رواية ابناء الحسوم "شمسون" الفصل الخامس والعشرون 25 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لا شيء أكثر نشاطاً من مخيلة امرأة تشعر بالغيرة.. ♥️

━━━━━━  ━━━━━━

"كيان"
بعد محادثتي الغريبة ويه فاهد گام هو للحمام سمعته يفتح الدوش مرة ثانية مع العلم سبح قبل لا يگعدني، واني بدوري گمت ابدل ملابسي جايبة ويايه فستان تركوازي فاتح كلوشة قصير اضطريت اللبس وياه كالون لان ادري بـ شُهيب راح ياكل راسي اني بس دا اتخيل شلون راح يطلب من مسرة تغير من ستايلها اساساً مادري شلون صابر لسه متحمل وساكت وما واجهها بغيرته المفرطة..

نزلت اللبس حذائي الكعب عادةً ما اللبس كعب طولي مناسب 160 سم ما احتاجه بس هسة علمود الفستان.. طلع فاهد من الحمام ينشف شعره المهلس هو سرح وناعم بس مهلس..

-فاهد: صباح الخير عروستي الكورية

-كيان: مو قبل شوية سولفنا هو كل شوية تصبح عليَّ

-اي ليش لا

-تدري البارحة دعيت عليك متصبح

-حرامات ما وصل دعائچ

-يمكن يوصل باچر محد يدري

-ههههههههههه كوري انتِ حلوة

رفعت راسي مستغربة هذا ليش كلما يشوفني يگول نفس الجملة؟ واكيد يلحقها بـ...

-بس مو احلى من حمرتي

-نعالتك منو يومية مقارنني بيها؟!

-هههههه تغارين من حمرتي؟ لا تغارين هي حبابة وراح تحبيها مثلي

-اففف وخر شگد مزعج

عبرته ادخل للحمام وجفلت يابسة بمكاني من شفت روحي بالمراية، رگبتي الصايرة عبارة عن خريطة من عضات البارحة!!

-ولللللللك فاااااااااااااهددددددد

-ههههههههههههه

-الله يشعلك يا ابن شامة الله ينتقم منننك ولك شلوون راح اطلع هيييچ وفستانييي مفتوووح

-ميخالف اثار العرس هاي مو مشكلة معذورة

الحقير يضحك ممهتم وواگف ويسولف ويايه عبر باب الحمام، فرشت اسناني بسرعة وطلعت اهف من الحمام من كل گلبي ناوية ارجعله العضة وانگلب چلب..

رحتله وبغفلة جريت ايده وعضيته عضة حفرت معصم ايده حفففر اضغط بكل ما عندي من قوة عيوني طلعت من الشد راح يصير بيه شي وانجلط والنذل ممتأثر ويضحك مكيف..

-فاهد: الله عيديها هنا

-وخررر يمممة النرفزة يممممااااا

-چؤ چؤ كوري مو اتفقنا ما نصيح؟

صرت اروح واجي بالغرفة اللوب شلون اطلع گدامهم؟ شسوي؟ احط خافي عيوب؟ بس لحظة اني حتى خافي عيوب ماعندي لان ما استخدمه! زين شنو اللف على رگبتي واني مجايبة شي؟ عزه العزاني شلون راح اواجههم شلووون!!

-فاهد: هسة تلگيهن كلهن معضعضات معليچ

-كيان: ايييي مو كلهم مثلك چلاب مسعوورة

-فاهد: كوري ليش هالتجاوز مو عيب

-باوع فااهد هسة تلگيلي حل فهمت لو لاا!

-لا

-ماكوو غصباً عليك تساعدني اي يله فكر ويايه شنو اسوي؟؟

-حطي شعرچ عليه مو شعفتچ طويلة

-مينضم خاف

-ينضم ينضم

جاب شعري بعده مهووس ما مشطته ونزله على اكتافي اي چنه صدگ انضم لان صايرات العضات من الجوانب، ابتسمت فرحانة واني اشوف روحي حليت هالمشكلة وهو وگف ورايه مباشرة ثبت حنچه على كتفي يتمايزني بالمراية..

-فاهد: وگولي فاهد ما يفيد بشي

-خاف شعري يروح منا ومنا وانسى انتَ ذكرني ماشي؟

-ماشي لو گاعد هههههههههههههه

سحبت كتفي منه وگع راسه ضحكت على خرعته ودفعت كتفه على كيف..

-امداك نفس تفاهة جنات والله تتوالمون شجاك ما تزوجتها

-احبها يجوز نصير اصدقاء بس ما نتوالم زواج لسانها طويل يصلي صلي تفيد مالك

-راح تخبله

-وهو المطلوب

-ليش ابوك أصر مالك وجنات يتزوجون؟

-لان مالك كلاس و رومانسي زيادة عن اللزوم

-وجنات شنو راح تسويله؟

-راح تربيله علة وتخلي يتغير وتطلع لسانه وعصبيته

-ليش ابوك يريد يغير شخصية مالك؟ تدري مالك احلى شخصية من بينكم خو شهوبي اخوية واموت عليه بس هادئ كلش اما مالك يجنن يجنن واحد يعجبه بس يسولف وياه صوته يخبل واسلوبه ولطافته وابتسامته و...

-وسمممممم ومررررض تتغزلين بأخوية گدامي بعدد جيبيلي گرون!!

-شنو گرون؟

-گرون انواع اكو ستيل اكو فافون اكو ذهب وعدنا حتى اللماس موجودات مالك يسويلچ حسب الطلب

-اشتريلك احسهن حلوات

-هو احنه لو نظل عليچن كلمن يلبس گرونه ويگعد

-تطلعون سيت واحد شگد كيوت

-كيان!

-هاا

-چنها ما وصلتچ الفكرة

-هو اي بس فهمني انتَ شبيك

-خلي اخوچ ال**** يفهمچ

-كلشي وحاط اخووية على كيفك لا تنفجر هواي ضاغطك شُهيب!

-يروح فدوة لـ مالك

-وانتَ هم تروح فدوة لمالك

-امشي لچ ما اروح لاحد فدوة

-تروح وغصبااً عنك شفايتلك توصل ربع من مالك ورزانة مالك

لزم وجهي كله بين ايده عقچه تعقچ همزين ما حاطة مكياج بعدني چان خرب، دفرت ايده وابتعدت عنه..

-شبيك شبيك مالك مثل شُهيب واني احچي بـ شهوبي هيچ

-انچبي ممنوع تحچين هيچ بعد گدامي ماقبل

-ليش عيني تغار

-اي اغار

-ايععع ماريدك تغار عليَّ

-دطيري منو يغار عليچ اني اغار منهم

-اي دگول هيچ من البداية

-يله ولي

-انتَ ولي

-كياان!!

-عيونها الكورية

ضحك ضحكة وره كلامي عود اني دا اقلده من يگول عيونه الصفر ودا اريد استفزه بس شو هذا كيّف ولزم وجهي بين ايده وفاجأني من باس بين عيوني..

-ههههههههههه احبهن احبهن

-عزه بعينك فهيد وحمرتك؟؟

-موجودة شبيها

-بس لا گمت تحبني اني هم اييييع

-انچبي شحب منچ احب العيون الكورية بس

-حبتك سليمة

-يلا زوجتي العزيزة كملي تجهيز حتى نطلع

اخذ شيشة العطر يرش على جسمه ورش عليَّ هم، كفخته على وجهه مزعوجة ورجعلي الكفخة بس مو كفخة عادية اظن اصابعه انطبعت بخدي..

-همجججي

-الله شگد ترف خدچ شو تعالي

انطاني كفخة بالخد الثاني شعل خدي المسودن، رجعتله كفخة اقوا وشردت للحمام وهو ركض ورايه يدگ بالباب..

-فتححهياا اني اعلمچ

-امشيي مسودن همجي بربربي مراهق ارعنن

-بت ال*********

-نعاااال على امك حقييير كم مرة گتلك لا تفشر على اهلييي

-****** من امچ

-تفوووو على امك العايقة

-قندرتي فوگ ابوچ الجايف

-قندرتي وقندرة اخوااني فوگ ابوووك الصايعع

-وقندرتي هم فوگاه عادي غلطي عليه ما اهتم

-عااار

-رعنة

-نذل نذذذذل

ضحك وابتعد من باب الحمام، بقيت هنا اتمكيج وامشط شعري شلت جزء منه بـ كماشة صغيرة ونزلت الباقي على اكتافي اضم رگبتي المزورگة.. تعطرت وطلعت اجهز جنطتي الصغيرة للكشخة..

-فاهد شوفني شلون طالعة بس لا مبين الاثر؟

-لا ما مبين

-خوش امشي ننزل

رش عطر من جديد والحقير رجع يرشلي على كل جسمي ترسني لعبت نفسي، كفخته على وجهه وشردت بره الغرفة وهو هم شمر العطر وركض ورايه.. نطارد بالفندق مثل المزعطة دست المصعد اضحك وارجف بنفس الوقت انتظره ينفتح بس الحظ الزفت ما لحگت لزمني فاهد من زندي يريد يعض خدي واني اعيط واكفخ بي.. ثواني وانفتح المصعد وصارو بوجهنا مسرة وشُهيب..

توقفنا ثنينا من شفناهم بس مال فاهد يفوت الموضوع هيچ عادي؟ مستحححيل هالمسودن يگعد راحة جر وجهي گدام شُهيب وباسني بخدي بوسة قوية وعضني بخفة وراهة..

-كيان بهمس: اني اعلمك والله الا اربيك

-فاهد: انتظرچ تربيني كوريتي هههههههههه

كشول شُهيب مزعوج حتى ما علق على حركاتنا، دخلت المصعد منزلة راسي ووجهي مبوخ مستحية، اعدل بشعري اضم برگبتي وارفع عيوني اشوف شُهيب ومسرة واگفين بدون لا يلتفتون علينا..

الا من وصلنا جوه وعافني فاهد يروح يجيبلنا ريوگ من البوفيه ياله اللتفتت مسرة عليَّ مبتسمة، لزمت ايدي بلطف وگالت بحنية..

-مبروك حبيبتي شايفين كل الخير والسعادة

-كيان: حبيبتي سرور ومبروك عليكم انتو هم بس شبي شهوبي مبين ضايج؟

-مادري عنه

استغربت جوابها بس ما علقت، تمشيت وياهة للطاولة الگاعدين عليها مالك وجنات واحد بصف الثاني جنات تسولف ومبينة مندمجة وتأشر بيدها ومالك صافن عليها..

-مسرة بهمس: ملاحظة كلما جنات تحچي مالك يصفن عليها لو مملاحظة؟

-كيان: اي كلنا نصفن عليها

-مسرة: كيوت كلش شلون تحچي ومن تگول حرف السين تطلع لسانها مثل الحية العنونة

-كيان: ههههههههههههههههههه

ضحكنا واخذنا موقع على الطاولة صبحنا عليهم وجنات كتفت ايدها واندارت على مالك تگله..

