رواية ابناء الحسوم "شمسون" الفصل الثامن والعشرون 28 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

<أخبرهم أنكَ مُلكي، أرهقتني الغيرة ♥️>..

━━━━━━  ━━━━━━

"جنات"
اول ما نزلنا بالمطار اجو زلم ياخذون جنطنا وينقلوها للسيارة، لحد الان مالك وابوه ميتحاچون بسببي قبل لا نسافر طرحت عليه فكرة الطلاق وهسة هم كررتها گدامه وگتله اجه وقتها وراح يگدر يرتاح مني بس ما قبل وعارض معارضة شديدة وگال بالضبط..

-مالك: سدي هذا الموضوع جنات!

-جنات: ابوك معاديك وفاهد گال متحلفلك

-لا تخافين راح نتطلگ اي بس مو هسة انطيني صبر احول الاملاك بأسمچ واعوفچ

-لا مو هيچ بث..

-بدون بس هذا حقچ واموالچ محتاج اللهي ابوية عن موضوع الأملاك هالفترة وانقلهن الچ بالسر بدون لا يكتشف، بعد مرور ساعة وحدة من التحويل لحسابچ البنكي اعتبري نفسچ طالق!!

-شبيك معصب عليَّ

ما جاوبني وزفر نفس بس وجهه مگلوب تنرفزت وسكتت ما اللاسن احتاجه هالفترة واني وحدي وراح نبقى ببيت واحد ضروري احاول احسن من صداقتنا..

لليوم حالتي مو زينة بس احاول اغير جو وما اتذكر الي صار، بس اكثر شي اذاني وخسف گلبي وكرهني الدنيا هو ليث.. كسرتي بـ ليث چبيرة حب اربعة سنوات يروح بليلة ويوم ويطلب مني شغلات وصخة واني على ذمة رجال ثاني؟ هضيمة!!

ركبنا السيارات فاهد وكيان بسيارة واني ومالك بسيارة ومسرة وشُهيب وعائلته بسيارة وشمسون مثل الچلب وحده راح..

الطريق من المطار لبيت مالك خيال! ولا بالاحلام الطريق معبد وكله اشجار من الجهتين صايرات مثل المظلات مغطيات الطريق مادري هنه هيچ او البلدية مسوين هالفيكة.. الجو حلو كلش بس مغيم والدنيا تنث مطر خفيف، شگد تمطر بهالبلد..

برود شديد محاوطنا بالسيارة يشبه برود روحي، السايق يسوق كلمة ما نطق ومالك گاعد بصفي يشتغل على الحاسبة ورايح بغير عالم، بعد مرور اكثر من ساعة وصلنا لمنطقة احلى من الطريق نفسه كلها اشجار عالية كلش والورق صاير ملون مو اخضر.. ابتسمت امد راسي من الجامة اتمايز المنطقة الجميلة الهادئة مبينة مال الطبقة المخملية لان ماكو زعاطيط تلعب بالشارع..

-مالك: تفضلي

انتبهت وياه من وگفت السيارة گدام بيت بنائه حديث اورپي بحت مابي مميزات من الخارج هيكلته المعمارية انيقة وشكله حلو..

نزلت من السيارة والسايق انطى لمالك مفتاح وحچى وياه بشي ما فهمته بس من الاشارات وضحت الفكرة ان هو رايح واذا مالك احتاج شي بس يتصل بي.. اومئ مالك براسه واشرلي ادخل قبله..

-تفضلي انستي

توترت ورجفت رجليه باوعتله مرتبكة ومترددة شجعني بيده حتى ادخل هزيت راسي وسميت بأسم الله ودخلت برجلي اليمين رغم ارتباكي بس عندي فضول اشوف بيته من الداخل تخيلته بعقلي شلون راح يكون وابتسمت من شفته يطابق خيالي بالضبط!

بيته عميق جداً من الداخل وچبير مساحته اكيد لا تقل عن 600 متر هيچ توقعته براسي، صالته دائرية عملاقة ويحاوطها تخم قنفات رمادي داير حبل ويتوسط المكان شاشة بلازما ومدفأة لونها اسود..

رسمي.. كلشي رسمي واللوانه حيادية محصورة بين الاسود والرمادي ومشتقاتهن، حتى ميز الطعام اسود والكراسي رمادي بس الحلو بيته مو كئيب ابد منور واكسسوارات المكان واللوحات جميلة جداً ضايفات روح حلوة بالمكان.. اخذت صفنة على كل لوحة اوگف اتأملها وافكر بقصتها..

لوحة عملاقة جذبتني متوسطة الصالة عبارة عن رسم فرس شقراء وايد مرة مصبغة اظافرها وردي فاتح دتمسد شعر الفرس وگفت اباوعلها وحسيت بمالك يوگف بصفي..

-مالك: صورة امي هاي

-شگد حلوة الصورة، ومن ايدها مبينة صاكة ههههه

ابتسم يهز براسه تقربت اكثر على الصورة حلو راسمها ومعلگها هنا صح الصورة جميلة جداً بس تجذب لان اللوانها وحيويتها تختلف عن اللون الاسود والرمادي المحاوط الصالة..

-مالك: بهذا اليوم تعرفت امي على ابوية وهو اخذلها الصورة

-الله صدگ؟

-اي

-انتَ تشبه امك؟

-يگولون

-ما شايفها؟

-لا

-ابد ابد؟ حتى صورة؟

-عندي صورة وحدة وقديمة ما مبينة ملامحها زين بس الاعرفه امي شقراء وامرأة جميلة

-يا حبيبتي الله يرحمها

هز راسه وراح مادري وين بقيت اني بالصالة افتر بيها هواي تفاصيل بس كلشي حلو وبسيط بطريقة راقية مبين ميحب الشغلات الاوڤر مثل بيت فاهد چان فخم كلش وطرازه مال قصور..

-مالك: جنات غرفتچ بالطابق الثاني بيها حمام وصالة صغيرة حتى تاخذين راحتچ

-هااا

-فوگ منا تصعدين الدرج صاير جانبي

-هاااا

-شنو؟

-ماريد

-متحبين الطابق الثاني؟ مو مشكلة انطيچ الغرفة الجوه بس مابيها صالة منفردة مثل الفوگ

-مو.. احم مو باوع هاي خلينا ننام هنا

-تردين تنامين بالصالة هنا؟

-اي احب انام هنا

دور عيونه بالمكان حاير يباوع للقنفات مو مال واحد ينام عليهن ضحك خفيف واشرلي على الغرفة الجوه..

-جنات والله بالغرفة اريحلچ اني جماعتي دائماً يجون هنا بالليل خاف يزعجوچ

-يطبون هنا بالصالة؟؟

-لا لا يصعدون گبلهم فوگ عندي صالة خاصة بينا واذا گعدو هنا ابلغچ قبل بوقت اكيد

-ها يعني ميشوفوني مو؟

-اي اكيد

-زين شثمه.. باوع عندك مثاعدة؟

-لا

-لعد منو ينظفلك

-اني انظف

-گول والكعبيببة

-ههههه

-شلون تلحگ تنظف وتشتغل بنفث الوقت اعرف الزلم فاهيين

-الحمدلله مو فاهي اني ومدبر وضعي

-زين شوف شوف.. انتَ وين راح تنام؟

-اني غرفتي هناك

اشر لممر طويل عبالي هذا ترك بالبيت اثاري هالبيت بي بعد مساحة جوه، شلون حظ تأملت عنده مساعدة حتى اخليها تنام ويايه بالغرفة انلاصت عليچ يا جنات..

-مالك: هسة ما گلتيلي تنامين فوگ لو جوه حتى ادخل جنطتچ وترتاحين

-جوه

-تمام

اخذ اغراضي للغرفة وصاحلي حتى ادخل ابدل وارتاح، طبيت للغرفة تخبل وتفتح نفس أي واحد بس شبيه انكرب گلبي وراح ابچي، ترخص مني وگال يروح يبدل وراهة للمكتب مالته خفت اضعاف شلون راح يعوفني وحدي كل يوم هنا ويطلع للشغل؟..

نزعت شالي وطلعتلي تراك برمودة لازم احاول اكون محترمة باللبس هنا عيب فشلة من الرجال ببيت فاهد چنت لازگة بصاية افتر بيها بس هسة شسوي وملابس البيت مالتي كلهن مشلتحات ومخازي شورتات وكيمونات وسوالف طايح حظها ما مخلية شي بنفسي احب اللبس واستمتع واتمكيج ماطول مو حرام ما اخليها بخاطري..

سبحت وطلعت اللبس بالتراك باوعت لروحي بالمراية والله ضيگ وصاير ربع ردن خاف عيب؟ خاف راح ينتقدني؟ بس لا لا هذا بيتي صار ولازم يتعود ميهمني، مشطت شعري ورطبت جسمي وتعطرت وگعدت مثل الططوة انتظر اللاشيء..

