رواية ابي والغزلان الفصل الخمسون 50 - بقلم ريام هادي

ابي والغزلان الجزء الثاني
للكاتبة Reem
البارت الاول

مجبورين نكتب عن الفراك.
جان احباب عدنه وفاركونه.
عيشونه بعشكهم اجمل احساس.
وعلى شوفت وجهم عودونه.
مااريد احجي لكن جرحي ملجوم.
واريد يطيب جرحي بشوفت عيونه.
كَلبي من الهجر مو ترس راسه الشيب.
ومن فركاك كَلبي وكَعت امتونه.
اوووف من الحجي يلجم هواي جروح.
وعمت عين الجروح شكد يحبونه.
عشاير بالكَلب صارتلة الدموع.
وبس ينذكر اسمه تكول هدونه.
مل مني الصبر وهاجرني غفله بليل.
وبقت رؤحي وحيدة بقفص مسجونة.
ارجع يالمحب جددلي الآمال.
اهواي احلام ميتة بكَلبي مدفونه

سليل : تمشي السياره واني صافنه الي يشوفني يكول شكد هادئه بس محد يعرف الي ديصير بداخلي احس گلبي يريد يطلع من ضلوعي من الالم وكلمته انتبهي لنفسج يانفسي ترن بأذني وكأنه تقصد يحفرها بعقلي وگلبي حتى تكون رفيق رحلتي زين لو اني نفسه ليش أذاني لو اني نفسه ليش عافني ليش سجاد هانت عليك نفسك وضحيت بيه بسهوله حصرت دمعتي مردتها تنزل وخاصه انتبهت بابا كل شويه يباوع عليه من المرايه وكأنه يكولي يصير قويه باباتي تحملي واني اجاوبه بعيوني شتحمل بابا والله گلبي ينزف دم من وراه

غمضت عيني وحطيت راسي على الجامه وصافنه على الطريق الي اختفت معالم بغداد منه وحل مكانها صحراء طريق عاام منشوف بس جوله على مد البصر
احنا بنهايه شهر ١٢ سنه ٢٠٠٢ الجو بارد كولش فتحت الجامه شويه اريد هوا اختنكت جنت من ابجي انفه عن نفسي ارتاح شوي ولان مخنوكه وما بجيت احس الهوا اختفه
نهر : امي سدي الجامه لتبردين
سليل : شويه ماما مخنوكه
نهر : براحتج يمه بس لا هوايه حتى ليتمرضن خواتج
سليل : صار
درت وجهي وغمضت واشتم هوا وتذكرت شريط حياتنا كله
شلون بابا تأذه من مرت ابوه وانحرم من ابسط حق وهو ان يتسجل بأسم امه الحقيقيه وشلون عذبته وشوفته الويل وحتى من الورث انحرم طلع ايد وره وايد كدام وفوك كل هذا زوجته وحده تعرف بيها متناسبه ودمرت حياته فوك ما هي مدمره
وبسبب سوايتها انحكمنا تكون امنا سندس
ام قاسيه همها ومهمومها الفلوس اعتقادها الفلوس كولشي بلدنيا وعدها استعداد ادوس على الكل في سبيل مصلحتها ومع الاسف اول ناس داستهم اني وخواتي وعافتنا بعز محنتنا وعافت بابا وتزوجت وتركتنا نتلطم بلدنيا وحدنا
بابا هسه عمره ٤٤ سنه حبيبي الشيب تارس راسه من الي شافه

انداريت على عمه نهر الي ماكو احن منها اخت بابا بس مااحسها اخته احسها امه وامي من حنية گلبها علينا حبت واحد ميسوه اضفرها عمو سامي وضحت بحياتها وبلدلال العايشه بيه وعاندت الكل وتزوجته وتحملت الفگر والقهر وصارت خدامه لاهله واله وجازاها اتزوج عليها والله شنو متخلف تكول عبالك بيدها هذا الشى وفوك كل هذا بدون رضاتها حتى ماكلف يبلغها سمعت من الي يتمنى اذيتها ولهذا اليوم تنوح عليه تالي الليل من القهر وكسرت النفس الصارت بيها
وتركته وخلصت حياتها بضيم جديد هو اني وخواتي اشتغلت وربت وسهرت وتعبت وشافت المر حتى بس نكبر بلوقت الي هذا واجب امي مو واجبها
عمرها هسه ٣٨ سنه رغم التعب والمشقه العاشتها بعدها حلووه وشكلها اصغر من عمرها بعدها جنها تفاحه فدوه لگلبها الحنينه

اخذت نفس وغمضت ورجعت اتخيل وحده وحده من خواتي
اولهن رشا الي هسه هي بلخامس اعدادي دخلت ادبي متحب المواد العلميه تموت على التاريخ والجغرافيه شلون تحبهن ماادري
رشاوي حلوه وكحه ومتقبل احد يلمس شعره منها
ودومها حذره ويه الكل مرات احس عقلها اكبر من عمرها وكدرت تواجهه ماما بقوه وترفض تخضع الها وتزوجها واحد على مرامها وكدرت تركعها على حلكها وتسكتها من اول يوم تركتها ماما سندس بيه رفضت بعد تعترف عدها ام مرات احسها هي الجبيره واحتمي بيها دومها على گلبي حتى لو متسولف هوايه بس اعرف بيها تموت عليه والها مساعد لا يعلى عليه بلمصايب والخطط الشريره وهي ريم

