رواية ابي والغزلان الفصل الثاني والخمسون 52 - بقلم ريام هادي

ابي والغزلان الجزء الثاني
البارت الثالث

سليل تسأل سجاد :شلونك بدوني 💔
يجاوبها :
شخبارك يكلي..شلونك ابدوني
اسكتت...وافركت ادية ودمعت عيوني
شلوني بغيبتك ماي وتركتة...... بكاع
لا..... جف اليلمني ولا يشيلوني
وغلاتك...... من رحت ميت فكد جناز
لا جابوك الية.........ولا يدفنوني
اعرف الينغمي........ انرش على وجه الماي
بس إنا انغمي وبسمك...يصحوني
اليفكر ينتحر يذكر عزيز وراح
والف موته بغيابك ماتت ظنوني
لو ماخذ ضحكتك موقفك ذكراك
لو ماخذ صور مطبوعه بجفوني
عاد شوي بلكت تخف عليه الاه
مو جن فاتحه وكعدوا يواسوني
شلوني بغيبتك هو الوجع بي لون
هي مرايتي وماعرفت شلوني؟؟؟

سليل : بقيت باهته ذوله شيحجون
جان يرفع روحه من حضن بيبي وكال
لعد خلي اروح اخطبها من ابوها قبل مياخذوها مني
سليل : انت شكعد تكول
سيف : ومنو حاجي وياج اني داحجي على غزل
وسحبها يريد يبوسها مباشره خليتها ورايه مو بيدي بهيج عمر اني عمي مرحمني وتعدى عليه شلون أمن بلغريب يلمس اختي حتى لو بعدها صغيره استغرب سيف حركتي
سيف : شبيج رجفتي تره مراح اكلها
سليل : رجاءاً مالك دخل بيها ولتذب ميانه بلكلام
الحجيه : ولك عليوي انت مو گلت اريد سهيله اخذها من ابوها وكتلك گبع واخذ
سيف : حبوبه ياسهيله اسمها سليل
الحجيه : اسمها صعب يوكف على الافاد مايطلع سهيله احلى واخف انتي اسمج بعد سهيله

سليل : بيبي شكعد تكول شنو كبع واخذ
سيف : ليش عندج اعتراض اذا خطبتج
سليل : اكيد عندي واني مستحيل اتزوج وانت بلذات
سيف : ليش شبيهه شو حلو وعندي ايد ورجل وراس يعني كامل قطع الغيار مالتي مناقصني شى وفوك كل هذا ابن عائله وعندي شهاده شتريد البنيه بعد
سليل : البنيه اي بنيه مو اني وثاني شى اني لا اعرفك ولا تعرفني
سيف : عادي اقدملج نفسي سيف علي خضير اسمي مركب طبعاً وحاصل على ماجستير بدرجه امتياز بلعلوم السياسيه واستاذ جامعي وقريباً احضر الدكتوراه شتردين تعرفين بعد

سليل : انت متلاحظ نفسك تلبك لبك
سيف : مفهمت شنو معناها
سليل : يعني وسكتت بله هذا شون افهمه
سيف : احجي لتسكتين شنو معناها
سليل : معناها خفيف وتاخذ ميانه ويه الشخص بسرعه واني مااحب هيج شى
سيف : عادي من نتزوج علميني شلون تحبين اكون
سليل : اقشعر جسمي مجرد اتخيل واحد مكان سجاد وكتله بنبره خوف يازواج مستحيل اتزوج واقبل وثاني شى شلون تتزوج وحده متعرفها ومصار ايام من شفتها وشمعنه اني

سيف : خلي اريح عقلج حتى لتفكرين من يوم مادخلتي البيت هذا ورازقيه موعت اذاني بيج كل مااتصل سليل هيج وسليل هيج كولشي تسوي يوصل بلتفصيل الممل منها ومن امي
سليل : وليش على اي اساس ينقلون اخباري
سيف : اساس يردون يفرحون بأبنهم ويزوجوه واني جنت مشترط اله بنيه من بغداد مااريد كرايبي ومن شافوج وشافو اخلاقج حبو فكرت يقربوج مني ومن اول يوم اجيت بس سلمت واجيت اشوف سليل الي اگلو گلبي بيها وطلعتي تستاهلين كل الكلام الحلو النكال عليج واكثر

سليل : اسمع اخ سيف انت واهلك متهموني واني مو لعبه بيدكم تزوجوني الي تردوه بلنسبه اليه مااتزوج ورجاءاً لتتعرضلي بلرايحه والجايه تره اوصل الكلام لبابا وتصير محلوه بحقك
سيف : ممسوي شى غلط او حرام رايدج على سنه الله ورسوله وبمرور الوكت تتعرفين عليه

سليل : اعتذر طلبك مرفوض ولتوصل لبابا لان مراح يتغير قراري يله غزل نرجع للبيت
الحجيه : يمه يلسانج شاجور حبوبه يخرط ومايسكت
سيف : عادي حبوبه تمون بمرور الايام اني الاحجي وهي التسكت
سليل : يله غزل امشي وعفتهم وطلعت مخنوكه شكد غثيث ياربي

