رواية عزلاء أمام سطوة ماله ج ١.....للكاتبه الرائعه مريم غريب الفصل التاسع عشر 19 - بقلم Shaimaa Gonna

  إعتذرت "سمر" من أخيها و ذهبت لترد علي المكالمة ... ليأخذ "فادي" الضيف و يجلسه بالصالون المتواضع و هو يمطره بوابل من الإبتسامات و الكلمات المرحبة

ولجت "سمر" إلي غرفتها و أوصدت الباب خلفها

و قبل أن ينقطع الرنين المتواصل ضغطت زر الإجابة و ردت بصوت متوتر :

-ألو !

-أيوه يا سمر . إيه ما ردتيش بسرعة ليه ؟

كان صوت "عثمان" متوازنا .. فيه قدر من الثبات و الهدوء الذي بث فيها التوجس بصورة أكبر ..

-مـ معلش الموبايل كان بعيد عني .. هكذا أجابته "سمر" و هي تحاول ضبط الهزة في صوتها قدر أستطاعتها

عثمان بنبرته الخفيضة الهادئة :

-أووك . عموما أنا كنت بتصل أقولك Sorry هضطر أكنسل ميعادنا إنهارده بس أكيد هنتقابل بكره.

سمر بعدم تصديق و سرور في آن :

-ده بجد ! قصدي ليه كده ؟؟؟

عثمان بأسف :

-صحيت الصبح ياستي لاقيت أبويا رجع من السفر و إبن عمي كمان خرج من المستشفي و رجع علي البيت كل العيلة متجمعين بقي و محدش راضي يفرج عني إنهارده .. معلش يا حبيبتي . بكره هعوضك.

سمر بغبطة شديدة :

-و لا يهمك خد راحتك خآالص . قصدي ماتستعجلش . يعني هنروح من بعض فين !

صمت قصير .. ثم قال "عثمان" بشك :

-أومال إنتي فين كده يا بيبي ؟

إزدردت ريقها بتوتر و أجابت بإرتباك :

-آا أنـ أنا . أنا في البيت !

عثمان بدهشة :

-في البيت إزاي يعني ؟ لسا شوية علي ميعاد الإنصراف ! .. ثم قال بغضب :

-إنتي ماروحتيش الشركة إنهاردة ؟؟؟

سمر بإرتباك أشد :

-مـ ما . ما ما آا ..

-ما إيـــــه إتكلمي ! .. قاطعها بإنفعال و تابع :

-يعني لو ماكنتش إتصلت بيكي ماكنتش عرفت إنك طنشتيني و كسرتي كلامي ؟ إنت بتتحديني يا سمر ؟؟؟

تخيلت "سمر" أن نبرة صوته العنيفة تجاوزت سماعة الهاتف و صار بإمكان أخيها سماعه و هو في الخارج ..

-أرجوك وطي صوتك .. قالتها بخوف شديد و هي تنظر نحو الباب ، ليرد "عثمان" بإستنكار ممزوج بعصبيته :

-أوطي صوتي ! هو إنتي لسا شوفتي حاجة ؟ بس لما أشوفك يا سمر . هخليكي تفكري مليون مرة قبل ما تحاولي تكسريلي كلمة واحدة تاني.

سمر و قد تملك منها الرعب :

-هتعملي إيه يعني ؟ تهديد ده ؟!

عثمان بنبرة وعيد :

-أفضل تشوفي بنفسك .. ثم قال بصرامة :

-بكره الساعة 9 نتقابل في نفس المكان . إوعي تتأخري زي المرة إللي فاتت و جربي ماتجيش يا سمر . يا ويلك مني لو عملتيها .. سلام يا بيبي.

و أقفل الخط بوجهها ..

-يا نهار إسود ! .. تمتمت "سمر" بإنيهار ، و أكملت :

-هيعمل فيا إيه الحيوان ده ؟ .. مش ممكن يعمل حاجة . هيعمل إيه يعني ! . يا ربي أعمل إيه بس . أنا أعصابي إدمرت خلآاص !!

•••••••••••••••••••••••••••••••••••••••••••••••••••••••••••

أنهي "عثمان" مكالمته و هو يغلي من الغضب ... ثم خرج من الشرفة و عاد إلي مجلس العائلة

حيث إحدي القاعات الفخمة التي يزيدها جمالا تلك النوافذ التي تمتد من الأرضية إلي السقف لتمنح للمشاهد إطلالة بانورامية آسرة ..