انمطلت على الفراش اصفن بالسگف.. مرت ساعة نعست وجفوني ثگلت باوعت للساعة عبرت الـ 11:00 بالليل احنه تعشينا بالطيارة بس هم جعت الله مال راس باچة هسة..

انطرقت باب غرفتي على كيف نهضت نفسي اگعد على حيلي وصحت..

-منوووو

جاوبني من وره الباب بهدوء..

-مالك: ماكو غيرنا بالبيت ليش تصيحين؟

-منوووو انتَ

-جناات!!

-هثة غير يگول منووووو

-وجعوووو اني مالك!!

-ويييع ماريدك روح

-ولج!

-روح روح شثوي بيك

-خوش!

فزيت اركض للباب من سمعت خطواته تبتعد مني عزا عزا صدگ راح هذا شلون بيه خاف ميرجع بعد واني اخاف انام وحدي.. فتحت الباب لگيته يمشي يبتعد من الغرفة صحتله..

-ماااااالك

-مسطيه!

-گلت مطططية؟؟؟

-شنو؟

-صحتلي مطيية! مو عيب عليييك

-انتِ ليش تصيحين من تحچين؟!

-هاا مو هدوء كلش ما جاي اثمع روحي

-انتِ گلتيها هدوء كلش ليش بعد متسمعين روحچ؟!!

-انتَ ليش متنرفز ملاك

-طلعي من الغرفة تعالي اكلي

-مو جوعانة روح اكل انتَ وثليمة وحدكم!

-منو؟؟

-ثليمة صديقة كيان المقربة!!

-سليمة مو هنا گتلچ احنه وحدنا

-اي ادري، اگلك اني جوعانة

-مو گتلچ تعالي اكلي!!

-مو مبين گوة عليك وماحب اثگل على احد

-لا ما مثگلة عليَّ!! تعالي اكلي وخلصيني!!

-انتَ شبيك ما جارعني وديني لبيت فاهد احثنن

-متردين تاكلين؟؟ تمام ابقي بالغرفة لا تطلعين راح يجون جماعتي عدنا شغل

-كلكم خلگ ططوات وراح تنجمع

-فوتي للغرفة

-شلون واني جوعانة

-جناااات طلعي اكلي وسكتييي

انهضمت من اسلوبه ينتر بيه وما طايقني ما تحملت احس گلبي انفطر وتطشر ووگع ببلوعة الحمام.. بدون كلام رجعت للغرفة وطبگت الباب ورايه بوجهه بدون لا احچي شي..

گعدت مطنگرة وحدي اكش ذبان وهمي بس ما طولت طنگورتي اكثر من ربع ساعة وانفتحت باب الغرفة بدون لا تندگ گمت على حيلي من دخل مالك وبيده طاولة تنسحل نفس مال الفنادق بس صغيرة وحاط فوگاهة مجموعة مواعين بيها اكلات..

-جنات: نعم؟

-مالك: اني اسف

-على شنو

-لان عاملتچ بطريقة سيئة، حقچ تضوجين مني واعرف هذا مو تبرير منطقي بس اني مضغوط هالكم يوم وهذا السبب ماريد احچي وياچ حتى ما اضوجچ بعصبيتي

-ماريد اكل شكراً

-جنات

-ما زعلت عادي بث مو جوعانة

-لا جوعانة يله تعالي اكلي!

-ماريد والله

-گلت اكلي!!

-انتَ ليش تتأمر؟

ذب نفس متعب واضح عليه شگد مضغوط وتعبان مسح على وجهه وقرب الطاولة عليَّ وگال بأبتسامة گوة رسمها..

-اكلي جنات مو زين عليج تبقين جوعانة اني خايف على صحتچ

-تمام، شكراً

-العفو

طلع واني گعدت اكل راگعة الدنيا بچلاق، جايبلي اشكال والله خوش يدلل اكلت لحدما بطني احسها راح تنفجر گمت اغسل وتمددت بالفراش اريد عيني الغبرة تغفى ماگدر عبالك تعرف ماكو احد يمي، ضجت من ريحة الاكل بالغرفة گمت واخذت الطاولة اسحل بيها ارجعها للمطبخ..

-ابوووو فاضيييييييييل

گلبي وگف من شفت ضبة زلم كلهم لابسين اسود من فوگ ليجوه مفتولين بالعضلات گاعدين بالصالة واسلحة مطشرة كل مكان وثنين لازمين مسدسات وموجهيها على مالك المتوسطهم..

من الهبطة حسيت راح يغمى عليَّ نسيت روحي ما لابسة حجاب ونسيت اني هنا بغربة ونسيت مالك بكبره اريد بس اشرد بروحي العزيزة، عفت الطاولة بنص الطريق ورحت اركض للغرفة وقفلت الباب عليَّ..

-دخيلچ يا البنيين دخيلچ يا فاطمة الزهراء اني وييين

گلبي يرگع رگع ردت اموت من اندگت باب غرفتي بقوة وعصبية، يمة دخيلك يابو فاضل شلون بيه وين جابني هذا يردون يسلبوني ويكتلوني ويطيحون حظي ويبيعون اعضائي وشعري!!

-فتحي البااااب

هذا صوت مالك يهمس بس عصبي، كللش عصبي دگ الباب مرة ثانية بقوة اكبر فتحت القفل ومديت راسي من الباب غلف وجهي بأيده الكبيرة ودفعني يرجعني للغرفة حطيت ايدي على گلبي وايد اصده بيها متحضرة لأي حركة تصدر منه..

-ليش طلعتي؟؟؟ انتِ تردين تموتين؟!!

-وين.. وين هذا.. عمت عيني.. عمت عينكم.. عمت عينك ولك شنو هاااي

-صوتچ نصي يمعوودة گتلچ ابقي بالغرفة لا تطلعين راح يجون جماعتي!!

-جماعتك يردون يكتلوك؟؟ شفتهم موجهين سلاح عليك بنص بيتك!! حباب طلعني مناا طلعني مارريد ابقى يمممك

-جنات اهدأي ما جايين حتى يكتلوني جاي نتدرب هنا ذولة اصدقائي!

-منين جبتهم ذولة من هجوم العمالقة!

-بس انطيني صبر ما ظل شي ويطلعون كله نص ساعة انتظري هنا بالغرفة بس يطلعون انطيچ خبر

-شافوني بدون حجاب شلون!

-غير انتِ طلعتيي مثل الططة بهذا لبسسچ گداام الزلم!!!

-اشم گفة ايدي همه بالصالة گاعدين هاي شبيك

-سكتتتي وطبي جووه

-ما اطب

لزم گذلتي الكثيفة بين ايده اخترعت عبالي راح يجر شعري وحضرت نفسي حتى ارجعله نفس الحركة بس فاجأني من گلبها وره يوخرها عن عيوني ويهمس بخفوت..

-صيري حبابة ولا تعذبيني جنة نص ساعة وطلعي براحتچ بالبيت

-لعد ليش وخرت گذلتي قلقتني

-شتت انظاري

-شمثوية المثكينة

-يله جنات ابقي هنا شوية انتظريني

-زين زين انتظرك بث مو يكتلوك يمعود دافع عن نفثك

ضحك وهز براسه اي وطلع من الغرفة، رجليه ترجف الهبطة بعدها بيه بس گلبي ما مرتاح يمكن مو اصدقائه وديچذب عليَّ؟ يمكن صدگ اجو يكتلوا هنا بس لحظة اذا يكتلو شلون خلوه يجيني للغرفة؟

الف فكرة والف سؤال براسي لو بس اعرف شنو يسوون بكل هاي المسدسات والاسلحة ارتاح، لبست شال من فوگ مستورة ومن جوه مشلتحة فتحت باب الغرفة على كيفي ومشيت على اطراف اصابيعي اعبر الممر المؤدي للصالة..

مديت بس عيوني اشوف احرص ما اخلي احد يلگفني.. عشر ثواني زومت وشفت كلشي گاعدين بالـ 12 واحد ومن ضمنهم مالك ياكلون شي وناس تضحك وناس بيدها اسلحة وتسولف وناس تتذمر، قسم يحچون انگليزي بلكنات مختلفة والقسم الاخر يحچون اجنبي.. بس ثنين منهم عراقيين موجودين وعرفت واحد اسمه نور وواحد حيدر..

