رواية ابي والغزلان الفصل الثالث والثمانون 83 - بقلم ريام هادي

ابي والغزلان الجزء الثاني
للكاتبة Reem
البارت الرابع والثلاثون

اجيت بكل صلافه وجايب اعذار
تريد ارجع واكلك اني حبيتك
جنت عمري وحياتي وبيك اسولف دوم
بس هسه الحقيقه الروح ناسيتك
رحت بيدك يا وسفه للعمره ما يهواك
......وعفت ناس بثمن من وكت شاريتك
وجنت اعمي العيون وبيك اشوف النور
وهسه شوف عينك هي عاميتك
وجنت اجمل سطر في دفتر الاشعار
ومن دفتر اشعاري صدك امحيتك
بعتني بعين صلفه وما عرفت العيب
واني بطيبة كلب وبعفه جازيتك
وانت مو حلو وعادي الجمال البيك
بس باجمل صور للناس سويتك
المن جاي كلي وبعد شتريد
بمزبلة الخيانه هناك ذبيتك ..

رشا : متنازله كلشي مااريد
رجع بابا الهم واجاني وكاال هذا هو بنتي كم يوم وتصيرين حره راح يطلكج شعلان وفرح تبقى عندج
نهر : وجنات شراح يصير بيها
حجي طه : بعدنا مفاتحين موضوع جنات شغله شغله حضرو مره ثانيه جايات وهسه حسين يجي ياخذها
سليل : بابا فدووه لتتعصب وجهك اصفر لتتخربط
حجي طه : الله يعلم شلون كاعد على نار وصابر مااكوم اكتل شعلان خلاص
نهر : خلي يولي لتوصخ ايدك بيه جفينا شره المهم يطلك رشا شوكت تفتحون شغله جنات
حجي طه : هسه راجع الهم نكمل الكعده بس كمت حتى اطمنها لرشا خفت لتبقى متعرف شى ويتأذه گلبها من التوتر
رشا : بست ايد بابا وكتله الله لايحرمني من خوفك وحبك عليه
حجي طه : روحي ارتاحي بابا وانتم انطوها علاجها لتخلوها توكف هوايه وكملولي الجايات
ريم : بس بابا خلي يجيبون الاستكاين بيش اصب
حجي طه : هسه اخلي يلمهن

ريم : رجعت خدرت جاي جديد قوري جبير واكفه على الطباخ وسمعت صوته
حسين : شلونج ريم
ريم : انداريت وشفت حسين حيييل صار سنين مشايفته وكتله برود هلو حسين
حسين : البقيه بحياتج
ريم : حياتك الباقيه
حسين : مصدكت من شفتج واكفه على طولج وتشتغلين شلون صرتي
ريم : يم الله وتقربت منه واخذت الصينيه وحطيتها على السنك وانطيته ظهري ورجعت اغسل بلستكاين
حسين : اني دوم اسأل عنج بس مكدرت اشوفج لان كالو وضعج موزين
ريم : اغسل واحجي وظهري عليه تسأل عليك العافيه
حسين : محتاجه شى
ريم : لا شكراً

حسين : اذا بيوم احتاجيتي شى تره ابقى ابن عمج بغض النظر للي صار ابقى الي تربيتي وياه سحليه
ريم : سديت المي وانداريت عليه
وكتله بهدوء كبرنا بعد لا اكو سحليه ولا ساسوكي
حسين : بس ابقى ابن عمج والعشره بينا طويله ومستعد اسويلج اي شى تردي
ريم : يكولون لا تطلب الحاجات اله من اهلها
حسين : يعني قصدج اني مو اهل للحاجه ومابيه خير مااسوي التردي
ريم : افهم الي تفهمه ورجعت انطيته ظهري وكملت غسل وبديت اتحرك وهو واكف وارتب بالاستكاين بلصينيه واحط الشكر واعرف بيه يشوفني مهتميت لوجوده لان فعلاً داخلي وگلبي مهتم البي اني اعظم من ان افكر بحسين وميهمني وجوده صبيت الجاي وباوعت عليه تفضل اخذهم وعفته وطلعت من المطبخ رجعت اسمع شصار وهو مشه ورايه وطب دخل الهم وسد الباب
هااا شصار بشرن

سليل : بعدهم ديفضون شغله رشا وهسه بدو يحجون بجنات
نهر : اسكتن لخاطر الله خلي نسمع
حجي طه : اني اريد هسه بت اخويه وينها شعلان واحك شعلان لان زواجه من الدخيله يعتبر نهب بدون علمنا وعيبه جبيره وهذا بعرف العشاير مجايب شى من جيبي وانت نهبت بت اخويه وهذا الشى يصير دم بيه وفصل من العشيره واني احكه بيها

شعلان : لا متحكني طه لان يوم متزوجت جنات جانت مو دخيله عندي
سجاد : شلون مو دخيله واحنا خليناها يمك علمود سالفه عيالها وابنها
شعلان : لا تذكرو زين جنات اجت دخيله سنتين وبقت يمي معززه مكرمه مالمست منها شعره ولا نظرت الها بنظره حرام ورجعتها بيدي الكم وانتهت شغلتها وسقطت شغله الدخيله عندي وضلت سنه كامله بيتك بعد مرجعت ضلت لو ما ضلت
حجي طه : اي ضلت بس تبقى دخيله

خضير : لا طه ماطول رجعت لبيتك عاشت وانتهت عيشتها بيت شعلان سقط حكمها وصارت حالها حال اي واحد يجي خطار
شعلان : ومن عقدت عليها اجيت اخذتها منا من بيتك مو من بيتي وهي بالغه سن الرشد مو صغيره وماتزوجت بدون معرفه احد بموافقه عمها
حجي طه : ياعم غير اني عمها وماادري بكلشي
شعلان : مو بس انت عمها عدها عم اكبر منك علي ابو حسين وبموافقته عقدت عليها يعني يبطل حكك واني مانهبت تزوجت بعلم اهلها وهاي مشكلتك بعد اذا هي مااخذت شورك

