاجه مايردك اله للسانك

-متقصر يبن الهواشم متقصر

- خليهه اگلك يخوي من تضيق عندك بس كررر دعاءمن سطرين

"اللهم إن الأمر أمرك، والخلق خلقك، والقضاء قضاؤك اللهم إني وكلتك وفوضت أمري إليك

-اي حافظه سيد واعرفة

ـ بارك الله بيك..گرره  وسلامي للعائلة

ـ يوصل وبادلنة السلام للعائلة

ـ ممنون يخوي..

،،،، راح من يمي السيد وهنا احس من صدك هل انسان وجوده باي مكان ينطي طاقه او مااعرف لان چنت ضايج شهر مفتح المحل ومحد مشتري وهو اجى اشترى المهم بقيت صافن عليه لين ماراح من يمي

رجعت للبيت واعرف تاخرت على غفران لان تريد تكص صور حتى اجهز الها فايل تقدم على حوزة ادرس البنات الصغار

لازم ادخل هاديء مطمئن لان اعرف هسه هي متعصبه او اول مارح ادخل ردت فعلها تكون جنونيه لان بهذا الشهر عرفت غفران بيمن تفكر وشتحس لان وياها حياتي حلوه

دخلت وبسرعه للحمام الجوه سبحت البيت سكون تام صعدت بلملابس الداخليه فتحت باب الغرفه لكيتها لابسه ومنتظرتني اول مادخلت سلمت

-السلام عليكم

-وعليكم السلام وووووين ليش اتاخررت

حاولت امازحها

-عووفي ليش تاخرت المهم اجيت وسبحت بس اغير ملابسي

گامت مقهوره

-ماراح تاگل

-لااا حبی وصبر  گلبي الله اليوم رزقني انكمل گلشي يخص الحوزه وناگل بلمطعم
مشتهي مندي من الممطعم مال صاحبي

- مااااشي حبيبي الله يرزقك اكثر

تنهدت جريت نفس ابسرعه متصيت غضبها الحمد الله ماخذتني فلاحه ملاچه

صاحت وهي تلبس الحذاء

- شنو تحجي ووووويايه

-لاااا حبيبتي ويه نفسي

لبست قميص الاسود وبنطلون اسود والساعه والموبايل تعطرت مشطت شعري
طلعنه سوه...
رحنة كملنة اجرئات المعاملة وقدمنة ورجعنة بقی یختبروهاا  اخذتها للمطعم واگلنه سوه

صار ثاني يوم اخذت غفران لاهلهه رحت للشغل آفكر بمريم ونوار صارلهم فوك الاربعه وعشرين یوم رايحين الاربیل

اخذت التلفون دگيت على رقم مريم بس ماشالته..  عذرتهه اكيد ملتهية وية زوجهه فد ساعتين وارجع اتصل..

خلصت شغلي ورجعت للبيت بعدني ماواصل بداية الفرع مال شارعنه شفت بنية مثل هيئة مريم طلعت من بيتنة

وشفت  وسيارة رجعت عليهه بگ صعدت السیاره ومشيت سريع اريد اشوف منو هاي بس مالحكتهم

بس هذن نسوان اثنين لابسات عبي ورجال يسوق بس ماميزت منو البسيارة
طبكت سيارتي نزلت للبيت الباب مفتوحه راسا دخلت لگیت ابوية متخربط وواگع بالگاع وامي تحاول تشيلة بس متگدر

ركضت عليه شلته حطيته  بالفراش...

-يلة یله یااابه یله يااابة عیني شلته وخليته على السرير دفعت الگرسی گعدت علی التخم

-یمه ااآ شبي ابویه يمةة شنووصار

ـ مو ووگت الحچي يمة مو ووگت حچي جيب هذاا مال الضغط بسررعه شووف ضغطة يلة يمة بسرعه

گمت انهت رحت للگومدي طلعت الجهاز رحت قسته لگيته كلش مرتفع الضغط
طلعت چیس العلاج‌‌ نطيته الدوة الخاص بالضغط مسدت راسه صدره الی ان شوي هداء ونام

طلعنة اني وامي برة  الغرفه سديت بابها

-هاااا يمه شنو شبيةابويه انت اعرف بيچ بس ليش واگع بالگاع

،بقت ساگته متحچي اشوف حيرة چبيرة بعيونهه..

تقربت علیها
-اااااشبيچ يمة ااحچي شنوووو صاير

التفتت وری  ظهر امي يم باب الصاله شفت جنطة صغيرة مال ملابس...
تقربت اريد اعرف  المن هاي الجنطة

گتلها

-یمه هاي الجنطه الزغيره المن من خواتي المنى لو مريم

ـ مريم

ـ يعني هاي الطلعت من بيتنة مريم

ـ اي يمة هي

ـ وشنو صار ليش مابقت تسلم علينة

ـ غير ابوك هيچ صار حاله ما اعرف شبي هو شافهه وانگلب على غفلة يصيح ويعيط  وانفعل

ـ مريم!!

