رواية ابو عدوان الفصل الثاني والثلاثون 32 - بقلم غير معروف

التاسع والعشروون

#ابو_عدوان

#مذاق _العشق

#بقلمي_نشوى_السلطان

مـساء الجـوري ..💐

ماتحملت الالم .. نزلت رجليه من الكرسي وكعدت بالكااااع .. بيدي كاضبه رجل الكرسي وايد الخ على بطني... صار وجع بطني
ماتحملت عطططت بصوت عالي .... روكااااااان .. اهجس روحي تريد تطلع .. من الوجع.... نفسي انگطع.... كضبت الكرسي اريد
اكوم.. ماحسيت الا وروكان فوگ راسي..
مد اديه.. كال شبيج عنود شبيج... كضبني من اذراعي .. كال
اكفي على كيفج... رفعني خلاني عالكرسي... واني متشنجة
احس بطني تريد تنفجر ..ركض جابلي ماي.. اشرتله بيدي ماريد
مدنجة وباديه لازمه بطني كتله وجع عندي مااااتحمل بعد..

كال اكفي ابوي انتي اكفي هسه اجي.. ركض طب جوه ..
جاب السويج ..كال تلفوني وينه .. خل اخابر وضحى ..
انخبص كام يفتر بالمطبخ ويدحگ عليه ..
طلع التلفون من جيبه ،. كال عباتج وين كومي اوديج للمستشفى
كتله ماااريد خليني هين مابيه اطلع وجع ببطني..
صد عالكاع .. شال العبايه نفظها كال ماكو ماتروحين
خل اوديج للدكتوره ،.، رفعت راسي كتلو وين بهالليل يادكتوره

_ اش ماعليج بس اكضبيني وتنهظي ... شو على كيفج ..
اكفي شوي شوي.. غير لو اعرف شجااااج يولي .. اكفي خل افتح السياره.. فتح باب المطبخ راح يركض فتح باب السياره...
جة يمشي.. كال ماتكدرين اشيلج مو.. اكفي خل اشيلج

كتله لالا عادي اكدر امشي... كضبته من اديه كادني على كيفي
كعدني وكال صبر هسه اجيج.. راح جاب العبايه خلاهه على جتافي
قفل الباب وصعد...طلع رقم وضحى اتصل عليه يطلع مغلق..
كال يووول لو بس ادري ليش كبل ماحصلها والجهاز مهجوم
صد عليه كال بعدها بطنج .. رجيت راسي عالكشن .. كتله
اي بعدها قويه .. مادري شجاني .. بس لا لان وكعت..

ديخابر وبيده التلفون.. صد عليه مبهوووت كال شنو وكعت
وين وكعتييي وشوكت...

كتله امشي هسه مادري اتزحلكت بالمطبخ....

_ تهند وكال شكد اكولج ديربالج بس اخ منج ... شغل السياره
ومشه.. يسوق وعينه عليه .. كل شويه ويدحك بوجهي..
انخبص خبص.. التلفون حركة على وضحى وكله مغلق...
كط التلفون بسده .. وطبينه بالفرع مالت عرس سالم...
واني مرتجيه .. دحكت الكراسي مسفطات وماباقي احد ...
جم زلمه واكفين همه وعساف بالساحة.. فتح الجامه ... نزلها
صاح .... على عساف كالو وينه اخيتي جة عساف يمشي من جهه ابو عدوان وكف بسد السياره دنج راسو كال الگووه
ها شو رحتو ورجعتو ..!

كاله الحرمه ماتكدر باله ماتصيح وضحى خل تجي..

كال هااا خير سلامات صاح عالولد .. يولو .. وينكم صيحو الوضحى من جوه ... صد عليه ودنج راسو كال تعبانج اليوم
كلو من سالم مابي اجر.. ثاري سعود ماينلام بي

ابتسمت واني اتألم.. كتلو لا خطيه .. شعلي هوه ..
داحجي وجان يعيط ابو عدوان ول وينهاااا وضحى ... فتح الباب يريد ينزل .. جان تطلع وضحى تمشي وراهه رواء وكفت يم الباب البره كالت ها خويه خير شو رجعتوا...

