رواية ابي والغزلان الفصل الرابع 4 - بقلم ريام هادي

ابي والغزلان
للكاتبه Reem
البارت الثالث

بارت جداً طويل لعيونكم 🌹

هاي الفتره كلش مشتهي الموت
واحس بروحي مامرتاح كلش
من شفت الزرع للصبخه مگيود
والفلاح مابي حيل يغبش
من شفت الوحل دك صدره للريح
والقداح خايف يستحي ايطش
مادام السعف يركص للـ غراب
بعد ما أمّن اكعد بالنخل عش

حجي طه : ولك شتكول
سلام : ابويه مات طه
بذيج اللحظة ركضت حافي مثل المخبل راح عزوتي وحزام ظهري راح الحنين ابويه رغم كل السواه بس جان حنين عليه وروحه بيه ومايوم قصر بحقي او كلي لا على اي شى اريده جنت احسه مو بس ابويه صديقي
طبيت وشفته مدد وصاير ثلج شمرت روحي بحضنه مثل الجاهل اعيط ذيج اللحظه فقدت كل حواسي وتركيزي بشى واحد خسرت اعز الناس خسرت سندي بلحياة وتيتمت
عياط وصياح النسوان جنت مااسمعه من كثر مفاقد شون شلت ابويه مااعرف شون انطاني گلبي اغسله وانزله بلحد هم مااعرف من كثر مامقهور حتى حچي مااحجي مقبلت احد يطب وياه غيري واخوتي من شافو وضعي سكتو غسلت اله وجفنته ونزلته كله بيدي ويه كولشي اسوي لحمي وصدري وروحي تتكطع عفت ابويه نايم وحده حاله حال اعزاز الناس تدفن وترجع وحدها اخ يلنجف شگد بيج اعزاز

نهر :
كاعده والطم على ابويه وابجي واحس الدنيا وكعت على راسنا اعرف بعد روحته راح نتأذه عامود البيت ابويه وانهد على راسنا
المله تنعي والناس تبجي الله يرحمة جبير اهله بلكوت والناس توجب ياهو الي اطب تلاچي والكل تلطم صارت صلاه الظهر الكل تصلي اليوم الثالث وحيل هوسه معارفنا هوايه
وبدو الزلم يحضرون لصب الاكل ويصيحون على البنات احسبو العدد حتى ندخل الاكل ودخل واباوع الي تتعارك على الماعون والي تكول لحمتي صغيره والثانيه تصيح ماكو خضره وهاي تكول فد خبيزة من يمجن طكت روحي وكمت اعرف بكل الفواتح هيج اتصير بس اني مااتحمل هيج شغلات گلبي يكوم يوجعني احنا نبجي دم على ميتنا وهنه حايرات بلكمه تكول مماكلات لحم بحياتهن

ادخل لغرفه ابويه وصلت قريب اله اجتي كرابتنا خلف الله عليهن شايلات الفاتحه شيل
ولج نهر تعالي الحكي
نهر: شصار
اشواق اختج ومرت اخوج اتعاركن بلمطبخ راح تعلك ونصير علچ بحلك النسوان
نهر : ركضت طبيت للمطبخ واشوف وحدتهن رافعه الدشداشه ومتحزمات وناس تهدد بناس عطت بيهن شكو
اشواق : تعالي شوفي سندس اتضم اللحم متستحي
نهر : وانتي شكعد تسوين بلمطبخ مو عيب عايفه العزه وحايره بالاكل ولج هذا ابوج المات متستحين

شفت اثنين من كرايبنا واكفات يتفرجن يموتن على هاي السوالف
من رخصتكم عمه اريد احجي وياهن
يا يمه قابل احنه غربه
نهر : ميخالف عمه من رخصتكم
اوف شكد يحبن هاي السوالف طلعن سديت باب المطبخ

بله انتن متستحن شتكول علينا الناس
سندس : كولي لأختج ابوها ميت مصار ٣ ايام وحايره تفتر اضم لحم
اشواق : هو اني لو انتي كل شويه راكضه ماخذه جدر اترسي لحم وادزي بيد جاهل لبيتج مرتين سويتيها عبالج مشفتج
ولج هاج شوفي هذا الجدر سلام جابه كال ضموه وهي نصه فرغته
نهر: من طيح الله حظجن اي والله يعني هيج عيونجن ضيكه

سندس : هاي جذابه هي كم لحمه صغار اخذتهن لأخوج اكيد مأكل وبليل ارجع تعبانه منو يسويله عشا احمي وياكل
اشواق : وطه ياكل جدريتين لحم
نهر : اشش كافي لا اركع راس براس
ولج اشواق ابوج مات قبل كم ساعه وحايره بطنج صدوك تحجين
اشواق : اني شعليه لتذبيها براسي هاي امي كالت شوفي بت الخبازه شسوي وحدها بلمطبخ والكل كاعد يتغدا بس هي بقت تفتر روحي شوفيها واجيت وشفتها تضم بلحم
نهر : اخ يمه اخ

سندس : وشبيها بنت الخبازه عيني مو مرت ابنها بله مستحت على شيباتها ورجلها مي كبره منشف وادز بيج حتى تراقبين هيج الموت ماله حرمه عدجن
اشواق : على اساس انتي شونج يمه الحرمه والخجل ينكط منج ولج شوفي حالج شون مهتلفه ومشايفه وتتختلين حتى تضمين اكل و لتحجين على امي تسوه راس امج وعشيرتج كلها انتي شنو شايفه نفسج علينا
سندس : تسوه راس امي مو شو تعالي

وجان تجرها من شعرها وانبطحن بلكاع وناس تضرب ناس وجان اجر الجفجير وعلى راسهن وخرن حقيرات فضحتنا من ضربي على الراس وحده هدت الثانيه
سندس : ولج نهر تضربيني واني حامل
نهر : واكسر راسج انتي واشواق لان اثنينجن متستحن
سندس : خلي يجي اخوج اذا ما اخلي يلعب بيجن طوبه ويربيجن
اشواق : امشي لج ام الكمل يربينا مبقى علينا بس طه والله ياالله

نهر : انجبي انتي الثانيه وامشي ولي اكعدي يم امي حتى حرمه ميت ماعدجن خلي يخلص العزا واني اعرف شون تفضحنا هيج
سندس : يابه دولي عودتهدد خلي واحد يلزم شعره مني اخلي العزا عزاوين
اشواق : اي بخبز امج والطحين مالتها ترشه على راسنا امشي لج فكر من جيتي جبتي المصايب وياج
سندس : اني الج اشواق هسه اعلمج شسوي هاي الفكر
اشواق : لا بالله شسوين سوي انتي وهذا الابسته برجلي

نهر : رجعت كفختهن وجريت اشواق لبره وباوعت لأمي بنظره ليش هيج يمه حتى حرمه لأبويه مخليتي وحايره بلحم ثالث يوم فاتحته الله اكبر شكد البني ادم كوي الموت كدامه وحاير بطنه ودنيته الفانيه

