رواية ابناء الحسوم "شمسون" الفصل الثالث والعشرون 23 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

أيمكنني قتلكُ حين أغار... حبيبي؟ ♥️

━━━━━━  ━━━━━━

طلعت من المنور بسرعة وسحبت سچينة مال اكل من الكاونتر، رجعت امد راسي اشوف منين جايه هالطگطگة وچان اشوف منظر ارعبني!! منظر بلعني لساني وبلعومي كله.. منظر امرأة ايدها مدماية وواگفة على جهة تمسحها بوصلة.. لا لا مستحيل مستتتحيل تكون هي!..

-مسرة: بدور؟!

اللتفتت عليَّ تباوعلي بنظرات بلهاء، تقربت منها گلبي يرعد تمايزت وجهها المجرح وايديها المدماية وشعرها المنفوش والافكار غزت عقلي دفعة واحد..

-انتِ بدور؟

-ها

-انتِ بدور؟ بدور اخت جمانة؟!

-انتِ منو

جاوبتني بنبرة بلهاء ممفهومة نفس نظراتها بالضبط وترتني زايد وحسيت بالخطر ماعرفت شلون اتصرف وشنو دتسوي هنا ووين جمانة بالتحديد؟!

-شدتسوين هنا بهيچ وقت؟

-انتِ شعلييييييييييييييچ

صاحت بوجهي صووت حسيته اخترق طبلة اذني وزرفها، دفعتني على الحايط وگعت سچينتي بالگاع وقيّدت ايدي بكفوفها القوية المدماية، لزگت وجهها بوجهي ونترت بين سنونها المفرقة..

-انتِ منوو وليش اجيتيني شنو تردددين

-مسرة: هديني

-ما اهدددچ ماا اهددد

صوتها عالي لدرجة گلت بأي لحظة راح يجي احد هنا ويلگفنا بس العجيبة محد اجه طول ما احنه هنا..

-بدور اختچ وين؟

هدت ايدي وابتعدت كم خطوة، عصرت راسها بقوة وتغمض بعيونها وكأن اكو اصوات بداخل راسها تريد توگفهن، نزلت اخذ السچينة ومشيت ابتعد كم خطوة وعيوني عليها..

-بدور: راحت.. رااحت.. هددوناا.. اخذني.. بچيت.. امي.. احسان.. جمانة.. ثرى...

فز گلبي وفتحت جروحي بـ ذكرها لاسم امي، لزمتها من متونها اهزها ارجعها للواقع واهمس بصوت راجف..

-ثرى؟؟ تعرفيها ثرى مو؟؟ بدور اني اعرفچ انتِ اخت جمانة صديقة امي بدوور رجعي ويااي

صارت تبچي بصوت كلش عالي فزعتني وگعت روحها بالگاع تتبعثر وتجرح وتشخط جسمها بالصبة وتضرب بيدها حيل.. خفت وحسيت بنهايتي قربت قررت اتركها وارجع السچينة واصعد لغرفتي ليستوقفني صوت العلوية القوي..

-العلوية: مسرة!

شهقت جوه انفاسي بلعت العافية وصوتي وياه ما واجهتها وما درتلها وجهي هي تقربت ودارتني عليها..

-العلوية: شمالچ تنتفضين يما

بلعت ريگ اهز براسي بحركة ماكو شي، ضغطت على ايدي بقوة خفيفة و وشوشتني بيني وبينها..

-العلوية: بدور خوفتچ حبيبة؟ چا مو حذرتچن لا تفترن بنصاص الليالي يا بنياتي لا تخترعن وتنگطع خلفتچن

سحبتني وياهة لغرفتها گعدتني على سريرها وجابت قران تفتحه وتطبگه بوجهي وتسمي بأسم الله وتقره شي..

-العلوية: يوم احنه زلامنا ما يندگون بـ بدور موش صاحية عمت عيني عليها

-شبيها؟

-عقلها شخط ويه موت اخوها احسان

-ماااات؟؟؟

عگدت حاجبها على ردة فعلي القوية، انتبهت لنفسي وگلت ابرر..

-لان هي ذكرته هوايه گالت احسان عرفته اخوها وانقهرت هسة من گلتي مات

-اي عمت عيني مات بعز شبابه انكتل

-شلون؟

-مادري جعيفر جابه مدمى بنص بيتنا ويصيح بيه اجي اشوفه لگيته مزرف بالچيلات سودة عليَّ

عيونها دمعت ومسحتهن بـ شيلتها، گلبي انعصر بوجع فضيع بصعوبة سيطرت على دموعي وهي تكمل..

-گال جعفر يجوز اهله ذبحو من عرفو بي هرب بنت عمه بليلة ظلمة ويه صاحبها

-مو حلال؟

-لا الكلام لله ظلموا البت عقد عليها الزلمة بموافقة ابوها واخذها لبيته يومين وگلب حچو براسه اخوته العاريه وذكروا بقانون العشيرة ماعدنا بت تطلع لغريب

-وبعدين شصار

-ابوها شبعها كتل للطفلة اشتعل گبره الخايس وجاب زلمتها والا تطلگها همه بطلعان الروح صارو لبعض انوب تردي يطلگها صاح زلمتها لا بعلي ما اطلگ واخذها وياي غصباً على اثخن شارب

نزلن دموعي ما گدرت اسيطر عليهن مسحتهن بسرعة بينما العلوية راحت على ميزها تطلع كتاب قريت غلافه مكتوب "ضياء الصالحين" وكملت وهي تقلب بأوراقه..

-ما ظل شي على صلاة الفجر يما لا تنامين

-علوية كمليلي القصة

-هاا وين وصلنا

-من زوجها ما قبل يطلگها

-اي راحت لبيته وتمم زواجه منها وتعال طلگ عشتو شنهي الدنيا سايبة ويطلگ ويزوج بـ اسبوع واحد بس شتحچين ويه ال**** نبصوا الا ترجع بنيتنا عبن ليش ابن عمها عاشگها ورايدها وراح يموت على فراگها انفگست عينه

-اي؟؟

-ما رضى الزلمة اخذ مريته وراح.. شلون ووين وشوكت مانعرف بليلة ظلمة اختفو ثنينهم ياهي طاحت بيها جمانة طاحت وخذوها غصب وزوجوها نفس العاشگ الخسيس الگال عشگت ذيچ كتلها واذاها وانتقم منها لانها صديقة ثرى وما رضت تگول وين مكانها...

سكتت تگح وراحت تشرب من دولكة المي الي حاطتها بالشباك، دموعي بعد ما گدرت اللزمهن والغصة كتلتني هاي قصة امي.. قصة امي وابوية المعقدة وعشق امي الكبير واصرار ابوية حتى يدوم هذا العشق اخذها وهربها بمساعدة "شمسون" النذل!!

العلوية واضح متعرف ابنها الي هرب امي ولا هو نفسه الكتلها وغسل عارهم وباگها بنفس الوقت.. واضح هاي المرأة الحنونة متعرف بسواد وجه ولدها وشنو جاي يسوون وره ظهرها باقية هنا گاعدة بين القرآين والكتب الدينية وبين احفادها تداهرهم بلسانها القوي وتضحكهم وتوزعلهم حنان ودفو..

مسحت دموعي من رجعت تلبس نظاراتها الطبية وگالت بأبتسامة حنونة..

-ضوجتچ انه يَـ بعدي

-لا بيبي بالعكس بس ما عرفتو منو هرب البنية كل هاي السنين؟

-لا والله ما درينا عجزوا ولدي جعفر وصاحب يدورون گالو نجيبها هنا نرجعها ونعيشها ويانه وفنه الي يجيسها بس ماكو البت فص ملح وذاب

-يمكن ماتت

-مادري بعد العلم عند الله بس ما اظن لان صارله سنين جعفر يدورها وانه هم هاي البت براسي عمت عيني ما ارضى على كسر البنيات گلبي ما يتحمل

-اشوفچ تدافعين للبنات هواي

-يما البنت جنح طير مكسور بمجتمعنا لوما انه وانتِ ما ننصفها وندافعلها چا ياهو النه ويهتملنا بعلي ياكلونا الذكور لحم ويذبونا عظم

سكتت من سمعنا صوت بدور ترجع تصيح وتبچي وتحچي وحدها، صوتها عالي بمعنى الكل ديسمعها ومحد يروح يشوفها لانهم واضح متعودين..

-العلوية: ما ارضى على بنياتي ولا على وليداتي كلهم ببطن عيني بس انه من اول احبن البنيات واميل الهن اكثر

-اني هم احب البنات لسه اتذكر من عرفت اني حامل ببنية شگد فرحت

-البت دفو وحنية للبيت ياهو تهتم بالأم والابو بكبرتهم غيرها بعلي انه بنياتي منطيتهن محافظات ولد عمهن ماخذهن خمستهن وبعيدات عني بس كل اسبوع جايتني وحدة تفر البيت فر وتنام يم رجليناتي تگلي يما شنو تردين انه خدامة جوه رجليچ اگلها حشاچ يا بعد امچ من الخدمة انتِ تاج على راسي احطنچ..

مسحت فمها بالمنديل وكملت..

-زلمتها من يسمعني احاچي بنياتي هيچ يحترموهن ويقدروهن يعرف وراهن ام تكسر ظهورهم لو نزلو دمعة من عيونهن الحلوة

-فدوة لگلبچ علوية شگد حنونه

-مو بس انه حنونة حتى وهاب يحب بنياته ومداريهن چان لحدما مات كل بنياته يحبهن

-والولد؟

-ولده تعبهم اي حتى احچي حگ الله تعبهم وهلكهم كبرهم على العنف والتعذيب والترهيب بـ حجة اسويهم زلام

-وصارو مثلما يريد؟

-همه صارو اي بس يا يما فقد حبهم وحنيتهم وبرهم فقد زلامه الرباهم وعافو كلهم من وگع محد اهتمله شايلين ومحملين حقد على ابوهم.. ماكو وهاب بين وگعته ومرضه وموته اسبوع واحد هو على فراش الموت وماكو واحد من ولده اجه يشوفه

-استغفرالله

-شگد چنت احاچي وما ارضى عليه اروحن زعلانة ببيت اهلي من يعذب ولده كلهم مو بس ولدي حتى ولد ضرايري ما ارضى عليهم كلهم وليداتي شافني رافضة وما اقبل ارجعله اذا ما عدل نفسه صار يأذيهم بالخنسة ويهددهم محد يسولف شي لعلوية اقبال لا تتعاقبون وصدگ ضيييم تحملو منه ياله مات وخلصو

هزيت راسي متفهمة ترخصت مني وبدت تقره شي اشبه بالدعاء وتمسح على شعري وصدري وايدي.. صوتها بي بحة عجايز بس شگد يريح ودخل الطمأنينة على گلبي.. تعبت كلش انتبهت عليَّ واشرتلي بصفها ع المخدة حتى امدد، حطيت راسي وما حسيت الا واني اغفى بغرفتها..

