رواية ابناء الحسوم "شمسون" الفصل الثالث 3 - بقلم 𝐙 𝐇 𝐑 𝐀

𝐓𝐇𝐄𝐘 𝐒𝐀𝐘 𝐌𝐀𝐅𝐈𝐀 𝐈𝐒 𝐌𝐘 𝐌𝐈𝐃𝐃𝐋𝐄 𝐍𝐀𝐌𝐄!

.

🚫ارجوا مراجعة التحذير السابق قبل البدأ بقراءة القصة ♥️

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

يُقال.. لكي تنصف لا تستمع للقصة من طرف واحد❗️..

━━━━━━  ━━━━━━

امطار غزيرة، جو معتم غائم، برق مخيف يشق اقطار السماء، رياح ضارية حَـسوم تقلع النبات من جذوره، ايام صقيع باردة الجو والمشاعر، تلفلفت السماء بردائها الاسود عالنة استعدادها لوصول محبوبها القمر، فـ هذهِ ايامه، ايام النصف من الشهر الجميع منتظر وصوله وتربعه على عرش السماء لكن هل سيتنازل ويظهر مع كل هذهِ الغيوم يا ترى؟

قفلت باب السيارة وبقيت واگفة بنص الشارع، ادور بعيوني وحاضنه جسمي بقوة، سرعان ما المطر غسل ملابسي وشعري من شدته، قررت اخطي بعض الخطوات للامام امشي وافرك بيدي، ابلع بريگي اليابس واتلفت، ماعرف ارجف من البرودة لو من الخوف..

ذبيت نفس وحچيت بداخلي "ماگدرت تنتظر شوية علما يرجع شموازيك متگلي!" طلعت موبايلي بأيدين راعشة جاي اريد اتصل واللتفتت بسرعة على صوت الصفير الي اجه من خلفي، وزعت نظراتي بيناتهم وداخلي يرهج بالافكار..

ضبة زلم واگفين امامي لابسين اسود من فوگ ليجوه حتى وجوههم مغطيهه، قسم الاسلحة بيدهم والقسم الثاني حاطي بخصرهم..

اشرلي چبيرهم اتقرب منه، تقربت بخطوات بطيئة و وگفت مقابيله بالضبط حك راسه بالمدسدس الي بيده وكال بلهجة عربية مكسرة..

-وين المصاري؟

جاوبته بثقة..

-وين الفلاش؟

-المصاري واعطيكي الفلاش

-الفلاش بعدين الفلوس ما طايرات

جحظت عيوني من خله السلاح براسي، وخر اللثام عن حلگه طلعت شفايفه الكبيرة..

-لا تعانددددين المصاررري وييينهمم

ما انهزيت حاولت ابقى متماسكة وهمست بنبرة قوية عصبية..

-الفلاش وياكم؟!

-آه

-اشوفه اول

تمتم بلغة ثانية عرفته دخيل مو منا، بعد السلاح من راسي وحطه بصدري ونتر بعجرفة..

-شو تردين انتِ؟؟

-نحط الفلاش والفلوس بالكاع بنفس الوقت غير هالشي ماعندي

زادت دگات گلبي من حاوطوني اربع زلم وهو مترأسهم، مسدسي بخصري محال اگدر اطلعه گدامهم راح يتورشعوني، قبل لا اجي هنا حذروني منهم ذولة ولد زنا ومابيهم شريف مو مال اطلع بطولاتي عليهم خصوصاً وكلهم موجهين السلاح عليَّ منتظرين اشارة من زعيمهم..

-هل تريدين تلعبين انتِ؟

-لا، اريد اضمن ما راح تغدروني

سكت يفكر لثواني وهز راسه موافق، نزل يحط الفلاش ونزلت وياه احط الچيك ممهتمة راح يتنگع لو لا بس شافني نزلت صار الرمي مطر عليَّ من كل صوب..

وگعت بالگاع وضميت راسي اعيط وهمه اشتغلوني يرمون حولي ويفترون وناس تغلط وناس تحجي وناس تتوعد، الرهبة اخذتني والخوف عاق حركتي تداخل لهجات ولغات ما اعرفها صرت اصيح بعلو صوتي..

-لييييش ترمووون هذا مو اتفاااقنااا

-وينن الفلوووس يا بنتتت ايش هذااا الورقة!!