طلعت اشواق يم امي وانداريت على سندس انتي مو حامل ولي لبيتج
سندس : هلوو شنو اطرديني
نهر : تقربت عليها وكتلها
اول شى نصي صوتج كافي فضايح ومخازي كدام الناس راح اطيحون سمعتنا علمود كم لحمه الناس جايه وتحسب الف حساب النا من وره المزعطه انصير علچ بحلوكهم وثاني شى منريد شى منج روحي لبيتج
سندس : وانتي منو واطرديني على شنو شايفه نفسج بابا هذا البيت بيت رجلي ومن اليوم الي الكم بيه رجلي مثله بيه واطب واطلع على كيفي واريد اشوف ياابن امه وابوه يطلعني منه حتى احركه عليكم

نهر : لتحجين شى اكبر من راسج لو ما بحلكي تراب وابويه هسه مدفون جان راويتج منو ابن امه وابوه وشون اطلعج منه نصيحه اخذيها مني وهاي لخاطر اخويه طه لان احبه احترمي نفسج واطلعي بكرامتج احسن ماتصفالج انعام وتخليج تندمين عاى اليوم الفكرتي ادخلين بيه بهذا البيت
سندس : هلوو هلوو وانعام منو يمه وتطردني مثل ما الها بهذا البيت لرجلي هم
نهر : الله مطولج ياروح لتحجين شى اكبر منج لو ما انتي مرت طه وطة بعزيت روحي جان الي تصرف ثاني وياج
سندس : اسمعي نهر طه رجلي وكل هاي الاملاك اله حصه بيهن حاله من حالكم والي اله هو الي واني مااطلع من ملكي

منحس غير انعام فوك راسنا
انعام : ياملك ام الوصخ ولج مبقت عليه بس بنت الخبازه بت الحافي امشي اطلعي من بيتي لا انعل سلفه سلفاج
نهر : كمت الطم على وجهي يمه عيب منا الناس تخزينا فاتحة ابويه راح تنكسر عيب النسوان تباوع
انعام : اسكتي انتي الثانيه خلي اشوف هاي الوصخه واكفه وتشمرين ولسانج اطول منج ولج انتي منو وتحجين بلحصص والورث
نهر: يمه متفهم وراح تروح لبيتها ارجعي اكعدي يمه النسوان مو راح نتعزى ونتصخم مو وكتها
سندس : لو ما مره جبيره وشيباتج بكد عمري جان عرفت شون اجاوبج بس مااريد طة يزعل مني
انعام : امشي لج انتي وطة ونعالي امشي بره لا اسحل الطرمه كلها بيج واشوفج ياام الاملاك انعام شسوي

سندس : خلي يجي ويشوف امه شون تحجي عليه الخابصني بيهم اهلي واهلي ذوله اهلك ياسبع
انعام : يله بره وتأشر بيدها ولي دوختينا الله يشيلج
نهر : سحبتها من دشداشتها امشي كافي يمعوده صوتج الناس بدت تباوع شوفي الولد اجوي يركضون
سلام : شصاير حسكم للجادر واصل متستحون
سندس : كول لأمك هذا الحجي الي رجلها مصارله ساعات من مات وبحلكها عود تراب عشتوو عافت العزا وتفتر ورايه وفوكاها تطردني من البيت
سلام : روحي لبيتج سندس عندج رجال ونحجي وياه

سندس : وليش يمه ماعندي لسان واحجي
انعام : هاي متريد تطلع هيج تريد اسحلها من شعرها وامسح الفاتحه كلها بيها امشى زركه هم حاسبه روحج مره وتتشرطين وتحجين لو منج ابوس ايدي وجهه وكفه لان رضا بيج طه بس هو هم غمه وقبل بوحده مثلج لا خلقه ولا اخلاق
نهر : امشي يمعزايه وسحلتها وهي تأشر بيدها وصوتها سمع الي بلطرمه كلها
عبالج اعوفج تتهنين بيه بعيني اذا ماافلش هذا البيت على راسكم ما اتسمى سندس وشوفي الزركه شسوي

نهر : دفعتها بره ولزمتها من ايده وگبل لبيتها بصفنا حيل لزك والرياجيل مگلوبه بره الله ياخذجن فضحتنا فتحت الباب الخارجي ودفعتها داخل بيتها وعطت بيها بس كافي متعبتي نسيتي انتي حامل تهدي هداج الله
سندس : انجبي واطلعي كله من وراج
نهر : فوكاها صارت من ورايه كتلج اطلعي بكرامتج بس انتي اااخ منج تحبين الاهانات
فوك ما واكفه بعزه ابوجن هيج تسون بيه بس عندي رجال هو يعرف شون ياخذلي حقي
نهر : تقربت منها وكتلها شكد شايفه وكحات مثلج مشايفه يعني لسانج طويل وتتجاوزين على الاكبر منج وفوكاها تردين تسوين مشاكل بين الاخوه شراح تستفادين من هاي الهوسه كلها
سندس : والله اني مندكيت بأحد انتم تحارشتو بيه اجتي اشواق واستلمتني عياط وانتي وامج كملتوها
نهر : انتي مو صاحيه يعني هذا وقت تتعاركين بيه لو ابوج الميت راح تسوين هاي سوايتج ولو عندج احترام لرجلج جان سكتي هذا ابوه عمج وجان لازم متسوين مشاكل بس شون متكدرين الخباثه بدمج
سندس : نهر اطلع لا افرح امه لا اله الا الله عليج وحدتجن لسانها شطوله
نهر : خلينا اللسان الكصير الج وطبي لبيتج وبعد لتوصلين هناك

طلعت وركعت الباب الله يعينك على ما بلاك ياااخويه مو مره حيه وتمشي
دخلت للبيت صارت بوجهي اشواق سحبتها للغرفه مال سلام شو تعاي طبينا وسديت الباب
اشواق : ااخ عوفيني
نهر : سمعي لج اذا سويتي بعد مشاكل والله اطيح حظج
اشواق : مالج دخل بيه انتي مو وليه امري
ابويه ومات وهسه امي مسؤوله عني
نهر : طايحه حظ من يومج تموتين على الخباثه
اشواق : خليت الطيبه الج ام گلب الحنين
عافتني وطلعت كعدت على جربايه سلام كمت ابجي وين عفتنا يابه هاك بفاتحتك ويتعاركون بعد اشهر شون راح اشوف ايام سوده اعرف اني دومي عكس امي بكولشي وهاي اشواق ويه امي تكول حزب عدنا شراح يخلصها وياهم
مسحت دموعي وطلعت لان صاحو راح يسون الختمه اباوع على امي ادك وتلطم الي يشوفها هسه تكول راح تموت وره رجلها من القهر واللطم والدموع عشره عشرة
ميدرون قبل شويه جانت تتعارك على اللحمه وصوتها مسمع لسابع جار

ساعات مرت صعبه ومتعبه وتم كولشي فاتحته جانت بذاك الوكت من اكبر الفواتح بلمنطقه كلها عراضه وشيوخ من كل المحافظات حتى بلبيت جانو هواي محافظات يباتون يمنا تالي الليل لمو الجادر واني صعدت لغرفتي مااتحمل من التعب احس روحي شويه واخرب
سمعت صوت اخوتي دخلو للبيت نزلت كلت خاف تسوي مشكله امي من وره سندس وخطيه طة مكسور ومو حمل قال وقلت سألت عن طه كالو راح للبيت اوف الْحٍمَدٍ للـّہ بقيت كاعده بلمطبخ افكر بحالنا وخاصه ب طه

