رواية ابي والغزلان الفصل 100 - بقلم ريام هادي

ابي والغزلان الجزء الثاني
للكاتبة Reem
البارت الخمسون

(بارت طويل لعيونكم 🌹)

احسك لغز شنهو انته وشنو اوصافك
ولاغيرك نبع بالشوك يرويني
توصيني اعله ياذمه توصيني
حياتي انته ونبض يسري بشرايني
ولونك مو دمع ماضمتك عيني
لونك مو كحل ماشالتك عيني
يلوموني واحسك تكبر بروحي ويلوموني
ونه بلا شوفتك شينفعن اعيوني
يشوفي ورجوتي ودنياتي ولوني
وعذابي وبسمتي وشكواي وضنوني
يخيعونك عليه وبيك خيعوني

نوريه : انتي شارطه على حسين تقبلين بيه  اله نجي نخطبج واني اليوم اجيت بنفسي اخطبج اله
ريم : من الصدمه وكعت رجلي
بلحظتها فصلت اريد اركز هاي شحجت
نهر : شعجب
نوريه : شنو شعجب
نهر : اني وانتي والدنيا كلها تدري مستحيل تجون تخطبون ريم لحسين شنو الصار وغير رايكم
نوريه : من هسه نتفق ابوه ميجي يخطب علي كال لو السما تنزل على الكاع مااروح واخطب بت طه
ريم : باوعت عليها وكلت بنتره شبيهه بت طه
جان تكرصني عمه من رجلي لان كاعده بصفي
نوريه : تعرفين بينا منريدج لحسين
ريم : لعد المن جايه
نوريه : غير ورم گلبي ومشاكله متخلص اني لو جار عدل وممسوي مشاكل من كل عقلج اجي واخطبج
نهر : لتنسين نفسج نوريه تره انتي بيتنا جاي تخطبين لو تتجاوزين
ريم : مبين حيل ساحلكم لهذا اجيتي تخطبين
نوريه : عيب هاي الكلمة ويلومني ليش مااريدج لابني كافي اسلوبج السوقي وهمجيتج وفوكاها ارمله وعندج ولد ااااخ كله منك
ريم : هاي الي اسلوبها سوقي والارمله مادخلت عند ساحرين وسوت سحر واذت احد ولاطلبت من بتها تطعن بشرف بت عمها السوقيه الكدامج تعرف الله وممأذيه احد ولا شايله خطيته
نوريه : شنو قصدج اني مسويه سحر الج
ريم : لا امي سوت وراحت
نهر : كاافي ريم
نوريه : اوكفي انتي نهر خلي اشوف هاي المتربت شلون تتهمني هيج اتهام
ريم : اني تربيت احسن تربيه مااسمحلج تتجاوزين جان نسمع عمه تكول

تعال يمه حسين اخذ امك جاي تخطب لو تتجاوز
ريم : صارت عيونا اني ونوريه على عمه لازمه الموبايل  وتحجي اتصلت بحسين وجان تنطي الموبايل لنوريه الظاهر هو كال الها انطيني امي راحت مسافه عنا واشوفها تلوب والوجهه احتقن ومبينه عصبيه حيل بس ماادري شديكول الها حسين حسيتها ترجف
جان تجر راسي عمه وتشاورني
نهر : شويه لسانج
ريم : هوً اني متشوفيها شلون شايله خشمها وتحجي بعنتكه تكول بت الباشا وجاي تخطب الخدامه

نهر : ميخالف اسكتي وخلي نفهم شكوو وبعدين احجي اني لهسه ممصدكه نوريه هنا وتخطبج شويه ضبي لسانج خلي نفهم الموضوع واياج تجاوبيها
ريم : لو اعرف شسوه حسين وخله امه تجي وينك سحليه اله اسحلك واجيبك وافهم شصاير من ورايه
نهر : اششش اجت
نوريه : سمعي نهر اني اجيت حسب الاصول اخطب بت اخوج لابني فكرو وانطونا خبر

نهر : اكول لطه وان شاء الله خير وعلي شيكول
نوريه : علي ميجي يخطب وانتم بعد بكيفكم
نهر : كافي انتي امه واجيتي وجيتج غاليه واحنا اهل مو غربه وتبقى بت عمه وهاي الشكليات متهمنا بس هم لازم ابلغ طه
ريم : داحجي جان عمه تكرصني ااخ مو خطبه شبعت طن تكرص ساعه الكشره

كامت نوريه ومحجت اي شى بعد وطلعت عمه وياها ردت اكوم جان تدفعني عمه وبقتني كاعده وتخزر بيه تكول بايكه البنك المركزي بقيت انتظر عمه ومدري شيسولفن بره هسه مجان حجن هنا كدامي دخلت عمه وره ربع ساعه طبت ركضت عليها ليش مخليتيني احجي
نهر : قصدج ليش مخليتج تتعاركين
ريم : مشفتي شلون تحجي بخشم يابس بت السطل
نهر : عيب ريم راح تصير عمتج ام رجلج
جان تنزل رشا منو هاي عمتج ولج راح تصير
ريم : أقبض من دبش بعد وكت جان من حبلت اجيتي
رشا : لج جنت اقرا قصه شبعت بجي بيها البطل مات بالاخير وعيوني هسه كوه اشوف بيهن
ريم : هااي لو ابيس بيها هسه واشرها على الحبل احد يلومني احنا هنا معارك طاحنه وهي حايره بلقصص
رشا : شصاير

ريم : لا حياتي سلامتج مصاير شى بس نوريه اجت تخطبني لحسين
رشا : كمزت لا بربج نوريه جان هنا هسه
ريم : لا خطبتني عبر الاقمار الصناعيه
رشا : بطلي تصنيف
نهر : اي يمه اجت ورادت هاي الخبله تتعارك

ريم : خو انتي شبعتيني تكرص اريد احجي ماكو
نهر : من لسانج الطويل اني ممصدكه اجت وهي تريد تهد عليها
رشا : وشكلتو الها شنو جوابك
ريم : هو اني كدرت احجي كله من وره عمه
رشا : عرس حسون هيل وطش بلولايه كللللووووش
ريم : مو هسه جنتي تبجين ام القصص
رشا : هي هاي الدنيه ولج عوفج من القصص راح تتزوجين حسوني وكمت اهز جتف
ريم : ومنو يكول اوافق
رشا : حتى اعدمج بأقرب تيل كهرباء
نهر : شنو هذا الحجي
ريم : مشفتيها شلون تكول علي ميجي يخطبني
نهر : كلنا نعرف ميجي حتى انتي من حطيتي الشرط تعرفين بيه ميجي وحتى نوريه كلت لو تموت متسويها وتجي شلون هسه جانت گبالنه وطلبتج لحسين ماادري
رشا : اكيد لازمهن من ايدهن التوجعهن مال يجن محبه بحسين مااقتنع
ريم : لو يجي علي يخطب لو مااقبل
رشا : باع هاي ام الوصخ كامت تبيع ثكل لج بابا حطي عقلج براسج وبله عناد

لازمه تلفوني دكيت على سليل
تعاي اختنا الجبيره عقلي اختج الخبله الصغيره
سليل : شصار هم تعاركتن
رشا : ياريت جان هينه نوريه جانت هنا وخطبت ريم لحسين
سليل : جان بيدي كاسه مال مركه وكعت من ايدي وزلكت
رشا : هاااا طار الشر طار
سليل : ناصبات عليه لو شنو
رشا : تعالي حليها وفوكاها متقبل
سليل : اجيت ركض

