رواية ابي والغزلان الفصل التاسع والسبعون 79 - بقلم ريام هادي

ابي والغزلان الجزء الثاني
للكاتبه Reem
البارت الثلاثون
(النور نوركم يااحلى متابعين انتم جماال القصه وروعتها)

المن سلمتني و بيه وصيت
و المن فاركتني؟و المن مشيت؟
عفتني بحال صعبه بعد ينكال!
مثل وحشه يتيم بوحده بالبيت
جذب كلمن اجاك و كلك ينام
و لا ليله بغيابك بيه تهنيت
على صفنه غيابك باقي عودان
و تحسبني عدل بس روح ضليت
تغير كلشي بعدك حته الوجوه
بس انه و غلاتك[نفسي ضليت]

سليل : ركضنا بريم للمستشفى والطريق كله منهارين عليها حاطتها بحضني وصلنا للطوارئ وگبل مغذيات وابر
واكفين باب الردهه محد يقبل نطب اني وسجاد وماما وبابا
حجي طه : بنتي راح تروح من ايدي نهر
نهر : ابجي واحجي عفيه لتكول هيج
سليل : منعرف نبجي على ريم لو على الكارثه الصارت
شويه وكال الطبيب المقيم انخفاض حاد بلضغط ومبين انهيار عصبي كلنا اله الصار ونصح نبقيها بلمستشفى وخاصه من حااسه باقيه تعيط وتجر بلكانيولا وانترست ايدها دم
خابرنا رشا وبلغناها وهم خطيه عياطها لوين وصل جانت فاجعه النا كلنا مو بس لريم

راح بابا وسجاد وشعلان للحله علمود استلام الجثه بهذا الوكت بلغنا زينه اخته الله يعينها مو هينه امها واخوها وبت اخوها وحالها وضعها مو اقل من ريم
بقيت يمها ومستلميهم او الباقي منهم ودفنوهم حسب كلام سجاد لو شايفتهم ريم تموت لا محاله يوكف گلبها لان باقين فحم
ليلنا ونهارنا واحد مكدرين ونبجي وحالنا مئات الناس الراحت بهاي المجزره
اول يوم الفاتحه وثاني يوم محضرنا لان يمها بلمستشفى نتناوب عليها فاقده متحس بلدنيا وبس تصحى تعيط مره تصيح رفل ومره سامر وتلطم عدت اليومين علينا جحيم
تالي صحت الي حجته جمله وحده ودوني لبيتي
سليل : نروح لبيت بابا حبيبتي من تصيرين زينه ناخذج هناك
ريم : : ودوني لبيتي
رشا : خلي ناخذها هم عيب من العالم متحظر الفاتحه تعرفين بيهم ميعودون يحجون على واحد حتى لو عنده مصاب
نهر : يله ناخذها خابرونا على واحد من الولد

اجه شعلان اخذنا ولازميها وتمشي ولا تنطق گلمه ومن وصلنا للبيت جان الجادر منصوب بابهم وكال شعلان اخوته الاثنين اجوي البارحه من الخارج وهمه تكفلو بكلشي وعمامهم والناس انگلبت عدهم
سليل : دخلنا من الباب جان البيت مليان نسوان وزينه كاعده تصرخ بكل صوتها وهي شافت ريم والدنيا انگلبت هاي تصرخ والثانيه تجاوبها گلبن العزه كله الصغير والجبير يبجي عليهن هاي خسرت امها واخوها وبت اخوها والثانيه خسرت بتها ورجلها
كوه سكتناهم ملخن روحهن

صعدت ريم لغرفتها تركض ركضنا وراها مردنا تصعد وطبت للغرفه وياريت ماطبت متعرف تشم بملابس رفل ومره بملابس سامر وصوتها اختفى من العياط حضنت ملابسهم وكعدت بلكاع وتلولي لملابس رفل
ريم : ماماتي رفوله هسه تجين تعبانه وابدلج وانومج وابوج ازعل منه شلون ياخذج ويروح وبعد ماابوسه
لك سامر ارجعلي وين عفتني تعاال والله ماادوخك ولا احجي ولا اضحك وحتى اقرا وياك كتب بس ارجعلي اروحلك فدووه ارجع راضيه بكلشي تسوي ميخالف ابقى ساكت بس انفاسك بيتك ابقى لتحجي ويايه كافي كاعد هنا وتقرا وتهز بيدك من تشوفني اكمز ويه الجهال والله بعد مااكمز بس تعاال

نهر : كاافي يمه راح تموتين
ريم : عمه عافني وراح اخذ روحي وبنتي ويااه ادري بيه يعاقبني لان اضحك كل وكت لان اسوي حركات يكول لتتصرفين مثل الجهال والله كبرت عمه بس خلي يرجع وبعد مايسمع النفس مني
سليل : حضناها ونبجي وياها
ريم : سليل هاي بجامتها جانت لابستها ريحتها بيها والله مردت ادزه والقران گلبي عالمني شميتهم اثنينهم جني اودعهم سوده بوجهي الله ياخذني لان مارحت وياهم وكانت تصرب بوجهه وشكت ملابسها تهسترت ولزمناها كوووه الله ذب كل الحيل بيها وتصرخ لدرجه صوتها اختفى من العياط
وحده من عماتهم كالت
يمه اخذوها لبتكم هاي اذا تضل هنا تموت
نهر : كومي سليل لو نعرف نشيلها وناخذها
كامت تدفع بينا متقبل خابرت سجاد اجاني ركض وسحبها ويايه وصعدناها وبقت عمه ورشا واني وغزل رجعنا وياها للبيت
بيدها بجامه بتها حاضنتها كوه صعدناها للغرفه وجان اكو ابر انطوها اليه اضربها الها خفت اضربها وتدفعني دزيت سجاد على القابله اكو يمنا خلف الله عليها اجت تركض بس سمعت لزمناها وضربتها ونامت