رجعت للبيت ضايجه ردت اكول لماما نهر على سيف بس خفت تكبر او توصلها لبابا اني عود اركعه على حلكه ومااخلي يحجي
الجو بارد شهر الثاني شباط ومطر مرات امد راسي جوه المطر بليل واطب حتى بس اريد ارتاح كل ما تمر الايام اشتاق اله اكثر عفت الموضوع وحاولت انسااه خلي يولي حتى ماافكر بيه

ريم : كاعده ضايجه وين اروح شفت الجهال يلعبون دعابل لبست دشداشه عندي وجواها طكيت البجامه وحطيت الربطه على راسي وطلعت جان تلزمني رشا
رشا .. وين رايحه ولج
ريم : العب بره ويه الجهال
رشا .. ولج تخبلتي بابا عيب انتي جبيره
ريم : يمعوده عطله راح تخلص واحنا محبوسين هنا قبل جنت اطلع ويه سحليه اتونس هسه محد يطلعني من البيت للمدرسه والله لعبت نفسي
رشا .. ميخالف ريمو فدووه لطلعين نسيتي اخر مره من طلعتي شصار
ريم : مانسيت وهم مشعول الصفحه ماكو حبابه ذاك علاوي ابن طالب العب شويه وياها واطب شو قريب بلحديقه ديلعب قابل بلشارع وشفتي وياها ولد عمه صغار بعمره حبابه رشاوي والله مخنوكه
رشا .. واذا كعدت سليل
ريم : بس صوفري اجي ركض حبابه حبابه وابوس برشا
رشا .. خبله والله روحي بس لتسوين مشاكل ولتنسين ذوله جهال مو بكدج يرعنه
ريم : اليوم اله اخسرهم
رشا .. طلعت مثل الطفله عليهم والله هاي ولا تكبر

علاوي العب وياك
علي : بس انتي جبيره خاله
ريم : وخل خاله ولك ياخاله بكد امك اني كلها بله انت شكد عمرك
علي : ١٠ سنوات
ريم : اني اكبر منك بسنتين باوع على طولي ولك لتباوع هيج اني اكل واطول مو مثلكم تاكلون تسمنون
علي : اي مو انتي زرافه
ريم : متضحك لك تلعب ويايه لو لا
علي : عندج دعابل

ريم : انطيني وحده ومن افوز انطيها الك ارجعها دين
وبديت العب وخسرتهم وعاط علاوي واني اضحك ضحكه النصر واكوله تشتري تره ابيع اني وجان اسمع صوته ورايه

شعلان : يعني هم بكبر البعير وهم ماخذه الدعبله منه وهم مخسرته كل دعابله وفوكاها تبيعيهن اله ولج شكد لوتيه انتي سامكو ميلحكج
ريم : وكفت على حيلي وكتله سامكو منو
شعلان : هذا واحد اخذ فلوس الناس وطفر
ريم : واني شماخذه يمه هنه كم دعبله
شعلان : عمو علاوي كم دعبله خالتك اخذت منك
ريم : حجيت بصوت ناصي خالتك بعينك
شعلان : تره سمعتج
ريم : درت وجهي منه
علي : عمو اخذت منه ٨٨ دعبله
شعلان : انا اخوك ولج رجعي دعابله

ريم : ماااا صارن مالاتي لعبتهن بجداره وماغشيت هو ميعرف يلعب
شعلان : بله مستحيتي على طولج وعمرج تلعبين ويه جاهل وتاخذين كل دعابله ولج الي بعمرج متزوجات
ريم : والله موتونه هنه متزوجات اني شعليه اشيل بدلتهن اني بعدني صغيره مالي دخل بيهن وتعال كولي انت شدخلك مو بيبي معاقبتك
شعلان : اني شعلان بأي مكان ادخل احمدي ربج ماسكطتج بعد دكتج الحقيره والي سويتي
ريم : وجان اسمع صوت رشا
رشا .. هااا ريمو اكو شى وبيدها كلاص جاي
جان مباشره يكول

شعلان : انتي مره وذبي هلمره اخاف ذيج المره سويتي نفسج عثرتي هلمره وروح الحسين اجيب قوري كامل اذبه على راسج
رشا .. قابل متقصده عثرت وكتلك العفو
شعلان : لا عبالجن ناسي السويتنه بس كولشي بوقته حلو
رشا .. خوفني ريمو تعالي ندخل ليذبحنا
شعلان : اضحكي الج يوم
ريم : خلي اروح لبيبي اكول اله شعلان اجه يسلم عليج وعطت بيبي بيبي
شعلان: رايح اعرف شنو قصدج اذا مااعلك بيوم بهاي الشجره
ريم : احد كلك اني تمره
علاوي : عمو ودعابلي
ريم : اسكت لك جبان ارجعهن كلهن بس تروح تركض لبيبي وتكول الها شعلان ضرب ريم

جان يفتح عيونه شعلان وراح يوكض علاوي ولزمه اوكف لك
علي : عمو راح ترجعلي دعابلي
شعلان : هين يابنات طه
رشا .. الله وياك نسيت الجاي اخاف عاجبك تشربه ههههههه وضربنا ايد بأيد وطلع شعلان متحلف النا
بس راح جريت ريم من شعرها يله لج ادخلي لتصير مصيبه وتگبر وهذا الخبل يرجع