كال الها حدري ويانه للدكتور العنود ماتكدر ...

صاحت رواء يااااا خير شبيها... جت تمشي ... وبيدها الصياني

كالت وضحى صبر خل اللبس عباتي...

رواء كطت الصياني بالكاع وجت تركض..كالت هااا شكو شبيها العنود...

عساف.. مابيها شي طبن جوه الزلم كبالجن ...

طبت تركض رواء راحت جابت عباتها وجت تركض.. كالت اني اروح وياكم ... وضحى ماتكدر تروح تعبانه..

كال الها يله اصعدي... صعدت وطبكت الباب..

كتلها يولي وين ابنج ...

_ يم ابوه عفته ماعليه شي بس ماكتيلي شبيج انتي شرالج
كبل ساعه ماجان بيج شي...

دحكت على روكان كتلهااا لا ماكو شي .. بس بطني وجعتني

_ ليش شبيج خاف تعبتي اليوم مو كتلج اكعدي...

العنود .. من كالت هيج صد عليه وهو يسوق كال الها لا عوفيها
هي شوكت سمعت الكلام خاطر تسمعو اليوم... دحكت عليه وصديت مارديت شي كتله يولي شبيها وضحى .. خطيه شو كوه تحجي...؟

_ ماابيه شي المهم شونها بطنج هسه ..

رفع راسو روكان ودحك عليه بالجامه كال الها شبيها وضحى ..

كالت هيج مابيها شي.. بس تكول يمكن ضغطي صاعد..
بس سوينالها ليمون هسه احسن ..

صفن عليها وكال الها زينه وامها وين...

جان تجر حسره كالت موجودات بس عفتهن يريدن يطلعن..

بقى ساكت ماحجة شي ... شال التلفون حسيته يريد يخابر احد ..
شو صفن ورجع كط التلفون... وصلنا المستشفى...
نزلت رواء .. وهو جة يمشي فتح الباب.. صاح عالحارس
كالو جيبلي سديه كرسي عالسريع...
كتلووو لااا دقيقه اكدر امشي... كال بس على كيفج ..
كادني من ايدي كال اسندي راسج عليه ...
كادتني رواء من ايد وهو من ايد طببوني للمستشفى...
كعدني عالكرسي .. كال الها رواء ابقي يمها هسه اجي..
كعدت بسدي رواء .. كالت يولي هاي اليابسه وعمليق صابنج
كتلها وج شصار بيه حسيت نفسي راح اولد .. الوجع يموووت

ههههه هاي هيج عيني عجل لو تشوفين الولده الصدك...
جان شكلتي...

كتله يولي شبيها وصخى...
دحكت عليه كالت ماكو شي بعدين اسولفلج ...
بهالاثناء جة روكان وبيده وربه بيضه كال يله تنهضي اكفي الحيلج
.. تكدرين لو لا..

كتلو لااا اكدر... كمت الحيلي .. واني اتألم ... طببني واخذني للغرفه
طبيت دكتوره كاعده .. وتفحص بالطفل... صغير .. كعدوني

عالسرير .. رواء واكفه بصفي وهو واكف عالميز يم الدكتوره
بقيت ادحك عالطفل تفحص بي الدكتوره وهو يناغيلي ويبتسملي

بحزتها خلاني انسى حتى المرض تخايلتو طفلي.. مدي اشيله
واخلي بحظني تخايلتو ابني .. شالته امه .. كالتله الدكتوره
اخذي العلاج من الصيليه وطلعي مابي شي...
اخذته المريه وطلعت... جان روكان يسلم عالدكتوره كال الها ..
ولي يسلمج دكتوره عندي حرمتي تعبانه وماتكدر.. ماتشوفيلياه شبيها ،،

كامت الدكتوره جت تمشي وكفت يمي...
كال الرواء اني راح اكف بره .. وانتي ابقي يمها...

جتي الدكتوره فحصتني كالت ... شكد الج هسه... كتلها كملت الخامس من يومين وبديت بالسادس...

