رواية عزلاء أمام سطوة ماله ج ١.....للكاتبه الرائعه مريم غريب الفصل الثاني والعشرون 22 - بقلم Shaimaa Gonna

  

يلج "مراد" إلي المكتب و علي وجهه إبتسامة مشرقة ... تختفي الإبتسامة فورا

عندما وقعت عيناه علي "سمر"

ظل متسمرا بمكانه لدقيقة كاملة ... أفقده سحرها رشده ، بينما وقفت "سمر" مطرقة في خجل .. إلي أن حمحم "عثمان" بخشونة ..

مراد بتلعثم :

-آا . صباح الخير !

-صباح النور .. قالها "عثمان" بإقتضاب و هو ينظر له بغضب

مراد بإبتسامة و عيناه ما زالتا تقيسان "سمر" من أعلي إلي أسفل ببطء :

-أنا قلت أجي أبص عليك . بقالي يومين ماشوفتكش !

عثمان و هو يحاول بصعوبة الإمساك بغضبه :

-طيب إدخل واقف كده ليه ؟ .. و إنتي يا سمر إتفضلي علي مكتب دلوقتي.

لبت "سمر" أمره و خرجت ، ليغمض "مراد" عيناه مبتسما حينما مرت هي بمحاذاته ..

-الله علي البيرفيوم إللي حاطاه .. قالها "مراد" بهيام ، ثم فتح عيناه و أكمل بذهول :

-Chanel Number 3 ! .. سمر بتحط من مجموعات شانيل ؟ و بعدين هي دي أصلا سمر السكيرتيرة بتاعتك ؟؟؟

زفر "عثمان" غاضبا و قال :

-إدخل يا مراد . أساسا إيه إللي جابك هنا ؟!

مراد و يمشي صوب مكتبه ليجلس أمامه :

-إيه ياعم المقابلة الناشفة دي ؟ ده بدل ما تقولي منور يا صاحبي . خطوة عزيزة . أي حاجة من الحاجات اللطيفة دي !

عثمان بنظرات حادة :

-إنجز يا مراد أنا مش فاضيلك . جاي في إيه ؟

مراد و هو يخطف تحفة خزفية من فوق المكتب و يقلبها بين راحتيه :

-مش جاي في حاجة مهمة . كنت جاي أخد رأيك في موضوع بس.

عثمان بإهتمام :

-خير موضوع إيه ؟

إنتظر "مراد" قليلا .. ثم قال :

-أبويا قدملي عرض إمبارح . هو من ناحية حلو و من ناحية أنا مش مستريح .. حقيقي محتار . مش عارف إتصرف إزاي !!

-طيب إيه هو العرض ؟؟

•••••••••••••••••••••••••••••••••••••••••••••••••••••••

في قصر آل"بحيري" ... يقفز "يحيى" من فراشه واقفا و قد غدت ملامحه كلها خطيرة فجأة

يحيى و هو يصيح زاعقا في هاتفهه :

-يعني إيه كل حاجة إتلغت ؟ .. يعني إيه المندوب ماجاش ؟ نعم ؟ المخازن مليانة إزاي ؟ أومال أنا كنت سافرت ليه ؟ .. في عقود ممضية . مين إللي ورا الموضوع ؟؟؟ .. إستحالت ملامحه إلي الصدمة الشديدة عند سماعه الإجابة

-إنتي متأكدة يا أسما ؟ .. تساءل "يحيى" بعدم تصديق ، لتؤكد له سكيرتيرته الخاصة التصريح للمرة الثانية

إشتد عضلات فكيه و هو يطبق أسنانه بغضب شديد ..

أغلق الخط و توجه نحو باب الغرفة تتبعه "فريال" و هي تسأله بقلق :

-في إيه يا يحيى ؟ .. إيه إللي حصل ؟ .. طيب رايح فين بس ؟؟؟

-إبعدي عني يا فريال من فضلك ! .. قالها "يحيى" بإنفعال و إتخذ طريقه صوب غرفة أخيه

يحيى بهتاف عنيف و أعصابه قد وصلت بالفعل إلي درجة الغليان :

-رفــــــــعـــــــــــــــــــــــت . رفــــــــعـــــــــــــــــــــــت . رفــــــــعـــــــــــــــــــــــت.

يخرج "رفعت" من غرفته بهدوء شديد بعكس حالة أي شخص قد يكون مكانه في هذه اللحظة ..