ريم : الله عليج بقى بس داس واحد
رشا .. لزمتها حيل من الربطه وخنكتها ومديت ايدي بجيوبها وشمرت الدعابل كلها بلكاع هاك علاوي روح لامك وانتي ورايه
ريم : والله حرام مالاتي كسبتهم بلحلال مو خوش اخت انتي
رشا .. امشي لتكعد سليل وتشوي على راسنا بصل وجان نسمع صوت سليل وينكم واحنا ركض طبينا وسدينا الباب ولا كأن اكو شى

سليل :
ايامي صارت متشابهه انام متأخره اسهر بس افكر واكعد بعد ١٠ الصبح البنات خلصت عطلتهم ورجعو للمدارس يرحون الصبح وخطيه ماما حايره بيهن وبهوستهن حتى الصداري تغسلهن بيدها تكول مااريد ينشغلن بس خلي ينجحن وخااصه ريم بكلوريا ومبقى شى وتعطل عطله المراجعه
وبيوم كعدت من النوم غسلت وتريكت باوعت نايمات اليوم محد داوم لان قبلها مطر وطين وماعدهم دراسه هوايه بقن نايمات دورت على غزل ماكو كلت اكيد بذاك البيت ابد مااحب روحتها بس شسوي بيبي صارت روحها بيها
شويه وكعدن وتريكن كتلهن رايحه اجيب غزل وهم اشوف ماما نهر يمهم

طبيت للبيت الجبير شفت غزل تأخرت وماما نهر ماكو مو بيدي اخاف على غزل ما أمن اتركها وقت طويل دخلت من المطبخ سلمت جانت مرت خالو خضير كاعده تلف دولمه وبصفها رازقيه ومرت طالب الي لهسه مااعرف شبيهه ويانه حتى سلام متسلم تكول ماخذين ورثها
رازقيه : هله بسورها ونورها
سليل : هلو حبيبتي رزوقه فدوه صيحيلي غزل ومشفتي ماما نهر وين
زوجه طالب : كعد تخابر مدري المن تتبسبس

سليل : ضجت من حجايتها لان مبين كعد تلمح على شئ وموزين
زوجة خضير : طبي يمه البيت بيتج روحي لعمتج جوه قابل انتي غريبه وانتي شويه الزمي لسانج
سليل : مباوعت على مرت طالب لان فشلتها عمتها كدامي ولا جاوبتها بس ابتسمت بوجهه رازقيه وزوجة خالو وكلت شكراً وطبيت اعرف مكان التلفون شايفته مشيت واسمعها تكول وتالي خوما كعد تسويلك مشاكل والله ياسجاد گلبي نار هاي سندس مراح تفك ياخه منك اذا متعرف مكان البنات وين
مو سمعت اسمه لو حتى رجلي رخت ليش اسمك يكطع حتى الهوا من صدري شكد مشتاقه اله ياربي تقصدت اسمعه صوتي وصحت ماما اندارت ماما نهر

سجاد : هاي هيه مو احجي نهر هذا صوتها اميزه من الف صوت
نهر : سكتت واباوع بعيون سليل جنها تسأل عليه وهو يحجي ويكول هيه مو
نزلت السماعه من ايدي وجريتها مااعرف ليش هيج سويت يمكن لان اني اكثر وحده حاسه بيها وبلوعتها الجرب الحب وتأذه منه اكثر واحد تلجمه هيج مواقف
جريتها بأتجاهي وانطيت السماعه بيدها وشاورتها

سلمي عليه عيب كل مره يسأل عليج
حطيت السماعه على اذني ويسمع انفاسي الي بدون قصد مني كامت تعلى شلون راح اسمع صوته بعد هاي المده كلها سكتت وهو هم ساكت بس يعرف هاي اني مو ماما كل نفس يطلع منه مو يدخل اذني لا والله يدخل صدري وروحي اريد كلمة الوو تطلع صارت اصعب كلمة بحياتي انطقها جان يهمس بصوت حنين وهادئ
سجاد : شلونج بدوني

سليل : محسيت غير دموعي تصب على خدي تكول حط سجين على جرحي ولجمه
سجاد : احجي اريد اسمع صوتج
سليل : بس كلت الوو وشهكت شهكه بسيطه شكد حاولت اضم دموعي منضمت جان يعيط
سجاد : من احترك سجاد واهله هسه ليش تبجين مو تدرين نقطه ضعفي الوحيده دموعج جنت دوم اكول الج سوي التردي بس لتبجين اترجاج البيه كافيني

سليل : ليش تعيط عليه واشهك جان يهدأ نبرة صوته
سجاد : لتبجين كاافي تره واصل حدها
سليل : مسحت دموعي وجريت نفس وگلت انت شلونك بدوني
سجاد : غمضت عيني حييل واحس روحي طارت الها ومديت ايدي وطلعت الباكيت ورثت جكاره وجريت نفس قوي والله جمر الجكاره ابرد من گلبي وهمس
شحجيلج
سليل : احجي شلونك بدون سليل
سجاد : عوفج مني وشلوني لان اني نفسي مااعرف شلوني
سليل : مرتاح

