رواية عشق المومنين(أبناء الساده) الفصل الرابع وستون 64 - بقلم نازك الحمراني

السلام عليكم
أسألكم الدعاء لروح اختي.. المقرر كان ينزل البارت البارحه لكن ظروف قسريه منعتني

......
رساله لك /
الامام المهدي عج
يريد انسان يراقب نفسه ويحاسب نفسه بستمرار ..؟
هل راقبت نفسك وحاسبت نفسك ام لا .
لاتدعي الحب وانت لست مطيع لحبيبك
الحب
تضحيه ... وترك الذنوب .. والمراقبه ولمحاسبه

اتكلم معكم عن تجربه شخصيه
اذ اردت ان تتخلص من ذنب عاهد امامك واكتب في ورقه ان لاتفعل كذا وكذا لمده ٤٠ يوم وثق انك ستنجح

ألشوارع فارغه ولرعب يحيط حتى الهوى كأن عام ٢٠٢٠اتعس السنين كئابه علينا لان رغم الحروب رغم حتى الاحتلال بقينا نتواصل مع بعض نحاول نخطف من الوقت واحد يشوف الثاني واحد يحضن الثاني

رغم گلشي صار بينا وعلينا لكن كورونا جعلت من عدنا اشخاص جلدين قاسيين ظهرت أتعس شي بينا ظهرت نفوس مريضه المتخبيه خلف نفوسنا الطيبه

كورنا درس تهذيب لكن الظاهر تهذيب لحد الجلد
بحيث القسوه الفرضتها گورنا علينا گانت مو فرض گد ماگانت مرض نفسي تحت أمراضنا
گد ماچانت صفه متغطيه جوه صفاتنا الورثناها من ام واب علمونا على الطيبه لكن گورنا خلتنا ننسى تربيتنا ونمشي ويه متطلبات ألعصر الحديث الئيمه

شگد حميت نفسي وردت ما أنصاب وشگد حافظة على روحي وردت أبقى سالم ومايقربلي مرض گورنا لگن القدر گال گلمته

أول مادخلت او أول خطوه مشيتها داخل حديقه ألمستشفى الي چانت جميله بسبب الورد والخضار
وترتيب الزرع بطريقه مستطيله لگن جمالها ماشفع
لان ألبوئس يحيط زرعها حياطينها حتى العصافير أختفى تغريدهن

ألوضع خرج عن السيطره والامر متروك للسماء مثل ماگالو رؤساء البلدان ومثل مالمسناه لان حتى الناس مخبوصة باهلهم المرضة اليجيبوهم وبيهم بعض المرضى يتوفون لا أگثرهم

الاعصاب نهارت على گف عفريت بحيث گامت تصير هواي مشاكل بين الگادر الصحي واهل المتوفي واحيانا ويانا توصل للسباب وتوصل المشاكل للتعدي بالضرب والتهديد

ـ لا اله الا الله صح نفس الشي صار ويايه انا وزملائي الناس اعصابهه تعبانه بس مايحقلهه تأذ لان احنة نأدي الواجب بتعب

اخذ سيد حامد نفس عميق شوي واتنهد كوة يتنفس حرك نفسه وعدل نومته نزل كمامات الاوكسجين وعدل كمامته الزرگه

وگال

ـ مو بس هذا الشي تعبنا اريدك تتخيل أشلون
الصحه ادز النة عدد من الجثث بسيارات المستشفى
مكتوب الاسم والرقم على كل جثة نستلمهم ونقوم بالواجب ويبقون بعض اهل المتوفي واكفين بعيد منك ومن جثة قريبهم

بحيث المسافه جدا بعيده بين الاقرباء وميتهم واگو حتى مايدخلون يشوفون ميتهم اشلون انغسله لان يخافون على نفسهم وبعضهم اصلا ميحضرون ولا يوگفون بعيد يذبون المتوفي ويطلعون...

ـ لا اله الا الله هيج البشر ينسى العشرة

ـ اي أهواي مرضى ذبوهم اهلهم أتخيل بين مانغسل واحد ونخلصه تجينه خمس ست وفيات يعني تجي بلساعه الوحده فوك العشر جثث لان هواي وفايات
ينطونه اوراق ورقم الجثه نغسلهن غسول شرعي

بعدها أنكفن ونصلي عليهم صلاة الوحشه وندفنهن ونوزع الرقم واسم المتوفي على القبور نرسلة للمستشفى الجابت الجثه

_الله يساعدكم يعني گل الاهالي هيچ يتعامولون مع ميتهم متناسين أحبابهم

_لا لا لا يخوي أگو ناس تلبس گمامه وتوگف يمنه حتى يردون يذبون نفسهم على الميت واحنا نلزمهم أگيد مو الگل أگو ناس طيبه أکو ناس الحنيه تغلب عدهم حتى على المرض وانت أعرف بس الي يترگ الميت ويروح هلشي صعب علينه گلش

_ليش لأن أمنو أحبابهم يمگ وراحو

_أي أگيد لان يصير عدنه ارباك وتوتر و يجوز يتغير الرقم واسم الميت يروح على غير جثه لان بسب الاعداد يكون وضع المتطوع هلكان ومحطم نفسيا بسبب الوفيات والاعداد الجبيرة النشوفهه اولٱ

ثانيٱ يكون ممركز بسبب الحر و الكمامه اللابسهه و البدله النايلون المبطنه وجواها ملابسنة عانينة من الخنگة وضيق تنفس بسبب الحر وتعرف الحر عدنه يبدي من شهر الرابع فكيف بشهر السادس والسابع يعني ضروف قاهرة اشتغلنه بيهه واغلبنه گان ميتحمل الحر ويفتح شوي من بدلته وگمامته

-صح انا شغلي ميداني بالمستشفى والحر چان يخنگني شحال انتو بالمقابر تشتغلون تغسلون وتدفنون لوحدكم الله يعينكم...

زين سيد حامد أشلون انصابيت يارفيقي وصاحبي يعني چنت فاتح بدلتلك شلون لامست المصابين

أختنك وهو يكح رجعت خليت الاوكسجين على وجهه..