مدت ايديها على بطني.. فحصتها .. كالت لاتخافين هاي مجرد تقلصات لا اكثر...

كتلها دكتوره خاف الطفل يريد يوكع لان ماوجعتني بطني قبل هيج

ضحكت كالت لا حبيبتي الظاهر انتي اول طفل طبيعي هاي تقلصات بالحمل.. انتي اليووم مقهوره ضايجة من شي...

رواء... اي والله االيابسه وعمليق قهرنها .. بعرس سالم

صفنت عليها الدكتوره .. ضحكت كالت منو سالم منو اليابسه

ضحكت اني كتلها دكتوره اليوم تزحلكت بالبيت بس ماتأذيت جثير
كمت الحيلي .. بس اليوم جنت مقهوره وبعدها هيج صرت..

_ الدكتوره .. اي ماما طبيعي هذا قالون العصبي عندج متغضب
وتقلصات قويه تضغط عالطفل.. راح انطيج علاج اخذي من الصيليه وباجر روحي لدكتوره لمياء.. سوي سونار حتى نتأكد من صحة الطفل اكثر.. وان شاءالله معافاه...

تمهضت وكومتي رواء..  كعدت الحيلي..

دك روكان الباب.. كالتله رواء فوت.. عدلت نفسي ونزلت هدومي

طب يمشي كال ها خير دكتوره ...

كالتو رواء ماكو شي بس تكول لازم ماتنقهر..  شال الوصفه
كال الها دكتوره يعني اطلعها للييت زين سونر هين ماكو

_ الدكتوره .. لا ماعدنا سونر .. اخذها اليوم وخلي ترتاح..
واهم شي اعصابها .. الظاهر هي ماتتحمل بسرعه تتأثر..
خلوها ترتاح وباجر تاخذ سونر وتروح لدكتوره اختصاص بالحمل
وان شاءالله مابيها شي..

دحكت عليه كتلو خل نطلع.. جه يمشي نزلني من السديه
تشكرنا من الدكتوره وطلعنا...دحك ازدحام عالصيدليه..

كال امشي ناخذ العلاج من بره... كادتني رواء طلعت امشي
وصار الطفل جدامي .. امشي وادحك عليه . وهي يناغي ويضحك

لو يمي يمكن اشبعه بوسات.. لزمت بطني واني امشي.. دعيت
الله يحفظلي طفلي .. صد عليه .. كال نزلي الشال صدرج طالع

يمشي ويدحك عالعالم .. خاف احد يباوع عليه.. مخبوص يدحك يمنه ويسره .. كل شويه ويكول
لا خوش مريضه وجايه بفستان حفله.. امشي ول يابه امشي..
وين ماكو رثع يدحك عليج... انعل ابو ساعتكم .. شلون راح اكوم ادوس راسو بالحذه.. 

رواء مدت راسها كالت يولي بس عرف مابيج شي رجع يحجي عالعالم .. ههههه امشي خل نلحك نركب السياره ونمشي كبل ما روكان يتحاتل ويا واحد والقالون مالتج ينكلب جوب يولي..
من كالت هيج ماتحملت ضحكت بصوت عالي وايدي على  بطني
كتله خرب ساعتج على هالدگة .. جان يصد عليه وحزرني بعينه
كال حسسسسج وين كاعده باللبييييت..

جان رواء تخاف كالت عزه عليج اسكتي راح ننكتل هينه..
طلعنا .. نمشي واحنا مدنجات روسنه .. فتح باب السياره كال
اصعدن .. رايح اجيب الدوه من الصيدليه البره واعگب
صعدنا اني وياهه.. وهو راح يتمشى جدامي.. صديت على رواء
كتلها يولي عوفج من روكان ومن القلون العصبي.. فهميني
اكو شي صاير ورايه واني مادري بي..

_ لاااا ماكو شي يمعوده شبيج.. اكلج شوكت تجهزين للطفل انروح اني وياج من تكريت ناخذ اكو محل بشارع الاطباء مال بيبي يخبلن
الشغلات العنده...