ريم : اي ناقص ياطلي ولجن هذا عمجن هم راس بله
سليل : خوش لعبها شعلان
رشا : لهاي الدرجه مستقتل عليها
ريم : بااع هاي يامستقتل غير لو ثابته عليه شغله النهب يعزوه ويصخموه بعشيرته ويفصلو من العشيره بس رجلج ذيب عرف شلون يلوفها
رشا : لتكولين رجلي الله لايوفقه ويخلصني منه

خضير : يعني ابنه مانهب ياطه وبحكم الاعراف والعشاير البنيه ردت لاهلها وتزوجها وره سنه وبعلم عمها الجبير الي هو واليها ومربيها من الاول واذا مكالت الك هاي مو شغلتنا ولا تحكنا بيها وهو ماسوه حرام تزوج على سنه الله ورسوله وبلشرع والقانون يحق يتزوج اربعه مو بس اثنين وحتى يحق اله يجمعهن بنفس البيت واذا خلاها سكته خلاها سكته على بنتك لان قدر وضعها وصحتها وهاي مو جريمه يتحاسب عليها وهم امه واخته واحنا كلنا ندري تزوج وعمها يعني هم يسقط حقك من تكول بلسر بس شعلان غلط بشى واحد ما المفروض يسكت جان لازم يكول من الاول لمرته ترضى وتبقى على حب الله كان بيها وخلف الله عليها ما ترضى الله ومحمد وعلي وياها
حجي طه : خوش يخالي هاي انت الجبير وصاحب الحق تگلبون الباطل حق

خضير : سيد كلامنا بيه شى اذا البت طلعت من سنه من بيت شعلان واتزوجها بعلم اهله كلهم وبعلم عمها الجبير والبت لا هي مراهقه ولاحديثه وعقد شرعي ابو حسام يحگنا نسمع حكمك
سيد : بحكم العشاير مايحگم ابو حسام يعتبر مو نهب ماطول توافرت كل هاي الامور الي يكولون عليها
خضير : ومستعد اجيب عمها الجبير يشهد
السيد : نجيبه ابو حسام حتى تبقون على بينه
حجي طه : لا اله الا الله مايحتاج سيد
خضير : الف رحمه على ابوك سيد بحكمك
سجاد : وهسه هي وينها
شعلان : هذا الشى مالك دخل بيه اذا طلكتها اردها لبيتها الاولي بيت عمها الجبير
مالكم حق عليها

رشا : علت الاصوات مبين شعلان وعمه حبكوها عدل ورتبوها لدرجه اي حق يسقط بسالفه النهب كله حتى يبقون راسهم مرفوع بين الناس وميطلع شعلان من العشيره او خضير تنهز صورته بين الناس وكل هذا بمساعده عمي النذل الي اجت هاي الشغله على طبق من ذهب حتى يأذون طه وبناته واكيد شعلان رتبها ويه علي لهذا اجه بزود يحجي ومخايف من تفوو على راسهم الخسيس الي خلت الغدر يصير حق وحلال الله
وبعد المناقشات خلو وطلعو

سليل : طب سجاد عيونه براسه ولازم زين حييل من ايده جريته منه على كيفك راح اطك ايد الولد
سجاد : الزمي ابنج شويه لا اشيله واشمره بلكااع صاير بين الرجلين
سليل : هاااي شبيك سجاد
سجاد : مااريد نفس الناس تطلع
سليل : عافني وسد الباب صدك كذب شجاه ولو حقه الصار جبير
ريم : لا خيه غير متدرين
سليل : شكوو
ريم : من بدو يطلعون رحت ركض اشوف المعگلين والسيد الخير الحكم لرشاوي فتحت البرده مال المطبخ على كيف شفت سيف طلع وابني وابنج يكمزون صارو كدامه دنك باس تيم ودنك باس زين بس حظج الاسود مشافه من باس تيم بس من باس زين هسه عباله يعرف هو ابنج وعلى ريحتج يبوسه
سليل : صخام وتالي

ريم : شتالي سحب ابنه واجاج فاير اذا تالي الليل اجيتي مزوركه عادي نستقبلج عدنا ردهه مال كسور
سليل : لا على اي اساس يضربني واني شعليه طفل وحب يبوسه
رشا : مو سيف من تزوج لهسه ماعنده اطفال لهذا روحه بكل جاهل يشوفه ومرته حتى اطفال انابيب سوت ومصار
ريم : شمدريج انتي
رشا : هااي شبيج غير ابن عم مشعول النكس ودوم اسمع اخباره من هند الحيه
ريم : والله وكت تكول مشعول النكس وجنت اكول مشعول حااف بدون لقب تجميلي تعيطين

رشا : حسبي الله ونعم الوكيل عليه مقاهرني غير جنات فلتت منها
نهر : بس من ربج ماتفلت ليش هي التهجم بيوت الله يوفقها
ريم : وداعتج تتوفق وكل البخت والحظ الها كولي احنا الماشيات عدل ونخاف الله وممأذين احد وبنات عوائل حظنا بلطين وهااا مو اي طين هذا الي اطك المجاري بيه ويبقى المي راكد كون شهر لحد ميخضر هناك حظنا تلكي يسبح ويغني ومستمتع جداً بلريحه

نهر : كولي الْحٍمَدٍ للـّہ يمي اكو حالهم امر من حالنا
ريم : مااتوقع
نهر : لا اكو وامرين هم اكو بنات مالهن والي متحملات الضيم من الرجوله والخيانه والقهر والجوع وكسره الحال وباقيات على جهالهن لان ماكو الي يلفيهن ويحير بيهن وضالات الليل كله ينوحن على بختهن انتن عدجن اب بظهرجن وعمج سجاد وكدرو اليوم يطلعون حق رشا من عيون رجلها وابوها فاتح البيت الها ويتمنى بس رضاتها وعافيتها بينما اكو اهل حتى لو البنيه تموت كتل وخيانه وقهر يكولون ماكو بنيه تطلك عيبه عدنا لو شمري جهالج وتعالي لو مانكدر انلفيج ضلي تحملي لو هو رجال تاليها يتوب ويرجعلج يبقى ابو بيتج تحملي وشميكون رد الاهل راح تضل المكروده تتحمل وگلبها يطك ولازم تسكت وما تفتح حلكها لان ماكو سند يوكفلها لهذا يابنياتي احمدن الله وشكرنه لو كل بناتنا عدهن اب لو اخ يلفيهن ويحن عليهن ويسندهن ويداري جهالهن جان لكيتي نص نسوانا اطلكن ورجعن لبيوتهن
مو كل البيوت المسدوده بيبانها ناسها مرتاحه مايعلم بلروح بس الله احمدن الله وشكرنه وكافي تندبن حظجن