ايام سوده مرت علينا كل يوميه بس تون بابا يحجي وياها يتوسل كلنا حاولنا لكن ميفيد وعمو محسن من عرف بجه بجي صرخ من كل گلبه على حالها هو كلنا يحبنا ويعتبرنا بناته بس ريم غير هاي يصيح الها التك مالتي الوحيده الي تقفص عليه واني مكيف وفرحان حاول يحجي وياها وهم مفاد وهنا ريم اتخذت موقف السكوت بقت تبجي بهدوء ومتحجي ويه اي احد
سجاد : بعدها
سليل : اسوء حالها يوم بعد يوم يصير اتعس
سجاد : خلي اصعد اشوفها
نهر : سجاد بعد ميصير
سجاد : ليش
نهر : لازم تلزم عده ومايصير يشوفها رجال ذيج الايام فاتحه والدنيا مكلوبه هسه لازم تلزم عده
وصيت الكل
سجاد : هم صحيح اذا احتاجيتو شى بس دزو
نهر : خلف الله عليك انت وشعلان ومحسن خلصتو ايامكم كلها هناك بلجادر
سجاد : غير اهلها احنا الله يصبرها

غزل : بقيت بايته بيت اهلي ومداومت علمود ريم وره ايام من الفاتحه دك تلفوني باوعت رقم دولي عرفت فيصل منو قابل يدك عليه ترددت اجاوب بس بعدين كلت خلي اشوف شيريد
الووو
فيصل : هلوو غزل شلونج
غزل : الْحٍمَدٍ للـّہ
فيصل : البقاء في حياتج
غزل : حياتك الباقيه شكراً
فيصل : اليوم سمعت من ابويه
غزل : اي ذيج الايام ملتهين بلفاتحه
فيصل : والله رغم مااعرف اختج زين شفتها مرتين او تلاثه بس حيل مقهور على حالها
غزل : الْحٍمَدٍ للـّہ على كل حاال
فيصل : غزل
غزل : نعم
فيصل : حضري نفسج الاقامه مالتج طلعت تره كلها شهر او شهرين وتجيني
غزل : عفيه بعد شهرين امتحاناتي
وبقت سنه وحده واتخرج
فيصل : اتفقنا من البدايه تكملين هنا بلسويد
غزل : بس انت رحت وبعد مسألت
فيصل : الاجرائات اخرتني مااشي امتحني هاي السنه كمليها وبس تخلص تجين
غزل : مااكدر انتظر بعد سنه
فيصل : ميصير هو اني كوه كملت معامله لم شمل المفروض بس يسلموني الاقامه تجين ركض
غزل : الله كريم نشوف شلون ترهم
فيصل : المهم حضري نفسج شوكت مااكول كملت تجين
غزل : ان شاء الله
فيصل : محتاجه شى

غزل : سلامتك سده وراح شأحتاج هو انت وينك حتى احتاج زين من تذكر كعدت افكر ويه روحي بله هسه من اطلك وارجع شيصير بابا منا ريم ترملت ومنا اني ارجع مطلقه شراح يصير بحاله والله ميتحمل جنت مقرره اطلك وانهي كلشي بس سالفه ريم گلبت كل الموازين وخاصه من شفت البيت شلون صار جهنم وبابا اسمع صوته بغرفته يقرا قران ويشهك من البجي يعني البيه كافي المصيبه الصارت دمرت الكل مااكدر اجي وازيد الامهم هذا هو اتوكل على الله واسافر بلكت الله يستعدل ويصير ادمي ويايه خلي اجرب اقلها مااتندم واكول منطيت فرصه اله ماطول مشه بلمعامله معناها رايدني يمكن هذا الشى يبرد ناري او على الاقل يهدأني وخاصه من رجعت لبيت عيالي واستلمني عمو وخاله نصائح وكلام خلوني اقتنع حالياً السفر افضل فرصه حتى ارتب حياتي

سليل : ايام بقينا ويه ريم بس متحس بينا نحجي نحاول ميفيد دوم ساكته لو تبجي وحدها ابنها متريده ولا تحضنه ولا تهتم اذا بجه او عيط وبقى عدنا مرات يمي ويه زين ومرات يم جنات مكسور خاطرنا عليه وعليها بس مابيدنا شى دخلت بصدمه شلون انطلع ريم من هاي الصدمه منعرف
كمنا نسوي ثوابات ونوزع وهي فوك متدري بلدنيا شكوو حتى من صار الاربعين مراحت تكول هسه يجون مميتين منتظرتهم خوفنا لاتفقد عقلها لان ندخل عليها نلكاها لو تسولف ويه سامر لو ويه رفل كمنا حتى نخاف نعوفها وحدها يجوز كلنا حياتنا مشت رغم مقهورين ومدمرين على اختنا اله ريم حياتها واكفه من لحظه وقوع الانفجار وهي تنتظرهم وتصيح هسه يجون

نهر : وره شهرين الحال متغير وبيوم خابرني حسين يسأل مثل كل مره وجنت مشغله قران وبخور كل اربعاء وخميس واسوي ثواب لبنت ورجل ريم جان يدك تلفوني وشلته وسلمت عاادي
حسين : شعدكم عمه منو مات هههههه صوت قران حسيت روحي بجامع
نهر : بجيت متحملت مجان قصدي احجيله بس طلعت مني وبديت اسولف اله واسمع شلون متخبل ويدك على كصته
حسين : باجر راجع للعراق
نهر : يمه بغلاتي عندك بروح الحسين لا ترجع
حسين : ليش عمه
نهر : استر علينا تره البينا كافينا هسه تستلمنا امك وبيبيتك ومالنه خلك للطلايب
حسين : اليحجي اكص لسانه
نهر : يمه لتخليني اتندم لان حجيت ضل يمك وعيش حياتك
حسين : عمه عرفت لشنو تلمحين تره عيب هذا الحجي بحقي مو اني الي استغل الوضع واستغل دمارها واتقرب منها تره اني حسين عمه الي جنت اذا مس الهوا وحده من بنات عمي احرك الدنيا ريم هسه بت عمي وتربينا سوه حك الربى اقلها والعشره البينا لازم اوكف بجانبها وعد مني متشوفين مني شى موزين واي شى يصدر من اهلي والله احرك الدنيا وكولي انت مو رجال

