رواية ابي والغزلان الفصل الثالث والثلاثون 33 - بقلم ريام هادي

ابي والغزلان
للكاتبة Reem
البارت الثلاثون

أقبل رجعتك بس عندي كومه شروط
أولهن تردلي سنين محسوبه
وثانيهن شبابي الهدر بين أوراق
وسهر ذيج الليالي المالهن حوبه
وثالثهن دموعي الصبّن بفركاك
على كل دمعه أفصلك فصل منهوبه

ام سندس : ها يمه وين رحتي شبيج شنهي حالج
نهر : ماعندي احد اروحله تستقبليني بيتج
ام سندس : يايمه اذا مايساعج البيت اشيلج على راسي تعالي سوده عليه ادخلي يمه ادخلي
سليل : اباوع على عمه دموعها تصب على خدها حيل خفت عليها وين راحت وليش هيج حالها دخلنا للهول والبنات كاعدات يلعبن
ام سندس : يمه اخذي خياتج وكليهن
سليل : وانتم بيبي متاكلون
نهر : لا حبيبتي مااريد
ام سندس : وانه هم يمه مااريد اخذيهن طكهن الجوع
سليل : ماشي بيبي اخذت البنات للمطبخ صبيت الاكل الهن وفرشت بلكاع بلمطبخ مردت اروح للهول اخاف عدهم حجي عيب اكعد بنصهم بقيت اوكل بغزل بس گلبي نار على عمه

ام سندس : شبيج يمه سولفي كاعدين وطفرتي ورديتي بهذا حالج شجاج
نهر : شمرت نفسي بحضن ام سندس ردت ام اشكيلها حالي ردت ام تحس بيه واطيب خاطري اني مكسوره وكسري جبير ومايعلم حالي اله الله
ام سندس : دخيلك ياعلي يمه نهر احجي مو جبدي طك عليج
نهر : وخرت من حضنها وبديت اسولف الها شصار
ام سندس : يا صخام الصخمه وتالي شسويتي
نهر : دخلت لبيت عيالي وصعدت لغرفتي وجبت كم حاجه من ملابسي واجيت ومن طلعت حتى مباوعت بوجهه احد صاحت امه ورايه ولا انداريت عليها شكول قابل هي متعرف اكيد كولشي تعرف مستحيل تسكت عني هاي الفتره اذا مو مطمنه ابنها مشه على شورها واتزوج مثل مارادت
ام سندس : ياعيني عليج والله يايمه مااعرف شحجي شكول بس اكولن الله يعين گلبج

نهر : اااااه ياخاله نار بيه وروح ابويه نار تاكل بيه خاله سامي كسر ظهري مو اخويه ومصيبته كسرت روحي بس اكول يجي يوم ومتأمله برحمه الله اشوفه وترد روحي اليه وهم اكول الله انطاني سامي حامي ظهري وساندني ضد الدنيا وبلاويها كافي تالي الليل ورن التعب والالم انام بحضنه واحس بالامان هذا حب عمري تالي يكسرني هيج كسره والله ياخاله لهسه ممصدكه
ام سندس : يمه جان المفروض تضلين تسمعين للزلمه اخافن امج تجذب حتى تحرك گلبج لا بسرعه تحكمين عليه
نهر : خاله فدوة اروحلج مو مصار ساعه من شكيتلج وكتلج حاسه عنده شى اني مو غشيمه ولا ماافتهم رجلي متغير وحاسته من زمان بس اجذب روحي واكول لا ميسويها امي تره من كالت مجرد اكدت شكوكي
ام سندس : بس جان لازم تنتظري وتسمعين منه هذا العقل يايمه
نهر : ياعقل خاله هو اني ضل بيه عقل كمت اشهك سحبتني لحضنها وبيدها تمسد براسي
ام سندس : بنيتي اذكري الله وكافي تبجين عسى نكول غلطانين ننتظره اكيد راح يجي لهنا
نهر : مااريد اشوفه ولا احجي وياه
ام سندس : ميصير ليش ما تشوفي شنهي عامله مصيبه ليش تضمين راسج المفروض هو اليستحي على نفسه لا شوفي واكوفي بوجهه لازم تفهمي انتي طلعتي من بيته بدون شوره وهذا عيب بحقج لا تخلي يلزم عليج الغلط واجهي وگليلي ليش هيج سويتي
نهر : مسحت دموعي وخرت من حضنها وكتلها اي صحيح خاله بس يجي اتفاهم وياه
بس اني مااريد ارجعله

ام سندس : لا تفكرين هسه يابنيتي احجي وياه وتفاهمي والتردي انه وياج
نهر : يعني اذا ردت اطلك تقبلين ابقى يمج والله خاله مااثقل عليج
ام سندس : اسمعي يمه ولو مااحبن هاي حجايتج مال اطلك بس اذا عزمتي وبعد ما تفكرين وتاخذين قرارج صح ورديت لا سامج الله تعوفي هذا بيتج حالج حال هاي البنيات واليجري علينا يجري عليج چا يوم عيد تضلين يمي انه دوم اكولن لو الله رازقني مثلج وحيده عاقله وفقيره ورزنه جان اعيش بجنه بس الله رزقني بوحده مسودنه ماتندل وجهه من كفاها الْحٍمَدٍ للـّہ على كل حال

نهر : والله ياخاله لو عندي غير مكان مااثقل عليج بس تعرفين ماعندي احد هو بس طه وتعرفين حاله وحال جهاله
ام سندس : ازعل عليج والحسين هذا الحجي يزعلني منج چا انه حسبت امج واياج تعيدي انه كتلج فكري زين وهسه ارتاحي واكعدي ويه الزلمه وشوفي وتفاهمي وراها انه وياج للوحه
نهر : نزلت ابوس ايدها جرتها وباست راسي
والله كمت اشهك على حالي بس الْحٍمَدٍ للـّہ الله ميكطع