حسيت ثاني يوم على ايدين ماريا تگعدني وتگول بفرحة حماس..

-يلا يلا گومي عروسة لازم نروح للصالون

فركت عيوني وباوعت لنفسي نايمة على فراش العلوية وحدي، باوعت للساعة شفتها بـ 11:00 الظهر گمزت من مكاني عزه بعيني تأخرت اني حجز الصالون مالتي بالعشرة الصبح ولسه نايمة!..

ركضت ركض فوگ سبحت فرشت اسناني وبدلت ملابسي مثل المخابيل وادور على صبا وجولي ذني وين موليات وكيان وجنات ليش ما گعدني!!

رحت للمطبخ اخذ أي شي آكله وشفت الكل متجمع هنا ديتريگ وفيروز متوسطتهن وميتات ضحك وياهة..

-مسرة: هاي شنو

-صبا: هاا ضلعي اخيراً گعدت تعال اكل تعال

-مسرة: ساعة بـ 11 بنات تأخرنا على حجز الصالون!

-كيان: لا حبي هستوها بالتسعة

-مسرة: لا شفت بغرفة العلوية بالـ 11

-فيروز: ساعة غرفة العلوية من زمن العباسيين عطلانة يمعودة

-فواطم: صحيح واني اشهد مر عليها العصر العباسي والمماليك والعثماني وهسة الاسلامي وبعد الـ...

-فيروز: انطمي انتِ وتاريخچ المعفن

-فواطم: اي والكعبة ما مصدگة راح اتخرج هالسنة

-كيان: شنو اختصاصچ؟

-فواطم: العشق الهيام الغرام تارييييخ

-كيان: اسفة بس ايوووو

-فيروز: اني عندي شنقوني ولا تأخذوني درس تاريخ

-هدى: اني چنت اكرهه بس سچاچة بي

-فيروز: انتِ بكلشي سچاچة دكتورة

-نور: شگد تلغن كافي من الصبح

-هدى: سكتي نور رحمة لأبوچ هو بس اليوم وراح نتفرق كلمن يرجع لبيته

-جنات: بنات اني ما راح اروح للعرس منو تطوع وتروح بدالي؟

غمزت فيروز وهمست لـ هدى سمعتها لان گعدت بصفهن بالضبط..

-فيروز: خلي ايات تروح بدالچ راح تموت من القهر

-هدى: باعت اختها علمود رجال گبوور

-فيروز: ما جاي اصدگ هاي نفسها ايات شبيها تخبلت والعباس اني رجلي اشاركه ويه عُلا اي غير اختي

-هدى: انچبي لا تروحين زايد

**

"صبا"
كملنا ريوگ وتفرقنا كلمن راحت تبدل نزلت جوه اشوف امي وين لگيتها شاده رأسها ونايمة..

-ماما شبيچ

-ام صبا: راسي راح يطگ ولچ الليل كله اسمع وحدة تصيح بالمطبخ

-صبا: عزززه منو هاي؟؟

-يمكن جنية ولچ سويتها على روحي من الخوف صباوي شلون بينا شوكت نرجع ساعة السودة الاجيت بيها

-ماما اجينا لخاطر مسرة ما اسمح لاحد يستنقص منها ويسألها وين اهلچ وليش جايه وحدچ احنه اهلها وعزوتها لو نسيتي من دگيتي صدرچ وگلتيلها اني امچ

-لا يمة انسى شنو بنيتي هاي سرور معزتها من معزتچ حبيبة امچ

-اوكي يله لعد امشي للصالون ويانه

-يله بس ابدل واللحگكم

عفتها تبدل وطلعت للصالة شفت العلوية گاعدة سلمت عليها ورحت للهول هناك اگعد واگلب بتلفوني، تچيت ظهري على الباب الثانية صايرة خشب التفصل بين الصالة والهول چبيرة وواسعة بس كلشي ينسمع منها واليها وصخام بوجهي ولطام على المحادثة السمعتها دارت بين مالك والعلوية بهاي اللحظة..

-العلوية: شمالك ضايج يما

-مالك: ابوية طيح حظظ حظي

-العلوية: شسوا هالططوة ما يتوب جعيفر الا ادوس بفاده

-انسي يمعودة تعودنا

-تعال يما تعال يبعد هَلي تعال انيمك بحضني اشبع منك گبل لا ترحون

ابتسمت على اسلوبها وياه استلطفت موقفها، خنست اصواتهم شوية ومالك حچى بهدوء شديد بس گدرت اسمعه..

-يمة عندي سؤال بس لا تفهميني غلط

-گول بعد امك

-جنات

-شمالها

-جنات ليش متعرف لهواي شغلات؟ يعني.. ماعرف شلون اشرحها بس كلشي متعرف للزواج

-اي واذا

-يمة حتى متعرف شلون يتكون الجنين وماعدها حتى فكرة عن الموضوع عبالها راح تحمل من لمسة بيوم عقدنا لزمت ايدها ورجلها بس حتى متروح تتعارك ويه فاهد وانوب شفتها وجهها اصفر وترجف تگول يمكن حامل!

-هههههههههههه يمة هاي بريئة مو ما تفتهم چا واذا تريدلك وحدة خبرة وملتحة

-لا لا طبعاً مو هيچ قصدي بس ليش معقولة ما دارسة هيچ شي هنا؟

-لا چا ليش درست وكملت سادس بس اكو ما يفهمن الا واحد يشرحلهن بتفصيل الممل او زلمتها يعلمها عقولهن بريئة ما يتخيلن شغلات بهذا العمق

-مادري غريب مكملة سادس ويكون ماعدها فكرة

-تريد اسأل ايوتة خليها تفهمك

-صدگ تحچين علوية؟!! ترديني احچي ويه اختها بهيچ موضوع حساس؟؟ اساساً ميهمني وماريدها تتعلم عوفيها هيچ احسن

-ياااااع چا شوكت نشوف خلفتك يما اريدن گبل السنة اشوف الفريخ بيدك

-دگعدي علوية يا فريخ

-چا ما نشوف بزرتك ملك ليش مو ازعل عليك ليش تحرم بت الناس من الخلفة وتربية جاهل

-يمة جنات صغيرة طفلة ومو مال تتحمل مسؤولية طفل خليها تربي نفسها بالاول وتكبر بعدين الله كريم

-اياااات وينچ ايااات

-ليش تصيحيهاا علوية شبيچ يمعوودة

-ايووته تعالي يمااا

-علوية اذا فتحتي الموضوع وياهة گدامي متشوفين وجهي بعد

-ولك مو جدامك ما تستحي انتَ انه احاچيها امشي غاد

ما سمعت ولا انتبهت الا لـ باب الهول تنفتح ويدخل مالك تصنمت بمكاني ازرزر بعيوني عليه بس هو ممنتبهلي بقى منطيني ظهره ويتسنط على محادثة العلوية وايات..

-العلوية: تعالي يوم اسألچ چم سؤال

-ايات: تفضلي علوية

-العلوية: هنادي حاچت جناوي وعلمتها على سوالف الزواج لو بعدها؟

-ايات: هاا..؟؟

-يما لا تستحين صح انتِ ما متزوجة بس عاقلة واعرفچ تفتهمين ورزنة بس جاوبيني هنادي مرت ابوچ العار حاچتها لو بعد؟ انه ماگدر اسئلها ما احاچيها هالعايصة

-لا ما حاچتها

-واختچ ما تعرف شي؟

-اي متعرف

-چا ليش مو لازم تكون دارسة وتفتهم؟

-جناوي تطبيقي بيبي ما دارسة احياء بس بالثالث متوسط وما متعمقين مثل السادس

-هااا يعني ما تعرف الفرخة

-لا متعرف لشي

-چا شلون هساع

-مادري

-يله انه اتصرف يما لا تشيلين هم.. الله يرزقچ بالزوج الصالح بعد چبدي يا ايوته يالنازكة..

ثواني وصاحت العلوية لمالك يرجع طب وطلع وما انتبه لوجودي متت ضحك بس غلست، انتظرتهم لحدما كملوا حديثهم وراحو ياله رجعت لامي ورحنا كلنا سوه للصالون..

توقعت راح يكون الوقت كله فرح وونسة بس چان العكس تماماً كيان وجهها اصفر وترجف ومبين عليها خايفة من زواجها وجنات مبوزة ومتتحچه ومسرة متوترة گعدت بصفها الكوافيرا تمكيجها وهي سارحة وتفرك بيدها..

-صبا بهمس: شبيچ سرور

-مسرة: شنو

-شبيچ متوترة من الصبح حسيتچ مو طبيعية صاير شي؟

-اي

استأذنت من الكوافيرا تاخذ ريست كملت مكياج عيونها وگامت تروح للحمام وصاحتلي..

-صباوي شُهيب كاشفني

-شنووو

-اششش صوتچ احچي بالهمسة

-لچ شلون مسرة شلون كشفچ؟؟؟

-من البداية هو كاشفني ويدور ورايه حتى واحنه سوه يدرس كل خطوة وكل تصرف ويايه

-عزا العزاني مسرررة لا يدري بالخطة وتروحين ترااب

-مادري ميتة خوف اتصلت بأبوية بلغته تخبل گوم الدنيا ما گعدها گلي السبب منچ انتِ مفضوحة صبا اني مفضوحة؟

-لا ابد تصرفاتچ وياه طبيعية بس هو ذكي سرور اتذكر من گلتيلي هو المفضل مال ابوه ويلگفها على الطاير

-اي يصيحله نمري بس ماتوقعت راح توصل لهاي المواصيل وبليلة العرس يتعاطى ويجي يچفصها يمي

-يمممة انوب يتعاطي مخدرااات؟؟

-لا لا بس منطي جگارة ودخنها بدون لا ينتبه هسة مو هذا موضوعنا على الاغلب شُهيب ميتذكر شي من البارحة بس اني اتذكر كلشي ولو تعرفين شگد مأثر بيه كلامه گلبي جاي يتگطع

-تخافين لا يطلع يمثل عليچ وكل اليسوي مو حقيقي؟

-اي واني.. اني...

