رواية ابي والغزلان الفصل الخامس والسبعون 75 - بقلم ريام هادي

ابي والغزلان الجزء الثاني
للكاتبة Reem
البارت السادس والعشرون

شلونج شلون المحنه..
شلون حبنه البي كبرنه
زينه مرتاحه بحياتج..
عفتي ناري وخذتي جنه
ادري موسهله علئ كلبج...
ينسئ حبنا المن زغرنه
اخ لو يرجع زمنه وترجع...
الضحكه البريئه اتلم شملنه
ذنبي حبيتج يريم وضيعيتج...
والسبب جانو اهلنه
حضي العاثر طحتلي...
باهل ماعدهم محنه
لوعة كليبي ويكلبج...
كون بلخيب املنا
(هديه من احدى المتابعات )

ريم : جنت فرحانه بسليل لدرجه امشي واهوس واصفك ومنطلقه ممصدكه ذوله الثنين راح يتزوجون أشرلي سامرمن بعيد يريد مي رحت للمطبخ اجيب بطل اله وجان يصير بوجهي
حسين : شلونج ريم
ريم : جنت عركانه ومحتره من الركص بس شفته والله ثلجت مباشره اطراف ايدي ورجلي ثلجت بلعت ريكي بصعوبه وكلت الْحٍمَدٍ للـّہ انت شلونك اباوع عليه طولانه لحيته وجهه تعبان مو هذا حسين العيونه تضحك للهوا صار من اخر مره تناقشنه اني ويااه مشايفته فوك السنه مشفته
حسين : الْحٍمَدٍ للـّہ
ريم : سحبت بطل المي وجان يكول
حسين : مبروك على الزواج
ريم : ااااخ ربي صبرني گلبي يدك بين اضلوعي مديرحم حالي گلبي خاين بعده يركض اله من يشوفه ويسمع صوته
فتحت بطل المي وشربت منه وكتله الله يبارك بيك شكراً

حسين : مرتاحه
ريم : اي الْحٍمَدٍ للـّہ
حسين : رجلج زين وياج
ريم : سامر طيب وهادئ يعني مرتاحه
جر حسره قويه وكاال
حسين : حبيتي
ريم : فتحت عيووني مصدومه اني ام لسان الي الكل تكول وكحه ولسان ومينكدر الج بذيج اللحظه انبلع لساني معرفت شجاوب وشكول گلبي يكوول هي هينه ويحب غيرك وعقلي يكول انت ماضي وانتهى وهسه سامر زوجي جانت المشاعر وگلبي وعقلي يتعاركون بداخلي صايره اني حرب الهم يطحنون بيه شكد ميكدرون كل واحد منهم يكول اني راح افوز وتاليها ولا واحد منهم فاز كلهم انداسو وضاعو يوم مادرت وجهك يـِْ♡̨ـِْا حسين ورحت دنكت بدون مااجاوب
جان يكول كلمة لو ذابحني ولا كايلها
حسين : اشتاقيتلج ريمتي

ريم : بلحظتها هاي هيه اعلنت روحي وعيووني الاستسلام ونزلت دمعتي جان اسمع صوت سامر ورايه
سامر : وين صرتي تاخرتي
ريم : بحركه سريعه مسحت عيني وانداريت عليه هذا المي جبته جنت متوتره لدرجه لاحظ هذا التوتر عليه سامر باوع على حسين وكاال
محتاج شى
حسين : لا بس اجيت اخذ مي وشفت ريم وباركت اله على الزواج
ريم : باوع عليه سامر وبهدوء كال يله امشي طلعت من المطبخ اني وياااه سحبني حييل من ايدي وبنبره حااده كلش
سا امشي للبيت
ريم : فدووه خلي اكمل الخطوبه ونروح
سا كدامي لااسوي الخطوبه عزه عليج
ريم : خفت لتصير عركه وادمر فرحه سليل جبت غراضي وبست سليل الي ضلت صافنه شلون راح اعوفها واروح
وطلعت اركض وراه

اول مصعدنا السياره شخطها حيييل والطريق كله صار نار شفت انسان ثاني مو سامر الهادئ البارد الي الكلمه تطلع منه بأحساب
سامر : شعندج ويااه هااا شكال الج
ريم : والله باركلي على الزواج
سامر : وبلمطبخ وحدكم
ريم : مابيها شى غير ابن عمي
سامر : بله لو واحد طاب وشافكم شيكول
ريم : شبيهه وكفتنا اكول الك ابن عمي ويباركلي شكوو بيها
سامر : لو اي ابن عم عادي مااهتم هاي مو اشوفج تتشاقين ويه سجاد ويه شعلان عادي بس حسين لا ريم اياج بيوم اشوفج واكفه وتحجين ويااه نسيتي جان خطيبج
ريم : اي نسيت وهو هسه بس ابن عمي
وصلنا للبيت وجان حيل عصبي صعدنا للغرفه وجر ايدي بقوه ويحرگني لدرجه حسيت ايدي راح تنخلع من قوت حركته

سامر : اخر مره اشوفج واكفه وحدج ويااه اذا حسين واكفه بليمنى توكفين بليسره ماكو مكان يجمعكم افتهمتي
ريم : تره والله مسويت شى غلط
سامر : ليش انتظرج تسوين شى غلط غير افصم راسج عن جسمج مااريد توكفين ويااه وانتهى
ريم : سكتت وكتله مااشي
سامر : اني منطيج الحريه لتخليني اتندم عليها والله اذا خنكتج اخليج تتمنين الموت خليني عااقل وياج ومحترمج ومقدرج اكبري ريم انتي هسه متزوجه وكل حركه منج محسوبه
ريم : ممكن تعوف ايدي حييل وجعتني
تركني وكعدت على الجربايه وكتله تره اني متربايه وبت ناس واعرف الصح والغلط ومايوم راح اسوي شى يخجلك اطمن

سامر : لو مو بت ناس مااتزوجج مشكيت بأخلاقج بس اريدج تنتبهين على تصرفاتج اليوم راح امشيها واعتبرها صحيح يبارك الج مره ثانيه ياريم اي مكان حتى لو بلشارع واكفه ويااه وحدكم اگلبها عزه عليج اخليج تبجين دم افتهمتي
ريم : افتهمت متناقشت ويااه لان هو عصبي واني حييل متأذايه من الموقف كله

