رواية ابو عدوان الفصل الثالث والعشرون 23 - بقلم غير معروف

العشرون

#ابو_عدوان

#مذاق _العشق

#بقلمي_نشوى_السلطان

شلت الماسحة عليه كتلو يول عليمن وجعوو...

جان ادحك من الجام ابو عدوان ماكوو...
كتله خلف وينه روكان...

كال ياروكان  رااااح من زمان 

بقيت مصدووومة شلون راح بدون مايكلي وشبي هيج مخبووص
بقيت بقلق... اهلي يحاجوني واني بالي يمه...!!

طبو جابر وابو قصي  وخلف  .. طبينا كعدنا بالهول
امي مسويه كليجة وجاي .. كعدت بسد امي وخليت قصي بحظني

كعدنا سوالف وضحك وخلف طول الوكت يداهر بيه
عاد صار المغرب ونجمة كالت راح اروح وبالليل ارجع ابات يمج

اخذها ابو قصي وطلعو.. كمت الحيلي فتريت بيت اهلي طبيت الغرفتي .. ادحك على كنتوري اغراضي ذكرياتي كلها هين

كتله ضي سدي الباب اريد اخابر روكان ..  شلت التلفون
بيدي دحكت عالشحن قليل... جان تكول
_ ياستاررر دكومي امي راح تشوي لحم بالتنور كومي نكعد يمها على الدفو وركان عوفي هالحزه جوز عندو شغل عليش طايره روحج وراه .. عوفي الزلمه خل يرتاح منج ...

دحكت عليها وبيدي التلفون .. كتله يولي شمسويتله خاطر يرتاح مني .. النوب انتي عليه .. شو اطلعي وسدي الباب گبل ماذبحج

ضحكت وكالت .. عجل مدام هيج تحبي وماتكدرين بدونه عليش جيتي علينا جان ابقي عندو.. ولو اليوم هو عند زينة هههه

كتله ولج جيبلي الشاحنة وتعاي.. كبل مابتلي بيج...
راح يطفى الجهااااز   الشاحنة وين شوفيها بالجنطة

داحجي وياهه وادور عالشاحنة وجان امي اتفوت كالت اششش شعلو حسجن... كتلها يمه هاي ضي ام اللسان اداهر بيه

كالت عوفج منها كومي ابو عدوان بالباب يريدج...

كتلهاا صدددددك يمه لو تشافين...

ولج اكللها اخوج واكف يمها شبيج كومي مو وكت شقى شوفي شيريد ...

دحكت على ضي وكمت اطك اصبعتين يم اذانها كتلها ها يولي
يم زينه موو... ولج اختج جابتو الراس روكان.. خاف عبالج
اختج ماتكدر شلت شالي وطلعت ... واني اضحك ..
دحكت من الباب سياراتو طابكة ... والايت قوي ماكدر ادحك
يضرب بعيوني... طلعت للطرمة .. الله ريحتة التنور
والخبز.. صحت يولي وضحى تعاي ساعدي امي...
لفيت شالي زين.. وكفت بسد الباب... جان يطفي الايت
ودحك عليه كال اللبسي عباتج واصعدي...

دحكت عليه وعلى جابر كتلو بس اني اليوم اريد ابات هين

كال جيبي عباتج وغير وكت باتي...
جان يصيح جابر كال يله سمعتي شكلج امشي جيبي عباتج وتعاي

هزيت راسي اي.. صديت ورجعت بالطرمة .. تلكتني امي
لابسه ثوب الخبز.. كالت كوليله خل ينزل راح اشوي لحم بالتنور عليش رايح خل يحي يتعلل ويانه

كتله مايقبل راح ياخذني... كال تهيري وجيبي عباتج

_ ليش يولي خاف يستحي يبقى هين.... مو كلتي ابات

كتلها مادري يمه راح اروح احسن... طبيت لملمت غراضي
اخذت التلفون .. خليتو بالجنطة .. ولبست عباتي وطلعت

تلكتني ضي وبيدها صينيه الخبز...
كالت هااا شو لبستي وين النيه..

راااح انروح جة ياخذني عيني...

كالت اممم مايكدر  ياب مايكدر بدونها... يحبهااااا

ضحكت كتله لا تحسدينا يووولي .. عوذه من عينج

هههههه مانصيب يمه مانصيب اكفي حل اجي اوصلج

طلعت وبيدي الجنطة ورايه امي وضي... فتحت باب السياره
وصعدت بسدو،،.

