رواية عشق المومنين(أبناء الساده) الفصل السابع والعشرون 27 - بقلم نازك الحمراني

سگوتكِ عذاب لضجيج قلبي

//عشق المومنين///
////نازك الحمراني///

سيد مهدي//
عشقي سيلاحقكِ للممات
فلا تكابري وتتصنعي الامبلات
فقلبينا قد خلقا لبعض
منذ وقبل الحياة

كل يوم الصبح اتصال يجيني من جدي لازم يگلي يمتى تقترب وتتمكن من زوجتك،كأنما شاك بيه ماأكدر أقترب الها بسبب عوق اقدامي ظنه صرت عاجز
وانا مااريد اوضح انا كامل لان مااريد أشوفهم يلومون عقيله ،مثل ما الكل أحملها ذنب صدمتها بيه

نزلت للرسيبشن،متعوذ من شر الشيطان الرجيم لان اجاني أتصال من جدي..اول مافتحت الخط گال

-بشررر ولیديييي خشيت بيها

-لاااا يجدي دخيل بخت جدك مو وكتهااا البنيه أريدها برضاتها وبقناعتهااا حتى يكون التمكين حلال،مابيه أي اكراه

-يعني بعدك تراوح مكانك وماعلمتها شنهي سالفتك صار
چم یووم سوه،نفس الغرفه، وجاي أطلعون سوه،تاگلون سوه ومثل ماسیلت عضيدك گال یفترون ویزورون سوه ودگول بعدهاااا گل هل شغلات شلون متريدك

ولك اني اعلمك سيد مهدي انت سيد مهدي الگلف لك لاترجعلي اذا شغلتك مكامله،انت هیبة عمامك،وكشخة نسل سيد باقر روووح بويه روووح ادخل بيها ساعه وخابرك جايب البشاره اليه

-أنشاء الله جدي انشاء الله اريدك تندعيلي يبويه وياك

-هوو من راح ابوك المرحوم صرت أنت واخوك كل همي
أدعيلك بگل وقت وحتی مادزیتك التركيا شهر عسل گلت خلیه یروح المشهد ،
هناك بغريب طوس انت وياها تفگون گلبکم البعض،وماكو ثنين راحو المشهد اله راجعين والمحبه تارسه گلوبهم،والحب تارس روحهم

لآن غريب طوس يجمع كل غريب،ويقرب كل بعيد وهاي
احد كرامات ألائمة الحب،والرحمه

-سلام الله عليه تتوقع عقيله مسامحتني

-اي يبوي لأن شفت بعيونها نظره الك من طلعتو المطار
روووح وتوكل على ربك
صعدت ألدرج متحفز ،فرحان فتحت باب الغرفه
وسيد باقر وحچاياته مثل جرس الكنيسه يدگ ويتكرر براسي مشيت وكل خطوه أدعي القبول وسداد صرت يم
الچربایه من صفحة راسه اتنوعتلها،ايمه مطمئنه اشلون اقترب منها...ردت أمد أيدي عليها تراجعت شي مانعني

هاي أني الي متمكن من مرأه قبلها ليش يمها غير ليش ماأگدر اقربلها گلشي بيه يريدها،جسمي وگلبي وروحي
حبي يخليني عاحز منها لو منتظر اشاره منها...

بعدت ألچرچف غافيه بسابع نومه موبس نايمه ااااااخ يارب بعدها متحجبه بعدها رافضه اعترافها بزواجنه

گاني عايز قهر وكسرت حال هذا كلام جدي عني وليش مامقترب منها مايدري أنه جاي أطبق ألجهاد الحقيقي و
اصعب جهاد هو جهاد النفس..جهاد نفس عن شي حلال
أي هسه لو أطلبه شي حرام ممكن اگدر أقنع سيد باقر
بالله ومخافت عقابه لكن المقابل الي يريدني أقترب الها

أنسانه زوجتك وحلالك تقنع منوو...وياهو أنك متكدر

صرت مثل "صياد يتگلى ولعصفور يتفلي"

لزمت بطرف ایدي طرف خدها تململت تحرك راسها بس ضجت لأن منزله ألحجاب كلش على وجهه طلعتت مااريد ابقى يمها أضعف واخذها غصب،طلعت مو بس من الغرفه من الفندق كله بعد ماتحمل اختنگت
مشیت ومشیت أعكز برجليه الى أن صار مقابيلي
المرقد الشريف الغريب طوس مكدرت أوكف أكثر
انقهرت من نفسي على نفسي من وضعي على وضعي
طحت ساجد على رجليه من الوجع،والقهر من وجهي
وعوق رجلي وايدي، من رفض عقيله اليه نزلت دموعي
حاره رغم الجو بارد أحاچي صاحب الگبة بعتاب

-مولاي یاغريب ألغرباء محتاج أحد أشگي له كسرت الخاطر،منین آبدي كأن چنت عايز قهررر وتمت قهر ثاني
الي بيه من وجع من كسر الظلع،وعوق الرجل والايد والكلى المتضرر على ساعه توكف
مولاي مو گافي هیچ علیه تعب،واختبار، آعرف کرامات رب العالمین یوضع عبده بأختبارات قويه لكن مولاي أنا تعبت من الألم الجسدي هسه أدور تعب گلبي "ونفسي