-في إيه يا يحيى ؟ بتزعق كده ليه ؟! .. تساءل "رفعت" ببرود مستفز

يحيى مزمجرا بشراسة :

-صحيح إللي أنا سمعته ده ؟؟؟

-إيه إللي إنت سمعته ؟

-إنت إللي بعت للعملا بتوعنا في لندن و قولتلهم الصفقة إنتهت ؟؟؟

-أه فعلا . حصل .. إعترف "رفعت" ببرودة أعصاب عجيبة ، لينفجر "يحيى" بغضب مستعر :

-لـــيــــــــــــه ؟ لــيــــه تعمل كده ؟ بتتصرف من دماغك منغير ما ترجعلي ؟ بتلغي صفقة بملايين منغير ما تاخد رأيي ؟ عملت كده لـــيــــــــــــه ؟؟؟

رفعت بحدة :

-يا ريت تكلمني كويس يا يحيى . ماتنساش إني أخوك الكبير.

-أخويا الكبير المفروض يبقي هو العاقل إللي بيخاف علي مصلحة أخوه الصغير . ليه ؟ ليه بتحاول دايما تبوظلي شغلي ؟ ده جزاتي ؟ ده جزاتي إني ماحبتش أبعدك عني و عملتلك مكان في الشركة ؟؟!!

رفعت بغضب :

-دي مش شركة لوحدك . إنت ناسي إنها ورث أبونا ؟؟

و هنا إجتمع كل من بالمنزل علي صوت هذا الشجار الناري ..

بينما قال "يحيى" بتهكم فظ :

-لأ و الله شكلك إنت إللي ناسي إن أبويا الله يرحمه كتبهالي بعد ما سيادتك فضلت تاخد نصيبك منها و تسافر بس أنا بقي إللي طلعت غبي لما رجعتك و كتبتلك ربع الأسهم فيها بعد ما ضيعت كل فلوسك .. و تابع بندم ممزوج بالحزن :

-كنت فاكرك إتعدلت و هتقف جمبي . كنت فاكرك فعلا أخويا الكبير إللي هيحميني و هيخاف علي مصلحتي . ماحسبتهاش صح بس قلت إحنا إخوات و مالناش إلا بعض ماينفعش نبعد ماينفعش نتفرق ماينفعش حد فينا يسيب إيد التاني . إستحملت منك كتير علي أمل إنك في يوم هتتغير . بس للآسف إنت زي ما إنت . غرورك و حقدك خلوك أعمي ممكن تدوس علي أي حد حتي لو كان أخوك !

صمت "رفعت" و ظل يحدجه بنظرات محتقنة فقط ..

يحيى بلهجة صارمة :

-أنا مش هقدر أقولك إمشي من البيت ده لإنه للآسف بيتك زي ما هو بيتي . بس لما أرجع من السفر هطلعك من شركتي و هسحب منك كل الأسهم . خلاص .. الثقة بينا بقت معدومة و أنا إستحالة آمنلك تاني يا . ياخويا.

و تركه و عاد إلي غرفته تلحق به زوجته

بينما وقفت كل من "هالة" و "صفية" و عائلة "مراد" مصعوقين مما حدث ، و لم يجرؤ أحدهم علي فتح فمه و الإستفسار أبدا ...

•••••••••••••••••••••••••••••••••••••••••••••••••••••••••••

عند "عثمان" ... فرغ "مراد" من شرح مشكلته لصديقه و بقي منصتا لما سيقوله له

عثمان بجدية :

-شوف هو العرض كويس جدا و مسألة إنك هنا مرتاح و مش عايز تسافر تاني دي أنا شايفها سخيفة جدا . فيها لما تروح تتأسس المشروع إللي إقترحه أبوك و توسعه لحد ما تمده هنا ؟ وقتها هتقدر ترجع تاني زي ما إنت عايز . إنما حوار العواطف في الشغل ده مايأكلش عيش يا مراد لازم تتنصح شوية و لا هتفضل طول عمرك أهبل ؟!

مراد بإنزعاج :

-ما تبطل قلة أدب بقي ياعم و لم لسانك .. ثم قال بجدية مماثلة :

-طيب إنت شايف كده يعني ؟ أصل أنا بيعجبني تفكيرك بصراحة !

-أنا مش شايف غير كده . إنت لحد دلوقتي ماعملتش حاجة و مضيها بطول و العرض . آن الأوان تتكن في حتة معينة بقي و تشوف مستقبلك كفاياك كده.

أومأ "مراد" بتفهم و قال :

-أوك . خلاص علي بركة الله . نبدأ تنفيذ المشروع .. ثم تنهد و سأله بشقاوة :

-بس إيه التغييرا الفظيع إللي طرأ علي سمر ده ؟ دي إتغيرت خالص يا أخي . لثانية قلت دي مش هي !

