رواية ابي والغزلان الفصل الخامس عشر 15 - بقلم ريام هادي

ابي والغزلان
للكاتبة Reem
البارت الثالث عشر

صرتلهم جسر عبرو عليه هواي
واليعبر يسولف عني ويذمني
نعرفها البشر لا ما تجازي الزين
شجر مثمر صرت والمار يضربني
صحيح تالمت بس طبعي منبع ماي
اظل انبع وفه للجاي متعني
ما ردت الشكر عالزين من سويت
بس ربك يجازي وهو يكرمني

ركزت اباوع لابس عسكري والبيريه بلعكس لابسها والبدله العسكريه مفتوح اول دكمتين منها والجنطه وره ظهره
ويغني اريد افتح حلكي وانطق اسمه مااكدراخرسيت اكول اخاف كعد اتخيل من التعب والقهر وبس اني اشوفه تقرب بعد ويمشي لا مكعد اتخيل وجان يعيط بضحكه
هااااا ولكم سيبنديه شكو متجمعين بابنا منو مات اخاف ام حمزة
حجي طه : كعدت بلكاع ممصدك هو كدامي والكل ركض علية الي بلباب والي جوه من عيطت الولد كلها طلعت ويحضنون بيه حتى امه وزوجته طلعو يركضون حفاي من حلات روحهم ويبجون من الفرحه وحاضني جان صدمة رجوعه العقل ميشيلها اني بس كاعد بلكاع وابجي حتى مكدرت اكوم واروح مثل الباقين رفعت عيوني للسما ربي انت ارحم بحالي الف الْحٍمَدٍ للـّہ والشكر ودموع تنزل بدون متوكف ويه الهلاهل والمنطقه الطلعت يباوع علية ويضحك
وهو يمشي والكل يسلم علية والي يحضن والي يبوس والي يبجي وصل يمي جان يكولي هااا ناقص شو متسلم علية كمت على حيلي وحضنته جني حضنت جعفر وابويه بحيث حاضنه واشهك من البجي مثل الجاهل وهوهم حاضني جان يكولي
محسن : لتبجي مو كتلك العار ميموت
حجي طه : ولك ياعار شون تسوي هيج بينا
محسن : كافي بجي لتخاف ماازوجك ام حمزة كافي اسكت

حجي طه : اضحك وعيوني كلها دموع ولك والله المره شورت بيك من كثر متجيب طاريها
ابو محسن : يله بويه ادخل وتعال ارتاح وانتم يلولد روحو جيبو ذبيحه نذبحه جوه رجله
محسن : لعد هاي شنو مو ذبيحه
حجي طه : غير عبالنا متت ونسويلك ثواب
محسن : ايا نواقيص معودتو اموت حتى تاكلون لحم بفاتحتي عاد سويتو فاتحه بيها خير لو خزيتونا
ام محسن : يمه وليدي وحق النبي گلت وليدي عايش گلبي يلوب عليك اكول ميعوفني هيج اتأذه كتلهم مينصب جادر اله اشوفه جثته كدامي
محسن : عاشت ايدج يمه ذوله ميستاهلون ياكلون هبيط بفاتحتي ياكلون سم اني ميت وهمه يمصمصون بلعظام اني گلت هسه اجي الكه الفاتحه خسرانه من وره ذوله الجوعيه
ابو محسن : فداك كل فلوسي وحالي ومالي الْحٍمَدٍ للـّہ الله جبر خاطرنا برجوعك
يله يولد جيبو الذبايح والمزايق وتعالو

حجي طه : المنطقه والاهل كلها انگلبت عليهم ولهسه منعرف هو شون عايش وشون اجه اسمه بلشهداء
واجت المزيقه وهذا انزل بنص الشارع يردح تكول معرس وامه وياه وتحضن بيه ممصدكه من الفرحه واني واكف اباوع علية لحد هاي اللحظه ممصدك هو عايش وگبال عيني
بعد مفضت الهوسه والناس بحدود ٣ ساعات وكلمن راح لبيته دخلنا للصاله اني وسامي وهو وابوه وابن عمه وكعد يسولف النا
محسن : احنا اجانه امر بلتحرك رحنا ومنعرف شنو كدامنا نشوف الموت هناك بلجمله قطعات عسكريه تنمرد خلال لحظات وصلت مرحله بينا نمشي على جثث عيونه جفت من الدموع وگلبنا مات ويأسنا من الحياه بس منتظرين شوكت يجي دورنا