سجاد : ههه تكولي مرتاح اسكتي لا اسبها گلها
سليل : شبيك وضعك مو طبيعي
سجاد : مو مهم اني بشريني وضعج شلونه حياتج خواتج احد يضايقكم
سليل : لا الْحٍمَدٍ للـّہ وضعنا هدوء اكيد تحجيلك كولشي ماما نهر
سجاد : تعودتي على المكان
سليل : يعني مو حيل شخبار البلبل مالتي والزرع خوما هملتهم
سجاد : شى من ريحتج ومااحطه بعيني
سليل : همست بهدوء اشتاقيتلك
سجاد : اااااااه يانارگلبي شوكت تبرد روحي سليل الله وياج
سليل : اوكف يعني مشتاقيت بس جاوبني
سجاد : ام وحيدها وانكتل بليله عرسه وتسأليها هم تشتاقين شراح تجاوبج هذا حالي وجوابي على سؤالج شلونك بدوني

سليل : مكدرت احس ضغط على گلبي جبير ورجعت دموعي تطلع تكول عبالك تتسابق حتى تنزل شكد كتمتها ذيج الفترات وقاومت اعلنت استسلامي واني ابجي وامسح دموعي جان ارفع راسي واشوف سيف من بعيد واكف وعاكد حاجبه وضايج ومستغرب وضعي مهتميت وكملت مسح عيووني واسمع انفاسه وجرت الجكاره ياربي حتى ريحه جكارته اشتاقيت الها شكد جنت اختنك منها شكد هسه مشتاقه الها
ماما نهر مبين راحت وعافتني احجي ويااه براحتي
همست اروح اني جر نفس من الجكاره وكاال

سجاد : جاوبيني على سؤالي هم عدهم ولد شباب البيت الي كعد تخابرين منه
سليل : استغربت سؤاله وكتله ليش
سجاد : لتردين سؤالي بسؤال اكو شباب لو لا
سليل : مبين ماما ضامه عليه واله مجان سأل كتله ماادري مااشوف بس بناتهم

سجاد : عينج على خواتج تعرفين بيهن يكمزن والاهم منهن انتي مااريد طبه وطلعه وكل شويه متنقله لمكان بين مينباع المهجوم بيتكم وادز الفلوس لابوج واكعدو وحدكم بيتكم مو بيت الغرب
سليل : الله كريم انتبهه لنفسك ولدخن هوايه
سجاد : سليل
سليل : نعم
سجاد : اذا عدهم شباب مااريد واحد يلمح خيالج
سليل : ليش جان يعيط
سجاد : شنو ليش مبين اكو شباب موو
سليل : لتعيط سجاد ولتنسى اني مو مرتك هسه وتتحكم بيه
سجاد : مو ابوج احبه لتخليني اسبه واسب العشيره كلها تره دمي فاير واذب حرگتي هسه بيج وثاني شى لتحجين شى متعرفي يله روحي حرگتي دمي فوك ماهو مسموط

سليل : يله مع السلامه وسده حيل ابتسمت على غيرته اووف مكدر يكتمها باوعت هذا شو بعده واكف مكتف ايده ومنتجي على الحايط وصافن عليه
مشيت من يمه جان يكولي
سيف : ويه منو جنتي تسولفين الي ساعه يبجيج وساعه يضحكج
سليل : ضجت من تدخله وكتله وانت شعليك ابن عمي اخويه وتاىسألني هيج سؤال

سيف : لتنسين انتي بيتنا خطار وكعد تسولفين بيتنا وبتلفونه
سليل : مناسيه ولا اهلي ناسين بس انت هم لتنسى مالك حق تدخل بحياتي واذا على التلفون مااستخدمه بعد

عفته ودكيت الباب على غرفه بيبي طبيت اشوف غزل لكيت بيبي تلعب بشعرها وتضفره مثل كل مره اعوج لان متشوف زين واني اعدل وراها خطيه احسها ترتاح من تكون غزل يمها طبيت بستها هلو بيبي
الحجيه : هله حبوبه
غزل : ماما ثلل شوفي بيبي شنو انطتني
فتحت ايدها تراجي اباوع يمكن هاي ذهب
شنو هاي بيبي

الحجيه : حبوبه ردت البسها مااشوف ليش رازقيه بليه تراجي
سليل : بيبي يارازقيه هذه غزل اختي
الحجيه : اني اسميها على بنتي لان من ريحتها انتي مالج شغل
سليل : بس هاي الترجيه ذهب
الحجيه : وشتريدين البسها خيط غير ذهب دورت على زرف اذنها ماكو مااشوف زين

سليل : لا بيبي احنا اصلاًمزارفين اذنها
الحجيه : ياااا ليش حبوبه البت جبيره وماكو ترجيه تلالي بأذنها
سليل : جريت نفس بله شكول الها اكول الها اجت ايام حسره علينه الملابس نلبس من وحده لوحده لو حسره علينه الاكل الزين حقها هي عايشه بنعيم وين تحس بينا
جريت نفس وكعدت بصفها واخذت الترجيه من ايد غزل
بيبي حبيبتي هاي منكدر ناخذها
الحجيه : ليش حبوبه