عثمان و قد عاوده الغضب مجددا :

-و إنت مالك بيها يعني ؟ ما تتغير ياسيدي مهتم ليه إنت ؟؟

مراد بضحك :

-أيوه ياعم حقك تعمل أكتر من كده طبعا . ما إللي علي راسه بطحه بقي . مش قادر تنسي الرهان إللي خسرته.

في هذه اللحظة دق الباب ، ثم دخلت "سمر" حاملة مشروب "مراد" بين يديها ..

-إتفضل ! .. قالتها "سمر" برقة و هي تنحني قليلا صوب "مراد" بينما إبتسم الأخير بشدة و هو يقول :

-بنفسك ؟ جايبالي العصير بنفسك مش معقول !

ردت "سمر" له الإبتسامة ، ليصطبغ وجه "عثمان" بالحمرة و هو يقول بصوت غليظ :

-من إمتي بدخلي المشاريب بنفسك ؟ أومال فين الساعي ؟؟

سمر بشئ من التوتر :

-عم حسن تعبان و واخد إجازة مرضية إنهاردة !

مراد و هو يجذب إنتباهها مرة أخري :

-إنتي مش فكراني و لا إيه يا سمر ؟

سمر و هي تنقل نظرها بقلق بينه و بين "عثمان" :

-لأ إزاي فاكرة حضرتك طبعا.

مراد بنعومة :

-شكلك إتغير أوي . بس للأحسن طبعا.

سمر بتعثر :

-مـ ـيـ ـرسي !

-عموما أنا مبسوط إني شوفتك تاني .. و مد لها يده للمصافحة

بصورة تلقائية مدت "سمر" يدها هي الأخري و صافحته ..

حدق "عثمان" بغيظ في يد صديقه المطبقة بشدة علي يد "سمر" ثم حدق فيها هي منتظرا أن تسحب يدها بسرعة ، لكنها لم تفعل حتي قرر "مراد" بنفسه تركها بعد عدة لحظات ..

-عن إذنكوا ! .. قالتها "سمر" و هي تنظر بالأرض ، ثم إستدارت لتغادر المكتب

-مزززززززززه جآاامدة أوي يا عوث ! .. تمتم "مراد" بحرارة ، ليتنهد "عثمان" بنفاذ صبر و يرد :

-أظن إنها مش تيبك . و لا إيه ؟

مراد بضحكة ساخرة :

-يعني هي كانت تيبك إنت ؟ بس سيبك . إحلوت أووي عن أخر مرة شوفتها.

عثمان بإستهجان :

-لا إحلوت و لا حاجة عادي زي ما هي.

مراد بجدية :

-لأ .. جسمها لف و بقت مارشميللو خالص . ألوظت يعني.

-ما تلم نفسك يابني آدم إنت ! .. صاح "عثمان" بعصبية رغما عنه

مراد بدهشة :

-الله ! و إنت محموء كده ليه ؟ الكلام غريب علي ودانك ؟ ده إنت إللي بدعه .. ثم قال بخبث :

-و لا الهزيمة لسا حرقاك ؟

رمقه "عثمان" بحنق ، فضحك "مراد" و قام من مكانه و هو يقول بنبرة متكاسلة :

-أوك . همشي أنا بقي عشان ماعطلكش أكتر من كده .. يلا باي.

و رحل "مراد" ليرفع "عثمان" سماعة الهاتف فورا و يستدعي "سمر" ..

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

شعرت "سمر" بخطر وشيك كلما إقتربت من غرفة مكتبه ... لكنها تسلحت بجدار شجاعة واهية قابل للإنهيار ما إذا أحب هو أن يهدمه

تقف "سمر" عند الباب ، ليشير لها "عثمان" بإن تقترب ... إنصاعت له و هي تبتلع ريقها بصعوبة حين لمحت تلك النطرة العنيفة بعينيه

سمر بصوت خافت :

-نعم !

قام "عثمان" من مكانه و مشي ناحيتها بتمهل ..

-إنتي بتشتغلي فين يا سمر ؟ .. قالها "عثمان" بجمود و هو يكتف يديه خلف ظهره

سمر ببلاهة :

-هه ! مش فاهمة ؟!

عثمان بصوت أجش :

-سؤالي واضح . إنت بتشتغلي فين ؟

سمر بعدم فهم :

-بشتغل هنا . في مؤسسة البحيري للتسويق و التجارة !

