رواية عزلاء أمام سطوة ماله ج ١.....للكاتبه الرائعه مريم غريب الفصل الخامس والثلاثون 35 - بقلم Shaimaa Gonna

تستوي "فريال" جالسة علي سريرها و هي تنظر لإبنها بقلق ..

بينما يقف "عثمان" و يسأل الخادمة بعدم تصديق :

-إسمه فادي متأكدة ؟!

الخادمة بتأكيد :

-أيوه حضرتك إسمه فادي حفظي بيقول إنه أخو سمر هانم !

رفع "عثمان" حاجباه بدهشة ، ثم نظر إلي أمه ليجد التوتر و الخوف يسطران قسمات وجهها ، و قرأ في عيناها ما لم تكن تستطيع أن تقوله بلسانها ..

إبتسم لها "عثمان" و أمسك بيدها و شد عليها مطمئـِا و هو يقول :

-أنا هنزل أقابله . ماتقلقيش يا ماما .. أنا في بيتي.

و فك أصابعها المطبقة علي كفه بلطف ، ثم نزل ليقابل "فادي" ..

وقف ينتظره عند مدخل البهو ... دقيقة و أتاه "فادي" بمظهره الغاضب ، حيث عمد أن يبين له أنه جاء إلي هنا مرة أخري و لكن علي مضض شديد

-أهلا يا فادي ! .. قالها "عثمان" بصوت ثابت النبرات ، و تابع :

-خطوة عزيزة.

إبتسم "فادي" بإستخفاف و قال بتهكم :

-الله يعز مقدارك يا باشا . متشكر . بس أنا مش جاي أضايف أنا جاي أخد أختي.

عثمان بنفس الثبات :

-أختك مين بالظبط ؟ سمر و لا ملك ؟؟

فادي بصرامة :

-أنا ماعنديش غير أخت واحدة دلوقتي يا عثمان بيه . ملك . أنا جاي أخد ملك.

عثمان بإبتسامة ساخرة :

-أهو دلوقتي يا فادي مابقاش عندك أخوات خالص . لا سمر و لا ملك.

فادي بحدة :

-يعني إيه ؟ إنت فاكر إنك تقدر تمنعني عن أختي الصغيرة ؟ أنا هاخدها غصب عنك إنت ماتقدرش تمنعني.

عثمان بهدوء مستفز :

-يا فادي إفهم . بقولك ماعادش في سمر و لا ملك . البيت قدامك أهو . لو لاقيت إللي بدور عليه خده.

صمت "فادي" قليلا يستوعب كلماته ... إستتتج في بادئ الأمر الإستهزاء و التحد الواضح بنبرة صوته ، فعاد و قال بحدة أكبر :

-أنا غيبت طول الفترة إللي فاتت و إشتغلت بإبدي و سناني منغير يوم واحد أجازة عشان أوفر بيت و مصاريف تكفي أختي مش همشي من هنا إلا بيها . أنا مش جاي أهزر المرة دي.

عثمان بجدية ممزوجة بالبرود :

-و لا أنا و الله بهزر . و زي ما بقولك سمر و ملك بقالهم فوق الـ6 شهور برا بيتي . ماعرفش عنهم حاجة.

ضم "فادي" حاجباه و قال بصدمة :

-بقالهم 6 شهور ! إخوآااتي !!! .. ثم إنقض علي "عثمان" و أمسك بتلابيبه صارخا بوحشية :

-وديتهم فيــــــــــــن ؟ يابن الـ××× . هقتلك . عملت فيهم إيـــــــــــــه ؟؟؟

ضحك "عثمان" بسخرية و هدئه قائلا :

-إهدا بس . إخواتك ؟ مش لسا قايل إن مابقاش عندك غير أخت واحدة ؟!

زمجر "فادي" بشراسة و هو يجتذبه من ثيابه بعنف :

-أقسم بالله لو ما نطقت و قولتلي هما فين هطلع روحك في إيدي.

تنهد "عثمان" و أزال يداه عنه بحزم و هو يقول بجدية تامة :

-فادي . سمر أخدت ملك و هربت مني . بقالها 6 شهور مختفية . صدقني أنا ماعرفش عنها حاجة و كل يوم بدور عليها . بس مالهاش آثر.

بـُهت "فادي" لسماع هذا ، و إبتلع ريقه بصعوبة ..

-يعني إيه ؟ .. تمتم بجزع ، و أكمل :

-الإتنين راحوا مني ؟ .. إخواتي ضاعوا . بقيت لوخدي خالص ؟؟؟!!!

وضع "عثمان" يده علي كتفه و طمئنه بثقة :

-إطمن يا فادي . سمر ماخرجتش من إسكندرية . لسا هنا
إوعدك هوصلها في أقرب وقت . و هترجعلك تاني هي و ملك.

