رواية عشق وإبتلاء الفصل الثالث 3 - بقلم الكاتبة شمس السعدي

البارت الثالث
#عشق_وإبتلاء💔
#بقلمي_شمس

البنيه من تصير بمرحله جديده تحس نفسها كبرت ..
وتصير الها ثقه بنفسها اكثر ..

فلأعداديه كانت مرحله مهمه بحياتي ..
برزت انوثتي وبسرعه نضجت وطولي حلو ..

ولبست حجاب .. زادني جمال اكثر ..

اني رحت علمي ..
ورنا راحت ادبي هي نفس عمري ..
بس ساره اصغر منا بسنه . يعني بقت بالمتوسطه ..

گمنا نروح ونرجع سويه .. بقلمي شمس
وحمودي بحجة يوصلنا . يحاول يقترب ..

بس الصراحه اني مااحس بشي اتجاهه وخاصه لان طموحي غير شي .. وهو يعتبر جاهل بالنسبه الي ..
متوسطه مافلح بيها .. وتالي ترك وگام يشتغل وي خالو
كان اهتمامي بدراستي .. وماما تشجعني ومتخليني اسوي اي شي تگلي اهتمي بدراستج ..

مرت اشهر ع الدوام ..

وبدأت الاوضاع تسئ .. وعرفنا حتصير حرب ع العراق ..

بابا تخبل وأصر اروح يمه بالناصريه ..
بس ماما ماوافقت ودراستي هم مااگدر ..

وكنا متأملين انه الاوضاع تتغير وماكو حرب ..

لكن خاب املنا وفعلا .. بعد اذان الفجر ..

بدأت الغارات الجويه .. وتنبيه للحرب ..

خفنا وركضت يم ماما .. والبيت انخبص الناس كلها طلعن وخايفه ..
والدوامات خلص وقفوها ..

كانت ايام مايعلم بيها الا الله ..

گاعدين ببيوتنا وخايفين ولاشغل ولا عمل ..

وبعد يومين مااحس الا .. الباب اندگت ..

تطافروا خوالي ..#شمس

فتحوا الباب وشفت بابا دخل ..

مااعرف ليش بوقتها حسيت بأمان . وركضت حضنته
مع انه اول مره احس بهيج احساس ..
يمكن لان عمره ماحسسني بحنانه ..

شافته ماما ..
عادل خير شجابك بهذا الوضع ..

اجيت اخذ ماسه يمي ..
الوضع مايتأمن ويبقى بالي يمها ..

وهسا عرفت بنتك فوگ العشر سنوات انت تاركها .
تجي بالشهر مره تاخذها ..
شنو الي خلاك هسا تتذكرها ..

قبل كنت مطمأن هي بأمان .. هسا الوضع موزين وبنتي الوحيده مااتركها هنا ..

ساعتها حسيت بفرح مااعرف ليش ..
ماهتميت الاي شي ..
گلتله .. اي يوم اروح وي بابا احسن هناك عمامي كولهم يمنا وامان .

حسيت ماما ضاجت وانقهرت .. انتبهت ع نفسي ضوجتها
گلتلها بس طبعا انتي وياي مااتركج هنا ..

لا مااروح شعندي رايحه .. #شمس

يووم همه مو اغراب هم اقربائج ..
وبيبي مااسه تحبج نبقى يمها ..

بعد جهد وكلام يله وافقت تروح ماما..
وگالت راح اروح عمودج .. لان ادري ببتول ماترحمج ومااخليج يمها وحدج ..

بيبي هديه قنعتها وگالتلها اي يمه روحي وي بنيتج بلكي تصير سبب الرجعتكم ..

ماما ..😡😡

ههههههه بيبي هديه من اول ماتطلگت ماما وهي عندها امل يرجعون ..

بس ماما رافضه هذا الشي .. وحقها لأن بمكانها اني مستحيل ارجع الزوج خاني وتزوج عليه بالسر ..

جهزنا ملابسنا والي نحتاجهم ..
وطلعنا بسياره بابا ..#شمس

طلع حمودي من المشتمل ..

ماما مقبلت تگعد بالمقدمه ..
گلتلي انتي اگعدي يم ابوج .. بابا ضاج ههههه

گضوا الطريق كله مثل توم وجيري ..
هو يرد وماما تصد .. خبلوني واني بالوسط بقيت

جذبتني الشوارع والمباني والمدارس ..
ساكنه والناس ببيوتها تخاف تطلع ..