-يابني كنت فين ؟ مش تقعد معانا بقي ! .. قالها "يحيى" بإنزعاج ، و أردف بحدة :

-أنا قلت مافيش خروج إنهاردة.

عثمان بإبتسامة :

-أنا جيت أهو . كنت بعمل مكالمة بس.

و ذهب ليجلس بجوار أمه ..

-منوور البيت يابو الصلـــوووح . حمدلله علي السلامة .. قالها "عثمان" و هو يمد يده و يربت علي قدم "صالح"

إبتسم "صالح" و هو يثبت الكرسي المتنقل الذي يجلس فوقه ، ثم رد دعابة إبن عمه :

-الله يسلمك يابن عمي . هو البيت كان ناقصني عشان ينور يعني ؟ ما فيه ناس زي الفل أهو مش قاطعين عنه الكهربا ليل نهار.

ضحك الجميع إثر جملته ، و شارك "محمود أبو المجد" في الحديث المرح :

-طول عمرك دمك خفيف يا صالح . ربنا يشفيك يابني و يقومك بالسلامة.

صالح بإبتسامة :

-متشكر يا أنكل .. ثم تساءل بإهتمام :

-أومال هي فين هالة يا جماعة ؟!

أجابته "صفية" الجالسة بخفة علي يد مقعده المعدني :

-أنا طلعت أندهلها بس قالتلي تعبانة و مش هتقدر تنزل.

صالح بقلق :

-تعبانة إزاي يعني ؟ طيب أطلع شوفها يا بابا من فضلك !

تنهد "رفعت" بسأم ، و قال :

-ماتقلقش يابني . هي كويسة.

صالح بشئ من العصبية :

-و حضرتك عرفت منين كنت شوفتها يعني ؟!

رفعت بضيق :

-أختك حساسة أوي زي ما إنت عارف .. ثم أكمل و هو يحدج "عثمان" بنظرات ذات مغزي :

-أقل حاجة ممكن تضايقها أو تتعبها . بس هي بترجع و بتبقي كويسة . ماتقلقش عليها.

تظاهر "عثمان" بعدم ملاحظة عبارة عمه الإتهامية و واصل العبث بهاتفهه و هو لا يكف عن مغازلة أمه بنفس الوقت

بينما إستمر الحديث و الهرج من حوله ليمتلئ المكان بالدفء و الألفة الأسرية ..

•••••••••••••••••••••••••••••••••••••••••••••••••••••••••••

في منزل "سمر" ... بعد الغداء ، تدخل إلي الصالون و هي تحمل طقم المشروبات

تقدم الشاي إلي "فادي" ثم القهوة المضبوطة إلي الضيف ..

-تسلم إيدك يا أنسة سمر ! .. قالها "أدهم" مبتسما و هو يتناول منها فنجان القهوة ، و تابع بثناء :

-الأكل كان حلو أوي . حقيقي من مدة مادوقتش أكل بيتي حلو كده.

سمر بإبتسامة و هي تجلس في كرسي مجاور لأخيها :

-ميرسي يا دكتور و بالهنا و الشفا . دي حاجات بسيطة.

أدهم بدهشة :

-كل ده و حاجات بسيطة ! بلاش تواضع . أكلك يجنن و الأصناف إللي عملتيها عجبتني أووي.

سمر و قد توردت وجنتاها خجلا :

-ميرسي علي المجاملة الرقيقة.

أدهم بإبتسامته الجذابة :

-مش بجامل علي فكرة . دي حقيقة .. و لا إنت إيه رأيك يا فادي ؟

فادي بإعتداد و فخر :

-و الله أنا من زمان معجب بأكلها و مش أنا لوحدي . كل معارفنا و جيرانا بيشكروا في نفسها في الأكل.

و هنا لاحظ "أدهم" خجلها المتزايد ، فقال بلبقاته المعهودة :

-أعتقد إن الأنسة سمر بتتكسف من المدح . طيب نغير الموضوع عشان خاطرها .. ثم مضي يكمل بجدية :

-شوف يا فادي . أنا تقريبا خلصت إجراءات تعيينك . مش هيبقي عليك بعد كده غير إنك تستلم شغلك.