غصت بكلماتها ونزلت عيونها تضيع دموعها، حضنتها اهدأها واطبطب على ظهرها وافكر شنو هالكارثة هاي شلون راح نحل هالسالفة..

-مسرة: راح اكمل واشوف ليوين راح يوصل

-صبا: ماتوقعه يمثل عليچ سرور

-ليش تگولين هيچ

-لان كل ممثل يجي دور يبين بي وجهه الحقيقي بس شُهيب حتى من يطلع وجهه الحقيقي ميطلعه عليچ، يخاف عليچ وميقبل تشوفي بصورة مو حلوة لا تتشوه صورته گدامچ، سرور هموسچ يهتملچ لدرجة حتى نبرة صوته تتغير من يحاچيچ وعيونه كلها حنية وعطف مستحيل هذا يمثل

مسحت الدمعة الخانتها ونزلت خفت لا يخرب مكياجها وكملت بنفس النبرة الهامسة..

-انتِ بنفسچ گلتيلي ماكو واحد يحن عليَّ بگده ولا اكو واحد يخاف على مشاعرچ ويعاملچ بهاي النعومة غيره وبدون لا تحچين اني مو عمية وجاي اشوف كلشي شگد طيب ولطيف

-البارحة گلي اتمنى متكسرين گلبي لان بديت اتعلق بيچ

-صحيح وهذا الي الكل ديشوفه، يجوز صح يدور وراچ وحقه يريد يتأكد قبل لا يدخل بعلاقة عمل او صداقة او زواج كل انسان يدور وره الي راح يكمل جزء منه لا تزعلين يا روحي وكلشي بالايام يبين

-صح

-يله حب اليوم عرسچ ولو هو على ورق بس ميمنع هالشي تتونسين وترگصين وتفرحين وتغيرين جو تبقين ملكة اليوم وكل الانظار راح تكون عليچ ماريد احد يشوف الانكسار بعيونچ ولا نظرة الزعل اريد الكل يشوف الواثقة بنفسها مسرة قيثارة!!

ضحكت وبينت اللماستها ضحكت وياهة وتحاضنه حضن خوات ورجعت تكمل مكياجها بعدما تغير مزاجها بالكامل، عيونها ضحكت ولمست الفرحة بصوتها البده يدندن ويه الاغنية وتسوي واهس لـ كيان وجنات والباقيات..

وگفت فيروز وگابلتها هدى يرگصن بنص الصالون وجروني وياهم.. انضمت جولي ومكياجها عافته على النص وسحسلنا تسنيم گوة قبلت ترگص گضتها حرام وميصير..

تغيرت الاجواء والعرايس اخيراً فكت عگدة حاجبهن وبدت تبين علامات الفرحة والليونة.. بس اني عقلي وبالي ويه كلام مسرة ماعرف شلون طلعت هاي المواساة مني واني بداخلي جاي اطگطگ، لو طلع شُهيب فعلاً يضحك عليها ويلعب هاي كارثة.. كارثة حقيقية!..

**

-عرريس اخونااا الليلة عريس اخووناا الليلة

-شمع وورد نهديييله.. عريس اخووونا الليلة

وگف فاهد بنص المحل يهز چتف ورگبة ويه ولد عمه (قصي، خالد، جلال و غياث) ذولة اقرب شي عليه اشوفهم ونفس الهيلگة والخبال والعضلات والروح المسودنة..

-جلال: كككلللييييييييييييشششش

-غياث: ولك هي كللللووووش مو ككللليييش

-جلال: انچب نفس الشي المهم جاي اهلهل للعار

-قصي: والله ما يستاهل اتعب لساني واهلهل علموده بعلي راح اطلعها باليوتيوب احسن

فتح هلهولة مصرية باليوتيوب وعلگها خبصنا خبص، اجاني غياث ومد التلفون الي يگول..

-غياث: نشوان بشرفك غيرها بين ما اللبس القميص

-فاهد: ولككك ما اسمحلك تتأمر على اخو مرتي

-نشوان: اهوووو بدينا بالخرط

-فاهد: شبيك شوشو احنه هسة نسايب عيب تگول عليَّ خرط

-نشوان: اني لوما فاضل وشُهيب ما اجي هنا واعكر مزاجي

-فاهد: يتعجر مزاجك لان اليوم اختك تنام يمي؟

-نشوان: يااااااااا عااااااااار

تكامشت وياه اريد اللوحه ببوكس اغير ملامح وجهه وفاككنا مالك..

-مالك: حتى بيوم العرس تتعاركون!!!

-نشوان: خلي هالعار يدعببل ما طايق اشوف چهرته السزز

-فاهد: شوف مالك اني معليه هو جاي يتجاوز لان تزوجت اخته واليوم انيمها بحضـ.....

لصم حلگه مالك وشمره على غياث وجلال..

-مالك: اخذووو هالزعطوط من وجهي

-فاهد: مشاعري العضروطية جاي تتأثر

-جلال: حتى مشاعري

-فاهد: شبيك يغارون لان راح اتزوج كوري

-غياث: صار بنفسي اشوفها

-فاهد: انچب لللللك ما اسمحلللك اطططيح حظك اذا عدتهاااا شرررفي هاي عرررضيي اغاار

-علي: ما گال اريد اگرط كوري گال اريد اشوفها

-فاهد: طااايح الحظ انتَ منووو وتجيب اسم مرتتييي على لسااانك الوصصصخ المليااان خ***

-جلال: عيب شباب انچبو لحد يتجاوز حدودة كافي

-قصي: يا بني ادددم اسمها مو كوووري

-نشوان: اي ميهم انچبو زوجها ميقبل تجيبون حتى طاريها عفية فاهد

-فاهد: لعد شلون ضلعي هاي كوريتي اشگه اليجيب طاريها

-مالك: المبالغة العدكم تلعب الروح

-قصي: ولك غياث ما شفت جنات البارحة غير شگتني شگ اني ما شايف هيچ بنية

-غياث: انتَ شايف العيون اويليي تدووخ

-جلال: رعطت ام امي گ....

ما كمل جملته واجاله بوكس طاير من مالك اندار على قصي وغياث كلمن ينطي بوكس وشردو يضحكون الادبسزية..

-مالك: عااارات ادبسزززية وين تشردوون وراكم وراااكم طايحين الحط ال****** ال*******....

نزل فشاير ومسبات حتى بغير لهجة اظنها مغربي لان كلشي ما فهمت وفاهد فاطس ضحك ويهز برگبته..

-فاهد: هاا هاا منو يبالغ هسة

-مالك: لعد حچيهم عن كيان مثل حچيهم على جنات؟؟؟

-فاهد: ماسمحلللك تگول اسم مرتي على لسانك ماالك احترم نفسسك

-فاهد انچبببببببب

دفعه متنرفز وهذا بس گاضيها يضحك، ذب نفس متنرفز ونزع قميصه يبدل واني هم رحت ابدل كلنا بغرفة العار فاهد ببيت ابوه مو غرفة تگولون قلعة شكبرها..

-مالك: وينهم اخوانك وفاضل؟

-نشوان: طلعو بشغلة وراجعين

-فاهد: وانتَ شعجب ما رحت وياهم

-نشوان: لان شُهيب گلي ابقى هنا احرس الچلب فاهد لا يسويلنا مصيبة

-فاهد: ها شعجب عادةً مالك يحرسني

-نشوان: مالك هستوه اجه والحمدلله خلصني منك اني رايح

-مالك: لا نشوان لا تروح كمل تبديلك ونطلع كلنا سوه

بنفس اللحظة انفتحت الباب ورجعو شُهيب ومروان وفاضل ودخلوا وياهم ولد عمهم الادبسزية الي تحارشو بخطيبة مالك متخبين بظهر شُهيب ويضحكون..

-مالك: ذولة الزبااايل ماريد اشوفهممم

-شُهيب: تندموا واجو يعتذرون

-مالك: لو يبوسوون رجلي هم ما اقبل اعتذارهم برااا يله ولد الكلب برررا

-غياث: سوينا العلينا فاهد افزعلنا ولك

-فاهد: مالك عوفهم اني گلتلهم يضوجوك

-مالك: انچبب واكل نعل وقناادر واطلع وراهم

-حلال: فاهد ما تحچي نعال بگصتك

-فاهد: اهووو شبيك متتحمل انتَ اني گلتلهم يدوسون وياك حتى نطور لهجتك العراقية حبيبي

-نشوان: تطور خايس مثلك لا جديد

-مالك: ولكم تلعبون على اعصاابيي

-قصي: على الاقل طلعنا العرج العراقي عندك مالك

ما قصر مالك نزللهم نزلة ونص بالمغربي يغرد عليهم وفاهد كل شوية يندار عليهم يترجم ويگلهم حمى زايد وهاي مسبات من العيار الثقيل حتى ابهاتكم حرگهم بالفشاير..

-غياث: يلا يستاهلون النغولة

-جلال: اي والزهرة مالك كثرلي كم فشورة مرتبة على ابوية

عبرهم شُهيب يروح يبدل واحنه هم وياه، مروان ماله علاقة بأحد ميسولف وفاضل المسواك بحلگه يفرك سنونه ويستغفر..

-فاضل: استغفر الله اكو ناس تستمتع بالكلام البذيء

-نشوان: ادبسزية وطايحين حظ العياذ بالله

-مروان: نشوان وين سترة البدلة مالتي؟

-نشوان: هاي هي فاكهة حياتي.. شُهيب ما فهمتونا كيان راح تروح شهر عسل لو لا خلوني احضر دموعي من هسة

-شُهيب: حسب علمي لا متروح لان عدها جامعة

-فاضل: وانتَ حبيب هم تروح ويه مدامتك؟

-شُهيب: لا عدنا شغل

-فاضل: شبيك شُهيب وضعك ما عاجبني ماذا دهاك

باوع لـ مروان حسيته ميريد يحچي گدامه انتظره لحدما راح للحمام يسوي شعره ياله اللتفت علينا وگال..

-شُهيب: فاضل عندي سؤال اني جاي احلم احلام غريبة هالفترة هم يتحققن لو يعتبرن اضغاث احلام؟

-فاضل: مادري حسب الحلم وحسب ساعته اكو احلام مخربطة وتكون متداخلة هاي تعتبر اضغاث احلام

-شُهيب: حلمت بمالك ومسرة رايحين يشترون كيكة سوه وراحو يحتفلون!!