دنكت شلت الكزاز سريع ومسحت شلون مجان مو وكت تنظيف وجريت زيون وكيان ولبست الجبه بلكراج وركض لبيت اهلي واسحل بيهم اول مدخلت اهلهل واكمز وزيون يصفك ميعرف شكوو
ريم :  الْحٍمَدٍ للـّہ هاي العاقله الجبيره عود
رشا : گابليني گابليني كلللوووش
ريم :  الْحٍمَدٍ للـّہ على نعمه العقل

سليل : كعدت فحطانه ولجن انطني مي خرب اجيت ركض
رشا : وببسي هم اذا تردين
سليل : اذا مجرش جيبيلي بداعت فروحه
ريم : بعد تردون اكل اني وين وانتن وين
سليل : تره ميرادلها روحه للقاضي كولي وافقت وانجبي
ريم : شلون اوافق وعلي مجاي يخطبني
طلعت عمه نهر من المطبخ باست الجهال وحطت كيان بحضنها وكعدت كبالنا وكالت تعرفين ميجي شلج بلمشاكل بعد
رشا : هاااج سلول احلى قوطيه مجرشه وبطل مي
ريم : فد لفه كص وياج احرك روحي ولجن ركزت ويايه
سليل : وجع بس تجوعرين هي وحده اثنين تلاثه مالها رابع
ريم : شنو بله يافيثاغورس
سليل : يقرون الفاتحه ويعقد محكمه وتزوجين وعاشو عيشه سعيده

ريم : افهموني عفيه اني خايفه
رشا : لا لا لا سجل ياتاريخ ريم خايفه
ريم : ليش تحسسوني المر بيه هين منهم والي شفته عادي وبسهوله انساه ذوله علي ونوريه وانعام وراح اعيش بنصهم يعني راح اعيش بنص الموت
سليل : اني اكلج راح تعيشين مثل الببجي
رشا : هلوو سلول تلعب ببجي
سليل : هو اني مال لعب الجهال يوميه لاعبين خوش بيه بس هذا عمجن ورجل غزل واخوه وياهم صديقهم دوم يلعبون وصوت وعياط ذاك اليوم عابد حماها لغزل مدخل بنيه واني تخبلت وغزل هم وتعاركنا وياهم واثنينهم من الخوف طلعوها
نهر :شنو صغير ويلعب والله عيب على شيباته
رشا : الي يسمعج عمو عمره ٧٠ سنه كل عمره ٤٦ اربعيني صاك اصلاً مرغوب هسه اكثر من الشاب اسأليني اني من وره القصص كامن يدورن على الاربعيني دواره
سليل : صخام بوجهج سليل على اساس اني ناقصه غيره الله يبشرج بلخير
ريم : اي عوفني وحيرن بعمو سجاد

سليل : خصم الكلام ياام تيم انتي رايحه لبوشنكي يا كاتل يامكتول
ريم : هاكم الجبيره جبتها حتى اطمني تالي زيدت خوفي
نهر : يمه شتردين انتي اذا متردين حسين لتحيرين روحج وتشلعين گلبه اني لهسه دايخه اريد افهم شلون قنعها واكيد جايه بموافقة علي متسوي شى من وراه وهذا زواج مينضم يعني حسين مسوي مصايب حتى بس يتزوجج اذا متردي كولي كافي شلع الگلب الولد تمرمر
ريم : ليش عمه واني مترمرت

نهر : انتي ويااه واعرف بوضعج وضيمج بس لتنسين هو متزوج ولا عنده جهال يعيش لخاطرهم يوميه طلابه بيت اهله من وره هذا الموضوع ومقبل يتزوج تالي سافر ورجع علمودج رد راح للموت وهم رجع علمودج وقبل كلشي يسوي بس حتى تصيرين اله وهسه منعرف شسوه وخله نوريه تجي هم حطي ذني بين عيوونج

سليل : عوفنا من الشقه ريمو هاي اخر فرصه مااعتقد تتكرر لان اكيد هسه من اجت نوريه كالت اله مره وحده اخطبها الك ومااعيدها يعني اذا رفضتي معناها تودعين حسين للابد مو بعيده بعد شهر نلكاه متزوج ومتحقي لان سوه المستحيل وانتي موكفتي ويااه
ريم : ليش نسيتو الي سواه
سليل : كاافي انسي لخاطر ربج الصار راح من سنين من ٢٠١٠ ولهذا اليوم صار ٨ سنوات شيصير وتذكرتي السواه
لتصيرين ظالمه انتي تعرفين المظلوم شيحس ومجربه هذا الشعور لتعيشي لغيرج تنازل عنج جان صغير وهم متوقع راح يقنع اهله ويجيبهم وانتي تزوجتي وعشتي حياتج والله مرادلج تكملين
رشا : والله نفسه بيج ينوح مثل النسوان عليج اول ايام زواجج غير احنا مجنا نحجيلج
سليل : وراها وكف بوجهه اهله واكثر من موقف وكعتي وكف بجانبج واليوم ثبتلج هو رجال وكد كلمته ودز امه كافي تفكرين بشغلات انتهت

نهر : يمه احنا منضغط عليج هاي حياتج وخلي هم نشوف ابوج شيكول
رشا : خلي اخابر غزوله دكيت عليها جاوبت وكتلها
غزل : فتحي سبيكر خلي تسمعني
رشا : فتحت احجي
غزل : ريمووو اذا تردين تنتقمين منهم وتردين السوه بيج وبضربه اقوى اخذي اهم شى عدهم وهو حسين هاي الضربه القاضيه راح تخلي نوريه وانعام ونورس وحتى جنات يموتون بدمهم والله بذاك الوكت لو ذابحتهن ولا متزوجه حسين تسوه عمرهن من تصيرين مرته وهااا اشرطي بيت وحدج حتى يموتن بلزايد من تفلس نوريه من ابنها وكل الوكت وياج شراح يصير بيها وخلي كلمن أذاج وطعنج وطعن رشا يعيشون نص الي عشناه بقهر وتفكير واذا يردن يسون شى متإكده حسين كدها وراح يوكف وياج وانتي هم سباعيه وتعرفين شلون تقهريهن بلزايد تعرفين شنو ريم بت طه اخذت المدلل مال انعام وعلي ونوريه وحيدهم اووويلي ضربه محمد علي كلاي القاضيه

ريم : باوعت على عمه نهر وكتلها وتكولين عليه وكحه والله اني افقر وحده بيهن شفتو الصغيره تفكيرها مال ابالسه
نهر : ولا وحده بيجن فقيره كلجن ماخذات من امجن بس على نسب متفاوته
غزل : لا ماماتي اني افقر وحده وكيوت والله
ريم : عوجت حلكها ام الكيوت
غزل : اروح اكمل شر ملابس اخاف يجي عمار مضل وكت بالي ريمووو مبروك حياتي

ريم : هزيت ايدي عبالك وافقت جان شعور بداخلي متضارب لحظات اكول ارفض واذل نوريه وبهيج حاله رديت الاهانه والاذيه الي شفتها على ايدها ولحظات اكول وحسين معناها اتركه للابد واني لهسه گلبي ينبض بحبه مجرد صار شهر مشايفته احس متيهه الاول والتالي