لحد مكدرنا بمعجزه نرجع للمقر وماكو ساعات وكالو تحركو هجوم مضاد بلحظتها اكو ضابط ويانا شكد اكرهه بس يمكن بعد السواه كمت احبه صاحني اني و٣ جنود نشيل عتاد وراها نروح للواء عنده شغلات نحولها من مكان لمكان جان الشغل كولش هوايه هلكنا بعد نص ساعه لازم نرجع حتى نلتحق ويه جماعتنا الوجبه الثانيه لان الاولى راحت من زمان كال اللواء مترحون اله تكملون البيدكم وساعه تجر ساعه راحو الجماعه سمعنا الفرقه الراحت ثاني يوم انمردت ولا واحد رجع منها شكد بوكتها ضجت لان حيل تعبنا بلشغل شكد حمدت الله لان نجاني بقينا استخدام يم الضابط واشتغل عادي بس ماكو لا نزول ولا اي شى جنت اشوف شون كل ٥٠٠ والف جندي يرحون لو يرجعون كم واحد لو محد يرجع

هاي المعركه دمرتنا عدا القصف الي صار مرتين الموت بينا وبينه شعره لحد مكاعد ودز علية نائب ضابط راد اسمي الرباعي واسم امي مدري بشنو شاك وهو يعرفني زين لان خمس ايام اشتغل يمه بس محافظ اسمي كله المهم رحت اله ورديت اسمي وهو طلع السجلات وساعه ونص يدور على شنو ماعرف
تالي جان يكول لكيته والله عرفت اكو غلط فتحت عيني شكو جان يكول من طلعت الفرقه مالتكم ومرجع احد دزينا اسماء الشهداء ومن ضمنهم انت لان المفروض انت طالع وياهم
جفلت يعني هسه اني اعتبر ميت وشون يدزون غير اكو تعداد
ياتعداد وبيومها الايرانين يطبون البصره شبيك محسن احنا نعرف الفرقه كلها راحت ولما صار كم يوم يمي تشتغل وعاشرتك ومن كتلي على فرقتك يله انتبهت لان هاي المجموعه بلذات ولا واحد رجع منها اني حتى من كتلي اسمك مأجه بالي بس دخت من گتلي انت بهاي الفرقه واني متأكد مأيد اسماء هاي الفرقه بلذات الكل شهداء شون انت موجود وهسه دزيت عليك وتأكدت منو بعد وياك مراح عبالك واحد وضربني على راسي رحت للولد البقو ويايه وهم خطيه ركضو للنائب ضابط وطلع هم مأيد اسمائهم مثلي شهيد گلت اكيد وصل الخبر الكم

حجي طه : اي عمر اجاني وبلغني اجت الاسماء للوحده يمنا وبيها اسمك
محسن : من عرفت هيج گلت راحو بيها اهلي توسلت انزل وكعت دخيل دم حتى للضابط دخلت بس ابلغكم تالي واحد ضابط شريف كال انزلو انتم الاربعه لان اصلاً لهسه انتم مؤيدين عدنا شهداء واندز عود كتاب تصحيح وبين متوصل تاخذلها اقل شى اسبوع بس تنزلون انتم تتحملون مسؤوليه نفسكم لان نزول ماكو والوضع تعبان رغم انتهت المعركه بس القصف مستمر على البصره اذا صار عليكم شى حتى حقوقكم تروح وافقنا بس نريد ننزل طلعنا من الموت نمشي ساعات ونتختل صار يومين بلطريق سيارات ماكو ونخاف لا دوريه تلزمنا او يلكطنا احد لحد ما واحد من العرب مبين شيخ خلف الله علية شالنا بدربه وصلنا بغداد واخذت تكسي وكتله نزلني راس الشارع ومن شفت وكفتكم عرفت اكيد مسوين فاتحه ولمتكم من ورايه

حجي طه : وهسه شراح تسوي
محسن : شسوي ماارجع لو يجي القائد نفسه غير عايش هسه باعجوبه بس سمعت على اساس يرجعونا للوحده مالتنا القديمه وياكم بلكت الله واذا مرجعنا اهرب
حجي طه : اي والله كون ترجعون
محسن : ولو شبقينا كم واحد من ١٥٠٠ واحد بس ٢٢٠ الباقي كلها شهداء
ابو محسن : الله يرحمهم بس انت بعد مترجع كافي العشناه
محسن : والله اعرف الصار بيكم مو قليل وافكر بيك يابه وبأمي وبأم فيصل بس كلكم بجفه وهذا بجفه ويأشر على طه