عثمان و قد غدت نبرته هادئة علي نحو يدهش :

-إللي هي ملك لمين ؟

سمر بحيرة ممزوجة بالتوتر :

-ليك !

-يعني أنا أبقي مين ؟ .. قالها "عثمان" بصوت هامس ، ثم رفعها بمنتهي الخفة و أجلسها علي سطح مكتبه

سمر حابسة أنفاسها بتوتر شديد :

-عـ عثمان البحيري !

عثمان و هو يزيح حچابها ببطء ليكشف عن شعرها :

-و إنتي تبقي إيه ليا ؟

-مـ .. مر مراتك .. نطقتها بصعوبة ، لتظلم عيناه في هذه اللحظة و هو يرد بغضب :

-و لما إنتي عارفة كده إزاي تسمحي لواحد غريب يلمسك ؟ إزاي تخليه يمسك إيدك ؟ و يبقي إيه لزمته الحجاب إللي علي شعرك ده ؟؟؟

سمر بحدة ممزوجة بالإرتباك :

-هو مامسكش إيدي بالمعني إللي تقصده ده سلم عليا بس و أنا بسلم علي كل الناس بالإيد عادي ! .. ثم قالت بإستغراب :

-و بعدين أنا مش فاهمة يعني إيه سبب التحقيق ده ؟ إيه إللي يسمعك كده يقول جوزي بجد و غيران !!

أجفل "عثمان" من ملاحظتها و قال :

-غيران ؟ أنا لأ طبعا .. ثم أردف بخشونة :

-و إيه جوزي بجد دي ؟ إنتي مراتي و لا عايزاني كل شوية أفكرك ؟؟؟

أحمـّر وجهها و أطرقت رأسها لتهرب من نظراته الحادة ، بينما تابع بنفس النبرة الخشنة :

-لازم تعرفي إنك ملكي أنا . و طول ما إنتي ملكي مش من حقك و لا من حق أي حد تبصيله أو يبصلك.

رفعت "سمر" وجهها و كم تمنت لو تستطع أن ترد عليه ، و لكنها عجزت كالعادة ، فإكتفت بنظرة حاقدة قصفته بها ..

عثمان بجدية تامة :

-و حاجة كمان . ماتحطيش أي بيرفيوم و إنتي خارجة .. و أكمل بسخرية :

-إذا كنتي مش بتحطيلي أنا بتخلي الناس هما إللي يشموا بدالي !

عضت علي شفتها السفلي بقوة جراء كلماته المحرجة جدا بالنسبة لها ..

تملصت في مكانها تريد أن تنزل عن المكتب ، ليثبت مكانه قليلا و هو يرمقها بنظرات غاضبة ، ثم يفسح لها المجال

راحت تضبط وضع حچابها مرة أخري و هي تشعر بالإهانة مجددا

تنفست بعمق و كادت تخطو بعيدا عنه ، ليقبض علي معصمها يقول بصوته الآمر :

-بكره هتيجي معايا الشقة و قبل ماتتحجي ماليش دعوة . دي مشكلتك مش مشكلتي . قولي لأخوكي أي حاجة بس بكره هتيجي معايا يعني هتيجي معايا .. سامعة يا بيبي ؟!

رمقته ببغض و شدت يدها بعنف من قبضته ، ثم غادرت مكتبه و هي ترتجف من فرط العصبية ...

........................................................................

صباح يوم جديد ... تستيقظ "سمر" باكرا ، و أثناء ما كانت ترتدي ثيابها راحت تعيد ترتيب أحداث خطتها الخرقاء

بالطبع خرقاء و يجب أن تتوقع أي رد فعل عنيف قد يصدر عنه ، و لكن ما أقلقها بحق و جعل أصابع يدها ترتجف و هي تغلق أزرار كنزتها .. تلك الطفلة المسكينة

ألقت "سمر" نظرة علي أختها النائمة بالمهد الصغير ، أزعجتها فكرة أنها ستتخذها كدرع حماية ، و لم تكن واثقة من نجاح الخطة

و لكن ما كانت واثقة منه تماما أنه حتي إذا بلغ قمة غضبه فإن هذا الغضب كله سيقع عليها وحدها لا علي هذه الصغيرة ، بالتأكيد لن يفعل لها شيئا

و تأمل كثيرا لو تنجح هذه الخطة ، رغم أنها تعلم أن لا يمكن الهروب منه كثيرا ، و لكن لتفلت منه هذه المرة و ستفكر في عذر أقوي للمرة القادمة ..