بقينا نسولف وحده تجر طول والثانيه عرض لحد مدك عمو على سليل وراحت تركض بقيت بحيره والتفكير وكف عقلي لحد مصار الليل واجه بابا حتى منزلت اتعشى وياهم مالي نفس ابد تعشو وكملو وصاحني بابا نزلت واني متردده مثل الطفله الي سوت مكسوره ومنتظره عقاب ابوها دكيت الباب وطبيت لكيت بابا فارش السجاده ومنتجي ظهره على الكنتور ويسبح اشرلي بأيده
حجي طه : تعاالي اكعدي بصفي
كعدت بصفه بلعت ريك ومتوتره
حجي طه : شلونها غزال البراري
ريم : حايره ومتأذيه وخايفه
حجي طه : الله لايحير عبد مسلم شبيج بنتي
ريم : اكيد عمه كالت الك علمود حسين
حجي طه : واني صحتج علمود هذا الشى
ريم : انت شتكول بابا

حجي طه : من يوم مارجعت من السجن وجنت صغيره واجهتي ابوج وماخفتي كلت هاي سباعيه متخاف مرات اشوف مشاكل خواتج يوكعن بيها شلون توكفين وياهن وتتعاركين وتواجهين ومينهز بيج شعره مره صفنت عليج حسيتج اخوهن مو اختهن تصوري كلت بداخلي اني خلفت ولد واحد وماشفت خيره بس انطاني ريم هي ابني
هي التوكف ويه خواتها من يوكعن مادرتي ظهرج لوحده بيهن وانتي بعز قهرتج وماخفتي من اكبر واحد تجين تالي وكت تخافين تتزوجين حسين
ريم : خايفه من عقولهم ومكايدهم
حجي طه : حقج اني من الناس كتلج بابا ابتعدي حتى لتصيرين نسخه مني تخلصين حياتج كلها تخافين تنامين ليصير شى لجهالج
ريم : بس احسك موافق هسه على حسين
حجي طه : لان رجال وطلع كد كلمته اليوم اجاني للمطعم وكعد ويايه وكتله اني احبك مالك مره عندي تدرين شكال
ريم : شكاال

حجي طه : كال عمي مستعد ابقى انتظر واقنعك الي يحارب اهله حتى ياخذ الي يحبها سهله يحارب حتى يقنع عمه واعرفك تحبني وتحب ريم وتريد مصلحتنا بس مصلحتنا بأن نتزوج اني تعبت وتأذيت وصار عمري ٣١ سنه والي بعمري متزوج ومستقر وجهال عنده خلصت ايام وسنين حرت شسويت حتى اوصل لهاي المرحله اترجاك لا تظلمني انت عمرك ماظلمت بشر لا تالي وكت تظلم ابن اخوك الي يعتبرك ابوه الثاني وانطيني امانتك وهي ريم اذا خنت الامانه او أذيتها اضربني طلقه ومااكول لا

ريم : دمعت عيني واني اسمع شمسوي
حجي طه : يعني كاعد يحارب بجبهه وحده انقهرت عليه وكتله الله كريم وعمج محسن جان كاعد مباشره نط من مكانه وكال كبع واخذ
ريم : ابتسمت ودمعتي بعيني
حجي طه : حسين تعلم من قبل ولمعلومج اني مزعلان منه لان ذيج المره عافج بلعكس احترمته رغم خلافي ويااه لان المابيه خير بأهله مابيه خير بمرته وجهاله وحسين طيب وحنين وبار بأهله ومن اهله غلطو مقبل الهم

بنتي انتي بعدج صغيره وابنج يكبر والمسؤوليه تكبر واني مادايم الج
ريم : الرحمن عليك بابا من عمرري على عمرك عفيه لتكول هيج
حجي طه : كلنا نموت ماكو شى اسمه من عمري على عمرك اكو شى اسمه اتلاحك لعمري ومااضيعه بلذنوب والقهر والمصايب الي فات عليها سنين ومثل مكتلج ابنج گبر وبعد راح يگبر ويصير شاب ويتزوج ويعوفج هاي سنه الحياة راح تبقين وحدج ليش ادمرين شبابج واكو من شاريج
لو ماكو قسمه اكول اكعدي واسكتي وربي ابنج بس ابن عمج خوش انسان ومتأكد خوش اب راح يصير لتيم

ريم : صفنت على كلام بابا زين انت تقبل اتزوجه بدون مايجي ابوه
حجي طه : جيت امه معناها ابوه يدري وسكت وهاي تكفيني اعرف مراح يجي بيوم ولا ينزل نفسه دومه يحس روحه احسن مني
ريم : لهذا اني مقهوره ردت يجي ويتنازل
حجي طه : مراح يجي لتعبين روحج والواكع بيها حسين وانتي راح يخلص عمركم ونتم تنتظرون شى ميصير مثل مااني خلصت عمرري واني انتظر انعام بيوم تعترف بحقي او على الاقل تكول ابريني الذمه وكدامج جم مره توصل للموت ومتنطقها

ريم : ماادري بابا تمنيت يجي اقلها اكسر عيونه
حجي طه : انكسرت بنتي من دز مرته تطلبج وراح تصيرين مرت ابنه الوحيد
ريم : واذا وكعني بمشاكل اعرف مراح يعوفني ارتاح
طه : ويمكرون ويمكر الله وَالله خَير المَاكرين
ذبي حمولج على الله ماكو مكر يدوم ولا ظلم يدوم ربج كريم ورحيم وعظيم تنسد باب مقابلها تنفتح باب احلى عليج بس بالاستغفار دوم وانتي كاعده وانتي تشتغلين استغفر الله العظيم واتوب اليه  والصدقات بيج مابيج انطي صدقه متعرفين الصدقه شكد بيها سر عظيم وتدفع مصائب ومشاكل اهم شى تكون نيتج خالصه لله سبحانه وتعالى وانطي مو شرط مبلغ جبير الموجود واياج تردين ايد تمدت الج هو مطالب منج اجه يطلب من رزق الله الي عندج وعندي وعند الكل رزق من الله مو من عدنا

ريم : اكو بيهم كذابين ماخذيها مهنه
حجي طه : همه وربهم بنتي الي عليج متردين سائل حتى لو ربع دينار شنو الربع جاهل هسه خمس سنين عمره ميقبل بيها ربع حطي بيده ولا تردين ايده متعرفين يجوز بهذا الربع الي انطيتي ربج يدفع عنج مصيبه تقدر بملايين

كلشي قسمه بتي واذا تزوجتي حسين او متزوجتي المكتوب راح تشوفي تبقى قوه ايمانج بقضاء الله هي الي راح تقلل منج حجم المصيبه وان شاء الله ماكو شى ليش نتفاول بلموزين
ريم : مبين خوش قانعك
حجي طه : مو بس قانعني اني احبه لحسين من يوم مااجه وهو صغير مراهق وكف وكال عمي اخذ البنات وروح ابويه وبيبي راح يإذوكم عرفته رجال وعرفت معدنه توقعي اني احسد علي عليه لان الله انطاه ولد جوهره بس مديعرف قيمتها