عافني وركع الباب ونزلت كمت واني احس بألم بكل جسمي ومخنوكه من كلشي صار من شوفت حسين ومن كلام سامر اخذت المنشفه وطبيت سبحت ردت بس ابرد بس اهدأ افترت الدنيا واني بلحمام ولزمت البوري جان وكعت على راسي طلعت تمددت بلفراش والدوخه زادت اكثر سحبت التلفون ودكيت على زينه هي جوه صعدتلي تركض
زينه : بيج شى
ريم : روحي ماعيه واحس واحد يفر بيه دايخه حييل زينه
زينه : تعاركتو موو صوته لوين واصل
ريم : عاادي تصير ركضت زينه وجابت خيار وملح عبالها هبوط ضغط وره شويه وكلتني حلاوه تحير شسوي حتى اصير زينه

سليل : كملت الخطوبه وكلهم راحو لبيتهم وبقينا اني وسجاد وحدنا
سجاد : شنو رأيج نصعد للسطح
سليل : عيب وبابا وماما
سجاد : غير مرتي تره والله اخذج هسه للشقه واريد اشوف منو يحجي
سليل : ههههه لا فدووه لتهدد
سجاد: مااسوي شى حااب اكعد وياج هناك لو السطح بس للمصايب
سليل : اوووف خلصت عمرري بيه
سجاد : اصلاً امني نكعد بس نسولف هم اخاف يشرف على الجيران
سليل : هو انت تخلي يشرف مو اخر مره حطيتله شبكه وكطعت الهوا كله
سجاد : شسوي خفت ابن گلب يباوع عليج وادخل بخطيته واذبحه كلت اسلم حل اسوي قمريه من شبجه لان شكد حاولت امنعج من السطح مفاد
سليل : محد صبرني غير السطح على سوالفك وأذيتك
سجاد : صرت اني موزين هسه
سليل : اي انت

سجاد : امشي نصعد لزم ايدي وصعدنا واخذت ويايه كيك وببسي باقي من الحفله ولفات وصعدنا فوك كعدنا بلكاع اكو جودليه (مفرش) فرشتها وكعدنا
ابقى شويه ابدل واجي
سجاد : ليش والله حلووه هيج
سليل : ماارتاح بلبدله بلكاع ثواني ما اتأخر ونزلت ركض بدلت جنت طايره طير ممصدكه راح اكعد ويااه بدون عراك ومشاكل وطلايب
لبست تراكسودي الجديد وبقيت المكياج وشعري لان مرتبات بس عدلت الباودر وحطيت عطر وصعد
كعدت بصفه نضحك ونسولف واكلنا شويه وكاال
سجاد : سليل
سليل : عيونها
سجاد : انتي احلى شى صار بحياتي
سليل : صدك
سجاد : مرات اصفن اكول لو محابها شلون يصير طعمها الحياه
سليل : اذا احلى شى وشويتني مثل السمج المسكوف وفحمتني لو مو احلى شسوي تفخخني
سجاد : على اساس انتي قصرتي لو نسيتي شسويتي
سليل : حسيته بده يتعصب تقدمت وبسته من خده ابتسم بهدوء
سجاد : شسويتي
سليل : مااريدك تتعصب
سجاد : هااا هاي رشوه حتى اسكت
سليل : ايييي
سجاد : بس اني ماامشي بس بلورق العراقي مااستخدمه
سليل : يعني شنو جان يأشر على شفايفي
لشفايفه
سجاد : هذا الورق اريده واصير انعم من الدخن
سليل : هههههه اني اشتغل بس عراقي ورجعت بسته من خده
سجاد :مبين انتي متجين بلهدوء اله بلغصب وجرني حييل وباسني من شفايفي
نسيت اسمي ودنيتي وكلشي عشته لحظه واني بحضنه وبكل حب نستني اي دمعه نزلتها بسببه

بقينا نسولف ونضحك وكل شويه يحضني يبوسني وابادله بهدووء ورومانسيه صعدت ماما فجأه شافت كعدتنا مابيها شى همزين بوكتها جنا نضحك منسوي شى بس تستحي تكول لسجاد روح باوع على ماما وكال الها
سجاد : انزلي نهر اليوم بايت هنا يمها
نهر : ولك شلون يصير
سجاد : مرتي وبكيفي ولتخافين اسلمها الصبح الج مثل ماهيه
نهر : كوم سجاد روح لبيتك ومن تصير بيتك عود اشبع منها
سليل : كووم حبيبي هم استحي من بابا
سجاد : اني انزل لطه

سليل : لزمته من ايده وكتله بداعتي لتحرجني الايام طويله ونعوضها
سجاد : اووووف صاار وانتي نهيران بعيني اطلعها بيج
نهر : هم نزل وهم يدبج على السطح تره مااخليك تشوفها
سجاد : مو هي بكيفج
نهر : يله روح واصبر ان الله مع الصابرين مو جنت تدلل عليها اكلها حييل بيك جان هسه ابنك بطولك
سجاد : لتذكريني تره مااروح
سليل : هههه يله حبيبي تصبح على خير
باسني من راسي ونزل حضنت ماما حييل وابوس بيها
نهر : خوً انتي عيني متختخه بحضنه صارت بال ١ بليل ولا دايره بااال
سليل : وداعتج للفجر مااحس
نهر : فرحانه ماما
سليل : كلش يووم كلش
نهر : الله يديمها عليج يله انزلي ارتاحي ونامي

نزلت شويه واتصلت بيه اطمن وصل وبقينا للفجر نسولف ممصدكه سجاد رجعلي وكل ميحجي يكول انتي اليه انتي مالتي وابتسم على كلامه
ريم : ثاني يوم بقى وضعي وصحتي مخربطه عرف سامر وفاجأني من كتله على الاعراض كاال احتمال حاامل نبض گلبي اني اصير ام اخذني لصديقه محلل رغم جان ثكيل وجهه عليه بسبب الصار البارحه
جان نحلل واطلع حاامل من طلعنا من المختبر كاال مبروك حسيته فرحان مو جامد مثل كل مره
وصلت للبيت بلغت امه واخته الطارو من الفرح وخابرت البنات وبلغتهم الكل فرحلي وماانكر اني هم فرحت راح اصير ام