سليل : لان منكدر ندفع فلوسها
الحجيه : ومنهي گلچ على دينار هاي مني لبنتي
سليل : بيبي بابا مراح يقبل
الحجيه : بكيفه لطه اني كلمتي تمشي على الصغير والجبير يردني طه ومايقبل
سليل : مو قصه يرد
سيف : شكد تعاندين لخاطر الله
سليل : باوعت سيف دخل ولازم الباب درت وجهي منه ومجاوبت
الحجيه : هله بلحبيب
سليل : يله غزل نروح
الحجيه : اسمعي يبنت طه البت اليوم تاخذون تزرفون اذنها وتلبسوها الترجيه مااريدها فارغه
غزل : بس بيبي اني ماانزع الربطه ليش البسها انطيها لماما ثلل حلوه عليها
سليل : حضنتها وبستها لا حبيبتي نرجعها لبيبي احسن مااريد

الحجيه : بله كاعده وتشارطين بكيفج هاي الترجيه لرازقيه وانتي وخواتج ادز مرت خضير تشتريلجن
سليل : كمت وكفت وكتلها بيبي عدنا اب يشتري النا ممحتاجين شكراً يله غزل وخليت الترجيه على الجربايه جان تعيط بيبي

الحجيه : والله خوش هاي تاليها بنت ابنج يرازقيه تردني وترجع عطيتي والله الدنيا انگلبت ولك حبوبه ناديلي ابوها يضبها شوي
سليل : مكلت شى اني والله بس شفت مالها داعي وممحتاجين
الحجيه : من اكول شى لا تناقشيني بيه افتهمتي
جان يتقرب مني سيف بعدت نفسي حجه بصوت ناصي
سيف : اخذيها سليل تره بعد متخلصين والله تگلب الدنيا وتسوي بيها كرامه وكسرتي كلامها وتاليها هم تاخذيها بس بعد ما مسحت بيج البيت كله وخلتج فرچه للكل اخذيها واسكتي

سليل : باوعت عليه وكتله والله ماله داعي هاي الهوسه كلها هي حتى جبيره على غزل ومتصير بأذنها وهم اذنها ممزروفه شنسوي بيها بعد واخاف تضيع واصلاً هم بابا ميقبل
الحجيه : ولك ناديلي ابوها مو جبدي طك منها

سيف : لحظه حبوبه واشوف شلون يبوس بيدها وراسها ويكولها على كيفج راح تاخذها
كتله شنو اخذها
سيف : بطلي عناد ماطول انطت شى لأختج اخذي وضمي ومن تكبر عود تلبسها مو شرط هسه
الحجيه : لا هسه واليوم توديها انت بيدك يزرفون اذاناتها واريدها تبات بأذنها

سيف : صار حبوبه تأمرين امر
سليل : نترت بخوف وكلت متروح غزل لاي مكان وحدها ويه اي احد مجرد اتخيل غزل ويه احد غيرنا اموت بدمي واتذكر مصيبتي
سيف : زين تعالي ويانه وهم عينج على اختج وهم تغيرين جو انتي الوحيده من خواتج مطلعتي هنه يطلعن دوام ويمشن ويه ابوهن بس انتي من يوم مااجيتي موصلتي لباب
سليل : وانت شمدريك

سيف : طول ماانتي بهذا البيت حتى عدد انفاسج اعرفها
سليل : خفت من كلمته حسيت مراقبني لو بلسجن وهو سجاني
لا مااجي تجي وياك ماما نهر
سيف : تره والله مااكلج اكو قابله قريبه من عدنا زرفت اذن البنات كلهن نوديها ربع ساعه ونرجع واذا حابه افرجج على السد ونهر دجله
سليل : كتلك مااريد وهم منطلع ويه رجال غريب
سيف : براحتج ودار وجهه على بيبي وكاال
حبوبه اليوم اخذ رازقيه وعمتها ونزرف اذنها واشتري الها ترجيه اصغر هاي جبيره

سليل : اسمها غزل مو رازقيه
غزل : بيبي تحب تكولي رازقيه واني اصيح الها بيبي ريحانه
سليل : وركضت غزل بحضنها وتبوس بيها باوعت عليها طفله وشافت حنان حقها سكتت مااريد تكبر اخذت الترجيه وغزل ورجعت للبيت

جان بالي كله بكلام سيف كل ميشوفني يوترني والعطله مو خلصت المن باقي بعد ميرجع لبغداد ماعنده دوام شكد مكروه شويه وطبت ماما نهر
وين جنتي
بذاك البيت
سليل : وكعدت سولفت الصار وانطيت الترجيه لماما
نهر : هذا هو بنتي عيب منها مره جبيره ومريضة وخلف الله عليها مقصرت العصر اخذ غزل واحط الترجيه بأذنها
سليل : صدك ليش بقيتي هناك عبالي رجعتي للبيت