رسيني على بر وساعدني مولاي مااريد افقد ذرة الصبر
اجى سيد معمم ومن هيئته والكتب الي لازمهم بيده دنج عليه مبتسم ماد آیده گلي

-گوم آخي ألارض بارده جدا وأنت أقدامك ورعشت أيدك
توحي أنت شخص مريض لاااازيد مرضك وجعك ترى ماكو شيء يستحق نذرف دموعنه عليه ونشگي منه أمام ألمقامات الشريفه والقباب الذهبيه فقط ألذنب
نعم من نذنب وعصي ونريد رب العالمين يغفر ألنه نجي للمقامات الشريفه نشگي،ونبچي نفوسنه الأماره بسوء،وابدانه الساعيه للذنب لأن همه الواسطه والشفاعه
بينه وبين رب العالمين

رديت عليه امسح مدموعي
-لكن وحوائجنه الدنيويه همين أمتعبتنه،ومرهقه نفوسنه من الدنيا،والاشخاص الي يأذونه همين نحتاج نجي نشكي همومنه عند أهل البيت عليهم السلام
رد عليه

-طبعا كل الگلته آعرفه،خاصه الدنیا مابیها غير التعب والفقد،والخساره،وحرقت القلب لكن لو أنت تقدم أمور الأخره،على الدنيا
ومثل ماگتلك تدعي فقط الأخرتك راااااااح كل أمور الدنيا وقهرها،وتعبها تكون تافهه عندك

أمام رضاء رب العالمين والسير على نهج ،وتتبع محمد وال محمد عليهم السلام يجوز تگول هذا السيد شعلي بيه عاف الناس واجى عليه يتفلسف براسي
أگلك يمگن بعثني رب العالمين سبب الك أو يمگن طریقة سجودك للگاع لفتت نظري لو هيئتك الي توحي أنت مريض جسديآ مرهق أو لأنك أنت شخص مختارك
رب العالمين الرساله،أو موقف
جاوبته

-لاااا بلعکس مولاي أشكرك ماتعرف مداخلتك كلامك كيف صبر عليه ألي انه بيه أما انه شخص صاحب رساله
كل أنسان بحياته يكون صاحب رساله شو صفنت علیه مولاي

-رحت الجامع جمكران

-لاااا والله

-روح هناك راح تشوف ألكرامات الي مايصدقها العقل

-اهل البيت ومقاماتهم كلها كرامات

-فعلا لكن عن تجربه روح هناك انا الي خلاني أترك محافظتي النجف،واستقر بأيران،هو مسجد جمكران
أول ماراح تدخل أله راح تعرف شاقصد
دنجت راسي من وجع رجليه،رفعت راسي،السيد ماكو
مكدرت حتى أدور عليه لأن أجى موكب زوار هواي
أفكر بحچي ألسيد ومازال عندي عمليه قبل لا اسويها اروح المسجد جمكران..رجعت للفندق دخلت ألهدوء بكل مكان، محد موجود بس الرسبشن سلمت صعدت للغرفة مثل المحتار فتحت ألباب دخلت رحت صوبها طلعت بسرعه، جريت نفس رجعت للغرفه لساها نايمه...

وكفت يم راسها بعدت الغطا هم نايمه حاچیتها بهمس

-ألخاطر محمد شوكت تكعدين،شني السالفه متگولین مزوج الاميره النائمه...كله نوم نوم طلعت منها
مر اليوم الثاني،واني وياها سلام،وكعده وناكل وحتى طلعنه سوه،حسيته اخذت عليه،وتستجاب اليه بس انا
منتظر قبولها التام مااكدر أجبرها على شي مترغبه

ثاني يوم لزمني وجع بگلیتي غلست منه نزلنه انه ومجتبى نشتري مسكن هم لكيت جدي متصل رحت للرسبشن انه وسيد مجتبى ونفس الحچي صاير اليه مثل العجايز القديمات ماعنده سالفه كل مايخابر يگلي
اشوكت تفضها لا ودور يمي مجتبى تقرب كلش عليه

ضحك بصوت عالي ويطك بلميز بهداي كد الضحك
تناوعت اللسيد مجتبى يضحك عليه والثاني يلح اشوكت وشوكت توصلها هذا ذا حب عقيله وين تالي يوديني گلت الجدي بضوجه

-رحمه الجدك ياجدي همين أحد لح عليك من زوجة لو بس انت هييچ تلح علیه رد

-الیوم اریدك تبيض وجهي لااااااتخليني افكر بعد روح جدك

-الله كريم بس لاا تلح مولاي ترى الملحه تخرب الواهس
سديته من جدي مشيت خطوتين لحگني سيد مجتبى
وبعد يضحك التفت عليه انتر

-سيد أذا تبقى تضحك هييچ ابد ابد ابد لاااااتجی ویایه

لان مااعرف شنو اصرف ویاك وانت تستفزني
رفع ايده كاتم ضحكته كوه وگال

-العفو عضيدي العفووو بطلت طلعنه أنروح الدكتوري سويت تحاليل طلعت وسيد مجتبى يمي يمشي ويايه
بيده أوراق الي نروح بيهن القم اجى سيد مجتبى ياشر السياره گتله