،ـ اي والله يايمة

ـ ليش شنو هو چان زعلان عليهه قبل لاتسافر

ـ والله يمة گلشي ما ادري متفاجئة من ابوك حالي حالك وهي ماگدرت ابقيهه هنا دفعتهه طلعتهه گلتلهه روحي لبيت رجلج من يصير ابوچ زين اخابرچ..

ـ  يعني ماعرفتي شنو صار

ـ هاي شوفه عينك وين اكدر احچي وافتهم من ابوك

ـ مو شرط ابوية هسة اروح لمريم وافتهم منهه

ـ يمة لا تتاخر زوجهه بعدة مريض

ـ لا ما اعتقد لان چان يسوق سيارة ووياه مرة ثانية غير مريم يمكن امه

ـ ها صلوات يعني صار زين.. 

ـ لازم اروح افتهم شنو صار وبالمرة اشوفهه لان مشتاقلهه  مگانهه خالي.  

ـ يمة اكعد اتغدة شبيك مستعجل

ـ من ارجع حبيبة انتي

-الله وياك يمه

طلعت رغم تعبان بس الفار يلعب بصدري صعدت السيارة شغلتهه توجهت لبيت ابو ارشد مشيت سريع لان اريد اوصل وافتهم من مريم اخذت تلفوني اتصلت همين متجاوب..

صار عندي قلق وارباك  شمرت التلفون ودست بانزين

رعد///
طلع ابوية السلاح وراد يرمي نورة صرت جدامهه حتى احميهه

-بووويه  ليش رافع سلاحك

ـ الناااااار ولا العااااار
النااااااار ولا اااااالعااااار ياعااار جايبليي الولد الزوجته بنص هالناااس لابس عباااية وووولك الچان يرجع سكرااان مطووطححح بنصاااص اللياالي حولته الیه بنيةةةة  وللك عااار ممااافكررت بشكلييي بوجهييييييي جدااااام هالناااس شجاااابك تريددد تفضحني. ياااانذذذل

ردت نورة

ـ يابة والله هالشي مو بيدي چننت اتمنى ارفع راسك موو بیدي

عاط ابويه

ـ أسگتيي نورة انتي ماسويتي شي يگسر الووجه الذنب ذنبببه هو لان چان يعرف بوضعچ وساااگت ويعاملج على انچ وولد وهو الوحيد اليعرف انتي بنت یانوره

عاط ابویه‌

-رررعد هذاااا اخر حچي عندك

-اي بووويه اخررر شي

ردت اندار لان  انصدمت من گلام آبوية انجن جنونه من الحچيتة رفع المسدس وصوبة على نورة دفعتها خليتهه بضهري

سمعت صوت طلقة انثارت مااأحسيت بشي بس جچت مرعوب على اخوتي وامي ونورة لا ایتصاوبو اشوف اخوتي التمو عليه وارشد راح يرگض على ابوية يتلاوة وياه حتى ياخذ السلاح

بعدني ممستوعب الصار واگف بطولي ثواني وحسيت حرارة تچويني بجتفي اليمنی اريد احرك ايدي ادفع الحروره گل ظني حديده حاره ادفعها من ايدي

نگتت ایدي والحروره بعدها مگدر اسند نفسي باوعت الجسمي  انزف دم

امي ونسوان اخوتي يتعايطون عيوني على الوجوه اريد بس سگتهم ماگو فايدة.. 
عطت

-بسسسس ماااااابية شي لااااااااا تخافون يمعودينن

مريم /// وصلو بيت اهلهم بس ماطيق اباوع لصفحتهم  ولا ااشوف حتی باب بیتهم‌ من البچي حسيت بدوخه قوية رجيت راسي على كپگشن الگدامي اشهك وابچي من موقف بابا

طلعت التلفون من جنطتي لگيت سيد سلمان متصل مرتين  متت بچي ابوية منعني احچي وياهم لاني عار

قفلت التلفون بقيت مدنگة مرجية راسي على الگشن واباوع على گاعية السيارة غمضت عيني وبقيت اردد حسبي الله ونعم الوكيل

نورة/////  انصدمت من عرفت ابوية يدري بحالتي ورغم هذا ماقبل يصححلي جنسي(جناآا) عليه دمرني وجاي هسة يحاسبني على غلطتة هوة

خلال ثواني مو اااگثر رفع ابویه سلاحه یرمي طلق  بس 
انضرب رعد طلقة تفداني بروحه هالمخبل وگع رعد بالكاع  ساجد ووبدة الصياح والعياط بعدني ما متعود على دور المرة

لا اعرف اصرخ ولا اعيط ولا‌اعرف الطم  مثلهم او ‌مثل البنات بس عطت بصوت عالي باسم

- رررررررعد

الگل سمع ووگعدت بالگاع يم رعد اهوس على ابوية..