رمقه "فادي" بنظرة منفرة ، و نفض يده التي كانت علي كتفه و قال بحقد شديد :

-إنت السبب . إنت إللي عملت فينا كل ده . كنا عايشين كويس و ببساطة . دمرت حياتنا .. ثم غدت نبرته خشنة مستعرة الآن :

-أنا دلوقتي ماعنديش حاجة أخسرها . لو إخواتي مارجعوش مش هاسيبك تتهني بحياتك ثانية واحدة . و لو كنت وسط ألف راجل بيحميك . هقتــلك !

ثم إستدار مغادرا ...

•••••••••••••••••••••••••••••••••••••••••••••••••••••••••••

في مكان أخر ... تحديدا داخل بيت متواضع بحي "العجمي" الشهير

تنهتي "نجلاء" من إعداد وجبة طعام هذه الطفلة الواقفة عند قدميها ، تتمك ببنطالها المنزلي بكلتا قبضتيها الصغيرتان

تهدل الصغيرة بصوت لذيذ للغاية :

-نلأ ( نجلاء ) مـم ( أكل ) !

تضحك "نجلاء" بمرح شديد و ترد عليها :

-عيون نجلاء يا قلبي . خلاص المم خلص يا روحي
تعالي نروح ناكله عند أختك بقي.

و إنحنت و حملتها ، ثم توجهت للخارج حيث تجلس ضيفتها بالصالة أمام التلفاز و لكن كعادتها شاردة في عالم أخر ..

-سـمـر ! .. هتفت "نجلاء" بوساطة و هي تجلس في كرسي محاذي لـ"سمر" ثم تأخذ "ملك" في حجرها

بينما أفاقت "سمر" من شرودها ..

-في حاجة يا نجلاء ؟ .. قالتها بتساؤل

تنهدت "نجلاء" و قالت بحزن :

-يابنتي إنتي كل شوية تسرحي كده ؟ الهموم إللي إنتي شايلاها دي مش كويسة عليكي و لا علي ده ! .. و أومأت بذقنها نحو بطنها الممتلئ

سمر بإبتسامة مريرة و هي تضع يده علي بطنها ذات التسعة أشهر :

-طيب قولي الهموم مش كويسة عليا أنا . لكن ده من الأول خالص و هو قافش في الدنيا . أكتر من مرة إتعرض للموت و فضل سليم . زي ما يكون بيعاند . عايز يعيش .. عايز يعيش عشان يكمل عذابي بعد أبوه.

رمقتها "نجلاء" بتأثر و قالت :

-يا سمر هو في الأول و الأخر إبنك . حتي لو كان أبوه مين . مش مصدقة إنه ممكن يهون عليكي !

صمت قصير .. و إعترفت "سمر" بآسي :

-ما هو للآسف ماهانش عليا . رغم إن كانت قدامي فرصة أخلص منه بعد ما هربت من أبوه علطول . بس في حاجة قوية جوايا . زي صوت عالي منعني و قالي لأ .. ثم أكملت بتردد :

-مقدرتش . كنت خايفة عليه زي خوفي علي ملك .. فضلت أفكر أعمل إيه و أروح فين ؟ قلت مستحيل أرجعله . و بعد ما أخويا رماني مابقاش ليا مكان أروحله . مش عارفة إزاي خطرتي علي بالي يا نجلاء ! و فعلا محدش ممكن يفكر إني هنا عندك.

نجلاء بإبتسامة :

-طيب إنتي عارفة إن دي أحسن حاجة عملتيها في كل ده يا سمر ؟ إنتي و لوكا جيتوا مليتوا عليا البيت بعد ما كان فاضي عليا.

سمر بحرج :

-ملينا عليكي البيت إيه بس ؟ أنا حاسة إننا تقلنا عليكي و الله 6 شهور كتير أووي.

تلاشت إبتسامة "نجلاء" و عاتبتها :

-أخس عليكي . و الله لو قولتي كده تاني هزعل منك
ده أنا نفسي تقعدي معايا إنتي لوكا علطول.

سمر بضحك :

-علطول ! لأ يا حبيبتي إطمني مش هنطول عليكي أوي
البيه الصغير يشرف بس و هاخده هو و الأبلة دي و نشوفلنا مكان نقعد فيه و بالمرة أدور علي شغل.

نجلاء بإستنكار :

-إيه يابنتي إللي بتقوليه ده ؟ إنتي فاكراني ممكن أسمحلك بكده ؟ مش هتمشي يا سمر طول ما أنا عارفة إن مالكيش مكان تروحيله.