-حيدر: هاي خيانة عظمى لا تغتفر مالك الا اگول لفاهد اخلي يلزمها عليك طول العمر

-مالك: على شنو؟

-حيدر: تچذب علينا وتفيك بروسنا ماجيب بنات لبيتي وما اطبب بنات چا هاي منو الطلعت

-نور: ولك هاي البلا مالته

-مالك: اسكت انتَ! كافي لحد يحچي جاي اشتغل

-حيدر: انتَ تشتغل احنه شعلينا مو زين عبرناك واجينا وفوتنا حفلة سالار

-نور: والله صح عود گلت نرد وحشتك عبالنا وحدك وضايج

-حيدر: نور بشرفك مليت من الگعدة سولفلي منو هاي البلا فايتني شي واني مادري؟!

-نور: بنت عمه بابا هاي التزوجها وورطوه بيها

-حيدر: هاااا تذكرت تذكرت حرامات ما شفتها زين ما ركزت بيها توقعتها وحدة ساقطة

صار صوت مال واحد يضرب الثاني بس ما عرفت هذا مالك رفس حيدر الا من گال بعصبية..

-مالك: حيدر انچبب!!

-حيدر: ههههه والعباس اتشاقه ما جاي احچي على البنية لان ما شفتها اصلاً بس احب اضوجك اخي، نور جواد كمل كمل

-نور: اوگف حيدر مالك انتَ گلت راح تروح للعراق تزوج وترجع تطلگ هنا شو بعدها موجودة؟

-حيدر: ليش تتزوج وتطلگ خو من البداية لا تتزوج وتكسر البنية!

-مالك: ممكن محد يدخل انفه بحياتي!

-نور: اووووي حياتي انفه

-حيدر: شلون ويه المثقفين احنه بابا اسمه خشم خشمم

-مالك: نفس الشي شباب عوفو السالفة طالعة روحي وضايج

-حيدر: يروحلك فدوة نور جواد وابو جواد والخلف جواد سولفلي حبيبي فضفض لا اروح لفاهد واكت الاول والتالي

-مالك: ماريد ادوخكم

-نور: دوخنا احنه نريد ندوخ.. گوم حيدر جيبلنا شي نشربه من الثلاجة ومالك سولف بالمغربي حتى تاخذ راحتك

-حيدر: هيووو مغربي شنو ما افهم انيي! حظي وگعني بين مغربي وجزائري اصلاً انتو تحچون عربي؟؟

-نور: طبعاً عربي لعد شنحچي

-حيدر: وابو راس الحار تحچون لغة ثانية مو عربي ولا يم العربي

-نور: يابه يله احچي بالانكليزي فرنسي اسباني بكيفك المهم خلصنا وسولف

-مالك: ذولة يفتهمون ماريد احچي گدامهم.. المهم ما راح اطلگ هالفترة انتظر ارجع املاكها وننفصل

-نور: حقك

-حيدر: ليش حقه شبيها البنية؟

-نور: صغيرة وصعب التعامل وياهة مالك مو جوه البنات الصغار يحبها واعية وعقلها چبير

-مالك: نور، حيدر سدوا موضوعها وخلونا نكمل شغل

-حيدر: چا شگد مغثوث منها شدعوة شدعوة مالك شسالفة!

رجعت للغرفة ضايجة ومخنوگة ليش ينطي بيه گدام جماعته لهدرجة اني مزعجة وكارهني؟ انقهرت كلش وگعدت أفكر بالموضوع ماحب اكون ثگيلة على احد ومبين هو ممتحمل وجودي بس شبيدي ووين انطي وجهي، نص ساعة وطلعو جماعته ورجعلي يسألني اذا محتاجة شي..

-جنات: لا شكراً

-مبين نعستي والوقت تأخر اني بالمكتب اذا احتاجيتي شي

-اگلك اوگف

-تفضلي

-تگدر تاخذني لمكان؟

-بهالوقت؟ وين؟

-لبيت كيان اريد اروحلها اشتاقيتلها

-ماشي باجر اخذچ هناك

-لا حباب اليوم اريد

-لا جنات عيب بهالوقت ترحين تلگيهم نايمين

-حباب مالك حباب لخاطري اريد كيان

-غير افهم ليش مستقتلة على شوفتها

-اريد انام يمها

-تباتين؟؟ لا ممنوع

-ليييش

-گلت ممنوع وبس!

-ماالك

-كاااافي جنات لا تعاندددين تعبت منننچ!!!

-شبيك تريدلك حجة حتى تعاركني وديني لبيت فاهد لو شُهيب واخلص مني لا تظل محملني منية گعدتي يمك!

درتله ظهري بمعنى اطلع ماريد اشوف خلقتك وهو افتهم وطلع من وحده، طبگت الباب وراه وگعدت على الچرباية حاصرتني بچية بس لو اموت ما ابچي من وره هالططوة!

عيوني تغفي راح اموت من النعاس، تمددت بالفراش احاول انام بس اغمض عيوني اتخيل شغلات تخوف وارجع افتحهن وهيچ بقيت بهالوضع المزري لـ ساعة جديدة..

غفت عيني وفزيت فجأة خايفة من شفت ضوه الغرفة مطفي ومتغطاية.. گمت مرعوبة ركضت على الضوه ارجف واتلفت ماگدرت ابقى بالغرفة وحدي وطلعت للصالة شفتها صايرة بالثنتين بالليل..

رحت اشرب مي ورجعت للغرفة وهنا بعد ما تحملت وعيوني گامت تمطر دموع، احس بالوحدة والضياع ماعرف شسوي ووين انطي وجهي ومنو يسمعني.. لا عندي تلفون واتصل بـ كيان لو مسرة ولا اندل اماكن هنا.. مسحت عيوني من اندگت باب غرفتي..

-خييير

فتح الباب ودخل مبدل ملابسه وبيده كوب حليب موز، ابتسم وقدمه الي..

-گعدتي؟

-لا بعدني نايمة

-اشربي هذا بلكي يساعدچ على الارق

-ماريد روح

-جنات

مجاوبته ودرت وجهي عنه، تنهد وگعد على السرير بصفي وبقينا بهذا الهدوء لفترة..

-مالك: اني اسف لان صحت بوجهچ بس جاي امر بظروف صعبة هالفترة

غلست عليه من شافني ساكتة اردف..

-ادري مو ذنبچ بس الموضوع متعلق بيج واجيت اشاركچ بهالشي حتى تكونين بالصورة.. جنات يردونا ننفصل

بقيت منطيته ظهري امسح دموعي بالخنسة..

-ابوية يضغط عليَّ بكل الطرق جاي يحملني بشغلات صعبة وعادي اني متعلم على الضغط والتوتر والعذاب بس الوضع خرج عن سيطرتي وماعرف شلون ارهم كلشي بوقت واحد واذا اتأخر عن الشغل شوية يستفزوني بيچ ويدخلوچ بالسالفة وتتأذين

-انتَ ليش تريدنا نبقى متزوجين؟

-لان ابوچ متحلفلچ

-عادي متعودة عليه

-مو عادي يريدون يطلگونا حتى اني اتزوج فواطم وانتِ تتزوجين علي ابن عمچ

-شنووووو

-هذا الجاي يصير واني اعرف علي انسان همجي وعينه وصخة وراح يأذيچ فوگ اذيتچ وياي

-لو يموت ما اتزوجه!! ايييع علي اقرف منه اققرف واحد همجي مخبل ايده والكتل هي اخته تزوجت وما خلصت منه حتى تحرش يتحارش بيها!!

-صدگ؟؟

-اي والله مرة حچت لـ فيروزه اجت تبچي وتگللهة يجبرني على شغلات بث ما فهمت شنو هالشغلات

-شگد عار!

-اي كلش عار

-خليها تلزم عليه دليل ونطيح حظه وصليلها هالحچي

-شلون اوصللها واني ماعندي تلفون

-ليش ماعندج تلفون؟

-اخذ تلفوني ابوية من زمان

-لحظة

گام وطلع من الغرفة بقيت انتظره فترة ورجع بيده باكيت مال موبايل ايفون الاصدار الحديث، حطه بيدي وگال..

-استخدمي هذا هالفترة بعده جديد اجاني هدية من صديقي وما محتاجه اني

-الله تهدون تلفونات غالية لبعض؟

-كلشي نهدي لبعض هسة المهم حطي يمچ هالفترة حلالچ صار علما نطلع ونشتريلچ واحد جديد

-لا ماريد جديد اريد هذا احب الايفون

-تمام.. هسة اني كلش تعبت رايح انام تصبحين على خير

-لا لا لحظة اوگف

-محتاجة شي؟

-شوف مالك من الاخير بدون لف ودوران راح احچي وماعيدها بعد.. اني اخاف اي اي اخاف لا تباوعلي هيچ ماگدر انام وحدي اتخيل جني وشغلات تخوف وشغلات مرعبة واظل افكر قبل لا انام وابچي واحث روحي راح اموت وانوب اظل ابچي للصبح وما انام واحث راح انهار واگعد عيوني منفخة وشكلي يصير يخزي چني ططوة وابقى هيچ مثل خراعة الخضرة وابوية وبنات عمي يخترعون واني انقهر بالزايد واحث...