عفتهم وطلعت اركض للسيارة اريد ادخلهه للكراج حتى اشيل رعد وانقله للمستشفى فتحت الباب وصعدت اركض.

فزت مريم يمكن چانت نايمة

گالت
عباتج عدليهااا فهميني شنو صار نورة سمعت صوت طلقه

ـ وووچ ررعد اابوية قتلة

ـ شنو قتلةة

ـ شخطت السيارة ودخلت للكراج

اجى عليه ارشد وصادق اخذو السويج مني

گال ارشد
ـ جيب جيب السويج اناا اخذة امشو خلي نشيلة

بقيت واگفا برة وعيني على اخوتي يتصايحون وية ابوية

التفتت لكيت الشارع انترس بالجوارين ومن ضمنهم ام ابراهيم نظراتها وحرگاتها الامي اريد اعرف وين شتيفتها

تذگرت هاااي ام ابراهيم الي امي اشترت منهه بياض وجهه بنتهه الصغيرة ونسبته لمريم واگفة هي وچناينهه بناتهه يباوعون عليه حسيت بخجل مو طبيعي يمگن عرفوني

صديت وجهي عنهم شفت امي تبچي تباوع على ام ابراهيم رادو يشيلون رعد بس ماقبل عاط بيهم وصاااح بغضب

-اااااااگدر امشي

لازم چتفه والدم ترس ملابسه ترس قمیصه الصحراوي صار احمرر گله یمشي بعصبيه وجع

أستوهم طلعو للطرمه دخل اخو مریم سيد سلمان حسيت المصيبة گملت..
رغم مریم مصدومه وماگو اي تفسير بوجهه حتى دمعه مانزلت

بس متاكد لو تعرف اخوهه اجى راح ينخطف لونهه بالزايد

یارب آشلون فضايح هذا اليوم يااااااا ربي دخيلك طلعنة منهه

سلمان///
وصلت شارع بيت ابو ارشد لگيت هواي ناس ملتمين يم باب بيتهم استغربت وراح بالي على اختي مريم..

طبگت السيارة نزلت اركض قبل لا ادخل بيت ابو ارشد شافتني وحدة لابسة عباية واگفة برة شگلها میطمن‌

گال

ـ ياااااا شوفو حبایب  منوووووووو اجی.
تقربت علیه گالت

- اگلك عيوني أانت مو سيد سلمان موو

وگفت بطارمه

ـ اي خوية اني شنو صاير ابيت ابو ارشد

ـعیني اااااانة جنتهم اااام سكينه..  الحك ادخل جوة ترة رجل اختك ابوه ضربه طلقة

ـ همييين اانضرب نواار طلقة

ـ ههه خطية ميدري

ـ مفتهمت قصدهه شنو
دخلت اركض للطرمة چانت الدنية مگلوبة باوعت لگيت ارشد وصادق ساندين رعد انتبهت متصوب بچتفة اليمنة شافوني جمدو بمگانهم....

تقربت الرعد گتله بخوف

-شنوووو القصة الف سلامه علييك ليش ضرربگ ابوك

رعد/رفعت راسي وشفت سلمان جدامي انصدمت بشوفته...
جاوبته انهت بسبب النزف
الله يخليك سيد بخير لاتخاف بالغلط دينضف سلاحه وثارت منه طلقة

جاوب بحیره

ـ بس یاصاحبي شووو گالو نوار المتصوب طلعت انت ولك خو ما متأذي

ـ لا تخاف البزونه بسبع ارواح وانا مثلهه هاي زلاطه عدنة بالجيش

ـ امشي امشي خوية خلي اوصلك للمستشفى

رد ارشد
ـ لا رحم الله والديك سيارتنه هيانهه لاتكلف نفسك

ـ تروح وترجع بالسلامه يخوي

لازم چتفي متاذي طلعت امشي ويه الولد وصلت للسيارة بقيت واگف ماريد اصعد
خایف علی مریم ونوره

شفت سلمان وگف جدام سیارتي شاف اخته مريم حضنهه وحضنته...
الولد  يريدوني اصعد بس ماگدرت رجلية شگلت بمگانهه خايف على مريم من سلمان اذا عررف

چان يحچي وية مريم وصاح بصوت عالي
ـ وين نوار ااااشو ماااااااگو وووووين مختفي رجلچ مریم

#یتبع