حجي طه : ليش
محسن : لان اعرف براسك مطي مدد وراح تكعد تنوح كله من ورايه واني فگر وكرطت جماعتي تتذكر حسره يموت واحد من جماعتنا كابلني ولطم تكول الحرب كلها من وراه
حجي طه : ههههههه والله حجيتها
محسن : الميت ميتي واعرفه ولك كالو بجيت بجي بس لا بجيت لان مزوجتك ام حمزة
حجي طه : رحمة لموتاك بداعت ابنك جوز من المره جان صارت بينه كارثه من وراها
محسن : يمه يوم
ام محسن : ياعيون امك وروحها
محسن : بروح ابوج من تجي ام حمزة صيحينا
ام محسن : سودة علية لو تشوفها شگد بجت عليك ولك والله بعد ماتجيب طاريها بلموزين
محسن : هسه اني شگلت يايمه خالتي وصويحبت امي واريد اسلم عليها
حجي طه : بله واحد راجع من الموت ويفكر يضحك على هذا وذاك جان يأشر لأبن عمه
كوم الله عليك صيحها بلشارع الورانه خلي امي ادليك بيتها
حجي طه : لا اني رايح انت تخبلت
محسن : بروح ابوك اكعد الله عليك
حجي طه : ولك لتحلفني وكعدت ماكو ١٠ دقايق وجان اطب المره تهلهل واني الله ذب كل الضحك علية صدك طولها مو طبيعي والمره هم عيب واحد يقلد خلقه الله بس اني اضحك واستغفر وهو يغمزلي بعينه
هله بشطب ريحان
وويبوس بيها ويكلها خاله حالليني واهبيني هناك واتذكرتج گلت كون ام حمزة تدعيلي

ام حمزه : يمه مابطلت دعاء لساني وكف وانه اكولن ترده سالم لهله
محسن : شفت المره استجاب لدعائه لان طويله الدعاء ميوكف من حلكها للسما لعد ليش اريد ازوجها الك حتى من عدها لله گبل شهيد متتعب
ام حمزة : وليدي وياي تحجي
محسن : لا خاله مو وياج رحمة الله والديج كفيتي وفيتي نريد دعائج على المعركه الجايه وخاصه لهذا صاحبي عزيز گلش ودوم يكول لو عندي مثل ام حمزه مره جان اني بخير
ام حمزة : يااا چا هذا مثل وليدي
محسن : فد دعوة معدله منج بلكت يوكع على راسه ويبطل ينك ويدوخني
ام حمزة : يمه الله يحرسكم لشبابكم
محسن : شتريد بعد گبل تسجلت فوك ابشرك ماطول ام حمزة دعت بلمكان اكص ايدي اذا مجابونا شهداء اثنينا على المعركه الجايه

حجي طه : ههههههه خرب لشتك وحضنته
محسن : لو ادري هيج معزتي عندك جان كل شهر اخذ جمعه استشهد واجيك بس مو تسوي فاتحه ماعندي فلوس
حجي طه : انت اخويه لا تستشهد ولا اتعب نفسك
محسن : اكلك انت وصلت كلامي لأهلي مال الوصيه
حجي طه : اي وره يومين كتلهم
محسن : عاشت ايدك حتى المره تخليني براحتي بعد هم موت وهم وصيه وهسه رجعت عايش شريد راح تسويلي
حجي طه : ولك لو تشوف حالها من عرفت وين تلكه مره مثلها تحبك
محسن : هسه اني شگلت بس اقلها من اباوع متعيط ولا تگلب خلقتها
حجي طه : هسه اليسمعك يكول من مره لمره
محسن : من اليوم ماابقي شى بنفسي
حجي طه : شسوي يعني
محسن : ماابقي وحده حًلوة مااتعرف عليها
واذا لكفتك

محسن : اكول الها مو اني هذا المرحوم
جان تصيحه مرته ابو فيصل
محسن : اي عيني اجيت
حجي طه : هااا شو خفت ورجفت
محسن : الميخاف من مرته مو زلمه وطفر يركض عليها
حجي طه : هههههه روح خوش زلمه
بيومها بقينا نضحك ونتشاقى صفنت سبحان الله يگلب من حال الى حال قبل ساعات كلها تبجي وتلطم وهسه كلها تضحك الْحٍمَدٍ للـّہ رجع ابو غضب

رجعت تالي الليل للبيت تعبان تعب الاسبوع وقهري هسه طلع علية اريد افتح عيني كوه بس وصلت لكيت الكل نايم شمرت نفسي حتى بدون ماابدل ونمت
محسيت غير على ايد صغيره تضرب بوجهي وتكول اكعد اكعد فتحت عيني الكاها رشا وتضحك شلتها وحطيتها على صدري وابوس بيها وتضحك اول مره تتقرب مني بدون متبجي لو تخاف ثواني وطبت سليل تركض وتصيح بابا بابا وشمرتها نفسها بحضني شلتها وحطيتها بصف اختها اباوع عليهن انتن غزلاني واحلى غزلان باوعت شفت حسام واكف على صفحه اشرت تعال بابا مأجه ركض لأمه هذا الولد مدري ليش من يشوفني ينهزم بقيت العب ويه البنات شويه وصاحت سندس يله عيني طة مجعت تره صار الغدا
حجي طه : ياغدا