-خلیني امشي شويه الهوى نقي رئتي ترتاح

-سيد مو رجليك تتعب

-هو اريح الرئه وتعب العظام شسوي يخوي الحمد الله على كل حال
مشينه على طريق كله خضار والشارع نظيف لزمتني گلیتي اليسرى وجع خفيف هملته اربع خطوات تعديتهن
وهنا الوجع زاد چنت بصف سی
د مجتبی امشي لزمت ايده التفت عليه

-خيرك مولاي

-ألحك أخوك مجتبى الوجع كطع مصارين أخوك
من الوجع مااعرف شوكت صعدت تكسي بس اشوف ادموع سيد مجتبى تنزل عشره عشره يدعي بصوت عالي وراسي على صدره

-ياااااااارب اخذ من حيلي الحيل أخويه ياربي فدوه من صحتي الصحته ياامام الرضا مو حلفتك بجدك الحسين عليه السلام أخوي اتعذب رحمو برحمة الله كااااافي والله كاااافي حرررام

اريد ارفع ايدي امسح أدموعه،بعدني لازم كلياتي رجعنه الطبيي الخاص،وهمين تحاليل جديده،ضربت مسكنات صرت أحسن الدكتور الايراني يحچي ويه مجتبى درت وجهي للشباك غرفة المستشفى،
كأن روحي المهمومه لاترغب بجسدي المُعذب"يارب خذ مافي الجسد من صحه لأجل أن تصفى الروح حتى ترضى كل الرضا عني
كعد سيد مجتبى يمي عيونه حمر من كد ماباچي گتله

-هسه من شويه تضحك عليه وسمعت جدك صوت ضحكتك حتى يضحك موووو
مسح دموعه وگال

-وتالي يخوي تريد أضحكني وانا

-وانت شنو ترى تعدينه الاقوى صير قووي شسالفه

-مو مااكدر أشوفك هييچ يخوي مااگدر اشوفك هلكثر متوجع ومابيدي شي عليك حرررام والله حرام

-لاااااأااااااااا مو حرام الحرام انو نعترض على قرارات رب العالمين وهسه گلي شنو بيه ولااا تخش عليه شي
حتى لو التقارير أجنبيه اخذهن وترجمهن
ارتجى على الكرسي طلع أوراق من ضرف يترجم اليه

-ألكلى اليسرى تعباااانه رغم ألجزء المضرر شالو بعمليه بلهند بس بقت تعاني من صعوبة الفلتره

-امممم يعني كليتي رحمه من الله مو معدتي عاد واحد ياكل على راحته ومايتقيد
،سيد دا أگلك گليتك تعباااااانه

-تعبانه بس مامیته یله گومني نرد للفندق بيش الساعه

-الساعه بتلاثه

-يعني من ٨الصبح الحد ٣الظهرر تلكى امك گالبتها مناحه یله یخوي عين أخوك يگوم
رجعنه للفندق، وقبل لا ندخل لزمت اید مجتبی گتله

-رووح الجماعتك ورد تونس وذا بعد شفت ادموعك من صدك أزعل عليك ومحاجى تخبر أمي لان الموضوع صار
عادي بلنسبه الصحتي
رد

-وي مااكله
،من نرد للعراق يصير خير عدنه عمليات هنا لازم انسويهن ونكمل

-هااااا تقصد وافقت نسوي تجميل

-خليني افكرر زين وهسه انگلع وروح الجماعتك
صعدت للغرفه لاكيت امي يم عقيله ياكلن فاكهه
كعدت يمهن كشرت امي برتقال،اكلت شيف برتقال وترخصت انام الحد صلاة المغرب فزيت لگیت عقیله جاي أتصلی مدد السجاده سآلتها

-لیش ماکعدتینی فاتتني نومه

-شفتك تعبان ماحبيت أزعجك وهو هسه أذن
رفعت ايدي اتناوع للساعه فعلا صار الها اقل من دقيقه
نزلت رجليه من الچربایه توضيت رجعت لكيتها طالعه

عرفت راحت تصليى بغرف أمي همزين قريبه كلش
جدي يلح اتقرب الها وهي حتى صلاة تتقيد مني وكفت للقبله عدلت التربه رفعت راسي جدامي لمرايه صارت
تناوعت الوجهي التشوه مغيره فد مره الخیاط قاسم وجهي نصين نص منمش من الكزاز الطشر بوجهي والنص الثاني، بيها خياطات تلاثه مغطيات معالم وجهي

سديت دكم القميص ونتبهت على الخياط بصدري الى جاي على طول الصدر من جوه النحر الحد نص البطن
همزين الشعر بدا یطلع غطى على الخياطات بصدري

طلعت اتعشى ويايه مجتبى منتظرين امي وعقيله تعشينه وسوالف مجتبى اضحك عقيله ترخصت شبعت
اشرت الامي تروح وياها خلصنه طلعت أكمل التقارير انه وسيد مجتبى