جت امي تمشي من يا م الباب مالتي... وبيدها جك ماي مدت راسها كالتلو ديربالگ عليها تره تستحي تاكل

ابتسم الها ابتسامه خفيفه كاللها الله كريم

كتلها يمه خابري نجمة كوليلها راحت خطيه عبالها ابات،..
صد عليه .. بقى صافن وجان يكول يله نتوكل.. سلمنا على اهلي... امي ذبت ورانا الماي.. وطعنا الدنيه مغرب والجو مغيب ..
ومطر خفييييف .. كتلو هاي وين رحت اليوم اختفيت..

جان .. يصد عليه كااال تلفونج وين...

كتله تلفوني بالحنطة ليش...

كال صورج دازتهن الاحد كبل...!

كتله ياصور يعني...!

جان يحجي بصوت عاااالي كال داسألج منطيه صورج الاحد

كتلو لااا والله ليش... !  شكو شييك... مارد عليه مد ايده
بحيبو وطلع التلفون... يسوق ويكلب... كتلو كط التلفون من ايدك
الشارع كلو ماي غير وكت... جان يرفع راسو دحك عليه كال ليش.
غير وكت...؟

كتله مو اقصد انت دتسووق... والطريق مزدحم...

ماعليج اني اعرف اسووووق مو جاهل.... بس جاوبيني
وتذكري زين انتي مامنطيه صورج الاحد...!

لااا والله مانطيت صوري اعرف انت ماتقبل شلون ارسل صوري
قابل تخبلت...بس ماكتلي ليش هالاسألة...

_ انطيني تلفونج ... وينه

تلفوني مخلص شحن مابي ليش..

ليششش مخلص شحن وين راح شحنه...!

شبيك اعصابك ليش تزكح قابل وين راح بس من رحت الاهلي بقى بيد قصي يلعب اللعاب وخلص الشحن...

ماشي خل نصل البيت اشحني وجيبي عليه...

اي بس انت شبيك ليش هيج ضايج وتسأل أسإله غريبة...!

مثلا شنو الغريب بسؤالي...؟

يعني تلفوني والصور وضايج... تره اني انتبهت عليك من طلعنا من البيت بس مداعرف شنو البيك...! جر نفس وكال .. خل نصل البيت
كتلو شبيك هيج ضايج والطريق كله ادخن غير افتهم شنو الصار..!

_اشششش كافي خل نصل البيت سدي الحجي..

اي راح اسكت بس عليك الله خفف السرعه ... دشوف الشارع بي مطر ... روكان شبيك.. مو احاجيك ليش ماترد عليه...

كال دنجي راسج .. وكافي حجي جدامنه سيطره ...

مارديت عليه بقيت ساكته ... الطريق كله... لحد ماوصلنا للعلم
وصلنا البيت ونزلت .. فتحت الباب نزلت غراضي..

وهو طب يمشي جدامي اخذ المفتاح وفتح الباب...طييت وراه
خليت الجنطة عالدرج وبقيت واكفه .. هو كعد كبالي..
كال جيبي الشاحنه وشغلي تلفونج...

كتله هسه ادورها بس ليش ... جان يعيط بيه كال بس لو تبطل إساله
يووولي جيبي الشاحنه وتلفونج يمي...

كتلو اي افتهمت بس من حقي اعرف ليش وشتسوي بيهن

كام الحيلي كال تريدين تعرفين ليش موو..

كتله اي اريد اعرف لان الف مره سالت على تلفوني

جة يمشي وبيده تلفونه... وجان يفتح الفايبر كتلو شنو هاي شدتسوي.. كام يكلب بالمحادثه .. كلام مطول كله صعده ليفوك
وجان يطلع الصور... دحكت عليه وعلى التلفون كتلووو شنو عاي
صوري...!

رفع راسو عليه كال لازم اني مااشوف اعمى ... ليش اني مادري بيهن صوررررج..!

كتلو اي بس شحابهن يمك... طفى التلفون وخلاه بجيبه.. وجتف اديه الاثنين لوره.. كال شحابهن يمي لو شحابهن يم سعووود

دحكت عليه مستغربه كتلوو سعود شنوو..!

كال يعني ماتعرفين موو!!

كتلو لا بس هاي الصور بس عندي حتى اهلي ماعدهم شلوون وصلن بجهازك

دحك عليه بنظره قاسية وكضبني من ايدي ... كال صورج بجهاز سعود..تعرفين شنو وبهذاااا لبسج ...! الصورررر شلوون وصلن
سعود....

رجعت ليوره .. شفتو صار اعصاب كتلو شمدريني اني
قابل اني الدزيتهن...

مد ايدو على راسو .. سحب اليشمغ وكطه غادي...
كعد وكال تعاي اكعدي ...