نهر : رحت اتفقت ويه ام طالب اخبز بعد اني
سليل : ليش صار شى
نهر : لا بس لازم مانعتمد عليهم ياامي البنيه تخبز النا والهم صار ٣ اشهر وكل مااكول الها اساعدها متقبل واليوم كلت الهم اذا مااخبز بيدي بعد مناخذ اي شى منهم حتى المسواك
سليل : اي والله زين تسوين واني اساعدج
نهر : لا حبيبتي اخاف عليج من التنور
سليل : ليش تخافين نسيتي بنص النار طبيت
نهر : ومااخليج بيوم اطبين اله
سليل : والله ياماما هنا نار وأشر على صدري
اقوى من حركت بيتنا
نهر : شكال الج

سليل : مكال بس شلع افادي وراح هذا سجاد اعرف بيه يحبني بس ميريدني
نهر : واذا تدرين هيج ياامي ليش يوميه بليل تبجين
سليل : هو بيدي والله احبه شسوه بيه باقيه احبه واشتاق اله من سمعت صوته قبل شويه زين بقيت واكفه على طولي من القهر والاشتياق
نهر : والى متى

سليل : لحد ما الله يفرجها بس انتي تخابري بأستمرار
نهر : اي شسوي يحلفني حتى يسمع اخباركم
سليل : اعرف بي شايل همنا حتى واحنا بعيدين
جان اسمع ركضه ريم
ريم : وسحليه ميخابر
سليل : يمه فزيت ولج شبيج بس تكمزين مثل الحصان
ريم : الله عليكم احجو هم سحليه يخابر يسأل عليه
نهر : لا بس يكول سجاد دوم ويايه وياخذ اخباركم من سجاد
ريم : خلي يولي الحقير بعد مااحبه صار ٣ اشهر ولا مره سأل ريمتي وريمتي خوش ريمته بعد زاعلته ولا احجي ويااه لو يموت
نهر : ميكدر ياعيني ميريد حتى يندل مكانه اخاف بيبيته او ابوه يضغطون عليه ويعرفون مكانه

ريم : يخابر من عمو سجاد والله زعلت والله
رشا .. بدت تعوي شكو
ريم : سحليه الحقير ولا يخابر
رشا .. والله زين يسوي خلص منج ومن كفخاتج غير جنتي ساحله المنطقه بيه ويوميه جايبه مصيبه اله تلكين هسه كاعد بلباب وبيده السبحه يسبح ويشكر الله البعده عنج
ريم : لا رشا لتكولين هيج
سليل : هاي شبيج من كل عقلج تبجين
ريم : اي ابجي غير صديقي وميسأل عني
نهر : ولج صوتج هسه يسمعوج عبالهم صدك صديق واحنا قابلين
ريم : اهووً ذوله العقد موتونا على كل كلمة على الحلك بابا شوكت يشتري بيت ونطلع منا

نهر : ادعوله تفض غير هي دومها مفتره عليه المكرود
جان ريم تمسح عيونها وتكول
ريم : اكولج ثلل وتغمز شلونه سجودي
سليل : انجبي سجودي شنو هازه كاروكه
ريم : يابه لتضوجين شلونه رجل اختي
نهر : ولج ريموو لسانج عيب

ريم : عفيه بيت منكدر نحجي بيه كلمة سكتت وحطت ايدها على حلكها
رشا .. شلونه عمو الوحش تتذكرين من جنتي هيج تصيحين
سليل : ابتسمت وتذكرت شلون جنت اخاف منه
ريم : هااا شو مرزلتوها لرشا
نهر : انتي بعدج صغيره عيب هاي الامور
ريم : والله مفهمت مره تكولون جبيره والي بكدج هنا متزوجات وعدهن جهال ومره بعدج صغيره اصفولكم على رأي مو راح احرك شعلان من وراكم

رشا .. هههههه الحرك اختصاصي اختي لو نسيتي
سليل : والله فد يوم يبتلي بيجن اثنينجن
اروح انام احسن اليه مااريد صوت
ريم : صار ثلل بعد اكو اوامر
سليل : لا ماكو ودخلت للغرفه حضنت المخده واتذكر انفاسه حرگت اعصابه غيرته مااكدر انسى اي تفصيله صغيره منه احبه لدرجه حتى الاذيه منه اتحملها

مرت الايام هادئه وضعنا بدا يتحسن وخاصه بابا من سمع البيت راح ينباع لكه مشتري اله
لهسه اتذكر جان يوم ٢٨ شهر الثاني سنه ٢٠٠٣ هستونا كملنا الغدا وبابا ويانه وعلى سوالف غزل وضحكها وشقه ريم وكاحتها وتصنيفات رشا كاعدين كلنا بلكاع شلنا المواعين ورحت اسوي الجاي واسمع دكت باب قويه طلع بابا ونسمع صوت شعلان نبره خشنه كاال
ابو حسام تعال ويايه
حجي طه : خير شصار
شعلان : مرتك جايبه جماعه من الحزب والمختار وجاايين عليك وخابصه المنطقه