-جنات: چانن يحچن عليَّ ثمعتهن

-مسرة: ميخالف جناوي احنه بقاموسنا الي نحبه نحچي عليه

-كيان: مسرة صاحتچ حية عنونة

-جنات: ادري بروحي حية تروحلي فدوة هنادي

-مسرة: تروحلنا كلنا فدوة، المهم مبارك عليكم ان شاء الله زواجة الدهر

-مالك: دخيلك يا ربي

ثلاثتنا فطسنا ضحك عليه گالها عبالك مخروع وجنات تهز براسها فرحانة على شي جاهلته.. وجهها يضوي كالعادة وبيها حماس ومبين مرتاحة وهي تتعامل ويه مالك وهالشي فسرلي شي واحد وهو معقولة صار بيناتهم شي البارحة؟؟؟

-فاهد: هااااي گايززز

-مالك: هلا بالمسودن

-فاهد: ولك ماي بيگ براذرر تعال بوسة امصك بيها

جر وجهه يبوسه وغمز وهو يگول..

-فاهد: ان شاء الله وضعك ممتاز حبيب روحيي بشرني

-مالك: احسن من وضعك، شلونك شُهيب

-شُهيب: بخير

گعد فاهد بصفي وشُهيب بصف مسرة بدينا ناكل وفاهد كل شوية ذابله قنبلة..

-فاهد: اشرحيلي شعورچ جنات شنو احساسچ وانتِ تزوجتي معذب قلوب الفتيات من ميلانو الى باريس

-جنات: اشعر بالفخر الشديد يعني منو چان يتوقع اتزوج مالك؟ انتَ متوقع؟ والله ولا متوقع بث اخيراً ثويتها وتزوجته وراح اخبله واطين عيشته لحدما يطلگني

-فاهد: احسنتِ عزيزتي بارك الله بيچ نطمح لهذا الشي جميعاً

-جنات: تدللون انطوني بث شهر الا اشيب شعره

-مالك: شكراً جنات اساساً جاي اشوف كم شيبة طلعتلي من وراچ

-جنات: لا شنو هذا مخصل ماحب هيچ لازم كله اگلبه ابيض

-فاهد: اني ادعمچ استمري

-جنات: تدعمني بتريلة خخخخخ

-فاهد: ههههههههههههههه حلوة حلوة بس لا تعيديها بعد

-جنات: فگر انتَ

-فاهد: ابوسچ

-مالك: فااااهد!!!!

-فاهد: شبيك اختي الزعطوطة هاي راح تصير ماي بيست فريند

-مالك: انچب ماكو هيچ خررط اكل وانلصم

-جنات: ملاك ليش تخرب صداقتي ويه المثودن احث راح نكون اثدقاء مقربين

-مالك: اكلي وسكتي انتِ

-جنات: لا تتأمر!

-مالك: اكلي حبيبتي لازم تتغذين زين حتى تكملين حياتچ طبيعي ماشي يروحي؟

-جنات: يله ميخالف راح اكل

-فاهد: نجي على مسرة قيثارة الخانسة شنو عداچ الخوينس وصرتي مثله؟

-مسرة: متونسة على سوالفكم

-فاهد: شنو شعورچ وانتِ متزوجة شُهيب؟ اكيد تندمتي مو صح؟

-مسرة: كلش

-فاهد: باعي بعده الوقت ما فات تگدرين تنسحبين وتتزوجيني ماكو مشكلة

اجته دفرة من جوه الطاولة من شُهيب صاح فاهد متألم ويضحك بنفس الوقت على خزرة اخوه..

-شُهيب: گوم لا اجنزك گووم

-فاهد: ما

-شُهيب: فاهد بس شوفة وجهك تنرفزني

-فاهد: شُهيب اعتبرني زعطوط اخذني على گد عقلي وزوجني مسرة قيثارة شبيك

-شُهيب: وللك گووم لا تخلي صوتي يعلى وننفضحح زعطووط

-فاهد: الله عبصته عبصته هَي هَي عبصته عبصته

-شُهيب: اشفتي منه هذا؟!!!

وجه سؤاله الي نزلت راسي ساكتة واجيب شعري على رگبتي بس عود فاهد يسكت؟ مستحيل!!

-فاهد: تموت عليَّ البارحة فد تونسنا بالعركة

-شُهيب: تستاهل

-فاهد: بس بعدين راضيتها بطريقتي

غمز وطفر يشرد للبوفيه من وگف شُهيب حتى يكتله عزه انفضحنا بنص المطعم الناس ظلت تباوع علينا، جرت مسرة ايده ترجعه حتى يگعد بس صاير نااار..

-شُهيب: هذا اخوك السربوت ماريد اشوفه بوجهي بعد من هسة اگلك فااهد يصير بوجهي اكتله وداعة امـ...

-مالك: لا تحلف يمعود اسكت ما يجي بوجهك بعد

-شُهيب: طايح الحظ مو رجال هذا نعاال

-مالك: خلص اهدأ متسوه

-شُهيب: هم رجعع!!

-فاهد: چا وين اولي غير اگعد ويه كوريتي

-شُهيب: فاهد ا...

-مسرة: شهوبي جيبلي شي حلو حباب

تسرسح شهوبي صفن عليها صفنة واخيراً شفته يبتسم من گعد الصبح للان هو مزعوج بس هسة تغير مزاجه، بدون كلام گام يجيبلها كيكة وعصير ورجع، حط الماعون گدامها والعصير هم وجابلها شوكة وكلينسه بصف الماعون نسى سالفة فاهد وحتى من رجع گعد بصفي ما اهتمله مهتم بس بالحلو الي گدام مسرة..

-شُهيب: لا تكثرين مو زين عليچ

دتجاوبه وقطع كلامها صوت شهگة جنات فاتحة عيونها على وسعها وتأشر عليَّ وتگول بحرگة..

-شبيييييچ كياااان

-كيان: شبيه؟

-جنات: رگبتچ شبيهاا

جفلت من الكل وجه انظاره عليَّ من الفشلة ماعرفت شسوي لو تذبحوني متلگون قطرة دم بيه تمنيتني مطمورة بالغرفة ولا نازلة على هالخزي.. جنات تأشر بيدها على رگبتي منهارة ومالك ينزل بيدها وترجع تأشر بأصبعها..

-جنات: شوفهاا فاهد شووفهاا شنو منو كااتلچ؟؟ ماالك شُهيب شوفوهاا هذا المثودن كتلهاا

بلع ريگه شُهيب وگام من الطاولة وفاهد حاط رجل على رجل ولا كأنه مسوي شي هذا الحقير، گرصته من ايده بقوة لويتها لوي تمنيت اشلع لحمه..

-مالك: جنات عيوني مالنا علاقة احنه

-جنات: مالك ما اقبل اني على كيان لا بعلي ما اقبل انتَ هَييي منو ثمحلك تمد ايدك عليها والله اگرمعك تگرمع اروح اشتكي عليك يم العلوية وعمو شمثون

-مالك: ولچ ميصير تحچين سكتي سكتي گومي وياي

-جنات: ما اگوم كياان اشتكي عليه خليهم يطلگوچ خيولي هذا الفگر لا تخلي يمد ايده عضي من يكتلچ ونعلي والديه زورگي مثلما يزورگچ

گومها مالك غصب وهي مستمرة بالدردمة تأشر منفعلة ومالك يهمسلها بشي بس البنية راح تنجلط وحقها صدگ المنظر مخيف، طلع فاهد جگارة يدخن وباوعلي خزرته خزررة فوراً نزل الجگارة حمحم وگال..

-فاهد: شسويت اني

-كيان بهمس: حسابك بعدين اني اعلمك

-فاهد: الله راح تعضيني؟

-كيان: اموتك بس اصبرلي

-فاهد: احححح اموت على العنف

النذل اني اهمس همس وهو يحچي بصوت مسموع گمت اللطم بالسكتة واعضعض بشفتي بس اسكت هو شافني هيچ انوب تسوفل بالزايد..

-فاهد: كوري مو هنا حبي مو هنا خلينا نرجع للغرفة

-كيان: الله ياااخذك يا فاهد ابن شامة

-مسرة: من رخصتكم

-كيان: عليچ الله لا ترحين.. انتَ گوم امشي اللحگ اخوانك گووم

-فاهد: مسرة شفتيها شلون تعاملني؟ هاي بعدنا بالبداية وهيچ عنيفة لعد لو صار عدنا جهال شتسوي؟ تعلم صبياني وفتياتي على العنف البشري عيب كوري مو ذولة الكوريين الصغار ملاتنه

گلبت عيونها مسرة بملل وفاهد گام لمادري وين ان شاء الله لجهنم واخلص منه، مديت نفسي على الميز حتى يوصل صوتي الناصي لمسرة وگلت بأستعجال..

-وروحها لامي مو مثل الي ببالكم والله العظيييم

-مسرة: عادي قلبي مو مشكلة هاي الشغلات تصير بس حطي خافي عيوب لو ماعندچ؟

-ماعندي والله ولا عندي شي اغطي وجنات هم ماعدها شال اضافي چنت وياهة من سوت جنطتها وحطت بس شال واحد

-عادي غلسي غلسي

-شگد عيب من شُهيب ومالك

-محد راح يتذكر حياتي بس خلي مسودنچ يلزم لسانه شوية كلشي راح يكون بخير

-تمام تمام

اجالها اتصال وگامت على جهة تجاوب، طلعت موبايلي اعدل شعري اضم رگبتي چان گمت ارجع للغرفة بس اعرفه المسودن راح يفضحني وما اأمن اعوفه ويه شُهيب وحده خاف يچفص بشي ويطيح حظي..

نزلت التلفون بسرعة من شهوبي تقدم للطاولة وبيده فنجان قهوة، حطها على الميز وگعد مقابيلي تنهد يذب نفس متعب يرجع بشعره ليوره بحركته المعتادة..

-شُهيب: شلونچ كيان

-كيان: زينة وانتَ شلونك

-شُهيب: مو مهم اني، شوفي كيان راح اعيدها للمرة الأخيرة لو فاهد جاي يضغط عليچ او يسببلچ تعب نفسي او جسدي تگدرين تنفصلين عنه وهسة بهاي اللحظة واني بظهرچ لا تخافين من شي لا من ردة فعل مروان ولا من عتب نشوان تمام؟

-تمام

-اريدچ قوية، فاهد مو سهل اني ما احچي هيچ حتى اخوفچ بس من واجبي انبهچ وهاي المرة الثالثة راح اعيدها على مسامعچ حبيبتي فاهد مدمن علاجات ميگدر يكمل يومه بشكل طبيعي بدونه وانتِ ما مضطرة تعيشين ويه هيچ انسان بغض النظر عن الصار بيناتكم ماعرف شنو هو بالضبط وماريد اعرف بس انتِ حبيبتي وبنيتي وما ارضى عليچ تبقين عزيزة گلبي واتأذه لو صارلچ شي كيان

لمس ايدي بين ايده وره ما همس الجملة بيني وبينه، عيوني دمعت من الحنية الي بصوته والتأثر بنظراته، لليوم شُهيب ما متقبل زواجي وهاي ثالث محادثة بيناتنا يحذرني ويگلي انسحبي واني بظهرچ ويا ريتني اگدر انسحب وارجع لحضنه وحضن اخواني وارتوي من حنانهم وحبهم..

