رواية ابي والغزلان الفصل الحادي والثمانون 81 - بقلم ريام هادي

ابي والغزلان الجزء الثاني
للكاتبة Reem
البارت الثاني  والثلاثون

(بارت لاحلى متابعين مااكدر استعجل حتى اعطي الحدث والي صار حقه اتمنى تستمتعون بهذا البارت تحياتي لًلًـّــ💎ــجٌٓمٍَُٓيِّعَْٓ )

مكابر كوه اجيب الراس عالراس
واعاند دنيتي عناد المجانين
وانه شما اطيح اكل للروح لاباس
على جروحج توجي ولاتصيحين
شربني الزمان اهموم من كاس
اقسى وأمر من سم الثعابين
تجرعته بصبر ماسمعت ناس
لجن ياحيف فضحني النياشين
انه الروحي جبل يهدمها يافاس
وانه المرمر التنحد بي سجاجين
لخلي جفوني عل دمعات حراس
واكل للعين فنج بعد تبجين
اذا وصلت منيتي لكطع الانفاس
واجب من يمر شامت تضحكين
مرمر سكف روحي واصلب الساس
ولامن جام بيتي وساسي من طين
وطبع بالروح يشبه ورقه الياس
يتكاثر عطرها بفرك الايدين.

سليل : مر اليوم كله واحنا على كعدتنا ورشا مصحت وكل وكت يمر علينا انحس بيه سنه صافنه على الساعه المعلكه بلحايط شلون تتحرك ثانيه ثانيه وكل حركه منها گلبي يدك وياها دموعنا منشفت حتى التوكف دموعه تحسه كاعد على نار نتوسل بلرايح والجاي بس حتى نشوفها وممنوع الدخول
وصار الصبح وعدا الظهر ورشا نفس نومتها
نهر : ولكم راح تروح من ايدنا خلي ننقلها لبغداد
سجاد : ممنوع الحركه عليها شبيج نهر غير البنيه فاقده همه حتى ميكدرون يسون عمليه الها يخافون من البنج عليها وبعدهم لهسه ممحددين حالتها

حجي طه : شصار شعلان بنتي ليش وكف گلبها بنتي ليش دتموت
شعلان : الف مره سألتني طه وجاوبتك جانت بلدوام واجت وكعت
نهر : انعل ابو الدوام هي حالها وضعها مال تعب ودوام
سليل : اجه الطبيب الاخصائي وياها اطباء مقيمين وناس تكتب وناس تشرح نريد واحد يفهمنا ماكو هسه غير يشوفون حالنا دك تلفون اباوع غزل ياربي شلون اخاف اجاوبها وتحس اكو شى وهي وحدها هناك اخاف تتأذه لزمت التلفون وانطيتها رفض وكتب الها اني بلدوام
رجعت كتبت ليش ادك عليكم محد يجاوب لا انتي ولا بابا ولا ماما تره البارحه حلمانه حلم موزين وكعدت مخنوكه انتم زينين
نزلت دمعتي وكلت اوف ياگلبج يحس بخواتج وجاوبتها كلنا مثل الورد مابينه شى من ارجع من الدوام نتراسل ونهيت المراسله وياها
اجه طبيب ولزمه بابا يتوسل بيه مقهرني غير من يكول ارحم شيباتي وكلي بنتي شلونها
جان يكول حالتها صعبه وحرجه ادعولها وانت حجي ابوها ادعيلها عسى ولعل ربك يستجيب

وعافنا وراح حسيت هذا هو ديكول كلها دقايق ويجي خبر اختكم
خليت راسي على الحايط واشهك وبشهكتي اتذكر سوالفها شقاها شخصيتها القويه بس الي صار بالي ريم رغم احنا كلنا خوات وروح وحده بس ريم ورشا غير وكأنهم توم رغم اختلاف الاعمار وحدتهن تفهم الثانيه من نظره العيون حطيت ايدي على وجهي وابجي واتذكر شلون جانن جهال وياخذن حيفهن من الي يأذيهن وشلون كعدتهن من يدك البسامير بلخشبه من كل گلبهن ويضحكن حتى بس يأذون عمو علي وبيومها خربن التايرات شكدوتهن ومخافن منه وخلنه بيومها يعيط من القهر على سيارته الجديده  شلون فرحتهن من يتفقن على واحد ويأذنه وتالي يخلصنها ضحك وركص لان منامن مغبونات اذا وحده تعاركت الثانيه بدون متطلب منها تجيت وياها شذكر وحده اثنين من دكتاهن الي مرات اسميها خباثه ومرات اسميها سباعيه
وحتى من صارت حادثه ريم كلنا انهارينا وبعد مده بدينا نتعود على الحال اله رشا بقت طول ماهي يمنا تصعد بدون علمنا تفتح الباب على ريم وتكعد بلباب تباوع عليها من بعيد  وتبجي وتسد حلكها حتى لحد يسمعها جنت اشوفها واتأذه وياها بس مااحجي لحد مايوم صعدت صدفه وهم شفتها مسويه نفسي الشى بس تفرك بگلبها عرفت اذا سكتت يجوز تصير كارثه بصحتها توجهت لبابا بدون محد يعرف وبلغته ومنعها تجينا للبيت اله بلحاله القصوى خاف على گلبها لهذا جانت يومياً تخابرني بس حتى تطمن ريم اكلت شربت نامت محجت وتلوب عليها جريت نفس ومسحت عيووني اوووف قبل يومين من دكت

تذكرت حجايتها قبل يومين من كالت محتاجه ريم سوده بوجهي لعد شنو الي بگلبها ومحتاجتها بيه يجوز شكها صحيح بشعلان بس من اباوع على كسرته وقهرته مو مال واحد عنده شى
باوعت على سجاد ورحت يمه بسرعه وكتله اخذني لبيتها
سجاد : مو وكتها هسه سليل الجهال يم جنات شكوو عليهم
سليل : ياجهال بس وديني واني افهمك
سجاد : امشي طلعنا من المستشفى واخذنا تكسي من الباب وكبل لبيتها اول مدخلت نزلت دمعتي سوده بوجهي ولج رشا رجعي لبيتج احس البيت يبجي عليج ركضو الجهال من شافوني وخرو ماما مو وكتكم هسه