سليل : طلعت وكفت باب المطبخ اباوع بأتجاه الهول لكيت عمه بعدها تبجي وبيبي تواسيها جان اشوف راس صغير طلع صفح باوعت عليها ولج شكومج من الاكل
ريم : عمه شبيهه ثلل
سليل : مابيها راسها يوجعها طبي كمل اكلج
ريم : خطيه تبجي
سليل : وتالي وياج مو خبصتيني جوعانه
ريم : ليش متنطيها هذا الدوا مال غزل
سليل : يادوا يمعزايه
ريم : الوردي بثلاجه اممم طيب
سليل : ولج تشربين منه
ريم : بيه ريحه علج وطيب هسه عمه متبجي اذا شربته
سليل : لزمتها من اذنها اياج اشوفج تتقربين منه هذا مال صخونه اذا شربتي تصيرين قرد
ريم : هاااا يعني راح اصير قرد
وركضت لحضن عمه اريد الزمها وتعيط عمه راح اصير قرد ودمعتها بعينها
نهر : شبيج ريمو
ريم : ثلل تكول اصير قرد
سليل : عمه تشرب دوا غزل مسويته شربت
نهر : ميصير حبيبتي تتأذين
ريم : راح اصير قرد واكمز وبيه ريحه ويضحكون عليه
نهر : ولج سليل ملكيتي غير القرد اباوع عليها مبرطمه شكلها يخبل بستها وكتلها تكذب عليج سليل حتى بعد متلعبين بيه موزين عليج حبيبتي
ريم : يعني مااصير قرد
نهر : لا
ريم : ثلل الله يذبج بلنار الي يكذب وين يذبوه عمه
نهر : بلنار
ريم : هااا مو كتلج
سليل : امشي ام لسان اكلي
ريم : عمه لتبجين محلوه من تبجين
نهر : مسحت دموعي وكتلها ماابجي بس روحي اكلي يله بلشطوره وبعد لتلعبين بأي دوا زين
ريم : اي عمه
ام سندس : والله يايمه اخاف احجي وحرام عليه
نهر : خير خاله بعدها تريد تكمل اندكت الباب طلعت سليل شويه وكالت عمو سامي
طب وراها وعيونه براسه وصاير نار

ام سندس : هله يمه تعال زارتنا البركه
سامي : البركه بيج خاله
ام سندس : اكعد يمه ليش واكف
سامي : والله اجيت اشوف مرتي شون تطلع من بيتي وبيدها ملابسها بدون حتى متاخذ رأي اوافق لا مبين حاسبتني رجل كرسي وبكيفها تعلمت اطب وتطلع
ام سندس : حاشه يايمه هاي مريتك وافتهم منها
يله بيبي سليل امشينا نعوفهم وحيدهم
نهر : دخلو وبقينا وحدنا واني على كعدتي على الكرويته (القنفه ) متحركت ولا كمت ومدنجه بس صدري يريد ينفجر من القهر اريد اعيط املخ روحي مااعرف احساسي يفوق اي شى اريد اسويه كعد بصفي وحجه بنبره عصبيه يريد يملخني
سامي : شون اطلعين من البيت بدون متحجين هاي تاليها حتى احترام مخليتي اليه كدام اهلي من رجعت واستلمتني امي مرتك اخذت ملابسها وطلعت مفكرتي شكول شنو موقفي وتعالي كوليلي اني شمسوي حتى تزعلين واطلعين من البيت وامي حلفتها مسويه شى الج حلفت الف يمين كالت ممسويه على شنو بعد طلعتي
نهر : رفعت راسي وباوعت بعيونه ودموعي تنزل بهدوء بس كل دمعه من توكع على خدي تكول تيزاب من حرارتهم
وكتله بنبره هدوء وقهر ليش
سامي : شنو ليش
نهر : شنو السويته وتجازيني هيج

سامي : شبيج نهر تخبلتي شصاير
نهر : اي تخبلت يوم مطلعت من بيت اهلي بنصاص الليالي مثل المخبله وافكر واكول شلون اخلي واحد يكمشني ويصير رجلي غير سامي
اي تخبلت يوم موكفت بوجهه امي وخليت اخويه يواجهه الموت حتى اتزوجك
اي تخبلت يوم متحملت المر والعيشه الاقل من مستوايه وقله الحال ويوم اكو وعشره ماكو و اكول احبه لخاطره اتحمل كولشي
اي تخبلت يوم مخلصت ٩ سنوات من عمري اشتغل وانظف واخبز وصرت خدامة لأمك وابوك وخواتك واكول لعيونه فدوه
اي تخبلت يوم مااسمع شون تعيرني بكل حفله وبكل فاتحه وبكل تجمع نسوان وتصيحلي العاگر ارض البور واكول فدوه اهم شى هو بحضني
اي تخبلت يوم منمت واني اكول كل الناس تطعن ظهري اله سامي هذا حب العمر حبيبي وصديقي واخويه بعد مافقدت طه هو صار سندي
اي تخبلت من امنت مراح يوم تذلني وتخليني علج بحلك الشمات وتاليها اسمع خبر زواجك من اكثر وحده مااتمناها تتشمت بيه امي