سليل : اي والله صدك هاي اكو موظفه عدنا زوجه كل فتره لازمته يحجي ويه وحده وتكب العيطه والعركه كتلها شلون باقيه ويااه كالت غير من وره الجهال واهلي ميتحملوهم اقلها ابوهم غصب عنه يتحملهم ويتكفل عيشتهم وضاله كل شهر عدها هزه شكل لحد موصلت تشوفه يسولف ويضحك متهتم لان ملت وگلبها طك
ريم : والله الي تريد تسوي شى تسوي المره هي بيدها تبقى مكفخه للرجال وهي بيدها تخلي يجر عدل
نهر : شبيج يمه رشا
رشا : دخت حييل وتعبت
ريم : من الوكفه وهم ترجفين من الاعصاب
رشا : مطلعو
ريم : خلي اشوف اذا همه بلباب صارت سوالفهم ويحجون على النسوان يكولون متحلى سوالفهن اله بلباب هااك مو صار نص ساعه يسولفون بلباب همه هم لو حتى بهاي تفرقه

سليل : تعالي اكعدي رشاوي بغرفه بابا تمددي على الجربايه
رشا : اي اخذيني فدووه
ريم : اني اخذج هسه سليل تنظف الاستقبال تره والله ظهري راح احد كال الكم اني البنكلادش مالتكم
سليل : صاار يمعوده اني انظف اخذيها وروحي شبيج يوم
نهر : بالي يم طه شكد بعد ينكسر من اهله هاج هسه خاله وابن خاله ولج هذا اخويه ولا عنده حظ ويه الوادم شكد يصير زين تفتر عليه مكافي عليه اخو الجبير بربج هاي سوايه يسويها علي مستحه على شيباته مكبر معقل مكال عندي بنيه عروس اخاف الله يطلعها بيها لج لا من همه صغار يعرفون يتصرفون ولا من گبار يخافون الله وينتبهون بس اجت فرصه طعنه
سليل : اي والله متشوفي يمشي وظهره محني الله يشهد انام واكعد همي ومهمومي بابا شراح يصير بيه من يطب ويطلع ويشوف ريم ورشا هذا حالهن بعد مجان فرحان بأستقرارهن
نهر : الله يعينك ياابن ابويه شفت ضيم وشحملت قهر

سليل : اروح انظف اشيل النفاضات تلكيهم ترسوها جكاير والاستقبال صار مدخنه
نهر : افتحي الشبابيج بدربج خلي تتهوه
سليل : مااشي
ريم : دخلت رشا ومددتها وتمدت بصفها من الجهه الثانيه
ابجي
رشا : هاااا
ريم : ابجي ليش ساكته
رشا : مااريد ليش ابجي كلشي مابيه مرتاحه
ريم : شوو تعالي سحبت راسها وحطيته على صدري والعب بشعرها وكتلها ابجي رشا لتبقي بگلبج تره ميتحمل اعرف كوه حاصرتها ماكو احد هسه وقفلت الباب ابجي ياروح اختج اعرف شتحسين الخذلان صعب جربتها والي بي هسه انتي اكبر خذلان وخيانه ابجي حتى ترتاحين
رشا : ااااااااااااه ياريم بيه عيطه تصعد لربج هذا شعلان الجان يبوس ايدي حتى بس ارضى عليه هذا الي جنت اوووف شحجي والله لو اخلص العمر كله احجي بي ميكفيني

ريم : ماردت تحجين ردتج تبجين
جان تحط وجهيي بصدري وكامت تشهك
رشا : شفتي شلون يدافع عنها اكيد راح يرجعها على ذمته
ريم : خلي يرجعها طبه طوب انتي تردي بعد
رشا : لو اموت لو يصبوه ذهب
ريم : خلص بعد مالج دخل بيه جلب ومات اعتبري
رشا : ياريت ميت والله ياريت
ريم : ابجي وفرغي همج ولو حرامات تنزل دمعه منج علموده وعلمود عشرته
رشا : والله مو علموده ولا بيوم راح انزله دمعه لخاطره اني ابجي على حالي لان حبيت واحد ميسوه اللابسته برجلي وامنت بوحده جنت اعتبرها اختي
ريم : وين تتوقعين هسه هي
رشا : بجهنم الحمره متهمني
ريم : بس اني تهمني
رشا : شسوين بيها
ريم : مالج دخل يجيج الصافي
رشا : شراح تسوين
ريم : ابرد نار گلبج بس اصبريلي
رشا : شيبردها اااااخ
ريم : تبرد وتصبح رماد بس الصبر

شويه ودكو الباب كمت فتحتها وطب بابا باس راسها لرشا
حجي طه : لتنقهرين بابا خلي يولي مو رحال واني ماقبل بنتي تعيش ويه واحد مو رجال وساقط
رشا : فدوه بابا اذا تحبني دير بالك على صحتك تره ماعندي احد بس الله وانت
سجاد : ايا ناقصه واني ولج وين رحت
رشا : انت لو ابوس ايدك الف مره قليل لان ماقبلت على كسرتي وبردت ولو شوي من ناري من ضربته برجله
سجاد : ولو باقي متلاوي ويايه جان حطيت طلقه براسه والعشيره غصب عنها تفصل
لديرين بال صيري زينه وفتره واروح للكوت انقل اوراقج وداومي هنا وخلي يولي
رشا : الله لا يحرمني منك عمو
ريم : خلي يولن مال الله لا يحرمني والله يحفظك وهاي الكلاوات متكول خبز عزمينا على عشوه غدوه بمناسبه الطلاك اكو احلى من هيج مناسبه قيمه نحتفل بيها
سجاد : والله اول مره أيد هاي الخبله ميصير على الناشف هيج
رشا : ههههه صار تدللون من عيووني