سكتت وافكر وصفنت بوجهه بابا
حجي طه : انطي الموافقه لو تفكرين بعد
ريم : ابتسمت بهدوء موافقه بس لتكول اله هسه
حجي طه : هههه لا مااكول خلي ينشوي شويه
ريم : طلعت من الغرفه مبتسمه لكيت رشا كاعده على الدرج هيه وعمه وفرح وتيم
رشا : بشري حمام غراب
ريم : ابتسمت وسكتت
رشا : نهلهل
ريم : اشرت براسي وجان اسمع الهلاهل وحتى تيومي يهلهل وميعرف ليش على الواهس ههههه ميدري يهلهل لان امه راح تتزوج

طلبت منهم ميكولون اله ابد وعفناه اسبوع بدون رد لزمت التلفون واتصلت بيه دك دكتين وبلثالثه جاوب
حسين : ممصدك هاي منين طلعت الشمس
ريم : مناك من العوجه
حسين : هاا بعثيه
ريم : انت بس تكول منين طلعت الشمس اتذكر الاغنيه
حسين : شلونج ريمتي
ريم : انت بكيفك تخطب
حسين : لا اقدم استماره ورسوم وروح وتعال وانتظر
ريم : مااوافق اله بشرط
حسين : والله ورمتي گلبي يله اسمع الشرط
ريم : شلون قنعت اهلك وخليت امك تجي تخطبني
حسين : سر من اسرار الدوله عيب تسألين
ريم : مكعد اشاقه حسين اذا مااعرف ماكو زواج
حسين : اكولج بس مو هسه من نتزوج
ريم : شمعنه
حسين : نتزوج واحجيلج كلشي والله
ريم : وشيصبرني

حسين : الله يساعد گلبي شكد صبرت عليج اصبري اسبوعين
ريم : هاااا شو اسبوعين
حسين : مو بس يدزلي عمي الموافقه احسبي ١٤ يوم نتزوج
ريم : لا مستحيل
حسين : من كل عقلج انتظر خطوبه ودوخه لوبيدي يومين بس هاي ١٤ يوم اجرائات العقد وهم علمود الاثاث وتجهيز مالتج
ريم : شو انت بكيفك تقرر ومعرفت شنو شروطي
حسين : هو شرط واحد بيت وحدج
ريم : شمدريك
حسين : لان اني هم اريد وحدي مو بعد هاي المشاكل والحب الي بينكم اكعدكم سوه غير يوميه الكه روحي بلمركز مال الشرطه لو مستشفى شلي بهاي الدوخه لا امي متقبله وجودج ولا انتي متقبلتهم كل واحد يكعد بيته ويسكت

ريم : شو انت مخطط كلشي بكيفك يجوز مااقبل اتزوجك
حسين : مو هي بكيفج تايهه الشغله بعد هاي الحروب النفسيه الطاحنه متقبلين والله ابوكج
ريم : فدوة اتشائم من هاي الحجايه قبل حجيتها جان يطكها بضحكه بصوت عالي
حسين : لتخافين هلمره ابوكج وانومج بحضني اااخ الله غير اسمع الرد حتى ابلش احظر كلشي مو حتى شيب براسي طلع حسوو بيه شويه يافاقدين الاحساس
ريم : ابتسمت وكتله بصوت هادئ
موافقه
حسين : ادري
ريم : شنوً
حسين : ادري موافقه بس منتظر عمي موافقتج عندي مو مهمه لان انتي بكل الاحوال الي رضيتي وان مارضيتي بس عمي ينطي الضوا الاخصر احرك الشارع واجيج
ريم : هيج صارت موافقتي مو ضروريه دروح خلي انزل لبابا واكول اله مااريده
حسين : العفو عمي العفو بسرعه ضاجت
ريم : مو كلامك مستفز
حسين : ريمتي
ريم : نعم
حسين : احبج والخلق كل مسامه بيج روحي من الدنيا انتي ياغصه عمري وتعب السنين
ريم : انفاسي صعدت ونبضات گلبي تتسابق حتى ادك بگلبي وكتله حسين
حسين : يابعد العشك واهله
ريم :  احبك حسين حيل احبك
حسين : مو بكدي والله مو بكدي

ريم : كاعده بلغرفه اباوع على الجنط مصفطه مرت ١٤ يوم بسرعه البرق نركض منا ومنا كتله اجلها اسبوع الجاي مقبل
صفنت واتذكر خطوبتي واضحك جانت يمكن اسرع خطوبه بلعراق

طالعه من الحمام لابسه تراك نيلي وبراسي الخاولي اباوع على نفسي صار اربع سنوات ونص منازعه الاسود ولا حاطه لون غير الاسود على جسمي كلشي اسود بإسود واليوم نزعوني البنات الجانن مخبوصات ساعه يهلهلن وساعه يركصن عكب باجر العيد الجبير شهر الثامن ٢٠١٨
سليل : يله يمعوده مو وكت صفنه
ريم : عفيه محبيت الفستان
سليل : غير يخبل
ريم : كتلج اريده لون طوخ مباشره من الاسود للفضي
سليل : اصلاً يخبل وعلى بشرتج طلع تحفه
ريم : هو حلوو بس مو اني جنت لابسه اسود مو مال انزعه ومباشره البس فضي
سليل : وابيض هم تلبسين كاافي الراح لتضلين تاكلين بروحج عود مسويه شى موزين اليوم خطوبتج وانتي لا اول ولا اخر ارمله تتزوج بلعكس المفروض تخلصيها طك اصبعتين لان اخذتي الي تحبي
ريم : الله يستر متسوي نوريه شى يخرب الاول والتالي
سليل : ماكو شى يله شوو جيبي الخاولي ومشطي شعرج هسه تجي بسمه اخت عمار بلسشوار ايدها تخبل
ريم : وخرت الخاولي وامشط وخايفه حقي مااريد انصدم خلصتها مصايب ممصدكه بعد كل هذا العذاب اتزوج حسين

اشتغلت بسمه بشعري واني مكيجت ولبست الفستان الفضي وحذاء فضي باوعت على ايدي نزعت الحلقه منها طول هاي الفتره ومتجرأت بيوم انزعها احتراماً للمرحوم نزعتها وضميتها وفركت ايدي بمرطب وحطيت عطر ونزلت ينتظروني سليل وغزل ورشا وعمه وبسمه وامها

طبت نوريه ونورس وياهم مره مااعرفها وجوهن السيف ميكصه بس سلام عليكم وكعدو بلصاله وبالاستقبال حسين وعمو محسن وبابا وسجاد وعمار واصدقاء حسين اربعه وياهم رجال جبير معكل وسيد للعقد
محجن اي حرف صاحوني للعقد ويه كل حرف اسمعه اعيد شريط ذكرياتي ويه حسين من اول يوم ضربته بلطابوكه وفتحت راسه جان طالع من عركه ٤ جهال مأذوه وبشمره طابوكه مني فتحت راسه وخليت دمه بطوله و انعام لزمت كصيبتي ورادت تأذيني وهو منطه بيه وكال ولد ضربوني من يومها وهو يدافعلي

شكد جمعتني مواقف وياه خلصت طفولتي ومعافني شكد يعاقبوه لان ويايه ومتركني جان صديقي الصدوق وبعدها صار حبيبي  وماحبيت احد بس هو
كمل العقد وعلت الهلاهل والجكليت يطشر من كل مكان بعدهم البنات ركضو للمطبخ علمود الكيك والببسي خلن وطلعن حتى بلخير ماكالوها اني باوعت هيج وهنه بعدهن باب الهول كلت بصوت مسموع صرت مرته على عناد اكبر واحد ولا اندارن خلن وطلعن