سجاد : بس فهميني شكوو
سليل : هسه اجيك وطبيت للبيت لكيت جنات كاعده وحاطه ايدها على خدها وجهه اصفر اكيد مقهوره حالها من حالنا هم تعتبر اختنا من شافتني جفلت
وين ريم
جنات : فوك بغرفه الجهال نايمه
سليل : صعدت ركض وفتحت الباب وشفت ريم نايمه شلون الجاهل ومحاوط رجله لزمت جتفها بهدوء وكعدتها
ريم ريم اكعدي

فتحت عيونها وسدتها
سليل : اختج محتاجتج اكعدي لخاطر الكعبه متجاوبت ويايه كمت على حيلي هاي شسويلها ريم ابوس ايدج ركزي ويايه رشا بلمستشفى ولا يمها
متحملت وكمت اعيط عليها وجريتها حيل وكعدت وجان اصلخها راشدي والثاني واشهك ولج اختج دتموت رشا دتموت كومي بروح رفل كومي جان تعيط وحضنتني
ريم : رفل ماتت احتركت بنتي احتركت سليل
سليل : واذا تبقين هيج راح ادفنين اختج بصف بتج كووومي فدووه علا صوت عياطها ونحيبها بقوه شلون اول يووم وكأنها هسه سمعت خبر وفاة بتها ورجلها مو صار ٦ اشهر

سحبتها حيييل من ايدها وتشهك وتصيح رفل يمه دفنوج واني مو يمج ذبو التراب فوكج وماشفتج دفعتها بلحمام وفتحت الدوش جواه هي وملابسها جان دوش ماكو بانيو كاع عاديه بقت واكفه جوه الدوش وينزل المي عليها وتشهك كعدت بلكاع والمي فوك راسها رجعت جريتها وكفتها وهم ضربتها حطيت عقلي وياها رغم بلحظتها المفروض اكون يم رشا بس احس مو اني الي تريدني تريد ريم اضربها وتعيط ولج كاافي اصحي روحي شوفي اختج مترسه اجهزه دتموت بتج ماتت الله يرحمها طفله اشهر عمرها روحي شوفي الخلصتي ٢٣ سنه وياها شصاير بحالها تردين رشا هم تموت تردين هم تشوفين اختج شابه يذبون عليها التراب

سمعت دكت الباب وسجاد يصيح
سجاد : سليل شجاج افتحي الباب شدسوين
اسمع عياط ريم
سليل : اليوم لو اني لو هي انتظرني سجاد
سجاد : لج بابا البنيه مريضة لتوكع نحير بيها لو برشا
سليل : مابيها شى هسه تصحى واذا مصحت اني اصحيها
سجاد : استغفر الله ياربي تخبلتي
سليل : روح سجاد بلهول
رجعت لزمت وجهه واوخر شعرها المبلل منه باعي عليه اني منو
ريم : شهكت وگلت انتي سليل
سليل : تسمعيني زين
ريم : اشرت براسي اي
سليل : ريم اختج ونصج الثاني دتموت كعد تعالج كلها ساعات ونغسلها بيدنا وندفنها اذا موعيتي دنجت ابوس ايدها من كثر ما منهاره اريدها توكف ويايه تساعدني سحبت ايدها وحضنتني
واعيه حبيبتي
ريم : اي
سليل : نروح لرشا نروح لريا هااا سكينه هاي حبيبتج نروح الها بااعي عليه

ريم : يكولون المصدوم ميصحى اله بصدمه اكبر او عالج الصدمه بصدمه اقوى
هذا حالي صدمتي على بنتي وسامر جانت قويه لدرجه رفضت حتى اعيش بعدهم يمكن خوفي من عذاب الله هو المنعني من الانتحار بعدهم بس قررت اموت روحي بأن اهجر نفسي وكلشي لدرجه مااحس بلي داير مدايري اله نادراً وارجع ارفض الواقع ودوم اكول بداخلي هذا حلم هسه اصحى منه والكه سامر كامش الكتاب يقرا ويضوج من صوتنا ورفوله بحضني وتيم يلعب بصفي دوم اقنع نفسي هسه راح يجون نامي ريم هسه تكعدين وتلكيهم يمج ومرت الاشهر بدون مااوعى على شى لحد مااجت سليل وخلتني احس اني راح اضيع نصي الثاني فكرة افقد انسان ثاني احبه مرعبه اذا رشا راحت مستحيل هلمره اكدر اقاوم وهنا بديت اوعى بس جسمي تعبان وروحي ميته بس وعيت وصحيت على واقع مرير زوج وبنت ميتين واخت تعالج بين الحياه والموت

سليل : ريمو نروح للمستشفى احجي واريدها تستوعب كلامي جان تكول
ريم : اريد ابدل وامشي نروح الها متعوفني رشا متعوفني وحدي اعرفها متفقين اني وياها الي يصيبني يصيبها
سليل : عفيه ابقي على اتفاقكم تعاال وسحبتها من جوه الدوش وركضت جبت خاولي ونشفت الها فوك ملابسها بدون ماانزعها وطلعتها وصعدتها بغرفه رشا ادور على ملابس فتحت الكنتور وطلعت ملابس الها
ريم : عوفيني ابدل وحدي
سليل : تكدرين

ريم : اي اكدر بديت ابدل واباوع على ملابسها اني حيل ضعفانه لهذا ملابسها كبار عليه واني البس تراكسود اسود الها شميت ريحتها بيه غمضت واتذكر من نختل حتى نسوي مكسوره بواحد لو من نخطط الليل كله شلون باجر نعاقب واحد ضوجنا ولازم منترك اثر ورانا فتحت عيووني وسحبت الجبه مال سليل ولبستها والشال ضبيته زين ودورت على شحاطه لبستها وطلعت
ريم : يله سليل

سليل : تكدرين تمشين
ريم : اي اكدر بس شويه دوخه عندي
سليل : هسه اشربج عصير
نزلنا ودخلنا للهول كاام سجاد
سجاد : هااا ولج صحيتي تعاالي
ريم : ركضت بحضن عموو ابجي وهو يمسد على راسي
سجاد : كاافي زيبك انتي سباعيه وقويه الله يصبرج
ريم : عمو تعبانه حيييل
سجاد : اعرف والله مو هينه بس هسه اختج محتاجتج من انتن وصغار سوه تالي وكت تعوفيها ينطيج گلبج
ريم : وخرت من حضنه وكتله لا