-فاضل: حبيب هاي مو بس اضغاث احلام هاي غيرتك نبصت بنص الحلم

-شُهيب: والبارحة صار شي غريب مادري هو حلم لو حقيقة بس مستحيل حقيقة على التچفص الچفصته واني اتذكر ما شفت مسرة البارحة مو نشوان ما شفنا البنات؟

-نشوان: صح ما شفناهن بس بالليل كيان حاچتني بالحديقة

-شُهيب: همزين يعني حلم

-فاضل: شنو صار بالحلم

-تچفيص بتچفيص وعاتبتها ليش راحت تشتري ويه مالك كيكة وبعدين گعدت اتغزل وهي تگلي اللبس فيونكة ماحب الرباط

-فاضل: اممم اظن بي تفسير هذا

-شُهيب: صدگ؟؟ شو اني اشوفه خرط

-فاضل: نعم نعم تفسيره راح تنرزق بطفل قريباً

-شُهيب: فاضل لا تلعب عليَّ

-فاضل: شُهيب روح طم روحك على هاي الاحلام الخايسة ناس تحلم تشتري بيوت وقصور تلگه ذهب، تخلف، تتزوج، تشوف ثعابين وامور اخرى لا الاخ هنا يحلم رايحة خطيبته تشتري ويه اخو كيكة

-نشوان: بله الكيكة چانت ككو لو بيضة؟

-فاضل: نعم گللنا حتى اعرف افسر عدل يا ترى راح تجيك بنت ام ولد

-شُهيب: شگد تافهين

-نشوان: هسة شنو راح تلبس فيونكة لو رباط

-شُهيب: رباط

-فاضل: واذا طلعت تحب الفيونكة؟

-شُهيب: لا ماتوقع شخصيتها مال فيونكة...

**

"كيان"
وصلنا للقاعة ودخلنا لغرفة التبديل نرتب نفسنا، گلبي مقموت وميتة خوف شگد حاولت اعدل ملامحي وما ابين روحي ضايجة او خايفة بس بالاخير فشلت من قرب وقت العرس..

اكثر شي موجع گلبي مو لان راح اتزوج فاهد هواي تزوجن زواج تقليدي ونجح ولا لان فاهد مسودن وغريب هوايه تغيرو بعد الزواج بس الراح يموتني قهر تزوجت اخو الاحبه وراح اضطر امثل اني بخير ومابيه شي والوضع طبيعي عندي.. والاتعس الاحبه اليوم هم زواجه وراح نتلاگه بمشاعر باردة من طرفه ومشاعر متوهجة وتقطر جراحة من طرفي..

-جنات: ما جاي ينلبس البرگععععع

صاحت بـ جزع وعيونها مغرغرة بدموع اعرف سبب جزعها مو البرگع ولا ليش ما رهمت تسريحة لشعرها بسبب قصره واضطرت ام الصالون تسويله فيكة بس بالگذلة لفتها.. سبب بكائها لانه اليوم عرسها واختها الي بمثابة امها متحچي وياهة والأمّر من هذا راح تتزوج بالاكراه من ابن عم التحبه جاي تشوفون التعاسة؟

هدأتها اواسي بيها واواسي نفسي بنفس الوقت، رتبت البرگع على راسها يناسب تماماً بدلتها نفس الموديل.. بدلة جنات منفوخة بـ تول مثل بدلات الاميرات، صدرها وظهرها مفتوح وصدرها كله شغل بـ لؤلؤ صغير ولمع ناعم مو اوڤر وتنزل بـ نفس اللمع الناعم للاطراف والبرگع نفس الشكل.. مكياجها بسيط كلش ام الصالون ماقبلت تحطلها شي ثگيل گالت هي حلوة من الله ولا نخرب جمالها اكتفت بمكياج وردي فاتح لطيف جداً وفيكة حلوة بگذلتها شالت جزء منها وسوت الباقية كيرلي مفتح..

حطيت مالتها البوكيه الوردي بيدها واخيراً جهزت جنات وطلعت اول وحدة من المنزع تتحضر لجلسة التصوير قبل لا تجي الناس، توترت بالزايد من اجت فيروز تستعجلني اني ومسرة وتگول..

-اول واحد يدخل مالك ياخذ صور ويه جنات لانها محجبة بعدين يجون فاهد وشُهيب حتى تاخذون صوركم بناات بسرعة كملو

حسيت صار عندي لعبان نفس من الارتباك گمت اطگطگ، باوعت لروحي اتأكد من ترتيبي وعدلت بدلتي البيضة، مابيها تفاصيل هوايه عبارة عن بدلة ستن ثقيل منفوخة بنفخة بسيطة وبيها فيكة من يم الخصر دانتيل ورد ناعم وتنزل سادة على طولي بس الشغل كله بالبرگع يخبل اول ما شفته انبهرت بي كله عبارة عن ورد ناعم نفس الموجود بالخصر وطبعاً اختيار البدلة چان ذوق مسرة بوكتها اخذت رأيها بوحدة عجبتني وگلتلي هاي احلى واخذتها..

حبيت يبقى شعري مفتوح كيرلي وتشده الي من وره بشي بسيط ولبست تاج مرصع بكرستال ناعم، مكياجي بسيط نفس جنات ميلوگلي مكياج طوخ، ضلال گليتر فضي على جفوني وايلاينر بسيط وكحلة وحمرة لا هي وردي ولا احمر صاير اللون بالوسط بس كلش عجبتني وام الصالون گالت مكياجي نفس الكوريات لان يلوگ لملامحي..

كملت ترتيب نفسي واخذت البرنص الاجيت بي لان البدلة صلوخ حطيته على اكتافي وطلعت ويه مسرة الي غطت نفسها بـ برنص ام صبا لبستها..

گعدنا بالقاعة اني ومسرة وفيروز وصبا وهدى الباقين ما سمحولهم يدخلون هسة الا ويه المعازيم يجون، جنات واگفة على جهة تاخذ صور انفرادية واني والبنات نسولف بجمال القاعة ونزاكتها..

-صبا: ولچ مسرة العراق شگد متطور تذكرين عرس بنت عمتي وين سووا

-مسرة: اي هاي بـ 2013 اجينا لعرس بنت عمة صبا القاعة تخزززي الكوشة تفشل فد انقهرت على العروسة بالبداية بس بعدين شفتها مقتنعة وفرحانة وهذا المهم

-ههههاااهههاااههاااا تعال مَلك تعال ابوية لا تستحي

اللتفتنا على صوت شمسون الغثيييث وهو يشجع بـ مالك حتى يدخلون، طبوا سوه وشمسون الوصخ صار يصفگ ويصوفر من شافنا..

-شمسون: واااااو واااااو واااااو شنو هذا الكيك هنا الله يساعد ولدي اليوم هههاااههاااهااا

-كيان: يمة يوغف على الگلب

-مسرة: راح اتقيء

-فيروز بهمس: تره هذا عمي

-كيان: عززه شگد عيب نسيت اسفة

-فيروز: عادي عادي هو حموضة احچي عليه ما اهتم

-هدى: چنت احبه بس وره فصلهم الناقص ويه ايات وجنات كرهته

-صبا: اني بس اريد استوعب الصلافة والجرأة وهو يبدل بين الخوات بآخر لحظة

-شمسون: ااااااه يا لجمالكِ السومري ونظرات عينيك البابلية

وهذا الغزل چان موجه لـ مسرة القرفانة ولصمته بأبتسامة تلزيگ حتى يعوفها..

-شمسون: نظرات عينيكِ الآسيوية اهلكت قلوبنا كياني

وهاي الي، ابتسمت واندار على جنات رفع ايده وگال وهو يغمز لـ مالك..

-شمسون: "يبو طول الحلو
بوصفك تعبت الناس
من شيل الحسن
ما تعب حيلك؟!
بقالب هالبشر
الله حط عيون
وانت بقالبك
بدرين منطيلك.."

المصورة: هههههه الله الله شلون عم فرفوشي انتَ عمو نيالهن چناينك

-مسرة بهمس: انچبي لوگية

-شمسون: حبيبتي انتِ مصورتنا الجميلة العزيزة اريدچ تدللين ولدي بالصور اريد صور كلهن اغراءات واثارة اريد يقشعر جسمي من اشوفهن واسترجع ذكريات عرسهم

-هدى بهمس: خوب گول تريد فلم +18 وخلصنا ليش مستحي عمو

-الصورة: من عيوووني الثنين يله بيمن نبدي؟

-شمسون: بـ فاهد وكيان نبدي مَلك استريح هنا وليدي جنات اذا تردين تلبسين حجاب روحي عمو

گلبي گام يدگ دنابگ من الخوف حتى رجليه بادت ماگدر اوگف عليهن من دخل فاهد يوزع بوسات بالهوا للمعازيم الوهميين ويگول..

-فاهد: شكراً شكراً بلا تصفيق رجاءاً حبايبي احبكم جميعاً نلتقيكم غداً

-شمسون: يله فهدي يله بابا

-فاهد: الله هاي شنو كوريتي شطالعة تشگ ششششگ

طلع مالك يعوفنا وفاهد وگف مقابيلي مباشرةً ولزمني من خصري يسحبني منه، نزعني البرنص ورفع كف ايدي وطبع قبلة خفيفة عليه غمزلي وهمس..

-احب ريحتچ

-حبتك سليمة

-احبچ كلش

-باع الچذب

-صح بهاي چذاب

-فاهد شايف لو سويتلي حركة سخيفة گدام ابوك واخوك احرگك وروح امي

-الله اموت على الحرگ

-فاهددد

-كياننن

-فاهد لا تعيب عليَّ مشكولة ذمتك تسويلي شي وتحرجني اموتك بيدي اطيح حظك اسويلك وشوم جديدة بجسمك بـ...

-بـ قُبلاتچ؟

-ايعع الله ياخذك ولك ايييع وخر عني

ضحك بصوت عالي وجرني للستيج حسب اوامر المصورة، اخذنا كم صورة حلوة مابيها شي ولا شغلات سخيفة لحدما بدت تترعن الحقيرة وتطلب منه يلزمني من خصري لو يقرب وجهه من وجهي واخر فكرة سخيفة توصلتلها هي..