حجي طه : اي بابا اضحكي والله ضحكتج هي اطيب جروحي
ريم : واني بنت البطه السوده من اضحك تغيم مو بابا
حجي طه : تعالي بحضني مشتاق لصوتج الي يلعلع وسوالفج تعالي غزاله البراري
حضنته لبابا حيييل والله ميتين رعب عليه واسوي هيج حتى بس الطف الجو لان رشا وبابا اثنينهم گلبهم تعبان واذا يبقون بهذا التوتر راح يتخربطون اسولف واضحكهم رغم داخلي يبجي دم على الصار بيه بس هسه همه محتاجيني ولازم اوكف وياهم مثل ما وكفو ويايه

نهر : وحسين وين راح
حجي طه : لبيتهم من سمع دكت ابوه تخبل
ريم : على اساس هسه راح يشرمها ويذبح ويصلخ
حجي طه : يبقى ابوه بنتي قابل يمد ايده عليه
ريم : اممم ابوه وعوجت حلكي
نهر : والله علي ميتوب من سوالفه شنو دم يمشي بيه لو سم
حجي طه : الله يهدي ماكول بلي صار حسبي الله ونعم الوكيل اكوم اصلي فاتتني الصلاه
رشا : تعالو نطلع ونعوف بابا

سليل : رجعنا للبيت واول مدخلنا حضنته سحاد : شبيج حبيبي
سليل : جنت حيل خايفه عليك
سجاد : شبيج نسوان كدامج
سليل : اخاف من هاي سالفه العشاير تعرف حتى الحق مرات ينگلب باطل بهيج كعدات
سجاد : مثل ما گلبو سالفه جنات
سليل : اي هذا قصدي وجنت خايفه لايفروها عليك
سجاد : لتخافين ميفروها هو متعدي ومره ثانيه الزمي ابنج لا احطه فوكاج واثنينكم اموتكم
سليل : ااممممم ليش بله
سجاد : بدون ليش جان وكعوه
سليل : سكتت عرفت لان باسه سيف بس مردت افتح موضوع ونتعارك
سجاد : تعالي عندي فصل مهم فوك اشرحلج عليه
سليل : هههههه والله تعبانه
سجاد : ليروح بالج لبعيد لازم اشرحلج النظام العشائري سنه ٢٠١٤ لان تغيرت القوانين ولازم تعرفيها
سليل : لازم يعني
سجاد : لازم لازم واله النظام الداخلي ينهار تصعدين لو افصلج مربع مثل العشاير واخذ الحك اربع مرات
سليل : لا فدووه اصعد بدون فصول
سجاد : تعالي راح اشرحلج شرح بروفسور مو مثلي
سليل : هههههه وحيات عينك

مرت الايم وعم الهدوء والترقب منتظرين شوكت يجي شعلان ويطلك وعن طريق السيد تواصلو ويه شعلان لان بقى طرف محايد لحد متنتهي الشغله واليوم من الصبح سجاد وريم راحو وياها لازم وحده من عدنا بس اني فضلت ريم لان احسها ترتاح وياها اكثر
رشا : لبست بنطرون اسود ولازمه بيدي قميصين واحد اسود والثاني نيلي بيه ورد ابيض ناعم اني جنت بيتي ذابه الاسود لان اكول خطيه شعلان شنو ذنبه افتر كدامه بالاسود يختنك منه من اطلع او يجي احد او اروح لاهلي البسه عبالي ادمي
ريم : يمعوده مكملتي شبيج صافنه
رشا : راح اكول شى بس لتضوجين فدووه
ريم :يمعوده شكوو
رشا : اريد مااروح بالاسود حتى ليكول انكسرت
ريم : البسي احمر احد لازمج
رشا : موو علمودج

ريم : اذا علمودي لازم العمر كله تلبسي مثل مااني البسه وهم لو الاسود يرجعهم تحرم عليه الالوان ليوم الدين بس مايرجع الراح رشاوي البسي الي تحبي وخلي يشوفج شلون مرتبه ومرتاحه وممهتمه وانزعي هذا البنطرون الاسود محلو ويه القميص الي بيدج البس گابوي ازرك يطلع احلى وهم قميصج طويل مستور وشال وحطي شويه مكياج
رشا : لا ولج مو هيج عيب
ريم : احد گلج راح نروح صالون قصدت شويه باودر على كحله على مسكاره يعني رتوش خفيفه توخر الصفار الي بوجهج
رشا : مااشي هسه وبدلت ورتبت نفسي اباوع على روحي والله اني زين شكلي مو بجمال جنات بس هم زين
ريم : صفن المطي فضينا يمعوده تره مرايحه تعقدين رايحه تطلكين بس والله الي يشوفج يكول رايحه تعقد
رشا : هو اريد يشوفني شلون مرتاحه
ريم : طكي سوار ومحبس ذهب وانزعي الحلقه المن لابستها بعد
رشا : اي والله اشمرها بوجهه
ريم : عليمن حرامات ثكيله بدليها بمحبس احسن ميستاهل تنذب بوجهه ب٤٠٠ الف وجهه ميسوه الف دينار
رشا : اي والله يله كملت

طلعنا واجه عمو واخذنا تكسي وصلنا للمحكمه جان واكف وياه ابن عم ابوه وطرف من السيد جااي يشرف على الاتفاق اول مشفته ااااخ لو بيدي اخنكه وجهه جان طافي ومبين التعب عليه ولحيته مطولها يعني احس وضعه مو طبيعي ويمشي على عكاز كوه يمشي سالفه الباحثه الاجتماعيه اتلافيناها بفلوس يعني بس يطلك وانتهى صاحو اسمنه وكفنا كدام القاضي ويسأل ونجاوب لحد مكال اله ذب اليمين عليها طلكها
باوعت بعينه بكل شموخ وهدوء بيومها من الالم عاهدت نفسي ماابجي كدامه ابد لو شكد مااكون تعبانه ومتألمه ومقهوره والوضع يهز كلت لازم ابين اله منكسرت رغم اني جامه وانكسرت مليون قطعه
شعلان : حضرت القاضي اذا مصارت زحمه ٥ دقايق احجي وياها