-على كيفچ على كيفچ

-اي

-فهمت تخافين هسة شنو المطلوب

-انام يمك

-تنامين يمي؟؟؟؟

-احم

-سمعت صح لو اني غلطان؟

-ثح

-مستحيل هالشي!

-لييش

-ماعرف انام ويه احد بغرفة وحدة اني من چنه بالعراق ما غفت عيني

-حباب حباب

تنهد ومسح على شعره محتار عشتو مو بحالك اني بس اااخ شگد انذليت هنا، باوعلي ما راضي وبادلته بنظرة امثل البراءة.. تنهد مرة ثانية وهز راسه معترض ثواني وگال بعدم رضا..

-تمام تعالي

انفرجت اساريري وگمزت من الفراش اروح وراه، مشينه عبر الممر وعبرنا الصالة انوب دخلنا ممر جديد وفتح باب غرفة صايرة من الجهة الثانية من البيت..

غرفته اكبر من غرفتي بهوااي اثاث الغرفة راحة نفسية يعرف ينسق هالرجال، تاج الچرباية فخم ومقدف يخبل والفرشة رصاصية ستن مال الطبقة المخملية والغرفة باردة وريحتها حلوة..

-مالك: راح انام على القنفة والفراش الچ

يبست بمكاني شلون راح اواجهه بالقنبلة الاكبر واگله لازم ينام بصفي وشرط يجعصني بحضنه يمكن ينجلط اذا يعرف..

-احم اگلك شنو رأيك هنا تنام

اشرت على الچرباية مالته وابتسمت ابتسامة واسعة مال لواگة.. هز راسه معترض وگال..

-لا انتِ اخذي راحتچ اني انام على القنفة

-لا لا والله باوع تره چبيرة الچرباية ماريدك تتبهذل خطية هذا فراشك اني بجهة وانتَ بجهة ننام هيچ وحلو حلو واحد يثولف ويه الثاني ومنضوج بعض والله حلوو

-لا ماعرف انام يم احد

-والله حلو

-لا مو حلو ماگدر انام اتقيد

-اقرالك قثة

-ماريد

-والله النومة ويايه تجنن

ضحك وره جملتي كيفت يمكن بده يلين كملت بنفس النبرة اللطيفة الچذبية..

-والله فد راح ترتاح ويايه

-ههههه ولچ اشش كافي

-والله ترتاح

-خرب

ضحك بصوت عالي واخذ مخدته وحطها على القنفة واشرلي انام على السرير..

-نامي عيني

-مالك!!

-ها

-شبيك انتَ شتحثث

-احس بالنعاس وراح انام وانتِ هم نامي

-اريد انام يمك

-هاي ليش تتحارش گوة

-هاي شبيك اخااااااف افهم عاد اخااااااااااااااااف اناااااااااام وحددددي اريدك تناااااام يميييي

-اهاا

-اي اييي

-لا تصيحين فهمت

-اي تعال نام فضني!!

رجع مخدته وتمدد على الچرباية واني هم طفرت بس اريد انااام راح انهار من النعاس..

-مالك: ماگدر انام بالقميص راح انزع واتغطى تمام؟

-مو..

-هاا بعد شنو اني گتلچ ماعرف انام ويه احد احب الخصوصية

-لا لا انزع عادي يله امري لالله

طفى الضوه ونزع قميصه ونام بديت اللوب هم ظلمة وهم احس بفراغ اريد احد يجعصني.. اتگلب بالفراش مثل السمچة المتزوحرة..

-نامي جنة

-ماگدر

-شنو تردين؟

-اريد افتح الضوه

-لااا عاد

-حباب حباب

-نامي ولچ كافي

-اخاف

زفر نفس قوي وفتح التيبل لامب، نام وانطاني ظهره انوب صرت اطفر مثل القرد المگمل، ماتحملت ونغزته بظهره، دار بس وجهه عليَّ اشرتله على ايده وهمست بخفوت..

-اريد

فتح عيونه مصدوم ونهض نفسه يگعد على حيله..

-مالك: شتردين؟؟

-باوع والله ما اتحرك واوكح بث اريدك تجعصني

-جنات

-بداعة امك

-امي ميتة

-بداعة ابوك

-خيولي ما يهمني

-بداعة فاهد المثودن شبيك مالك ذليتني اخـ....

-تخافين فهمت فهمت.. باعي جنات اذا ظليتي تحوصين لو تتحركين بين ايدي ما اضمنلچ شنو يصير وراهة مو تجين تلوميني بعدين!

-يعني شنو تثوي تكتلني؟؟

-اسوي الاتعس

-ما اثمحلللك

-انتِ صيري بين ايدي وخنشوف شلون متسمحيلي

-تكتلني اكتللك واموتتك والله

-دنامي نامي اني وين وهي وين

شهگت من جرني من زندي ونومني بين ايده جمدت ما اتحرك ممتوقعة حركته المفاجأة، غطيت بهدومي راح اذوب من الخجل راسي على زنده العاري وايدي مصعدتهن فوگ مثل العگروگ ماريد اللمس جلده جرهن ونزلهن يحصرهن بين جسمي وجسمه گمت ارجف مادري شبيه..

رفعت راسي شوية اباوع لوجهه ونزل راسه الي يأشرلي بوجهه بمعنى "شكو"..

-جنات: انتَ ثاقط

-هو منو النايم بحضن الثاني انستي؟

-اني بث مجبورة

-وي ابقي مجبورة

-انتَ واحد..

-نامييي

نزل راسي يدفنه بالمخدة حتى انام اختنگت بس خنست اسكت وصدگ نمت بسرعة ونومة عميقة مريحة كلش لان انجعصت جعصة مرتبة واموت على الجعيصة اني...

**

-الله كوري راح نكون شركاء سكن

-كيان: شركاء نعععل ما انام وياك بنفس الغرفة شوفلك غرفة ثانية!!

-فاهد: كيان تره هاي غرفتي خاف متدرين

-لا ادري

-ها يعني هم نزل وهم يدبچ حلو حلو

-فاهد ما طايقتك لا تحچي وياي!!

-هسة اني شسويت؟ واذا تكاتلت ويه مروان وتنمرت على نشوان وردت اسب فاضل وتذكرت هذا سيد ويشور بيه شبيچ كيان لا تعظمين المواضيع

-فشلتنا بنص المطار تتصايح وتتعارك من ولا شي شبيك متخبل شبيييك

-ما متخبل

-يوم زين وعشرة عقلك طاير كاافي فاهد تعبت منك ومن تصرفاتك الا اطلگك وارتااح منك بس اصبري انتَ طا...

-لا بشرفچ لااا دخيييلچ ستري عليَّ التوبة بعد ما اعيدهااا

-اسكت لا تحچي متستاهل زوجة مثلي بس شسسوي اصبر واتحمللك الله يخلصني مننك

-اگلچ انتِ هسة طلگتيني لو لا؟

-شمدريني گلتها اني؟؟

-مادري شو ما انتبهت

-عزه خاف طلگتك فاهد

-يجوز.. اوگفي ابوية يتصل

جاوب تلفونه واني بقيت اعصر بعقلي اتأكد گلتها لو لا ياربي خاف گلتها وتطلگنا صدگ؟ زين شلون ارجعه على ذمتي والله حيرة..

-فاهد: لا ماگدر اجي يابة... كيان طلگتني واني بالعدة هسة

-كيان: ولك اشش شبيك

-فاهد: لا يابة حرام ميجوز اطلع غير عدتي ستة اشهر محد يشوفني بيها؟

-كيان: تره هنه ثلاث اشهر!!

-فاهد: لا ولچ صارن ستة لان اني رجال

-كيان: فاهد كافي سد التلفون

-فاهد: يابة اني رايح لان طليقتي جاي تأمرني اسد التلفون

-كيان: شيخلصني من ابووك سده كافي

-فاهد: انچبي ما اسمحلچ تحچين على ابوية تاج راسچ.. هاي لان اني يتيم تستفردين بيه حرام عليج مو الدنيا تدور بس ماگول غير الله يطلع حوبتي بيچ يا كيان بنت سلوان

-كيان: اي اي خوش

سد الاتصال ويه ابوه وراح يتمدد على السرير، تخصرت ووگفت انتظره يگوم او يدليني على غرفة احط بيها اغراضي متت تعب وصارلنا ساعتين ونص نتعارك او خليني اگول اني اتعارك وهو بس يحشش ويضحك فرگس گلبي..