فادي بحماسة :

-أنا جاهز يا دكتور من بكره لو أمكن.

-طبعا ممكن . خلاص بكره الصبح تطلع علي البحر الأحمر و تستلم مكانك هناك.

سمر بصدمة :

-بحر أحمر إيه ؟ إنت هتسافر يا فادي ؟؟؟

نظر "فادي" إليها و رد بشئ من الإرتباك :

-أيوه يا سمر . ما أنا نسيت أقولك إن شغلي هيكون في البحر الأحمر و بالتالي لازم أسافر.

سمر بغصة مريرة :

-هتسيبنا و تسافر ؟ طب مين إللي هياخد باله مني و من ملك ؟؟!

فادي بتأثر شديد :

-أنا مش هسيبكوا بمزاجي يا حبيبتي . هو الشغل كده طب هعمل إيه يعني !

و بدا عليه القلق من ردة فعل "أدهم" لتلاحظ "سمر" هذا و تقول بإستسلام :

-خلاص يا فادي . سافر .. ربنا يوفقك.

يتدخل "أدهم" بلطف :

-أنسة سمر ماتقلقيش . فادي مش هيغيب عليكوا كتير هما خمستيام إللي هيكون فيهم في البحر الأحمر و هيجي يقضي معاكوا نهاية الأسبوع !

أومأت "سمر" و هي تحاول رسم إبتسامة علي ثغرها

ليأتيها صوت بكاء "ملك" في اللحظة التالية ..

سمر بوجوم :

-عن إذنكوا . هروح أشوف ملك !

•••••••••••••••••••••••••••••••••••••••••••••••••••••••••••

في الصباح التالي ... يودع "فادي" شقيقتاه

تقلبت "ملك" بين ذراعي أختها و مضت إلي أخيها فإحتضنها بين ذراعيه ..

همس من فوق رأسها :

-أشوف وشك بخير يا سمر !

أومأت "سمر" قائلة و الدموع تلمع بعيناها :

-أشوف وشك بخير يا فادي.

أوصاها من جديد. :

-خلي بالك من نفسك و من ملك.

سمر بخفوت :

-ماتقلقش.

-هبقي أكلمكوا كل يوم.

ثم لثم جبهة "ملك" و قبلها من وجنتيها و أعادها إلي "سمر" ثانيةً ..

رحل ... فأخذت "سمر" شقيقتها الصغيرة إلي الجارة "زينب" و ذهبت علي أساس إلي عملها ، و لكن كانت الوجهة مختلفة تماما

نصف ساعة و كانت في نفس المكان الذي تواعدا عنده في المرة السابقة ..

إنتظرت نصف ساعة إضافية حتي آتي

رأته و هو يوقف سيارته بصورة تدريجية ، إرتجفت مرتعبة حين إلتقت عيناها بعيناه

نظراته مخيفة .. رغم أنه كان يبتسم ، الله أعلم ماذا يضمر لها ..

-إركبي يا بيبي ! مستنية إيه ؟ .. قالها "عثمان" بنعومة ، ثم مد يده و فتح لها الباب لتستقل بجانبه

لبت دعوته بآلية ، لتسأله بتردد عندما إنطلق بالسيارة :

-هـ هو إ إحنا رايحين فين ؟

عثمان ببرود شديد :

-أنا خدت بالي المرة إللي فاتت إن اليخت عجبك . فقلت هخدك تاني بقي و نقضي سوا يومين حلوين وسط البحر .. عشان ماتعرفيش تهربي مني !

سمر بإنفعال :

-يومين إيه ! قولتلك ماينفعش أغيب عن البيت أكتر من ساعات الشغل.

عثمان بحدة :

-وطي صوتك . مش هكملك تاني في الموضوع ده .. ثم قال بصوت جازم :

-و بعدين قلت هتقضي معايا يومين يعني هتقضي معايا يومين.

-بس آا ..

-مابسش .. قاطعها بصرامة ، و تابع :

-سيادتك مراتي و أنا ليا حقوق عليكي و لما أقول كلمة ما تتردش أبدا فاهمة ؟

شدت علي أسنانها و راحت تلهث بقوة ... لا مفر ، إتضح ذلك في نبرة صوته ، في طريقة كلامه .. و يا ليته يكتفي بهذا

بعد قليل أوقف سيارته أمام إحدي البنايات الضخمة الحديثة ، ثم أدار لها وجهه و قال بأمر :

-إنزلي.