سندس : غير ساعه وحده ونص هسه
حجي طه : حيل هلكد نمت
سندس : كعدت لكيتك نايم بصفي شونه محسن اجتي البارحه نهر وكالت اجه سامي مبشرها برجوعه
والله معجزه من رجع
حجي طه : الْحٍمَدٍ للـّہ والشكر اكلج سندس لو اني جايبيني شهيد شسوين
سندس : ياستار قابل شسوي الطم حالي حال النسوان
حجي طه : يعني هم تنقهرين علية
سندس : بله بربك هو هذا هم سؤال اذا محسن بجيت علية والولد صاحبك وشايفته جم مره من يجيبلي الراتب مو عاد انت رجلي وابو جهالي شنو هذا السؤال المحلو شجاك
حجي طه : لا هيج اجه بالي
سندس : تعال اكل وشيل هاي الشغلات من بالك
حجي طه : كعدنا ناكل واني افكر لو يصير علية شى ذوله شون يعيشون من صارت شغله محسن خلتني افكر بهواي شغلات بس اني شبيدي هو بس هذا البيت عندي عايفه الهم الْحٍمَدٍ للـّہ على كل حال
مرت الايام ورجعت التحقت وراها بأسبوعين التحق محسن رجع النا وهو والباقي من جماعتنا نسمع بلمعركه وروحنا تروح شنطي بعد شهداء خلصت معركة الي يسموها الايرانيين كربلاء 5 وجماعتنا ناس سمتها الحصاد الاكبر ومجموعه معركة نهر جاسم
جانت من اشرس المعارك واكثرها خسائر انطينا بالالاف شهداء عدا دمار جزء جبير من البصره بسبب القصف والعمليات العسكريه الصارت بيها

وشهر يجي شهر واني انزل لعائلتي والتحق نفس الروتين بس زاد خوفي عليهم انعام من يوم عركتي الاخيره مشفتها شغلي من انزل بأجازتي ماشي صح مو هوايه بس هم يسند ويه الراتب
ودخلنا ١٩٨٨ بدت المعارك تقل وضعنا بلجيش تعب حالنا ومعنوياتنا مكسوره كل فتره مودعين مجموعه وبشهر الرابع دخلنا معركه تحرير الفاو والحمدلله انتصرنا بيها بس من نصفن على حالنا كاعنا انترست جثث ٨ سنوات حروب ذبينا بيهم دم شباب كلشي مشافو من حياتهم ٨ سنين ناس استشهدت وناس اسرى وناس انفقدت اكثر من مليون شهيد خلال ٨ سنوات ارامل وايتام ترسو العراق لحد مااعلنو وقف اطلاق النار مصدكنا واخيراً يعني بعد منحارب بعد منروح جبهه منفكر بليوم الف مره عايشين لو راح نموت لهسه اتذكر من اجتنا التعليمات من الفرحه كمنا نبجي وناس تحضن ناس حتى الي عاش هم فقد اخ واب وصديق وقريب محد طلع بدون خسائر بكل بيت بلعراق اكو شهيد الله يرحمهم جميعاً

نزلت لبيتي واول مره تستقبلني سندس بلهلاهل والجگليت من فرحتي رجعت حضنتها وافتر بيها جنت حيل فرحان واخيرا
راح اعيش حالي حال الناس واعيش ويه جهالي الي كبرو ومشفت شى منهم الشوارع العراقيه مليانه افراح وركص واحتفالات للصبح بيومها گلت لسندس امشو اوديكم لساحه الاحتفالات
سندس : منيلي ملابس اطلع بيهم
حجي طه : هسه ياعيني البسي اي شى قابل رايحين عرس هو نغير جو ونحتفل حالنا حال غيرنا
سندس : اروح لأنوار اجيب ملابس منها
حجي طه : يعني انتي متبطلين منها مو كتلج هاي بعد متوصلين الها
سندس : ليش وشبيهه سنين هي ويايه وحبابه شريد شأحتاج تجيبلي لو كرهتها لان كشفتك على حقيقتك وعرفتني بلحيه ام الشوارع
حجي طه : هسه البنيه يمج گرباج وتحجين عليها فضيني ترحين لو لا
سندس : اي اروح بس اجيب ملابس من انوار لازم اطلع حلوة
بقيت انتظرها فوك ساعه هاي وين ولت شويه وطبت مبدله ومكيجه وشعرها برم مسويته هاا شمسويه بروحج