إنتهت "سمر" من تحضير نفسها ، ثم إيقظت "ملك" من نومها بلطف و أخذت تبدل لها ملابسها و تعطرها و تمشط لها شعرها البندقي الجميل

عند ذلك كان النعاس قد طار تماما من أعين الصغيرة ، لتأخذها "سمر" و تذهب لشقة الجارة "زينب" ..

دقت بابها ... لحظات و فتحت لها "زينب" و علي وجهها إبتسامتها المشرقة ..

زينب بود :

-صباح الخير يا قمرات . إيه نازلين بدري ليه ؟ .. ثم قالت بإستغراب :

-و بعدين إنهاردة الجمعة . مافيش شغل إنهاردة !

سمر بإبتسامة متوترة :

-ملك مش هتقعد معاكي يا ماما زينب . أنا هاخدها معايا إنهاردة.

زينب بشك :

-هتاخديها معاكي فين ؟

حمحمت "سمر" بتوتر أشد ، و لكنها أخبرتها بالأخير ..

-إنتي بتقولي إيه ؟ .. صاحت "زينب" بغضب ، و تابعت :

-إنت أتجننتي ؟ هتروحيله برجليكي تاني ؟ و وعدك ليا ؟ هتسلميله تاني ؟؟؟

سمر بهمس و هي تتلفت حولها بقلق :

-بالله عليكي يا ماما زينب وطي صوتك . وعدي ليكي زي ما هو . و الله ما هسيبه يلمسني تاني صدقيني مش هيحصل لو علي رقبتي.

زينب بإستنكار :

-أومال رايحاله برجلك دلوقتي ليه ؟ و هتقابليه لوحدك ليه ؟؟؟

سمر بنبرة مقنعة :

-أنا هروح أقابله فعلا بس و ملك معايا . أنا نايمتها طول الليل إمبارح عشان تفضل صايحة طول النهار و هي معانا . هتحجج بيها و مش هيعرف يعمل معايا حاجة . ماتقلقيش يا ماما زينب و الله العظيم ما هخليه يقربلي.

زينب و قد تهدلت تقاسيم وجهها بإستسلام :

-خدي بالك من نفسك يا سمر . إوعي تضعفي يابنتي أو يغلبك الشيطان ده.

سمر بثقة :

-ماتقلقيش .. أنا وعدتك !

•••••••••••••••••••••••••••••••••••••••••••••••••••••••••••

في قصر آل"بحيري" ... يضبط "يحيى البحيري" ربطة عنقه أمام المرآة ، لتأتي زوجته من خلفه و تسند خدها علي كتفه و هي تطلق تنهيدة حارة

فريال بلهجة قانطة :

-هتسافر تاني يا يحيى ؟

يحيى بصوت خافت لونته المرارة :

-أيوه يا فريال . لازم أسافر . هحاول أنقذ ما يمكن إنقاذه من الصفقة إللي حطيت فيها حصيلة سنة كاملة من الشغل !

تقلص وجهها بألم ، فهمست :

-عشان خاطري ما تتأخرش . أنا ببقي وحيدة منغيرك . مابحسش بطعم الحياة إلا بوجودك جمبي.

إستدار "يحيى" ليواجهها

أمسك بكتفيها و حدق في عيناها مباشرةً ..

يحيى بصوته الدافئ :

-و أنا كمان يا حبيبتي مابقدرش أعيش ثانية منغيرك . لكن مضطر . إدعيلي إنتي بس سفري ده يجي بفايدة و لو كل حاجة تمت زي ما أنا عايز هرجع بعد يومين إن شاء الله.

فريال و هي تنظر إليه بلوعة :

-ربنا يحفظك ليا و ترجعلي بالسلامة . دول الأهم بالنسبة لي.

إبتسم "يحيى" بحب ، ثم ضمها إلي صدره بلطف ، و تمتم بأذنها :

-بحبك . خليكي فاكرة إني جمبك دايما .. و بحبك دايما !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°

في غرفة "صالح" ... الصمت و الوجوم يخيمان عليه و هو يجلس مهموما علي فراشه الواسع

تلج "صفية" إليه حاملة كأس اللبن الدافئ بين يديها ..

جلست علي طرف السرير بجانبه ، و قربت الكأس من فمه و هي تقول بإبتسامة رقيقة :

-صلَّوحي ! يلا يا حبيبي إشرب اللبن و هو سخن.

يشيح "صالح" بوجهه قائلا بإنزعاج :

-من فضلك إبعديه عني يا صفية مش عايز.

