رواية ابي والغزلان الفصل 104 - بقلم ريام هادي

#ابي_والغزلان
هديه بسيطه

يوم ٥/١٥ غلقت باب ابي والغزلان واليوم بعد مرور هذه المده راح افتح شباك صغير عن حياتهم تعالو معي نشوف شصار بهذه الفتره فتحنا الشباك سوه

نرجع نهايه شهر العاشر ٢٠١٩ ايام المظاهرات الناس مخبوصه الي يتظاهر والي يساعد والي يشارك بأبسط شى اعطينا جرحى وشهداء ومستمرين بلمقاومه على امل يتغير واقع العراق المرير وبكل هاي الهوسه اكو بنت كاعده وحاطه ايدها على خدها تنتظر زوجها المشارك بلمظاهرات حالها حالات الالاف النساء مثلها
رشا : يمعوده غزوله ادخلي جوه صارلج خمس ساعات كاعده هاي الكعده متعبتي اقلها كومي غسلي اكليلج لكمه
غزل : گلبي نار على عمار شلون اكل واني ماادري بيه وين ماوين وادك عليه وهو ماكو
رشا : خابرتي عمو بلكت وياه لان هو هم هناك بلتحرير من الصبح
غزل : خابرت وكال مشفته وهلمره خالتي ام عمار كل شويه ادك عليه هاا مجاوبج

رشا : هم ام خطيه وحقها گلبها محروك على ابنها
غزل : خايفه موت عليه احس على ساعه اوكع من طولي من الخوف شفتي منشورات الفيس كلها تحجي على الجرحى والصاير
حتى الشبكه تروح وتجي ويمكن راح يكطعوها
رشا : اي والله الوضع حيل تعبان
نهر : هاا يمه هاي عود دزيتج على اختج حتى تدخل ترتاح وتاكل خليتي وكعدتي بصفها
رشا : شوفيها متقبل تكوم
نهر : ميصير غزوله كومي يمه اكلي شى من الصبح محاطه لكمه بحلكج
غزل : والله مجوعانه عوفوني عفيه

طب سجاد وعيونهم عليه طفرت غزل تركض
غزل : فدوة عمو عمار وينه
سجاد : ماكو شى شبيج قبل شويه جنت يمه
غزل : ليش لعد ميجاوبني
سجاد : صديقه تصوب وحاير بيه
نهر : يمه دخيلك ربي وهسه شلونه
سجاد : حالته خطره الولد لو يصبح لو لا ادعوله
غزل : گلبي انقبض بلزايد وحسيت روحي ساحت كعدت بلكاع ابجي
رشا : هااي شبيج كومي گلبي
غزل : هسه بس لو يجاوبني
سجاد : مابيه شى لتلحين
رشا : اباوع بعيون عمو حسيت وضعه مو طبيعي ويتهرب ومتوتر
سجاد : وين ابوجن
نهر : اكل وشرب الدوا ودخل يتمدد بفراشه
سجاد : رايح اله نهر كوميها خلي تاكل لتوكع ومابينه حيل ركض ومستشفيات
نهر : اي هسه يله ماما لخاطري تعالي ندخل جوه

رشا : عفت غزل على عمه ورحت وره عمو سجاد دخل لغرفه بابا وفتحت الباب وكفت اسمع شيكول
سجاد : طه تره عمار بلمستشفى وحالته خطيره
حجي طه : كام طه من مكانه ياستار شصار
سجاد : متصوب واصابته خطره بصدره ورجله
رشا : لطمت على وجهي عزه بس لا مات
سجاد : اشش وجع صوتج
رشا : عمو احجي فدوة مات عمار
سجاد : لا اله الا الله لج بابا سمعتي كلمة موت كلت تصوب وحسج عالي نصي لتسمع اختج وهسه توكع
حجي طه : امشينا سجاد نروحله خلي بس ابدل

سجاد : يله انتظرك وانتي تعالي ورايه
رشا : طلعت ويه عمو للكراج شفت غزل وعمه ماكو معناها طبت جوه
سجاد : ترحين على سليل وتبلغيها وخلي تجي تبات يمكم
رشا : وليش مخابرتها
سجاد : اختج مخبله بس احجيلها حتى للمظاهرات متخليني اروح
رشا : والله زين تسوي حقها
سجاد : بله حجي زايد روح الها وبلغيها
حجي طه : يله سجاد امشينا
سجاد : عينج على خواتج

رشا : صار عمو راحو واني دخلت اركض لبست العبايه على راسي وركض على سليل طبيت
سليل : اسم الله فزيت ولج شكو جفتي هيج عليه
رشا : اسكتي شحجيلج
سليل : شصاير
رشا : رجل غزل متصوب
سليل : وسجاد
رشا : اي عيني كلمن يحود النار لكرصته اكلها رجل اختج متصوب تصيح وسجاد
سليل : لتخبليني سجاد بيه شى
رشا : مابيه بس يعيط ويصيح قابل شبيه عنتر شايل سيفه ويفتر ورانه

سليل : وينه هسه
رشا : راح ويه بابا للمستشفى
سليل : وغزل
رشا : متعرف شى وخايفه عليها اذا عرفت شسوي
سليل : امشي نروح يمها
رشا : طلعنا وقفلت سليل باب بيتها ودخلنا على غزل بغرفه عمه حاضنتها وكاعده
هستونا كعدنا وسليل تبوس بغزل جان اطب ريم وبصوت عالي

ريم : ولج الله يعين گلبج يايمه ياعمار متستاهل والله
غزل : شبيه عفيه عمار
ريم : اباوع بلوجوه كلها اصفرت ورشا غمت كصتها كلت بصوت ناصي لصتها مووو
رشا : جفصتي بيها من كل الجوانب عاشت ايدج عاطت غزل
غزل : احجولي عمار شبيه