سندس : شمسويه غير اطلع مرتبه شوفني اخبل مو
حجي طه : والجهال كوه بدلت الهم غير تنتبهين الهم هم
سندس : عادي شبيهم نظيفين كل وكت يله خلي نروح
حجي طه : طلعنا لراس الشارع ونباوع على الناس ندور تكسي حتى ياخذنا
سندس : شوف السيارات والناس الي عدها سيارات خوما مثلنا كحف واكفين ننتظر بلكت كوستر لو تكسي ياخذنا
حجي طه : كل الناس مثلنا قابل بس اني ماعندي سياره
سندس : اوووف شوكت يكعد حظنا مثل الناس
حجي طه : اني مطلعج حتى تتونسين وتونسين الجهال مو حتى تتحسرين وتكضيها تتأفأفين
سندس : سكتنا حتى الحسره ميصير نسولف بيها اوف وين انطي وجهي
حجي طه : امشي نرجع واكعدي اندبي حظج
سندس : لا لا سكتت يله امشي
بيومها طلعنا صح غيرنا جو واغاني ونسه بس هم سندس بس تشوف وحده لابسه وكاشخه ولابسه ذهب وكالت شوفها شوفها شون كاشخه مبين عدهم فلوس كرهتني بلطلعه كلها حاولت الهي نفسي بلجهال ويه سليل ورشا وشويه حسام يلعب ويانه من شاف خواته ويايه وعفتها كاعده تباوع على هذا وذاك

رجعنا بليل وره كم يوم استلمت تسريحي من الجيش من لزمته بيدي ممصدك واخيراً خلصت بس وبعدين هسه اني لازم اشتغل اكثر من قبل حتى اكدر اوفر المصاريف
رحت لأبو المطعم واتفقت اشتغل وياه دائمي والرجال مقصر وبديت اطلع من الصبح صارت يوميني احسن بس تعب اكثر
بيوم اشتاقيت لنهر وعزمتها هي وسامي على الغدا يمنا جان يوم جمعه ومطلعت للشغل علمودها
اجتي بس ليش مااحسها مرتاحه عيونها تعبانه مو هاي التفاحه نهر
دخلت وسلمت على سامي ردت بس ابقى وحدي وياها محتاج افهم شبيهه
سندس : عيني طة اصب الغدا
حجي طه : اي صبي
نهر : جايه وياج اساعدج
تعالي عيني
سندس : اكولج نهر شو محبلتي صار اكثر من سنه ونص من تزوجتي
نهر : والله رحنا للطبيبه وتكول مابيج شى
سندس : شنو مابيج شى لو مابيج غير لازم هسه طفل بحضنج وعمتج شتكول وسامي

نهر : عمتي ساكته مرات تبسمرني ومرات تبلعها وسامي خطيه ميكول شى بلعكس دوم يكول رزق من الله والله كريم
سندس : والله عمتج فقيره خوما مثل حظي دزلي عمي تتفلس على الباگله نار شرار وياريت امه طلعت مرت ابوه
نهر : شلج بهذا الحجي ياسندس متعبتي من المشاكل
سندس : شعندج عيني انتي كاعده ومتختخه ورجلج يجيب ويحط بحضنك
نهر : ليش طه مقصر وياج شو خلصها وهو جاي يحط بحضنج بس اكو ناس متملي عينها بس التراب
سندس : ها بت انعام مو كلت انتي الزينه البيهم
نهر : مو انتي تخلين الحجر يسولف امشي برد الاكل الولد ينتظرون

كعدنا ناكل والجهال داير مدايرنا اباوع على طه احسه يعرف بحالي وبلنار التاكل بيه للعصر سوالف وجاي وراح سامي يخلص شغله ويرجعلي كعدنا وحدنا اني وطه وسندس طبت تنوم رشا
حجي طه : اكعدي وسولفيلي شبيج
نهر : ابتسمت شبيه
حجي طه : تعلميني بيج احجي يبنت حسين شنو المضوجج
نهر : حضنته وبجيت جنت حيل مختنه
حجي طه : شبيج احجي احد وياج سامي مأذيج

نهر : تعبت طه كولش تعبت والله مو بيدي
حجي طه : شكو فهميني
نهر : عمتي تكوم وتكعد يلعاگر ويلعاگر رحت للدكتوره كالت مابيج شى وعلى ايدها وسامي هم مابيه شى بس رزق الله وهاي عمتي تشيلني وتركعني يلعاگر
حجي طه : وسامي شيكول
نهر : تعارك مرتين وياها وتالي كلي من تسمعين منها طنشي شون اطنش واني ماانزل من لسانها حسره شافت وحده حامل لو سمعت فلانه جابت ولطمت ياعيني عليك يبني كلها صارت عدها جهال اله انت
حجي طه : استغفر الله
نهر : واني لازم اسكت ومااحجي
حجي طه : هسه اني احجي ويه سامي
نهر : لا فدوة لعينك لتسويلي مشاكل مابيه حيل هسه يكول توصلين حجي لأخوج
حجي طه : شنو قابل اني غريب
نهر : ميخالف اني ماعندي لا ام بظهري واشكيلها ولا اخت ولا صديقه بس انت عندي واله والله من گثر ضيق روحي مجان حجيتلك بس احس اذا مااحجي راح اطك واموت