رشا : مااريد احجي
شعلان : ٥ دقايق اترجاك
القاضي : اطلعو احجو وتعالو
شعلان : بس نطلع مراح يخلونه نحجي اهلها بره
القاضي : ٥ دقايق تفضلو وخرنا على صفحه وصار كبالي واني نار تغلي بيه بس الظاهر كدامه هادئه وبارده

شعلان : رشا والله غلطت ارجعيلي ومااعيدها ولا اسوي شى يضوجج متعرفين شلون متاذي بغيابج رشا تعرفين بيه اعشقج وروحي معلكه بيج ارجعي وروح ابويه وداعت فرح مااخلي الهوا يلمس شعره منج ويضوجج
رشا : رجاءً لتحلف لان قبل حلفت وكلت
يشهد الله مااكسر خاطرج قيد شعره وكسرتني گلي وكلت اريدج ام بيتي حلالي تصونيني واصونج وصنتك وانت خنتني
وكتلي مااخليج تتندمين وتندمت على الساعه الشفتك بيها وعرفتك لتحجي شى انت مو كده

شعلان : اعرف خذلتج وكسرتج بس ساعه شيطان وراحت والله غفور رحيم انتي متغفرين
رشا : اي مااغفر لان اني مو الله سبحانه وتعالي اني رشا بشر حالي حال اي وحده تنجرح وتنهان كرامتها وتنداس وتترك اله أذاها يعني بربك مستحيت هسه من واكف كدامي وتطلب مني اسامحك شسامح شعلان على وحده اثنين مكافي اتزوجت بت عمي وعلى فراشي واخرها تشهر بيه كدام الزلم والناس وتكول متوفرلي حقوقي لان مريضة يايوم ردتني وكتلك لا يايوم اجيت ودخلت ملكيتني استقبلك بالاحضان يايوم نمت واني ماانام بحضنك شنو بعد الاحتياجات لو من يمي متحتاج شى بس من جنات الوصخه

شعلان : شتحجين حقج ومن اجيت وهديت عليكم والله لان عقلي طار مااتخيل ترحين مني مااتخيل بعد مترجعين لبيتج تخبلت اروح واجي مااعرف شسوي عقل ماضل براسي ردت اخذ فرح عسى ولعل لخاطرها ترجعين وحتى جنات طلكتها مثل مردتي
وردت بالف طريقه ارجعج ومنجحت رشا كاافي والله داموت لان عفتيني والحسين الشهيد اعشقج ومااتخيل يوم يمر بدونج وهاج شوفي حالي تسكطت رجليه والله اعلم اكدر امشي عليها مثل قبل لو لا وانحرمت منج ومن بنتي وانهجم بيتي وانفضحت بين ولد عمومي مكافي العقاب هذا

رشا : اصلاً قليل بحقك هذا اني من وره سوايتك جان متت ولك ياظالم النفس گلبي وكف بله لو نعكس الايه وجاي ولاكي رجال بفرشتك ويايه شسوي
شعلان : انجبي لا افلش وجهج شنو هذا الحجي
رشا : هااك مجرد كلام متقبلته واني لان مره لازم عادي اتقبل رجلي بفراشي واكول يله نزوه وعدت واغير الجراجف وبليل ترجع تلكاني متعطره ومكيجه واخذك بحضني ولا كأن اكو شى انت من كل عقلك تتوقع هيج اسوي

شعلان : اعرف متسوين واعرفج قويه وسبب حبي الج لان قويه ودوم جنت اكول مهره
رشا : اممم مهره ومن روضتها وصارت انعم من الدخن وياك ومطيعه وطيبه مليتها كلت اشوف غيرها اعيش وياها مغامرات جديده وملكيت غير الساقطه بت عمي يعني الدنائه والنذاله انواع بس مثل نوعك مشفت
شعلان : احجي التردي بس ارجعي ولتنسين طول السنين الفاتت عمري مأذيتج ولا قهرتج وجان حبنا ينحلف بيه
رشا : جاااان تعرف شنو معنى جااااان وبيدك خليت خيانتك ينحلف بيها
شعلان : غلطت مره اول مره واخر مره اكلج مااكدر اعيش بدونج مية موته بليوم اموت عليج واشم بريحتج بلفراش

رشا : يااا فراش يمه الي جنت تمتع مرتك الثانيه بيه تره الي تشمها مو ريحتي ريحتك انت وياها اشتم زين
شعلان : بداعت فرح عندج ارجعي زين بس ارجعي وعد وكلمة رجال مااتقرب منج ولا اوصل بس ابقي بيتج اقلها من اطب اشم ريحتج اشوف بتي تجي تركض عليه اخذها بحضني جم مره اطب انسى نفسي واصيح فرح واضل ابجي والله بجيت انحرمت منج ومنها

رشا : عساك انحرمت من ريحة الجنه هاي مشكلتك مو مشكلتي انت برجلك دفرت النعمه مو اني وهيج انت ميت على فرح مو جنت تريد ولد واتزوجت حتى تخلف الك ولد يشيل اسمك شسوي بعد بفرح