حجي طه : واكف بلفاتحه واباوع على الناس التجي وخاصه اهل امي شفت خوالي اثنين اخوت رازقيه وسلمت عادي مكدرت اخذهم بحضني واكولهم اني ابن اختكم اني ابن رازقيه مراح يصدكون الكل يعرف اني ابن انعام وماعندي دليل يثبت كلامي بس كلام ابويه وابويه راح لدار حقه
وشستفاد هسه اذا فتحت الموضوع بس راح اشوه صورته الله يرحمه ويجوز يكذبوني ومحد يصدكني مااعرف طبيعه نفسيتهم شنو

٣ ايام بلفاتحه وعيني ماغمضت النوم موتت ابويه كسرتني شكد جنت خايف من هذا اليوم احس روحي ضليت وحدي سندي بلدنيا راح
واكف ثالث يوم الفاتحه بلجادر والدنيا مگلوبه شيوخ واهل وجيران ولمحته من بعيد يدفع بيه واحد بلعربانه ركضت عليه
هاي شجابك سيدي
عمر : بعدك تكول سيدي مو احنا خارج الخدمه
بوسته الْحٍمَدٍ للـّہ على سلامتك
عمر : الله يسلمك البقيه بحياتك سألت عليك وكالو مجاز بس اليوم الظهر اجوني الولد جنود اثنين ورجعت سألت كالو ابوك توفى اخذت العنوان منهم واجيتك خفت لا خلصت الفاتحه
حجي طه : جيتك على راسي بس ليش كلفت نفسك وانت مريض
عمر : شون ماااجي للانسان الضحى بروحه حتى ينقذني اني عايش اليوم بسببك هذا اخويه عمران
حياك الله
تفضلو وبقو بحدود نص ساعه وراحو جيته جانت غاليه عندي هو خوش رجال ابن اصول
بعدني احجي ويه الناس اجه سالم گالب وجهه
حجي طه : شكو
سلام : مرتك شكد وكحه لخاطر النبي
حجي طه : اهوو شبيهه
سلام : يابيها گلبت الدنيا عركه هي وامي
حجي طه : وامي بيها حيل تتعارك وبهذا وضعها
سلام : اني شمدريني بس انت الزم مرتك شويه شنو هاي الجساره العدها
حجي طه : كافي منا الناس بعدين اعرف شصار

كملت الفاتحه وشالو الجادر واني حيلي مهدود كالو تعالو نتحاسب كتلهم باجر لان تعبان
دخلت للبيت هدوء وماكو احد صحت سندس وينج
سندس : ها عيني الله يساعدك
حجي طه : ويساعدج بس طلعيلي داخليات اريد اسبح
سندس : حاضرين وهسه احضرلك العشا
حجي طه : مجوعان
سندس : شون ياعيني متاكل
حجي طه : الزاد بحلكي زهر اريد اسبح وانام
مشيت خطوتين وانداريت صدوك تذكرت شغله
ليش متعاركه ويه امي اليوم
سندس : شبسرعه بلغنك بهاي السوالف استاديه بس اكيد مكالو شنو السبب
حجي طه : اني سألتج الج مو الهم شصار وتعاركتو
سندس : ليش محجولك شسون بيه وشون طردني من بيتك
وحطيت ايدي وابجي
حجي طه : هاا بيتي شمرت الخاولي على القنفه وكعدت بصفها فهميني شصار
سندس : امك بعز العزه ادز اشواق عليه اخاف ابوك شى او اخذ شى واني بس اخذت ماعون صغير بيه لحمه علمود كلت اخاف تجوع بليل وماعندي عشا اسويلك وهاي استلمتني حاصل فاصل وكملتها نهر وختمتها امك وطردني تقبلها هاي تاليها انطرد من بيتج

حجي طه : متأكده هذا الصار
سندس : قابل اكذب انت لو شايف شگالت امك عليك يبوو حجي ميلبس عليه ثوب حتى غلطت عليك
حجي طه : نفخت بضوجه استغفر الله يعني احنا بيا حال وانتم تسوون هيج موعيب منا الناس وخطار معرفتي تلزمين لسانج
سندس : شو انت ذبيتها براسي اكوله لعبن لعب بيه وحده ترفع وحده تكبس علمود لحمه
حجي طه : احد طلب منج اكل
سندس : هاي فوك زينيتي طلعت اني الموخوش وتعال كولي شو لا تعصبت ولا رحت كسرت البيت على راسهن اكوله طردوني وغلطو عليك وانت حايرلي بالزمي لسانج غير مرتك تجاوزو عليها وانت بارد ثلج

حجي طه : يعني ابويه قبل شويه شلنا الجادر مالته تردين اروح اتجاوز عليهن وهنه بهذا الحال ومنو يكول كلامج صحيح غير اسمع الموضوع من الطرفين لو هي بس هوسه
سندس : راح تخبلني انت اكولك طردوني طردوني اغنيها الك
حجي طه : اذا متجاوزه طبج مرض واذا ممتجاوزه اخذلج حقج بس بلعقل لتنسين هاي امي
سندس : واني مرتك والي كولشي تملكه
حجي طه : وكفت شملك
سندس : نسيت البيت وكل الاملاك الك حق بيهم وريث حالك من حالهم والك حصه بكولشي
حجي طه : يعني صدوك انتي ناقصه عقل ومتستحين ولج تراب ابويه بعده بهدومي وتحجين على الورث والحصص من هيج طردوج اكيد نفس هذا الحجي سمعتي الهم
لو منهم اطيح حظج مو بس اطردج
ولمزتها من ايدها حيل واجر بيها بقوة اسمعي لج هذا الموضوع متفتحي ابد واذا سمعتج مره ثانيه حاجيه بيه اكسر الحزام على ظهرج اني بعمري ما ماد ايدي على مره لتخليني اتعامل مثل مااتعامل ويه الحيوان جري عدل ولوما حامل واخاف علي بطنج جان عرفت شون اجاوبج

سندس : اااخ عوفني جتفي خلعته
حجي طه : ومره ثانيه اخلع راسج من جسمج انجبي واسكتي
دفعتها ومشيت

هاا نسيت اكولج شى البيت الكاتله روحج عليه بأسم امي من سنين
سندس : لطمت على خدودها صخام بوجهج سندس لا اكيد تريد تحرك دمي
حجي طه : وليش احرك دمج اني مااكذب وتكدرين تسألين من ٢٤ سنه ذاك البيت بأسم انعام لهذا لدوخين نفسج وياطابه وياطالعه وحجه البيت وليش منعيش بيه هذا بيتج وانجبي واكعدي بيه واحترمي نفسج
سندس : وانت ليش مكتلي ذاك البيت بأسمها قشمرت عليه مو عيب عليك
حجي طه : ليش انتي قبلتي بيه علمود البيت
سندس :متوقعتك حافي وماعندك شى عبالي براسك خير وكلك فلوس
حجي طه : حافي مو جان الزمها كطعت شعرها تكطع واضرب على راسها وتعيط
سندس : لك عوفني الله لا ينطيك
جريتها من شعرها للغرفه وفتحت الكنتور يله لج البسي اليوم متضلين هنا
سندس : اني ماابقى بهذا المهجوم عش دجاج ومان عليه بيه ودفعته
حجي طه : عفتها تبدل واني نار بيه اذا تحجي بعد حجايه يمكن ادفرها حتى الطفل اموته بطنها