بقيت بمكاني كتلو شكوو شبيك...

عاط اني مو اكلج تعالي شبييييج خايفه...؟

لا موخايفه بس ...

بس شنووو تعالي هين بسرعه ...

اييي بس لاتصيح شبيك... مشيت وكلي ثقة وبدون تردد .. سوالي مجال وكعدت بسده... مد ايده وطلع التلفون.. دخل على الفايبر
دخل للمحادثات ... مكتوب الاسم فاعل خير..، فتح المحادثة
وكال هاج ... كط التلفون عليه... وطلع جكارتو... وكام وكف الحيله
دنجت راسي وكمت اكلب بالمحادثه....
كلاااااام مطول.... واني اكلب.. اهجس انضربت براسي

قريت كم سطر... بلمح البصر... مكتوب سعود
اني حبيتك وابقى احبك .. بس روكان اخذني منك..
سعود اني معجبة بيك...!
نزلت الكلام... واني جسمي كله يرجف عيني عليه وعين
على التلفون.. صوري بالمحادثه...
دخلت على السكرين الثاني ...

مجاوب سعود... اعتذر منج تبقين اخيتي دام انتي حرمة اخويه
راح احذف رقمج وبعد لا ترسلين شي ..واني اقرأ ..
كامت دموعي تجري... كتلووو شنو هالحجي منو الي دزه الك

كال هذا الهامج منو الدزلي الكلام.. ..!

مشيت وكفت بسده كتلو دحك هذا الرقم الي بالسكرين مورقمي
منو الي ديسوي هيج...

جر التلفون من ايدي بقووة وفتح المحادثه من جديد وطلع
السكرين الثالث... كال هاج اقري...

سحبت التلفون .. ورجع على اول سكرين... مكتوب سعود هذا خطي الثاني محد يعلم بي بس اني وانت وربنا..
ارجوك لاتصدني.. اني معجبه بيك من زماااان...

وهو يرد ... كااااافي ولا تكتبيلي بعد ارجوج...

كتلو شنووو هالمحادثات.. ومنو الدزهن الك تره راح اتخببببل وهذا الي مكتوب فاعل خير منوو،،!

كال عوفي هالكلام  اني سألتج بالسياره كتلج هالصور دازتهن الاحد كتيلي لا يعني الصور بتلفونج انتي وبس... مو لو اني غلطان

اي صحيح بس بتلفوني بس ماعرف شلون طلعن...
كضبني من ايدي بقوووة كال ... صورج بجهاز سعود ومحادثه
مطوله ... بينج وبينه...

رفعت راسي عليه واني ابجي كتلو محادث بيني وبينه
يعني انت مصددددك بهالكلام...

ول موشغلة مصدك بس اني عقل براسيييييي مابقى..
صورج شلون وصلن سعود وماكو غريب يطب للبيتج...
فهمينيييي ... صور حرمتي بهاللبس هذا وعد الزلم.. عجل كولي اني
اعوووووذ بالله منك ياللساني...

_ يروح ويجي بالهول ويصفك بديه ... وجهه احمر...
ويدحك عليه بنظرات يريد ياكلني .. كتلو اني مدام واثقه من نفسي
ماراح اهتم بس اذا انت تشگ بيه عاد هالشي بقى يمك مويمي..
شلت عباتي والجنطة وصعدت عالدرج..

جان يصيح اكفييييييي...

وكفت واني عالدرجة الثانيه.. صديت عليه..بدون مااحجي
بس عيوني الف قصة بيهم... وحدهن جانن يحجن...
اهجس الدنيا كلها طلعت من عيني... واني ابجي .. كتلو بصوت مخنوگ نعم روكان..

كال ..عليش تبجييييين...

كطيت الجنطة ومسحت ادموعي كتلو احجي ماكو شي...

جان يكول يعني فوك اللي صار وانتي ام اراهي... انزلي
انزليييي خل افتهم الصور والمحادثه شنو هذن
يولي... اني روكان حرمتي صورها عند هذا وذاك... عجل خل اطم روحي... والغزل الي بالمحااااادثه... ! ش

ياااغزل شعليه اني كتلك مواني الي حاجيته والرقم مو رقمي..
معقووول ماتصدكني...

زين.. لو نكول احد سواااهه ضدج.. زين والصور شلون
مو بس بجهازج... يعني الصور انتي دازتهن...!

انييييي مادزيت شي والله مادزيت... ومووو اني الي حاجيت سعود
انت ليش ماتصدك... تره حراااااام عبيك والله

يووووووولي ... ولج موسالفه ماصدك اريد افهم هاللغز هذا شنوووو صورج منين طلعن.. وليش ماشحنتي جهازج...