واشتغلت الهوسات والتصفيك مطولو دقايق وطلعو الزلم هم حتى حسين راح يوصل اهله ضجت ماانكر لان حتى مدخل يبارك ولا شافني لابسه الفستان ومرتبه نفسي حتى الحلقه ملبسني
بقينا كاعدات ناكل كيك ونضحك واجه بابا باسني وعمو محسن يهلهل ويكح واني اضحك
محسن : لا عبالج كبرت اكدر اتزوج اثنين نسوان
ريم : مبين كلش فدوة عمو خلصتها علينا سنين اتزوج واتزوج بس حجي
غزل : وين يلكه مثل خاله
محسن : حجت المحامي مالتها
غزل : غير احبها
محسن : شاورني وكال زوجيني عمتج والله بيها حيل
غزل : ضحكت وكتله حتى عمار يذبحك عموو
محسن : لعد بس هو ياخذ چنتي اني اخذ امه وحده بوحده
ريم : سمعت اني احجيلك وياها بس هديتي سوار ذهب
محسن : شكد قفاصه هاي البنيه ولا تكبر ام فليس ماانطيج لو تموتين اخذي من رجلج
غزل : ماعدنا مره الك عمو عيونك زايغه واخاف على عمتي منك
محسن : مال اركع راس براس مو خوش بنات انتن عبالي ترجعني شباب يله ولن
ريم : شربت حبايه الضغط
محسن : لا نسيت
غزل : لا هواي راح تتزوج
محسن : ناصبات عليه بنات طه البومه اني الجن

رجع عمو للاستقبال عليهم كعدنا نصحك ونسولف بس اكو غصه بگلبي ومااشوف غير الباب تندفع
حسين : هااا ولج شبسرعه بعتيني تاكلين ومتوكلين رجلج مو خوش مره انتي
ابتسمت بفرح ومشيت سريع بأتجاهه
رجعت
حسين : وصلتهم واجيت اكو واحد عاقل يعوف حبيبته بهيج يوم
رشا : احم احم نحن هنا

حسين : وشسويلج تره ابوسها كدامكم
نهر : هههههه يمه بوس يعينك الله خلصتها جفاف خبز يابس وبصلايه
رشا : عمه تحثك على الرزيله والفجور عيب اني مره حديقه حسوو بيه
سليل : نسيت اهم شى ملبستها الحلقه
حسين : شلون انسى وين اصبعج
ريم : مديت ايدي ولبسني صفنت هاي الحلقه مو غريبه عليه هااي
حسين : لتفكرين نفس الحلقه مال خطبتنا الاولى رجعتها اليه عمه نهر ومن ذاك اليوم محتفظ بيها وهسه اذا مدخلت لاصبعج اكص الاصبع المهم اطب
ريم : دمعت عيني وتذكرت الصار بوكتها
حسين : توقعت تحبيها
ريم : شفت ايام محلوه بسببها
حسين : وهسه راح تشوفين ايام تخبل بسببها دفع الحلقه ودخلت بيدي رجع فتح علبه ثانيه بيها سوار ومحبس

بوقتها مطلبت ذهب لان اعرف وراه تأثيث بيت وهو جاب سوار ومحبس لبسهم اليه والبنات يهلهلن

سليل : عيني اخذ مرتك للاستقبال وصيح الزلم يجون يكعدون هنا هو منو غريب ماكو احد
حسين : شلون اروح اكلهم من رخصتكم اطلعو اريد ابوس مرتي ولج من الجهال شخطتي
سليل : والي يطلعهم الك
حسين : كارت ابو العشره
سليل : اي هيج الحجي المعدل
رشا : اني اطلعهم واخذ الكارت
ريم : اتعاركن مااوصيجن وفضحني
وتالي دخلن البنات وكالو تعالو هنا نسولف وقدمنا الهم كيك مره ثانيه حتى يجون ياكلون يمنا وكدرن يطلعن سجاد وعمار وبابا وعمو محسن طلعو يفترون

اول مدخلنا للاستقبال حضني حيييل وشمني من كل گلبه من رگبتي
حسين : شكد مشتاقه لهاي ريحتج جنت اشمها بتيم بس متصير طيبه مثل مااشمها بيج
ريم : بادلته الحضن وغمضت وكتله صرت مرتك
حسين : وحبيبتي وبنتي وروحي وريمتي
ريم : متكولي شلون قنعت امك
حسين : من نتزوج كتلج شكد تلحين
ريم : تدري تقريباً مثل هيج ايام انخطبنا قبل هم جان بذو الحجه بس جان قريب محرم
حسين : يابه ولا تنسى شى
ريم : شبيك
حسين : لتبسمرين اعرف سوالفج واحسبي حسابج ١٤ يوم متزوجين قبل محرم
ريم : مااريد عرس
حسين : ليش
ريم : مااريد عفيه وماالبس بدله
حسين : غزل مو لبست
ريم : اني مااريد اختار اليوم الي نتزوج بيه البس فستان بسيط وانروح للبيت
حسين : صار تدللين
ريم : حضنته وبسته بلهفه من خده
حسين : احد كلج اني تيم
ريم : ههههه ليش
حسين : البوس يصير هنا مو بلخد ويأشر على حلكه
ريم : ماابوس واضحك جان هو يجرني حيييل وباسني وبادلته جنت مشتاقه لدفو انفاسه ولحنانه

نفضت فكري وصفنتي ورجعت للواقع وهو كاعده بلغرفه ومصفطه الجنط اليوم الحنه مسويت شى بس اهل حسين سوو حنه للزلم بقاعه وعزم علي كل معارفه بلسوك واصدقائه وكالو العروس عدها حاله وفاة منكدر نسوي بلقاعه عرس مختلط لهذا بس حنه للزلم وباجر زفه مابيه احد مراعاه للظرف هزيت ايدي والله مخابيل بس عفتهم براحتهم جانت الحنه بقاعه راقيه حيل كلفتهم ملايين دزلي التسجيل والفيديوهات جنت فرحانه على ركص حسين ولا كعد بس يركص طاير من الفرح  توسل بسجاد وعمار يحضرون ومقبلو بس باركوله اتوقع عموو ميريد يلتقي بعلي

بقت غزل وسليل يمنا واشتغلن حفافه وتنظيف لجسمي واني كل عيطه مني اسب نوريه واسب علي نبشتهم نبش لحد مكملولي البنات
نايمات اربعتنا بالاستقبال لان بارد وحده فارشه بصف الثانيه جان اطب عمه
نهر : هااا ولجن منمتن
ريم : تعالي نامي يمنا وسحبتها ونومتها بنصنا
تباوع بلجهه اليمنى سليل وغزل والجهه اليسرى اني ورشا والجهال نايمين بلجهه الثانيه يم راسنا
نهر : اباوع على بناتي كبرن وصارن امهات واني بنصهن دمعتي نزلت
سليل : شبيج ماما

نهر : بهيج ايام من ينجمعن البنات يم امهن تحس الدنيا ملكها واني حاسه هسه الدنيا ملكي انحرمت من الام والاخت وانتن صرتن الي بناتي وخواتي وحتى صديقاتي اعرف راح الدنيا تاخذجن وتلهيجن بس الي اريده ولو مره بلشهر او كل شهرين تلاثه مره تنجمعن سوه هنا وتنامن هاي النومه مااريد الدنيا تاخذجن مني وتقلل الحنينه بيناتجن