فتح عينه وبلحظه انگلب وجهه وبقى بس صافن مثل الصاعقه نزلت على راسه وكام يعرك وكف على حيله واباوع عليه ميعرف شيكول رجع كعد وكام يمتمت
سامي : اني والله مو
نهر : قبل متكول اي شى بس جاوبني بشنو قصرت اني شنو غلطي وتجازيني هيج
سامي :اعرف شمراح اكول مراح تعذريني بس لازم افهمج موقفي فدوه اسمعيني للاخير
نهر : شوف سامي راح اسمع منك للاخير لان هاي اخر مره منك اسمع
سامي : خلي اجي غير وكت وافهمج اكيد هسه مراح تستوعبين اي كلمة اكولها
نهر : بلعكس استوعب وهاك مسحت دمعتي حيل وباوعت عليه يله احجي ليش هيج سويت
بلحظتها الله انطاني قوه عجيبه حتى اسمعه من كثر ما عقل لهسه ممستوعب سالفه زواج سامي اريد يصدك اريد يكذبني تمنيت يكول ردت ازوج وخربت او اي عذر ينطيني لان اني احبه تمنيت كل هذا كذب وماله وجود
مسح گصته ويرجف ويحجي

سامي : اعرف يجوز متعذريني بس والله صار غصب عني ياهو اليجي يحجي عليه ليش ماعندك جهال ليش متتزوج مكافي ٩ سنوات بقيت كبرت ويرادلك خلفه تعينك بكبرتك متشوف الاصغر منك جم طفل عدهم متريد يبقى اسمك بلدنيا واشكال الحجي من الاهل من الاصدقاء ياهو اليجي يحجي نفس القوانه
نهر : بس اني مو عاقر وانت تعرف كولش زين جم دكتوره رحنا الها وكالت مابيج شى سليمه وضعج زين
سامي : اعرف والله اعرف بس مكعد يصير حرنا وين رحنا لا بقينا طبيب ولا جده ولا شيخ ولا امام ومصار
نهر : وكلت ماطول مصار خلي ادوسها برجلي واروح اتزوج غيرها بلكت تحبل
سامي : والله السويته لمصلحتج قبل مصلحتي

نهر : انت من كل عقلك هيج تكول يامصلحه واني اشوف حبيبي ورجلي بحضن مره ثانيه
سامي : ردت امي اتجوز منج ردت الناس متعيرج ردت اخليج مرتاحه ومتفكرين بهذا الموضوع
نهر : والله عذرك اقبح من ذنبك حتى اريحج اتزوج عليج يعني انت عاقل وكعد تحجي هيج شنو شفتني ثوله واصدكك مو لهاي الدرجه الغباء
كول اتزوجت اريد جهال كول عجبني يصير عندي مره ثانيه كول بطلت احبج وحبيت غيرج كلها اصدكها بس مال تكول حتى اريحج وهذا الكلام الي يضحك عيب والله احترم عقلي على الاقل

سامي : مو كتلج مراح تفهميني لان تعبانه هسه
نهر : هنا عطت وابجي متحملت وكفت على حيلي تعبانه اني تعبانه كول داموووت ولك اني دامووت (واضرب على صدري) تعرف شنو اموت يعني اصبح الصبح الكه رجلي متزوج عليه وتكولي تعبانه تعرف شنو حالي من امي تغمني وتعيرني بيك وشون بعتهم واشتريتك وتاليها تتزوج عليه جان يتقرب يريد يهديني ويحضني دفعته حيل تهسترت واعيط اياك تلزمني اياك
تعرف شنو شعوري واني امشي بنص الشارع واتخيل حضنك وشماتك ونومتك ودلعك الي سنين اليه صارو لغير مره تعرف شصار بيه من دخلت لغرفتنا واباوع على جربايتنا الي حضنت ايام من الحب والدلع والغزل واشوف نفس المواقف ويه غير مره لك انت شون الك نفس تتقرب من وحده غيري شون الك نفس تباوع بوجهي وتبوسني وتكولي احبج وترجع تسوي نفس الشى ويه ذيج

كمت ادك على راسي جان يلزم ايدي ورجعت هم دفعته كامت عيونه تصب دمع ويمسحهم
وبعدني اعيط واكوله زين تريد جهال حقك عوف كولشي تعال كولي تعال كول يابنت الناس اريد جهال وانتي مصخمه مكعد تخلفين اريد اتزوج ليش حتى هاي حرمتني منها ليش خليت الكل تتشمت بيه تعال شاركني هو مو حقك الشرعي بس اني هم الي حق عليك تاخذ رأي ولو اقبل بلوضع لو مااقبل غصب عليك تكولي هذا حقي سامي وانت حتى هذا الشى حرمتني منه شنو فرقك هسه عن امي الرادت تزوجني السكير وتطعن بيه انت سويت الاضرب منها اخذت مراهقتي وشبابي اخذتني وردة ودستني بقندرتك

سامي : والله نهر احبج وروحي معلكه بيج ومكتلج حتى لتعوفيني حتى لتنقهرين اني ما اكدر بدونج انتي حب حياتي
نهر : لو صدك حب حياتك متخليني بهيج موقف
زين مفكرت بصديق عمرك طه وهو يمشي ويوصيك بيه مفكرت اذا بيوم الله جمعك بيه شتكوله اتزوجت على اختك ومكتلها خليتها علج بحلك العالم والكل يضحك عليها وعرفت من امها اكثر من شهر ونص واني متزوج عليها واباوع بوجهه ولا يهزني شى
سامي : اني ماسويت شى حرام
نهر : ماسويت حرام من تزوجت وكتلك حقك وهذا شرع الله بس مو من حقك متكولي وتكذب عليه واسمع من غيرك ومو من حقك تخليني اعيش غصب وياك