صفية بضيق :

-بعد ما عملتهولك بإيدي تقولي مش عايز ؟ .. لكنها لاحظت تعابيره البائسة فجأة ، فسألته بجدية :

-مالك يا صالح ؟؟

صالح بكدر :

-ماليش يا صافي.

صفية و هي ترمقه بنظرة ثاقبة :

-إنت كداب يا صالح . قولي في إيه ؟ إيه إللي مضايقك ؟!

و ظلت لعدة دقائق تقنعه بالكلام ... ليقول أخيرا :

-دايما كل الظروف بتبقي ضدي يا صفية !

صفية بعدم فهم :

-مش فاهمة ! تقصد إيه يا صالح ؟!

صالح بكآبة :

-كل ما أحل عقدة . كل ما أفتكر إن مشاكلي إتحلت بطلع غلطان في الأخر .. مشاكلي بتزيد و بتتعقد أكتر.

أجفلت "صفية" و قالت بدهشة :

-ليه بتقول كده يا حبيبي ؟ إنت ماعندكش أي مشكلة . وضعك بيتحسن و الدكتور قال قريب أوي هترجع تقف علي رجليك من تاني . صحتك ممتازة و قطعت شوط هايل النتيجة إللي وصلنالها ماكنتش متوقعة . إنت إنسان قوي يا صالح و عندك إرادة . مافيش حاجة واقفة في طريقك دلوقتي !

نظر لها و قال بسخرية :

-لأ في . أبويا .. أبويا إتخانق إمبارح مع أبوكي . و شكل الخناقة كانت بجد و غير أي خناقة عادية عدت بينهم . أبويا يا صفية عقدلي الدنيا أكتر ما هي متعقدة.

صفية بصوت كالأنين و هي تلتقط خصلة أمامية من شعره :

-يا حبيبي إنت بتقول كده ليه بس ؟ مافيش عقد يا صالح . و بابا و أنكل رفعت دايما بيتخانقوا و بيرجعوا زي ما كانوا.

-بس المرة دي غير . صوتهم كان عالي و أنا سمعت كلامهم .. أنا حاسس إن المشكلة دي هتقف في طريقنا يا صفية . حاسس إن عمي هيبعدك عني بسبب خلافه مع أبويا.

وضعت "صفية" إصبعها علي فمه و قالت :

-هشششش . ماتقولش كده تاني . إنت مش واثق فيا يعني ؟ أنا مستحيل أبعد عنك أنا بحبك يا صالح و عمري ما هسيبك أو أسمح لحد يبعدني عنك . فاهم ؟ مش عايزاك تقلق نفسك بحاجات زي دي . ركز في علاجك و بس . و إحنا لبعض في الأخر . محدش هيقدر يفرقنا أبدا .. أوعدك.

رمقها "صالح" بنظرات آملة ، بينما إبتسمت و هي تعيد الكأس إلي فمه :

-يلا بقي إشرب اللبن !

•••••••••••••••••••••••••••••••••••••••••••••••••••••••••••

كان "عثمان" جالسا في سيارته المركونة علي جانب الطريق ... يراقب المارة أمامه بنظرات فاترة من خلال نظارته الشمسية القاتمة

زفر بقوة و قد أزعجه طول إنتظاره ، لكنه تلقي مكالمة في هذه اللحظة ..

أخرج هاتفهه من جيب داخلي في سترته البيضاء .. ألقي نظرة سريعة علي الرقم ، ثم أجاب :

-بابا ! .. كانت نبرته لطيفة ودية

يحيى بصوت أجش :

-إنت فين يا عثمان ؟

-أنا في مشوار كده . ليه في حاجة ؟!

يحيى بنبرة متماسكة غامضة :

-لأ مافيش .. بس بقالي مدة ماشوفتكش !

-آسف بس إنت عارف الشغل و شركتي لسا في بدايتها . هاشوفك بالليل إن شاء الله.

-أنا مسافر دلوقتي.

عثمان بدهشة :

-مسافر ! مسافر فين ؟؟

-طالع علي لندن.

-الله ! إنت مش كنت لسا هناك ؟!

-هاروح تاني . لسا في شغل متعلق .. ثم قال بنبرة جدية :

-المهم أنا عايز أطلب منك طلب.

عثمان بإهتمام :

-طلب إيه يا بابا ؟!

-طول فترة غيابي . عايزك تمسك الشركة و تديرها بنفسك . خلي بالك يا عثمان عينك تبقي في وسط راسك . مش عايزك تغفل عن أي حاجة.

