تحميل رواية «عذاب الحب» PDF

رواية عذاب الحب الفصل الأول

نور: بس انا مش قادره ما افكرش فيه مش قادره ابطل انت ليه مش حاسه بيا

ساره: انا اكتر واحده حاسه بيكي انا بقول لك حاول تشيلي من قلبك علشانك انا اكتر واحده عارفه انت تعبانه قد ايه بسبب الموضوع ده

نور: بعياط مش قادره صدقيني والله ما قادره

ساره: طيب اهدي بالله انا اسفه ما تعيطيش بس عارفه مش كريم ده اخويا بس هو جبله ومش بيحس

نور: ما تقوليش عليه كده ده قمر

ساره: بت بت هضربك وربنا ايه المحن ده

نور: انتي واحده عديمه المشاعر مش بتحسي اصلا

ساره نينينيني انا برضو

نور: طيب يلا بقى من غير ما مطرود

ساره: انتي عبيطه يابت انتي اللي في بيتنا ههه

نور: احم بجد ايه الاحراج ده طيب سلاموو عليكوو انا بقى

ساره: سلام يا اختي ونامي على طول علشان بتطلعي عيني كل يوم عشان تصحي

نور: وهي ماشيه قول يا رب ههه

اعرفكم

((نور احمد تانيه كليه تجاره ولا طويله ولا قصيره وبيضه ومختمره وما لهاش صحاب غير ساره وبتحبها قوي وبتحب كريم اخو ساره))

((ساره محمود طويله وملمحها حلوه في ثانيه كليه مع نور بتحبها قوي ومش بيفترقوا غير وقت النوم علشان هم جيران)) في الصبح

ساره: ماما انا رايحه الكليه هعدي على نور ونمشي على طول

ام ساره: ماشي يا حبيبتي خلوا بالكم من نفسكم وبلاش جنان علشان عارفاكوا دماغكم طقه

ساره: يخرب بيت الزولم يا جدعان

ام ساره اه انا ظالمه امشي بقى

ساره: سلام ست الكل

عند نور

ام نور: يا بنت قومي كل يوم تطلعي عيني كده مخلفه غيبوبه يا ربي نور انت يا بنت قومي

نور: اممممم ايه يا ماما عايزه انام

ام نور: يا بنت قومي ااتاخرتي على كليتك

نور: خمسه خمسه بس واقوم

ام نور: فين الشبشب

نور: قامت منفوضه اعااااا في ايه بس يا ست الكل قمت اهو انت ما بتعرفيش تتفهمي

ام نور: ايوه كده يلا البسي وتعالي افطري

الباب خبط

ام نور: دي اكيد ساره روحي البسي على ما افتح

ساره: صباح الخير يا طنط

ام نور: صباح الخير يا حبيبتي تعالي ادخلي على الغيوبه دي تلبس

ساره: دخلت ماشي عندكم فطار ايه بقى

ام نور: ههه يا حبيبتي تعالي ناكل احنا علي منور تلبس

بعد ربع ساعه

نور: اعاااا خيانه بتفطرو من غيري

ساره طلعت لسانها لنور: ايوه

ام نور: تعالي اخر صبري افطري بسرعه علشان كده هتتاخر على الكليه

نور: ماشي ماشي انا هروح عند سوسو حبيبتي اصلا

ام نور احنا معزومين على العشاء اصلا عندها فخلصو الكليه وتعالوا عشان تساعدونا في الاكل

نور وساره بس لبعض: ههه اكيد سلام احنا بقى عشان اتاخرنا

راحوا الكليه واليوم عدى بسرعه ورجله رجعوا على بعد المغرب كده وطالعوا الشقه بتاع ساره عشان معزومين هناك

نور بتفتح الباب: يا طنط انا جعانه

ساره: بصوت عالي وانا كمان يا ماما جعانه

كريم: طيب قولو السلام عليكم حتى الاول

ساره: اعااااا كريم وجريت حضنته وحشتني اوووي

يتبع......

عذاب الحب 💔

نور بتفتح الباب: يا طنط انا جعانه

ساره: بصوت عالي وانا كمان يا ماما جعانه

كريم: طيب قولو السلام عليكم حتى الاول

ساره: اعااااا كريم وجريت حضنته وحشتني اوووي

كريم: بضحك وهي في حضنه وانتي كمان يا مجنونه ما كانوش ثلاث شهور دول

ساره: انا كنت مفتقدك قوي جيت امتى

كريم: بعد ما رحتو الكليه على طول بس ما رضيتش ارن عليكي علشان تحضرو محاضراتكم كلها ما تسيبوش حاجه وتيجوا ازيك يا نور

نور كانت مسهمه وسرحانه في كريم

كريم: نور انت يا بنتي رحتي فين

نور فاقت: احم ازيك يا كريم حمدالله على السلامه

كريم: الله يسلمك يا نور عامله ايه

نور: الحمد لله بخير انت عامل ايه

كريم: انا كويس الحمد لله

ام نور وام ساره اللي هي سماح طلعوا على الصوت ومامت نور بتقول لهم هو ده اللي قلت لكم تعالوا بدري علشان تساعدونا في الاكل

ساره: معلش يا طنط المره الجايه هههههه

سماح ام ساره: طيب تعالي يا اخر صبري يلا انت ونور حطي الاكل على السفره علشان نتعشى اكيد جعانين

ساره: بصت لنور اللي هي اصلا سرحانه من ساعت لما شفت كريم

قالت لها: تعالي يا نور ودخل جوه نور اول مدخلت جوه عيونها دمعت وكانت عايزه تعيط

ساره شافتها: وقالت لها خلاص معلش امسكي نفسك علشان ما حدش يلاحظ حاجه

نور: مسحتدموعها وقالت لها حاضر

طلعوا وحطه الاكل على السفره وهم بيتعشوا وقعدين بيهزرو ويضحكوا

كريم بص لهم وقال: عندي ليكم خبر حلو جدا انا قررت اخطب طبعا كل فرح كانوا فاكرين ان هو هيخطب نور ونور طبعا فرحت جدا

ساره: ومين صحبت الحظ دي بقى ان شاء الله هي عارفه ان هي نور اكيد يعني بس حابه تهزر وكده علشان يقول مين

كريم بص لها قال لها: واحده زميلتي في الشغل طبعا الكلمه نزلت زي الصاعقه على نور وتقريبا عينيها دمعته كانت هتعيط ومسكت نفسها في اخر لحظه