شعلان : والله كله من وره هند وامي اكلو راسي وكالو ودخلو الشيطان بيه وكمت ماافكر
رشا : لو انت تحبني ذره مااكول حب كامل ذره وحده جان مامشيت وره امك ولا اختك وهاي السوالف عيب تكولها مال كله من وره هند كله من وره فلانه عيب على شاربك الحاطه يقلل من قيمتك اكثر ما قلت ويكولون بيد النسوان شعلان الجان يهوبز ونافخ روحه وبس هو وبس صار خرخاشه بيد اخته وامه عيب نصيحه لتحجيها بعد لتصير مضحكه اكثر ماانت مضحكه هسه
شعلان : يعني مترجعين ولا تفكرين
رشا : لو تموت تعرف شنو تموت ماارجع انت خلاص بلنسبه اليه انتهيت ورجاءً حط كرامه عندك شويه ولتحاول تتقرب مني نهائياً لان اذا هلمره حجيت وياك بهدوء مره ثانيه احجي شى ماكو رجال يتقبله على نفسه ولو اني تربيت الرجال الصدك ميخون ولا يطعن وانت ماشاء الله اثنينهن سويتهن

شعلان : هذا هو التردي يجرالج
رشا : ياريت بسرعه تأخرت
ورجعنا وكفنا كدام القاضي ورمى اليمين وطلكني وطلعت واني حاطه عيوني بعيونه رغم عيونه تتهرب مني ويريد يبجي بس اني الله انطاني قوه وصبر عجيبه لان كل مااحجي اتخيل منظره ومنظرها اخر مره من جانو سوه وهذا الشى الجان يقويني ويصبرني ماانزل دمعه واحجي بكل حقد وكرهه
طلعنا واجت ريم وعمو
ريم : تأخرتو حيل
رشا : عمو فدوه خلي نطلع
سجاد : امشي يله وطلعنا امشي بقوه بس اااخ منك يلگلب شتتحمل بعد وصعدنا سياره ونباوع
ريم : وين عمو
سجاد : مالكم دخل بقينا ساكتات ونزلنا يم مطعم يله نتريك متت جوع مجوعانات
ريم : اي والله
رشا : اني مااشتهي
سجاد: مو بكيفج ادخلي يله
ريم : كعدنا نتريك وكوه اكلت رشا
سجاد : رشاوي
رشا : هااا عمو
سجاد : انتي ام واب لبنتج هسه لتنزلين راسج وتقهرين نفسج وتضيعين حياتج اليوم الصار لازم يقويج مو يكسرج
رشا : ان شاء الله عمو
سجاد : اعرف ان شاء الله هو مو حجي اريد فعل اريدج تثبتين للكل كسرتيهم وما انكسرتي
ريم : شو اني متحجي هيج ويايه زعلت
سجاد : يزيبك اااخ منج بس صحيتي اشتغلت الخطط مالتج وكدرتي اطلعين اختج من حلك السبع يعني بيومها لو منهاره رشا جان كتلته لشعلان ومااتحسف حيل بيه يطبه طوب بس يمكن طه هم يروح بلرجلين
ريم : شعبالك عمو وراك زلم مشوربه لتخاف فوت بيها وعلينا خليها
سجاد : من ناحيه مشوربه فهي مشوربه وداعت شواربج الي مبينات بلشمس
ريم : هسه عفت كلشي ولزمت شواربي غير حزينه ياعمو
سجاد : الله لايراويكم الحزن
رشا : امين
ريم : يله نكوم تره تأخرنا على الجهال

ريم : مرت اول ايام جانت رشا تبجي بدون توقف وكلنا عفناها براحتها الصار جبير لو شكد منحاول نصغره الها لو شكد منحاول نهونه
هسه احنا بشهر ١١ بدايته ٢٠١٤
طلبت من سليل نروح للنجف اريد اشوف بنتي وسامر هاي الايام كلها احلم بيهم
سليل : ميخالف نخلي سجاد ياخذ النا سياره ونروح كلنا
نهر : لا يمه اخذي اختج ورجلج وروحو وحدكم رشا بعدها فترت نقاهه وموزين عليها لهسه تتعب وابوج هم تعبان مو حمل طريق وهم راح نروح للمكبره مااريد الجهال يرحون عوفوهم هنا وروحو توكلو بالله
كعدنا الفجر وره صلاه الصبح لبست واخذت العبايه ونزلت
عمه اريد فلوس من الجوه العندي
نهر : اني انطيج يمه اذا تحتاجين
ريم : لا اريد من فلوس سامر
نهر : يمه اذا مصرف ابوج عنده وكال شتحتاج اخذيلها
ريم : لا عمه اريد اشتري كراسي مال صلاه هناك بلنجف واخليهم بالامام صدقه جاريه على روح سامر وبنتي واريدها من تعبه خطيه جان دوم يكول اشتري لابويه واخلي بجامع وبأمام ودار الوكت واني راح اشتري واخلي صدقه لروحه ولروح بنتي

نهر : الله يصبرج يمه وزين تسوين هاي احسن شى هسه اجيب الجنطه الج
واخذت فلوس واجت سليل طلعت من الباب واشوف سياره حسين وسجاد كاعد ليكدام وسليل ليوره
اختنكت مااريد اروح وياه اشرتلي سليل اصعدي صعدت وكلت السلام عليكم سلمو وانطلقت السياره فتحت الجامه جان الهوا بارد من الصبح طيب يرد الروح رجعت راسي ليوره وعيوني على الشارع واتذكر كلشي مر عليه ويه سامر ويه بنتي تنزل دموعي لا ارادياً وامسحها بهدوء ممصدكه رايحه لبنتي اشوف گبرها وگبر سامر
حسين : تتريكون
ريم : باوعت على سليل وكتلها اني مااريد
سليل : ليش شويه تتقوين وراج طريق
ريم : مااريد مجوعانه انزلو انتم اكلو مقبلو ينزلون بدوني وراح حسين وسجاد جابو لفات وبس نزلو كتلها ليش حسين يودينا

سليل : والله البارحه جان يمنا ومن كتله لسجاد على الروحه هو كال اني من اجيت من السفر مرحت للزياره اجي وياكم وهم بسيارتي واستحه سجاد يرده
ريم : والله لو ادري حسين يودينا فلا اروح
سليل : ليش ولج شبيج تكرهيه
ريم : مو كرهه بس مااحب اشوفه
سليل : بس يبقى ابن عمج وعلاقتنا طيبه بيه
ريم : لتخليني اسب عمج من الصبح واني رايحه بطريق وزياره كتلج مااريد اشوفه
سليل : بعد صارت ياعيني ومبقى شى ونوصل