سليل : على كيفج ياعيني مابيه شى جرح بسيط يوم يومين ويطيب جان تكوم تلطم غزل انريد نلزمها كوه وخرنا ايدها من وجهه
غزل : ليش مكتولي والله گلبي حاسس حرام عليكم وينه اريد اروح اله
ريم : وين ترحين حسين وبابا وعمو ويايه اكعدي واسكتي مابيه شى ان شاء الله
غزل : اذا ابقى هنا للصبح انجلط فدوة عمه ابوس ايدج خلي اروح
نهر : يمه مستشفى وطوارئ وكلها زلم وين رايحه

كامت حافيه وحطت الشال على راسها وسحبت عبايه اسلاميه وتريد تطلع جان تلزمها سليل ونهر
سليل : اوكفي هسه نخابر سجاد ونخلي ياخذج
غزل : اذا مااجه منا لنص ساعه ماخذه تكسي ورايحه الهم بس اسألي بأي مستشفى حاطيه
سليل : سحبت التلفون ودكيت على سجاد مجاوب دزيت رساله وكتله ضروري هاي غزل راح تهج بلشارع جان يخابر
سجاد : شبيهه
سليل : گلبت الدنيا بلعياط عفيه تعال اخذها تشوف رجلها

سجاد : اي مو احنا بسفره واخذها تعالي شوفي المستشفى غير مگلوب جرحه بلمئات حتى مكان ماكو للكعده اجي واخذها بنص الرياجيل خلي تكعد وتسكت
جان تسحب التلفون مني غزل وتحجي ويه سجاد
فدوة عمو بداعت جهالك بس اشوفه
سجاد : ياغزوله والله مابيه شى
غزل : اذا مااشوف والله گلبي يوكف وتبجي بصوت عالي
سجاد : اسمعي الكلام واكعدي ويه خواتج واذا صار شى اني بنفسي اخابرج
غزل : عمو اترجاك
سجاد : بلا عناد واذا سمعتج طالعة من الباب رجلج اكسرها صيري عاقله كلها كم ساعه بس يصير زين اخليج تسمعين صوته لو افتحلج كاميرا وشوفي ويله بعدين اخابركم

شمرت التلفون عليه وكعدت بلكاع تبجي
سليل : سجاد اوكف لتسده
سجاد : خير بله هم كولي اريد اجي للمستشفى
سليل : وخرت من عدهم وبهدوء كتله ضل بالي عليك حبيبي شبيك عصبي عليه جر نفس بهدوء وكال
سجاد : اعصابنا مدمره سليل الوضع ميطمن وجماعتنا اكثرها مصابه
سليل :لتأذيني بيك سجاد اذا صار بيك شى اني اموت مو حجايه واحجيها والخلقك اموت مااتحمل
سجاد : لتخافين حبيبي ماكو شى بس ادعولنا
سليل : اكو دكتورات حلوات يمك
سجاد : استغفر الله روحي سليل لا ابتلي بيج والله
سليل : هاي شبيك تعيط سؤال هو قابل كفرت بس امانه اذا اكو لتباوع بداعتي
جان يسد التلفون بوجهي ميخالف المهم حجيت الي بگلبي

رشا : بقت غزل الليل كله تلوب ساعه تصعد فوك ساعه تنزل ودمعتها منشفت حاولنا كلنا نهديها بس ميفيد كل ساعه تمر تشيط اكثر وتبجي اكثر ومحد يرد على التلفون وبابا عايف جهازه هنا وبقينا بحيره وكلنا ندعي للصبح
لحد ساعه ٨ الصبح دك تلفون ريم
ريم : هااا حسون بشر اي ياالله الْحٍمَدٍ للـّہ
غزل : شصار فدوة
ريم : لتخافين عدت على خير رجع لوعيه وضعه مستقر
نزلت غزل سجدت لله شكر وتبجي
نهر : لج يمه كافي مو افادج وكف من البجي راح تموتين
غزل : مو بيدي ماما الله يعلم بحالي وشأحس

سليل : المهم عدت مرحله الخطر ربج كريم الف الْحٍمَدٍ للـّہ والشكر
وجان نسمع ريم تكول لحسين
ريم : وشرادت نوريه هسه وكتها
وتأشر عمه نهر حتى تحجي على كيفها
ريم : يله روح عيني مااعرضلك وسديت الخط
رشا : شبيج من الصبح تعيطين
ريم : يمعوده مخابرته امه تعال عندي موضوع وياك ضروري
نهر : غير امه وتريده ومن حقها تشوفه
ريم : فدوة عمه لتصبين البانزين على النار هاي نوريه ام السحوره متكعد راحه ماطول شغله ضرويه شوف شمدبره تعلميني بيها محد يفهمها بكدي

رشا : وتبقين العمر كله تمنعين حسين من اهله لازم خد وعين من وره هاي سوالفج بيوم حسين ينهزم لحضن امه
سليل : ميسويها
ريم : جاوبتكم ام زين فدوة لطولها
سليل : ميحتاج تتلوكين هذا واقع حسين يموت على ريم وبنفس الوقت يحب اهله وبار بيهم بس انتي هم على كيفج وياه ماله داعي هذا التوتر من يكول اروح اشوف امي
ريم : اتفقن بنات طه عليه
هسه عوفجن مني وين غزل
نهر : كامت تغسل وتخابر عمتها اكيد عرفت
رشا : زين هو هسه وضعه زين لو هم اكو خطوره

سليل : اوف منك سجاد حتى ميفتح الخط عليه
ريم : يفتهم بعرضي غير مباشره تكوليله لتباوع على الدكتورات
سليل : شمدريج
رشا : ههههه بايكه الاسئله
ريم : لا سمعتها تحجي خفي عليه شويه من الغيره الله يعينه عليج
سليل : لو حسين يباوع على هاي وذيج تقبلين
ريم : غير افكس عيونه شنو ماوراه زلم مشوربه
سليل : شفتي حتى لتلوموني
رشا : الْحٍمَدٍ للـّہ اني سنكل هو واحد الله نطاه والله اخذه وعساه لا رد