نهر : ميخالف يمه خليها هسه البنيه مصدومه ومتحجي واصلاً هم لازمه عده بس تطلع عدتها تعال زورها واخذ من خاطرها رجعتك هسه راح تنفهم بغير شى انتظر تخلص العده واخذ من خاطرها اعرفك شهم وماتنزل راس عمك وتخلي علج بحلك اليسوه والمايسوه
حسين : ولو مراضي على طلبج بس حتى اثبتلج اني كد كلمتي راح انتظر تخلص عدتها وارجع للعراق المهم ترضين
نهر : الله يرضى عليك يمه انتبهه لنفسك
حسين : عمه بس كل مااخابر مرايد شى بس طمنيني عنها
نهر : صار يمه الله وياك

سليل : مرت الاشهر وريم على حاله جثه بلبيت اي روح مالها كوه نوكلها ولوما الحمام جوه هم متنزل وتيم مالها علاقه بيه تماماً
نهر : بلمطبخ اشتغل ودخل طه عليه
حجي طه : اكو جاي
نهر : اي اكعد سويت هسه جديد شويه واصب كعد بلمطبخ وصافن
صبيت استكان وخليته كدامه وجريت الكرسي الكباله وكتله
صدك طه كل مااريد اسألك انسى
حجي طه : على شنو
نهر : سندس مايوم خابرت دزت خبر مرسال صخام اي شى تسأل عن بناتها
حجي طه : شذكرج بيها
نهر :والله دوم بالي وانسى اسأل
حجي طه : اي مرتين خابرت
نهر : صدك وشكالت
حجي طه : شلونهن البنات شخبارهن انطيني ارقامهن اريد اسلم عليهن
نهر : اي وشكلت الها
حجي طه : سديته بوجهه
نهر : ياااا شجاك

حجي طه : على شنو تسأل صار سنين تنام وتاكل وعايشه ومتونسه وعود يهفها الشوك شويه تشيل تلفون على بناتها من اخذت حسام ودارت وجهه وراحت ماكالت بناتي اخاف عليهن وجانن ممتزوجات مكالت احد يتعرض الهن ينباكن مثل اخوهن ضرب الكل بلطكاك وراحت وهسه جايتني وره هاي السنين كلها انطيني رقم البنات اريد اسلم عليهن

نهر : بس تبقى امهن وبهاي الظروف اكيد يحتاجوها
حجي طه : الام الي تربي يانهر مو الي تخلف حتى حتى الحيوانات تخلف وتشمر وانتي امهن ومااريد اسمعج بيوم تكولين سندس امهن
نهر : شنسوي نغير الواقع
حجي طه : اي نغيره لان هو مغير من كاعه
نهر : وحسام مسألت عنه
حجي طه : تدرين واني احجي وياها الكلمة وكفت على لساني ردت اكلها ابني عايش اتزوج صار اب گلبي جمر عليه وهو بلجذب ماشال تلفون وكال اخابر ابويه اشوفه ميت عايش
نهر : گلبي على گلب ولدي وگلب ولدي عليه صخر

حجي طه : اي والله ياخيتي هذا حالي تدرين لهسه ماغيرت رقمي لخاطره اكول بلكت بيوم يحن ويسأل على ابوه ينام ويحلم بيه واذا عنده جهال يكولون اله بابا ويتذكرني
نهر : سوده عليه گلبج ملجوم من وحيدك
حجي طه :جنت بكل شده اوكع الها اكول هسه يجي ويوكف ويايه ويسندني ويسند خواته وتروح الشده وتجي الاقوى وهو على نفس الحال
نهر : تربيه سندس شتترجى منها

حجي طه : هذا مو حسين ابن اخويه وتربيه علي وانعام اكثر اثنين بلدنيا يكرهوني وشوفي كل كم يوم يخابر ويسأل وعمي شلونك وشمحتاج حتى من سافر مايمر اسبوع او اسبوعين اذا ميخابر ويسأل تدرين شلون ترد روحي من يدك واشوف اسمه احس بحنيته عليه رغم كلشي صار واكول سبحان الله ابن اخويه الي يشوف دم سنونه ولا يشوفني يحن ويسأل ويطيب خاطر وبس انخاه الكاه يمي وابني وطالع من ظهري ميكلف نفسه ولو مره بلسنه يكول شلونك يابه اكلج نهر اني قصرت ويااه اخاف قصرت وماادري بروحي

نهر : شقصرت ياطه هو كم شهر بقى وراها انباك وانت انطيك العندك والماعندك بس حتى ترجعه ورجعت تشتغل عامل لاجل عينه
حجي طه :والله ماندمان هذا ابني من لحمي ودمي وهسه اذا يرجع اشيله على راسي
نهر : مايفيد راح وسافر وعاش حياته ومسحنه كلنا
حجي طه : تمنيت بهاي الشده يم اخته يوكف وياها يداوي جرحها ياخذها بحضنه تره مو هينه عليه بفاتحت رجلها نسابتي موجودين وابني ماموجود الله يعلم شصار بيه ولو همه ماقصرو وغالين عليه بس هم مو مثل مايكون اخوها جان هواي فرقت من تحس اخوها بظهرها
نهر : لتفكر وتهضم بروحك هاي ذبت ابنك ماعنده ذره حنيه لا عليك ولا على خواته ماكول بس الله يحفظة وين ماجان وكون مايعيش مثل الهسه تعيشه لان الدنيا دواره وكلها دين لماي العين

حجي طه : الْحٍمَدٍ للـّہ والشكر على كل حاال اكوم اصلي المغرب عينج على ريم لتروح اليوم هم تنام بدون عشا
نهر : عيني عليها ليضل بالك
اباوع عليه گبر طه هواي بعد كسرت ريم حتى من يمشي احسه محني الظهر دكت شكد مصايب على راسه بس هاي المصيبه هدته ااااخ ياخويه شيشوف گلبك بعد
ماكول بس الله يعينك وينطيك العافيه