سجاد : يله شو امسحي عيونج هاي سليل مثل المرض صايره ياهو التلزمه تبجي
ريم : حسيت واحد حضني من رجلي باوعت تيم دنكت وشلته وحضنته وابجي واشم وابوس بيه ياروح امك اشتاقيتلك كبران فدوه لوجهك الحلوو
سليل : منظرها وهي تبوس وتشم بأبنها يكطع الگلب
وين جنات
سجاد : بلمطبخ يمكن مدري شبيهه يمكن مقهوره على رشا
سليل : يله ريمو حبيبتي عوفي تيم من ترجعين بعد لتعوفي

ريم : نزلته من حضني لان دخت احس جسمي كله يرجف بس مااريد ابقى اريد اروح لرشا
دخلنا للمطبخ لكيت هند وجنات يتبسبسن
مرتاحيت لوكفتهن
هند : الله يشافيها لرشا عيني
شلونج ريم البقيه بحياتج
ريم : عيوني على جنات الي حتى مسلمت عليه وجهه مگلوب احمر مدري ازرك ابد مو طبيعيه وتفرك بيدها  احجي واباوع على جنات وحياتج شكراً
هند : اني راح اخذ جنات عدنا والجهال شلون يبقون وحدهم
سليل : بكيفكم يله سجاد تأخرنا فدووه عينج على الجهال فدووه
ريم : هااي شبيهه مخلوسه

صعدنا بلسياره وطبك سجاد جاب بسكت وعصير وكلنا ريم كوه مردنا تتخربط
وصلنا للمستشفى اول مشافوها تمشي على رجلها وجايه بابا كاام واجي بسرعه عليها وحضنها
حجي طه :  الْحٍمَدٍ للـّہ على سلامتج بنيتي
ريم : بست ايده لبابا مشتاقه لحنيته
الله يسلمك حضنتني عمه وتبجي
نهر : بركه يمه من صحيتي الله مايكطع حشه لله يوم مانفرح بطلعه رشا
حجي طه : زينه انتي بابا ريم حاجيني زينه
ريم : اي زينه وين رشا
حجي طه : ميقبلون احد يطب عليها
ريم : اريد اطب عليها
نهر : حاولنا يمه مايقبلون يكولون ممنوع
سجاد : ماكو شى ممنوع هسه جم فلس يطببوها
سليل : فدوه سجاد روح شوف احد يطببها حتى لو بس هيه مندخل
ومن الاجرائات الي بلمستشفى تنطي الفلوس اطب حتى للمدير مع الاسف هذا حال العراق بلفلوس كل الممنوع يصير مسموح

سجاد : كوه الممرضه قبلت خمس دقايق مو اكثر كالت شويه انتظرو خلي يطلعون الاطباء ساعه ٣ الظهر وتتغير الشفتات واطببها
بقينا ننتظر وكعدت ريم حتى لتتعب
ريم : اختنكت ساعه اتذكر رفل وسامر ويرجع صدري يضيق وابقى الوب اكوم واكعد اخاف اتخربط وارجع مثل الاول جان يلزم ايدي بابا كأنه حس بحالتي
حجي طه : هاج بابا سبحي سبحان الله والحمدلله ولا اله الا الله والله اكبر هسه ترتاحين
ريم : اخذت السبحه من ايد بابا وكمت اسبح شوي شوي بدأت اهدأ واسيطر على وضعي وخطيه سليل وسجاد كل شويه يجون بصفي اخاف دايخه او بيه شى

باوعت على شعلان منهار وتعبان انقهرت عليه بس ليش احس شغله رشا جبيره ومتحمل گلبها هي مابيها شى لدرجه توصل للموت اذا مصار شى جبير يعني مستحيل مرتاحه وحياتها طبيعيه وهيج توكع اختي واعرفها اوووف شوكت تمشي الساعه
ومر الوكت ودخلوني عليها لبسوني بشعري وبرجلي علمود التلوث وتقربت منها جانت نايمه والاجهزه بكل جسمها تقربت من اذنها واحجي بصوت ناصي

ماابريج الذمه اذا عفتيني ورحتي تره اني نص بشر هسه نص روح نص عقل وگلب محروك عايشة بلقدره الاهيه لتموتيني بيدج دومج ويايه مااسامحج اذا عفتيني وحدي رشا اني مكسوره ارجعيلي والله صحيت لخاطر لا اعوفج دنكت بست ايدها ورجعت احجي يم أذنها ارجعيلي محتاجه الكم اكثر من قبل اريد انام بحضنج وتلعبين بشعري ومن احجي تكفخيني اريد اختل من الدنيا الظلمتني ودمرت بيتي مااتحمل اشوف التراب فوكاج والله مااتحمل كافي بتي لهسه حتى كبرها ماشفته كافي ترملت واني بعز شبابي مااريد اعيش فقدان الاخت سامعه دوم يكولون فقدانها يهد الحيل واني ماعندي حيل حتى ينهد راح تهديني گلي
راح تاخذيني وياج

ارحميني وارحمي بتج وابني لتعيشيهم فقدان امهاتهم كافي عشنا بدون ام شنو ذنبهم همه هم يعيشون اذا متي اني اموت وراج والقران مااتحمل والشده البيها انتي واني مااتحمل مااعرف تسمعيني تحسين بيه بس اني حااسه بيج مو رشا الي تنام هاي النومه بدون سبب وكعت مصايب يابو مصايب على راسنا منمتي هاي النومه شنو الكسرج وصلج للموت  كومي واخذي حقج من الي أذاج مو رشا وريم الي يختلن ومياخذن حقهن كوومي احلفج بلدم الجمعنا وخلانا خوات ارجعي والله لا ادفع ثمن كل واحد لمس شعره منج اشرت السستر يله عفيه تأخرتي بست راسها وكتلها منتظرتج رشاوي منتظرتج ريه كومي يانبض گلب ريم انتي بستها من راسها وطلعت اول موصلت الهم كلت لسليل اريد هوا