رجعت باوعت على ريم شون صافنه مثلي للجهه الثانيه واعرف بعقلها هسه دوامه افكار ريم هسه صارت بلثالث متوسط بكلوريا هي اكثر شخصيه بينا متمرده وصعبه يمكن ورثت وكاحه ماما وفضولها وصلافه عمه اشواق بس  الْحٍمَدٍ للـّہ ورثت طيبه بابا وحنيته يعني ريم شخصيه مركبه مشكل يالوز كولشي بيها وخاصه جرأتها وقوتها الي تفوقت حتى على رشا بلوكاحه
بس رغم لسانها وصلافتها بس گلبها طيب ودوم احنا بحياتها رقم واحد واكيد ويانه سحليه الي بمرور الايام كمت حتى اني اقتنع هو سحليه من كثر مساحلته وياها ليل نهار وميكدر يرفض الها طلب
بس الي صابها بلحادث من فزه وخله البهاق بيها صارت عدوانيه كولش يمكن مرات اعذرها لان محد يتقبل حالتها يمكن لو الكل تعامل وياها طبيعي مجان وصلت لهاي المواصل من اصفن احس ريم اكثر وحده متأذيه بينا وخاصه مكعد تكدر تجتاز الي صار وخلتها تكره الكل ماعدنا احنا
وشايله هم شلون راح تتعامل ويه الناس الي رايحين الهم الله يستر منج ياريم

شلت عيني من ريم وجهتها على اخر العنقود غزل الطفله الهادئه الي لليوم مااسمع حسها اله من اصيحها اكثر خواتي براءه وهدوء لدرجه عدها قابليه بلساعات تبقى هادئه وكاعده بنفس المكان متتحرك بس انطيها لعابتها
غزوله هسه رابع ابتدائي شاطره والكل يحبها بس السؤال الي يوجع قلبي دوم شنو هذا الي برگبتي ماما ليش اني مو مثلكم ومثل الجهال رگبتي ورجلي معقجه تشوف الجلد مالتها محترك وباقي اثر تسمي معقج مثل الملابس ودوم اكول الها من تكبرين يروح
وتبوسني وتسكت جنت اشوف بعينها الخوف لهذا تشمر روحها دوم لو بحضني لو بحضن عمه نهر الي اعتبرها امها من اول موعت وبدت تميزنا واني مره تصيح ثلل مثل خواتي ومرات تصيحلي ماما
ماانسى لحظه من جانت طفله والنار تاكل بيها وريحه لحمها لهسه بخشمي مرات احلم بلحادث واكعد احضنها وابجي وادعي من گلبي على الي جان السبب بكل الي صار

وصلنا للكوت واباوع بابا شون يوجهه السايق على الطريق
نهر : تندل طه
حجي طه : اندل المنطقه بس البيت بلضبط مااندله بس نوصل نسأل
نهر : ليش مو جنت تجي ويه ابويه الله يرحمه
حجي طه : اجي لبيت عمامي مو بيت اهل امي هو اصلاً جان ميزورهم ويجوز زايرهم ومماخذني وياه الله اعلم
سليل : وصلنا للمنطقه اباوع بيوت جبيره المنطقه زينه توقعت اشوفها صحراء وبيوت تعبانه مهدمه
وصلنا بس سألت بابا على بيت الحجي خضير  ومباشره دلونا
نهر : خالك مو
حجي طه : اي خالي خضير وخالي عبد الله شفتهم بفاتحة ابويه وسلمت عليهم
نهر : الله يستر

سليل : وصلنا الهم دكينا الباب اباوع بيت جبير وبيه حديقه كولش جبيره انفتحت الباب شاب طول بعرض يطلع بعمر سجاد اذا مو اكبر
تفضل
حجي طه : السلام عليكم
وعليكم السلام امر حجي
حجي طه : جاي اسأل عن الحجي خضير اذا موجود
وصلت بس منو حضرتك
حجي طه : كول اله طه ابن حجي حسين ابن عمه
ياهلا ياهلا بلي جاينا ياهله بأبن العم
انه ابن خضير الجبير طالب
اباوع بابا يسلم عليه احنا باقين بلسياره بس الجامه مفتوحه ونسمع گلشي
طالب : الاهل وياك تفضلو البيت بيتكم زارتنا البركه  لو ندري نفرش الحي گله ياس
حجي طه : رحمه الله والديك متقصر
سليل : نزلنا بهدوء وهذا الشاب خبص الدنيا صاح على ولد ينزلون الغراض بدونُ حتى ميفتهم المن جايين وبابا كال اله لتنزلون اي شى استغرب بس سكت
جان يأشر

طالب : حجي من رخصتك الخوات يرحن ليغاد للنسوان
حجي طه : اريد بناتي ويايه
طالب : حجي مايصير  النسوان يطلن على الزلم كلها داخل زلم وكرابتنا
سليل : اباوع عليه يحجي ويه بابا عين بعين بس ميباوع علينا ابد وخواتي عيونهن مثل المطيرجيه هنا وهنا يستكشفن المكان
حجي طه : ابو منو انت
طالب : ابو علي
حجي طه : الله يحفظه الك بويه ابوعلي اني اجيت على خالي خضير كم كلمة رهمت باقي مارهمت ماخذ بناتي ورايح
طالب : شنهي عمي اذكر الله تاخذ واجبك واجب الاهل وترتاحون والتريده يصير
نهر : طه خلي نروح وانت ادخل اتفاهم وياهم