سماح مامت كريم: وانا مش موافقه يا كريم

كريم: ليه بس يا ماما ده البنت طيبه خالص وتحبيها اول ما تشوفيها

سماح : انا قلت اللي عندي يا كريم والبنت دي مش هتتجوزها

كريم: حضرتك فين المشكله البنت حلوه خالص وطيبه على فكره هتحبيها ايه المشكله ان انا اخطبها اصلا وبعدين انا بحبها

نور طبعا ما قدرتش تستحمل اكتر من كده

ومامتها حاسه ان هم ما ينفعش يقعدو اكتر من كده لان دي مشكله عائليه ومهما كانوا هم قريبين من بعض ازاي برده ما ينفعش يتدخلوا في حاجه زي دي اخذت بنتها ومشيت لانها عارفه انه نور بتحب كريم

نور دخلت اوضتها وقفلت على نفسها الباب وفضلت تعيط وساره كلمتها ولقيتها بتعيط وجات لها الشقه ودخلت لها الاوضه وحاولت تهون عليها بس برده نور كانت زي المضروب على راسه ونفسها حد يفوقها وفي الاخر ساره مشيت عشان ما حدش يلاحظ حاجه بعد ما ساره مشيت من عند نور ام نور دخلت لنور لقيتها بتعيط هو ده هي كانت متاكده منه دخلت اخذت نور في حضنها طبطبت عليها و ملست على شعرها

ام نور: انا عارفه انك انت بتحبي كريم..

يتبع........

عذاب الحب 💔

ام نور: انا عارفه انك انت بتحبي كريم وده من بدري بس كنت بستنى انك انت تيجي تحكي لي بس انت ما جيتيش بس بعد ما شفتك النهارده كده اتاكدت فعلا انك بتحبيه

نور فضلت تعيط: ماما انا كنت هحكي لك بس كنت خايفه

ام نور: خفتي مني انا يا نور دانا ماما حبيبتك دانتي عمرك مخبيتي حاجه عني

نور بعياط: انا اسفه ياماما

ام نور: بس يا نور عيني كفايه عياط انا قلبي وجعني عليكي يابنتي

نور: ماما عايزه انام في حضنك

ام نور: يااه وانا اطول القمر ده ينام في حضني تعالي يا حبيبت ماما

وفضلت تقرالها قران لحد منامت ودعتلها ربنا يريح قلبها

في الصبح

ام نور صحيت لقيت بنتها نايمه وباين علي ملامحه الحزن وزعلت اووي عليها

ام نور: نور قومي يا حبيبتي يلا علشان كليتك

نور قامت علي طول غير العاده

نور بحزن وملامح باهته: صباح الخير يا ماما

ام نور: صباح الورد يا عيون ماما اي النشاط ده اول مره تقومي علي طول منغير مطلعي عيني هههههه

نور ابتسمت

ام نور: قومي يلا صلي والبسي وتعالي افطري علشان كليتك

نور: ماما ممكن مرحش انهارده بجد مش قادره

ام نور: لا انا بنوتي شاطره وهتتغلب علي كل حاجه وهتشيل حب كريم من قلبها وتركز في كليتها يلا يلا قومي

نور حضنت مامتها: شكرا علشان انتي بتحتويني وبتخففي عني

ام نور: يا هبله انا امك يلا قومي وانا هحضر الفطار

نور هزت راسها وقامت

بعد الفطار

الباب خبط ونور فتحت

ساره: صبح صبح اعم الحاج ههههه

نور: هههه جموسه ياربي

ساره: تشكرات تشكرات لا داعي لتسقيف دعونا نعمل في صمت ههههه

نور: ههههه هبله يلا علشان اتاخرنا

ساره كانت فرحانه انها طلعتها من المود شويه

ساره: عامله ايه انهارده يا نور

نور: عايشه

ساره: عارفه انه صعب جدا عليكي بس هوني علي نفسك هو ميستهلش حبك ده والله

نور: مش عايزه اتكلم يا ساره ممكن

ساره بتنهيده: حاضر هسيبك براحتك

في البيت عند ام نور

سماح: مش هوافق يا هدي مش هيتجوزها برضو

هدي ام نور: وايه المشكله ليه توقفي في طريقه ادام بيحبها

سماح: ليا اسبابي ومش هوافق برضو

هدي: حتي لو كان علي حساب ساعدته

سماح: افهميني يا هدي انا مش شايفه انها البنت المناسبه لابني

هدي: طيب شوفيها الاول مش يمكن تحبيها

عند كريم

كريم: امي مش موافقه علي ندا يا مروان انا تعبت بجد

مروان صاحب كريم: اكيد ليها اسباب يا كريم اقعد معاها وشوفها

كريم: اسباب ايه اللي تخليها توقف في طر يق سعادتي يا مروان

مروان: مش يمكن في بنت معينه عايزه تجوزهالك

كريم: مظنش

مروان: اقعد معاها يا صاحبي واكيد هتلاقي حل

كريم: طيب سلام انا بقي هروح الجامعه للبنات اجيبهم واخرجهم بقالنا كتبر مخرجناش

مروان: اشطا بااي

نور وساره طلعين من الجامعه ونور باين عليها التعب والارهاق

وساره بتحاول تطلع نور من المود شويه بس بتفشل

فون ساره رن وكان كريم

كريم: ايه فينكم

ساره: خارجين من الجامعه اهو في حاجه ولا ايه

كريم: لا مفيش خلاص انا شوفتكم اهو سلام

ساره: شافنا فين ده

نور: في اي

ساره لسه هتتكلم كريم جيه عليه

كريم: ازيكم يابنات عاملين ايه

نور: الحمدلله

ساره: اي ده اي جابك

كريم: والله خساره فيكي قولت اجي اخرجكم شوية علشان تفكو من جو الكليه والمزاكره بس انا غلطان سلامو عليكو انا ماشي باي باي

ساره: خدي يلا انا اسفه معلش ده انت اخويا حبيبي

كريم بتكبر وهو بيعدل التيشيرت بهزار

ايوه كده ناس متحيش الا بالعين الحمرا

ساره بضحك: مخلاص ياعم المتكبر مكنتش خروجه دي الي هنتزل علشلنها

كريم: يلا بينا طيب وانا هفسحكم فسحه هتحلفو بيها

نور: معلش روحو انتو انا هروح علشان تعبانه

كريم: تعبانه مالك نروح المستشفى

نور بدموع: لا انا تمام انا مرهقه بس

كريم: طيب خلاص في اي انتي هتعيطي ولا اي

نور مسحت دموعها: عايزه اروح ممكن

ساره بصت عليها بحزن وقربت منها ومسكت ايدها وطبطبت عليها

كريم: مفيش اعزار يا ست نور يلا علشان نروح مطعم ناكل الاول ونشوف ست البنات مالها علشان انتي مبتعرفيش تخبي يا نونو اشطا

نور ابتسمت علي كلامه بس قلبها كان بيبكي

يتبع..