كتلها رواااااء عوفي السالفه كلها ولا تفريها صار شي ورايه
احجيلي حتى افهم.. لاتخلين بالي كليلي روكان مرجع زينه
لو شنو .. شبيها وضحى.. يولي لاتخليني اسمع من غيرج

_ رواء ..اووو العنود ليش تلجين يولي... راح اكولج سالفه
وخليها ترجيه بأذنج .. زينه ديري بالج منهااا ... تره خبيثه
وكلشي تكدر تسويلج...

كتلها .. خل تولي هاليابسة شتريد تسويلي مثلا ..
والله ان جابت اسمي بسالفه اطب اسحلها بنص اهلها
ان جان ذيج المره تحملت الها هالمرره لااا وداعتج

رواء.. دسكتي سدي السالفه جة روكان هسه انترزل
خل نرجع عالبيت هسه ابن الثوله الكاه واكفلي حدر الدجة بالباب
يتناني... يولي وراج صارت الحفله تخبل حتى العروس كامت تركص..

اي الله يهنيهم... اوف روكان طلعلياهه سم...

اشش من ايدج تتصرفين بخبال يولي .. اكو حرمه تغيض زلمتها بزلمه ثاني.. حيل بيج .. جة سدي السالفه بعدين

العنود.. فتح الباب وبيدو علاكة الدوه.. خلاهه بسدي وصد عليه
كال شلونج هسه...

دحكت عليه بطارف عيني وصديت عالشارع كتلو مابيه شي

_ روكان.. اشوف مو راضية .. تصدين غادي.. يولي رواء
ليش خليتنه تكوم تشنغل لو صاير بيها شي.. موتدرن بيها حامل
خل اصل الييت هم كليي باجر اريد اروح للعرس...

_ ماروح ماروح مكان بي زينه واتباعهه ماريده بس امشي

رواء... عود نزلوني بيت سالم هناك اهلي وابو حمودي..،

العنود...التلفون مالته بسدي.. كام يدك.. هو ديسوق دحكت عالاسم
مكتوب سعود الفهد... مد ايده ... رفع خط... كالو هلا سعود سلم

عليه وجان التلفون صوته عالي... اسمعه يكوله بس ترجع للبيت اريد امر عليك بشغله ...كالو هساع اني بالطريق اصل ويصير خير

خمو بالدوام صاير شي... كاله لا لا بس سالفه لما تصل بخير وسلامه احجيلك.. سلم عليه وسد الخط...

كالت رواء .. هذا سعود موو... والله عرفته راح يخابرك

دحك عليها بالمرايه كلها ليش شبي سعود..

كالت اسمع منه هو راح يحجيلكم.. اني ماعليه...
من كالت هيج استغربت اتذكرت من كالت وضحى مرتفع ضغطها

وحذرتني من زينه.. كالت صاير شي ورايه اكيد...
وصلنه بيت سالم .. نزلت رواء كال الها صيحي وضحى خل تجي

ويانه... جان يصيح سالم من مكانو كالو يبو عدوان مو هينه وضحى
راحت ويه سعود توها... مشت رواء طبيت للبيت.. لاف السياره

روكان واحذنا لبيتنه... نزلت طبيت بالهول ارتجيت عالقنفه..
خله يمي العلاج وراح جاب الحبايه .. كال اشربيها هسه ..

خله العلاج بسدي .. طلع التلفون من جيبه .. وطب للربعه وسد الباب وراهء... شربت العلاج ... وكمت ذبيت العبايه.. طبيت

للمطبخ اريد اردي الكلاص.. جان يصير لايت عالشباك.. دحكت من الجمامه .. نزل سعود يمشي..  وياهه خالتي وضحى طبو  للربعه.

وسد الباب وراهم... بقيت صافنه شبيهم .. اكو شي والله ..
شصاير خرب غير افتهم ..خاف جايين يرجعون زينه ...

لا مستحيل ماتصور خالتي وضحى ماتسويها.. طبيت امشي
وكفت يم باب الربعه ... اريد اسمع شيحجون.. ماكو صوتهم

ركضت طفيت السبلت .. ورجعت خليت اذاني عالباب..
حاولت افهم .. اسمع سعود يكوله مايرهم هالحجي الناس الها
الظاهر اذا اقرب شخص هيج يحجي شلون مايصدكون..