حجي طه : مااريد اكعد هنه كلمتين صدكوني باقي ماصدكوني ماخذكم ورايح لغير مكان وكت ضيافه وهاي الشغلات
اسمع ابو علي روح لأبوك صيحه واني هنا منتظره
طالب : هاي بحكنا جبيره جان من بغداد وخطار علينا وماتريد تاخذ واجبك ولا ادش للدار
حجي طه : بيت العامر بأهله هنه گلمتين وبس

سليل : بقى يلح لحد مادخلونا كلنا لغرفه جبيره كولش بيها كعده عرب بلكاع ومفروشه ونظيفه وريحه البخور تعط منها
كعدنا ودخلو علينا اربع رياجيل اثنين كبار اكبر من بابا واثنين شباب وياهم هذا طالب حضنو ابويه وجان يعيط واحد منهم ويحجي بأعصاب
خويه طالب ليش مدخل النسوان هنا اول تالي
طالب : شعلان خويه ماصار شى
شعلان : شنهي ماصار  من ياوكت وحرمه تكعد بمجلسنا
خضير : وليدي شعلان مو وكتها
شعلان : عمي مايصير
عبدالله : وليدي اسكت
شعلان : لا اله اله الله بويه ماتصير شنهي ماضل حيه
حجي طه : حق ابني بس اني مااريد بناتي بعيد عن عيني هنه كم گٌٰـلمة اكولهن واذا صدكتوني كان بها ما صدكتوني اروح من وين ماجيت
خضير: وليدي طه اكعد ذني بنياتنا وابوك ابن عمنا يعني بنياتك من دمنا موش غريبات
شعلان : لا غريبات ومايصير يكعدن جارنا ويرحن يم النسوان
خضير : بسك عااد واسگت اكعد بويه طه شنهي ترجف وضعك موطبيعي
وانتم نادو على البيت يحضرون الاكل
سليل : اباوع على هذا الاسمه شعلان يبو نار صاير كاعد بلكاع والسبحه بيده ويرجف رجف جان تتقرب مني ريم وتهمس
ريم : اكولج ثلل هذا شبيهه المخبل شو يريد يشرب من دمنا

سليل : اششش اسكتي مو وكتها
الكل كعد وبدو يسألون عن صحه بابا واحواله
صاح خال بابا حضرو الغدا مباشره بابا كال
حجي طه : لا اريد اكل ولا جاي على اكل اني جاي دخيل عدكم
خضير : ابشر ياابن الغالي تأمر
حجي طه : لا يأمر عليك ظالم بس بالاول لازم تعرفون ليش
عبد الله : اخذ ضيافتك وارتاح وراهه التريده يصير
حجي طه : قبل كولشي لازم تعرفون ليش جاي وليش رايد تحموني
وبدا بابا يسولف واول شى كاله
حجي طه : اني ابن حسين ورازقيه
اباوع الوجوه انگلبت وهاي الجانت ترحب بينا تغيرت
خضير : شنهي تضحك علينا
حجي طه : لا استغفر الله خالي اسمع القصه واحكم
وبدا بابا يقص عليهم شلون انعام سجلته بأسمها مباشره وكفو على حيلهم كلهم

خضير : اكيد انت تخبلت رازقيه رضيعتي (اختي) توفت وليدها وياها
حجي طه : اعرف ماتصدكوني وحق بناتي الي هنه اعز من روحي مااكذب
شعلان : عندك مستمسك يثبت حجيك
حجي طه : كولشي ماعندي غير هاي اختي بنت ابويه تشهد ويايه
شعلان : خوش شاهد غير طابخيها سوه
طالب : اسكت شعلان خلي نفتهم
شعلان : شنفتهم واحد جاي وره ٤٤ سنه يكول انه ابن عمتكم الماتت وابوي مسجلني بأسم مرته شنهي هنود احنا خوش فلم هندي

خضير : اسمع بويه طه اكراماً لابوك راح اسكت واعديها تاخذ واجبك وتروح وتنسى گلشي گلته
حجي طه : مجاي اخذ واجب ولا اكل ردت حمايه الي ولبناتي واذا متردون تساعدوني ومتصدكوني اروح وماتشوفون وجهي طول العمر
سليل : بدا النقاش والعياط وهذا شعلان نار ويكمز كوه لازمي غزل خافت منه وختلت بحضني اختنكت حيل منهم واباوع رشا وريم وحده تباوع للثانيه وصارن بارود وريم تفرك بيدها من القلق والاعصاب
ورجع بابا يفهمهم بس الكل صوته عالي بدينا نخاف لان اشتد الصياح خفت ليأذون بابا حتى نسو وجودنا احنا البنات كاام هذا الي فتح الباب النه الي اسمه طالب شويه واجه  وجان تندفع الباب بعوجيه وطبت مره جبيره حيل بلعمر بال ٨٠ سنه كوه تمشي لابسه اسود والفوطه بريسم سوده وعليها دنبوس ذهب وريحتها عنبر ومسك تعط من عدها والي كاعدين كامو الها وكلها تصيح هله يمه شجابج
جابو كرسي وكعدوها