اسمع سامي انت اختاريت ومالي دخل بأختيارك وماطول مقدرت لا حبي ولا تضحيتي ولا كل التعب الي تعبته علمودك
لحظه وحده مااضل على ذمتك
سامي : تريدين اطلكج
نهر : ليش تتوقع اعيش وياك بعد دكتك الناقصه بيه
كام يعيط حيل
سامي : لو تموتين ما اطلكج
نهر : اطلكني وغصب عنك واياك تشوفني وجهك روح لمرتك الجديده ليش بعد فاتح بيتين وانت الفلس كوه تلمه هاك خلصتك من بيت ولو هو يابيت قصدي خلصتك من غرفه وخدامه جنت تكرب عليها واحسن ماتدفع دم گلبك بالايجارات جيب مرتك وكعدها بغرفتي احسنلك واصرفلك
سامي : طلاك ما اطلك وذاك حايط وتركعين راسج بيه راح اعوفج جم يوم هنا ترتاحين وراها اجي اخذج واريد اشوف يامره مترجع ويايه
نهر : تحلم اخليك تلزم شعره مني
سامي : يصير خير يصير خير
وعافني وطلع كعدت بلكاع اضرب على رجلي والقهر كاتلني طلعت ام سندس وسليل يركضون

سليل : حضنت عمه حيل وابجي وياها سمعت كل حجيها وعرفت عمو سامي شسوه بيها
ام سندس : يمه على كيفج اذكري الله لا يصير بيج شى
نهر : شفتي خاله فوكاها يريدني ارجعله بأي حق ارجع وهو تزوج عليه وحتى مكلف نفسه يكولي
ام سندس : يمه هو يريدله وليد وضال عليج يحبج

نهر : ليش اني مااريد ما اتمنى اسمع كلمة ماما والله ياخاله يوميه اول ما اصبح الصبح جنت اكول ربي اكرمني بطفل واحد بس واحد حتى افرح گلبي وگلب سامي والله اطك من البجي كل متجيني الشهريه واكول هلشهر هم انحرمت اكون ام تره اني عايشه بعذاب بس محد حاس بيه اني من اشوف فلانه حبلت وفلانه جابت واصغر مني اموت بدمي بس مابيدي شى قابل اعترض على حكم الله هو رزق يعيروني على شى مو بيدي بيد الله المن بعد يصلون ويصومون اذا ميأمنون بان هذا رزق من الله ويحاسبوني عليه

سليل : حضنت عمه حيل فدوه عمه كافي اني بتج واصيحلج ماما بس لتبجين
جان تجي ريم وتكعد بحضن عمه واني اصيحلج ماما وتبوس بعمه نهر جان تجي رشا تركض بقت عليه اني هم اصيحلج ماما
نهر : حضنتهن حيل وابجي والله انتن بناتي واعز من روحي
ام سندس : كومي يمه غسلي وجهج صاير ليمونه لا توكعين ولج منهو اليستاهل تموتين روحج علموده اخذيها سليل لعمتك وغسليلها وانه اكومن اصبن غدا كتلنا الجوع وتاكلين ويايه
نهر : والله مجوعانه
ام سندس : اسكتي تاكلين لا والعباس مااحطن لكمه بحلكي كومي بنيتي ربج يحلها
سليل : وخرت البنات من حضن عمه وكومتها شكد شفتها مكسوره وتعبانه ااااه يابابا هاك حتى اختك اجاها السره ويانا
نهر : راح اسبح احسن بلكت راسي يفك لان حيل يوجعني
سليل : واني راح افتح البقجه مالتج واحضرلج هدوم
نهر : ولو اتعبج حبيبتي
سليل : تعبج راحه ماما وبستها

نهر : جانت كلمة سليل غريبه بس حسيتها لان اعرفها تحبني رغم القهر الي بگلبي بس ابتسمت من سمعتها دخلت للحمام ترست النجانه مي وطاسه صغيره اشيل بيها واذب على جسمي واغسل رغم المي بارد بس احسه نار على جسمي اغسل واشهك من البجي وكل شويه اكول شون راح اكدر بدونه راح اكدر استمر بلا سامي
مااعرف شكد بقيت بس سمعت دكت الباب ريم تصيح
ريم : عمه اطلعي كافي راح يخلص المي ويبقى شعرج بيه صابون ويعثك ويتكطع
نهر : اي هسه اطلع
ورجعت دكت
ريم : عمه لازمه الخاولي تره تعبت
نهر : هههه اوف منج ريم فتحت الباب شويه انطينياه واخذته منها
ثواني ورجعت دكت الباب
ريم : عمه دشداشتج بيدي وطويله لازمتها
نهر : لحظه امي بس انشف واخذها منج نشفت زين وفتحت الباب ومديت بس راسي ادور ماكو صحت ريم وينج
جان تجي تركض لابسه الدشداشه بلمكلوبي وتسحل سحل وكعت وردت كامت اجت تركض
نهر : هاي شمسويه
ريم : تعبت شايلتها كلت البسها بس شطولها شوفي عمه كصيها طويله