سليل : تعالي نطلع بره اخذتها وكعدتها بره وجبت مي وغسلت وجهه
شفتيها
ريم : ااااااه يانار گلبي شلون نايمه نومه دمرتي سليل
سليل : ادعيلها ترجع النا الله يستر
ريم : معرفتي ليش متخربطه
سليل : يكول رجلها رجعت من الدوام وكعت
ريم : هيج بدون كلشي
سليل : على كلامه
ريم : جريت نفس وكلت ان شاء الله خير
سليل : ارجعج للبيت
ريم : لا ابقى هنا يمكم مااتحرك اله تفتح عيونها
سليل : بقينا نتراوح ناس تروح وناس تجي نتبادل بينا وطلبت من سجاد ياخذ بابا لان حيل تعب وضغطه كل شويه صاعد وكوه قبل يروح يرتاح كم ساعه بيت رشا ويرجع
غزل كل متخابرني اتهرب منها حتى متعرف وحتى اطمنها طلعت بره وخابرتها وخليت ماما هم تخابرها حتى لتحس اكو شى

مرت اربعه ايام عشناها بجحيم منعرف شنسوي ناس لازمه قران وناس الادعيه وناس تصلي وناس تبجي حالنا يبجي الصخر عليها بس ميأسنا من رحمه الله نروح ونجي بين المستشفى والبيت سوينا نفسنا مجموعتين  معفت ريم وحدها اخاف عليها صارت مجموعتنا اني وريم وسجاد نتعب يجي مكانه شعلان وماما ومرات بابا اباوع على حاله اوف يابويه دومك مشلوع گلبك لا من احنا وصغار مرتاح ولا من كبرنا ارتاحيت وهلمره تزوجنا ونفس الاذيه اذا مو اكثر

خامس يوم العصر بدت رشا تستجيب من طلع الدكتور وكال  الْحٍمَدٍ للـّہ بدت تصحى لو ما العيبه وبلمستشفى جان هلهلت مباشره خابرت ماما وبابا وشعلان خلال ربع ساعه همه يمنا ممصدكين صحت مباشره شعلان حجز الها غرفه بلخااص مال المستشفى هي حكومي بس بيها جناح خااص
كالو منطلعها اله يستقر وضعها

رشا : فتحت عيووني بس احسها تلزك وعظامي مثل الواحد لازم جاكوچ ومكسرهن يونن عليه اريد استوعب اني وين وشصار اسمع صوت الطبيب بس ممركزه اخذت وقت يله استوعبت شيكول ولو اصلاً اني ماادري وين احجي وابلع بريگي العطش الاحسه مثل وحده ركضت ايام بلصحراء وبتموز بدون قطره مي بس كدرت انطق بطلعان الروح مي بللو حلكي واسمع يكولون شسمج اريد اجاوب مااكدر لحد مكدرت انطق الف ياالله كايله
رشا

الطبيب : رشا شنو اليوجعج
رشا : گلبي وجسمي وكمت اووون من الالم وحسيت روحي نمت وماادري شديصير
لحد مافتحت عيني وره ساعات يمكن او ايام مااعرف مضيعه الدنيا من يحطون المغذيات احس بألم الكانونه من تلزمها الممرضه وعيت اي اني وعيت بس راسي اريد اشيله مااكدر وكوه اتنفس
غمضت وتذكرت الصار اسمع صوت الممرضه تكول صيحو الدكتور دكاتها حييل عااليه اخاف من وره المغذي الغيره الطبيب
واني اكول بداخلي ياريت هذا المغذي مالتج يغسل الصار يغسل جرحي وكسرتي ودماري
بقيت ساكته لان الالم الاحسه اقوى حتى من الم الولاده من كعدت وره البنج وخااصه مااتنفس اله يحطون اوكسجين بحلكي

سليل : اجه الطبيب وعاين حالتها وكال على الاقل هاي الايام تبقى بلمستشفى بعدها حالته منعتبر عدت المرحله ١٠٠٪؜ نخاف من المفاجئات وهم لازم تحاليل كامله حتى نعرف سبب الصار وتحتاج عمليه او لا
ومنعو الزياره يوم لاخ وباقين ناكل بروحنا بس نريد انطب الها
رشا : وعيت بكامل عقلي صّـْْ(☑)ـْْحّ جسمياً وصحياً صفر بس عقلي يفكر ويشتغل شسوي شلون اشوفه شكول الهم بيه نار اذا تطلع تحرك الكوت عليه وعلى الخلفه نزلت دمعتي ومااكدر ارفع ايدي وامسحها
وبقت تنزل وكت طويل كمت اخاف اغمض لان صورتهم باقيه محفوره بعيني هو اخر شى شفته اخر شى

سليل : كالو راح ننقلها لغرفتها بس تشوفوها واطلعون ممنوع تبقون هوايه ردنا بس نطمن ونشوفها ركضنا قبلها للغرفه من حلات روحنا
رشا : يدفعون السديه بيه وعيوني على السكف بس اشوف اضويه تمشي وتعبر راح اشوفه شلون اتعامل ويااه اني هسه اذا اعيط احس گلبي يوكف زين ذوله يستاهلون اموت من وراهم اريد اموتهم اذبحهم قبل مااموت لاول مره اطلب من الله اخذ حقي يله ياخذ امانته مااريد اموت الهي قبل مااخذ حقي بجاهج ياام البنين مانخيتج مره ومصار الاريده بس الصحه ياالهي حتى اصحى واشوف الطعني بظهري ماتقبل بلظلم واني انظلمت قويني ياالله

دخلوني للغرفه وشالوني لمكاني وعيوني ركزت اول واحد شميت ريحته بابا شهكت جنت محتاجته حيل
حجي طه :  الْحٍمَدٍ للـّہ على سلامتج رشاوي هيج توكفين گلب ابوج عليج
رشا : احجي بهدوء وصعوبه
مو قصدي اخوفك واحد وره الثاني يبوسون بيه شفت الكل بعينهم الخوف والدموع وتقربت المتوقعت اشوفها بلا وعي مني رفعت ايدي وهي كلها مزركه من الابر وحيل تأذيني وحضنتها