نهر : كومن نظفن اخاف يطلعون عمار ويجيبوه للبيت جهالجن هوسو البيت وعيب اخاف خطار يجي
غزل : نار بروحي محد حااس بيها حسيت بلحظه راح اخسر روحي اني هواي خسارات بحياتي ومامستعده اخسر عمار تمنيت بس اشوفه احضنه املي عيني منه لاول مره احس اني بدون عمار لا شئ
رشا: اليوم كله ننتظر خبر لحد مرجع بابا وسجاد العصر وعرفنا لازم يسون لعمار عمليه لصدره واصفين دكتور بلحارثيه حتى يسويها ورايحين وشارط الطبيب العمليه بمستشفى اهلي ومكلفه
رشا : اني اشارك عندي كم فلس جامعتهم مال رواتبي

ريم : واني هم عندي انطيكم
نهر : عندي الباون مالتي (قلاده) ثكيله واذا ابيعها خوش فلوس بيها
سليل : واني هم جامعه كم فلس من رخصه سجاد طبعاً وهم وياكم
غزل : صافنه بوجهه اهلي شلون يتسابقون حتى يساعدوني وكل واحد يحط الفلوس الي جمعها ويفضلني على نفسه بلحظتها حمدت الله لان انطاني هيج عائله وكت الشده توكف بظهري
حجي طه : واني اكمل المبلغ باجر لازم يسوي العمليه
سجاد : لازم نحجز عند الطبيب خلي نجمع حتى احجزله
اختفت بلحظتها غزل ورجعت بيدها علاكه
هااك بابا
حجي طه : شنو هاي بنتي
غزل : فلوس العمليه مال اطفال الانابيب مااريدهم ومااسوي
حجي طه : رجعيهم بابا احنا هسه نجمع ونسوي العمليه ويرجعلج عمار بخير منعوفج يابنتي
غزل : اساساً هاي الفلوس مالتكم خمس ملايين ملعبت بيهم كملو عمليه عمار
حجي طه : كتلج رجعي الفلوس ذني مالاتج وشبيج ترجفين بنيتي تتوقعين اعوفج بهاي المحنه ولج لو اعرف ابيع هدومي وارجعله الج سالم

غزل : نزلت دمعتي وكتله فدوة بابا لتكسر بخاطري مااريد عمار يكعد ويتأذه اكثر اعرف نفسه عزيزه ومراح يقبل ومن يعرف انتم لميتو بينكم راح ينقهر وتتأزم حالته اقلها هاي الفلوس راضي عنها واذا راحت لعلاجه مراح ينقهر بكد قهرته اذا عرف جامعين اله راح يحس بلعجز وقلة الحال واني ماارضى اله هذا الاحساس فدوة بابا اترجاك اخذهم وسوي عمليته

نهر : وعمليتج
غزل : الله مكاتبها الي هسه واذا الي نصيب بيها يجي يوم واسويها مطايره المهم عندي هو ميهمني لا طفل ولا شى
سجاد : بيده الجكاره ويدخن وصافن على غزل وكال جيبي الفلوس وذب الجكاره بلنفاضه واخذ الفلوس من ايدها
سليل : اوكف سجاد خلي نتفاهم

سجاد : حجي غزل صحيح واني اعرفه لعمار راح يتإذه خلي نكمل عمليته هسه وعلى الطفل وكت متريد تسوي عمليه عود نجمع مو مشكله تره نفس الحسبه المهم الرجال من يكعد ميحس روحه عاله على احد انتم مشفتم اخوه شلون مكسور ومحتار من عرف بلعمليه اقلها حتى كدام اهله مينحرج
غزل : فدوة عمو الله يحفظك الي والله اكثر واحد فاهمني
حجي طه : هاااا صار سجاد اكثر واحد فاهمج ولج واني

غزل : انت تاج راسي وحبيبي وبست بابا من راسه وايده
ريم : والله دمعت هاي شنو
سجاد : منو هاي الي ادمع ام مشاعر معوقه
ريم : ليش عمو قابل ماعندي احاسيس ومشاعر غير مواهبي ممكتشفيها بعد
سجاد : الموهبه الوحيده الي اعرفها ساحله المكرود حسين وراج
ريم : والله ماكو غيري المكروده خليني ساكته

حجي طه : يله يابه امشينا نرجع للولد بلمستشفى حتى باجر اندخله عمليه
غزل : اخذوني وياكم فدوة
سجاد : اخذج والله بس نحوله للمستشفى الاهلي اقلها هناك ماكو هوسه مثل الحكومي
نهر : تعالي يمه اكلي راح توكعين
سجاد : اذا متاكلين ياغزل تحلمين اخليك تشوفي لحد ميرجع للبيت وتعرفيني كد كلمتي
غزل : لا لا اكل والله اكل بس عينكم عليه
رشا : ولكم جهالنا خانسين وينهم
سليل : اكيد يلعبون بلغرفه الفوك
سجاد : اني طالع

سليل : كمت وطلعت وراه وجريت ايده ودخلنا للمطبخ وكفت كباله وجهي بوجهه واحجي بهمس
يعني حتى بوجهي متباوع هيج حبيبي ممشتاق الي
سجاد : بربج الرجال بين الحياه والموت وانتي تكوليلي عينك لتباوع على الدكتورات ولج هو اليكبر يعقل انتي كعد تخرفين
سليل : شسوي غير اغار عليك
سجاد : ليش مسوي شى اني حتى تغارين
سليل : حتى لو ممسوي اغار
سجاد : اثكيلي سلول تره واصله منج لهنا واشر على خشمه
سليل : ينطيك گلبك وبست خده
سجاد : ولج انتي تربيه ايدي بطلي هاي السوالف العتيكه
سليل : يعني ممشتاق وغمزت اله
سجاد : ههههه ااااخ منج
سليل : فدوة لضحكتك جنها هلال العيد بلسنه مرتين اشوفها
جان يجرني ويبوسني من رگبتي ومن خدي بكل لهفه وحضنته وشفايفي لامست شفايفه جان اطب ريم