سندس : اني اروح لا خلف الله عليك
حجي طه : اي مو بكيفج ساعه ١١ بليل موليه لأهلج حتى خوش تكذبين عليهم يله امشًي
اخذتها مشي بليل وهي تمشي ورايه وتبجي وصلنا لبيت اهلها دفرت الباب حيل وطبت وطلع اخوها وامها يركضون
ام سندس : دخيلك ربي شصاير ابني
حجي طه : هاي بتكم يمكم متصيرلي مره طول ما هذا لسانها وهاي اخلاقها
سندس : وشبيهه اخلاقي مو احسن من خواتك الحقيرات الشايفات نفسهن
ام سندس : ولج اسكتي يمصخمه
روح يمه لبيتك ومن تهدى النفوس ادزها لبابك
سندس : ماارجع لو يموت
حجي طه : لدزيها اني اصلاً ملتحق عكب باجر وشهر ونص يله اجي خليها يمج
سندس : هاي هيه هذا القبضته شمرتني يم امي حتى متصرف ولا فلس من يومك كحف وبخيل
جان تضربها امها على حلكها كامت تعيط وتبجي وطبت جوه واخوها الصغير وراها

سندس : يمه طة احسبها عليه هاي صغيره وطايشه ومتفتهم
حجي طه : ياصغيره هاي عمه توديج وتوديني للبحر وترجعنا عطشانين بتج ماراضيه بعيشتها رحمه لأهلج قنعيها وعقليها اذا تبقى بهذا الحال متصيرلي مره بعدنا بلبدايه وهيج تتعارك وتهد وتتجاوز
وره سنين شسوي اني تعبان وحيلي مهدود وظهر انكسر وهي مكان متراعي الله بيه تزيد همي
ام سندس : روح يمه لدوامك وترجع بلسلامه وعوفها يمه ومن ترجع النا حجي
حجي طه : هاج عمه
ام سندس : شنهي
حجي طه : مصرف الها اخاف تحتاج شى
ام سندس : مستوره ابني توكل لدربك وليضل بالك
حجي طه : لا هي مسؤوله مني خليهم يمج متعرف تتصرف اخذيهن عمه حتى ارتاح
ام سندس : صار وليدي بس تهدى وكول ياالله وارجع لبيتك وارتاح وراك تعب يعينك الله على ايامك
حجي طه : الله كريم اروح اني
ام سندس : مودع بالله وليدي
حجي طه : رجعت اتمشى ساعه حدود ١٢ بليل واباوع الجو طيب نهايه التاسع بعد يومين ندخل شهر العاشر ١٩٨٢ وحاير وافكر شون بلضيم الرايحله عكب باجر الالتحاق مالتي وخايف ليش انكر جسمي يرجف الشفته ذيج المره خوفني الموت قريب بكل وكت هناك بس شسوي مجبور

دخلت للبيت دورت على ملابسي زين مرتبات بلجنطه بس الجو هناك بليل بيه كرصه برد فتحت الكنتور ادور هدوم الشتوي ماكو صعدت للغرفه الفوك مسويها مخزن فتحته لكيت جنط الملابس الشتويه طلعت بلوزات خفاف اثنين بس بيهم تايت حتى لتاكلهم العثه
لازم ينغسلون بس والله ولا بيه حيل جتوفي تون عليه
خلي انزل لنهر بلكت تكدر تغسلهم
طبيت للبيت باوعت علي وسلام كاعدين بلحديقه يحسبون فضل الفاتحه عفتهم ودخلت
باوعت گلت اذا ماكو نهر ارجع اغسلهم اني لكيت نهر كاعده بلمطبخ وحاطه ايدها على خدها
شبيج يابه
طفرت من مكانها وحضنتني وتبجي
اذكري الله وترحميله
نهر : راح نضيع وراه
حجي طه : اي والله بس شنكول غير الْحٍمَدٍ للـّہ على كل حال اكعدي ارتاحي ليش منايمه
نهر : مجاني نوم وانت بيك شى سمعت صوت عياط توقعت سندس قريب الصوت من غرفتي
حجي طه : اعرفج متكذبين عليه احجيلي شصار
نهر : وبديت اسولف كولشي وداعتك وروح بابا هيج صار
حجي طه : لتحلفين ميحتاج اني مصدكج
نهر : الله يساعدك عليها شون جارعها
حجي طه : يمي متسوي هواي شغلات او على الاقل تضبط نفسها هي الظاهر راسمه على العالي واليوم كسرت اول امل الها
نهر : دير بالك فدوه انت مناقصك اذيه
حجي طه : والله لو ما حامل واخاف الله اخاف لا اكسر بختها باجر اطلكها بس والي بطنها شون
نهر : اريد اسألك شغله ضاله بالي بس اخاف تزعل
حجي طه : لا احجي ماازعل
نهر : هي تدري بأن ماما مو
حجي طه : مو امي هذا قصدج
نهر : عفيه لتزعل مني
حجي طه : ليش ازعل هذا واقع بس اني مكايل الها سندس مراهقه ومتفتهم وراح تلغي هنا وهنا ومناقصنا وجع راس
نهر : اي فدوه لعمرك لتكول ابد الها خلينا هيج مستورين
حجي طه : الله كريم اكولج نونه تكدرين تغسلين هذني البلوزين والله تعبان وجتوفي تون عليه
نهر : ياسوده عليه من عيوني
حجي طه : هاي وديتها لأهلها من انزل اجيبها
نهر : اي احسن لان اذا بقت هنا راح تسوي مشاكل عاشت ايدك
حجي طه : من ينشفون باجر ذكريني بيهم لان هناك بارده
نهر : تروح وترجع سالم غانم وبكل خطوه سلامة ياروح اختك
بست راسها وطلعت صارت بوجهي اشواق
هلو طه
حجي طه : هلو شوقه شونج
اشواق : الْحٍمَدٍ للـّہ شفت مرتك شسوت اليوم
حجي طه : انتي هم مقصرتي
اشواق : هاا يعني اني موزينه ومرتك الزينه
حجي طه : كافي لغوه وروحي نامي مو وكت هاي السوالف
اشواق : اي عيني اكيد ادافع عليها
حجي طه : اشواق شنو يحكج جسمج قبل شويه سحلت ذيج تحبين اسحلج مثلها
عافتني وطبت لغرفتها تركض
نهر هنا عمرها ١٨ سنه كملت اعداديه وانعام بطلتها مخلتها تدخل كليه بحجه منو يساعدني وتعبانه بطلت واستلمت البيت واشواق بعمر سندس ١٦ سنه

رجعت للبيت سبحت ونمت حتى مااكلت
وثاني يوم بقيت بلبيت معجبني اروح لأي مكان بس العصر اجوي ناس تعزي خلصت الفاتحه بس الناس منكطعت رجلها من البيت
خلصت اليوم خطار ومجاملات لحد مرجعت هلكان ومن الفجر طلعت ذيج المره ودعت ابويه هلمره منو اودع بس خطيه جعفر لكيته واكف هو ونهر بلباب ساعه ٥ الصبح وبيدها دولكه مي بستهم ودعتهم وذبتها ورايه واسمعها تدعيلي من كل گلبها المفروض مرتي هيج تسوي بس الْحٍمَدٍ للـّہ كولشي قسمه حتى الفرح والراحه قسمة واني ممقسوم اشوفهن