جهازي هيانه موجود... كعدت عالدرجة فتحت الجنطة
كال شدسويين...

رفعت راسي كتلو شسوي غير ادور الشاحنه... مارد علية
بقى  ساكت واكف كبالي... ادور ماكوو.. شلت الجنطة
كطيتها كلها جدامه.. ثبرت هدومي عالدرج... الشاحنه ماكوو

كال ها وينهاااا...

رفعت راسي عليه.. كتلو مادري ماكووو...

يعنيييي شلون ماكووو موكلتي شاحنتي بالحنطة

اي بس بيت اهلي كلت الضي طلعي الشاحنه....

يعني تريد تفهميني الشاحنه بيت اهلج موو..!

هزيت راسي اي...

طلع تلفونه ... كال تلفون وضحى ترهم شاحنته على تلفونج مو

كتلو اي ترهم ..

جان يتصل بوضحى.. كال اللها دزيلي الشاحنه ويا احد
واذا ماكو احد اني اجي اخذها... سد التلفون وكعد واديه على. راسه
وينفخ .. مثل واحد لايبه روحه...

نزلت عليه وكفت بسد المحجل.. كتلو روكان .. يعني انت شاك بيه
هيج بكل سهولة شكيت بيه...

رفع راسوو ودحك عليه كال الف مررررة كتلج مو سالفه شاك بس
اكو لغز مداكدر احله... انخبطن عليه جثيرررر امور
عوووفيني... تره راسي راح ينفجر من المغرب للحزة واني
ررحي طالعه حاولت اعرف منوالي راسلني ماكدرت...
وصورج حرگن گلبي حرگ... شفتي رووووحج شلابسه بالصور
مووو ... يعني مابقى....(....) ماشافهن...

اي هذن صور سبعتي... بالفستان يعني شمدريني راح ينباكن الصور شمدريني اكو نااااس ماتخاف الله... داحجي وياه
وجان يطب جاهل.. كاال هاي الشاحنه دزتها عمه وضحى..
كام عليه اخذها... وشكلها  كال انطيني تلفونج...

ركضت طلعت تلفوني من الجنطة.. كتلو هاك.. خلي يمك ..
وكلب بي على راحتك... بس ثق اني مضلوووووومة...
خليته بأيده وصعدت اركض الغرفتي.... وقفلت الباب عليه
كعدت وكمت ابجي بحرگة .. ليش الفرح مايدوم يربي... منو الي سوه هيج معقول طلال... لاااا ماتصور... صفنت جوز هو حب ينتقم من روكان ...لان دخله السجن..  اي طلال لو زينه .. بس زينه ماتكدر ترتب هيج سالفه جبيره... كمت الحيلي الوووووب افتر بالغرفه .. وروحي تريد تطلع
اتذكرت من كالي انخبطن عليه جثير امور..
وتذكرت حجايته من كالي اثكلي ولا تبقين طايشه..
ومن كالي شافني ويا سعود اضحك..... وبالحديقه..
اووووف هذا كل عقله اني داحجي ويا سعود...
ياربي منين طلعتلي هالمصيبة... شجابني عالصور...
شسووويت بنفسي .. حسبي الله عالحان السبب... بطبعي من اضوج
اعزل نفسي عن العالم اطفي كلشي واكعد وحدي.. بس
هالمره بقيت الللوب.. اريد انزل اريد افرغ النار الي بصدري
فتحت باب الغرفه... وكفت يم المحجل... سمعت صوت وضحى وهي تحاجي... يعني خالتي جتي... حدرت عليهم.. واني عالدرج
دحكت على وضحى اشرتلي بيدها تعالي...  وهو ولا دحك عليه
مدنج راسه وتلفوني بصفه ويكلب بتلفونه... نزلت وعيوني تحركني
وحمر.. كعدت  بسد خالتي وضحى...
كتلها بصوت ناصي شفتي خاله شسوولي سالفه
اشرتلي بيدها اشش.. وجان تمد ايدها .. سحبت راسي وحضنتني  كالت ماعليج الله مع الحق لاتخافين   اكيد اكو ملعوب جبير
مسحت ادموعي... دحكت عليه كام اللحيله كال اللها اليوم انتي
هين باتي... اني راح اطلع...

\ كالتلو ها رايح بذاك البيت...