-هسة وين انام اني؟

-بكيفچ تردين هنا لو بالصالة

-انتَ مو عندك تسع غرف انطيني وحدة

-مقفولات

-اي افتحلي وحدة

-اسف ماگدر

-ليششش

-ما يعجبني

-فاهد حرام عليك تجبرني انام هنا ماريدددك

-ولا اني اريدچ بس ماعندي غير حل

-تره كومة غرف اكو لا تسويها ظلمة!

-گتلچ مقفولات وما افتحهن!!!

عصب وتغير شكله عجيب شلون تتغير نبرته وصوته واسلوبه كله من خلال كلمة استفزته، نفخت هوا متنرفزة وچتفت ايدي لصدري..

-رجعني لبيت اخواني لعد

-اموووت وما اروح لبيت اخوانچ العاارات

-وديني لـ شُهيب!!

-اخذچ للگبررر احسن

-لعد اخذني لبيت مااالك وجناات

صفن شوية ورفع رجله يحط رجل على رجل وهو متمدد بمكانه وابتسم وكأن عجبته الفكرة، هز راسه بـ اي وگال بحماس..

-خوش فكرة خلينا ننام كلنا ببيت واحد اوگفي اتصل بي ادعي يقبل نروحله

اخذ موبايله يتصل واني وگفت بصفه انتظره يجاوب بلكت يجيني الفرج، دگ مرتين ما جاوب مالك دگ الثالثة وهم ما جاوب شمر الموبايل ورجع تمدد..

-يمكن ويه الحب هسة عوفي لا نقاطع متعتهم

-منو الحب؟؟

-جنات يعني منو

-مالك يحب جنات؟

-لا بس عادي تلگيهم سوه ويسوون باح باح

-شنو باح باح؟

-اراويچ؟؟؟

-لااا ماريد وخر، اگلك جوعانة گوم جيبلنا اكل

-لا ماگدر كيان عذريني

-ليش شعندك؟

-مو اني بالعدة شلون اطلع

-هاااا فاهد صدگ تذكرت تره ما گلت انتَ طالق كاملة اني

-لا گلتيها

-والله ما گلت

-گلتي

-يله ما دام گلت رجعني لاخواني

-لا ما گلتيها

-گلت

-لا ما گلتيها متأكد

-يله لعد گوم جيبلنا عشا

-تأمرين امر كوريتي

اتصل بشخص وگله جيبلنا عشا نص ساعة ووصل، اجت مساعدته الچلبة شگد حاقدة عليها اتذكر شلون سحسلت بيه بيوم العقد تنگط سم بس ميخليني احچي عليها يحبها..

جهزت الاكل وگعدنا ناكل بالصالة گدام التلفزيون نتابع فلم رعب اخيراً لگيت شي مشترك بيناتنا وهو ثنينا نحب افلام الرعب وبرامج المصارعة..

-فاهد: هالفلم الا يشگ شگ

-كيان: شايفه من قبل؟

-اي تابعي تابعي

بقينا نتابع ومن فلم لفلم للفجر احنه گاعدين حاط حبشكلات گدامنا ناكل ونتفرج، عبرت الخمسة الصبح ما تحملت بعد من التعب غفيت بمكاني، حسيت على شخص يحط ايده جوه جسمي يلمسني بوصاخة، فزيت مخترعة ودفرت ايده عني..

-حقييير

-بالغلط والله

غفيت مرة ثانية ورجعت حسيت اني بين ايدين فاهد شايلني ياخذني للغرفة، ما حچيت شي وبقيت نايمة لحدما نزلني على الچرباية غطاني وخفف الاضوية وحسيته يگعد بصفي وأنفاسه تلفح وجهي وشفايفي..

-كيان: اموتك

-فاهد: هههههههههههههههههههههههه

مسحت عيوني ووخرت شعري عن وجهي، كفخت وجهه بالخفيف وگلت بتذمر..

-ضايج يضحك فرحان يضحك زعلان يضحك متحمس يضحك عفية بني ادم ماعنده غير الضحك بحياته

-ليس الشقاء هو البكاء وليست السعادة هي الضحك

-وصاير تتطي حكم ومواعض حلو

-اعجبچ كوريتي

-فاهد

-عيونه الصفر

-روح نام

-تمام

تعجبت من فعلاً تركني وطلع من الغرفة توقعت راح يرجع لان مستحيل يعوفني بحالي بدون لا يزعجني بس لا ما رجع وبقيت وحدي اخيراً...

مر اسبوع سريع واني ببيت فاهد وللغرابة الشديدة العيشة ببيت فاهد مو بذاك السوء، صح يومية نتعارك ونتكاتل ونتماطل وواحد يكفخ بالثاني هو يزورگني واني ازورگه وميحس بس لا بأس لا بأس اليوم ديمشي لكن نأمل تخلص هالفترة على خير ويبقى هادئ وميتخبل..

نسهر للصبح نتابع افلام وناكل وحتى المساعدة تگعد ويانه تتمدد على القنفة وتغفى بنص الفلم وفاهد يشيلها يوديها بغرفتها، اضحك على تصرفه هي مرة چبيرة بس يعاملها بحنية وابد ميتأمر عليها ويجبرها تشتغل هي تسوي كلشي من وحدها وتعامله بطريقة حلوة..

من نتعب نروح ننام هو بغرفة واني بغرفة، غرفته حذرني اكثر من مرة ما ادخللها وبالطبة والطلعة يقفلها ما انطيت اهمية ولا صار عندي فضول اشوف شنو اكو هنا حتى من يطلع اوقات بنص الليل بشغل مستعجل وينساها مفتوحة هم ما ادخل..

اليوم راح ارجع للجامعة ومالك راح ياخذني بطريقه ويمكن ياخذ جنات هم حتى يسجلها، وگفت گدام المراية ارتب ياخة قميصي النيلي وبعدها لبست حزام بنطروني..

-المهندسة كيان المحترمة

اللتفتت على صوته واگف وساند جسمه على الباب لابس كيمونة بيضة عريضة ومچتف ايده لصدره بارزات عضلاته ووشومه بشكل مخيف..

-كيان: بعد متصيحلي كوري ولا كيان كله المهندسة كيان

-فاهد: لعد اني صيحيلي الدكتور فاهد

-هه وينك وين الدكتور

-ليش؟

-انتَ مال دكتور؟ انتَ واحد مجرم شقاوات زايد عليك

-شكراً

-لا تزعل هاي الحقيقة

-وليش ازعل واني اعرف هاي الحقيقة؟

هزيت راسي اعدل بگذلتي المقصوصة عدل واخذت حمرتي الوردي ارسم شفايفي..

-صدگ فاهد انتَ شنو دارس؟

-ادارة اعمال

-ها يعني عندك شهادة

-اي وجاي احضر لاطروحة الدكتوراه

نزلت الحمرة من ايدي وصفنت عليه من المراية اتأكد هذا ديتشاقه لو صدگ يحچي..

-كيان: مستحيل اصدگ

-ليش

-مادري ما احسك مال دراسة

-صح

-يعني دتچذب عليَّ مو؟

-هههههههههه مو

-هاي شبيك فاهد واني صدگت والله وغرت منك

-ههههههههههههههه

-الا اخذ الماجستير والدكتوراه واصير دكتورة بالهندسة واصير مثل مسرة قيثارة وشُهيب

-تصيرين احسن منهم

-هيچ رأيك؟

-اي

-شكراً شكراً انطيتني طاقة حلوة يله اني اروح يمكن مالك اجه لان ديتصل عليَّ

-ما راح ياخذچ مالك السايق واگفلچ بره

-لا هذا مالك ديتصل.. (جاوبت الاتصال) الو هلو مالك.. صباح النور... متاخذني؟.. ليش؟... هاا.. ماشي

-ها؟

-اعتذر مني يگول جنات مالها خلگ تروح للجامعة مريضة وهو صار عنده شغل

-اي السايق بره منتظرچ اخذي رقمه واتصلي بي يرجعچ

-تمام

اخذت جنطتي وطلعت من البيت ويه السايق، وصلني للجامعة ورحت لقسمي استقبلوني صديقاتي يباركولي بعد عيني ويجرن بأيدي حتى يشوفن خاتم الالماس الي شمسون جبرني اللبسه..

-كيان شو بيشتغل زوجك مبين زنگين

-كيان: احم.. رجل اعمال

-ممكن نشوف شكلو

-ماعندي صورته

-معئول وصور العرس؟

تذكرت صور عرسي الخزي مستحيل اراويهن لاحد على الحركات التفشل السويناها تملصت منهن گوة ودخلت القاعة انتظر الدكتور.. بدت المحاضرة وعلى النص اجه بروفيسور هندسة الاسس يقاطع المحاضرة ويطلبني اروحله..

