رواية ابناء الحسوم "شمسون" الفصل الاول 1 - بقلم 𝐙 𝐇 𝐑 𝐀

𝐓𝐇𝐄𝐘 𝐒𝐀𝐘 𝐌𝐀𝐅𝐈𝐀 𝐈𝐒 𝐌𝐘 𝐌𝐈𝐃𝐃𝐋𝐄 𝐍𝐀𝐌𝐄!

🏴

#أبناء الحَســــوم 🔥🔇

بقلم: زهراء السلامي 🌸

𓈓𓈓

توضيحات ضرورية يجب قرائتها قبل البدأ بقراءة هذهِ التحفة الفنية "تباً للتواضع" 😂

من هسة نتفق احب ادمج الفصحى بالعامية من اكتب التوضيح تحملوني ؛)

𓈓𓈓

توضيحات مهمة:

-بدايةً، هذهِ الرواية عميقة بأفكارها قبل مشاهدها فـ هناك احداث غريبة لا تصدق انصحك بقرائتها كما تحب خيالية اذا الامر يرضيك او حقيقية اذا الامر يسعدك، اما اذا كنت متعصب ولا ترضى بالحالتين وعندك مشاكل بالشك فـ انا مضطرة بالقول الرواية لا تنفعك اخرج منها لطفاً راح تضيع وقتك على الفاضي

-🚫الرواية جريئة
لا تحكم على الكاتب وعلى شخصيته من خلال كتابته لرواية ما، فـ انا لا اتكلم بلسان الشخصيات ولا اعيش حياتهم ولم اجرب المواقف التي مروا بها ولم ادخل الاماكن التي دخلوها لا انا ولا انتم!.. انا كاتبة وسأكتب القصة بلسانهم وشخصياتهم وانت قارئ وان شاء الله ستتأقلم معهم فـ بعض المشاهد تقشعر لها الابدان وبعض الشخصيات مستفزة تحرق القلب والبعض الاخر بلسم ناعم على الفؤاد..

لكن رغم كل هذا الكلام 👆🏻 لا تقلق قمنا بحذف وتدبير المشاهد الجريئة لتلائم جميع الاعمار ويفضل قراءة الرواية من عمر 16 فما فوق لطفاً

-اذا كنت لا تحب اللهجة العامية الرواية لا تنفعك بشيء سوف تستفزك عباراتها وممكن تشوفها ان هي "خرط" لكن يسعدنا كتابة وقراءة هذا الخرط ♥️

-القصة تتضمن اكثر من ثنائي، واكثر من قصة، فـ اذا كنت من النوع الي يحب الرواية تتركز على ثنائي واحد فـ "ابناء الحسوم" لا تناسبك للاسف.. متأكدة راح تصير القصة عركات وكل فئة ويه ثنائي معين وينتظر مشاهدهم على نار 🥵

-ممكن الرواية باردة ببدايتها انطوها مجال احياناً نضطر نبدي على مهل ونتحضر للمشاكل والمصايب، فـ تدفق الصدمات دفعة واحدة تسبب اضطرابات في القلب والمعدة 🌚

-اللهم إني بريئة من ذنوب الابطال وذنب الذي سيقرأ (اكتبها هسة تحسباً يمكن يمكن يمكن يمكنن احد يتأثر بشي معين او حدث معين اني معليه 😂)

-كتابة القصة لا تعني تأييد افعال الابطال نهائياً ولا كتابتها تعني اننا سنأخذهم قدوة ونقلدهم ونتأثر بيهم وانما التعلم من تجاربهم وانا بريئة من افكار الجميع + نقرأ ونكتب للتطلع على تفاصيل حياة باقي الناس من باب الفضول والخروج من قوقعة افكارنا وبيئتنا والتسكع والتمتع وعيش افراح واحزان باقي الناس

-ممكن تخرج من قصة "ابناء الحسوم" ما مستفيد منها بشي لا معلومة ولا نصيحة وممكن تطلع محمل بأشياء سوف تبهرك وتغير منظورك للحياة..