مشيت لراس الشارع ركبت فورتات ولكراج العلاوي اباوع هواي جنود مثلي ملتحقين منو راح يستشهد منهم ومنو يرجع لأهله واني رجعت هلمره امشي بطولي المره الثانيه شون ارجع ملفوف بعلم لو اصلاً ميلكولي جثه
كعدت منتظر السياره تقبط وتمشي بينا للموت اسبح بسبحة ابويه واستغفر
مشينا ساعات وصلنا للمقر
التحقت حالي حال الالاف الجنود مندري شنو مصيرنا
كاعد وصافن على الفراغ الكدامي صحراء على مد البصر وصوت الهاونات البعيد الي صارت عادي عدنا اصلاً متاخذ عيونا النوم اله نسمع صوت الهبد والركع والقاذفات
اجوي جماعه من غير فرقه انقلو علينا تعرفت عليهم خوش ولد نزار ومحسن وسلمان عدنا نزار يضحك للهوا وصوته يخبل دوم يغني بليل صوته ريفي حنين من اهل الناصريه كاعد واشرب جاي وبنص العاشر صارلي ١٥ يوم هنا كولشي مااعرف لا عن اهلي ولا عن مرتي
محسن : شوكت الله يخلصنا والله طكت روحي اذا اطل واحط طلقه براس الضابط احد يلومني
حجي طه : شبيك محسن صاير نار اكعد يمعود
سلمان : ولك على اساس عرسه اسبوع الجاي والامر مقبل ينزله وهو تخبل عدنا انذار
حجي طه : هو اصلاً العراق كله انذار هذا شبيه الضابط
نزار : تلكه مرته طارته لان مينزل واجه يذب حركته بينا
محسن : ولكم اذا متزوجت هذا الاسبوع ابوها الحقير يخرب كولشي
حجي طه : هي غير مرتك شيخرب
محسن : ابوها عمي اخو ابويه واخذ كلمه من عدنا نهايه هذا الشهر اذا مصار الزواج كل واحد يشوف دربه
سلمان : والله احسن الك شلك بلزواج هاك كدامك متزوجين جنا دبابه ضاربها هاون ومعطبه واحدنا اذا تاخذ راشدي منه يكولك رحمه الله والديك الثاني اقوى
النسوان مثل البك مال الاهوار من يوكفن على الواحد ميكعدن راحه اله تمص دمه وتخلي مثل المخبل يحك

نزار : احجي على نفسك اني اسد
سلمان : امشي لك لتخليني اقسملك هو انت اذا انضرب هاون قريب تطلع من الحمام حزام البنطرون متشده وتتعثر بلكاع
نزار : اهو هي مره صارت وجلبت بيها
محسن : ولكم عوفو الحزامات والهاونات اريد اتزوج زوجوني لا احرك روحي
حجي طه : ههههههه خلي اروح احجي ويه الضابط
نزار : هاك راح يحلها السيد طه دخيل جدك
حجي طه : تستهزأ مو هسه تشوف
نزار : اذا قبل ابقى اغنيلك للصبح
محسن : واني اشد وصله واصيرلك فيفي عبده بس اقنعه رحمه لأبوك
حجي طه : كولشي مااريد منكم بس جفوني شركم ولتتعاركون
كمت رحت للضابط اخذتله تحيه هو يعرفني من شغله عمر
استريح
حجي طه : سيدي جايك بخدمه وعلى الله وعليك
كول طه
حجي طه : سيدي جندي اول محسن عريس ويريد يتزوج اقبل بنزوله
اني مو كتله بعد اسبوعين تنزل
حجي طه : فهمته الوضع ضل صافن
سيدي ذيج المره من صارت الاشتباكات جان اكو جندي ويانا امنيته يشوف ابنه محروم سنين منه والامر مالته مأخر نزوله لو قابل جان يمكن هو عايش وشايف ابنه يعني حرمه من الحياه ومن ابنه ترضاها تتحمل خطيته احنا ورانا تنقلات ومنعرف حالنا خلال هاي المده واخاف يصير عليه شى وتتندم طول عمرك واني مستعد ابقى مكانه ماانزل شهرين او ٣ الي تريده بس نزله خلي يتزوج تكسب اجر بيه وهي اجازته يعني ممخالف القانون
خوش محامي عنده
حجي طه : والله مو محامي بس اتذكرت الشهيد واجيت ابلغك
صفن دقايق اخذ اسمه وانطه ورقه بنزوله تشكرت منه جانت شبه معجزه وافق يمكن هذا الولد اله خبزه بلدنيا
ويتزوج
رجعت اتمشى اجه يركض
محسن : بشر حمامه غراب
حجي طه : السيد طه ميحط ايده بشى اله يصير
جان يشيلني ويبوسني
واني اضحك على سوالفه

واجه نزار يغني
ويردح كافي اسكت يمعود مااريد اسمع اغاني تدري بيه حزين على والدي
محسن : الله يرحمه مشكور والله انت اخ والنعم منك
حجي طه : تدلل وشايف كل الخير
راحو الولد كعدو مسافه عني ويدندن بيهم نزار واني صافن اجت اذني يمه صوته حنين غصب عنك تسمعه والليل طويل وين تروح
واسمعه يغني ياحريمه

ياحريمه انباكت الجلمات من فوك الشفايف
ياحريمه ياحريمه
ياحريمه اسنِينَكّ العشرين مامرها العِشَك والعشك خايف
ياحريمه ياحريمه
لا ولك - - لا لا على بَختَك مانّي سالوفه صَرت بين الطوايف
ياحريمه ياحريمه
يازلف بتغاوي ويه الليل بطراف الكِصِيبه
هاك رُوحي الّما غُفت والطيف مامره حَبيبه
هاك جَرحي الّما تعَطَب وانتَ عطابه ولهيبه
هاك عُمري الظاك حَنضَل وانت بَرحي
ياحريمه ياحريمه

ادندن ويااه من ضيم قلبي تعبت وكل عمري ٢٤ من اوصل للخمسين يمكن ميت
مرت الايام واسبوع جر اسبوع صارلي ٣ اشهر هنا المن انزل انطب معركه نطلع من الثانيه لعبت روحنا الي مات والي تصوب شفت ايام سوده بس الموت مبين معاجبه اني مكعد يتقرب مني نزلت تعبت اشتاقيت لأهلي