تاخرنه من رجعنه اتصل من الرسبشن جدي حچى وياه مجتنى ونطاني السماعه اخابر وجهه يضحك راد يعلي صوت ضحكته اشرت اله بسبابه

-اشششش بالك سيد مجتبى بالك
خلى ايده علی حلگه وگال

-رایح ویه شباب عراقیین نشرب ارگیله
هزیت راسی معنی روح رجعت الاتصال جدي گالي

-وليدي اليوم جرب وذا ماصار بعد ابد مااطلب منك وتبقى براحتك

-متاكد ماتلح

-لا يبعد جدك

-مع السلامه
سديت التلفون صعدت للغرفه دخلت للغرفةعليها...ويا فرحتي من سديت الباب شفتها لأول مره هيچ تلبس لابسه دشداشه خضره مخططه باسود‌ وابيض ربع ردن
فاله كفشتها، صاير نثاره متعجب على طول شعرها

رجال خامس یوم زواجه،هسه عرف شعر زوجته طویل الك بيها اراده ربي،والحمد الله الشكر على كل حال

مچنت ادري هل طول شعرها دنيت الزمه معقوله فوق جمالها جمال شعرها کعدت على الچربایه یمها ازيح الخصلات من وجهها همست الها

-یاقارورتي والله هي اذا ضل عليج بعد ميتة سنه منتحرك من مكانه، لاودور انتي بس نوم مخلصتها
وهسه ويه طول شعرچ وسحر وجمال جسمها عرفت وتيقنت هاي الاميره النائمه
تأملت اشفافها،بابهامي تلمستن بالي لازم أتمكن منها

لان شوقي وحبي يسبق كل حرگه أسويها شفافي بذكر الله. والبسمله تتكلم
اريد اقترب منها وقبلها آگلها ياظالمه حارمتني منچ

أطلت النظر إليك فأدركت أن النعيم نظرة
گمت بگل ثگل جسمي ومااعرفت منين اجتني هل قوه كد ماراغبها،واريدها مدري كد ما صوت أنفاسها بدى يعلى بكل حركه ،تفاعلت،رغم بس أيدي ترسم مخطط

قربت شفافي على عينهة امنيتي چانت ابوس عینها
وحققت الامنیه كلشي انتعش بداخلي، لان بدت تون وتستجيب بنعاس رفعت وجهي اشوف استجابته مبهور بيها البارده هيچ یصیر بیها فتحت عيونها بعيوني اريد اشكر أستجابتها وأدخل بيها،واتمگن
مدت ايدها اثنينهن علی صدري وبثگل گل جسمها دفعت اضلوعي بصرخه،

و برجلها ثنينهن رفستني رفسه اخت الموت صارت طیحتني للگاع حريمه دورات التكواندو الچنت اداوم بیهن مالحگت اتلافی رفسة عقيله وزگطتها
آیدي ثنینهم بين فخذي اتلوی بلگاع وتگلب اقل من دقیقه من رفستها أذتني حيل وتوجعت ضلوعي گمت

وشكد فرحت من سكناتها"وتئوهاتها أما هسه وردت فعلها صدمتني، وكفت مبتعد اید على ضلوعي وايد على الحايط متأذي كلش
أللحظه ومن الألم ردت اسحلها من كفشتها الطويله بس عزة نفسي" وكرامتي" متسمحلي اتحرك خطوه اتجاهه مو اني لي اجبر وحده عليه حتى لو چانت الوحده زوجتي وحبيبتي
تناوعت الها أخر نظره وبدقيقتها قررت قرار هو فراق بيني وبينها وبعد مااقرب الهااا ولا اريد قربهاا
ومااريد افكر بحسنها وجمالها رفعت السبابه ردت أحچي
بس سكتت خزرتها مديت ايدي فتحت باب الغرفه وطلعت سديت الباب حيييل وصوت الطبه تكعد الميت

رحت ألغرفة أمي فتحت الباب ايدي على ضلعي ماحچیت اي شي بوجهي للحمام أ سبح عسى ناري تبرد
ومنها اتشطف زين

ماطولت لان كل جسمي يصل عليه لبست برنص الحمام طلعت ادور بكنتور محتبى طلعت بنطلونه الكابوي لبسته ردت قميص البس فوك الفانيل مالكيت رغم يمي لكن من غضبي افتح الكنتور الاول وحيل واسده افتح الباب الثاني واسده حيل

عرفت والدتي اني متعصب گالت
-سید هذن القمصان يمه اشرتلي على الخانه الاولى اخذته ادكم الدكم كوه متوتر وغضبان من عقيله رجعت امي تسال

-شبيك ابني ليش هيچ حالك
چنت منطیها گفاي أنداريت عليها وعليت صوتي وهاي اول مره بحياتي أعلى صوتي على والدتي
اني بوجودها ما أعلي صوتي... مو دور اعلي عليها
بساعتها چان طافح بيه الكيل..عطت بغضب

-شبييييييييييييه اأاااااتعرفیبييييييييييين شبیه كله من وراااااااأااچ یمه أااااااااااااااانتي السبب وصلتينا الهل مواصيل
چانت کاعده هالماقبلت وصاحت امي بيه