سليل : وكع الماعون من ايدي من الخوف شجابها شتريد من عدنا اباوع على خواتي مباشره وجوهم صفرت طب بابا بدل وديطلع جان تجلب بيه ماما نهر
نهر : اجي وياك مااعوفك
حجي طه : من كل عقلج اخذج بنص الزلم
نهر : لابسه عبايه على راسي ومحتشمه ومااحجي شى بس اجي وياك كولشي يصير هي مره واني مره اقلها اني يمك
حجي طه : ميصير يانهر خليني اروح اشوف شجابها مكافي السوته اجت ورانا لهنا
نهر : احلفك بروح ابوك واخوك خليني اجي اذا ابقى هنا كاعده تجي تلكاني مجلوطه
حجي طه : استغفر الله امشي يابه امشي وانتي بابا سليل عينج على خواتج هذا الباب مينفتح بس الي ولنهر افتهمتي اي واحد متفتحي
سليل : صار بابا

نهر : اباوع على طه سوده عليه وجهه اصفر وايده ترجف نعرف اني وياهه سندس مو مثل قبل الهه سلطتها ونفوذها واني حيل اخاف على طه منها تكدر كولشي تسوي وتاخذ البنات بس شلون اندلت طريقنا
طبينا لمكان مثل الاستقبال جبير او مضيف بيهم رياجيل اثنين لابسين مدني واثنين عسكري ورجال جبير مبين المختار وسندس كاعده بينهم حاطه شال على راسها بس لابخه مكياج لمن ماله اباوع الجهه الثانيه بيها خوال طه ولدهم طالب وسيف واجه شعلان ويانه هم كعد وابن عمهم بقلبي ارجف واقرا ايات

دخل طه وسلم واشرلي اكعد كعدت مكان مثل الزاويه بدايه الباب جان يكوم طالب من مكانه قريب طه وكاال
تعال اختي مكانج
تمشيت بهدوء ومغطيه نص وجهي بلعبابه من المستحه وكعدت بصف طه
تسالمو والله بلخير وانصبت الكهوه وبدا الحجي اول محجه المختار وبقى يعرف هذا الرفيق الفلاني وهذا الرفيق العلاني سواهم صدام حسين اله شويه بس الي افتهمنا الجايين شخصيات الها وزنها بلدوله مو حزبيين عاديين صفنت والله وكت سندس الزركه تعرف هيج ناس وتكعد بنصهم وتنهي وتأمر امداك يلوكت الخليت هيج شكول تصعد علينه وتشوف نفسها ااااخ ياانعام كله منج الديصير بأخويه

شويه ونطقت وبصوت عالي
سندس : بناتي وين طه
حجي طه : نصي صوتج
سندس : ياصوت تحجي عليه وانت ماخذ بناتي
حجي طه : بناتي ومن حقي اخذهم وين مااريد
سندس : مو هي تايهه الك واني امهم مالي حق بيهم
حجي طه : لا مالج حق يوم متزوجتي ودرتي وجهج وعفتيهم مالج حق
خضير : على كيفك طه خلي نفتهم

حجي طه : شتفتهم خالي هاي وحده عافت اربع بنات حال الضيم حالهن مريضات ومتأذيات وماعدهن بيت يحويهن شمرتهن بيت امها ودارت وجهه واخذت الولد واتزوجت عود كل كم شهر تمر تشمر كم فلس وترجع لرجلها لا كالت مريضات تعبانات عايشات ميتات والبنيه شكد تحتاج الام بحياتها لو ما الله ورحمته بناتي الله اعلم شنو حالهن هسه الله رزقهن بعمه تخاف الله حطتهن على راسها وشالت مسؤوليتهن وياها اخ قليل اسمي اخويه حزام ظهري اعتبره صح مو اخويه ابن امي وابويه بس اعتبره اعز تحمل ويه اختي مسؤوليتهن ويشتغل ويصرف عليهن والشهاده لله امها الله يرحمها خلتهن بعيونها وهي مجرد كم شهر حالها حال الغريب اطب وتطلع ساعات وبعد ميشوفنها بالاشهر يابنات بابا تحجين عليهن

جان واحد من الكاعدين الجايين وياها يكول
بس يبقون بناتها وانت على اي اساس تعوف بغداد كلها وتاخذهن بدون متبلغ امهن مثل الحراميه
جان يكول سيف بصوت عالي
سيف : شنو حراميه هذا ابوهن
خضير : ابني اسكت خلي نفهم
كاعد سيف ويلوب وشعلان بيده السبحه ويفر بيده وصافن على كل كلمة تنكال بتمعن والباقي يتفرجون
حجي طه : اني مو حرامي وذني بناتي ومن حقي وين مااروح هنه ويايه
سندس : لا مو من حقك هي مو تايهه اني صحيح معايشه وياهن بس مامسموح الك تاخذهن وتضمهن صار اشهر مثل المخبله ادور عليهن وتالي تذكرت اهل ابوك ورحت هناك وسألت كالو هنا خوش كمت تعرف سوالف المجرمين من عشرتك وياهم صرت انكس منهم
حجي طه : احترمي نفسج لتشوفين ساكت لهسه

سندس : شسوي اتحداك اذا تكدر تلمس شعره مني عبالك مثل قبل
خضير : كولو ياالله يابه احنا هنا حتى نحلها ودي
سندس : ماكو ودي اني جاي اخذ بناتي
حجي طه : وبناتج ميردنج
سندس : مو بكيفك لو اعرف اخذهن غصب
حجي طه : جربي وشوفي
احد الحزبيين : لكً انت شو محد مالي عينك احنا مو كاعدين شو ماعدك احترام النا هسه اسحلك من ياختك واعرفك شلون تكعد وتحجي عدل
سيف : جرب وشوف
جان يكول ذاك بصيغه واحد مستهزأ وبخشم يابس
وانت منو بعد بله