سليل : مرات العصر اجي لبيت اهلي واخذ زين اعوفه يم جنات واصعد يم ريم امشط شعرها ابدل الها ريم دخلت بحاله صدمه مرات احسها مثل الطفله الفاقده النطق والحركه احنا نمشيها وبس تباوع بوجوهنا ومرات نسمع صوتها تريد شى او تسأل عن تيم وهذا الشى كل اسبوع يمكن مره يصير وهم نكول الْحٍمَدٍ للـّہ بعدها بوعيها
سبحت وطلعت وكاعده امشط بشعرها الي يوكع خصل خصل من القهر
كلت اضفره الها احسن مما اشيله وينفتح بس كملت تمددت على رجلي وبقيت العب بشعرها وجان تحجي جفلت من كلامها
ريم : ليش معفتينا نحترك
سليل : شنو ريمو شتكولين

ريم : لو ميتين ذاك اليوم مجان احسن اقلها مراح اعيش بعذاب ولا قهر ولا اكبر ولا احب وانغدر ولااتزوج وتموت بنتي وزوجي
تدرين موتتها المفروض اني اموتها بس الله أجلها وعشت وصارت من نصيب بنتي لو عايفتني محروكه اقلها مااعيش كل هاي الاذيه

سليل : حبيبتي هذا امر الله وهي هسه طير بلجنه كلمن ونصيبه ريمو
ريم : واني من انولدت نصيبي العذاب عادي جنت قانعه وراضيه بس سامر وبنتي شنو ذنبهم واني كله مني جان المفروض اروح وياه واخذ تيم اقلها كلنا نموت ونرتاح
سليل : سحبتها من رجلي وحضنتها كاافي اروحلج فدووه تملخين بروحج شوفي حالج بلمرايه صايره مومياء وابنج شنو ذنبه متردي
ريم : ليش ما مات وياهم شعنده عايش واني شعندي عايشة
سليل : الى متى تبقين هيج صار اكثر من ٥ اشهر وهذا حالج
ريم : شنو ورايه رجال ومات وبنيه واحتركت
سليل : عندج ابن محتاجج شنو ذنيه هسه بين ايد وايد صّـْْ(☑)ـْْحّ احنا خالته بس مهما كان هو محتاج امه وتيم متعلق حيل بيج ومرات كوه ينام بليل بس يبجي شنو ذنبه وهيج تنفري كاامت من حضني وتمددت بفراشها وغمضت عينها وكالت
ريم : طفي الضوه من اطلعين

سليل : استغفر الله ياربي الله يبرد نار گلبج وبستها من راسها وطفيت الضوه وطلعت ميفيد الحجي وياها وحقها اني هسه اذا صار شى اسم الله على سجاد او زين اموت روحي وراهم بس شبيدنا غير نهون عليها نخاف على لحظه يصير بيها شى او تسوي شى بنفسها

نزلت وشفت عمه تقرا قران كعدت يمها شويه اسمعها من تقرا ارتاح ومن كملت باوعت عليه
نهر : شبيج يمه
سليل : خايفه على ريم طولت حييل حالتها شلون بيها
نهر : ربج يبرد حرگتها كلشي بلزمن يبرد
سليل : مااعتقد على حالها هذا
نهر :ماكو واحد يموت وره واحد كلها ايام وتعدي بحياتنا اني مااكلج تنسى لا جرحها جبير ومحفور حتى بصدرها مو بس گلبها بس على الاقل تعيش لخاطر ابنها الحزن شكد ميكون جبير ويهد جبال من نعم الله علينه يصغر ويه الوكت ميروح بس يصغر ولو يبقى نفس الوجع والحجم جان هسه الناس كلها ميته وره احبابها الي تموت وره رجلها والي وره ابوها والي وره امها جان ماصفى بشر بهاي الدنيا بس عطايه ربج عظيمه وهاي من عطايااه نعمه المصيبه تصغر ويه الوكت ماعدنا هسه بس ننتظر الايام تمر وهي تصحيها ماتقبل هيج يايمه

سليل : ياريت عمه شوفيها شلون ذبلت تخوف صار ت وعايفه هذا الطفل كل وكت يبجي عليها
نهر : مو هينه الصار بيها رجلها وبتها بيوم واحد خلوها لا تضغطون عليها وهي من حالها تكوم وتراعي مابقالها غيره يجي يوم وتحطه بحضنها ومتعوفه ابد
سليل : ياارب الله يسمع منج وين الجهال
نهر : بره بلحديقه وجنات يمهم
سليل : اروح اخذ زين وارجع مبقى شى ويجي سجاد
نهر : روحي يمه الله وياج

طلعت شفت جنات تخابر بس شافتني سدته مهتميت وكتلها اني رايحه محتاجه شى
جنات : سلامتج كلشي ممحتاجه
اخذت زيون ورجعت لبيتي شويه واجه سجاد
الله يساعدك
سجاد : ويساعدج شنو جنتي طالعه
سليل : اي لبيت اهلي رحت على ريم
سجاد : شلونها اليوم
سليل : نفس الشى عفتها تنام
سجاد : الله يصبرها
سليل : شبيك شو وجهك مكلوب
سجاد : ولو مااريد اغثج بس ابو البيت يريد المشتمل مالته يريد يبيعه
سليل : لا عفيه
سجاد : شنسوي ياعيني غير بيته قابل نبقى العمر كله بيه
سليل : عفيه سجاد تعلمت بيه نزيد الايجار
سجاد : كتله والله ازيدك ٥٠ وراها ١٠٠ الف مقبل كال اريد ابيعه مو أجره او ازيد أيجاره
سليل : ضربتني بگلبي والله
سجاد : هذا الايجار شنسوي
سليل : انقهرت كلش لان صار سنتين عايشة واتزوجت بيه
سجاد : هسه ليش تردين تبجين
سليل : والله احسه بيتي كل الوكت ايدي بيه وارتب واعدل
سجاد : بعد راح يبيعه لازم ادور من باجر بيت انطاني الرجال شهر وكال من المشتري هم احصلك شهر يصير شهرين لازم خلال هاي المده نلكه ونشيل