سليل : جنا كاعدين وره الغدا غزل تغسل مواعين وجنات متمدده على التلفزيون تتفرج مسلسل واني العب ويه اموري اندكت الباب راحت غزل تفتحها وجان تكول عمتج جنات هي وحماج بلباب
جنات : ياستار شكوو
نهر : خلي يطبون يمه ونفهم شكوو
سليل : دخلت عمه وجنات وشويه ونسمع هوسه
جنات : ماانطيكم ابني على اي اساس
ام عدي : ابن ابني واني اربي ليش يتربى عند الغرب
جنات : هذا ابني ياغرب تحجين عنه وهسه تذكرتي عندج حفيد صار سنين ذابته
اخو عدي : بله حجي زايد لو تجين تعيشين ويه امي لو تنطينا الولد احنا نربي
جنات : ماانطي لو تموتون تالي وكت طلع عنده عم وين جنت عنه من مات اخوك سألت بيوم اجيت شلت تلفون وخابرت وكلت ابن اخويه مريض تعبان بيه شى ولا يمك هسه صرت حنين وين جانت الحنيه من اخذتو الاثاث وبعتوه واخذتو نص فلوسه مكلتو عيب مكلتو هذا مال يتيم هسه كامت تقطر عليكم الحنيه

ام عدي : اسمعي هذا الحجي لايوكل ولا يشرب عدنا لو تجين تعيشين يمي وابن عدي يتربى كدام عيني لو ولي وين ترحين اديحين ديحي بس تنطينا ابنا
سليل : واشتغل العياط ويردون يطبون ياخذوه خابرت سجاد وبابا وسجاد وصل قبل بابا لان قريب
طب يعيط وجر حماها لجنات وطرده هو وامه
سجاد : اذا اجيت بعد اكسر رجلك
ام عدي : اله اخذه منج بلمحكمه واخلي حسره عليج شوفته
نهر : على اي اساس منو مقشمرج وكال الج من حقج تاخذي
ام عدي : لو اعرف اطعن بيها واخذه ماطول حارمتنا منه
جنات : الله اكبر عليج تردين اطعنين بشرفي حتى تاخذي هسه لو حنينه عليه اكول حقها شو كل كم شهر ادزيلج كم شغله مابيهم ١٠ الالاف دينار وهو طفل وحده مصرفه بال ١٥٠ الف مكلتي شياكل شيشرب خلف الله على عمي هو متكفل بكلشي يخصه ويخصني منين نزلت عليج الحنيه
سجاد : خلي احد يلمس سمعتها او شرفها اكاومكم عشائرياً وانعل سلفى سلفاكم واشوف يارجال منكم يطلع راسه ويحجي بعد والي يوصل هنا انعل امه وابوه روحو منا لا اجيب السلاح افرغه براسكم
سليل : سجاد حيل جان عصبي ولزم حماها لجنات وضربه بوجهه وصار مصايح وتالي اجه بابا وعمو محسن وفضوها وذولاك بقوو على رأيهم يردون امير او تجي جنات تعيش يم امهم وكبرت السالفه بس جنات جانت حيل مرعوبه

وره يومين خابرت رشا واقترحت تروح جنات تعيش يمهم وخاصه ميعرفون رشا بلكوت ولا يندلون مكانها بين متخلص الشغله خافت لايوم يدخلون عليها فجأه وماكو احد بلبيت وياخذون اموري لهذا اسلم حل حالياً بين متنفض قانوناً وعشائرياً تختفي جنات من عدهم وأمن مكان تعيش يم رشا وحضرت غراضها وكلشي يخصها ويخص ابنها وراحت للكوت ويه شعلان ورشا

اني غزل طه ياسين اصغر غزلان طه اخر العنقود مثل ميكولون حياتي كلكم تعرفوها ولحد هسه محد يعرف داخلي شنو
اني بنيه حالي حال كل البنات احب افرح واضحك واعيش مثل باقي البشر بس يمكن الظروف المرت بينا خلتني مميزه بكلشي
اني من دون خواتي قليله الكلام عندي قابليه مااحجي يوم كامل واجاوب على كد السؤال يكولون هذا طبعج وانتي صغيره لدرجه نعوفج ساعات نرجع نلكاج نفس مكانج ولعابتج بيدج بابا يصيحلي غزوله نسمه البيت الهادئه وريمو تصيحلي ام نص لسان لان مااحجي بس وكت ماافتن عليها واحب اسويها عصبيه ريم الوحيده الي تضحكني وتغير حالتي النفسيه
جنت دوم اصفن على خواتي واكول ياريتني مثل سليل ابجي شوكت مااحب شوكت ماازعل الطريقه الوحيده لتفريغ الهم البجي ياريتني مثلها طبعاً سليل اصيح الها ماما رغم بس ١٠ سنوات بينا لكن تعلمت اصيح الها ماما لان احسها امي قبل متكون اختي

واحب اصير مثل ريم اضحك واكمز واتشاقه واخذ حقي من اكبر واحد ومااخاف ومثل رشا شخصيه قويه حاده الطباع وعقلها اكبر من عمرها وترد الضربه بعشره تمنيت اخذ من كل وحده بيهن الصفه المميزه بيها بس اني طلعت بيه صفه غير عنهن تلاثتهن صفه الصبر والسكوت
من اني وصغيره واني اشوف الحرك الي بيه برگبتي بلذات ومااعرف هو شنو وماما سليل تكولي يروح من تكبرين لحد ما وعيت وبيوم جنت بلخامس الابتدائي وبنيه ويانه احتركت رجلها وراها داومت وشفت رجلها شلون اتشوهت والطلاب يخافون منها عرفت هذا حرك قديم ومراح يروح مني واخاف قبل جنت حذره ماانزع الحجاب صرت اضعاف حذر وخوف صديقاتي الكل ماعندي وحده معينه ياهو التجي تكول خلي نلعب العب وياها وبلمتوسطه والاعداديه اكعد بلفرصه ويه البنات واسمع كلامهن وسوالف المراهقه مالتهن بس دوم يكولون الي لحد ما وصلت كليه ليش هيج انتي هادئه ابتسم واكول هذا طبعي