سمر بإبتسامة :

-ماتقلقيش عليا يا نجلاء . أنا هعرف أتصرف.

نجلاء بإصرار :

-مش هتمشي يا سمر . إلا إذا كنتي عايزة ترجعي لبيت جوزك مش هعارضك !

و هنا تحولت "سمر" تماما و صاحت بحدة :

-أرجعله ؟ مستحيل أرجعله . أنا لو بموت مش هرجعله.

نجلاء بحيرة :

-ليه بس يابنتي ؟ إنتي مش بتحبيه ؟ طيب بلاش الحب . حتي عشان إبنك إللي مالوش ذنب في حاجة ده.

سمر بصرامة :

-مش هرجعله يا نجلاء . كفاية ذل كفاية مهانة بقي . أنا كده مرتاحة .. طول ما انا بعيدة عنه مرتاحة !

تآففت "نجلاء" بسأم و قالت :

-مرتاحة إيه بس يا شيخة إنتي هتعمليهم عليا ؟ ما أنا بسمعك كل يوم و إنتي بتحلمي بيه.

جحظت عينا "سمر" بصدمة ، و أحمـّرت وجنتاها بشدة و تسألها بعدم تصديق :

-أنا بتكلم و أنا و نايمة ؟؟؟

نجلاء بإبتسامة خبيثة :

-أيوه ياختي . طول الليل مابسمعش غير نغمة واحدة بس
عثمان عثمان عثمان.

عضت "سمر" علي شفتها السفلي بقوة ، و قالت بغضب :

-لأ . لأ أكيد دي بتبقي كوابيس !

نجلاء بمكر :

-كوابيس إيه دي إللي بتنادي عليه فيها بالحرارة دي يا سمر ؟ إعترفي إنه وحشك و إنك بتحبيه.

سمر بغيظ شديد :

-لأ لأ لأ . مش بحبه
أنا بكرهه سامعة !

ثم تحاملت علي نفسها و قامت بصعوبة لتذهب إلي الغرفة و تنال قسطا من الراحة

بينما نظرت "نجلاء" إلي "ملك" و سألتها و هي تطعهما أخر ملعقة بالصحن :

-هنعمل إيه دلوقتي بقي يا ست لوكا ؟ هه ؟ قوليلي !

غمغمت "ملك" بكلمات غير مفهومة ، لتوافقها "نجلاء" قائلة :

-تصدقي صح . هو مافيش غير كده . قشطة علي أفكارك يا لووووكآاا.

و راحت تدغدغها و تشاركها المرح و الضحك ...

•••••••••••••••••••••••••••••••••••••••••••••••••••••••••••

صباح اليوم التالي ... يقرر "عثمان" المرور اليوم علي مؤسسته الخاصة المنفصلة عن بقية مجموعات عائلته

يصل إلي مقر ( البحيري للتسويق و التجارة ) في تمام التاسعة ، يلقي تحية الصباح بفتور علي سكرتيرته ، ثم يلج إلي مكتبه

يتنهد بثقل و هو يفكر .. مر يوم أخر دون أن يسمع عنها خبر ، إلي متي ؟ لقد أوشك موعد الولادة

هل ممكن ألا يري طفله ؟؟؟

-روحتي فين بس يا سمر ؟! .. تمتم "عثمان" لنفسه بيأس ، ثم مضي بإستسلام لمباشرة عمله

يدق باب مكتبه بعد قليل ، لتقف السكرتيرة مكانها بتردد ..

يتطلع إليها "عثمان" و يقول بإستغراب :

-نجلاء ! في حاجة و لا إيه ؟

نجلاء بشئ من التوتر :

-حـ حضرتك فاضي دقيقتين ؟!

-دقيقتين ؟ فاضي يا نجلاء . تعالي.

دخلت "نجلاء" و هي تحمحم بتوتر أشد .. وقفت أمامه ، فرفع حاجبه في إنتظار ما ستقوله ..

نجلاء بإرتباك :

-مبدئيا كده حضرتك لازم تعرف إني عملت كل ده بقصد الخير مش الشر.

عثمان بعدم فهم :

-بتقولي إيه يا نجلاء ؟ وضحي كلامك من فضلك أنا مش فاهم حاجة !

قطبت "نجلاء" حاجباها و قالت برجاء :

-هقولك يافندم . بس بليز لازم توعدني إنك مش هترفدني.

عثمان بدهشة :

-أرفدك ليه يا نجلاء ؟ إنتي عملتي إيه بالظبط ؟ في مصيبة حصلت في الشغل ؟؟؟

نجلاء بإسراع :

-لأ حضرتك الشغل كله تمام.

عثمان بنفاذ صبر :

-أومال في إيه إنطقي بقي . أنا مش فاضيلك.