سليل : وين نلكه وبيت نظيف وقريب على اهلي
سجاد : حتى لو شويه ابعد
سليل : شكد راح نتبهذل
سجاد : الله كريم بلكت اله بلشارع الورانه او الگبالنه يعني بهذا المربع
سليل : مااشي بقيت طافيه كلش ومخنوكه والله احس بيتي وراح ينباع وكل مااتذكر النازحين اكو الله يعينهم شلون عافو بيوتهم وغراضهم وتعب السنين واكو بيوت اجيال عااشت بيها ونزحو بروحهم اني بيت ايجار واريد ابجي عليه شحال همه
يعينهم الله شلون هم وكسران ظهر الله لايوفقه الجان السبب ويرجعهم سالمين لبيوتهم

بليل نسولف اني ورشا تسألني عن ريم وعن احوال ذاك البيت وعني كتلها على سالفه البيت
رشا : ليش متشتروه
سليل : شاربه شى روحي نامي
رشا : شبيج والله مكعد اشاقه
سليل : بابا البيت بملايين منيلنا
رشا : اسحبي قرض يحضي بس تعرفين تشتغلين بلماليه ومتسحبين ورواتبج وينهم مو تكولين عمو ميصرف منهم
سليل : اي وحولتهن ذهب
رشا : اسحبي قرض وعلى ذهباتج واشتروه هو صغير ومو غالي
سليل : يمعود البيوت الصغار دوم غاليات بس والله هم فكرة زينه بس منو يكول عنتر يقبل
رشا : هههههه غير انتي عبله وتقنعي
سليل : اكدر اقنعه بكلشي اله بسالفه الفلوس خشم يابس وميقبل ادعيلي يقبل امنيتي اشتري هذا البيت ومااطلع منه اقلها يم اهلي
رشا : الله يسهل واذا تردين حتى اني اقدم على سلفه واسحبها الج واساعدج واذا شغله سريعه اخذ من شعلان واني انطيه الفلوس
سليل : فدووه لقلبج متقصرين اروح انوم زين يبجي متنحس
رشا : روحي الله وياج

سليل : بقيت افكر بيها كوه نمت اتگلب واباوع على سجاد شلون نايم كون الله يهديك وتوافق
ثاني يوم داومت وسألت على سالفه القروض والمديره حجيت الها ظرفي وعدتني تسهل الي الاجرائات بقى اصعب شى هو شلون اقنع سجاد
رجعت من الدوام وحايره افتح الموضوع اليوم ويااه احس روحي مثل الوحده مسويه مكسوره وجايه لابوها تگله وخايفه لا تتعاقب
كملت الغدا واجه تغدا
سجاد : شو هادئه اليوم بالج حتى مو هنا بشنو تفكرين
سليل : اريد اكول شى بس بروح ابوك مو تعيط بداعتي
سجاد : ياستار معناها اكو شى يغث
سليل : مجرد رأي وياريت تاخذ بيه والله تنقذني
سجاد : احجي سليل تره قلقتيني صار شى بلدوام
سليل : شنو رأيك اسحب قرض وابيع ذهبي ونشتري هذا المشتمل
سجاد : منين طلعتي بهاي السالفه
سليل : فدوه لعمرك سجاد مااريد اطلع من هذا البيت والله تعودت عليه وليش نبهذل روحنا بغير مكان هو ابو الملك مو يريد يبيعه احنا نشتري وبلكت تنزل من سعره
سجاد : اي بله وبأسم منو يتسجل
سليل : شنو هذا السؤال بأسمك طبعاً
سجاد : هي مو فلوسج

سليل : جم مره كتلك لتكول فلوسي وفلوسج ليش اني مو عايشه بجاهك واكل واشرب والبس منك شو ما كتلك من فلوسك ومااريد وعندي راتب اصرف منه لتسوي تفرقه بينا مااحب تتصرف ويايه وكأني غريبه عنك تره اني سليل حبيبتك وزوجتك وام ابنك
سجاد :صوتج نصي واحجي على كيفج مااحب هاي النتره بلكلام
سليل : من وراك شگلت ومباشره رفضت
سجاد : اني مرفضت بس كلت بأسم منو يتسجل
سليل : بأسمك واني وياك واحد

سجاد : تقبلين اعيش بيت مرتي دافعه فلوسه وين رجولتي بعد ابقى بلبيت اشتغلج وانتي اطلعي جيبي الراتب وصيري رجال البيت
سليل : هسه انت تعصبت وعلا صوتك وهو نقاش ورأي اني لان حابه البيت هيج گلت والى متى نعيش بالايجارات واحنا نكدر نشتري
سجاد : منين نكدر والقرض ميراد فلوس ندفع وفوائد
سليل : نعتبره ايجار هسه ايجارنا ٣٥٠ والله اعلم الي راح نأجره بيش والايجارات هسه غلت مثل هذا المشتمل زين اذا حصلناه بال ٤٥٠ شوف شلون گبت البيوت ليش كل شهر نطي هلكد ويروحن بطن ابو الملك خو نشتري ونسدد القرض تاليته البيت النا اذا منفكر بنفسنا نفكر بأبنه
سجاد : ماطول مااكدر اوفر فلوس البيت نكعد على كد امكانيتي واذا حابه تشتري اشتري واطلع اني منه
كاام ولزمت ايده

حبيبي هي مو عركه اني جاي اقترح عليكً
سجاد : واني رافض اقتراحج
سليل : كمت وكتله ميصير هيج بكلشي متزمت برأيك اني هم مرتك ومن حقي اشاركك كلشي ليش دوم تحسسني مالي دور بس على كد الاكل والشرب والتنظيف وتربيه زين
سجاد : هاااا اني هيج محسسج
سليل : تعبت والله تعبت حسره اريد شى منك اتوسل واوكع دخيل يله تقبل ودوم رأيك اليمشي بالاخير عدا الاوامر والعياط اذا بس ناقشت هسه هذا الموضوع مهم انت شسويت دخلته بغير اتجاه بأسم منو يتسجل اني اريد بيت يجمعنا النا بدون ما واحد يوميه داك بابنه السلام عليكم وعليكم السلام ويتأمر براسنا فوك متكول خلف الله عليج تفكرين ويايه
باوع صفح عليه وكاال خلف الله عليج ومشكوره وسدي الموضوع