_ارتاح لا تحجي رفيقي لااااا تحچي

غمض عيونه بتعب وانا كعدت على كرسي مقهور عليه ودائما علاجنا باشد حالات الحزن نلتجأ الزيارة عاشوراء طلعت من جنطتي گتاب الإدعيه وبديت أقراها اله، خلصتها قريت زيارة الناحيه وصلت الى

"اللَّهُمَّ إِنَّكَ أَمَرْتَنَا فَعَصَيْنَا، وَنَهَيْتَ فَمَا انْتَهَيْنَا، وَذَكَّرْتَ فَتَنَاسَيْنَا، وَبَصَّرْتَ فَتَعَامَيْنَا، وَحَدَّدْتَ‏ فَتَعَدَّيْنَا، وَمَا كَانَ ذَلِكَ جَزَاءَ إِحْسَانِكَ إِلَيْنَا، وَأَنْتَ أَعْلَمُ بِمَا أَعْلَنَّا وَأَخْفَيْنَا، وَأَخْبَرُ بِمَا نَأْتِي وَمَا أَتَيْنَا، فَصَلِّ عَلَى مُحَمَّدٍ وَآلِ مُحَمَّدٍ، وَلَا تُؤَاخِذْنَا بِمَا أَخْطَأْنَا وَنَسِينَا، وَهَبْ لَنَا حُقُوقَكَ لَدَيْنَا، وَأَتِمَّ إِحْسَانَكَ إِلَيْنَا، وَأَسْبِلْ‏ رَحْمَتَكَ عَلَيْنَا.

اللَّهُمَّ إِنَّا نَتَوَسَّلُ إِلَيْكَ بِهَذَا الصِّدِّيقِ الْإِمَامِ، وَنَسْأَلُكَ بِالْحَقِّ الَّذِي جَعَلْتَهُ لَهُ، وَلِجَدِّهِ رَسُولِكَ، وَلِأَبَوَيْهِ عَلِيٍّ وَفَاطِمَةَ، أَهْلِ بَيْتِ الرَّحْمَةِ، إِدْرَارَ الرِّزْقِ الَّذِي بِهِ قِوَامُ حَيَاتِنَا، وَصَلَاحُ أَحْوَالِ عِيَالِنَا، فَأَنْتَ الْكَرِيمُ الَّذِي تُعْطِي مِنْ سَعَةٍ، وَتَمْنَعُ مِنْ قُدْرَةٍ، وَنَحْنُ نَسْأَلُكَ مِنَ الرِّزْقِ مَا يَكُونُ صَلَاحاً لِلدُّنْيَا وَبَلَاغاً لِلْآخِرَةِ.

هنا فز من نومته يگح جريت الكرسي تقربت عليه گلي

-ماعفتتني ياسيد مهدي

ـ شلون ترضاهه اعوفك

ـ ليش عوفني سيد عوفني

ـ لو انت بمكاني وانا المريض تعوفني؟

ـ انت رفيق دربي الاخ الماجابته امي

-أذن لااااااااتطلب مني اتركك..
ويا عمي لا تخاف شوفني گدامك گلشي لابس وماخذ احتياطي ومأمن نفسي صاير أشبه جايسون ابو المنشار گد

أبتسم وجاوب

ـ بس أگيد اختنگت من البدلة والحر منا أطلع روح ارتاح وانزعهه

ـ طالما وياك وانت بخير انا مرتاح.. هسة گلي اشلون صرت اكو شي يوجعك

-الحمدالله شوي احسن

_اجيب أگل الك هسه

_لا لاااااا وين اشتهي حلگي مررر اريد. أسولف وياگ

ـ بيك حيل تسولف

ـ اي بس انت بيك حيل تسمع

ـ كلي اذان صاغية سيد.. گول گمل گلامك

ـ تدري ليش لازم أگلك وهاي أمانه يا سيد مهدي البعض بدة ينسحب من عمل الغسل لان الوفيات كثيرة و الاصابات اكثر وگلشي بحاتنا مايجي بسهوله حتى الشهاده ألها ناسه الخلص بحيث النسحبو تدري ليش مانسحبت

_ليش رفيقي

من چنت طفل زغير والدي الله يرحمه، دائما قبل لا أنام يسولف اليه عن عن الحمامة الي أنقهرت وحزنت على رؤية النبيّ إبراهيم عليه السّلام وهو وسط النار جمع شعلها ألنمرود واعوانه الحمامه گد مانقهرت على النبي ابراهيم وهو وسط هاي النار المرعبه طارت حتى توصل للنهر واغترفت من مايخ بمنقارها، وراحت تسكب قطرات الماي فوگ النار العظيمة عسى تگدر تطفئها!

شگد أحزن وانقهر من أتخيّل كيف يتسرّب من منقارها الماي وهي بلطريق، وكيف أنّ النمرود حتى ماشافها ولا عرف بوجودها بس ماگدرت تطفي ولو جزء من نار النبيّ.

وافرح دورات الحمامه حاولت بالقليل الي عدها والله وحده من رأىٰ مساعيها مهما چانت بسيطة على ونبيّ زمانها.

اليوم، أيقَنتُ أنّي مثلها، ما أملك سوىٰ بضع مقاومات صغيرة أرشّها علىٰ نار صاحب الامر عجل الله فرجه ناره المستعرة منذ ألف عام، فلا النار تنطفئ ولا نماردة الزمان والمذنبين يهتمون للي جاي يصير ولي جاي ننصحهم بيه

_وليش تحب قصة الحمامه ونار النمرود

_لان أنا وانت وگل شخص صاحب دين مثل حمامة نبي الله إبراهيم، أجنحَتنا ضعيفة هَوَت بينا آلاف المرّات في الطريق لان أعداءمولاي عمالقةٌ كالغيلان، مسعورون ككلابِ ، يهشّمونا بغياب مثل جرّة فخار.

أحنا جاي نحاول بلگلمه هم يرسلون علينا جيوش من قائلي الگلام

وجاي نحاول مره ثانيه بلقتال سالت دماء أشرافنا ونگرت وهسه جاي نحاول بلجهاد مع مرض خطر وهم راح يجي من يقتل جهادنا

لگن عزائنا أنّ الله يرىٰ،و صاحب زماني- لايضيع لديه شيء.