خضير : هاا حجيه كواج الله
الحجيه : يكويك الله وليدي ويحفظك شنهي حسكم ليغاد شصاير
شعلان : ليش جبت حبوبه
طالب : خلي تسمع هي هم طرف بلسالفه
سليل : باوعت على بابا غوركت عينه
نزل طالب يم رجل الحجيه الجبيره ويحجي وياها بهدوء
طالب : حجيه اجانه اليوم ابن حسين رجل بتج الله يرحمها رازقيه ويكول انه ابن رازقيه مو ابن ضرتها وماعنده شى يثبت هو ابن عمتي وانتي تعرفين هي توفت والطفل وياها
رفعت راسها الحجيه وتباوع على طه وتباوع على ولدها
وانتم شتكولون
خضير : يمه كلنا نعرف رضيعتي توفت وهي حبله بأخر شهرها والوليد مات وياها وصار دهر على السالفه وهسه جاي ابن حسين يكول انه ابن اختكم سالفه اطير العقل وانه ما مصدكه
الحجيه : وانت عبد شتكول
عبد الله : يمه انه من راي اخوي اختنا توفت وراحت لدار حقها ومالها وليد وكلنا نعرف هذا الشى
الحجيه : شنهي غايته حتى يجذب
شعلان : حبوبه يجوز يدور ورث شى عباله راح ننطي وگلنا نعرف ابوه سجل كل ورثه وحلاله لمرته وماحصل شى گال اروح اقشمر عليهم واخذلي چم فلس استفاد بروس الزواج

حجي طه : مجاي على ورث وتراب امي وابوي جاي بس رايد حمايه
خضير : من منو الحمايه
حجي طه : من ودنجت خجلان من مرت ابويه واخويه
شعلان : لا الدنيا خربت وعلي
الحجيه : اسكت شعيلان
شعلان : حبوبه ماتسمعين كلامه يطك الجبد جاي يحتمي من امه واخوه شنهي شافنه زواج ونصدكه شنهي سالفتك شمصخم وفلتت بعيالك واجيتنا

خضير : شبيك طه ساكت وصافن على الحجيه
حجي طه : اني ماادري حبوبتي عايشه كالو جانت مريضه وماسألت
طالب : حبوبه شتكولين انتي هذا ابن رازقيه
سليل : اباوع على ابويه الي ايده ترجف تكول كاعد بأمتحان الكل محد مصدكه ورجع يفهمهم ويعيد شصار وكل شويه واحد عايط من يمه وكلهم محد مصدكه وخله عمه نهر تشهد وتحجي وهمه كالو لان اخته اكيد تحاميله حتى الحجيه الجبيره جنها ممصدكه بس عيونها كل شويه على وحده من عدنا واكثر وحده جانت مركزه وياها غزل وبعد ساعه ونص من النقاش قرر بابا يطلع ويسلم امره لله وياخذنا ويطلع دنكوم وكومت غزل من حضني جان تأشر  الحجيه بلعوجيه على غزل
تعالي حبوبه ليه

سليل : غزل بطبيعتها خجوله كولش وجبانه بس تفاجأت من صاحتها مشت الها بدون خوف رغم جانت مرعوبه من عدهم ومن صوت العياط

الحجيه : تعالي حبوبه شسمج
غزل : اني غزل
الحجيه : شنهي
اسمي غزل
سليل : جان تحضنها وتبوسها وتشمها من گل گلبها وجان غزل تبادلها بلحضن استغربنا من تصرف غزل لان متتقبل غريب باوعت على الحجيه شو هاي دمعت عيونها
وجان تكول
جنج بنيتي رازقيه نفس عيونها ودورت وجهه وخوفها وفقاريتها
شعلان : شنهي حبوبه تشبهه لاتنسين عمتي هم تقرب لطه تصير بنت عمه لابوه
حجي طه : وامي رازقيه امي رضيتو وان مارضيتو صدكتو وان ماصدكتو رازقيه امي وارجع واكول وترابها وتراب ابوي مجذبت بحرف واني ابنها بس حظي الخلاني اتسجل بأسم انعام

الحجيه : اي انه گلبي مايجذب انت ابن رازقيه
خضير : شجرالج يمه
الحجيه : يمه انه مصدكته للوليد هذا ولد رازقيه ومتأكده
عبد الله : يمه هذا مو حجي شنو مصدكته جاينه واحد وره سنين يصيح انه ابن رازقيه تصدكي
الحجيه : اي اصدكه وگلكم تسكتون تعال وليدي واشرت بيدها نزل بابا باس ايدها وراسها وحضنها وهي حضنته حييل وتبجي دمعت عيني رفعت راسي واشوف هذا الي اسمه شعلان يفرك بلسبحه وصاير نار لو بيده يذبح بابا ويذبحنا