اريد هذا البيت ميهدا ولا يسكت سوالفكم وضحكم وعركاتكم تبقى بيه اخذتجن ٤ بنات صغار عودجن طري واليوم انتن اربع نسوان امهات بيوت
رشا : عدا اني ورفعت ايدي وابتسم
نهر : انتي هم ام بيت هذا البيت هو بيتج وانتي المسؤوله عنا وكافي فروحه منورة دنيتج لحد مايوم هم ترحين لرجال يستاهلج
رشا : لا عيني شكراً كيم اوفر اني لا اريد رجال بحياتي ولا ادخل رجال غريب بحياة بنتي خليني هنا يمكم وخواتي يرحن ويجن علينا

ريم : تره راح ابجي كافي قابل مسافره هو ١٠ دقايق بلسياره اني يمكم
نهر : لتعوفني اني وابوكم وتاخذكم الدنيا
سليل : اني يوميه يمج وين اروح مكابلتج وكاعده
غزل : واني كل جمعتين اجي من الصبح لليل واليوم الي ننجمع كلنا بيه ابات

ريم : واني لا اعرفكم ولا تعرفوني عائله بس المغثه وراها اخذ رجلي بحضني واسويلكم بلوكات
جان تكفخني عمه والله من وره كفخاتج حتى الذكاء قل ذاك اليوم حسين كال اريد بوسه عضيته
رشا : ههههه والله خطيه ابن عمي نوريه داعيه عليه شلون راح يعيش وياج وعلى خبالاتج
ريم : جيبولي طاسه اشيل الفقاريه الي تنكط من رشا

نهر : كاافي ولجن ويله نامو
ريم : لتكومين ابقي بنصنا
سليل : خلي اخابر سجاد اشوفه نام لا
ريم : عوفي تلوب عليه اذا تردين البسي وروحيله يجوز جايب حاته حلووه نايمه بحضنه هسه
سليل : انجبي ريم ميسويها وكمت طفرت وخابرت دك دك ماكو تالي جاوب
افتح كاام جان صوته مال نوم
سجاد : بيج شى
سليل : افتح كاام
فتح واكوله يمنه يسره
سجاد : هااا خبله منو دفعج عليه بهذا الليل
سليل : ريم تكول اكو وحده حلووه
سجاد : يابه شكد عربانه انتي ريم ادفعج المفروض توكفين بعينها وتكولين سجودي حبيبي ميسويها
سليل : سكتت جان يهمس
سجاد : اجيج
سليل : لا
سجاد : مشتاقلج ماطول الجهال يمهم
سليل : ههههه اكعد راحه
سجاد : شگلت اني تفكيرج قذر
سليل : لا بالله
سجاد : والله هسه اخذج وانومج بحضني وعوفي خواتج مو انتي تكولين انت كل دنيتي لو تقشمرين عليه
سليل : حبيبي روح نام
سجاد : باجر راجعه واني اعلمج ماكو بيات بره حضني افتهمتي
سليل : قربت الشاشه وبسته افتهمت باي حبيبي

رجعت دفرت ريم وعاطت ااخ ولكم عروس اروح عاهه لرجلي
بقينا نسولف لل٣ الصبح وتالي اعلنت عيونا استسلامها للنعاس

فستان بيجي وبخيوط ذهبيه وحجاب من نفس الفستان لابسته وانتظر حسين يجيني
الكل كاعد وفرحان دخل لابس قاط طالع يخبل اباوع على طوله ومعانيه وجهه الي مرسوم عليها الشوق واللهفه والحب
سلم على الكل وتقرب مني وباس راسي
يله نمشي
حجي طه : بعد وكت تعشو وروحو
سجاد : طه يابعد وكت صارله سنين ينتظر وتكله بعد وكت
حسين : متشوف احبك تفهمني بدون مااحجي
سجاد : اخذ مرتك وروح والله يعينك على ما بلاك
ريم : ههههه هيج صارت عمو
سجاد : عينج على هذا الفطير مو وره السبعه ادزي مفشوخ
حسين : عيب سجاد شنو هذا الحجي مااجي اخابرك انت تجي تاخذني غير مفشوخ مااكدر اوصل وحدي
ريم : ضربته بعكسي هااي اني
حسين : نتفاهم بلبيت من رخصتكم

ريم : بوستهم كلهم وبقيت تيم يم عمه ردت اخذه بس هي مقبلت اباوع عليه مكيف ميعرف شديصير بس هو يحب حسين هوايه
صعدت وياه اول مصعدت شغلي

صغيرة جنت وانت صغيرون
حبنا بدا بنظرات العيون
قالو ترى ذولة يحبون
من الصغر لما يكبرون
مثل نجمة والقمر
كبر حبنا وازدهر
بعيونك حبيبي
تبتدي دروب السفر

فرحانه واني ادخل بيتي ويه حب عمري دخلت واني اسمي بگلبي وادعي رب العالمين يديم عليه هاي الفرحه جان يشيلني
ظهرك ليطك
حسين : لتخافين حديد واذا طك عندج دهن دهنيلي ظهري انام شهر بلفراش وراها اصير زين
ريم : نزلني الله عليك
نزلني وباسني وحضني عجبج البيت
ريم : اي مرتب بس لو ماخذين بنفس منطقة اهلي
حسين : ملكيت وعيونج هذا مال ولد صاحبي وكدامج هسه طالعين العمال منه يعني لا انرمم ولا انتعب نفسنا
ريم : همزين الغراض مرتبات
حسين : على حطت ايدج
ريم : هم اجت امك اختك للبيت
حسين : لا محد اجه
ريم : همزين
حسين : ليش
ريم : لا هيج بگلبي اكول اخاف ليسوون سحر ويأذوني
حسين : تعالي
ريم : وين
حسين : للمراجيح

ريم : هههه لزمت ايده وحضني ومشينا سوه طبيت لغرفتي جانت ايطاليه ولونها يجنن كلشي حلوو بلبيت وخطيه صرف هوايه رغم ردت منه شى بسيط بس هو مقبل حتى الاثاث هو اختاره على ذوقه ومن اكول خلي اختار اني يكول اعرف شتحبين وصدك من طبيت للبيت شكوو شى احبه موجود

كعدنا على الجربايه اول مبدا يريد يتقرب مني دفعته بهدوء وكتله سولفلي شلون قنعت امك
حسين : لا كعد تتشاقين هسه بهذا الوكت
ريم : اتفقنا
حسين : ريمتي حبيبتي بعدين احجيلج كلشي والله
ريم : ماااا وكمت من يمه اذا مسولفلي والله مااخليك اطخ شعره مني
حسين : الله مصبرج ياروح يعني ملكيتي غير هذا الوكت
ريم : كم مره كتلك سولفلي ونفس جوابك من نتزوج اول يوم اسولف الج
حسين : يعني مو اول دقيقه من ندخل اول يوم واليوم طويل
ريم : متلمس شعره مني
حسين : انتي متجين بلعيني والاغاتي واني جدي مشوي هسه شووو تعاالي
ركضت وهو يركض ورايه
حسين : تعالي ريم لتشلعين گلبي
ريم : كتلك ماااا اله اعرف
جان يطفر طفره وحصرني بلحايط خلي يفيدج الماااا مالتج