طوبى لمن نال الشهاده دونكم
ماهزهم صوت السنابك واللهيد

_الله الله ياسيد حامد لهذااحب اسمع الك توصل الحجي الداخل گلبي گمل حبيبي

_بعدها صار الثقل علينا احنة البقينة نجاهد لوحدنه لاجل انسانيته والاجل فتوة المشارك اجره اجر المجاهد والمتوفي شهيد هل شي خلانة احنة القلة نثبت بصفوفنه و تبقى ثابته ماتتحرك لكن هواي ماكدرو يكملون بسبب التزاماتهن او اسباب ثانية

وحتى النساء المتطوعات الغادرو اجن اخوات مؤمنات بمكانهن جدد لان صار نقص حاد وهالشي يحتاج وقت وتدريت اقل شي اسبوع

- وليش انسحبو

-لان اسابيع ويجوز شهر مايشوفون عائلاتهم واحبابهم وهنة نساء مو مثلنة احنة الرجال نكدر نضل خارج البيت هنة محكومات من ازواجهن او عائلاتهن فصار نقص حاد بين النساء

بقيت مستمر بالجهاد
لان انا غريب بعالم الغرباء،
وحيد في عالم الاهل والناس
المن ارجع ووالدي وامي تحت الثرى
المن ارجع والبيت الجهزته للخانوم ماصارت اليه وضلت بس الاماني
المن ارجع ولا اهل ولا عائلة ولا اقارب ينتضروني

ـ يعني مافكرت بيه انا اخوك وعضيدك وصاحبك

ـ انت الوحيد الماغبت عن بالي بس اعرف بيك جنت بالخدمه وحالك من حالي انتم الجيش الابيض ثقل عليگم

ـ طيب چان فكرت بالخانوم ترجعلهه صاحي وتگون الها زوج وسند وحبيب

ـ هووو لو بالايد چان كل المنتسبين رجعو سالمين لاهلهم بلا ماينصابون

ـزين انت ماخابرتهه بعد ماخابرتك تطمن عليك عندي نقالي خابرها. صوت وصوره انت نقالك جهاز الصرصر مابيه هاي الخاصيه يله نطيني رقمها

ـلااااا سيد ابد ماريد اتشوفي بهيچ وضع واصلا انا قطعت علاقتي نهائي

_عود صدك تحچي ليش هيچ

_سيد مهدي كثر ماأحبها تحبني ماريدهه تتعلق بيه اكثر لان اخر مكالمه چانت منهارة وتبچي ورافضة اتطوع وحالتهه تعبانه كلتلهه لا تتصلين ولا اتصل بعد لأن گلشي يصير واحتمال ماكدر اتواصل ويأچ وهمين ماأريدچ تتعلقين بشخص مقطوع من شجره.

حجى هل گلام وثغب يبچی بلوعة عاشق حبيب
گمت طلعت منديلي مسحت أدموعه اصبر عليه

-سيد لا تبتأس أنت مؤمن وان شاء ألله ازمه وتعدي وانا رااااح أزفگم بيدي وأگمل ترايبات بيتك وتصير الفرحه فرحتين فرحه شفائك وفرحة زواجك
هاا ألبيت مالتگ رطب فد مره راح اطلع العمال ارتبو بيتي شغلهم گلش حلوووو وحتى راح أثثه ألك

-لااا تصبر عليه أبو علي لا تصبرر ألشوق جارح والالم قووووووي اااادعي ربك ان يلهمني الصبر على تحمل الالم وتحمل الشوق لان ثنيهن دمرني

جسدي البالي لاااااايتحمل لاااا يقدر شوق ألحبيبه نهش لحم جسدي
والمرض كسر عظامي

-رفيقي انت الصابر المحتسب شنو هالجزع

ـ لا استغفر الله ماجزعت أبد ولا حتى دخل گلبي لكن المشاعر فياضه.. احتمال بسبب المرض وشعور الوحدة والغربة الحسيت بي قبل لاتجيني

ـمااااا چنت اعرف بيك مصاب هواي سالت عنك من أسبوع أتصل وماگو رد تالي يلة گلولي

ـ لاااااااااااتهتم انت هم حقك مشغول بمهنتك واهلك أدعيلي ابقى على قوتي وجهاد نفسي يارب يارب ابقى مؤمن وصابر محتسب اوجاعي عند صاحب العصر والزمان عسى ان يخفف عنة غربته ووحدته احتسب اوجاعي عند امامي عجل الله فرجه عسى ربي يبريء أوجاعه من ذنوبنا

لزمت ايده رغم اصابته كعدت ساجد ابچي بحرقة عابد عاشق للظهور مولاي عاشق للبلاء الذي يغربل الروح من الدنس حتى تصعد لبارئها طاهره مطهره تشكي وجع الناس وجع النفس الاماره بسوء
همست

- سيد حامد لا تحچي هييچ

_لاااا ماضايج بس على شي واحد چنت ملتزم طول عمري على زياره عاشوراء ورى گل فريضه وملتزم گل صلاة الفجر أقراء زيارة الناحيه المقدسه بس من ألتعب قبل أصابتي بيومين ماقريتهم هذا الشي هم
حسسني بذنب

_بارك ألله بيك ولا تتوقع مولاي يزعل منك بس تترك رفيقك لاااا انا ازعل منك

ولا تحچي هيچ لانو حچيك معناها تريد تعوفني واااانا بالخيال رافضة فكيف بواقع حال اقسم بالله اموت بعدك وماااا أتحمل

أبتسم ودار وجهه اليه مسح على راسي

-لااااا لااا سيد مهدي عندك زوجه واطفال ينتظروك
وعشق زوجتگ وحليلتگ فاق عشاق الجاهليه

-أي.. واغلى من حليلتي وابنائي مااملك وهمة روحي البين جنبي واخاف عليهم خاصه حليلتي اذا ابتعدت عنها مو بس تشتاق حتى تخاف من كل الحواليها