ريم : يعني وين اولي هاااا متجوزون من سوالف المراهقين عدكم بيت وروحو بيه مكتوب العمر كله عليه الكفكم بمواقف بايخه واني طفله صغيره واستحي
جان يضربها سجاد على راسها والله محد البايخ غيرج غير مرتي ومشتاق الها
ريم : اممم مرتك بيتك هنا بيت محترم هاي السوالف عيب وينك بابا تعال شوف عمو سجاد يتحارش بتك

سليل : لزمت حلكها صخام استحي من بابا خبله
ريم : اريد رشوه واسكت
سجاد : لو تموتين سوالف القط والقفاصه مو عليه روحي لرجلج لو عمج محسن مو اني
ريم : ااااخ يجي يوم واقطك ياگميل
سجاد : اروح اكمل شغلاتي هاي اختج فايخه وضاله تفتر مثل بزون المطابخ
سليل : روح حبيبي الله وياك انتبهه على نفسك گلبي
ريم : اممم انهجم بيت الباميه باع الدلع
جان اخنكها ودفعتني وركضت على ابنها حيدر جان يبجي

رشا : اباوع على بنتي الكبرت وهي من دون الجهال بلا اب اكول شنو ذنبها تنحرم منه كام حتى ميتصل بيها ملتهي بنسوانه
نهر : والله شبيج صافنه رشاوي
رشا : على فروحه شلون طولانه وكبرانه وتلعب ويه زين
نهر : يوم متشوفيها عروس وتفرحين بيها
رشا : لا عمه ياعرس شحصلنا من الرجال حتى تحصله بنتي ولتنسين حظ البنيه على امها خليها هيج يمي ادلل بيها وادلع واخليها تاخذ احسن شهاده سلاحها
نهر : ميخالف يمه حلو البنيه تحصل شهاده وتحمي نفسها وراتب يقوي ظهرها بس يبقى الزواج اساس الحياه
رشا : عابت هيج اساس يعني تحب وتضحي وتتزوج وادلل وتالي ينام بحضن غيرها فدوة عمه اني وياج اكثر اثنين محصلنا شى من الزلم لهذا سالفه الزواج مااخليها بعقل بنتي ابد

نهر : مو كل اصابيعج سوه مثل مااكو الموزين اكو الزين
رشا : ابشرج على هذا الجيل والي نشوفه ونسمعه من الفيس والبرامج راح نترحم على امثال شعلان صاير الخيانه حق مشروع للطرفين تكول كاعدين بأوربا

نهر : زين انتي بعدج صغيره
رشا : لتكملين عمه حفظت كلامج والقران حفظته زواج ماازوج اني اكرر تجربتي واعيش ويه رجال اتعب واسهر واضحي لعيونه وتالي يضربني بوري على شنو فدوة شو راتب وعندي وبنتي تسوه الدنيا شسوي بعد بلرجال سدي الموضوع رحمه لجدي
وانتن وينجن يله منتعشى ام بطن مجعتي
ريم : اي والله طاكني الجوع

مر اسبوع والكل متوتر وبرحمه رب العالمين نجحت عمليه عمار كلنا بقينا بيت اهلي مرجعنا لبيوتنا علمود نبقى نقوي بغزل وعمتها حبابه كالت ابقي يم اهلج اخاف تتأذين اذا ترجعين لغرفتج وهو ماكو
اليوم واكفين باب المطبخ عيال غزل كلنا رحنا حتى نستقبله وغزل ترجف وتنتظر رجعة زوجها وانهدي بيها نخاف ليهبط ضغطها

ودخل بلعربانه يدفع بيه سجاد وبابا وعمو محسن ذبحو جوه رجله طلي على سلامته وامه تهلهل وتبجي واخوه يبجي جان منظرهم يقهر يعني لو صاير شى بيه شجان صار بيهم ومن نتذكر الشهداء منكول بس الله يعين امهاتهم واهلهم والله لايوفق الجان السبب

غزل : ركضت من شفته وحضنته وابجي اشهك مثل الطفله ممصدكه رجعلي حتى هو استحى لان بابا والولد كلهم واكفين بس مو بيدي جنت حيل منهاره وخاصه بس شفته مره وحده وجان تحت تأثير البنج ورجعني عمو مقبل ابقى وياه بلمستشفى لان اصدقائه موجودين ومر الاسبوع عليه سنه

سجاد : يله يابه نرفع الزحمه
عمار : وين ترحون وروح ابويه مطلعون لباب البيت اذا متتغدون
حجي طه : تعبانين ابني وانت تعبان نجيك غير مره واجيب هذا الجوك الموسيقي كله وندوخكم بس هسه لازم ترتاح
عمار : ابد والله عمي لتكسر بخاطري الي سويتوه ماانساه بعمري
سجاد : ميحتاج هذا الحجي لو انت بمكانه هم تسوي احنا اهل ولان اهل نجيك غير مره ارتاح اليوم

ام عمار : وروح الغوالي مالكم طلعه من البيت جيتكم اليوم على راسنا شلون اطلعون وكت غدا حجي لخاطرنا لتطلع
رشا : لحت ام عمار وعمار وحتى غزل وبقينا ورحنا نساعدهم بلغدا الكل ملموم ويضحك وغزل عيونها بس على عمار وادمع وتمسحهم اعرفها دموع شوق وحب وحنين الله يحفظهم
طلعنا العصر منهم واخذنا تكسي ويه سياره حسين لان متكفي ورجعنا للبيت

غزل : بس طلعو اهلي رجعت اركض ابوس بعمار براسه وخده وايده ممصدكه عايش كدامي وهو حضني حيل
عمار : ليش هيج حبيبي كالولي شمسويه لا اكل ولا نوم وبجي وفوك كل هذا منطيه فلوس العمليه والله متت بدمي كله من ورايه عمليتج انلغت
غزل : ليش هو اني اريد الطفل المن غير لعيونك اذا انت بيك شى شسوي بلطفل فدوة الفلوس لتراب رجلك فدوة لتضوج بس صير زين والوضع يتحسن اسوي سلفه واجمع وشوي شوي اسوي عمليه كافي هسه انت كدامي عندي بلدنيا كلها
عمار : والله انتي اصيله وانيالي عليج اني اكيد مسوي شى زين بدنيتي والله جازاني خير بيج
غزل : بسته من خده وكتله خلي اصيح خاله خطيه كالت روحي لرجلج ومن تخلصين كلام وياه صيحيني