-كل الي سويته المصلحتك وخوفآ عليك شفتك أنهاريت من سمعت بيها رح تنخطب واني مااااااااااردت اخسرك مره...تريدني اخسرك بعد اني أم استميت الأجلكم مو بس أغشششش حتی اقتللللللللللللللل
تقربت علیها واشر بایدي اجاوبها

- لو أللحظه يساووووورني شك ان لي سويتي مو خوفا وحرصا عليه جان تصرفي معاچ ثاني وترى مووووووو بس انتي الغلطانه أني همات الغلطان مو بس آنتي
ما حمل احد ثاني اعباء اغلاطي
أنه چان رحت الجامعتها...رحت الخالها خلینا یمه خلينه
لانتناقش افضل حل
طلعت من امي مغضب رحت للامام رضا علیه السلام
دخلت للحضره وكعدت گباله موجوع،مخذول گتله

-مولااااااااااااااي يكووووول ربك ولان شكرتم لازيدنكم
والله ماكفرت بيوم ولاعصيت ربي ولا ارتكبت الحرام
ولاجحدت بنعمة ربي ولاتكبرت بفلوسي وشهادتي
ماسويت من ذن بس غير حمدت ربي وشكرته
على كل هل نعم العندي...اريد كون منك مولاي أدمرني حطملي حياتي موووتني بعد ماتحمل والله ماأتحمل
ماعندي طاقه تكفي الي شي جديد او دخيل عليه
ماااااااا اتحمل مولاي ششوف بعد من سيء الى اسوء
أني هذا مو امتحان الي يصير بيه هذا عقاب...
مولاي گلولي شنو ذنب لي استاهل اتعاقب عليه
احچي جدي، احچي جدي يا أمامي لااااااااضل ساكت
ماعندي مااااااا عندي صبر

گلولي شمسوي عدكم گمت اروح رجعت اريد اتلمس الشباك...كمشته ودموعي بللن ااشباك گتله

-سامحني ياربي ماجازع والله اني ممعصوم عجزي صار ذنب حتى بزواجي
يارب اغفرلي لحظة اليئس العندي"ولا تكلني الى نفسي طرف عين أبدا" طلعت من الحضره للصحن...
لگیت السجاد مفروش بصحن سحبت شطفتي من رگبتي خليتها بلكاع بيت اناجي ربي
اللهم لا تشمت اعدائي بدائي ۞ واجعل القرآن العظيم دوائي وشفائي ۞ انت ثقتي ورجائي ۞واجعل حسن ظني بك شفائي ۞ اللهم ثبت علي عقلي وديني ۞ وبك يا رب ثبت لي يقيني ۞ وارزقني رزقاً حلالاً يكفيني ۞ وابعد عني شر من يؤذيني ۞ ولا تحوجني لطبيب يداويني ۞ اللهم استرني على وجه الارض ۞ اللهم ارحمني في بطن الارض ۞ اللهم اغفرلي يوم العرض عليك ۞ بسم الله الرحمن الرحيم طريقي ۞ والرحمن رفيقي ۞والرحيم يحرسني ۞ من كل شيء يلمسني ۞اللهم اعوذ بك من شر النفاثات في العقد ۞ ومن شر حاسد اذا حسد ۞ اللهم اني عبدك ابن عبدك ۞ ابن امتك ناصيتي بيدك ماض في حكمك ۞ عدل في قضاؤك ۞ اسالك بكل اسم هو لك سميت به نفسك ۞ أو أنزلته في كتابك ۞ أو علمته أحداً من خلقك ۞ او استاثرت به في علم الغيب عندك ۞ أن تجعل القرآن ربيع قلبي ۞ ونور صدري وجلاء حزني وذهاب همي ۞ اللهم يا مسهل الشديد و ياملين الحديد و يامنجز الوعيد ۞ و يا من هو كل يوم في امر جديد ۞ اخرجني من حلق الضيق الى اوسع الطريق ۞ بك ادفع ما لا اطيق ۞ ولا حول ولا قوة الا بالله العلي العظيم ۞اسالك اللهم بقدرتك التي حفظت بها يونس في بطن الحوت ۞ ورحمتك التي شفيت بها ايوب بعد الابتلاء ۞ ان لاتبق لي هما ولاحزنا ۞ ولاضيقا ولاسقما الا فرجته ۞ وان اصبحت بحزن فامسيني بفرح ۞ و ان نمت على ضيق فايقظني على فرج ۞ وان كنت بحاجه فلا تكلني إلى سواك ۞ وان تحفظني لمن يحبني وتحفظلي احبتي ۞ اللهم انك لا تحمل نفساً فوق طاقتها ۞ فلا تحملني من كرب الحياة مالا طاقة لي به ۞ وباعد بيني وبين مصائب الدنيا ۞ وتقلب حوادثها كما باعدت بين المشرق والمغرب ۞ اللهم بشرني بالخير ۞ كما بشرت يعقوب بيوسف ۞ وبشرني بالفرح كما بشرت زكريا بيحيى ۞اللهم آآمـيـــن۞
من كدا مناجاتي نمت كعدت على اصوات مصلين صلاة الليل بين قائم وراكع صليت وياهم صلاة الليل غفيت الحد صلاة الفجر أذن صليت..واستغفرت ربي ساعة بسبب كلامي الدنيوي بحضرت الامام
رجعت للفندق لاگیت سید مجتبی گالي بضوجه