حليلتي متحس بالامان الا ويايه ومتعلقه بيه وانا اكثر منها.. بس انت غيرر يا سيد حامد غيرر أنت صديقي الي فارقته أربع سنوات وتالي رجعت صداقتنا فلا تجازيني بلفراك أنت وانا نبلش بدروس أشبال الأمام

- لكل اجل كتاب مجاي أگلك أريد ألموت بلعگس عندي أموور هواي بحياتي ممسويهن عندي قرارت مستقبليه ودي أشتغل عليهن

_عمرك طويل بأذن الله

_وانت ديربالك على نفسك واولادك وزوجتك وامك واهلك اجمل شي بهالحياة الاهل مهما بدر منهم يبقون النفس اليهون عليك مصاعب الحياة وووومصايبهه

مسحت دموعي وعدلت گعدتي اشوف بوجهه سيد حامد وحسب خبرتي بالمصابين سيد حامد ميخلص من هالمرض احتمال چبير تكون نهايته بس سبحان الله القوة الي بوجهه وعدم خوفة من المنية وشجاعته ثار فضولي...سئلته

_سيد حامد واضح عليك ماخايف من الموت

- لاااااا لان راح التقي بارحم الراحمين الي يرحمني ويخليني برحمته ادخل الجنه واشوف امير المؤمنين يتمشى ويه السيده الزهراء لو اشوف نبي الرحمه وسبطيه واتأمل انجمع بالخانوم بذيج الحياة.اردد گلما أتوجع من جسمي واحس گلبي يوکف

"لكنني صبور يا الله، حين أضع ه يدي فوق قلبي مئات المرّات في الأيام التي مضت، يَارب يدُك أرحم من يدي وعطفُك ولُطفك أعظم من خوفي وقلقي."

فـ گل احنة بشر خطأء والميخاف من الموت فقط الانبياء والمعصومين وما انكر انا خايف لأن

-لأن شنو سيد حامد انت ماعندك اخطاء وذنوب چبيرة وان شالله انمحت بهذا مرضك فـ ليش خايف

- أبو علي خايف من ذنوبنا البينه وبين نفسنا احنة بشر يا سيد مهدي اگيد بيوم حچيت على احد او انتقدت او سويت شي حسبته هين وهو عند الله كبير وعسير.. خاف هالامور. لنشوفها سهله هي راح تحرمنه من رؤية ذو الجلال والاكرام والاحبه أهل بيت النبوه عليهم السلام

-لاااا انت ونعم منك مافد يوم اذيت بشر او سويت شي... والله غفور رحيم ياصديقي..

انتبهت على نفسي شجاي أاااااحچي وشلون اتجراء وافتح هيچ موضوع وياه حسيت بنفسي غلطت
راسا غيرت الموضوع مبتسم

_مگتلي اشلون انصابيت سولفلي

- قبل تقريبا عشر ايام بهذاك اليوم اجتنه تقريبا ٥٥ جثه وبعض اهالي المصابين واكفين بعيد حتى ما دخلو ويانه شافونه اشلون نغسل اهلهم..

انا وجماعتي طلبة الحوزه نغسل ونكفن ونصلي على المصابين مثل متعرف رتبنا الجثث ال٥٥ لكن بعد تعب وبعد ما اجهدنة واستنفذت طاقاتنه بقينة نفرات معدوده بفرقتنة نغسل ونكفن وندفن

صار علينة ضغط قوي لان لازم ندفهم قبل الليل الدفن بالليل شوي صعب خصوصا بهالاعداد الچبيرة ورغم هذا ماگدرنه نكمل بالوقت المطلوب صلينه صلاة الوحشه

فــ احنا والدفانين رحنه ندفن بالليل على ضوة لايتات السيارة والاضوية البيدنة او أگو بلايت نقالهم لذلك صار شوي خربطة بالارقام والاسماء

ـ الله يساعدكم على ضروف العمل

ـ مرهقة ومتعبة يا سيد مهدي لكن كلشي بأجرة عند الله وهذا الاهم صح بعض الناس حجو علينة وذمونه وهواي طلع كلام علينة
لكن محد يعرف بالمصايب الصارت وضروف التغسيل والدفن..

الاخرنة بهاليوم ناس توفة ابوهم واجوي هدادة على المستشفى وبين الضرب والصياح بينهم وبين الكادر حسبنة شكد يحبون ابوهم ويهتمولهه ويريدو يعيش
هيچ گالنه ابو الاسعاف لكن الصار شمروه علينة والكل عافه وراح لبيتة لان حالته متأخرة بالكورونا

ويانه صديق اسمه شيخ شبر من الطلبه الأكفاء ولان نازع چفوفه وقناعه وطالع برة المغتسل اضاهر لامس هالرجل بشكل مباشر ودخلة للمغتسل من شاله للرجل وغسلناه ودفناه باليوم الثاني حسيتة صاحبنه شيخ شبر مو على بعضه ويمشي گوه

وچان بهذا اليوم عليه توزيع ارقام واسماء الجثث
وبهاليوم كلش اتخربط وكام يخربط بالاسماء والارقام گال ما أگدر أرتفعت حرارتي رأسن وكع للكاع

رگضنا احنا وزملائنا نسعفه حرارته جانت عاليه
و اختنك راسا من البدلة الجان لابسهه
الرجل ماطول يومين واستشهد

ـ الله يرحمه.. ليش لامسته اذا تعرف بي ملامس

ـ ماجنت ادري ملامس ولاهو يدري بعدين حجالنه گال يجوز من مسحت بيدي وجه الرجل المصابـــــ انوب صاحبنا لثاني البيده الاوراق همين داخ من الحر وكع وكعت منه الاوراق

.هنا بسرعه طلعناه من الكابينه اشويه حتى يتنفس نزعت ملابسه ودلكت صدره اشوي صحى خلينه الاسعاف تاخذه واحنا كملنا لتغسيل وتكفين

جماعتتا صارو ينصابوون واحد ورى الخ
وحتى والنساء المتطوعات همين الاصابات صارت بينهن صار اللود بعد اكبر علينا

الحر بجهه
واهل المتوفي بجهه والناس التذمنه بجهه..
مين منلتفت اذية نفسية
والاذية النفسية وية المرض الجسدي يقضي على المريض وهذا الصار بينه أحنا المتطوعين المعممين

مسحت دمعه من وجهي هواي اتأثرت بكلام سيد حامد رغم انا بنص الگادر الطبي وگلشي جدامي بس خدمه سيد حامد تختلف...