گمت بگلب بارد توقعته ديريد يسألني عن سبب اجازتي وليش طولت وراح اضطر اعيد الكورس من جديد بس طلعت توقعاتي غلط! غلط لدرجة گلبي وگف من گال بلغة البلد..

-كيان اني مصدوم واتمنى عندچ تبرير منطقي على الصار

-كيان: شنو قصدك بروفيسور

توترت من شفت حماية الجامعة يحومون گدام مكتب البروفيسور منتظرين كلمة منه، خرطت روحي من مدلي ايباد عارض بي فيديو الي اني وثامر واگفين وره القسم جوه شجرة بالحديقة ندخن واني انطي لـ ثامر كيس اسود مقدف مال مخدرات!

-البروفيسور: زميلچ ثامر مات من فترة واتوقع تعرفين بهذا الشي صحيح؟

-اعرف

-عرفتي شنو سبب موته؟

-ها.. لا ماعرفت

-مات اثر جرعة مخدر زايدة كيان.. هسة احنه ماعدنا معلومة منين جاب المخدرات وشلون حصلهن خصوصاً هذا النوع ميتحصل بسهولة لانه جداً غالي ويستخدموا ببعض العمليات الجراحية فوق العظمى.. سؤالي هو شنو چنتو تسوون اسفل هاي الشجرة؟

بلعت ريگ وحاولت گد ما اگدر اسيطر على رجفتي وصوتي واعصابي التالفة، ترددت لثانية قبل لا اگول..

-بروفيسور دندخن عادي حالنا حال الاف الطلاب

-شنو هذا الي انطيتي لثامر؟

-ماتذكر

-ارجو منچ تجاوبين بصراحة لان اكثر من علامة استفهام عليج واكثر من فيديو وصلني الچ

-ما جاي افتهم بشنو جاي تتهموني؟

-جاي نستفسر هذا مو اتهام واريدچ تجاوبين بصراحة تامة بيني وبينچ قبل لا تدخل الشرطة لان قضية ثامر انفتحت من جديد بعدما تطمطمت بشكل سريع واول المشتبه بيهم هو انتِ لان اخر اتصال بجهازه چان رقمچ ولسبب غريب محد استدعاچ تحقيق طول هالفترة الفاتت بس اهل ثامر مُصرين يفتحون ملف القضية من جديد

-اني ماعرف شنو تريدني اگول

-الحقيقة اريد منچ الحقيقة ولا تخافين لان الحقيقة راح تظهر بالنهاية واذا طلع الچ ايد بالموضوع حسابچ عسير راح تنسجنين كيان ويتدمر مستقبلچ وهالشي راح يزعلنا لانچ طالبة متفوقة

-اريد اتصل بزوجي ممكن؟

-اكيد بس اتصلي هنا

گلبي يرگع بخوف راح انجلط الدم احسه يبس بعروگي لزمت تلفوني بأيدين راعشة واول شخص اجه على بالي اتصل بي هو فاهد ماعرف ليش بس حسيته ما راح يعوفني ويحاول يساعدني..

-هاا كوري

-هلو فاهد تعال للجامعة فدوة

-ليش شبيچ؟؟

-اني بمصيبة جاي يتهموني بشي تعال حباب دا انتظرك

سديته بسرعة قبل لا اسمع جوابه ورجعت التلفون بالجنطة، رجليه متحملني وروحي تفور شسويت بروحي اني شوكت اخلص من ثامر وتنتهي هالسالفة والله تعبت تعبتتت، مشى الوقت ببطئ ما حسيت على روحي واني اجرح بيدي من الخوف..

-البروفيسور: كيان العميد يريد يستدعي الشرطة ويكملون التحقيق وياچ

-كيان: لا لا عفية بس انتظروا زوجي راح يجي

-مو بيدنا هالشي مرت نصف ساعة وللان ما اجه

-والله هو بالطريق اني متأكدة جاي

دموعي صارت تجري من الرعب افرك بيدي وادعي ربي يستر عليَّ وتنحل السالفة بدون لا يصيرلي شي يضرني، فزيت من مكاني من سمعت صوت فاهد جاي من بره يحچي ويه الحماية..

ثواني ودخل للمكتب اني شفته لو احس شفت ابوية ركضت بلهفة وخوف وغصت بحضنه، حضنته من رگبته بكل قوتي شددت على الزنجيل اللابسه بيدي اعصره وابچي بحرگة ميتة خوف.. حاوط خصري بيده يبادلني الحضن وگال بصوت هادئ عكس العادة..

-شصاير كيان فهميني

-فاهد ساعدني فدوة فاهد

-گولي شصاير

-البروفيسور: حضرتك زوج مدام كيان؟

-فاهد: نعم، ممكن تفهموني شصاير؟

حچو بلغة البلد، باوعله البروفيسور ما عاجبه شكل فاهد ولا عاجبته الكيمونة البيضة العريضة اللابسها ولا الزنجيل ولا وشومه والترچية التلمع بأذنه كلهن يرمزون لانسان اله تاريخ عريق بالشقاوات والسوالف المكسرة..

-البروفيسور: تفضل مسيو خلينا نتفاهم

گعد فاهد بهدوء، هدوء رغم حالتي التعيسة بس استغربته حتى من حچى وياه البروفيسور وفهمه كلشي توقعته راح يثور ويخبص الدنيا لو يضحك مثل المجانين بس ما صار هالشي ابد چان يحچي برزانة وثگل وكأنه انسان ثاني غيّر نظرة البروفيسور وصار اكثر ليونة وبقوا يتناقشون لفترة..

-فاهد: انطيني دقايق اسوي كم اتصال وارجعلك

چلبت بيده ما اخلي يروح وعيوني تحرگني من البچي..

-كيان: لا تعوفني

قربني منه وباس خدي بخفة ومسح عليه بلطف..

-دقايق وارجع كوري لا تخافين

سحب ايده مني وطلع بره المكتب يجري اتصالاته دقايق رجع وگال بثقة..

-فاهد: راح يجي والدي يحل الموضوع

-كيان بهمس: لا حباب لا تدخل ابووك يظل يستغلني بعديين ميسوي شي بدون مقابل فاهد حباب

-فاهد: انطيته مقابل لا تخافين

-شنو انطيته؟؟

-معليچ انتِ بس ارتاحي ولا تبچين بعد

-لو ما مدخلة راح تنلاص اكثر اني اعرف شمسون شنو

-فاهد بهمس: كيان وضعچ صعب راح تسحسلين محاكم وسجون وتنفضحين ضروري ادخل ابوية يتواصل ويه جماعته يحلولنا السالفة بكم فلس بالسكتة

سكتت ماگدر اناقش تعبت وتخربطت روحي ماعت حتى هوا مجاي يدخل لريتي ورغم وضعي الصعب البروفيسور ما قبل اطلع من المكتب اغسل يمكن عباله راح اهرب..

-فاهد: ما تشوفها متخربطة؟!

-البروفيسور: مو بيدي هالشي مسيو العميد انطى تعليمات وضروري نمشي عليها

-فاهد: حاامل زوجتي يمكن حامل ووضعها صعب انطيها مجال تتنفس بره لا يصير بيها وبالجنين شي!!

صفن عليَّ شوية وهز راسه ويأشر بيده تفضلو..

-البروفيسور: لا تتأخرون اكثر من عشر دقايق مسيو اتمنى تتفهم وضعنا

-تمام تمام

اخذني فاهد وياه بره للحمامات وغسل وجهي، وخر الكتر من شعري ولبسه بيده وصار يسويلي مساج لفروة راسي مادري ليش يسوي هيج بس كلش ارتاحيت ووضعي تحسن..

-كيان: اخاف انسجن والله اخواني يموتون

-ما تنسجنين هسة يجي شمسون ويحلها

-بله ما گدر يحلها؟؟

-بابا هالسوالف زلاطة عدنا راح تنحل لا تخافين

بچيت محروگ گلبي ماعرف وين انطي وجهي اتصل بـ شُهيب وافضح روحي لو اعتمد على فاهد واشوف شنو يطلع بيده؟

-كافي كوري لا تبچين مو زين على الطفل

-يا طفل؟

-انتِ حامل نسيتي؟

-يوووه فاهد

-ههههه لا صدگ احچي راح احل الموضوع وعد

-احلف

-وداعة عيونچ الكورية ههههههههههههههه

-وخر تافه

ضربت كتفه وضحكت امسح بدموعي، سحبني من خصري باوعتله مستغربة من حركته ونظراته رافع تك حاجب وابتسامة جانبية ماكرة مرسومة على ثغره..

