رواية #عيناك_واللحن_القديم الفصل الثاني عشر بقلم Frdos El Sined

#عيناك_واللحن_القديم
بقلمي : فردوس عبد اللطيف
الحادي عشر والاخير
اترك لعينيك الكلام، فسيقرأ من أحبّك لمعانها واجعل وداعك لوحة من المشاعر، يستميت الفنانون لرسمها ولا يستطيعون، فهذا آخر ما سيسجله الزمن في رصيدهما
شجاع : الحكني ايمن ولك تخربطت الماس خالتي علياء اشلون شتسوولها بهيج وضع ؟
علياء : ناخذهه للمشفى
شجاع : اخذناها للمشفى وبقيت اباوع على حبيبه عمري من الجام والاطباء حولينها والاوكسجين والاجهزه عليها
دموعي ماتوقفت
كومي الماس حبيبتي فدوه اروحلج كومي عندي حجي هواي اريد احجي اريد اكولج مانمت بغيابج
الماس احبج احبج احبج
حسيت بايد على كتافي
التفتت عمو مهند
مهند : اهدأ شجاع هذا حالها على طول هسه تصحى
وره نص ساعه تقريبا استقر وظعها طلبتني طلعت الممرضة وكالت منو شجاع المريضة طالبته
دخلت خطواتي تسبقني رجلي ثكلت واني اتقرب يم حلم عمري الماستي العزيزه
فتحت عيونها ابتسمتلي
شجاع : لزمت ايدهه ..فديت هالابتسامه النرجسيه
الماس : نزلت دموعها ....شجاع ولك سامحني انت مفاركتني ولا دقيقة انت عايش هنا واشرت على كلبها
ولك شسوي تريدني انتظرك تنهزم مني بعد ماتشوفني بهالوجه
عيونها ذبلانه حولينهم زراك
دخلت الممرضة ضربتها ابره بالكانونه واشرتلي معناهه حاتنام
دنكت بست ايدهه وراسها
غمضت عيونها وغطت بنومه عميقه
طلبت كرسي وكعدت يمهه بس اباوعلها اريد اشبع عيوني من شوفتها شكد انحرمت منج الماس
اجه عمي مهند صاحني وهو يبجي ويشهك
شجاع : خير عمي اشبيك اشو كوه تجر النفس ؟
مهند : شجاع اني تعبان واعرف مباقيلي شي واودعكم بس اوصيك بالماس وزوجتي واولادي اريدك تساعدهم يرجعون للعراق بعد ما اموت لان ماعدهم احد هنا
شجاع : عمرك طويل عمي
مهند : خلي اكمل ابني شجاع هسه خبرني الطبيب السرطان
ماخذ من كلياتها بعد ما اكل الكبد راح عالكليات يعني بعد ميفيد اي علاج خلي نطلعها للبيت الصبح هناك حولينا احسنلهه
اليوم الثاني
طلعناها من المشفى ورجعنا للبيت بس اني ممستوعب الي صار معقوله الماس تروح مني لا هذا حجي يقشمروني بي
بس ما اكدر احجي لا تتخربط اخاف عليها من نسمه الهوى لا تأذيها
كعدتهه عالقنفه وكعدت كبالهه اباوع عليها مع كل الي صار بيها بس عيوني تشوفها بنفس الجمال والحلاوه الي كلبي حبها بيهم
بعد مرور اسبوع
علياء : يبوووووي يبوووو ي وينك ايمن ابوك مايتنفس
شجاع : ركضت على غرفة عمي
لكيته متوفي غطيته وكعدت عالارض يم السرير وابجي
اخ ياشجاع الناس تجي لالمانيا تغير جو واني كظيتها مستشفى وموت وقهر
اخخخخخ ياعمي الله يرحمك عفتهم المن ؟
الدنيا تلطش بيهم ....