حجي طه : اسم الله عليج لتهتمين هو سامي شونه وياج
نهر : وردة ويخاف الله بيه وممأذيني ابد
حجي طه : وهذا اهم شى داري رجلج وعوفي اي واحد يحجي انتي متزوجه سامي مو اهله واذا على الجهال هذا رزق من الله ويجي يوم والله يفرحج بس التزمي بصلاتج ودائماً سبحي وانتي كاعده لتخلين السبحه تنزل من ايدج
نهر : الله كريم بداعتي لتحجي شى
حجي طه : هذا هو المهم ترتاحين
نهر : بست راسه والله انت احن الناس علية
ابتسم وجان نسمع صوت هوسه صح الصوت مو حيل قوي بس مسموع اندور على مصدر الصوت جان تطلع سندس من الغرفه

سندس : سمعتو العيطه
نهر : اي هاي وين
سندس : هاي بيت اهلج اكيد مو عيني مصايبكم وعركاتكم كلها مسموعه هنا
نهر : شصار هسه ياستار
سندس : هسه اشوف واجي احجيلج
حجي طه : مالنا دخل اكعدي واسكتي
سندس : غير نعرف شصار
حجي طه : كتلج اكعدي واسكتي
نهر : فدوة طه بس خلي نعرف شكو العياط مستمر اخاف صار شى گلبي وجعني

طفرت بسرعه سندس حتى بدون متنتظر موافقه طه وصعدت فوك اني هم صعدت وراها اريد اشوف شون راح تعرف
باوعت دخلت لغرفه دخلت وراها لكيتها ماده راسها وربع من جسمها بلشباك تقربت منها ومديت راسي وياها وجني صرت بيت اهلي الشباك صاير على منور البيت ودائماً باب المنور مفتوح وحتى الشباك الفوك يعني تسمع بوضوح وكأنها وياهم وتشوف شغلات بسيطه من صخام بوجهج سندس واني اكول كولشي جان تعرف علينا وهي لا اطب ولا تطلع

واشوف امي تروح وتجي لزمني گلبي رغم كولشي تبقى امي بس هاي شنو ركزنا بلكلام واسمع نوريه تكول اني شعليه هي تفتر جوه رجلي وكع المي عليها لطمت على صدري بس لا بت جعفر لمحت امي لازمه جنات وهاي تصرخ ومبينه الطفله مزركه من البجي نزلت مفرفحه عليها
حجي طه : هااا شبيج على كيفج لتوكعين
نهر : طه فدوة يمكن حنات محروكه واكع مي عليها
حجي طه : بت جعفر

نهر : اي وشايطه روحها وتبجي وذوله مكعد يعرفون يداوها الطفله بيد امي تشهك من البجي والعياط فدوة نروح نجيبها
حجي طه : شون ندخل لذاك البيت وانتي تدرين بلوضع يانهر
نهر : هاي بت جعفر لو ابن علي لو اي طفل والله مااهتم بس مو بت الغالي وفوكاها لا ام ولا اب وامي اعرف بيها مراح توديها وراح تسكط الطفله ونوريه من يوم مصار عدها ولد هملتها فدوة طه بروح جعفر عندك امشينا
سندس : ولج تخبلتي شون اطبين هناك والله انعام تشحتج بلنعال استري على روحج وهسه رجلج يجي للبيت وروحي لبيتج ماعليها شى

نهر : شون اروح ولهسه عياطها بأذني كعد تسمع شون تعيط
حجي طه : اكعدي هسه بلكت تسكت انتي شفتي الحرك
نهر : لا مشفته
حجي طه : بلكت قليل على كيفج
نهر : كعدت بس ايدي بحلكي اكرض بأضافيري من القلق وهاي تزيد بلعياط واني اسمعها وعيوني تصب دمع هي من جانت حيل صغيره وخاصه اخر فتره كلها يمي وبحضني لان محد بحالها مو عاد هسه نوريه عدها ولد واشواق مخلصتها دوام وامي اكيد حايره بروحها منو الها لهاي اليتيمه بقينا بلربع ساعه نسمع عياطها شويه وكف طه كومي نروح