-شبيك

-تضحك ووضعها زبالة شگد صلفة كيان

-ياااا

-بس تعجبيني تفيديا لازم گلبچ يكون ميت عود من تجيبين الطفل بالسلامة اخليچ تشتغلين ويانه

-لا ايع وخر شيشغلني وياكم انتو مجرمين واني مهندسة

-مهندسة بالمخدرات والجگاير صح صح

-مهندسة وغصباً عليك وراح تشهد نجاحي وتطوري

-منتظر هاليوم

-تستهزأ حضرتك؟!

-لا بالعكس فعلاً منتظر هاليوم وعد راح اوگفلچ بين الصفوف اصفگلچ واصوفرلچ واهز رگبه واگلهم هاي المهندسة كوريتي

-ههههههههههههه

-واجيب حمرتي هم مو تنسيها

-ما ناسيتها جيبها خليني اتعرف عليها ولو الله يساعدها راح تاخذ واحد مسودن

-اعقل علمودها

ابتسمت ووخرت ايده من خصري اعترف احب حبه لحمرته حب صادق ومابي اللاعيب، يمكن فاهد فاشل بالتعبير عن الحب واسلوبه عنيف وغبي لانه يشردها منه بكل مرة بس اذا چانت قسمته وراح تنسعد وياه وتغيره للافضل اتمنى ينجمعون..

طلعنا من الحمامات بعدما ارتاحيت شوية وتبسمرت بالباب من شفت شمسون يطلع من مكتب البروفيسور متأنق على اخر حباية وعطره يهفهف شكله وحيويته ولبسه ميطابق عمره ابد..

-فاهد: ها اها احنه بالحمام نبچي وابوية حلها بدقايق

-كيان: اخاف فاهد

-من شنو؟

-شمسون: هههااههههااهههااهههاا المسودن وكوريته هنا

-فاهد: حليت السالفة ابو شيبة؟

-شمسون: حليناها بس كوري انتِ هم على كيفچ عمو شبيچ يومية موگعة روحچ بورطة جديدة

غمز بآخر الجملة بلعت ريگ متوترة من ابتسامته الحقيرة المليانه معاني دنيئة وچنت متأكدة مو بس متأكدة باصمة بالعشرة هذا النذل ما راح يفوتلي السالفة على خير وراح يورطني بشي جديد وطلع توقعي صح!!

**

-تعاركت

-صبا: لا جديد

-مسرة: تره يغثني يعني شترديني اگله شكراً لانك تتصدق عليَّ اشوف بنتي مرة كل اسبوعين؟ لا حبيبتي هالسوالف مو عندي ارزله واطيح حظه واشوف ميس غصباً عنه!

-صبا: سرور على كيفچ وياه لا ينچلب عليچ ويروح يشتكي بالمحكمة

-مسرة: لا لا اكرم مو مثل باقي الزلم ولچ هذا خيخة اذا متدوسين على راسه بالقندرة ميمشي عدل

-صبا: خيولي لا تجيبين طاريه وتضوجينا.. تدرين من رجعنا من العراق لسه جسمي متكسر تعباانة كلش

-مسرة: حتى اني وضعي مخربط صار اسبوع راجعين ولليوم ما رتبت اموري ويه هموسي

-اي غير سافر

-صح واليوم راجع اخيراً اشتاقيتله

-هههههههه زواج على ورق اي اي

-وهو فعلاً زواجنا على ورق شنو الجاي يتغير اني ببيت وهو ببيت ووضعنا نفسه

-صبا: هاي منو؟

اللتفتت اباوع لشاشة الكامرات وانكتم صوتي ويه شوفتها تدخل الشركة.. ماتذكر اسمها كالعادة بس اتذكرها هالنخلة عدل ومستحيل انسى ملامحها الروسية هاي خطيبة شُهيب!!

-مسرة: هاي نعالة شُهيب السابقة

-صبا: خطيبته؟ بس شعدها جايه هنا؟

-يعني ليش تكون جاية لشركة خطيبها السابق صبا! غير حتى تشوفه!

-ولچ دتجي لاتجاه مكتبچ اني راح افلت مالي خلگها

طلعت بسرعة واني بدون كلام نزلت اللبس حذائي العالي الي انزعه كلما اگعد وگعدت منتظرتها تدخل بداخلي فرحة لان شُهيب مسافر لغير مدينة علمود شغل خاص بي وما راح يلتقون بس عبست من استوعبت هالشي ما راح يمنع لقائهم بغير وقت..

-مسرة: تفضل

فتحت الباب ودخلت بطولها الفارع وجسمها المثالي هيئتها تؤكد كونها عارضة ازياء محد راح يصدگ هي مهندسة خصوصاً مع ملابسها الفاضحة ووجهها ناصع البياض وشعرها الاشقر.. شكلها يصرخ اني جميلة واشگ شگ غصباً عليكم واني گوة لازمة روحي لا اروح اشگها شگ واطلع حرگتي بيها!..

-نورسين: بونجور

-مسرة: اهلاً

-نورسين: شلونچ آنسة مسرة قيثارة

-مسرة: "مدام مسرة".. بخير انتِ شلونچ

-نورسين: مچنت اعرف تزوجتي؟

-مسرة: ما صار اسبوعين

-نورسين: على الخير حبيبتي، اجيت اشوف شُهيب وين اللگاه تعرفين؟

-مسافر

-صحيح بس گلي راجع اليوم وراح يداوم

-گلچ؟

-اي قبل شوية اتصلت بي وبلغني

-اها

-بس يجوز بعده ما وصل يله اروحله لبيته عفواً حبيبتي اخذت من وقتچ

-ترحيله للبيت؟ هيچ علاقتكم قوية؟

-اي شُهيب خطيبي السابق

حچتها بأبتسامة برزت اسنانها هسة لو تگلولي مسرة شنو امنيتچ بالحياة؟ اگلكم اشگ حلگ هالقردة الگدامي!

-مسرة: اذا تردين انتظري هنا ماكو داعي تتعنين لبيته شوية بعيد عن الشركة

-نورسين: لا متعودة اروحله عادي مشتاقة لشقته الكيوت

-مسرة: اتوقع لليل ياله يرجع

-نورسين: عادي انتظره لليل

-خاف تتعبين يرجع لوقت متأخر

-تعودت على التعب وياه ههههههه

اوكي اوكي.. شهيق زفير مسرة.. يله حبي شهيق وبعد زفير اهدأي ما راح تعصبين ولا راح تگومين تدچيها ولا راح تموتيها خنگ بسبب جملتها الاخيرة بصوت متلاعب الي بس المطي ما راح يفهم قصدها شنو چان..

والي ديتسائل هل نورسين تعرف اني وشُهيب متزوجين على الاغلب جوابي راح يكون لا! لان للان ما علننا عن الزواج لدرجة اكو موظفين ويانه بالشركة ميعرفون..

-نورسين: باي حبي

طلعت والضحكة شاگة وجهها دخنت من العصبية يعني توقعي طلع صح وشُهيب عنده علاقة بخطيبته لدرجة يتخابرون ويتشاوفون وتروحله لبيته! تف على ابوك الكلب شُهيب ابن نعلون!

كلشي ما عرفت اشتغل عقلي كله ويه ذيچ القردة شتريد بالضبط؟؟ معقولة تريد ترجعله؟ او همه ديفكرون يرجعون لبعض واني صرت بيناتهم.. لا يمكن تريد منه مساعدة او شي خاص.. بس لحظة شنو هالشي الخاص الي راح تروحله لبيته وتبقى لليل تنتظره!

-على كيفچ يمعودة اظافرچ خلصن

بهتت بوجه صبا هاي شوكت اجت وشوكت دخلت للمكتب ما منتبهه عقلي فاصل.. باوعت للساعة عبرت الـ11 بالليل واني بعدني بالشركة ما حاسة على روحي وصبا هم هنا!!

-صبا

-گول ضلعي

-شتسوين هنا الوقت تأخر وخلص الدوام ليش ما رجعتي للبيت

-والله يا حبي ردت اطلع وطبيت اشوفچ لگيتچ سارحة وتاكلين بأظافرج وترجفين خفت يصير بيج شي وحدچ وگعدت انتظرچ ترجعين لوعيچ

-لا صبا اني ما مهتمة خيولون طُزززززز بيهم طُزززززززز

-همه منو؟

-شُهيب وقردته

-شسووا؟

-راح تروحله للبيت اصلاً يمكن هي ببيته هسة الله ياخذهم

-القردة ببيته وانتِ مگابلتني هنا؟؟! مترحين يغبررة مترحين يا زماالة!

-اروح؟

-طبعاً ترحين غير زوجچ هوو

-مو هي متعرفنا متزوجين

-واذا؟؟ هل هالشي راح يبطل كونكم متزوجين!!

-لا اكيد

-لعد روحي وصدميها بالحقيقة ومن الباب جري وبوسي هم!