-واخيراً وليس آخراً ارجو من الجميع قراءة القصة للمتعة لا غير ❌ + كل من لم يتقبل ولم يحب ونعت قصة (الاطلس "دمليج اسود") بالمسلسل التركي او الافلام الهندية فـ هذا مو مكانكم "ابناء الحسوم" ممكن تكون احداثها اغرب واعمق منها ولن تعجـــــبك :)

الغلاف الاكثر من رااائع 😩🔥 من ابداع iwantmeto

كافي سوالف وخلونا ننتقل للمشاهد 🙈

𓈓𓈓

-ماذا لو كان الدم هو لونها المفضل؟
،

-ماذا لو كان اللعب في النار هي متعتها الحقيقية؟
،

-ماذا لو كانت كلمتها المفضلة "سليمة"
،

-جميعنا كُنا اطفالاً
،

-لا أحد يولد شريراً
،

-لكل شرير قصة!
،

-أخ.. حرفان يحملان معاني كثيرة
،

-يسمع، ثم يبتسم، ثم يتجاهل، ثم.... يقتل؟
،

-ملينا من اساطير السلاطين جيبولنا الشياطين وسولفولنا قصصهم!
،

𓈓𓈓

"المشـــهد الاول"

دخان سيجارة يتعالى في المكان ليختلط برائحة كولون نفاذة تخترق تجويف الأنف مرغماً، كؤوس تتضارب بمزاجية، عبير ثروة ينبعث من انفاس الجالسين، أصوات ثرثرات هامسة بأفكار جنونية، لعقت شفتيها بضجر وقامت بشد معطفها الثقيل المصنوع من الفرو الاسود..

-اي؟

-تفضلي..

مشطت عيوني بالمكان اتابع الناس المخملية المحتلين المطعم، يتهامسون بهمسات مختلفة منهم يتحدث عن المال، منهم عن المشاريع، منهم يتغزل بحبيبته الي امامه، منهم ينتظر الزلة من صاحبه ليستحوذ على امواله، بلعت ريقي وقررت افتتح وياه الحديث..

-ريحة كولون حضرتك ثقيل سببلي حساسية بأنفي

-جورجيو ارماني

-نعم؟

-اسم الكولون (عطر) جورجيو ارماني

كالهه بطريقة باردة وفر الساعة الي بيده يرتبها، ذبيت نفس متنرفز وطقطقت اصابعي، بلحظتها رفع عيونه عليه واشر بأيده بهدوء ناهيني..

-Oh, no please

-عفواً؟

-اتنرفز من هاي الحركة

حركت اكتافي بلا مبالاة ورجعت اطق اصابع ايدي الثانية وهمست بنبرة باردة اكثر منه..

-عادي، ما راح تموت

نظرلي بملامح جامدة ما مفهوم معناها، ماهتميت واستمريت اكل من الحلو الموجود امامي، ضرب راسي صداع اختل توازني شوية بس ماهتميت كملت اكل واگول متعمدة اغثه..

-عندك فوبيا من شي؟

رفع كاسته يشرب منهه وكال بثقة مقززة ما معلوم جاي يتشاقى لو يعنيها..

-يُقال اني الفوبيا بنفسهه

-تدري شي؟

-امم؟

-لعبت نفسي

-من شنو؟

حطيت رجل على رجل واشرت للگرسون يجي ينطينه الحساب، ذبيت نفس وعصرت جبيني اخفف من الوجع الصابني والغواش الي احتل عيوني، قلقت لثانية وفتحت جنطتي اتأكد من وجود مسدسي ورجعتها على الطاولة، ملاحظة نظراته عليه ينتظرني اكول شي رجع كرر سؤاله بأهتمام..

-من شنو لعبت نفسچ ماي ليدي؟

رجعت اركز انظاري بي، ابتسمت تك خد ورفعتله حاجبي مستهزأة، علقت جنطتي اليدوية على ذراعي وگمت واني اگول ببساطة لاذعة..

-منك...

𓈓𓈓

"المشهد الثـــاني"

كفخ هوا بارد قشعر جسمي، ريحة اشبه بالغاز ترست انفي خلتني اعطس مرتين وره بعض، فتحت الضوه وجفلت من الصورة العملاقة الشفتهه معلگة على الحايط..

عكدت حاجبي بفضول وتقربت اشوفهه عن قرب لوحة جبيرة عبارة عن شخابيط باللون الاحمر والاسود متمازجات بطريقة اشبه بنوع من انواع الفن بس شكله غريب كلش..

رجعت اطلع وبلعت العافية من انركعت بكيس ملاكمة عملاق وره ظهري، ذبيت نفس وشتت خوفي شي ثاني مرسوم على الحايط الي بجانب الباب، احرف انگليزية ولاتينية ورمز Ş مكتوب بشكل عشوائي كل مكان حول الغرفة، شكله مو مال فيكة واضح يرمز لشي معين..

دورت عيوني بالغرفة حتى فصالهه غريب وريحة الغاز تكتل بأي لحظة راح تنفجر الغرفة بسبب هالريحة، نفخت هوا وقررت اطلع عيب عليه كاعدة افتر بغرفته بكيفي، صرخت من انفتحت فجأة موسيقى صاخبة عالية من سماعات جبيرة..