-شُهيب: واضح من سكوتچ تردين تكملين هذا الزواج واحنه راح نبقى نحبچ مهما كان اختيارچ وتأكدي عندچ ثلاث اخوان وأم يگلبون الدنيا لو انمس اظفر من اظافرچ بس اهم شي ما تسكتين كيان عن أي مشكلة بينچ وبين فاهد مهما كانت بسيطة لا تترددين تجين تحچيلي راح اوگف وياچ ضد الدنيا كلها المهم عندي تبقين سعيدة ومرتاحة

هزيت راسي بـ اي ومسحت دمعة خانتني من كل گلبي متمنية اشاركه بالصار، احضنه وابچي على صدره مثل قبل من يضوجني شي وهو يسمعلي من دون ملل..

-مالك: عفواً على المقاطعة..

سحب كرسي بجانب شُهيب بحركة سريعة وگعد بدون لا يسمع جوابنا، اللتفت بجسمه على شُهيب واردف بنفس النبرة السريعة.. 

-مالك: شُهيب محتاج مساعدتك بشي

-شُهيب: وهو

-مالك: عندي رسالة بيها مخطط يرمز لشي مهم وما جاي اعرف احله عجزت صارلي يومين ادرسه بس ما مفهوم بالنسبة الي وماگدر اطلعه لأيٍ كان لان حياتي واگفة عليه

عگد حاجبه شُهيب مستفسر، حرك راسه مالك يأكد على كلامه وكمل گدامي ممهتم لوجودي..

-انطاني ابوية مهلة ثلاث ايام اذا ما كملت المهمة راسي يطير

شهقت جوه انفاسي بخفة استوعب بس محد انطاني مجال، شُهيب جاوبه بنبرة باردة..

-شُهيب: وشلون تريدني اساعدك؟

-مالك: احتاج صديقك الاسباني

-شُهيب: الاطلس؟ مستحيل!

-شُهيب الموضوع ما ينرادله شي بس يقرالي الرسالة وانتهى كلشي ماريد منه

-تتوقعه راح يساعدك؟ الاطلس راح يكون اسعد انسان وهو يرگص على قبرك خاف متدري

-ادري بهذا الشي

-ما دامك تدري ليش اجيت تطلب؟

-لان ماعندي حل!!!

حچاهة بحرگة گلب واردف بدون خجل..

-ابوية متحلفلي واذا ما كملت هاي المهمة اني بخبر كان! يريدله أي حجة حتى يتخلص مني وانتَ تعرف بهذا الشي! شُهيب اطلب منك مو طلب اخوي لان اعرفك متعتبرني اخوك...

تغيرت نبرة صوته اللينة والمتوسلة الى نبرة غاضبة بيها تحدي..

-اطلب منك مساومة من عدو لعدوه والمقابل راح يكون غالي مهما كان السعر

صفن شُهيب يفكر شوية عيونهم متركزة على بعض واحد يدرس الثاني واني بوسطهم، بعيداً عن ليش حچو گدامي وشعجب ولا ليش شمسون يريد يذبح مالك ولا شنو هالمهمة الخطرة الي يحتاج الاطلس يتدخل بيها بس السؤال المهم والأهم شنو سبب عداوة ذولة الاخوان؟!

-شُهيب: الاطلس مستحيل راح يساعدك مالك ماريدك تتأمل زايد اني اعرفه زين

-لا تگله الشغل الي

-تريدني اغشه؟!

-اي لمرة واحدة سويها غش وگله الموضوع متعلق بيك او بواحد من جماعتك

-ماگدر اغدر بي هو واثق مني

-ما راح تغدره! يا اخي اللگه أي شي بقالي كم ساعة بس!!

-مالك!! جاي تطلب من عدوك.....

سكت بالع جملته بعدما اجت مسرة بيدها كوب شاي اخضر ابتسملها ولا كأن چان يحچي بشي مهم بادلته الابتسامة بس مبين حست اكو شي بين ذولة الثنين فوراً انسحبت تصعد لغرفتهم.. تسائلت ليش عدهم عادي يحچون گدامي بس قطعوا كلامهم من اجت مسرة؟

-مالك: إياك تشاركها بشي

-شُهيب: مالك!

-مالك: لا تتغابى شُهيب! عوف العاطفة وفكر بعقلك هاي البنية مو خالية!

-كافي سد الموضوع

-اني اعرف انتَ شاك بيها بگدي واكثر بس اريدك تنتبه على نفسك منها مسرة قيثارة مو سهلة عدها تاريخ مضطرب قوي لا تنجرف لمشاعرك لازم تاخذ حذرك

-ممكن نرجع لموضوعنا ونعوف مسرة

-نهايتك على ايدها شُهيب وتذكر كلامي! راح تورطك وجاي اشوفك تضيع وتخسر كلشي بسببها ويوصل الموضوع لحياتك ومستقبلك وانتَ تعرف كلش زين اني ما احچي بشي اذا ما متأكد منه

گلبي نبض بخوف مدا افهم شنو سالفة مالك ويه مسرة ولا فكرة شُهيب عن الموضوع اللتزم الهدوء بدون لا يضيف تعليق، چنت على وشك ثواني من القهر لان ما دافعلها بس ردتلي روحي من گال بصرامة..

-موضوعنا مو مسرة هسة! بس مع ذلك شكراً لاهتمامك وخوفك بس اني اعرف مرتي قبل لا نتزوج بيناتنا صداقة قوية واعرف كلشي متعلق بيها سواء هي حچتلي او اني دورت وراهة وشلون ما چانت ما اسمح لأحد يحچي عليها واضح؟!

-واضح

-نرجع لسالفتك، جاي تطلب من عدوك يساعدك بشي متعلق بحياتك استوعب اذا الاطلس افتهم بالسالفة ميرحمك ماريد ادخله بهيچ موضوع لان قبل لا ينتقم منك راح ينتقم مني!

-ما راح يعرف واذا عرف انتَ مهدله الموضوع گله المسألة حياة او موت اساساً هو ميزعل منك وحتى لو زعل بررله كم مرة واعتذر راح يسامحك هو يحبك ومستعد يساعدك بكلشي يملكه

زفر شُهيب بقوة وگدما مالك متوتر اني متوترة اضعاف مضاعفة گلبي راح يوگف اذا شُهيب ميقبل يساعده معناها مالك يموت! راح يقدم اخوه للعدو على طبق من ذهب!

-شُهيب: خليني اشوف الرسالة

طلع موبايله مالك وفوراً فتحله يشوفه، ركز شُهيب بكل حواسه بالشاشة بس مبين ما فهم شي، رفع راسه وگال بحيرة..

-شُهيب: هاي رسالة مشفرة؟

-مالك: لعد شنو جاي اگول كلشي ما افتهمت منها

-شُهيب: هاي مادة التشفير ومستحيل احد راح يفك شيفرتها الا الي يملك المفتاح او يكون مختص وهذا صعب مالك مو أي شخص يگدر يحله

-مالك: الاطلس يگدر هو دارس علوم رياضيات ومادة التشفير اخذها بالجامعة واساساً بحث تخرجه من الماجستير چان التشفير بالمفتاح المتماثل

ضحك شُهيب مستهزأ يباوع لـ اخوه بطرف عينه، نفخ مالك وهز راسه بـ اي وگال من وره خشمه..

-مالك: اي اعرف هواي اشياء تخصه

-شُهيب: من يومك مهووس بي

-ما مهووس! بس ضروري اعرف كلشي يتعلق بـ عدوي

-اي اي احاول اصدگك

-لا تتساخف شُهيب وخلي الاسباني يساعدنا

-تدري من يعرف الموضوع متعلق بيك لو يغرگني تفال هم ميشفي گلبه

-مو مشكلة كلشي اله مقابل اردها اله

-شلون تردها؟

-راح اردها بطريقتي لا تخاف

-اثق بيك؟

-تمام الثقة ما انسى مساعدة احد حتى لو چان عدوي ارجعله المعروف ضعفين

-تمام بس الاطلس ميتحصل بسهولة لازم ننتظر الطاووس يشوف تلفونه

-تريد تقنعني اذا اتصلت عليه هسة ما راح يفز من نومه ويجاوبك؟!

-اي

-شُهيب! لخاطر الله من ايام الجامعة انتو روح بروح مثل الكبلات واحد لازگ بالثاني ما اتوقع اذا اتصلت بي ميجاوبك بسرعة

-ميجاوب يا اخي تعلمني بصديقي؟!

-اي

-ميجاوب مالك اعرفه عدل

-نتراهن؟

-استغفر الله راح اتصل!!

ضحك مالك على ردة فعله طول هالمحادثة اني گاعدة لا گمت ولا تحركت نبتت بمكاني اريد اسمع لكلشي والخدمني محد بيهم اهتم بوجودي وكملو شغلهم.. دگ شُهيب على الاطلس مالك گله دگ كاميرا حتى يأكد كلامه ان لو چان نايم هم راح يجاوب گلب عيونه شُهيب واتصل..

رن كم رنة والطرف الثاني ميجاوب ابتسم شُهيب تك خد منتصر وسد تلفونه يرجعه لجيبه..

-مالك: غريب معقولة صداقتكم متزعزة هالفترة؟ لان مستحـ....

ما كمل الجملة ودگ موبايل شُهيب طلعه وچان نلگه المتصل "الاطلس" ضحك مالك بصوت عااالي منتعشة روحه ويصفگ لانه فاز بالرهان..

-شُهيب: ديلا يلا ما اجاوبه هسة عود بعدين

-بابا ماعندي وقتت الله يشيلك خليتني ابوس الايادي والرجلين شگد نذل!

-شُهيب: هدوء لا يطلع صوتك،،، الو هلا اطلس..

وطبعاً هو متصل كامرا ووصلنا صوته الناعس وهو يگول بعصبية مكتومة شُهيب فوراً نصى السماعة حتى الناس متسمع..