وضحى تكوله يابه اتفاهم وياهم بدون مجاتل تره تصير فضيحة
هين اني بعد اريد اكف الحيلي ماكدر .. كمت الوب بسد الباب

اريد بس افهم شي .. اسمعه يصيح يكولهم والله ماتصيرلي مره وهي طيبة .. هذا مكانها واريد اشوف منهو الي يرجعها بعد.. يصيح

بعلات حسو.. وطلع يمشي باب الربعه انفتح .. واسمعهم يرجعون بي .. وضحى تكوله الخاطري ارجع لا تروح .. ركضت للمطبخ

فتحت الباب.. شفت سعود يرجع بي يكوله ارجع بروح عمي..
وروكان دفعه وطلع يمشي سريع.. وضحى بالطرمة تصفگ بديها
تكوله الحكة يابه اليوم يتجاتل ويا اهلها... شلون بلوه هاي ماتسكت

لفيت شالي .. وطلعت علو خالتي اركض.. كتلها خيرر خاله شكوو
روكان شبي يصيح وين راااح... شفتها وجهه اصفر مابيها حيل تحجي كعدت بالكاع كالت يمه جيبلي ماي حلكي يبس..

شفتها منتهيه تربعت وكعدت بالكاع وسعود طلع يركض وره روكان
ركضت للمطبخ واني كاضبه بطني.. جبتلها كلاص ماي شربتها..
كتله خاله ارتاحي .. مايصير شي لاتخافين..

كالت .. اليوم يتذابح ويا اهل زينه ..اليوم ناس تذبح ناس.. شراح يسكته .. اووف كتله لسعود لا تحجي ... اويلي شلون يمه

تلفوني ماكو جان خابرت اهلي يجون عليه..
يايمه رجليه ماتنن مابيه الحكهم.. خابري يمه بلجي يرجع..

كتله لاتخافين مايصير شي والله .. شوفي نفسج شصاير بيج

كالت .. كله منها .. ماجازت من طلايبها .. مره هالگبرج
وكل البلا بيج .. والله لمو اكول بنت عمي الا اتبره منها على هالعمايل..

بس فهميني خاله شنو الصاير ... شكو شبي سعود وياهه

_ اسكتي يمه ياريت بس سالفه اسعود.. تذكرين سالفه سعاد..

_ ايي قصدج الارمله مو...

اي اي هيه يمه .. اليوم كضبتني امها بالعرس اتكول جنتكم حاجيه للنساوين تكلهم سعاد تركض وره روكان .. ومتخبله اتكول بس

يسمعون اخوتها يهدون والله مايسكتون.. من كالتلي هيج انقهرت تخبلت.. البنيه فاين حظها وتجي زينه تتهمها .. وتكلهم تحب روكان

عزه عالماتلج .. كلمن شافتها كالت تركض وره روكان..
ماسكتت ام البنيه الا واني تافله المر...

_ هاااا خاله تلوميني من احجي مو كتلج .. هاي ماراح تسكت
يوميه تبلانه بسالفه .. هذي موصاحيه اكيد مريضه

شوفي والله هساع لني كلت نفس سالفتج بالعرس كلت للنساوين
هاي مثل خالتها بيها انفصام بالشخصيه.. بعيد البلا والله مو طبيعيه .. تتصرف تصرفات مال جهيل الله وكيلج ..

كتلها بلجي مفصومه بالنص .. زين وسعود شبي وياهه..