چنت يم سيد حامد من ألليل الحد ثاني يوم الظهر وگلش وضعه صار متأزم حتى من يريد يحچي شي مايگدر بيومها أشر اليه رفعت الاوكسجين شوي وقربتله راسي وهمسلي..

_اخذ مفاتيح البيت بهاي الغراض هاي امانة خليهن يمك اي شي يصير لاتنطيهن واقراء رساله تلگاها داخل گتاب القران

رجعتلة الاوكسجين وعفتة ينام
ما اگدر ارجع لكربلا واخذ امانة سيد حامد من بيته..

بقيت انتضر يمة عندي امل قوي يتشافى ويتعافى
بيدي مفاتيح بيته وهو وضعه مايسرر ومشتاق العقيله فد مره مامطول عليها هلگد

طلعت من المستشفى للحديقه أشوي أشوف الزرع اصوات الصريخ من كل سياره تطلع من المستشفى أختنك أكثر گعدت على مسطبه راسي بين ايدي متخوف على الناس على أحبابي على ناسي

هل مرض الي دخل المدن دخل القرى دخل بيوت الناس شتت العوائل قتلت الشباب قبل العجائز نزعت الگمامه طلعت نقالي اخابر عقيله عسى بسماع صوتها أنسى همي أنسى الموت الجاي أشوفه يحووم على الناس بگل مگان واعرف صوتها هو الوحيد الي ياخذني من وادي سحيق السابع سماااا

فتحت خط سلمت

-السلام عليكم قارورتي

-وعليكم السلام سيد اشلووووونگ مووووو طولت

-ليش مشتاقه اليه

-هااا أاي أي گاش مشتاقه وحتى سيد علي يتناوع الصورك بنقالي ويكول اريد بابا مشتاق اله

-اه يگلبي على مرتي الخجوله ويگلبي على حنان أبني الورثه من أمه انطيني ياه

-للااااااه سيد اريد اشبع من صوتك

-اشلون بقارورتي تريد تخليني اعوف واجبي واجيها ركض رکض ركض

-لااااا لااا لاتجي بسرعه اخاف عليك من الشارع والطريق والسرعه

-احبچ ريتچ الهوى الاتنفسه حتى على طول يمي
هاااا شو سگتي يارب گون هسه يمچ واشوف اشلون خدودج صارو حمرررر

.-سيد

-عيونه السيد وروح السيد وبيرغ السيد وسبحة السيد اااخ شگدددد احبچ ياانا

-واحبك انه همينه سيد

-ماكو دلع منا منا مو گلتي من اتعود وصار هواي عازلين وعايشين وحدنا عاد هسه مو يمچ همسيلي بنقال أسمع الدلع

-استحي مااگدر انتظر شويه بعد

-انتظر يروحي ليش لا بس گون اسم حلوو

-ضجت مني مووو

-لااااا ماعاش ليضوج منچ بلسم الجرح ونبض القلب
وهسه حبيبي اروح اشوف سيد حامد

-الله وياك لا ألله ألا الله
_محمد صل الله عليه واله رسول الله

غلقته لبست الكمامه گمت أتمشى رواق المستشفى اروح السيد حامد وصلت الغرفته لگيته كاعده ماد رجليه ومخلي المخده وعليها التربه والاوكسجين بلحكه يصلي ولابس عمامته

تقربت عليه وجهه مايطمأن رفع ايده وسجد من حس عليه همس

قى ساجد طول بسجوده طريق العِشق نحو المعشُوق ألكُلّ يسعَى للوصول بجسدِه
ولكِنْ هُناكَ مَنْ حلّق بروحِه ووصل

جاي أجاوبه رجع سجد وانا فرشت سجادتي حتى أصلي قريب عليه جاي أگبر رأسن سمعت صوت شهكته خفت عليه شلت السجاده واجيت أله گومته من التربه مددته على المخده وهو فاتح حلكهه يريد يتنفسكويختنك فاتت الممرضه من يمي صحت بيها

-الدكتورررررررررر بسرررررررررعه صيحي بسرعه

-صار
راحت ركض وبخبرتي كطبيب بسرعه مديت ايديه اثنينهم الصدره اسوي انعاش للقلب عيوني بدت تنترس ادموع گلبي مئيس حزين الاسعافات الاوليه كلهن سويتهن

دخل الطبيب طلع سماعة القلب گال

-روح اخوي

جاوبته
-ترى هذا صاحبي

-ارجوك لا تربگنا لان احنا مالنه خلگم والله روووح

ماجادلته لان محد يعرفني هنا بس ممرض أقدم والشفت مالته خلص

كال طبيب ممارس واعتقد شايفه قبل بس مااذگر

-لااا يبقى دكتور لان دكتور مهدي من الاطباء الراقين بكربلاء مارست داخل المستشفى اليداوم بيها

احس الطبيب ممقتنع من نظراته طلعت من الغرفه واسمع الطبيب يصيح يله بسرعه شيلوو الجثه منا وجهزوووووو الغرفه وعقموها المريض غيره السيد الرئه مالته تالفه فد مره گعدت يم الغرفه اقراء قران ومره ادعي الله يحفظه ويطلع سلامات من هاي المحنه

الحظات والدقائق صارت طويله الاصوات العاليه
الممرضات يرگضن منا ومنا الى أن هدئت الضجه

طلع الطبيب گالي وهو يعقم ايده

-البقيه بحياتگم المريض تعب ورئته ماعاد بيها تتحمل أگثررر فقدناه والاحسن اله الموت راحه

تفاجأت صحت

-لااااا ادكولها دكتور

طبطب على چتفي وگال

-الله يصبرگم والله رئته منتهيه ارتاح هسه كال هاي الكلمه هد جتفي وراح

گعدت بلگاع فقدت عليه صحت بيه ياخوية الماجابته امي ياصديچي

يارفيچ عمري بعدني مااشبعت منك شوف بعدني مازفيتك بديه وگ عروستك متانتك موو كلت

مو گلت راح اطيب ونرجع سوة شجاك مستعجل على الموت تمنيت الشهادة واجتك وك حااااامد شلون أرجع بلياك