عذاب الحب💔

البارت الرابع

اليوم خلص بسرعه ووصلنا البيت الساعه 12 وكان يوم جميل

تاني يوم الصبح

كريم صحي وراح يقعد مع مامته

كريم: صباح الخير ياست الكل وباس ايدها

سماح بزعل : صباح النور

كريم: حضرتك لسه زعلانه مني

سماح: وهزعل ليه

كريم: ماما لو سمحتي البنت اخدت معاد مع باباها مينفعش مرحش والله انا مش عارفه انتي مدايقه ليه البنت كويسه وانتي هتشوفيها وتحكمي عليها

سماح: يعني عايزه اي دلوقتي مش خلاص قررت وخدت معاد مالك بيا

كريم: يا امي انتي الخير والبركه مقدرش اعمل حاجه حضرتك متكونيش راضيه عليها لو سمكتي وافقي علشان خاطري

سماح: ماشي يا كريم انا موافقه بس متاكده ان الجوازه دي مش هتكمل

كريم بضحك: لا هتكمل ان شاءلله هتروحي معايا صح

سماح: امري لله

كريم بسعاده: هل تدري اني بحبك

ساره من وراه: نعم ادري هههههه

كريم: غلسه هانم صحيت اهي

ساره: نينيني صباح الخير يا ماما

سماح: صباح النور يا عيوني

كريم: امي هو احنا هناخد البت دي معانا

ساره: فين ها رايحه فين

كريم: لا مش هنقول خلي الفضول يقتلك

ساره: يا ماما بقي قوليلي

سماح: كريم رايحه يتقدم ل ندا

ساره بصت لكريم: برضو

كريم: مالك يا ساره ده بدل متفرحيلي

ساره: مبروك بس اتمنى انك تفكر تاني في الموضوع ده واه انا مش هروح معلش معايا مزاكره الامتحانات قربت

كريم: ماشي يا حبيبتي مع اني كنت اتمني انك تيجي انتي والبت نور علشان اعرفكو علي ندا

ساره: معلش بقي مره تاني انا رايحه عند نور علشان نزاكر سوا

سماح: ماشي ياحبيبتي

******

في شقة نور

ام نور فتحت الباب لساره

ساره: صباح الخير يا طنط هدي

هدي: صباح الورد ياحبيبتي تعالي ادخلي

ساره: البيت هادي يبقي الهانم لسه نايمه اكيد

هدي بضحك: اكيد هههه ادخلي صحيها وانا هحضر الفطار

ساره دخلت الاوضه وحات عند ودن نور

ساره: تووووووووووووت

نور قامت مخضوضه لقت ساره ميته علي نفسها من الضحك

نور مسحت وشها بايدها وبصتلها

نور: حسبي الله وحدفتها بالمخده ليه التخلف ده

ساره بضحك: معلش سوري بس بحب اصحيكي مخضوضه مزاج بقي هنعمل اي ههههه

نور: ابغى اقوم اجيبك من شعرك لاكن استحي

ساره: طب قومي يلا علشان نزاكر ونحاول نلم المواد دي الامتحان كمان اسبوعين

نور: يعني مش هنام

ساره: تؤتؤ قومي يلااا

نور: اووف قايمه انتي حد مسلطك عليا يابنتي

****

ساره ونور اليوم كله بيزاكرو وكريم ومامته راحو بيت ندا علشان يطلبو ايد ندا لكريم

وباباها

وافق وحددو معاد الخطوبه

رجعو وعدو علي شقة هدي علشان يسلمو عليها

هدي: اي الشياكه دي يا واد يا كريم

كريم وهو بيعدل الجاكت: اقل حاجه عندي ههههه

هدي وسماح: لا التواضع يابني هههه

سماح: اماال فين البنات

هدي: جوا بيزاكرو استني انادي عليهم واعرفهم انكم هنا وقامت بعد شويه نور لبست الاسدال وطلعت

نور: ازيك يا خالتو

سماح: الحمدلله ياحبيبتي

نور: ازيك يا كريم

كريم: الحمدلله ومبسوط وفرحان وعايز اقوم ارقص هههههه

نور بضحك: يارب دايما مبسوط بس اي السبب

كريم: يجماعه هو مش باين علي البدله ولا اي

سماح: اصلا احنا لسه جايين من بيت ندا وطلبنا ايدها

كريم: والخطوبه السبوع اللي جاي

نور غمضت عينها هي كانت عارفه انه هيحصل بس مكنتش تعرف انو بالسرعه دي

ساره مردتش تقولها حاجه كانت خايفه عليها تتعب علشان نور عندها السكر اصلا

ومامتها بصت عليها بحزن

اي هيكون رد نور واي هيحصل هل كريم هيخطب ندا او لا ونور هتعمل اي هنعرف البارت الجاي

يتبع...

عذاب الحب💔

Habiba ahmed

البارت الخامس

وقفنا طبعا المره اللي فاتت لما كريم قال ان هو خطب ندا وان الخطوبه بعد اسبوع طبعا كانت صدمه كبيره لنور هي كانت عارفه انه ده هيحصل بس ما كانتش عارفه ان هيحصل بالسرعه دي طبعا ساره كانت خايفه جدا لنور تتعب نور تماسكت في اخر لحظه بعد ما كا نت هتنهار قدامهم

نور بنغزه في قلبها: مبروك

كريم: مبروك حاف ما بقبلش لو في نقوط تمام هههههه

نور حاولت تبتسم ونجحت في ده بس ابتسامتها كانت حزينه

كريم: ايه يا ست ساره مفيش مبروك لاخوكي مش كفايه ما جتيش معايا عشان تشوفي مرات اخوك الكلام كان زي السكاكين في قلب نور

ساره: مبروك يا كريم انت عارف ان انا معايا مذاكره ومش فاضيه اليومين دول

كريم : ماشي مع ان كان نفسي تكوني انت ونور معايا عشان اعرفكم على على ندى بس المره الجايه ومش هتنازل عن ده

ساره وهي بتبص علي نور: اكيد

كريم مشي هو ومامته وساره طلبت تبات مع نور علشان يزاكرو بس الحقيقه انها مكنتش هتقدر تسيب نور لوحدها