-بوسها عريسنا

-كيان بهمس: على خدي اشعلك لو بغير مكان

-فاهد: يله ميخالف نضم ذيچ بعدين

باسني على خدي والمصورة اعترضت وشمسون يضحك ومكيف..

-المصورة: ابوك يريد شي مغري بوسها بوسة عشاق عيني عريسنا

-شمسون: اي يله بابا تحركو ما جاي احب حركاتكم، مَلك اطلع باباتي خليهم ياخذون راحتهم خاف مرت اخوك تستحي منك

-مالك: تمام

-فاهد بهمس: اجيبلچ نايلون يعزل؟

-كيان: النايلون ضمه اللفك بي واطمك بگبرك

ضحك بصوت عالي وبحركة مفاجأة دنيئة وصخة جرني وباسني بقوة، فكيت عيوني على وسعها اريد اتحرك ماگدر مقيدني لازمني من متوني بقوة حسيت اصابعه طبعن بيه، گلبي گام يدگ بقوة، ارتبكت وحسيت بجسمي يرجف وانفاسي انقطعت لحدما ابتعد مني يضحك والمصورة مستمرة بالتصوير وتشجع بينا..

-كيان بنتر: اني اعلممممك فااااهدددد

-شمسون: هههااههاااههها ميخالف ميخالف تستحي چنتي

-كيان بهمس: والله حسابك بعدين اني الك حقير نذذل زبالة

-فاهد: جري نفس كياني بعدچ متأثرة و تلهثين وانتِ تحچين حتى عيونچ بعدها ذبلانة

درتله ظهري ارجف واهفي على وجهي، اجوني مسرة وبقية البنات يهدأوني ومبتسمات عبالهن خجلانة..

-فيروز: ههههههه درنا وجوهنا والله ما شفناكم بس هدى السافلة باوعتلكم

-هدى: تخبلووون ومنظر يجنن مستحيل افوته شكررراً عمو شمسون رجعت احبك فديتك

-مسرة: you guys are such a cute couple

ابتسمت بوجههن اتحكم بأعصابي، كملتلي المصورة بعض الصور الفردية وبعض الصور فاهد ويايه وفد خبيييث يمة يمة گلبي شلعه ساعة يجر بشعري وساعة يخربه وساعة يگلي بوسيني خلي يصير طبع حمرة على خدي حتى اصورها وانزلها ستوري اغور حمرتي يمكن تشوف الستوري ماعرف منو هاي حمرته بس هوواي هووواي يذكرها..

اخيراً بعد عشرطعش ساعة كملنا جلستنا وره ما انهد حيلي واجه دور مسرة وهموسها، دخل شُهيب ولا ارادي الكل ابتسم على ردة فعله وهو يشوف مسرة عيونه تلمع برغبة، بحب ولهفة، عيونه بيهن حچي ميحتاج يگول شي ولا حتى يسلم بس مع ذلك شُهيب جنتل مان وتقرب منها لمس كف ايدها وطبع قبلة خفيفة عليها فوراً اخذت الصورة المصورة من جمالها وجمال نظراتهم خصوصاً بعدما گال بصوته الهادئ الوقور..

-مبارك علينا ماي ليدي

ضحكت من غطت فمها واندارت على جهتي وجهة جنات الملفلفة نفسها بالبرنص وگالت بهمس..

-مسرة: الخفيفة تسرسحت

بقى منحني منتظرها توگف بجانبه وهي ما تأخرت بسرعة گامت ولفت ايدها بين ايده وراحو للستيج..

-شمسون: اييه دور نمري هسة، مصورتنا اريد شغلات مغرية يشوفوها جهالهم بالمستقبل ويتونسون عليهن

-شُهيب: شغلات مغرية يشوفوها الجهال؟ هاي اول مرة اعرف الجهال مسموحلهم يشوفون هيچ امور تخدش برائتهم

-شمسون: ميخالف بابا سماح انتو اهلهم چا همه شلون اجو للدنيا هههااههااههاا

-المصورة: ههههه يله عيوني عرساننا اريد حركة حلوة منك نمرر

-مسرة: اسمه شُهيب مو نمر!!

-المصورة: ههههههه اوكي حبي كلشي ولا تزعل عروستي يله شُهيب انتَ تبدي

وگفوا على جهة حتى ميبينون گدام فاهد وبدوا ياخذون صور بس حركتهم لينة ويه بعض عكسي اني وفاهد بيناتنا حقد وكره همه شفت بيناتهم خجل وتوتر ولمسات مبعثرة لا ارادي اليشوفهم راح يتنهد بـ حُب..

-المصورة: انزع سترتك حبي

-مسرة: نعمم؟؟؟؟

-المصورة: هههههه يمعودة بس سترته على كيفچ

-مسرة: تعليقي على كلمة "حبي" هاي شوكت صار حبچ حبيبتي؟

-شمسون: اااااه احب الغيرة

-المصورة: اسفة حبيبتي مو قصدي بس كلمة طلعت مني لا ارادي حتى العريس القبله فاهد هم گتله وزوجته ما اعترضت

-مسرة: تمام ما اختلفنا بس اني ماحب وحدة تگول لزوجي حبي رجاءاً

-المصورة: على راسي حبيبتي اعتذر

ابتسمت مسرة ورجعت تكمل جلسة التصوير سمعتها تدردم شي ويه شُهيب وهو يضحك تمنيت اروح بنصهم واسمع واجتني الفرصة على رجليها من المصورة طلبت مني اللزم برگعها من وره علمود الصورة، وگفت وراهة واسمعها تگله..

-خو انتَ كيفت

-شُهيب: هههه ليش اكيف هسة هي منو واهتملها

-ديلا خوش

-مسرة صدگ چذب معقولة زعلتي؟

-لاااااع

-يا ستار هههههههههه

-ليش تضحكك

-لان وجهچ صار احمر وايدچ ترجف ما توقعتچ هيچ تغارين

-اغار على كلشي مربوط بيه شُهيب حتى لو ماحبه خلي هالشي ببالك!

-تمام مچنت اعرف بهذا الشي

-وهسة عرفت

-خلص هذا هو وصلت الفكرة كلشي ولا تزعلين

-ما زعلت وشكراً على تفهمك

-تدللين عليَّ

باس راسها بطلب من المصورة ابتسمت هي والمصورة طلبت منها تحاوط رقبته، سوت الحركة وعلى وگفتهم گلتلهم يتقربون ويباوعون واحد بعيون الثاني.. سووها بس التوتر يقره الففف مسرة ارتبكت وباوعتلي غمزتلها اشجعها وهي ضحكت تكمل الجلسة..

-شمسون: ملل

-المصورة: ها عمو ليش؟

-شمسون: وين الاغراءات؟

-فاهد: هاي اخراءات يابة

-شمسون: صحيح يله نعوض بـ مالك

-جنات: لااااااااا صخام ولطام بوجهيي شلون حظ خاييث

-فيروز: يعينچ الله يعينچ الله

-المصورة: ميهم عمو نعوض بـ مالك بس بعدهم شُهيب وغيورته هنا شنو تحب يسوون حركة ببالك؟

طلع جگارة شعلها والمصورة اعتذرت منه وطلبت يطفيها لان ممنوع، رفع بس عيونه عليها بخزرة بسيطة جداً خلاهة هم تعتذر لان اعتذرت وهم تعتذر مرة ثانية وتسمحله يكمل تدخين..

-شمسون: امم، اريد اشوفها بحضنه

-مسرة: مستحححيل

-شمسون: يله عمو خلصونا خلي نجيب مالك يريح گلبي

-كيان: يسويلك فلم اباحي هنا؟؟

طلعت من حلگي عرفت بروحي چفصت چفصة بكبر راسي من خزرة شُهيب ظليت لا اخذ ولا انطي من شمسون گال بغمزة..

-عيب عمو هاي السوالف عود بعدين

-فاهد: نعست

-شمسون: حتى اني يله نمري ونمرته روحوا هناك اخذو الوضعية واني وكيان نجي وياكم لا يظل بنفسها الفلم.. اقصد اللقطة

دگيت رجلي بالگاع وجرني وياهم اروح اشهد اللقطة الرومانسية الحماسية، گعد شُهيب على كرسي مَلكي ماروني والمصورة گالت لـ مسرة تگعد على فخذه وتحضن رگبته وتقرب وجهها منه..

-مسرة: شسالفة ماريد!!

-شُهيب: خلص لا نسوي شي هي ما مرتاحتله

-شمسون: احنه نريد يله نمري، يله حبيبتي عمو لا تخليها بنفس زوجچ

عارض شُهيب ما راضي يضغطون عليها بس هي اخيراً وافقت من كلام وتشجيع المصورة وشمسون.. سوت الحركة ولفت ايدها على رگبته اخذتلهم ستين صورة بس بهاي الوضعية لعبت فلك المصورة رادتهم يدگون انوفهم ويه بعض ورادت وضعية حميمية ووضعيات رومانسية اخرى طلعت روحهم ياله عافتهم..

اخيراً صاحو لـ مالك طلعو اخوته وشمسون اختصر كلشي على الكل وگال..

-مَلك لا تشلع گلب المصورة وسوي كل التگوله اريد هالمرة هو بحضنها

-جنات بصياح: وييييين يكفيييي

-شمسون: نرهمها نرهمها لا تخافين...

**

"جنات"
لطمت لطم لو بيدي انزع البدلة واتصلخ واهج منا بعباتي، جروني جر يسحسلون بيه لنهاية القاعة وجابولنا فروة گعدوني عليها ونفشو بدلتي بالگاع..

گلبي راح يوگف احس راح انهار بأي لحظة، رادوا ينزعوني البرنص بس لو اموت ما انزعه وعمي هنا قبل شوية ما اهتميت لان بعيد عليَّ ميشوفني زين بس هسة هو فوگ راسي..

-مالك: يابة اطلع جنات تستحي گدامك

-شمسون: راح اطلع بس اذا ما سويتو الصور تعرف شسوي مالك

-مالك: تمام تمام روح هسة

طلع ابوه الططوة وحبيت شلون گله اني استحي رغم ما حچيت وما بينت احترمت هالنقطة، اندار عليَّ وگال بسرعة بسرعة..