-هذا چيك بنفس القيمة التردوهه شبيييك

-انا قلت فلوووس كاااش تضحكون عليَّ انتممم

-ماشي شبيك فهمت! موجودات بسيارتي شبيييكم كاااافي راح تصير طلقة بيَّ واموووت

ما اسمع نفسي من صوت الطلق كلشي بيه يرجف بس ماكدر ابين خوفي راح يولوني ذولة وياكلوني ماگدرلهم وحدي..

-من البداية وجيبي ليش كل هذا الفهاووا

هزيت راسي وهمست بداخلي..

-تعلم احچي اول يا مطي

-شنو تقولين؟؟؟

-اريد اروح لسيارتي اجيب الفلوس گلت

-هيا نمشي

گومني يعت بأيدي بقوة والسلاح منبت بظهري خسفه خسف، تمشيت للسيارة بخطوات سريعة فتحتها وهجم قبلي اخذ الجنطة الحاطتهه بكرسي الصدر، انطاها لواحد من رجاله فتحها يتأكد منها وشمر عليَّ الفلاش وگال..

-غبية

-عااار

-ماذا؟؟؟

-عار يعني انتَ حلو

ضحك فرحان واندار لجماعته يترجملهم يگلهم بس شافت حلگي وهيج كالت لو تشوفني كلني شتسوي..

عكمشت وجهي عليهم لعبانة روحي براطمه مال واحد يسوي بيهن شيش تكة من گدما كبار..

-اني رايحة بعد اياك تتصل عليَّ لو تدز شخص يهدد بيه وحق الله منسكتلكم المرة الجاية!!

-قفي

-خير؟؟

تقدم واحد منهم عليَّ وخر القناع عن وجهه بس طلع حلگه مثل ذاك ابو براطم وكال بالانكليزي..

-I love your smell

تمنيت اجيبه بصفگة افر وجهه فر بس ماكدرت للاسف اني وحدي وذولة هواي، ابتسمت واشرتله بعيوني عود شكراً..

-wait wait

انهزيت كلني من تقرب مني واحد ثالث صار كلش قريب مني يبس الدم بجسمي انرگعت بباب السيارة وباوعت بوجهه..

-شبيكم كلااب!!

-what perfume are you wearing my gorgeous lady

خزرته وانداريت على چبيرهم افتهم عليَّ وسمط صاحبه براشدي ورجع يفشر عليهم، اخيراً تركوني وحدي ركبت سيارتي وانطلقت للبيت بكل سرعتي ومكمشة بالفلاش بقوة اخاف يصير عليه شي اضيع روحي ولا اضيع هالفلاش..

ما عولت شوكت اوصل للبيت سفطت سيارتي ونزلت اهرول، فتحت الباب استقبلني كالعادة مرتبك ويأشر بيده..

-ها وينه؟؟

-موجود

-تأكدتي هو نفسه؟

-اي

-انطيني بسرعة اشوفه

اخذه من ايدي وفتح اللابتوب حط الفلاش وركز انظاره بالشاشة، اصابع ايده ترتعش ارتباك وقلق بقى على وضعه الى ان بدت تظهر الارقام، عيونه لمعت بحماس وضرب ايد بأيد وصاح..

-كفووو بحبيبة گلبييي

𓈓𓈓

"سيداتي وسادتي اسعد الله مسائكم بكل خير..تستعد الطائرة للهبوط التدريجي نحو مدرج ومطار (.....) الدولي، من اجل سلامتكم وراحتكم يرجى البقاء في مقاعدكم وربط احزمتكم..."

اجفل المسافرين من سرعة هبوط الطيار للطائرة فـ المطبات الهوائية اهلكتهم طوال الطريق وها هو الان يزيد الوضع سوء بهذا النزول المستهتر..

كَمَش بأيدي الكرسي بقوة وشد على اعصابه، بقى على هذا الوضع دقايق والطيار يصول ويجول بالطائرة ما جاي يهبط ع الارض محد يعرف شنو السبب، زادت الهمسات بالمكان والقلق بده ينخر قلوبهم صاح احد المسافرين بنرفزة واضحة..

-وش جاي يصير هنا؟!! اشبوو هاذ الطيار كأنو يسوق عربة حمارر!!

-اي بعلي عربانة مطي بيده هذا شكول طيار هذا؟؟ خالي ودوني اني اسوق بداله

-شفيش انتِ هذي شفيهه المضيفة وععع

-what is happening with this pilot?