منو الهم ؟
هناك الفاتحه مختلفة والدفنه هم تجي ناس تعزي وكهوه وهاي هي
بعد ما نتهت الفاتحه كعدت وياهم جمعتهم الولد وامهم والماس
شجاع : ياجماعه ترى عمي وصاني اخذكم وياي للعراق قبل مايموت كلي ماعدهم احد هنا واريدك تاخذهم هناك
ايمن :اني ماروح دا ادرس
زيدون : اني هم ادرس هنا وشسوي بالعراق
الماس : شجاع سمعت كلنا مانروح
تركونا وكلمن راح لغرفته بقيت اني والماس
شجاع : حبيبتي خلي نتزوج بعد ما لكيتج ما عوفج
الماس : شجاع اني اعرف اني مباقيلي غير كم شهر واموت
لان حالتي ميؤس منهه والاطباء مانطوني امل بالحياة
اذا اني عزيزه عندك
احلفك بروحي ترجع لبيتك ولوظيفتك ولزوجتك انت تجاوزت اجازتك واني سمعتك تحجي ويه صديقك واخذت اجازه بدون راتب وهذا ميفيد
بقائك هنا يعطل حياتك
شجاع : ترديني ابقى وتتزوجيني ؟
الماس : لو اريد اتزوجك مجان عفتك من يوم المحكمه لان بوقتها جنت اعرف بمرضي ومابي امل لهذا اختفيت من حياتك وماردتك تتعذب وياي
ارجع لزوجتك اذا انت تحبني صدك
شجاع : انت حبي الوحيد انت عشقي اشلون اعوفج وانت بهالوضع ؟
الماس : شجاع ترى اطلع من بيت اهلي هم لحد ماترجع للعراق لاتزعلني عليك فدوه
*********
شجاع : بعد اصرارها اضطريت احجز واودعهم
حتى بصيص امل ماخلتلي دموعي تجري واني طالع من بيتهم تمنيت الزمن يرجع للوراء
اني بسبب شهوه خسرت حبي وصلت بالمطار واني مسطور دايخ صعدت بالطياره وافكر بيها وبكلامها وبقوه ارادتها وشخصيتها
طول الوقت بالطياره وافكر معقوله الي سويته صح لو غلط
اشلون اضيعها من ايدي .. وميه سوال براسي اشلون ياربي
شسوي ؟ اشلون راح اكدر انساها
وصلت للبيت
مي : مبتسمه وكاعده طفرت من مكانها وركضت علي وحضنتني
مي : شجاع حبيبي شوف ابنج شلون يتحرك بطني
شجاع : مي تعبان عوفيني
مي : حضنتني اشبيك شجاع البقيه بحياتك العوض بسلامتك
شجاع : مي تحبيني
مي : يووووو يابعد كلبي انت كولشي احبك اموت عليك
شجاع : رحت للحمام اسبح وسمعتها تصرخ
طلعت عالسريع خير اشبيج ؟
مي : الحكني راح اجيب
وركض عالمشفى
وره ساعتين من الصريخ واجاني ولد سميته مشتاق لان اسمه يذكرني باشتياقي لالماس
**********
بعد ولادة زوجتي .... طيف الماس ميروح من بالي وحتى انسى لازم ليليه اشرب واشرب لحد ما انام
تالي صرت اشرب الظهر وراها من اروح للدوام والبطل وياي واشرب اثناء الواجب وصلت مرحله الادمان
اهملت نفسي وشغلي وبيتي لو نايم لو اشرب وابجي
بعدها شكيب من شافني هيج اخذني للطبيب لغرض اتعالج من الادمان
وفعلا دخلت مستشفى وبقيت شهرين اتعالج لحد ما تحسنت وتركته لان دمرت حياتي اهرب من الواقع بالشرب
زوجتي تعرف بحبي لالماس لكن صبرت وتحملت وخلتني اعتمد عليها وما اكدر استغني عنها
*****
التحقت بالموصل بعد تحريرهه ولزمت مسؤليه وواجب امني بالمدينه
راسلت الماس ودزيتلهه هذا المسج
الماس احبج ومانسيت الشوك ...