-خلينا نخلص هالجلسة بسرعة جنات حتى نرتاح ماشي؟

-اثتحي

-ميخالف اعتبريني أي شي گدامچ

-حتى لو اعتبرتك ططوة؟

-ما جاي افتهم شنو هاي بس ميخالف

هزيت راسي اي وكملت المصورة ومساعدتها يعدلون ببدلتي، اشرت لـ مالك يحط راسه بحضني وعلمته شنو يسوي وراهة گمت ارجف اطرافي والدم يبس بجسمي من تمدد وراسه بنص حضني ورفع انظاره يباوعلي واني لازم انزل عيوني عليه..

التوتر يقره مو الف مليووون عندي روحي راح تطلع من الخجل معت وسحت، طلبت اتلمس لحيته واللعب بيها شوية علمود الصورة ايدي ترعش ماگدر اسوي أي شي لان متثبت، هو لمس ايدي على كيف وحطها على لحيته وايده فوگ كف ايدي..

-مالك: بقى شوية ونخلص لا تتوترين

هزيت راسي وكملنا اللقطة ارتاحيت وتوقعت خلصنا بس مصورتنا ادبسزززز ومتشبع هالمرة رادتني ابوس گصته من جيرة بگصتچ يالمصورة الخايسة..

حطيت شفايفي على گصته بدون لا ابوسه واخيراً گالت گومو كملنا، كيفت لو بيدي اطير بس اجه الاطگع ورادت صور ثانية گمت اللطم لطم افغاني بمكاني وادبچ عمارچي هم..

-المصورة: عروستك حلوة استغل الفرصة بوسها عيوني هههههه

ابتسم بدون تعبير وما قبل يسويها لان اني ما قبلت ما لح وگللها غيري اللقطة بس لطشت الا تسويها واذا كلش كلش تستحون سوي نفسك دتبوسها بس علمود الصورة..

باوعلي يستأذن مني بنظراته اصلاً حتى ماگدر اغرد روحي رايحة بأي لحظة احس راح يغمى عليَّ، شگد محتاجة ايات شگد اريدها هسة شگد محتاجة احد يوگف ويايه ويساعدني يمر هاليوم على خير بس للاسف..

لزم ايدي ثنينهن وحطهن على صدره، نزل نفسه على وجهي من الخجل ماگدرت ارفع عيوني واباوع بعيونه كزبرت والتوتر غزى قلبي من همس بيني وبينه..

-تعجبني البنية العفيفة

رفعت عيوني اخيراً لتوازي عيونه، شد على خصري وقربني منه اكثر ..

-ما اشوف هواي محتشمات وعفيفات بعالمي بس كلما اشوف وحدة انبهر بيها

-انتَ و...

-هههه ما جاي اتغزل بيچ لا تغرديلي هذا مدح

-احم شكراً

-العفو آنستي

ابتسمت ونزلت عيوني ختم الجلسة بقبلة على ايدي وطلع من القاعة، رجعنا للمنزع واخيراً نزعنا البدلات البيض ولبسنا بدلة ملونة مالتي لونها بنفسجي طوخ مخصرة على طولي فيروز ماتت عليها ورادت تشتريها بس من شافتها عاجبتني حلفت الا اني اخذها والعلوية اشترتها الي..

طلعنا للمعازيم وبده الردح والرقص اجت ملا وقرت لكل عروسة والا يجروها بالوسط ترگص گدام الناس.. لو چنت بغير وضع اخذ العرس طول بعرض برگصي وروحي المرحة القديمة لان اموت على شي اسمه اعراس بس هسة كلش نفسيتي متساعد ورغم هذا رقصت على الخفيف..

هوسات واهازيج وناس فرحانة مشى العرس بشكل حلو بدون أي مشاكل وفرحت من ايات اجت ترگص ويايه وحضنتني ودعتلي بالسعادة صح وجهها ثگيل عليَّ بس مو مهم تبقى اختي وامي الربتني..

قربت الزفة الساعة عبرت التسعة ونص بالليل وبدلنا بالبدلات البيضة، صارت جلوتنا جماعية كلش كلش حلوة والملا توگف على عروسة عروسة وتقرا بجانب راسها..

اخيراً وگفت بوسطنا وعادت كلمات الجلوة وتمد بيها وموسيقى خفيفة مشتغلة وياهة تناسب الاجواء..

-الملا: أمينة في أمانيها
مليحة في معانيها

تجلت وانجلت حتى
سألت الله يهنيها

جبينها كالبدر ياضي
وريقها يشفي أمراضي

لها رب السما راضي
وأحسن في معانيها

كملت الجلوة وبدت تقره شي ثاني واشتغلت الدنابگ والطربگة، تقدمت على مسرة وجرتها من ايدها توسطها القاعة حتى ترگص والنساء يحيطوها من كل جهة متفاعلين وياهة..

فقرة مسرة چانت احلى فقرة رگصها يجنن وكلها انوثة، ابتسامتها ما غابت وبدلتها رهيبة اكثر من وحدة اجت تسألها منين جبتيها وتجاوبهم للاسف مو من العراق هاي..

بدلتها اكمام طويلة ضيقة من فوگ وتنزل ذيل حورية تناسب تماماً والبدلة عبارة عن دانتيل من فوگ ليجوه البطانة مالتها بيجي فاتح من بعيد عبالك جسمها بس من تتقربون ياله تكتشفون هاي بطانة.. شعرها مرفوع بتسريحة عالية ومنزلة كم خصلة ضافت حركة مشاكسة تناسب مكياجها الترابي اللامع وحمرتها المارونية..

كلشي بيها مثالي هاليوم مثل تاجها الكرستال الفخم وحلقتها الالماس وردة فعل شُهيب من شافها كان احلى شي شفته اليوم غير كل مزاجي حلو من تتزوج من انسان تحبه وتعشقه وتنظرله نظرة تشرح مشاعرك بدون لا تضطر تحچي بيهن مو قصدي الا علاقة حتى لو حب خطوبة يبقى الحب حلو..

تتمايل بوسط القاعة ويه صديقاتها وام صديقتها صبا، دخلت العلوية تهوس بيناتهن وجرتني اني وكيان وصارت لحم الكل اجه يرقص والفرحة غامرة المكان..

قبل لا تبدي الزفة العلوية جابت هديتها، هدت كل وحدة من عدنا سوارات ذهب "پتوت" لبست مسرة وكيان وگالت بضحكة..

-اظن ماعدكم هالسوالف هناك وما تلبسوهن بس عجبوني وگلت ما اخليها بنفسي واللبسچن پتوت تونسن وليداتي بخراخيشهن

-مسرة: يخبلون بيبي عاشت ايدج

-كيان: كلش حلوات وحتى لو منلبس راح نلبسهم لانهم منچ

-جنات: اهووو بطلي لواگة يله علوية وين مالتي

-كيان: گبرر

-جنات: اليگبرچ يا فگر

-العلوية: هااع هااع هاي جدامي ياالعايصات

-كيان: بيبي هي بدت

-جنات: هي زعجتني

-كيان: اني اعلـ..

-العلوية: وسممم كافي الله يساعدهم عليچن جابوچن مسودنات على گلوبهم

-جنات: همه مثودنين

-كيان: وططوات هم

ضحكت العلوية ووگفت بنصنا تاخذ صورة، استعجلونا كلش لان صار وقت يجون العرسان وتطلع الزفة يباااو شصار بيه راح اموت اي بعلي احس اقترب موعد اعدامي وراح ياخذوني للمذبحة هسة..

**

"مسرة"
لبست البرنص فوگ بدلتي وام صبا لبستني الكبوس فوگ شعري واجت تهمسلي..

-لبسي الكبوس حبيبة كله زلم بره ماماتي سرور والعيون راح تصير عليچ لا تصغرين رجلچ بيناتهم

-مسرة: تمام خالة

-فديتها العاقلة

بوستني وذبت شال على جولي وصبا خلتهن يلبسنه حتى لو بس يحطو على راسهن بشكل عشوائي، صاحو بالسماعة راح يدخلون العرسان الي تريد تلبس حجابها خلي تلبس..

خمس دقايق ودخلو ثلاثتهم واستقبلتهم العلوية وكل عماتهم ونسوان عمامهم وبنات عمامهم بالهوسات والگفلات القاعة انرجت رج بالهوسات والهلاهل والچكليت والورد الطشو عليهم..

وگفت وحدة من عماتهم بالوسط تهلهل وتهووس بشالها وعبايتها وتگول بصوت عالي..

-شهوووبي رايد راددته وعايف بنااات ولايته

اندارت على مالك وتگول بنفس الفرحة والهلاهل..

-ملوووكي طفييي اللالة تره عيووون چتالة

واخيراً على فاهد وگالت وره ما شمرت كومة چكليت عليه..

-زوجناااه الچان مسرربت... ما يرجع الا نص الليل كلللللووووش

-فاهد: موو حق هذااا شمعنى همه تقرولهم حلوو واني وين ماكو گفلة خ** ومسربته جبتوها عليَّ

-العمة: هههههههههه چا غير نحبك احنه عمة اروحلك فدوة

-فاهد: سكتي عمة سكتي فشختي راسي تفشخ بالچكليت

ضحكن عماته كلهن وهوسهن هوسة اخيرة قبل لا نطلع بصوت واحد..

-يا يممة فرشي مدتچ الليلة تجينا چنتچ....

اللتفت عليَّ شُهيب مبتسم واشرلي حتى نطلع، نزل نفسه قريب اذاني وهمس..

-شكراً

درت وجهي اباوعله وهو لسه منزل نفسه حتى يسمعني..

-على شنو؟؟

-على هذا

اشر على البرنص مبتسم ابتسامة ممتنة، ابتسمتله واني اتذكر كلامه البارحة شگد ميحب لبسي قبل واني چنت اللاحظ هالشي الغريب لان كلما اللبس شي ضيق او قصير ميعلق على ملابسي بس من اللبس سوت طويل ومحتشم او فستان طويل او شي عريض يگلي اليوم طالعة حلوة وفهمت سبب تعليقاته البارحة..

-هنادي: عيننني مو مغازل وبوس بالباب العالم تنتظررر

-العمة: ههههههه خليهم طيور الحب معليچ بيهم فديتهم

طلعنا للسيارات كل ثنائي بسيارة، بالباب ورصدت عيني واحد من بعيد واگف يباوع علينا واضح محد انتبهتله غيري او يمكن انتبهوله وغلسو عليه.. هذا ليث حبيب جنات!

وگفت بمكاني معصور گلبي عليه اجه يشوفها يطلعوها من باب القاعة عروسة لغيره؟ والمن؟ لابن عمه بالتحديد يا لسخرية القدر!!