-الاطلس: خير؟؟

-شُهيب: الخير بوجهك حبيبي شلونك مشتاقلك

-الاطلس: تشتاقلك جهنم شكو شتريد

-حبيبي وروحي انتَ بعد شلونك شلونها نانتك

-زينين زينين

-عسى دوم اخلاقك صايرة زفت من يوم طلگت لهسة منتبه على روحك لو لا؟

-مو زين جاوبتك شتريد خلصني شُهيب الدنيا طالعة من عيني

-هاي شنو وين انتَ ولك؟ هاي مستشفى؟؟؟

-لا منتجع سياحي

-شتسوي بالمستشفى؟؟

-اتونس شوية ضايج

-اطلس!

-علساس ما تعرف البيه شُهيب عوفني البيه مكفيني، انتَ وين؟

-اني بالعراق بالفندق تحديداً.. المهم عندي سالفة وياك

سكت ميجاوب ينتظر يسمع شُهيب شيگول، استغربت من نبرته واسلوبه اعرف الاطلس وشايفته كم مرة وعلاقتهم تجنن والاطلس يمووت على شُهيب بس واضح نفسيته تعبانة يمكن عنده ظروف وهالظرف هو طلاقه..

گام شُهيب على جهة يحچي وياه بعدما سد الكام بقينا اني ومالك جاي احس بتوتره وارتباكه، عيونه تاكل وتشرب بـ شُهيب منتظر أي اشارة حتى ينحل الموضوع ويخلص..

-شُهيب: تمام عاشت ايدك راح ادزه...

رجع يگعد ويانه على الطاولة يذب نفس متعب..

-شُهيب: قبل يشوفه وشَك السالفة بيها إن بس غلس احمد ربك واشكره وضعه مو زين هالفترة چان گعدلك ركبة ونص

-مالك: ادري بي انفصل عن زوجته

-شُهيب: دزلي الرسالة وگال الظهر يحلها وينطينا اللغز

-مالك: هاي فائدة يكون صديقك عبقري لا تخسر هالاسباني اكرهه صح بس يحبك هواي

حچاهة مستهزأ ما عاجبه وگام من طاولتنا يروح للمصعد، دورت عيوني على جنات ماكو وفاهد هم ماهو خليت ورجعت للغرفة اجهز جنطتي حتى نطلع من الفندق..

-هيله يا رماااانة هيييلة الحلوة زعلاااانة هييييلة

نعم هذا صوت فاهد من الحمام يغني هاي الاغنية الغريبة الي لا بيها لحن ولا كلمات مفهومة..

-كيان: لو بس افهم شتسوي كل شوية سابح ارتاح

-فاهد: اهووووو حتى سبح ما تخلونا نسبح براحتنا عيشتيش هاااي

-شعليه بيك اسبح بس كافي بربعت

-جلدي يحكني ما اتحمل حر

-اوووي نونو

-ولي عندي حساسية

-لعد شلون چنت عايش هنا قبل العراق جهنم جوهم

-شبعت تحصف بس احب العراق احبببه واحلى ايامي چانت هنا چانت صارت احلى لو مالك وياي بس يله ولد عمي عوضو مكانه

-ليش بس تحچي بمالك شُهيب شبي؟

-نعععل على شُهيب

-هاااي شبيك

-اشششش لا تزعجيني بأسمه وتخربين مزاجي... هيييلة يا رمااانة هيييييلة الحلوة زعلاااانة هييييلا

كمل يغني ويرگص يهز برگبته ويقره هيلا يا رمانة، كملنا ترتيب الجنطة وطلعنا من الفندق لگينه سيارة واگفتلنا بالباب vip.. فاهد عنطز الا يگعد بالصدر والباقين گعدنا وره..

-شُهيب: اكو شي؟ ليش ما جاي تحچين؟

همسها بينه وبين مسرة بس اني وجنات وراهم ونسمع، وحدة باوعت على الثانية ننتظر جواب مسرة وهي تگول بأبتسامة مصنطعة جداً..

-مسرة: لا ماكو شبيك شُهيب هاي خامس مرة تسألني هالسؤال اليوم

-شُهيب: لانچ مو طبيعية

-شلون عرفتني مو طبيعية؟

-ما حچيتي بطريقتچ المعتادة ولا ضحكتي والكيكة ما كملتيها

-ما كملت الكيكة لان شبعت من الريوگ

-ما اكلتي شي بالريوگ مسرة وانتِ تعشقين الحلو حتى لو شبعانة هم تاكلين وما تفوتين هالفرصة

-مسوية دايت

سكت من شافها هادئة وهالشي غريب مسرة ابد مو هادئة نهائياً خصوصاً وياه من قبل نطلع للموقع سوه يقضون الطريق كله يسولفون بأمور عشوائية او خليني اگول هي تسولف وهو يتأملها بنظراته..

وصلنا لبيت العلوية لگينا ولد عمامهم وولدهم والعلوية بالباب يستقبلونا واكو ست خرفان لازميهن من گرونهن، اندار فاهد عليَّ يسوي گرنين بأصابعه على راسه ويگول..

-كيان باعي هاي الگرون راح اللبسهن لخاطرچ

ضحكت رغم بعدني ما فاهمة الفكرة بس جنات خربت من الضحك، رجع فاهد يلتفت گوة حابس ضحكته..

-فاهد: حلو فستانچ مسرة شنو الماركة؟

-مسرة: ديور

-فاهد: شُهيب وانتَ گرونك يا ماركة؟

-شُهيب: انچب ودير وجهك

-فاهد: شبيك هسة واذا اختك خلتني اللبس گرون ماركتهن گوچي

-شُهيب: استغففرر الله يالاسلام

ضحك بخفة يصفگ لان گدر ينرفز شُهيب ويزعجه، بينما فاهد اردف..

-فاهد: مالك انتَ مرتاح نيالك

-مالك: فاهد لا تلح

-فاهد: بس انصحك لبسها نقاب حلوة تسطر سطر عيونها

لطمه بكف ايده من وره على حلگه صاح متألم لان محابس مالك اذت اسنانه حيييل..

-مالك: بعد اذا عدت هذا الخرط اطيح حظك احترم نفسك واگعد راحة

-فاهد: ما اقصد شبيك بطول زري جنات ومرة اخوية فديتها حبابة خوش بنية

بقو يتلاسنون مينزلون من السيارة ومسرة اندارت علينا تهمس بخفوت..

-مسرة: شنو يقصد فاهد؟

-كيان: بشنو؟

-مسرة: على موضوع الگرون شنو قصده ما فهمت

-جنات: هنا الرجال الي ماعنده غيرة على نسوانه خلي يلبس گرون بمعنى مثل الطلي يمشي وياهة

فتحت عيونها وحلگها مصدوومة يمكن اول مرة اشوفها مصدومة لهدرجة، ضحكت جنات تداري الوضع وهمست..

-معليچ بفاهد هذا وحده يلغي اثفة كيان بث نرفزني

-مسرة: حقير! اسفة كيان

-كيان: هو انتن خليتن بيها اسفة چفصتن بي

فتحو باب السيارة ونزلنا لتستقبلنا الهلاهل والهوسات، سلطعون متوسطهم وفاتح ايده بفرحة واضحة منتظر ولده يحضنوا..

اول من تقدم مالك لزمه شمسون يحضنه ويبوس خدوده ويمسح على راسه وانتبهتله همس بشي بيناتهم، بعدها شُهيب وعاد نفس الحركات واخير واحد فاهد..

سلم علينا البنات وجبرنا نبوسه الا مسرة ما قبلت واكتفت بـ مصافحة يد من بعيد..

-شمسون: هههااهههاههها تخافين مني عمو؟

-مسرة: لا عمو بس ما احب رجال غير زوجي وابوية يلمسوني

لصمته على حلگه فشلته بقى بس يضحك، سلمنا على الباقين واخواني استقبلوني بحضن حاار نشوان جعصني جعص ويمسح بدموعه ومروان حضننا ثنينا لصدره يبوس براسي وراس نشوان واني كل شوية اعدل بشعري اضم برگبتي ومسرة عينها علية وتنبهني ، جابو الذبايح ذبحو جوه رجل كل واحد خروف، جرت جنات ردن مالك تهمس بخفوت..

-جنات: مالك مالك

-مالك: نعم

-اريد الباچه حباب خليهم يضموها الي

-مالك: تدللين، علوية كل الباچة ضميها نريدها لا تطبخوها اليوم

-العلوية: بعد امك صاير تاكل باچة وليدي

-خالد: ههههههههه مو اله علوية هاي لـ جنات ولك طاهر صدگ حچيك من گلت جنات تموت على الباچة

-العلوية: راح نظل بالباب شمالكم ما تطبون

دخلنا والولد مستلمين جنات دگ تنمر كومة ولد عمهم كومة حتى اسمائهم ما جاي احفظهن شگد يخلفون!

-علي بضحك: يمكن لسان جنات مگروض من وره لسان الباچة

-خالد: خههههههههه اي اكيد تحب اللثاان

اسلوبهم وقح جداً جداً وقح وواضح ديستهزأون بيها بس هي بالها مو وياهم مركزة ويه العلوية ديسولفن عن شي..

-فاهد: انلصموا كافي!

-قصي: ما جاي نتنمر فاهد بالعكس نحب طريقة كلامها

-علي: اني جاي اتنمر

ضحك ضحكة مستفزة ايييع يلعبون النفس والله لو جنات تسمعهم تصليهم صلي بلسانها..

-فاهد: علي انچب لا يسمعك مالك ويلزگك بالگاع

-علي: يثمعني مالك وراح يذعل اوووي اني شثويت شبيكم قاثين ويانه

-خالد: تره جنات لسانها مگطوم وتضحك من تحچي تلگي مالك يضحك عليها....

انلصم صوته وانبلع كلياً من حس بأحد وراه طرت طرت طررت فرح من شفت مالك اجه ولزم هذا النذل خالد من رگبته من وره يعصرها..

-مالك: منو لسانها مگطوم؟

-خالد: محد محدد والزهرة محد

-مالك: ما جاي اسمع؟

يحچي راص على اسنانه ويضغط على رگبته من وره گدام كل الزلم وحتى العلوية وجنات أنتبهوا عليهم ومحد تدخل..

-خالد: اني جاي اضحك على روحي انييي لساني مگطوم

-مالك: شو تگدر تحچي شلون؟ خليني اگطمه الك خاف ما گاطمي عدل حبيبي خالد...

لزم راسه ورگعه بالحايط بقوة وقسوة شهگنا اني وجنات من شفنا الموقف وسمعنا طگة صوت راس خالد بالحايط الخشن، ما توقعت الحركة خصوصاً من مالك بس ملامحه تقرا برود وجمود ولا كأن تأثر من سوايته عبر الكل ودخل جوه تارك خالد يصرخ من الالم ولازم حلگه وخشمه الينزف دم..

-العلوية: تستاهل خويلد اكيد دست وياه بالحچي بعلي شيسوي بيكم ملك تستاهلون

-غياث: صدگ يستاهل ابن السطل يحچي على جنات

-ابو خالد: غياث!