سليل : هذا الي الله كدرك عليه هذا هو براحتك بقينا مثل ام البزازين يوميه بيت عفته واخذت زين وصعدت للغرفه
جنت حيل مخنوكه اريد اتناقش وياه لازم يضوجني ويخلي فرق بيني وبينه
رشا : بديت اخذ علاجات وضعي تحسن بقى بس اراجع طبيبه نسائيه علمود الحباله جنت ميته ويصير عندي طفل تكول عبالك ممخلفه گبل هاي الفتره عطله شعلان احس وضعه مو طبيعي وكل ما اسأله يكول شغل متعبني گتله على سالفه الدكتوره مقبل وكاام يعيط احس هواي متغير ويتصفن حاولت افتهم منه معرفت وين الخلل مرات اكول اخاف عنده وحده واتعوذ من الشيطان واكول شجاج رشا هو هذا هم تفكير وارجع واكول شصار هو تعبان من شغله اله ادخل شى موزين والله مرات عقلي يصير مثل عقل الجهال

وره يومين خابرتني جنات وجان ابنها يبجي يريد عمو شعلان اني مرات اضوج واغار واتمنى عندي ولد حتى مااخلي شعلان يتحسر وراها اكول كبري عقلج يبقى طفل صغير ويتيم وحقه يتعلق بشعلان غير يحبه وبقى سنتين هنا ويشتريله
جنات : لج عيني اكل گلبي ياعمو وياعمو
رشا : خطيه حبيبي
جنات : والله تعبني رشاوي وحايره ويااه كل مديكبر اتعب اكثر
رشا : الله يعينج اني هسه مو اشوف نفسي بفروحه اركض كل الوكت وراها
جنات : اعرف ثقلت عليج والله مستحيه اكدر اجي كم يوم يمج
رشا : استحيت وكتلها هااا هله بيج البيت بيتج
جنات : اي والله هذا موتني كل الوكت وكاال عمو شعلان وعطله هاي الايام
رشا : اي عيني ليش هله بيج بس منو يجيبج
كلت اكيد تحتار منو يجيبها على الاقل افلت من جيتها بحجه شعلان ميكدر يروح لبغداد لان عنده شغل هوايه
جنات : ابو فرح يجي اذا يكدر واذا بيها زحمه وتكلفه خليها
رشا : هااا اكول اله وانطيج خبر
جنات : انطيني من وكت حتى احظر نفسي
رشا : ان شاء الله جنت ضامنه شعلان ميروح لان هاي الفتره كلها اكله اريد اروح دكتوره وهي بعد كم منطقه عنا يگلي ماعندي وكت خليها هسه اكيد اذا اكله روح لبغداد من سابع المستحيلات يقبل واذبها براسه

اجه وجنت محظره العشا وبدلت ومكيجت
شعلان : هااا شنو اليوم حبيبي عالكها
رشا : ههههه لا هيج حبيت اغيرلك جو
شعلان : لتعبين نفسج اخاف عليج
رشا : شبيك شعلان كل مااسوي شى وكلت لتعبين احد كلك كعد اعالج وراح اموت وتخاف عليه اتحرك
شعلان : هاي فوكاها اني اريد راحتج وانتي تحجين هيج والله النسوان كله البله والمصايب بيجن منعرف شتردن لو اكرب عليج جان صرت موخوش رجال اريد راحتج هم موخوش رجال
رشا : وشكلت اني وتعصبت
شعلان : اصعد ابدل
رشا : هااا صدك تكدر تروح لبغداد
شعلان : خير شكو
رشا : جنات تريد تجينا
شعلان : اي عادي يومين واروح عندي شغل باجر
رشا : هااا يعني تروح لبغداد واني دكتوره بعد كم فرع عنا متقبل توديني
شعلان : احرك روحي حتى ترتاحين انتي ردت جنات وكتلج تم هم اطلع مو خوش
رشا : مو هذا القصدته اني قصدي
شعلان : واليرحم والديج اسكتي راسي راح ينفجر من الاعصاب اصعد انخمد وانام
رشا : والعشا
شعلان : اكلي وحدج
رشا : عافني وصعد بقيت دايخه بسوالفه شعلان واعرفه بيه شى مغيره والله مو وهم اكو شى مو طبيعي گلبي ميلعب هيج بدون سبب لازم افهم شنو الديصير من ورايه

غزل : حضرت الجنط واباوع داير مدايري راح اعوف العراق واهلي جنت حيل مخنوكه تكول ماخذيها للمشنقه نزلت الجنط كلهن بلهول
محسن : كملتي بنتي
غزل : اي كملت
محسن : ينتظرج فيصل بتركيا تخافين اطيرين وحدج لو اجي وياج
غزل : لا عمو انت تعبان ومالك حيل
محسن : اي والله كدامج بس لعيونج طبني مرض اجي وياج لو زحوف
غزل : اسم الله عليك عمو لتكول هيج
نروح لبيت اهلج
غزل : اي مبدله نسلم عليهم ونطلع
ام فيصل : هاج بنتي هاي گليجه وزلابيه انطيها لعمتج ثواب البارحه وزعه عمج علمود رجل ريم وبتها وضميت لاهلج
غزل : تسلم عمو هاي الفتره كلها ماكطعت من الثوابات
محسن : الله يعلم حركت گلبي عليها شكد بس مابليد شى غير الدعاء الها بلصبر وهاي شى بسيط اعرف هي لو صاحيه ماتعوفهم بدون ثواب
غزل : بس ماما نهر وبابا كل خميس يسوون
محسن : واني هم مو غريب وكل مااكدر اسويلهم يجعل مثواهم الجنه
غزل : امين
محسن : يله بنتي

