رواية عشق وإبتلاء الفصل الثاني والأربعون 42 - بقلم الكاتبة شمس السعدي

البارت الثاني والاربعون
#عشق_وإبتلاء💔
#بقلمي_شمس

تفاجأت بجيتهم وهمه صار هوايه ماجايين النه .
بيبي هديه حيل فرحة من شافت بيبي ماسه .
لان هنه بنات خاله .

گلبي يدوگ ع السريع .
ومااعرف شأسوي .
بدينا نجهز الغدا اني وباجي وماما ويانا .

كلما اريد اسأل باجي واشوف شعندهم جايين مااگدر.
الوضع غريب .

صبينا وتغدوا . اني ماگدرت اخلي لگمه بحلگي من التوتر . اخاف ماما تفتح موضوع صفاء .
گدام بيبي وعمتي .

خلصنا سويتلهم جاي .
وصفيت الموعين لحتى اغسلهن.
صاحت بيبي .
ماسه اتركي كلشي وتعالي .

رجليه گامن يطبكن ببعضهن .
گعدت يم الباب .

اشرتلي تعالي يمي هنا بعد مانزلت الاستكان من ايديها .
گالت .
باعي نيران هاي هديه گاعده وهاي انتي وهذا عويدل .
وافراح هم . من البدايه ماگدرت احجي واتدخل .
وگلت همه اعرف بمستقبل ولدهم .

انتي نيران انطيتي بنتج لحميد . في سبيل ماتنطيها لمصطفى .
وحطمتي البنيه وماخليتيها تاخذ على رايها .
وتالي تطلگت وگابلتج .

ماما . بس خاله… .

اشششش خليني اكمل حجي . قاطعتها بيبي

وعادل هم مااتفاهم وگام يرعد ويربد .
وتالي طاحت بيها هاي المگروده .

وافراح رادت ترد كرامت ابنها لان رفضتوه .
وجبرته يخطب بنت انتصار .
واني اعرفه مايحبها ومايريدها .
وكم مره اجه يبحي ويگلي بيبي اني غير ماسه مااريدلي مره .
والنتيجه هم زواج فاشل . مصطفى تعب وحنين زاد مرضها وعنادها ومشاكلها .
لان هي تدري بي مايحبها والنتيجه .
ملوكه بقت بينهم .
لاهي منا ولاهي منا .

لهنا وكافي اني وليدي صارلي اشهر ماشايفته عايف الناصريه وهاج .
وهسا تريدين تزوجين ماسه الغريب ماتعرفيه منين مامنين والله يروح بيها وليدي ويموت بس يسمع .

ماما .. عمه شنو البيدي . مصطفى متزوج وماسه ماتاخذ متزوج وتكرر غلط ابوها .

بابا عصب وگال استغفر الله .اللهم طولج ياروح

كملت ماما .. واجتها قسمه زينه قابل تبقى عمرها كله بلايه زواج .

بيبي . ولج مصطفى صارله خمس اشهر من مطلگ .
بعد. يازواج .

مطلگ😲😲

اي جا انتو ماتدرون .

لاخاله ماندري هسا سمعنا . ليش طلگها وعندهم بنيه وحنين مريضه .

هيج صارت مشكله وتطلگوا.

يا وهم بعد يومين تگول تطلگت بسبب ماسه . ويبقن يلومن بيها .

عمتي افراح . نيران اسمعيني . اني اول وحده صرت ضد ماسه من تزوجت . وعاندت وزوجت مصطفى لبنت انتصار گلت بنت اختي وتصون ابني وتحبه وتربتنا واحسن مما يبقى ياكل بروحه على ماسه . وماسه تزوجت خلص ومايردون بعد .
شمدريني بنت اختي فوگ مرضها يطلع كل البله بيها .

بسببها ابني هج البغداد بعد مارجع .
وهاي بنتة باقيه عندي . ومحلفني ماوديها الامها .
خطيه لا ابو ولا ام .