ريم : هيج تخوفيني عليج
رشا : ممصدكه واكفه وتحجين ويايه
ريم : شلون اعوفج يلي معفتيني بيوم
رشا : لزمت وجهه وابوس بيها منا ومنا من لهفتي ممصدكه سمعت صوتها واكفه كدامي صاحيه
كتلها لو ادري تكومين جان من زمان دخلت مستشفى
نهر : اسم الله يمه شجاجن عين ومصلت على النبي كل شويه وحده بيجن توصل الموت اااخ ربي مكتوب نعيش بلهبطات الف  الْحٍمَدٍ للـّہ على كل حاال شدي حيلج يمه بيتج ورجلج وبنيتج ينتظروج
نغزني گلبي اااخ منك يلكلب شكد راح تنضرب منا وهيج بنغزات تهزك لو تقويك لو تيبسك بمكانك

حجي طه : وينه شعلان
سجاد : هسه يجي رادوه بلحسابات تعرف بيهم لازم ياخذون دفعه تحت الحساب
رشا : طب حتى بدون مااشوفه من ريحته اعرفه هذا حبيبي العشت سنين انام بحضنه واغفى على ريحته واحس بالامان واتباهه بيه واكول هذا حبيبي وسندي وابو بنتي هذا اماني وراحه بالي وتالي اطعنت منه دنك باس راسي
شعلان :  الْحٍمَدٍ للـّہ على سلامتج
رشا : قبل لا انطق باوعت على اهلي وكلت الله يسلمك شسوي هسه اعيط واوخره واكول هيج سوه بيه شسوي باوعت على ريم وعيوني تلالي من الدموع
حاولت اسيطر على نفسي بعدني جمله مااكدر اكمل الهث من التعب
وخرت وجهي منه بدو يحجون واسمع صوته وياهم غمضت مردت اشوفه ردته يروح كرهته لدرجه حتى صوته احسه سجين تكطع بلحمي

سليل : يمكن نامت
نهر : من المسكنات الله يعينها
ريم : يله روحو انتم اني ابقى يمها
نهر : اي خوش يمه اصيح الهم يجيبون سرير الج حتى تنامين بصفها لان انتي امر من حالها ولج شوفي حالج ابره ماتكدرين تشيلين مثل السكرانه تتطوطحين انتي مال تبقين يمها اداريها اخاف تحتاج شى هو اصلاً يراد واحد يداريج
ريم : لا والله عمه اني زينه اريد ابقى يمها عفيه بس اليوم وباجر نتبادل
سليل : زين ابات اني يمها وانتي باجر
ريم : لا اله اليوم جنت اريد ابقى يمها اول وحده استقتلت حتى ابقى رغم تعبانه ومن شافو اصراري قبلو

بعد كم ساعه صار الليل حدود ساعه ٩ وعمو سجاد جابلي اكل اخاف اجوع
سليل : محتاجه شى
ريم : سلامتكم بس بوسيلي تيم
سليل : ابتسمت وكتلها من عيووني واذا احتاجيتي شى بس دكي عشر دقايق احنا يمج
ريم : ان شاء الله
جنت بس اريدهم يرحون واخيراً بقيت وياها وحدنا باوعت عليها نايمه اكلت صار شكد مجوعانه وباوعت عليها كامت توون
تقربت منها رشاوي تسمعيني
رشا : فتحت عيني يمكن جنت نايمه ملكيت احد وينهم
ريم : راحو
رشا : كلهم
ريم : اي كلهم اوكفي سحبت الكرسي وكعدت يم راسها اعرف بيج كوه تحجين بس سؤال واحد شنو الي وصلج للموت
رشا : اااااخ جن واحد وداس على الجرح وترسه ملح شهكت بقووه
ريم : جفلت من شهكتها الي جانت بحركه قوويه رغم ضعف حالها وحضنتها
اسم الله شبيج احجي
رشا : خاني

ريم : عزه العزاه والله گلبي لعب احجي بس كاافي لتتخربطين وماافتهم شى جبت كلينكس ومسحت عيونها
رشا : شتمسحين امسح على گلبي يبجي دم والله يبجي دم شلون ممتت شلون كاعده هسه واحجي واتنفس
ريم : قدرت ربج مثل مخلاني عايشة هسه وره مصيبتي اسمعيني تنفس جري نفس على كيف
رشا : حتى النفس يأذيني تعرفين شنو هوا الله يأذيني ويجرح بصدري
ريم : ايا مشعول ومنعول الوالدين احجي شصار
رشا : لج بعيني شفتهم ريم بعيني هاي عساها انفكست وماشفته
ريم : نايم وياها لو شون فهميني مو راح انجلط
رشا : شفت جنات لابسه سيت النوم وهو وياها بلغرفه
ريم : لطمت على وجهي من الفزه جنات بت عمنا
رشا : الساقطه الكح.. بفراشي ريم عافو كل مكانات الدنيا وبفرشني عافت كل هاي الزلم الظاله ودنت على رجلي وهو النذل العاار عاف كل هاي الكح والنسوان المطشره بلشارع ومثل الجلب اتزوجها
ريم : عزه العزاني متزوجها
رشا : شهكت بقووه اي متزوجها عليه شسوي والله متحملت شفتهم وكف گلبي ساعه اكول ليش مامتت واخلصت وساعه اكول لا اخذ حقي

ريم : اششش فدووه صوتج حضنتها حسيتهت بدت تغص وتتخربط جبت بطل مي وشربتها شويه
باعي عليه كاافي بجي اول تالي تبجين
رشا : ليش هو بيدي الصار قليل يتزوج بت عمي الي اعتبرها اختي وبفراشي وياها وهذا الي العار ماسوه سوايته تدنى نفسه عليها زين شوكت اتزوجها ومن شوكت هي وياه هذا حالهم لهاي الدرجه اني ثوله وغبيه لهاي الدرجه فاقده الاحساس بحيث مااحس برجلي متزوج عليه وفوكاها مرته بيتي واصيحلها اختي زين متخبلت ودوني للشماعيه زين صاحيه واحجي هسه ويااج