غزل : صعدت ويه عمو وخابرت ماما سليل حتى تجي لبيت اهلي هي وعمو حتى اودعهم كلهم
دخلت ولكيتهم متجمعين
ركضت لحضن بابا
حجي طه : هااا بنتي رايحه
غزل : بست ايده اي ادعيلي فدووه
حجي طه : بكل خطوه سلامه وياك وين مترحين بنتي الله يوفقج وينور طريقج وتكونين اسعد البنات
غزل : حضنته حيييل وبجيت راح اشتاقلك
محسن : يمعوده لتصعيد ضغطه وين نحير بيه
حجي طه : فدوه الها والله يامحسن لو ادري تسافر للخارج ولا ازوجها لفيصل غدرت بيه ياصاحبي
دنك عمو من حجايه بابا واني كتله
غزل : اني هم اريد اروح اغير جو بلكت هناك اعالج الحرك مالتي ولتخافون دوم اخابركم وافتح كامره وياكم
حجي طه : ديري بالج على نفسج وعلى رجلج ولا عبالج وحدج هناك والله اجيبج لو بأخر الدنيا اريدج سباعيه وقويه وافرح بخلفتج
غزل : ان شاء الله

انداريت على ماما نهر بستها وهي بس تبجي وماما سليل لحظات صعبه حييل عليه اصعب من يوم الزواج لان رايحه بلد وحدي بيه والاضرب ويه شخص ممتقبلني بوست جنات وجان اطب رشا استغربت جيتها رغم ودعتها خابرت وبلغتها مكالت راح اجي لبغداد
ركضت لحضنها همزين اجيتي
رشا : شلون مااجي وانتي مسافره وعايفتنا
غزل : الْحٍمَدٍ للـّہ شفتج قبل مااروح
رشا : الله ومحمد وعلي وياج بكل خطوه سلامه حبيبتي ان شاء الله مده وتخابرينا وتكولين اني سعيده ومرتاحه
غزل : ان شاء الله حضنت عمو سجاد
سجاد : ديري بالج على نفسج بطلي فقاريه هناك يراد الجريئه والقويه اياج تتنازلين عن شى يمس كرامتج
غزل : احااول

سجاد : بنوتي بطله بس شويه خففي المستحه واحجي الي يضوجج اوكفي بوجهه اووف البطن الشالت ريم ورشا نفسها شالتج شلون طلعتي هيج فقيره متحلين رجل دجاجه مااعرف
غزل : على ماما سليل طالعه
سجاد : امج هم لسانها طولان لتخافين ياما تحت السواهي دواهي هاي محد يعرفها بكدي فقيره شكل مو طبع
سليل : باوعت عليه وكتله هااي اني
سجاد : اكيد ياام الزين الغاليه
تقربت منه وكتله زعلانه مااحجي وياك
سجاد : انتي تتحارشين
غزل : هااا اكو شى
سليل : لا حبيبتي توصلين بلسلامه وحضنتها

غزل : وين ريم
نهر : فوك
غزل : مكتولها راح اسافر
نهر : گلت والله يمه ما حجت شى ساكته ومطفيه الضوه ومتمدده بفراشها مثل كل يوم
صعدت عليها وفتحت الضوا عيونها دم مبين جانت تبجي كعدت يم راسها وتقربت منها ومديت ايدي على شعرها وامسد واحجي وياها
طول عمري جنت اكول ياريتني مثل ريم ياريتني مثلها اكمز واضحك واتشاقى واضرب الدنيا جلاق مثل متضرب كل واحد مضوجها وين ضحكج الجان مسمع الجيران صوتج وهوستج الجنت يوميه احط ايدي على اذني واكول غير تسكت مسجل متتعب ومن تتعاركين لخاطر وحده من عدنا اكول اي والله عندي اخت تاخذ حقي اني فاهيه مابيه خير نص لسان على كولتها جنت اشوفج كتله من نار واكول شوكت اصير مثلها ولو ربعها واليوم شفت هاي النار طافيه

مااكول كومي هوسي واركصي وتعاركي على الاكل ويه الصغير والجبير مثل قبل بس على الاقل كومي لخاطر بابا الي حتى اللكمه كوه يبلعها ودوم تعبان من وراج كومي لخاطر تيم الهسه انتي امه وابوه لخاطر نفسج
اني رايحه مسافره رايده منج القوه محتاجتج والله اخاف اوكع هناك وماعندي الي يشجعني اخذ حقي جنت اشوفج شلون تشجعين رشا ادافع عن بيتها وتنفذ خططج واعترض اعتبرهم خطط شريره بس بگلبي اكول بس اتزوج اني هم من يصير شى اخابرها وامشي بخططها والله محتاجت متتوقعين شكد رفعت عيونها كلها دموع وتباوع عليه انتظرتها تحجي محجت
دنجت بستها وكمت ردت اسد الضوا جان تكعد على حيلها بلجربايه واشرت بيدها تعااالي بدون كلام ركضت شمرت نفسي بحضنها وابوس بيها وهي هم تبوس كلشي مكالت بس
ريم : ديري بالج على نفسج
غزل : صااار انتي هم ديري بالج على نفسج حضنتها حييل مشتاقه لصوتها ولسوالفها ولاتوقعت يجي يوم اشتاق لهوستها وعركاتها
كمت من حضنها ورجعت تمددت وكأنها اختارت ترجع ثواني من عزلتها حتى بس تودعني وترجع

نزلت ودعت الكل واكيد الكل خايف عليه اذا اني خايفه من المجهول الله اعلم شمنتظرني
من الصبح اخذني عمو وبابا اجه مقبل اروح اله يودعني بلمطار اباوع بابا وعمو محسن اثنينهم يبجون عليه والله منظرهم يخبل انيالي عليهم وعلى حنيتهم ودعت العراق وطرت بخوف ورجف اول مره اصعد طياره
ومبقيت ايه مقريتها

ونزلت بمطار اسطنبول اتاتورك ادور بلوجوه مثل الطفل مضيع امه وخايفه حيل لا ميجي فيصل وبقيت ادور فوك النص الساعه ردت شويه وابجي من الخوف وحدي وبدوله غريبه واول مره وجان اسمع اسمي انداريت شفت فيصل اول مره اكيف لان شفته ركضت عليه ردت احضنه مو من الشوق والله من الخوف تالي انتبهت على نفسي وسلمت ومديت ايدي هو جرني وباس خدي هااا شنو هذا منو اخاف مبدلي مو هذا رجلي