حضنج والله مانسيت ولا شوك
يا الماس عمري وياج بلا شوك
اموت واحيا وانت ورده بلا شوك
****
دزتلي رساله
(الماس : شجاع والله والله يشهد كد ماحبيتك نسيت كل الناس
نسيت اهلي سلمتك روحي من حبي الك والسنين مرت وانت حبيتني مثل ماحبيتك
وعدتني نتزوج ..حلمي كان بطفل منك بحضني واتحمل زعل منك وبوسه ارضيك واذكرك واحاجيك
احبك شجاع
واتمنى تتهنى بزواجك ربي يفرحك انت تستاهل كل خير
لكن الي ظلموني سلمتهم بيد الله وراح اطلب من ربي يحرمهم جنته مثل ماحرموني من حضنك
ربي ظلمهم واذيتهم تعبت حالي .. ياشجاع الدنيا ماعاد تحلالي وربي يسمع دعوتي ويتقبلها
ربي كافي امتحان والله امتحانك طال وعمري ماطال
شجاعي حبيبي كلبي عمري وطني وضوه عيوني احبك )
بعدها حضرتني وماقبلت تسمع مني اي شي
بقيت يوميه اتواصل ويه خالتي علياء اسألهه عليها وهي تنطيني اخبارهه

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

*******

بعد مرور ا شهر اطلع دوريات واروح وارجع وبالاجازه يتلكاني مشتاق بوجهي يكلي بابا كليت يعني جقليت او حلقوم او جبس المهم اجيبله نمنمات
التهي بين حجي مي وضحكها ونخلص اليوم والثاني وبين اجازه واجازه اطلعهم مكان وافرهم مخليت شي عليها بس كنت حريص زايد عن اللزوم وكلما تكبر مي تفهمني اكثر وتعرف الاريده منها شنو وتمشي على هلحجي ومطيعه صح نزعل ومرات تصل للصراخ بس ابد ولايوم خلتني انام زعلان حتى اني تعلمت عليها ومن تزعل اصالحها حتى لاتبتعد عني لان اشعر بالوحده

ومره كاعدين بالسيطره بالموصل
امجد : سيدي فوت اني واكف ميصير انت توكف
شجاع : ضحكت ليش ميصير معليك يصير
امجد : روح كمل مخابره وتعال كنت اتراسل مع مي اتصفح وهي دزلي صور مشتاق ملبسته حجاب وشكله يضحك واني اباوع واضحك وفجأة انكطع عني كلشي مسمعت شي غير صريخ وفقدت ماحسيت بالدنيا صحيت واني بمدينه الطب بغداد والوايرات على جسمي اغمض بعيوني وجع كثر عليه مو مثل كل مره هلمره القاضيه شجاع لان اني تصوبت ست مرات وهاي السابعه بس ماحبيت اذكرهه الكم لان حاتطول القصة وماردت ادوخكم بالاصابات
تذكرت كلشي والاخص الماس مرضها يارب كون تاخذ روحي وتخلي بيها يالله صحيت واني بلبيت وشكيب واخويه لصغير اريد اكعد ماكو ما اكدر اصابتي بالغه
والي فهمته ان الارهابيين
اول شي ضروبنه طلقات بعدها فجرو بينا المكان بس اني ماتصوبت بالطلق لكن بالتفجير وامجد هم لان كنا على جهه بس الجماعه الباقين اربعه استشهدوا بالرصاص والانفجار امجد فقد رجلينه وحاليا مقعد
مر عليه شهر بدون وعي لحيتي كبرت عشر سنين عبالك مصدكت راح يجي يوم وافقد قدرتي هيج واجهت صعوبات ومن خلال هل الجرح تعلقت بلقران والصلاة وكلبي صار يم ابني مشتاق ابني لازم ميغلط مثل ابو ولازم يكون قوي بعد شهرين نقطعت عن الناس لحد ما كدرت امشي
اصابتي جانت عده شضايا بظهري وراسي بس الاذيه بضهري حيل وجع مو طبيعي انتهى بفضل رب العالمين ورجعت للعسكريه الي حيات كل عسكري هيه عسكريه معناها شي بنسبه اله
مي ماتضجرت مني ومن وجعي ضلت سهرانه معايه مرات تبجي مرات تحجيلي تدعيلي وطعمني حتى تلبسني وتساعدني بكلشي وعوضتها عن كلشي بحياتها ويايه
وفهمتها تبطل غيره من الماس وان الزواج شي والحب والعشك شي