**

في اوضة نور

نور: انتي كنتي عارفه انهم رايحين صح

ساره: احم الصراحه اه بس مكنتش هقدر اقولك

نور: انا هنام

ساره: اخدتي علاجك طيب

نور: اه اخدته

ساره: طيب متخليكي شويه معايا ونقعد نرغي اي رايك

نور: معلش يا ساره مش قادره

ساره: طيب ممكن تهوني علي نفسك لعله خير

نور: ونعم بالله تصبحي على خير

ساره بحزن علي صحبت عمرها: وانتي من اهل الجنه ربنا يريح قلبك

عدي اسبوع وانهارده يوم الخطوبه

اسبوع عدي علي نور وكانت اسوء ايام في حياتها وحلتها النفسيه في النازل ومبتخرجش من الاوضه وساره مش بتسيبها خالص

كريم بيكلم ندا في الفون

كريم: صباح الخير ياروحي

ندا:صباحالسعادة يا حبيبي انا مبسوطه اوووي

كريم: هههه لا انا مبسوط اكتر

ندا:امم طيب كنت عايزه اطلب طلب صغنن يا حبيبي

كريم: قلب حبيبك اطلبي ميت طلب

ندا: كنت عايزه اخلع الحجاب

كريم بعصبيه: نعم تعملي اي سمعيني تاني كده

ندا: يا حبيبي هي ليله في العمر وانا عايزه افرح بقي

كريم: واي المانع انك تفرحي وانتي لابسه حجابك

ندا: كريم بليز

كريم بعصبيه: ندا انا قولت اللي عند الحجاب مش هيتقلع

ندا: انت بتكسر فرحتي على فكره

كريم: خلاص ماشي احنا ممكن نلغي الخطوبه خالص اي رايك

ندا: ماشي يا كريم مش هقلع الحجاب ممكن تيجي بقي علشان متاخرش علي البيوتي سنتر

كريم:تمام هلبس واجيلك باي

ندا: بااي

****

كريم: ماما انا هروح اوصل ندا البيوتي سنتر

سماح: ماشي يا حبيبي

كريم: ساره ونور مش هيجو برضو

سماح: لا ياحبيبي سيبهم علي راحتهم احنا هنيجي علي القاعه علي طول

كريم: ماشي سلام

كريم وهو سايق

مالك يا كريم خايف من اي خايف تكون اخترت غلط هي دي اللي اخترتها ام لاولادك بعدين دي عايزه تقلع الحجاب علشان بس ليله عايزه تتنازل عن دينها علشان ليله بس بعد اي مخلاص جاي تفكر دلوقتي طيب انا كنت هعرف من فين انها كده طول عمري شايفه ملتزمه ومحترمه

*****

ساره: هتروحي

نور: اكيد دانا هروح وهرقص كمان

ساره: متاكده انا خايفه عليكي

نور: خايفه علي من اي اللي جاي مش هيكون اصعب من اللي فات يا ساره انا قلبي اتكسر يعني مش هتفرق كتير

ساره: حقك عليا انا

نور حضنتها: وانتي اي ذنبك يا هبله انتي مسبتنيش لحظه من يومها انتي اجمل اخت في الدنيا

ساره: متزعليش معلش انا عارفه ان اي كلام هقولو مش هيهون عليكي ولا هينسيكي

نور: كفايه انك معايا يلا نلبس

ساره: يلا ياروحي

**

بليل في القاعه الكل وصل ومستنين وصول العرسان

كريم راح جاب ندا من البيوتي سنتر وهي اعتزرتله عن اللي كانت عايزه تعمله وهو قبل اعتزارها

وكانو مبسوطين

ووصلو القاعه والكل طلع باركلهم ونور طلعت علشان تبارك غصب عنها لانها مش قادره تشوف واحده تاني جمب كريم وقلبها بيتقطع

نور: مبروك يا كريم

كريم بسعاده: الله يبارك فيكي يا نور عقبال مفرح بيكي واسلمك لعريسك بنفسي

نور: مبروك يا عروسه

ندا: شكرا عقبالك

نور هزت راسها ونزلت وجريت علي الحمام علشان تنهار براحتها من غير محد يشوفها

ساره طلع وراها

نور دخلت الحمام

سارة: نور افتحي لو سمحتي

نور بتعيط ومش بترد

ساره: يا نور بالله افتحي متوجعيش قلبي عليكي

نور فتحت وعيونها حمرا واترمت في حضن ساره

نور بعياط: عايزه اروح

ساره: طب اهدي وهعملك الي عايزاه اهدي

نور عيونها بتغمض

ساره برعب: نور نور اهدي وفتحي عيونك بالله

نور وقعت بين ايد سارة

يتبع...

البارت السادس

وقفنا المره الي فاتت لما نور اغمي عليها

ساره بعياط: نور فوقي يا نور وبتخبط علي خدها

ساره شافت واحده داخله الحمام

ساره: لو سمحت ممكن تساعديني

البنت: اكيد طبعا بس مالها هي

ساره: اغمي عليها

البنت: طيب اهدي انتي انا معايا برفان لحظه

طلعت البرفان وبتفوق نور وساره حاضنه نور

نور: اممم وفتحت عيونها بصعوبه

ساره: كده تخضيني عليكي

نور بتعب: ممكن تهدي انا كويسه

ساره بعياط: انتي بتعملي في نفسك كده ليه علشان حد ولا يستاهل فوقي لنفسك بقي

نور بصت علي البنت

نور: شكرا يا حبيبتي

البنت: العفو اهم حاجه انتي كويسه

نور هزت رأسها ليها بمعني ايوه

ساره: شكرا بجد مش عارفه لو انتي مجتيش كنت هعمل اي

البنت: انا معملتش حاجه والمهم انها دلوقتي كويسه بعد اذنكم

ساره: اتفضلي وقومت نور

ساره: اسفه علي طريقة كلامي معاكي بس انتي فعلاً لازم تفوقي لنفسك انتي متعرفيش انا كنت هموت من الخوف عليكي ازاي