الحجيه : اسمعوني گلكم طه وعياله من اليوم يعيشون حالهم من حالكم والي يمس شعره منهم اغضب عليه ليوم الدين
شعلان : كله من وراك طالب ليش جبت حبوبه وبعياط وصوت عالي
الحجيه : وجعت امي وابويه اسكت ولك تعاند حبوبتك
شعلان : لا حبوبه السموحه منج واحب على راسج
الحجيه : جفيني شرك ولي ليغاد ولك عبد الله كض ولدك لا وتراب ابوك اطردها گلها وابقي بس طه
شعلان : هاك استلم بدينا
طالب : شعلان كافي
شعلان : بعدين حسابي وياك
خضير : كافي بسگم راح تمالخون جدامي
حجي طه : اني مااريد شى والقران والشده البيها اني كولشي مااريد منكم بس خلوني هنا بحمايتكم
عبد الله : ليش مارحت لولد عمك وعمومتك مو همه اولى بحمايتك
حجي طه : لان علي اخوي علاقته زينه بيهم واخاف يوكفون بجانبه
شعلان : غير نفتهم شمسوي من مصيبه وجان تختل عدنا
حجي طه : اني مجاي اختل خلي الكل يعرف اني هنا المهم تحت حمايتكم لان مااعرف لوين سلطتهم ويكدرون يأذون بناتي
طالب : حجي لو ابو منو بلخير
حجي طه : ابو حسام
طالب : ابو حسام خويه حبوبه حجت وامرت وامرها على الصغير والجبير هذا دارك وبيوتنا كلها مفتوحه الك وبناتك بنياتنا واختك اختنا التريده يجرالك بعد اذن ابويه وعمي
الحجيه : حت وان مارضو يطبهم عرج اسم يمه البيت كله ليك والتريده يجرالك
حجي طه : لا حبوبه اريدج سالمه كافي انتي من ريحه امي تسوه الدنيا اني عندي الي يكفيني والحمدلله اشوفلي بيت صغير هنا ايجار بين ماابيع بيتي الي بغداد واشتري هنا

الحجيه : يمه صخام بوجهي تكعد نزل عند الوادم واحنا بيوتنا وكياعينا تسد الشمس
طالب وليدي شوف دار مرتبه لابن عمتك داري يمه حطه بعيونك
طالب : صار حبوبه
شعلان : بعد ننطي كاع ورث امه هاي اذا هي امه
الحجيه : شعيلان ابن زهره تسكت لا وحق الزرته وحجيته ادوسن راسك برجلي
سليل : جان تضحك ريم وخزرتها حطت ايدها على حلكها ودنجت وهو انتبهه الها وركع الباب وطلع
يمه طليب اخذني تعبت وانتي تعاي وياي
سليل : طفرت من خوفي على غزل وين ماخذتها ابتسمت بوجهي وكالت بصوت تعب وهادئ

الحجيه : لا تخافين يمه هاي من ريحه الغالي ابن الغاليه هاي الله دزاها ليه بعد كسرت النفس والحسره وشلاع الگلب  يجبر خاطري بشوفه بنيتي بيها
سكتت ومحجيت واشرلي بابا عوفيها جنت استغرب من غزل الي لزمت الحجيه ومشت وياها وكأنها تعرفها من زمان
طلعت ومباشره كال خال بابا خضير

خضير : اسمع طه احنا راح نسمع كلام الحجيه لان تعبانه وصحتهه موزينه ومانريد انتعبها تبقى هنا اكرام لابوك ونشوف بعدين سالفه امك
حجي طه : مااريد شى بس أجر بيت هنا واخذ بناتي بحضني وتحت حمايتكم اخاف يصير شى
عبد الله : لا تتوقع بيوم نطيك فلس رازقيه مالها ورث اخاف بالك
حجي طه : بيش احلف الكم مااريد فلس منكم كولشي مااريد وروح ابويه
خضير : سد الموضوع وتعال ويايه للمضيف نشوف الوادم تأخرنا عليهم بين ما الولد يحضرون البيت الراح تكعدون بيه
عبد الله : خلي يحضرون بيت ابوصابر مو طلع منكم
خضير : خوش فكره اسمع طه عدنا وره البيت بلحديقه غرفتين وملحقاتهم جانت لفلاح عدنا راح نرتبها الكم واكعدوها بيها
حجي طه : يعني بنفس هذا البيت
خضير : اي عندك اعتراض
حجي طه : لا بلعكس أمن
سليل : اخذو بابا وياهم واباوع لعمه نهر الساكته وترجف حسيت بخوفها من الموقف كله واشرولنا نطلع وندخل من الباب الثانيه واخذتنا عمه نهر وتوجهنا للمكان الكالو عليه وطبينا ونشوف جوق موسيقي نسوان على جهال مو بيت تكول مدرسه
اجت وحده مبينه حبابه
هله خيه تفضلي زارتنا البركه وتبوس بعمه نهر وبينا وكعدتنا
اني رازقيه بنت خضير
سليل : اسمج على اسم بيبي
رازقيه : يابيبي
نهر : قصدها على اسم عمتج
رازقيه : اي حبوبه سمتني
سليل : وبدت تعرفنا على العائله وكل وحده وجهالها واحنا بس نأشر براسنا ولا اسم حفظنا بس مبينين ناس طيبه ولو مينعرفون اله بلعشره
ريم : اكولج ثلل ذني شكد مخلفات شنو بزازين
سليل : غير تسكت
رشا .. وهلمره لابسات اشكال الدشاديش وشنو هاي الالوان تكول اشاره مرور مو مثلهن
سليل : باع الثانيه
ريم : الله عليج رشا ذيج الكاعده وگالبه وجهه مو جنهه بيبي نعاال
رشا .. لا ولج بيبي انعال احلى هاي جنها ابوبريص مركوع بلنعال وذيله طاير ودايسته سياره
ريم : داسته السياره قبل النعال لو بعده
سليل : تسكتن لو النعال اكطعه على راسجن اششش عيب