-غياث: اعذرنا عمي

-العلوية: چا تستاهل بعد كتله ابن القندررة تعال اربيك

لزمته ودگ بالعصاية على ظهره ورجليه وهو منا دايخ من ضربة راسه وگع بالگاع يصيح ويرافس عافته واندارت لـ علي وهم گطعته بالعوچية مالتها والباقين كلهم يضحكون وكأنهم متعودين على الوضع..

اجتني جنات تركض تفتهم شصاير سولفتلها الموقف ظلت صافنة شوية وصارت تضحك الخبلة..

-جنات: الططوة طلع عصبي ما مبين عليه

-كيان: انصدمت بي ذكرني بـ شُهيب من يعصب يخوف يصير حتى نفس البرود والحركات يتبعوها

-عزه خاف فد يوم اضوجه ويكتلني ماگدرله ضخم

-لا ميكتلون نسوان همه

-همزين طمنتيني

-كيان: اي، جنات مو تضوجين منهم ذولة الحقراء المتنمرين مالك رباهم والعلوية هم كفو منها

-جنات: اووي وشكو اضوج يرحون فدوة للثاني (للساني)

-مسرة: سبع فدوات مو فدوة وحدة

ابتسمنا من دخلت ويانه على الخط وصارت بنصنا، اندارت على جنات وهمست بخفوت..

-مسرة: الططوة مالتچ ذكرني بـ هموسي

-كيان: هستوني گلتلها عيناً عصبية شُهيب

دخلنا جوه سلمنا على باقي النسوان وعيوني تدور ماريا وينها مشتاقتلها موت، رحت افتر بالبيت ادورها لحدما رحت للمطبخ بالطابق الثاني حااار يسمط وحاطين جدوره كبار على النار شفتها واگفة لابسة دشداشة عريضة وملبسيها ربطة شاديها على راسها مثل العصابة ودتقطع بصل والدموع تنهمر من عيونها..

-كيان: ماريا؟

اندارت بسرعة بس كأنها خايفة من شي او فازة ماعرف لان ملامحها قلقة مجرد شافتني تغيرت نظراتها وذبت السچينة تضحك وتطفر بمكانها وتصيح بحماس..

-كياااان بنيتي كيااان

شمرت روحها عليَّ تحضني وتطفر بحضني خلتني اطفر وياهة ميتة ضحك على سوالفها، وخرتها مني اسأل عن حالها ولبسها بعد سلامنا الحار تقربت مني تهمس بخفوت..

-هاي وحدة گلتلي لازم تلبسين هيچ لان زلمنا جاي يباعولچ وعجبيتهم

-كيان: عزه منو هاي؟

-هاي السمينة والچبيرة

-ماعرفها ولچ صدگ اكو زلم ديباعولچ ماريا؟!

-ماريا: لا والله لا اصلاً ما شفت أي رجال ماعرف ليش هيج تگول بس هي...

سكتت بسرعة من دخلت وحدة من نسوان عم شُهيب باوعتلها وانتبهت هاي متروسة وضخمة كلش واتوقع هي الي ملبسة ماريا هذا اللبس..

-جيهان: ماريا؟؟ هاي بعدچ ما خلصتي البصل شبيچ فاااهية

-ماريا: جاي اسوي والله ها اها خلصت خلصت

-كيان: خالة، ماريا عيونها تتحسس خطية متگدر تقطع بصل شوفي الدموع

-جيهان: والله حبيبتيي محد على راسه ريشة بهالبيت الكل يشتغل لو هي بزر نستلة وما تتحمل واحنه مطيات شغل نتحمل؟؟؟

-كيان: على كيفچ شبيچ انهديتي بيه دا اگلچ تتحسس عيونها متتحمل ريحة بصل ولا تقطع بصل انطيها أي شغل عادي بس بصل لا

-جيهان: ماعندي شغل غير البصل خليها تثرم وتنلصم وبلا هالعيارة

-كيان: احترمي نفسچ انتِ منو وشايفة روحچ؟ هاي خطار وواجب تحترميها اذا مو لخاطرها لخاطر ابنها الي هو ابنكم

-ابننا على راسي بس اممه منفصلة من ابووه يعني مو واجبناا نتحملهاا ونربي زعاطيطط بطولي ختوليي لفندق وتخلصنا منهاا ومن حساسيتها الزايدة عوووووعع

دفعت ماريا لطشتها بالكاونتر وطلعت من المطبخ متت قهر ونويت احچي لـ شُهيب يطيح حظها هالوصخة!

-كيان: اني اعلمها هالحقيرة لا تبچين حبيبتي هسة اسولف لـ شُهيب كلشي

-ماريا: لا كيان لا تحچين لـ شهوبي حبابة خلي فرحان هو والعروسة

-حبي شُهيب راح يزعل اذا ما حچيتله وهو ميرضى عليج تنذلين ويقهروچ هالشكل

-لا ما زعلانة اني اصلاً ما زعلت ولا مقهورة اني احب اقطع بصل باعي حلو كلش حلو

صارت تقطع سريع قطع كبار عود دتثبتلي هي تحب وما متأذية بس دموعها تحچي غير هالشي وزادت وضعي سوء.. بقت تتوسل بيه اسكت وما احچي وراح تزاعلني اذا گلت لـ شُهيب وما بقى شي وراح نرجع تگدر تتحمل هالكم يوم..

مشى الوقت هنا ومثل ما متعودين الزلم معزولين عن النساء وشبعنا سم من الحياية، ما خلن وحدة بحالها بس مسرة محد حچت عليها بوجهها يخافن من ردة فعلها يمكن لو عركة شُهيب ذاك اليوم جابت نتيجة..

-جنات: كيان بالليل دبريني اريد انام يمچ من البارحة ما نايمة اني

-كيان: ليش ولچ شجاچ

-مو تدرين بيه ماگدر انام الا اللطش بشخص ولو اموت ما اللطش بـ مالك اثتحي

-كيان: اي اي ابقي مستحية احسن

-اي هو هيچ

-باعي بالـ 2:00 بالليل اني ادعبل فاهد من الغرفة حتى محد يحس علينا وانتِ تعالي بسرعة بس بالخفية مو تخلين احد يشوفچ

-اي اي اتفقنا

**

-العلوية: ههههه حبوبا چا همه ذولة زلامنا

ضحك الكل وياهة بعدما طيحت حظ زلامهم على گولتها بالرزايل وانوب صارت تمدح بيهم، تغيرت نفسيتي من گعدت وياهة وسولفت من البارحة اني وضعي مخربط لا نوم ولا اكل احس بـ جبل نايم على صدري بسبب رسالة خطيبة شُهيب السابقة..

ادري ادري دنتنظرون رأيي بالرسالة نجي لوحدة وحدة ونتفاهم، هل ضجت من الرسالة؟ جوابي اي ضجت وتمنيت اطب بالتلفون اكفشها واطيح حظها بس من صفنت بيني وبين نفسي وسألت روحي "على يا اساس؟" منو اني واحاسبه اذا چان داخل بعلاقة او يريد يدخل بعلاقة.. لحد يگول تزوجنا وماعرف شنو علاقتنا عبارة عن لعبة، لعبة گدام ابوية وشمسون فقط لا اكثر ولا اقل..

نجي لثانياً هل عصبت من شُهيب؟ اي والعباس ابو فاضل عصبت ومتمنية انتفه واشرب من دمممه هالحقير العاار الكلب السافل!! بس هم بعدين تذكرت شكو كل هالرزايل هو بكيفه بأختيار علاقاته وميصير احمى زايد..

نجي لثالثاً هل راح اواجه ابو همسة بكوني شفت الرسالة واسأل عن خطيبته؟ جوابي اكيدد لا هيچ راح ابين تافهة وجاسوسة واتدخل بخصوصياته وافتح موبايله من دون ميعرف.. صح ما فتحت الرسالة بس شفتها من الاشعارات لكن مع ذلك هم يعتبر تجسس..

-علي: شُهيب مالك يريدك بره

اجه علي وجهه وشفايفه مورمة بسبب ضربة مالك اليوم الصبح وكالكلب خلاه يعتذر من جنات ولو تشوفون وجه جنات شلون صار چانت خجلانة على متوترة على فرحانة لان مالك دافعلها ومن كل عقله سحل علي وجابه گدامها حتى يطلب منها السماح اويليي يعجبوني الزلم الخشنة.. طبعاً ما اقصد على مالك وانما كشكل عام..

راح شُهيب يشوف مالك وترك محفظته وتلفونه بصفي كلما يگعد يطلعهن من جيوبه، تابعته بنظراتي علما راح والف حوصة صارت بيه اريد اشوف شنو جاوب خطيبته لاحظت محد منتبه عليَّ جريت تلفونه وفتحته على محادثتهم وطلع فعلاً مجاوبها بس للاسف مجاوبها بالروسي..

رصيت على أسناني اكتم غضبي واني اشوف جوابه عبارة عن سطرين بالروسي وهي راجعة مجاوبته هم بالروسي وهو مجاوبها ومجاوبته برسالة وياهة قلب احمر ومجاوبها ومجاوبته وانوب اتصلت بي وما جاوب ورجعت اتصلت ومجاوب الصبح.. واخير اتصال صار بالاربعة العصر شالكم الله وخلصني منكم يا زباايل!

اوكي اوكي اهدأي مسرة وتذكري بشنو اتفقنا؟ اتفقنا منهتم ولا نركز بالنفايات ونركز على نفسنا اذا يريد هاي القردة خلي يروحلها لو يروح لأي قردة ثانية شكو حارگه دمچ؟ واصلاً ليش مهتمة حبي ختولي لا تضوجين منها حتى لو دا اشوفها من صورتها الشخصية شقراء وعيونها خضر ومبينة شطوولها تگولون شاروط بس ميخالف ميخالف عادي هسة شبي القصر والله يخبل..

رجعت تلفونه الوب بمكاني ممرتاحة واختنگت بالزايد، گمت لغرفتنا بالطابق الثاني اخذت منشفة ودخلت اسبح بلكت ارتاح وتنطفي النار البيه.. گعدت جوه الدوش اصفن وحدي وارتب افكاري الوقت الوحيد الي اگدر افكر بي عدل هو جوه الدوش..

عقلي مشوش وكل افكاري ومخططاتي تخربطت، من جهة ميوستي البقت ويه اكرم ما قبل اجيبها ويايه رغم بالاربعة ايام الفاتت البقاها عندي تتذكرون؟ گال چان مسافر سفرة عمل ضرورية بس وجهه من رجع لا يوحي على سفرة عمل لان اجاني مزورگ وتايه وعندي شك مليون بالمية شُهيب اله ايد بكتلته مي بااارد ونزل على گلبي بشوفة اكرم بهذا الحال تمنيت اروح لهموسي ابوسه واگله فددديتك وفديت شعرك الحلو يا بعد الحلوين..