ريم : ليش من كعدتي معيطتي ليش من شفتي بقيتي هادئه
رشا : حايره شسوي لهسه مااكدر افكر لتنسين احنا بين اهله وناسه واخاف تصير مشكله جبيره وياخذ بنتي مني همه ناس عدهم الرجال عادي يتزوج وحده واثنين من حقه يعني ممسوي العيبه
ريم : انعل ابوهم يابو ذوله العيب يستحي من سوالفهم هو لو متزوج من الشارع من اي مكان مو بت عمج وعايشه ويااج ااااخ كله منج لزكتي بيها لزك تكول اميري ولزك
رشا : تتوقعين النذاله من جنات بربج تتوقعين

ريم : لا والله هاي الخنيسه الساكته كل الوكت وتبجي بوجه الله حسره تسأليها الهادئه الماتطلع منها العيبه هيج تسوي هاي اذا الزمها هسه اشكها نصين اطلع قهر گلبي كله بيها والله حسيت بيها شى حالها مو طبيعي تلوب
رشا : شسوي هسه اريد اعيط اريد اشرب من دمه ودمها عقلي مديفكر صح وتعبانه حييل وخايفه هم

ريم : من شنو خايفه فوك دكتهم وسقوطهم خايفة اول تالي رشا تخاف
رشا : احنا بنصهم واخاف تصير عركه وتوكع براس سجاد وبابا ويصيرون دم لتنسين بابا مراح يسكت وتبقى جنات بت اخوه وشعلان ابن خاله يعني راح تعلك من كل جهه وسجاد هم مراح يسكت اعتبار هي امانه عنده وهو دنت نفسه واتزوجها حتى بدون ميرجع الهم ومستحيل متصير بلسلاح وتالي اضيعهم واضيع بتي لتنسين عشيرته كلها هنا واخاف ياخذ بتي وماالكاها او يسويله لعبه كمت كلشي اتوقع من حثاله مثله

ريم : شوفي رشا تسكتين تماماً وتتعاملين طبيعي وياه
رشا : اكلها لهسه مخنوكه اريد اعيط شلون من فتحت عيني وشفته ماتفلت بوجهه
ريم : انتي كلامج صح بالاول نروح لبغداد وتاخذين بتج وملابسج وذهبج
رشا : اني بحال ذهب انعل ابو الذهب والفلوس اكول الها انكسرت كسرت عمري لو ميت ودافنته اهون عينه من شوفته بهذا المنظر الحقير من كثر ماالموقف جبير وكف گلبي ولهسه يوحعني والله اعلم يجوز ادخل عمليه ومااطلع منها
ريم : اسم الله عليج تردين تعوفين تعبج وذهبج الها لا والله اخذ فلوسي رواتبج مو لامتهن
رشا : اي
ريم : كلهن وملابسج الزينه وتكولين اله اني تعبانه اريد ارتاح بيت اهلي وافكر عوفني براحتي قشمري
رشا : مفهمت
ريم : اعرف بيج تعبانه بس لازم تركزين لان باجر متقبل غلط راح يحاجيج ميبقى ساكت هو هسه على اعصابه لتطلع حجايه منج وتعلك
اهم شى اذا سألج كلتي لاحد تكولين لا
رشا : شلون اباوع بوجهه
ريم : لازم تتقوين اذا تردين متخسرين بنتج ولا تصير هنا مطاحن
رشا : وبعد

ريم : هسه افهمج وبديت اشرح الها واعيد حتى لتنسى اصعب مره بحياتنا اني ورشا نحط خطه ولازم تتنفذ بحذافيرها واي غلطه تكلفنا هوايه متوقعت يجي اليوم الي نخطط شلون نفلت بتها من ابوها وشلون نطلع منا بدون مشاكل وبهدوء لحين وصولنا لبغداد وهناك بعد ميكدر يسوي شى يركع راسه بلحايط نبقى احنا المسيطرين واندمه على الساعه الفكر بيها يخون النذل
بقينا الليل كله نسولف ساعه تنام ساعه تبجي ساعه تسولف جانت مثل الطير المذبوح على النص وبسجينه عميه  الي كل منحجي على الموضوع يحز بلرگبه شويه ونخلي النزف يرجع ومكان ما نوكف النزف نقرب راس السجين على الجرح ونغزه حتى ميبطل من الدم
هذا حال رشا لحد الصبح

رشا : اجه شعلان مكدرت كوه اجر النفس شلون احجي ويااه شلون اباوع بعيونه كلهم موجودين وستأذن منهم يحجي ويايه وطلعو  كالو نرجع للبيت نتغدا  ونجي سد الباب وراهم بس ريم بقت برا تنتظر مقبلت تروح تقرب وكعد يم راسي وبجه
شعلان : والله مو قصدي أذيج والله الشيطان دخل بينا
رشا : جريت نفس قووي وحجيت ليش شنو قصوري وهيج تجازيني
شعلان : رشا اني احبج والله اكلو راسي علمود الولد
رشا : ياولد
شعلان : كل ميحجون وكبرت وماعندك ولد وخاصه من مات رجل ريم كل شويه وامي وهند كالو شفت مات بس اسمه بقى بلدنيا عنده ولد انت اذا تموت منو يشيل اسمك
رشا : مو عندك فرح
شعلان : بنيه تاليها متشيل اسمي
رشا : يعني اتزوجت اختي اي لتباوع عليه هاي اختي مو بت عمي وطعنتني وبعت حبي ودست كرامتي وانوثتي وسويتني علج بحلك امك واختك وبعت سنين الجمعتني بيك على المره قبل الحلووه علمود تخلف ولد يشيل اسمك شنو كدامك طفله وتقشمرها

شعلان : وروح ابويه هو هذا السبب
رشا : لنفرض صدكتك احد كلك اني مااخلف
شعلان : انتي تعبانه وگلبج موزين ومن خوفي عليج ردت اخفف عليج
رشا : ههههه خلف الله عليك تخفف عليه تروح تتزوج ياالله شكد تحبني لو تكرهني شسوي تدفني بلحديقه واني عايشه هسه بس اريد افتهم عفت كل النسوان بلكوت وبعشيرتك وبغداد والعراق كله ركضت على جنات
شعلان : كله من وره هند الله يشيلها
رشا : وانت كزه طفل صغير تسمع كلامها عمرك ٤٠ سنه تعرف شنو ٤٠ وتمشيك اختك يعني هسه اذا تلزم مخبل بلشارع وتكله هيج وهيج يضحك عليك تره محد يصدك كلامك انطيني كلام مقنع انطيني سبب حتى اعيش واتحمل الصدمه زين عوفك من كلشي ملكيت غير بفراشي يعني منين ما الزكها الكاها خيسه منين مااحاول اقشمر روحي الكه نفسي اكبر زوج ومطيه
هم متزوج عليه وهم بت عمي وبمثابة اختي وهم كاعده بيتي امانه وهم بفراشي وبغرفتي يعني شلون الزكها وانطيك ولو واحد بلميه الحق