جان تجي سليل ولج مو كتلج لتلعبين بغراض عمه
هاج عمه حضرت الج ملابس
نهر : اخذتهم منها وجان تعيط ريم
ريم : مااا تلبس هاي الدشداشه الي عندج ثلل محلوه
سليل : ولج اثنينهن مال عمه
ريم : لا هاي حلوه بيها ورد اصفر
سليل : وهاي هم بيها ورد
ريم : اي بس مالتي احلى
نهر : ولجن ثلجت فضوها وانطوني وحده
ريم : نزعيني ثلل وانطيها لعمه
سليل : شلبسها الج اااخ منج ونزعتها هاج ماما
ريم : حطت ايدها على حلكها نسيت واني اكولها عمه
نهر : عمه ماما اي شى منكم يخبل
سليل : كملي ماما وننتظرج
وانتي تعالي اقريج رياضيات وراج امتحان
ريم : مشتريتيلي
سليل : وكت شرايه باجر اشتريلج
ريم : اريد هوايه
سليل : صار بس امشي اقريج

اخذتها وكعدت اقريها هي شاطره بس حركة تكمز هنا وهنا
باوعت على غزل الي دوم لازمه لعابتها وتصيح لو ثلل لو ليم (ريم) اشا(رشا) بس يخبلون بلسانها تمنيت الحرك مصار جان صارت احلانا ابد متعبني وعيوني دوم على الحرك مالتها وملتزمه بعلاجها اكول بلكت يخف راح يصير ٨ اشهر على حادثه الحرك
واحنه هسه بشهر الرابع ١٩٩٧ بس يوميه بس افكر انام من وكت احلم بلحادثه لهذا حتى بطلت احاول انام من وكت وبقيت انام وجهه الصبح ساعتين واكعد للمدرسه

يوم بعد يوم واني اشوف عمه تذبل بلزايد ومرات اسمعها بليل من انام تشهك من البجي بس تسد حلكها واكول هيج الحب يأذي زين اذا يحبها ليش يأذيها
بهاي المده عمو سجاد جان ماكو رايح شغل لديالى وميدري بلي صار وعمو سامي موصل بعد وصار اسبوع هدوء بلنسبه النا بس بلنسبه لعمه نار
رغم تعبها وقهرها بس شايله البيت شيل مرات احسها اتذب حرگتها بلشغل بحيث البيت يلمع حتى اني كامت متقبل اشتغل بس الجمعه طول الايام عليه ادرس وادرس خواتي اذا احتاجو شى رغم ميته قهر على حالها بس مرتاحه لوجودها اكعد اصبح الكه حتى اللفات محضرتهم والبنات تمشط الهم شالت كل الحمل عني وحتى بيوم رجعت لكيتها تخبز بمكان بيبي واسمع بيبي تكولها

ام سندس : يمه اروح ڤًـدوة هلأدين شنهي يمه الخبز يخبل منج
نهر : اي خاله اعرف اخبز علمتني ام سامي مو تدرين صار سنين اخبز
ام سندس : چا ماتوقعته هيج والله ومعدله ينهر يحفظج لشبابج يمه
نهر : تدللين خاله وياريت تخليني اخبزلج حتى من يجون الناس يردون خبز بعد لترجعيهم اني اخبز اقلها اعيش بخبزتي احسن مااثقل على المصرف

ام سندس : يااا صگد تحجين يمه چا انه مو الكلج اشيلج على راسي ليش تزعليني منج
نهر : سالم راسج خاله والله متقصرين بس هيج ارتاح وهم احنا نستفاد النهار طويل وبهذا الوكت البنات بلمدرسه والشغل من الصبح اكمله يبقى وقت اخبز بيه احسن

ام سندس : يمه اتعبين منا البيت ومنا البنيات وشغل وتركيب شيضل بيج
نهر : هذا الشغل كله ميجي نص الشغل الي اشتغله بيت سامي بس الله اليعلم شجان يسون بيه وشون سنين كاسرين ظهري بلشغل ولازم لا اتعب ولا اشتكي وحتى من امرض اشتغل شحجي خاله سنه سنتين شفت المر من عيالي بس الي مصبرني جان حبه وحنانه وهاج كملها خوش جازاني
ام سندس : ربج كريم بنيتي ومايضل حمل مطروح
نهر : ونًعــٌٓمُٓ باإٱللـِْﷻـِْﮭﮧ يله خلي اشر الخبز وبعدين اصفطه ودزي للناس
سليل : عمه اريد حنينيه
نهر : صار حبيبتي
كملتها وهسه داكل بيها جان اطب ريا وسكينه وركض يعيطن انريد كمت وقسمتها ٣ وانطيت لكل وحده شويه لان عمه كملت وماعدها تسويلهن دندخل ليجوه واسمع صوت واحد يصيح ريم ريم
ذبيت جنطتي من ظهري وفتحت الباب والكاه حسين ابن عمي علي هااا خير شو هنا
حسين : سليل صيحيلي ريم
سليل : ولك انت مو بيبيتك منعتك من عدها ومتقبل تلعب وياها شتريد منها
حسين : معليه بيبي
سليل : واذا عرفت تضربك
حسين : متضربني
سليل : اي بس ريم واكعه دك جلاليق الك ولك شطولك اتصير واكبر منها وهاي الزقجه تكدرلك
حسين : انقهر عليها تبجي لان محد يلعب وياها واني العب بس تضربني وازعل واكول ماالعب وياها ومن اشوفها بلساحه وحدها اركض عليها وارجع اصالحها
سليل : حسيت اختي كعد تعاني واكيد بمرور السنين من توعى وتفهم راح تعاني اكثر شون ياربي
حسين : شو صفنتي هييي
سليل : وجعي شكو
حسين : صيحيها
سليل : شتريد منها
حسين : جبت الها هذا القلم ابو الالوان بابا اشتراه اليه وهي رادته
سليل : اباوع قلم جاف جبير داير مدايره اكثر من قلم جاف ملون يالون تريده ادوسه تطلع النباله مالته ويكتب ملون كولش حلو
سليل : ابوك يضربك اذا عوف
حسين : ميعرف مو هي كالت اذا متنطيني القلم ما اسوي وياك صحيبه
سليل : ريم وينج تعالي
اجت تركض مبتسمه من شافته خزرته
ريم : روح مزاعلتك
حسين : هاج القلم
ريم : اخذته وطلعت اصبعها الصغير
وهو هم وتصاحبو
وين الطباشير الازرك
حسين : هاج وهذا احمر هم
سليل :من هسه تستغلين الناس من تكبرين شسوين
ريم : شنو اغستل الناس
سليل : لا هيج ماكو شى اذا انتي كوه تنطقيها شون افهمها الج
وانت حسين اذا تضربك جلاق اضربها عيب بنيه تسوي هيج
ريم : ازاعله بس يسوي هيج
حسين : لا مااضربها سليل مو بس جلاق حتى تعض تعضني
سليل : لا ربحنا روح حسوني لامك
ريم : باي سحليه
حسين : باي ساسوكي
وراح يركض لبيتهم بعد شارع عنا
طبي عيني ساسوكي
ريم : هاج ثلل الج
سليل : الي
ريم : اي حلو وانتي خطج حلو رسميلي بيه بلدفتر واخذي الست متقبل نكتب بيه اله قلم رصاص
سليل : لعد ليش اخذتيه من المسكين
ريم : حتى من اكتل جنات يعوفني ميدفعني
سليل : هههههههه طبي للبيت والله حتى ساسوكي مو مثلج