طبيت للبيت واباوع عليه مهجور هاي اكيد سندس موصلت لهنا سبحت على السريع وطلعت على بيتنا دكيت الباب طلعت نهر بس شافتني عاطت وحضنتني وتبجي
ولج شبيج
نهر : عبالي صار بيك شى وجعفر مثل المخبل يدور عليك من فرقه لفرقه كل شويه داز جماعه يسألون عليك
حجي طه : لتخافون عايش مميت
نهر : اسم الله عليك يابعد روحي شونك صحتك شونها
حجي طه : بخير بستها من راسها لكيت انعام كاعده بلكاع بلمطبخ والجو بارد شهر الواحد ١٩٨٣ كعد تنظف خضره دنجت عليها بست راسها شونج يمه
انعام : هلا بيك الحمدلله على سلامتك
حجي طه : الله يسلمج كعدت على الكرسي واجتي اشواق هم سلمت وسلام بس علي وجعفر بلمطعم بلشغل
انعام : شونها صحتك
حجي طه : يم الله
انعام : ليش تأخرت منزلت
حجي طه : حتى ترتاحون مني
انعام : واحنا شكو غير عندك بيت ومره
حجي طه : هي وينها المره
انعام : غير انت سيبتها بيت اهلها ومرتك صغيره وكحه يرادلها كرصه كعدها بيتك واكرصها
حجي طه : الله كريم اليوم اجيبها
كعدت وياهم حيل مشتاق الهم جان الوضع طبيعي مصار اي شى كملت الغدا ورحت لبيت سندس دكيت الباب طلعلي اخوها الصغير سلم
اجتي تمشي من بعيد بطنها طالعه كبرانه ابتسمت من شفتها حضنتها وهي هم حسيت باشتياق الها رغم مشفت يوم عدل وياها
يله امشي نروح للبيت جانت هادئه كولش يمكن هاي ٣ اشهر اجت من صالحي
رجعنا للبيت ونظفته وساعدتها لان حيل وصخ ورتبنا كولشي
بقيت تقريباً ٤ ايام بلبيت يمها جانت هادئه هدوء عجيب ومطيعه بشكل تمنيت تبقى هيج والله اعيشها بخير بس ابو طبع ميغير طبعه غير الجفن
خامس يوم اجتي كعدت بصفي
اكولك حبيبي طه
حجي طه : كولي محتاجه شى
سندس : مو محتاجه بس انت متشوف وضعنا
حجي طه : شبيه
سندس : بس مو تعيط مثل ذيج المره اسمعني للاخير وافهمني
حجي طه : الله يستر احجي
سندس : هسه شبيك بعدني محاجيه ضجت
حجي طه : احجي وفضيني
سندس : متشوف اخوتك شون يلعبون بلفلوس لعب شفت علي اشترى سياره سوبر ٨٢ منيله هاي الفلوس كلها
حجي طه : ليش اشتره سياره
سندس : هاي شنو مشفتها بلباب
حجي طه : اي شفتها بس معبالي مالته
سندس : لا عيني مالته ولازم مطعم ابوك ومحلات باب الشيخ عدا ايجارات البيتين
حجي طه : انتي منين تعرفين هاي الشغلات
سندس : ماكو شى ينضم بله همه يلعبون بلفلوس لعب واحنا هذا حالنا هسه البيت وافتهمنا لأمك باقي الورث
حجي طه : تردين اداعي بورثي وابويه سنه مكمل
سندس : عمي لداعي اقلها شارك بلخير اطلع اشتغل مثل قبل بلمطعم انت هسه من اصحاب المال مو عامل عند ابوك مثل قبل يعني يصير خواتك مترسات ذهب واني حصره عليه
حجي طه : ليش مو اشتريتلج نيشان
سندس : قحط كم قطعه روح شوف اشواق ونهر يحيرن شيشترن من الذهب عدا امك الله اعلم شعدها
حجي طه : انتي ليش هلكد مركزه وياهن

اني الف مره كتلج مالج دخل بيهم عيشتهم غير عيشتنا
سندس : هسه لتعيط كعد نتفاهم عوف الورث وعوف الذهب مااريد بس اقلها مصرف شون حالنا راتب الجيش هم راتب ربع الشهر ميكفي والفلوس الجنت ضامهن والي انطاكياهن ابوك هم خلصن واني كلها كم شهر واجيب متكولي شون نعيش ناكل حصو واهلك عايشين بلعز حتى الله ميرضاها روح للمطعم اشتغل امن مستقبلنا ابوك والله يرحمه منو يساعدك اذا وكعت غير جيبك

حجي طه : صفنت على كلامها هم بيه نوع من الصح اني وضعي بدا يدهور والعيشه صعبه والفلوس العندي شبه خلصت خلي ارجع للمطعم من باجر اقلها هلسبوعين الكاعد بيهم الم كم فلس يفيدوني مصرف الي والها قبل ما التحق
سندس : ها ياعيني شو سكتت
حجي طه : يجوز ارجع باجر للشغل
سندس : اي واخيراً وباسته من خده من فدوه لرجلي
حجي طه : اوف منج
ثاني يوم كعدت من الصبح انتظر الولد تفاجأ علي بوكفتي
علي : ها صباح الخير شو هنا
حجي طه : منتظركم حتى اروح وياكم للشغل
علي : ليش
حجي طه : شنو ليش غير مطعم ابويه واشتغل بيه طلع جعفر وحضني جان كل ميشوفني لو يبوسني لو يحضني كيف لان راح اطلع وياهم عكس علي انگلب وجهه استغربت منه صعدنا بلسياره كتله
بلخير على السياره
علي : الخير الي يصيبك
رجعنا للشغل جانت تصرفات علي مزعجه يعيط على العمال ويغلط ويكفخ واذا واحد وكع ماعون القيامه قامت مرت ٣ ايام اروح واجي وياه واني ساكت على اعصابي رابع يوم متحملت من شفت عدنا عامل من زمن ابويه يشتغل عدنا رجال جبير والمرحوم يموت عليه ابوجمال محافظات من اهل البصره كل شهر ينزل ٣ ايام ويرجع عنده عائله برگبته وايتام وابويه استخطاه وشغله وصار ١٠ سنين ويانا ويبات بلمحل لان وكع ماعون الطماطه لو الدنيا نگلبت

علي : اعمه متشوف شكبرك تصير اصلاً زايده مني مبقيك هنا من باجر تولي لأهلك حتى نوم متنام بلمحل مناقصني عاهات يوميتك اجيب بيها اثنين عمال
حجي طه : على كيفك علي وياه هو ماعون طماطه شنو قيمته
علي : رجاءاً لتدخل اني صاحب المحل وبكيفي
اجه جعفر يركض ها يولد شبيكم
حجي طه : شنو صاحب المحل موعيب هذا الحجي المحل محل ابونا وگلنا بيه واني مكتلك شى بس كتلك على كيفك
ابو جمال : وليدي طه لتتعاركون انه اروح لهلي
حجي طه : وين تروح انت باقي هنا انت من ريحه الغالي
علي : خوش والله تكسر گلمتي
جعفر : كافي علي الناس تتفرج علينا وهذا باب رزقنا عدكم شى حلوهه بلبيت مو هنا
علي : انت اسكت لتدخل شوف طه هذا المحل محلي واني اطرد اليعجبني وابقي الي يعجبني حتى انت اذا اطخ بعقلي اطردك
حجي طه : مو بكيفك
جعفر : كافي علي بروح ابوك شوف العالم شون تباوع
علي : ماشي نرجع للبيت وشوف شراح اسوي
حجي طه : اركع راسك بلحايط وشسوي سوي ابو جمال ميطلع من المطعم وانت اذا معاجبك الوضع تكدر تروح واني وجعفر هنا