رمقته بإستغراب ، لكنها إنصاعت له

ترجلت من السيارة و مشت ناحيته ... أمسك بيدها و جرها خلفه ، ليجتازا معا ممر حجري

تبعته و قلبها يرتجف بين أضلاعها ، تري أين يتوجه بها ؟ ما ذا سيفعل لها ؟؟؟

إزدادت حيرتها حين ولج بها إلي ذلك المكان ..

الإضاءة شديدة هنا و لاشك أنها مزعجة قليلا ، لكنها إستطاعت أن تري و تكتشف المكان بوضوح ..

الحركة المستمرة ، الموسيقي المنبعثة من السماعات المعلقة بالسقف ، الملصقات النسائية الخاصة بالموضة و الإطلالات العصرية تزين الجدران ، المكان نفسه يكاد يعج بالنساء !!!

-كوافير ! .. تمتمت "سمر" بإستغراب شديد ، ثم إلتفتت له بسرعة

وجدته يرمقها بنظراته الشيطانية و أصابعه الغليظة ما زالت تحاوط رسغها بإحكام ..

-إحنا إيه إللي جابنا هنا ؟! .. تساءلت بجدية ، ليرد "عثمان" ببراءة :

-جينا عشانك يا بيبي . زي ما إنتي شايفة ده كوافير أعتقد إنه مكان مش ملائم للرجالة . و لا إيه ؟

سمر بتوجس :

-و أنا هعمل إيه هنا ؟

عثمان بخبث :

-هتعملي كل حاجة . الناس إللي هنا هيظبطوكي علي الأخر . صدقيني هتخرجي من هنا واحدة تانية خآالص.

جلل وجهها رعب حقيقي ، لترد برفض :

-بس أنا مش عايزة !

عثمان بلهجة خفيضة مهدئة :

-سمر . Relax يا حبيبتي . هما مش هيعملولك حاجة . الحكاية بسيطة أووي . إنتي محسساني إنك عمرك ما دخلتي مكان زي ده . إيه يا بيبي هو أنا جايبك فين يعني ؟ ده أكبر Beauty center في إسكندرية .. ثم قال بنعومة :

-و بعدين إنتي مرات عثمان البحيري . حتي لو في السر لازم تبقي أجمل و أشيك ست في البلد كلها.

و هنا جاءت إحدي العاملات ، لتتساءل بنبرة رسمية رقيقة :

-صباح الخير يافندم ! تحت أمرك ؟ أي خدمة أقدر أقدمهالكوا ؟!

عثمان بجدية :

-أه لو سمحتي . في حجز بإسم سمر حفظي.

العاملة :

-فعلا يافندم و ميعادها بعد عشر دقايق بالظبط.

عثمان بإبتسامة و هو يشير إلي "سمر" :

-هي دي . مدام سمر حفظي !!!

............................................................

كانت تلك هي المرحلة الأكثر صعوبة ... عندما أصرت مشرفة الفريق علي رغبتها و أرغمت "سمر" علي نزع كافة ملابسها

في غرفة الـSpa ذات الحرارة العالية ..

تأخذ "سمر" حماما سريعا قبل بدء الجلسة ، و ذلك لتنظيف و تطهير الجلد لمنع نمو البكتريا في جو كهذا تتوفر فيه الحرارة و الرطوبة في آن

حرصت المشرفة علي وجوب تناول "سمر" لكمية كبيرة من الماء و العصائر لأن غرفة الـSpa تسبب التعرق بشكل كبير للغاية و بالتالي هناك إحتمال للجفاف و إنخفاض ضغط الدم

تبدأ الجلسة .. لتضع المشرفة لها قناع الوجه بنفسها بعد غسيله و تطهيره بالمستحضرات الفاخرة

بينما تقوم فتاة ثانية متمرسة بعمل حمام زيت جوز الهند لتغذية شعر "سمر" و نعومته و لمعانه

و فتاة أخري تضع قدميها في سائل اللبن و العسل و تواصل عمل التدليك لتخرج القدم بعد ذلك نقية كالرخام المصقول

الخطوة التالية ، تجلس "سمر" في مغطس حار للغاية تحملت السخونة بإعجوبة في حين أخذت بعض الفتيات يضعن لها أقنعة تجميلية و يعالجن و يلمعن كل جزء في جسمها ..