يمكن تحت الهدوء عاصفه ويمكن مراح يبدر مني شى بيوم رغم كل المريت بيه
اليوم بيدي الصدريه لازمتها وفرحانه بعد التعب هذا كله راح احقق حلمي وصلني عمو سجاد للكليه بعد موصلنا ماما سليل للدوام
سجاد : عندج مصرف
غزل : اي عمو عندي
سجاد : هااج
غزل : والله عندي
سجاد : ولج هاج خليها بجنطتج اخاف تحتاجين شى
غزل : اخذتها منه هو الوحيد الاخذ منه بعد بابا وخواتي وماما نهر وحطيتهم بلجنطه وطبيت گلي تفائل بدراستي انقبلت علوم بايو مسائي الجامعه المستنصريه
طبيت وكعدت بلستول وحدي وبدت الطلاب تدخل وناس تعرف على ناس وكل طالب يكوم يعرف عن نفسه وصل السره اليه وتكلمت بس الاستاذ كال صوتج ناصي علي ورجعت حجيت جنت موت خجلانه

مرت اول فصل دراسي جنت شاطره واقرا ومااحب اترك محاظره مدنجه واقرا وبصفي صديقه تعرفت عليها اسمها حوراء
حوراء : غزول
غزل : امممم
حوراء : شوفي ذاك شلون ذبح روحه عليج
غزل : مالي دخل بأحد فدوه حوري لا كل شويه تشتتيني بشى اريد اقرا
حوراء : شكد تحبين تقرين حشره كتب
غزل : اي حشره كتب واذا متقرين كومي منا بعد نص ساعه الامتحان مالتنا
امتحنت وكملت وجنت حيل فرحانه لان جاوبت ورجعت للبيت طايره نزلت من الخط جان واحد كاعد بسياره حديثه باب بيتنا لابس مناظر شمسيه مديت راسي من بعيد اشوف منو مباشره نزع المناظر وكاال
فيصل : اكو شى
غزل : ارتبكت وكتله انت ليش واكف بابنا تريد شى
فيصل : وانتي اي واحد يوكف بابكم تسألي
غزل : عفته وطبيت مدري وين شايفته دخلت للبيت لكيت عمو محسن جاي ياخذ غراض بابا محتاجهم
غزل : هلوو عمو
محسن : ياهلا بأحلى الغزال شلونها المحلله
غزل : الْحٍمَدٍ للـّہ عمو
محسن : بله متحلليلي رحمه لابوج احس الضغط صاعد عنده من وره سوالف طه وراح يجلطني
غزل : ههههه بعدني عمو مااعرف احلل من اتعلم اول واحد اخذ دم منه لان ماشاء الله الاورده مالتك بارزه
محسن : جنج على اورده انطيج ايدي وجككي براحتج
غزل : شكراً عمو فدووه لقلبك اكو ولد بره بلباب
محسن : هذا غضب الساطع ابني
غزل : هااا واني اكول وين شفته
محسن : خوما ضوجج

غزل : لا ماكو شى من رخصتك طبيت بدلت ومرت بعدها الايام بس الصار بعد اسبوع واحد بس اتفاجأ عمو محسن وزوجته القليل تجينا وابنه فيصل الشفته بلباب ذيج المره عدنا مهتميت بلبدايه واصلاً مطلعت بس ماما نهر كالت سلمي وادخلي لبست تراكسود مستور وشال طلعت سلمت ردت اطلع جان يكول عمو
محسن : وين فالته متردين تشوفينا ابتسمت على كلامه وكتله بلعكس عمو احب اكعد وياكم بس لان عندي دراسه
محسن : الدكتوراه مالتج عوفيها وتعالي اكعدي لا مااخليج تسحبين دم مني
غزل : ههههه كعدت صار

بدو يسولفون وزوجة عمو محسن تباوع وتبتسم لحد مكال عمو محسن
محسن : اجيتك طه ومااريدك تردني
حجي طه : شنو هاي الرسميه التسولف بيها معرفتك
محسن : خليني محترمك اله احجي مو غير الجماعه كاعدين
حجي طه : هههههه اي هذا محسن احجي شتريد بس لتكول باجر متجي كومه عدنا شغل
محسن : وين اروح يول مكابلك وكاعد متشوف كطعت الخلفه
حجي طه : ههههه احجي أمرني
محسن : اجيت اطلب ايد بنتك غزل لابني فيصل ومااريدك تردني
غزل : اني جمدت شنو منو شصار لدرجه مرمشت
نهر : منتبهت لغير ما ماما نهر اشرت اطلع
حجي طه : والله فاجأتني مااعرف شكول الك
محسن : كول كبع واخذ من يم الكل كبع واخذ من يم محسن مااعرف شكول مو البكه مالتي مخططه متكرص
حجي طه : ههههه انطي صبر غير استوعب كلامك
محسن : فيصل احجي بلسويدي كلي اريد غزل مره الي تعرف ثقافته اجنبيه خريجه جامعة سوك العوره
حجي طه : يابه شكتلك اني وهيج گبيت
محسن : هسه شنو جوابك فضني
حجي طه : مشايف واحد يخطب هيج
محسن : تره اني عمها هسه اخذها بملابس البيت واعقد عليها لابني
حجي طه : اذا برضاتها اني اجهزها ولبابك اوصلها
محسن : خلي يولن تره متكسر عيني بكلامك
حجي طه : ههههه اعرفك متنكسر عينك انت

محسن : بلخير عليك ابني نقرا الفاتحه
حجي طه : يمعود انطي صبر خلي اسأل لبنيه اكلتنا حاصل فاصل
محسن : نشوف طه باجر اجي اريد احدد موعد الخطوبه ولتعبني اني رجال عندي ضغط واخاف على روحي انطيني بنتك جنه اليه ومااريد من جهرتك شى ثاني
حجي طه : هههه صار اسألها واذا قبلت التريده يجرالك بس تعال تره ميصلح احنه بصفر خليها وره صفر ارداك الجواب