شعلان : اعرف غلطان ومستعد حتى رجلج ابوسها بس لتعوفيني وتهدمين بيتنا
رشا : يابيت هااا يابيت الي نمت بيه ويه مرتك الاولى لو مرتك الثانيه لو هسه مرتك الثالثه مبين الخيانه بدمك والله اعلم مرتك الاولى ليش فلتت منك وانهزمت يجوز هم خاينها
شعلان : اعرف بيج مصدومه وحقج بگلشي تحجي وراضي بحكمج بس لتعوفيني وتهدمين كلشي بينا اني احبج والي صار حتى مااضغط عليج بموضوع الخلفه

رشا : وهاااي الي حتى حرامات اوصخ لساني واجيب طاريها مخافت تحبل انت مو متزوجها علمود الجهال جان شكالت منين الطفل من الهوا مفكرت شتكول لعمها لسجاد الي للناس جان مستحيل تكدر تضم الموضوع يعني احس الشغله فلم هندي على تركي على كوري على عربي قديم مخلط يالوز  شلون من باب لخاطر الطفل وشلون تكدر تضمه من عدنا اذا حبلت لو تسوي مثل الافلام الهنديه تضم بطنها بكورسي للشهر التاسع وتولده وتذبوه باب البيت وهااا تره لكينا طفل تعالو نربي

شعلان : انتي تعبانه هسه واي نقاش مراح يجيب نتيجه گلتي لريم لان باتت يمج
رشا : هو هذا موضوع ينكال وهو يحجي ويايه صفنت عليه وعلى دشداشته ونظافته الجنت دوم اكول اعشقها بيك وريحته الجنت حتى من اغسل ملابسه اشمها يله اغسلها گلبت معدتي واني اتخيل ريحه جنات بيه وشون تبوس وتحضن واداعبه وشلون هو يتغزل بيها ويتقرب منها وهمه مصاليخ مباشره درت وجهي وبگلبي اكول الصبر ياارب
شعلان : بيج شى
رشا : اريد اروح ويه اهلي
شعلان : على كص رگبتي اخليج
رشا : تذكرت كلام ريم وكتله اسمع شعلان اني مراح افتح الموضوع كدام احد بس بشرط
شعلان : الي تأمرين بيه
رشا : اطلك جنات واليوم
شعلان : تم يجرالج
رشا : ومااشوف وجهه مااعرف وين اديح
شعلان : واهلج شلون
رشا : اوك خلي ترجع ويانه لبغداد بس مو من ارجع لا اريدك تلكه حجه تبقى يوم بلكوت حتى مااشوف وجهه طول الطريق وياها مااتحملها ومن اوصل  لبيت اهلي ابقى بغرفتي القديمه واياها تتقرب مني اخلص النقاهه هناك وهم اراجع علمود گلبي لان اكو اطباء زينين بغداد ومن اصير احسن توديني طبيبه نسائيه حتى اشوف سبب تأخير الحمل
حسيته فرح

وينسد الموضوع تماماً واياك بيوم اشوفك مجرد لامح خيالها
شعلان : ولا الي علاقه ومستعد من اجي اخذج من بغداد مااوصل بعد
رشا : شوكت تزوجتها من جانت عايشه يمنا سنتين اتزوجتها
شعلان : شنو
رشا : جاوبني لتسكت
شعلان : قبل شهرين تزوجتها
رشا : وافقت بسرعه
شعلان : كاافي رشا
رشا : جااوبني وافقت بسرعه
شعلان : وره مده يله وافقت
زين اذا شهرين متزوجها مو من قبل شوكت عقدت عليها شوكت تقربت منهاو هي مصار اسبوعين يمي
شعلان : بغداد من جانت تودي ابنها بعد متفقت هند وياها عقدت سيد عليها
رشا : ياعيني تخاف من الحرام حقك
شعلان : مو هسه جنتي زينه شگلبج
رشا : لا منگلبت بس تعرف الفضول قاتل وين جنت تلتقي بيها هي متطلع هوايه
شعلان : عوفج من هذا الموضوع اترجاج
رشا : جاوبني عفيه وبعدها اسده
شعلان : كم مره اخذها للبيت الي اشتريته بغداد قبل سنه الكتلج عليه وبعدين قررت ابيعه  المقفول ساعتين وارجعها
رشا : مو كلت بعته وشلون تطلع من بيت اهلي

شعلان : لا مبعته اطلع حجه مره للسوك مره تودي ابنها للالعاب براس الشارع اني اصلاً التقيت بيها مرات معدوده
رشا : واشتاقيت الها وجبتها يمي حتى تسهل عليك الشغله لان بيت اهلي صعب يوميه تطلع لهذا كلت بيتي اسهل وهاي الغبيه تروح للدوام ماكو اسهل من هيج وهي قررت تستقر بلكوت هنا بعد افضل يوم يمي ويوم يمها
شعلان : فدوه لعينج كافي اترجاج رشا ارحمي حالي داموت لان سويت هيج وصلتج للموت
رشا : مااشي سكتت العندي كلته
شعلان : واني مستعد لكلشي
روح اريد ارتاح ردت بس يكول بعد لحظه وافقد اعصابي واخنكه
بس طلع طبت ريم
ريم : هااا تأخرتو
رشا : هذا حرام عايش يعني الله اخذ سامر الزين الفقير وعاف هذا النذل المنحط
ريم : على كيفج ليسمع يمعوده ويضيع كلشي بس نطلع منا وشسوين سوي غلطي فشري عيطي الي تردي
رشا : اريد اطلع اخذ بتي وارجع مااتحمل ساعه ابقى هنا
ريم : مو بكيفج صيري زينه ونشوف الطبيب شيكول على حالتج