رشا : كلمن رجع لبيته وحياته مر شهرين والوضع متأزم وشهداء زادت والجرحى بالالاف وضع البلد يوم بعد يوم للاسوء ودخلنا السنه الجديده 2020 رقم مميز سنه من بدايتها كوارث وغريبه ومرت الايام
شعلان اجه مرتين شاف فرح وراح وشرطت من يجي يشوفها كون اني مو بلبيت حتى مااسمع حتى صوته

واجه المجان متوقع كورونا والحجر الصحي خله الناس كلها بخوف وانقسمت الناس نوعين قسم خايف وحذر من كورونا وملتزم وقسم ثاني اصلاً ممعترف بوجود الفايروس
بلنسبه النا اكثر شى كنا خايفين على بابا وعمه لان عمرهم جبير وماعدهم مناعه نمشي ونعقم صار هوس بينا محد يطلع ونخاف على جهالنا الكل مرعوب اخاف يصير بيه

ريم : متروح للعزيمه
حسين : شبيج ريمو اكلها هو غدا وارجع
ريم : اكيد امك دازه على نورس وعيالها
حسين : وشكو بيها
ريم : شلون شكوو بيها وحماتها الي امك رادتها الك جايه ومكيف حضرتك بيها
حسين : والله مالي دخل بيهم واني مااريد اروح بس انحرجت لان ابويه كال لعم نورس حسين راح يحظر الغدا
ريم : يعني الله اكبر حجر وفايروس والناس خاتله وتباعد اجتماعي وامك تريد تجمع راسين بلحلال
حسين : هو غدا قابل شكوو
ريم : هااا يعني متكدر متروح
حسين : لا مااكدر
ريم : اجي وياك
حسين : مستحيل
ريم : ليش يمه
حسين : متكعدين راحه اعرف بيج
ريم : لتخاف اصير كيوت وحبابه بس رجلي على رجلك
حسين : ريمتي حبيبتي ابقي بلبيت اخاف عليج من الفايروس وعلى الجهال
ريم : شوف سحولي مااعوفك تروح وحدك لو على جثتي والفايروس كون بعدويني والي يكرهني كول امين كوووووول

حسين : امين عمي امين امري لله بدلي للجهال واستعجلي
ريم : صار ابو حيدوري
گلبي يلعب من امه اعرفها متكعد لهذا اصريت احظر هاي العزيمه لان حسيت الوضع مو راحه وكل شويه تأكد عليه ومن وصلنا للبيت لكيت الكل منتظر حسين وحمات نورس ضاربه طن مكياج وعلى اخر حبه من الكشخه والضحكه تارسه وجهه هيه ونوريه ونورس ومن شافني طفن والله كيفت لان حسيتهن انضربن على راسهن من شافني

نوريه : مو كتلك وحدك معزوم
ريم : ليش عمتي مترديني اجي
نوريه : ردت بس ابني
ريم : حقج والله يبقى ابنج واني هم اريد رجلي وين ميروح ويااه وهذا حقي
حسين : بدينا
ريم : حجيت شى
حسين : تعالي اكعدي تعال بابا تيم اكعد يمي
ريم : الكل سكت سلم عليه عم نورس رجال حباب ورزن وامه هم زينه اما عمي الحنين علي بس شافني دار وجهه مو بيده طيب يموت عليه واني لزكت بحسين تكول لزكت جونسن ولا عفته وحده وياهن اتغدينا وكعدت بصفه اوكله بيدي وهو يبتسم وامه واخته والكتكوت المهلس حمات نورس تريد تاكلني واني ولا يمي وحسين حاير بتيم يوكله
نوريه : اكل يمه يامربي بغير ولدك ياباني بغير ملكك اكل وعوف امه توكله

ريم : باوعت عليها وردت اجاوبها جان يكول حسين
حسين : هذا ابني واعز من حيدر هم واذا ماهو ياكل ويشبع اني مااكدر اكل اكلي انتي يمه ولا تهتمين
ريم : باوعت على امه عوجت حلكها ومعجبها الكلام اني اوكلك حبيبي وحطيت اكل بحلكه وهو ابتسم وهمس ساسوكي هدي اللعب
ريم : باوعت عليه بمسكنه وكلت هادئه لعيونك حبيبي وابتسمت عبالهن يتغزل بيه ميدرن حسين ايده على گلبه لا اتعارك

كملنا الاكل وشكد حاولن يسحبن حسين مني ويكعدن ويااه وحدهن مخليتهن وره ساعتين اجت نوريه تركض كالت الحجيه تخربطت
اني بدون مااقصد كلت منو هاي الحجيه
نورس : بيبيتي انعام شبيج نسيتيها
ريم : ياااا ليش بعدها عايشه
حسين : ريم
ريم : ياعيونها

حسين :كاافي يووم حضري بيبي خلي اوديها للطارئ
ريم : كعدت وحطيت رجل على رجل واشوفهم شلون مخبوصين مهتميت والابتسامه على وجهي تكول عبالك اشوف فلم عربي بطوله عادل امام
وركضو بيها وعيال نورس راحو وبقيت اني ونورس وحدنا
حسين قبل ميطلع كال
حسين : ريمتي راح اعوفج هنا وياها بداعت ابوج ارجع الكه اختي صاحيه مابيه حيل اركض بيها مستشفيات
ريم : روح حبيبي اوعدك تلكاها قطعه وحده مو تفصيخ
حسين : وتالي وياج
ريم : روح لبيبيتك بلكت الله ترجعلي بخبر حلوو
عينج على الجهال
ريم : صاار تأمر امر