نهر : ضليت صافنه وگلبي قبضني غزل تتزوج بعدها صغيره يمكن هي الوحيده المااريدها تتزوج احس اضيع بدونها ومنا خواتها اتزوجن وبقت بس سليل وكلها ايام وتروح اضل وحدي دمعت عيني متحملت كمت ورحت بلمطبخ ابجي
سليل : كاعده احضر العشا اخاف عائلة عمو محسن يبقون طبت ماما تبجي
سليل : وكفت هاا شبيج يوم
نهر : حضنت سليل خطبو غزل من طه هسه
سليل : شنو منو خطبها
نهر : محسن لابنه
سليل : بس هي بعدها اول كليه
نهر : اكيد ابوج ينطيها وخاصه لمحسن صديق عمره
سليل : وغزل شكالت
نهر : اشرت الها تطلع يمكن صعدت للغرفه فوك
سليل : وانتي ليش تبجين
نهر : شون ماابجي وبناتهن كلهن راحن وراح ارجع وحدي
سليل : حضنتها حييل وين انروح عنج غير انتي امنا الحنينه مرجعنا الج بس هلمره مو وحدنا جهالنا ويانه
نهر : يوم عيد ياسليل واشوف الجاهل بيدج والله محد لوع جبدي بكدج وكد ذاك المخبل
سليل : هههههه ان شاء الله بس لتبجين فدووه اروح اشوف غزل
صعدت لغزل لكيتها تقرا هاا غزول
غزل : هاا ماما
سليل : عرفتي بعمو محسن
غزل : اي عرفت
سليل : وانتي شنو رأيج
غزل : بكيفكم بس اني اريد اكمل دراستي
سليل : كولي لبابا هيج
غزل : استحي
سليل : هاي حياتج ميصير تستحين
غزل : مااشي
سليل : واذا قبلو تكملين دراسه
غزل : شفتي لفيصل

سليل : شفته مره مرتين ليش شبيهه شاب حليوي جعلته اخويه ومرتب وفوك كل هذا متربي بلسويد بلخارج يعني مو معقد مثل العندي يطك الگلب
غزل : بس شايف نفسه عبالك ابن رئيس وزراء
سليل : وين شفتي
غزل : ذاك اليوم بلباب ويحجي بغرور اكره ولد هيج
سليل : هاي حياتج وانتي بكيفج تقبلين متقبلين براحتج
غزل : باجر عندي امتحان اقرا وبعدين الله كريم
سليل : والله وكبرتي وصرتي عروس ويجون الخطابه على بابج
غزل : ياريت مااتزوج
سليل : ليش
غزل : منو يقبل بيه هيج
سليل : هسه مو فيصل خطبج
غزل : يجوز ميعرف وخاصه محجبه دوم كدامهم
سليل : بس مرته اجت بعرس ريم واكثر من مره شافتج
غزل : اذا اني من اشوفه اختنك شلون الي يتزوجني
سليل : مو رحنا كم طبيب وكال نسوي عمليه تجميليه وانتي مقبلتي
غزل : اخاف ماما وهنا الطب فاشل واخاف يسكطوني
سليل : هم نسأل ونشوف اقري حبيبتي ولتفكرين

غزل : اقرا مستحيل اكدر اقرا اخر شى اتوقعه اتزوج كل خواتي تخرجن يله تزوجن
معقوله اتزوج واعوف كليتي
وره ساعه اندكت الباب ودخل بابا
حجي طه : شسوي المحلله
غزل : كعدت عدل وابتسمت ادرس بابا
حجي طه : عرفت شويه اكعد واروح حتى مااشغلج
غزل : الوكت كله الك بابا
حجي طه : سمعتي عمج شكال طلبج
غزل : اي
حجي طه : شتكولين
غزل : سكتت
حجي طه : احجي بابا اني مااجبرج اذا متردين وهم ممتعاجز من لكمتج اخاف عبالج اريدج تتزوجين والله على عمه عيني صاعد هسه واسألج ولو غير محسن من الباب اكول الهم ماعندي مره بس تعرفين معزت عمج عندي وهم ما أمن عليج يم الغرب اقلها من انتي يمه احسج بعدج يمي واعرف زوجته طيبه وخوش مره وانتي فقيره مو مال ناس منعرفهم اسلمج الهم
غزل : ودراستي
حجي طه : اول شرط احطه تكملين دراسه
عز معناها انت موافق

حجي طه : والله ياغزوله لو عليه احطج بجام خانه وما ازوجج العمر كله بس هاي سنه الحياه واذا مو اليوم بعد سنه بعد سنتين بس الفرق مااعرف الناس الراح تجيج شلون وانتي بلذات غير خواتج كلهن هادئه وفقيره اخاف توكعين بيد ناس مترحمج وابقى اتندم العمر كله لان مأمنتج عند محسن
مااريد جوابج هسه شوكت متحبين انطي جوابج
غزل : الله كريم باس راسي وطلع وبقيت محتاره اقبل لو ارفض

بقيت افكر الليل كله شفت اشكال الحب من سليل وحبها الجنوني لسجاد ورشا وحبها بكبرياء لشعلان وريم وحب الطفوله الي مع الاسف انتهى بألم بس اني هم اريد احب مثلهم هم افكر واسهر تمنيت اعيش علاقه حب وانسان يحبني واحبه واكافح حتى اتزوجه
اول مره احس روحي ضايعه ومااعرف شريد