-وووين چنت التقاریر وصلن شگول للطبیب رافض تسوي عمليه الوجهك لوو شنو

-لاااااا جاوبه راح سوي عملية وجهي وحجز اليه باسرع وقت هااااا وخلي بالك النفسي مو شخص معين
لان أريد اگوم على حيلي، وبعد ما آسكت عن نفسي
ارید ارجع الدوامي‌اني السبب وقفت كل العمليات.وقفت
واولهن عملية وجهي...

-احلى خبررررر يعني احجززز وبعد ماعندك اعتراض

-اي مااعندي اعتراض بس لان تعبت من البنج ياذيني وهم من نخلص عمليه هم نرجع للعراق وارجع عقيله ألأهلها وماجبرها تكمل حياتها ويايه وتكون حياتي وحياتها تعيسه مثل حياة جدي وبيبيتي..
ماريد اعيشها بتعاسه
اجتني امي سالتني

-هااااا وليدي شلونك

-زين يمه الحمد الله بس شوفي عقيله ومنتظرج بلغرفه
راحت امي شويه ورجعت تفرك بايدها گالت

-تعاااااااااااااآآااااااال يمه مريتك نايمه بس مصخنه
وگفت قلق عليها واني حلفت ما ادخل ولااشوفها وبيني وبينها حد الله ماكدرت وماادخل اله حنثت يميني..اراقبها من بعيد هي نايمه
حرمت عليها حتى متروح لزياره أمي بيومها كالت تريد تروح ازور ماقبلت تاخذها
امي اصرت لاضيق عليها کخليها ازور وراحن وهل وروحه روحه لليل‌وين ادورچن
كاعد على نار تخربطت ...لان مریضه
اي هي مريضه وهسه اختنگت وتيهت حتآ امي
امي شلون اعوفهت تروح وحدها بقيت اكل بروحي

كأني عايز شلاع گلب وجاني شلاع گلب ثاني كاعد بس استغفر الاستغفار يرفع البلاء كاعد بستراحة الرسبشن وگلبي لايب موت اشويه دخلن امي وعقيله
ومبتسمات ظليت كاعد اريد اهدىء ماريد لساني يفلت وخصوص هاي الفتره
هواي فلتت والاجواء ماتتحمل بعد شفتها عيونها مورمه من البواجي

ختنگت وضجت من حالي تبچي وتبچي بسببي لان كارهتني وماتريدني كارهتني وكارهه القبح وتشوه وجهي بس من ابوها تخاف وباقيه

اشكد تكرهني، بسببي تبچي هواي شسويلها حتى ماخلي دموعها تنزل ضجت حيل لان بس تبچي المغرب كلت اروح للغرفه هم سمعتها تبچي قررت ارجع للعراق علمود ارجعها الاهلها رحت للغرفه لكيت سيد مجتبى گتله

-نرچع للعراق و
اخوي مچتبی رفض ماقبل گل

-لا سيد مهدي ارجوك ماعولت غيرت رايك وراح سوي العمليه منرجع اله نسويها الك خلينا نروح خليت امي تاخذها للمولات تسوق علمود تغير جوو ‌وبعدها موعد السفر للعملیه

سافرنا ماكدرت اروح ماودعها لبست ملابسی وکملت رحت للغرفه اجيت عليها عدلت حجابها صرت يمها دنجت ابوس راسها غمضت عيوني شميتها مشتاك ومهتام عليها سلمت عليها رغم برودها گلت كلشي يصير

-محتاجه شي من قم هزت راسها انتظرت منها حچايه
ماكووو بس دمع عينها ضجت من نفسي لان تبچي كارهتني ودعت امي أنطلقنه سافرنه أسوي عمليه تحددت بعد يومين أستغليتها أروح القم مثل ماگال الیه
السید وهنا وصلت الجامع جمگران اول مانزلت من السياره ريحة المسك من بعيد همست بداخلي

أمطر عليه بريِح يِوسف يا الله
فـا أنا في كرب يعقوب..

مشيت خطوات صار جدامي الصحن الشريف چبیر گلش
نظيف ارضيته تلمع صوت نافورات الماي توصل الاذني
كأنما تسمع صوت جريان مياه الكوثر
القباب الخمسه شاهقات،تبهر الناظر الهن اول ماتدخل تحس بقشعريره وجود أثار الحجه المنتظر عجل فرجه
وقفت يم بابه اقراء الدعاء اجى سيد مجتبى گال

-آلمگان گلش بعید وانت مريض يخوی شجابك

-جابني الشوق للأمام الغائب وأن أكون من جنوده لان
تعرف هذا الجامع الي اسس قواعد بنيانه وخططاه هو الامام الحجه يعني تعرف عظمة هيچ مگان اساس نبنى بايد الامام