اجوي وجابو لفات وريم مأكلت مقبلت بس جاي شربت وصلنا للمقبره اباوع عليها كامت تلوب ونسأل لان تيهنه رغم بلدفنه جان سجاد موجود بس هم الواحد ميندل من اول مره وكوه بعد ساعه كامله ندور دخلنا وكالت ريم
ريم : وينهم عمو
سجاد : ذاك كبرهم هسه نوكف السياره وننزل جان تفتح الباب ونزلت تركض ونزلت وراها وكف السياره حسين ونزلو
ريم : نزلت مث المخبله اريد اشم ريحة بنتي الي لهسه ريحتها بخشمي لهسه ماشبعت من عطرها وضحكتها لهسه ماما الي تكولها مكسره بحلكها ترن بأذني

وشمرت نفسي على كبرها واني اقره اسمها تهسترت فقدت كمت اشيل من رمل بصف كبرها واذب على راسي
سليل : نريد نلزم ريم ماكو فقدت حقها كوه لزمنها
سليل :ميصير هيج تسوين والله حرام عليج هذا تعذيب الهم اكعدي اقريلهم قران احجي وياهم اكيد همه مشتاقين الج
حسين : هااج سليل غسلي وجهه
اخذت غسلته وكعدتها بينهم منا بتها ومنا رجلها
ريم : هاا ماماتي شو حتى كبرج حلوو وصغير ليش ياگلب امج تعوفيني مشتاقيتي اليه اااااخ يابنتي ونمت على كبرها ريحتج لهسه بخشمي بجيت بجي وانداريت على سامر
هااا ياابو بيتي هاا يلحنين الماكسرت خاطري بيوم اشتاقيتلك سامر والله اشتاقيت لكلشي بيك شلون تعوفني وحدي مشتاقيت لهوستي مشتاقيت تضحك على سوالفي والله يوميه احلم بيك تبوسني ليش تاخذ روحي وتروح شوف حالي بعدكم شلونه حتى الضحكه تطلع جذب ماتت ريم بعدكم صوجي مارحت وياك اقلها هسه جان نمت بصفك
سليل : اسم الله شنو سالفتج كااافي ورجعت تنعي وتعيط
سجاد : سكتيها راح تموت

سليل : خليها اطلع قهرها حتى ترتاح هاي اول شوفتها الهم بلكت يبرد نار گلبها باوعت حسين يمسح بدموعه وخر بعيد عنا وراح وراه سجاد بقيت تبجي وساعه تنام فوك كبر بتها وساعه فوك گبر سامر وبقيناها براحتها وجابو مي ورد وغسلت الگبر بيدها مقبلت احد يغسله وراحت على كبر عمتها هم بجت هواي عليها
ريم : والله لو عمه حقيره جان ضليتي بس لان طيبه وتخافين الله انحرمت منج ومن حنيتج وطيبتج الف رحمه على روحج عمه مثواج الجنه ان شاء الله وغسلت كبرها

سليل : بقينا ساعتين ونص لحد مهلكت من البجي تقرا قران وتبجي لحد ما كومتها كووه
كاافي ارحمي حالج
ريم : شلون اعوفهم واروح شوفيهم شلون نايمين وعايفيني
سليل : امر الله هذا يله صيري قويه وامشينا للامام ذبي حملج على الله وبجاه الامير علي يبرد نارج وترتاحين صعدنا منتهيه العيون مورمه والشال مفتوح ومتبهذله تبهذل بقيت اعدل بيها لحد موصلنا للامام وهي بس صافنه واخذتها من ايدها للمغاسل توضت وغسلت وعدلت نفسها ودخلنا زرنا جان لازمه الشباك بكل قوتها رغم الهوسه وتشهك لحد مكملنا الزياره وراحت سألت هي وسجاد على سالفه كراسي مال الصلاه ودلوها واحد هناك وهمه يوصلوها للعتبه العلويه ويدخلون الكراسي لان يخافون من المفخخات
بقينا ننتظر اني وحسين بلصيوان مال الامام واجوي
هاااا بشرو

سجاد : اشترت ١٠ كراسي وهدتهم على روح سامر ورفل
سليل : الله يتقبل حبيبتي
ريم : امين
سجاد : نروح ناكل صارت ساعه ٣ ونص الظهر
رحنا للمطعم اكلت بهدوء اباوع عليها رغم حسين كل شويه يغافل سجاد ويباوع عليها وهي ولا رفعت راسها ولا كأنه موجود
سليل : ابقو انتظرونه نشتري حلاوه دهينيه ونجي تردين ريمو
ريم : اي وياج كيلو من الياسري
سليل : صاار حبيبتي عادي لو بلجوز
ريم : لا عادي مااحب بيها جوز
سجاد : وانت حسين
حسين : اني هم وياك كيلو عادي
ريم : بقينا اني وحسين وشالو الاكل ودز جاي

رفعت راسي شفته يباوع عليه هااا خير
حسين : هم تكرهيني
ريم : اليوم انت وسليل متفقين عليه لو شنو
حسين : ليش
ريم : ماكو شى
حسين : مجاوبتي
ريم : حسين هسه جايه من كبر بنتي ورجلي شتريد مني ابقى اضحك واسولف
حسين : بس جاوبيني تكرهيني
ريم : لا ليش اكرهك
حسين :مااشي لتتعصبين بس ردت اوضح شغله الج تره انتي عزيزه عليه وراح تلكيني دوم وياج حتى لو تعتبريني اخو هم راضي المهم وياج
ريم : حتى وراها تفلت واشوف بس التراب وراك
حسين : جربيني وشوفي والله مااخذلج
ريم : جريت بطل المي وشربته وباوعت عليه وجريت نفس سؤال حسين
حسين : جواب
ريم : جنات عدكم
حسين : شجابها بالج
ريم : جاوبني