طلعت العلوية جنات وياهة ومالك من الجهة الثانية يمشيها لان مغطين وجهها وراسها والبرنص وگوة دتمشي، بباب القاعة وگفت تلقط انفاسها ورفعت شوية من البرنص تحچي شي ويه مالك.. ثواني وصاح لـ اختها ايات عرفت تريد اختها حتى تودعها تسالمن بالباب والقهر والحظ الزفت جنات جمدت بمكانها وعيونها من وحدها گامت تذب دموع من شافت ليث من بعيد..

صارت تنحب وتبچي بحرگة بصوت مسموع الناس عبالهم تبچي على اختها ويواسوها ومالك هم ما منتبه لوجود ليث ويوعدها يجون زيارات للعراق حتى تشوف ايات والعلوية بس جنات بغير عالم وعيونها على ليث المكسور..

شفت فيروز وتسنيم هم انتبهن لـ ليث ولاحظت الكسرة بعيونهن، ماگدرت اعوف جنات الا اتأكد عليها تصعد السيارة وتكون بخير..

-شُهيب خليني نساعدها تدخل السيارة بدلتها چبيرة

-تمام براحتچ

رحت وياهة العلوية ما خلتني گالت روحي لسيارتكم وهي تساعدها بس گلبي وجعني عليها، صعدنا السيارة ورفعت البرنص من وجهها اشوف حالها بالضيم تبچي بقهر وتفرك بصدرها بقوة جلغته بأظافرها.. لزمت ايدها اهمس بيني وبينها..

-جنات اهدأي.. اخدأي لتخلين مالك يلاحظ لا يسوولچ مصيبة.. باعيلي حبيبتي بالچ يمي جناوي

باوعتلي بعيونها صايرات دم وكحلتها سالت شوية، نظفت جوة  شششعيونها شوية بأصبعي واهمس وياهة..

-الزمن كفيل بالنسيان جنات والله راح يعوضچ بالاحسن، حالي مثل حالچ بس بغير وضع اني بس گلبي هم جاي يتگطع بس احنه لازم نبقى قويات ومنسمح لأحد يكسرنا ويأذينا..

-ياريتني ميتة ولا شايفني بهيج وضع

ضربت على وجهها بأيدها بحرگة لزكت ايدها حيل وطلعت راسي من البرنص اشوف مالك واگف على جهة يحچي ويه العلوية وهي توصي..

-مسرة: ادعيله جنات انتِ مؤمنة وملتزمة اكيييد الله راح ينظرلچ ادعيله الله يمسح على گلبه وگلبچ ويعوضكم ثنينكم

هزت راسها بـ اي ماگدرت ابقى وياهة اكثر العلوية صاحتلي حتى اروح، تركتها وقلبي وياهة وهمست اخر جملة قبل لا اطلع..

-لا تخلين زوجچ يحس على شي مهما يكون يبقى رجل ومبين يغار عليچ استري على ليث لا يأذي

هزت راسها للمرة الاخيرة وعفتها، لزم ايدي شُهيب ورحنه لسيارتنا.. احنه سيارتنا سودة عالية ومزينة ببوكيه ورد احمر چبير على دعامية السيارة بالضبط نفس لون البوكيه مالتي واظافري.. صعدت وانتبهت السايق نشوان ضحكت فرحانة من اجينا للعراق لسه مدا نسولف ونلتقي مثل قبل كله من بعيد اشوفه ونتسالم..

-مسرة: ياا نشوان شبيك

انتبهتله يمسح بعيونه صايرات حمر مبين ديبچي، ما جاوبني وبقى مغطي عيونه بأصابعه قلقت وردت اسأل مرة ثانية وشُهيب لزم ايدي يستوقفني ويهمس..

-على كيان يبچي خلي

رقت ملامحي على حنيته اشوف يباوع لسيارتهم ويبچي بحرگة ومروان هم واگف على جهة يمسح بعيونه وره ما ودعها وبوسها ووصى فاهد عليها..

انطلقت السيارات نشوان هادئ وكل شوية يلتفت على سيارة فاهد وكيان بينما سيارات الباقين مشتعلة شعععل بالاغاني وجايبين فرقة كاملة تغني وتطرب بالطريق..

الاجواء حلوة كلش كلش حلوة وتونس وگفو بنص الطريق والا ينزلون العرسان يرگصوهم، جروهم جر ووگفو بالشارع سدو سد همه هوايه ولد عمهم كلش هواية يمكن فوگ الثلاثين ابن عم عدهم هاي من غير ولد عماتهم وكلهم مطربگين وفرفوشين ويضحكون ويحبون الوناسة..

توسطهم شمسون وعمامهم الباقين وصار الردح عراقي للگاع للگاع واصوات الزلم عالية بالهوسات وهلاهل النسوان الي تطلع من السيارات شعلت الاجواء شععل..

رجعو وره ما انترس الشارع والسيارات بدت تدگ هورنات لان عاقوا الطريق واصلاً الشوارع ازدحام كلش.. گعد شُهيب بصفي يضحك على حركات نشوان وكملوا ملاسنهم بالسيارة..

-نشوان: هههههههههه ولك هذا مخبل فاهد والله مخبل

-شُهيب: مروان راح ينجلط من وراه الكلب ههههههه

-مسرة بهمس: شسوه؟

-شُهيب: عناد بـ مروان يريد يضوجه گال راح انزل كيان ترگص ويانه هنا خطية خليها تتونس

-مسرة: متنلام كيان من تصيحله مسودن

-شُهيب: مخبل هذا وراح يخبلها

-نشوان بضحك: ههههههههه مروان يلزم لحيته ويگله هذا وجهي لو بقت وياك وتحملتك سنة

-شُهيب: ومالك يگله شدعوة سنة گول شهرين

-نشوان: وفاهد يجاوبهم انتو بس تغارون الا اخلف كوريين صغار اضغطكم بيهم الچلب فد مستفززز

-شُهيب: اني شگلتلكم؟؟ تحملوو خبالاته

نفخ نشوان متنرفز ويضحك بنفس الوقت وفتح اغاني بالسيارة يعليهم، گعد شُهيب بصفي عدل يفتح برباطه الماروني ابتسمت من شفته ما لابس فيونكة معناها صدگ ميتذكر شنو صار البارحة..

-مسرة: وينها خالة ماريا؟

-شُهيب: اخذتها عمتي وياهة

-مسرة: اخترعت مو اگول اني اللتهيت بالعرس وبالي مچان وياهة خفت

-لا لتخافين عمتي امان وما عافتها العرس كله

بعد مرور ساعتين من زفة صاخبة وبحضور بدون مبالغة اكثر من اربعين سيارة ورانة وصلنا للفندق.. نزلونا والفرقة ورانه تدگ لحد بوابة الفندق..

دخلت الفندق وشُهيب لازم ايدي يمشيني، اخذ مفاتيح الغرفة وصعدنا غرفتنا رقمها 37 وغرفة مالك وجنات 38 وغرفك فاهد وكيان 39..

ما دخلنا للغرفة وحدنا دخلو ويانه ثنين من عماته وثلاثة من بنات عمه يچيكون على الاوضاع، شفت عمته بيدها علاگة وهمست شي لـ شُهيب ما سمعت شتگول وما فهمت الا من شُهيب اشر بيده بطريقة "لا" وما قبل ياخذ العلاگة.. كررت العمة الطلب وهم ما قبل بقت تلح عليه لحدما قريت شفايفه يگللهه "هذا مو زواجها الاول" وما اسولفلكم على وجه عمته شلون صار وشلون فتحت عيونها على وسعها مصدومة..

لزمته من ياخة جاكيته ونترت شي بيناتهم بهمس وخازرته بقوة عرفته دتگله "شلون تزوجتها وهي مطلگة" ما احتاجيت اسمع صوتها بسبب جواب شُهيب من گال بصرامة..

-واذا وهسة؟؟

-العمة: ولك شلوون

-شُهيب: رجاءاً لحد يتدخل عمة!

وفعلاً اشرت للباقين وطلعو من غرفتنا بينما راح شُهيب للميز ينزع رباطه ويشمره متنرفز.. اني كلش قليل اشوف شُهيب معصب او بالاحرى ما شايفته يعصب الا مره او مرتين بس من يوم اجينا للعراق لحد هاي الدقيقة هو على اعصابه وضايج ومتنرفز وعرفت السبب اهل ابوه وسوالفهم..

نزعت كعبي ومرغت رجليه شوية بيدي، وخرت البرنص عن اكتافي وعيوني على شُهيب راح يوگف على جهة وفتح الشباك يدخن..

-اشهب شبيك

ما انتبهت على نفسي صحتله اشهب الا من گلته، ماعرف ليش من نكون وحدنا ومشاعري تتلخبط تجاهه يفلت لساني واصيحله اشهب..

-مابيه مسرة

-شبيها عمتك؟

-كلشي مابيها، تحبين اطلع علما تنزعين ملابسچ وترتاحين؟

-لا عادي بالحمام انزع مو مشكلة

هز راسه ورجع للميز ينزع ساعته وطباقيات قميصه، فتح اول ثلاث دگم من قميصه ظهرت وشوم صدره وخربط شعره العسلي المرتب هوسه بيده صار شكله يخبل ضافله لمسة مشاكسة..

انتبهت لروحي صافنة عليه مثل الثولة، انطيته ظهري بسرعة واخذت جنطتي ورحت اركض للحمام واخذت راحتي بالتطفر هنا ظليت اگمز على غبائي وتصرفاتي وياه.. انطيت لروحي راشدي اصحي نفسي ومديت ايدي انزع سحاب البدلة..

نزعتها بسرعة لان سحابها جانبي ما بهذلتني، فتحت الباب امد نفسي اشمرها بره مادري بي واگف على جهة ما اشوفه بسهولة يدور بجنطته على شي وياااابه على الموقف الي يفششل الصار!!

رفع راسه يشوفني واني مثل العوبة مادة نفسي گدامه احط بدلتي على كيف بالگاع حتى متخرب، دا ارجع ادخل بالحمام ورفعت عيوني وصرنا عين بعين عزززززززاااا بعينيي اي والله عززااا..

حمحم ينزل عيونه بسرعة واني طبيت بالحمام وگمت مو بس اطفر صرت ادبچ مثل العلوية على الخزي الصار..