-استغفر الله

همسها جوه انفاسه متضايق من تداخل لغات ولهجات المسافرين مع بعض، عنده صداع قوي بسبب قلة النوم والي گاعدة بجانبه ما سدت حلگهه وهي تكول..

-شگد بقيت بدبي؟ هاا تذكرت گلت شهر صح صح، زين شسويت هناك؟ رحت سياحة گلت مو؟؟ يااا لا گلت عندك شغل ههههههه

ردلها ابتسامة مصطنعة بس يريدها تسكت راح ينهار بأي لحظة لكن هيهات هذهِ المرأة تسد فمها..

-باوع اني عراقية مغتربة واحس بغربة هناك تكدر تدليني على اماكن؟.. فدوة انطيني اسم مكان عملك بلكت اگدر اجيلك اشوفك احس بالامان تعرف مادري احس گلبي مقموت اني شسفرني؟.. بس تدري اني سافرت للشغل شسوي هاي الدنيا تريد واحد يركض منا ومناك وزوجي مابي خير خلعته واجيت هنا

-تمام

-اي هسة تنطيني شي يوصلني الك؟

ابتسم ورد بهدوء..

-هذا رقم اتصلي بي يوديچ وين ميعجبچ

-هاا يعني رقمك هذا؟؟

-لا

-لاا اريد رقمك اني شمعرفني بهذا الرجال الي راح اتصل بي؟؟ بله رادني بسوء؟؟

-حتى اني متعرفيني شمعرفچ ما اريدچ بسوء؟

-يااااااا صدگ ما تستحي باع الصلافة!!

ابتسم منتصر عرف شلون يسكتها، صح مو من عوايده هاي الوقاحة لكن طفح الكيل، دامت هذهِ الرحلة لساعات وما سدت حلگها ولا ثانية حتى وقت الاكل تحجي وتتذمر من زوجها الي خلعته!

ركز سَمعه وكل حواسه مع صوت الرجل الي بجانبه الآخر وهو يگول اثناء تقليبه للجريدة..

-الرجال: سمعت شنو جاي يصير بروسيا؟ الدنيا مگلوبة بسبب واحد اسمه "غوغري"

تطلع للمزيد من المعلومات من الرجل وفكرة واحدة استحوذت بعقله..

-الرجال: يگولون عنه زعيم مافيا من مافيات روسيا فر الدنيا فر بأعماله الغير قانونية ومحد جاي يصيده

ممتاز وهسة كبرت علامة الاستفهام على راسه وتعطش للمزيد لكن اكيد ما راح يبيّن اهتمامه بشي يخص "المافيا" وهو گاعد بطائرة طيارها مستهتر!

-شلون تعرف غوغري؟

-الرجال: اهااا يعني تعرفه؟؟

-لا

-ها عبالي تعرفه من سؤالك وبالنسبة لجوابي راح يكون اني ماعرف "غوغري" بس سامع ابن عمي يحچي بي يگول عنه رجُل داهية هو الي منظم العصابات الصغيرة وممشيها ومنطيهم الامان يمارسون اعمالهم الغير قانونية ويدافعلهم هم

-شي غريب كون ابن عمك يعرف كل هاي التفاصيل عن زعيم مافيا؟

-ابن عمي fbi شغله كله هناك ووظيفته يدور ذولة اولاد الزنا ويفنيهمم فنيي

هز راسه مبتسم ويه الرجل المتحمس وهو يحچي عن ابن عمه الي اكيد ما راح يبقى عايش هواي، ليقاطعه صوت المرأة الثرثارة ترجع تگول بملل..

-اگلك اني راح اسامحك هالمرة تمام؟ اريد رقمك يله انتَ مبين ابن خير وماعندك سوالف سرسرة

-لا عندي

-لا لا ماعندك شكلك مريح

-ابد ولا مريح

-لا مريح هو بكيفك!

-جربيني وشوفي

-يااا باع، تعال صدگ انتَ عزابي؟؟

-متزوج

-اخخخ صدووووك؟؟

-اي

-وعندك خلفة؟؟

-ثلاث ولد

-اخخخخ صدووووك؟؟

-نعم

-بس يله ميخالف الرب يحفظهم، زوجتك حلوة مثلك لو جمالها على گدهة؟

-حلوة كلش

-اخخخخ شو اشوف

-هاي شنو مدام؟!