و بعد مرور نصف ساعة تضمنت تلك الأعمال الشاقة كلها ، تخرج "سمر" أخيرا من هذه الغرفة و هي تتنفس الصعداء ..

كانت ركبتاها ترتجفان من التعب حين باشرت بإرتدت ملابسها مرة أخري لتأخذها المشرفة إلي المرحلة الأخيرة ، حيث قسم التصفيف و التجميل

تدخل "سمر" إلي الصالون الفخم ، تجلس بإحدي المقاعد ليلتف حولها فريق كامل من الفتيات

تابعت ما يفعلنه لها

فواحدة تهتم بأظافر يديها و ثانية بأظافر رجليها ، و ثالثة تهتم بوجهها تقوم بترطيبه قبل وضع مستحضرات التجميل عليه

و فجأة تشعر "سمر" بالذعر حين رأت تلك التي حملت مقص بيدها و إعتزمت الإقتراب من شعرها ..

-إيه ده رايحة فين إنتي ؟ .. قالتها "سمر" بعدائية شديدة و هي تصدها عنها ، لترد الفتاة بصوت تغلفه البراءة :

-هقص شعرك يا مدام !

سمر بإستنكار :

-تقصي شعر مين ؟ أنا مش هقص شعري يا شاطرة.

الفتاة بلهجة مهذبة :

-يا مدام دي أوامر عثمان بيه هو مأكد علي الطلب ده أكتر من أي حاجة تانية.

سمر بإنفعال :

-قلت مش هقص شعري.

و هنا آتت المشرفة و قد إجتذبتها نبرة "سمر" المرتفعة ..

المشرفة بلباقتها المعهودة :

-في مشكلة يافندم ؟ حد هنا ضايق حضرتك ؟؟

نظرت "سمر" إليها و قالت بحدة :

-الأنسة دي عايزة تقصلي شعري قولتلها مش هقصه و بردو مصممة !!

المشرفة بإبتسامة هادئة :

-يا مدام دي أوامر عثمان بيه.

سمر و قد إنتابها الغضب بصورة كبيرة :

-يعني إيه أوامر عثمان بيه ؟ أنآااااااا مـــــش هقـــــــص شعـــــــــــــري !

إبتسمت الأخيرة و لم ترد عليها ، بل أخرجت هاتفهها و أجرت مكالمة أمامها ..

-ألو ! .. Sorry يا عثمان بيه بس في مشكلة هنا و محتاجين حضرتك .. مدام سمر مش موافقة علي قص الشعر .. مش سامحة لحد يقرب منها .. أوك . إتفضل حضرتك . معاك أهيه !

و ناولت الهاتف إلي "سمر" ..

-ألو ! .. ردت "سمر" بنبرة جامدة ، ليأتيها صوته البارد :

-إيه يا بيبي ! عاملة مشاكل ليه ؟

سمر بحدة :

-أنا مش هقص شعري.

عثمان بهدوء تام و كأنه يخاطب طفلة :

-هتقصيه يا حبيبتي . إنتي مش متخيلة شكلك هيبقي حلو إزاي بعد ما تقصيه .. و أكمل بصوت مستثار :

-ده غير إني بصراحة هموووت و أشوفك بالشعر القصير هتبقي جآاااامدة.

كادت "سمر" أن تجادله بعنف ليقاطعها هو بسرعة ..

عثمان بصرامة شديدة :

-بقولك إيه ! إنتي تسمعي الكلام أحسنلك . أنا مش فاضي للعب العيال ده . إنجزي بسرعة و ماطعتليش الناس و بعدين أنا كمان قربت أزهق و أنا قاعد مستنيكي برا . خلصي يا سمر و خلي يومك يعدي.

•••••••••••••••••••••••••••••••••••••••••••••••••••••••••••

في مكان أخر ... تحديدا ڤيلا "رشاد الحداد"

يدق هاتف "چيچي" أثناء جلوسها مع خطيبها و حبيبها الذي تسبب في إنفصالها عن زوجها و بليلة الزفاف

تستأذن منه لترد علي الإتصال ، تقوم و تمشي بعيدا عنه قليلا ، ثم تجيب ..