نور حضنتها وعيطت

نور: عايزه امشي

ساره: طيب تعالي هنقعد في الجنينة علشان مش هينفع نمشي

نور: طيب

******

ندا : انا مبسوطه اووي ياحبيبي

كريم: وانا كمان يا حبيبتي

ندا مسكت ايده: بحبك

كريم: وانا كمان بحبك يا ندوش بس لو تعقلي

ابن عم ندا جاه عليهم

ابن عمها: مبروك ياندا مبروك يا كريم

ندا: الله يبارك فيك ياحبيبي

كريم ضغط علي ايدها جامدعلشان كلمة حبيبي

ابن عمها: تيجي نرقص

ندا: اشطا يلا شويه وراجعه يا كريم

كريم شدها جامد من ايدها

كريم: رايحه فين سمعيني تاني كده

ندا: اي يا حبيبي فيها اي

كريم: فيها كتير يا انسه يا محترمه

ندا: كريم ده زي اخويا يعني مفهاش حاجه

ابن عمها: انت مالك يا جدع انت دي اختي انا اللي مربيها وبعدين احنا متعودين علي كده مش هتيجي انت علي اخر الزمن تقولها متعمليش ده واعملي ده

وتتحكم فيها من دلوقتي

كريم بعصبيه: وانت مالك يلا حد وجهلك كلام وانتي اقسم بالله لو قمتي من هنا لهسيب الخطوبه وامشي اي رايك بقي

ندا بديق : ماشي ياكريم بس لينا كلام تاني

كريم بص النحيه التانيه بعصبيه

******

هدي: مبروك ياحبيبتي وعقبال ساره كده اما تفرحي بيها

سماح: الله يبارك فيكي ياهدي وتفرحي بنور

هدي : إن شاءلله فين البنات مش بينين من بدري

سماح: وهما دول بيقعدو في حته تلقيهم هنا لا هنا مانتي عارفه

هدي: علي رايك والله

****

ساره: احسن دلوقتي

نور: طول منا بعيد هكون احسن انا هرجع الشقه القديمه

ساره: هتسبيني لوحدي

نور: مش هطول بس افوق لنفسي واموف اون علشان انا حاسه ان طاقتي خلصت خلاص

ساره: لو هتكوني مرتاحه هناك روحي

نور: اكيد المهم اني ابعد

ساره حضنتها: هتوحشيني مش هلاقي حد اغلس عليه ولا اقعد معاه ولا ارغي معاه

نور: لا متقلقيش هكلمك اربعه وعشرين ساعه هههه

ساره: اما نشوف

نور: افردي وشك بقي

*******

بعد مالخطوبه خلصت والكل مشي

مروان: اي يا كريم مالك مش فرحان ليه

كريم: مين قال اني مش فرحان يا مارو

مروان: انا اكتر واحد عارفك وعارف انك مش مبسوط بس ليه مش عارف لان ده كان اختارك انت

كريم: بكره إن شاءلله نتكلم واحكيلك بما ان مليش حد احكيله هحكيلك انت وخلاص بقي امري لله

مروان: يعم اتنيل انت ليك غير اصلا وبعدين اي احكيلك وخلاص حاسك جاي علي نفسك اوووي يابني

كريم: اه حصل هههههه

مروان: غور يلا

كريم حضنه: انت عبيط ياض انت اخويا اصلا

مروان ببرود: عارف

كريم زقه: طب غور بقي انا غلطان

مروان ببرود: طلقني لو مش عاجبك وسابه وجري

كريم: خد يلا وجري وراه

مروان راح عند سماح وهدي

مروان: خالتي ابعدي ابنك ده عني اه الواحد مفرهد وجعان ومكلش حاجه من الصبح مش عارف انا اي جيبني خطوبه مفهاش اكل

كريم بزهول: امااال مين اللي لسه طافح ده دانت خلصت علي الاكل

مروان ضرب كف علي كف : يخربيت الزولم اجدعان

هدي وسماح نزلين ضحك علي اكتر اتنين بيحبو يغلسو علي بعض وملهمش غير بعض

سماح: خلاص يا مروان ليك عندي يا حبيبي عزومه وهعملك الاكل اللي بتحبه مرضي ههه.

مروان: بصي يا ست الكل هي فرصه متتعوضش فاكيد مش هرفض انا لاقي حد ياكلني وقولت لا هههه

(مروان مامته متوفيه )

سماح: يا حبيبي انتي تيجي كل يوم وانا اعملك اللي عايزه

مروان: تسلميلي يا خالتي يلا عايزين حاجه

كريم: تسلم يا مارو

مروان: يلا سلامو عليكو انا بقي

كريم: يلا بينا احنا بقي وبعدين فين الهوانم اللي مش بينين من او الخطوبه

دول

سماح: قاعدين بره في الجنينه

كريم: طيب يلا

في الجنينه نور نايمه علي كتف ساره وبيرغو

ساره: هههههه

نور: بطني وجعتني يخربيتك هههه

ساره: مش قادره ابطل ضحك هههه

كريم بديق: يلا

ساره ونور: طيب وركبو العربيه

ساره: كيمو باشا مالك

كريم بصلها وبص قدامه

ساره: اي ده مقموص هههه طب في اي مالك

كريم: لا ابدا مفيش انتي عملتي حاجه انتي وست نور لا

ساره: اوباا شكل الموضوع جامد يابت يا نور

نور: ليه احنا عملنا اي

كريم: ياسلام يعني انتو مش شايفين انكم عملتو حاجه انتو سبتو الخطوبه وطلعتو بره

ساره: معلش يا كيمو بس الجوا كان ممل ودوشه اووي معلش متزعلش

نور: معلش يا كريم متزعلش

كريم: المشكله اني مبعرفش ازعل منكم

ساره: حبيبي يا برو

*****

وصلنا البيت

نور: ماما ممكن اتكلم معاكي شويه

هدي: تعالى ياحبيبتي

نور: ماما كنت عايزه نرجع الشقه القديمه كام يوم كده

هدي: عايزه تبعدي صح

نور هزت رأسها

هدي: حاضر ياحبيبتي اللي هيريحك هعملهولك وحضنتها

نور: شكرا بجد انك وفقتي علشان عارفه انك مش بتحبي الشقه التاني ومع ذالك وفقتي

هدي: اعمل اي حاجه علشان تكوني مرتاحه

نور طلعت من حضنها

نور: اروح احضر الشنطه بقي

هدي: اوعي تنسي كتبك وحاجات الكليه

نور: اشطا يا دودي

****

تاني يوم الصبح

سماح: ازاي يعني يا هدي طيب مقولتليش ليه امبارح جاي انتي وماشيه تقولي

هدي: حبيبتي متزعليش والله احنا اتفقنا بعد مجينا من الخطوبه بليل

سماح: هطولو طيب

هدي: لا كام يوم بس وهنرجع تانى

كريم: صباح الخير ليه انتو رايحين فين

هدي: هنرجع الشقه القديمه

يتبع...