بس صوت الغارات والرمي ..
الخوف كتلنا اكثر ..

اوووف يبلادي .. كنا نروح ونرجع للناصريه بآمان وهدوء
هسا بخوف وقلق من المجهول ..
مانعرف اذا نوصل بسلامه ..
او نموت بالطريق ..

وگفونا دوريه مال شرطه ..
گالو الابوي ..
انت وين رايح وي اثنين نسوان متخاف عليهن والوضع متأزم ..

گله بابا .. هو لان اخاف عليهن اخذتهن يمي ..

مهدولنا الطريق ومشينا ..#شمس
ودعهم بابا .. منصورين ان شاء الله

احنه دخلنا الناصريه وسمعنا .. ضربه قويه عبالك انفجار
وهاي اول مره اسمع هيج صوت ..
گمت اعيط وابجي ..
بابا بسرعه حباب ليتجينه قنبله وتموتنا ..

اباوع الامي صفره قطرة دم ماكو وتتشاهد ..

گال بابا راح نروح البيت عمي الشيخ .. بأطراف المدينه يعني مثل الريف او منطقه زراعيه ..
شيخهم الي هو يصير ابو زوجها العمتي افراح ..
وعم بابا واخو جدو هندي بس اكبر منه ..

يگول بابا هناك امان .. واذا صار شي وترصدوا للمواقع المهمه والحساسه ..
هنا يكون امان النا .. مجرد منطقه زراعيه متقلقهم بشي .
فعلا .. اول موصلنا ..
الخضار وجمال الطبيعه لايوصف .. رووعه ..

والكل مجتمع هناك .. عماتي كولهم وبيت عمو علي .
وولد عم بابا ..
وبيبي ماسه هم ..
العائله كلها مجتمعه ..

اول مشافتني بيبي ماسه فتحت اديها ..
گاعده بالگاع تلگط تمن وتطر ماش ..

حضنتني حيل ..
ومن شافت ماما فرحت اكثر .. وگالت هلا بالغاليه .

لهناك طلعت بتول زوجه بابا .

ياااااا واني اگول ياهي الغاليه طلعت نويره ..
شجابها هنا ..

بيبي .. وانتي شلج غرض .. ترى هي تقربلي اكثر منج
امها تصير بنت خالتي ..
ويكفي هي ام ماسه .. #شمس

بتول .. اي افتهمنا .. بس گليلها خلي تهدا وتگعد مو تضل رايحة وراجعه وتراوي طولها ..

بيبيتي عصبت عليها وشمرت عليها الدولكه مال مي .
بيبي اذا عصبت شنو مقابيلها تشمر بي 😂
گلتلها ..
هو وين راح عويدل خلي يجي ياخذج من گدامي لو يرجعج مااتحمل طلايب اني ..

ماما .. خاله اتركيها خليها تحجي والله مااهتم الها ولااضوج ..
واني لوما اخاف على ماسه ويبقى بالي يمها مااجي ولااشوفها ..

طبعا اني عجبتني الطبيعه .. واكو شط مقابيلهم .
واشوف البنات يجيبن مي ..
لمحت حلا .. رحت اركض ورافعه الجبه مالتي وجوها بنطرون ..
بطبيعتي سافره بس من اجي للناصريه لازم البس عبايه واني مااحبها فألبس جبه ..

ركضت پاتجاه حلا .. ومااحس الا صوت وراي
نزلي جبتج ماكو خشا.
#بقلمي_شمس
يتبع...

..................
اسفه حبايب اذا تأخرت عليكم ..
بس بسبب النفوس الضعيفه ردت اوقف القصه .
بس بعد رجاء والحاح صاحبة القصه وافقت ..
لان خطيه نطيتها وعد ..
وربي حتى اكو بنيه دازتلي قصتها مالي خلگ اقرأها
لأن اكتب واتعب وتالي هيج اتجازه ومع انه  مااعرفه ولاعندي كلام وياهة بس شوفي شنو تگول
الله يهديها ..

ااني مو بكيفي انطي الصفحة ..
البنيه مقبلت
واستغربت وهي منين تعرفها والاسم اصلا مستعار
واذا تعرفها وتريد تحذرها معقوله ماعندها صفحتها او رقمها ..
شي يعجب ويثير الشك .. والصراحه خصوصيه البنيه امانه ومااگدر انطيها الاي احد يطلبها ..