فيصل : الْحٍمَدٍ للـّہ على سلامتج
غزل : الله يسلمك
فيصل : خفتي من الطياره
غزل : موت خوف
فيصل : وراج طيران اكثر
غزل : انت موجود مو مثل ما وحدي
فيصل : تعالي ارتاحي واشربي واكلي بين ميصير موعد الرحله
غزل : ماشي من خوفي بلطياره ولا اكلت بس شربت جاي لان وكت ريوك جان
اشترالي اكل وكعدنا ناكل منتظرين رحلتنا للسويد
فيصل : ليش لابسه اسود
غزل : غير علمود بت ريم ورجلها
فيصل : بس صار هوايه من ماتو الله يرحمهم
غزل : عدنا اله تعبر السنه يله انزعه
فيصل : هناك بلعراق بس بلسويد تنسين كلشي متعلق بلعراق واول متوصلين تنزعي
غزل : ضارك بشى مااريد انزعه
فيصل : اني احب اللون الاسود بس مو هيج من فوك ليجوه حتى الحذاء والجنطه والشال اختنكت
غزل : نوصل ونشوف
فيصل : كلت تنزعي
غزل : مااشي سكتت مردت اتجادل ويااه لا المكان ولا الوكت مال نقاش
وره مده صار نداء رحلتنا وطرت معاه كانت الرحله طويله حدود ٤ ساعات من اسطنبول لستوكهولم
بس مخايفه هلمره لان هو موجود كاعد يمي وهو يقدم اوراقي جانت بيده وجان مكمل كلشي بس يكول اوكفي هنا وتعالي هنا واني من الخوف لازمته اخاف اتيهه منه صعدنا بلطياره كعدت اباوع على الجو والغيم كنت بصف الشباك واباوع سبحان الخالق الغيم عبالك شعر بنات لو كطن من البياض والجمال

وصلت وجنت حيل تعبانه لان اجرائات هوايه اول منزلنا وبعد الاجرائات وكل اوراق الاقامه مكملها دخلت للسويد وباب المطار اجه ولد مبين صديقه حيل
فيصل : هذا حسن صديقي غزل مرتي
حسن : اهلاً بيج اختي نورتي السويد
غزل : شكراً
شگل صداع عندي من الطياره وردت بس ارتاح وصلنا لعماره
فيصل : تعالي ادخلي
دخلت وجانت نظيفه وتخبل عود مثل عماراتنا شكد دايخه صحيت فتح باب الشقه ودخلت باوعت جانت جبيره واثاثها كلش حلوو بس هوسه ملابس مطشره واكل وزعابيل
فيصل : شقه عازب ملحكت انظفها
غزل : عادي ارتاح واني انظفها
فيصل : ميحتاج ادخلي ذيج غرفتج نامي وارتاحي جوعانه
غزل : لا فتحت الباب جانت الغرفه زينه مرتبه انظف من باقي الشقه بس حطيت راسي بهدومي نمت محست شكوو بعد

سليل : رجعنا للبيت والليل كله ابجي لان فاركنا غزل كعد على صوت دموعي سجاد
سجاد : خير بيج شى
سليل : غزل راحت
سجاد : وكعتي گلبي عبالي صار بيج شى بزين
سليل : غير اختي وسافرت
سجاد : غير للسويد المفروض تكيفين الها
سليل : شكيف وهي بعيده
سجاد : الله يوفقها نامي حبيبي
سليل : اني مو حبيبتك
سجاد : هااا لعد منو انت
سليل : وحده هيج تزوجتها وتسوي تفرقه بينك وبينها
سجاد : لكت الها حجه واتذب حرگتها بيه تنامين لو اجرم بيج بهاي الليله
سليل : كمت اشهك وعلا صوت دموعي يله كلشي اتوقع منك اضربني بقت على هاي جان يجيت عليه ويبوس بيه
سجاد : ولج ام دميعه كبرتي وصرتي ام وبعدج تشهكين من تبجين
سليل : وخر مني من سوالفك غير
سجاد : شتردين هسه
سليل : مسحت دموعي نشتري هذا المشتمل
سجاد : رجعنا متكدرين اله تنگين
سليل : حضنته بداعتي سجاد التريده وياك بس نشتري والله كل مااتخيل افرغه واطلع روحي تطلع
سجاد : استغفر الله الصبر منك ياارب
سليل : كمت ابوس بيه واكول بداعتي بداعه سلوله عندك بداعتي
سجاد : خوش اغرائات
سليل : ياريت يفيد
سجاد :والله انتي فد وحده كلاوجيه كل البله منج ويكولون فقيره
سليل : تربيتك حبيبي
سجاد : تربيه سزز

سليل : ههههههه ميخالف المهم نشتري فدوه سجودي
سجاد : خلي نصبح باجر واروح لابو البيت ونشوف بيش يريده بس لتبجين لخاطر الحمزه معودت هاي الفتره سگتي
سليل : جيتت عليه وابوسه بيه وبرگبته
سجاد : ااااخ منج لو كايل لا جان انطيتيني ظهرج وجهه الجينكو اشوفه
سليل : لا حبيبي شعندي غير ابو زيون ادلل عليه
سجاد : تعالي اشوفج الدلال شلوونه

سليل : سهرت وياه ونساني حتى غزل اااخ منه شكد احبه رغم اطباعه الصعبه وثاني يوم داومت والظهر اجه وكاال
سجاد : شوفي سليل اني عرضت سيارتي للبيع نشوفها شكد اتجيب ويه الذهب والقرض اذا سحبتي اني ادفعه كل شهر اعتبره ايجار وانطي الج واذا الله مكني اشتريلج ذهب يبقى دين برگبتي
سليل : حضنته اروح فدووه الك بس ليش تبيع السياره فايدتنه
سجاد : مااكدر اخذ الفلوس كلها منج حتى ارتاح عندي جم فلس ظامهم ابيع السياره واشتري اقل على القرض والذهب نشتري
وبيومها طرت من الفرح
وركض بعت ذهبي انطينا عربون للبيت
واخيراً صار عندي مشتمل ملك
والملك لله

يتبع .....