-وهناك شنو المكان شو هووسه

-هناك عريضه يبيعونها اشتريلي وحده راح مجتبى يشتريلي وحده وعيوني للبير الي بركة الامام صار ألماي
يجري بيه نزلت دموعي على صبر الأمام عليه السلامه
من ذنوبنه وابتعادنه عنه
‏تذُوبُ فِي حضنِ جمكران همُوم المُنتظرين !
والعريضه التي نرسلها ببئرك مولاي لاتخذل عشاقك
اجى سيد مجتبى نطاني العريضه بيها الدعاء گال

-هذااا قلم سيد اكتب حاجتك بس طلب منك سيد اقرا الدعاء بصوتك بلكن اصير مثلك هيچ خاشع
اخذت القلم والعريضه بديت اقرا بيها واكتب حاجتي
"كتبت يا مولاي صلوات الله عليك مستغيثاً، وشكوت ما نزل بي مستجيراً بالله عز وجل ثم بك من أمرٍ قد دهمني، وأشغل قلبي، وأطال فكري، وسلبني بعض لبي، وغير خطير نعمة الله عندي، أسلمني عند تخيل وروده الخليل، وتبرأ مني عند ترائي إقباله إليّ الحميم، وعجزت عن دفاعه حيلتي، وخانني في تحمله صبري وقوتي، فلجأت فيه إليك وتوكلت في المسألة لله جل ثناؤه عليه وعليك في دفاعه عني، علماً بمكانك من الله رب العالمين ولي التدبير ومالك الأمور، واثقاً بك في المسارعة في الشفاعة إليه جل ثناؤه في أمري، متيقناً لإجابته تبارك وتعالى إياك بإعطاء سؤلي، وأنت يا مولاي جدير بتحقيق ظني وتصديق أملي فيك في أمر(-تكتب الشكوى أو الحاجة هنا(اجعلني من انصارك واتباعك وحنن،ثم قرب،ثم سدد،ثم قرب قلب زوجتي عليه) فيما لا طاقة لي بحمله ولا صبرلي عليه، وإن كنت مستحقاً له ولأضعافه بقبيح أفعالي وتفريطي في الواجبات التي لله عز وجل.
فأغثني يا مولاي صلوات الله عليك عند اللهف، وقدم المسألة لله عز وجل في أمري قبل حلول التلف وشماتة الأعداء، فبك بُسطت النعمة عليّ، واسأل الله جل جلاله لي نصراً عزيزاً وفتحاً قريباً، فيه بلوغ الآمال، وخير المبادي، وخواتيم الأعمال، والأمن من المخاوف كلها في كل حال، إنه جل ثناؤه لما يشاء فعال، وهو حسبي ونعم الوكيل في المبدأ والمآل
درت وجهي لكيت سيد مجتبى عيونه مدمعه..گلي

-صوتك حلو سيد بس ماگلت شنو امنیتك وحاجتك

-بيني وبين ربي وانت شنو طلبت

-طلبت اول مره كون يهديني واصير مثلك،وطلب الثاني كتبت اله صحة اخوي اريدها من رب العالمين ومنك وذا كان ولا بد عمري يرهن العمر أخوي

-يخوي عمرك طويل ليش تفاول على نفسك غير اموت اذا صار بيك شي

-واااانه انه اضيع انت اقوى مني بسمعتمد عليييييك بكلشي،انت سندي الوحيد،عضيدي الماكو منه عضيد بعد عين أخوك ياخويه تعرف عمامي لو ماجدي چان سووو ماسووو بس انت واگف بوجهم،حتی وانت مريض يهااابوك ياخويه طيب الخاطري الخاطر اخوك
تحاضنه اثنينه وبچینه،صوتنه صار عالي لزمت بعدته امسح أدموعه گتله

- انت زلمه ليييييش البچيييي هاااا خلینه نروح نشمر العرايض داخل البير

رحنه وشمرنه الاوراق وگلي امنيه أكون جندي من جنود القائم عجل الله فرجه الشريف دخلت للحضره صليت صلاة الزياره وطلعنه

رحنه للمستشفى وصلت وچان گلشی محضر الاجراء العمليه رغم تعب البنج سویت عملیه الوجهي وبقى وجهي ملقوف بلفاف بس عيوني وخشمي طالعات
مشتاق العقيله وكل يوم اخابر امي واسال عليها
حتى امي تگلي ..أذا تحبها أتصل أسال عليه انت

.يايمه خطيه مخلصتها بجي خابرها واسال عليها

-من تريدني احاچیها سدیت التلفون من صدك مشتاااق الها تعودت على وجودها اكثر بهل اسبوع
سوه نطلع،ناكل سوه،نتمشى سوه،بنفس الغرفه سوه

دخل الطبيب الايراني وحچي طمئني گلي
-وجهك يرجع،بنسبة تسعين بلميه...
وايدك بنسبة سبعين بلميه ترجع تتحرك
شكرته رجعت زرت جامع جمكران وهناك دفعت كفارة اليمين يمين القسم لان صدك مشتاق العقيله وبهل عشر أيام نسيت كلشي صار بيناتنه دفعت يمين القسم...
وبالي اريد ابدي وياها حتى لو تعتذر عن الرفسه وطگه