ريم : اووو ثلل كاتمه على انفاسنا والله بابا جابنه بيت متكدرين تسكتين من الاشكال العجيبه الي كدامنا يعني همه يجبروج تحجين عليهم
نهر : بنات كافي تتبسبسون عيب
سليل : راح اركع راس براس
رازقيه : هااا حبيبه محتاجات شى
سليل : لا تسلمين مقصرتو
رازقيه : حبوبه موصيه بيجن زايد
سليل : عفيه بس شوفي اختي الصغيره وينها
رازقيه : قصدج غزاله
سليل : غزل اسمها
رازقيه : غزاله احلى
ريم : اكولج عفيه اريد اروح حمام
رازقيه : يااا تعالي حبيبه
سليل : لتتأخرين
ريم : هووو بيدي
سليل : اوووف منج

نهر : گلبي ممرتاحً لو باقين بغداد مو احسن
سليل : اني هم اكول هيج بس بعد اجينا
نهر : ذوله حياتهم غير حياتنا واخاف نتأذه اكثر من قبل
سليل : شنشوف بعد اكثر من الي شفناه شيصير خلي يصير المهم انتي وبابا ويانه
بقينا كم ساعه كاعدين ساكتين وريم ورشا وحده لازمه الثانيه الكل تباوع علينا تكول معرض لو تلفزيون ويتفرجون عليه بعد ٣ ساعات انتظار اخذونا للبيت المفروض نكعد بيه طبينه نظيف مبين مغسول بس بعده بارد رغم فارشي وجان الجو شتا ولان منطقه كلها زرع احس الهوا ابرد من بغداد
طببنا ملابسنا وغراضنا بس گلبي ماكلني على غزل ليش لهسه مأجت شويه واسمع واحد يكول ياالله ويصفك بيده ويصيح ابو حسام
عرفته من صوته طالب
حطيت الربطه على راسي وطلعت
بس شافني دنج
العفو اختي هاي اختج الصغيره حبوبه امرت اسلمها بيدي الكم
سليل : حضنت غزل من خوفي وكتلها بيج شى
جان مباشره يكول وهو مدنج
طالب : لتخافين مراح ناكلها بس حبوبتي حبتها وصارت روحها بيها مايحتاج هيج ترجفين
سليل : استحيت منه وكتله لا مو قصدي بس اعرف بيها تخاف لهذا اسألها
طالب : الامانه وصلت محتاجين شى
سليل : سلامتك شكرا
رفع راسه باوع بنظره خاطفه ودنج وكال الشكر لله وراح اخذت غزل وطبيت وسديت الباب ودنجت عليها هااا غزوله شون تعوفيني وترحين
غزل : ماما حلوه بيبي وحبابه انطتني حلاوه وتبوس بيه ومشطت شعري شوف بس عوجه
ريم : والله بيها بله الحجيه هي كوه تمشي وشافتج ومشطت الج عجايز تالي وكت
سليل : ريم عيب لتنسين هي بيبيتنا
ريم : والله اني اعرف بيبي وحده ربتلي عله بگلبي واكوم واكعد ادعي عليها مامستعده اتعرف على بيبي ثانيه وتطلع شرشبيل لو فيغا الكبير كافي علينا مصيبه وحده كرهت كولشي اسمه بيبي
رشا .. بس تره مبينه حبابه
ريم : حبابه بحلكج ياحبابه مشفت شلون عاطت بهذا المشعول
رشا .. ولج يامشعول
ريم : هذا الاسمه شعلان جنه بريمز ومشتعل وبس يكمز شكد مكروه
رشا .. اي والله اني هم محبيته عصبي وشايف نفسه شوفه
سليل : بعدنا بسم الله اول يوم وصنفتن العاالم اتصنف
نهر : اني راح اتمدد بس يجي ابوكم كعدوني اخاف انام
سليل : ماما بيج شى
نهر : لا بنتي مابيه لتخافين
شويه وانفتحت الباب ودخل بابا ركضنا بحضنه المكان غريب علينا والوضع كله متوتر جنا نريد انحس بالامان كعدنا كلنا داير مدايره وكاال

حجي طه : اسمعو بنات من اليوم راح تتغير حياتنا مااريد مشاكل ولا قال فلان ولا علان فتره نبقى ونطلع منا بس ينباع بيتنا الي بغداد واشتري بيت ونكعد ونستقر لتعاندون احد والاحسن متحتكون بيهم مالكم اي دخل بيهم
نهر : اكو شى موزين تأخرت يمهم
حجي طه : بس الحجي نعاد كم عمام خوالي وبقو ساكتين وكالو باجر يدزون على عمي حسن ولده ويصير الحجي كدامهم
نهر : شدعيلج يلي بگلبي اااخ لو ما اخاف الله تبقى امي
حجي طه : على كيفج يلغاليه هذا قدرنا والحمدلله على كل حاال
نهر : جوعان
حجي طه : لا اكلت وياهم حلفو اله اكل شلونه البيت زين
سليل : زين مرتب غرفه وصاله ومطبخ جبير وحمام يعني كافي النا
حجي طه : اني راح انام بلهول وانتم بلغرفه شفتوها تكفيكم
نهر : كافيه وجبيره وكلها فراش ونظيفه
حجي طه : كومي نومي البنات تعبتو اليوم
شبيج ريم ليش صافنه عليه
ريم : بابا هم يجي يوم ونرتاح
حجي طه : جريت نفس قوي وبحسره الله كريم باباتي كولي ياالله وان شاء الله خير

سليل : دخلنا كل وحده فرشت فراش الها وقبلها فرشت لبابا واخذت غزل بحضني ونامت بقيت مكدرت انام وكل مااغمض تجي صورته بوجهي ياترى هسه شكعد يسوي نام كعد اكل طلع يفكر بيه زعلان فرحان نزلت دمعتي بعد يوم طويل ومتعب واكول هم يجي يوم واشوفك