چيچي و هي تتغنج بصوتها :

-ألوو ! .. نانسي هاي . إزيك يا حبيبتي ؟

نانسي و قد بدت الحماسة في صوتها بدرجة كبيرة :

-سيبك مني دلوقتي يا چيچي . عارفة أنا فين و شايفة قدامي مين حالا ؟!

چيچي بضيق :

-نانسي بليز لو عندك حاجة مهمة قوليها Now أنا مش فاضية لتفاهتك و لا فاضية أنم معاكي يا روحي.

ضحكت "نانسي" برقة و قالت بخبث :

-بس دي نميمة هتعجبك أووي . أنا دلوقتي قاعدة في الكوافير بجرب قصة شعر جديدة . بس تخيلي مين قاعد قدامي !

چيچي بنفاذ صبر :

-ميــــن يا نانسي إخلصي ؟

نانسي بنفس النبرة الخبيثة :

-عـثــمــــــــــــــــان البحيري يا قلبي.

تجهمت "چيچي" عند ذكر إسمه و إنقبض قلبها بخوف ، لكنها تمالكت نفسها و ردت بسخرية :

-عثمان قاعد قدامك في الكوافير ؟ و علي كده بقي بيصبغ و لا بيعمل Make_Up ؟؟

نانسي بجدية :

-لأ يا حبيبتي ده قاعد في الريسبشن مستني واحدة جوا في قسم المحجبات.

چيچي بدهشة :

-محجبات ! عثمان بقي بيعرف محجبات ؟!!!

-أه و الله زي ما بقولك كده دخلت معاه قدامي . أنا كمان ماصدقتش نفسي في الأول .. ثم قالت بضحك :

-شكلك عقدتيه يا چيچي و بيطلعه علي البنات كلها حتي المحجبات.

چيچي بفضول :

-ماتعرفيش هي مين ؟؟؟

-لأ ماعرفش . بس ..

چيچي بإستغراب :

-بس إيه ؟!

-مش عارفة لبسها غريب أوووي.

-غريب إزاي يعني !!

تنهدت "نانسي" بحيرة و قالت :

-مش عارفة ! بصي هي حلوة بس باين عليها غلبانة.

-يعني إيه غلبانة ؟!

-غلبانة يعني شكلها مش من مستواه خآاالص.

چيچي بصدمة :

-لأ ماتقوليش ! .. قصدك إنها بنت عادية ؟ فقيرة يعني و كده ؟؟؟

-باينها كده يا چيچي .. ثم عادت لتقول بخبث :

-مش قولتلك شكلك عقدتيه ! أهو مابقاش بيميز و إتسعر علي كل البنات هههههههههه.

چيچي بإبتسامة شماتة :

-بس كده حالته بقت Hopeless case ( ميؤوس منها ) أوووي .. ثم شاركت صديقتها الضحك و قالت بشر :

-عموما بالهنا و الشفا يا عثمان !

•••••••••••••••••••••••••••••••••••••••••••••••••••••••••••

في قصر آل"بحيري" ... مرت ثلث ساعة حتي الأن و ما زال "صالح" يباشر ممارسة إحدي التمارين الشاقة مستخدما تلك الآلة الرياضية التي جاءت إلي غرفته بأمر من الطبيب

لم يسمح له الطبيب بأي نوع من الإستراحة نهائيا ، ليس قبل مرور النصف ساعة التي وضعها كحد أقصي ..

-يا دكتووور كفآاااية . مش قآاااادر ! .. قالها "صالح" و هو يهبط و ينهض بجسده مستعينا بالذراعين المرفقين بالآلة المعدنية

الطبيب بعناد :

-قلت لأ . لسا قدامك عشر دقايق علي أول Break.

صالح بغيظ :

-عشر عفاريت يركبوك يابن الـ آا ..

-صـــــالح ! .. قاطعته "صفية" قبل أن يكمل كلمته البذيئة ، و أردفت :

-الدكتور عايز مصلحتك يا حبيبي . كل ما العلاج بقي مستمر و صح هتخف بسرعة.