سيف : اني ابن خاله واحد من اهل المكان الي انت كاعد بيه الي المفروض تحترمون اهله ومكانتهم مو جايين تتجاوزون لو تحجون عدل وتنصون صوتكم وبلا صيغه التهديد والامر لو مالها هاي الكعده من الاساس والتردوه سوه اريد اشوف منو ياخذ البنات من طه ومنو يلمس شعره منه ومن بناته

علت الاصوات وعياط وناس تجر طول وناس عرض وابن عمهم والمختار يحاولون يهدون الوضع اباوع على طه سوده بوجهي شفته بيضه ويرجف وخايف لتاخذ بناته منه اعرف عناد تاخذهم لو اتزوجهن وتصعد بروسهن مميته عليهن وسيف تخبل بلزايد

سندس : ذني بناتي ياناس شلون انحرم منهن انتم تخافون الله اذا تخافو لازم اطبكون ويايه مو ويااه تحرمون ام من بناتها لان هو ابن اختكم هذا الحق عدكم اذا منصفتوني والله اخذهن بلمحكمه ومن حقي وانت اركع راسك بلحايط مابقيهن يمك لو تموت
متحملت تحجي بخشم يابس ونافخه روحها
كمت وحجيت نسيت حتى وجود الرياجيل

نهر : انتي اخر وحده تحجين بلحق والحقوق اني امهن اني التعبت والربيت والكبرت هاي الايد ومديتها بس مغطايه بلعبايه الي طبطبت وغسلت ومشطت وداوت وحضنت وكبرت هاي الايد هي تعجن وتخبز للعالم حتى الم الفلس على الفلس واوكل البنات والبسهن ومااخليهن بعازه احد واولهن انتي واسهر الليل اذا وحده مريضة اخذها بحضني اكول يطبني مرض خلي اتمرض المهم تكوم وتتعافى
اني الي عفت اهلي والعز الي بيه لخاطر ضحكه من ضحكاتهن الام الي تربي وتتعب مو الي تخلف وتشمر اتقو الله واحكمو بلعدل ذني البنات شمرتهن وهنه كاتلهن المرض والقهر والكسر ومحد يمهن غير ام جبيره بلعمر كوه تعين روحها وفوكاها اخذت اخوهن وعافتهن بليه والي يحاميهن وقست گلبه عليهن ومكان ميوكف وياهن ويصير سندهن راح وحتى مشافن وجهه لسنين

واجه بمكانه رجال غريب لا بيها ولا عليها ابن خالي يشتغل ليل نهار حتى يساعدني ويودي ويجيب صيف شتا بهذا البرد والدنيا ثلج يكعد من صباحيه الله يجي ياخذهن بيده ويوديهن للمدرسه ويرجعهن حتى وهو تعبان ومريض ومشغول وعلى باب الله يعوف كولشي ويجي عليهن وينبهه ويعلم ويراقب لان بنات وكلكم تعرفون تربيه البنيه بهذا الوكت شكد صعبه
وبلصيف تصكع الشمس براسه حتى يوديهن للامتحانات ويجيبهن سنين من عمره خلصهن هو عينه براسه اخاف احد يحجي عليهن نص كلمة وروحو اسألو عن اخلاقهن بلمنطقه اتحداكم اذا اكو نص كلمة موزينه على بنات طه الكل يحلف بأخلاقهن وشرفهن وتربيتهن

انتي وين جنتي من هاي السنين غير كم يوم تجين تتعاركين وتهوسين وتذبين كم فلس وترحين حتى كم مره امج شمرت الفلوس بوجهج
اني التعبت سندس اني امهن واذا انتم تحجون بلحق والعدل والامومه كلكم مالكم حق بيهن اني الالي الحق بناتي وماانطي اضفر بيهن لو اعرف اموت وروح ابويه ومااخليج ياسندس ادمرين البنات اكثر ما دمرتيهن

انتبهت على نفسي شلون الكل صافن عليه وطه مدمعه عينه جان تكول
سندس : لو شمسوين اخذهن ما أمن على بناتي عن واحد كتل اخوه بيده اذا اخوه مهان عليه يهون عليه بناته
هنا الكل انصدم همه يعرفون بيه جان بلسجن بس مكال بسبب كتلتي لسلام كال تعاركت ويه حزبي بلمنطقه وكتب تقرير عليه وسجني ومن سمعو كلام سندس الكل فتح عينه مصدوم
سندس : هذا الكدامكم كتل اخوه علمود الورث والفلوس شلون أمن بناتي يمه
نهر : رجفت اعرف طه مراح يكدر يكول ليش كتل سلام واكيد راح يكول علمود الورث
خضير : احجي طه صدك انتي الي كتلت سلام اخوك وعلمود الفلوس
حجي طه : دنجت وگلي قهر وكلت اي اني الي كتلته

يتبع .....