ريم : كوه صبرت رشا على حالها و٣ ايام راقبو حالتها الي قوه مناعتها وصحتها اصرارها تنهزم بتها وتفضحه تريد قبل وكت ترجع وتحجي كلشي واجه شعلان وكال طلكت جنات والتردي يصير نوعاً ما صدكها ميدري المره اذا حطت شى براسها تقنع الف رجال بلغلط وتكوله هو الصح ويقتنعون الله سبحانه وتعالى بكتابه الكريم ان كيدهن عظيم واليوم رشا شوفته الكيد شلون يصير كتبولها على خروجيه مع مراجعه طبيب اخصائي علمود حالتها اخاف تحتاج عمليه

سليل : طلعت رشا من المستشفى وذبح الها شعلان وطاير بيها خطيه الله يسعدهم بس رشا لمت ملابسها وحطت علبة الذهب يمي وكالت ضمي مااريد احد يشوفه اشوف ريم تفتر هنا وهنا هاي الي خلصت ٦ اشهر مثل الشرنقه نايمه ومكسوره ايدها كوه تحركها  اليوم طلقه صدك زيبك الملابس والمكياجات والذهب وفلوسها كلهن لمتهن
سليل : خلي تجي جنات تساعدكم
ريم : ميحتاج
سليل : شبيكم وياها من طبيتي حتى مسلمتي عليها ولا هي وصلت رغم جانت تبجي عليج
ريم : هي رشا بحال سلام هسه يله سلول بسرعه صعدي الجهال وخلي نروح
سليل : صار عقيد ريم تدللين

رشا :اباوع على غرفتي الخلصت احلى ايام بيها وياه هنا اول ليله حضن وعشق صارت بينا بلحلال هنا ضحكنا وهنا حضني وهنا يغازلني بهذا المكان جان يحضني وينام ويشم شعري ويكول شكد احب ريحته هنا جان يتمدد واتشاقه وياه ابوس واعض وادغدغ بيه وصوت ضحكي يوصل لوين وكل شويه وكاال ولج ضحكتج ليسمعوها تره اشعل عشيرتج ومن اتعب مينام اله اصير زينه ومن يتمرض متغفى عيني اله ينام گبلي جنت اكوم من عز نومي اغطي وارجع  نفس هذا الفراش جاب جنات ونام بيه وخله وصاخته وصاختها ولوثه وداس كلشي حلوو يجمعني بيه الله لايوفقكم

ريم : يله رشاوي
رشا : اشرت لفروحه الاجت تركض وتبوس بيه فرحانه بشوفتي وصعدنا بلسياره بدون حتى مااباوع بوجهه
سجاد : وجنات شلون
شعلان : رشا كالت عندي غراض تجمعهم الها روحو بلسلامه واني باجر اجيبها واجيب غراض رشا
نهر : شلون تبقى اني اضل وصعدو جنات اذا السياره متكفي
شعلان : لا نهر انتي متعرفين غراض الي تحتاجهم
رشا : عمه جنات تعرف هذا البيت زين وهي راح تلم غراضي وصيتها اني محد يندلهم غيرها
حجي طه : مترهم بابا تبقى وحدها
شعلان : هي راح تبات بيت اهلي واني الصبح اخلي هي وهند يلمون الغراض واجيبها واجي
حجي طه : اذا هيج مااشي
نهر : براحتكم لتتأخر باجر من الصبح تعالو
شعلان : صار

رشا : معودت تحركت السياره غمضت مااريد افتح مااريد اشوفك مشت السياره وطلعت من الكوت وعفت بيها جرح مايندمل ليوم الدين

طبينا بغداد وكلها حايره بيه حتى ريم الي شفتها شلون طول الطريق حاضنه ابنها وتبوس بيه وعينها عليه مفاركتني
بقيت بالاستقبال الدرج الصعده والنزله موزينه عليه وخاصه الحمام جوه اول يوم ساكته ردت الكل يرتاح نمت وحسيت احد بصفي فتح عيووني شفت ريم تدحس نفسها يمي وغطتنا سوه  وحضنتني ونامت
ااااخ يااختي حتى بهاي السوه لا انتي اتهنيتي برجلج وعائلتج ولا اني كل وحده جرحها شكل بس جروحنا العمر كله متروح

ريم : فتحت عيني وكمت من مكاني غسلت ادور على تيم لكيته يم عمه متعلم عليها هي تريكه
صباح الخير جوعانه عمه
نهر : اوووووووف رحمتك يارب مصدكت بيوم اسمع هاي الكلمة جوعانه
ريم : تعبتكم مو
نهر : تعبج راحه يمه بس كوني بخير تعالي اكعدي اسويلج بيض العيون الي تحبي
ريم : كعدت اتريك ويه تيم واباوع عليه شلون ياكل ونزلت دمعتي اتذكرت رفوله شلون احطها بحضني واوكلها على كيف اخاف عليها تغص صغيره بعدها
نهر : يمه اكلج بروح الغاليه ولتبجين هذا ابنج محتاجج والله ضال من ايد لايد ميصر هيج هو ابنه ونشيله على راسنه بس تبقين امه واحن الناس عليه
ريم : والله ماكو احن منج بلدنيا كلها
سمعت صوت رشا عاالي

ركضنا اني وعمه وبيدي تيم اخاف اعوفه وحده
شبيج لكيتها تحجي بلتلفون
رشا : اسمع شعلان هاي الكح ام الزلم اليمك اذا اجت وعتبت بيت ابويه اخليها فرجه للناس وانت ياساقط يامنحط اذا ماطلكت
اشهرك شهيره والقران اخلي الرايح والجاي يتفل عليك صير رجال ولو مره بعمرك ولو الرجوله بعيده عليك مره وحده اثبتلي انت رجال وطلكني ياحثاله ياناقص يادون واله اخلعك بلمحكه واخلي الكل بعشيرتك تضحك عليه واني مره وكول مره خلتني فرجه للناس
نهر : صخاام هااي شتحجي
ريم : عوفيها عمه تغرد وبعد وبعد شايفه انتي
راح تصير بلنعل بعدين

يتبع