التمو عليه دكاتره هذا الي صبر وهذا اليبچي على حالي وانا كاعد وباهت ودموعي على خدي وردد
إنّا لله وإنّا إليهِ رَاجعُون

أجى عليه دكتور مشرف على حالته گال

_راح يجون جماعته بلفرقة ياخذوه يتكفلون بتغسيل وتكفين ودفن ربي يكون بعونك ويصبرك على فقدانه

هزيت اله راسي گمت على حيلي انتظر يجون ماقبلو أدخل عليه طلعت مفاتيح الجنان من جنطتي وبقيت أقراء دعاء العديله بين ما گملت اجو جماعته لابسين ملابسهم البيض وعمامتهم البيض والسود بكامل لبسهم وقايافتهم تقدمت الهم

_أعرفگم بنفسي أنا دكتور مهدي صديق سيد حامد
اريد احضر دفن وتغسيل...

رد عليه واحد منهم .

_ اعتذر الوضع تعبان الاصابات جاي تعدى اكثر بكل تحذيرنا والبسنا وجاي اكو ينصابون مااكدر تحمل ذنبك

_لا اني اجي وياگم واگون حذر تعرف اني دكتور واعرف الخطورة الموقف

_يااخي علمودك جاي أحچي

بقينا ثوان نتناقش وبين الحاح قبلو اروح گالي واحد منهم

_لازم تلبس مثل لبسنا الوقائي

_تمام
مسحت دموعي مشيت وياهم لازم السديه الي عليها جثة سيد حامد ندفعها لحد سيارة الأسعاف الچرجف مالته مبلل گد ماعقمو

وگفنا يم سيارة الأسعاف رشو عليه بعد تغسيل عمامته خلوها على جسمهوبعد وتطيهير لبست ملابس الوقايه ووصلنا الكابينة التغسيل اتناوع الوجهه اشلون مغمض عيونه ملامحه اثر السجود بجبينه
وكتله

_سيد حامد أوادعك وداع المحبين حضنك حضنه موادع تذگر من انت ودعتني وحضنتني وبستني بعيوني بس اني ضلت حتى ماودعتك انت غصة بگلبي مودع بالله خويه وان شاءلله شهادة مكتوبة الك تمنيتها أنت واجتك

بدوء بتگفينه واني دموعي على خدي واردد...
اللهم آنسه في وحدته، وفي وحشته، وفي غربته، اللهم أنزله منزلا مباركا، وأنت خير المنزلين، اللهم أنزله منازل الصديقين، والشهداء، والصالحين، وحسن أولئك رفيقا، اللهم اجعل قبره روضة من رياض الجنة، ولا تجعله حفرة من حفر النار. اللهم أفسح له في قبره مد بصره، وافرش قبره من فراش الجنة اللهم أعذه من عذاب القبر، وجفاء الأرض عن جنبيها.

گملو تگفينه مشينه رحنه لمقبرة لگيناهم محضرين القبر نزلوا التابوت وكعدت يمه وانحب واستغفر
أخذوا الجثة رادو ينزلوها للحد القبر كتلهم اني انزله
نزلت للقبر تنوشت منهم وكملنه دفن وتلقين
وقفت يم راسه

اللهم آنسه في وحدته، وفي وحشته، وفي غربته.
اللهمّ أنزله منزلًا مباركًا، وأنت خير المنزلين، اللهمّ أنزله منازل الصدّيقين، والشّهداء، والصّالحين،
وحسُن أولئك رفيقًا.
اللهمّ اجعل قبره روضةً من رياض الجنّة، ولا تجعله حفرةً من حفر النّار، اللهمّ افسح له فيقبره مدّ بصره، وافرش قبره من فراش الجنّة.
اللهم أعذه من عذاب القبر، وجفاف ِالأرض عن جنبيها.
اللهم املأ قبره بالرّضا، والنور، والفسحة، والسّرور.
اللهمّ إنّه في ذمّتك وحبل جوارك، فقِهِ فتنة القبر، وعذاب النّار، وأنت أهل الوفاء والحقّ،
فاغفر له وارحمه، إنّك أنت الغفور الرّحيم.

اللهم اغفر له وارحمه واعف عنه وعافه وأكرم نزله ووسع مدخله، واغسله بماء وثلج وبرد،
ونقه من الخطايا كما ينقى الثوب الأبيض من الدنس، وأبدله داراً خيراً من داره، وأهلاً خيراً
من أهله، وزوجاً خيراً من زوجه، وقِهِ فتنة القبر وعذاب النار.

گملت عملية ألدفن وجماعته مگابلينه يبچون وهنا سيد حامد جان نعم صديق للكل
سيد حامد حبه لامام الحُسَيْنِ؛ هو السِّر!
لأن گل من عشق الحسين رحل إليه مبگرٱ

بگل صوت وشهگة من ورة القناع أحاچي

_مودع يااصاحبي يااارفيچ العمر ياخوية ياحامد

بقيت يمه أبچي لاعتراض لگن الفقد صعب گوموني أصدقائه ماقبلو أبقى أكثر رحنا وصلت للمسشفى غسلت وتعقمت ذبيت الملابس وطلعت من جنطتي ملابسي واخذت اغراضي ومبايلي جنت مأمنهن
اتصلت على مجتبى

_السلام عليگم

_هلا بسيد مهدي صوتك تعبان شخبار سيد حامد

_سيد حامد اتوفى

_لا اله الا الله وانت شلونك

_عضيدك گلبه تعب مات سيد حامد

_ وين انت اني جايك

_تلگاني مقابيل الأمام علي عليه السلام

دخلت من بعيد منتظر ألحضرة يفتحوها لأن مسدوده الحضره عيني للگبه

_موووولاي سيد حامد بشفاعتك ياعلي وحيد
وشهيد أجاك

گملت اصلي و زيارة وكعدت بصحن الامام حزين
بيدي القرأن اقراء واعتقد مرت ساعة ونص أشوف مجتبى يمشي وتلفت ويدور بين زوار