-لا ولج ميصير استخف

-لعد صارلچ اسبوع ما شايفته ميخالف حضني

-لا احس لا ميصير اروح

-مسرة!!

-ها

-وسمااا بگلبچ المزنجر من شوكت تترددين هيچ ووضعچ يتخربط وتخافين! امشي روحيلهم وصدمي عيشتها لهالقردة بشوفتچ وشرطط تباتين ببيته اليوم!!

-لا صبا احس عيب ابات

-كااافي انچبييي بطلي هالسوالف!!

-مو اخاف اروح وانصدم بشي

-شنو هالشي؟

-مثلاً اشوفهم بوضع مو حلو والله راح اكره شُهيب وبعد ما اطيق شوفته حتى من الشركة انسحب!

-ما دامچ خايفة واجهي خوفچ وروحي شوفيهم بيا وضع حتى تتخذين اجراء ومتبقين يا غافلين الكم الله مسرة انتِ لازم تعرفين مسار علاقتهم وما تبقين عايشة باليمكن ويجوز اني اخاف عليچ تكبر مشاعرچ وتنصدمين صدمة اكبر بعدين

-هيچ برأيچ؟

-هيچ ونص! بابا هذا هموسچ شلون تعوفي لوحدة ثانية تشگ العيون مثل نورسين!!

-تفففف عليها شگد حلوة

-وشگد تعرف تلبس!

-شفتي شعرهااا چنه وصلة مسح صفرة!!

-قصدچ چنه شعر باربي اي شفته

-وطولها چنها طنطل!!

-قصدچ طول عارضات الازياء اليشئون شئ اي شفته

-لو مياعتها وتغنجها وحركاتها وشلون تگلب بعيونها الخضر چنهن عنبات خايسات!!

-قصدچ چنهن....

-صبا انچبي!!! ما جاي تساااعدين ابدددد

-حبي اسفة بس اني ما اچذب انتِ جاي تفترين على هاي القردة الشگرة الجميلة

-سكتي سكتي گلبي راح يوگف علگ سكري من وراهة

-مبين عليج متخربطة گومي ولج اخذي علاجچ وطيررري لبيت هموسي طيحي حظهمم

-رايحة اطيح حظهم راايحة

-عفية صيري سباعية بس الثقة اهم شي تبقين واثقة من حالچ حبيبتي لا تبينين انتِ غيرانة ولا معصبة امشي برهاوة وهدوء كأنچ رايحة لموعد غرامي

-وخررررررررري عنييييييي

-اسم الله الرحمن يمة شبيچ بس يله يله هاي اثار الغيرة

اخذت جنطتي وقبل لا اطلع لزمتني صبا تخليلي روج احمر وطوخت عيني بالكحلة.. مشطت شعري السرح بيدي وتعطرت سبحت سبوح بالعطر حتى لو رايحة اخوض حرب ويمكن ما اسيطر على روحي واذبح نعالسين هناك بس لازم اكون مرتبة وانيقة مو حلوة بحقي البهذلة..

ركبت سيارتي الرياضي وطررت والله طرت لبيت شُهيب طلعت اللوكيشن مالته اتذكر دزلي عنوانه قبل كم يوم علمود يوصلون شي لبيته ومشيت على الخريطة، ربع ساعة ووصلت گلبي يدگ بجنون وانفاسي انگطعت ارجف.. حرفياً ارجف من فوگ ليجوه من غيرتي الغبية الراح تموتني شي يوم!

عيوني بدت تغوش وراسي صدع سكري علگ اخذت علاجي وطلعت مي اشرب شوية واحاول انظم دقات قلبي وارجعلي النظر.. ثواني وطلعت من السيارة ارسم ملامح البرود على وجهي واني داخلي محترگ وراح يحرگ أي واحد يصير گدامي!!

شقته بالطابق الثالث صعدت الدرج برجلين ترجف وكمشت بالمحجر بأيدين بايدة ما احس بوجودهن.. اي اني اغار عليه واني مريضة بالغيرة ماقبل احد ياخذ شي خاص بيه ولا يباوعله ولا حتى يلمسه احترگ واموت وافحم واعطب واحس گلبي راح يوگف مثلما ديصير هسة بالضبط!..

وگفت بباب الشقة وباوعت للساعة بالـ 11:45 دقيقة.. دگيت جرس الباب وانتظرت فترة لا بأس بيها وللان محد فتح.. الف لا مو الف مليون سيناريو وقصة صارت ببالي راح افقد اعصابي واوگع هنا وچان وگعت فعلاً لوما انفتحت الباب..

طلع شُهيب شعره مخربط ولابس قميص زيتوني مفتح وبعيونه النوم، ثانيتين ياله استوعب وجودي وگال بصوت مبحوح من النوم..

-مسرة؟

-هلو

-صاير شي؟؟

-اي

دخلت بدون استأذان لبيته دفعته شوية عن الباب وطبيت للصالة عيوني تدور تدور تدور تدور راح تطلع من وجهي اريد اللگف أي شي أي خلل او خطأ أي اثر لانثى!

-شُهيب: قلقتيني شنو صاير؟

-لا ماكو داعي تقلق انتَ وين چنت؟

-هنا قبل شوية وصلت

-ونمت فوراً يعني؟ لان مبين گعدتك من النوم اسفة

-اي نمت

-شبيك ليش خشمك احمر؟

-مريض شوية

-ها يله همزين اجيت حتى تسويلنا شوربة

ابتسم ومسح على شعره يرتبه سد اخر دگمتين من قميصه وترك الباقي مفتوح..

-شُهيب: اني اسوي؟

-مسرة: اي انتَ

-هو مو لازم بالعكس

-صح بس اني ماعرف اسوي وانتَ مريض لازم تاكل شوربة واني وجودي حتى انطيك تعزيز واشجعك تسويها

-شنو هالتعزيز بله

-اصفگلك واهوسلك.. هَييي هَييي عفية بشهوبي هَييي هَيييي يله هموسيي هَييي هَييي يله يا وليدي هَييي هَيييي...

-هههههه وصلت الفكرة

-يله يله نسوي شوربة تحمستتتت

-قصدچ اني اسوي شوربة انتِ گعدي وارتاحي هنا

-هموسي صدگ نسيت اسأل هم اجاك احد اليوم؟

-لا ليش

-هاا عبالي اجاك فاضل

-فاضل؟ ليش يجيني؟

-هيچ علمود سالفة بالشغل يلة اني راح ابدل واجيك

-تبدلين!

-اي نسيت اگلك راح ابات هنا اليوم لان ابوية سافر واحس بوحشة تقبل ابقى هنا؟

-طبعاً اقبل البيت بيتچ

-شكراً، زين ماعندك ملابس نسائية هنا؟

-وليش يكون عندي ملابس نسائية مسرة

-يعني مثلاً مال كيان، امك، خطيبتك الجربة السابقة؟

-هههههههههههههههه استغفر الله ياربي ضحكتيني واني ميت تعب

-مو زين

-اكيد زين، لا مسرة ماعندي ملابس نسائية تگدرين تلبسين شي مني

ايدت الفكرة بس اريد ادخل لغرفته اتأكد من شي، طبيت شفت فراشه مخربط مبين چان فعلاً نايم والغرفة نظيفة مابيها أي شي دنيء.. فتحت كنتوره ابحوش بي عندي فضول احب اشوف ترتيبه وتنسيقه اللطيف وقت طويل اخذت واني اگلب بملابسه واشم بعطوراته الهادئة الحلوة بعدين تذكرت لازم اشوف شي اللبسه.. طلعت قميص اسود وبجامة شلتهن بيدي اشوفهن شطولهن ماعرف شلون راح اللبسهن..

لبست القميص وصل لفوگ ركباتي ضحكت على شكلي المبهذل ولبست البجامة وياه تسحسل كفيتها و ضحكت بصوت اعلى من مشيت خطوتين وخرطت مني تنزل..

-هههههههههه شُهيببب ملابسك عملااااقة

مديت راسي من الباب اشوف وين راح لان مبين مدا يسمعني.. وبنفس اللحظة دگ جرس باب البيت طلع هو من المطبخ ممنتبه لوجودي وراح يفتحها، نبض قلبي بقوة راح يشگ صدري ويطلع منه، سچينة ودچوها بيه من شفتها نورسين! اجت نورسين وحضنت شُهيب من رگبته وگالت بدلع..

-اسفة بيبي خليتك تنتظر هواي.....

يتبع...

━━━━━━  ━━━━━━

الحماس للبارتات الجاية عنديييي ↖️↖️↖️↖️😭🙈🫶🏻🔥🔥

دللوني بالتفاعل واني ادللكم بطول البارت والتنزيل 🫂🩷