وطبعاً حيرة اكرم وتَيه حاله يفسر ان ما عرف منو السوه بي هيچ لان كلنا نعرف ولد شمسون خفافيش الظلام ومينلزمون بسهولة..

كملت سبحتي ولفيت جسمي بالمنشفة وطلعت من الحمام البخاري عبالك داخلة سونا مو حمام من الحر طبعاً هنا كلش كلش حارة مدا اعرف السبب منين هل من وره الكهرباء المتقطعة او من وره الـ...

-يمممة اخترعتت

نزيت مفزوعة، شُهيب گاعد على الكرسي المقابيل الچرباية حاط رجل على رجل ويدخن..

-مسرة: من شوكت انتَ هنا؟؟

جريت منشفة ثانية اغطي بيها اكتافي العارية، مجاوبني ملامحه مغيمة ومبين عليه ضاايج والطنگورة واصلة للسماء السابعة قلقني كلش وخفت لگفني افتش بتلفونه..

-مسرة: شبيك اشهب

-انتِ شبيچ

اخيراً نطق وطفى الجگارة بالنفاضة، اخذت ملابسي ورجعت للحمام ابدل وصاح بيه ارجع..

-تعالي

-خليني ابدل

-اكمل كلامي وروحي

نزلت الخاولي من ايدي شمرته على الچرباية وانداريت عليه لوما اسلوبه ناعم وصوته هادئ وهو يحچي چان ضجت على أوامره، وگف على حيله وتقدم ناحيتي، شعل جگارة جديدة وذب الدخان على جانبه الايمن، مسح على شعره ولحيته وعاد سؤاله..

-شبيچ مسرة

-مابيه شي

-متغيرة؟ البارحة شحلاتنا نسولف ونضحك ويه بعض ليش من گعدنا الصبح لهسة انتِ ما تحچين وياي وتهربين مني؟

تقدم خطوتين اكثر صار مقابيلي مباشرة، عيني بعينه توترت وماعرفت شنو اجاوبه، ماگدرت اواجهه واگله اني ما مرتاحة بهاي العلاقة وبهذا الزواج كله واحسني طرف ثالث حقير بعلاقة حب انتهت بعدم رغبة، حتى لو هو ميحبني وماكو شي بيناتنا نبقى متزوجين..

-احچي

-ماكو شي اني بس تعبانة اليوم، رايحة ابدل وارجع

تركته واخذت ملابسي ادخل للحمام، بدلت لبجامة حرير سودة وروب قصير، كملت عنايتي كلها بالحمام ومشطت شعري وشسورته ومكيجت مكياج ناعم طولت فوگ النص ساعة توقعته أيس مني وراح وهذا المطلوب..

طلعت من الحمام وشبه متأكدة طلع وعافني بس طلعت غلطانة ولگيته گاعد نفس گعدته قبل شوية وصافن، رحت على الميز اتعطر وگام يوگف ورايه دا اگدر اشوفه من المراية..

-اذا احد جوه ضوجچ بشي احچيلي لا تخليني حاير

-لا ليش تحير محد مضوجني اصلاً منو تسترجي وتحچي ويايه بعد عصبيتك وصياحك ذاك اليوم

ضحكت ادير وجهي عليه اواجهه متأملة يبادلني ضحكة او حتى ابتسامة خفيفة بس ابد جلمود گدامي ما تغيرت ملامحه الجامدة..

دگ تلفونه طلعه من جيبه وشفت المتصل "•" هاي خطيبته السابقة! رفعت نظراتي اله اشوف شكله شلون صار بس چان ريلاكس ولا توتر رفض الاتصال ورجع الموبايل بجيبه..

-شُهيب: البارحة ما نمتي ابد ليش؟

-اممم يمكن لانك نايم على الچرباية والقنفة كسرت ظهري

-گتلچ اني انام على القنفة وانتِ على السرير...

قطع باقي الجملة من رجع رن موبايله وهم هي متصلة تركته براحته اگعد على السرير واسوي روحي اللعب بتلفوني بس عيني عليه اشوفه من المراية، تغيرت ملامحه الجامدة من ابتعدت عنه وحسيته حاير اللتفت عليَّ وگال..

-اجاوب الاتصال وارجع

-لهدرجة مهم

-ما اتأخر

طلع للبلكون الغرفة مالتنا بيها لانها طابق ثاني واني تمددت بالفراش، راقبته لحدما طلع وسد باب الجام وراه ووگف على صفحة يجاوب الاتصال.. ايد بجيب بنطرونه والايد الثانية لازم الموبايل..

شتت تركيزي بي صوت طرق باب غرفتي، صحت يفوتون مابيه حيل اگوم ولو اگوم هسة احرگ هموسي وتلقونه وخطيبته النعالة..

-هلو سرور

رفعت نفسي اشوف منو وابتسمت من شفتهن صبا وجولي واگفات بالباب..

-هلوو تعالن تعالن

-صبا: خاف هموسچ هنا

-مسرة: بالبلكون ديحچي بالتلفون تعالو معليكم

-صبا: لا عيب نروح لعد

-مسرة: دوليي تعالن بنات والقران ضايجة لهوني حتى ماروح ادچه واخلص منه

-جولي: هههههه شمسوي بشنو غثچ؟

-مسرة: ممسوي شي تعالو نسولف شكو ماكو

-صبا: ماكو بس سمعت كيان تصيح ويه فاهد قبل شوية وهو يضحك عليها

-مسرة: بنات هذا البني ادم مو طبيعي!! حقه شُهيب ما قبل يزوجه اخته لچ ينرفز ومستفز وميهمه احد

-صبا: عوفچ من فاهد اريد اگلچن على شي...

بدت تسولفلنا شنو صار من طلعوا من الزفة لحد هاي اللحظة، صبا تحچي واني وجولي فاكات حلگنا ممصدگات تطلع كل هالاعترافات من مروان المطنگر..

-مسرة: وشصاار شنو جاوبتي؟؟

-صبا: مجاوبت بعدني اليوم تلاگينا صرنا وجه بوجه حسيته يريد يحچي ويايه واني ما انطيته مجال ولو تشوفون شلون انعفس وتأذه توقعته راح يعصب بس لا چان مقهور وملامحه حزينة

-جولي: خطية مروان باعي صبا اذا ما متأكدة من مشاعرچ لا تستعجلين انطي لنفسچ فرصة تفكرين وگليله انطيني مجال

-صبا: المشكلة كلها بعصبيته شلون راح نكمل حياتنا ويه بعض و كل يوم نتعارك على اشياء تافهة وسخيفة هاي واحنه بس زملاء عمل شلون لو ارتبطنا وصار حب متبادل

-مسرة: لانكم بس زملاء عمل تصير بيناتكم هالعركات لانه كابت مشاعره تجاهچ وخايف من ردك فعلچ فـ يفرغ طاقته وغيرته بالعصبية والصياح.. الكبت العاطفي كلش مؤلم ويعكر المزاج

-جولي: اتفق ويه مسرة فكري قبل لا تخطين أي خطوة واحنه وياچ بكلشي

-صبا: تمام وقصي؟

-مسرة: حتى اكون واقعية قصي ستايلج، صح ممرتبطة من قبل انتِ بس اعرف ذوقچ شنو بالرجال وشلون تحبي يكون بس قصي بعيد ومتعرفين شي عنه اذا كلش عاجبچ اطلبي تتعرفين عليه

-صبا: معاجبني ومو ببالي بس امي تگول خوش قسمة

استمر حديثنا ربع ساعة وشُهيب للان ما كمل اتصاله، عيوني تنحرف عليه اگدر اشوفه منا واغلب وقته ساكت ويسمعلها هي تحچي اختنگت وضاگ بيه النفس گلبي اشتعل غيرة وحقد!! من عصبيتي ردت اگوم اخذ جنطتي واروح أاجر فندق بره بس بصعوبة وصعوبة قسوى سيطرت على روحي..

-جولي: هسة نجي عليَّ بنات..

-صبا: اييي يله خنشوف ابدي جولي ابدي

سكتن وگامن من الچرباية من رجع شُهيب للغرفة رادن يطلعن وما قبل هو اخذ تلفونه وراح بره اكيد يحاچي القرددة مالته..

-جولي: سرور وياي؟

-مسرة: اي احچي

-جولي: اول شي مسرة انتِ وشُهيب بعدكم بنفس الوضع؟

-مسرة: شنو قصدج

-جولي: علاقتكم على ورق؟ ماكو مشاعر بيناتكم؟

-مسرة: اكو نععععل وقناادر مگطططعة على راااس نعالسين الخاايسة!!!

-صبا: منو نعالسين ولچ هاي شنو اكو تحديثات واني مادري؟

-مسرة: عوفي عوفي الموضوع لا تخبليني واروح اتعارك وياه بهالليل

-جولي: مسرة اني اريد اطلع ويه شُهيب

-مسرة: وين تولون؟؟؟

-جولي: نتعرف

شهگت شهگة من نص گلبي طلعت ما متوقعة هالجواب ولا متوقعة هالطلب الوقح، اردفت بنبرة سريعة تبرر..

-جولي: بس تعارف انتِ مو گلتي زواجكم على ورق وماكو مشاعر متبادلة؟ يمكن اني وياه نرهم شمعرفچ

-مسرة: رووحيله حبي رووحيله خنشوف اذا يعبرچ لو يهتمممم

-جولي: مسرة شبيج! شنو هالحجي ليش اني شبيه؟!

-مسرة: جولي هذاك هو گدامچ رووحي شتسوين سووي عسى ناركم تاكل حطبكم شُهيب ميهمنييي بشي بس من هسة اگلچ هو عنده تواصل ويه خطيبته السابقة وماعرف شنو نوع علاقتهم اذا كسر گلبچ اني معليه؟؟ مو تجين تگليلي ليش ما نبهتيني وگلتيلي بهالشي!!

-جولي: قابلة عادي اني اخلي يحبني

-مسرة: حببتتتچ جرراااادة

-جولي: مسررررة

-صبا: مسرة احچيي شنو سالفة خطيبة شُهيب ولچ صدگ عنده علاقة بيها؟؟

-مسرة: ماعرف شنو نوع العلاقة بس بعده يتواصل وياهة القردة بنت القررد ولچن لو تشوفنهااااااا

من العصبية لزمت مخدتي اعضعض بيها جولي انتفضت وگامت من مكانها توگف على حيلها زيدت وضعي سوء من گالت بعصبية..

-جولي: ماكوو خطيبة ماكو زوجة ماكو حبيبة البقاء للاقوى عيونيي انتِ متردي مو؟؟ خلص اني اعرف شلون اخلي يحبني وتشوفننن

عافتنا وطلعت من الغرفة ولاول مرة اظل فاكة حلگي ماعرف شگول وشنو اجاوب مثل الطرنة هيچ صافنة..