سليل : كاعده اليوم اخذ اجازه ارتاح شويه من الدوام دزيت رساله لسجاد بليل باجر مااداوم اجه اخذ غزل وصلها جنت نايمه ماادري كعدت ساعه ١٠ تريكت وغسلت مواعين الريوك وسألت ماما شنسوي اكل
نهر : يمه اشكال المرك بلمجمده طلعي وبس طبكي التمن مديت راسي بالمجمده اباوع عدنا قيمه جابوها النا وعدنا شجر وعدنا فاصوليا طلعتهم تلاثتهم وكلت اشوف شياكلون واسوي التمن
نهر : يمه رايحه لبيت ام عباس امهم مريضة أدي واجب واجي محتاجه شى
سليل : ببسي فدووه ماما
نهر : ولج موزين على عظامجً
سليل : مابيهم شى لتخافين ماانكسر قبل العرس
نهر : تف من حلكج فال الله ولا فالج
سليل : بس قوطيه وحده
نهر : مااشي واجيب خس هم حتى تسوين زلاطه ماعدنا
سليل : مااشي
باوعت شسوي هسه رفعت ملابسي جبت وصله المسح امسح الاطراف الممفروشه
وادندن مابيه عوفن هلي ولا بيه اعوف هواي وجان احس واحد يحضني من وره حيل وشالني من الكااع عطت عيطه من الفزه
سجاد : اني اني شبيج
سليل : حضنته وكمت ابجي
سجاد : شبيج حبيبي هاي اني
سليل : والله متت رعب
سجاد : ليش مبقيه الباب مفتوحه مو كم مره كتلج تسديها
سليل : هسه طلعت ماما للجيران يجوز هي بقت الباب مفتوح
سجاد : طبيت لداخل البيت وحضرتج تغنين
سليل : عفيه سجاد لهسه الهبطه بيه بعدين حاسبني
سجاد : تعالي حبيبتي خفتي مووو
سليل : حضني حييل وبدا يتلمس جسمي وخرت منه وابتسمت راحت الخوفه
جان يسحبني ويكول لا بعدج خايفه ادري بيج
سليل : ههههه سجودي بطل هاي سوالفك
سجاد : غير علمودج صدك سوي زين وذب بلشط
سليل : لتسوي وعوفني اكمل شغلي يغمز ويحجي
سجاد : ماكو احد بلبيت مو
سليل : بلعت ريك هاااا مو تدري ماكو بعد ليش تسأل
سجاد : انتي مو مرتي
سليل : المفروض

سجاد : ليش منتزوج هسه وره صفر اسويلج عرس
سليل : طفرت منه سجاد حبيبي مبقى شى ايام وتجي فرحه الزهره ونتزوج
سجاد : مو شيب ابويه حرگتي كل مااجي حسره عليه احضنج ابوسج
سليل : هانت ايام واصير بيتك
جان يتقرب وسحبني من ايدي وحصرني بلحايط
سليل : فدووه لتجي ماما عيب كدامها صير عاقل
سجاد : بوسيني يله اكعد عاقل
سليل : بسته من خده
سجاد : اي مو اني اموري وتبوسيني هيج
سليل : شتريد
سجاد : اريد بوسه اطفين نار گلبي واله وروح ابويه اخذج هسه وشيصير خلي يصير
سليل : لا لا راح ابوسك وتقدمت بهدوء وبسته من شفايفه محسيت غير يبوسني ويتفنن ويتلمس كل جسمي ذبت بكل حركه يسويها غمضت وسلمت روحي اله شكد جان مشتاقلي اني هم مشتاقه اله جان متلهف بطريقه مجنونه ويتنقل بين شفايفي ورقبتي وجان نسمع الباب ونطفر

ونسمع صوت اخر وحده نتوقع نسمع صوتها
ريم : هااا ولكم شسوون وكحين
سليل : هااا ريم بيج شى هبطت من شفتها
ريم : اجيت حتى امنع الجريمه النكراء الي تريد تصير
سجاد : لا هله شجابج
ريم : حظك عموو هذا شعبالك شوف شمسوي بدنيتك والله سلطني عليك
سليل : احجي بيج شى
ريم : بيت ابويه واجيت غزل خابرتني واااااخ الْحٍمَدٍ للـّہ اجيت جان راحت اختي بشربت مي
سليل : كرصتها كاافي

ريم : ليش اسكت شجنتو تسوون هااا
سليل : روحي لبيتج منريد نشوفج
ريم : تقربت من سليل وشاورته مو اذا رحت مو بعيد الكاج حامل الجيه الثانيه استري على روحج
سليل : ههههه ايا حقيره
سجاد : جوعان اني
ريم : حقك الله يعينك تتعب هوايه
سجاد : شتردين لج
ريم : علاكه حلويات لا وعلي افضحكم ومااخلي واحد مااكول اله لكيتكم بوضع الفحشاء
سجاد : غير مرتي
ريم : من تجي بيتك عيني عموو احنا ناس مؤدبين ماعدنا هاي السوالف ليش اطلع عيونا واحنا صغار
سجاد : والي بطنج شنو من الهوا اجه
ريم : قولون عموو مالك دخل بيه

سليل : اني اشتريلج والله
ريم : مالي دخل علاكه هسه تجيني وبيه جبس برنگلز
سجاد : هذا شنو بله
ريم : جبس بقوطيه طويله مو ابو الالف لتصير بخيل اريد القوطيه الجبيره ابو الالفين ونص وببسي مجرش وجم نستله الي يحبها گلبك
سجاد : بس لا مجوعج رجلج
ريم : لا يجب دائماً بس من يصير بطريقه القفص والاستغلال يصير طعمه اطيب
سجاد : راح اجيب مو لان خايف منج بس لان حامل وخطيه للطفل
ريم : كثر الله من امثالك انت جيب ومو مهم النيه
سجاد : حبيبي محتاجه شى
سليل : لا گلبي سلامتك
ريم : ولج خسري ياحظي وره الزواج تصير بلدفرات وميكول شتحتاجين هاااج هذا الموجود
سليل : سجودي ميكولها وتقربت وحضنته
ريم : بابا وينك تعال شوف بتك التكول عليها فقيره شلون تتحارش برجال كدامي
سليل : ضربتها على راسها صوتج عالي
ريم : يله جعت
سجاد : رايح باسني من خدي وراح
ريم : اي عيني اطورنا ست سليل صرتي فاسده وتشجعين على الفسوق
سليل : بطلي هاي سوالفج وتعالي كوليلي شجابج
ريم : خابرتني غزل وكالت علمود فيصل وتعرفين بيه مااتحمل بس كعدنا الصبح خليت سامر يذبني هنا
سليل : انتي شتكولين
ريم : والله انيالها اذا تزوجت فيصل كافي عمها ابو زوجها هو محسن وزوجته هم دره مال الله
سليل : زين وهو
ريم : اكيد مثلهم ولتنسين اختج ماعدها احد ولا تحب واحد لتروح توكع بواحد بأبن گلب يلعب عليها بلكليه وهاي فقيره بنستله واندومي يصادقها