-رجاءً انسة! اني خلعت زوجي

-تمام

-راح تخليني اشوفها؟

-ماعندي صورتها

-ليششش؟

-اغار

-لا ليش هيج خطية ما تفتخر بيها ليش

-وشدخل الصور بالافتخار؟

-لا عيب ما يصير حط صورتها خلفية بجهازك فرحها شوية خطية انقهرت

-ان شاء الله

-يله اشوف راسلها تدزلك صورتها

-بهمس: اللهم طولچ يا روح

-ها شگلت؟

-اكلچ مو كأنُ تأخر هبوطنا؟

-اي صح بس شعدنه جاي نسولف، اريد كرت العمل فدوة خاف انسى

بدون نقاش فوراً طلع كرت العمل وانطاها عسى ولعل تگعد وتسكت وفعلاً هالشي جاب نتيجة ظلت تقره بالكرت واللتهت بي..

اخيراً هبطوا واستعد يستلم جنطته، مشى يكمل الاجراءات بس يريد يطلع من المطار تعب بهاي السفرة من بدايتها چانت مخربطة والطريق الطويل زيّد عليه الموضوع، راح متوجه للمطار الثاني يدور بعيونه على جماعته وچان يلگفهم من بعيد..

-Hiiiii

ابتسم على صوتها العالي وهي تلوح ايدها بحماس، ركضت سريع وغاص جسمها بحضنه الضخم تطفر وتعيط بمكانها..

-اخيييراً اجيت مشتاقة اني مشتاااقة

-شلونچ گلبي

-زينة انييي خرب اننن

-شبيچ شنو هاي خرب ان جديدة منين متعلمتها؟

-من ماي فريند المعفنة

-وينه اخوچ المرتاح؟

-خطية ما اجه من الشغل كتل روحه كتل حتى هو ياخذك من المطار بس بعد ما صارت خطية كاتله الضيم المسكين

-اهااا

-صدگني كاتله الضيم والوصخ همين حتى سبح ميسبح تدري لو لا؟ الشغل هلكه هلااااك

-كيان تكعدين راحة لو اگعدچ بطريقتي؟

-وهنا بالمطار؟؟ لا شنو هالعدم احترام هذا مع الاسف، شوف مع الاسف عليك مع الاسف تطلع هالسوالف منككك يالسند يالابوو يالحبيببب

-امشي امشي بلا هالسوالف

ضحكت وكمشت بأيده يطلعون سوه من المطار، واگف السايق بره ينتظر وصوله زفر متنرفز من شافه وكيان كمشت بأيده تهمس..

-ميخالف بس هالمرة

هز براسه وصعد السيارة السودة المظللة بهدوء بدون لا ينطق كلمة "كالعادة" مينسمع غير صوت كيان العالي المتحمس كل شوية لازمته تبوسه من خده وتشمه بقوة..

-كيان: افييييش يا ريحة هلي

-حبيبتي

-كيان: مشتاقتلك كلش هواي تدري؟

-طبعاً ادري

ابتسملها بـ حُب يمسح على شعرها يداعب خصلاتها، حطت راسها على زنده تحضنه وتمسح على لوح كتفه..

-كيان: سولفلي شكو ماكو مشتاقتلك

ابتسم من تذكر الي سولفت وياه بالطيارة وقرر يحچي لكيان عنها يعرفها تحب هالسوالف، فرطت ضحك على الموقف وتحلفه الصار صدگ مو مبالغة..

-صدگيني هذا الصار

-كيان: هههههههه بعد بعد سولفلي على البنااات الي هناك

-شبيهن؟

-كيان بغمزة: تعرف البيهن...

**

-مـــــــــــــاااررريااااا

دخلت للبيت اركض وادورها مثل المخبل، صحت بعالي صوتي مرة ثانية..

-ولچ ماااارياااا ويننننچ ماااكو وقتتتت

عبرت الصالة اهرول للغرفة ماكو مالها اثر امشي واصيح بأسمها وين راحت هاي خررب مو وكتها ابدد مو وكتتها..

-ماارياا وينج ولج بتتت الاوادمم

-ها.. شكو شكو

لفيت وجهي على القنفة الموجودة بالصالة واذا أشوفها ممطولة عليها ومفلگحة ايديها فاتحتهن..

-ولج ولج ولج ولج تعزيناا وتصخمناا ولج

-شكو شصار

-ولج مارياا اجه ابنچ ولج

-شنو

-ابنججج اصحي خرب روحج

-ابني؟!؟!!