-صبا: غبيية غير تحچين وتگولين انتِ تردي وتغارين عليه غبررة ثوولة مطية زماالة مسررة

-مسرة: شريد منه صبا؟؟ اگلچ عنده علاقة بصخلته اصلاً هيچ احسن عرفت من البداية ولا اورط روحي وياه وابوية يطيح حظي

-صبا: وين چانت هاي صخلته كل هالفترة لو من ارتبط بيچ نبزت!!

-مسرة: يمكن اشارة من الله هاي حتى متطور الامور بيناتنا ومحد يخسر بالنهاية غيري من ابوية ياخذ حقه من شمسون وولده

-وجولي؟؟ خاف صدگ تخلي يحبها!!

-خليها احسن حتى اعرف اذا انطاهة مجال هو شنو نوعه وشنو نيته تجاهها وتجاهي وتجاه خطيبته الخايسسة المعفنة الغبررة

انطرقت الباب سكتت صبا وگامت تشوف منو طلت فيروز تمد راسها من الباب وتگول بأبتسامة..

-صار العشا يا حلوات

-مسرة: ماشي حبيبتي نازلين

طلعت صبا تبدل ملابسها واني هم گمت ابدل خوما انزل بالبجامة فشلة، فتحت الجنطة ادورلي على لبسه وانفتحت الباب وطل منها شُهيب.. ما اهتميت لدخوله وكملت ابحوش بالملابس..

-شُهيب: صار العشا

-امم

-ما كملنا حديثنا

-اي

-تحبين نحچي هسة لو وره العشا؟

-ماعندي شي احچي اگلك تعال ساعدني اختار شي اللبسه شو دخت

ما گال لا وگف بصفي يدورلي على لبسة من الجنطة ببالي شي واريد اتأكد منه ومثلما توقعت ما صدگ اجته الفرصة يتحكم بملابسي صار يشيل بالملابس يشوفهن ويرجعهن بالجنطة الى ان استقر على السوت النيلي..

-شُهيب: هذا حلو

-مسرة: لا شنو لابسة هيچ تريدهن يضحكن عليَّ

-ليش؟

-اني عروسة لازم اللبس شي حلو

-مسرة والله حلو هذا

-لا شوف هذا

جريت فستان ربع ردن كلوشة وردي فاتح ما قبل وشفت الاعتراض بعيونه جره من ايدي وگال بنبرة سريعة..

-لا لا هذا مو حلو هذا احلى

-شنو نيلي مال عجوزات

-حلو

-مو حلو

-حلو حلو

-مو حلوو

-حلو ومحتشم ومرتب وانيق

-مو حلو ومبهذل وعريض ومرعبل

-مسرة

-عيووونييي

ذب نفس حاير، تعمدت اخذ "فستان نوم" نعم مو فستان عادي ولا دشداشة لا فستان نوم لونه اسود قصير يوصل لنص الفخذ الظهر والصدر مفتوحات رفعته گدامه وگلت بفرحة..

-هذا الفستان يخبببل مووو

جمد صافن عليه ظل لا ياخذ ولا ينطي وعيونه تقره رفض قاطع ااااااه يا للسعادة عرفت شلون اغثه وابرد ناري بي.. ركضت للحمام فرحانة ونويت اللبسه بس اكيد ما راح انزل بي شنو مخبلة بس ردت اخلي يفرفر بأذاناته وصدگ يلبس گرون اني اعلمك شُهيب يابن شمسون العار قردتك مصلخة بصورتها الشخصية متغار بس من يجي الموضوع الي متقبل واشوف عيونك تطاير منا ومناك اصبرلي!!

لبسته وباوعت لروحي بالمراية يجننن ويفشل بنفس الوقت ماعرف شلون راح اطلع گدامه واخلي يشوفني هيچ بس طززز اي والله طز الا اشعوطك..

لفيت اطراف شعري سويته كيرلي مفتح وغمقت مكياجي وبرزته بحمرة طوخ وتعطرت من جديد وطلعتله بس گلبي يرعد رعد متوترة..

-هااا شرأيك؟؟؟

وجهه گام ينطي اللوان اصفر على احمر على بنفسجي فرك رگبته من وره وظل يرفع بخصلات شعره يرجعه ليوره حركته سريعة ونابعة من توتر بلع ريگه وگال..

-شُهيب: هيچ تردين تنزلين؟

-اي بس حايرة بالاكسسوارات تعال اختارلي انتَ

-اگلچ تعالي شوفي هذا

شال نفس الفستان الوردي الكلوشة يحطه بوجهي ويگول بأبتسامة مرتبكة گووة كتمت ضحكتي على حركته من گال..

-شُهيب: هذا حلو صح كلامچ قبل شوية كلش حلو لبسي

-لا هذا حبيته اكثر

-مسرة والله هذا حلو راح يرهم للون بشرتچ ورفعي شعرچ وخففي مكياج يطلع كلش حلو

-no no

-مسررة

-شهوبي اوبي اوبي الي لابسته يرهم للعرايس غير احنه هستونه عرسان جدد

-الي لابسته ينلبس بغرفة النوم مسرة هذا مو لائق تطلعين بي ويشوفوچ باقي الزلم!

-حابته كلش هوت

-لا هذا مغرري مو هوت!! اكو اختلاف بيناتهن الهووت شي جذااب وحلو والمغررري يثيرر حتى المططي

-اممم لا مو لهدرجة

-لهدرجة ونص شوفي نفسچ بالمرااية لخاطر الله!!

-شفتها وطالعة كيوت

-كيوت؟؟؟ هههههههههههههههه گلتيلي كيوت؟؟ يمكن انتِ ما تفرقين بين الكيوت وبين اليشگ ششگ

راح افطس من الضحك وتغير مزاجي بالكامل ماتحملت انطيته ظهري بس حتى اضحك براحتي وميشوفني وتركته ورايه محترگ، رحت للمراية اللبس مجوهراتي وهو باقي يفتر بمكانه..

كملت ترتيب نفسي وشمرتلي بوسة بالهوا للمراية ابوس شكلي وجمالي بس بعد ما تحمل شُهيب واجاني وسحبني من زندي على كيف ودارني عليه، رفعت راسي حتى اشوفه عدل بسبب فرق الطول الشاسع بيناتنا..

-اني مريض

-شنو

-احسني مريض ماريد انزل اتعشا

-ها سلامتك

-اي اگلهم يجيبولي العشا هنا

-اوكي اني اجيبه الك

-لا لا يمعودة شنو انتِ تجيبي دخيلچ

-ليش مو اني زوجتك؟

-اي بس ليش تتعبين انتِ ماقبل عليچ ابقي هنا وياي نتعشا سوه

-لا وعدت صبا وخالة ماريا اتعشا وياهن جوه

-نجيبهنننن

-اوي شُهيب ليش تعيط بوجهي ما اتحمل اني

-مسرة ابقي يمي هنا لا تعوفيني وتنزلين

-اني جوعانة واريد انزل يم البنات

-اجيبهن كلهن يمچ هنا وشرفييي

-اممممم

-اني مريض حسي بيه تعبان وضعي مو تمام

دگ تلفوني بنص حديثنا الممتع عفته واگف ورحت اشوف منو ديتصل بيه اييييييييع ايييييييييييع هذا صقر ريماس اييييييييع شيريد هالعار ما لعبت نفسه مني مو اني لعبت نفسي من نفسي..

-اوگف اروح اشوف شيريد مني وارجع

-منووو

انتفض وسأل بعصبية وهاي اول مرة يسويها واات ماذا يحصل هنا؟ الوضع بده يصير احلى واحلى واني مستمتعة على الاخر الحمدلله لگيت احد يغار عليَّ قبل لا اموت همزين ما ظلت بنفسي..

-مسرة: فد واحد

-ما احب اتدخل بخصوصياتج بس ممكن اعرف منو

-لا

عفته وطلعت للبلكون امثل دا اجاوب صقر ريماس المزعج بس طبعاً ما فتحت الخط، مديت نفسي اشوف الحديقة منا فارغة محد اكو والجو بالليل يخبل عجبني كلش ونسيت نفسي هنا التلفون عود حاطته على اذني وواگفة اتأمل جمال الجو والحديقة منا..

-شُهيب: ما خلص هالاتصال؟!

اللتفتت عليه والتلفون بعده على اذني، سويت روحي اودع الطرف الثاني ومثلت دا اسد الخط..

-لا ما خلصت بس يله لخاطرك سديته

رجعت جوه وهم بعده ورايه يمشي احس بنشوة سعادة گدرت اعيشه جزء من العشته قبل شوية من چان يحچي ويه القردة..

-شُهيب: راح اگلهم يجيبولنا العشا هنا

-لا حياتي انزل اني

-مريض اني مرريض مررريض حسي بيه شلون تعوفيني وحدي بله صار بيه شييي

-مابيك الا العافية لتخاف ما راح اتأخر بااي

مثلت عود دا اريد اطلع وخلع ايدي جرها قبل لا اوصل للباب وسحبني بقوة من خصري يلزگني بي، رفعت عيوني اباوعله وجهه عرگان وصاير احممر ددم، انفاسه حارة تلفح وجهي وقابض على فكه بقوة يمعود گلبي ميتحمل كل هالجاذبية على كيفك ويايه..

-اطلب منچ لاخر مرة بكل لطف تحترميني وتبدلين هذا الفستان

-واذا ما نزعته؟

-اشگه عليچ!!

اءءء؟؟ نعم نعم نعم هل اذاني سمعت الكلمات هاي لو اني بديت اشخط؟ بس تأكدت هو فعلاً گالها لانه غمض عيونه وزفر نفس قوي ونزل اكتافه بطريقة الاستسلام..

-مسرة بهذلتي حالي

-ليش شهشهوي

-اااااخ يابة

قاطع للمرة الثانية النظرات والكلمات واللحظات المثيرة صوت تلفوني والمتصل هم صقر ريماس، دفعته من صدره ابعده مني وهالمرة اني الفجرتها من سألني منو يتصل بيچ وجاوبته..

-مسرة: حبيبي هذا

جفلت وانگطع نفسي من سحب التلفون من ايدي ورگعه بالحايط بكل قوته فلشه تفلش، شهگت جوه انفاسي من حركته المفاجأة والغريبة وعصبيته المفرطة وهو ينفض نفض وكلشي بي يرجف..