أجفل "عثمان" بشئ من القلق ، و تساءل :

-طيب في حاجة يعني ؟ في مشكلة حصلت ؟؟

-مافيش حاجة . أعمل بس إللي بقولك عليه.

-حاضر !

-حاجة كمان ... أمك . خلي بالك من أمك . إوعي تسمح لأي حاجة في الدنيا تضايقها.

عثمان و قد ساوره القلق بشدة الآن :

-بابا في إيه ؟ بجد في إيه ؟؟؟

-يابني قولتلك مافيش حاجة . بوصيك زي كل مرة . مش كل مرة بسافر بسمعك الكلمتين دول ؟

-أيوه بس المرة دي حاسس إنك مخبي عليا حاجة !

يحيى بنفس النبرة الغامضة :

-مافيش حاجة . بأكد عليك بس.

عثمان بعدم إقتناع :

-أوك . عموما ماتقلقش . أنا هتولي كل حاجة لحد ما ترجع.

-تمام . سلام بقي دلوقتي عشان طالع عالمطار.

-سلام يا بابا . خد بالك من نفسك !

و أغلق الخط و ما زالت الحيرة و الشك تلعبان بملامح وجهه و تشغلان عقله ..

يلمح "سمر" أخيرا و هي تتقدم صوب سيارته ، طار كل ما كان يشغله في هذه اللحظة و خاصة عندما شاهد تلك المخلوقة الصغيرة التي يعرفها جيدا متكورة في صدر أختها مطوقة عنقها بذراعيها القصيرين ..

نظر لها بذهول شديد و ظلت عيناه عليها حتي وصلت عنده

إتخذت "سمر" مكانها بجانبه ... إبتسمت و هي تقول متظاهرة بعدم ملاحظة ردة فعله غير المصدقة :

-صباح الخير !

-إيه إللي إنتي جايباها معاكي دي ؟ .. قالها "عثمان" بتساؤل و هو ينقل نظراته بينها و بين "ملك"

سمر ببساطة :

-دي ملك . لوكا أختي إنت مش فاكرها و لا إيه ؟!

عثمان بحدة :

-جبتيها معاكي ليه ؟ إنتي بتهرجي !

سمر ببراءة :

-إيه إللي حصل بس ؟ أنا لسا راجعة بيها من عند الدكتور و مافيش حد في البيت ياخد باله منها . كنت هسيبها فين ؟!

زفر "عثمان" غاضبا و قال :

-و إحنا هناخد راحتنا مع بعض إزاي و هي معانا سيادتك ؟؟

سمر بإبتسامة و هي تمسد علي شعر "ملك" الحريري :

-أنا هانيمها . أكلها معايا أول ما تشبع هتنام.

عثمان و هو يلوي ثغره بنفاذ صبر :

-أما نشوف !

و شغل محرك السيارة ، ثم إنطلق ..

•••••••••••••••••••••••••••••••••••••••••••••••••••••••••••

في ڤيلا "رشاد الحداد" ... تتمدد "چيچي" في حوض الإستحمام البيضوي و المتتلئ بالماء الممزوج بالصابون ذا الرغاوي و الفقاقيع البيضاء

تتنفس بعمق لعدة مرات .. تزيد درجة إسترخائها ... ترهف السمع إلي تلك الموسيقي الهادىة المنبعثة من سقف قاعة حمامها المستقل

يدق هاتفهها في هذه اللحظة ، فتمد يدها المبتلة لتأخذه من خلفها ..

-ألوو ! .. ردت "چيچي" بنبرة متكاسلة

المتصل :

-چيچي هانم . في مفاجأة مش هتصدقيها !

چيچي بفتور :

-بليز منغير مقدمات إنجز و هات إللي عندك بسرعة.

المتصل :

-البنت إللي حضرتك وصفتيها دلوقتي حالا ركبت عربية عثمان البحيري.

چيچي و قد خفق قلبها من الإثارة :

-البنت المحجبة !

المتصل :

-هي يا هانم.

چيچي بإبتسامة شريرة :

-Very Good . خليك وراهم . و عايزة شغل نضيف و واضح.

المتصل :

-أنا تحت أمر حضرتك . هحاول علي أد ما أقدر بس مش واثق أوي إني هعرف أعمل المطلوب بالظبط.

چيچي بصرامة :

-تجيبلي شغل نضيف هاديك حقك أضعاف إللي إتفقنا عليه . أنا عايزة حاجة واضحة عايزاها تبقي فضيحة الناس ماتنسهاش أبدا !