ظليت اتلفت بخوف وانفاسي تعتلي ماعرفت شلون اطلع من الغرفة من الصوت كل وضعي تخربط ركضت للباب افتحهه بس مانفتحت حاولت اسحبهه هم متنفتح ابتعدت مستغربة شنو هاي مقفولة؟؟

-هاااي ليش الباب مقفووول افتحهها!!

رجعت احاول واحاول بس ماكو فائدة روحي احس جاي تنسحب ضغط عالي بالغرفة انسدت اذني وراسي راح ينفجر ماكدرت ابقى واكفة قررت اكعد استقر شوية على السرير اللقط نفس وصرخت..

-الباااااب مقفووووول لييييششش؟؟ باااوع لو دتتشاقى ويايه تره شقااك مااااصخ افتح البااااب

حطيت راسي بين ايدي اضغطه بقوة وامسح الدموع البدت تنزل من عيوني من وجع راسي، كمت من مكاني بصعوبة ادك بالباب عسى ولعل يسمعني ويجي يخلصني من هالمكان بس ما لحكت لان انفتحت الباب وظهر منهه وبيده جداحة مشعولة شرگت بلعابي اگح ما لحگت اعيط وشمر الجداحة بالغرفة اشتعلت بينا....

𓈓𓈓

"المشهد الثـــالث"

دوى صوت الراشدي بالمكان مخلف صدى يلتهم الكرڤان الفارغ بينما هو بقى على وگفته مستسلم منتظر مَوته آمل يتخلص من هذا العذاب، سحبت ايده اتوسل وارجف بخوف بحياتي ما خفت مثل ما خايفة هسة احس گلبي راح يوگف بأي ثانية..

-امشي ويايه فدوة امشيي تريده يمووتك تره هذا مخبل امشي

-تحبين تموتين وياه؟

بلعت ريگ اعصر عيوني ما طايقة اشوف وجهه، استجمعت قوتي وعطت بي..

-شنو من گلب علييك ولك حيوووان انتَ ماعندك مشاااعر ماعندك ضميرر؟؟

-تطلعين لو تاكلين المقسوم وياه؟

جاوب ببرود حرگني وابتسامة مشاكسة مرسومة على ثغره، بنفس اللحظة دخلو زلم ثلاثة مقنعين واگفين ينتظرون اوامر منه، مسح شفايفه بأبهامه واشر بعيونه علينا..

بلا كلام اجو المقنعين دفعوني بخفة وجروه مني لزموا من ايده يچتفوه ونزعوه قميصه، اطرافي نملت وراسي راح ينفجر حتى صوتي اختفى من شفتهم يعلگوا من ايده گدامي وبيدهم اسواط من الجلد..

-ولك حرررام عليك ونبي حرررام عوووفه يالكللللب يالخسيسس

-تطلعين؟ لو.. تاكلين.. المقسوم.. وياه..؟

حچاهه كلمة كلمة وهو ينزع حزامه، تخربط وضعي من صار يتقرب مني والحزام بيده، حاولت ما ابين خوفي بس رجليه خانتني انداريت عليه يعلگون بي ويعيط بيَّ بروح رايحة..

-طلللعي برررا لا تبقيييين هنااااا

-مارووح ماعوفك

-وللللج روووووحييييي

صوته يرج بالگرفان رررج اخذتني الرجفة وصرت اراوح بمكاني، منين ما ادير وجهي محاوطيني ناس مجرمين ماكو بگلوبهم رحمة، هزيت راسي بـ لا واخيراً سمحت لدموعي تتحرر..

-ماعوفك

تعب مني نزل راسه وايده معلگه فوگ ورجليه مثبتيهه بالگاع بأصفاد، شهگت بعياط من صارو يضربون بي گدام عيوني بچيت بچي مخابيل اتوسل بيهم يعوفو يضربون من دون رحمة ملخو جسمه وصدره وحتى وجهه ملامحه بعد متبين من الدماية والجروح..

-الا انتقمممم منكمممم يا كلاااااب ما اطلع بنت امييي اذا ما اخذت حقنا منكممم ولللك ارحم بحاله وشنو تريد انطيك

زدت بالبچي من سمعته يصيح بيه بصوت تعبان بس قوي خلى جسمي يقشعر...

-لااااااا ولجججج لاااااااااااا اموووتج وحق الله اموووتج انتِ مو تكرههينييي طلعيييي مناااا طلععععييي

-اذا انتَ حيوان ومتحس من يعذبوك اني احس ارحم بحالي

همستها بتعب بصعوبة طلعت الكلمات من فمي ووگعت بالگاع، رفعت انظاري على ابليس الگدامي بيده الحزام وينظرلي نظرات متوعدة، نزل ينگبص امامي قرب وجهه من وجهي وهمس بأبتسامة مشاكسة بيني وبينه بدون لا يخلي احد يسمع..