مر اليوم بين الدراسه وبين مسموح النا نباوع كارتون شويه ونطفي لان ورانا قرايه وبعد يومين جان يوم جمعه كعدتنا عمه جايبه ريوك گيمر وخابزه خبز حار والقوري على الجوله الريحه تخبل كعدت البنات اكيد ريم شيل اشيلها لان تموت على النوم بس رشاوي تكعد بسرعه وغزوله هم تكعد بسرعه اله التنبل ريم حتى من تكعد تاكل تك عين
نهر : ماما ريم اكلي عدل
ريم : عمه نعسانه اريد انام
رشا .. شكد تنام
ريم : انجبي انتي كاليميرو
رشا .. كعبول تره اطيح حظج
نهر : خوش والله وحده اتصيح بلثانيه وتغلطون مو عيب مو كبرتو
سليل : اي والله عمه اضربيهن موتني
ريم : هي تكولي كعبول واني خشمي صغير
رشا .. لا جبير وكله وصاخه عيييع
ريم : عمه شوفيها لرشا
نهر : كافي رشا عيب هاي عود انتي الجبيره
ريم : حيييل هههه
نهر : وانتي اذا مكلتي العفو لأختج مااشتريلج
ريم : ثلل تشتريلي
سليل : اني مااشتري معليه
ريم : اهوووو مااا مااكول العفو
نهر : لعد زعلت منج
ريم : لا لا يله العفو وتأشر بيدها اني الج
سليل : لزمت اصابيعها بطلي هاي الحركه لان وراها مصيبه
كعد نضحك وبيبي متونسه على سوالفنا جان تندفع باب الصاله واطب ماما هي وحسام محمله اشكال العلاليك والضحكه شاكه حلكها هي شافت عمه نهر راحت مباشره الضحكه اني بسرعه طفرت من الكاع ورحت للغرفه مااريد لا ابوسها ولا اسلم عليها بس ريم ورشا وحتى غزل فرحو بشوفتها وحسام يبوس بيهن
شويه واسمع ماما تصيح وينج تعالي
مديت راسي بس اباوع عليها
سندس : وتالي وياج تبقين هيج تعالي ابوسج
سليل : مااجاوبها بس اباوع عليها شفت عمه طبت للمطبخ يمكن حتى سلام وحده ممسلمه على الثانيه
سندس : يعني بعده راسج ناشف ولو على يامله اطلعين ميطلع على اهله نغل اكيد لو ابوج لو الفاهيه عمتج
سليل : بقيت بس اباوع وحاطه ايد على ايد واباوع على حالها بنطرون كصيف وقميص كصير حيل والشعر كاصته كاري وملفلفته وطافر ليفوك وكالبته على الجهه الثانيهر وطاكه الترجيه عبالك طشت مال حمام شكبرها وايدها مليانه اسوارات ذهب واكيد الحمره الحمره الطاغيه بوجهه اجه حسام باسني

حسام : ليش متسلمين على ماما مو عيب
سليل : مالك دخل لتدخل بهاي الشغلات كولي شلونه وضعك
حسام : الْحٍمَدٍ للـّہ وبابا خليل حباب ويايه
سليل : لزمته حيل من ايده ولك يابابا انت ابوك بس واحد وهو طه
حسام : اييي هدي ايدي أذيتيني
سندس : شبيج سليل وياه
سليل : كمت ارجف شنو يكول لرجلج بابا على اي اساس
سندس : وانتي شعليج لتدخلين
سليل : باوعت على حسام وكتله حرامات انت اخويه وبابا شكد جان يحبك شون تكول لغيره بابا
حسام : يشتريلي كولشي اريده مو مثل بابا طه كولشي وكال ماعندي
سليل : نمرد گلبي واني اسمع شيكول تمنيت متاخذه وياها اقلها متغسل دماغه اذا من هسه نكر بابا وسمه ذاك بابا لعد من يكبر شيسوي واني صافنه وكاتلني القهر ومنتبهه شكالت بيبي لماما جانت تعيط ماما