في هذه اللحظة كان "مراد" يمر قرب الغرفة ، فلمح "صالح" و هو يتريض و ملامحه تشير إلي نفاذ صبره و إمتعاضه ..

-عـآااااااش يا وحش .. هتف "مراد" بمرح و هو يلج إلي الغرفة

نظر له "صالح" بطرف عينه و قال بسأم :

-بلا وحش بلا جحش بقي . سيبني في حالي الله يكرمك.

مراد بضحك :

-إجمد يا أبو الصلوح مش كده . دي حاجة بسيطة يا راجل !

-بسيطة ! .. صاح "صالح" بإستنكار ، و أكمل بسخرية و هو يلهث من الجهد الذي يبذله :

-تعالي ياخويا إتمرن مكاني نص ساعة و بعدين قولي بسيطة.

-ياسيدي ربنا يقويك و يشفيك .. ثم سأل "صفية" :

-صافي ماتعرفيش عثمان فين ؟

صفية و هي تهز رأسها سلبا :

-لا و الله يا مراد ماعرفش !

مراد بتعجب :

-مش عارف أنا أخوكي ده بيغطس فين كل شوية ؟!!

-تلاقيه في الشغل !

مراد بجدية :

-لأ مارحش الشركة . أنا لسا سائل عليه هناك.

-طيب لو عايزه في حاجة مهمة كلمه علي الموبايل.

مراد بإبتسامة تهكمية :

-مابيردش . ما ده بقي يبقي أخوكي . لما يعوز يختفي مابيسبش وراه أثر.

و هنا أعلن الطبيب أخيرا :

-خلاص يا صالح بيه . معاد الـBreak وجب !

•••••••••••••••••••••••••••••••••••••••••••••••••••••••••••

علي رصيف المرسى ... تمشي "سمر" بجانب "عثمان" مطرقة الرأس

تستحي من رفع وجهها الملون ببراعة و بمختلف أنواع آدوات التجميل المفتخرة ، وجهها الذي صار مبهر الجمال لا يتناسب البتة مع ثيابها الرثة ..

يقبض "عثمان" علي يدها اليمني ، بينما تحمل هي في الأخري كيسا قاتم اللون يحوي الجزء الذي تم قصه من شعرها

فقد أصرت أن تلملمه بنفسها و تأخذه معها

جعلها "عثمان" تصعد أولا إلي اليخت و بقي قليلا ليخاطب السائس "ناجي" ..

-الحاجة وصلت يا ناجي ؟ .. تساءل "عثمان" بصوته المخملي ، ليومئ "ناجي" قائلا :

-من بدري يا باشا و أنا أخدت الشنط و حطتها في الأوضة زي ما حضرتك أمرت.

عثمان بإبتسامة :

-شكرا يا ناجي.

-العفو يا عثمان بيه أنا تحت أمرك.

أعطاه "عثمان" بعض النقود كالمرة السابقة و أصرفه ، ثم إتجه إلي اليخت ليلحق بـ"سمر" ..

°°°°°°°°°°°°°°°°°°°°°°°°°°°°°°°°°°°°°°°°°°°°°°°

وحدها داخل قاعة المرحاض الملحق بغرفة النوم الفخمة ... تجثو علي ركبتيها فوق الرخام البارد

تبكي بحرقة و هي تفتح ذلك الكيس و تجمع بكلتا قبضتيها بقايا خصلات شعرها المتساقطة ، ثم ترفعهم إلي وجهها الملطخ بالكحل الأسود و الذي راح يمتزج بطبقات مساحيق الزينة السميكة

مسحت وجهها بالخصيلات الفاحمة ببطء و هي لا تزال تذرف دموع القهر بلا إنقطاع

حتي شعرت بظله ينطرح فوقها

رفعت إليه بصرها المشوش ، لتجده يقف فاردا قامته الشامخة ، و يطالعها ببرود متناهي ..

-ليـــــــــــــه ؟ .. تساءلت بصوت مبحوح مجروح ، و تابعت :

-ليه تعمل فيا كده ؟ ليه تخليهم يقصوه ؟ .. حرام عليك !

لوي فمه بإبتسامته الشيطانية ، و رد ببساطة :

-مزاجي طلب كده يا حبيبتي . حبيت أشوفك بالشعر القصير زي ما شفتك بالشعر الطويل . يعني ! .. قلت نغير شوية أحسن أزهق منك و إحنا يدوب لسا ماكملناش شهر مع بعض.