حسين : اي عدنا وتعاركت ويه ابويه اكثر من مره من وراها واخر شى كال اوديها لبيت خالها بس وره زواج نورس
ريم : هااا راح تتزوج اختك
حسين : اي
ريم : بيها الخير يوم الالك
حسين : متأكده
ريم : اريد شى منك
حسين : متأكده
ريم : يمعود اريد شى منك تسوي لو لا

حسين : أمريني
ريم : اريد اشوف جنات
حسين : مستحيل
ريم : مو هسه أمريني وجربيني وشوفي والله مااخذلج بس حجي دومك هيج
حسين : على كيفج اكلتيني وشربتيني شتردين منها اعرف بالاول
ريم : اريد رشا تحجي وياها تعاتبها انت مشايف حالتها تكسر الخاطر
حسين : اخااف تسون شى
ريم : عيب هذا الحجي حسين وعوف مااريد شى منك هو انت هيج دومك بس حجي تعلمني بيك
حسين : كاافي تجرحين ريم
ريم : تره الردته منك شى بسيط وتافهه قابل كتلك اريد راسها اتجيبه بطاسه ردت نكعد نحجي وياها ونتعاتب تدري بينا شكد جنا نحبها يجوز اكو سبب خلاها هيج تسوي
حسين : والله ياريم مااعرف خايف منج
ريم : مشكور مقصرت مااريد
حسين : لتزعلين مااريد مشاكل وطلايب
ريم : مره وحده صير كدها وبطل تتردد كتلك نكعد وياها نص ساعه زمان ونكوم وهاا بيتكم بعد شتريد حتى تأمن ومتقلق اخاف نذبحها وندفنها
حسين : هو انتن مال ذبح
ريم : تكدر لو لا
حسين : سهله بس بدون مشاكل ريم
ريم : وعيونك نكعد حبابات نحجي وياها اني ورشا نص ساعه ونكوم بس كون ماكو احد بلبيت

حسين : عادي كلهم يطلعون وخاصه هسه امي حايره بتجهيز نورس وهوايه يطلعون وابويه بلشغل بس بيبي وهي دوم بغرفتها كاعده وساكته ومتكدر تتحرك
ريم : شوكت نشوفها
حسين : باجر انسب وكت بس هاا بشرط
ريم : اهوووو كام يتشرط منريد
حسين : يمعوده اوكفي اااخ منج شكد عجوله شرطي ابقى يمكم
ريم : بس بره خوما يمنا لزك لان تعرف سوالف نسوان
حسين : عادي المهم مااعرفكم وحدكم
ريم : هيج تخاف عليها انهجم راسها كون
حسين : مااخاف عليها اصلاً ميت منها ولو بيدي اذبحها بس مااريد تكبر بين ابويه وابوج كافي الصار
ريم : هاااي سهله بس سوينا طريق وان شاء الله كل الخير يصير

حسين : انطيني رقمج مااعرفه
ريم : هاااك انتظر اتصال منك الصبح مو تنسى حسين
حسين : شلون انسى صار المهم ترضين
سليل : تأخرنا عليكم
ريم : احسن شى سويتي
سليل : ليش
ريم : هاااا ماكو شى يله خلي نرجع راح تغرب
رجعنا لبغداد ودخلت سبحت ونمت واخذت تيومي بحضني وثاني يوم كعدنا
تريكنا وبيدي التلفون الوب
رشا : شبيج مو على بعضج
ريم : ماكو شى
شويه ودك طفرت ركض بلهول
حسين : صباح الخير
ريم : صباح النور بشر
حسين : حضرن نفسجن جاي بلطريق
ريم : عرفت جنات جايين
حسين : شلون اكول الها غير تكول لابويه
ريم : جيد ركضت على رشا كومي
نهر : شبيج يمه خلي تاكل بعدها
ريم : مو عندي غراض اريد اشتريهم اريد اسوي ثواب بيدي لرفل وسامر
نهر : اني اجي وياج يمه اختج تعبانه
ريم : خلي تجي تغير جو ولج كوومي واغمز الها افتهمت

رشا : خلي اروح وياها عمه اغير جو وهم صبح بعد وكت ماطول الجهال نايمين
نهر : يمه ساعه ١١ يا بعد وكت بس انتن عدجن بعد وكت
ريم : المهم السوك مفتح يله بسرعه
صعدنا فوك
رشا : شكوو وجع شصار
ريم : البسي بسرعه رايحين لجنات
رشا : وين للكوت
ريم : باع هاي الطرنه ياكوت هنا بيت عمج الشفيه علي عدهم وحسين جاي ياخذنا كتله رشا تريد تعاتبها
رشا : خلي تولي ولا اوصخ لساني بيها
ريم : اسمعي رشا اذا مترحين اني اروح لان مااتحمل وحده تعيش بنصنا ونحسبها حالها من حالنا وادك الناقصه بينا وتاخذ رجل اختي وتهدم بيتها ونعبرها هيج الها اعذريني ايام سوري خيه رايحه تردين ضلي
رشا : لا لا جايه عندي هواي اسأله الها اريد اعرف ليش هيج سوت

طلعنا نركض وعمه تهز بيدها وتكول للدياحه والسواكه تركضن وللشغل مابيجن حيل بسناها وكتلها ادعينا النصر او الشهاده
نهر : ياستار خبال روحي ترجعن بلسلامه
صعدنا بلسياره اني كعدت ليكدام ورشا ليوره
حسين : مثل متفقنا منريد مشاكل
ريم : احنا وجوه مشاكل ياعيني انت بس وصلنا ومالك دخل
وصلنا للبيت طبينا ااااخ هذا البيت شكد جنت اباوع عليه من شباك بيتنا واتحسر عليه واكول ياريت اعيش بيه يوم
طبينا هدوء
وينها
حسين : فوك بغرفه نورس
ريم : صاعدين الها
حسين : خو اصيحها تنزل الكم
ريم : انت ابقى هنا اخاف احد يجي واني ورشا صاعدين يله رشاوه نحجي وياها وننزل
صعدنا واباوع رشا عيونها نطت فتحنا الباب جانت تلبس ابنها جفلت من شافتنا
جنات : شسون هنا
ريم : ماكو شى جايين نسلم عليج
يتبع ....