سليل : لج مو لهاي الدرجه فقيره بس واعيه وحذره
ريم : اني العليه اكول تتزوج فيصل اقلها شوكت متحب تروح للسويد واكيد يسحبها اذا سافر
سليل : گلبي وجعني وين تروح غير اتخبل اذا سافرت
ريم : شسوي بلعراق العظيم شحصلنه منه بس الضيم خليها تغير حياتها
سليل : رشا عرفت
ريم : اي عرفت ورأيها نفس الشى
سليل : الاهم هو رأيها

اجه سجاد وكعدت اريد اكمل المسح جان يجي يشاورني
سجاد : بس ادنجبن كدامي لو مو ريم اخذج سحل للشقه
سليل : بطلت والله ماامسح
سجاد : جوعان لو اكلك اطيب
سليل : اليوم شجاك
سجاد : نايم وتفترين بلحلم عليه اكعدي يابنت الناس ميفيد تبوسين وتحضنين واني روحي خضره واجيتج طاير لو ما زيبك جاان اااخ منو يخلصج مني
سليل : بسته من خده وكتلك اموت عليك من تتحركص عليه
سجاد : افرحي عود من تصيرين عندي انتي مره وافلتي مني
سليل : تقربت منه وهمست بأذنه يجوز انت تفلت مني
سجاد : حبيبي سويلي اكل تره هواي تلعبين بناري
سليل : هههههه رايحه
طبيت للمطبخ وبديت احظر الاكل وهاي ريم حاطه الجبس وتخرخش بأذني

سجاد : اكو واحد يطبخ مركه شجر اياج سليل من نتزوج اطبخيها
سليل : شبيهه والله طيبه
ريم : اصلاً الشجر زايد على الخضروات ومركه الشجر جريمه بحق البشريه
سليل : ادري بيج متحبيها
سجاد : راح اجيب دجاجه ونتغدا عوفي كلشي
ريم : بربك عمو حمصها
سجاد : هاي البنيه اكص ايدي اذا رجلها يوكلها
ريم : هنا الاكل اله طعم ثاني يله لتتأخر
سليل : اجه ماما وكاعدين نسولف وجاب سجاد الغدا تغدينا سوه بعد مااجت غزل
وكعدناها بنصنا وكل وحده تحجي شكل
هدأ الموضوع ومنفتح بعد لحين انتهاء صفر

خلص صفر وعدت الايام ونركض نجهز المشتمل مقبل نكعد بشقته لان عماره وناس طابه وناس طالعه أجرنا مشتمل بعد عن اهلي اربع بيوت صغير ٦٠ متر بس عندي يسوه ٦٠٠ متر بيه صاله ومطبخ وحمام جوه وفوك غرفتين نوم وحمام احسه قصر لان ويه سجاد واثثناه وهديه بابا اليه مو مثل خواتي مردت ذهب لان عندي جابلي طباخ وثلاجه ورشا عليها التخم وريم الغساله وعمه سبلت وعمو محسن ميز طعام يعني نص البيت من اهلي واني وسجاد اشترينا غرفه النوم والكاونتر وكملنا باقي النواقص خلال ١٠ ايام بس نركض ركض وكمل البيت الجنت انام واكعد احلم يجمعني بيه

اليوم واكفه كدام المرايه وعيوني مدمعه من الفرحه لابسه البدله البيضه والبركع وممصدكه اليوم عرسي اي اليوم راح اتزوج اليوم راح انام بحضن حبيبي بعد عذاب سنين غمضت وتذكرت اول مره رف گلبي عليه وحبيته وجنت بنت ال١٦ سنه بسنه ١٩٩٩ من وكعت من الدرج وداراني ومن يومها گلبي يدك عليك ياسجاد من يومها وانت تمشي بدمي وحبك يتخلل كل مسامه بجسمي حبيتك بمراهقتي وحبتك بشبابي وكل مره احبك اكثر من قبل
واخذتني صفنتي لكل موقف وياه بزعله بعصبيته بهدوئه بحبه كل موقف جمعني بيه وتر نبضات گلبي رغم كل مشاكلنا المرينا بيها بقيت متعلقه بيه واحبه مكدرت احب غيره

وجان تنفتح الباب وتركع الهلاهل رشا وريم وجنات وغزل وماما نهر گلبو الدنيا
نهر : اللهم صلِ على محمد وآل محمد تخبلين يمه الف الْحٍمَدٍ للـّہ الله انطاني عمو وصحه وازفج بيدي
سليل : بست ايدها وراسها الله لايحرمني منج يمه ومن حنانج ويحفظج النا
نهر : يله بنتي ينتظروج جوه كلهم
وطلعت والبدله تسحل ورايه وانزل درجه درجه واشوف بابا حبيبي مثل كل خواتي واكف ينتظرني يمكن بابا مكتوب عليه يوميه يودع وحده بينا وكفت بست راسه وايده وحضنته حيل سمعت ماما تكله
نهر : ماحجيت وياها شى ونصحتها مثل خواتها
حجي طه : الي تتحمل واحد مثل سجاد بعصبيته بعقله بأطباعه بخبالاته وتغير بيه وتخلي يحب ويأمن ويتزوج ويفتح بيت بعد كل المر بيه مينخاف عليها
بنتي سباعيه بطله كدرت على الاسد وخلته يحبها بس وصيتي الج شى واحد اريدج مرتاحه وسعيده اياج بيوم يكسرج الزمن
انتي اول فرحتي وتبقين اولهن

ريم : اعترض واني
سحبني بابا لحضنه وباسني انتي غزال البراري شعنونه البيت وضحكته كل وحده بيجن ماخذه من گلبي قطعه الله لايلجم گلبي بوحده بيجن اريد دوم كون اشوفجن اسعد البنات
حضناه كلنا ونبوس بيه
محسن : راح المكياج يمعوده ليرجعها علينا معودنا اخذها حمضت وفاحت ريحتها
سليل : ههههه اشكرك عموو والله ريحتي تخبل
محسن : قشمري نفسج ولو ذاك هم صمون يابس مشمور بلسطح
سليل : لا عمو لتحجي عليه حباب
محسن : والله وكت واكفه وادافع بكل عين صلفه
نهر : غير رجلها
محسن : الله خوش معلومه اول مره اعرفها هاااا نهر مالج دخل حيري بضيمج راح اخذ غزل منج
نهر : لتدكرني تره هسه اكعد اخلصها مناحه
محسن : عندج اخوج ماجستير بلطم والمناحه ومقبل على الدكتوراه
حجي طه : هاااا انداريت عليه
وجان نسمع المزيفه