-حاضر . حاضر يافندم .. ثم صمتت للحظات لتستجمع شجاعتها ، و صاحت فجأة :

-سمر عندي يا Boss !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

في منزل "نجلاء" ...

تستيقظ "سمر" من نومها العميق ، عندما شعرت بهذا الآلم الحاد يكاد يمزق أسفل معدتها .. تآوهت بصوت مخنوق و هي تمسك ببطنها

لحسن الحظ كانت "ملك" نائمة ، فالألم يزداد و هي لن تستطع أبدا الإهتمام بها الآن ..

نهضت "سمر" بعد عناء شديد من السرير ، توجهت نحو الهاتف و رفعت السماعة

ضربت رقم "زينب" بأصابع مرتعشة و هي تحارب دوار و صراخ قوي حبسته في صدرها ، ثوان و جاء صوت الطرف الآخر ..

-السلام عليكم !

سمر بصوت متقطع بالكاد مسموع :

-مـ . مـ ـا مـ ـا ز يـ ـ ـنـ ـب.

زينب بذعر :

-سمر ! إيه يا حبيبتي مالك ؟ الطلق جه و لا إيه ؟؟؟

سمر بتأوه خافت :

-آااه شـ ـكله كده !

زينب بحنان :

-طيب يا حبيبتي أنا جايالك أهو علطول.

سمر باكية من شدة الآلم :

-لأ . ممـ ـكن تكـ ـوني متـ ـرقبة.

زينب بعصبية :

-إحنا في إيه و لا في إيه دلوقتي ؟ قلت جايالك مسافة السكة أهو.

سمر بوهن :

-يا ما مـ ـا زيـ نـب . بـ ـلآاش .. و بترت عبارتها فجأة لتصرخ بأعلي صوتها و قد إنهار صمودها تماما :

-آااااااااااااااااااااااااااااااه !

إنتفضت "ملك" في هذه اللحظة و إستيقظت فزعة ، بينما تهاوت "سمر" علي أقرب مقعد مواصلة صراخها مع توالي الركلات التي راح طفلها يسددها أسفل معدتها بلا رحمة ..... !!!!!!!

...........................................................................

صعقته الصدمة عندما إعترفت "نجلاء" له بذلك ...

هب من مكانه بعنف ، و توجه نحوها بسرعة

سألها "عثمان" بصوت يدوي كالرعد القاصف و عيناه تومضان كالبرق الخاطف :

-بقي إنتي إللي مخبياها مني طول الفترة دي ؟ مخبياها فين يا نجلاء ؟ نهارك إسووود.

تنكمش "نجلاء" علي نفسها و هي تقول بخوف :

-يا Boss سمر لجأتلي و وثقت فيا . كنت هعمل إيه يعني ؟
لازم كنت أساعدها . و بعدين ما أنا جيت أقولك أهو لما شوفت معاد ولادتها قرب و هي لسا علي عنادها قلت لازم أقولك بقي !

حدق فيها غاضبا و رد مزمجرا :

-ماشي يا نجلاء . حسابك معايا بعدين
و دلوقتي قوليلي مكان المقر السري للخيانة.

نظرت له بإستغراب ، فصاح بها :

-قوليلي زفت عنوانك إيــــــــه ؟؟؟

نجلاء بتلعثم :

-حـ حاضر يافندم . العنوان 9 شارع ******* الدور الرابع شقة 8 !

لم يفوت "عثمان" ثانية أخري ، بالكاد أخذ هاتفهه و سلسلة مفاتيحه و غادر شركته بسرعة رهيبة ...

كان يصعد المنحدر بالسيارة عندما أصبح الطريق أكثر إكتظاظا في وسط المدينة

بدا نافذ الصبر و هو يقود عاجزا عن إختراق الطريق بجنون كي يصل إليها بسرعة ، إذ كان مضطربا متوترا ، قلبه يرف في صدره كالطائر الطنان

يتحرق شوقا للقائها ، بعد كل هذه المدة .. يعثر عليها أخيرا ، حبيبته ، تلك التي نبض قلبه و لأول مرة معها و لأجلها ، و رغم ذلك أذاقها مرارة العذاب و الذل و القهر ..

تري كيف هي الآن ؟ .. كيف صار شكلها و بعد تسعة أشهر من الحمل ؟؟؟

سيعرف بعد لحظات .. فقد وصل أخيرا عند البناية التي تقطن بها "نجلاء" و هو ينطلق راكضا في هذه اللحظة للداخل صوب المصعد ...

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

عند "سمر" ...