عذاب الحب 💔

Habiba ahmed

البارت السابع

كريم: ليه هترجعو الشقه القديمه حصل حاجه هنا ولا اي

هدي: لا يا حبيبي هنروح عادي نقعد كام يوم

كريم: وامتحناتك يا نور هتروحي الكليه ازاي

نور: عادي الشقه قريبه من الكليه

كريم: علي رحتكم ومش محتاجه اقولك لو حصل اي حصل ولا احتجتي حاجه ترني عليا وانا هكون عندك فورا

هدي: اكيد يابني يلا سلام يلا يا نور

كريم: هوصلكم يلا

هدي: مش عايزه اتعبك ياحبيبي خليك هناخد تاكس

كريم: عيب الكلام ده هوصاكم واطمن عليكم وارجع

هدي: ماشي

******

سماح: خلاص يابنتي انتي لو مطلقه وبتجري علي يتامه مش هتعملي كده

ساره بحزن: سبيني يا مامت محدش حاسس بيا

سماح: ههههه دي كام يوم وراجعه وغير انك هتقبليها في الكليه مهجرتش يعني وقومي روقي البيت واغسلي المواعين يلا

ساره: لا بقي مش كفايه نور مشيت هغسل المواعين كمان

سماح: علي المطبخ يلا

ساره: اعااا بقي

سماح: متبرطميش سمعاكي

******

فون كريم رن وكانت ندا

ندا: ازيك ياحبيبي

كريم: الحمدلله عامله ايه

ندا: كويسه جدا وحشتني علي فكره

كريم: طيب هكلمك بعدين علشان سايق العربيه

ندا: انت جاي الشركه انهارده

كريم: اه يلا بااي وقفل

بعد موصلنا الشقه كريم شال الشنط وطلعهم

كريم: محتاجه حاجه يا خالتي

هدي: تسلم يا حبيبي

كريم: خلاص همشي انا

هدي: استني هعملك حاجه تشربها

كريم: لا ياست الكل شكرا انا همشي علشان معايا شغل تعالي يا نور عايزك

نور: نعم

كريم: في اي متغيره مالك

نور: مفيش حاجه انا تمام

كريم: من امتي بتخبي حاجه عليا

نور: مش بخبي بس فعلا مفيش حاجه

كريم: هسيبك براحتك

نور ابتسمت

كريم: وتخلي بالك من نفسك ومتنزليش لوحدك ولو احتجتي حاجه رني عليا وانا اجيبهالك و في الامتحانات هوديك انا

نور: ليه كل ده وبعدين انا مش طفله

كريم: نور كلامي يتسمع من غير تعليق وتقولس حاضر وبس

نور: اووف حاضر

كريم: ماشي يا طفله عايزه حاجه

نور: متقولش طفله وشكرا مش عايزه حاجه

كريم: اوكي باي يا طفله هههه وسابها ومشي

نور: يابارد

كريم: سامعك ولو رجعت انتي عارفه هعمل اي

نور: انا مين ده انا مقولتش حاجه

****.

عدي كمان اسبوعين خلصنا امتحانات وحصل حاجات كتيره فيهم كريم ساب خطيبته بس محدش يعرف لسه وسابها ليه هنعرف دلوقتي

فلاش باك

كريم: انا قولت اللي عندي يا ندا ابن عمك ده يلزم حدوده معاكي ده كةن هيحضنك وانا واقف

ندا: وفيها اي زي اخويا ومتربين سوا

كريم بعصبيه: زمان حاجه ودلوقتي حاجه تاني انا مش سوسن علشان اسكت علي حاجه زي دي

ندا: انت كده بتخنقني وبتبعدتي عن الناس اللي بحبها

كريم: ده اسلوبي ومش هيتغير حابه نكمل تتغيري وتخلي في حدود بينك انت وابن عمك واي حد عمتا مش عايزه كل واحد يروح لحاله

ندا: وانا مش هقبل بالوضع ده

كريم: براحتك اتفضلي الدبله اهي

ندا: انت بتتخلي عني

كريم: انا متخلتش عنك انتي اللي اختارتي

نور: ماشي يا كريم هبعتلك كل حاجه مع محمد (ابن عمها) بعد اذنك

كريم رجع البيت ومقلش لحد وعدي كام يوم

في يوم كان قاعد بليل مع اخته وامه والفونه رن

سماح: مين بيرن عليكي دلوقتي

كريم بص في الفون

كريم: دي خالتي هدي

سماح: افتح بسرعه طيب

كريم فتح: الو

هدي بعياط: الحقني يا كريم دخلت لقيت نور واقعه في الأرض ومش بترد عليا ومش بتفوق

يتبع..

عذاب الحب 💔

Habiba ahmed

البارت التامن

ساره بخضه: في اي مالها نور

كريم بخوف: مش عارف خالتي بتقول مش بتفوق

ساره بعياط: لحظه هلبس واجي معاك

كريم: مش هقدر استني يا ساره هكلمك اطمنك انا وطلع يجري

ساره بعياط: ماما انا خايفه علي نور اووي

سماح: اهدي ياساره خير إن شاءلله

ساره:انا مش هقدر استني انا هدخل البس واروح

سماح: وانا كمان

كريم كان سايق العربيه بسرعه جدا وقلبه كان بيدق بخوف وحس انه مش هيستحمل لو حصلها حاجه وصل الشقه

كريم بيخبط جامد

هدي فتحت وكانت منهاره

كريم دخل يجري لقاها علي السرير

كريم: نور فوقي نور

كريم شالها وطلع يجري علي المستشفى

في العربيه كريم حط نور في الكنبه اللي وره وساق بسرعه

هدي: يابنتي متوجعيش قلبي عليكي فوق بالله

كريم فونه رن

كريم بتوتر: في اي ياساره بترني كده ليه

ساره: بعياط انتو فين احنا عند الشقه دلوقتي ومفيش حد بيرد

كريم: احنا رايحين علي المستشفي

ساره: مستشفي اي طيب

كريم:...... سلام

وصلو المستشفي وكريم شالها

كريم: عايز دكتور بسرعه

الممرضه:دخلها اخر اوضه في الطرقه

وانا هنادي الدكتور

ساره جايه جري: الدكتور قالي اي

هدي: لسه مطلعش خدي نفسك انتي

سماح جايه من اخر الطرقه: ايه ياحبيبتي ايه الاخبار

هدي بعياط : معرفش معرفش بنتي كانت كويسه مكنش فيها حاجه

سماح حضنتها: اهدي هتكون كويسه

ساره بتبص لكريم بعتاب وبتقولو انت السبب

كريم: في اي يا ساره بتبصيلي كده ليه

ساره عيطت: لو حصل حاجه لنور مش هسامحك

كريم: انا عملت اي علشان تفولي كده

ساره: مانت لو مكنتش جبله ومبتحسش كنت عرفت انها بتحبك وانت عملت اي فضلت تقولها انتي زي ساره انتي اختي ورحت خطبت واحده تاني انت بجد اي مبتحسش