كال اللها لااااااا اريد اروح اللجهنم... شال اليشمغ والسويج ومشه
وكفت الحيلي اريد احجي بعدين اتذكرت كلت لا كرامتي
انهانت جثير تالي يكوم يشك بيه.. رجعت كعدت بمكاني..
سمعتة لطخ الباب بقوووة وطلع... شغل السياره.. وراح

كالت عوفي هذا اعرفه من يضوج يعزل نفسه لا تخابري

كتله لااا شخابره خلي على راحته وتلكي طلع حجة حتى يروح يمها
كالت لا وداعتج اعرف روكان جوز راح للدوام هناك يبات..
هو من يضوج يروح الدوامه... ً

كتله خاله تتوقعين منو وره هالسالفه روكان حجالج مو
كالت اي حجالي من العصر.. جان يمي ومتخبل يدك عليهم ينطو يغلقو.. والله يايمه مادري سالفتهم تحير..

كتلها زين تتوقعين زينه تسوي هيج.. لان هي هددتني وكالت الا اخلي يطلكج...

هااا يمتى هالحجي يعني ...

كتلها والله لان حجيت الابو عدوان على سالفه سعاد ..
جا متخبله وتصيح بالمطبخ...

كالت بس هذي سالفه مال واحد ذكي مو مال زينه اكيد زلمه وره السالفه كلها.... زينه وحدها ماتكدر تخطط هيج...

عجل منو خاله هو لو طلال لو زينه...

مادري يايمه ... كومي غسلي وجههج ولاتنقهرين دام انتي مضلومة
الله مايضبع حقج لابد ينكشفون...

اووف والله موهامني شي خاله بس روكان من شفته شك بيه
صدك قهرني ،. واني مستحيل ابقى يم شخص ماعنده ثقه بيه

اش لاتكولين هيج هو بحزة عصبيه تره حكة يايمه

لا خاله هو يعرفني احبه شلون هيج يشك

يمه ادري تحبي بس كبل انتي هم غلطتي ويا كتيلو احب غيرك
وكتيلو .. مجبوره عليك .. وهالسالفه الي صارت جمعت عليج
جثير امور اني ادري انتي تحبي بس الزلمة بهيج حاله دماغو مايكوم يجمع يكوم يفكر تفكير بعيددد...

خل يفكر وحلي يشك بس الله كريم... خل يصبح الصبح

لا تكولين هيج روكان كلبو طيب هساع الصبح يجي هادي ويدور عليج... كومي افرشي بسدي تره مطر بره وادري بيج تخافين

لا خاله راح افرش بس غير لو عيني تغمض... كمت الحيلي جبت الفراش فرشت.. تمددت هي خطيه غطيتها ... كمت على كيفي لمدمت الهدوم الي عادرج وخليت العبايه بسدهن..
دحكت عالقنفه جهازي بعده مو ماخذه... مشيت شلت التلفون
ورجعت اكلب بالصور.. الصور نفس اللقطات الي عندي عدهم
يعني محد مصورني لا الصور من جهازي منقولات...
ياربي والله غريب منو الاخذهن وجهازي بس بيدي....
تعوذت الشيطان... وحليت راسي عالمخده وتمددت...
اريد انام ماكدر عيني عالتلفون وعالباب.. جنت اتمنى يتصل
او يرجع.. بقيت اتأمل لحد مانمت من وجع راسي..
كعدت الصبح الساعه 8 ووبع.. دحكت على خالتي وضحى نايمه
شلت التلفون ... ماكو مكالمه.. ولا رساله... هيج يعني بكل سهوله
باعني وصدك.... ماشي روكان ان ماخليتك بندمك.. كمت توضيت
وطبيت للربعه صليت ودعيت الله يبين الحق... شلت السجاده
وطلعت.. لكيت خالتي وضحى .. كاعده وتلف بالكج...
كالت صوباح الخير يمه.. اليوم من وكت كاعده ماجة روكان

صباح النور خاله لا ماجة ولا خابر...

هو يجي لا انقهرين ... عوفي هسه هو بحزة عصبيه...

لا هو عفته وراح اعوووفه .. شلت التلفون...

دحكت عليه وهي تعدل بفوطتها.. كالت يعني شلوو تعووفي

كتلها... راح اروح الاهلي... جهزت غراضي...

لاااااا يايمه شو هيج وين تريدين.. اركدي يمه تره روكان ماتعرفين طبعه.. شلون تروحين بدون علمه

كتله لا خاله احسن ماكدر ابقى يم انسان من اول زلة شك بيه
طلعت الارقام .. الصادره رقم نجمة وخلف وجابر...
احتاريت على يارقم اتصل.... رفعت راسي كتلها بالعافيه عليها
زينه .. راح اروح هسه... كمت الحيلي والجهاز بيدي

يتبع