وصلت "زينب" قبل دقائق قليلة ، لتجد هذه المسكينة تعاني آلم المخاض وحدها ، حتي أنها لم تقدر أن تقوم لتفتح لها باب الشقة

فإضطر البواب أن يكسره ليدخلها ..

-آاااااه . مش قآادرة يا ماما زينب همووووت ! .. هكذا كانت "سمر" تصرخ بقوة و هي تتلوي بإستمرار فوق الكرسي و جسدها كله ينضح عرقا

زينب و هي تمسح علي شعرها بحنان :

-معلش يا حبيبتي إمسكي نفسك شوية الإسعاف في الطريق.

سمر ببكاء :

-مش قادرة . أنا هموت يا ماما
مش هقدر أكمل همووت.

زينب بجزع :

-بعد الشر عليك يابنتي ماتقوليش كده إن شاء الله هتقومي بالسلامة .. ثم نظرت إلي البواب و قالت بإنفعال :

-إطلب الإسعاف تاني يابو حسين إستعجلهم البت علي أخرها.

البواب بلهجة إسكندرانية :

-و أني هنعمل إيه بس يا إست زينب ؟ طلبتهم 3 مرات لحد دلوقت . ربنا يسلمها بعون الله.

و هنا ظهر "عثمان" علي عتبة الباب ..

تجمد بمكانه لوهلة ، لقد كانت هي هذه المرة .. إستطاع أن يراها حقا ، لم تكن أوهام و لا هلاوس ، لم يكن يتخيلها كما في الليالي السابقة

أنها أمامه علي بعد خطوات ... يالجمال هذه اللحظة ، كم هي لذيذة لحظة اللقاء بعد طول غياب

و لكن سرعان ما تحولت اللذة إلي الألم عندما لاحظ حدة عنائها و سمع صوت آهاتها .. إندفع "عثمان" صوب زوجته متجاهلا وجود أحدا غيره و غيرها بالمكان

كوب وجهها بكفيه و هو يقول بلطف شديد :

-سمر . حبيبتي
مالك ؟؟؟

و بينما كانت "زينب" مصدومة من إنضمامه المفاجئ ، فتحت "سمر" عيناها الذابلتين و نظرت إليه غير مصدقة ..

--إنت ! .. قالتها "سمر" بصوت هامس ذاهل

عثمان و هو يجفف العرق عن وجهها بكفه :

-إطمني يا سمر . هتبقي كويسة
أنا جمبك مش هاسيبك.

تفقد "سمر" و عيها بعد ذلك مباشرةً ، لتصيح "زينب" بذعر :

-يا لهوي ! البت هتروح مني . جرالها إيه ؟
مابتنطقش ليــــه ؟؟؟ و الإسعاف ولاد الـ××× إتأخروا.

أخيرا يلاحظ "عثمان" وجود "زينب" و ينتبه لكلامها ..

-أنا شوفت مستشفي قريبة من هنا و أنا جاي .. قالها "عثمان" بتوتر و هو ينحني ليحمل "سمر" بحذر

-هاوديها حالا !

ثم إتجه بها للخارج مسرعا ، و لحقت "زينب" به أيضا و هي تحمل "ملك" بدورها ...

•••••••••••••••••••••••••••••••••••••••••••••••••••••••••••

كانت الولادة متعثرة للغاية ... لولا أنه جلبها إلي هذه المشفي التخصصي ، لكان وضعها أكثر صعوبة

يخرج الطبيب من غرفة العمليات بعد قضاء ثلاث ساعات كاملة ، لينطلق "عثمان" صوبه و يسأله بتلهف :

-دكتور . طمني من فضلك
سمر عاملة إيه ؟؟؟

الطبيب مبتسما بإنهاك :

-الحقيقة مدام حضرتك من أصعب الحالات إللي مرت عليا
البيبي كان في خطر هو و هي لإنه كان هينزل برجليه . طبعا إحنا عملنا محاولات كتير عشان تولد طبيعي بس للآسف حالتها ماسمحتش خالص فإضطرينا للجراحة.

عثمان بقلق :

-يعني إيه ؟ هي كويسة و لا لأ ؟؟؟!!!

الطبيب بصوته الهادئ :

-إطمن يافندم هي دلوقتي بخير و إبنك كمان كويس أوي.

عثمان براحة غامرة :

-الحمدلله.

-ممكن نشوفها يا دكتور ؟ .. هكذا جاء صوت "زينب" متسائلا من خلف "عثمان"

الطبيب بلباقة :

-حاليا هيكون صعب شوية يا هانم لإنها لسا تحت تأثير المخدر . كمان شوية هتفوق و هنكون نقلناها في أوضة وقتها تقدري تشوفيها.