صحت عليه

_سيد مجتبى تعااااااال

التفت سمعني كمت اله وصحت سيد مجتبى
أجاني بهمة وركض وحضني

محتاج حضنه کلش

_عضيدي ماااات ماات صاحبي ورفيجي بچيت وبجى ويايه

صحيح الموت قضاء وقدر وانو احنا كلنا مصيرنا نموت لكن فراق الأحبة صعب يخلي كسره بلقلب والنفس تبقى على طول حزينه

طول عملي بلمستشفى اشوف هواي ناس تموت لكن موتت سيد حامد اثرت بيه
قبل ساعات جنه نسولف ويحجيلي شنو مضوجه هي هاي الحياة الي علمودها تصير مشاكل علمودها واحد يحقد على الثاني

مسحت دموعي ولازم اتقوى حتى اشوف شنو الامانه لمخليها أليه وشنو يريد مني..بقينا انا وسيد مجتبى كاعدين كانما عزاء السيد حامد بس نقراء قران حتى سيد مجتبى قرا

ابتسمت كوه عليه لان مجتبى تغير بعد الصار اله كومني بهدوء وكال

-يله سيد انروح للبيت وهم انوزع سلات غذائيه على روح صديقك تعرف الفاتحه ممنوعه

-اشلون نوزع عضيدي

سئلته هيج حتى اعرف اشلون متغير للاحسن
گلي
-أعرف عوائل مصابه بمرض کورونا وميكدرون يشترون ومحد يدخل عليهم نروح نسوك الهم ونجيب علاج وملابس وا اوكسجين مو احسن

-ليش اجتك هاي الفكره

-مو أكو ناس من تسمع عائله عدهم نفر مصاب تبقى تشهر بيهم وتحذر الناس منهم واحنا راح انساعدهم لان اعرفهم مساكين جدا((خير الناس انفعهم للناس))

-الله يبارك بيك حبيبي شكد جنت ضايج من زواجك وشكد ايام فكرت بخطورته لكن سبحان الله تغييييرت كلش زين التغيير الي نبحث عنه

-بفضل رب العالمين

-الحمد الله وخاصه من اخلي بنتي عدكم اشوف ابنك رغم زغير بيده النقال ويسمع القران والطميات سيد علي
هو هم احد الاسباب حتى الاقراص الجابتهم ميسم بسيارتي

-انت خوش واحد بس الشيطان اشوي لعب براسك ومازال متندم (خير الخطائون التوابون)

ألتفت للگبه أشوي شوفت عضيدي أرتاحيت گملنا زیاره انا وياه رجعنا للبيت گلي سيد مجتبى

-وين اخذك الجدي

-لااااا لااااا اريد عقيلتي تاخذني من حزني

-ماشي خويه هو هم عنده احد سيد حامد

-لاااات معنده وحتى ذمم مااسوي عزا اله بس خليت جماعته يقروله قران ويختمو على روحه.

-والله هااااي كافي لا تضوج نفسك اتت مريض عضيدي

-لاااا مااراح اضوج كلما اشتاق اله اقر زيارة الناحيه او
القران على روحه
وصلت للبيت سيد مجتبى جاب سطل التعقيم خلاني اغسل وبوجهي للحمام سبحت وعقمت نفسي وعقيله مثل كل مره منبهه من ارجع من الدوام ماتطلع اليه الا من اطلع من الحمام

طلعت وعقيله ماكو اكيد بلغرفه مسحت وجهي بلخاولي
جاي اروح للغرفه وجنطة بنت سيد مجتبى بصاله تذكرت هوو بلكراج واكف طلعت اله صحت

-عضيدي ووينك

اجى عليه
-ليش ماتدخل البيت بيت اخوك

-اعرف يخوي بس أحسن ابقى حتى ام علي ماتتقيد

-عقيله خيتك يخوي وانا موجود

-انت بلحمام وخاف تشاقى ماااعرف سوالفك وثانيا يخوي أنت علمتني،هيج من رحنا البيت امير وزوجته موجوده وهو بلحمام وكلت خلينا بطارمه مناااااااا لمن يخلص سبح وحتى من ميسم موجود هم متدخل

-ههههههه اي ذكرت تتعال هسه

دخلنا ويه دخلتنه طلع سيد علي لازم بيده بنت سيد مجتبى وحاضنها الصدره من شافني ركض سيد مجتى ركض عليها شال بنته

-عمووو بنتي توكع منك لا تركض بيهاااااا

-موووو بابا مشتاق اله

نصيت جسمي ماد ايدي احضنه

-بعد ابوووك يابويه

بقى لازم رگبتي ويبجي

-ليش عفتنا انا وماما مشتاقين الك هوووووووواي

-بعد ماتعوفني

-اي ماااعوفك

-دول والله

-مووو كلنه مااااكووو حلف

-اسف بابا غير احبك

-وانا ياباباتي امووت عليك

كال سيد.مجتبى
-روح اترخص

-ابقى بين ماعقيله تسوي اكل

-مستعجل والله وانت بعد عوووف المستشفى كااافي

_من تعوفهااا انت

ضحكنا سوه بين مااطلع اجت عقيله اليه تبجي وايده على حلكهااا

-البقيه بحياتك سيد

-وحياتج الباقيه محتاجچ

-اروح اسوي اکل

-لاااا ابقي يمي

كالت عقيله السيد علي

-روح ماما الغرفتك ولا تطلع الا منااا لمن اصيحك وبالك على اختك

-مووو اريد العب ويه بابا

-بعدين حبيبي بابا تعبان

تقرب باس ايدي وراح الغرفته

دخلنه للغرفه واعرف قارورتي تريد اطلعني من جو الحزن حتى اقتل خجلها المبالغ

-ليش طردتي ابناااا وهو مشتاق اليه

-مو وجهك تعبان

حاولت ابلع حزني مابينه الها لان اعرف ماتتحمل اتشوفني مقهور دنيت عليها مديت ايدي للدنبوس انزع حجابها عطر شعرها داعب حواسي
نصت وكالت