سندس : والله انتم تشترون المشاكل شرايه الطفله وعد بيبيتها هو حرك قابل ماتت
حجي طه : امشي نهر نشوف شبيهه
نهر : طفرت من مكاني وطلعت گبل طه ولكيت باب الشارع مردود ممسدود حيل دفعته وطبيت صارت بوجهي امي وبيدها جنات مصلخه بس بلداخلي عمرها جان ٣ سنوات وكم شهر والرجل مصلوخه من الطول للطول ونص البجامه الجانت لابسته لازكه على رجلها وامي تريد توخره من رجلها لطمت على وجهي من شفتها وركضت جريتها حيل من ايدها حضنتها وابجي

انعام : لا هله شكو شعدكم جايين
حجي طه : اجينا على بت جعفر هاي شمسوين بيها
انعام : جيبيها وامشي اطلعي بره لا انعل شيب الخلفج والج عين ادخلين بيتي شنو هاي الصلافه اني موكتلج مااريد اشوف وجهج بعد
نهر : مااجيت عليج اجيت اخذ جنات واطلع
انعام : هههههه مو بكيفج هيه
حجي طه : ام علي مو وكت عناد البنيه حركة قوي واذا بقت هيج اخاف دمها يتسمم
انعام : تموت ومااخليكم تاخذوها

نهر : يعني انتم متخافون الله فوك محاركين الطفله تردون تموتوها نسيتي هاي بت منو هاي بت جعفر وانتي نوريه وينج نوريه
نزلت تركض نوريه هااا نهر
نهر : وجعاا شگلتي لروحج من حركتيها نسيتي هاي بت اختج ولو اختج انقص منج ذبتها وراحت اتزوجت بس على الاقل كولو يتيمه مالها احد يعني كلت راح تصيرين امها لان هم بت حماج وهم بت اختج يعني هيج دمكم نكس بحيث ميحن
نوريه : احترمي نفسج شنو نكس قابل اني كمشتها من ايدها وحركتها هي تلعب وحركه جوه الرجلين شسويلها طبها طوب
نهر : يطبج طوب انتي هذا لو ابنج هيج تحجين بس العتب مو عليج على امي الي مأمنه طفله عندج

انعام : وجع شخبصتينا ولي للساقط مالتج وعوفي جنات
نهر : والله ولا اعوفها بيدي اوديها للمستشفى وراح اخذها يمي من اطيب ارجعها
انعام : باع هاي من كل عقلج اخليج اطلعين بيها
حجي طه : تره والله لعبتوها لنفسنا بس تمشين وتهددين مكافي شايله سيف واني واني امشي نهر نوديها للمستشفى
انعام : هسه يجي عمها علي ياخذها قابل انت الفكر راح تكدر على علاجها وكل نفسك وجهالك بالاول وبعدين حير بت جعفر
حجي طه : توقعت هاي الطفله تحطيها بعينج لان الباقيه من ريحه ابنج بله اني وطبني مرض متحبيني وتردين اليوم گبل باجر اموت بس هاي طفله يتيمه مالها احد وانتي المفروض بيبيتها واحن الناس عليها

انعام : قابل شمسويه الها قدر وصار ومنتظره علي يودينا للمستشفى
اني راح اوديها شو وخري امشي نهر
عفناها وطلعنا وبيدنا جنات مصلخه دخلتها لبيتي وصحت سندس وينج نزلت تركض من فوك جانت اكيد تتصنط علينا
هااا يمه هاي شصاير برجلها
حجي طه : جيبيلي ملابس من سليل بس القطعه الفوك لان الجوه منكدر انلبسها
سندس : اي وركضت ولبست جنات على السريع
نهر : حاضنتها وابجي وياها هيج تتبهذل ياربي مابيها شى ميته رعب لتتأذه رجلها

وصلنا للمستشفى وللطوارئ قسم الحروق اخذوها من ايدنا عبالهم اني امها وطه ابوها اسمع عياطها من يكشطون رجلها كعدت بلكاع ابجي
حجي طه : اششش كافي هسه تصير زينه طفله وبمرور الوكت ترجع مثل الاول
نهر : يعني ليش هذا حالها شنو ذنبها
حجي طه : قدر ويريد يصير كافي لتبجين
بقينا ساعه كامله يداون بيها الْحٍمَدٍ للـّہ الحرك مو عميق حيل بس لان طفله ولحمها ترف تأذت الطبيب انطانه عصارات ولازم متابعه الها ومنعوفها شالها طه ورجعناها للبيت طول الطريق اباوع عليها شون نايمه وتشهك بعدها تعب البجي والحرك بصدرها
شون طه هم ارجعها الها والله محد يدير بال الها
حجي طه : امج مراح تسكت وراح تگلب الدنيا اذا اخذتيها
نهر : لعد اعوفها يمهم يدمروها

حجي طه : خلي نرجع والله كريم بلكت من تشوفها مربطه هيج تنقهر على حالها وتخليج تعتنين بيها
نهر : امي گلبها صاير حجر والي يعاديها تكرهه حتى اني شفتها متباوع بوجهي
حجي طه : عادي وبعد وبعد لتهتمين بس خلي نوصل ويصير خير