-اي ايي گابليني گابلينيي اريد دبچ عمارچي اصييل

-احااا

-احووو

-احااا احوو

-حيل حيل على وجهچ حيل بعد على متونچ خية حيييل، اريد اللطم لحدما تتملخ متوني اجه فحلي يا يمة حيطلعع عيونيي

-يبوووووو

-كافي لا ياخذچ الواهس بسااع نظفي الصالة لا يجي يمسحها بينا يلله ولچ شلوون ما گللنا راح يرجعع عمتت عيني وعينچ عود مسويهاا مفاجئة الناا خايبة هاي مفاجععة

-ماريا ببكاء: ما اللحگ انظف اخاف اخاف ولك اخاف

-لا تبچين لو يفيد البچي چان گضيت نص عمري ابچي

-شسوي نظف ويايه فدوة حباب تعال نظظف

نشيل ونشمر بغرفتها وَشَلنا الصالة ورتبناها وهي تشتغل وتگمز من الخوف وكل ساع وطافرة عليَّ..

-ماريا: ضمني ضمني حبااب

-وين اضمچ بجيبي خرب عقلچ

-اكفي والله ضمني

-هاي بعدها دايخة البنية هاي وانتِ ما مسوية شي وهيج تتراجفين اني الي مكوم الشغل وطافح لفوگ راسي شسوي وين اضم روحي ووين

-عزززه ولك صدگ تحجيي وين چنت

-نايم چنت يخايبة

-ماريا: هاهيه تلطمنا اليوم احنه نايمين بالشارع ما بيها مجال حوو حووو

-لا ميسويها بس نتعاقب ويسوينا اربع وصل

گابلنا بعض نلطم على متونه، اخيراً انتبهت على صوت الاغاني الينعر بالبيت رحت اكمز على القنفات حتى اطفي المسجل..

-هلا هلا چنتي تهزين موو؟؟ خوش راح يهزنا ويهز الخلفونا اليوم على هالاستهتاار

-شسووي بروحي

وگعت بالگاع ترافس وتبجي وتوخر بشعرها المنفوش عن وجهها، كعدت بجانبهه اهدأهه واكول..

-ميسويلج شي لا تخافين انتِ شمسوية غلط وهيج خايفة؟

-ها

-شمسوية ماريااا

-مـ.. ما.. مامسوية ما مسوية رايحة اسبح

طفرت تركض وتلم بملابسها المطشرة على الدرج..

-اخذيني يمة سبحيني وياچ

شالت نعالهه وشمرته عليَّ اجه بنص گصتي..

-ماريا: اتبسزززز

-شبيچ متتحملين شقه

عافتني وراحت فوك، كمت افتر بالبيت اشوف شنو المرعبل ارتبه، السنك بيهه مواعين شلتهن وضميتهن بالكاونتر هنه ووصخهن، الكاع بيها زجاج مطشر مال بطل زجاجي مكسور نزلت اشيلهم واندگ الجرس..

-بهمس: يا يممة يا يابة ياا يووم يا يممة عمت عين الوكت الخلاني بهالحال ولج مارياااا

صعدت الدرج اربع بايات اربع بايات، دگيت باب الحمام عليها كسرته..

-ماريا: ولك هااااااا

-سمعيني اذا سألچ عني گليله اني كلل يوم اجي ازورچ واني الاطبخ والانظف والارتب واطلعچ واونسچ واسوي كلل التردي زين؟؟

-ماريا: ليش تچذب

-مو وكتهاا ماريا وصل وصل

-ماريا: گله جااي تسببح مو تكول چنت ناايمة

-ماچذب اني حرام

-اطيحح حظككك

-ما ما ماجذب

فتحت باب الحمام مدت راسهه كله شامبو عضت اصبعها وصارت تتوسل بعيونها..

-ماريا: فدوة فدوة حباب

-والحرام عليمن يوكع؟

-عليَّ عود

-مو استشكل

-انجب لك ابو البنات تفف عليك وعلى خلقتك السزز يله ولي جووه

-الا اگله چنتي نايمة

-روح گله واني احچيله مچنت تزورني ومتشتغل كل هالفترة

-يعني سويتيها وحدة بوحدة موو

-اي العين بثنين عيون والسن بكل السنوون

-خليني اروح افتح الباب كسرها علينا

تركتها ونزلت بسرعة فتحت الباب وذبيت نفس من شفتها كيان واگفة متخوصرة..