-البارحه مااجاني نوم ابد

-اممم مو جنتي دكولين اليه مااعرف انام يم اي شخص

-اي هذا الحچي قبل ست سنوات

-اشلون بتناقض العندچ

-لاااادكولها الله عليك

-زين من مانمتي بشنو جنتي تفكرين

-ولا شي كمت اتوضيت وصليت صلاة الليل وقريت قران وادعيه من مفاتيح الجنان

-هاااا هيج

تقربت عليه سندت راسها الصدري مديت ايدي محاوطها

اعرف اعشقها والكل املاحظ عشقي الها لكن بيني وبين نفسي أگول عشقي الها ماينوصف لان ياخذني من گاني وحزني يخليني والضيق الى مرفاء بحر عيونها الزرك حضنها اجج نيران مكبوته حرقت اوراق حزني على فقد صديقي همست

-صدرك المكان الوحيد اليحسسني بلامان وحتى ماخاف
من اي شي يصير

سكتت اريدها تحجي لان عقيله طول فترة زواجنا بدت تتغيير للاحسن ترجع النفسها تكون عدها ثقه بروحها تحجي تسولف ماريد أكول اله(حسبي الله ونعم الوكيل بلشي الخلاها هيج)رغم سولفت اليه عن تعذيب زوجة والدها الها عن حجي ابوها يحملها سبب وفاة امها عن هواي امور خلتها تنحصر بزاوية الخوف لكن هسه مطمأن لان هي صارت احسن

-ليش ساگت مولاي

-اريد اسمع صوتج

ايدي تمسد ضفيرتها الطويله الاحبها واحب التعرجات الي تصير من الزم ضفيرتها غمضت عيني وانزل ايدي واصعدها على ضفيرتها مستمتع كان حياة جديده غير هاي الحياة اعيشها هل لحظه
-شتحسين هسه

-مااكو اي احساس يوصف مشاعري يمك رغم مره قريت (الحب الحقيقي ان لاتخاف وانت وسط واغابه مرعبه كلها رهبه خوف) وفعلا هذا الاحسه وياك

-حلو وين قريتي

-انطيك الصدق انا ماقريته طلعته من گلبي وطلع بس الك لان انت الوحيد تستاهله

-شهل تطورات حبيبتي بعد كل فتره اغيب عنج حتى اسمع هييج حجي حلوه ينعش
همست باذني

-مو بس هيچ عوفلي نفسك ربع ساعه
غمضت عيني اطرد خيالات الفقد والحزن وهي ترسم بايدها وشفافها لوحه من الحب والغزل والشوق وكاني مفارقها دهرر دگات قلبي زادت وتتصاعد
نبضه نبضه حتى وصل صوتها الاذنها ابتسمت وهي تلمس قلبي غمضت عيونها وانا افگر كتب علينا نحن العاشقين ان تهتز قلوبنا ان ترتبك ان تتحرك مثلما تهتز وتتحرك الكره الارضيه بهزات لا مفر منها

حبنا بهل لحظه صار شعله من النار هي وحرارة الشعله اخترقت اجسادنا بحراره لا تنطفيء اله بنهايه فوران وانتهاء رغباتنا

راسها على ايدي دموعها بللت مسام جلدي رغم الفرح الي عيشتني بيه بس بچت ماعرفت لیش حتی اجی بالی لان اول مره هی تبادر بس گالت بقهر

-الله علیك لااااا تعوفني بعد ولا تخليني احس بلغربه والخوف من گلشي

-ليش تگولین هیچ

-لان اول مره تبات بعید مني رجع اليه خوفي قبل لا ااحبك خوفي من ان الناس راح ترجع تتفل عليه وتضربني،وتاذيني لمجرد امي توفت اثناء ماولدتني

-مااعوفچ لان انا احبچ حب ابدي

-لااااا سید انا اگثر احبك حب سرمدي مابي بدايه ولااا نهايه ولا اول ولا اخر مثلك انت مولاي

-وانتي النور الي اجى حياتي لان خليتيني اشوف الحياة تستحق اعيشها بعد الصار اليه
يله كوم اسبح مجهزه گبة وبيتزا بس احميه

-تمام بس ايدچ محاوطتني اشلون اسبح

-بس گلي فگرت بیه هناك

-اي بحيث تخيلتچ انتي غيمه بگل مگان اروح اله اشوف الغيمه ورايه ويايه مره تحميني من الشمس مره
ومره تنطيني مطر الكاعي اليابسه

سبحت وطهرت بسرعه نشفت جسمي وهي جدامي اطهرت
حتى تروح تجهز اليه الاكل مشطت شعري ورحت الغرفة سيد علي لگیته یهز گاروك اخته شافني ركض عليه نصيت اله حضنته

-ليش تهز الكاروك

-احتي(اختي)كعدت تبچي وماما يمك ماصحت عليها نطيتها مممه شربتها

-يقلب ابوك افديك بروحي

-يله اطلع على تيييف(كيف)ريحة بيزا

-هااا ابو بطن يله حبيبي

_لا تدعد(تگعد)بسرعه

طلعنه للمطبخ عقيله مرتبه گلشي اثنين بيتزا وكبب طلعتهن من المايكوو صوت الخلاط وكف وهي تصب النه عصير برتقال

-عاشت ايدك حبيبتي

-الف عافيه

-وهم اشكرچ نیابه عن اخوي

-ليش

-جاي تعبين بنته وشوي بنته بچايه عكس جهالنه

-لاااا دگولها سید تری حسبتها حسبت الدره البیضاء اصلا اذا مااشوفها اضوج تعلمت عليها ولاااا تنسى هي يمي من عمرها ايام يعني بنتي صااارت لو ما عمه زينه تحبها كلش وتنام يمها چان حتی اللیل هی یمينا

بقیت اکل وعقیله تسولف بدا العرك يصب من وجهي والحراره فجاه ارتفعت اخر لگمه ماگدرت ابلعها

واحس بدیت افقد طاقتي اشوي اشوي اخذت كلاص العصير اشرب من عنده کلت نحول جسمي يجوز من التعب لذت سكري هبط جاي اشربها حرگني بلعومي وكع الكلاص من ايدي اختنكت

وهمست بصعوبه

-عق عق عقيله

#يتبع