كريم مش مصدق الي سمعه

كريم لسه هيرد شاف الدكتور طلع جري عليه

كريم: اي يا دكتور عامله اي دلوقتي

الدكتور: اهدو يا جماعه هي بقت كويسه

بس عايزه اسال هي تعبت قبل كده واغمي عليها

ساره بتوتر: اه يا دكتور بس فاقت علي طول

كلهم بصولها

الدكتور: كان المفروض تهتمو اكتر من كده علشان هي مبتخدش العلاج بتاع السكر

هدي: ازاي يادكتور هي بتقول انها بتاخده

الدكتور: لا يا مدام مبتخدش العلاج وسبب تعبها ده انها بقالها فتره مش بتاخده

كريم حس بالذنب

كريم: طيب هي فاقت وحالته اي دلوقتي

الدكتور: شويه وهتفوق وهي كويسه وهتتاكدو من ده لما تدخلو تشفوها بس ياريت تبعد عن اي حاجه مزعلاها

كريم: شكرا يا دكتور

هدي: بنتي تعبت امتي وازاي متقوليش يا ساره

كريم اتدخل: نطمن عليها يا خالتي وبعدين نتكلم

دخاو عند نور وكانت نايمه وامها جريت عليها وخدتها في حضنها وساره قعدت النحيه التانيه ومسكت ايدها

نور فاقت شفتهم جمبها كده ابتسمت بتعب

نور : اي حصل

ساره: انا السبب كان المفروض اخد بالي منك بعد اخر مره وعيطت

نور: انتي عبيطه ياساره سبب في اي انا كويسه والله ومتعيطيش علشان خاطري

هدي: كده توجعي قلبي عليكي يابنتي ليه مبتخديش العلاج

سماح: خلاص يا هدي مش وقته سلامتك يا نور ياحبيبتي

نور: الله يسلمك يا خالتو وبصت علي كريم كان باصص ليه بحب اووي اول مره تشوف البصه دي منه واستغربت

كريم بحب: سلامتك يا نور كده تخضينا عليكي

نور: معلش انا اسفه انا محستش بنفسي غير هنا

كريم: اسفه علي اي يا نور بس بس احنا زعلنا فعلاً منك ازاي متخديش علاجك انا ليا كلام تاني معاكي بس بعد متفوقي كده وتبقي كويسه

نور هزت راسه

عذاب الحب💔

Habiba ahmed

البارت التاسع والقبل الاخير🥲

عدي اليوم ورجعنا الشقه تاني وماما وكريم جابو الحاجه الي كانت في الشقه القديمه كريم اتغير جدا معايا وعرفت بعدين انه فركش مع ندا

تاني يوم طلعت اقعد علي السطح علشان الجو كان حلو وست ساره نايمه فطلعت لوحدي

كريم: الجميل بيعمل اي هنا

نور بخضه: بسم الله وحطت ايدها علي قلبها

كريم: اهدي انا اسف

نور: حصل خير

كريم بابتسامه: قاعده لوحدك ليا

نور: علشان الست اختك نايمه

كريم: احم الصراحه هي مش نايمه انا الي قلتلها متطلعش

نور باستغراب : لي يعني

كريم: علشان عايز اتكلم معاكي لوحدنا

نور: في اي يابني

كريم: الصراحه انا بحبك

نور حست انها بتتخيل زي العاده

نور: انجز قول

كريم بحب: منا قولت

نور: قولت اي

كريم بابتسامه: ب ح ب ك

نور مكنتش مصدقه وقلبها بيدق بسرعه وكانت في قمت الاحراج

كريم بضحك: اهدي ممكن

نور: بتحبني انا طب ازاي

كريم: كنت اهبل الصراحه وعمري مشوفتك غير اخت بس اما تعبتي حسيت اني قلبي وجعني وكنت هموت من الخوف عليكي سعتها اكتشفت اني بحبك

نور بدموع: انا عايزه امشي بعد اذنك

كريم مسك ايدها: طب ليه الدموع دي انا كنت فاكر انك بتحبيني زي مبحبك بس شكلي غلطان

نور عيطت عند الكلمه دي:

انت بتتكلم في اي انا مبحبكش طب ازاي انا اكتر حد اتعذب بسبب حبك انا كنت بحبك لدرجه مش لاقيه وصف لحبي ليك

وجاي دلوقتي تقولي مش بحبك وفضلت تعيط

كريم قلبه وجعه عليها وكان فرحان بسبب حبها لي

كريم: انا اسف اهدي حقك عليا انا اصلا جبله ومش بفهم وغبي متعيطيش بقي

نور ضحكت ومسحت دموعها : ايوه انت مبتفهمش

كريم: مقبوله منك ياعم وغمزلها اي بقي

نور بحرج: احم اي في اي

كريم: موفقه عايز اخد خطوه رسمي

نور: لامش موافقه وابعد بقي خليني انزل

كريم شدها وقعدها تاني

نور: كريم مينفعش تلمسني

كريم: اسف معلش

نور: انا نازله

كريم نزل معاها

سماح وساره قاعدين عند هدي

نور دخلت وكريم دخل وراها

كريم: بصي بقي ياست الكل انا عايز اتجوز بنتك

نور: وانا قولتلك اني مش موافقه

كريم بيرقص حواجبه بيها

كريم: هتوافقي يا بطه

نور: اعااا بقي طب مش موافقه ها

كريم: ههههه بس يا طفله

نور: متقولش طفلة

كريم: لا طفله

هدي: بس انت وهي اي شغل الاطفال ده

سماح: وبعدين انت اهبل في حد يتقدم لحد كده عايز اتجوز بنتك يابن الهبله

كريم: هرش في قفاه

كريم: احم صح خلاص بكره علي الساعه 5هنيجي نتقدم رسمي

هدي: تنورنا ياوحبيبي

كريم: تسلمي يا حماتي هههه

نور: انا داخله جوه يا مامااا

الكل ضحك عليهم

ساره دخلت وراها

ساره: احم نوري

نور: تعالي هنا بقي انتي تقوليلي نايمه وانتي متفقه مع اخوكي

ساره: بس اي رايك في المفاجأة دي

نور: لو قولتلك اني مش عارفه اوصف فرحتي هتصدقيني

ساره حضنتها: مبروك ياروحي بجد فرحت اوووي

نور: وانا انا كنت مبلمه ومش نصدقه حاجه هههه

ساره: يلا الاتنين اهبل من بعض مجمع الا موفق ههههه

نور: اتلمي يا بارده

ساره: هتلبسي اي بكره

نور: مش عارفه انا عندي حاجات كتير بس عايزه البس حاجه مميزه كده فهماني

ساره: تيجي نروح المول بكره الصبح ونجيب اجمل فستان لاجمل عروسه

نور: هو انا بحبك من شويه خدي بوسه

ساره: تعالي نشغل اغاني

نور: اوووو ونرقص ههههه

ساره: استني هشغل

تاني يوم

يتبع..