علي : ههههههه اسكت بابا اسكت عدنا بيت ونحجي بيه وانت ابو جمال اذا شفت وجهك بلسعدون كله احرك جد جدك
حجي طه : متحملت وجريت قميصه ولك احترم نفسك شنو هاي اخلاقك
وكفت العمال كلها بينا وابو جمال ريكه نشف خطيه ويصيح عمي رايح مولي من بغدادگلها
حجي طه : لا متروح عمي واريد اشوف يارجال يطردك
علي : رجال وغصب عنك وانت هم امشي اطلع بره
حجي طه : من شفته هيج متحملت وشلت المملحه بصفي وركعتها براسه عاط وجعفر يهدي بيه والعمال واكفين بنصنا تالي عمرنا ولد حجي حسين يتعاركون كدام الوادم
صرت عصبي نار مااشوف كدامي وذوله فوك ١٠ رياجيل بينا هو كوم واركب السياره واطلع
رجع الكل لشغله بس اني بقيت الوب احس مكتفيت منه
صعدت للطابق الثاني عدنا غرفه استراحه مال عمال نزعت ملابس الشغل ولبست ملابسي وطلعت وراه هذا شبيه متفرعن علينا

جعفر : وين يمعود
حجي طه : اريد اشوف شبيه اخوك متخبل وميستحي يطرد ابو جمال علمود ماعون طماطه
جعفر : لتروح خلي تبرد الشغله لتكبرها طه
حجي طه : هو يمشي ويصيح المحل محلي ليش هيج يكول
جعفر : صار ٣ اشهر يخربط ويحجي هيج واني منطي الاذن الطرشه شنسوي اخونا الجبير ولازم نتحمله
حجي طه : الجبير يحترم نفسه حتى نحترمه مو متفرعن علينا ويعيط على الناس تكول عبيد عنده ذوله بأجرتهم يشتغلون لا خلف الله عليه لو ما همه منين يطبله وارد وممقصرين والمطعم جبير والرجل هوايه عليه اكيد تصير غلطان مبقى واحد مرزله ٣ ايام بقيت وياه لعبها لروحي وساكت واكول ميخالف ماادخل بشغله بس مو توصل بيه يطرد ابو جمال
جعفر : خلي نكمل شغلنا ونرجع سوه
حجي طه : لا راجع هسه

طلعت وركض جعفر ورايه اخذنا نفرات ورجعنا وصلنا للبيت طبيت سمعت صوته يعيط
لو اني بلمطعم لو طه دفعت الباب وطبيت
انت شبيك تخبلت متستحي
جان يركض عليه وضربني على خشمي بكل قوته خلاني افقد توازني وعاطت نهر وركضت عليه وانعام واكفه ولا يمها
لزمه جعفر
علي : لك اني تمد ايدك عليه كدام العمال وتخليني مضحكه كدامهم
حجي طه : واكسر راسك هم لان متستحي ومتخاف الله وتتعدى على الفقره
علي : اطيح حظك وحظهم بكيفي واريد اشوف شون تكسر راسي
طبت سندس على العياط لان الصوت عالي وحايط على حايط
انعام : كافي صوتكم مااسمعه طه بعد متوصل للمطعم
حجي طه : على اي اساس المطعم مال ابويه واني الي حصه بيه
انعام : لا مالك اي حصه ولا الكم كولشي بأسمي كشايه مالكم عندي كلكم والي يعصاني ابيته بلشارع ولد لو بنيه

بقيت ممستوعب الحجي شون بإسمج البيت اي اعرف من زمان بس
انعام : كولشي بأسمي ابوك تنازلي بيع وشره عن املاكه اللهم بس البيت الي انت كاعد بيه بأسمك بس الباقي كله اليه
جعفر : يمه ابويه هيج يسوي مستحيل
انعام : انت انجب وحسك مااسمعه لا اخليك تبات بلشوارع واسمعوني كلكم اني بكيفي المن انطي والمن ماانطي واني خليت مطعم السعدون لعلي وهو يشغله وانت طه تحير بروحك مالك مكان هنا
سندس : على اي اساس انتي مو امه شنو من ام متخافين الله تحرمين ابنج من كولشي
انعام : مبين مرتك متدري اني مرت ابوك مو امك
سندس : لطمت على صدرها شنو مرت ابوك ولك طه احجي صدوك هاي مرت ابوك
انعام : هاي بعينج وامشي اخذي رجلج ومااريد ادخلون البيت
حجي طه : مااصدك ابويه ينطيج حصصنا ويسجل كولشي بأسمج
انعام : اعرفك مثل امك تحب تاخذ مال غيرك
راحت دخلت للغرفه جابت الاوراق هاك شوف همزين تعرف تقرا وتكتب وهاي بصمه ابوك وختمه

حجي طه : جبل وكع على راسي اني ميهمني الفلوس كد ميهمني كسرت النفس والروح الي كسرها ابويه بيه متوقعت يخلي رگبتي جوه رجلها ويدري كولش زين هي متحبلي الخير
انعام : شوف طه اني تربيه وربيتك وزين مني وتحملت كل هاي السنين وابوك ومات وانت مالك اي شى يمي والمطعم والمحلات متوصل الهن واذا وصلت اشتكي عليك
سندس : تعزيتي يسندس مسحتي ايدج بلحايط
حجي طه : عطت بيها انجبي وروحي للبيت
سندس : هو انت كدرتك عليه وفوكاها ميخليني احجي عليها وخابصني اهلي واهلي ذوله اهلك شفت اكلو حقك وخلوك ولا فلس بجيبك وذلوك
جعفر : يمه لتسوين هيج طه اخونا وانتي ربيتي
انعام : ربيت وكافي خلي يحير بروحه
حجي طه : اباوع على نهر تبجي منهاره واشواق وسلام فاكين عيونهم
علي : اخذ مرتك ولطب لهذا البيت وبس اشوفك قريب من المطعم بيدي اسحلك بلشارع
طلعت والدمعه بعيني اول مره احس روحي ذليل ومكسور ومن اقرب الناس اليه حتى مكدرت ارفع عيني واحجي بعد اذا كولشي بأسمها وهي طردتني لشنو بعد باقي
سحبت سندس من ايدها وهي تبجي وتلطم على صدرها تكول ميت عدها
دخلنا للبيت وعاطت

هاي هيه ي طه طلعت ايدك الحايط لا فلوس ولا ورث ولا املاك وفوكاها مو ابنها اخاف بعدين تطلع مو ابنهم ابن حرام
جان اندار عليها وضربتها انركع راسها بحافه الباب وشاغت روحها لازمتها وتعيط
هو انت صير رجال براسي تضرب وتحاسب لو بيك خير جان كدرت تاخذ حصتك واني الثوله مأمنه عندك ورث واتحمل الفكر
حجي طه : تسكتين لا وروح ابويه اكطع النعال على راسج
سندس : هذا الفالح بيه تضربني من تعرف هاي مو امك شون تعوف ابوك الها هاك تنازل الها عن كولشي وانت بقيت حالك حال المجدي بطرك البيت ومنو يكول بيتك
حجي طه : عطت عيطه هزيت البيت هز
لج كافي حيوانه اسكتي اريد افتهم الصار
سندس : شتفهم يعين امك الاملاك وبح وكلها بأسم انعام وانت طردتك واخوتك حايرين بروحهم يعني راح اضل طول عمري ويه واحد حصره عليه اللكمه