سندس : هلوووو وشعدنا فاتحي ملجأ هااا متبقى لحظه هنا مو اني اتعب واشتغل واتسوك وتعبي وفلوسي تصير بطنها
ام سندس : ولج يافلوس لتخليني اسبج البنيه حتى خبز تخبز للوادم حتى تشارك بلكمتها وانه ماقبلت بس هي دكت رجل عبالج مثلج مو نفسها عزيزه
سندس : يمه رحمه لأبويه هاي متبقى لحظه هنا خلي تولي بلشوارع وين متروح تروح بس متبقى هنا
ام سندس : ولج لا تخليني حتى ابوج المكرود اسبه على هاي الخلفه الزفره البت وين تروح رجلها وتزوج عليها ومالها بيت يلفيها وانه احطها على راسي وبيتي انتي شلج دخل
سليل : ركضت عمه من المطبخ ودخلت للغرفه مدخلت وراها لان اريد اشوف بيبي شراح تسوي

ام سندس : سمعي ولج ذاك بيتج المهجوم تولين بيه مالي دخل لا بيج ولا بيه المن تكعدين المن اطردين بس هذا بيتي وانه لو احركنه ماتفكين حلكج
سليل : وجان تطلع عمه وعلى راسها العبايه وبيدها بقجتها والدمعه بعيونها حضنتها وين رايحه ماما
سندس : وغمه ولج گلبه اني امج مو هاي
سليل : مجاوبتها وبقيت اتوسل بعمه تبقى فدوه لترحين
نهر : خاله خلف الله عليج كفيتي وفيتي والله ينطيج العافيه اروح اني
ام سندس : ياااااا من گل عقلج ترحين
سندس : يوم عوفيها خلي تروح شنو باقيه هنا مو كتلج مامستعده اضيع فلوسي على هيج شكول خلي تولي لأمها مو عدها ام وبيت المن جايه هنا هو يادوب مكفيكم

ام سندس : اسمعي ولج هااج وجان تجر الفلوس الحطتهم على الكرويته لبيبي اخذيهم ولي منا وادفع بسندس
سندس : تصدكين تجذبين يمه اطردين بتج علمود هاي
ام سندس : هاي تسوه راسج كافي شايلتني وشايله بنياتج واذا على فلوسج اخذيهن ولي وانه ارجع اخبز وهي تساعدني ونعيش البنيات
سندس : يمه بروح ابويه اسمعيني اني
نهر : خاله ميحتاج اروح والله بلا مشاكل وهذا بيتها وبناتها بيه
ام سندس : لا هذا بيتي مال رجلي وبنياتها هي عافتهن وراحت تزوج وموزين مني ملفيتها لهسه وادخلها انه لو ما اخافن الله اكطعها حتى عن بزرتها

سليل : اخذت البنات ودخلتهن
للغرفه لان صافنات على الوجوه وخايفات لان عياطهن واصل للشارع
نهر : خاله الله عليج خلي اروح ردت اطلع جان اتجر العبايه من راسي وحطتها بيدها
ام سندس : اسمعي سندس والسماج سندس اذا ماجريتي عدل احرمج حتى من البنيات لاتدخلين مايعجبك لاتجين وفلوسج هاج امداج وامداهن شمرتهن بوجهه وصخ الدنيه انه مايوكف بعيني واذا انتي تركضين وتلهثين مثل الچلب وراهن انه مايهمني ادوسج وادوسهن بنعالي وماترفلي عين
ونهر ضاله حالها حال البنيات وبيتها هذا وبكيفها وانه خطار عدها
سندس : هيج صارت يمه
ام سندس : ويله ولي عكرتي جمعتنا جنا شحلاتنا نضحك

عاطت سندس على حسام واخذت وطلعت
نهر : كعدت على الكرويته وحطيت ايدي على راسي رغم موقف خاله اعظم موقف امي مسوت مثله وتشمتت بيه بس هم حسيت بلعجز وكرهت سامي لان خلاني بهيج موقف وكمت ابجي
جان ادنج ام سندس على راسي وتبوسه
ام سندس : يمه بروح ابوج الطيب وبداعت اخيج العزيز لا تزعلين هاي مشعشعه چا نسيتي سوالفها مو جانت مرت اخوج وصايحه الغوث منها لو نسيتي
نهر : رفعت راسي وكتلها والله خاله ماابجي من وراها ابجي من الحظ والوكت الي خلاني هيج ذليله

ام سندس : انه موجوده وتنذلين. امداني اي والله
نهر : بست ايدها حشاج خاله والله انتي ذهب صافي الله يحفظج اليه وللبنات
ام سندس : چا انه انسى وكفات طه الحلوه هو ابني وانتي بنيتي كومي يمه تعوذي من الشيطان وراح يصير صلاه الظهر واليوم جمعه كومي يمه ورانا شغل هواي اجت گلبتنا كلاب وراحت اااخ دومها شالعه گلبي
سليل : ارتاحيت من راحت ماما وعمه نهر بقت رغم بيومها ريم ورشا كامو يبجون يردوها ويردون حسام بس اني وعمه نهر قشمرناهن وكعدنا نسوي اكل وهنه يسون زلاطه رغم كل وحده بكد الاصبع بس اكلناها شنسوي شيخلصنا منهن

حسيت عمه شويه ارتاحت واطمنت ورجع الهدوءلبيتنا اما ريم لمت الفلوس الي اطشرت وتصيح اروح اشتري من الدكان ولزمناها كوه اخذناهن منها تكول لكيتهن بلكاع مالاتي
قشمرناها بعلج ابو السهم طارت بيه وانطتنا كل الفلوس