مر اسبوع واحنا على حالنا المسواك يجي للباب رغم اكثر من مره بابا ميقبل بس كلمتهم وحده مو من عدنا من حبوبه
مبين الحجيه الكل يريد خاطرها ويحبوها
ناخذ المسواك نطبخ وانظف ونكعد بس ماما نهر شرطت على البنات لازم يقرون حتى السنه متروح منهم بين متوصل اوراق النقل مالتهم
وبيوم كاعده اسوي زلاطه وقت غدا واسمع صوت ريم عالي طلعت اركض بس جريت الربطه

ريم : اختنكت ممتعلمه انحبس بين اربع حياطين جنت كولش حابه اكعد بلحديقه غافلت سليل وعمه الي دوم يكولون لطلعين حطيت ربطه هيج كلاوات على راسي رغم ممحجبه بس شسوي تعليمات بابا وبديت افتر بلحديقه جنت لابسه بجامه عمه مخيطتها اليه شتائيه واشم بلورد نزعت نعالي وامشي حافيه بلحشيش رغم بارده بس اكو شمس واباوع للاشجار حديقتهم تجنن جبيره حيل ومدنجه وحاطه خشمي كله بورده تكول شويه واكلها هلكد مطيبه ريحتها وجان اسمع واحد يكول بصوت عالي خشن هاي شسوين هنا فزيت فزه ردت اوكع على وجهي من الخرعه لا ارادياً من طلعت گٌٰـلمة وجع صوتك عالي وجان اشوف مشعول الصفحه شعيلان وعيونه براسه مباشره رجعت ليوره دست على الزرعه ولا حسيت بيها شوك من خرعتي

شعلان : شسوين هنا
ريم : هااا مااسوي
شعلان : محد كلج ميصير اطلعين هيج
ريم : اباوع هذا يعيط واني اموت من واحد يعلي صوته عليه جان اكول اله وليش تعيط هااا
شعلان : واكسر راسج هم شنو مالج صداد ورداد شلون ابوج يقبل اطلعين هيج وفوكاها طالع شعرج
ريم : باوعت طالعه كم شعره جان اكوله مو تايهه الك وتكسر راسي وانت منو وتتحكم بيه واني ممسويه شى غلط بلحديقه ومطالعه بره
شعلان : ماعدنا وحده تطلع هيج وطول ماانتي هنا بيتنا مسؤوله من عدنا
ريم : واني شسويت
شعلان : شوفي شلابسه وتكمزين مستحيتي مخفتي ولد غريب يشوفج شنو هاي الخفيه الي انتي بيها معلموج الستر واجب موعيب وين الحيه وين المخافه من الله
ريم : اباوع على هدومي بجامه عريضه وكولشي مطالع منها جان يعلى صوتي اكثر وكتله ليش احد كال الك لابسه بدله ركص واهز بلحديقه ومااخاف من الله شنو هاي الهمجيه الي انت بيها ومااحس غير راشدي ينزل على خدي من الخرعه وكعت ليوره بلكاع وجان مباشره اشوف سليل تعيط ودفعت شعلان

سليل : انت منو سمحلك تمد ايدك على اختي
شعلان : وادوسها بلقندره اذا عله صوتهه بعد وتجاوزت لا عبالجن انتن بغداد واديحن براحتجن ومالجن احد يكسر راسجن
سليل : جرب بعد مد ايدك وشوف وداعت بابا اخليك عبره لكل واحد يفكر يلزم شعره من عدنا
رادت يتقدم يمد ايده وجان يلزمه طالب ودفعه
طالب : شبيك يول تخبلت
شعلان : شوف ذني الدافع عنهن شلون جسرات
طالب : يتجاسرن الهن اب ينحجي ويااه مو تمد ايدك عليهن مامقبوله منك واصلاً مااسمحلك ومره ثانيه اني اوكف بوجهك وتصير موزينه
شعلان : ولك طالب شجاك متشوف حركاتهن وسوالفهن
طالب : اتقي الله عدنا خوات وعرض البنات صار اسبوع صوتهن مطالع شلك بهذا الحجي

سليل : عدنا اب وهو يعرف يرد عليك كومي ريم
كامت ونفضت ملابسها جان تباوع عليه بدون متنزل دمعه منها دخلت للبيت وبعدنا نحجي وجان اشوفها طلعت لابسه عبايه ماما نهر وركضت وراها
ولج ريم وين رايحه انتبهت بلدشداشه والربطه اخاف يحجون وركضو الولد وراها وجان اطب البيت الجبير وركعت الباب حيل وطبت للحجيه

وترجف وتحجي
ريم : يكولون عنج بيبيتنا والكل يعرفج عادله وماعندج تفرقه والكل يحبوج
طالب : تعالي اختي اطلعي حبوبه تعبانه مو وكتها اني اخذلج حقج
ريم : مااطلع اليوم ماانام اذا مااخذ حقي
شعلان : مبين جلدج يحكج
جان اندار عليه وحق الحق اله اندمك
الحجيه : شبيج حبوبه
ريم : ابن ابنج ضربني واني ممسويه شى جنت بلحديقه ولابسه ربطه على راسي يعني لا طالعه بلشارع ولا مسويه شى حرام وغلط وهذا لبسي
ونزعت الجبهه دنج طالب وشعلان صارت عيونه براسه
مطالع اي شى وعريض يجوز انتم لبسكم يختلف هذا مو ذنبي بس ذنبكم تحاسبون على شى منعرفه اني طلعت بس اشتم الهوا وانضربت بيتج وماخله قدر وشان لا الج ولا لبابا تاخذين حقي لو لا