يمد "عثمان" يده إلي الطبيب و يصافحه و هو يقول بإمتنان :

-أنا متشكر أووي يا دكتور
بجد شكرا علي تعبك.

الطبيب بإبتسامة :

-لا شكر علي واجب يافندم . ده شغلي و بعدين أنا ماعملتش حاجة أنا كنت مجرد آداة في إيد رينا . أشكره هو.

عثمان بسعادة :

-الشكر لله طبعا.

و إستأذن الطبيب ليذهب و يتابع جدول عمله ، بينما مضي "عثمان" إلي الرواق الفارغ و أخرج هاتفهه ليجري بعض المكالمات ..

•••••••••••••••••••••••••••••••••••••••••••••••••••••••••••

كانت نائمة علي السرير الأبيض ، في رداء طبي مشبع برائحة البينج ..

عندما بدأت في إستعادة وعيها ، سمعت صوت طنين جهاز رسم القلب قرب أذنها .. أملت أن يكون هذا يعني أنها حية ، و لكن إحتمال موتها أصبح بعيدا الآن

فهي تشعر بالألم و الإنهاك ، لا يمكن أن يكون الموت مؤلما هكذا ..

شعرت "سمر" بضغط علي يدها اليسري ، فحاولت رفعها لكنها عجزت ... لتسمع في هذه اللحظة صوته الذي لا يخطئه السمع أبدا :

-سمر . حبيبتي إنتي فوقتي ؟!

جاهدت "سمر" لتزيح أجفانها عن عينيها و تري لو كان هذا حقيقة أم خيال ..

نجحت بالفعل و رفرفت عيناها يمنة و يسرة حتي إستقرت عليه .. حملقت فيه بصدمة ، كان وجهه علي مقربة شديدة من وجهها ، مستندا بذقنه علي حافة وسادتها

إذن فهو كان أخر من رأته قبل أن تفقد الوعي ، لم يكن حلما

إرتعدت "سمر" في هذه اللحظة عندما تذكرت طفلها ، أمسكت ببطنها الفارغة الآن و صرخت بصوت مختنق :

-إبنـــــي . فيــــن إبنـي ؟ خته مني
وديته فيــــن ؟؟؟

أمسك "عثمان" بكفيها و رفعهما حذو رأسها حتي لا توذي منطقة الخياطة ، و قال يهدئها :

-إهدي يا سمر . الولد كويس و أنا ماختوش في حتة
هو في الحضانة و جارتك إللي إسمها زينب دي راحت تطمن عليه.

تهدأ حركة "سمر" الآن ، و تشيح بوجهها عنه و عيناها تذرفان الدموع ..

-حمدلله علي سلامتك ! .. تمتم "عثمان" بصوت خافت ، و تابع :

-كنت هموت من الخوف عليكي . كده يا سمر تبعدي كل المدة دي ؟ عملتي كده ليه ؟ أنا كنت وحش معاكي في الفترة الأخيرة ؟!

سمر بصوت متحشرج ضعيف :

-إنت جاي تمثل عليا تاني ؟ أنا المرة دي ماعنديش حاجة أديهالك . ماعنديش حاجة غير إبني و ده بتاعي أنا إنت أصلا ماكنتش عاوزه و إدتني حبوب منع الحمل عشان تضمن إنه مش هيجي . بس أهو جه و أنا عايزاه.

عثمان بحنان :

-و أنا كمان عايزه . و عايزك بردو
عايزكوا إنتوا الإتنين يا سمر.

سمر بدموع :

-و أنا مش عايزاك . إنت خسرتني كل حاجة
نفسي و كرامتي و حياتي .. و أخرهم أخويا . إنت أسوأ حاجة حصلتلي !

و هنا إنفتح باب الغرفة ، ليدخل "فادي" بشئ من التردد

لم تصدق "سمر" عيناها في بادئ الأمر ، و رفعت رأسها عن الوسادة و هي ترمقه بفم مفتوح ...

إبتسم "عثمان" بإنتصار ، بينما مضي "فادي" نحو أخته قاطبا حاجبيه بتحفظ

لم تستطع "سمر" التأكد من أنه ماثلا أمامها حقا ، إلا عندما تحدث ..

فادي بإقتضاب و هو يتهرب من النظر في عينيها :

-حمدلله علي سلامتك !

تفيض دموعها أنهارا عند نطقه بها ، و كأنه كان مغتربا عنها لزمن طوييييل و عاد لتوه ..

رق قلب "فادي" حين رآها هكذا ، و جلس في وضع الركوع أمام سريرها .. مسح علي شعرها الحريري بكفه ، و قبل جبينها و هو يقول بصوت مختلج :

-حمدلله علي سلامتك يا حبيبتي . بس بقي ماتعيطيش
أنا بكره العياط.