_ اووف عجل مو تجاتلت وياهه بالمطبخ كتلها شنون هيج تكولين
على البنيه تحب روكان .. ماخفتي ربج .. جان تكول ايييي اكول

وبعد اكول اني التركض وره رجلي افضحها بكل الديره ...
عاد اني هين صدك تخبلت كتلها ولج خافي ربج حررررام التهم

البنيه مالها شر على احد وماشفته منها شي شلون تريدين تبلين
اخويه ويا الناس.. جان تكولي امها بنتي ماتتبله على احد احنه

شفناه يتردد عليها .. شفنه بعيونه محد كلي.. كتله غضب الله
عليجن شلون اثنين... النساوين بالحفله وايدي على كلبي كل شويه

اكول راح يسمعن وتصير فضيحة جة سعود وعساف
يركضون على صياحهن.. جان تعيط الامايه اييي جة سعود جة
هاا ..المن تريد ادافع للعنود...

جان يبقى صافن عليها وعساف واكف..

كال الها عيب عليج شهالحجي هذا .. شنو العنود احترمي نفسج
انتي بكير امي .. وومايصير اتجاوز على حرمة ..

جان تعيط وتكله هاااا تغشم نفسك عادي احجي عليش مستحي
بنتي لا تهمتك ولا تهمتها شوفتي الحجي مالتك وياهه ..

وشلون هي كاطه نفسها عليك.. شلون نسوان تالي وكت
تركض من زلمه زلمه... وزينه تأيد كلام امها...

عاد تلاطشت وياهن ماكدرت اسكت وسعود تجاتل وياهن
ورواء رادت تكتل زينه بس ربج وخرناهه .. لمو ابو عدوان يجي وياخذها جان وحده كتلت الخ ..
يمه اليوم ايتذابحوون. والسبب هيه .. الله لاينطيها .. خل اكوم الحكهم...

العنود.. تحجيلي واني بس الطم على وجهي كتله هاي فضحتني وشهرتتي بالديره الله لا ينطيها ..والله اليوم اروح بيدي اسحلها

كمت الحيلي طبيت للمطبخ ... شلت عباتي... وخالتي وضحى تصيح عليه اعكبي يمه اعكبي ماكدرت ..لبست العبايه

وصلت للباب البره دحكر على خالتي كوه تحجي وجهه اصفر
قهرتني .. رجعت عليها.. كتلها كومي خاله شسوت بينه هاي

الله لا ينطيها.. توجت عالحايط وكامت ويايه .. طبيتها كعدت عالقنفه .. كالت حاره يمه شغلي هذا المعلك.. صديت

ياا قصدها السبلت.. شغلته كتله هسه يشتغل.. اجيبلج ماي النوب
كالت لا يمه فتحت اللكج .. كالت روحي غايطه ..

شلون يمه اخوها شراني ولد عمي واعرفهم وروكان مايسكت
خايفه يصير شي ...

كتلها وينه تلفوني بلكت يجاوب... ركضت شلت التلفون
طلعت الرقم دكيت واني امشي بالبيت روحي مفرفحة ادحك

عليها منتهيه كلت هسه يصير بيها شي..
مادري هو الي راح ومادري شراح يصير.. يدك ومحد يرد

يارب اكفينه شرهم يارب...اروح واجي للطرمة وللبيت واني لازمة بطني.. امشي وادعي... وين اروح هسه وشلون افتهم السالفه

طبيت على خالتي.. ادحك عليها حلكها يابس .. كتلها خاله
هسه يرجعون لا تخافين .. كعدت يمها فركت الها اديها ورجليها

وهي راجيخ راسها عالقنفه.. جان اسمع حس من بعيد كتلها خاله خاله يمكن جوي... كمت الحيلي وخالتي ورايه ... تمشي وتلف

بالفوطه... جان ...يطب سعود يركض للطرمه وردانه كلها دم  ... كال اريد شاش كطن بسرررررعه ... من كال هيج اهجس

حيلي راح ... كضبت بيدي الباب كتله شبي روكاااان وينه
صديت على خالتي كامت تلطم على وجهه... البيت كام يفتر
بيه وسودت الدنيا بعيني.....

يتبع.....

شكرآ لجميع التهاني الي وصلت على الخاص والي
وصلتني بالتعليقات .. الحمدلله التوفيق من الله
وماانسى تشجيعكم الي ييعلي من معنوياتي ويخليني اكتب
واستمر واحصل على المليون.. وصلنا المليون
بفضل من الله وبفضلكم ❤️