جان يجرني حيل وشمرني على الجربايه
ريم : حسوني حبيبي شبيك
حسين : اليوم اطلع قهر الانتظار كله
ريم : تقرب مني ونزعني الحجاب واخذني بحضنه وهو يفتح خصلات شعري خصله خصله ويشم بيهم
حسين : اااااخ ياريم شكد تعبت لحد موصلت لهاي اللحظه
ريم : واني هم تعبت وعانيت
حسين : مو بكدي
ريم : شكوول وتكول مو بكدي
حسين : لان هذا واقع مو بكدي
ريم : تقربت بسته من خده الايمن ورجعت بسته من الخد الايسر متحمل بعدها وتقرب مني كميه الشوق الي عنده خلتني صدك احس هو اكثر مني بلحب والتعب
جان مثل الهايم وممصدك اني بحضنه ولو اني هم ممصدكه لان فقدت الامل بيوم اكون اله بعد كل المريت بيه لمساته وحنيته ومداعبته لكل مسامه بجسمي خلتني اعيش اجمل لحظات عمرري ويااه

نايمه على صدره وهو مرجع ظهره على ظهر الجربايه وايده محاوطتني وكل شويه يبوسني
هسه اخذت الي تريده تحجي لو ازعل
حسين : ليش هو ينشبع منج
ريم : حسوني تره شلعت گلبي احجي فدوه
حسين :سامعه مصائب قوماً عند قوم فوائد
ريم : اي
حسين : مصيبة رشا الاخيره مال المراسله جانت فائدتها اليه رهيبه
ريم : شلون يعني
حسين : من خابرتني وكالت نورس الها ضلع بلموضوع بلبدايه عيوني صارت براسي تخبلت ركضت للبيت وعياط وصياح گلبته گلب

ريم : اي وشكالت امك
حسين : امي تكول مو نورس هاي جنات جذابه وكتلها
جنات شصير منج
نوريه : غير بت اختي واني ربيتها شجاك نسيت
حسين : ونورس بتج هاي الاقرب والاهم
نوريه : اكيد نورس
حسين : زين مخفتي احد ماعنده ذمه وضمير يطعن بشرف بتج يعني سحور وسويتي مشاكل ٢٤ ساعه بلبيت وكلت ميخالف امي وتمون بس توصل مرحله تطعن نورس بشرف رشا واسكت اله اني مكرن
نوريه : شلك دخل بيهن كم مره كتلك عوفك منهم من انت وصغير شالع گلبي تكول ذبيت الصره مالتك بحضن بيت طه
حسين : سوايت بتج اله اخليها تعض اصابيعها
نوريه : شتريد تسوي

حسين : اني حذرتها قبل مده وكتلها اطلعي من هذا المنوال ومالج دخل بهاي المواضيع بس مبين هاي اذا متنكرص متوب
نوريه : اذا سويت شى والله اغضب عليك ليوم الدين
حسين : اغضبي اني اريد تغضبين وهذا الغضب راح يوكع على راس بتج

ريم : وشسويت
حسين : وداعتج ولا حجيت وياها ولا تعبت نفسي بس رحت لرجلها وكتله على السوته وهو تخبل الشهاده لله رجلها ذهب صافي رجال ميقبل العيبه عفته ورجعت ماكو ورايه بساعه اجه وشمرها هي وابنها يمنا وكال المره الي تطعن وتخرب بيوت متصيرلي مره
ريم : كعدت على حيلي وكلي تركيز اي اي كمل
حسين : عجبج الاكشن موو
ريم : كلش

حسين : انتي تسمعي تحسي فلم اكشن بس مشفتي الاكشن الي صار بلبيت عياط وصياح وبجي ولطم وللمعلومه من امي ومن نورس وحده مكابله الثانيه ويلطمن وخابرن ابويه واجه هداد وطردني
ريم : لا بربك
حسين : من وراج انطردت

ريم : وتالي
حسين : عفت البيت وكعدت ويه ولد صاحبي عنده شقه بلحريه كمت اروح واجي طريق طويل بس اقلها راسي بارد بدون مشاكل
ريم : ولشوكت بقيت ويه الولد
حسين : شهرين لحد مدكت امي وكالت الحك ابوك تخربط ورحت ركض طلع بيه سكر وصاعد سكره ٥٥٠
ريم : بگلبي اكول لو ميت وخلصانين

وشصار وراها
حسين : كمت اروح واجي خفايف مو هوايه لحد قبل ماادز امي بكم يوم حتى تخطبج دز رجل نورس حتى يطلك
ريم : يعني هاي الفتره كلها متواصلت ويه اهلك واهلك متواصلو ويه رجل نورس حتى يرجعها
حسين : حسب مسمعت ابويه محاول وياه ومقابل وهي اكثر من مره متوسله بيه وطالبه يرجعها وقفل عليها
ريم : حيييل
حسين : ولج
ريم : تعرف بيه الي بگلبي على لساني
حسين : خلي اكمل
ريم : كمل
حسين : دزت امي ونورس يتوسلون حتى اقنع رجلها يرجعها اني هنا صرت ملك وحطيت رجل على رجل وكتلهم اقنعه وارجعها لبيتها بس يجون يخطبوج اليه ورجعت علكت ولج شبعت عركات من وره هذا الحضن شوو تعالي لتوخرين مني
ريم : ههههه حضني حييل وكتله كمل شصار
حسين : علكت كم يوم وابويه تخربط وصعد سكره
ريم : وانعام

حسين : تره بيبي شبهه مواته حتى بدايه زهايمر بيها
ريم : لتخاف هاي تموتنا ومتموت
حسين : المهم ابويه عاند وكال لو تطلك نورس وتموت وانت هم تموت مااروح لطة واطلب بنته وتالي اقترحت امي هي تجي وهلمره هي الي تتوسل اقبل تخطبج الي بدون ابويه ونورس مبقت بس رجلي مباستها والله الوكف بعيني ابنها بعده صغير
ريم : تستاهل خلي تضوك الي سوته برشا لو ضاربها مكسرها
حسين : اكو امور تصير للواحد لو يكطعون لحمه اهون من هاي الامور مثل نورس لو كاتلها ومشبعها كتل اكيد المه اخف من الم طردتها من بيتها ومن رجلها راد يطلكها الي صار بيها ذيج الاشهر تعادل الف ضربه

ريم : ورجعت لبيتها
حسين : رحت حجيت وياه وعدته متسويها والرجال مقصر وتفهم الامر راحت نورس لبيتها وطلعت امي واجت خطبتج
ريم : بله راحت نورس ومخطبت
حسين : متكدر لان اني فهمت رجلها على سالفتي وساعدني خلف الله عليه وكال لنورس اذا امج مخطبت بت عمج لاخوج وصلح غلطج ماارجعج ونورس اكلت گلبها لامي وبس طلعت من الباب اجتكم
ريم : زين قبل ابوك

حسين : تعب من المشاكل والعياط ويوميه هوسه وقنعته ومشت الشغله ياريمتي اعرف رشا تأذت وانظلمت بس لو ما هاي المشكله مجان هسه انتي بحضني اجتني نجده من الله گلبت الحاال كله بعد مجان شبهه مستحيل صار متاح اشهر ادعي تمشي الامور مثل مااريد والحمدلله مشت