طبيت للبيت لكيت نورس تغسل مواعين جريت موزايه من ماعون الفاكهه الي كدامي وكعدت اكل واتفرج عليها
نورس : اكو شى
ريم : تدرين انتي الج فضل جبير بزواجي
نورس : اني
ريم : اي واكو غيرج لوما سحورتج انتي وامج مجان حسين وكف بوجهكم وتحداكم بس تره الله عادل مستحيل السويتي يمر مرور الكرام ولو بعد حين تطلع الحوبه ينورس واذا مطلعت بيج تطلع بعزاز گلبج اتذكري كلامي

نورس : وهسه شتردين
ريم : سلامتج يااختي اشتغلي يله وعفتها وكعدت اتصفح اشوف شكو ماكو
مرت ٤ ساعات بهدوء تام جهالي نامو ونورس كعدت بغرفتها القديمه واني بلصاله اتصفح
وفجأه دخل حسين وعيونه دم حمره
كمت على حيلي خيرك حبيبي
حسين : توفت بيبي

ريم : لحد يلومني ولحد يكول هذا موت واله رهبه بلحظتها مكدرت اكتم فرحتي وابتسمت بوجهه هو تفاجأ مني وضاج وعافني وراح يجيب المستمسكات
كعدت والابتسامه متفاركني هاي الانسانه سبب دمار حياة ابويه وحياتنا شفنا المر والويل منها من سمعت خبر موتها كل الي فكرت بيها شلون رب العالمين راح يحاسبها على بلاويها ومصايبها حتى تخيلت بلكبر شلون تتعذب وكل مااتخيل ابتسامتي تعلى لحد مااجه حسين وما باوع بوجهي وكاال خلي سجاد يجي ياخذج لبيت اهلج لان ورايه دفنه مااكدر ارجعج
وعافني وطلع واني هم مجاوبته ولا حتى اخذت من خاطره خابرت عمو وكتله تعال انعام ماتت هو سكت تبقى عمته وهو ابن اخوها وراها كال الله يرحمها حظري غراضج من الباب اخذج

سحبت الجنطه وشلت حيدر وتيم بيدي حتى محجيت شى ويه نورس سمعت بجيها على بيبيتها ولا اهتميت
ورجعنا لبيت اهلي وطول الطريق عمو سجاد ساكت
نزلت وصارت عمه نهر بوجهي مرات الواحد يجي لحظات الثول اني من هاي اللحظات الي صارت وبوجها ابتسمت وكتلها انعام ماتت نسيت هي امها وجان تعيط ومن عيطتها تذكرت خرب حظج ريم ودك لطم وتصيح يمه وتبجي طلعت رشا تركض وبابا

حجي طه : خير ياستار
نهر : ماتت امي طه مااتت وهي مراضيه عليه
حجي طه : لا اله الا الله ودنك راسه ولزمه وكعد متحمل يبقى واكف وعمه بلكاااع تلطم وتحاول رشا تسكتها
منظر عمه وانهيارها واحساسها بلذنب بأن ماتت امها وهي مراضيه عليها يقهر متحملت تأذي نفسها وعطت حيل بيها
ريم : ياام هاي الجاي تلطمين عليها وراح تموتين نفسج من وراها مو هاي نفسها الي طردتج من بيتها وحرمتج من ورث ابوج مو نفسها الي تشمتت بيج من اتزوج عليج رجلج وخلتج علج بحلك كل نسوان المنطقة مو هي الرادت تطعن بشرفج بس حتى اتركين طه وبناته
عدا سوايتها بأبويه ودمرت حياته وحاربته بناته وبرزقه حتى احنا ماسلمنا من شرها هااج هاي اثار امج الجاي تلطمين عليها وطلعت كل ايدي وشوفتها البهاق الباقي
شوفي بعينج امج بلا رحمه حركت بنات صغار ولا اهتمت حتى بس تحرك گلب اخوج انطيني حسنه وحده سوتها انعام حتى تستاهل كل هذا اللطم والحزن
نهر : ولج هااي امي تعرفين شنو امي
ريم : لا والله مااعرف لان مع الاسف الله رزقني ام مثل امج هم متخاف الله لهذا مااحس بمشاعر اذا ماتت امي

رشا : كافي ريم عوفيها
ريم : دنكت بمستوى عمه وكتلها ابجي والطمي بس ميشفع الها سوايتها بأبويه وبينا ومو كل ام تحت اقدامها الجنه واذا هي مراضيه عنج تره رب العالمين مراضي عن امج ولا محالله ولا مبريه الذمه بكلشي سوته انعام بينا
رشا : دفعت ريم وصعدتها كاافي
ريم : مااريد تبجي عليها
رشا : شبيج قابل بيدها تعرفين عمه شكد گلبها رهيف عوفيها تبجي هسه تتعب وتسكت
ريم : انقهر من اشوفها بهذا الحال
رشا : لتزيدين أذيتها وعوفيها اني موقف بابا غريب حسيته انقهر
ريم : ذوله راح يموتوني بعد كل السوته مقهورين عليها
رشا : همه طيبين مو بيدهم وانتي ارجعي نومي جهالج تره تعبانين
ريم : مااشي

رشا : نزلت عليهم ولكيت بابا حاضن عمه وتبجي وهو عيونه تنزل دمع اووف ياحنيتكم رغم كلشي حزنو عليها
سليل : اجه سجاد بلغني بوفاة انعام وهو غير السكوت اي شى مبدر منه وكال لازم احظر الدفنه تبقى عمتي ولخاطر حسين مااعوفه وحده وعرفت مرجع ريم لبيت اهلي
رحت لاهلي وشفت ماما نهر وبابا متأذين حالي حال خواتي تفاجأنه بيهم يمكن لو احنا مننقهر بس كلمن وطبعه
بابا عفيه ليصعد ضغطك