لااااااااااااامو اله تعتذر...گافي أسلم علیه ودكول الحمدالله على السلامه
لااااااااامو اله اسلم كافي تبتسم اليه
لااآاآاااااامو شرط تبتسم ..مجرد دكلي حمدالله على سلامه‌ راح اخذها الحضني هواي بالي اجت شغلات عنها وأولهن عيونها

وصلت للفندق متاخر تقريب الساعه ٣بليل اول مارحت
للغرفه مالتنه چنت ملثم وجهي ببلاستر وشطفه نزعت الشطفه حتى تعرفني دخلت اتنوع شلون تقراء قرأن
ابتسمت الها

وهي اول ماشافتني دنجت و ايدها ترجف...انتظرت تحچي تتكلم...صدمني برودها
وستقبالها اليه چان آبرد من البرود..
حتى ماگالت شلونك شلون صحتك،وهي تعرف رحت اسوي عمليات مو عمليه
تصنمت منها جرحتني ،واذتني معقوله لهل درجه كارهتني حتى الحمد لله على سلامه ماكو

اخ ياربي شكد بعد لازم اتحمل ...
أشكد جنت فرحان بشوفتها كد مانقهرت ونكسرت منها
طلعت یا ئس منها ومن حبها اليه مکسور گلبي...
اسنين ومعشم روحي تحبني...
تالي الحمد الله ماكو....
نزلت من الفندق وبقيت كاعد بابه عيوني للكبه الذهبيه

سلام الله عليك ياأمير المؤمنين من گال
"العشق مرض لا أجر ولا عوض"

أستغفرت ربي ....
المُحب الصادق : يعاتب لا يصد ، يحاول لا يتوقف ، يهتم لا يَدعيّ ... زعله محبـة ، و محبته أمان ، يأتي مثلما النور ، يتسع بك كالسماء ، و يضيق دونك مثلمـا الظلمة عندما يختفي الضوء ... المُحب الصادق يجادلك ، و يخاصمك ، و يشاغبك ، و يلاحظك ، و يستوضح منك لا ينفك عنك ، لحظاتكما معًا؛ بالنسبة إليه"هبات"لا مضيعة وقت.

اجت امي ويه الزايرات سلمت عليها صعدت وياها هي راحت يم عقيله وانه يم سيد مجتبى نمت مجرد ساعه الاجل صلاة اليل ختمت صلاة الوتر

كمت ضلعي أذاني
خليت ايدي عليه متذكر مولاتي الزهراء ناديتها
امَاهُ فَاطِم !
اماهُ جئتنكِ بكلي وكلي خراب
اماهُ اني أحتاج الى حنانكِ
اماهُ احتاج تضعِ يدكِ على قلبي المُتعب
اماهُ أنِ اختنق كثيراً احتاج أن
تضعِ يدكِ على روحِ الذابلة
'خذي بيدي أماهُ فاطِم لا املك شيئاً
في هذهِ الدنيا غيركِ وغير حنانكِ
وانا بأنتظار أن تضعِ يدكِ على قلبي المُتعب

كعدت الصبح سيد مجتبى مكمل جنطنه نرجع للعراق...
ركبنه الطياره، جانت منتظرتني أكعد يمها گلت الام

-آگعدي يم عقيله يمه خاف تحتاج منچ شی تستحي مني وانه رايح بلاااااخيرررررر كلشششش تناوعت اليه
وسكتت مااعرف شبيها هلكد ساااااكته ابتعد منها لااان تحرك گلبي بجمودها
وصلنه للعراق ستقبلونا الاهل أللكل فرحان بينا جدي وجدتي وعمتي استقبلونه بلهلاهل
البيت مرتبته عمتي العلويه زينه بفوانيص رمضان كالها
مجتبى

-هاااااا عمه هلكد كشخه وفوانيص هاي الشهر رمضان لو الرجعت سيد مهدي وزوجته

-للثنين لان سيد مهدي هلال البيت جيت عليها بست راسهاااا
-مشكووره عمه بس تدرين هذا خامس يوم فاطرين بيه

-وذااااا ياعمه همين عرسان وهمين سفررر باچر سادس یوم برمضان صومگم ویانه

-انشاء الله عمه

اجت العامله زنان اخذت الجنط عقيله بعدها واكفه وحتى نقابها كوه شالته لو ماعمتي تلح....تناوع الها الزراك عيونها الخجلها ماتتناوع اليه كارهتني
كالت امي العقيله

-ذيييييييييچ غرفتچ انتي وسيد مهدي روحي الها

-صاااار علويه
وكفت منتظرتني اخذها تقربت عليها گتلها

-تعالي ويايه....مشينا للغرفه دخلت وانا اخذت ثوبي والخاولي،گتلها

تناوعت الها ودها تحجي تسولف بس مثل كل مره دموعها تنزل عشره عشره

ومثل گل مره ساگته،وسگوتها یموتني ويحسسني انو اجبرها تتحمل تشوه وجهي أنقهرت على نفسي وحبي الها اجت تطيح دمعه مني
بس بسرعه اخذت ملابسي
وطلعت منهااا

#يتبع