-انتِ تحبي؟

حركت راسي لا بحركات عشوائية، هز راسه اي وكبرت ابتسامته وهو يهمس..

-راح اموته تره

-موته

-گدام عيونچ؟

-بكيفك ميهمني

رفع نفسه عني واشرلهم يرجعون يضربوه بقوة اكبر واحد منهم شال سطل مي عرفت بي ملح بسبب شهگته من شمروه عليه ويرجعون يضربوه، انهاريت ركضت اللزم ايده واتوسل..

-انطيك التريده عموو بس عوفه ابوس ايددك عوفه كاافي راح يمووت هذا ابنننك

جاوبني بثقة وهو يطلع جگارة من جيبه واصوات الديعذبوه ترج بالمكان..

-عندي ثنين غيره ما يهمني

-گتلك انطيك التريددده لا تصير مطييي

اللتفت عليه عيونه تجدح وابتسامة ماكرة مليئة بالمعاني الفاسدة نُحتت على وجهه، رفع ايده يأمرهم بشي فوراً واحد منهم شمر بيده علاگة، اخذها وطلع منها دشداشة بيضة شمرها عليه وگال بعجرفة..

-لبسي هاي وانتظريني بالكرفان الي بجانبنا فارغ ماكو احد

اخذتها من ايده والدموع ترست وجهي وعيوني ما اشوف شي كدامي بس اسمع صوته حطم جدران الغرفة انشخط بلعومه راحت روحه ما گدرت ابقى زايد دخلت بالكرفان الثاني وعيوني شخصت من المنظر الشفته......

𓈓𓈓

همست بأذني.. "مراقبات من قبل عيون مرسومة وانفاس راغبة مكتومة، ضايعات بفراش من الهموم ومحتميات بأحضان يملؤها الحقد والسَموم، مدفونات جوه انقاض غنوم ومحاوطات بـ افكار داجنة من ابناء ضالة حَســـوم!"

#أبناء الحَـــــسوم "شمسون" 𓆩🃏𓆪..

𓈓𓈓

عودة حميدة ان شاء الله احبائي مشتاقتلكم كُلشش هوايه 🥹🫂🌸

احم احم توضيح فوگ وتوضيح تحت تحملوني 😂
منو يتذكر هذا المشهد بالاطلس 👇🏻

نعم نعم الابن الثالث كان لازم اله ظهور خاااص جداً بالاطلس لكن اختلفت الاراء وما ظهر.. لكن هسة احنه محظوظين كفاية وان شاء الله راح نكتب قصته الكارثييية الخاصة وهي هذي "أبناء الحَســوم" 🔥

فـ.. شبابزز لموا چوالاتكم هالمرة ما راح نرجع للعراق حَ نسافر لمكان آخر وراح نعيش تجربة مجنونة، دموية، أكشنية، محمسة، مختلفة ونشهد قصص حب غريبة عجيبة ويه بعضضض فـ شدوا الرحال ماعدنا وقتتت 😁🔥🚫

خلونا ننتقل جميعااً لـ قصة "أبناء الحَســـــوم" وخليهم يحمسونا وياهم بحياتهم المعقدة ونتونس على حماسهم العنيفف 😂💃🏼

ضيفوها بالمكتبة اذا تحبون حتى يوصلكم اشعار ان شاء الله من نبدي بالتنزيل 🤍

ملاحظة: الابن الثالث ما عايش بالسويد كتبت هالشي بالاطلس حتى نضيع هويته 😂

ملاحظة عاشرة 😂: لا يجب قراءة الاطلس (دمليج اسود) لتفهم أبناء الحَسوم هنه قصتين مختلفات تماااماً او بالاحرى عالمين مختلفين

عالم السمو والملائكة 😇
vs
عالم السَفلة والشياطين 😈

"𝐖𝐄𝐋𝐂𝐎𝐌𝐄 𝐓𝐎 𝐓𝐇𝐄 𝐎𝐓𝐇𝐄𝐑 𝐖𝐎𝐑𝐋𝐃 𝐄𝐕𝐄𝐑𝐘𝐁𝐎𝐃𝐘 😏"

تعالووو انستااا وأي سؤال يراودكم لا تترددون تطرحوا عليَّ 😍💛

واخيرراً منو متحمس لبارت الاضافي مال الاطلس؟؟ راح يكون شي جميييييل جداً ان شاء الله 🙈🔥🔥🔥

اختكم وصديقتكم زهراء السلامي "زازا" تحبكم واااايد واااايد ومشتاقتلكم كومة 🫂💋💋💋