بدون لغوة زايدة اريد اطفي نار جسمي فتحت الدوش على المي البارد وطبيت بي هو وتسريحتي ومكياجي، نزعت ماشات التسريحة جوه الدوش ومسحت مكياجي هم هناك ما راح زين واستخدمت المزيل على جهة ورجعت اغسله..

اخيراً كملت كلشي ونظفت نفسي بغسول الجسم، نشفت جسمي وغرگت روحي مرطب.. دورت بجنطتي على ملابس طبعاً بالباب العلوية سوت كشف وجبرتنا نجيب سيتات نوم ابيض بس اني وصيت صبا تجيبلي بجامة وياهة وتحطها بجنطتي..

والحقيرة الكلبة الرعنة صبااا جايبتلي بجامة ستن لونها ماروني صايرة كيمونة بصدر مفتوح كله كيبور يا نذلة يا حقيرة تفووو عليك شمسون يا عاار مادري شعلي هو بس يستااهل..

طلعت تلفوني وغردتلها بـ مسج رزالة مرتبة الحقيرة بسرعة قرتها ودزتلي ايموجيات ضاحكة هاي لو احضرها مية مرة هم ميرتاح گلبي..

رطبت شعري ومشطته وسويت السكن كير مالتي وحطيت مكياج خفيف واخيراً تعطرت بعطري الخاص ومديت راسي اشوف وينه هموسي.. مموجود بالغرفة شو؟

طلعت للغرفة احط جنطتي على جهة بعدني واگفة ارتب اغراضي على الميز ودخل للغرفة بعده ما مبدل ملابسه..

-شو بعدك بملابسك؟

-اريد اسبح

اخذ منشفة ودخل يسبح سريع وطلع مبدل بـ تراك اخضر زيتوني وگف گدام المراية يمشط شعره وحطيت كل تركيزي وياه اريد اشوف شنو راح يحطه بس صدمني من ما خلى شي ابدد..

-عبالي تچذب عليَّ من تگول ما احط شي لشعري!

ابتسم ابتسامة جانبية وضيگ عيونه يباوعلي ويگول بتلاعب..

-وليش اچذب بهيچ شي

-مادري يعني گلت يمكن يستحي لان يحط زيوت او شي تخلي شعره يلمع وصحي وسرح

-لا گتلچ من الله شعرنا هيچ خو شوفي ابوية واخواني

-اي لاحظت

اخذ عطره يرش على جسمه واماكن النبض وراح يگعد على القنفة، باوعلها تمايزها صفن عليها واني صافنة عليه وكاتمة ضحكتي..

-مسرة: تشوفها اذا تكفيك لو لا

-صراحة اي

-هههههههههههه

-واكتشفت مستحيل تكفيني

-اممم صح

-راح اجيبلي فراش من الريسبشن

-لااا وين يمعود لا يفضحونا ويسوونا ترند، شاهدوا عريس بيوم عرسه ياخذ فراش وينام على الارض بسبب عروسته

-ويضيفون للخبر ملح وبهارات ويسوونه متعاركين واصواتنا واصلة للظالين

-ويكملوها من يكتبون اكتشفت عروسته انه متزوج وعنده سبع جهال

-ويخونها مع زوجته ومع عشيقته

-وناس بالتعليقات راح تكتب اي ذولة نعرفهم جيراننا والعريس فد ملعب وواحد ادبسزز وعينه زايغة

-ووحدة ثانية راح تكتب هذا حتى امي ما خلصت منه و تحارش بيها ذاك اليوم

-وواحد راح يكتب هذا صديقي وهو معليه هي مرته مو خوش وكشفها تخونه...

وهكذا استمرينا الليل كله ميتين ضحك على خيالنا، گعدنا نألف قصص ومواضيع وشُهيب طلب من خدمة الغرف عشا وحلويات ونمنمات.. على گعدتنا اذن الفجر گام هو توضى ومد سجادة يصلي كزبرت من بده بالصلاة يجهر من يقره الفاتحة والسورة الثانية تمايزته من وره وهو يصلي وحسيت بالخجل..

خجلت وماعرفت شنو اتصرف اگوم أمثل جاي اصلي؟ بس شلون واني ممصلية بحياتي استحيت من نفسي ومنه بس ما چانت عندي الفكرة الأصح وهو لازم استحي من رب العالمين..

كمل صلاته وقره شي وراهة يمكن دعاء بس كلش قصير وگام يلم السجادة ورجع يگعد يمي، كملنا سوالف وبالي بقى ويه الصلاة الى ان مشى الوقت بينا بدون لا نشعر..

-شُهيب: يمعودة صارت بالخمسة الفجر ما تعبتي؟

-اي والله بس هاك هاك اكل هاي طيبة

حطيت لوزاية بحلگه اكلها وحط فستقة بحلگي..

-شُهيب: طيب عجبني هذا مملح ضوگيها

-اگلك

-اسمع

-جيبلي كرزات وجلاتين اخذهن ويايه شو طيبات هنا

-بعيني

-وبعد شنو.. هاا تذكرت عدهم نستلة هم كلش طيبة نسيت اسمها عود اراويك الغلاف

-صار

-وبعد نلحگ تاخذنا نروح للسوگ قبل لا نسافر؟

-مادري باچر نشوف اذا عدنا وقت ميخالف اخذكم

-اي عفية.. هاك عصير اناناس طيب

انطيته من عصيري الگصبة مالتي كلها حمرة بس ماهتم شرب منه، ابتسمت مرتاحة وفرحانة كلش، بعيداً عن كون زواجنا مو حقيقي بس انصح كل بنية تختار شريك حياتها ويكون صديق قبل لا يكون حبيب.. الصديق ما راح يمل منچ وراح يسمعلچ بكل وقت، راح تكون علاقتكم متجددة وعفوية وتونس والاهم من كل هذا ما راح تخجلين منه وتكون علاقتكم صحية..

وكل هاي الشغلات موجودة بـ شُهيب، يجاري خبالي وغرابتي، يحچي بنفس لغتي المليانة سخرية، يشوف حيويتي وطاقتي عفوية ولطافة ميشوفها غباء وسذاجة مثلما چان يشوفها اكرم، واكثر نقطة احبها بي هو مَـ يمل.. ميمل من أي احد حتى لو گابلني وگعد ثلاث ايام متواصلة راح يبقى بنفس الحماس والطيبة.. شُهيب رجل وزوج مثالي بنظري يا بختها الراح تكون وياه وترتوي من عطفه وحنانه وتريّح نفسها جوه جناحه بدون لا تشيل هم لشي..

وهسة هم عيونه بدت تغفي والتعب بيّن عليه، مسح وجهه وشعره هوسه هالحركة جديدة مچان يسويها وكلش حبيتها تنطي منظر يخبل ومثير و... هاي شبييييچ انچبي وسكتي عاد مسرة مصختيهاا!!

-تعبت شُهيب روح نام على الفراش

-لا عادي ما نعسان

-روح حباب اني هم نعست

-ماشي نامي على الفراش واني انام على القنفة هنا

-وين تكفي روح على الفراش ومعليك انتَ

-وانتِ وين؟

-هنا واذا كلش ما ارتاحيت انام بصفك واحط بيناتنا مخدات ههههه

اكيد ما راح اسويها وانام بصفه بس هاي حجة حتى يگوم وفعلاً استجاب ابتسم يفرك بعيونه وگام، وخر المخدات من الچرباية وحضن مخدة بقوة بين ايده ونام على جانبه الايسر..

قاطع صفنتي صوته وهو يگول بالضحك بدون لا يباوعلي..

-مسرة قيثارة لا تحاولين تكتليني واني نايم

-احاول

-حبابه امي ماعدها غيري

-لتخاف على امك اني اداريها

-واخواني خطية

-يعيشون بدونك

-اخر شي يمعودة ابوية يحبني اني النمر مالته

حچاهة وضحك، ضحكت وياه بدون لا اجاوبه غيرت الموضوع بسؤال ثاني..

-ليش تحضن مخدة بهالطريقة؟

جاوبني بصوت ناعس..

-متعود

هزيت راسي متفهمة يمكن متعود يحضن خطيبته السابقة هيچ من ينام، نفضت عقلي بسرعة قبل لا يتعمق تفكيري وگمت افتح شوية من الستائر اباوع من الشباك وقت الشروق يجنن يشبه ماريا.. دائماً اگللهه تشبهين شروق الشمس بشعرچ الاشقر وطاقتچ الجميلة..

نعست واني واگفة هنا، باوعت لـ شُهيب غافي ورايح لغير عالم، جريت موبايله حاطه على الميز الي بصف الشباك اشوف ساعة بيش وانتبهت لأشعار رسالة جايه من رقم مسمي "•" قريت بداية الرسالة لا ارادي عيني اجت عليها چانت بالعربي..

"ما راح يتكرر الصار بيناتنا وعد، جاوبني لا تظل تعذبني هيچ تعرفني...."

انقطعت الرسالة وماگدر اقرا الباقي الا افتح التلفون واني اعرف رمزه، الف شيطان لعب براسي واصابعي تحكني اريد اعرف الباقي وشنو صار بيناتهم.. من المحادثة مبينة بنية بسبب اسلوبها قررت ما افتح التلفون واعوف خصوصيته اله مو من حقي هالشي.. بس عود گدرت اسكت واهدأ؟ والله ولا گدرت متت وحسيت روحي مشتعلة بالفضول لزمت التفون وفتحت الرمز وقريت باقي الرسالة الطويلة..

""ما راح يتكرر الصار بيناتنا وعد، جاوبني لا تظل تعذبني هيچ تعرفني ماتحمل.. بيوم الحفل ادري تهورنا بس اني چنت تعبانة واريدك وانتَ هم تريدني حسيت بهالشي من لمستك لا تستحي من هالشي اعرفك احسن من الكل، شُهيب بس ترجع خلينا نحچي سوه راح اجي لبيتك ونتفق على علاقتنا، هذا رقم جديد اراسلك منه خاف ما سجلته يمك البارحة من حچينا..

نورسينتك ♥️"......

يتبع 🙂.....

━━━━━━  ━━━━━━

اااااخ يا زمننن ن ن ن ن (هذا صدى) 😘

البارت يجننن من كتبته كله مشاعر واحاسيس والكبلات افففف متت عليهمم يخبلوون حبايبي يخبلووون ♥️
اعتبره من بارتاتي المفضلة 🦋🤍🫶🏻🫶🏻🫶🏻

بس القفلة!!!!! اءءء شلون بينا احنه شلووون 🙂🤣