حجي طه : شو تعالي جريتها وطردتها وسديت الباب عفتها بره حتى مااوصلها اني مصدوم ومكسور وما اعرف شون اتصرف وهي مثل المخبله تهسترت
كل مااغمض اتذكر الاوراق الي طلعتهم وكولشي بإسمها روحي تفرفح واضل افتر مثل المخبل عبالك احجي وياه واعاتبه ليش يابه هاي تاليها خليتني مضحكه الها
كعدت بلكاع وايدي على راسي احس راح يطك يمكن ضغطي صعد بقيت حوالي الربع ساعه
اندكت الباب حتى مكدرت اكوم بس سمعت صوت ام سندس
فتحته وشفتها جايه وبيدها بتها
هاك يمه هاي مرتك انت حير بيها وبعيشتها
حجي طه : صافن عليها مفهمت شتريد
ام سندس : اجتني وكدامك اكول الها اني معودت ازوجها اني مره على كد حالي طلعت بلدنيا بيها وبأخوها وابوها مات وخلصتها سنين اخبز للناس واوكلها واوكل اخوها انكسر ظهري عليهم ومن زوجتها كلت انشال الحمل عليه مو هسه راجعتلي وفوكاها حبله اني مره مريضه مااكدر اعيش مرتك وابنك
سندس : يمه طردني وضربني شون تقبلين ارجع
ام سندس : الرجال يضرب ويغلط ساعه عصبيه تنجبين وتركدين بيتج وانت يمه طه اعرفك عاقل وشزيناتك شجاك تطردها وهي حبله وادزها وحدها
حجي طه : شوفي شسوت هي وخلتني اتخبل عليها
ام سندس : اكعدي واسكتي غير بيت رجلج ماعندج تجيني تشوفيني هله بيج غيرها ماعندي
باوعت عليها هاي المره المسكينه هم ابتلت بتها بست راسها وكتلها عمه ميكون خاطرج اله طيب
وانتي ادخلي لغرفتج مااريد اشوف وجهج
سندس : شفتي مو گتلج
ام سندس : شگلج ضربج طلقه راد ادخلين بغرفتج ادخلي ولي

طبت للغرفه تبجي تعرف مالها مكان تروح بيه بعد حچي امها
طلعت امها اني احس روحي بكابوس ومخنوك وما ادري وين انطي وجهي طلعت من البيت وصار بوجهي جعفر يتعذر
انت شعليك قابل العركه وياك
جعفر : بنص هدومي هسه والله حجيت وياها هلمره ياهو تلزمه اذا ميسمع كلامها تنومه بره
حجي طه : اني عندي بيت وساترني وعلى الشغل تدبر بس انت مالك مكان ابقى تحت جناحها تره علي راح ياكل الاول والتالي صير سبع واخذ حقك
جعفر : شون اخذ حقي وهمه حالي من حالك اكلوه كولشي بأسمها
حجي طه : العتب مو عليها على ابويه النطاها كولشي موتزعل مني
جعفر : شزعل لو بيدي هسه احركهم على سوايتهم وهاي نهر بس تبجي مسويتها مناحه
حجي طه : مااكدر اطب اطيب بخاطرها سكتها خطيه تتأذه باوعت على البيت رفعت راسي تالي عمري انطرد من بيتك يابه ترضاها استغفر الله واتوب اليه
جعفر : لتضوج ايام ويهدا كولشي وترجع مثل الاول
حجي طه : لا اول ولا ثاني امك مخططه لكولشي بس انتظرت الوكت المناسب مبين هسه صار الوكت الجانت تنتظره من سنين حتى تنتقم من رازقيه
جعفر : امك شعليها
حجي طه : محد يعرفها بكدي بس الي الله واذا ابويه سجل كولشي برضاته الها بلعافيه عليها بس اذا اكو شى او مغصوب لا محالل ولا موهوب والله موجود وحبله طويل يجي يوم ويطلع الحق
اني باجر التحق

جعفر : يمعود وين رايح بعدها اجازتك
حجي طه : اريد بس منك عينك على سندس هاي خبله ومتكعد راحه راح اخلي مصرف عدها عندي جم فلس بس انت كل كم يوم مر عليها اخاف تحتاج شى
جعفر : طه بروح ابويه ضل والله قلبي وجعني لتروح
حجي طه : لتخاف ماطول الدنيا مطيحه حظي مااموت

طلعت ثاني يوم للجبهه وعفت فلوس على الميز لسندس كل فلوسي بقيت بس مال كراوي حتى مشفت وجهه بعد
احس الجبهه صارت احن عليه من اهلي حتى لو ريحه الموت بكل مكان الجو ثلج نهايه شهر الثاني ١٩٨٣ وداير مداير الجوله كاعدين اني ومحسن والحصره تاكلنه على نزار الي استشهد وسلمان المفقود كمت احس روحي نحس وشؤوم حتى على اصدقائي ياهو القربه مني يصير بيه شى
كمت ماانزل كل جماعتي تنزل واني باقي تكول اشتري الموت شرايه صرت ضعيف مكسور مهزوز كل مااتذكر نظره مرتي اليه بأستصغار لو نظره علي وانعام الحاقده اكره روحي شسويت اني حتى كل هذا يصير بيه

اشتاقيت لنهر وضحكتها ولجعفر وسوالفه حتى اشواق وسلام رغم ميتقربون مني بس احبهم

  شهر الخامس الضابط گلي انزل ارتاح حسيت نفسي وصحتي تعبت وعندي راتب مال ٣ اشهر بجيبي مصرفت منهم وين اصرف واحنا بنص الموت گلت انزل انطيها لسندس وارجع التحق
نزلت بس مو مثل كل مره اقدم رجل واخر الثانيه عبالك ولا اريد اروح وصلت للبيت حتى بيتي احسه غريب بس جذبني صوت هذا منين طالع فتحت الباب عياط طفل
دكيت باب الهول فتحه اخو سندس حضني وگلي هلو عمو الحمدلله على سلامتك بسته بس عيوني ادور صوت الطفل هذا منين اجتي عيوني واشوف ام سندس متربعه بلكاع والطشت يمها وتسبح بأبن نفاس بس مااعرف ولد لو بنيه

اندارت عليها وصاحت هله يمه هله بجيتك والله واجت وجابت الخير وياها وجابت ابوها من الجبهه بلخير يمه ماجاك وكعت من ايدي الجنطه واشوف ام سندس تلفهه بخاولي ابيض وتكوم وتحطها بحضني لحمه حمره والخدود دم
هاك يمه بنيتك
فتحت عيني وممصدك صرت اب حطيت وجهي وشميتها من رگبتها بنفس قوي لو بيدي احطها بنص صدري واحضنها حيل بس اخاف عليها حيل صغيره بجت دمعت عيوني واني اشوفها
هاي بنتي
ام سندس : اي وليدي مرتك ولدت قبل ٣ ايام واجت بت ومنعرفلك طريق وماسميناها اله تجي وتسميها
شسميها
سليل اسمج سليل
شرفت اول غزلان الحجي طة

يتبع ...