-شنوووو تشوفينيييي گدامچ؟؟؟؟ لهنااااا وكااافي وصلتتت حدهاااا شايفتني ******* وتحاچين صااااحبچ گدااااامي؟؟؟؟؟

-شبيك

-انتِ البييييه انتِ!!! كلشييي جاي تسووووي بس حتى تستفزززيني وتلعبين بأعصابييي وتمسيييين رجولتييي وتذلينييي!!! تعررفييني ماگدر اضغططط عليچ واحچييي وياااچ!! بس ما جاااي يهمچ شيي و تردين تشوفيني عصبي وفاييير بأي طررريقة كانتتت وهسسسة مبروووك نجحتي مسرة قيثااارة اني عصبييي لدررررجة احرگ ******* صاحبچ واحرررگ الخلللفة فووووگاااه

فشر على حبيبي الوهمي وشمر كلامه شمر وطلع للبلكون يطبگ الباب الجام وراه بدون مبالغة حسيته شوية ويفترسني لو يسحلني من شعري عيونه تخوف ونبرة صوته تغيرت صارت اقوى واعلى، نعم ادري تصرفي غبي وماكو رجال يتقبل هالشي بس غيرتي عليه من القردة اغبى واحتاجيت ارجعها اله بأي طريقة كانت حتى ما اموت مجلوطة بفراشي..

گعدت على الكرسي اتصفن وافكر بالموقف، مر وقت وهو بره ما قبل يدخل واتوقع طلع حتى ميسوي مشكلة اكبر كلما يكون عصبي يخلي واحد من عدنا يروح لمكان ثاني حتى ميصير شي غلط بيناتنا..

مديت نفسي اشوفه واگف منطيني ظهره وفاتح جگارة، بقيت اراقبه لفترة طويلة وشفته يدخن فوگ الست جگاير صدري گام يوجعني نيابة عنه وحسيت بحرگة اذتني..

گمت من مكاني شلت موبايلي من الگاع شفت شاشته محروگة ومتفلش ما اهتميت ولا ضجت حطيته على جنب وطلعت للبلكون وگفت وراه وعرفته حس بوجودي بس غلس عليَّ وفتح الجگارة السابعة..

-ما اختنگت من الجگاير؟

مجاوبني وبقى يدخن ممهتملي تقربت منه اكثر ودست على ظهره بأصبعي انبت اظفري بي..

-اكرهك

-اعرف شكراً

-انتَ همجي

-اعرف

-وبربري

-جيد

-چنك نمر متوحش مكشر على انيابه

-امم

-وعصبيتك تخوف

-اعرف

-وماعندي حبيب

راقبت عضلات ظهره شلون ارتخت بعد هالكلمتين، دست ظهره مرة ثانية بأصبعي حفرت اظفري بي اكثر ناوية اأذي حتى يباوعلي وكملت..

-ما مرتبطة اني شُهيب چذبت عليك

شمر الجگارة بالحديقة واللتفت يواجهني صفن بوجهي ثواني وفاجأني من ابتسم لا مو بس ابتسم ضحك! اي والله ديضحك وبرزت اسنانه البيضة وبحركة سريعة غافلني وجرني من خصري عليه حضن وجهي بين ايده وباسني على خدي..

فتحت عيوني مصدومة من تصرفه، باسني بوسة مطولة وشمني وراهة يستنشق عطري ومغمض عيونه، مغص صار ببطني من بقى هيچ لدقيقة كاملة بدون لا يتحرك..

انتبهت على نفسي ورجعت لوعيي وخرت نفسي منه حتى يبتعد بس ما وخر بالعكس شدني من خصري اكثر يحاوطني بتملك وقوة عصرني بين ايده العنيفة..

-تأدب

-هههههه حاضر

-وخر عني يا فاسق تره هسة اروح ارتبط واخليك تطلع بالشارع مصلخ

ضحك بصوت عالي، عالي لدرجة ضحكت وياه ممتوقعة هالضحك يطلع منه..

-مسرات انتِ فد وحدة...

-حلوة؟

-اي وفد وحدة...

-خوش بنية؟

-هههههه اي و..

-وحبابة ومؤدبة ولطيفة؟

ضحك يهز براسه اي، حررني من ايده من گح كم مرة ينطيني ظهره الله يساعد رئاته على الجگاير اليحرگهن كل يوم..

-اعتق نفسك من الجگاير الا تموت ياله ترتاح

-راح تفرحين بموتي؟

-اموت من الفرح

-بس مو تنسين توزعين ثوابات على روحي

-انتَ موت ومعليك خلي الباقي عليَّ

ضحك خفيف و طلع كلينسة من جيبه يمسح العرق من جبينه وگال بنبرته الهادئة المتعودة عليها..

-اعرف بيچ ما مرتبطة مسرة

-هااا؟

-تتوقعيني اعرفچ مرتبطة واقبل اتزوجچ؟

-لا بله ليش عيوني تستنكف؟؟؟

-مو هيچ بس ماحب اخذ حاجة غيري

-اني مو حاجة اني بني ادم

-تبقين حاجتي ومستحيل انطيچ لاحد

غابت ابتسامتي وبلعت ريگ وره جملته الاستحواذية من شاف وضعي المستغرب عدل على جملته فوراً يضيف..

-اقصد ما طولنا متزوجين

-بس مو من حقك لان زواجنا على ورق انتَ الك حق ترتبط وتكمل حياتك واني هم

ابتعد يوگف على جهة قريب باب الغرفة رافع تك حاجب معاجبه كلامي بس ما لحگ يعلق بسبب صوت صفير اجه من جوه مديت نفسي واذا اشوفهم ثلاثة من ولد عم شُهيب الادبسزية واگفين بالحديقة يباوعولي ويصوفرون..

-وللللك باااع الكيييك بااااع

-بووويااااا مو مرة طرگاعة

ابتعدت بسرعة اضم نفسي ملابسي فاضحة واني ناسية روحي، باوعت لـ شُهيب عاگد حاجبه مستغرب المن يا ترى موجه هذا الحديث؟ تقدم كم خطوة يظهر نفسه الهم وصاح واحد بيهم بصوت خايف..

-ولكمم خرررب امكمم شُهيب هنااا ولك شُهيبب

اشر لجماعته يشردون وشُهيب شال سندانة ورد حجمها وسط محطوطة على جهة وشمرها على واحد منهم اجت فيييت عليه و تفلشت على راسه..

-شُهيب: جااااااايكم ولد الكلللللللب

-والعبااس التوبة وعليي والزهرررة وروح اميي التوبة ما عرفناااها

ركض واحد منهم لباب الحوش ويصيح بيهم..

-ولكمم امشووووو اليوم مكتولين مابيها مجااال لا تظلووون تتوسلووون

طلعو يركضون وشُهيب رجع للغرفة يركض حتى ينزللهم لزمته بالباب ما اخلي يروح صاير نااار واعرف راح تصير مشكلة چبيرة جوه وتعبت من المشاكل من اجينا لسه ما ارتاحينا يومية سالفة..

-هددديني مسرررة اروح اربيهممم

-شُهيب حباب شبييك وين رايح اني غلط اوگف بالبلكون هيچ بس تأكدت الحديقة چانت فارغة ومادري بأحد راح يطلع

-هددددينييييي

-والقرااان اذا نزلت ما احچي وياك بعد هسة اخذ اغراضي واطلع مناا كافي تعبنا

جر ايده مني ويزفر سموم وحميم من العصبية طبگ الباب بقوة وراح يگعد على الكرسي يحرك برجله بعصبية مسيطر عليها بصعوبة..

-مسرة: جو العراق كلش مدا يناسبك من يوم اجينا هنا انتَ بس عصبي وصاير شعلة نار

مجاوبني وبقى على هالوضع لفترة من الزمن، انطيته گلاص مي شربه كله وانطيته ثاني هم شربه ولو منطيته ثالث هم يشربه بس كافي لا نصير اوڤر، اندگت باب غرفتنا توقعتها وحدة من البنات يذكرونا بالعشا..

-اوگف اشوف منو بالباب

-لبسي شي فوگ ملابسچ

هزيت راسي اي ولبست روب ورحت افتح الباب وتفاجأت من شفته..

-مسرة: مالك؟

-مالك: ممكن تصيحيلي شُهيب

اساساً الغرفة مو كلش چبيرة فـ شُهيب سمعه وگام يشوف شبي..

-مالك: اجيت اشكرك على موقفك اليوم ولانك جازفت بصداقتك ويه الاطلس وحليتولي الموضوع

-شُهيب: العفو

-مالك: واجيت اطلب منك شي ثاني ادري كثرت طلباتي بس ماعندي غيرك حالياً

-شنو هو

-أريدك تهتم بـ جنات

عگد حاجبه شُهيب ولا ارادي سويت نفس حركته بسبب طلب مالك الغريب..

-مالك: مسافر اني اليوم بالليل وماعدها احد، اختها ايات لحد هسة متحچي وياهة وجنات كلش زعلانة من تصرف اختها وماريدها تبقى وحدها ويزيد وضعها سوء

ابتسمت على اهتمامه بيها وشلون شايل همها مع العلم ثنينهم ميحبون بعض وزواجهم اجباري بس حنون عليها اكثر من اختها..

-شُهيب: تمام

ضحكت بگلبي يااابة يالبرود حتى ما سأله وين مسافر وشعندك، ابتسم مالك ممتن واردف بنبرة تحمل خجل من كثرة طلباته..

-مالك: اعتبرها مثل كيان وشوف طلباتها وراقب اكلها لان ما تاكل زين الا واحد يجبرها ولا تخلي واحد من الولد يزعجها

-شُهيب: لا تخاف ما راح نخليها تحتاج شي

-واهم شخص لا تخلي يتقرب منها ابن عمي ليث انتبه شُهيب اكثر واحد اريدك تركز عليه لان مو راحة هالولد

-شنو يگدر يسوي والكل موجود

-باچر العلوية عازمة الكل بالبستان وعلى الاغلب عمي عادل راح يجي ويجيب بناته وابنه ليث ماريده يشوف جنات ولا يحتك بيها اگدر اعتمد عليك؟

-ليش متوصي فاهد؟

-فاهد ما أمن دجاجة عنده تريدني أمن على بني ادم

رفع شُهيب حاجبه بأستنكار فهمت حركته وكأن ديگوله متأمن دجاحة عنده وضغطتو علينا حتى نزوجه كيان..

-مالك: لا تخاف هو مهتم بـ كيان لانها تعجبه بس راح يسرح على جنات وهذا قصدي

-تمام تمام

-يله سلام

طلع وافتهمت سفرته لـ تركيا علمود شغل خاص ابوه جبره يكمله وراح يطول ستة ايام واكيد عرفت هالمعلومات من ابوية من اتصلت بي.. بس ياريته ما سافر ولا وصانه هالوصية وحسيته شركني بوصيته لان انظاره چانت تتوجه الي من يحچي.. محد چان حاسب حساب هالمصيبة الجديدة الي وگعت مثل الصاعقة على روس الكل واول المتورطين بيها هو شُهيب.....

يتبع.....

━━━━━━  ━━━━━━

مسرة وكيان وجنات اجو للعراق يتزوجون ❌
اجو يوگعون كل يوم بمصيبة 🥲✅

توقعاتكمممم 💀🩷؟؟