و مسح دمعة كادت تفر من جانب عينه ..

-طيب أسيبكوا مع بعض شوية .. قالها "عثمان" و هو يقوم من مكانه

-عن إذنكوا !

و خرج ... لتدقق "سمر" النظر في وجه أخيها من خلال الدموع المتراقصة بعيناها

نطقت بنبرة ممزقة :

-فادي ! .. إنتي هنا بجد ؟؟؟

فادي بدموع :

-أيوه يا سمر . أنا هنا.

سمر بصوت كالأنين :

-يعني سامحتني ؟!

أومأ "فادي" و أجابها بإبتسامة حزينة :

-إحنا مالناش غير بعض . و أنا مستحيل أتخلي عنك
إنتي أختي.

أجهشت "سمر" بالبكاء و دفنت وجهها في صدره ، ليربت علي كتفها هامسا بلطف :

-بس يا حبيبتي . كله هيبقي تمام
بإذن الله !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

في الخارج ...

يقف "عثمان" أمام الغرفة مسندا رأسه إلي الجدار .. تصل "صفية" مع "صالح" في هذا الوقت ، و نادت عليه عندما لمحته :

-عثمان !

إعتدل "عثمان" في وقفته ، و إستدار نحوهما و هو لا يزال واقفا بمكانه ..

-جبتي الهدوم ؟ .. قالها "عثمان" بتساؤل حين وصلا عنده

صفية و هي تشير للحقائب التي بيديها و بيدي "صالح" :

-جبت كل حاجة يا عثمان . غيار و طقم و بطنية صغيرة و Powder و lotion ( كريم للجلد ) كل حاجة موجودة ماتقلقش .. ثم قالت بحماسة شديدة :

-بس هو فين حبيب قلب عمتو ؟ همووت و أشوفه !

عثمان بإبتسامة :

-في الحضـَّانة . روحي لبسيه الحاجات دي و جهزيه كده عشان هنمشي كمان شوية.

صفية بإبتسامة عريضة :

-أووك .. و إلتفتت لتذهب حيث أرشدها ، لكنها إلتفتت إليه فجأة و صاحت بإستذكار :

-أه عثمان . مامي جاية دلوقتي مع أنكل رفعت.

عثمان بإستنكار :

-جاية إزاي يعني و هي تعبانة ؟!

هزت "صفية" كتفاها و قالت :

-هي إللي أصرت لما قولتلها . ماقدرتش تصبر عشان البيبي . صحيح إنتي قررت تسميه إيه ؟؟

عثمان بثقة :

-يحيى طبعا.

صالح مهنئا :

-مبروك يابو يحيى !

عثمان بإبتسامة :

-الله يبارك فيك يا صالح . عقبالك.

صالح و هو ينظر إلي "صفية" :

-أمين يسمع من بؤك ربنا.

عضت "صفية" علي شفتها بخجل و قالت بإرتباك :

-طيب أنا هروح أشوف يحيى بقي و أجهزه زي ما قال عثمان . تيجي معايا يا صالح ؟!

تنهد "صالح" و قال :

-يلا بينا.

و ذهبا ... ليخرج "فادي" بعد لحظات و يهم بالمغادرة ، فإستوقفه "عثمان" :

-فادي !

إستدار "فادي" إليه بوجه خال من التعابير ، بينما إقترب منه "عثمان" و قال بتهذيب :

-شكرا إنك جيت.

فادي بصوت جاف :

-أنا جيت عشان أختي.

-أنا عارف . بردو شكرا.

رمقه "فادي" من علو و قال :

-أنا عارف سمر كويس . و عارف إنها أطهر مخلوقة علي وجه الأرض لولا بس تصرفها خانها في لحظة يأس عمرها ما كانت سلمتلك.

عثمان بجدية :

-فادي سمر دلوقتي بقت مراتي و أم إبني
مش ممكن أجرحها أو أسمح لحد يقول عليها نص كلمة . الماضي كله إدفن و مش هيصحي تاني . أوعدك.

أومأ "فادي" بوجوم ، ثم قال :

-خلي بالك من إخواتي !

عثمان بإبتسامة :

-إطمن . و وقت ما تحب تشوفهم أهلا بيك دايما.

•••••••••••••••••••••••••••••••••••••••••••••••••••••••••••

في سيارة "رفعت البحيري" ... جلست "فريال" بجانبه و آثرت الصمت من بداية الطريق

بينما لم يستطع "رفعت" مقاومة نفسه أكثر من ذلك ، كما أن هذه فرصة لا تعوض و هي معه الآن وحدها ، لا يمكن لأحد أن يقاطع حديثه معها ..