حجي طه : لا بنتي مابيه شى
رشا : شراح تسوون
نهر : اروح وياهم اني بيدي اغسل امي مااخلي الغريبه تغسل الها
سليل : قصدج نوريه
نهر : اي مااخلي واشواق مسافره بس اني موجوده ولازم اروح
حجي طه : مااعتقد علي يقبل
نهر : هو بكيفه غير امي اطيح حظه والله اخزي كدام الناس
حجي طه : نخابر حسين يبلغ ابوه بالاول يله اوديج
نهر : خابرة فدوة
رشا : اتصل بحسين وكان توقع بابا صحيح مباشره كال عمو علي لتوصل ولا تجي لان امي وصلت متوكف نهر على جنازتي وهذا الشى أذاها لماما نهر كلش

اخذناها لغرفتها وحاولنا نهديها وتوضت وتقرا قران وتبجي
سليل : رايحه لريم اشوف اخاف بيها شى
رشا : روحي اني ابقى يم عمه
سليل : طلعت من غرفه عمه دخلت لغرفه ريم لكيتها حاطه الهتفون بأذنها ومبتسمه
هااا خبالو الدنيا محتركه وانتي فرحانه
ريم : الموت مابيه فرح اعرف بس هاي الانسانه سبب تعاستنا شتردين احزن واكطع روحي والله ماتت ليش اصير بوجهين هذا واقع اني فرحانه ولحد يدخل رجاءاً
سليل : لخاطر ماما احترمي حزنها
ريم : تره مجبت فرقه واردح واهلهل بس مبتسمه
سليل : والله وجهج يطك منه الفرح
ريم : الله يجعلني دوم
سليل : لتنسين رجلج هسه متإذي عليها
ريم : من حقه دللته وتحبه قابل حركته مثلنا لو لزمته الشارع مثلنا كلمن ومشاعره هو هم لازم يحترم عدم حبي لهاي الانسانه وهو اكثر واحد يعرف شكد تأذينا منها مو من حقه يطلب مني احزن عليها

سليل : الله يكملج بعقلج وتعدي هاي المده على خير
ريم : ولج والله ربج كريم ورحيم شفتي حتى فاتحه ما الها كورونا وماكو فواتح راح تندفن وحدها وحتى محد يحزن عليها عبالج نوريه ونورس يكطعن روحهن مثل عمتي وربج يومين وينسوها اصلاً خلصت نوريه من خدمتها
سليل : بس انتي هم على كيفج
ريم : عود ابتسم بهدوء تدللين ام زيون الورده
سليل : شاخطه وربي هاي البنيه عفتها وطلعت
نزلت لبابا جان كاعد بلغرفه وصافن ودمعته بعينه بست راسه وكعدت يمه
هاا بابا حبيبي شلونك
حجي طه : الْحٍمَدٍ للـّہ
سليل : حاسه بيك وبقهرتك بس متوقعت راح تتأثر هلكد
حجي طه : رغم كلشي جنت بيوم من الايام اصيح الها يمه سنين واني عبالي هيه امي
الله يرحمها راحت لدار حقها
سليل : فدوة اخاف على ضغطك ليصعد
حجي طه : لتخافين بس عينج على امج لتتعب
سليل : صار حبيبي

يومين مرت وعمه تعبانه وشوي شوي كدرنا انطلعها من جو الحزن الي هيه بيه واحترمنا حزن عمها على امها
الكل ساكت وملتزم الهدوء وماكو شى يضل على حاله بسبب الحجر وكعدتنا بلبيت حاولنا نعدي يومنا رغم سجاد تأذه لان سد المحل وبابا هم سد المطعم وهمه ناس كسبه بس الْحٍمَدٍ للـّہ مشت الايام وعايشين على الموجود الله يساعد الي ماعنده
ريم : رجعت لبيتي وجان حسين زعلان مني منسى علامات الفرح بوجهي حتى البقاء بحياتك مكلتها وهذا الشى الي أذاه
حاولت اراضيه وكعدت ويااه
حبيبي حسوني سحولي سحليه شووو باوع بوجهي
حسين : عوفيني ريم وروحي لجهالج
ريم : كعدت بصفه واحجي ومااباوع بوجهه ليش تلومني ياعيني انطيني شى زين سوته انعام حتى اترحم عليها
حسين : اقلها لخاطري
ريم : خاطرك على راسي بس الشفناه منها يخليني مو بس افرح لان ماتت مو زين ما هلهلت

حسين : لهاي الدرجه انتي قاسيه
ريم : مو قسوه وعيونك بس الشفته منها خلاني اكره كلشي يخصها وتمنيت اصلاً تتعذب اكثر يله تموت درت وجهه حسين عليه وكتله
خلصت طفولتي اتعذب بسببها وحتى من كبرت تشوهت بسببها ويوم مردت انسى كلشي حركتك ضدي وطفت فرحتي بيك وفصخت خطوبتنا وخليتني اعيش ويه رجال غيرك وعشت لحظات الموت وفقدان الضنى بسببها اسكت حسين فدوة لو عشت ربع الي عشته جان اتحداك اذا نزلت دمعه عليها حسووو بيه كااااااااافي عشت بدلال منها وعز لتجي تقارن افعالها وياك بفعالها ويانه فوك كل السوته جاي زعلان مني لان فرحت بموتتها تره اني مو ملاك ولا وجهين حتى اتصنع الحزن من وحده دمرت عمرري وكمت ابجي بعالي صوتي وجان يحضني

حسين : كاافي حبيبي لتبجين
ريم : ابجي لان زعلان مني مااكدر احزن عليها اترجاك افهمني
حسين : هذا هو حبيبي براحتج بس بعد لتجيبين طاريها لا بخير ولا شر
ريم : مسحت دموعي وكتله يعني مزعلان
حسين : اكو واحد يزعل من روحه بس انسيها بعد يم ربها الله يرحمها
ريم : لتخاف هذا هو هي وربها تنجاز خلي احير بأمك هي اولى بطاقتي كلها
حسين : هههههههه ااخ منج شوو تعالي ولج مشتاق لسوالفج وحضني حييل
ريم : اوووف اشتعلت الي بالي لان حرمتني منك كم يوم
حسين : هااا ولج
ريم : لتخاف مو انعام وحده بشرياني الابهر تفتر ااااخ يوم الها وافرح نفس الفرح
حسين : ولج ام لسان
ريم : عيونها
حسين : تعالي اكص لسانج
ريم : ههههههه كص هو الك