•••••••••••••••••••••••••••••••••••••••••••••••••••••••••••

في إحدي الشقق الفخمة ... المطلة علي ساحل الأسكندرية

تقف "سمر" بالمطبخ المصمم علي الطراز الإيطالي و الذي إتخذ شكل حرف الـ U .. مطلي بلون سماوي رائع تألق مع لمسات الإستيل الأنيقة ..

تناولت "سمر" أحد الصحون المربعة ، و شرعت في تحضير وجبة الطعام لأختها

لقد تركتها بالخارج مع "عثمان" ... ظلت تدعو و هي ترتجف بتوتر ألا تخذلها "ملك" و تغفو بحق ، لابد أنه يحاول ذلك الآن ..

-إن شاء الله مافيش حاجة هتحصل ! .. تمتمت "سمر" لنفسها بنبرة مهزوزة ، ثم أخذت الطعام و توجهت به إلي قاعة الصالون الخارجية

في طريقها إلي الخارج إستطاعت أن تسمع صوت ضحكات "ملك" الرنانة ، و إستطاعت أيضا سماع صوت "عثمان" المتذمر ..

ظهرت "سمر" عند طرف القاعة ، لتراه جالسا علي الأريكة الصغيرة ، واضعا "ملك" فوق قدميه و وجهها مقابلا لوجهه

كانت تبتسم بشدة و قد ظهرت غمازتاها الجميلتين ، فيما بدا "عثمان" نافذ الصبر أمام مرحها بصورة كبيرة ..

-يابنتي خلاص بقي أبوس إيدك سيبي دقني ! .. قالها "عثمان" بضيق شديد

بينما كركرت "ملك" ضاحكة و هي لا تزال مستمرة في شد لحيته بقبضتاها الصغيرتين

تأفف بنفاذ صبر و هو يحاول إبعاد وجهه عن متناول يدها ، لكنها لم تتركه و أظهرت سلوكا شرسا حين قفزت عليه و قضمت خده بأسنانها اللبنية المربعة و هي تزمجر بعفوية ..

لمح "عثمان" شقيقتها و هي تقف و تراقب هذا ، فصاح بإنزعاج :

-إنتي ياستي . تعالي خدي القطة المتوحشة دي . دي إستحالة تكون طفلة ماكملتش سنة !

ضحكت "سمر" رغما عنها و مضت إليهما ..

-معلش أصلها بتسنن بقالها فترة و بتحب تعض علي أي حاجة .. قالتها "سمر" و هي تمد ذراعيها لتأخذها منه

ناولها "عثمان" إياها فورا رغم أن الصغيرة إستاءت ، فقد كانت مستمتعة برفقته ..

عثمان عابسا بضيق :

-قدامها أي إيه دي لحد ما تنام ؟

سمر و هي تهز كتفاها بخفة :

-أنا هأكلها و هحاول أنيمها !

عثمان بإستنكار :

-نـــعــــم ! هتحاولي ؟؟؟

سمر بهدوء :

-أه هحاول . ما أنا أكيد مش هعرف أنيمها غصب عنها.

عثمان بإنفعال :

-إنتي بتهزري ؟ إنتي قاصدة تعملي كده علي فكره بتاعندي معايا. يعني ماتكونيش فاكراني عبيط و مش فاهمك بس لازم تعرفي إن مش أختك إللي هتحوشني عنك.

إرتجفت "ملك" علي صوت صياحه ، و تغللت عميقا في أحضان أختها ة و خبأت وجهها في شعرها و هي تنشج و تئن بحرارة ..

أجفل "عثمان" بتوتر مفاجئ عندما سمعها تبكي ، بينما توهجت نظرات "سمر" المصوبة إلي عينيه و هي تقول بغضب :

-إنت ماتعليش صوتك ده تاني و البنت موجودة . هي عملتلك إيه ؟ دي طفلة صغيرة . و بعدين إنت إللي لازم تعرف إن لولا أختي دي ماكنتش هتشم ريحتي أصلا . أنا لو كنت قبلت أي حاجة عرضتها عليا فأنا قبلت عشانها هي فمش هسمحلك أبدا بأي تجاوز معاها . فاهم ؟

و ظلت نظراتها المستعرة تلتهمه للحظات قبل أن تتركه و تمضي نحو إحدي الغرف ..

وقف "عثمان" يحدق في إثرها الفارغ مشدوها ، فهذه أول مرة تتجرأ عليه هكذا ، أول مرة ... يري الكره .. الغضب الحقيقي في عيناها !!!!!

يتبــــــــع ...