نهر : وصلنا للبيت اول منزلنا لكينا الشرطه بلباب سياره نجده وبيها ٣ هبطت ومعدتي خبطت عرفت امي سوتلها سالفه
حجي طه : هاج استلمي
نهر : لننزل عفيه
حجي طه : لتخافين هنا يابه يمك يم سياره النجده
اول منزلنا عاطت
انعام : ولكم متخافون من الله بكتو بت ابني وضربتوني شوف سيدي ذوله اخذوها
حجي طه : مديت ايدي للضابط الصافن علية وعلى نهر وبيدي جنان مشدده
شبيها هاي الطفله
حجي طه : احتركت وهي بت اخويه واخويه متوفي اخذتها اني وعمتها للمستشفى لان وضعها موزين
بس الحجيه اجت للمركز تكول ضربتوها واخذتوها كوه بكتوها
حجي طه : باوعت على انعام اااخ وين ترحين من الله ورجعت باوعت على الضابط يابه انت تشوف حالنا هذا شكل ناس تضرب وتبوك واني كتلك هاي بت اخويه مو غريبه اني عمها وهاي عمتها سمعنا عياطها واخذناها ولو باقيه جان اسكطت

باوع ضابط من عيونه عرفت مصدكنا
حجيه ذوله عمها وعمتها ورجعوها الج بعد على شنو الشكوه والطفله متأذيه
انعام : وليدي كتلك ضربوني واخذوها واوما انتم تجون الله اعلم شجان سوه بيها
اخذيها حجيه للطفله رجعتلج واني راح اسد الموضوع
نهر : فدوة يوم خليها يمي
انعام : انجبي بت الگلب تردين اعوفها يمج حتى تطلع مثلج عاقه
حجي طه : استغفر الله سيدي رحمه الله والديك ومقصرت
انعام : يعني مراح تاخذوهم للسجن
بتهمه شنو حجيه الطفله وذوله هم اهلها وضعها تعبان وحقهم واخذوها للمستشفى على شنو اخذهم يله يولد
حجي طه : عافنه الضابط وراح وهي شايله جنات وتنكط سم

حجي طه : خطيه هاي الطفله برگبتج
انعام : مالك دخل وحير بروحك وبعيشتك هاي اذا خليتك تعيش مرتاح احسب حسابك كلها جم يوم ومراح تلكه اللكمه التاكلها هسه وخلي اشوف منين تعيش
حجي طه : شنو قصدج ضحكت ضحكه خبيثه وطبت وهاي نهر ماتت بجي على جنات
اجه سامي يركض شصار
حجي طه : تعال ادخل واني افهمك
سندس : مو كتلكم هاي الحيه متسكت حيل بيكم متوبون اله تندكون بيها
حجي طه : سويلنا جاي راسي راح يطك
سندس : وانتي خفي من البجي قابل شكو ماتت كلها جم يوم وترجع تكمز هاي تربيه انعام واشواق الله يستر شراح تطلع
نهر : اسكتي لخاطر ربج شكد تلغين اسكتي
سامي : كافي نهر وامشي نرجع للبيت
نهر : خليني شويه هنا
حجي طه : عوفها شويه يمي

سامي : خلي ترتاح طة واجيبها غير وكت يمك
نهر : بست طة وطلعت والطريق كله ابجي
سندس : هاا طلعو
حجي طه : انتي ليش متلزمين لسانج
سندس : والله كله منكم رحتو هداده عليها على شنو واذا الطفله احتركت قابل هي متعرف تتصرف بس انتم تموتون وتندكون بيها بله لو الضابط الاجه چلب وحط عقله وياكم مجان سحلكم اثنينكم جان تسوه عمركم وفوكاها هاي نهر تدخل مركز حتى خوش عمتها ادكلها طبل

حجي طه : حتى الجاي مالتج مااريده رايح اولي طالع
سندس : هو هذا الفالح بيه لو اكو جبهه جان اخذت جنطتك وانهزمت خلصتها كلها هيج ويايه والله ياالله وتهز بيدها
حجي طه : طلعت اتمشى وافكر بحجي انعام شنو حسره علية اللكمه هاي شسوت امشي وصافن وافكر وماادري بروحي لحد منتبهت غربت
باوعت راح تصير المغرب خلي ارجع هواي تمشيت واخذني الوكت اروح اصلي احسن
واني اتمشى وصلت ركن الشارع لمحت اشواق نازله من سياره ركزت زين واشوفها ويه سعد العرگجي

يتبع ..

الغلاف اليوم هديه من احدى المتابعات شكراً حياتي يخبل مثلك 🌹