مر اليوم رغم توتره وكل واحد حاير شراح يصير باجر واجه باجر بعد يوم بلمدرسه راجعه يوم سبت والجنطه بظهري وامشي مدنجه واسمع صوته
رفعت راسي ابتسمت
سجاد : شلونها ام دميعه
سليل : هلو عمو شلونك الْحٍمَدٍ للـّہ على سلامتك وينك تأخرت
سجاد : جان عندي شغل هوايه شخبارج شونج بلدراسه
سليل : الاولى
سجاد : هااا متأكده
سليل : والله ومن ينطونا الشهاده اشوفها الك
سجاد : عفيه بلسباعيه
وصلنا للبيت تعال عمو طب
سجاد : اجيت اشوف البنات خلي اروح لنهر واجيكم العصر
سليل : عمه نهر هنا
سجاد : شعجب
سليل : تعال طب وهي تحجيلك
طبيت لكيت عمه تمشط لغزل بستها وبست غزل تعال عمو
نهر : منو
سليل : عمو سجاد
سجاد : هااا خيرج شعجب من وكت هنا
نهر : الْحٍمَدٍ للـّہ على سلامتك
سجاد : الله يسلمج شبيج شو وضعج مو راحه
نهر : سليل اخذي اختج
سليل : صار عمه
اكعد ليش واكف
سجاد : كعدت احجي بسرعه وجهج ميطمن
نهر : وبديت اسولف اله بس ااخ من دموعي خانوني ونزلو واني اسولف اباوع على سجاد شغل الجكاره ويروح ويجي وصارت عيونه براسه
سجاد : وانتي شقررتي
نهر : مااريده سجاد بس هو يعرف ماعندي لا سند ولا والي اكيد يستقوي عليه ويجوز ياخذني غصب لبيته
سجاد : شنو ماعندج سند ولي لعد اني وين رحت نسيتي اني ابن خالج وبحكم اخوج واذا طه ماكو اني موجود عيب عليج هيج تحجين التردي على قول لسانج ترجعين بشروط ارجعج تطلكين اخلي يطلكج ورجليه فوك راسه شنو تايهه اله

نهر : مااريد توكع بسببي بمشاكل مكافي المشاكل الوكعت بيها يوم مااجيت وطه وبناته هلمره اني
سجاد : انتي ليش ثوله وتعصبيني كتلج اني مكان طه لو طه موجود تكوليله مااريد توكع بمشاكل وهذا الخريط مالتج المابي معنى احجي لو طه تحجين هيج ويااه
نهر : هو وينه سوده عليه تهنا اني وبناته بلياه
سجاد : متيهون واني موجود بس انتي فكرتي زين هذا الحجي شكد صارله
نهر : ١٠ ايام تقريباً وبعدها ولا وصل
سجاد : فكرتي زين منا منا
نهر : غير الطلاك مااريد فدوة ساعدني ماعندي بس الله وانت ترد كرامتي اذا طلكتني منه
سجاد : يجرالج شمسويه غدا ميت جوع هسه اجيت من ديالى ومابيه اروح ادور اكل
نهر : مسويه باميه تخبل تلوك لحلكك
سجاد : صبيلي ميت جوع
نهر : سليل تاكلين ويه عمج راح اصبله
سليل : مديت راسي من الغرفه والبنات شلون
نهر : من يجون اني وياهم نتغدا
سليل : لعد بيبي وين
نهر : راح تودي خبز للجيران وتأذي واجب
سليل : صبيلي لعد ويه عمو لان جوعانه
نهر : يله بدلي بسرعه

سليل : ركضت لبست دشداشتي وطلعت لكيت عمو هستوه بدا ياكل
سجاد : لو باقيه شويه ولا لكمه تلكين
سليل : لا عمو وابقى جوعانه
سجاد : مشكلتج يله اكعدي
كعدنا ناكل وعمه نهر گبالنا لازمه ماعون صغير بيه تمن ومركه شويه وتوكل غزل
اني بعفويه مني كتله عمو شنو هاي ريحتك هو عاف الخاشوكه وبقه يشم بروحه
سجاد : شبيها والله سابح الصبح وملابسي مكويه ونظيفه
سليل : هههههه لا قصدي ريحه طيبه شسم العطر وتقربت منه اشم العطر مجنت احسب للعيب لان اعرفه عمو وبنفس الوقت تعلمت عليه مكمت اخاف حيل منه
وتقربت كولش لرگبته وغمضت واشمها بدون ماالمس رگبته وانفاسي اطخ بيه وجريت نفس اشمه بهدوء لان العطر صدك طيب وهادئ احب هيج عطور جان تعيط عمه نهر سليل
رجعت لمكاني واستغربت عيطتها بنفس اللحظه كام عمو من الاكل
وجان يكول
شبعت الْحٍمَدٍ للـّہ
سليل : وين هسه اكلت
سجاد : لا شبعت
نهر : اكعد سجاد اكل وانتي سليل تعالي اصبلج وحدج عافت غزل وكامت
سليل : استغربت من تصرفها وبقيت صافنه شبيهم
تقربت منها وهي واكفه على الجدر جان اكولها بصوت ناصي شبيج ماما
نهر : بعدين نحجي
سليل : حسيتها مو طبيعيه جان تندك الباب
ركضت اني
سجاد : وين اني افتح الباب
سليل : لا عمو ابقى كاعد جان ياكل بس متوتر مخليته يكوم وطلعت
ركضت افتح وصلت للباب الخارجي جان صغير وكصير يعني اليوكف ويدك الباب ينشاف وجان اشوفها كدامي مباشره جفلت وكفت
بيبي انعام بلباب

يتبع ....