-كيان: انتَ هنا وينكم شنو ميتين

-خرب غيرتج متنا من الخوف ماريا سوتها على روحها

-كيان: هاا لان رجع مو

-شلونه؟ حاچاچ بشي؟ تحسين نفسيته تعبانة لو زينة؟ شنو چان لابس؟؟ بس لا لابس اسود مثل حظي الملطم؟؟

-كيان: لا لابس نيلي واحس نفسيته زينة ومرتاح

-مرتااح؟؟؟

-اي شبيك

-الله يبشرچ بالجنة بجاه القاسم

-كيان: بس راح يجي هنا تره هو گال بس اروح ابدل واللحگچ

صار يبلعم ويفرك بشحمة اذنه متوتر، گعد على القنفة يحمحم ويتحضر شلون راح يبدي الحديث وياه، نزلت ماريا عيونها شاخصة ولافه المنشفة على شعرها من شافتني ذبت نفس وگالت بخوف..

-ماريا: عبالي هو

-كيان: شبيكم؟ ليش محسسيني راح يجي البعبع شمسوين وهيچ خايفين؟

زادت ملامح القلق على وجهها وگعدت على پاية الدرج تايهة حسيتها شوية وراح تبچي رحت اگعد بجانبها افتهم سالفتها وليش كل هالخوف والتوتر بعدني دا احچي وياها وتبعثر لساني وتبخرت افكاري من الاتصال الي اجانه..

اتصال اربكني وخلاني اطفر من مكاني مجرد افتهمت راح يجينا لبست البوت وتحججت بالدراسة وطلعت من البيت ماگدر اواجهه ماريد احط عيني بعيونه، ركضت للشارع العام اوگف تكسي ومنو يشوفني يعبرني ممهتم تعبت من الانتظار وعظامي تصطك ببعضها البعض من برودة الجو رجليه صارن خيوط واني انتظر..

-كيان؟

اللتفتت على الصوت وفتحت عيوني فرحانة بشوفته..

-فاضل!!

-كيان؟

-فاضل!!

-كيان؟؟؟

-فاضل

-راح نظل على هالحال؟

-ها اي صح، المهم فاضل شجابك هنا؟

-اجيت اشوف اخوچ، شبيچ تتلفتين؟

-لا ماكو شي بس اريد ارجع للبيت مستعجلة ضروري

-تحبين اساعدج بشي؟

-ياريت، اي اريدك توصلني للـ....

-هاي شنو منو هنا فاضل؟

جفلت من الصوت الي اجه من خلفي، صوت يدب الخوف بقلبي كلما اسمعه، قشعريرة تزورني ودوخة تاكل راسي.. توترت وماگدرت اللتفت عطره الواضح يفحفح كل مكان والهوا العالي متعمد يوصله لأنفي حتى الهوا خيب امالي وصار يهدد بيَّ..

-فاضل: هلا بعمي شلونك

-بخير حبيبي

تحاضنوا وتسالموا واني منطيتهم ظهري، لبست الكلاو على راسي ولهيت روحي بالتلفون وگلبي يرگع رگع خوف وبداخلي ادعي يارب ما شافني يا رب ما انتبه عليَّ..

-جاي اشوفچ كيان معقولة ما شفتيني؟

بلعت ريگ وذبيت نفس بنفس الوقت، رسمت ابتسامة مصطنعة على وجهي واللتفتت اقابل وجهه المبتسم وايده المفتوحة المنتظرة مني عناق..

-معقولة ما تجين تسلمين على عمچ شمســـون؟..

يتبع 💣....

━━━━━━  ━━━━━━

يا مرحبااا عودة حميدة ان شاء الله شباباتي 😍♥️

مشتاقتلكم عيووني شباب وشبابات 🤍
ادري ادري كُـلشي غريب وما مفهوم بالبداية ينراد وقت حتى نتعود عليهم ونضرب ميانة ونفتهم سالفتهم +++ كُلش كُلش متحمسة تظهر باقي الشخصيات والاحداث الخوونفوشارية 😋🔥

التنزيل راح يكون حسب التفاعل ان شاء الله اذا حبيتوها ثبتولنا حبكم بالتصويت والتعليقات الحلوه مثلكم 💋

أي شي يخص الابطال، الاحداث الجديدة، سؤال، استفسار، فضول ناحية القصة ينزل بـ حسابي الانستا دخلوا برجلكم اليمين 👰🏼‍♀️👇🏻