وگلت محد يرجعه الوعيه والطبيعته والبنته وبيته بس ماسه .
كافي ظلمناهم كل هاي السنين. 
الله قاسملهم مايرتاحون لو يتزوجون الف مره .
همه مقسومين واحد للثاني .
واني الله شاهد احب ماسه ورايدتها جنه الي من البدايه بس من تزوجت واحد غير ابني ضجت وانقهرت وشلت عليها .
واني طالبتها منج طلبه يانيران ولاتفشليني .

(اسمع وممصدگه . كان شبه مستحيل يجي يوم وتخطبني عمتي المصطفى . ومن المستحيل مصطفى يطلگ حنين وهي مريضه . شنو الي تغير وشنو الي قلب الموازين . وليش مصطفى مااجه وگلي او اتصل .
خمس اشهر مطلگين واني ماادري.
وباجي ليش مگلتلي . اي هي لمحت وگالت لاتظلمين مصطفى.  بس ماحجت شي . ليش خبوا هذا الشي عني خمس اشهر راحت من حياتي واني طردته وگتله مااريدك كتله انساني وشوف حياتك . ربي احفظ عقلي وگلبي لان راح اموت من القهر والتفكير .)

كلها تحجي وتتناقش وماما تفرفح . مااعرف شنوالسالفه بس عيوني طگن من البجي . احس روحي فايره .
اباوع بعيونهم وهمه كل واحد يناقش بكيفه ويحجي .
ليش احنه شنو بالموضوع ليش احنه ساكتين وهمه الي يقررون عنه .
بعد كل هذي السنين اجاني امل حتى ارجعله .
لازم افهم منه واحجي وياه واعرف ليش هيج سوه واحنه الي ناخذ قرارنا مو همه .

گمت بسرعه للغرفه . سحبت موبايلي من الشحن .
اديه ترجف وگلبي يدگ حيل .
اتصلت .
دگ دگ وماكو جواب .
رجعت مره ثانيه دگيت معقوله ميريد يجاوبني .
معقوله شاف حياته وي غيري بهاي الخمس اشهر .
كل هذي الافكار اجتني بلحظه ووياها كلمة الو .

اووووف ياهالصوت اروحله فدوه .
گال الو واني دموعي نزلت .

-مصطفى شلونك .

-هلو ماسه واخيرا حن گلبج وسألتي .

-انت الي گطعت عني .

-مو انتي الي طردتيني وگلتي انساني .
اني رحت وتركتج حتى ترتاحين وتشوفين حياتج .

-انت وين

-اني بالبيت

-يابيت

-بيت اهلي

-امممم عمتي وين يمك .

-اي هاي نايمه .

-هههههه لعد الي عدنا منو .

-امي عندكم 😲😲 شتسوي .

-ليش مگتلي مصطفى انت طلگت حنين .

-منو گلج وشعندها امي عندكم .

-هي وبيبي ماسه هنا . وهنه الي گالن .
انت ليش ضميت .

-انتي السبب ماسه انتي الي هجرتيني وماسألتي .
والله اسألي امي صار كم شهر الناصريه مشايفها ولابنتي .
مشتاق الملوكه حيل .

-وليش بعدت عن اهلك وناسك لازم اكو سبب .

-طلعت مابيها حظ وانصدمت بيها .

-مصطفى انت بعدك تحبني .

-هذا السؤال المفروض اني اسأله الج .

-اني بحياتي مانسيتك بس من گطعت گلت نستني .

-ماسه شنو الي ذكرج بيه هسا .

-اجوني خطابه مصطفى.

-هااا 😲 منين .

-عمتي افراح خطبتني الابنها .

-امي 😲😲 شلون والمن .

-الك طبعا بس اذا مموافق عادي اگلهم مموافقه وكل واحد يروح بطريقه .

-اوكفي اوكفي يمعوده خليني استوعب السالفه .
#بقلمي_شمس
يتبع…