سليل : حسيت على سجاد يفتر ويلوب وكل شويه يطب ويطلع لعب گلبي ابو زيون شعندك تفتر شمسوي من مكسوره
سجاد : دومج ظالمتني
سليل : والله صارلك يومين گلبي يلعب منك
سجاد :هو يايوم ما گلبج لعب
شويه واندكت الباب وطلع ورجع طب وبيده كيكه بسيطه موصيها توصيل للبيت اني شفت مباشره بجيت

سجاد : عادي اذا متبجين يعني مو سليل
سليل : اروح فدووة للي يذكر ميلادي واخذت الكيكه من ايده وحطيتها على الميز
سجاد : كل سنه وانتي سالمه يانفسي وباس شفايفها بوسه هادئه
سليل : اوووف اعشق هاي الكلمة وحضنته وابوس بيه والجهال يضحكون
سجاد : هااا بعده گلبج يلعب
سليل : لا وابتسمت
سجاد : جذابه يومين وترجع ريمه لعادتها القديمه

سليل : شسوي احبك مو بيدي
تقرب حضني حيل وكال انتي بنتي قبل متصيرين مرتي حطي هذا الشى بالج
سليل : وانتي عمو الوحش وعلة گلبي وتعب السنين شكد احبك ياسجاد روحي معلكه بيك
سجاد : متنومين الجهال
سليل : خطيه خلي يحتفلون ويانه
سجاد : يله نحتفل سوه وبعدين عندي حجي وياج لازم نحل قضيه الفايروس المتفشي بلعراق ونلكه لقاح اله الوضع صار خطير مينسكت عنه
سليل : هههههههههههه ولا تخلص مناقشاتك
بيومها جنت طايره وفرحانه حيل لدرجه للفجر باقين كاعدين سوالف وضحك وهاااا ودلع

بعدها بيومين كاعدين عند اهلي كلنا اجتمعنا بابا مسوي ثواب لروح ابوه واخوه جعفر وعمه سوت حلاوه لروح امها بس ريم ولا قبلت حتى تحطها بحلكها هي ورشا
نهر : غزوله يمه صار اشهر والحمدلله صار زين عمار شوكت تسوين العمليه
غزل : الله كريم يوم بس الم ايدي تعرفين عمار كاعد والوضع ميساعد وهسه على اساس التعيين راح يطلع بلكت اسمي وياهم معينين محللين
نهر : يـِْ♡̨ـِْا رَبّ يمه يسهلها عليج عندي ذهابتي اخذيهن وسوي وبلا نقاش
غزل : الله كريم

نهر : ونعم بالله بس تخلص سالفه كرونا تسويها وبلا عناد
غزل : اسويها ماما والله اسويها بس خلي عمار يرجع للشغل وبابا يفتح المطعم ويوكف على رجليه واسوي
نهر : الله يفرجها عليج يمه بجاه الحسين
محسن : ولك طه تعال نلعب طاولي اغسلك بيه صار هواي مضاحك عليك
حجي طه : وذاك اليوم منو غسلك
سجاد :ابو فيصل تره طه لاعب محترف نسيت كم مره غلبك
محسن : بلغش هو لو ما يغش ولا يفوز
حجي طه : نلعب ونحكم
صوت عياط عمو محسن بعد كل داس خساره ويه بابا يخلي الجهال تكمز وتضحك لان يحير شيسوي حتى الجهال يشيلهم ويشمرهم وهمه مكيفين عليه
عمو محسن دوم يمنا اغلب وقته لان يضوج وحده بسبب الحجر ويطب ويطلع يكول لبابا اذا انصاب بكورونا لازم انت ويايه تنصاب قابل هي خوه لو نعل لازم كلشي سوه

رشا : كاعدين نضحك والجهال يمنا ودك تلفوني اباوع شعلان اهووو هادم الملذات
انطيت التلفون لفرح هااج ماما هذا ابوج
كامت اخذت الجهاز شوي واجت كالت
بابا مراح يجي هذا الشهر يكول عمه جنات بيها كورونا واخاف يصير بيه واعديج
ريم : كللللللللوش الساعه المباركه
جان تنشمر مخده عليه انداريت عمو سجاد خزرني
كتله وبعالي الصوت والله لو مو تخزرني لو تسحلني ذهاباً واياباً اهلهل وافرح وادبج للصبح

حجي طه : بابا هذا مرض ميصير الشماته بيه
ريم : حبيبي باباتي اروح فدوة لطولك ولگلبك الحلوو اني وحده گلبي اسود جوزو مني وهله وهله ولج رشيوه كاعده وساكته
رشا : هههههههه الله يعينك حسين عليها
حسين : على اساس انتي الفقيره كومي هزي وياها مبينه من عيونج فرحانه مفضوحه كوه هيه
رشا : والله اني بالي يم جهالها تعرف بيه احب ابنها امير اخاف يصير عليها شى وهذا يتيم وين يروح
ريم : لتخافين العاار ميموت بس خلي افرح انطو درب لام تيم خليها تلعب جوله
رشا : هههههههه وياج وياج واصفك
سليل : خواتي مو صاحيات وربي
الكل مبتسم وكاعدين على حب الله ودوم نكول ربي ادفع ماكان اعظم
الله يبعد عنا الوباء والمرض ويشافي كل الناس
ريم : وهاااا للمعلومه طابت جنات مو كتلكم العاار ميموت

الكاتبه ريام :: يله حبايب ودعو معي الغزلان وابوهم ونغلق الشباك الصغير ونترك الباقي من حياتهم الهم وماعدنا غير الدعاء رِّبًـــ♡̨ـــٍْيٌٓ يحفظ عمو طه وعمه نهر وغزلانا الحلوات وازواجهم وبالاخص عمو الوحش

ويوم ١٠/١٥ نفتح سوه الابواب الخمس
قصتي الجديده انتظروني
تحياتي لًلًـّــ💎ــجٌٓمٍَُٓيِّعَْٓ