رمقته بنظرات كارهة و الدموع تتراقص بعيناها ، ثم قالت بإنفعال :

-بس إنت مش من حقك تعمل فيا كده .. إحنا ماتفقناش علي حاجات زي كده.

-بفلوسـي ! صاح "عثمان" بخشونة ... ثم أكمل بنعومة :

-إنتي بتاخدي مقابل كل حاجة يا بيبي . و طالما بدفع يبقي من حقي أعمل فيكي إللي يعجبني.

أثار غضبها بكلماته المهينة ، فإصطبغ كل شئ أمامها باللون الأحمر ..

قامت من مكانها و وقفت قبالته مباشرةً و زمجرت :

-قولتلك قبل كده أنا مش جارية عندك و لو حبيت أسيبك هاسيبك مصلحتي معاك خلصت خلاص و مابقتش عايزة منك حاجة.

عثمان بإبتسامة مستفزة :

-بس أنا مش حابب أسيبك يا سمر . لسا ماخدتش منك كل إللي أنا عايزه ده إحنا يدوب كنا مع بعض مرة واحدة !

أعادت "سمر" جملتها التهديدية بغضب أشد :

-لو حبيت أسيبك هاسيبك.

ضحك "عثمان" بسخرية و قال :

-و أنا مش هفارقك بالسهولة دي و فجأة هتلاقي الموضوع إتعرف و أخوكي عرف بجوازنا و مش بس أخوكي المعارف و الجيران و .. و إنتي عارفة بقي . أظن إنتي بتخافي علي سمعتك و سمعة إخواتك ! صح يا بيبي ؟

هزت رأسها و هي تقول بمقت ممزوج بالإزدراء :

-إنت شيطان . و أنا إللي ورطت نفسي معاك . الله يلعن الساعة إللي شوفتك فيها . يا ريتني ما شوفتك يا ريتنـ ..

-خلاص بقي ! .. قاطعها بحزم و هو يغلق فمها بكفه ، و أمسك بيديها الإثنتين و حبسهما في إحدي يديه ، ثم قال بهدوء :

-إنتي إللي مصعبة كل حاجة علي نفسك . قولتلك حاولي تاخدي الأمور ببساطة . أنا دايما بحاول أكون لطيف معاكي . بس كالعادة إنتي إللي بتستفزيني.

تقلصت معدتها و إمتلأت عيناها بالدموع أكثر و هي تنظر إلي عينيه الثاقبتين

تنهد "عثمان" و يده التي كانت علي فمها إنخفضت إلي ذقنها ..

-إحنا جايين ننبسط سوا يا سمر . حاولي تنسي وضعنا شوية و فكري في نفسك . صدقيني و سيبيلي نفسك خالص .. مش هخليكي تنسي وضعنا و بس . هخليكي تنسي إسمك كمان.

سمر بلهجة مفعمة بالنفور :

-أنا بكرهك !

عثمان و قد عادت البسمة الشيطانية تزين ثغره :

-خلاص بقي . أنا كده عملت إللي عليا و إنتي إللي دماغك ناشفة.

دفعها إلي الحائط و إمتدت يداه كقبضتين من الحديد و أطبقتا علي معصميها و رفعتهما إلي مافوق رأسها ..

أشاحت بوجهها عن وجهه حين إقترب منها إلي حد الإلتصاق ، بينما تمتم و فمه يحتك بأذنها :

-بوظتي مكياچك بالدموع دي يا بيبي . بس عارفة ؟ إنتي أساسا حلوة منغير كل ده .. و أكمل و شفتاه تداعبان عنقها في كل إتجاه :

-في مفاجأة عشانك برا . إنتي أكيد ماخدتيش بالك منها لما دخلتي الأوضة .. تعالي نشوفها مع بعض !

سمر بصوت مهزوز :

-مش عايزة منك حاجة.

رفع "عثمان" رأسه و نظر لها ..

-بطلي كآبة بقي .. غمغم بضيق ، و تابع بحزم :

-إغسلي وشك يلا و حصليني علي برا . مستنيكي ماتتأخريش !

يتبـــــع ...