-فريال ! .. قالها "رفعت" بصوت مهزوز ، لتنقبض "فريال" و تتوتر خاشية ما يريد قوله

رفعت بنبرة معذبة :

-أرجوكي كفاية تعامليني المعاملة دي . أنا غلط في حقك قبل كده و غلط في حق أخويا كتير و كنت أعمي لما إستمريت في حبـ .. لما إستمريت في تفكيري الغلط
بس أنا ندمان . و إنتي لازم تعرفي إن مهما بلغ حجم الخلاف بيني و بين أخويا إستحالة آذيه . ده أخويا يا فريال . أنا كنت بغير منه و يمكن بحقد عليه كمان . لكن عمري ما فكرت آذيه و لا عمري أتمنيتله الشر . كان نفسي أبقي زيه بس . كان نفسي يبقي عندي زي إللي عنده
لكن عمري و الله ما كرهته و لا أتمنيت يحصله حاجة وحشة . أنا ماكنش ليا غيره و بعده بقيت منغير ضهر . شيلت مسؤولية بيته و بيتي بعد ما راح . أنا بحب أخويا يا فريال . لازم تفهمي ده كويس.

كانت دموعها تسيل أثناء حديثه ، لتضغط علي شفتاها عندما فرغ ، و تجفف خديها بمنديل

ثم تدير وجهها إليه و تبتسم بخفة و هي تومئ يرأسها بلطف ..

أطلق "رفعت" زفرة راحة ، و بادلها الإبتسامة و هو يقول :

-أنا من الصبح حاسس إنه معانا يا فريال . حاسس إنه رجع !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

في غرفة "سمر" ...

الجميع يلتف حولها في سعادة واضحة .. "عثمان" و "زينب" و "صالح" و "صفية" الطفل آسرهم جميعا و حولهم إلي أشخاص مختلفون

فقد تصرف "عثمان" برقة و وداعة بالغة و هو يضع الصغير بين ذراعي أمه. . حتي "سمر" لم تقو علي إخفاء فرحتها بإبنها

فضمته إلي صدرها بحب ، و قلبت رأسه بحنان ..

صحيح آنه طفل حديث الولادة ، لكنه جميل .. ملامحه تشي بجماله الآخاذ ، بشرة بيضاء ملساء ، وجنتان متوردتان ، و شعر غزير حالك اللون و ناعم كالحرير

حتي عيناه عندما فتحها قليلا ، إستطاعت أن تتبين لونهما .. بحر رمادي غامق كبحر الأسكندرية في نهار شتوي ماطر

إنه جميل للغاية ، بل فائق الجمال ..

-أيوه يا أنكل ! .. كان هذا صوت "صفية" و هي تتحدث عبر الهاتف إلي عمها

-طلعت الدور السابع ؟ الأوضة إللي في الوش بقي . أيوه رقم 410 . أوك . باي .. ثم نظرت إلي أخيها و قالت بسعادة :

-مامي وصلت.

دقيقة و كان الباب ينفتح من جديد ... لتدخل "فريال" مستتدة إلي ذراع "رفعت"

كانت تبحث عن شئ معين ، و كأنها لا تري غيره بالمكان .. و إستقر بصرها عليه

أسرع "عثمان" و أخذ الطفل من "سمر" بعد أن حصل علي الإذن منها ، ذهب به إلي أمه التي تهاوت علي كرسي قام "صالح" بإحضاره لها عندما لاحظ إرتجاف ساقاها ..

إحتوت "فريال" حفيدها بين ذراعيها .. تطلعت في وجهه مشدوهة ، بينما أجاب "عثمان" عن سؤالها الصامت :

-يحيى يا ماما !

قالها "عثمان" فلم تشعر "فريال" بطوفان الدموع الذي أخذ يتدفق من مآقيها

كما لم تشعر بتحرك لسانها الثقيل الهامد منذ مدة طويلة ، منذ رحيله ، و كأنه أخذ صوتها معه و أعاده لها عندما عاد هو الآن ..

-يـ .. يـ ...يـحـ .. ـيـ .. يـ..حـ.. ـيـ..ـي !

تبادل الجميع نظرات الذهول و الفرح ، و جثت "صفية" أمام والدتها و هي تقول بإبتسامة ممزوجة بدموعها :

-مامي إنتي بتتكلمي ؟؟؟ .. و إلتفتت إلي "عثمان" صارخة بفرحة :

-عثمآاااان . مامي بتتكلم !

إبتسم "عثمان" بشدة ، و إنحني ليقبل رأس أمه

بينما رددت "فريال" ثانيةً و هي لا تكف عن النظر و التفرس في ملامحه :

-يـ..ـ..حـ.ـيـ.ـى !