******
بعدها نقلت لبغداد وحاليا اداوم ببغداد
وصلتني رساله بيها مكتوب وسيدي مصدكت هيه اي والله هيه كعدت اقره فتحتو شجاع اسمك بكلبي انت شجاع بعد كلبي ريتها بروحي ولابيك مجنت مصدكه حاتموت وتعوفني شجاع احبك والله وشفت ابنك حلو مثلك وعيونه هم خضرا مثلك نيالهه مي تتهنه بيك وبدفو كلبك عاشقي وحبيبي شجاعي شجاعي اسمع السيدي كامل وعيده مره وعشره وبعدين حتى لومتت مراح انساك اني بكلبك
شجاع : فتحت السيدي وبي صورها بلمستشفى بالمانيا كعدت اسمع صوتها وحجيها كله من حبتني لحد مكتشفت المرض قبل المحكمه هيه كتشفت الموضوع وجانت تريد تحجي بس هيه محجت لان منطوها امل ابد وماكو امل والكبد صعب والكليه تاثرت اخر شي تغنيلي اغنيه شكثر مشتاك لو تدري دووم تغنيها جانت وضلت تغنيها وووو معرف بعد شحجي اليحب لا تتخلى لوجنت ماسك ايدها وماخذها بعيد مجان هذا حالي وبل الختام احبك حب واعشكج ياهيامي ياوياج عشت احلى ايامي ماغاب عطرج عن انفاسي ولايغيب صدى صوتج عني ورغم محاولتي نسيانها منسيت الماس وكرهت الالماس من فاركتج مايرهم الغيرج احبج الماس اعرف تسمعيني مارح انساج ابد طول عمري ....
كل بيت بعراقنا الحبيب تجد اكثر من قصة عاشوا اهلهه واكو من حب ونال واكو من حب وتعذب وانهان وتعب ومحصل غير الوجع ماكو احلى من الحب والزواج وحياتنا بيدنا وهاي قصة عسكري من ملايين وكل عسكري همه على كده و هنا نلكي ابطال ونلكي الزين والشين وكلشي حلو ومر ويه اصدقاء اوفيا مثل شكيب ماانسى وكفته ابد
وضعي الصحي لايزال مامستقر ولازم اسافر الى تركيا اكمل علاج ويستخرجون شضايا بعدهه بجسمي اكو استخرجوهه بالعمليه بمدينه الطب من ضهري وخواصري واكوشضايا ا ستقرت براسي ولحد الان ما استخرجوهه
بس نرجع نكول الحمد لله من رجعت لبيتي ولابني وزوجتي
هذه قصتي حبيت توصل رساله لحبيبتي الماس لان اعرف بيها تقرى قصص لكاتبات عراقيات وسمعت رسالتي وصلتهه واجاني خبر ان الماس قرت القصة وتأثرت خلال قرائتها للاحداث لان ذكرتها بأحداث مؤلمه غيرت مسار حياتها
بس مع هذا الخبر وصلني خبر محزن ان كلياتها انتهت وحاليا تحتاج الى متبرع وحبيت اتبرعلهه بكليتي لكن
كليتي ماتفيدهه تلفت بسبب الشرب والسجاير
حاليا الماس بالمانيا ترقد بالمشفى تنتظر معجزه من رب العالمين تنقذ حياتها ولو الاطباء مانطوهه امل
اتمنى كل من يقرى القصة يدعولها تكوم بالسلامه
******
اتمنى عجبتكم القصة اكثر شخص تأثر بأحداثها هو اني لان اول ماقريتها وشجاع يكتبلي كلبي انقبض من كثره الظلم الي تعرضتله الماس
تدرون من تصوب بالموصل جان دازلي نصف الاحداث وبيومها سمعت بي تصوب وبقيت محتاره اكملها من عندي لو انتظره وانتظرت لحد ما راسلني وكملي الاحداث
بصراحه دائما احب اكتب القصص الحقيقية وما احب اتلاعب بالنهايه حتى لو كانت مؤلمه وماترضي القراء
اكتبها مثل ماهي افضل
ولكل منا قدر مكتوب وما نحن الا مسيرين بارادة الله
متابعيني الاعزاء كل قصة اكتبها بيها هدف احب اوصله للقارئ للعبره اتمنى استفدتوا من احداث قصتنا واخذتوا عبره
منها ...شكرا لكم شكرا لمتابعتكم قصصي (احبكم )
ترقبوني بقصة جديده
*****الكاتبه فردوس عبد اللطيف *****