حبوبه : شنهي يمصخم شعيلان مديت ايدك عليها
شعلان : حبوبه تتمركص بلحديقه وتجاوزت وعلت صوتها مو زين مادفنتها بمكانها
ريم : ماعاش ولا كان الي يلزم شعره من بنات طه وحبوبتك كالت الي يلمس شعره من عدنا عقابه جبير واليوم انضربت وانهانيت على شى ممسويته واريد كلمتج وعدج النا حتى اذا متاخذين حقي اغسل ايدي واكول لبابا الي كعدنا دخيل عدهم مصانو الامانه رفعت راسها الحجيه وبعصبيه كالت

الحجيه : شعلان تطلع من البيت ويحرم عليك دخوله
طالب : حجيه اذكري الله هذا حبيب گلبج مصار شى وهسه هو يعتذر منها ساعه شيطان
الحجيه : الي يكسر كلمتي ماله مكان لابيتي ولا بگلبي يلا ولي مااريد اشوف وجهك لحد مااموت
شعلان : حبوبه دخيلج تبيعيني علمود هاي
البكعه
ريم : شكد ضربته أذتني بس كلمة البكعه كسرت روحي ردت ابجي من القهر بس قاومت مردت يتشفى بيه
الحجيه : اسكت وانت طليب تاخذ وتبلغ ابوك وعمك شعلان مايدخل بيتي ولا يحظر جنازتي طول ما كسر كلمتي وماخله حرمه لخطاري ولو همه راعين البيت موش خطار بس ماطول تعدى على وحده من البنيات معناها تعدى عليه
طالب : امشي شعلان اطلع

شعلان : ولك شطلع تسمع كلام حبوبه
ريم : باوعت عليه ورافعه راسي بنصر واني اشوف شون يتوسل بيها حتى بس ترضى عليه مبين كولش يحبوها جان ادفعه بعكازتها ودارت وجهه عنه وعاطت ولي مني مااريد اشوفك وكامت تكح باوع طالب على الحجيه وكال امشي يمعود لتتخربط ويصير بيها شى من وراك واخذه طالب وطلع انداريت شفت سليل ورايه واكفه وساكته
جان تأشر الحجيه عليه تعاال ليه واشرت بصفي يعني اكعدي كعدت وجان تكول

الحجيه : اسمعي يلذيبه اعرف انتي وكحه ولسان واعرف الي يدوس على طرف منج تاكلي بسنانج واليوم خليتيني اطرد ولد ابني ومايرفلي جفن بس لا تتمردين اذا اليوم انتي ذيبه باجر يسلط عليج الذيب الاقوى منج
ريم : شنو يعني
الحجيه : يعني اخذي حقج مربع بس انطي حق غيرج انتي هم غلطانه بس اني ماكسرت بيج تكدرين تجفين الشر وادخلين بدون متراددين
ريم : والله بيبي ممسويه شى هو من الاول عيط
الحجيه : كالي ابوج ريم غزاله البراري شرسه وتاخذ حقها اوصيج وبعدج حديثه ميلي يبنيتي مو گلشي بلصوت العالي والمرادد
ميلي ويه الريح صيري گصب الاهوار ويه الريح وكت الشده تميل وكت الراحه قويه  مايكسرها احد
لا تصيرين ذيب ياكل وينهش بلكل ربج يسلط بنيتي
وانتي يحليوه يلعيونج كلهن حزن

سليل : باوعت عليه بيبي
الحجيه : اويلي عليج يرازقيه حتى خلفه ولدج مشلوع گلبها مثلج
كومي بنيتي وشربيها مي وشكر حتى لا يطلع شى بوجهه شو وريني
مديت ايدي وشافت البهاق وباوعت على سليل وكالت
كومي اخذيها وسمي بلرحمن دمج لهسه محروك وشربيها مثل ما كتلج
سليل : كومتها وحضنتها وطلعنا شفت رشا بلباب لازمه كلاص جبير وحاضنته وتضحك
شبيج رشاا

رشا .. مو اختي التنضرب ومااخذ حقها
سليل : صخام بوجهج شسويتي انتي مكافي هاي الخبله خلت الولد ينطرد من البيت
رشا .. وداعتج من شفته ضربها وانتي طلعتي حميت قوري الجاي خليته يفور كلت اشمره بوجهه بس ركضت ريم خلتني اوكف وبقى يفور لحد محترك جد جده للجاي وصار تيزاب وشفت مشعول الصفحه على كولتها طلع يدردم وغلط على بابا متحملت ترست الكوب وسويت نفسي اشرب جاي وعثرت يمه وشمرته على زره ولجن انصلخ صلخ ههههههه
ريم : ههههههه هله بأختي السبعه
سليل : والقران خواتي عصابه ولجن كبرتن وماتبتن وشسوه
رشا .. كام يكمز ويعيط لو ما العيب اله يبجي اني سويت نفسي ماادري وسحبه طالب وطلع اكص ايدي اذا نام اليوم
نهر : شصار
سليل : بعد وكت ماما ريا وسكينه اليوم دفنن اول ضحايا الكوت الله يستر شراح يسون بلعالم

يتبع ....