سليل : دكت گلبي جانت ويه المزيقه كعدت على القنفه وانتظر يطب
دقايق ونسمع صوت الطلقات والهلاهل ودخل سجاد بقاطه الرسمي ومزين ومرتب لحيته وشعره الاسود بيه خصل بيض منطيته وقار ورزانه وهيبه وعطره تارس الهوا الاشتمه دنك عليه ورفع البركع وباسني
باوعت عليه وكااال
سجاد :طالعه تخبلين اليوم راح تنامين بحضني حبيبي وين تفلتين مني بعد
سليل : ابتسمت بخجل اباوع الكل فرحان ويركص ويهلهل دخل من الولد شعلان وحسين وعمو محسن جماعته واصدقائه بقاهم بره مقبل لان البنات يركصن
ريم : جنت منطلقه بعرس سليل ولمحته من بعيد واتذكرت كلام سامر درت وجهي ومباوعت كلت حتى النظره حرام عليه كاافي ريم واتذكري انتي مرت سامر وكلها كم شهر واصير ام ابنه
حسين : تقربت من ريم بهدوء استغليت الكل هوسه ويركص ومخبوص وبيني وبينها شبر بس وهمست قريب أذنها بدون مااطخها
تمنيت هيج اجي واخذج وكدام كل الناس اعيط اخذت الاحبها اخذت ريمتي

ريم : انداريت شفته اندار وطلع گلبي انقبض وروحي فرفحت ومحسيت غير دموعي تنزل حيل تأذيت من كلامه ركضت للحمام تقيأت بسبب الوحام والصار رجفت من كلامه وابجي شتريد مني روح كاافي
سمعت دكت الباب
صحت اني وبديت امسح وجهي
سامر : بيج شى
ريم : لزمني گلبي هذا سامر كال مااحظر العرس شجابه مسحت دموعي وغسلت وطلعت
سامر : دورت عليج كالت غزل يمكن بلحمام طلعو تره راح تتحرك الزفه
ريم : شوكت اجيت
سامر : هسه كلت مااعوفج بهيج يوم
ريم : حضنته وكتله شكراً لان اجيت جنت منهاره لدرجه اريد انهزم حتى من العرس
باسني من خدي وگلي نروح
ريم : اي يله مد ايده لزمته وطلعنا بطلعتنا لمحت حسين يباوع اعرف شاف سامر لازمني ردت يعرف تره كافي اني تزوجت انساني وروحي عيش
صعدت بسياره سامر ليكدام وطلعنا بلزفه وره سليل جريت نفس اول مره اريد سامر يمي مااريد اضعف واحن واسوي الحرام
جيته صحتني على نفسي لزمت ايده طول الطريق ومتركتها حتى هو استغرب تصرفي بس حسيته مرتاح

سليل :انزفينا بسياره سجاد جانت النترا مزينا ومرتبها كعدت بصفه وهو يسوق
ومشغلين اغاني بس اكيد اني ملبسني كبوس كون اشوف الطريق وكل شويه اكول اله عفيه خلي اوخره وهو ميقبل مردت اتعارك واكسر فرحتنا
جان يضحك ومكيف صّـْْ(☑)ـْْحّ جماعته حاولو يركصوه بس هو مقبل بس يصفك وياهم ثكيل حتى بعرسه بس ابتسامته وفرحته تسوه الدنيا عندي
اخذنا صور بسرعه وطلعنا جان ميقبل اي وحده من البنات تنزل بلشارع ويباوع هنا وهنا ومكبعني من فوك ليجوه على اعصابه كلت بس لا يتعارك
الْحٍمَدٍ للـّہ عدت الزفه ورجعنا لبيتنا راد الدخله بلبيت واني هم مااريد فندق بيتي وياه يسوه الف فندق
دخلنا للبيت وحسين جايب طلي جوه رجلنا ذبحوه ودخلت للمشتمل وخواتي ويايه هوستهن والهلاهل بس دخلنا للصاله نزعت الكبوس الي ملبسه الي وخانكني بيه بقيت بلبدله والبركع وشغلن البنات ديجي اني ورشا وجنات وريم وغزل وماما وزينه حمات ريم كمنا نردح ونركص اخذنا هز بلنص ساعه هو سد الباب وبقى بره يم الولد
حتى اني اركص وطايره من الفرح وره حدود اقل الساعه دك الباب حيل وصااح مكافي حسووووو

ريم : منين اجيب احساس للي مايحس
رشا : اني اليوم ابات بحضن اختي
سجاد : اطيرج بكفخه هسه مااوديج بحضن رجلج لا للكوت گبل
رشا : هااي شبيك عموو الله عليك مشبعنا ركص
سجاد : روحي لبيتج اركصي مفاتح ملهى عندي
ريم : اي والله حقك عمو اني راح اجيب القران والسجاده واصلي شكو صلاه فايتتني بيتكم للبركه
سجاد : علويه ريم قبل الله صالح اعمالج تره راح اركع راس براس لاعبات عليه بنات طه

نهر : امشن الرجال يريد يرتاح بيته
ريم : اله هي تكول روحو اسمعها منها يله اروح
رشا : واني هم والله مااروح اله سليل تكول
سجاد : هااا حبيبي
سليل : باوعت عليه وابتسمت وكلت يله روحو بله مطرود
سحبني لحضنه وحضني كدامهن
وهنه الهلاهل وريم تصوفر تكول ولد مو بنيه هي وزينه حماتها
سجاد : خوش مطيرجيه عدنا وين الماسحه ذني ميطلعن هيج
سليل : حضنو البنات وباركوله وباركولي وطلعو راح سد الباب وراهم واجه يتمشى ونزع ستره وشمرها وكاال
سجاد : اجت عصفوره گلبي لعشها
سليل : كتله بهدووء احبك سجاد روحي بيك ممصدكه اني وياك وحدنا بيتنا
حضني بهدوء وشالني وكاال
سجاد : واني امووت على كل مسامه بيج يانبض گلبي وياتعب عمرري وراحته

يتبع ....