ريم : وانت سويت هيج لخاطر تاخذ حق رشا لو لخاطري
حسين : لخاطر حبوبتي يعني ليش تحجيني اكلها شبعت عركات وغلط وطرد حتى بس تجي امي تخطبج وهم ماقبلت على تصرف نورس حيل حقير وهي اختي بس الحق حق دكتها دكه ناقصه
ريم : لان هي ناقصه

حسين : ريمتي حبيبتي حتى نبدي حياتنا بدون مشاكل وحزازيات انتي بيت وهنه بيت لا تجيبين طاريهن بشين او زين وحتى هنه هم مااقبل
ريم : ليش تضوج احجي عليهن
حسين : ناقص غيره الي يقبل تنسب امه واخته ويسكت عادي مثل مااقبل يلمسن شعره منج ولا يجيبن طاريج انتي هم بلمقابل نفس الشى رمرم حبيبي اريد اعيش بهدوء حيل أذتني المشاكل وغيرت نفسيتي اجت ايام ادمرت راسي من رجلي مااندله عوفج من كل الفات وانسي اهلي هذا بيتج وكم يوم اجيبلج تيم يمج ونعيش سوه مالنا دخل بيهم
ريم : على ذكر تيم
حسين : لتوصيني
ريم : خلي اكمل

حسين : ميحتاج اعرف شتكولين اني احبه مو لان ابنج بس هو محبوب ومن صغير تعلقت بيه اني طفل غريب اذا بلشارع احن عليه مو عاد ابنج
ريم : اريدك دوم تبقى تحبه واذا الله رزقنا طفل متفرقه عن اخوه
حسين : اثنينهم ميه جلاق اركعهم اذا اخذوج مني وينامون بحضنج
ريم : اااخ منك كمزت عليه وابوس بيه واضحك بصوت عالي من گلبي

طفله مدلله وامرأه ناضجة ومراهقه مجنونه كنت هكذا بين يدي حبيبي يداعب كل مسامه ويراقص انفاسي بكل حب وهيام كانت ليله مجنونه بين عاشقين يتبادلان الحب والشغف والنشوى بجنون
كواني بنار العشق حتى سمعت نبض القلب يهتز خفقاً وفرحا

كعدت الصبح وافتح عيووني بوجهه صافن عليه
ريم : شوكت كعدت
حسين : من زمان وشفتج نايمه كلت اعوفج ترتاحين
ريم : ساعه بيش
حسين : بالعشره
ريم : هو احنا نمنا ساعه ٦ الصبح شوكت كعدت
حسين : نمت ساعتين وكعدت
ريم : غير تنام وترتاح ياعيني
حسين : اريد عيني تملي منج وخشمي يتنفس ريحتج
ريم : راح تبقى هيج تحبني وتتغزل بيه
حسين : لا بس اول ايام اقشمرج
ريم : لزمت ايده عضيتها
حسين : اااخ تأذي هيج صارت مووو
ريم : شبعني بوس وعض جنا مثل ثنين صغار ساعه نتشاقه وساعه نتسابق بحضن بعض

سليل : تزوجت ريم وراحت لبيتها كلنا خايفين من اهل حسين وسوالفهم بس هي كالت ابقى بعيدين عليهم ومالي دخل بيهم
رجعت للدوام كمت اعوف زيون بلروضه وكيان عند ماما حياتي مد وجزر اني وسجاد ماكو بيت مابيه مشاكل بس منكدر نكول عليها شى جبير نقاشات واختلاف بلمواقف والرأي غيرته وشكه تعلمت عليهم هم اغلط مرات ويااه وارجع اصالحه ومن هو يغلط اووو انتهزها فرصه واطلع الزعل من عينه يله ارضى سجاد زوج واب حنون طيب ونفسه عزيزه ودوم مفضلنه على نفسه وهذا الشى الي مريحنا

ريم : امشي ولازم ايدي وتيومي بالايد الثانيه
حسين : جنت ناذر اذا اطيبين اجي مشايه بأربعين الامام الحسين كل سنه وسبحان الله سنه والبعدها اجيت وانتي بيدي
ريم : جنت تدعي اطيب لو نتزوج حدد
حسين : ليش اكذب جنت ادعي اطيبين اهم من زواجنا بس الاعمال بلنيات يعرف رب العالمين بگلبي شريد وحققلي هذا الشى واليوم انتي مرتي ونتمشى بلزياره
ريم : مر شهرين على زواجنا مشفت بس الحب والدلع والضحك وعلاقته بتيم تخبل وتيم يصيح اله بابا ويودي الصبح للمدرسه وحتى بليل يقري اذا ماعنده شى اكوم واكعد اكول ربي دخيلك اني من يومي نحس وايام الفرح معدوده عندي ديمها عليه وابعد كيد نوريه وبتها عني

بلزياره اليوم وهوسه وبين الامامين كاعده واتذكر جزء من الصار بيه واختنك ومن اشوف حسين يوكل بتيم وشلون يخاف عليه اكول ماكو شى بلسهل يجي لازم ندفع مقابيله شى الْحٍمَدٍ للـّہ هانت وعدت بفضل الله

غزل : كل شهر من تجيني اگلبها مناحه وابجي اريد اصير ام زادت مخاوفي رغم خاله وعمار ابد محسسوني بشى بلعكس يطيبون خاطري ويضحكوني لكن الى متى هم هي ام وتريد تفرح بخلفه ابنها
واني تعبت من الاطباء بس كت فلوس بله فايده
تمنيت اتعين وتتغير نفسيتي بس عمار مقبل لهذا كعدت وسكتت بلبيت وهو يشتغل وشغله مااشي حاله سمع كلامي وره مده طويله جنت جامعه فلوس من الشهريه الي ينطيها اليه ويه فلوسي القديمه اشتره سايبه يروح ويجي بيها ومرات يطكطك كم كروه والحمدلله ناكل ونشرب احسن من غيرنا بس فلوس الطبيب ناهبتنا عدا خواتي وبابا يدزولي بأستمرار هو ميقبل اضطر اخذ خاله ويايه للطبيب حتى ليشوف شكد اصرف على المنشطات وادويه الحمل ويعرف اخذ فلوس منهم
بيوم لزمت خاله كاعده تدعي بلكراج وكت المغربيه ويه الاذان كتلها خاله اذا محبلت تزوجيه لعمار

ام عمار : بنتي شلج بهذا الحجي
غزل : خايفه والله
ام عمار : هذا رزق الله وكلمن ورزقه اني ماازوجه لا بني طول هو م رايد ومرتاح وياج لتنغصين عيشتج على شى اذا الج قسمه بيه يجيج لحد يمج ولو ما الج لو تركضين العمر كله ميصير روحي توضي وصلي ورتبي نفسج رجلج جاي واطردي هذا الوسواس بنيتي وادعي الله يجبر بخاطرج وخاطر عمار

غزل : امشي واسبح وادعي ليل نهار بس حتى اصير ام

ريم : دخلنا ٢٠١٩ بدايه شهر الواحد هاي الفتره كلها مشفت بشر من اهله دكو الباب وهو كل كم يوم يروح ساعه ويرجع اليوم انظف واحسب كاعد ويه تيم يشتغل بجهاز اجيت يمه وكتله حسين يمكن اني حاامل
يتبع ...

مساء الـ🥀ـورد والهنا باجر ان شاء الله بارت هديه مني الكم ماكو استراحه انتظروني 🌹