عذاب الحب 💔

Habiba ahmed 🖤✨

البارت العاشر والاخير

انا وساره كنا مبسوطين جدا وفضلنا نغني ونرقص ونتنطنط واليوم عدي وساره باتت معايا

تاني يوم الصبح صحيت ملقتش ساره في الاوضه افتكرت اني كل ده بحلم قمت مخضوضه لقيت بوكس

نور: اي ده ومين جابه هنا تعالى اما افتحك وفتحته وكان في فستان وكل مستلزماته والفستان كان فوق الجمال ولقيت ورقه مكتوب فيها

انا جبتلك الفستان يارب يعجبك ومستني اشوف الفستان علي اميرتي الحلوه ومتاكده انك هتكوني قمر وهتحلي الفستان وكاتب اسمه من تحت

انا كده اتاكدته انه مش حلم اعااااا انا مبسوطه واخيرا هتجوزه لولولولي

هدي فتحت الباب

هدي: بتعملي اي يابت الهبله

نور: اي يا دودو مبسوطه متبسطش يعني ولا اي

هدي: لا ياختي اتبسطي بس منغير هبل

نور حضنتها: انا بحبك اووي

هدي عينها دمعت

نور: في اي بس يا دودو هتقلبيها نكد لي

هدي: فرحانه بيكي يا نور عيني وزعلانه انك هتسبيني

نور: هو من حتت هسيبك دي لسه بدري اوي وانا عمري مستغني عن احن ام في الدنيا دانا هقرفك ليل نهار عندك انتي اللي هتطلبي مني مجيش عندك هههه

هدي مسحت دموعهاوقالت بهزار : لي ياختي وهو انا مجوزاكي ليه

نور: علشان اقرفك واعيش معاكي ونكنسل الواد كريم ههههه

هدي: هههه والله لو سمعك مش بعيد يكتب الكتاب دلوقتي ههههه

نور: مجنون ويعملها ههههه

هدي: طب يلا يا سكر وراكي تنضيف واكل عايز يتعمل الساعه ١٠

نور: اعااا لا بقي انا العروسه معملش حاجه خدي البت ساره

ساره من عند الباب: وهيا لسه هتاخد ساره دي اتلفتني من اول مصحيت ههههه منوره يا دودو هههه

نور: امي دي رهيبه يا جدعان

هدي: طب يلا يابت الرهيبه قومي معانا شغل كتير

نور قامت: اي ده هو انا مقولتلكيش

هدي: لا

نور: انا مش هعمل حاجه وطلعت تجري

ساره : انا ادبست وش

هدي: بتقولي اي انتي التانيه

ساره: بقول اروح البيت اغير واجي تاني

هدي: لا بعد منخلص يلا علي المطبخ

ساره: اعاا والله حرام بقي

الساعه جات ٥وانا لبست الفستان وكان قمر عليا وكنت بلف بيه بفرحه

ساره: قمر اوي مشاءالله

نور: بجد يا ساره شكلي حلو

ساره: هو بعيدا عن انك دبستيني انهارده واني دعيت عليكي واني عايزه اقوم ارنك علقه بس شكلك قمر الواد هيتهبل

نور: ههههه قلبك ابيض كفايه اللي عملته ست الحبايب فينا اما مسكتني ههههه

ساره: اه والله فرحت فيكي ههههه

نور: الحقي دول جم

ساره: ايوه في اي مالك

نور: متوتره اووي كاني معرفهوش ودي اول مره

طلعت قدمت العصير وسلمت علي كريم وخالتو

سماح: اي القمر ده يا نور مشاءالله عليكي

نور: حبيبتي يا خالتو عيونك اللي قمر

كريم قام راح جمب هدي

كريم بصوت واطي: بقولك اي يا دودو يا عسل انتي

هدي: ادخل في الموضوع علي طول

كريم: ههههه فهماني دايما انتي بقولك عايز اقعد مع نور لوحدنا شويه علشان عايز اقولها حاجه كده

هدي: طيب تقعدو في البلكونه هنا قصادي

كريم: قصادك قصادك اي حاجه وخلاص بقي

هدي: نور خدي كريم واقعدو في البلكونه

نور: طيب يا ماما

في البلكونه

كريم: اي الجمال ده

نور: اقل حاجه عندي

كريم : يا جامد ههههه

نور ابتسمت وبصت قدامها

كريم بحب : مالك

نور: مفيش

كريم: مش هتقوليلي من امتي بتحبيني

نور : فاكر من ٣سنين اما تعبت جامد

انا روحي كانت بتتسحب مني وكنت خايفه عليك اوي يومها اتاكدت اني بحبك ولما قمت بالسلامه انا روحي رجعتلي تاني كان اوحش يوم في حياتي

كريم: هو انا كنت غبي واعمي كده ازاي

نور: زي السكر في الشاي نيهيهي

كريم بضحك: ظريفه بدل متقوليلي متقولش كده علي نفسك

نور: لا قول وانا مالي

كريم: امشي يابت

نور: خلاص سوري هههه

كريم: بحبك ((انتي اساس حكايتي ))

نور بحب: انا مبحبكش انا عديت المرحله دي من بدري

عذاب الحب 💔

اكتملت

بعد كل تعب وصبر وحزن يوجد عوض ربنا ليك عوض مكنتش تحلم بيه ولا تتخيل انه كان ممكن يحصل ابدا

هستني رايكم في الروايه بفارغ الصبر وحقيقي كلامكم بيفرق جامد معايا وبيشجعني اني اكمل دي كانت اول رواية انشرها يارب تكون عجبتكم وبتمني تقولولي رايكم في الكومنتات وشكرا علي كل كلمه حلوه منكم وبحبكم جدا وان شاءلله في رواية جديده استنوني

Habiba ahmed 🖋✨